အခန်း (၂၃၁၃-၂၃၁၄)

အပိုင်း(၂၃၁၃)

စုရီမှာမူ သူ၏ ကျင့်စဉ်ကို ဖော်ဆောင်ရန်သာ အာရုံစိုက်နေသည်။ ဓားငယ်လေးမှာ ဝိညာဉ်အလင်းတန်းများနှင့် ထူးခြားသော ရည်ရွယ်ချက်တို့ဖြင့် တုန်ခါနေသည်။ ဝေ့ဝူယင်သည် ဤ ထူးခြားသော ရည်ရွယ်ချက် နှင့် ရင်းနှီးနေသည်။ ၎င်းမှာ သံသရာ ပင် ဖြစ်သည်။

ကြယ်တို့၏ သံသရာတွင်လည်း ဤအငွေ့အသက် ပါဝင်သော်လည်း ယခုမှာမူ အနည်းငယ် ကွဲပြားနေသည်။ ကြယ်တာရာ သံသရာ ၏ သံသရာ ရည်ရွယ်ချက်မှာ အမျိုးမျိုးသော ရည်ရွယ်ချက်များဖြင့် ဖွဲ့စည်းထားပြီး ဝေ့ဝူယင် ရင်းနှီးသော ရည်ရွယ်ချက်တွင် သေမျိုး ရည်ရွယ်ချက် ပါဝင်သည်။

သို့သော် ဤသံသရာ ရည်ရွယ်ချက်မှာမူ မပြည့်စုံသလို ခံစားရပြီး ပြတ်တောက်နေသော လျှို့ဝှက် ရည်ရွယ်ချက် များဖြင့် ရောယှက်နေသည်။ ဝေ့ဝူယင်သည် ဤကဲ့သို့ ပြတ်တောက်နေသော ရည်ရွယ်ချက် အမျိုးအစားနှင့် ရင်းနှီးလှသည်၊ အဘယ်ကြောင့်ဆိုသော် သူသည် သေမျိုး ရည်ရွယ်ချက် ကို အပြည့်အဝ နားလည်သဘောပေါက်ပြီး သေမျိုး တာအို ၏ ကောင်းချီးကို ရရှိကာ သေမျိုး သူတော်ကောင်း ခါးပတ်ကို ရရှိခဲ့စဉ်က သူ၏ ကျင့်ကြံခြင်း လမ်းစဉ်တစ်လျှောက်ရှိ သေမျိုးရည်ရွယ်ချက်မှာ ယခုကဲ့သို့ပင် ပြတ်တောက်နေခဲ့သည်ဟု ခံစားခဲ့ရသောကြောင့် ဖြစ်သည်။ သူ၏ ဒုတိယမြောက် စိတ်ဝိညာဉ်သည် စိတ်ဝင်တစားဖြင့် သူ၏ ဝိညာဉ်အာရုံနှင့် ကောင်းကင်မျက်လုံးများမှတစ်ဆင့် ပြင်းထန်စွာ စောင့်ကြည့်လေ့လာနေတော့သည်။

"မလုပ်နဲ့..."

ရုတ်တရက်... အမှောင်ဟင်းလင်းပြင်အတွင်း စကားလုံးတစ်လုံး ဟိန်းထွက်လာကာ ကောင်းကင်ဂြိုဟ်ပတ်လမ်းများကို တုန်ခါစေပြီး အာကာသနှင့် အချိန်အလွှာအားလုံးကို ဖြတ်သန်း၍ တားဆီးမရနိုင်အောင် ပျံ့နှံ့သွားသည်။ ၎င်းမှာ ညဉ့်ဦးယံ နိမိတ်ဖတ်သူများမှ အထွတ်အထိပ် သူတော်စင်၏ တားဆီးခြင်း ခံထားရသော နေမင်းပမာဏရှိသည့် ကြယ်တံခွန်ကြီးထံမှ ထွက်ပေါ်လာခြင်း ဖြစ်သည်။

စုရီသည် ထိုနေမင်းရှိရာ အဝေးတစ်နေရာသို့ ခေတ္တကြည့်လိုက်ပြီး လုံးဝ မပျောက်ကွယ်တော့မည့်အလား အနှိုင်းမဲ့ ပြုံးပြလိုက်သည်။

"ဒါ ငါ့ရဲ့ တိုက်ပွဲပဲ"

ထို့နောက် ဓားငယ်လေးမှာ မြန်ဆန်စွာ တုန်ခါလာတော့သည်။ သူက စကားတစ်လုံးကို ကြေညာလိုက်၏။

"အားလုံး..."

ထိုဓားမှာ သူ၏ ရင်ဘတ်အတွင်းသို့ ဝင်ရောက်သွားပြီး ခြောက်သွေ့သော မြေဆီလွှာအတွင်းသို့ ဆီးနှင်းစက်များ စိမ့်ဝင်သွားသကဲ့သို့ သူ့ကိုယ်အတွင်း ပျောက်ကွယ်သွားတော့သည်။

ကောင်းကင် တရားသူကြီး၏ အာရုံစိုက်မှုမှာ ချက်ချင်းပင် စုရီထံသို့သာ ပြောင်းလဲသွားတော့သည်။ ယွီပေါင်ယွဲ့သည် အသက်ဝဝ ရှူနိုင်ပြီဟု ခံစားလိုက်ရသည်။ ကြယ်တာရာများအကြား ပျံ့နှံ့နေသော၊ ထိတ်လန့်တုန်လှုပ်နေကြသော မဟာမိတ်များမှာလည်း ကြီးမားသော ပြစ်ဒဏ်မှ လွတ်ငြိမ်းချမ်းသာခွင့် ရလိုက်သလို ခံစားလိုက်ရသည်။

ဝတ်ရုံဖြူနှင့် စုရီသည် အမှောင်ဟင်းလင်းပြင်အတွင်း တစ်ဦးတည်း မတ်မတ်ရပ်နေသည်။ သူသည် ကမ္ဘာကြီးကို နောင်တကင်းမဲ့စွာ စိန်ခေါ်ဝံ့သော အနှိုင်းမဲ့ အထီးကျန် ဆန်လှသည့် သူရဲကောင်း ပုံရိပ်ကို ပိုင်ဆိုင်ထားသည်။ ကောင်းကင် တရားသူကြီး၏ အာရုံစိုက်မှု အားလုံးမှာ စုရီက ကံကြမ္မာ အဆက်အသွယ် အားလုံးကို မိမိကိုယ်ကိုယ်ထံသို့ ခေါ်ယူလိုက်သကဲ့သို့ သူ့အပေါ်၌သာ ကျရောက်နေတော့သည်။

၎င်းမှာ ကြည့်ရှုသူများကို ဇဝေဇဝါ ဖြစ်စေသော နက်ရှိုင်းသည့် လုပ်ဆောင်ချက်တစ်ခု ဖြစ်သော်လည်း သူတို့မှာ ဆက်လက် စောင့်ကြည့်နေကြဆဲ ဖြစ်သည်။ ကြည့်ရှုသူ အများစုမှာ စုရီ ဘာလုပ်လိုက်သည်ကို နားမလည်ကြသော်လည်း နားလည်သူများမှာမူ သူသည် ပြန်လည်ဝင်စားလာသူဖြစ်ကြောင်းနှင့် ၎င်းမှာ မည်သို့ ဖြစ်နိုင်ခဲ့သည်ဆိုသော သူ၏ မူလအစ လျှို့ဝှက်ချက်ကို အနည်းငယ်မျှ မြင်တွေ့လိုက်ရပြီ ဖြစ်သည်။ သူသည် နောင်တစ်ချိန်တွင် ဂလက်ဆီအချင်းချင်း ကြား၌ပင် တုန်လှုပ်သွားစေမည့် ကြီးမားသော လျှို့ဝှက်ချက်ကြီးကို ထုတ်ဖော်လိုက်ခြင်း ဖြစ်သည်။ အကယ်၍ သူသာ အသက်ရှင်ခဲ့လျှင်...။

ဝေ့ဝူယင်သည် ဤအရာကို မျှော်လင့်မထားခဲ့သော်လည်း သူကမူ ဝမ်းမြောက်စွာ ကြိုဆိုနေသည်။ စုရီ၏ ကိုယ်ပေါ်တွင် ယခင်က ငြိမ်သက်နေသော ကောင်းကင်တာအို အော်ရာများမှာ ကြောက်မက်ဖွယ်ကောင်းသော နှုန်းဖြင့် စုစည်းနေပြီး မည်သည့်အတားအဆီးမျှ မရှိတော့သည်ကို သူ အာရုံခံမိလိုက်သည်။

‘ငါ့ကို နောက်ထပ် ပြပါဦး...’

ဝေ့ဝူယင်က ကံကြမ္မာလှိုင်းလုံးများအရ ခန့်မှန်းကြည့်မည်ဆိုလျှင် ကမ္မ တန်ဖိုးပေါင်း တစ်သိန်းနီးပါးခန့်မှာ ဤနောက်ဆုံး အားစိုက်မှုတွင် လျင်မြန်စွာ ကုန်ဆုံးသွားနေသကဲ့သို့ ခံစားရသည်။

ကောင်းကင် တရားသူကြီး၏ အာရုံစိုက်မှု ပြောင်းလဲသွားပြီးနောက်၊ ကျိန်စာနှင့် ၎င်းကို ချိုးဖောက်မှု သို့မဟုတ် အခြေအနေများအပေါ် အတည်ပြုခြင်းမှာ မျက်စိတစ်မှိတ်အတွင်း ပြီးဆုံးသွားသည်။ လျှို့ဝှက်ပြစ်ဒဏ် ပေါက်ကွဲထွက်ပေါ်တော့မည်. စုရီသည် စိမ်းပြာရောင် ဓားရိုးပါသော ပွင့်လင်းမြင်သာသည့် ဓားတစ်စင်းကို ထုတ်ယူလိုက်သည်။ ဓားသွားမှာ မြူနှင်းကဲ့သို့ ရောင်စုံအလင်းတန်းများဖြင့် တောက်ပနေသည်။ သူသည် သူ၏ အတိတ်ဘဝမှ ဓားကို ကိုင်ဆောင်ထားရသဖြင့် အနည်းငယ် စိတ်လှုပ်ရှားနေမိသည်။

"တဒင်္ဂနယ်မြေဓား... ငါတို့ နောက်ထပ် တစ်ကြိမ်လောက် ကပြကြဦးမလား..."

အမှောင်ဟင်းလင်းပြင်အတွင်း ပဲ့တင်ထပ်သွားသော ဓားတုန်ခါသံ ထွက်ပေါ်လာသည်

"လျှို့ဝှက်ကောင်းကင် ရတနာဓား..."

ထျန်းရှီယာက အံ့ဩတကြီး အော်ဟစ်လိုက်သည်။ အခြားသူများလည်း စုရီ၏ ဓားကြောင့် အံ့အားသင့်နေကြသည်။ ယခင်က သူတော်စင်နှင့် တိုက်ခိုက်စဉ်တွင် သူသည် ဓားကို မထုတ်ဘဲ လက်ကိုသာ ဓားအဖြစ် သုံးခဲ့ခြင်း ဖြစ်သည်။

လျှို့ဝှက်ကောင်းကင် အဆင့် ပစ္စည်းများသည် အလွန် အဖိုးတန်လှပြီး ကောင်းကင် ရတနာများထက် များစွာ သာလွန်သည်။ အထွတ်အထိပ် မျှော်စင် များသည်လည်း လျှို့ဝှက်-ကောင်းကင် ရတနာများ ဖြစ်ကြပြီး ၎င်းတို့သည် ကောင်းကင်၏ စွမ်းအားကို တိုက်ရိုက် ရယူနိုင်သည်။ လျှို့ဝှက်ကောင်းကင် ရတနာများနှင့် ကောင်းကင် ရတနာတို့၏ ခြားနားချက်မှာ ကောင်းကင်၏ စွမ်းအားကို ရယူပုံချင်း ကွဲပြားခြင်း ဖြစ်သည်။ ၎င်းမှာ ကျင့်ကြံသူများ၏ ကောင်းကင် တံခါး နှင့် ဥပဒေသများ၏ အာဏာစက်တို့ ခြားနားသကဲ့သို့ပင် ဖြစ်သည်။

ဥပဒေသ အာဏာစက်များသည် ကျင့်ကြံသူများအား သူတို့၏ နားလည်သဘောပေါက်မှုနှင့် အပ်နှင်းခံရသော အာဏာ အဆင့်အတိုင်း ကောင်းကင်၏ နယ်ပယ်သုံးထောင်တွင် ကိန်းအောင်းနေသော ဥပဒေသများကို မိမိတို့၏ အလိုရှိရာအတိုင်း လှုပ်ရှားစေနိုင်သည်။ ထိုသို့ပြုလုပ်ရန် ဝိညာဉ်အင်အားကို ကုန်ဆုံးစေ၏။ မိမိတို့ကိုယ်စား လုပ်ဆောင်ရန် ဥပဒေသများကို ဆင့်ခေါ်နိုင်သော်လည်း၊ ဥပဒေသများ၏ အာဏာသည် ကောင်းကင် စွမ်းအင်ကို တိုက်ရိုက်အသုံးပြုခွင့် မပေးပေ။

တစ်ဖက်တွင်မူ ကောင်းကင်တံခါးသည် ကျင့်ကြံသူများအား ကောင်းကင်စွမ်းအင်ကို စုဆောင်းခွင့်ပြုသည်။ ၎င်းကို ကောင်းကင်ရှန့်ထို များအတွက် ကောင်းကင်ရောင်ခြည် ဟူသော အခြေခံပုံစံဖြင့် ရရှိပြီး မိမိတို့ကိုယ်ကို နတ်ဘုရားကဲ့သို့သော အဆင့်များအထိ အစွမ်းထက်လာစေကာ ကျင့်ကြံခြင်းအခြေခံကို ပိုမိုခိုင်မာစေသည်။

ဝေ့ဝူယင်အား ကောင်းကင်စစ်ဝိညာဉ်က ဥပဒေသများသည် ပြင်ပစွမ်းအားများသာဖြစ်ပြီး ကျင့်ကြံခြင်းအခြေခံအတွင်းသို့ အပြည့်အဝ ပေါင်းစပ်ထားခြင်းမျိုး မဟုတ်သဖြင့် ကျင့်ကြံခြင်းအစောပိုင်းအဆင့်များတွင် ၎င်းတို့အပေါ် အလွန်အကျွံ မမှီခိုရန် အကြိမ်ကြိမ် သတိပေးခဲ့ဖူးသည်။ ၎င်းမှာ ကျင့်ကြံသူတစ်ဦး ပဲ့တင်ထပ်ဝိညာဉ်နယ်မြေသို့ မရောက်မချင်း မှန်ကန်နေဆဲဖြစ်သည်။

လျှို့ဝှက်-ကောင်းကင် အဆင့်ရှိ ရတနာတစ်ခုသည် စစ်မှန်သော ကောင်းကင်အရှိန်အဝါကို ပိုင်ဆိုင်ထားပြီး ကောင်းကင်၏ နယ်ပယ်တစ်ခုကို တုပနိုင်သည့် အခြေခံနှင့် ချိတ်ဆက်ထားလေ့ရှိသည်။ သို့သော်လည်း ကျင့်ကြံသူအများစုမှာ ဖန်တီးရပိုမိုလွယ်ကူသော ကောင်းကင်ရတနာများ ကိုသာ အားကိုးကြသည်။ ၎င်းတို့မှာ သော့တစ်ခုပြုလုပ်သကဲ့သို့ဖြစ်ပြီး လုံလောက်သော ဝိညာဉ်အင်အားရှိသူ မည်သူမဆို အသုံးပြုနိုင်သည်။ ဝေ့ဝူယင်သည် ဤအချက်ကြောင့်ပင် အဆုံးမဲ့ဟင်းလင်းပြင်ကြေမုံကို သိမ်းပိုက်နိုင်ခဲ့ခြင်းဖြစ်သည်။

မဟာပုရောဟိတ် အမှောင်လှိုင်းမှာမူ စိတ်လှုပ်ရှားမှုကြောင့် မျက်လုံးများ ပြူးကျယ်နေတော့သည်။ "သူ အဲဒါကို သုံးလိုက်ပြီ" ဟူသော အတွေးတစ်ခုတည်းဖြင့် သူ အောင်ပွဲခံနေမိသည်။ သူသည် ဓားကို ဂရုမစိုက်ပေ။ စုရီအသုံးပြုလိုက်သော မန္တန်ကို ထောက်ပံ့ပေးသည့် အရင်းအမြစ်ကိုသာ သူ ဂရုစိုက်သည်။ အကျိုးဆက်အားဖြင့် သူ၏ မူလပန်းတိုင်မှာ တစ်ဝက်တစ်ပျက် အောင်မြင်သွားပြီဖြစ်သည်။

စုရီသည် ဤအခြေအနေမှ အသက်ရှင်သွားလျှင်ပင် ယနေ့မှစ၍ ကောင်းကောင်းအိပ်စက်နိုင်တော့မည်မဟုတ်ချေ။ အေးအေးဆေးဆေး နားနေနိုင်တော့မည်မဟုတ်ပေ။ အမှန်စင်စစ် အမှောင်ဟင်းလင်းပြင်တစ်ခွင်တွင် ဝိညာဉ်အာရုံများ ဆင်းသက်လာသည်နှင့်အမျှ လောဘတကြီး စိုက်ကြည့်နေသော မျက်လုံးများမှာ ပေါ်ထွက်လာနေပြီဖြစ်သည်။ ဝေ့ဝူယင်သည် ထိုအထဲရှိ ယုတ်မာသော လိုအင်ဆန္ဒများကို အာရုံခံမိနေပြီး တောက်ပသော ကြယ်နန်းတော် နန်းတော်သခင်ပင်လျှင် ချွင်းချက်မဟုတ်ချေ။ မည်သူမျှ အပြည့်အဝ တုံ့ပြန်ခြင်းမပြုနိုင်မီမှာပင် လျှို့ဝှက်ပြစ်ဒဏ်သည် ဆင်းသက်လာတော့သည်။

“...”

ရွှေရောင်လွှမ်းသော ရောင်စုံအလင်းတန်းတစ်ခု ရောက်ရှိလာသည်။ ၎င်း၏ မူလအစမှာ အချိန်နှင့် အာကာသတို့၏ ခမ်းနားသော ပေါ်ထွန်းမှုဖြစ်သည့် အချိန်မြစ် နှင့် မူလစမှတ်တို့မှ ပစ်လွှတ်လိုက်သည့်အလား ခံစားရသည်။ မည်သည့်နေရာ သို့မဟုတ် မည်သည့်အချိန်မှ ရောက်လာသည်ကို ပြောရန်မဖြစ်နိုင်ဘဲ ဤနေရာသို့ ရောက်ရှိနေပြီဆိုသည်ကိုသာ သိနိုင်သည်။

စုရီသည် ထိုတောက်ပသော အလင်းတန်း၏ အရောင်အဝါအောက်တွင် အလွန်တည်ငြိမ်နေသည်။ သူ၏ လက်ထဲရှိ တဒင်္ဂနယ်မြေဓား တွင် စတုတ္ထအဆင့် အခြေတည် ဓားဝိညာဉ်ကို ထည့်သွင်းလျက် သူ လွှဲယမ်းလိုက်သည်။ ၎င်းမှာ တစ်ချက်တည်းသော လွှဲယမ်းမှုဖြစ်သော်လည်း သူ၏ အနှိုင်းမဲ့ဓားရည်ရွယ်ချက် နှင့် ကျင့်ကြံခြင်းအခြေခံတစ်ခုလုံး ပါဝင်နေသည်။

ရွှမ်း...

ဓားအလင်းတန်းတစ်ခု လင်းလက်သွားသည်။ အာကာသ၊ အချိန်နှင့် ကောင်းကင်တစ်ခုလုံးကို ဖြတ်သန်းသွားသော ထိုအလင်းတန်းသည် ပုံမှန်အားဖြင့် အထွတ်အထိပ်သို့ရောက်နေသော ကောင်းကင်ငယ် တမန်တော်တစ်ဦး၏ အင်အားကို သယ်ဆောင်ထားသည်။ ၎င်းကို လျှော့တွက်၍မရနိုင်ပေ။

ယခင်ကကဲ့သို့ပင် ကြီးမားသော ပေါက်ကွဲသံ သို့မဟုတ် ခရမ်းရောင်ဟိန်းသံများ မထွက်ပေါ်လာပေ။ ဖြူစင်သော ဓားအလင်းပင်လယ်သည် အရွယ်အစားတူညီသော ရွှေရောင်လွှမ်းသည့် ရောင်စုံအလင်းတန်းကို ပိုင်းဖြတ်လိုက်သည်။ တောက်ပသော အလင်းတန်းတစ်ခုသည် အမှောင်ဟင်းလင်းပြင်အတွင်း မိုင်ပေါင်း ထရီလီယံချီ၍ မျက်စိတစ်မှိတ်အတွင်း ပျံ့နှံ့သွားသည်။

အားလုံး သတိပြန်ဝင်လာသောအခါ စုရီသည် ဓားကိုကိုင်လျက် ထိုနေရာတွင်ပင် ရပ်နေဆဲဖြစ်သဖြင့် သူတို့၏ နှလုံးသားများမှာ ပြင်းထန်စွာ ခုန်နေတော့သည်။ သူ၏ ဝတ်ရုံမှာ စုတ်ပြတ်နေပြီး ဓားကိုင်ထားသော လက်မောင်းအရေပြားပေါ်တွင် သွေးများပန်းထွက်နေသည့် ပြတ်ရှရာများ ရှိနေသည်။ နီမြန်းသော သွေးစက်များသည် အလွန်ပူပြင်းသော အပူချိန်ဖြင့် စီးကျနေပြီး သူ၏ ရဲရင့်သောအရှိန်အဝါဖြင့် မြင်ကွင်းကို အရောင်ခြယ်လိုသည့်အလားပင်။ သူ ထိုနေရာတွင် ရပ်နေသည်။

အသက်ရှင်နေဆဲ...။ သူ အသက်ရှင်နေပေသေးသည်။

တဒင်္ဂနယ်မြေဓား မှ ရောင်စုံအလင်းမှာ မှိန်ဖျော့သွားပြီး မျက်နှာပြင်တွင် အက်ကြောင်းပါးလေး တစ်ခု၊ နှစ်ခု ပေါ်နေသည်။ သို့သော်လည်း ၎င်းမှထွက်ပေါ်လာသော ဓားတုန်ခါသံမှာ အင်အားမလျော့ပါးသွားချေ။ အမှန်စင်စစ် ဓားအလင်းများမှာ ဓားသွားတစ်လျှောက် လှပစွာ စီးဆင်းနေပြီး ယခင်ကထက် ပိုမိုပြင်းထန်စွာ မြည်ဟီးနေကာ စိတ်လှုပ်ရှားမှုများဖြင့် ပြည့်နှက်နေသည်။ စုရီသည် သူ၏ ဓားထံမှ လိုအင်ဆန္ဒကို ခံစားမိသဖြင့် ပြုံးလိုက်ပြီး ဓားကို အမှောင်ဟင်းလင်းပြင်ဆီသို့ ညွှန်ပြလိုက်သည်။

"ဒါပဲလား..."

***

အပိုင်း(၂၃၁၄)

"ဒါပဲလား..."

စကားသုံးလုံးတည်း။

သို့သော်လည်း ၎င်းက အားလုံး၏ နှလုံးသားကို လှုပ်ခတ်သွားစေသည်။ လျှို့ဝှက်အရှင် တစ်ဦးသည် မိုးကုပ်စက်ဝိုင်း သန့်စင်ခြင်းမျှော်စင် မှ အစစ်အမှန် ပဲ့တင်ထပ်ဝိညာဉ် အဆင့် ကျင့်ကြံသူထက် များစွာသာလွန်သော အခြေအနေဖြင့် အသက်ရှင်နိုင်ခဲ့သည်။

ပိန်လှီသော အမျိုးသမီး အထွတ်အထိပ်သူတော်စင်မှာလည်း လုံးဝ တုန်လှုပ်သွားရသည်။ ၎င်းမှာ မည်ကဲ့သို့သော စွမ်းအားမျိုးနည်း။ သူမ ရင်ဆိုင်ခဲ့ရသော ထိုရောင်စုံအလင်းတန်းထက်ပင် စုရီ၏ ဓားအလင်းမှ အန္တရာယ်အငွေ့အသက်ကို ပိုမိုခံစားနေရသည်။ သာမန် လျှို့ဝှက်အရှင် တစ်ဦးက အဘယ်ကြောင့် ဤမျှအထိ စက်ဆုပ်ဖွယ်ကောင်းလောက်အောင် သန်မာနေရသနည်း။

ထို့အပြင် သူ ကိုင်ဆောင်ထားသည့်ဓား...။ ထိုဓားက ဒဏ္ဍာရီလာ တဒင်္ဂနယ်မြေဓားလော။ သူမ၏ မျက်လုံးများထဲတွင် ယခင် မှတ်ဉာဏ်များ၊ သူမ ဖတ်ခဲ့ဖူးသမျှ သမိုင်းစာအုပ်များနှင့် ကြားဖူးသမျှ ပုံပြင်များမှာ ဝင်ရောက်လာခဲ့တော့သည်။ ထိုဓားကို မှတ်မိသူတိုင်းကဲ့သို့ပင် သူမ၏ နှလုံးသားမှာ ပြင်းထန်စွာ ခုန်နေပြီး စုရီ၏ ယခင်ဘဝကို အတည်ပြုပေးနေတော့သည်။

အမှန်စင်စစ် သူမသည် ယခင်က မိုးကုပ်စက်ဝိုင်း မျှော်စင် ကို အသုံးပြုခဲ့ဖူးသည်၊ သို့သော် ၎င်းသည် လျှို့ဝှက်-ကောင်းကင် ဂုဏ်သတ္တိများအားလုံး ဆုံးရှုံးခဲ့ပြီး ကြီးမားသော ပျက်စီးမှုများကို ကြုံတွေ့ခဲ့ရသော်လည်း၊ ဤဓားမှာမူ အသက်ရှင်ကျန်ရစ်နေဆဲဖြစ်ရာ ၎င်း၏ အရည်အသွေးမှာ နှိုင်းယှဉ်၍မရအောင် မြင့်မားလှပေသည် စုရီ၏ စိန်ခေါ်စကားကို တုံ့ပြန်သည့်အလား ဒုတိယမြောက် လျှို့ဝှက်ပြစ်ဒဏ် ဆင်းသက်လာပြန်သည်။

စုရီမှာမူ ယခင်အတိုင်းပင် ရင်ဆိုင်၏။ ဓားကို ကိုင်ဆွဲလျက် သူ၏ အကန့်အသတ်ကို တစ်ချက်တည်းဖြင့် ထုတ်ဖော်လိုက်သည် ဓားအလင်းမှာ နောက်ထပ် အဆင့်တစ်ခုသို့ အတင်းအကျပ် ရောက်ရှိသွားသည့်အလား ပိုမိုပြင်းထန်လာသည် သူသည် လွန်ခဲ့သော ခေတ္တခဏကထက် ပိုမိုသန်မာလာခဲ့လေပြီ။

သူတို့ ထိပ်တိုက်တွေ့မှုမှ ထွက်ပေါ်လာသော အလင်းတန်းများ ပျောက်ကွယ်သွားသောအခါ စုရီသည် ထိုနေရာတွင် မတ်မတ်ရပ်နေဆဲဖြစ်ပြီး သူ၏ မျက်လုံးများမှာ တည်ငြိမ်ကာ သူ၏ အရှိန်အဝါမှာလည်း ဓားတစ်စင်းကဲ့သို့ ထက်ရှလျက် အတားအဆီးမဲ့နေသည်။ သူသည် နားလည်ရခက်သော ထိုအနှိုင်းမဲ့စွမ်းအားကို ရင်ဆိုင်ရင်း အစစ်အမှန် တန်ခိုးရှင်တစ်ဦးကဲ့သို့ ထာဝရတည်မြဲခြင်း ခံစားချက်ကို ပေးစွမ်းနေသည်။

"ဓားတန်ခိုးရှင်" ဟူသော စကားလုံးများသည် ဝိညာဉ်ကွန်ရက်တစ်ခွင်တွင် ပဲ့တင်ထပ်သွားသည်။ ဝေ့ဝူယင်၏ မျက်လုံးများမှာ တောက်ပလာသည်။ စုရီသည် သူ၏ နှာခေါင်းမှ စီးကျလာသော ပူနွေးသော သွေးကြောင်းကို ပွတ်သပ်လိုက်ပြီး သူ၏ ထက်ရှသောအကြည့်ဖြင့် အမှောင်ဟင်းလင်းပြင်ကို စိုက်ကြည့်နေသည်။

ယွီပေါင်ယွဲ့၏ မျက်လုံးများမှာ စိုစွတ်နေ၏။ သူမ၏ နှလုံးသားမှာ စိုးရိမ်မှုများ လွှမ်းမိုးနေသော်လည်း တစ်ဖက်တွင်မူ လေးစားကြည်ညိုမှုတစ်မျိုး ပေါ်ထွက်လာပြီး စုရီကို ကြယ်တာရာကောင်းကင်တစ်ခွင်တွင် အနှိုင်းမဲ့သူအဖြစ် ထာဝရ မှတ်တမ်းတင်လိုက်တော့သည်။

"သူ့ရဲ့ ရည်ရွယ်ချက်က...."

သခင်လေးရှန့်သည် အသေအချာ စောင့်ကြည့်နေရင်း စုရီ၏ ရည်ရွယ်ချက်မှာ ပြောင်းလဲတိုးတက်နေသည်ဟု ခံစားလိုက်ရသည်။ ရည်ရွယ်ချက် ဆိုသည်မှာ ကျင့်ကြံခြင်းဝိညာဉ်၏ ရုပ်ပိုင်းဆိုင်ရာမဟုတ်သော တည်ရှိမှုမှ ဆင်းသက်လာသည့် ရည်ရွယ်ချက်ကို ဖော်ပြခြင်းဖြစ်သည်။ ၎င်းကို အသုံးပြု၍ ကောင်းကင်၏ နက်ရှိုင်းသော ဂုဏ်သတ္တိများကို တုပနိုင်သည်။

ဥပမာအားဖြင့် ရေ ရည်ရွယ်ချက်ကို အသုံးပြု၍ ရေချီကို ဖန်တီးခြင်း သို့မဟုတ် ထိုသဘာဝရှိသော တည်ရှိပြီးသား စွမ်းအင်များကို စုဆောင်းခြင်းမျိုး ဖြစ်သည်။ လောကနှလုံးသား ရည်ရွယ်ချက် ကဲ့သို့သော အရာများသည် စွမ်းအင်ပုံစံအားလုံးကို ထိုသတ်မှတ်ထားသော စွမ်းအင်အမျိုးအစားအဖြစ်သို့ ပြောင်းလဲပေးနိုင်သည်။

၎င်းမှာ ပျံ့နှံ့နေသော ဝိညာဉ် ရည်ရွယ်ချက်ကို ဖော်ပြခြင်းဖြစ်သည်။ ၎င်းသည် ပုံစံသုံးမျိုးဖြင့် ရှိသည် - မျိုးစေ့ ၊ နိုးထခြင်းနှင့် လောကနှလုံးသား တို့ဖြစ်သည်။ မျိုးစေ့ရည်ရွယ်ချက်သည် ကနဦးပုံစံဖြစ်ပြီး လူတစ်ဦး၏ နက်ရှိုင်းသော နားလည်သဘောပေါက်မှုများကို စုဆောင်းထားခြင်းဖြစ်သည်။ ၎င်းသည် ခန္ဓာကိုယ်တွင်းရှိ မသတ်မှတ်ရသေးသော စွမ်းအင်များနှင့် အဆီအနှစ်များကို ပြောင်းလဲခွင့်ပြုသည်။ ဤနည်းအားဖြင့် ဒြပ်စင် မွေးဖွားခြင်း အဆင့် အတွင် ကျင့်ကြံသူများသည် အခြေခံ ဒြပ်စင် ၄ ပါး သို့မဟုတ် အဆင့်မြင့် ဒြပ်စင် ၅ ပါးကို ပြောင်းလဲထိန်းချုပ်နိုင်ခဲ့ပြီး ပူခြင်း၊ အေးခြင်း၊ မာခြင်း သို့မဟုတ် ပျော့ခြင်းစသည့် ဂုဏ်သတ္တိများကို တုပခဲ့ကြသည်။

နိုးထခြင်း အဆင့် ရည်ရွယ်ချက်သည် မိမိကိုယ်တွင်းရှိ စွမ်းအင်များနှင့် ပြင်ပရှိ ထိုသဘာဝတူစွမ်းအင်များကို မိမိအတွင်းသို့ ထည့်သွင်းခြင်းဖြင့် အပြည့်အဝ ထိန်းချုပ်ခွင့်ပြုသည်။ လောကနှလုံးသားမှာမူ ပြင်ပရှိ စွမ်းအင်များနှင့် အဆီအနှစ်များကိုပါ ပြောင်းလဲခွင့်ပြုသည်။ လောကနယ်မြေ များနှင့် ခြားနားစွာပင် ၎င်းသည် ထိန်းချုပ်ရုံသာမကဘဲ မီးစွမ်းအင်များကို ရေစွမ်းအင်များအဖြစ်သို့ ပြောင်းလဲပစ်ခြင်းဖြင့် အရာရာ၏ သဘာဝကို အံ့ဩဖွယ်ကောင်းလောက်အောင် ပြန်လည်ရေးသားပစ်သည်။ ဝေ့ဝူယင်သည် ဤအချက်ကို အသုံးပြု၍ အလွန်ရှားပါးသော အခြေအနေများတွင်သာ တည်ရှိတတ်သည့် ဒြပ်စင်များ၏ မူလစွမ်းအင်နှင့် အဆီအနှစ်များ ကို ဖန်တီးခဲ့သည်။

စုရီ၏ ဓားရည်ရွယ်ချက် သည် သူ၏ ထိန်းချုပ်မှုနယ်ပယ်အတွင်းရှိ အဆီအနှစ်နှင့် စွမ်းအင်တိုင်းကို သူအသုံးပြုမည့် ဓားစွမ်းအင် အဖြစ် ပြောင်းလဲနေသည်ကို တစ်ကမ္ဘာလုံးက စောင့်ကြည့်နေကြသည်။ သူသည် သူ၏ ဓားရည်ရွယ်ချက်ကို အသုံးပြု၍ ကမ္ဘာကြီး၏ အင်အားအနည်းငယ်ကို ချေးယူကာ တိုက်ခိုက်နေခြင်းဖြစ်သည်။

“လောကနှလုံးသား... ဓားရည်ရွယ်ချက် လောက”

သခင်လေးရှန့်သည် ဒဏ္ဍာရီလာ ကျင့်ကြံခြင်း အောင်မြင်မှုတစ်ခုကို တွေးမိလိုက်သဖြင့် မျက်လုံးများ ပြူးကျယ်သွားသည်။ ထိုရည်ရွယ်ချက် ကျင့်ကြံခြင်းအဆင့်မှာ ရတနာချိုင့်ဝှမ်း ဂလက်ဆီ တွင် နှစ်ပေါင်း တစ်သန်းကျော်အတွင်း မည်သူမျှ မထုတ်ဖော်နိုင်ခဲ့သဖြင့် ပျောက်ကွယ်သွားပြီဟု ယူဆထားကြသည်။ ချွင်းချက်အနေဖြင့် သူ၏ မိခင်တွင်သာ ရှိခဲ့သည်။

သူသည် အသေအချာ စောင့်ကြည့်နေရင်း နှလုံးသားမှာ မြန်ဆန်စွာ ခုန်လာတော့သည်။ စုရီ ထိုနေရာတွင် ရပ်နေစဉ် ဓားအလင်းတန်းများသည် သူ၏ ခန္ဓာကိုယ်ပတ်လည်တွင် စုစည်းလာပြီး အာကာသနှင့် အချိန်၏ အမျိုးမျိုးသော အတိုင်းအတာများမှ စိမ့်ထွက်လာကာ နေရာအနှံ့အပြားမှ ရောက်ရှိလာနေသည်။ ၎င်းမှာ ဟင်းလင်းပြင် အတွင်းမှ လာတာပင် ဖြစ်ကောင်း ဖြစ်နိုင်ပေသည်။

ဟင်းလင်းပြင် ဝိညာဉ်...

ဟင်းလင်းပြင် ဝိညာဉ် ရည်ရွယ်ချက်...

...

ဟင်းလင်းပြင် ဝိညာဉ် ရည်ရွယ်ချက်...

ထိပ်တန်းအဆင့် ကျင့်ကြံသူများသာလျှင် မိမိတို့၏ ကျင့်ကြံခြင်းအဆင့်ထက် ကျော်လွန်သော ရည်ရွယ်ချက် လမ်းစဉ်ကို ခိုင်မာစွာ လျှောက်လှမ်းနိုင်ကြသည်ဖြစ်ရာ စုရီသည် ယနေ့တွင် ထရီလီယံပေါင်းများစွာသော ကြည့်ရှုသူများ၏ ရှေ့မှောက်၌ မိမိကိုယ်ကို သက်သေပြနေပြီဖြစ်သည်။

“ဒီလောက်အထိ ပြင်းထန်တဲ့ ကံကြမ္မာလှိုင်းလုံးတွေက ကြီးမားတဲ့ ဉာဏ်အလင်းပွင့်မှုကို ဖြစ်ပေါ်စေတာပဲ... ကောင်းကင်တာအိုက သူ့အတွက် ရှင်သန်ရာလမ်းစလေးတစ်ခုရဖို့ အစွမ်းကုန် ကြိုးစားပေးနေတာပဲ...”

ဝေ့ဝူယင် တွေးတောနေမိသည်။ ကောင်းကင်တာအိုက စုရီအား ဟင်းလင်းပြင် ဝိညာဉ် ရည်ရွယ်ချက်ဆီသို့ မည်သို့ လှုံ့ဆော်ပေးနေသည်ကို သူ စိတ်ဝင်တစား စောင့်ကြည့်နေသည်။ ဝေ့ဝူယင်ကိုယ်တိုင်ပင် ဤရည်ရွယ်ချက်အဆင့်နှင့် ပတ်သက်၍ အတွေ့အကြုံမရှိချေ။ သို့သော်လည်း... စုရီသည် ပိုမိုမြင့်မားသော ရည်ရွယ်ချက်အဆင့်တစ်ခုကို တည်ဆောက်ရန် ကြိုးစားနေသည်ကို သူ နားလည်သည်။

အာကာသနှင့် အချိန် အာဏာ နှစ်ခုလုံးကို ပိုင်ဆိုင်ထားသော အစစ်အမှန် ဟင်းလင်းပြင်နဂါး တစ်ဦးအနေဖြင့် ဝေ့ဝူယင်သည် အာကာသ၏ အတိုင်းအတာများ၊ အချိန်၏ စီးဆင်းမှုများနှင့် စကြာဝဠာ၏ အခြေခံစွမ်းအင်ဖြစ်သော ဟင်းလင်းပြင်စွမ်းအင်တို့မှာ ပြင်ပအားတစ်ခုကြောင့် ပြောင်းလဲသွားပြီး အထွတ်အထိပ်သူတော်စင်များ၏ ပဲ့တင်ထပ်ချီ ထက် မနိမ့်ကျသော ဓားစွမ်းအင်အဖြစ်သို့ ကူးပြောင်းသွားသည်ကို ထိတွေ့ခံစားနေရသည်။

အမှန်စင်စစ်... စုရီ၏ ရည်ရွယ်ချက်သည် စကြာဝဠာကြီး၏ သေးငယ်သော အစိတ်အပိုင်းလေးတစ်ခုကို လွှမ်းမိုးချုပ်ကိုင်ထားခြင်းဖြစ်သော်လည်း စုရီအတွက်မူ ၎င်းမှာ အစစ်အမှန် နတ်ဘုရားများ၏ စွမ်းအားနှင့် တန်းတူပင် ဖြစ်သည်။ ဤသည်မှာ ရည်ရွယ်ချက်ပင်။ ဤသည်မှာ စစ်မှန်သော ရည်ရွယ်ချက်ပင်...။

ဟင်းလင်းပြင်အတွင်း ရပ်နေရင်း လက်ချောင်းများနှင့် ဓားသွားပေါ်မှ နွေးထွေးသော သွေးများ စီးကျနေသော်လည်း စုရီ၏ ပုံရိပ်မှာ ဖန်ဆင်းခြင်းလောကတစ်ခုလုံးတွင် အနှိုင်းမဲ့သော လွတ်လပ်သည့် ဓားတန်ခိုးရှင်တစ်ဦးနှင့် တူနေသည်။ ကြောက်ရွံ့ခြင်းကင်းမဲ့မှု၊ အုပ်စိုးလွှမ်းမိုးမှုနှင့် စိတ်ဓာတ်တက်ကြွစေမှုတို့ကို သူသည် အမြင့်ဆုံးအဆင့်အထိ ဖော်ဆောင်နေသည်။ သခင်လေးရှန့်သည် စုရီ၏ ဓားရည်ရွယ်ချက် ဖော်ဆောင်မှုကို အသေအချာ စောင့်ကြည့်နေသည်။ လှပသော ဓားအလင်းလှိုင်းများကြားတွင် စုရီသည် စတုတ္ထအဆင့် အခြေတည် ဓားဝိညာဉ် ထည့်သွင်းထားသော လျှို့ဝှက်-ကောင်းကင် ရတနာဓားကို ကိုင်ဆွဲလျက် အမြင်အာရုံ၏ အထွတ်အထိပ်သို့ ရောက်ရှိနေသည်။

လျှို့ဝှက်ပြစ်ဒဏ်များမှာ ရပ်တန့်မသွားချေ။ တတိယမြောက် အပြစ်ဒဏ် ဆင်းသက်လာပြီ ရွှေရောင်လွှမ်းသော ရောင်စုံအလင်းတန်းသည် မည်သည့်ခမ်းနားသော ပုံရိပ်များကိုမျှ ဂရုမစိုက်ဘဲ ပစ်မှတ်ကို ရက်စက်စွာ သတ်ဖြတ်ရန် ဆင်းသက်လာတော့သည်။

ယခင်က ကြည့်ရှုသူများသည် ဤအဖြစ်အပျက်ကို လျှို့ဝှက်ကျိန်စာ ချိုးဖောက်သူအား ပေးသော သင်ခန်းစာတစ်ခုအဖြစ်သာ သဘောထားခဲ့ကြသော်လည်း၊ ယခုမူ လျှို့ဝှက်အရှင် အဆင့်သာရှိသော စုရီက ဓားတစ်စင်းတည်းဖြင့် ကောင်းကင်ကို စိန်ခေါ်နေသည်ကို မြင်တွေ့ရသောအခါ အားလုံးမှာ စိတ်လှုပ်ရှားစွာဖြင့် စောင့်ကြည့်နေကြတော့သည်။ တတိယမြောက် အပြစ်ဒဏ် ကျရောက်လာချိန်တွင် ဘီလီယံပေါင်းများစွာသော လူများမှာ ထိတ်လန့်တကြား အသက်ရှူမှားသွားကြရသည်။

စုရီမှာမူ အလျှော့မပေးသလို နောက်သို့ တစ်လှမ်းပင် မဆုတ်ချေ။ အေးစက်သော မျက်ဝန်းများဖြင့် သူ ဓားကို လွှဲယမ်းလိုက်သည်။ ၎င်းမှာ သူ၏ အစင်ကြယ်ဆုံးနှင့် အဆင့်မြင့်ဆုံး ဓားပညာရပ် ပါဝင်သော ရိုးရှင်းသည့် လွှဲယမ်းမှုတစ်ခုပင်။

အထွတ်အထိပ်သူတော်စင်တစ်ဦး၏ မျက်စိတစ်မှိတ်အတွင်းမှာပင် သန်းနှင့်ချီသော လျှို့ဝှက်သင်္ကေတများဖြင့် အားဖြည့်ထားသော ဓားအလင်းသည် တားဆီးမရသော အရှိန်အဟုန်၊ အနှိုင်းမဲ့သော ထက်ရှမှုတို့ဖြင့် ရှေ့သို့ ထိုးနှက်သွားသည်။

ထိုဓားအလင်းသည် စူးဟောင်ရန်၊ ပိန်လှီသော အမျိုးသမီး အထွတ်အထိပ်သူတော်စင်နှင့် ညဉ့်ဦးယံ နိမိတ်ဖတ်သူများမှ အထွတ်အထိပ် သူတော်စင်တို့ကိုပင် တုန်လှုပ်သွားစေသည်။ အခြားသော ကောင်းကင်ငယ် တမန်တော် အဆင့်ရှိ အထွတ်အထိပ်သူတော်စင်များမှာလည်း သူတို့၏ အစစ်အမှန် ဝိညာဉ်များ အထိ အံ့ဩမှင်သက်သွားကြရသည်။

တောက်ပသော အလင်းတန်း တစ်ဖန် ထွက်ပေါ်လာပြန်သည်။ ဓားနှင့် အလင်းတန်းတို့၏ ထိပ်တိုက်တွေ့မှုသည် လာသကဲ့သို့ပင် မြန်ဆန်စွာ ပြီးဆုံးသွားသည်။ ရလဒ်မှာ အမှောင်ဟင်းလင်းပြင်အတွင်း ဒဏ်ရာအနာတရ ကင်းမဲ့စွာ ရပ်နေသော ပုံရိပ်တစ်ခုပင်။ ဒဏ်ရာ လုံးဝ မရရှိခဲ့ချေ။

***