အခန်း (၄၀၁)

အခန်း။ ၄၀၁

ညဉ့်နက်သန်းခေါင်ယံအချိန်တွင် ယွင်ရှန်းရောက်ရှိလာသဖြင့် ရှာဝမ်ရွှီမှာ အတော်ပင် အံ့အားသင့်သွားရသည်။

"ညဉ့်နက်သန်းခေါင်ကြီး ငါတို့ရဲ့ စီမင်ဆီကို ဘာလာလုပ်တာလဲ"

ယွီမော့က ယွင်ရှန်းကို မြင်သည်နှင့် မကောင်းသော နိမိတ်တစ်ခုခု ရှိနေသည်ဟု ခံစားလိုက်ရသဖြင့် မေးမြန်းလိုက်သည်။

"ယွီမော့... စကားတွေ အများကြီး မပြောနဲ့တော့ လက်ဖက်ရည် ပြင်လိုက်ပါဦး"

ရှာဝမ်ရွှီက ပြောကာ အနည်းငယ် ပြုံးလိုက်မိသည်။ ယွင်ရှန်းအနေဖြင့် အခက်အခဲရှိချိန်တွင် သူ့ကို သတိရပေးသည်မှာပင် သူ၏စိတ်ကို ကျေနပ်စေပုံပင်။ ယွင်ရှန်းသည် ယန်ချန်းရွှယ်က အဆိပ်ခတ်သည့် ကိစ္စကို ဖုံးကွယ်ထားပြီး စစ်သူကြီး ယန်ပါးဟိုသည် မိစ္ဆာသားရဲ သားအိမ်ရေအဆိပ်သင့်နေကြောင်းကိုသာ အကြမ်းဖျင်း ပြောပြလိုက်သည်။

"စစ်သူကြီးယန်ရဲ့ ခန္ဓာကိုယ်ထဲက အဆိပ်က သားအိမ်ရေ ဖြစ်နေလိမ့်မယ်လို့ ထင်မထားမိဘူး။ ဒီအဆိပ်အကြောင်းကို ဆင့်ခေါ်ခန်းမက လူတွေဆီကတစ်ဆင့် ကြားဖူးခဲ့ပေမဲ့ စစ်သူကြီးယန်အပေါ်မှာ သုံးလိမ့်မယ်လို့တော့ စိတ်ကူးထဲတောင် မထည့်ခဲ့မိဘူး"

ရှာဝမ်ရွှီက ယွင်ရှန်း၏ ဖော်ထုတ်မှုကို အံ့အားသင့်စွာဖြင့် နက်နက်ရှိုင်းရှိုင်း စဉ်းစားလိုက်သည်။

"ကျွန်မ ပွင့်ပွင့်လင်းလင်းပဲ ပြောပါရစေ။ ဒီနေ့ လာတာက ရှာစီမင်ရဲ့ အကူအညီကို တောင်းဖို့ပါ။ မှော်ဘုရားကျောင်းမှာ ခန္ဓာကိုယ်ကို သန့်စင်ပေးနိုင်တဲ့ အဆင့်မြင့် အလင်းမှော်ပညာ ရှိတယ်လို့ ကြားသိထားရပါတယ်။ အဲဒါကြောင့် ရှာစီမင်အနေနဲ့..."

ယွင်ရှန်းသည် ခေတ္တမျှ ဝေခွဲမရ ဖြစ်သွားပြီးမှ ပြောထွက်လိုက်သည်။

ဤစကားကို ကြားလိုက်ရသောအခါ ရှာဝမ်ရွှီမှာ မှင်တက်သွားရသည်။

"ငါသိသားပဲ... မင်းလာရင် ဘယ်တော့မှ သတင်းကောင်း မပါဘူး။ အဆင့်မြင့် အလင်းမှော်ပညာကို ဈေးထဲက ဂေါ်ဖီထုပ်တွေ၊ မုန်လာဥတွေလို အလွယ်တကူ ရနိုင်တယ်လို့ ထင်နေတာလား စီမင်ကရော အဲဒါကို စိတ်ထင်တိုင်း သုံးလို့ရမယ် ထင်နေလား။ အထူးသဖြင့် သေကိန်းဆိုက်နေတဲ့ လူတွေအပေါ်မှာပေါ့"

လက်ဖက်ရည် လာချပေးသော ယွီမော့မှာ ချက်ချင်းပင် ဒေါသထွက်သွားတော့သည်။ ရှာဝမ်ရွှီ၏ မျက်နှာတွင်လည်း ခက်ခဲသော အမူအရာ ပေါ်ပေါက်လာသည်။ အလင်းမှော်ပညာသည် သဘာဝတရားကို ဆန့်ကျင်သော စွမ်းအားဖြစ်သဖြင့် လွယ်လင့်တကူ အသုံးမပြုနိုင်သည်မှာ အမှန်ပင်။

သို့သော် ယွင်ရှန်း၏ အားကိုးတကြီး တောင်းဆိုနေသော မျက်နှာကို မြင်လိုက်ရသောအခါ ငြင်းပယ်ရန် ပြင်ထားသော စကားလုံးများမှာ သူ၏ နှုတ်ခမ်းဖျားတွင်ပင် တန့်သွားခဲ့ရသည်။

"စီမင်..."

ယခုတစ်ကြိမ်တွင်မူ အမြဲတမ်း တိတ်တိတ်ဆိတ်ဆိတ် နေတတ်သော ယွီမော့ပင်လျှင် ရှာဝမ်ရွှီ ဝင်ရောက်ပတ်သက်ခြင်းကို ကန့်ကွက်ရန် စကားပြောလာသည်။ ယန်ပါးဟို၏ အခြေအနေမှာ မရိုးရှင်းကြောင်း သူတို့နှစ်ဦးစလုံး ကောင်းစွာ သိရှိထားကြသည်။

ကောင်းကင်ဘုံ ကံကြမ္မာမှန်အကြောင်းကို ထားဦး ချန်စီမင်ကိုယ်တိုင် ပေးပို့ထားသော စာတွင် ယန်ပါးဟို၏ သေဆုံးမှုမှာ ကံကြမ္မာက သတ်မှတ်ထားပြီးသား ဖြစ်သဖြင့် ရှောင်လွဲ၍ မရနိုင်ကြောင်း ရှင်းလင်းစွာ ဖော်ပြထားသည်။ ထို့အပြင် ရှာဝမ်ရွှီအနေဖြင့် ကျိုးတော်ဝင်မိသားစုကိုသာ ကာကွယ်ပေးရန်နှင့် အခြားအရေးကိစ္စများတွင် ဝင်ရောက်မစွက်ဖက်ရန်လည်း သတိပေးထားခဲ့သည်။

ရှာဝမ်ရွှီသည် ချန်စီမင်၏ စကားကို အမြဲတစေ မြေဝယ်မကျ နာခံခဲ့သူ ဖြစ်သော်လည်း ယခုတစ်ကြိမ်တွင်မူ ထိုသို့ မဟုတ်တော့ပေ။

အစပိုင်းတွင် သူသည် ကျန်သူများ၏ တားဆီးမှုကို ဂရုမစိုက်ဘဲ ယန်ပါးဟို၌ သွေးထွက်သံယို ဘေးဒုက္ခ ကြုံရတော့မည်ဖြစ်ကြောင်း ယွင်ရှန်းအား သတိပေးခဲ့ရာ ၎င်းမှာ ကောင်းကင်ဘုံ လျှို့ဝှက်ချက်ကို တစ်စိတ်တစ်ပိုင်း ဖွင့်ဟလိုက်ခြင်းပင်။ ကောင်းကင်ဘုံ လျှို့ဝှက်ချက်ကို အနည်းငယ်မျှ ထုတ်ဖော်မိခြင်းသည်ပင်လျှင် နောင်တစ်ချိန်တွင် သူ၏အပေါ်သို့ ပြန်လည် အကျိုးသက်ရောက်မှု ရှိလာနိုင်သည်။

အကယ်၍ ရှာဝမ်ရွှီသာ ယန်ပါးဟိုကို အမှန်တကယ် ကူညီပေးလိုက်မည်ဆိုပါက ၎င်းသည် ကံကြမ္မာကို ဆန့်ကျင်ခြင်းပင် ဖြစ်ရာ သူ၏ အနာဂတ် ကျင့်စဉ်လမ်းတွင် ကြောက်မက်

ဖွယ်ကောင်းသော အကျိုးဆက်များကို ဖြစ်ပေါ်စေနိုင်သည်ဟု ယွီကျိနှင့် ယွီမော့တို့က တွေးတောရင်း ထိတ်လန့်နေကြသည်။

ထို့ကြောင့် ထိုလူငယ်နှစ်ဦးသည် ယွင်ရှန်းအပေါ် အနည်းငယ် ငြိုးတေးသလို ဖြစ်လာကြသည်။ သူတို့သည် အသက်အရွယ် နုပျိုသေးသဖြင့် ကျား၊ မ အချစ်ရေးကို ကောင်းစွာ နားမလည်ကြသော်လည်း ရှာဝမ်ရွှီ တစ်ယောက် ကျိမော့အဖြစ် ဟန်ဆောင်ကာ ဆေးခန်းသို့ သွားပြီး ပြန်လာကတည်းက တစ်စုံတစ်ခု ပြောင်းလဲသွားသည်ကို သတိထားမိကြသည်။

ယခင်က ရှာဝမ်ရွှီသည် စကားနည်းပြီး ရေခဲရုပ်ထုကဲ့သို့ အေးစက်လှသူ ဖြစ်သည်။ သို့သော် ယခုအခါတွင်မူ သူသည် သူ၏အမည်နှင့်အညီ ပိုမိုနွေးထွေးလာပြီး ရံဖန်ရံခါတွင်လည်း အပြုံးရိပ်များ တွေ့လာရသည်။ အထူးသဖြင့် ယွင်ရှန်းဟူသော အမျိုးသမီး မှော်ဆရာမလေး ပေါ်လာသည့်အခါ ရှာဝမ်ရွှီ၏ အကြည့်များမှာ ဂွမ်းကဲ့သို့ နူးညံ့သွားတတ်သည်မှာ သူတို့အတွက် အလွန်ပင် ထူးဆန်းနေတော့သည်။

"ဒုက္ခပဲ... တကယ့်ကို ဒုက္ခအရှင်လတ်လတ်ပဲ"

သူတို့ စိတ်ထဲက ရေရွတ်မိကြသည်။

ယွင်ရှန်းကမူ သူမ ရောက်ရှိလာခြင်းကြောင့် မှော်ဘုရားကျောင်းရှိ လူငယ်နှစ်ဦး၏ စိတ်နှလုံးများ မငြိမ်မသက် ဖြစ်နေရသည်ကို လုံးဝ သတိမပြုမိပေ။ ရှာဝမ်ရွှီ၏ စိတ်ထဲတွင်လည်း အလားတူပင်။

သူသည် ယွင်ရှန်း၏ တောင်းဆိုမှုကို ပြတ်ပြတ်သားသား ငြင်းပယ်နိုင်ကြောင်း သူကိုယ်တိုင် သိသည်။ ကောင်းကင်ဘုံ ကံကြမ္မာမှန် ထဲတွင် မြင်ခဲ့ရသော ယန်ပါးဟို၏ သေဆုံးခြင်းမှာ ကံကြမ္မာက ပြဋ္ဌာန်းထားပြီးသား ဖြစ်သဖြင့် မည်သူမျှ မပြောင်းလဲနိုင်ပေ။ သို့သော် အကယ်၍ ယန်ပါးဟို သေဆုံးသွားခဲ့လျှင် ယွင်ရှန်းသည် အလွန်အမင်း ဝမ်းနည်းကြေကွဲရပေလိမ့်မည်။

မှော်ဘုရားကျောင်းရှိ လူများ၏ ခက်ခဲနေသော မျက်နှာအမူအရာများကို မြင်သောအခါ ရှာဝမ်ရွှီသည် သူ၏ မှော်စွမ်းအားများကို အသုံးပြု၍ ယန်ပါးဟိုကို ကယ်တင်ရန် ဝန်လေးနေသည်ဟု ယွင်ရှန်းက ထင်သွားခဲ့သည်။

"ရှာစီမင်... ရှင် အပင်ပန်းခံရကျိုးနပ်စေရပါမယ်။ စစ်သူကြီးယန်ကိုသာ ကယ်တင်ပေးမယ်ဆိုရင် လနတ်သမီး၏ ချီးမွမ်းခြင်းဖော်စပ်နည်း လျှို့ဝှက်ချက်ကို ကျွန်မ ပေးပါ့မယ်။ ဒီနည်းပညာက မှော်ဘုရားကျောင်းရဲ့ မှော်ဆေးဝါး အဆင့်အတန်းကို အနည်းဆုံး တစ်ဆင့်လောက် မြှင့်တင်ပေးနိုင်လိမ့်မယ်လို့ ကျွန်မ ယုံကြည်ပါတယ်"

ယွင်ရှန်း၏ စကားကြောင့် သူမကို စိုက်ကြည့်နေခဲ့ကြသော ယွီကျိနှင့် ယွီမော့တို့မှာ မှင်

တက်သွားကြတော့သည်။ သူတို့နှစ်ဦးမှာ ယွင်ရှန်းကို လက်ညှိုးငေါ့ငေါ့ထိုးရင်း "နင် ဘာပြောလိုက်တာလဲ... အဆင့်မြင့်မှော်ဆေး လနတ်သမီး၏ ချီးမွမ်းခြင်းကို နင်ကိုယ်တိုင် ဖော်စပ်ခဲ့တာ ဟုတ်လား" ဟု ထစ်ထစ်ငေါ့ငေါ့ မေးလိုက်မိကြသည်။

ယွီကျိနှင့် ယွီမော့တို့ ဤမျှ အံ့အားသင့်သွားခြင်းမှာ မဆန်းပေ။ လွန်ခဲ့သော ခြောက်လအတွင်း ဤအဆင့်မြင့်မှော်ဆေးသည် မှော်ဘုရားကျောင်းရှိ မှော်ဆရာအားလုံးကို အကြံကုန်ကာ ဂယောင်ဂတမ်း ဖြစ်စေခဲ့သည်။ မှော်ဆေးဝါး ကျွမ်းကျင်သူအားလုံး ဖော်စပ်ရန် ကြိုးစားခဲ့ကြသော်လည်း အတော်ဆုံးဆိုသူများပင်လျှင် ကျရှုံးခဲ့ရသော ဆေးတစ်မျိုး ဖြစ်သည်။

"မိန်းကလေးယန်... အဲဒီလို လုပ်ဖို့ မလိုပါဘူး"

ရှာဝမ်ရွှီက အလောတကြီး ဝင်ပြောလိုက်သည်။ အဘယ်ကြောင့်မှန်းမသိသော်လည်း ယွင်ရှန်းနှင့် ဤကဲ့သို့ အပေးအယူလုပ်ပြီး ဆက်ဆံရသည်ကို သူ အလွန်မုန်းတီးမိသည်။ သူသည် သူမကို ပျော်ရွှင်စေချင်သောကြောင့်သာ ကူညီလိုခြင်းပင်။

အဘယ်အချိန်က စတင်ခဲ့သည်ကို သူ မသိသော်လည်း စီအန်း ဆေးခန်းလေးတွင် နေထိုင်ခဲ့စဉ်က နေဝင်ရိုးရီအချိန်၌ ယွင်ရှန်းတစ်ယောက် တုတ်ကောက်လေးကို အမှီပြုကာ ဆေးမှတ်တမ်းများကို ကြည့်ရှုနေတတ်သည့် ပုံရိပ်ကို သူ အသားကျနေခဲ့ပြီ ဖြစ်သည်။ သူမ၏ ပါးချိုင့်လေးများ ပေါ်အောင် ပြုံးလိုက်သည့်အခါတိုင်း သူ့မှာ မသိမသာ ငေးမောနေခဲ့မိဖူးသည်။

"ဟာ"

ယွီမော့မှာ အံ့အားသင့်လွန်းသဖြင့် လက်ဖက်ရည်ခွက်ကိုပင် မှောက်လုနီးပါး ဖြစ်သွားသည်။ လနတ်သမီး၏ ချီးမွမ်းခြင်းဆိုသည်မှာ လူတစ်ဦး၏ မှော်ခန္ဓာကိုယ်ကို ပြောင်းလဲပေးနိုင်ပြီး အသုံးမကျသူတစ်ဦးကိုပင် မှော်ဆရာတစ်ဦး ဖြစ်လာစေနိုင်သော အဖိုးတန်ဆေးပင်။ အကယ်၍ ၎င်း၏ လျှို့ဝှက်ချက်ကိုသာ ဖော်ထုတ်နိုင်မည်ဆိုပါက မှော်ဘုရားကျောင်းအတွက် များစွာ အကျိုးရှိမည်မှာ အမှန်ပင်။

ရှာဝမ်ရွှီက မကျေမနပ်ဖြင့် လက်ကာပြလိုက်ပြီး "ကျွန်တော် စစ်သူကြီးယန်ကို မကယ်ချင်တာ မဟုတ်ပါဘူး။ ဒါပေမဲ့ အလင်းသန့်စင်ခြင်းမှော်တစ်ခုတည်းနဲ့တော့ သူ့ကိုယ်ထဲက အဆိပ်ကို မဖယ်ရှားနိုင်ဘူး" ဟု ဆိုလိုက်သည်။

ယန်ပါးဟိုသည် အဆိပ်ပါသော ဟင်းရည်ကို သုံးလတိုင်တိုင် သောက်ခဲ့သည်ဖြစ်ရာ ဆေးပညာနှင့် လူ့ခန္ဓာကိုယ်အကြောင်း ကောင်းစွာနားလည်သော ရှာဝမ်ရွှီက ထိုကာလမှာ အဆိပ်များ ကိုယ်တွင်းအင်္ဂါများအထိ ပျံ့နှံ့ရန် လုံလောက်သော အချိန်ဖြစ်ကြောင်း သိရှိနေသည်။ အဆင့်မြင့် သန့်စင်ခြင်းမှော်သည် အရေပြားပေါ်ရှိ အဆိပ်အပုပ်များကိုသာ ဖယ်ရှားပေးနိုင်မည် ဖြစ်သည်။

အရိုး၊ အင်္ဂါနှင့် သွေးကြောများအတွင်း အမြစ်တွယ်နေသော သားအိမ်ရေအဆိပ်ကို အမြစ်ပြတ်ရန်မှာ မှော်ပညာတစ်ခုတည်းနှင့် မလုံလောက်ပေ။

"နောက်ထပ် ဘာလိုအပ်သေးတာလဲ ကျွန်မ ဘယ်လိုနည်းနဲ့မဆို ရှာပေးပါ့မယ်"

ယွင်ရှန်းက အခိုင်အမာ ပြောလိုက်သည်။ သူမ၏ နောက်ကွယ်တွင် ဝူကျိ ကုန်သွယ်ရေးရှိနေသဖြင့် အရင်းအမြစ်များကို အသုံးချကာ လိုအပ်သည်များကို စုဆောင်းနိုင်လိမ့်မည်ဟု သူမ ယုံကြည်နေသည်။

သို့သော် ယွင်ရှန်း မမျှော်လင့်ထားသော အဖြေမှာ...

"ဒါက မင်းပြင်ဆင်လို့ရတဲ့အရာ မဟုတ်ဘူး။ အဲဒါက နတ်သမီးမျိုးနွယ်စုရဲ့ သက်စောင့်ရေပဲ။ အဲဒီရေကို ရှန်းကျူးနိုင်ငံက မီးနတ်သမီး မြတ်သောတောင် ရဲ့ အနက်ရှိုင်းဆုံးနေရာမှာပဲ တွေ့နိုင်တယ်။ အဲဒီစမ်းရေက အရမ်းအဖိုးတန်သလို နတ်သမီးတွေတောင် အလွယ်တကူ မသုံးကြဘူး။ နောက်ပြီး ရှန်းကျူက နတ်သမီးတွေက လူသားတွေကို အမုန်းဆုံးဆိုတာ လူတိုင်းသိကြတယ်။ အချိန်အရဆိုရင်လည်း ရှန်းကျူနဲ့ ကျိုးပြည်ထောင်စုကြားကို အသွားအပြန်လုပ်ဖို့က တော်တော်လေး နောက်ကျသွားပြီ"

ရှာဝမ်ရွှီက သက်ပြင်းချရင်း ပြောလိုက်သည်။