အခန်း (၄၀၃)

အခန်း။ ၄၀၃

ယွင်ရှန်းသည် မကြာသေးမီကပင် ကိုယ်အလေးချိန်များစွာ ကျဆင်းသွားခဲ့သည်။

သူမကို ပွေ့ဖက်ထားချိန်တွင် သူမ၏ ခန္ဓာကိုယ်လေးမှာ သိသိသာသာ ပေါ့ပါးသွားသည်ကို ယီပိုင်မင်း ခံစားမိသဖြင့် ရင်ထဲ၌ မချိမဆံ့ ဖြစ်သွားရသည်။ တောကြောင်မလေးသည် မကြာသေးမီကပင် အလုပ်များလွန်းလှပြီး သူမကို အပူအပင် အဖြစ်စေဆုံးအရာမှာ အမှန်စင်စစ် ယန်အိမ်တော်၏ အရေးကိစ္စများပင်။

ယွင်ရှန်းက နှုတ်မှ မည်မျှပင် ယန်အိမ်တော်ကို ဂရုမစိုက်သယောင် ပြောဆိုနေပါစေ သူမ၏ သွေးထဲတွင် ယန်မိသားစု၏ သွေးများ စီးဆင်းနေသည်မှာ ပြောင်းလဲ၍မရသော အမှန်တရားပင်။ သူနဲ့အတူရှိနေသမျှ ကာလပတ်လုံး ယွင်ရှန်းကသာ သဘောမတူပါက သူသည် ယန်အိမ်တော်ကို လုံးဝ အပြိုလဲခံမည် မဟုတ်ပေ။

"ရှင် ပြောချင်တာက... ဒီတိုက်ပွဲရဲ့ ရလဒ်ကို ပြောင်းလဲနိုင်ဖို့ ရှင် အပြည့်အဝ ယုံကြည်မှု ရှိနေတာလား။ မဟုတ်သေးဘူး... ရှင်တောင် မသိသေးဘူး။ စစ်သူကြီးယန်က အဆိပ်မိနေတာ။ တကယ်တော့ မနေ့က ကျွန်မ ရှာဝမ်ရွှီဆီ သွားတယ်ဆိုတာလည်း ဒီကိစ္စအတွက်ပါပဲ"

ယီပိုင်မင်း၏ စကားကို ကြားလိုက်ရသောအခါ ယွင်ရှန်းသည် နောက်ပြောင်လိုသည့် စိတ်များကို ဘေးဖယ်ထားလိုက်တော့သည်။ ကျိုးပြည်ထောင်စုတွင် တစ်စုံတစ်ဦး လိုချင်သမျှကို ပေးနိုင်သည်ဟု ရဲရဲဝံ့ဝံ့ ပြောနိုင်သူမှာ ကျိုးဧကရာဇ်တစ်ဦးတည်းသာ ရှိသည်။ သို့သော် သူမ သိထားသော ယီပိုင်မင်းမှာလည်း စကားကို လွယ်လွယ်နှင့် ကတိပေးတတ်သူ မဟုတ်ပေ။ သူကသာ ပြောလာပြီဆိုလျှင် ထိုကိစ္စကို သူ အသေအချာ လုပ်ဆောင်နိုင်၍သာ ဖြစ်ပေလိမ့်မည်။

"စစ်သူကြီးယန်ရဲ့ ကိုယ်ထဲမှာ ရှိနေတာ မိစ္ဆာသားရဲ သားအိမ်ရေ အဆိပ်ပဲလေ။ ပြီးတော့ အဲဒါက ယန်ချန်းရွှယ် ခတ်ထားတဲ့ အဆိပ်ဆိုတာလည်း ငါ သိတယ်"

ယီပိုင်မင်းက တည်ငြိမ်စွာဖြင့် တစ်လုံးချင်း ပြောလိုက်သည်။

"ရှင် ဘယ်လိုလုပ်ပြီး သိတာလဲ။ ရှင် ဆေးခန်းကို သွားပြီး အဲဒီဆေးရည်တွေကို စမ်းသပ်ခဲ့တာလား"

ယွင်ရှန်းမှာ ပို၍ပင် စိုးရိမ်ပူပန်သွားတော့သည်။

"တောကြောင်မလေး... မင်းက အရမ်းပါးနပ်ပေမဲ့ တစ်ခါတလေကျရင်တော့ နည်းနည်း ကလေးဆန်နေတုန်းပဲ။ ဒီနေ့ ကိစ္စတွေကို မင်းတစ်ယောက်တည်းနဲ့ ဖြေရှင်းနိုင်မယ်လို့ ထင်နေတာလား။ ယန်ချန်းရွှယ် ဘာကြောင့် အဲဒီလို လုပ်ခဲ့ရလဲဆိုတာ မင်းသိလား။ အကြောင်းကတော့ တန်ယုကို တစ်စုံတစ်ယောက်က ဖမ်းသွားလို့ပဲ။ အဲဒီလူတွေက ရွှမ်ဝူကျိရဲ့ လက်အောက်ခံ သွေးစွန်းနေသောလက်ဂိုဏ်းက လူတွေပဲလေ"

ယီပိုင်မင်း၏ မျက်နှာမှာ ခန့်မှန်းရခက်သော အမူအရာများဖြင့် ပြည့်နှက်နေပြီး သူ့ထံမှ မည်သည့်အရာကိုမျှ ဖုံးကွယ်ထား၍ မရနိုင်သကဲ့သို့ပင်။ တစ်ညတည်းနှင့်ပင် ယီပိုင်မင်းသည် လွန်ခဲ့သော လအနည်းငယ်က တန်ယုကို မည်သူမည်ဝါမှန်းမသိသော လူတစ်စုက ဖမ်းဆီးသွားခဲ့ကြောင်း စုံစမ်းသိရှိခဲ့ခြင်းပင်။ ယန်ချန်းရွှယ်သည် သူမ၏ သားဖြစ်သူ တန်ယုအတွက် အကြပ်ကိုင်ခံထားရခြင်းကြောင့်သာ ဤကဲ့သို့ ပြုမူနေခြင်း ဖြစ်ပေလိမ့်မည်။

ဆေးပညာနှင့် ပတ်သက်လာလျှင် ယွင်ရှန်းသည် ကျိုးပြည်ထောင်စု၏ ထိပ်တန်းပညာရှင်ဟု ဆိုနိုင်သလို သူမသည် အလွန်လည်း ထက်မြက်သူ ဖြစ်သည်။ သူမသည် ယီပိုင်မင်း မြင်တွေ့ဖူးသမျှသော အမျိုးသမီးများထဲတွင် စိတ်ဓာတ် အတည်ငြိမ်ဆုံးသော သူလည်း ဖြစ်သည်။

ရံဖန်ရံခါတွင် ယီပိုင်မင်းသည် ယွင်ရှန်းကို သူ၏ မယ်တော်ဖြစ်သူ ဧကရီလီနှင့်ပင် မှားယွင်းစွာ နှိုင်းယှဉ်မိတတ်သည်။

သူ၏ ဘဝတစ်လျှောက်တွင် တွေ့ဖူးသမျှ အမျိုးသမီးများထဲ၌ မယ်တော် ဧကရီလီသည် သူ၏ စိတ်တွင် အစွဲအမြဲဆုံး ရှိခဲ့သူဖြစ်သည်။ သူမသည် တုနှိုင်းမရသော အလှအပကို ပိုင်ဆိုင်ရုံသာမက ဗျူဟာနှင့် နည်းပရိယာယ်များတွင်လည်း အလွန်ထူးချွန်သူ ဖြစ်သည်။ သို့သော် ထိုမျှ အစွမ်းထက်သော ဧကရီလီသည် အချစ်နှင့် ပတ်သက်လာလျှင်မူ အကြီးအကျယ် ကျရှုံးခဲ့ရရှာသည်။

သူမသည် သူမကို ချစ်မြတ်နိုးခြင်းမရှိသော ကျိုးဧကရာဇ်အတွက်နှင့်ပင် ဂုဏ်သိက္ခာရော ခန္ဓာကိုယ်ပါ ပျက်စီးသွားခဲ့ရပြီး နောက်ဆုံးတွင် အရိုးပြာပင် မကျန်ခဲ့ပေ။ ဤအကြောင်းကို တွေးမိတိုင်း ယီပိုင်မင်း၏ ရင်ထဲတွင် မခံချင်စိတ်နှင့် ဒေါသတို့က သူ၏ မီးခိုးရောင် မျက်ဝန်းများအတွင်း၌ လှိုင်းထန်လာရတတ်သည်။

သူသည် သူ၏ရင်ခွင်ထဲမှ လူသားလေးကို နောက်တစ်ကြိမ် ငုံ့ကြည့်လိုက်မိပြန်သည်။

ယန်ချန်းရွှယ်၏ သစ္စာဖောက်မှုနောက်ကွယ်မှ အကြောင်းရင်းကို သိရှိသွားပြီးနောက် ယွင်ရှန်းသည် တွေးတောခြင်းများအတွင်းသို့ နစ်ဝင်သွားခဲ့သည်။ ယီပိုင်မင်း၏ စူးစိုက်ကြည့်နေသော အကြည့်များကို သူမ သတိမပြုမိပေ။

ယီပိုင်မင်းသည် ယွင်ရှန်း၏ နီမြန်းသော နှုတ်ခမ်းဖူးလေးများမှသည် သေးသွယ်သော မျက်နှာကျနှင့် နက်မှောင်သော မျက်ဝန်းအစုံအထိ မည်သည့်အသေးစိတ်ကိုမျှ မလွတ်စေဘဲ သေသေချာချာ စိုက်ကြည့်နေမိသည်။ တွေးတောနေချိန်တွင် ပေါ်ထွက်လာသော ယွင်ရှန်း၏ ရင့်ကျက်သည့် အရှိန်အဝါမှာ သူမ၏ အသက်အရွယ်နှင့် လုံးဝ မလိုက်ဖက်သော်လည်း ယီပိုင်မင်းကိုမူ ခဏတာမျှ မျက်တောင်မခတ်ဘဲ ငေးမောသွားစေသည့် အရည်အချင်းတစ်ခု ဖြစ်နေသည်။

ယွင်ရှန်းသည် ငယ်ရွယ်သေးသဖြင့် ကျိုးပြည်ထောင်စု၏ နံပါတ်တစ်အလှမယ်ဟု တင်စားခြင်းခံရသော ဧကရီလီ၏ အလှနှင့် နှိုင်းယှဉ်ရန် စောလွန်းနေသေးသော်လည်း သူမ၏ ဆေးပညာနှင့် မှော်ပညာအပေါ် နားလည်နိုင်စွမ်းမှာမူ ဧကရီလီပင် လိုက်မမှီနိုင်သော အရာများ ဖြစ်သည်။

ယနေ့ကဲ့သို့ အရေးကြီးသော သတင်းများကို ကြားလိုက်ရချိန်တွင် အခြားသူများဆိုပါက ထိတ်လန့်တုန်လှုပ်နေကြမည်ဖြစ်သော်လည်း ယွင်ရှန်းကမူ တည်ငြိမ်စွာဖြင့် ဖြစ်ပျက်သမျှကို ချိတ်ဆက်စဉ်းစားနေနိုင်သည်။ ယွင်ရှန်းသည် အံ့အားသင့်ဖွယ် ကောင်းလောက်အောင် တိုးတက်လာနေပြီး အချိန်တစ်ခု ရလာသည်နှင့် သူမသည် သူ၏ မယ်တော်ထက်ပင် ပိုမိုတောက်ပသော အမျိုးသမီးတစ်ဦး ဖြစ်လာလိမ့်မည်ဟု ယီပိုင်မင်းက ခံစားနေမိသည်။

သူမသည် ယွင်ရှန်းသာ ဖြစ်ပြီး ဧကရီလီ မဟုတ်ပေ။

ယီပိုင်မင်းသည် ကျိုးဧကရာဇ် မဟုတ်သကဲ့သို့ ယွင်ရှန်းကိုလည်း ဤဘဝတွင် မည်သည့်အခါမျှ အားငယ်စေမည် မဟုတ်ပေ။

သူ၏ မှော်ဝိညာဉ်ထက်ဝက်မှာ ယွင်ရှန်း၏ ခန္ဓာကိုယ်အတွင်းသို့ စီးဝင်သွားခဲ့သည့် အချိန်မှစ၍ ဤအမျိုးသမီးငယ်မှာ သူ၏ အတိတ်၊ ပစ္စုပ္ပန်နှင့် အနာဂတ်တို့တွင် သူနှင့် ခွဲခြားမရအောင် ရစ်ပတ်နှောင်ဖွဲ့ထားပြီးသား ဖြစ်ကြောင်း သူသိရှိခဲ့သည်။

ဒါပေမဲ့ ငါတို့ကြားမှာရှိနေတဲ့ အတားအဆီးတွေကိုသာ တစ်နေ့မှာ သူမ သိသွားခဲ့ရင် အခုလို ငါ့ရင်ခွင်ထဲမှာ ငြိမ်ငြိမ်လေး မှီတွယ်နေပါဦးမလား။

ယီပိုင်မင်း၏ စိတ်ထဲတွင် အတွေးပေါင်းစုံ လှည့်ပတ်နေသကဲ့သို့ ယွင်ရှန်း၏ စိတ်ထဲတွင်လည်း အတွေးများစွာဖြင့် ရှုပ်ထွေးနေသည်။ ပရိယာယ်နှင့် ဗျူဟာမြောက် စီစဉ်မှုများတွင်မူ တော်ဝင်မိသားစုအတွင်း ကြီးပြင်းလာသော ယီပိုင်မင်းကို သူမ မယှဉ်နိုင်သည်မှာ အမှန်ပင်။ ယန်ချန်းရွှယ်က ဤမျှအထိ သစ္စာဖောက်လိမ့်မည်ဟု သူမ တစ်ခါမျှ ထင်မထားခဲ့ပေ။ ဖခင်နှင့် သားသမီးကြားတွင် နောက်ဆုံး၌ သားသမီးကသာ ပို၍ အရေးကြီးနေတတ်သည်။

"ယီပိုင်မင်း... ကျွန်မကို အကူအညီတစ်ခုလောက် ပေးနိုင်မလား"

ယွင်ရှန်းက မော့ကြည့်ရင်း မေးလိုက်သည်။ ယီပိုင်မင်းသည် သူမထက် ပို၍ သိရှိနားလည်ထားကြောင်း သူမ ကောင်းစွာ သိသည်။ သူမသည် ခေတ်သစ်အမျိုးသမီးတစ်ဦး ဖြစ်သည့်

အလျောက် မိဘများ စောစီးစွာ ကွယ်လွန်သွားခဲ့သဖြင့် ငယ်စဉ်ကတည်းက သူမကိုယ်သူမသာ အားကိုးခဲ့သူ ဖြစ်သည်။ ဝူကျိတိုက်ကြီးသို့ ရောက်ရှိလာပြီးနောက် ယန်ခန်းဟိုင်၏ လေ့ကျင့်ပေးမှုများကြောင့်လည်း မည်သူ့ကိုမျှ အားကိုးလိုစိတ် မရှိခဲ့ပေ။

ယခုမူ သူမသည် ပထမဆုံးအကြိမ်အဖြစ် တစ်စုံတစ်ဦးထံ အကူအညီ တောင်းခံလိုက်ခြင်း ဖြစ်သည်။ သူမ၏ ဤကဲ့သို့ အကူအညီ တောင်းခံမှုက ယီပိုင်မင်းကို ပြုံးပျော်သွားစေသည်။ ယွင်ရှန်းက သူ့ကို အကူအညီတောင်းခြင်းမှာ သူမ၏ စိတ်တံခါးကို ဖွင့်လှစ်ကာ သူ့ကို စတင်လက်ခံလိုက်ခြင်း၏ အမှတ်အသားတစ်ခုဟု သူ ယူဆလိုက်သည်။

ယွင်ရှန်းသည် သဘာဝအတိုင်း ထက်မြက်သူဖြစ်သော်လည်း သူမ၏ နောက်ခံကြောင့် လှည့်စားမှုနှင့် လုပ်ကြံဖန်တီးမှုများတွင်မူ မကျွမ်းကျင်ပေ။ သို့သော် သူမ၏ လက်ရှိ အန္တရာယ်ရှိသော အခြေအနေကို သိမြင်လိုက်သည်နှင့် ချက်ချင်းပင် ဆုံးဖြတ်ချက်တစ်ခု ချမှတ်လိုက်တော့သည်။

ရွှမ်ဝူကျိ၊ အမှောင်အိမ်ရှေ့မင်းသား၊ ပြီးတော့ ထျန်းချွဲကျီ... သူတို့အားလုံးက ငါ ယွင်ရှန်းနဲ့ ယန်အိမ်တော်သားတွေကို ဒီလောက်အလွယ်တကူ အနိုင်ကျင့်လို့ရမယ်လို့ တကယ်ကြီး ထင်နေကြတာလား။

အကယ်၍ သူတို့သာ သူမကို ပွင့်လင်းမြင်သာစွာနှင့် သိက္ခာရှိရှိ ရင်ဆိုင်ခဲ့မည်ဆိုပါက ယွင်ရှန်းအနေဖြင့်လည်း အရိပ်မည်းထဲမှ တုံ့ပြန်ရန် ဝန်လေးနေမည် ဖြစ်သည်။ သို့သော် သူတို့က ယုတ်မာသော နည်းလမ်းမျိုးစုံကို အသုံးပြုလာခဲ့မှတော့ ယွင်ရှန်းအနေဖြင့်လည်း သူတို့၏ လှည့်ကွက်များကို အလွယ်တကူ လွှတ်ပေးနိုင်မည် မဟုတ်ပေ။

"မင်း အလိုရှိသမျှကို ငါ ဖြည့်ဆည်းပေးဖို့ အသင့်ပဲ"

ယွင်ရှန်း၏ မျက်ဝန်းထဲမှ ပြတ်သားသော အကြည့်များကို မြင်လိုက်ရချိန်တွင် တောကြောင်မလေး တစ်ယောက် သတိပြန်ဝင်လာပြီဖြစ်ကြောင်း ယီပိုင်မင်းသိလိုက်သည်။ သူမသည် အခြေအနေတစ်ခုလုံးကို လျင်မြန်စွာ ချိတ်ဆက်စဉ်းစားပြီးနောက် "ကျွန်မကို သွေးစွန်းနေသောလက်ဂိုဏ်းရှိတဲ့နေရာကို ပြောပြပါ" ဟု အံကြိတ်ကာ ပြောလိုက်သည်။

ယီပိုင်မင်း၏ မျက်ခုံးများ မြင့်တက်သွားပြီး "မင်းက သွေးစွန်းနေသောလက်ဂိုဏ်းဆီကို သွားမလို့လား" ဟု မေးလိုက်သည်။

"အကြွေးရှိရင် ပြန်ဆပ်ရမှာပဲလေ"

ယွင်ရှန်းက ပြောလိုက်ရာ သူမ၏ မျက်ဝန်းထဲတွင် သတ်ဖြတ်လိုသော အရိပ်အယောင်များ ပေါ်ထွက်လာသည်။

"မင်းရဲ့လက်တွေကို ဘာလို့ အညစ်အကြေး ပေခံမှာလဲ မင်းသာ မကြိုက်ဘူးဆိုရင် မနက်ဖြန်နောက်ပိုင်းမှာ ဒီကမ္ဘာပေါ်မှာ သွေးစွန်းနေသောလက်ဂိုဏ်းဆိုတာ ရှိတော့မှာ မဟုတ်ဘူး"

ယီပိုင်မင်းက ပြောကာ ယွင်ရှန်း၏ လက်ကလေးကို တင်းကျပ်စွာ ဆုပ်ကိုင်ထားလိုက်သည်။

အမျိုးသားတစ်ဦးနှင့် အမျိုးသမီးတစ်ဦး၏ လက်အရွယ်အစားမှာ မွေးရာပါပင် ကွာခြားလှသည်။ ယီပိုင်မင်းက သူမ၏ လက်ကလေးကို ပွတ်သပ်ရင်း စဉ်းစားနေမိသည်မှာ. သူမ၏ လက်များသည် လူ့အသက်များကို ကယ်တင်ရန်သာ ဖြစ်သင့်ပြီး သူ၏ သွေးစွန်းနေပြီးသား လက်များကမူ နောက်ထပ် အသက်တစ်ရာကို သတ်ရန်ပင် ဝန်လေးနေမည် မဟုတ်ပေ။

“ဘယ်သူပဲဖြစ်ဖြစ် ငါ့မိန်းကလေးကို စိတ်အနှောင့်အယှက်ပေးရဲရင်၊ သူတို့အားလုံးကို တစ်သက်လုံး ထိတ်လန့်တုန်လှုပ်နေစေရမယ်” ဟု သူ ကျိန်ဆိုလိုက်သည်။

သွေးစွန်းနေသောလက်ဂိုဏ်း၏ အခြေစိုက်စခန်း

မနက်စောစောအချိန်၊ ကျိုးမြို့တော်၏ အနောက်မြောက်ဘက် မိုင်ပေါင်းများစွာ ဝေးကွာသော ချိုင့်ဝှမ်းတစ်ခု။

ဤနေရာသည် ယွီကျင်းမြို့မှဆိုလျှင် အနည်းဆုံး ရက်သတ္တပတ် နှစ်ပတ်ခန့် ခရီးသွားရမည့် နေရာဖြစ်သည်။ ချိုင့်ဝှမ်းတစ်ခုလုံးမှာ မြူနှင်းများဖြင့် ဖုံးလွှမ်းနေပြီး ဤနေရာသို့ ဝင်ရောက်သွားသော မည်သည့် မုဆိုး သို့မဟုတ် မိစ္ဆာသားရဲမျှ ပြန်လည် ထွက်လာနိုင်ခြင်း မရှိပေ။

အများသူငါ သတိမထားမိနိုင်သော အချက်မှာ ထိုချိုင့်ဝှမ်းတစ်ခုလုံးကို ဖုံးကွယ်ထားရန် မှော်အစီအရင်တစ်ခုကို တပ်ဆင်ထားခြင်းပင်။ ချိုင့်ဝှမ်းအပြင်ဘက်ရှိ အပင်များမှာ သာမန်အတိုင်း ထင်ရသော်လည်း သေချာကြည့်လျှင်မူ အားလုံးမှာ အဆိပ်ပင်များ ဖြစ်နေသည်ကို တွေ့ရမည်ဖြစ်သည်။ ထိုမြူနှင်းများမှာလည်း မှော်အစီအရင်က ဖန်တီးထားသော ထင်ယောင်ထင်မှားမှုများသာ ဖြစ်သည်။

ဤနေရာသည်ကား သွေးစွန်းနေသောလက်ဂိုဏ်း၏ အဓိက အခြေစိုက်စခန်းပင်။