အခန်း (၂၃၀၅-၂၃၀၆)

အပိုင်း(၂၃၀၅)

မဟာ ပုရောဟိတ် အမှောင်လှိုင်းတွင် တစ်လခန့်သာ အချိန်ကျန်တော့သည်။ တစ်နည်းဆိုရသော်... ပြင်ပလောကတွင် သူ၏ ရွေးချယ်ခံနှင့် ကျန်းလင်တို့ မတွေ့ဆုံမီ စက္ကန့်သုံးဆယ်ခန့်သာ လိုတော့ခြင်းပင်။

သူ၏ ရွေးချယ်ခံမှာ ပြင်ပ စီးဆင်းခြင်း အဆင့် တွင်သာ ရှိသေးပြီး မျိုးနွယ်စုအတွင်း အရှိန်အဟုန်ဖြင့် တိုးတက်နေသော်လည်း မျိုးနွယ်စုခေါင်းဆောင်ပင်လျှင် ဤပုံမှန်မဟုတ်သော မိခင်ကို ယှဉ်နိုင်မည် မဟုတ်ပေ။ အခြားသူများမှာလည်း ဤရလဒ်ကို သဘောပေါက်သွားကြသဖြင့် တိတ်ဆိတ်စွာ စောင့်ကြည့်နေကြသည်။ ဟောင်ချန်းရွှယ် နှင့် အီမန်တက် တို့သည် တရားသူကြီးများ၏ လုပ်ဆောင်ချက်များကို အားလုံးအတွက် ရှင်းပြပေးနေကြသည်။

"ကျန်းလင်ဟာ မိန်းမပျိုလေးတစ်ဦးကို အနီးအနားက မျိုးနွယ်စုတစ်ခုဆီ လိုက်ပါပို့ဆောင်ပေးဖို့ တောင်းဆိုမှုကို လက်ခံလိုက်ပါပြီ... အဲဒီမျိုးနွယ်စုက မဟာပုရောဟိတ် အမှောင်လှိုင်းရဲ့ ရွေးချယ်ခံရှိတဲ့ မျိုးနွယ်စုနဲ့ ရန်ဘက်ဖြစ်နေတာကြောင့် သူက အဲဒီအနီးအနားကို ရောက်သွားတော့မှာပါ... ဒါကို အသုံးချပြီး ဒိုင်လူကြီးတွေက တွေ့ဆုံမှုကို သေချာပေါက် စီစဉ်ပါလိမ့်မယ်"

ဟောင်ချန်းရွှယ်က ရှင်းပြသည်။

"လောကရှန့်ထို ဝေ့ဝူယင်ရဲ့ တာအိုကဒ် သက်ရောက်မှုကြောင့် သူဟာ အဲဒီရွေးချယ်ခံကို ပစ်မှတ်အဖြစ် သိမ်မွေ့စွာ သတ်မှတ်နိုင်ပါတယ်... သူဟာ သေမျိုးလောကရဲ့ တာအိုမှာ ပိုမိုမြင့်မားတဲ့ အောင်မြင်မှုတွေ ရရှိဖို့အတွက် တာဝန်တစ်ခုလို ပုံစံမျိုးကို တည်ဆောက်ထားပြီးပါပြီ... ဝေ့ဝူယင်ရဲ့ တစ်ဦးတည်းသော ရွေးချယ်ခံ ကျန်းလင်ဟာ ပဋိပက္ခတစ်ခုထဲကို သေချာပေါက် ဝင်ရောက်သွားပါလိမ့်မယ်...”

“ထပ်လောင်းပြောရရင် သူတို့ရဲ့ ကျင့်ကြံမှုအဆင့်တွေက မတူညီပါဘူး... ပုံမှန်အခြေအနေမှာတောင် ကျင့်ကြံမှုအဆင့် တစ်ဆင့်ကွာတာဟာ ကျော်လွှားဖို့ ခက်ခဲလှပါတယ်၊ ဒါပေမဲ့ ကျန်းလင်ဟာ မနာလိုစရာကောင်းလောက်တဲ့ အဂ္ဂိရတ်ထုတ်ကုန်တွေကို ရရှိထားပြီး တိုက်ကြီးမှာ ဘယ်သူမှ မယှဉ်နိုင်တဲ့ အခြေခံအုတ်မြစ်ကို ပိုင်ဆိုင်ထားတာပါ..."

အီမန်တက်က စိတ်လှုပ်ရှားစွာ ဖြည့်စွက်ပြောကြားလိုက်သည်။ ထို့နောက် သူမက မဟာပုရောဟိတ် အမှောင်လှိုင်းထံသို့ အာရုံစိုက်လိုက်ပြီး ဆက်လက် ကြေညာလိုက်လေသည်။

"ဒီလို ကွာခြားချက်မျိုးနဲ့ဆိုရင် ဘယ်လို ပဋိပက္ခမျိုးမဆို ဒီရွေးချယ်ခံအတွက်တော့ ကံဆိုးတဲ့ ရလဒ်ပဲ ထွက်လာမှာပါ"

"မဟာပုရောဟိတ် အမှောင်လှိုင်းမှာ ကစားစရာ ကဒ်တစ်ခုခု ရှိနေရင်တော့ တစ်မျိုးပေါ့... သူ့ရဲ့ ဝှက်ဖဲက အသက်ဝင်လာမလားပဲ"

ဟောင်ချန်းရွှယ်က စိတ်လှုပ်ရှားမှု မြှင့်တင်ရန်အတွက် စနောက်လိုက်သည်။ မဟာပုရောဟိတ်တစ်ဦးကို၊ အထူးသဖြင့် ညဉ့်ဦးယံ နိမိတ်ဖတ်သူများ အဖွဲ့အစည်းမှ ဆရာကြီးတစ်ဦးကို မည်သူမျှ လျှော့မတွက်ရဲကြပေ။

မဟာပုရောဟိတ် အမှောင်လှိုင်း၏ ဖြူရော်နေသော မျက်နှာထားကို ဖုံးကွယ်ရန် ခက်ခဲလှသလို၊ အချိန်ကုန်ဆုံးလာသည်နှင့်အမျှ သူ၏ နှလုံးခုန်သံမှာလည်း ပိုမို မြန်ဆန်လာခဲ့သည်။ တစ်ဖက်တွင်မူ ဝေ့ဝူယင်မှာ တည်ငြိမ်စွာ ပြုံးလျက်၊ ဓားပြအချို့နှင့် တိုက်ခိုက်နေသည့် ကျန်းလင်ကို စောင့်ကြည့်နေသည်။

ထိုဓားပြများမှာ ဓားပြအစစ်များ မဟုတ်ပဲ စားဝတ်နေရေးကြောင့် ထိုအခြေအနေကို အရေးပေါ် ရွေးထားရသည့် ပြည်သူများ ဖြစ်သည်။ သူမသည် သူမ၏ ဓားကို အသုံးမပြုဘဲ သူတို့အား ကရုဏာသက်ကာ ဘဝသစ်တစ်ခုအတွက် ဒုတိယအကြိမ် အခွင့်အရေး ပေးခဲ့သည်။ သူမ၏ တရားမျှတသော စိတ်နေစိတ်ထားမှာ မှားသည်ဖြစ်စေ၊ မှန်သည်ဖြစ်စေ ဝေ့ဝူယင်ကမူ သဘောကျသည်။ သူမသည် သူမကို စော်ကားသူတိုင်းကို သတ်ဖြတ်ရမည်ဟူသော ခံစားချက်မပါသည့် လူသတ်သမားလမ်းစဉ်သို့ ကျဆင်းသွားခြင်း မရှိပေ။ သူမသည် အသက်ဇီဝကို တန်ဖိုးထား နားလည်မှုဖြင့် ကိုယ်ပိုင် ကျင့်ကြံခြင်း နှလုံးသားကို တည်ဆောက်နေခြင်း ဖြစ်သည်။

ဝေ့ဝူယင် ကိုယ်တိုင်သည်လည်း အခြားသူများ၏ အသက်အပေါ် ထားရှိသော သဘောထားမှာ အလွန်အမင်း ရက်စက်ကြမ်းကြုတ်သူ မဟုတ်ပေ။ သူသည် ရန်သူအားလုံးကို သနားညှာတာမှုမရှိဘဲ အမြစ်ပြတ် သုတ်သင်သူ မဟုတ်ခဲ့ပေ။ အကယ်၍ ထိုသို့သာ ဖြစ်ခဲ့လျှင် သူတွေ့ဆုံခဲ့သော ကောင်းချီးခံ အများအပြားမှာ မိမိအကျိုးစီးပွားအတွက် သေဆုံးသွားခဲ့ကြပေလိမ့်မည်။

သူ၏ ဆေဘာ ရည်ရွယ်ချက်သည် ပဋိပက္ခကို ဓားသွားဖြင့် အဆုံးသတ်ရန် ကြိုးစားသော်လည်း အထိန်းအကွပ်မဲ့နေသည်တော့ မဟုတ်ပေ။ ဤအထိန်းအကွပ်ကြောင့်ပင် သူ ဆေဘာကို ဆွဲထုတ်လိုက်တိုင်း ထိုသို့သော ခွန်အားနှင့် နက်နဲသော အဓိပ္ပာယ်ကို ပေးစွမ်းနိုင်ခြင်း ဖြစ်သည်။ ဘုရင်၏ ကိုယ်ရည်ကိုယ်သွေးမှာလည်း လိုအပ်မှသာ ထုတ်ဖော်သည့် စိတ်ဆန္ဒဖြင့် ပုံဖော်ထားခြင်း ဖြစ်သည်။ ၎င်းသည် ဓားအိမ်မှ မထွက်ရခြင်းအတွက် မည်သည့်အခါမျှ မညည်းညူသော်လည်း လိုအပ်ချိန်တွင်မူ မတွန့်မဆုတ်ဘဲ ရပ်တည်ကာ သူ၏ ခွန်အား ၁၀၀ ရာခိုင်နှုန်းကို အပြည့်အဝ ထုတ်ဖော်ပေးလေ့ရှိသည်။

တစ်ဖက်တွင်မူ ခရာတိုမှာ အလွန်အမင်း မာနကြီးပြီး အားနည်းနေချိန် သို့မဟုတ် အသုံးမပြုခံရချိန်များတွင် ကလေးကဲ့သို့ ဂျီကျတတ်သလို၊ ကောင်းကင်ဘုံနှင့် ငရဲဘုံကိုပင် သူ၏ မျက်စိထဲတွင် အထာ မထားပေ။ သို့သော်လည်း သူသည် လိုအပ်ချိန်တိုင်းတွင် အားကိုးရသူတစ်ဦး ဖြစ်သည်။

ဝေ့ဝူယင် ခရာတိုကို ကြည့်ကာ ပြုံးမိ၏။ ထိုကောင်လေးသည် နဂါးပုံသဏ္ဌာန် နတ်ဘုရား ကိုယ်ပွားလေးများကို အသုံးပြုကာ ဟင်းလင်းပြင် အထွတ်အထိပ် သူတော်စင်များနှင့် ကစားနေလေသည်။

အမှန်တရားမှာ ရိုးရှင်းလှပါသည်။ လျှို့ဝှက်စာချုပ်အားလုံးမှာ သူ၏ လက်ထဲတွင် ရှိနေခြင်းပင်။

ဟင်းလင်းပြင်သည် ခရာတို အတွက် အိမ်ကွင်းပင် ဖြစ်သည်။ ခရာတို၏ လက်ရှိကျင့်ကြံမှုမှာ လျှို့ဝှက်ဒဏ္ဍာရီ အမှတ်အသား၏ ပထမအဆင့်တွင်သာ ရှိသေးသော်လည်း ၎င်း၏ သန္ဓေပြောင်း အာကာသနှင့် အချိန်ကာလ ဥပဒေသများ၊ အခြားသော စွမ်းအားများနှင့် ပေါင်းစပ်လိုက်သောအခါ ဤပတ်ဝန်းကျင်သည် သူ့အတွက် အားသာချက် အရှိဆုံးနေရာ ဖြစ်လာခဲ့ပေသည်။

...

တံတွေး မြိုချလိုက်သံတစ်ခု ထွက်ပေါ်လာ၏။ ထိုအသံမှာ လေးလံကာ တင်းမာလှ၏။ အခြားသော ကစားသမားများအားလုံးမှာ တိတ်ဆိတ်နေကြပြီး သူတို့၏ အာရုံများကို စင်မြင့်ကမ္ဘာထံသို့ ပို့လွှတ်ထားကြသည်။ ဖီဆန်နဂါးတိုက်ကြီးမှာ ယခုအချိန်တွင် ရပ်တန့်နေသော အခြေအနေ ၌ ရှိနေသည်။ မဟာပုရောဟိတ် အမှောင်လှိုင်း ၏ လက်များမှာ တင်းတင်းဆုပ်ထားလျက် ကျောပြင်မှ ချွေးများ စီးကျနေ၏။ သူ၏ ခံစားချက်ကို အမှန်တကယ် နားလည်ရန် ခက်ခဲလှသော်လည်း သေးငယ်သော ကမ္ဘာတစ်ခုအတွင်း၌ အေးခဲနေသည့် သေမင်းကို စိုက်ကြည့်နေရသကဲ့သို့ပင်။ ၎င်းမှာ အလွန်ပင် နာကျင်စရာကောင်းသော အတွေ့အကြုံ ဖြစ်သည်။

ဤသို့ ရပ်တန့်ထားခြင်းမှာ လျှို့ဝှက် - တော်ဝင်တိုက်ပွဲ အတွင်းရှိ ရွေးချယ်ခံ နှစ်ဦးမှာ တစ်ဦးနှင့်တစ်ဦး ဆုံတွေ့သွားကြသောကြောင့် ဖြစ်သည်။ ၎င်းကို သွင်းအားစုကာလ ဟု ခေါ်ဆိုပြီး တရားသူကြီးများက ကစားသမားများကို မေးခွန်းတစ်ခုစီ မေးမြန်းနိုင်ရန် သတ်မှတ်ထားခြင်း ဖြစ်သည်။

"သွင်းအားစုကာလ စတင်ပါပြီ... လျှို့ဝှက်ကဒ် အသုံးပြုချင်ပါသလား... ဆုံးဖြတ်ဖို့အတွက် တစ်ဆယ့်ငါးမိနစ် အချိန်ရပါမယ်"

စွန်းကျားကျန်း က ကြေညာလိုက်သည်။ သူ၏ အသံမှာ ကျယ်လောင်စွာ ပေါက်ကွဲနေပြီး မဟာပုရောဟိတ် အမှောင်လှိုင်း၏ နားထဲတွင်မူ လှောင်ပြောင်သံကဲ့သို့ပင်။ သူ၏ ဘဝတွင် ပထမဆုံးအကြိမ်အဖြစ် ဘီလျံပေါင်းများစွာသော မျက်လုံးများ၏ ဖိအားကို ခံစားနေရသည်။ အားလုံးက စောင့်ကြည့်နေကြသည်။ အားလုံးက စောင့်ဆိုင်းနေကြသည်။

သူ၏ အသက်ရှူသံမှာ ပိုမိုလေးလံလာသလို မျက်လုံးများမှာလည်း ပိုမိုနီမြန်းလာခဲ့သည်။ ဤတစ်ဆယ့်ငါးမိနစ် အသက်ရှူချခွင့်မှာ ကောင်းကင်ဘုံက ပေးသကဲ့သို့ ရှိသော်လည်း ငရဲခန်းသို့ ရောက်နေသကဲ့သို့ပင်။ သူသည် ညဉ့်ဦးယံ နိမိတ်ဖတ်သူများများ ထံသို့ အလွန်အရေးကြီးသော သဝဏ်လွှာများကို ဒေါသတကြီး ပေးပို့လိုက်သည်။ ၎င်းမှာ သတိပေးချက်ရော နောက်ဆုံးအခြေအနေ တင်ပြချက်ပါ ဖြစ်သည်။ ရိုးရိုးရှင်းရှင်း ပြောရလျှင် "အခုလုပ်မလား၊ ဒါမှမဟုတ် အကုန်ပြီးသွားပြီလား" ဟု မေးလိုက်ခြင်းပင်။

ဟင်းလင်းပြင်အတွင်း၌မူ လျှို့ဝှက်စာချုပ်ကို ရှာဖွေရန် တာဝန်ပေးထားသော အနက်ရောင်ဝတ်ရုံခြုံ အမျိုးသမီး အထွတ်အထိပ် သူတော်စင်သည် သူမ၏ လှုပ်ရှားမှုများကို ရပ်တန့်လိုက်သဖြင့် စူးဟောင်ရန် နှင့် ပိန်လှီသော အမျိုးသမီး အထွတ်အထိပ် သူတော်စင်တို့၏ အာရုံစိုက်မှုကို ရရှိသွားသည်။ ဟင်းလင်းပြင်အတွင်း၌ ဖြစ်သော်လည်း သူမ၏ နှလုံးခုန်သံနှင့် ဝိညာဉ်တုန်ခါသံများကို သူတို့ ကြားနိုင်နေကြသည်။

"စပြီလား"

စူးဟောင်ရန်က အသက်ရှူသံ ပြတ်တောင်းပြတ်တောင်းဖြင့် မေးလိုက်သည်။ သူတို့၏ ကျင့်ကြံခြင်းအခြေခံမှာ နတ်ဘုရားကဲ့သို့ပင် ဖြစ်သော်လည်း ဟင်းလင်းပြင်ဆိုသည်မှာ သူတို့၏ ခွန်အားနှင့် ယှဉ်ပြိုင်နိုင်သော နယ်မြေဖြစ်သဖြင့် သာမန်လူတစ်ယောက်က သမုဒ္ဒရာကြီးကို ဖြတ်ကျော်ရန် ကြိုးစားနေသကဲ့သို့ပင် ခက်ခဲလှသည်။ အကယ်၍ သူတို့သာ တစ်ဆင့်မျှ ပိုမို သန်မာခဲ့ပါက ဤစာချုပ်ကို ရှာဖွေခြင်းမှာ လက်ဖျစ်တစ်ချက်တီးရုံနှင့် ပြီးမြောက်နိုင်သော ကိစ္စပင်။

ကံမကောင်းစွာဖြင့်... ကျင့်ကြံခြင်းမှာ ခက်ခဲလှပေသည်။

ကောင်းကင်ငယ် တမန်တော် အဆင့်ထက် ကျော်လွန်ရန် ကြိုးစားခြင်းမှာ ထိုအဆင့်သို့ ရောက်ရှိရန်ထက် အဆတစ်ထောင်ခန့် ပိုမိုခက်ခဲလှသည်။ ၎င်းမှာ အစောပိုင်းနှစ်များက အခြေခံအားနည်းချက်များကြောင့် ဖြစ်စေ၊ အရင်းအမြစ် နည်းပါးမှုကြောင့်ဖြစ်စေ... သူတို့၏ ကံကြမ္မာပင် ဖြစ်သည်။ ကျင့်ကြံခြင်း လူ့အဖွဲ့အစည်း၏ အထွတ်အထိပ်သို့ ရောက်ရှိပြီးနောက် ကျင့်ကြံသူ အများစု ကြုံတွေ့ရသော ကံကြမ္မာပင် ဖြစ်သည်။

အစွမ်းကုန် သန့်စင်ခြင်း ဂလက်ဆီ အတွင်း၌ ကောင်းကင်ရှန့်ထို အဂ္ဂိရတ်ပညာရှင် ၂၄ ဦးခန့် ရှိနေသော်လည်း အများစုမှာ နိမ့်ကျသော အဂ္ဂိရတ် မျိုးဆက်များကို ပိုင်ဆိုင်ထားကြသူများသာ ဖြစ်ကြသည်။ ထို့ပြင် ကောင်းကင်ရှန့်ထို အဆင့်ရှိ ဆေးဝါးများမှာ ထုတ်လုပ်ရန် အလွန်ခက်ခဲသလို အချိန်လည်း အလွန်ပေးရသည်။ အများပြည်သူ သိရှိထားသော အဆင့်မြင့် လျှို့ဝှက်ကောင်းကင်အဆင့် ထုတ်ကုန်အများစုမှာလည်း အထွတ်အထိပ် သူတော်စင်များအတွက် အသုံးမဝင်သလောက် ဖြစ်နေတတ်သည်။

ကောင်းဟန် သည် အဆိပ်ဆေးဝါး ဖော်စပ်မှုတွင် ကျွမ်းကျင်သူဖြစ်သည်။ သူ၏ အဆိပ်ရည်များသည် ဂြိုဟ်တစ်ခုလုံး သို့မဟုတ် ကြယ်တစ်လုံးလုံးကို ဆွေးမြည့်ပျက်စီးစေကာ လောကဝိညာဉ် သို့မဟုတ် ကြယ်တာရာဝိညာဉ် ဖြစ်ပေါ်လာမည့် အခွင့်အလမ်းများကို ဖျက်ဆီးပစ်နိုင်သည်။ သူသည် ကောင်းကင်အဂ္ဂိရတ် ရှန့်ထို ဖြစ်လာနိုင်သော်လည်း သူ၏ အစဉ်အလာမှာ အဆိပ်ဆေးဝါးများသာ ဖြစ်နေပေလိမ့်မည်။ ဤအချက်က ကျင့်ကြံခြင်း၏ ခက်ခဲမှုကို ပိုမိုပေါ်လွင်စေသည်။ ပိန်လှီသော အမျိုးသမီး အထွတ်အထိပ် သူတော်စင်သည်ပင် နှစ်ပေါင်း သုံးသိန်းကျော် ကျင့်ကြံခဲ့သော်လည်း သူမ၏ ပဲ့တင်ထပ်ဝိညာဉ်အဆင့် အခြေခံကို ခိုင်မာအောင် မလုပ်ဆောင်နိုင်သေးပေ။

အဘယ်ကြောင့်နည်း။

အကြောင်းကား မိုးကုပ်စက်ဝိုင်း သန့်စင်ခြင်း အဂ္ဂိရတ် ရှန့်ထိုမှာ ကျင့်ကြံခြင်း တိုးတက်မှုကို အထောက်အကူပြုသော ထုတ်ကုန်များတွင် အထူးပြုကျွမ်းကျင်သူ မဟုတ်သောကြောင့်ပင်။

***

အပိုင်း(၂၃၀၆)

"ငါ့တို့မှာ အချိန်အများကြီး မကျန်တော့ဘူး... သွင်းအားစုကာလ စတင်နေပြီ..."

ညဉ့်ဦယံ နိမိတ်ဖတ်သူများ အဖွဲ့မှ အထွတ်အထိပ် သူတော်စင် အမျိုးသမီးက စူးဟောင်ရန်အား ပြန်ပြောလိုက်သည်။ သူမ၏ အသံထဲတွင် ကြောက်ရွံ့မှုများ ကိန်းအောင်းနေသည်ကို သူတို့ ခံစားမိကြသည်။ အမှန်စင်စစ် နိမိတ်ဖတ် ပညာရှင်များသည် အသုံးမကျသူများ မဟုတ်ချေ။ သူတို့သည် လျှို့ဝှက်စာချုပ်များ၏ အစအနများကို အကြိမ်ကြိမ် တွေ့ရှိခဲ့ကြသော်လည်း ပတ်ဝန်းကျင် အခြေအနေကြောင့် ၎င်းတို့အား ဖမ်းဆုပ်နိုင်ခြင်း မရှိခဲ့ကြပေ။

ပိန်လှီသော အမျိုးသမီး အထွတ်အထိပ် သူတော်စင်မှာမူ သူမ၏ အခြေအနေအပေါ် သနားသလိုလို၊ ဝမ်းသာသလိုလို ခံစားနေရသည်။ သူမသည် လျှို့ဝှက်ပြစ်ဒဏ်တစ်ခုကို ရင်ဆိုင်ခဲ့ရပြီး နှစ်ပေါင်းများစွာ စုဆောင်းခဲ့သော ကျင့်ကြံမှုများကို တစ်ပြိုင်နက်တည်း ဆုံးရှုံးခဲ့ရကာ ဒဏ်ရာလည်း ရရှိခဲ့သည်။ ထို့ပြင် ဤအနက်ရောင်ဝတ်ရုံခြုံ အမျိုးသမီးသည်လည်း ဟင်းလင်းပြင်အတွင်း၌ ရှိနေစဉ် လျှို့ဝှက်ပြစ်ဒဏ်ကို ရင်ဆိုင်ရန် မဝံ့ရဲပေ။

၎င်းမှာ မုန်တိုင်းထန်နေသော ပင်လယ်ပြင်တွင် ပေါက်ပြဲနေသော လှေငယ်လေးတစ်စင်းဖြင့်၊ ရေအောက်၌ သွေးဆာနေသော ငါးမန်းများ စောင့်ဆိုင်းနေချိန်တွင် မုန်တိုင်းကို ရင်ဆိုင်ရသကဲ့သို့ပင် ဖြစ်လိမ့်မည်။ စူးဟောင်ရန်က သက်ပြင်းချလိုက်၏။

"ပြစ်ဒဏ်စတာနဲ့ လျှို့ဝှက်စာချုပ်က သူ့အလိုလို ပေါ်လာလိမ့်မယ်... အဲဒီအချိန်ကျရင် ငါတို့ မင်းကိုယ်စား အဲဒါကို အရယူပေးပါ့မယ်"

သူက နှစ်သိမ့်စကား ပြောလိုက်သော်လည်း ထိုအမျိုးသမီးကမူ စူးဟောင်ရန်မှာ အပိုတွေ ပြောနေခြင်းသာ ဖြစ်ကြောင်း သိထားသည်။ အကယ်၍ သူတို့ စာချုပ်ကို ရှာတွေ့ခဲ့လျှင်ပင် သူတို့ထံမှ အဖိုးတန်အရာများကို အဆုံးစွန်ထိ ခြိမ်းခြောက် တောင်းယူကြပေလိမ့်မည်။

သူတို့ မိုးကုပ်စက်ဝိုင်း သန့်စင်ခြင်း မျှော်စင်ကို လုပ်ခဲ့သလိုမျိုးပင်။

သို့သော်လည်း ဤအချက်က သူမ၏ ကြောက်ရွံ့မှု အတော်များများကို လျော့ပါးသွားစေသည်။ သူမ ခေါင်းညိတ်ပြလိုက်၏။ ထို့နောက် သူမသည် လျှို့ဝှက်ပြစ်ဒဏ်ကို ရင်ဆိုင်ရန် ကြိုတင်ပြင်ဆင်မှုများ ပြုလုပ်ရန် ကြိုတင်ထွက်ခွာသွားရန် ဆုံးဖြတ်လိုက်တော့သည်။ သူမသည် ဘေးအန္တရာယ်ကို သူမ၏ အခိုင်အမာ ခံတပ်အတွင်း၌သာ ရင်ဆိုင်လိုခြင်း ဖြစ်သည်။

သူမက ထွက်ခွာရန် သင့်တော်သော ဟင်းလင်းပြင်စီးကြောင်းကို ရှာဖွေရင်း မထွက်ခွာခင် လေးလံသည့် သက်ပြင်းတစ်ချက်ကို ချလိုက်လေသည်။

"အင်အားကြီးပြီး ရည်ရွယ်ချက်ကို မသိရတဲ့ နယ်ခြားသားတစ်ယောက်က ဒီကို ရောက်လာခဲ့တယ်... ဒါပေမဲ့ ငါတို့ကိုယ်ငါတို့ ပျက်စီးရာပျက်စီးကြောင်း လမ်းပေါ် ဆွဲတင်ခဲ့တာကတော့ ငါတို့ကိုယ်တိုင်ပဲ ဖြစ်နေတယ်"

"..."

စူးဟောင်ရန်။

"..."

ပိန်လှီနေသော အမျိုးသမီး အထွတ်အထိပ် သူတော်စင်။

"..."

နိမိတ်ဖတ် ပညာရှင်များ။

သူမ ထွက်ခွာသွားခဲ့လေပြီ။ အချိန်နှင့် အာကာသ၏ မတူညီသော စီးကြောင်းတစ်ခုအတွင်းသို့ ဝင်ရောက်ကာ သူမ၏ ပစ္စုပ္ပန် ဆီသို့ ပျံသန်းသွားခဲ့သည်။

စူးဟောင်ရန်က ခေါင်းခါလိုက်၏။ သူ၏ စိတ်ထဲတွင် ထျန်းရှီယာ ၏ ပုံရိပ် ပေါ်လာကာ သူမ၏ နူးညံ့သော အထိအတွေ့ကို ပြန်လည်အမှတ်ရရင်း စိတ်ကို ပြန်လည်တည်ငြိမ်အောင် ထိန်းလိုက်သည်။

"မြန်မြန်လုပ်ကြစို့..."

...

ဟင်းလင်းပြင်အတွင်း၌ ကျောက်ချထားသကဲ့သို့ တည်ရှိနေသော အသစ်ဖန်တီးထားသည့် သီးခြားကမ္ဘာငယ်တစ်ခုအတွင်း၌ အနက်ရောင်ဝတ်ရုံခြုံထားသော ပုံရိပ်တစ်ခု ပေါ်လာသည်။ ကောင်းကင်ဘုံ ကျင့်ကြံခြင်းစွမ်းအင်များက သူမ၏ ခန္ဓာကိုယ်ပတ်လည်တွင် ပါးလွှာပြီး မှောင်မိုက်သော အရိပ်ကွယ် အလွှာတစ်ခုကို တည်ဆောက်ထား၏။ သူမက ချက်ချင်းပင် သတိအနေအထားသို့ ပြောင်းလဲကာ အော်စသ်လိုက်၏။

"ထွက်လာခဲ့စမ်း"

သူမ၏ စကားသံမှာ တိုးသော်လည်း မိုးကြိုးသံကဲ့သို့ ဟိန်းထွက်သွားပြီး ထိုနယ်မြေ၏ နံရံများကို တုန်ခါသွားစေကာ ပြိုလဲလုနီးပါး ဖြစ်သွားစေသည်။ အနည်းငယ်မျှ ခွန်အားထပ်သုံးလိုက်ရုံနှင့် ဤနေရာမှာ ပျက်စီးသွားမည်ကို သူမ သိပေသည်။ ဤနယ်မြေမှာ ခိုင်မာမှု မရှိသလို မည်သည့် လျှို့ဝှက်ကျင့်စဉ် သို့မဟုတ် အစီအရင်မျိုးမှလည်း ရှိမနေပေ။

၎င်းမှာ ရိုးရှင်းသော အာကာသနယ်မြေတစ်ခုသာ ဖြစ်သော်လည်း ထူးခြားချက်မှာ ဟင်းလင်းပြင်အတွင်း၌ မည်သို့ ကျောက်ချရပ်တည်နေသည် ဆိုခြင်းပင်။ သူမ အချိန်မျက်လုံးျဖြင့် ကြည့်လိုက်သောအခါ ဤနေရာကို ဖန်တီးထားသည်မှာ ရက်အနည်းငယ်သာ ရှိသေးကြောင်း၊ နယ်ခြားသားက ထူးဆန်းသော တည်ရှိမှုဖြစ်သည့် စုရီကို စိန်ခေါ်ခဲ့ချိန်ထက် အနည်းငယ်မျှသာ ပိုစောကြောင်း သိလိုက်ရသည်။

"ဒီမှာပါ"

ပုံရိပ်တစ်ခုမှာ ထိုနေရာတွင် အမြဲရှိနေခဲ့သကဲ့သို့ပင် ရုတ်တရက် ပေါ်ထွက်လာသည်။ နတ်ဘုရားတစ်ပါးကဲ့သို့ ခန့်ညားသော မျက်နှာထားနှင့် ကြယ်တာရာများကဲ့သို့ တောက်ပသော မျက်လုံးများမှာ ထိုသူ၏ မည်သူမည်ဝါဖြစ်ကြောင်း သက်သေပြနေသည်။

ဝေ့ဝူယင်...

အာရုဏ်ဦး အဂ္ဂိရတ် ရှန့်ထို...

အနက်ရောင်ဝတ်ရုံခြုံ အမျိုးသမီး၏ မျက်လုံးများမှာ အနည်းငယ် ပြူးကျယ်သွားပြီးနောက် ပြန်လည် မှေးစပ်သွားသည်။ ဤအရာမှာ အစစ်အမှန် ဝိညာဉ်မပါဝင်သည့် ထူးဆန်းသော ကိုယ်ပွားကျင့်စဉ်တစ်ခု ဖြစ်ကြောင်း သူမ သိလိုက်သည်။

"မင်းရဲ့ ညဉ့်ဦးယံ ဝိညာဉ်ကိုယ်ပွားကို မင်းနဲ့အတူ ယူလာခဲ့သလား... သူက ငါမျှော်လင့်သလောက် တော်တဲ့လူဆိုရင် ဒီလိုဖြစ်လာမှာကို သူ ကြိုမြင်နေသင့်တယ်"

ဝေ့ဝူယင်က ပြောလိုက်သည်။ ရုတ်တရက်ဆိုသလို ထိုအမျိုးသမီး၏ ရင်အုပ်ကြားမှ ပြင်းထန်သော အမှောင်ထု အော်ရာများ ပါဝင်သည့် ဝိညာဉ်အလင်းတန်းတစ်ခု ဖြာထွက်လာ၏။ ၎င်းက ညဉ့်ထက် ပိုမိုမှောင်မိုက်ကာ အဆုံးမဲ့ချောက်ကမ္ဘာကဲ့သို့ နက်နဲသော လူသားပုံသဏ္ဌာန်တစ်ခုအဖြစ် ပြောင်းလဲသွားခဲ့သည်။

"..."

"ကောင်းပြီလေ... မင်းက အသုံးမကျတဲ့လူ မဟုတ်ဘူးပဲ"

ဝေ့ဝူယင်က ရယ်မောရင်း ပြောလိုက်သည်။

"ကဲ... စကားပြောကြရအောင်..."

...

တစ်ဆယ့်ငါးမိနစ် ကြာပြီးနောက်...

ကျန်းလင် နှင့် မဟာပုရောဟိတ် အမှောင်လှိုင်း၏ ရွေးချယ်ခံ တို့အကြား ပဋိပက္ခ စတင်လေတော့သည်။ ကျန်းလင်က အပိုင်းအစ တစ်ခုကို ပြန်လည်ရယူရန်အတွက် သူ၏ အသိစိတ် ပင်လယ် အတွင်းသို့ ဝင်ရောက်ခွင့်ပေးရန် ယုတ္တိမရှိသော တောင်းဆိုမှုကို ပြုလုပ်ခဲ့သည်။ ၎င်းမှာ သူ၏ လျှို့ဝှက်ချက်အားလုံးကို ဖွင့်ပြရန်နှင့် သူ၏ အသက်ကို သူမ၏ လက်ထဲသို့ အပ်နှံရန် တောင်းဆိုခြင်းပင် ဖြစ်သည်။

သိသာပါသည်၊ သူ ငြင်းဆိုခဲ့သည်။ အခြားသူများလည်း ထိုနည်းတူပင်။ အတင်းအကျပ် ပြုလုပ်ပါက ထိုသူ သေဆုံးသွားမည်ကို သူမ သိထားသဖြင့် သူမသည် အခြားသူများအား မိမိဆန္ဒအလျောက် ခွင့်ပြုရန်နှင့် အသက်ရှင်သန်နိုင်ခြေကို မြှင့်တင်ရန် အမြဲတမ်း တောင်းဆိုလေ့ရှိသည်။ လူတစ်ဦးက သဘောတူခဲ့သော်လည်း ထိုသူမှာလည်း အသိစိတ်ပင်လယ် ပြိုလဲကာ မလွဲမသွေ သေဆုံးသွားခဲ့ရသည်။

ယခုအခါ သူမသည် ရှေ့ဆက်မည်လား သို့မဟုတ် ရပ်တန့်မည်လားဟူသော ပဋိပက္ခနှင့် ရင်ဆိုင်နေရသည်။ ကျန်းလင်သည် သမီးငယ်လေး၏ အသက်မှလွဲ၍ ကျန်အရာအားလုံးကို စတေးကာ သူမ၏ ကျင့်ကြံခြင်း နှလုံးသားကို ခိုင်မာအောင် ပြုလုပ်ရန် ဆုံးဖြတ်ခဲ့သည်။ သူမ ရပ်တန့်၍ မရပေ။

အမှောင်လှိုင်း၏ ရွေးချယ်ခံမှာ သူ၏ မျိုးနွယ်စုကို အကူအညီတောင်းခဲ့သော်လည်း အနည်းငယ် သေဆုံးကုန်ပြီးနောက် သူတို့က သူ့ကို ပြန်ရောင်းစားလိုက်ကြသဖြင့် ရွေးချယ်ခံမှာ မိသားစုမရှိဘဲ တစ်ကိုယ်တည်း ကျန်ရစ်ခဲ့သည်။ အပြန်အလှန် ပျက်စီးစေရန် မိမိ၏ ကိုယ်ပိုင် ဝိညာဉ်ကို ဖောက်ခွဲရန် ကြိုးစားရင်း နောက်ဆုံးအကြိမ် ဟိန်းဟောက်ပြီးနောက် သူ အပိုင်းပိုင်း ပိုင်းဖြတ်ခံရသည်ကို အားလုံး စောင့်ကြည့်နေခဲ့ကြသည်။ ကံမကောင်းစွာဖြင့် ကျန်းလင်မှာ အလွန်ပင် မြန်ဆန်လှသည်။

သူ့ခေါင်း ပြတ်သွားခဲ့လေပြီ။ ခေါင်းဖြတ်သတ်ခံလိုက်ရခြင်းပင်။

ပထမဆုံးသော ရွေးချယ်ခံ သေဆုံးသွားသည်ကို ဘီလျံပေါင်းများစွာသော လူများက စောင့်ကြည့်နေခဲ့ကြသည်။ ထို့နောက်တွင်တော့ အားလုံး၏ မျက်လုံးများသည် မဟာပုရောဟိတ် အမှောင်လှိုင်း ထံသို့ ရောက်ရှိသွားကြတော့သည်။

...

မဟာပုရောဟိတ် အမှောင်လှိုင်း၏ မျက်ဝန်းအိမ်များမှာ ထိတ်လန့်မှုကြောင့် ကျုံ့ဝင်နေပြီး အသက်ရှူသံများမှာလည်း မြန်ဆန်နေကာ လက်ဖဝါးများမှာ တုန်တုန်ယင်ယင်ဖြင့် ချွေးများ တရစပ် စီးကျနေသည်။ သူ၏ အသိစိတ်ပင်လယ်အတွင်း၌မူ လျှို့ဝှက်ပြစ်ဒဏ် ဟူသော စကားလုံးမှာ ကောင်းကင်မှ မိုးကြိုးသံများကဲ့သို့ ထပ်ခါတလဲလဲ မြည်ဟည်းနေပြီး တဒိတ်ဒိတ်ခုန်နေသော နှလုံးခုန်သံနှင့် အပြိုင် မြန်ဆန်လာခဲ့သည်။ မည်သူမဆို သူ၏ ကြောက်ရွံ့တုန်လှုပ်နေမှုကို အထင်အရှား မြင်တွေ့နိုင်ပေသည်။

"..."

ဘီလျံပေါင်းများစွာသော မျက်လုံးများမှာ မျှော်လင့်ချက်ကြီးစွာဖြင့် စိုက်ကြည့်နေကြသည်။ သူတို့သည် နောက်ထပ် နတ်ဘုရားတစ်မျှ မြင့်မြတ်သော ပုဂ္ဂိုလ်တစ်ဦး ကျော်လွှား၍မရသော စိန်ခေါ်မှုကို ရင်ဆိုင်ရမည့် မြင်ကွင်းကို ကြည့်လိုကြသည်။ ညဉ့်ဦးယံ နိမိတ်ဖတ်သူများများနှင့် သူတို့၏ မဟာမိတ်များသည် မိုးကုပ်စက်ဝိုင်း သန့်စင်ခြင်း မျှော်စင် ကဲ့သို့ ကံကောင်းမှုမျိုး ကြုံရမည်လော၊ သို့မဟုတ် ဤနေရာမှာပင် အဆုံးသတ်သွားမည်လော။

အံ့ဩစရာကောင်းသည်က တစ်မိနစ်လုံးလုံး ကြာသွားသော်လည်း မည်သည့် ပြစ်ဒဏ် သို့မဟုတ် ပြစ်ဒဏ်၏ အရိပ်အယောင်မျှ ပေါ်မလာခဲ့ပေ။ ကျန်းလင်မှာမူ ရှေ့ဆက်သွားနေပြီ ဖြစ်သည်။ သူမသည် မဟာပုရောဟိတ် အမှောင်လှိုင်း၏ ပထမဆုံးသော ရွေးချယ်ခံကို သုတ်သင်ခဲ့ရုံတင်မကဘဲ ဒုတိယမြောက် ရွေးချယ်ခံကိုလည်း ရှာဖွေတွေ့ရှိကာ အသက်ကို ခြွေယူခဲ့ပြီး နှစ်မှတ် ရယူနိုင်ခဲ့သည်။ ထို့အပြင် သူမသည် ဒြပ်စင်ကိုးမျိုးကို မူလဒြပ်စင် စွမ်းအင် အဖြစ် ပေါင်းစပ်ပြီးနောက် ကျင့်ကြံခြင်းအဆင့်အတွက် လန်းဆန်းသစ်လွင်သော ဆယ်ခုမြောက် အဆင့်သို့ တက်လှမ်းမည့် လက္ခဏာများ ပြသနေသည်။

"..."

စုရီ၏ မျက်လုံးများ တောက်ပသွားသည်။ ယွီပေါင်ယွဲ့၊ ချင်ရင်ရင် နှင့် ထျန်းရှီယာ တို့အားလုံး၏ မျက်နှာတွင် နားလည်သဘောပေါက်သည့် အရိပ်အယောင်များ ပေါ်လာကြသည်။ မဟာပုရောဟိတ် အမှောင်လှိုင်း၏ မဟာမိတ်များသည် လျှို့ဝှက်စာချုပ်ကို ရှာတွေ့သွားခဲ့လေပြီ။

***