အခန်း (၂၃၁၁-၂၃၁၂)

အပိုင်း(၂၃၁၁)

နောက်ဆုံးတွင် အောင်နိုင်သူကို အတည်ပြုနိုင်ခဲ့ပြီ ဖြစ်သည်။ လျှို့ဝှက် တရားသူကြီး သုံးဦးစလုံး၏ နှလုံးသား၊ ဝိညာဉ်နှင့် စိတ်ဝိညာဉ်တို့တွင် နက်ရှိုင်းသော ခံစားချက်များ ရိုက်ခတ်သွားခဲ့ကြသည်။ ကစားပွဲစတင်ပြီး နှစ်နာရီပင် မပြည့်သေးသည့် အချိန်အတွင်းမှာပင် ဤနယ်ခြားသား၏ အပြတ်အသတ် လွှမ်းမိုးမှုနှင့် စောစီးစွာ အောင်ပွဲရရှိမှုတို့ကြောင့် သူတို့ အံ့အားသင့်ရသည်မှာလည်း အံ့ဩစရာ မဟုတ်ပေ။

ဤဂလက်ဆီသို့ ခြေချလာသည့် အချိန်မှစ၍ ဝေ့ဝူယင်၏ ခြေလှမ်းတိုင်းသည် သူ၏ တည်ရှိမှုကို ခမ်းနားစွာ ပြသနေခြင်းနှင့် မခြားနားခဲ့ပေ။ နယ်ဝေး ဂလက်ဆီ ကူးသန်းသွားလာရေးကို အဆင်ပြေချောမွေ့စေသည့် အထက်တန်းစား ကြားနေအင်အားစု တောက်ပသော ကြယ်နန်းတော် နှင့် သူ၏ နည်းပညာပိုင်းဆိုင်ရာ ဆက်နွှယ်မှု၊ သူရဲ‌ကောင်း တာအို၏ ကပ်ဘေးကြီးကို အချိန်မီ တားဆီးပေးနိုင်ခဲ့မှု၊ မျှော်စင် ခုနစ်ခု၏ အာဏာစက်ကို မကြောက်မရွံ့ဘဲ ရဲရဲဝံ့ဝံ့ စိန်ခေါ်ခဲ့မှုနှင့် နောက်ဆုံးတွင် မျှော်စင်နှစ်ခုနှင့် ဂလက်ဆီအတွင်း အကြီးဆုံး မှောင်ခိုအဖွဲ့အစည်း နှစ်ခုတို့ကို လျှို့ဝှက်ကစားပွဲတွင် အနိုင်ယူခဲ့မှုတို့မှာ အံ့မခန်းလှပေ။

သူရဲကောင်းတာအို နန်းတော် တွင် သူပြသခဲ့သော အဂ္ဂိရတ် တာအိုသည် အစွမ်းကုန် သန့်စင်ခြင်း ဂလက်ဆီက အထွတ်အမြတ်ထားသော စံနှုန်းများကိုပင် စိန်ခေါ်နိုင်ခဲ့ပြီး၊ ယခု လျှို့ဝှက်ကစားပွဲ၏ လောင်းကြေးထပ်သည့် အဆင့်တွင် သူပြသခဲ့သော အဂ္ဂိရတ် အောင်မြင်မှုများသည်လည်း ဘီလီယံပေါင်း ရာနှင့်ချီသော လူများ၏ မျက်မှောက်တွင် သူ့ကို ထိပ်တန်း အဂ္ဂိရတ်ပညာရှင်တစ်ဦးအဖြစ် ခိုင်မာစွာ ရပ်တည်စေခဲ့သည်။

ထို့အပြင် သူ၏ ဝိညာဉ်ကွန်ရက်မှာလည်း ဤဂလက်ဆီသားများအတွက် အသစ်အဆန်းဖြစ်နေပြီး ပရိသတ်ထံသို့ ဆက်သွယ်နိုင်စွမ်းကို အဓိပ္ပာယ်အသစ် ဖွင့်ဆိုပေးခဲ့သည်။ ဥပမာအားဖြင့် စုရီနှင့် ယွီပေါင်ယွဲ့တို့ မပြန်လာမီအချိန်အတွင်း ဝေ့ဝူယင်သည် သေမျိုး တာအို၏ ကျင့်ကြံခြင်းလမ်းစဉ်နှင့် အဂ္ဂိရတ် အဆင့်အတန်းများကို ထူးကဲစွာ ဟောပြောခဲ့ရာ ဂလက်ဆီတစ်ခုလုံး၏ အာရုံစိုက်မှုကို အဆမတန် ရရှိခဲ့သည်။ ထိုရည်ရွယ်ချက်ကို အထောက်အကူပြုရန် ဝိညာဉ်ကွန်ရက်ကို အနည်းငယ် ပြုပြင်လိုက်ရာ နေရာအနှံ့အပြားမှ လျှို့ဝှက် အာဏာရှင်များသည် သူတို့၏ သေမျိုးနယ်ပယ်မှ တပည့်များကို ခေါ်ဆောင်လာကာ ဤထူးကဲသော တာအို ဆွေးနွေးပွဲကို မျက်ဝါးထင်ထင် မြင်တွေ့စေခဲ့သည်။

ဤလုပ်ဆောင်ချက်မှာ လေးရက်ခန့်သာ ကြာမြင့်ခဲ့သော်လည်း ရိုက်ခတ်မှုမှာ ခန့်မှန်းရခက်လောက်အောင် ကြီးမားလှသည်။ ဘီလီယံပေါင်း ရာနှင့်ချီသော ကြည့်ရှုသူ အရေအတွက်မှာ သေမျိုးကျင့်ကြံသူများ သူတို့၏ ဆရာများ၊ မိသားစုများ၊ မျိုးနွယ်စုများနှင့် မဟာမိတ်များ၏ စောင့်ရှောက်မှုဖြင့် ဝင်ရောက်ကြည့်ရှုလာကြရာ ကြည့်ရှုသူပေါင်း တစ်ထရီလီယံကျော် ၁,၀၀၀,၀၀၀,၀၀၀,၀၀၀ ကျော် အထိ တိုးတက်လာခဲ့သည်။

အာရုဏ်ဦး အဂ္ဂိရတ် ရှန့်ထို ဟု လူသိများလာသော ဤနယ်ခြားသားသည် သေမျိုး တာအိုနှင့် ပတ်သက်၍ ဉာဏ်အလင်းပွင့်စေသော၊ လန်းဆန်းစေသော နားလည်မှု အသစ်များကို သယ်ဆောင်လာသဖြင့် ထိုအရေအတွက်မှာလည်း ဆက်လက် မြင့်တက်နေဆဲ ဖြစ်သည်။ ကျင့်ကြံခြင်းနှင့် အဂ္ဂိရတ် နယ်ပယ်နှစ်ခုလုံးတွင် အဆင့်တက်ရန် လိုအပ်ချက် ပြည့်မီသွားပြီး ချက်ချင်းပင် အဆင့်တက်လှမ်းနိုင်ခဲ့သည့် သေမျိုးကျင့်ကြံသူ အရေအတွက်မှာ မရေတွက်နိုင်အောင်ပင်။

ဝေ့ဝူယင်က သူ၏ ဟောပြောမှုကို ရပ်နားလိုက်သောအခါ မရေမတွက်နိုင်သော ဝိညာဉ်တို့သည် စောလွန်းသည်ဟု ခံစားရပြီး မတရားမှုကို ရင်ထဲတွင် ကြိတ်၍ ငိုကြွေးနေကြရသည်။ သူတို့သည် အဘယ်ကြောင့် ဝေ့ဝူယင်၏ တပည့်များ မဖြစ်ခဲ့ရသနည်း။

ယခုအခါ အောင်နိုင်သူ ဝေ့ဝူယင် ဟူသော နာမည်မှာ သူတို့၏ စိတ်ထဲတွင် ပေါက်ကွဲသံကြီးကဲ့သို့ မြည်ဟီးနေတော့သည်။ အာရုဏ်ဦး အင်ပါယာသည် သူတို့၏ ခက်ခဲသော ကျင့်ကြံခြင်းနှင့် အဂ္ဂိရတ် လမ်းစဉ်တွင် ကူညီပေးခဲ့သော ဆရာတစ်ဝက်၊ ဒဏ္ဍာရီဆန်သော တည်ရှိမှုတစ်ခု ဖြစ်လာခဲ့ပြီ။

၎င်းမှာ ငြင်းပယ်၍ မရနိုင်အောင် ကမ္ဘာကို ပြောင်းလဲစေသည့် လုပ်ဆောင်ချက်ဖြစ်သည်။ သူ၏ လုပ်ရပ်များ၏ ရလဒ်ကို ချက်ချင်း ခံစားရသလို အနာဂတ် ရိုက်ခတ်မှုများကိုလည်း အားလုံးက ရှင်းလင်းစွာ မြင်တွေ့နိုင်ခဲ့သည်။

ဤသည်မှာ တရားသူကြီးများက ဝေ့ဝူယင်၏ တည်ရှိမှုကို အံ့ဩမှင်သက်နေရသည့် အကြောင်းရင်းပင် ဖြစ်သည်။ သူသည် ရဲရင့်သည်၊ ထက်မြက်သည်၊ ကြောက်ရွံ့ခြင်း ကင်းမဲ့သည်။ သူသည် သူတို့ မမီနိုင်သော ပဲ့တင်ထပ် ဝိညာဉ် နယ်မြေ အဆင့်ရှိ အထွတ်အထိပ် တည်ရှိမှုကြီးများ၏ ပုံရိပ်နှင့် အတိအကျ ကိုက်ညီနေတော့သည်။ သူတို့ မသိရှိလိုက်သည်က သူတို့ အလွန်အမင်း အထင်ကြီး လေးစားနေရသော ဤသူမှာ အသက်နှစ်ရာပင် မပြည့်သေးသည့် လျှို့ဝှက်ကြယ်တာရာ အဆင့် ကျင့်ကြံသူလေး တစ်ဦးသာ ဖြစ်နေခြင်းပင်။

ချောင်စွေ့ဖုန်း၏ မျက်လုံးများမှာ ဝေ့ဝူယင်၏ ပြုံးနေသော မျက်နှာကို ကြည့်ရင်း တောက်ပနေသည်။ အစမှ အဆုံးအထိ သူသည် အရာအားလုံးကို ထိန်းချုပ်ထားနိုင်ခဲ့ပြီး သူမ စိတ်ထဲတွင် ရှိထားသော ပုံရိပ်နှင့် အပြစ်ဆိုဖွယ်မရှိ ကိုက်ညီနေသဖြင့် သူမ၏ ခန္ဓာကိုယ်မှာ ပူရှိန်းလာခဲ့သည်။

သူမတစ်ဦးတည်း မဟုတ်ပေ။ ရှီနင်၊ ရှန့်ဝမ်ချင်း၊ ယွီစွန်းလီ၊ ချင်ချူးမူ နှင့် လျူစုယင် တို့၏ နှလုံးသားများမှာလည်း အမျိုးမျိုးသော စိတ်လှုပ်ရှားမှုများဖြင့် ပေါက်ကွဲလုမတတ် ဖြစ်နေပြီး စိတ်ထဲတွင်လည်း ပုံရိပ်အမျိုးမျိုးကို စိတ်ကူးယဉ်နေကြတော့သည်။ သခင်လေးရှန့်မှာမူ အံ့ဩမှုကို မဖုံးကွယ်နိုင်ဘဲ သက်ပြင်းချလိုက်မိသည်။ သူသည် အဖြစ်အပျက်အားလုံးကို စောင့်ကြည့်သူဖြစ်၍ ဝေ့ဝူယင်၏ နက်ရှိုင်းမှုကို သိရှိသော်လည်း၊ ဤလူငယ်သည် ဂလက်ဆီ တစ်ခုပြီးတစ်ခုကို အမှားအယွင်းမရှိ၊ ကြောက်ရွံ့ခြင်းမရှိဘဲ တုန်လှုပ်စေသည်ကို တွေ့ရသဖြင့် အံ့သြရသည်မှာလည်း အမှန်ပင်။

သူသည် ရတနာချိုင့်ဝှမ်း ဂလက်ဆီသို့ ရောက်ရှိမည့် အရေးအတွက်လည်း စိုးရိမ်ပူပန်လာမိသည်။ ရှီနင်နှင့် ရှန့်ဝမ်ချင်း အထူးသဖြင့် ရှန့်ဝမ်ချင်း ကို ကြည့်ရင်း ဝေ့ဝူယင်၏ အင်ပါယာ ဥပဒေသသည် အနည်းငယ်မျှ နောက်ဆုတ်မည် မဟုတ်ကြောင်း သူ နားလည်လိုက်သည်။ အမှန်စင်စစ် ဝေ့ဝူယင်၏ လုပ်ရပ်များသည် အနာဂတ်တွင် မည်သူ့ရှေ့တွင်မဆို ကိုယ့်ခြေထောက်ပေါ်ကိုယ် ရပ်တည်နိုင်မည့် အရင်းအနှီးများ ရရှိရန် အပြည့်အဝ ပြင်ဆင်နေခြင်း ဖြစ်ပုံရသည်။

ဝိညာဉ်ကွန်ရက်မှတစ်ဆင့် ဝေ့ရှောင်ထျန်းသည် မျက်ရည်ဝိုင်းလျက် ကြည့်ရှုနေသည်။ သူမ ငိုသည်မှာ ဝမ်းနည်း၍ မဟုတ်ဘဲ ဝေ့ဝူယင်၏ စကားများက သူမ၏ နှလုံးသားထဲတွင် ပဲ့တင်ထပ်နေသောကြောင့် ဖြစ်သည်။ သူမ၏ စိုးရိမ်မှုအားလုံး လွင့်စင်သွားခဲ့လေပြီ။ နောက်ဆုံးတွင် သူမသည် သူ့ကို အပြည့်အဝ ယုံကြည်သွားခဲ့သည်။ သူမ မသိသော်လည်း သူသည် သူ၏ လမ်းစဉ်အတိုင်း ရှေ့ဆက်နေဦးမည် ဖြစ်သည်။

...

ဝေ့ဝူယင်မှာမူ သူ မျက်လုံးပေါင်း မည်မျှနှင့် နှလုံးသားပေါင်း မည်မျှကို လှုပ်ခတ်နိုင်ခဲ့သည်၊ သို့မဟုတ် မည်မျှသော နှလုံးသားများကို တည်ငြိမ်အေးချမ်းစေကာ မယိုင်လဲသော ယုံကြည်မှုနှင့် ပျော်ရွှင်မှုများ ပေးစွမ်းနိုင်ခဲ့သည်ကို မသိရှိပေ။

သူ့ကို အောင်နိုင်သူအဖြစ် ကြေညာလိုက်သောအခါ အထွတ်အထိပ် သန့်စင်ခြင်း မျှော်စင်၊ အထွတ်အထိပ် ဖန်တီးခြင်း မျှော်စင်၊ ညဉ့်ဦးယံ နိမိတ်ဖတ်သူများနှင့် အရိပ်ကွယ် အဖွဲ့တို့၏ လျှို့ဝှက်ကျိန်စာများမှာ ပျယ်ပြယ်သွားသော်လည်း သူတို့မှာ ရှုံးနိမ့်သူများ ဖြစ်နေဆဲ ဖြစ်ပြီး ခုနစ်ရက်အတွင်း လောင်းကြေးများကို ပေးအပ်ရန် ဖြစ်လာသည်။

အကယ်၍ သူတို့သည် ဤဂလက်ဆီမှ ထွက်ပြေးရန်၊ ဂလက်ဆီအများအပြားရှိ အထက်တန်းလွှာများ၏ လေးစားမှုကို စွန့်လွှတ်ရန်နှင့် ယုံကြည်၍မရသူများအဖြစ် အသတ်ခံရန် မရည်ရွယ်ပါက ဤကတိကို ဖျက်ဝံ့မည် မဟုတ်ပေ။ ထိုသို့ပြုလုပ်ခြင်းက သူတို့ကို လုံးဝ ပျက်စီးသွားစေလိမ့်မည်။

သို့သော် ဝေ့ဝူယင်ရော အခြားသူများပါ ထိုအချက်ကို အာရုံမစိုက်နိုင်ကြသေးချေ။ အားလုံးမှာ ကောင်းကင် တရားသူကြီး၏ ပြင်းထန်သော အရှိန်အဝါကို တစ်ဖန် ပြန်လည် ခံစားလိုက်ရ၏။ ၎င်းမှာ အပြစ်ဒဏ်၏ အတိုင်းအတာကို တိုင်းတာရန် ဆင်းသက်လာကာ အာကာသ၊ အချိန်နှင့် ဟင်းလင်းပြင်တို့ကို ပိတ်ဆို့ထားလိုက်လေသည်။

စုရီ၏ ချောမောသော မျက်နှာမှာ ညကဲ့သို့ မည်းမှောင်နေပြီး ယွီပေါင်ယွဲ့မှာမူ ပြာနှမ်းနေတော့သည်။ သူမသည် လျှို့ဝှက်ပြစ်ဒဏ်ကို ရင်ဆိုင်ရတော့မည်ဟု ထင်မှတ်ခဲ့သည်။ ထိုအလားအလာကို သူမ အလွန်အမင်း မကြောက်လှပေ။

စုရီ လျှို့ဝှက်အရှင် အဖြစ် မတက်လှမ်းမီကပင် ဤရလဒ်ကို ဆွေးနွေးခဲ့ပြီး ဖြစ်သည်။ သူမအနေဖြင့် သေဆုံးသွားရုံသာ ဖြစ်ပေလိမ့်မည်။ လျှို့ဝှက်ပြစ်ဒဏ်သည် မူလ ဝိညာဉ်နှင့် အစစ်အမှန် ဝိညာဉ်ကို ဖျက်ဆီးပစ်ခြင်း မဟုတ်ရာ၊ လုံလောက်သော အင်အား သို့မဟုတ် မှန်ကန်သော နည်းလမ်းများဖြင့် သူမကို မူလအခြေအနေသို့ ပြန်လည် ရောက်ရှိအောင်၊ အသက်ရှင်အောင် ပြုလုပ်နိုင်ပေသည်။ ၎င်းမှာ စုရီ၏ စွမ်းဆောင်ရည်ဖြင့် ဖြေရှင်းရန် မခက်ခဲလှသော ကိစ္စပင်။

ဝေ့ဝူယင်က စုရီအား အဆင့်တက်လှမ်းရန် အချိန်ပေးခဲ့ခြင်းမှာလည်း သူမကို ပြန်လည် အသက်သွင်းရန် သို့မဟုတ် အခြားသူများ၏ တားဆီးမှုများကို ရင်ဆိုင်နိုင်ရန် အခြေခံကောင်းကောင်း တည်ဆောက်နိုင်ဖို့ ဖြစ်မည်ဟု သူမ ထင်မြင်ခဲ့သည်။ သူမ သေဆုံးနေချိန် ကြာလာလေလေ၊ ပြန်လည် အသက်သွင်းရန် ခက်ခဲလေလေ ဖြစ်ပြီး၊ စုရီကဲ့သို့ ထူးကဲသော ကျင့်ကြံသူသည်ပင် နောက်ဆုံးတွင် မိမိကိုယ်ကို အသေမခံဘဲ မကယ်တင်နိုင်သည့် အခြေအနေသို့ ရောက်သွားနိုင်သည်။ သူမ ကြောက်ရွံ့သည်မှာ ထိုအချက်ပင်။

ယခုမူ သူမသည်လည်း အခြားသူများနည်းတူ၊ သူ့ဘာသာသူဆိုလျှင် သိပ်မပြင်းထန်သော်လည်း ဤကဲ့သို့သော လျှို့ဝှက်ကျိန်စာများနှင့် အခြေအနေများအောက်တွင် အလွန် သေစေနိုင်သော ယုတ်မာလှသည့် ကောင်းကင်အဆင့် အသက်သွေးကြော တာအို၏ တည်ရှိမှုကြောင့် တုန်လှုပ်နေရသည်။ အကယ်၍ စုရီသာ ဤနေရာတွင် သေဆုံးသွားပါက၊ သူ၏ မူလအစနှင့် ပတ်သက်သော လျှို့ဝှက်ချက်များကြောင့် သူ၏ ဝိညာဉ်ကို ပြန်လည် အသက်သွင်းနိုင်မလား ဆိုသည်ကို ဘေးဖယ်ထားလျှင်ပင်၊ သူ မကြာသေးမီက ကြယ်တာရာများအကြား အောင်ပွဲခံခဲ့စဉ်က ရန်ငြိုးဖွဲ့ခဲ့သူများမှာ သူ ပြန်လည် အသက်ဝင်လာရန် မည်သို့မျှ ခွင့်ပြုမည် မဟုတ်ပေ။ ထိုသို့ဆိုလျှင် သူသည် အပြီးတိုင် သေဆုံးသွားရပေလိမ့်မည်။

ညဉ့်ဦးယံ နိမိတ်ဖတ်သူများမှာလည်း ထိုသို့ပြုလုပ်ရန် အကြောင်းဖန်လာခဲ့ပြီ။ ဤကိစ္စတွင် အခြားမည်သူများ ပါဝင်ပတ်သက်နေဦးမည်နည်း။ မဟာပုရောဟိတ် အမှောင်လှိုင်း၏ တစ်ကိုယ်လုံးတွင် စိတ်လှုပ်ရှားမှု၊ ကဲ့ရဲ့ရှုံ့ချမှုနှင့် ရယ်မောပျော်ရွှင်မှုများ လွှမ်းမိုးနေသည်။

စုရီအပေါ် သူ အဘယ်ကြောင့် ဤမျှ ပြင်းထန်သော အာဃာတနှင့် ရန်ငြိုးထားရသနည်းဆိုသည်ကို လူအများမသိကြသော်လည်း သိရှိသူများအတွက်မူ ထိုအကြောင်းပြချက်မှာ သေးနုပ်ခြင်း သို့မဟုတ် အဓိပ္ပာယ်မရှိခြင်းမျိုး လုံးဝမဟုတ်ပေ။ အမှန်စင်စစ် ၎င်းမှာ အလွန်ပင် ခိုင်လုံလှပါသည်။

စော်ကားခံရခြင်းကို အဓိကထား၍ ရန်ငြိုးဖွဲ့တတ်သော ကောင်းဟိန် နှင့် ခြားနားစွာပင် မဟာပုရောဟိတ် အမှောင်လှိုင်းမှာမူ သာမန်လူသားဆန်သော ခံစားချက်တစ်ခုဖြစ်သည့် မေတ္တာ ကြောင့်သာ ဖြစ်သည်။ စုရီသည် သူ၏ သွေးစွန်းသော အောင်ပွဲခံလမ်းစဉ်တွင် မရေမတွက်နိုင်သော အသက်များကို သတ်ဖြတ်ခဲ့ရာ၊ ထိုအထဲတွင် မဟာပုရောဟိတ် အမှောင်လှိုင်း၏ မွေးစားသမီးလည်း ပါဝင်ခဲ့သည်။ သူမသည် အနည်းငယ် စိတ်သဘောထားကောက်ကျစ်ပြီး ယုတ်မာသူ၊ ဆိုးယုတ်နေသူ ဖြစ်ကောင်းဖြစ်နိုင်သော်လည်း သူ၏သမီးပင် ဖြစ်သည်။ စုရီသည် သူမကို သတ်ဖြတ်ခဲ့ရုံသာမက အထွတ်အထိပ် သူတော်စင်များပင် လက်မရှောင်ဝံ့သည့် ပြန်လည်အသက်သွင်းနိုင်မည့် အခွင့်အရေးမှန်သမျှကိုပါ အပြီးတိုင် ဖျက်ဆီးပစ်ခဲ့သည်။ သူသည် စုရီကို သေစေချင်လှပြီ။

သို့သော် ထိုပိုးကောင်ငယ်လေးတွင် အထွတ်အထိပ် သူတော်စင်တစ်ဦး၏ အကာအကွယ် ရှိနေခဲ့သည်။ ယခုကဲ့သို့ သူတစ်ပါးလက်ဖြင့် ငှားရမ်းသတ်ဖြတ်နိုင်မည့် အခွင့်အရေးကို သူ လက်လွှတ်ခံမည် မဟုတ်ပေ။

စုရီသည် ကောင်းက် တရားသူကြီး၏ စစ်ဆေးမှုမှ ကျရောက်လာတော့မည့် ဖိအားကို ခံစားမိနေသဖြင့် မဟာပုရောဟိတ် အမှောင်လှိုင်းကို လျစ်လျူရှုထားလိုက်သည်။ သူက တိုင်ယန်တောက်နှင့် အခြားသူများထံသို့ လှည့်ကာ မေးလိုက်၏။

"မင်းတို့ အဲဒါကို ရှာတွေ့ပြီလား"

“မတွေ့သေးဘူး... ဟင်းလင်းပြင် ထဲမှာ ဘာလှုပ်ရှားမှုမှ မရှိဘူး..."

တစ်ချိန်တည်းမှာပင် ဝေ့ဝူယင်က သတိပေးလိုက်၏။

"အသင့်ပြင်ထားတော့"

***

အပိုင်း(၂၃၁၂)

"..."

စုရီ၏ နှလုံးသားမှာ တုန်လှုပ်သွားရသည်။ ဝေ့ဝူယင်၏ အချိန်ကိုက် သတိပေးချက်တွင် ကြီးမားသော အဓိပ္ပာယ် ရှိနေသည်ဟု သူ ခံစားလိုက်ရသည်။

‘ဘာတုံ့ပြန်မှုမှ မရှိဘူးလား... ဒါဆိုရင်... အဲ့တာက အခြားလူတစ်ဦးဦးရဲ့ လက်ထဲကို ရောက်နေတာလား...”

သူ၏ အကြည့်မှာ မဟာပုရောဟိတ် အမှောင်လှိုင်း ထံသို့ ဝဲကျသွားသည်။ အကယ်၍ သူ၏ လျှို့ဝှက်ကျိန်စာမှာ ညဉ့်ဦးယံ နိမိတ်ဖတ်သူများ လက်ထဲတွင် ရှိနေပါက သူသည် အလွန်အန္တရာယ်ရှိသော အနေအထားတွင် ရှိနေပေလိမ့်မည်။ သို့သော်လည်း သူသည် တည်ငြိမ်စွာပင် ရှိနေဆဲ ဖြစ်သည်။

စုရီသည် မိမိ၏ လက်ကို ဓားကဲ့သို့ အသုံးပြု၍ ရှေ့သို့ သာသာယာယာ လွှဲယမ်းလိုက်သည်။ အာကာသမှာ ပြတ်တောက်သွားပြီးနောက် အားလုံး၏ အံ့ဩမှင်သက်နေသော မျက်မှောက်တွင် သူသည် အခန်းအတွင်းမှ လျှောခနဲ ထွက်ခွာသွားတော့သည်။ ဝေ့ဝူယင်၏ အကူအညီမပါဘဲ ကောင်းကင် တရားသူကြီး၏ ဖိနှိပ်မှုအောက်မှ သူ ထွက်ခွာသွားနိုင်ခဲ့ခြင်း ဖြစ်သည်။

ဝေ့ဝူယင်၏ မျက်လုံးများမှာ တောက်ပလာသည်။ ထူးဆန်းစွာပင် ဝိညာဉ်ကွန်ရက်၏ ရှုထောင့်တိုင်းမှာ စုရီထံသို့ ဦးတည်သွားတော့သည်။ ဤအနှိုင်းမဲ့ ဓားသမားသည် အမှောင်ဟင်းလင်းပြင်အတွင်း လေကဲ့သို့ လွတ်လပ်ပြီး ဟင်းလင်းပြင်ကဲ့သို့ အဆုံးမဲ့သော လွတ်လပ်သော ဓားတန်ခိုးရှင် တစ်ဦးကဲ့သို့ မတ်မတ်ရပ်နေသည်။

သူ၏ တည်ငြိမ်သော အကြည့်မှာ ဂလက်ဆီအပြင်ဘက်ရှိ ကောင်းကင် တရားသူကြီး၏ ရွှေရောင်မျက်လုံးကြီး ရှိရာသို့ စိုက်ကြည့်နေသည်။ သူသည် လျှို့ဝှက်အရှင် တစ်ဦး၊ အစစ်အမှန် အာဏာရှင် ရှန့်ထို တစ်ဦး ဖြစ်သည့်အတွက် လျှို့ဝှက် တာအို အပေါ် သူ၏ ကျွမ်းကျင်မှုမှာ ထိတ်လန့်ဖွယ်ကောင်းသော အင်အားနှင့်အတူ အထွတ်အထိပ်သို့ ရောက်ရှိနေပြီ ဖြစ်သည်။

အခြားတစ်ဖက်၌... ယွီပေါင်ယွဲ့၏ မျက်ဝန်းများမှာ စိုးရိမ်မှုများဖြင့် ဝေဝါးနေတော့၏။

"သူ ဒီပြစ်ဒဏ်ကို မဖြစ်မနေ ရင်ဆိုင်ရမှာလား..."

သူမသည် ဘေးနားရှိသူများကို ရည်ရွယ်ခြင်း မရှိဘဲ မေးမိလိုက်သည်။ ထူးဆန်းစွာပင် မဟာပုရောဟိတ် အမှောင်လှိုင်းထံမှ တုံ့ပြန်မှုကို သူမ ရရှိခဲ့သည်။

"သူက ဒီအပြစ်ဒဏ်ကို ရင်ဆိုင်ရမှာတင် မကဘူး၊ သူ့ကိုယ်သူပါ ဒုက္ခိတဖြစ်အောင် လုပ်ရလိမ့်မယ်"

သူက ဆိုသည်။ သူ၏ အသံမှာ ကြမ်းတမ်းပြီး စက်ဆုပ်ဖွယ်ကောင်းလှကာ သူ၏ ပျော်ရွှင်မှုကိုလည်း အနည်းငယ်မျှ ဖုံးကွယ်မထားပေ။ လျှို့ဝှက်ကျိန်စာကို နောက်မှ ရှာတွေ့ပြီး ဖျက်ဆီးပစ်နိုင်ခြေ သို့မဟုတ် စုရီသာ ဤကပ်ဘေးမှ အသက်ရှင်သွားပါက ဖြစ်လာမည့် အကျိုးဆက်များကို သူ ထည့်သွင်းစဉ်းစားခြင်း မရှိပေ။

စုရီသည် ဝေ့ဝူယင်၏ အကြိမ်ကြိမ် သတိပေးမှုကို ခံရပြီး အချိန်အလုံအလောက်လည်း ရရှိခဲ့ရာ၊ ဤအခြေအနေကို အလေးအနက် မထားပါက သူသည် လူအိုက်တစ်ယောက်သာ ဖြစ်ပေလိမ့်မည်။ ဝေ့ဝူယင် အမှန်တကယ် စိတ်ဝင်စားနေသည်မှာ... စုရီသည် သူ၏ လက်ရှိအဆင့်တွင် ဖန်တီးရှင် လက်ထက်က ကောင်းကင်ငယ် တမန်တော် တစ်ဦး၏ ထုံးစံအတိုင်း ရှိရမည့် အမြင့်ဆုံးသော စံနှုန်းကို ယှဉ်ပြိုင်တိုက်ခိုက်နိုင်ပါ့မလား ဆိုသည်ပင်။ သူသည် ထိုသို့လုပ်ဆောင်နိုင်ရန် လုံလောက်သော ယုံကြည်မှု ရှိနေသည်ဟု ခံစားရသည်။

‘မင်းရဲ့ လျှို့ဝှက်ကျိန်စာက ငါ့လက်ထဲမှာ ရှိပြီးသားပဲ... မင်းက လျှို့ဝှက်ပြစ်ဒဏ် အားလုံးကို ကျော်ဖြတ်ပြီး မင်းရဲ့အဆင့်မှာရှိတဲ့ ကောင်းချီးခံ တစ်ဦးရဲ့ အစွမ်းကို ငါ့ကို ပြမလား၊ ဒါမှမဟုတ် သေမလား ဆိုတာပဲ ငါ စိတ်ဝင်စားတယ်’

ဝေ့ဝူယင်က တွေးတောနေမိသည်။ သူသည် သူ၏ အဂ္ဂိရတ်ကြယ်တာရာများကို အကာအကွယ်ယူ၍ သူ၏ ကောင်းကင်နတ်မျက်လုံးများဖြင့် စုရီကို အနီးကပ် စောင့်ကြည့်နေသည်။

ဝေ့ဝူယင်သည် အလွန်အမင်း ထူးခြားဖောက်ပြန်သော တည်ရှိမှုမျိုး ဖြစ်သော်လည်း အဆင့်မြင့် ကောင်းချီးခံတစ်ဦး၏ အစွမ်းအစနှင့် ပတ်သက်၍ ခိုင်မာသော တိုင်းတာချက်မျိုး မရှိသေးပေ။ စုရီသည် အင်ပီရီယန် တစ်ဦး မဟုတ်သဖြင့် သူတို့ထက် အားနည်းပေလိမ့်မည်။ ထိုအချက်အလက်များကို ရရှိထားခြင်းမှာ ရှေ့ဆက်သွားမည့် ဝေ့ဝူယင်အတွက် များစွာ အထောက်အကူ ဖြစ်စေပေလိမ့်မည်။ ထို့နောက် သူ၏ အကြည့်မှာ ယွီပေါင်ယွဲ့ထံသို့ ရွှေ့လျားသွားသည်။ သူ လိုအပ်နေသော နောက်ဆုံး အရာတစ်ခု ရှိနေသေးသည်။

...

ဝေ့ဝူယင်၏ အတွေးများကို မသိရှာသော ယွီပေါင်ယွဲ့သည် စုရီထံသို့သာ စိတ်ရောကိုယ်ပါ နှစ်မြှုပ်၍ အာရုံစိုက်ထားလေသည်။ သူမ ထိုသို့ အာရုံစိုက်နေစဉ်မှာပင် ကောင်းကင် တရားသူကြီး၏ စစ်ဆေးမှုက သူမကို စောင့်ကြည့်နေပြီ ဖြစ်သည်။ အခန်းတွင်း၌ အသက်ရှူကျပ်မတတ် ဖိအားများ လွှမ်းမိုးလာရာ အခြားသော ကစားသမားများနှင့် လျှို့ဝှက် တရားသူကြီးများ၏ မျက်နှာအမူအရာများမှာ ထိတ်လန့်ခြင်း၊ သဘောပေါက်နားလည်ခြင်း သို့မဟုတ် ဝမ်းသာခြင်း စသည်ဖြင့် အသီးသီး ပြောင်းလဲသွားကြသည်။

ဝမ်းသာနေသူမှာ အခြားသူမဟုတ်ဘဲ မဟာပုရောဟိတ် အမှောင်လှိုင်း ပင် ဖြစ်သည်။ စုရီ၏ မဟာမိတ်များအပေါ် ကံကြမ္မာ အဆက်အသွယ် များမှာ မျက်နှာလိုက်ခြင်းမရှိဘဲ နောက်ယောင်ခံ လိုက်ပါနေခြင်းဖြစ်ရာ ယွီပေါင်ယွဲ့သည်လည်း စုရီ၏ မဟာမိတ်စာရင်းဝင် ဖြစ်နေသဖြင့် ကောင်းကင် တရားသူကြီး၏ ဝဲပျံနေသော အကြည့်အောက်မှ ကင်းလွတ်ခွင့် မရခဲ့ချေ။

စုရီသည် ၎င်းကို ချက်ချင်း သတိပြုမိလိုက်သည်။ ယွီပေါင်ယွဲ့သာမက သူ့ကို အကာအကွယ်ပေးနေသော၊ ဝေ့ဝူယင်ကို အရှိန်အဝါဖြင့် ခြိမ်းခြောက်နေသော ထိုအထွတ်အထိပ် ပုဂ္ဂိုလ်ကြီးနှင့် အခြားသော မဟာမိတ် အငယ်အကြီး အားလုံးမှာလည်း ပစ်မှတ်ထားခံနေရသည်။ စုရီသည် ထိုပျံ့နှံ့နေသော အာရုံစိုက်မှု၏ ၅၁ ရာခိုင်နှုန်းကိုသာ ခံစားရသည်။

အကယ်၍ လျှို့ဝှက်ပြစ်ဒဏ်သာ ဤနေရာတွင် ပေါက်ကွဲထွက်လာပါက သူ၏ အခြားသော မဟာမိတ်များမှာ တောင့်ခံနိုင်ရန် ခက်ခဲမည်ဖြစ်ပြီး အစုလိုက်အပြုံလိုက် သေဆုံးသွားကြပေလိမ့်မည်။ ဝေ့ဝူယင်၏ သတိပေးချက်ကို ပြန်လည် စဉ်းစားကြည့်ရင်း သူ၏ လျှို့ဝှက်ကျိန်စာကို ပြန်လည်ရယူရန် သို့မဟုတ် ဖျက်ဆီးရန် အခွင့်အရေးမှာ လုံးဝ မရှိတော့ကြောင်း သူ ရိပ်မိလိုက်သည်။

ထို့ကြောင့် သူသည် ပြစ်ဒဏ် အပြည့်အဝကို ရင်ဆိုင်ရန် အသင့်ပြင်ထားသော်လည်း သူ၏ မဟာမိတ်များမှာမူ ထိုသို့မဟုတ်ပေ။ ယွီပေါင်ယွဲ့ တစ်ဦးတည်းပင် ကောင်းကင် တရားသူကြီး၏ အာရုံစိုက်မှု ၁၂ ရာခိုင်နှုန်းခန့်ကို ရင်ဆိုင်နေရသည်။ သူမသည် သူ ငယ်စဉ်ဘဝကတည်းက ပစ္စည်းများ၊ ရတနာများ၊ အဂ္ဂိရတ် ထုတ်ကုန်များဖြင့် များစွာ ကူညီခဲ့သူ ဖြစ်သလို၊ အနာဂတ်တွင်လည်း ကောင်းကင် ရှန့်ထို အဂ္ဂိရတ်ပညာရှင် ဖြစ်လာမည့် အလားအလာရှိသော လွတ်လပ်သည့် အဂ္ဂိရတ်ပညာရှင် တစ်ဦးလည်း ဖြစ်ပေသည်။

စုရီသည် အသက်ကို ညင်သာစွာ ရှူလိုက်ရင်း လက်တစ်ဖက်ဖြင့် မြင်သူအပေါင်း ဝေခွဲရခက်စေမည့် ထူးဆန်းလှသော လက်ကွက်တစ်ခုကို ဖော်ဆောင်လိုက်သည်။

ဝှစ်...

သေခြင်း၊ ရှင်ခြင်း၊ ကံကြမ္မာနှင့် ပြန်လည်ဝင်စားခြင်းတို့၏ အဆီအနှစ်များ ပါဝင်သော ထူးကဲသည့် ဝိညာဉ်အလင်းတန်း တစ်ခု ထွက်ပေါ်လာပြီး၊ အလွန်နက်ရှိုင်းသော ထူးခြားသည့် ရည်ရွယ်ချက် တစ်ခု အဖြစ် ပြောင်းလဲကာ သူ၏ မျက်မှောင်နှစ်ခုကြား ရှေ့တွင် ဓားငယ်လေးတစ်စင်းအသွင်ဖြင့် ဝဲပျံနေတော့သည်။ သူ၏ စိတ်မျက်လုံး မှ ဝိညာဉ်အင်အား အနည်းငယ်သည် ရွှေရောင် ကောင်းကင် ရောင်ခြည်အလွှာပါးလေး ဖုံးအုပ်လျက် ထိုဓားငယ်အတွင်းသို့ စီးဝင်သွားသည်။

ထိုဓား ထွက်ပေါ်လာသောအခါ ဝိညာဉ်အာရုံခံစားမှု သို့မဟုတ် ကံကြမ္မာ ဝိညာဉ် ရှိသူများမှာ ချက်ချင်းပင် တုန်လှုပ်သွားကြရသည်။

"အဲဒီဓားပဲ"

မဟာပုရောဟိတ် အမှောင်လှိုင်း၏ စိတ်ထဲမှ ရေရွတ်လိုက်မိ၏။

"အိုး..."

ဝေ့ဝူယင်၏ ဝိညာဉ်အာရုံမှာလည်း မယုံနိုင်လောက်အောင် ကြောက်မက်ဖွယ်ကောင်းသော စွမ်းအား လှုပ်ခတ်မှုတစ်ခုကို ဖမ်းယူရရှိလိုက်သည်။ ၎င်းမှာ အမှောင်ဟင်းလင်းပြင်ကို ဖြတ်သန်း၍ သံချပ်ကာကောင်းချီး ကြယ်တာရာ နယ်မြေထံသို့ မည်သည့် အဟန့်အတားကိုမျှ ဂရုမစိုက်ဘဲ ဂလက်ဆီ နယ်နိမိတ်များကို ကျော်ဖြတ်ကာ အရှိန်အဟုန်ဖြင့် ပြေးဝင်လာနေခြင်း ဖြစ်သည်။ ၎င်းမှာ ကောင်းကင်၏ တန်ခိုးအာဏာ အနည်းငယ် ပါဝင်နေပြီး ကြောက်မက်ဖွယ်ကောင်းလောက်အောင် ပြင်းထန်လှသည်။

အထွတ်အထိပ် သူတော်စင် တစ်ဦး...

ထို့နောက် အာရုံခံစားမှု လုံလောက်စွာ အားကောင်းသူများသည် ဂြိုဟ်သိမ်ဂြိုဟ်မွှား နေမင်းတစ်စင်းခန့် ပမာဏရှိသော တောက်ပသည့် ကြယ်တံခွန်ကြီးတစ်ခု အမှောင်ဟင်းလင်းပြင်အတွင်း မကြုံစဖူးသော အရှိန်နှုန်းဖြင့် စုရီရှိရာသို့ အရေးတကြီး ပြေးဝင်လာသည်ကို မြင်တွေ့လိုက်ရသည်။

ကောင်းကင် တရားသူကြီးသည် ထိုသူတစ်ဦးတည်းအပေါ်တွင်ပင် သူ၏ အာရုံစိုက်မှု ၂၀ ရာခိုင်နှုန်းခန့်ကို ပုံအောထားရာ၊ ၎င်းမှာ ကံကြမ္မာ အဆက်အသွယ်အရ ထိုသူသည် စုရီကို အကူအညီပေးနိုင်ဆုံးသူ ဖြစ်နေသောကြောင့် ဖြစ်ပေမည်။

ဘုန်း...

ကောင်းကင်ကို ခွဲထုတ်ပြီး ဝိညာဉ်ကို ဆွဲဆုတ်လိုက်သကဲ့သို့ ပြင်းထန်သော ပေါက်ကွဲသံကြီး ထွက်ပေါ်လာကာ အာကာသနှင့် အချိန်တခွင်လုံးတွင် ပြင်းထန်သော လှိုင်းလုံးများကို ရိုက်ခတ်သွားစေသည်။ ၎င်းမှာ မိုင်ပေါင်း ဘီလျံတစ်သောင်း အတွင်းရှိ သက်ရှိအားလုံး၏ နှလုံးသားကို တုန်လှုပ်စေပြီး ဝိညာဉ်အာရုံများကို နာကျင်စေခဲ့သည်။

သံချပ်ကာကောင်းချီး ကြယ်တာရာ နယ်မြေ ကိုမူ လက်မတင်လေး လွဲချော်သွားခဲ့သည်။ ထိုဂြိုဟ်သိမ် ပမာဏရှိသော ကြယ်တံခွန်ကြီးကို လူတစ်ဦးက တားဆီးထားလိုက်သည်။ သူမမှာ အနက်ရောင် ဝတ်ရုံကြီးကို ဆင်မြန်းထားသော အမျိုးသမီးတစ်ဦးဖြစ်ပြီး ဥပဒေသ အော်ရာများ စီးဆင်းနေသည့် ခရမ်းရွှေရောင် ဓားမြှောင်ကောက် နှစ်စင်းကို ကိုင်ဆောင်ထားသည်။

သူမ၏ ရပ်တည်ပုံမှာ မည်သူမျှ မဖြိုခွင်းနိုင်သော ခံတပ်ကြီးတစ်ခုကဲ့သို့ ခိုင်မာလှပြီး ကောင်းကင်၏ စွမ်းအားအစစ်အမှန်ကို အသုံးပြုကာ မည်သူမျှ ကျော်ဖြတ်မရသော တံတိုင်းကြီးတစ်ခုကို တည်ဆောက်ထားလိုက်သည်။ သူမ ဘာမှမပြောသော်လည်း သူမ၏ ရည်ရွယ်ချက်မှာ ရှင်းလင်းလှသည်။

"ကျော်ဖြတ်ခွင့် မရှိစေရ"

***