နှစ် ၅၀၀ နောက်ကျမှ ပွင့်လာသော စနစ်

ကျိုကျိုးတိုက်ကြီး၊ ကျိလေတောင်ထိပ်။

မည်းမှောင်နေသော တိမ်တိုက်များ ဖုံးလွှမ်းနေပြီး လျှပ်စီးများ လက်ကနဲ၊ မိုးခြိမ်းသံများ ဟိန်းကနဲ ဖြစ်နေသည်။ ကြေးနီရောင် ကောင်းကင်လျှပ်စီးများသည် တိမ်တိုက်များကြားတွင် နဂါးနှင့် မြွေများ တွားသွားသကဲ့သို့ တဖျတ်ဖျတ် တောက်ပနေ၏။ နတ်ဘုရားနှင့် မိစ္ဆာများ၏ အမျက်ဒေါသကဲ့သို့ ကောင်းကင်ဘုံ၏ ဖိအားမှာ တောင်ကြီးတစ်လုံးကဲ့သို့ လွှမ်းမိုးထားသဖြင့် မြင်ရသူအပေါင်းကို တုန်လှုပ်ချောက်ချားစေသည်။

နားထဲတွင် စည်တီးနေသကဲ့သို့ ကျယ်လောင်လှသော မိုးခြိမ်းသံများမှာလည်း နားကွဲမတတ်ပင်။

ကျယ်ပြန့်လှသော ကောင်းကင်လျှပ်စီးများသည် လျှပ်စစ်ရည်များအဖြစ် ပြောင်းလဲကာ ကျိလေတောင်ထိပ်တွင် လက်နှစ်ဖက်ကို နောက်ပစ်လျက် မတ်မတ်ရပ်နေသော လူရိပ်ပေါ်သို့ စီးဆင်းသွားသည်။ ထိုလူရိပ်မှာမူ လျှပ်စီးများ ရိုက်ခတ်နေသော်လည်း လှုပ်ရှားခြင်းမရှိဘဲ ခိုင်ခံ့စွာ ရပ်တည်နေလေသည်။

မိုးကြိုးအတိဒုက္ခ ပြီးဆုံးသွားပြီးနောက် ကျန်းလီသည် မျှော်လင့်ချက်အပြည့်ဖြင့် ကောင်းကင်ကို မော့ကြည့်လိုက်၏။

သို့သော်လည်း ကောင်းကင်တွင် မည်းမှောင်နေသော တိမ်တိုက်များ ကင်းစင်သွားပြီး ကြည်လင်နေသည်မှလွဲ၍ သူမျှော်လင့်နေသော ရွှေရောင်တောက်ပသည့် နတ်ဘုရားဘုံတက်လှမ်းရာ လှေကားကိုမူ မတွေ့ရပေ။

"တကယ်ပဲ နတ်ဘုရားဘုံကို တက်လှမ်းလို့ မရတော့တာပဲ"

ကျန်းလီသည် လွှမ်းမောသော ခံစားချက်ဖြင့် တစ်ကိုယ်တည်း ရေရွတ်လိုက်မိသည်။ ၎င်းမှာ သူ၏ (၁၅) ကြိမ်မြောက် နတ်ဘုရားဖြစ်ရန် အတိဒုက္ခကို ကျော်ဖြတ်ခြင်းပင် ဖြစ်သည်။

အတိဒုက္ခကို ကျော်ဖြတ်ကာ နတ်ဘုရားဘုံသို့ တက်လှမ်းခြင်းမှာ လေထဲက တိမ်တိုက်ကဲ့သို့ အခြေအမြစ်မရှိသော ပုံပြင် မဟုတ်ပေ။ ၎င်းအတွက် ခိုင်မာသော သက်သေအထောက်အထားများ ရှိသည်။ ယခုအချိန်အထိ ကျိုကျိုးတိုက်ကြီးတွင် နတ်ဘုရားများ ချန်ထားခဲ့သော ဂိုဏ်းအဆက်အနွယ်များ၊ နတ်ဘုရားလက်နက်များ၊ နတ်ဘုရားကျင့်စဉ်များနှင့် နတ်ဘုရားဘုံတက်လှမ်းရာ လှေကားကို ကိုယ်တိုင်မြင်ဖူးခဲ့သည့် ရှေးဟောင်းပုဂ္ဂိုလ်ကြီးများ ရှိနေဆဲပင်။

ထိုပုဂ္ဂိုလ်ကြီးများ၏ အဆိုအရ လွန်ခဲ့သော နှစ်ပေါင်းထောင်ချီက ကျိုကျိုးတိုက်ကြီးတွင် နတ်ဘုရားဖြစ်သွားသော ကျင့်ကြံသူကြီးများ မကြာခဏ ပေါ်ထွက်ခဲ့သည်။ ကောင်းကင်အတိဒုက္ခကို ကျော်ဖြတ်ပြီးသည်နှင့် နတ်ဘုရားဘုံမှ နတ်ဘုရားဘုံတက်လှမ်းရာ လှေကား ကျဆင်းလာကာ ကျင့်ကြံသူကို ကြိုဆိုလေ့ရှိသည်ဟု ဆိုသည်။

သို့သော်လည်း အကြောင်းရင်းကို မသိရဘဲ နတ်ဘုရားဘုံမှ နတ်ဘုရားဘုံတက်လှမ်းရာ လှေကား ကျဆင်းမလာတော့သည်မှာ ကြာခဲ့ပြီဖြစ်သည်။ နတ်ဘုရားဘုံသို့ တက်လှမ်းရာလမ်းမှာ ပျက်ပြယ်သွားခဲ့သဖြင့် ရေတွက်၍မရနိုင်သော ကျင့်ကြံသူကြီးများမှာ သက်ပြင်းချကာ နောင်တများဖြင့် ကွယ်လွန်ခဲ့ကြရလေသည်။

ကျန်းလီသည် လွန်ခဲ့သော နှစ်ပေါင်းငါးရာက ကျိုကျိုးတိုက်ကြီးသို့ ကူးပြောင်းရောက်ရှိလာသူ တစ်ဦး ဖြစ်သည်။ သူ့တွင် မည်သည့် အထူးစွမ်းရည်မှ ပါမလာခဲ့ဘဲ ကြိုးစားအားထုတ်မှု၊ ဉာဏ်ပညာနှင့် ကံတရားတို့ဖြင့်သာ အောက်ခြေမှ စတင်ခဲ့ရသည်။ အခက်အခဲနှင့် အတားအဆီး အမျိုးမျိုးကို ကျော်ဖြတ်ခဲ့ပြီးနောက် နောက်ဆုံးတွင် ကျိုကျိုးတိုက်ကြီး၏ အမြင့်ဆုံးနယ်ပယ်ဖြစ်သော 'မဟာယာနအဆင့်' သို့ ရောက်ရှိခဲ့ကာ လက်ရှိ 'လူသားဧကရာဇ်' ဖြစ်လာခဲ့သည်။ သူသည် ကျိုကျိုးတိုက်ကြီး၏ အငြင်းပွားဖွယ်မရှိသော အင်အားအကြီးဆုံး ပုဂ္ဂိုလ်ပင် ဖြစ်သည်။

ကျင့်ကြံခြင်းကမ္ဘာသို့ ရောက်လာပါလျက်နှင့် နတ်ဘုရားဘုံသို့ မတက်လှမ်းနိုင်ခြင်းမှာ တကယ်ပင် နှမြောစရာကောင်းလှ၏။

ကျန်းလီလည်း တစ်ခါတစ်ရံတွင် စဉ်းစားမိသည်။ အကယ်၍ သူ့မှာသာ စနစ်တစ်ခု သို့မဟုတ် အနားမှာ အမြဲရှိနေပေးမည့် ဆရာအဘိုးအိုကဲ့သို့ အထူးစွမ်းရည်တစ်ခုသာ ပါလာခဲ့လျှင် ယခုထက်ပို၍ လမ်းကြောင်းဖြောင့်ဖြောင့်နှင့် ရောက်လာနိုင်မည် မဟုတ်လား။

သို့သော် ချက်ချင်းပင် သူ ပြန်လည် စိတ်အေးသွားသည်။ ယခုအချိန်မှာ ဒါတွေကို စဉ်းစားနေလို့ ဘာထူးမည်နည်း။ အထူးစွမ်းရည် ရှိသည်ဖြစ်စေ၊ မရှိသည်ဖြစ်စေ သူသည် ယခုနေရာသို့ ရောက်လာခဲ့ပြီ မဟုတ်လား။ ထို့ပြင် အတိတ်ကို ပြန်ကြည့်လျှင် သူကျော်ဖြတ်ခဲ့ရသော လမ်းဘေး လမ်းချိုင့်များမှာလည်း ပျော်စရာတစ်မျိုး ဖြစ်နေသည်ဟု ခံစားရသည်။

[ဟို့စ်၏ အချက်အလက်များကို စစ်ဆေးတွေ့ရှိပါပြီ။ လက်တုံ့ပြန်ခြင်းစနစ်ကို စတင်လိုက်ပါပြီ။]

[အမည် - ကျန်းလီ]

[အသက် - ၅၁၈ နှစ်]

[အဆင့်အတန်း - လက်ရှိလူသားဧကရာဇ်]

[ကျင့်ကြံမှုအဆင့် - မဟာယာနအဆင့်]

စက်ရုပ်ဆန်ဆန် အသံတစ်ခု ကျန်းလီ၏ နားထဲတွင် ပေါ်ထွက်လာသည်။

ကျန်းလီသည် အလိုအလျောက်ပင် သူ၏ နတ်ဘုရားအာရုံကို ဖြန့်ကျက်ကာ သတိထားလိုက်သည်။ သို့သော်လည်း ထိုအသံကို ရှင်းရှင်းလင်းလင်း ကြားလိုက်ရသောအခါ သူ ကြောင်အသွားရသည်။ စိတ်ထဲတွင် ရင်ခုန်ရမလား၊ စိတ်ပျက်ရမလား မသိသော ခံစားချက်တို့ ပေါ်ပေါက်လာကာ ရယ်မောလျက် ဆဲရေးလိုက်မိ၏။

"ဒီ သောက်စနစ်က ရောက်လာတာ နောက်ကျလွန်းနေပြီ မဟုတ်ဘူးလား။"

ဆဲသာဆဲရသော်လည်း စနစ်ကိုမူ ဖွင့်ရမည်ပင်။

[ဤစနစ်သည် လက်တုံ့ပြန်ခြင်းစနစ်ပါ။ ဟို့စ်ကို အထင်သေးခဲ့သူ အားလုံးကို အနိုင်ယူနိုင်ရန် ကူညီပေးပါမယ်။]

[ဟို့စ် ကျေးဇူးပြု၍ စတင်ခြင်း လက်ဆောင်ထုပ်ကို လက်ခံပေးပါ။]

'လက်တုံ့ပြန်ခြင်း' ဟူသော စကားလုံးကို ကြားလိုက်ရသောအခါ ကျန်းလီ၏ စိတ်ထဲတွင် မတင်မကျဖြစ်သော စိုးရိမ်စိတ်တစ်ခု ပေါ်လာသည်။ သို့သော်လည်း စိုးရိမ်စိတ်ကို ဖိနှိပ်ကာ ပြောလိုက်သည် - "လက်ခံမယ်"

သူပြောပြီးသည်နှင့် ကျန်းလီ၏ရှေ့တွင် ပစ္စည်းများစွာ လေဟာနယ်ထဲမှ ပေါ်လာသည်။

သူသည် မြေပြင်ပေါ်တွင် တင်ပျဉ်ခွေထိုင်ကာ ထိုပစ္စည်းများကို စစ်ဆေးလိုက်၏။

ဆေးပုလင်းငယ်လေးကို ဖွင့်လိုက်သည်နှင့် သင်းပျံ့သော ရနံ့ကို ရလိုက်ပြီး စိတ်ကြည်လင်သွားစေသည်။ ၎င်းမှာ ထိပ်တန်းအဆင့် ဆေးလုံးများတွင်သာ ရှိတတ်သည့် ရနံ့မျိုးဖြစ်သည်။

ထိပ်တန်းအဆင့် 'ချီစုစည်းဆေးလုံး' အလုံး ၂၀ - ၎င်းမှာ ချီသန့်စင်ခြင်းအဆင့် ကျင့်ကြံသူများအတွက် အထူးအာနိသင်ရှိသည်။

ထိပ်တန်းအဆင့် 'အခြေခံတည်ဆောက်ခြင်းဆေးလုံး' ၁ လုံး - ချီသန့်စင်ခြင်းအဆင့်မှ ပြီးပြည့်စုံသော အခြေခံတည်ဆောက်ခြင်းအဆင့်သို့ ရောက်ရှိရန် ကူညီပေးနိုင်သည်။

အဆင့်နိမ့် အဆောင်စာရွက် ၁၀ ရွက် - ခွန်အားတိုးအဆောင် ၂ ရွက်၊ အရှိန်တိုးအဆောင် ၂ ရွက်၊ ကိုယ်ဖျောက်အဆောင် ၂ ရွက်နှင့် စိတ်တည်ငြိမ်အဆောင် ၄ ရွက်တို့ ပါဝင်သည်။

အဆင့်နိမ့် ဝိညာဉ်ကျောက်တုံးတုံး ၁၅၀ တုံး။

မပြည့်စုံသော တာအိုကျင့်စဉ်တစ်အုပ်ဖြစ်သည့် 《အနုနည်းဖြင့် အနိုင်ယူခြင်း》။

စနစ်က ဘေးနားတွင် စာသားလေးဖြင့်လည်း ညွှန်ပြထားသေးသည်။

[《အအနုနည်းဖြင့် အနိုင်ယူခြင်း》 သည် တာအိုဂိုဏ်း၏ လျှို့ဝှက်ကျင့်စဉ် ဖြစ်သည်။ ဤမပြည့်စုံသော ကျင့်စဉ်ကို လေ့ကျင့်ပါက ချီသန့်စင်ခြင်းအဆင့်တွင် ပြိုင်ဘက်ကင်းဖြစ်မည်။ ရင်းမြစ်အမှတ် တစ်သိန်းအသုံးပြုကာ ပြည့်စုံအောင် ပြုပြင်နိုင်သည်။]

[လက်ရှိ ရင်းမြစ်အမှတ် - ၀]

ကျန်းလီသည် ထိုပစ္စည်းများကို ကြည့်ကာ စကားမပြောနိုင်ဘဲ ဖြစ်နေသည်။

ဒီစတင်ခြင်း လက်ဆောင်ထုပ်က 'အစပျိုး' အဆင့် လူသစ်တွေအတွက် များလွန်းနေတာ မဟုတ်ဘူးလား။

ကျန်းလီသည် ထိုပစ္စည်းများကို သေသေချာချာ စစ်ဆေးလိုက်သည်။ ထိုထဲတွင် တန်ဖိုးအရှိဆုံးမှာ ဟောင်းနွမ်းနေသော ထိုကျင့်စဉ်စာအုပ် ဖြစ်ဟန်တူသည်။ ဟောင်းရုံတင်မကဘဲ မပြည့်စုံသည့် စာအုပ်ပင်။

"ပြီးတော့ 《အနုနည်းဖြင့် အနိုင်ယူခြင်း》 က..."

ကျန်းလီ ခဏမျှ စဉ်းစားလိုက်ပြီးနောက် သူ၏ သိုလှောင်လက်စွပ်ထဲမှ စာအုပ်အသစ်တစ်အုပ်ကို ထုတ်လိုက်သည်။ ထိုစာအုပ်၏ အမည်မှာလည်း 'အနုနည်းဖြင့် အနိုင်ယူခြင်း' ပင် ဖြစ်သည်။

၎င်းမှာ တာအိုဂိုဏ်းချုပ်ကိုယ်တိုင် လက်ရေးဖြင့် ရေးကူးကာ ကျန်းလီကို လက်ဆောင်ပေးထားခြင်း ဖြစ်ပြီး ထိုစာအုပ်ပေါ်တွင် တာအိုဂိုဏ်းမှ စီနီယာကြီးများ၏ အတွေ့အကြုံများနှင့် မှတ်ချက်များပါ ပါရှိသည်။

ယေဘုယျအားဖြင့် အစွမ်းထက်သော တာအိုကျင့်စဉ်များတွင် ကျင့်ကြံမှုအဆင့် ကန့်သတ်ချက်များ ရှိတတ်သည်။ ဥပမာ - ဟို့ထုဂိုဏ်း၏ 《အင်ပါယာကို ထိန်းချုပ်သော အိုး》 ကျင့်စဉ်မှာ 'ရွှေအမြုတေအဆင့်' ရောက်မှသာ စွမ်းအားကို အသုံးပြုနိုင်ပြီး၊ စိတ်မိစ္ဆာဂိုဏ်း၏ 《ယင်ယန်ပြောင်းလဲခြင်း》 ကျင့်စဉ်မှာလည်း ရွှေအမြုတေအဆင့် ရောက်မှသာ အသုံးပြုနိုင်သည်။

သို့သော် 《အနုနည်းဖြင့် အနိုင်ယူခြင်း》 ၏ အကြီးမားဆုံး အားသာချက်မှာ ဝိညာဉ်ချီ ကန့်သတ်ချက် မရှိခြင်းပင်ဖြစ်သည်။ ၎င်းသည် ခွန်အားကို စိတ်တိုင်းကျ ထိန်းချုပ်ကာ အားနည်းသူက အားကြီးသူကို အနိုင်ယူရန် ဖြစ်သောကြောင့် အဆင့်ကျော် တိုက်ခိုက်သူများအတွက် အလွန်သင့်လျော်ပြီး ကန့်သတ်ချက်မရှိသော တာအိုကျင့်စဉ် အနည်းငယ်ထဲမှ တစ်ခုဖြစ်သည်။

ကျန်းလီသည် ထိုစာအုပ်နှစ်အုပ်ကို အသေးစိတ် နှိုင်းယှဉ်ကြည့်လိုက်ရာ ပါဝင်သည့် အကြောင်းအရာများ တူညီနေသည်ကို တွေ့ရသဖြင့် ဇဝေဇဝါ ဖြစ်သွားသည်။ "တကယ်တော့ အားလုံးက ပစ္စည်းကောင်းတွေပါပဲ။ ဒါပေမဲ့ ဒီပစ္စည်းတွေက ဘာလို့ ချီသန့်စင်ခြင်းအဆင့်တွေအတွက်ပဲ ဖြစ်နေရတာလဲ"

"စနစ်... ငါ့ရဲ့ ကျင့်ကြံမှုအဆင့်က ဘာလဲ"

စက်ရုပ်ဆန်ဆန် အသံ ထွက်ပေါ်လာသည်။

[မဟာယာနအဆင့်]

"မင်းရဲ့ စတင်ခြင်း လက်ဆောင်ထုပ်က မှားပေးနေတာ မဟုတ်ဘူးလား။ ဒါက ချီသန့်စင်ခြင်းအဆင့် လူသစ်အတွက် မဟုတ်ဘဲ မဟာယာနအဆင့် လူသစ်အတွက် လက်ဆောင်ထုပ် ဖြစ်သင့်တာ မဟုတ်လား"

[စစ်ဆေးပြီးပါပြီ၊ မှားယွင်းမှု မရှိပါ။]

"ငါ့ရဲ့ ကျင့်ကြံမှုအဆင့်က ဘာလဲ"

[မဟာယာနအဆင့်]

"မင်းပေးတဲ့ စတင်ခြင်း လက်ဆောင်ထုပ်က ဘယ်အဆင့် လူတွေအတွက် သင့်လျော်လဲ"

[ချီသန့်စင်ခြင်းအဆင့်]

"ဒါဆို မှားနေတာ မဟုတ်ဘူးလား"

[စစ်ဆေးပြီးပါပြီ၊ မှားယွင်းမှု မရှိပါ။]

"ငါ့ရဲ့ အဆင့်က..."

[မဟာယာန၊ မှားယွင်းမှု မရှိပါ။]

"အေးပါကွာ" ကျန်းလီ စိတ်ပျက်လက်ပျက် ဖြစ်သွားရသည်။ "ငါ မမေးခင်ကတည်းက ဖြေထားနှင့်ပြီပဲ"

ဒီစနစ်က စည်းကမ်းကြီးလွန်းတာလား၊ ဒါမှမဟုတ် တကယ်ပဲ ဉာဏ်ကောင်းနေတာလားဆိုတာ ကျန်းလီလည်း မခွဲခြားနိုင်တော့ပေ။

[လူသစ်တာဝန်ကို ထုတ်ပြန်လိုက်သည်။ ဤတာဝန်ကို ငြင်းပယ်၍ မရပါ၊ ရှောင်လွှဲ၍ မရပါ။]

[တာဝန်ရှုံးနိမ့်ပါက အပြစ်ဒဏ် - စနစ်၏ ကျန်ရှိသော လုပ်ဆောင်ချက်များကို ဖွင့်၍ မရတော့ပါ။]

[စနစ်၏ လုပ်ဆောင်ချက်များတွင် - အရောင်းဆိုင်၊ ဝိညာဉ်ချီ ဖြည့်တင်းပေးခြင်း၊ စိတ်မိစ္ဆာများကို ရှောင်လွှဲခြင်း၊ လေဟာနယ်ဖြတ်ကျော် ရွှေ့ပြောင်းခြင်း... တို့ ပါဝင်သည်။]

[လူသစ်တာဝန် - ကျန်းယီရှင်းသည် မျိုးနွယ်စုခေါင်းဆောင်၏ သားဖြစ်သည့် အရှိန်အဝါကို အသုံးပြုကာ သင့်အား အကြိမ်ကြိမ် နှိပ်စက်ခဲ့သည်။ ကျေးဇူးပြု၍ ကျန်းယီရှင်းကို အနိုင်ယူပါ။]

ကျန်းလီ၏ခေါင်းထဲတွင် မေးခွန်းထုတ်စရာများ ပြည့်နှက်သွားသည်။

ကျန်းယီရှင်း... ရင်းနှီးနေတဲ့ နာမည်ပါလား၊ ဘယ်သူပါလိမ့်။

သူ့မှတ်ဉာဏ်ကို ကူးပြောင်းရောက်ရှိလာစ အချိန်အထိ ပြန်လှန်ကြည့်လိုက်မှ ကျန်းယီရှင်းက ဘယ်သူလဲဆိုတာ ကျန်းလီ သတိရသွားသည်။

ကျန်းလီ၏ဖခင်မှာ ယခင်မျိုးနွယ်စုခေါင်းဆောင် ဖြစ်သည်။ ဖခင်ကွယ်လွန်ပြီးနောက် မိခင်နှင့် ကျန်းလီတို့ မိခင်အိုကြီးသာ ကျန်ရစ်ခဲ့ပြီး မိခင်မှာလည်း ပြင်းထန်သော ရောဂါဖြင့် ထပ်မံကွယ်လွန်သွားရာ ကျန်းလီသည် မိဘမဲ့ ဖြစ်သွားခဲ့ရသည်။

မိဘများ ကွယ်လွန်ပြီးနောက် ကျန်းယီရှင်းသည် သူ့ဖခင်မှာ လက်ရှိမျိုးနွယ်စုခေါင်းဆောင် ဖြစ်သည်ကို အကြောင်းပြကာ လူတိုင်းကို လိုက်လံ နှိပ်စက်ခဲ့သည်။ ထိုအထဲတွင် ကျန်းလီကို နှိပ်စက်ရသည်မှာ သူ့အတွက် အထူးပင် ကျေနပ်စရာ ကောင်းနေပုံရသည်။ ကျန်းယီရှင်းမှာ တစ်မျိုးနွယ်လုံးတွင် ပါရမီအကောင်းဆုံးဖြစ်သဖြင့် ဘယ်သူမှ ဘာမှမပြောရဲကြပေ။ ကျန်းလီမှာမူ အားမကိုးရသူဖြစ်သဖြင့် နှိပ်စက်ခံရပြီးတိုင်း ဘာမှမလုပ်ဘဲ နေ့တိုင်း ကောင်းကင်ကိုသာ အပြစ်တင်နေခဲ့ရာမှ နောက်ဆုံးတွင် စိတ်ဒဏ်ရာကြောင့် ရင်ကွဲနာကျကာ သေဆုံးသွားခဲ့သည်။

သူသည် ထိုအချိန်တွင် ကူးပြောင်းရောက်ရှိလာခဲ့ခြင်းဖြစ်သည်။

ကူးပြောင်းလာပြီးနောက် ဤမျိုးနွယ်စုတွင် ဆက်နေလျှင် အကျိုးထက် အဆိုးက ပိုများမည်ဟု ကျန်းလီ ယူဆသဖြင့် အိမ်မှ ထွက်ပြေးခဲ့သည်။

......

ဒါက လွန်ခဲ့သော နှစ်ပေါင်းငါးရာက ကိစ္စပင်။

ယခု အမြင်နှင့် ကြည့်မည်ဆိုလျှင် တစ်မျိုးနွယ်လုံးတွင် ပါရမီအကောင်းဆုံးဆိုသည့် ကျန်းယီရှင်းသည် ယခုဘဝတွင် အခြေခံတည်ဆောက်ခြင်းအဆင့်လောက်သာ အများဆုံး ရောက်နိုင်သည်။ ထို့နောက် ကြိုးစားပမ်းစားကျင့်ကြံပါမှ အခြေခံတည်ဆောက်ခြင်း နောက်ဆုံးအဆင့်လောက်အထိ ရောက်နိုင်မည်ဖြစ်ပြီး ရွှေအမြုတေအဆင့်ကို ရောက်ရန်မှာမူ မဖြစ်နိုင်သလောက်ပင်။

အခြေခံတည်ဆောက်ခြင်းအဆင့်၏ သက်တမ်းမှာ သာမန်လူသားကဲ့သို့ပင် ၁၄၀ ဝန်းကျင်သာ ရှိသည်။ ရွှေအမြုတေအဆင့်၏ သက်တမ်းမှာမူ လူအပေါ် မူတည်ပြီး နှစ် ၂၀၀ မှ ၃၀၀ အကြား ရှိတတ်သည်။

ကျန်းယီရှင်းသည် အခြေခံတည်ဆောက်ခြင်းဖြစ်စေ၊ ရွှေအမြုတေဖြစ်စေ ယခုအချိန်တွင်မူ သူသည် သေပြီးသားဖြစ်နေရမည်။

အရေးအကြီးဆုံး အချက်မှာ ဤလူသစ်တာဝန်သည် ယခုလက်ရှိ သူ၏ အနေအထားနှင့် လုပ်ဆောင်ရန် မည်သို့မှ မဖြစ်နိုင်ခြင်းပင်။

"စနစ်... အခုက ဘယ်ခေတ်လဲ"

[ယန်ပြက္ခဒိန် ၄၃၀၀ ခုနှစ်။]

"အခုက ယန်ပြက္ခဒိန် ၄၈၀၀ ခုနှစ်ကွ။"

ကျန်းလီ၏ စိုးရိမ်စိတ်နှင့် တစ်ခုခုလွဲချော်နေသည်ဆိုသော ခံစားချက်က ဘယ်ကလာသလဲဆိုတာ သူ အခုမှ သိလိုက်ရသည်။ ဒီစနစ်က နှစ်ပေါင်း ၅၀၀ နောက်ကျမှ ပွင့်လာတာပဲ။

[စနစ်က သတ်မှတ်ထားသော အချိန်ကိုသာ အတည်ပြုပေးပါ။]

ကျန်းလီမှာ ဒေါသထွက်လွန်း၍ တစ်ကိုယ်လုံး တုန်ရီနေသည်။

"တာဝန်ကို ပြောင်းလဲပေးဖို့ ငါ တောင်းဆိုတယ်"

[တာဝန်ကို ပြောင်းလဲ၍ မရပါ။]

"ကျန်းယီရှင်းက သေသွားပြီလေ။"

[စနစ်က သတ်မှတ်ထားသော အချိန်ကိုသာ အတည်ပြုပေးပါ။]

"ငါက အခု မဟာယာနအဆင့် ဖြစ်နေပြီ။ ချီသန့်စင်ခြင်းလား၊ အခြေခံတည်ဆောက်ခြင်းလား မသိတဲ့ ကျန်းယီရှင်းကို သွားတိုက်ခိုက်ဖို့က သင့်တော်ရဲ့လား။ ဒါကို လက်တုံ့ပြန်တာလို့ ခေါ်သလား။"

[ကျေးဇူးပြု၍ လူသစ်တာဝန်ကို အောင်မြင်အောင် လုပ်ဆောင်ပါ။]

"စနစ်ကို ပြန်စ (Restart) မယ်"

[ကျေးဇူးပြု၍ လူသစ်တာဝန်ကို အောင်မြင်အောင် လုပ်ဆောင်ပါ။]

"စနစ်ကို ဖျက်ပစ် (Uninstall) မယ်"

[ကျေးဇူးပြု၍ လူသစ်တာဝန်ကို အောင်မြင်အောင် လုပ်ဆောင်ပါ။]

ကျန်းလီမှာ သွေးအန်မတတ်ပင် ခံစားလိုက်ရသည်။

'လက်တုံ့ပြန်ခြင်း' ဟူသော စကားလုံးကို စတွေ့ကတည်းက သူ ရိပ်မိသင့်ခဲ့သည်။ ကျိန်စာသင့်စနစ်ပဲ။ သူသည် လက်ရှိ လူသားဧကရာဇ်ဖြစ်ပြီး ကျိုကျိုးတိုက်ကြီး၏ အင်အားအကြီးဆုံးသူ ဖြစ်နေပြီ၊ ဘယ်သူ့ကို သွားပြီး လက်တုံ့ပြန်နေရဦးမှာလဲ။

"ဘာမဟုတ်တဲ့ စနစ်၊ မင်းက ဘာအသုံးကျလို့လဲ။"

ကျန်းလီသည် ဤစနစ်ကို ဂရုမစိုက်တော့ရန် ဆုံးဖြတ်လိုက်သည်။ နှစ်ပေါင်း ၅၀၀ နောက်ကျမှ ပွင့်လာရုံတင်မကဘဲ သေပြီးသားလူကို အနိုင်ယူခိုင်းနေသည်၊ ဘယ်လို အနိုင်ယူရမှာလဲ။ စိတ်ကူးထဲမှာပဲ အနိုင်ယူရမှာလား။

...

ကျိလေတောင်အောက်တွင် လူသားဧကရာဇ် အတိဒုက္ခကျော်ဖြတ်သည်ကို စောင့်ကြည့်နေကြသော အစွမ်းထက်သည့် ကျင့်ကြံသူများစွာ ရှိနေကြသည်။ ထိုသူများမှာ ဂိုဏ်းကြီးများ၏ အကြီးအကဲများ၊ နိုင်ငံကြီးများ၏ ဘုရင်များ သို့မဟုတ် နှစ်ပေါင်းထောင်ချီ သက်တမ်းရှိနေပြီဖြစ်သော ရှေးဟောင်းပုဂ္ဂိုလ်ကြီးများ ဖြစ်ကြသည်။

ထိုဂိုဏ်းချုပ်နှင့် အဘိုးအိုကြီးများ၏ ကျင့်ကြံမှုမှာ ကောင်းကင်မြေကြီးတုန်ဟီးလောက်အောင်ပင် ဖြစ်သည်။ အကယ်၍ ယခုအချိန်တွင် နတ်ဘုရားဘုံသို့ တက်လှမ်း၍ မရသည့် အခြေအနေသာ မဟုတ်လျှင် သူတို့အားလုံးမှာ အတိဒုက္ခကျော်ဖြတ်ကာ နတ်ဘုရားဖြစ်ရန်အတွက် အေးအေးဆေးဆေး ကျင့်ကြံနေကြမည်မှာ ကြာပြီဖြစ်သည်။ ထိုထဲတွင် အချို့မှာ နတ်ဘုရားအတိဒုက္ခကို ကျော်ဖြတ်ပြီးသူများပင် ရှိသည်။ သို့သော် သူတို့အားလုံးမှာ ကျန်းလီ၏ အတိဒုက္ခကျော်ဖြတ်သည့် အကြိမ်အရေအတွက်ကိုမူ မမီကြပေ။

သူတို့ ဤနေရာသို့ လာကြခြင်းမှာ ကျန်းလီ အတိဒုက္ခကို ကျော်ဖြတ်နိုင်မလားဆိုသည်ကို ကြည့်ရန် မဟုတ်ဘဲ အတိဒုက္ခပြီးနောက် နတ်ဘုရားဘုံသို့ တက်လှမ်းနိုင်မည်လားဆိုသည်ကို စောင့်ကြည့်ရန် ဖြစ်သည်။

သို့သော်လည်း ယခုတစ်ကြိမ်မှာလည်း သူတို့ကို စိတ်ပျက်စေခဲ့သည်။ နတ်ဘုရားအတိဒုက္ခ ပြီးဆုံးသော်လည်း ဒဏ္ဍာရီထဲက နတ်ဘုရားဘုံတက်လှမ်းရာ လှေကား ပေါ်မလာခဲ့ပေ။

နတ်ဘုရားဖြစ်ရန်မှာ မဖြစ်နိုင်တော့ပါလားဟူသော အတွေးမှာ ထိုဂိုဏ်းချုပ်ကြီးများ၏ စိတ်ထဲတွင် ရှောင်လွှဲ၍မရဘဲ ပေါ်ပေါက်လာခဲ့သည်။

ကြိုတင်ပြင်ဆင်ထားသော်လည်း သူတို့၏ စိတ်ထဲတွင် စိတ်မကောင်းဖြစ်မှုတို့ အရိပ်ထိုးသွားကြသည်။

ကျန်းလီသည် တောင်ထိပ်မှ ပျံသန်းဆင်းလာသည်။ လူကဲခတ် မတော်သူပင် ကျန်းလီ၏မျက်နှာတွင် စိတ်ပျက်နေသော အမူအရာကို မြင်နိုင်လေသည်။

တစ်ကြိမ်တည်းနှင့် နတ်ဘုရားမဖြစ်ရရုံနှင့် ကျန်းလီ ဤမျှအထိ စိတ်မပျက်မိပေ။ သို့သော် ရုတ်တရက် ရောက်လာသည့် စနစ်က သူ့ကို နတ်ဘုရားဖြစ်အောင် ကူညီပေးနိုင်မည့် အထူးစွမ်းရည်(ရွှေလက်ချောင်း)ဟု ထင်ခဲ့မိသော်လည်း တကယ်တမ်းမှာမူ အသုံးမကျသော လက်ချောင်းတစ်ချောင်းသာ ဖြစ်နေသောကြောင့်ဖြစ်သည်။

ဂိုဏ်းချုပ်ကြီးများမှာလည်း ကျန်းလီ၏ စိတ်အခြေအနေကို ရိပ်မိကြသော်လည်း ပြုံးရွှင်သော မျက်နှာများဖြင့် ဂုဏ်ပြုစကား ဆိုကြသည်။

"လူသားဧကရာဇ်ကျန်း၊ နောက်ထပ်တစ်ကြိမ် ကောင်းကင်အတိဒုက္ခကို ကျော်ဖြတ်နိုင်ခဲ့တဲ့အတွက် ဂုဏ်ယူပါတယ်"

"ကျေးဇူးတင်ပါတယ်"

"ဘေးကနေ ကြည့်နေတာတောင် တုန်လှုပ်စရာပဲ။ လူသားဧကရာဇ်ကျန်းကတော့ အေးအေးဆေးဆေးပဲ ကျော်ဖြတ်သွားနိုင်တယ်။ ကျင့်ကြံမှုအဆင့်က ထပ်ပြီး တိုးတက်သွားဦးမယ် ထင်တယ်။"

"ကံကောင်းလို့ပါ၊ ကံကောင်းလို့ပါ"

"လူသားဧကရာဇ်ကျန်းသာ နတ်ဘုရားဘုံကို ရောက်သွားရင် အဲ့ဒီမှာလည်း နယ်ပယ်တစ်ခုကို အုပ်ချုပ်မယ့်သူဖြစ်မှာ သေချာတယ်။"

"နတ်ဘုရားဖြစ်ဖို့ လမ်းကြောင်းက ခက်ခဲလွန်းပါတယ်။ ကျွန်တော်တို့အားလုံး အတူတူ ကြိုးစားကြရမှာပါ"

"လူသားဧကရာဇ်ကျန်း... ကျွန်တော့်ရဲ့ဂိုဏ်းကိုလည်း ကြွပါဦး။ အသုံးမကျတဲ့ နောက်မျိုးဆက်တွေကို ကျင့်ကြံခြင်း အတွေ့အကြုံတွေ သင်ကြားပေးဖို့ ကျွန်တော့်မျက်နှာကို ထောက်ထားပြီး လက်ခံပေးပါဦး"

"စီနီယာကျန်း... ဘာတွေပြောနေတာလဲ။ စီနီယာက ကျွန်တော့်အပေါ် သင်ကြားပေးခဲ့တာတွေကို အမြဲ မှတ်မိနေပါတယ်။ နောက်ရက်တွေကျရင် ကျွန်တော် စီနီယာ့ဆီလာပြီး ကျင့်ကြံခြင်း အတွေ့အကြုံတွေ ဖလှယ်ပါ့မယ်။ အဲ့ဒီကျမှ နောက်လူတွေကို ဘေးကနေ နားထောင်ခိုင်းလိုက်ပေါ့"

"နှမြောစရာကောင်းတာက နတ်ဘုရားဘုံက ကျွန်တော်တို့နဲ့ အရမ်းဝေးနေသလို နေရာအတိအကျလည်း မသိရဘူး။ လောကစည်းမျဉ်းကလည်း အရမ်းထူထပ်နေတယ်။ ဒါတွေသာ မရှိရင် လူသားဧကရာဇ်ကျန်းရဲ့ အစွမ်းနဲ့ဆိုရင် အတင်းအဓမ္မ ဖောက်ထွက်လို့ ရနိုင်မှာပဲ။"

"မင်းတို့ရဲ့ ရွှေမီတောင်အနွယ်က လေဟာနယ်နေရာလွတ်ပိုင်းမှာ အကျွမ်းကျင်ဆုံးဆိုတာ လူတိုင်းသိတာပဲ။ နတ်ဘုရားဘုံရဲ့တည်နေရာကို ရှာနိုင်မယ့်သူ ရှိရင် အဲ့ဒါ မင်းတို့ပဲ ဖြစ်ရမှာပေါ့။"

ကျန်းလီသည် ထိုဂိုဏ်းချုပ်များကို ယဉ်ကျေးစွာ ဆက်ဆံကာ တစ်ဦးချင်းစီကို ကျေးဇူးတင်စကား ပြောလိုက်သည်။ နောက်ပိုင်းတွင်လည်း ဂိုဏ်းအသီးသီးသို့ သွားရောက်ကာ အတွေ့အကြုံများ ဝေမျှပေးရန် သဘောတူလိုက်သဖြင့် ထိုဂိုဏ်းချုပ်များမှာ အလွန်ပင် ဝမ်းသာသွားကြသည်။

.....

ဂိုဏ်းချုပ်များနှင့် လမ်းခွဲပြီးနောက် ကျန်းလီသည် စနစ်ကို ထပ်မံခေါ်လိုက်သည်။ ခုနက ရွှေမီတောင်မှ ဘုန်းတော်ကြီး ပြောသွားသော စကားက သူ့ကို အတွေးတစ်ခုရစေခဲ့သည်။

"စနစ်... ငါ့ကို နတ်ဘုရားဘုံကို ပို့ပေးနိုင်မလား"

[စနစ်၏ နောက်ပိုင်းတွင် လေဟာနယ် ဖြတ်ကျော် ရွှေ့ပြောင်းခြင်း လုပ်ဆောင်ချက်ကို ဖွင့်ပေးပါမယ်။ ဟို့စ်ကို နတ်ဘုရားဘုံသို့ ခေါ်သွားပေးနိုင်ပါတယ်။]

"အခုချက်ချင်း ပို့ပေးလို့ ရမလား" ကျန်းလီ အလွန်ဝမ်းသာသွားသည်။ ဒီစနစ်က အသုံးဝင်သားပဲ၊ အထူးစွမ်းရည်ဆိုတာ ဒါမျိုးပေါ့။

[ကျေးဇူးပြု၍ ဟို့စ် လူသစ်တာဝန်ကို အရင်ဆုံး ပြီးအောင် လုပ်ဆောင်ပါ။]

ကျန်းလီသည် စနစ်ကို စိတ်ရှည်လက်ရှည် ရှင်းပြနေရသည်။ "မင်း ငါ့ကို နတ်ဘုရားဘုံကို အရင်ပို့ပေး။ အဲ့ဒီကတဆင့် ငရဲပြည်ကို သွားလို့ရမယ်။ ငါ ငရဲပြည်မှာ ကျန်းယီရှင်းကို ရှာပြီး သူ့ကို အနိုင်ယူလိုက်ရင် တာဝန်ပြီးပြီ မဟုတ်ဘူးလား"

[ကျေးဇူးပြု၍ ဟို့စ် လူသစ်တာဝန်ကို အရင်ဆုံး ပြီးအောင် လုပ်ဆောင်ပါ။]

"နည်းနည်းလောက် လျှော့ပေးပါဦး။ အကြွေးတင်ထားလို့ မရဘူးလား။ သေပြီးသား လူကို ငါက ဘယ်လိုလုပ် သွားတိုက်ရမှာလဲ"

[ကျေးဇူးပြု၍ ဟို့စ် လူသစ်တာဝန်ကို အရင်ဆုံး ပြီးအောင် လုပ်ဆောင်ပါ။]

"အသုံးမကျတဲ့ စနစ်။"

ကျန်းလီ ခံစားလိုက်ရသည်မှာ ၎င်းမှာ အထူးစွမ်းရည် မဟုတ်ဘဲ ကောင်းကင်ဘုံက သူ့ကို လက်ခလယ် ထောင်ပြနေခြင်းသာဖြစ်သည်။

သူသည် စနစ်ကို အသုံးမကျကြောင်း ဆဲရေးနေရင်း တာဝန်ကို မည်သို့ ပြီးအောင် လုပ်ရမည်ကို စဉ်းစားနေမိသည်။

ဥပမာ - ကျန်းယီရှင်း ဆိုတဲ့ အမည်ရှိတဲ့သူကို ရှာပြီး ထိုးကြိတ်လိုက်ရမလား၊ ဒါမှမဟုတ် လူတစ်ယောက်ကို အတင်းအဓမ္မ ကျန်းယီရှင်းလို့ နာမည်ခေါ်ခိုင်းပြီး ထိုးရမလား၊ ဒါမှမဟုတ် ကျန်းယီရှင်းရဲ့ သင်္ချိုင်းပေါ်မှာ သွားကရမလား...

ဟုတ်ပါတယ်၊ ဒါတွေက အရန်အစီအစဉ်တွေပါ။ အရင်ဆုံး လုပ်ရမည့် အစီအစဉ်ကတော့ ဇာတိရွာကို ပြန်သွားပြီး ကျန်းယီရှင်း အသက်ရှင်နေသေးလားဆိုတာ ကြည့်ရမည်။ ဖြစ်နိုင်သည်မှာ သူသည် သက်တမ်းတိုးဆေးလုံး တစ်လုံး... မဟုတ်ဘူး၊ တစ်လုံးက မလောက်နိုင်ဘူး၊ ဆယ်လုံးလောက် ရထားလို့ ယနေ့အထိ အသက်ရှင်နေတာမျိုး၊ ဒါမှမဟုတ် ဆရာကောင်းတစ်ယောက်နဲ့ တွေ့ပြီး အစွမ်းတွေ လွှဲပြောင်းပေးခံရလို့ 'ဝိညာဉ်သန္ဓေအဆင့်' ကို ရောက်သွားပြီး အသက် ၅၀၀ လောက်အထိ အသက်ရှင်နေတာမျိုး ဖြစ်နိုင်သည်...

မည်သို့ပင်ဖြစ်စေ ပါရမီတစ်ခုတည်းကသာ အဆုံးအဖြတ်ပေးနိုင်သည် မဟုတ်ပေ။ ဥပမာ - ကျန်းလီကိုယ်တိုင်ပင်။ သူ၏ ကြိုးစားအားထုတ်မှုနှင့် ကောင်းကင်အဆင့်ဝိညာဉ်အမြစ်၊ အတိုင်းအဆမဲ့ တာအိုခန္ဓာတို့၏ အနည်းငယ်သော ကူညီမှုသာ မရှိလျှင် သူလည်း ယခုကဲ့သို့ မဟာယာနအဆင့်အထိ ရောက်လာနိုင်ဖို့ မသေချာဘူးမဟုတ်လား။