လူသားဧကရာဇ်ကျန်း၏ အရူးအမူးပရိသတ်

လူသူကင်းမဲ့သော နေရာသို့ ရောက်သောအခါ နယ်စားကုန်းမှာ ဒေါသကို မထိန်းနိုင်တော့ဘဲ ကျန်းမျိုးနွယ်စုခေါင်းဆောင်ကို ပါးတစ်ချက် ရိုက်လိုက်သည်။ မျိုးနွယ်စုခေါင်းဆောင်မှာ လေထဲတွင် နှစ်ပတ်ခန့် လည်သွားပြီးမှ မြေပြင်ပေါ်သို့ ကျသွားကာ ပါးစပ်တစ်ခုလုံး သွေးချင်းချင်း နီသွားလေသည်။

"ဒီအသုံးမကျတဲ့ကောင်... ချင်းမြို့မှာ မြို့တော်ဝန်လုပ်ခဲ့တာ ငါ့ဘဝရဲ့ အကြီးမားဆုံး အမှားပဲ။ မင်းတို့ ဘိုးဘေးက နောက်ထပ် နှစ်အနည်းငယ်လောက် ပိုနေချင်ရင် သူ့ဘာသာသူ နည်းလမ်းရှာခိုင်းစမ်းပါ၊ ငါတို့ကို လိုက်ပြီး ဖာခိုင်းမနေနဲ့။"

"မင်းပဲ ပြောခဲ့တာ မဟုတ်လား၊ မင်းတို့ ဘိုးဘေး မိစ္ဆာကျင့်စဉ်ကျင့်တာကို လူသားဧကရာဇ်ကျန်းက ခွင့်ပြုထားတယ်ဆိုတာ။ အခု ချက်ချင်း လူသားဧကရာဇ်ကျန်းကို ဆက်သွယ်စမ်း။ အခု အခြေအနေမှာ သူ ထွက်ပြောမှပဲ ငါတို့အားလုံး အသက်ဆက်နိုင်မယ်။"

မျိုးနွယ်စုခေါင်းဆောင်သည် ပါးစပ်ထဲမှ သွေးများကို ထွေးထုတ်လိုက်ပြီး - "အမြဲတမ်း လူသားဧကရာဇ်ကျန်းကပဲ ကျွန်တော်တို့ကို ဆက်သွယ်တာပါ။ ကျွန်တော်တို့ဘက်က သူ့ကို ဆက်သွယ်ဖို့ နည်းလမ်း လုံးဝမရှိပါဘူး"

နယ်စားကုန်းသည် အခုမှပင် လူသားဧကရာဇ်ကျန်းသည် ကျန်းယီရှင်း မိစ္ဆာကျင့်စဉ် ကျင့်နေသည်ကို လုံးဝ သိပုံမရကြောင်း သံသယဝင်လာတော့သည်။ ဖြစ်နိုင်သည်မှာ လူသားဧကရာဇ်သည် တကယ်ပင် မျှတသူဖြစ်ပြီး ကျန်းမိသားစုထံသို့ တစ်ခါမှ ပြန်မလာခဲ့ခြင်း ဖြစ်ပေလိမ့်မည်။

သို့သော် ယခုအချိန်တွင် ဒါတွေကို စဉ်းစားနေလို့လည်း မထူးတော့ပေ။

"ဆိုလိုတာက လူသားဧကရာဇ်ကျန်းကို အားကိုးလို့ မရတော့ဘူးပေါ့။" နယ်စားကုန်း၏မျက်နှာမှာ ဒေါသကြောင့် ပြာနှမ်းနေပြီး - "အခုတော့ နည်းလမ်းတစ်ခုပဲ ရှိတော့တယ်"

"ဘာနည်းလမ်းလဲ။ ဟို ကျန်းလီဆိုတဲ့လူကို လူလွှတ်ပြီး သတ်လိုက်ရမှာလား" မျိုးနွယ်စုခေါင်းဆောင်နှင့် မြို့တော်ဝန်ကျန့်တို့က အလုအယက် မေးလိုက်ကြသည်။

"မိုက်မဲတဲ့ကောင်တွေ။ ကျန်းလီက အတိတ်ပြန်လှန်ကြည့်ဖို့ လျှောက်ထားပြီးတာနဲ့ အသတ်ခံလိုက်ရရင် ဒါက ကျန်းလီကို သတ်တာ မဟုတ်ဘဲ တော်ဝင်တရားရုံးတော်ရဲ့ မျက်နှာကို ဖြတ်ရိုက်လိုက်တာပဲ။ ရုံးတော်သာ ဒီကိစ္စကို လွှတ်ထားလိုက်ရင် ရုံးတော်ရဲ့ အာဏာက ဘယ်မှာ ရှိတော့မလဲ။ အဲ့ဒီကျရင် အထက်ကနေ စုံစမ်းလာရင် ငါတို့အားလုံး သေကုန်မှာပေါ့။" နယ်စားကုန်းက ဒေါသတကြီး ဆဲဆိုလိုက်သည်။ သူ၏ နှစ်ပေါင်းရာချီ ထိန်းသိမ်းခဲ့သော စိတ်ရှည်မှုမှာ ဒီနေ့တင် နှစ်ကြိမ်တိုင်တိုင် ပျက်ပြားခဲ့ရပြီဖြစ်သည်။ တစ်ကြိမ်မှာ ကျန်းလီကြောင့်ဖြစ်ပြီး အခြားတစ်ကြိမ်မှာမူ ဤငတုံးနှစ်ယောက်ကြောင့်ဖြစ်သည်။

"တတိယမင်းသားက လူသားဧကရာဇ်ရဲ့ အောင်မြင်မှုတွေကို အရမ်းလေးစားကြည်ညိုတဲ့သူ ဖြစ်လို့၊ သူက ချင်းမြို့မှာ မြို့တော်ဝန်လုပ်ခဲ့ဖူးတဲ့ ငါတို့လို အရာရှိတွေကို ရာထူးတိုးပေးဖို့ စိတ်ဝင်စားနေတာ။ အခု ငါတို့လုပ်နိုင်တာက တတိယမင်းသားကို အကူအညီတောင်းပြီး သူကိုယ်တိုင် အတိတ်ပြန်လှန်ကြည့်ဖို့ စီစဉ်ခိုင်းပြီး ငါတို့ကို ဖုံးကွယ်ပေးဖို့ပဲ။ ဒါမှ ငါတို့အားလုံး အသက်ရှင်နိုင်မယ်။"

"ဒါပေမဲ့ ကျွန်တော်တို့ထဲမှာ ဘယ်သူက တတိယမင်းသားနဲ့ တွေ့ခွင့်ရှိလို့လဲ"

နယ်စားကုန်းက အေးစက်စက် ပြုံးလိုက်ပြီး - "ချင်းမြို့မှာ မြို့တော်ဝန်လုပ်ပြီး ရာထူးတက်သွားတာ ငါတစ်ယောက်တည်း မဟုတ်ဘူး။ သူတို့တွေလည်း အခုဆိုရင် ရာထူးမနိမ့်ကြတော့ဘူး။ အခု ကိစ္စပေါ်လာပြီဆိုတော့ ဘယ်သူမှ လွတ်မှာမဟုတ်ဘူး။ သူတို့တွေကိုပဲ တဆင့်ခံပြီး တောင်းဆိုခိုင်းရမယ်"

......

"လူသားဧကရာဇ်ကျန်းရဲ့ ဝမ်းကွဲအစ်ကိုက မိစ္ဆာကျင့်စဉ် ကျင့်နေတယ်၊ အဲ့ဒါကို လူသားဧကရာဇ် ကိုယ်တိုင်ကလည်း ခွင့်ပြုထားတယ်ဆိုတာ တကယ်လား။"

တတိယမင်းသားသည် စိတ်လှုပ်ရှားစွာဖြင့် ထရပ်လိုက်ပြီး မယုံနိုင်လောက်အောင် မေးလိုက်သည်။

"ဟုတ်ပါတယ် အရှင်မင်းသား။ ကျွန်တော်မျိုး ချင်းမြို့မှာ အရာရှိလုပ်နေတုန်းက ဒီကိစ္စကို သိလိုက်ရတော့ အလွန်ပဲ ထိတ်လန့်သွားမိပါတယ်"

လွန်ခဲ့သော ရက်အနည်းငယ်အတွင်း ချင်းမြို့မြို့တော်ဝန်ဟောင်း အရာရှိများမှာ နည်းလမ်းအမျိုးမျိုး သုံးခဲ့ကြပြီးနောက် နောက်ဆုံးတွင် နယ်စားကုန်းအား တတိယမင်းသားနှင့် တွေ့ဆုံခွင့် ရအောင် လုပ်နိုင်ခဲ့ကြသည်။

နယ်စားကုန်းသည် မြို့တော်သို့ ရောက်ပြီးနောက် အကြိမ်ကြိမ်လေ့ကျင့်ပြီးမှ တတိယမင်းသားထံသို့ သွားရောက်ခဲ့ခြင်း ဖြစ်သည်။

"လူသားဧကရာဇ်ဟာ အာဏာနဲ့ အဆင့်အတန်း မြင့်မားလှပေမဲ့ ရင်းနှီးတဲ့သူက နှစ်ယောက်၊ သုံးယောက်ထက် မပိုပါဘူး။ ဒါကြောင့် သူက ဆွေးမျိုးသံယောဇဉ်ကို အလွန်တန်ဖိုးထားပါတယ်။ ဒါပေမဲ့ သူက လူသားဧကရာဇ်ဖြစ်နေတော့ အပြင်ပန်းမှာ သိပ်ပြီး ပြလို့မရဘူးလေ။ တကယ်တော့ သူက သူ့အစ်ကို သေသွားမှာကို မကြည့်ရက်လို့ တိတ်တဆိတ် မိစ္ဆာကျင့်စဉ်ကျင့်ပြီး ဝိညာဉ်သန္ဓေအဆင့်ကို တက်ကာ အသက်ဆက်ဖို့ ခွင့်ပြုပေးခဲ့တာပါ။"

"အခု ဒီကိစ္စကို ဟိုဘာမှမသိတဲ့ လူငယ်နှစ်ယောက်က ဖော်ထုတ်လိုက်ရင် လူသားဧကရာဇ်က မိစ္ဆာကျင့်စဉ်ကို ခွင့်ပြုပေးခဲ့တယ်ဆိုတာပါ ပေါ်သွားနိုင်ပါတယ်။ အဲ့ဒီလိုသာဖြစ်သွားရင် လူသားဧကရာဇ်ရဲ့ဂုဏ်သတင်းက တစ်ခဏအတွင်းမှာပဲ ပျက်စီးသွားပါလိမ့်မယ် အရှင်မင်းသား။"

"ကျွန်တော်တို့သာ ဒီကိစ္စကို ဖုံးကွယ်ပေးလိုက်နိုင်ရင် လူသားဧကရာဇ် သိသွားတဲ့အခါ ကျွန်တော်တို့ကို ကျေးဇူးတင်မှာ သေချာပါတယ်"

တတိယမင်းသားသည် အခန်းထဲတွင် ခေါက်တုံ့ခေါက်ပြန် လမ်းလျှောက်နေရင်း မျက်လုံးထဲတွင် ဝမ်းသာရိပ်များ ပေါ်လာသည်။ ပါးစပ်မှလည်း "လူသားဧကရာဇ်ရဲ့ ဂုဏ်သိက္ခာ" "ငါတို့ကို ကျေးဇူးတင်မှာ" "ဆွေးမျိုးသံယောဇဉ်" စသည်တို့ကို တိုးတိုးလေး ရေရွတ်နေပြီး နောက်ဆုံးတွင် နယ်စားကုန်းကို ပြောလိုက်သည် -

"ဒီကိစ္စကို ငါ သိပြီ"

...

မဟာကျိုး ဧကရာဇ်နိုင်ငံ၊ ရွှေနန်းဆောင်။

မဟာကျိုးဧကရာဇ် 'ကျီကျစ်' သည် မျက်လုံးတစ်ဖက်တွင် သူငယ်အိမ် နှစ်ခုစီ ပါဝင်သော 'ထပ်ဆင့်သူငယ်အိမ်' ပိုင်ရှင် ဖြစ်သည်။ သူသည် အရပ်ရှည်ပြီး ခန့်ညားလှပကာ ထိုင်နေရုံနှင့်ပင် တရားမျှတမှုနှင့် အရှိန်အဝါကို ခံစားရစေသည်။

၎င်းမှာ စိတ်ကူးယဉ်မှု မဟုတ်ဘဲ နိုင်ငံတော်၏ကံကြမ္မာ စွမ်းအားများကြောင့် အမှန်တကယ်ပင် ခံစားရခြင်းဖြစ်သည်။

မဟာကျိုးသည် ဥပဒေနှင့် နိုင်ငံတော်ကံကြမ္မာကို ချိတ်ဆက်ထားသဖြင့် ဧကရာဇ်ကျီကျစ်သည် အမှုများကို မမျှတစွာဆုံးဖြတ်ပါက ကံကြမ္မာစွမ်းအားများ၏ ဖိအားကိုမခံနိုင်ဘဲ နောက်ဆုံးတွင် ကံကြမ္မာက သူ့ကို ပြန်လည် နင်းခြေဖျက်ဆီး ပစ်ပေလိမ့်မည်။

ဧကရာဇ်ကျီကျစ်သည် အတိတ်ပြန်လှန်ကြည့်ရန် တောင်းဆိုသော လျှောက်ထားလွှာများကို ဖတ်ရှုပြီးနောက် မေးလိုက်သည် - "ချင်းမြို့က ဝိညာဉ်သန္ဓေအဆင့် ကျင့်ကြံသူတစ်ယောက်က မိစ္ဆာကျင့်စဉ် ကျင့်ကြံတယ်လို့ သံသယရှိနေတယ်။ ချင်းမြို့မြို့တော်ဝန်ကလည်း အဂတိလိုက်စားပြီး သက်သေဖျက်ဆီးတယ်လို့ စွပ်စွဲခံထားရတယ်။ အခု ထျန်းချင်းနယ်ကိုသွားပြီး အတိတ်ပြန်လှန်ကြည့်ဖို့ ဘယ်သူ သွားချင်လဲ"

မင်းသားနှင့် မင်းသမီးများ အားလုံး တိတ်ဆိတ်နေကြသည်။ ဤကဲ့သို့သော အလုပ်မျိုးမှာ လုပ်ရကျိုးမနပ်ပေ။ အောင်မြင်လျှင်လည်း ဆုမရှိဘဲ မှားယွင်းလျှင်သာ အပြစ်ပေးခံရမည်ဖြစ်ရာ ပုံမှန်အားဖြင့် ဧကရာဇ်က လူနှစ်ယောက်ကို ရွေးချယ်ပြီး တစ်ယောက်က လုပ်ဆောင်ကာ တစ်ယောက်က စောင့်ကြည့်ရသည့် ထုံးစံသာဖြစ်သည်။

"ခမည်းတော်... သားတော် သွားချင်ပါတယ်" တတိယမင်းသားက ထွက်ဆိုလိုက်ရာ အခြားသော မင်းသား၊ မင်းသမီးများက အံ့သြစွာ ကြည့်လိုက်ကြသည်။ တတိယမင်းသားက ဘာလို့ ဒီလောက်တောင် တက်ကြွနေရသလဲ၊ ခမည်းတော်ရဲ့ရှေ့မှာ အမှတ်ယူချင်လို့လား။

"ဒါဆို တတိယမင်းသား သွားပေါ့၊ စတုတ္ထမင်းသားက လိုက်ပြီး စောင့်ကြည့်ပေး။ အမိန့်တော် အတည်ပဲ၊ ရုံးတော် သိမ်းစေ"

ရုံးတော် သိမ်းပြီးနောက် တတိယမင်းသားက စတုတ္ထမင်းသားကို လှမ်းခေါ်လိုက်သည်။

"ညီတော်... ခဏလာဦး"

စတုတ္ထမင်းသား မျက်မှောင်ကြုတ်လိုက်သည်။ သူနှင့် တတိယမင်းသား၏ ဆက်ဆံရေးမှာ မကောင်းလှပေ။ နှစ်ယောက်စလုံးမှာ ထီးနန်းကို လိုချင်ကြသဖြင့် အပြင်ပန်းတွင်ရော၊ အတွင်းပိုင်းမှာပါ အကြီးအကျယ် ပြိုင်ဆိုင်နေကြသူများ ဖြစ်သည်။

ယခု သူ့ကို ခေါ်ခြင်းမှာ အတိတ်ပြန်လှန်ကြည့်မည့် ကိစ္စနှင့် ပတ်သက်လိမ့်မည်ဟု သူ ခန့်မှန်းလိုက်သည်။

"နောင်တော်... ဘာကိစ္စလဲ"

"အခု ခမည်းတော် လွှတ်လိုက်တဲ့အမှုရဲ့ နောက်ခံအကြောင်းအရင်းကို ညီတော် သိလား"

"ချင်းမြို့မြို့တော်ဝန်က ဝိညာဉ်သန္ဓေအဆင့်ကျင့်ကြံသူကို မိစ္ဆာကျင့်စဉ်ကျင့်တာ ဖုံးကွယ်ပေးတယ်ဆိုတာ မဟုတ်ဘူးလား"

"အဲ့ဒီ ဝိညာဉ်သန္ဓေအဆင့် ကျင့်ကြံသူရဲ့ နောက်ခံက မရိုးရှင်းဘူး။ သူက လူသားဧကရာဇ်ကျန်းရဲ့ ဝမ်းကွဲအစ်ကို ဖြစ်သလို၊ လူသားဧကရာဇ်မှာ ကျန်ရှိတဲ့ တစ်ဦးတည်းသော ဆွေမျိုးရင်းချာပဲ"

"ဘာပြောတယ်။" စတုတ္ထမင်းသား လန့်သွားသည်။ အစပိုင်းတွင် တတိယမင်းသားက နောက်ခံအကြောင်း ပြောနေသဖြင့် သူက အရေးမစိုက်ခဲ့ပေ။ မဟာကျိုး၏အင်အားအရ ထိုသူသည် တာအိုဂိုဏ်း လှည့်လည်သူဖြစ်နေလျှင်ပင် သူတို့က ဥပဒေအတိုင်း အရေးယူရန် မကြောက်ပေ။

သို့သော် လူသားဧကရာဇ်၏ ဆွေမျိုးရင်းချာ ဖြစ်နေလျှင်မူ အခြေအနေက လုံးဝ ပြောင်းလဲသွားပြီ ဖြစ်သည်။

ထို့ပြင် လူသားဧကရာဇ်၏ အစ်ကိုက မိစ္ဆာကျင့်စဉ်ကျင့်နေသည်ကို လူသားဧကရာဇ်က မသိဘဲ နေပါ့မလား။ အကယ်၍ လူသားဧကရာဇ် ကိုယ်တိုင်ကပါ မိစ္ဆာကျင့်စဉ် ကျင့်နေလျှင်ရော...

လူသားဧကရာဇ်သာ မိစ္ဆာကျင့်စဉ် ကျင့်နေလျှင် မဟာကျိုးက ဖမ်းဝံ့ပါ့မလား။

စဉ်းစားကြည့်ရုံနှင့်ပင် ကျောချမ်းစရာ ကောင်းလှသည်။ ထို့ကြောင့်ပင် ခမည်းတော်က ဤနောက်ခံအကြောင်းကို ရုံးတော်တွင် ထုတ်မပြောခဲ့ခြင်း ဖြစ်ပေလိမ့်မည်။ အကယ်၍ ထုတ်ပြောလိုက်ပါက လူသားဧကရာဇ်၏အစ်ကိုသည် မိစ္ဆာကျင့်စဉ် ကျင့်သည်ဖြစ်စေ၊ မကျင့်သည်ဖြစ်စေ နောက်ဆုံး ရလဒ်မှာ "မကျင့်ပါ" ဟုသာ ဖြစ်လာပေလိမ့်မည်။

မဟာကျိုးတွင် လူသားဧကရာဇ်ကို စီမံခန့်ခွဲပိုင်ခွင့်ရှိသော်လည်း၊ စီမံခန့်ခွဲနိုင်သော အစွမ်း မရှိပေ။ ထိုသူမှာ မဟာယာနအဆင့် ကျင့်ကြံသူ ဖြစ်သည်။ မဟာကျိုးက အင်အားအားလုံး သုံးလျှင်ပင် ပိုးဖလံမျိုး မီးကိုတိုးသကဲ့သို့သာ ဖြစ်ပေလိမ့်မည်။

စတုတ္ထမင်းသားသည် ချက်ချင်းပင် အခြေအနေကို သဘောပေါက်သွားပြီး တတိယမင်းသားနှင့် တိတ်တဆိတ် သဘောတူညီမှု ရယူလိုက်သည်။

သူတို့ကြားတွင် ပဋိပက္ခများရှိသော်လည်း ၎င်းမှာ မဟာကျိုး၏သိက္ခာနှင့် တည်တံ့မှုအတွက် ဖြစ်သဖြင့် ခဏပြန်လည်သင့်မြတ်နိုင်ပေသည်။

...

အတိတ်ပြန်လှန်ကြည့်မည့် နေရာကို ချင်းမြို့ဆင်ခြေဖုံးတွင် သတ်မှတ်ထားသဖြင့် လျှောက်ထားလွှာတင်ပြီးနောက် ကျန်းလီနှင့် ယွမ်ဝူရှင်းတို့သည် ချင်းမြို့သို့ ပြန်လာခဲ့ကြသည်။

လွန်ခဲ့သော ရက်အနည်းငယ်အတွင်း ယွမ်ဝူရှင်းမှာ ထိတ်လန့်တုန်လှုပ်စွာ နေခဲ့ရသည်။ ပုံမှန်ဆိုလျှင် တွေ့ရခဲသော ဝိညာဉ်သန္ဓေအဆင့်နှင့် နတ်ဘုရားပြောင်းလဲခြင်းအဆင့် ကျင့်ကြံသူများမှာ တစ်ယောက်ပြီးတစ်ယောက် ရောက်လာကြပြီး ကျန်းလီအား လျှောက်ထားလွှာကို ပြန်ရုပ်သိမ်းရန် ခြိမ်းခြောက်လိုက်၊ မြှောက်ပင့်လိုက် လုပ်ကြသည်။

သူတို့၏ အကြောင်းပြချက်များမှာ လူသားဧကရာဇ်ကို ထိခိုက်မည်၊ အခြေအနေကို ငဲ့ညှာပါ စသည်ဖြင့် ထပ်တလဲလဲဖြစ်နေသဖြင့် ကျန်းလီမှာ သမ်းဝေနေမိသည်။ သူသည် ထိုသူအားလုံးကို ယဉ်ကျေးပျူငှာစွာဖြင့်ပင် ပြန်လည်တုံ့ပြန်ခဲ့သည်။

နတ်ဘုရားပြောင်းလဲခြင်းအဆင့် ကျင့်ကြံသူတစ်ဦးမှာ စိတ်မရှည်တော့ဘဲ ကျန်းလီ၏ "ခင်ဗျားက လူသားဧကရာဇ်ကျန်းအကြောင်း ဘာသိလို့လဲ" ဟူသော စကားကြောင့် ဒေါသထွက်ကာ တိုက်ခိုက်ခဲ့သည်။ ကျန်းလီသည် ယွမ်ဝူရှင်း၏ရှေ့တွင်ပင် ဝိညာဉ်သန္ဓေအဆင့်ဖြင့် နတ်ဘုရားပြောင်းလဲခြင်းအဆင့်ကို အနိုင်ယူပြသည့် ဂန္ထဝင်တိုက်ပွဲတစ်ခုကို ဖော်ဆောင်ပြခဲ့လေသည်။

ထိုစဉ်မှာပင် တံခါးခေါက်သံ ထွက်ပေါ်လာပြန်ရာ ယွမ်ဝူရှင်းသည် သက်ပြင်းချကာ တံခါးသွားဖွင့်ပေးလိုက်ရပြန်သည်။