အခန်း (၁၃၀၆-၁၃၀၈)

အခန်း ၁၃၀၆: အရောင်ပြောင်းတာ မမြင်ရသလောက်! ၂

ချင်းလင်အပန်းဖြေစံအိမ်ရုံးခန်း_

ချင်လင်က နေ့စဉ်တာဝန်များအပြီးသတ်သည်။

ဒါပေမဲ့ ဒီနေ့ကံမကောင်း။ လက်ဖက်ခြောက်၊ သစ် ဘာမှမရ။

ချင်လင် ဂိမ်းထဲမှအာရုံပြန်ရုတ်ချိန်တွင် တံခါးခေါက်သံကြားရသည်။

ကျောက်မိုချင်းဝင်လာပြီး နည်းနည်းစိုးရိမ်နေသံနှင့်_

"​ယောက်ျား.. လာကြည့်ပါဦး.. ရှောင်ရန်တစ်ခုခုဖြစ်နေပြီထင်တယ်''

"အဲကောင်ဘာဖြစ်လို့လဲ?''

ချင်လင် ဇဝေဇဝါဖြစ်သွားသည်။

ရှောင်ရန်ကသတ္တိကြောင်သော်လည်း စံအိမ်မှာအသန်မာဆုံး၊အားအကောင်းဆုံးဖြစ်၍ ဘာပြဿနာမှမရှိနိုင်။

သို့သော် ကျောက်မိုချင်းစိုးရိမ်နေပုံကြောင့် မပေါ့ဆရဲ။ ချက်ချင်းကျောက်မိုချင်းနှင့်အတူ ရုံးခန်းအပြင်ထွက်လာသည်။

စမ်းချောင်းနားရောက်သောအခါ ရှောင်ရန်ကလဲလျက်သား အဆက်မပြတ်ညည်းနေသည်။ အိမ်သာတက်ချင်ပြီး တက်မရသလိုဖြစ်နေ၏။

သို့သော် ရှောင်ရန်အခြေအနေက လုံးဝပုံမှန်မဟုတ်။

သူကရှောင်ရန်ဆီတန်းသွားပြီး ခေါင်းကိုလက်နှင့်သပ်လိုက်သည်။

ရှောင်ရန်က သူ့လက်ဖဝါးကိုခေါင်းနှင့်တောင်ပြန်ဝှေ့နေသည်။

အဆင်ပြေပါတယ်ဆိုတဲ့သဘော။

ထို့နောက် တစ်ခုခုပုံမမှန်ကြောင်း သူသတိထားမိသည်။

ရှောင်ရန်ကျောပေါ်တွင် အက်ကြောင်းများက ကွဲထွက်တော့မလိုပင်။

"ဒီတော့ မင်းအဝတ်အစားလဲချင်တာပေါ့''

ဘာဖြစ်နေမှန်း ချင်လင်သဘောပေါက်ပြီ။

ရှောင်ရန် အရေခွံလဲနေပြီ။

အရင်တစ်ခါ မိချောင်းအကြောင်းလေ့လာပြီး မိချောင်းအရေခွံလဲတတ်မှန်းသူသိခဲ့သည်။ တချို့က တစ်ကြိမ်သာလဲပြီး တချို့က သုံးကြိမ်လောက်လဲသည်။ ဒီလိုအရေခွံလဲခြင်းက အကောင်ပေါက်အရွယ်တွင်ဖြစ်တတ်ပြီး အရွယ်ရောက်သည်နှင့်အရေခွံမလဲတော့။

နောက်ပြီး မိချောင်းအရေခွံလဲတိုင်း သူ့အရေခွံသူပြန်စားသောကြောင့် မိချောင်းအရေခွံမှာတွေ့ရခဲသည်။

ပညာရှင်များတွင်သာ မိချောင်းအရေခွံလဲသောဗီဒီယိုရှိသည်။

ရှောင်ရန်မှာခွန်သွေးပါပြီး ခန္ဓာကိုယ်အကြီးမြန်သည်။ သူ့ကိုယ်လုံးကဝမ်ချိုင်ထက်ကြီးနေပြီဖြစ်၍ အကောင်ပေါက်သာရှိသေးမှန်း သူမေ့သွားသည်။

အကြောင်းရင်းသိပြီး ချင်လင်မစိုးရိမ်တော့။ သူက ကျောက်မိုချင်းအား_

"ရတယ်.. ရှောင်ရန်က အရေခွံလဲတာ... အဲဒါပုံမှန်ပါပဲ''

"မိချောင်းက အရေခွံလဲလား?''

ကျောက်မိုချင်း နည်းနည်းအံ့ဩသွားသည်။ ဒီလိုကြားဖူးတာ ဒါပထမဆုံးပင်။

ချင်လင် ခေါင်းညိမ့်လိုက်သည်_

"အင်း.. မိချောင်းက လဲတာပေါ့... အရေခွံလဲလေလေ ကြမ်းလာလေလေပဲ... အရေခွံလဲတိုင်း သူတို့ခန္ဓာကိုယ်အရေပြားကပိုသန်မာပြီး ခံနိုင်ရည်မြင့်လာတယ်''

ကျောက်မိုချင်း ခေါင်းညိမ့်လိုက်သည်။

အသုံးမဝင်တဲ့ဗဟုသုတရလိုက်ပြီ။

သို့သော် ရှောင်ရန်အဆင်ပြေသွားမယ်ဟုသိပြီး လုံးဝစိတ်သက်သာရာရသွားသည်။

ဒီကောင်တွေကိုမွေးထားမှတော့ စံအိမ်မိသားစုလိုသဘောထားရမည်။ ဘာမှမဖြစ်စေချင်။

ချင်လင်က ရှောင်ရန်နှင့်ခဏနေပြီး ခေါင်းကိုလက်နှင့်သပ်ပေးသည်။ ဘယ်လိုပဲဖြစ်ဖြစ် မိချောင်းအရေခွံလဲရတာ ခက်ခဲသည်။

နာရီဝက်ကြာပြီးနောက် ရှောင်ရန်၏ကွဲထွက်သွားသောကျောပြင်တွင် အရေပြားတစ်စတွေ့ရသည်။ ထိုနေရာမှစပြီး အရေခွံကွာလိမ့်မည်။

ဒီတစ်ခါရှောင်ရန်ပိုနာကျင်ပြီး သူ့ကိုကူပေးစေချင်ပုံပေါ်သည်။

သို့သော် ဒါမျိုးသူမတတ်နိုင်။ အရေခွံလဲခြင်းမှာ တိရစ္ဆာန်ကိုယ်တိုင်လဲမှပြီးနိုင်သည်။ မဟုတ်ရင် အရေခွံအသစ်ထိခိုက်ပျက်စီးနိုင်သည်။

ထို့ကြောင့် ကြည့်သာကြည့်နေရ၏။

ခဏအကြာ_

ဝန်ကြီးလု၏တအံ့တဩအသံကြားရသည်_

"သူဌေးချင်.. သတင်းကောင်း.. သတင်းကောင်း''

ဝန်ကြီးလုမှာ လက်ထဲတွင်ဗီဒီယိုတစ်ပုဒ်ဖွင့်လျက်သား အလောတကြီးပြေးလာသည်။ သူကချင်လင်ဆီပေးကာ_

"ဒီဗီဒီယိုတစ်ချက်ကြည့်ဦး... တော်ဝင်ပညာရှင်ရန်တို့ အရောင်ပြောင်းသစ်ရွက်ကနေထုတ်ထားတဲ့ အရောင်ပြောင်းပစ္စည်းနဲ့လုပ်ထားတဲ့ပိတ်စလေ''

ချင်လင် ဗီဒီယိုကြည့်လိုက်သည်။

ရန်သွမ့်ဟယ်တို့ ပိတ်စနှင့်စမ်းသပ်သောဗီဒီယိုပင်။

ဗီဒီယိုကြည့်ပြီး သူ့မျက်နှာမယုံနိုင်ပုံပေါက်သွားသည်။

အရောင်ပြောင်းပင်၏အရောင်ပြောင်းနိုင်စွမ်းနှင့် တချို့ပစ္စည်းကိရိယာများကိုသုတ်လိုက်ပါက အစွမ်းကကြောက်စရာကောင်းမည်ဟု ဝန်ကြီးလုပြော၍သိရသည်။

ပိတ်စအာနိသင်အရ ဒီပစ္စည်းကိုတစ်သုတ်ချင်းအသုံးချနိုင်လိမ့်မည်။ တစ်နေ့ ဆုံးမရန်လိုသောဝမ်းမနာသားများရှိလာပါက ထင်မှတ်မထားသောအံ့ဩစရာပေးနိုင်မည်။

"သူဌေးချင်.. ဘယ်လိုထင်လဲ?''

ဝန်ကြီးလုမမေးဘဲမနေနိုင်တော့။

"အရမ်းအံ့ဩဖို့ကောင်းတာပဲ''

ချင်လင်က အမှန်အတိုင်းဖြေလိုက်သည်။

"သူဌေးချင်''

ဝန်ကြီးလုကတောင်းဆိုပြန်သည်_

"အထက်လူတွေက မင်းနဲ့ဆွေးနွေးခိုင်းတာရှိတယ်... ဒီအရောင်ပြောင်းပင်က အရမ်းသိသာတယ်... သူတို့ကဒါကိုထိပ်တန်းလျှို့ဝှက်ချက်အဖြစ်ထားချင်တာ... မပေါက်ကြားချင်ဘူး''

"ဒီတော့ အပြင်မှာအရောင်ပြောင်းပင်ကိုပျိုးထောင်ပြီး ကျယ်ကျယ်ပြန့်ပြန့်စိုက်ဖို့မဖြစ်နိုင်ဘူး''

"ဝန်ကြီးလု.. ဘာဆွေးနွေးစရာရှိလဲ? ကျွန်တော်တို့အပြည့်အဝပူးပေါင်းမှာပါ... ပြီးတော့ ဒီအရောင်ပြောင်းပင်က အထက်လူတွေရဲ့အပင်ဆိုတော့ ဆွေးနွေးစရာမလိုပါဘူး''

ချင်လင်က အမြင်မကျယ်သူမဟုတ်။ သူအရူးဖြစ်မှပဲ ဒီအရောင်ပြောင်းပင်ကိုပျိုးထောင်ဖို့စဉ်းစားမည်။

ဒီပစ္စည်းကိုဂိမ်းထဲကထုတ်လာခြင်းမဟုတ်၍ ကန့်သတ်ချက်မရှိ။ သူများခိုးနိုင်သည်။

ဒါကိုပျိုးထောင်ရင် ဒုက္ခပဲရောက်မည်။ တခြားနိုင်ငံကသိသွားရင် သေချာပေါက်လာခိုးကြမည်။

သူကိုယ်တိုင်ဒုက္ခရောက်ရုံသာမက တိုင်းပြည်လည်းဒုက္ခရောက်မည်။

ဝန်ကြီးလုကဆက်ပြီး_

"ပြီးတော့ ဒီအရောင်ပြောင်းပင်ကို ပါမောက္ခလီခိုင်ပျိုးထောင်ထားပေမဲ့ ချပြလို့မရဘူး... သီးသန့်ပဲဆုပေးမှရမှာ... ပါမောက္ခလီခိုင်ကို ဒီအ​ကြောင်းပြောပေးပါဦး''

ထိုစကားကြောင့် ချင်လင်ပိုရယ်ချင်သွားသည်။

အဲဒါကိုအစ်ကိုလီက ဂရုစိုက်နေမလား?

အမှန်တရားကို သူသိသည်။ အစ်ကိုလီက အကြိမ်ကြိမ်ဓားစာခံဖြစ်ခဲ့သည်။ သူထပ်မဖြစ်ချင်သလို သူများလည်းမသိစေချင်။

ထို့ကြောင့် ဝန်ကြီးလုရှေ့တွင် လီခိုင်ကိုဖုန်းဆက်လိုက်သည်။

ဖုန်းဝင်ဝင်ချင်း လီခိုင်အသံထွက်လာသည်_

"ညီလေးချင်.. ဘာဖြစ်လို့လဲ?''

ချင်လင်ကလိုရင်းတန်းပြောသည်_

"အစ်ကိုလီ.. ဝန်ကြီးလုကပြောတယ်... အရောင်ပြောင်းပင်ကို အတွင်းရေးအဖြစ်ထားမယ်... အဲဒါကြောင့် အစ်ကို့နာမည်ကိုကြေညာလို့မရဘူးတဲ့... အစ်ကိုနားလည်ပေးနိုင်မယ်ထင်ပါတယ်''

လီခိုင်က အလောတကြီးအသံနှင့်_

"ဘာနားလည်စရာလိုလဲ? ငါနာမည်မခံချင်ပါဘူး... ညီလေးချင်.. ဝန်ကြီးလုကိုပြောလိုက်... ငါအထက်လူတွေနဲ့အပြည့်အဝပူးပေါင်းမယ်... အရောင်ပြောင်းပင်အကြောင်းမပြောဘူးလို့''

ချင်လင် ရယ်လိုက်သည်။ အစ်ကိုလီအကြောင်း သူကောင်းကောင်းသိသည်။

ဖုန်းချပြီးနောက် ဝန်ကြီးလုကိုဖုန်းပြကာ_

"တွေ့လား ဝန်ကြီးလု.. ကျွန်တော်ပြောပါတယ်... အစ်ကိုလီက ဂရုမစိုက်ပါဘူးလို့''

ဝန်ကြီးလု ခေါင်းညိမ့်လိုက်သည်။ သူတို့နှစ်ယောက်ကို အရင်ထက်ပိုလေးစားမိသည်။ တကယ်တော့ ဒီလိုပုဂ္ဂိုလ်ရေးအရှုံးအမြတ်မကြည့်၊ ကိုယ်ကျိုးမငဲ့တဲ့လူတွေက တွေ့ရခဲသည်။

သို့သော် သူမသိသည်က ချင်းလင်ဓာတ်ခွဲခန်းတွင် လီခိုင်တစ်ယောက်ဖုန်းချပြီးနောက် တဟီးဟီးထရယ်နေသည်ကိုပင်။

အရောင်ပြောင်းပင်ထွက်လာပြီး သူနာမည်ထပ်ခံရမှာစိုးရိမ်ခဲ့သည်။

သော*က်ရေမလောင်း၊ မြေဩဇာမကျွေးဘဲတောင် ဒင်းကကြီးနိုင်သေး။

စောစောက ညီလေးချင်သူ့ကိုသတင်းကောင်းကြီးပေးခဲ့သည်။

အံ့ဩကြည်နူးစရာ။

ဒီလိုအံ့ဩစရာမျိုး သုံးလေးကြိမ်လာစမ်းပါစေ။

ချင်းလင်အပန်းဖြေစံအိမ်_

အဖြေရပြီးနောက် ဝန်ကြီးလုက အရောင်ပြောင်းပင်ဆီခပ်သုတ်သုတ်သွားလိုက်သည်။ အဖိုးမဖြတ်နိုင်သောရတနာလို သူကရှုစားနေ၏။

သူက သိပ္ပံသုတေသနတာဝန်ခံ။ သူအဖို့ ဒီလိုရလဒ်ကြီးတွေက မိန်းမလှအယောက် ၁၀၀ ထက်သာသည်။

အရောင်ပြောင်းပင်ကိုကြည့်ပြီးနောက် တဖက်ကိုကြည့်လိုက်သည်။ ထိုနေရာတွင် သူဌေးချင်ပျိုးထောင်ထားသောအပင်သုံးပင်ရှိသည်။

အရင်က ဒီအပင်တွေကိုအာရုံမစိုက်ခဲ့။ ပါမောက္ခလီခိုင်၏အပင်က သိသိသာသာစွမ်းနေသောကြောင့် ထိုအရောင်ပြောင်းပင်အပေါ်သာလုံးလုံးအာရုံစိုက်ခဲ့သည်။

အခုအရောင်ပြောင်းပင်ကိုအတည်ပြုပြီးဖြစ်၍ သူဌေးချင်ပျိုးထောင်ထားသောအပင်သုံးပင်ကိုကြည့်ချင်စိတ်ဖြစ်လာသည်။

နှစ်မျိုးလုံး အာကာသထဲရှိခြောက်ခြောက်ကပ်ကပ်ဂြိုဟ်တစ်လုံးတည်းပေါ်မှရလာခြင်းဖြစ်၍ သိပ်မကွာနိုင်။

တစ်မျိုးက အံ့ဖွယ်အာနိသင်မျိုးရှိတယ်ဆိုတော့ နောက်တစ်မျိုးမထူးခြားဘဲမနေဘူးမလား?

ဒီတစ်ခါ သူဌေးချင်ကိုအကူအညီတောင်းတာ အလကားဖြစ်သွားမှာပေါ့?

ဝန်ကြီးလုက ထိုသုံးပင်ဆီလျှောက်သွားသည်။ အရောင်ပြောင်းပင်လောက်အကြီးမမြန်သော်လည်း မီတာဝက်ရှည်နေပြီ။

"အာ.. ဘာလဲ?''

ဝန်ကြီးလုက အံ့ဩသံနှင့်ရေရွတ်လိုက်သည်။ ရုတ်တရက် အပင်သုံးပင်ကိုတအံ့တဩလိုက်ကြည့်သည်။

ထူးထူးဆန်းဆန်းမြင်ရသောကြောင့်ပင်။

ထိုသုံးပင်ပေါ်တွင် ပူဖောင်းလေးများဖြစ်နေသည်။

အပင်က ပူဖောင်းထွက်တယ်?

ဘာလဲဟ?

အခန်း ၁၃၀၇: ရှောင်ရန်အရေခွံပေး!

အပင်သုံးပင်ပေါ်မှပူဖောင်းများကိုမြင်ပြီး ဝန်ကြီးလုအံ့ဩသွားသည်။

အရောင်ပြောင်းပင်လို၊ ပူဖောင်းနှင့်အပင်တွေ့ရခဲသည်။

သူဌေးချင်ပျိုးထောင်သောအပင်က အင်မတန်ထူးခြားတာလည်းဖြစ်နိုင်သည်။

ထို့ကြောင့် ရှောင်ရန်နားရှိနေသောချင်လင်ဆီသွားပြီး အံ့ဩသံနှင့်မေးသည်_

"သူဌေးချင်.. ငါနဲ့လိုက်ခဲ့ပါဦး... မင်းပျိုးထောင်ထားတဲ့အပင်သုံးပင်ကလည်း ပုံမှန်မဟုတ်ဘူး''

ဝန်ကြီးလုက ချင်လင်ကိုအပင်သုံးပင်ဆီဆွဲခေါ်သွားသည်။

"သူဌေးချင်.. ဒီသုံးပင်က ဘယ်လိုထူးခြားတာလဲ?''

ဝန်ကြီးလုက တအံ့တဩမေးသည်။

ချင်လင်က တစ်ချက်ကြည့်ရုံနှင့် ပူဖောင်းထွက်ပြီမှန်းသိသည်။

ဒါသူထင်တဲ့အတိုင်း။

ပူဖောင်းမထွက်ခင်အထိ ဝန်ကြီးလုတို့ကပူဖောင်းမြက်ကိုအာရုံမစိုက်ကြ။ အခုပူဖောင်းထွက်လာသောကြောင့် စိတ်ဝင်စားခံရသည်။

ထို့ကြောင့် သူကဟန်လုပ်ပြီး အံ့ဩဟန်ဆောင်ကာ_

"ဝန်ကြီးလု.. ဒီအပင်မှာပူဖောင်းထွက်နေတာထင်တယ်''

"အင်း.. ငါစောစောကမှတွေ့တာ''

ဝန်ကြီးလုကရယ်ပြီး_

"အံ့ဩစရာကောင်းတယ်မလား? မင်းစိုက်တဲ့သုံးပင်မှာ အထူးအာနိသင်ရှိရင်ရှိမှာ''

ချင်လင် ကြိတ်ရယ်လိုက်သည်။

သေချာတာပေါ့။

ပူဖောင်းမြက်အာနိသင်ကြောင့် ပါးစပ်အဟောင်းသားဖြစ်ရလိမ့်မည်။

အခုတော့ ဝန်ကြီးလုနဲ့လိုက်သရုပ်ဆောင်ပေးရဦးမည်။

"ဟုတ်လောက်တယ်''

ချင်လင်က အလေးအနက်ခေါင်းညိမ့်လိုက်သည်။

နောက်ရက်များတွင် ပူဖောင်းမြက်ဖြစ်စဉ်ကို ဝန်ကြီးလုကတချိန်လုံးလေ့လာနေသည်။

မြက်ပေါ်မှပူဖောင်းက တစ်နေ့တခြားကြီးကြီးလာ၏။

အရှိန်က အတော်မြန်သည်။

နောက်တစ်နေ့_

ချင်လင်က ကျောက်မိုချင်းအား အတွင်းဘက်အခန်းတစ်ခန်းထဲဆွဲခေါ်ပြီး_

"အချစ်.. ဒီအခန်းကိုဘယ်လိုထင်လဲ?''

"ဘာဖြစ်လို့လဲ ယောက်ျား?''

ကျောက်မိုချင်းက ဇဝေဇဝါနှင့်မေးသည်။

ချင်လင်ကရှင်းပြ၏_

"မင်းမြင်တဲ့အတိုင်း.. ချင်ဖုန်းလေးက တစ်နှစ်ပြည့်တော့မယ်... သူ့ကိုသီးသန့်အခန်းမပေးသင့်ဘူးလား? ဒီအခန်းကိုပြန်ပြင်ဆင်ပြီး အရုပ်ကုတင်လုပ်မယ်... အမေ့ကိုကြည့်ခိုင်းမယ်... သူ့မြေးနဲ့သူနေချင်နေရှာတာ''

"အာ.. မမြန်လွန်းဘူးလား? ကလေးက ငယ်သေးတယ်လေ''

ကျောက်မိုချင်း အံ့ဩသွားသည်။

"မငယ်တော့ဘူး... ရှောင်ရန်တောင်စီးပြီး ဆော့နိုင်နေပြီ''

ချင်လင်က ပြုံးပြုံးနှင့်ပြောသည်။ ပုံမှန်ကလေးဆို ငယ်သေးသည်။

သို့သော် ချင်ဖုန်းလေးကသန္ဓေအားဆေးကြောင့် မငယ်တော့။ အဓိကက မိဘတွေရဲ့ပျော်စရာကို ဒီကောင်လေးကခံနေသည်။

အမေက ကလေးကြည့်ချင်တယ်ဆိုမှတော့ အမေကျေနပ်အောင်လုပ်ပေးရမည်။

သူ့အမေစကားအတိအကျမှာ သူနောက်ကလေးတစ်ယောက်ယူရင် အိမ်ကပိုပြီးစည်ကားမည်တဲ့။

ဒီတော့ ဟူး...

ကျောက်မိုချင်းက ချင်လင်ကိုစေ့စေ့ကြည့်ပြီး_

"ယောက်ျား.. ရှင်ဘာအကြံအစည်တွေထုတ်နေတာလဲ?''

"ဘယ်မှာထုတ်လို့လဲ?''

ချင်လင်ကရှက်ကိုးရှက်ကန်းနှင့် တန်းငြင်းသည်။

ကျောက်မိုချင်းကပြုံးပြီး စကားရိပ်သန်းသည်_

"ရှင့်ကိုအခွင့်အရေးပေးမယ်... ရှင်ကျေနပ်အောင် လုပ်ချင်လုပ်နိုင်မှာ''

"မင်းပြောတာနော်''

ချင်လင်ကဟန်လုပ်မနေဘဲ ကျောက်မိုချင်းဆီတန်းသွားကာ အခန်းထဲချီသွားသည်။

"သိသားပဲ ဟွန့်''

ကျောက်မိုချင်း နှာခေါင်းရှုံ့လိုက်သည်။

အချိန်ဘယ်လောက်ကြာသွားသည်မသိ...

ချင်လင်အပြင်မှဝင်လာသောအခါ ရှောင်ရန်အသံကြားရသည်။

သူ့ဆီပြေးလာပြီး သူ့ရှေ့တွင်တစ်ခုခုချလိုက်၏။

ရှောင်ရန်က အရင်ထက်အရောင်ဖျော့သွားသည်။

အရေခွံလဲပြီးခါစဖြစ်၍ အရေခွံအသစ်ကသိပ်အထိအခိုက်မခံ။ အမည်းရောင်ပြန်ဖြစ်ဖို့ အချိန်ယူရဦးမည်။

ရှောင်ရန်ထားခဲ့သောပစ္စည်းကိုကြည့်ပြီး ချင်လင်နည်းနည်းအံ့ဩသွားသည်။

မိချောင်းအရေခွံ။

ဒါရှောင်ရန်ခန္ဓာကိုယ်မှန်း သူသိသည်။

ပုံမှန်မိချောင်းအရေခွံလဲပြီးရင် အရေခွံကိုတန်းစားပစ်ကြသည်။

မိချောင်းအတွက်အာဟာရလည်းဖြစ်သည်။

"အစ် အစ် အစ်!''

ရှောင်ရန်က အသည်းအသန်အော်နေသည်။

ချင်လင် မအံ့ဩဘဲမနေနိုင်။

ရှောင်ရန်ပြောတာသဘောပေါက်သည်။

မိချောင်းအရေခွံက သူ့အတွက်ပါပေါ့။

သူကအမှတ်တမဲ့ မိချောင်းသားရေဖိနပ်၊ မိချောင်းသားရေခါးပတ်များကိုတွေးမိသည်။

တကယ်မိချောင်းအရေခွံပဲ။

ကျွိ!

မွေးနီအသံထွက်လာသည်။

သူကဘေးမှခုန်ချပြီး မိချောင်းသားရေရှေ့ပြေးလာကာ အနံ့ခံကြည့်သည်။ ရုတ်တရက်ရွံသလိုနှင့် ပျို့အန်ပုံပြသည်။

အရေခွံက ဘယ်လိုလုပ်အနံ့ကောင်းမလဲ?

"အစ် အစ် အစ်!''

ရှောင်ရန်က မွေးနီလုပ်ပုံကိုမကျေနပ်ဘဲအော်သည်။

မွေးနီကလက်သည်းထောင်ပြပြီး အသံပြန်ပေး၏။

သူ့ကိုယ်သူ ရှောင်ရန်တစ်ချက်ရိုက်စာမရှိမှန်းတောင်မသိ။

ဒီကောင်ကစူးစူးဝါးဝါးအော်သောကြောင့် ရုတ်တရက် ရှောင်ရန်နောက်နည်းနည်းပြန်ဆုတ်သွားသည်။

မိချောင်းသိက္ခာချတဲ့ကောင်။

သူ့ကြောင့် မွေးနီကရောင့်တက်လာသည်။

နောက်ခဏတွင် ဝမ်ချိုင်၏ 'ဝု ဝု ဝု' သံထွက်လာသည်။

ဝမ်ချိုင်ကရှောင်ရွှယ်နှင့်ဝင်လာသောကြောင့် မွေးနီလန့်ပြီး ဘီရိုပေါ်ပြန်ပြေးတက်သွားသည်။

လူကောင်းကိုအနိုင်ကျင့်၊ လူဆိုးကိုမထိရဲခြင်းပင်။

ချင်လင်ကပြုံးပြီး ရှောင်ရန်ထားခဲ့သောမိချောင်းအရေခွံကိုကောက်ယူလိုက်သည်။ ထို့နောက် အတွင်းဘက်ယူသွားပြီးဆေးကြော၏။

ရှောင်ရန်အရေခွံကို ဖိနပ်မလုပ်၊ခါးပတ်မလုပ်ဘဲ ဘီရိုထဲပြထားတာကောင်းမည်။

ချင်လင်အတွင်းဘက်မှထွက်လာပြီးနောက် ရုံးခန်းထဲသွားသည်။ နေ့စဉ်တာဝန်များအပြီးသတ်ပြီးသောအခါ ဧည့်ခန်းထဲသွား၏။

ဝန်ကြီးလုက သူ့ကိုရပ်ပြီးပြောပြန်သည်_

"သူဌေးချင်.. ဒီပူဖောင်းတွေကိုကြည့်... ကြီးကြီးလာတယ်... ပူဖောင်းအပြင်ပိုင်းက အကြမ်းခံတယ်... အလွယ်တကူမပေါက်နိုင်ဘူး''

ချင်လင်ကသွားကြည့်ရာ သလင်းကျောက်လိုအရာစဖွဲ့နေပြီဖြစ်၍ အပင်အရွယ်ရောက်တော့မည်။

"သူဌေးချင်''

ဝန်ကြီးလုက ပူဖောင်းကိုလက်ညိုးထိုးပြပြီး_

"ဒါဒန်ဒလိုင်နဲ့တူတယ်မထင်ဘူးလား? ဒန်ဒလိုင်က အမွေးဖွားဖွားနဲ့... ဒါကပူဖောင်းတွေ''

​အခန်း ၁၃၀၈: အောက်စီဂျင်စက်လား?

"တကယ်တူတယ်''

ချင်လင်က ဆက်ဟန်ဆောင်နေဆဲ။

"သူဌေးချင်.. ဒီအပင်ကိုနာမည်ပေးရတော့မယ်''

ရုတ်တရက် ဝန်ကြီးလုကပြောသည်။

ဒီလိုအမည်မသိသီးနှံမျိုးကို အပင်စိုက်သူကနာမည်ပေးရလေ့ရှိသည်။ အထူးအခြေအနေမှာတောင် ဟွားယွမ်ကအပင်စိုက်သူနှင့်တိုင်ပင်ရသည်။

"ပူဖောင်းထွက်လာမှတော့ ပူဖောင်းမြက်လို့ခေါ်မယ်!''

ချင်လင်ကပြောသည်။

ဘာနာမည်ကြီးလဲ?

ဒီအတိုင်း ဂိမ်းနာမည်သက်သက်သာ။

"ဟုတ်ပါပြီ.. ဒါဆို ပူဖောင်းမြက်ပေါ့''

ဝန်ကြီးလု ခေါင်းညိမ့်လိုက်သည်။

ရက်ပိုင်းအကြာ_

ပူဖောင်းမြက်ပင် လုံးလုံးကြီးလာသည်။

သို့သော် ဝန်ကြီးလုမှာအပင်နားလျှောက်သွားပြီး ဘာအတွက်မှန်းမသိသေး။

"သူဌေးချင်''

ဝန်ကြီးလုကမျက်မှောင်ကြုတ်ပြီးမေးသည်_

"ပူဖောင်းမြက်ပင်က ကြီးပြီထင်လား? ဘာလို့ဒီလိုထူးခြားတာလဲ?''

ချင်လင် သိသည်။

ဒါပေမဲ့ ပူဖောင်းမြက်ကိုခေါင်းမှာစွပ်ပြီး ကာဗွန်ဒိုင်အောက်ဆိုဒ်ကို အောက်စီဂျင်အဖြစ်ပြောင်းနိုင်တယ်လို့ပြောမဖြစ်ဘူးမလား?

"ဝန်ကြီးလု.. ပူဖောင်းတစ်လုံးခူးပြီးစမ်းကြည့်ပါလား?''

ဒီလိုသာ ချင်လင်ပြောနိုင်သည်။

"ဒါဆို သူဌေးချင်ကိုဒုက္ခပေးရမှာပေါ့''

ဝန်ကြီးလုကတန်းပြောသည်။ သူဌေးချင်လှုပ်ရှားမှာကို သူမစောင့်နိုင်။ ဘာပဲဖြစ်ဖြစ် သူဌေးချင်စိုက်ထားသောအပင်ဖြစ်၍ သူကိုယ်တိုင်စမ်းသပ်တာပိုကောင်းသည်။

ချင်လင်လည်းဟန်ဆောင်ပြီး ပူဖောင်းခူးလိုက်သည်။ ထို့နောက် အဆစ်ကိုတအံ့တဩကြည့်ပြီး_

"အာ.. ဒါမျိုးစေ့တွေပဲ?''

မျိုးစေ့တွေပေါ့။

သူကိုယ်တိုင်ခူးပြီး မသိဘဲနေမလား?

သို့သော် ဝန်ကြီးလုရှေ့တွင် သူ့သရုပ်ဆောင်ကအဆင့်မီနေဆဲ။

"အာ?''

ဝန်ကြီးလု အံ့ဩသွားသည်_

"ဘာလို့ပူဖောင်းမြက်မျိုးစေ့က ဒီမှာဖြစ်တာလဲ? အံ့ဩစရာကောင်းလိုက်တာ... ကမ္ဘာပေါ်ကမျိုးစေ့တွေနဲ့ကွာတယ်''

"ဝန်ကြီးလု.. ဒီမျိုးစေ့အရောင်နဲ့အရွယ်အစားက ဝန်ကြီးယူလာတဲ့မျိုးစေ့နဲ့မတူဘူးထင်တယ်''

ချင်လင်ကမေးပြန်သည်။

"အဲဒါပုံမှန်ပဲမဟုတ်ဘူးလား သူဌေးချင်?''

ဝန်ကြီးလုကနားထောင်ရင်း ရယ်လိုက်သည်_

"ငါယူလာတဲ့မျိုးစေ့က လတ်လတ်ဆတ်ဆတ်မှမဟုတ်တာ... ပယင်းလိုဟာနဲ့အုပ်နေတာ... ဘယ်လောက်ကြာပြီမှန်းမသိတော့ အရောင်ဘယ်တူပါ့မလဲ''

"ဟုတ်သားပဲ ဝန်ကြီးလု''

ချင်လင်ကပြုံးပြုံးနှင့်ဝန်ခံလိုက်သည်။

ကောင်းလိုက်တာ။

ဒီအပင်မျိုးစေ့နဲ့ဝန်ကြီးလုယူလာတာ ကွာမှာပေါ့။ အထူးသဖြင့်က အရောင်။ ဝန်ကြီးလုကဒီလိုပြောမှတော့ ဒါအမှန်ပေါ့။

ရှင်းပြချက်ကောင်းပဲ။

ချင်လင်ကပူဖောင်းနှင့် အတွင်းဘက်အလုပ်ခန်းထဲပြန်လာသည်။ အခန်းတံခါးလော့ချကာ အတွေးနှင့်ဂိမ်းထဲဝင်လိုက်၏။ သူ့လက်ထဲမှပူဖောင်းမှတ်ချက်ကိုကြည့်လိုက်သည်:

(အထူးကာကွယ်ရေးပူဖောင်း: အထူး!)

(အထူးအပင်မှဖြစ်လာသောပူဖောင်းဖြစ်သည်။ ကိုယ်တိုင်မခူးကြည့်ပါက ဒီလိုထူးထူးဆန်းဆန်းဖြစ်လာကြောင်းယုံရခက်မည်။ ပူဖောင်းထွက်လာလျှင် အထူးအာနိသင်ရှိသည်။ ကာဗွန်ဒိုင်အောက်ဆိုဒ်ကို အထဲမှသလင်းကျောက်နှင့်ဓာတ်ပြုပြီး လူ့ခန္ဓာကိုယ်အတွက်လိုအပ်သောအောက်စီဂျင်ထုတ်ပေးသည်။ အန္တရာယ်မရှိ:

အောက်စီဂျင်ဖြည့်ဆည်းချိန်: တစ်ရက်၊ အန္တရာယ်ရှိပစ္စည်းစစ်ယူခြင်း +၂၊ ခံနိုင်ရည် +၂!)

ဒီပူဖောင်းက အပြည့်အဝကြီးပြီ။

အရည်အသွေးမပြောင်းလဲသောကြောင့် စိုက်ပျိုးပြီးကျဆင်းသွားခြင်းမရှိပေ။

ပူဖောင်းစမ်းသပ်ရမယ်ဆိုမှတော့ သူစမ်းသပ်ပြီးကြောင်း၊ ပူဖောင်းအာနိသင်ကိုသူသိကြောင်း ဝန်ကြီးလုကိုထွက်ပြောလို့မဖြစ်။

ထို့ကြောင့် ထင်းများသိုလှောင်ထားသောတင်းကုပ်ထဲသွားပြီး တရုတ်တိုင်းရင်းဆေးပင်တချို့ရှာသည်။ ထို့နောက် စိုက်ပျိုးရေးခြံအိမ်ထဲဝင်ပြီး မီးစမွှေးသည်။

ထို့နောက် ငါးကန်သွားပြီး ပိုင်ရွှင်တစ်ကောင်ထုတ်လာသည်။

ပိုင်ရွှင်အသားက အရမ်းကောင်းသည်။ အထူးသဖြင့် ဝမ်းဗိုက်သားပင်။ အလွန်လတ်ဆတ်ပြီးအရသာရှိသည်။ သူ့ငါးချက်လက်ရာနှင့်ပေါင်းလိုက်သောအခါ ပြောမပြတတ်အောင်ပင်။

နောက်ပြီး တရုတ်ဆေးပင်များနှင့် ငါးကိုအထူးအနံ့အရသာစွက်လိုက်သည်။

မကြာမီ ပိုင်ရွှင်စွပ်ပြုတ်အိုးရလာသည်။

ချင်လင်က တစ်ပန်းကန်ခပ်ပြီး အားရပါးရစား၏။

ချင်းလင်အပန်းဖြေစံအိမ်ဧည့်ခန်းထဲ၌ ဝန်ကြီးလုမှာချင်လင်ဆီကသတင်းစောင့်ရင်း ပူဖောင်းမြက်ရှေ့တွင်ခေါက်တုံ့ခေါက်ပြန်လျှောက်နေသည်။

ချင်လင်မှာတော့ ဂိမ်းထဲစိတ်ရှိလက်ရှိစားသောက်နေ၏။ သူကပိုင်ရွှင်အိုးကိုကြည့်ပြီး ပန်းကန်ကြီးနှင့်ခပ်ကာ ဂိမ်းအပြင်ထွက်လာသည်။ ထို့နောက် အလုပ်ခန်းအပြင်ထွက်ပြီး စားသောက်ခန်းထဲယူလာသည်။

ကျောက်မိုချင်းနှင့်ကလေးချီထားသောလင်းဖန်ကိုတွေ့သောအခါ_

"လာ.. အမေ မိုချင်း.. ကျွန်တော် ငါးစွပ်ပြုတ်လုပ်ထားတယ်... လာမြည်းကြည့်''

ဒီစွပ်ပြုတ်သောက်ပြီး အပ်ချုပ်စက်စာမိနိုင်သော်လည်း ထူးထူးခြားခြားအစိတ်အပိုင်းမပါဘဲဂိမ်းထဲမှထုတ်လာသောကြောင့် ဘယ်သူမှမသိနိုင်။

ဒါမျိုးကို သူ့အမေနဲ့မိန်းမစားစေချင်သည်။

သူတို့ဘာမှန်းမသိရင်တောင်မှပေါ့။

ကျောက်မိုချင်းနှင့်လင်းဖန်က ချင်လင်၏ငါးစွပ်ပြုတ်ကိုအလွန်ကြိုက်သည်။ ချင်လင်လက်ရာကို သူတို့နှစ်ယောက်လုံးသိသည်။

နှစ်ယောက်သား ငါးစွပ်ပြုတ်သောက်ပြီး ချီးကျူးမဆုံးနိုင်။

"ယောက်ျား.. ဒါဘာငါးလဲ? အသားက ကောင်းလိုက်တာ''

"အင်း.. ဒီငါးစွပ်ပြုတ်က အရင်ထက်ပိုကောင်းတယ်''

အမျိုးသမီးနှစ်ဦးက အားရပါးရစား၏။

စံအိမ်ထဲ၌_

ဝန်ကြီးလုမှာ ချင်လင်၏စမ်းသပ်ချက်စောင့်ရင်း ပူဖောင်းမြက်ကိုလေ့လာနေဆဲ။

စမ်းသပ်ချက်ကမြန်မြန်ထွက်မည်မဟုတ်မှန်းသိသော်လည်း ပူဖောင်းမြက်၏ထူးခြားချက်ကိုသူလေ့လာထားသည်။ သုတေသနတာဝန်ခံဖြစ်၍ မစောင့်မျှော်ဘဲမနေနိုင်။

ချင်လင်၏စမ်းသပ်ချက်က အမှန်ပင်အဲလောက်မမြန်။

စားလိုက်သောက်လိုက်၊ ပျော်လိုက်ပါးလိုက်နှင့် သုံးရက်အချိန်ဖြုန်းပြီးမှ ခွက်တစ်လုံးယူပြီး ဝန်ကြီးလုဆီရောက်လာသည်။

ဝန်ကြီးလုကတန်းမေးသည်_

"သူဌေးချင်.. စမ်းသပ်ချက်က ဘယ်လိုလဲ? ဒီပူဖောင်းက ဘယ်လိုအသုံးဝင်လဲ? အဲဒါထက် မြက်ပင်ကရော?''

"ဝန်ကြီးလု.. ပူဖောင်းက အရမ်းအသုံးတည့်ပါတယ်... ကျွန်တော်နဲ့လိုက်ခဲ့ပါ!''

ချင်လင်က ပဟေဠိဆန်ဆန်ပြောသည်။

ဝန်ကြီးလု ဇဝေဇဝါဖြစ်သွား၏။ ချင်လင်ကလမ်းလျှောက်ထွက်သွားသောကြောင့် သူကချက်ချင်းလိုက်သွားသည်။

သို့သော် ချင်လင်ကရေကူးကန်ခေါ်လာမည်ဟုမထင်မိ။

ချင်လင်ကကောင်းယောင်ယောင်ကိုခေါ်ပြီး ညွှန်ကြားသည်_

"ယောင်ယောင်.. ဝန်ကြီးလုကို ရေကူးဝတ်စုံတစ်စုံပေးလိုက်ပါ''

"သူဌေးချင်.. ရေကူးဝတ်စုံက ဘာလုပ်ဖို့လဲ?''

ဝန်ကြီးလု ပိုပြီးဇဝေဇဝါဖြစ်သွားသည်။

ချင်လင်ကပြုံးပြီးဘာမှမပြော။ ပဟေဠိဆက်လုပ်ထားသည်_

"ပြီးရင် ဝန်ကြီးလုသိပါလိမ့်မယ်''

ဝန်ကြီးလု ပိုသိချင်သွားသည်။ ကောင်းယောင်ယောင် ရေကူးဝတ်စုံယူလာသောအခါ ချင်လင်၏တိုက်တွန်းချက်အတိုင်း အဝတ်လဲခန်းထဲသွားလဲသည်။

"သူဌေးချင်.. ဘာတွေဖြစ်နေတာလဲ?''

ဝန်ကြီးလုကမေးပြန်သည်။

ချင်လင်က ဝန်ကြီးလုဆီလျှောက်လာပြီး သူ့ရှေ့တွင်ပူဖောင်းကိုဆွဲဟကာ ခေါင်းတွင်စွပ်ပေးလိုက်သည်။

ဝန်ကြီးလုကြောင်သွားသည်။

သူဘာတွေလုပ်နေတာလဲ?

သို့သော် ပူဖောင်းစွပ်ပြီးမကြာမီ ထူးခြားချက်ကိုသူသတိထားမိသည်။

လုံးဝအသက်ရှူရမခက်။

မဟုတ်သေး။

ဒီလိုခေါင်းမှာစွပ်လိုက်ရင် အောက်စီဂျင်ပြတ်ပြီး ကာဗွန်ဒိုင်အောက်ဆိုဒ်နှင့်လူဖြစ်သွားမည်။

ဒီလိုဆို တဖြည်းဖြည်းအသက်ရှူကြပ်လာမည်။

မယုံရင် ခေါင်းမှာပလတ်စတစ်အိတ်စွပ်ကြည့်ပါ။

အခုပူဖောင်းစွပ်ပြီး ဒီလိုလုံးဝမခံစားရဘဲ အောက်စီဂျင်ဝနေသည်။

"ဝန်ကြီးလု.. အခုဘယ်လိုနေလဲသိပြီလား?''

ချင်လင်ကပြုံးပြီးမေးသည်။

ဝန်ကြီးလု ချက်ချင်းခေါင်းညိမ့်လိုက်သည်။

"ဝန်ကြီးလု.. ရေကန်ထဲဆင်းငုပ်ကြည့်ပါ''

ချင်လင်ကပြောသည်။

ဝန်ကြီးလုကဇဝေဇဝါဖြစ်သွားသော်လည်း ချင်လင်ပြောသည့်အတိုင်းလုပ်သည်။

သူကရေကန်ထဲခုန်ချလိုက်၏။

ရေထဲခုန်ချပြီးနောက် ဝန်ကြီးလုက အမှတ်တမဲ့မျက်လုံးမှိတ်လိုက်သည်။ ဒါအသားကျနေသောအလေ့အကျင့်ပင်။ မဟုတ်ရင် မျက်လုံးထဲရေဝင်လိမ့်မည်။

နောက်ခဏတွင် ဝန်ကြီးလုအသိပြန်ဝင်လာသည်။

ခေါင်းပေါ်မှာပူဖောင်းပါမှတော့ ရေဘယ်လိုလုပ်ဝင်မလဲ?

သို့သော် သူမျက်စိဖွင့်ကြည့်ပြီးကြောင်သွားသည်။

ရေထဲတွင် ပူဖောင်းကရေဖိအား​ကြောင့်ပုံပျက်သွားခြင်းမရှိဘဲ ပူဖောင်းနှင့်ရှောရှောရှူရှူအသက်ရှူနိုင်သည်။ ဘယ်ရေမှပူဖောင်းထဲမဝင်။

အံ့ဩစရာ။

သူကအမှတ်တမဲ့ ရေကန်အောက်ခြေတွင်ထိုင်ချလိုက်သည်။ တခြား သူစမ်းသပ်ချင်သေးသည်။

အချိန်လွန်သည်နှင့်အမျှ သူအံ့ဩလာ၏။

အချိန်ဘယ်လောက်ကုန်သွားသည်မသိသော်လည်း အတော်ကြာမည်။ သူအသက်ရှူရလွယ်နေဆဲဖြစ်ပြီး လုံးဝအသက်ရှူခက်ခြင်းမရှိပေ။

ဒီပူဖောင်းက အောက်စီဂျင်အဆက်မပြတ်ထုတ်နိုင်ပုံရသည်။

ထူးဆန်းလိုက်တာ။

ဒါဒီအတိုင်း အပင်ကထွက်လာတဲ့အရာ။ ခေတ်မီနည်းပညာနဲ့ထုတ်ထားတဲ့အောက်စီဂျင်စက်မဟုတ်။