အခန်း (၁၃၀၉-၁၃၁၁)
Vol. 88 Ch. 1309-1311
အခန်း ၁၃၀၉: ကာကွယ်ရေးဝတ်စုံလား?
ဝန်ကြီးလု လုံးဝအံ့ဩသွားသည်။ ရေထဲခဏဆက်နေပြီး နောက်ဆုံးရေပေါ်ပြန်တက်လာ၏။
ရေကန်ထဲမှထွက်ပြီးနောက် ခေါင်းပေါ်မှပူဖောင်းဖြုတ်ကာ ချင်လင်ကိုတန်းမေးသည်_
"သူဌေးချင်.. ဒီပူဖောင်းက အောက်စီဂျင်ဆက်တိုက်ထုတ်ပေးနိုင်တဲ့ပုံပဲ''
ချင်လင်ကပြုံးပြီးရှင်းပြသည်_
"ဝန်ကြီးလု.. အံ့ဩစရာမကောင်းဘူးလား? အဲဒါ ပူဖောင်းထဲကသလင်းကျောက်တွေကြောင့်ပဲ... သလင်းကျောက်က လူတွေရှူထုတ်တဲ့လေကိုစုပ်ပြီး အောက်စီဂျင်ထုတ်ပေးနိုင်တယ်''
"ကျွန်တော်စမ်းသပ်ပြီးအဓိကတွေ့ရတာက ဒီပူဖောင်းမှာ အန္တရာယ်ရှိတဲ့ဓာတ်ငွေ့တွေကိုစစ်ထုတ်ပေးနိုင်တဲ့အရည်အသွေးလည်းရှိနေတယ်... အံ့ဩစရာကောင်းတယ်''
"အန္တရာယ်ရှိတဲ့ဓာတ်ငွေ့ကိုစစ်ထုတ်နိုင်တယ်''
ဝန်ကြီးလု ရေရွတ်လိုက်သည်။ သူ့မျက်လုံးများအရောင်တောက်သွား၏။ အောက်စီဂျင်ထုတ်ပြီး အန္တရာယ်ရှိဓာတ်ငွေ့တွေစစ်ထုတ်ပေးနိုင်တယ်ဆိုတော့ ဘယ်လောက်အသုံးဝင်မလဲ သူစိတ်ကူးမိသည်။
"သူဌေးချင်.. ပူဖောင်းက အောက်စီဂျင်ဘယ်လောက်ကြာကြာထုတ်ပေးနိုင်လဲ?''
သူကတန်းမေးသည်။
"သလင်းကျောက်ကိုဓာတ်ခွဲကြည့်တော့ လူတစ်ယောက်ကိုတနေကုန်သုံးလို့ရတယ်''
ချင်လင်ကရှင်းပြသည်။
"တစ်ယောက်ကို တစ်ရက်!''
ဝန်ကြီးလု အံ့အားသင့်သွားသည်။
နတ်အစွမ်းလိုလို။
ဥပမာ_
မီးသတ်သမားများ။
အချိန်တိုင်းလိုလို မီးသတ်သွားရင် အောက်စီဂျင်အိုးသယ်ရသည်။ ကယ်ဆယ်ရေးကြာရှည်ပါက ၁၀ နာရီစာအောက်စီဂျင်အိုးမှာ မလောက်။ အသစ်လဲရသည်။
ဥပမာ မီးသတ်သမားသယ်ရသောအောက်စီဂျင်အိုးမှာ ပေါင်ချိန်များစွာလေးသည်။
မီးသတ်ရင်း ကျောပေါ်တင်ရသောထိုအလေးချိန်က ဝန်ထုပ်ဝန်ပိုးဖြစ်သည်။
ဒီပူဖောင်းရှိရင် လွယ်သွားပြီ။ တစ်ရက်စာအောက်စီဂျင်က ဝန်ထုပ်ဝန်ပိုးများကိုလျှော့ချပေးနိုင်သည်။
အထူးသဖြင့် ပူဖောင်းကအန္တရာယ်ရှိဓာတ်ငွေ့များစစ်ယူနိုင်သောကြောင့် မီးလောင်သောနေရာအတွက်အစွမ်းထက်လက်နက်တစ်ခုဖြစ်မည်။
အရောင်ပြောင်းပင်နှင့်ယှဉ်လျှင် ပူဖောင်းမြက်အာနိသင်က အတိုင်းအတာတစ်ခုအထိပိုကောင်းသည်။
ဒါကိုကျယ်ကျယ်ပြန့်ပြန့်စိုက်ပြီး လူတိုင်းအသုံးချနိုင်သည်။
တခြားမပြောနှင့်၊ မိသားစုတိုင်းတစ်ပင်နှစ်ပင်စိုက်ထားပါက မီးလောင်ရင်ချက်ချင်းခူးတပ်နိုင်သည်။
တချို့ကလေးတွေရေထဲကစားချင်ရင်တောင် အန္တရာယ်ဘယ်လောက်ကင်းလိုက်မလဲ?
တချို့နေရာအကျယ်ကြီးများတွင် မီးကင်းလုံခြုံရေးလည်းထည့်ရသည်။ ဘာပဲဖြစ်ဖြစ် သူတို့ပူဖောင်းမြက်စိုက်နိုင်သည်။
ကူးစက်ရောဂါနှင့်အသက်ရှူလမ်းကြောင်းဌာနများတွင် မူလစျေးကြီးသောကိရိယာများအစား ပူဖောင်းမြက်သုံးနိုင်သည်။
ယေဘူယျအားဖြင့် လူ့အဖွဲ့အစည်းတွင်အဘက်ဘက်မှသုံးနိုင်သည်။
"သူဌေးချင်.. ပူဖောင်းက ဘယ်လောက်အကြမ်းခံလဲ?''
ဝန်ကြီးလုကမေးသည်။
"ဒီအပိုင်းတော့ကိစ္စမရှိပါဘူး... အရမ်းအကြမ်းခံပါတယ်''
ချင်လင်ကပြုံးပြုံးနှင့်ပြန်ဖြေသည်။ အချက်အလက်နှင့်မစမ်းသပ်ရသေးသော်လည်း ခံနိုင်ရည် +၂ ရှိမှန်း သူသိသည်။
ပူဖောင်းအာနိသင်ကိုသိပြီးနောက် ဝန်ကြီးလုက ချင်လင်အား_
"သူဌေးချင်.. မင်းပျိုးထောင်လိုက်တဲ့အာကာသပင်က အံ့ဩစရာကောင်းပြီးရင်းကောင်းပဲ''
ဝန်ကြီးလုမှာစိတ်လှုပ်ရှားစွာနှင့် ဘေးနားသွားပြီးခေါင်းဆောင်ဆီဖုန်းဆက်သည်။ ဒီသတင်းကောင်းကို သူလည်းတင်ပြချင်သည်။
ဖုန်းဝင်ဝင်ချင်း ခေါင်းဆောင်အသံထွက်လာ၏_
"ရှောင်လု.. တော်ဝင်ပညာရှင်ရန်က အရောင်းပြောင်းဓာတ်ကိုစမ်းသပ်လိုက်ပြန်ပြီ... အရောင်ပြောင်းဓာတ်လုံလောက်ရင် အာနိသင်ဆန်းစစ်ပြီးပိုထက်နိုင်တယ်တဲ့''
"အတွင်းရေးအရ အရောင်ပြောင်းပင်ကိုအမြန်ဆုံးပြန်ယူလာရမယ်... အနီးကပ်စောင့်ရှောက်ရမယ်''
"ခေါင်းဆောင်.. အရောင်ပြောင်းပင်ကို ကျွန်တော်ချက်ချင်းပြန်ယူလာပါမယ်''
ဝန်ကြီးလုကဆက်ပြီး_
"ခေါင်းဆောင်.. ကျွန်တော်အစီရင်ခံစရာရှိသေးတယ်... သူဌေးချင်ပျိုးထောင်တဲ့အပင်သုံးပင်မှာ ထူးထူးခြားခြားအာနိသင်ရှိနေတယ်... အံ့ဩစရာကောင်းတဲ့အကြောင်း ကျွန်တော်အတည်ပြုပြီးပြီ''
"ဘယ်လိုထူးခြားတာလဲ?''
ခေါင်းဆောင်ကစိတ်ဝင်စားပြီး တန်းမေးသည်။
အာကာသမျိုးစေ့နှစ်မျိုးမှာ တစ်မျိုးကအရောင်ပြောင်းဓာတ်လိုအံ့ဖွယ်အရာထုတ်နိုင်သည်။ နောက်တစ်မျိုးကို မမျှော်လင့်ဘဲမနေနိုင်။
ဝန်ကြီးလုကအစီရင်ခံသည်_
"ခေါင်းဆောင်ယုံနိုင်မှာမဟုတ်ဘူး... အပင်ကပူဖောင်းထွက်လာတယ်... ပူဖောင်းက အောက်စီဂျင်တစ်ရက်ထုတ်ပေးနိုင်ပြီး အန္တရာယ်ရှိတဲ့ဓာတ်ငွေ့တွေကိုတောင်စစ်ထုတ်ပေးနိုင်တယ်''
"ကျွန်တော်ကိုယ်တိုင်စမ်းသပ်ပြီးပြီ... ရေထဲမှာပူဖောင်းနဲ့အကြာကြီးနေခဲ့တာ... ကောင်းကောင်းအသက်ရှူလို့ရတယ်''
"ပူဖောင်း? ဘယ်လို?''
ဝန်ကြီးလုစကားကြောင့် ခေါင်းဆောင်နည်းနည်းစိတ်ထွေသွားသည်။
ဖုန်းထဲကနားထောင်ရုံနှင့် ယုံရခက်သည်။
ဝန်ကြီးလုကသဘောပေါက်သောကြောင့် ချက်ချင်းပင်_
"ခေါင်းဆောင်.. ကျွန်တော်အခုချက်ချင်းပြန်ယူလာခဲ့မယ်... အဲဒီကျရင် သိပါလိမ့်မယ်''
ဖုန်းချပြီးနောက် ဝန်ကြီးလုက ချင်လင်အား_
"သူဌေးချင်.. အထက်လူတွေက လုံခြုံရေးတင်းကြပ်ဖို့အတွက် အရောင်ပြောင်းပင်ကိုမြို့တော်ပြန်ယူလာခိုင်းတယ်... ပြီးတော့ ဒီပူဖောင်းတွေလည်း ခူးယူသွားဖို့စီစဉ်ထားတယ်''
"ပူဖောင်းမြက်ပင်နဲ့မျိုးစေ့ကိုတော့ ချင်းလင်အပန်းဖြေစံအိမ်မှာပဲထားခဲ့မယ်... အထက်လူတွေကိုပဟေဠိထားလိုက်မယ်... အချိန်ကျရင် အထက်လူတွေက ချင်းလင်ဓာတ်ခွဲခန်းနဲ့နည်းပညာမျှသုံးလိမ့်မယ်''
ဒါမျက်နှာသာပြန်ပေးခြင်းဖြစ်မည်။
ချင်းလင်ဓာတ်ခွဲခန်းကနှစ်ယောက်ကြောင့်မဟုတ်ရင် ဒီအံ့ဖွယ်အာကာသပင်နှစ်ပင်ကို သူတို့ပျိုးထောင်နိုင်မည်မဟုတ်။
ပူဖောင်းမြက်ကိုကျယ်ကျယ်ပြန့်ပြန့်စိုက်နိုင်မှတော့ ချင်းလင်ဓာတ်ခွဲခန်းနဲ့နည်းပညာမျှသုံးတာ ပြန်ပေးဆပ်ခြင်းတစ်မျိုးပင်။
ချင်လင်က ကန့်ကွက်ခြင်းမရှိ။
အမှန်အတိုင်းပြောရရင် သူ့မှာဂိမ်းရှိနေသရွေ့ တစ်ခုလောက်အတိုးအလျော့ဖြစ်တာ ဘာမှမထူးပေ။
အခုပိုက်ဆံအလုံအလောက်ရှိပြီဖြစ်၍ ပိုက်ဆံကနံပါတ်တစ်ခုထက်မပို။
ထို့ကြောင့် ကင်ဆာလက်တွေ့စမ်းသပ်ချက်မှရသောပိုင်ဆိုင်မှု ၁၀% ကို စ*စ်ဘေးရံပုံငွေအဖြစ်လှူဒါန်းနိုင်သည်။
ဝန်ကြီးလုလည်း ချင်လင်နှင့်ဆွေးနွေးပြီးနောက် ပူဖောင်းများစခူးသည်။ အပင်သုံးပင်မှထွက်သောပူဖောင်း နည်းနည်းများသည်။
အခန်း ၁၃၁၀: ကာကွယ်ရေးဝတ်စုံလား? ၂
တချိန်တည်းမှာ မာဟုန်တို့ကိုလည်းအသင့်ပြင်ခိုင်းထားပြီး အစောင့်အကြပ်နှင့်ပြန်သွားသည်။ ချင်းလင်ဓာတ်ခွဲခန်းကိုလည်း သူ့အတွက်အစောင့်အကြပ်ယာဉ်စီစဉ်ခိုင်းသည်။
မကြာမီ ဝန်ကြီးလုကပစ္စည်းများနှင့်အတူ မြို့တော်ပြန်သွားသည်။
အရင်ဆုံး တရုတ်သိပ္ပံအကယ်ဒမီမှတော်ဝင်ပညာရှင်ရန်တို့အဖွဲ့ဆီ အရောင်ပြောင်းပင်သွားပို့သည်။
ခေါင်းဆောင်အတွက်ပူဖောင်းနှစ်လုံးပါ တပါတည်းယူသွား၏။
"ခေါင်းဆောင်.. ဒါအာကာသပင်ကထွက်တဲ့ပူဖောင်းပါ''
ဝန်ကြီးလုကခေါင်းဆောင်ကိုမြင်မြင်ချင်းအစီရင်ခံပြီး ပူဖောင်းပေးလိုက်သည်။
ခေါင်းဆောင်ကပူဖောင်းကိုမြင်ပြီး ဝန်ကြီးလုစကားကိုကြားယောင်ကာ အံ့ဩသွားသည်။
ဒီလိုလုပ်ဆောင်ချက်ရှိတဲ့သိပ္ပံနည်းကျကာကွယ်ရေးပစ္စည်းမျိုးဖန်တီးရင် အကုန်အကျများမည်မှန်းသိကြသည်။ သာမန်လူတွေမတတ်နိုင်။
အခုအပင်ကထွက်တဲ့ပူဖောင်းက ဒီလိုလုပ်နိုင်သတဲ့။ ဘယ်လောက်အံ့ဩဖို့ကောင်းလိုက်လဲ?
ခေါင်းဆောင်သက်ပြင်းချလိုက်သည်_
"တကယ်တွေးရခက်လိုက်တာ... လူမလုပ်ဘဲနဲ့... အပင်ကဘယ်လိုလုပ်ဒါမျိုးဖြစ်နိုင်လဲ? နေဦး.. လူမလုပ်ဘဲနဲ့?''
ခေါင်းဆောင်ကမျက်မှောင်ကြုတ်ပြီး မျက်နှာထားတည်သွားသည်။ သူကဝန်ကြီးလုအား_
"ရှောင်လု.. ဒီပူဖောင်းနဲ့အရောင်းပြောင်းပင်ကိုတွေးကြည့်စမ်း... အဲဒီနှစ်ခုပေါင်းရင် ဘယ်လိုဖြစ်မယ်ထင်လဲ?''
ဝန်ကြီးလုကနားထောင်ရင်း ခဏတွေးကြည့်ပြီးကြောင်သွားသည်။
ကာကွယ်ရေးဦးထုပ်၊ ကာကွယ်ရေးဝတ်စုံ?
"အင်း!''
ခေါင်းဆောင်က တည်တည်ငြိမ်ငြိမ်ခေါင်းညိမ့်ပြသည်။
အရောင်ပြောင်းပင်အာနိသင်နဲ့ အရောင်ပြောင်းအဝတ်အစားဖန်တီးဖို့လည်းတွေးမိသည်။
အာနိသင်က သိသိသာသာ၊ ထိုအရောင်ပြောင်းခြင်းက မမြင်ရသလောက်ပင်။
အရောင်ပြောင်းပင်ကိုကာကွယ်ရေးဝတ်စုံအဖြစ်သုံးရင် ပူဖောင်းကရော? ကာကွယ်ရေးဦးထုပ်သက်သက်ပဲလား?
ပစ္စည်းအစုံလိုက်လုပ်ရန်အသုံးချနိုင်ပြီး အထူးအစုံလိုက်ပစ္စည်းဖြစ်လာမည်ထင်သည်။
တိုက်ဆိုင်မှုသက်သက်ဆိုရင် ဒီပစ္စည်းနှစ်ခုကိုဖန်တီးပေးတဲ့သဘာဝရဲ့အံ့ဖွယ်ဖြစ်နိုင်သည်။
ဒါပေမဲ့ တိုက်ဆိုင်တာမဟုတ်ဘဲဝင်ပါလိုက်ရင် ဒါမှမဟုတ် ဒီလိုအသုံးချဖို့ပျိုးထောင်တာဆိုရင် အခြေအနေကပြင်းထန်သွားမည်။
ဒါတစ်ခုခုကိုရည်ညွှန်းနေသလိုလို။
ဝန်ကြီးလုနှင့်ခေါင်းဆောင်က ဒီနှစ်ခု၊ တစ်ခုနှင့်တစ်ခုဘာမှမဆိုင်မှန်းမသိကြ။ တိုက်ဆိုင်မှုတောင်မဟုတ်။ အလိမ်အညာသက်သက်ပင်။
ချင်လင်မှာ သူလုပ်ထားသောအကွက်က ဝန်ကြီးလုနှင့်ခေါင်းဆောင်ထင်နေသလို တခြားမျိုးစေ့နှင့်ဒီလောက်တိုက်ဆိုင်နေမည်ဟု လုံးဝမတွေးမိပါချေ။
"ဘယ်လိုပဲဖြစ်ဖြစ် ဒီပူဖောင်းအာနိသင်ကိုအရင်စမ်းသပ်ရမယ်... မြို့တော်မီးသတ်ဌာနကိုပို့လိုက်!''
နောက်ဆုံး ခေါင်းဆောင်က ဝန်ကြီးလုကိုညွှန်ကြားလိုက်သည်။
ဝန်ကြီးလုခေါင်းညိမ့်လိုက်၏။
ဒီနှစ်ခုအဆက်အစပ်ရှိမရှိက သက်သေမပြနိုင်သေး။
အခုပူဖောင်းအာနိသင်ကို အရင်စမ်းသပ်ရမည်။ ဒါအရေးအကြီးဆုံးပင်။
မီးသတ်ဌာနမှာ မြို့တော်တွင်အရေးအကြီးဆုံးဌာနတစ်ခုဖြစ်သည်။
အထူးသဖြင့် ပေကျင်းလိုလူစည်ကားသောနိုင်ငံတကာမြို့တော်တွင် ကပ်ဘေးဒုက္ခတစ်ခုဖြစ်သည်။
ထို့ကြောင့် မီးသတ်ဌာနက အရေးအကြီးဆုံးဖြစ်၍ ဌာနတိုင်းတွင်ကိရိယာများကောင်းကောင်းတပ်ဆင်ထားသည်။
ဗဟိုမီးသတ်ဌာန၊ကိရိယာဌာနတွင်ပစ္စည်းအသစ်ရောက်ကြောင်းသတင်းရသည်။ ဒီနေ့ ကျန်းခယ့်ကမီးသတ်သမားတချို့နှင့် ပစ္စည်းအသစ်ကိုစစ်ဆေးရမည်။
မီးသတ်သမားတစ်ယောက်က ပစ္စည်းယူဆင်ကြည့်သည်။ ကာကွယ်ရေးဝတ်စုံနှင့်အောက်စီဂျင်အိုးဖြစ်၏။
မီးသတ်သမားက အောက်စီဂျင်အိုးမပြီး လက်ထဲတွင်ချိန်ဆကြည့်ကာညည်းတွားသည်_
"အောက်စီဂျင်အိုးကိုအဆင့်မြင့်အောင်လုပ်လို့ရမလား သိချင်လိုက်တာ''
"အင်း.. ပေါင် ၁၀၀ သယ်ရတာ တကယ်ပင်ပန်းတယ်''
"ဟေး.. ဒီအောက်စီဂျင်အိုးတွေက ပိုလေးလာသလိုပဲ... ငါအထင်မှားတာလား?''
ကျန်းခယ့်က မီးသတ်သမားသမားများကိုကိရိယာဝေပေးရင်း ညည်းတွားသံများကြောင့် စိတ်ပျက်လက်ပျက်ခေါင်းညိမ့်လိုက်သည်။
ဒါနဲ့ပတ်သက်ပြီး သူဘာမှမတတ်နိုင်။ အထက်လူများဝယ်ခြင်းဖြစ်သည်။
ထိုအချိန်တွင်_
ရုတ်တရက် ဒါရိုက်တာတစ်ဦးက လေးလေးလံလံသေတ္တာတစ်လုံးဆွဲလာသောလူနှင့်အတူရောက်လာသည်။
ဌာနအကြီးအကဲကဝင်လာပြီး ကျန်းခယ့်ကိုလက်ယပ်ခေါ်ကာ_
"ကျန်းခယ့်.. ခဏလာပါဦး... ဒီသေတ္တာထဲကပစ္စည်းတွေရဲ့အစွမ်းကိုစမ်းသပ်ကြည့်''
"ခေါင်းဆောင်.. ဒါကဘာလဲ?''
ကျန်းခယ့်က ဇဝေဇဝါနှင့်ရောက်လာပြီးမေးသည်။
ဒါရိုက်တာက ရှင်းပြ၏_
"မပြောတတ်ဘူး... ဟွားယွမ်ခေါင်းဆောင်ကပို့ပြီးစမ်းသပ်ခိုင်းတာ... ကာကွယ်ရေးပူဖောင်းလို့ပြောတယ်... အထဲမှာအသုံးပြုနည်းပါတယ်''
ကျန်းခယ့်ကခေါင်းညိမ့်ပြီး သေတ္တာဖွင့်လိုက်ရာ ပူဖောင်းတချို့ထွက်လာသည်။
တချက်ကြည့်ရုံနှင့် ခေါင်းဆောင်းပုံစံဖြစ်မည်။
ကျန်းခယ့်ကပူဖောင်းကိုင်ကြည့်ကာ နည်းနည်းဇဝေဇဝါဖြစ်သွားပြီး_
"နည်းပညာမြင့်ပစ္စည်းနဲ့မတူဘဲ အပင်နဲ့တူနေတယ်... အနံ့ကထူးခြားတယ်''
နည်းနည်းထူးဆန်းသည်။
ထို့နောက် ကျန်းခယ့်ကသေတ္တာထဲမှအသုံးပြုနည်းယူလိုက်သည်။
အသုံးပြုနည်းဖတ်ပြီး ကျန်းခယ့်ကြောင်သွားသည်။ အသုံးပြုနည်းအားလုံးဖတ်ပြီးသောအခါ ကျန်းခယ့်မယုံနိုင်ပုံပေါက်သွား၏။
ဒါတကယ် အပင်ကဖြစ်လာတာလား?
အထူးသဖြင့် အပင်ကဖြစ်လာတဲ့ပစ္စည်းမှာ ဒီလိုအံ့ဖွယ်အစွမ်းမျိုးရှိတာ မယုံနိုင်စရာ။
ဒါပေမဲ့ ဒီပစ္စည်းဒီလောက်စွမ်းရင် နတ်လက်နက်ဖြစ်နေမှာပေါ့။
မီးသတ်သမားတွေက အောက်စီဂျင်အိုးကိုညည်းတွားနေကြတာမလား?
ဒါနဲ့ဖြေရှင်းနိုင်ပြီ။
နောက်ပြီး အောက်စီဂျင်အိုးပေါ့သွားရင် မီးသတ်ရပိုလွယ်သည်။ အလုပ်ပိုလုပ်နိုင်ပြီး လုံခြုံစိတ်ချရမည်။
ဘာပဲဖြစ်ဖြစ် အောက်စီဂျင်အိုးနဲ့ဆို တကယ်လှုပ်ရှားရခက်သည်။
ထိုအချက်ကိုတွေးမိပြီး ကျန်းခယ့်က မီးသတ်သမားအား_
"အောက်စီဂျင်အိုးချပြီး ဒီပစ္စည်းအသစ်ကိုစမ်းကြည့်ပါ''
မီးသတ်သမားများက ကျောပေါ်အောက်စီဂျင်အိုးထမ်းလျက်သား ပူဖောင်းဟူသောစကားကြောင့်ဇဝေဇဝါဖြစ်သွားသော်လည်း အိုးကိုချကာသေတ္တာဆီလျှောက်လာသည်။ အားလုံး ပူဖောင်းကို ကြောင်တောင်တောင်နှင့်ကြည့်လိုက်ကြသည်။
"ဒါကဘာလဲ?''
"ခေါင်းဆောင်းနဲ့တူတယ်''
"ဒီပစ္စည်းအသစ်က ဘာအတွက်လဲ?''
မီးသတ်သမားတချို့က သူတို့သံသယကိုပြောကြသည်။
ကျန်းခယ့်ကယူပြီးရှင်းပြသည်_
"ဒီပစ္စည်းကိုဟပြီး တပ်လို့ရတယ်... အောက်စီဂျင်အိုးအစားထိုးပစ္စည်းပဲ... ဟွားယွမ်ကလူတွေထုတ်တဲ့ပစ္စည်းအသစ်''
အောက်စီဂျင်အိုးအစားထိုးပစ္စည်းဟုကြားပြီး မီးသတ်သမားများအပျော်လွန်သွားသည်။ ဟွားယွမ်ဟူသောနာမည်ကြောင့် ပိုစမ်းသပ်ချင်ကြသည်။
မြန်မြန်ဆန်ဆန်ပင် မီးသတ်သမားများက သေတ္တာထဲမှပူဖောင်းကိုတပ်လိုက်သည်။
ကျန်းခယ့်က တအံ့တဩကြည့်လိုက်သည်။ ပူဖောင်းဟနေသောနေရာက လည်ပင်းမှာကွက်တိပိတ်သွားသည်။ သို့သော် ပူဖောင်းနှင့်ကာကွယ်ရေးဝတ်စုံက သိပ်မလိုက်။
ဒါကပြဿနာမဟုတ်။ အသုံးပြုနည်းအတိုင်း ပူဖောင်းမှာအာနိသင်ရှိရင် သက်ဆိုင်ရာဌာနတွေက ကာကွယ်ရေးဝတ်စုံနှင့်ပူဖောင်းကိုလိုက်ဖက်အောင် ဒီဇိုင်းပြန်ဆွဲလိမ့်မည်။
မီးသတ်သမားများမှာပူဖောင်းဝတ်ပြီး မျက်နှာကမယုံနိုင်ပုံဖြစ်သွားကြသည်။ လေ့ကျင့်ရေးအတွင်း အောက်စီဂျင်စက်မကြာခဏသုံးသောကြောင့် ထူးခြားမှုကိုခံစားမိသည်။
အောက်စီဂျင်စက်ဆိုရင်တောင် ပုံမှန်အသက်ရှူရင် နည်းနည်းမသက်မသာဖြစ်သည်။ ဘာပဲဖြစ်ဖြစ် အောက်စီဂျင်နဲ့ကာဗွန်ဒိုင်အောက်ဆိုဒ်က နည်းနည်းရောနေသည်။
ဒီပူဖောင်းက မတူ။ အသက်ရှူရခက်ခြင်းမရှိဘဲ ရှောရှောရှူရှူရှိသည်။
မိနစ်ပိုင်းအကြာ ဒီပစ္စည်းကအောက်စီဂျင်ထုတ်ပေးနိုင်ကြောင်း လုံးဝသေချာသွားသည်။
"ဘယ်လိုနေလဲ?''
ကျန်းခယ့်လည်း စူးစမ်းမေးသည်။
"အောက်စီဂျင်အိုးထက်ပိုကောင်းတယ်!''
မီးသတ်သမားတစ်ယောက်ကဖြေသည်။
တခြားမီးသတ်သမားများက ခေါင်းညိမ့်ထောက်ခံ၏။
ထို့ကြောင့် ကျန်းခယ့်ပိုအံ့ဩသွားသည်။ သူကချက်ချင်းလေ့ကျင့်ရေးကွင်းဖွင့်ခိုင်းပြီး မီးသတ်သမားများကိုပူဖောင်းယူလာခိုင်းကာ လက်တွေ့လေ့ကျင့်ရေးဆင်းစေသည်။
လေ့ကျင့်ရေးကွင်းမှာ မီးလောင်သည့်နေရာပုံစံဆင်ထားခြင်းဖြစ်သည်။ အထဲတွင် အတားအဆီးများ၊မီးခိုးလုံးများ၊ရုပ်တုများရှိသည်။ မီးသတ်သမားများက မီးသတ်ဝတ်စုံနှင့် ရုပ်တုများကိုသယ်ပြီး အတားအဆီးများဖြတ်ရသည်။
မကြာမီလေ့ကျင့်ရေးစသည်။ အချိန်စသည်နှင့် မီးသတ်သမားများက လေ့ကျင့်ရေးကွင်းထဲဆင်းသည်။
ကျန်းခယ့်နှင့်ဒါရိုက်တာက အပြင်မှာစောင့်နေ၏။ အချိန်လွန်သည်နှင့် မီးသတ်သမားများကရုပ်တုများသယ်ပြီး လေ့ကျင့်ရေးကွင်းအပြင်အလျှိုလျှိုထွက်လာကြသည်။ လေ့ကျင့်ရေးပြီးဆုံးသည့်သဘောပင်။
သူတို့ကလည်းထွက်လာသည်နှင့် ချီးကျူးစကားပြောသည်_
"ဒီပစ္စည်းက သုံးရလွယ်လိုက်တာ''
"ဟုတ်တယ်.. လေ့ကျင့်ရေးဒီလောက်လွယ်တယ်လို့ခံစားမိတာ ဒါပထမဆုံးပဲ''
"ရလဒ်က ဘယ်လိုလဲ?''
ဒါရိုက်တာက တန်းမေးသည်။
"YES!''
အချိန်မှတ်သူက ချက်ချင်းအစီရင်ခံသည်_
"ကယ်ဆယ်ရေးအောင်မြင်ဖို့ အချိန်ကသုံးပုံနှစ်ပုံလောက်သက်သာသွားပြီ!''
ထိုရလဒ်ကြောင့် ဒါရိုက်တာရောကျန်းခယ့်ပါ အံ့အားသင့်သွားသည်။
ဒီလောက်အချိန်ကုန်သက်သာတာ ဘာအဓိပ္ပါယ်လဲ သူတို့သိသည်!
အခန်း ၁၃၁၁: တစ်နှစ်သား!
ဝန်ကြီးလုလည်း မီးသတ်ဌာနမှအထူးပူဖောင်းစမ်းသပ်ချက်ကိုရသည်။
မီးသတ်သမားအားလုံး ပူဖောင်းနှင့်ကယ်ဆယ်ရေးလေ့ကျင့်ခန်းဆင်းပြီး မူလအချိန်ထက်သုံးပုံနှစ်ပုံလျော့သွားသောကြောင့် သူအပျော်လွန်သွား၏။
အရေးကြုံရင်အသက်ကယ်နိုင်ပြီး မီးကြောင့်ပျက်စီးဆုံးရှုံးမှုကိုလျှော့ချပေးနိုင်သည်။
အထူးသဖြင့် ပူဖောင်းကြောင့် မီးသတ်သမားများသွက်သွက်လက်လက်လှုပ်ရှားနိုင်၍ အန္တရာယ်လည်းပိုကင်းသည်။
နောက်ပြီး မီးလောင်နေရာတွင်ပူဖောင်းကအကြမ်းခံနိုင်ပြီး အပူဒဏ်ခံနိုင်ရည်က လုံးဝအဆင့်မီသည်။
ရလဒ်ထွက်ထွက်ချင်း ဝန်ကြီးလုက ခေါင်းဆောင်ကိုအစီရင်ခံသည်_
"ခေါင်းဆောင်.. ရလဒ်တွေထွက်ပါပြီ... ဒီပူဖောင်းအပူဒဏ်ခံနိုင်ပုံက မယုံနိုင်စရာပါပဲ... ကြည့်ပါဦး.. ဒါမီးသတ်ဌာနကအစီရင်ခံစာပါ''
ခေါင်းဆောင်က ဒီရက်ပိုင်း ဒီကိစ္စကိုစိတ်အဝင်စားဆုံးဖြစ်နေသည်။ သူကချက်ချင်းမတ်တပ်ထရပ်ပြီး အစီရင်ခံစာယူလိုက်၏။
ပူဖောင်းအပူဒဏ်ခံနိုင်ပုံကြောင့် သူလည်းအံ့ဩသွားပြီး_
"မီးသတ်တဲ့နေရာမှာအသုံးဝင်မှန်းသိပေမဲ့ ဒီလောက်အသုံးတည့်မယ်မထင်မိဘူး''
ထိုအချိန်_
တံခါးခေါက်သံကြားရသည်။
"ခေါင်းဆောင်.. ဝန်ကြီးလု.. ကျုပ်ဘာလုပ်ပေးရမလဲ?''
တော်ဝင်ပညာရှင်ဟောင် ဝင်လာသည်။
ခေါင်းဆောင်က တော်ဝင်ပညာရှင်ဟောင်ကိုခေါ်ထားမည်ဟုမထင်သော်လည်း အကြောင်းရင်းကိုသူခန့်မှန်းမိသည်။
"လုပ်ပေးရမှာပေါ့''
ခေါင်းဆောင်ကပြောသည်_
"တော်ဝင်ပညာရှင်ဟောင်.. ခင်ဗျားဒုံးပျံရှာဖွေရေးအဖွဲ့ကပြန်ယူလာတဲ့မျိုးစေ့နှစ်စေ့ကို အောင်အောင်မြင်မြင်ပျိုးထောင်ပြီးပြီ... ဒီအပင်နှစ်ပင်မှာ မယုံနိုင်စရာအာနိသင်တွေရှိတယ်... အထူးသဖြင့် ဒီနှစ်ပင်ရဲ့အာနိသင်တွေက တိုက်ဆိုင်လွန်းတာပဲ... ဒီအချက်အလက်တွေကြည့်လိုက်ပါဦး''
ခေါင်းဆောင်ကပြောရင်းဆိုရင်း အချက်အလက်များယူပြီး တော်ဝင်ပညာရှင်ဟောင်ကိုပေးသည်။
တော်ဝင်ပညာရှင်ဟောင်က ယူဖတ်လိုက်၏။ ပူဖောင်းမြက်နှင့်အရောင်ပြောင်းပင်၏အချက်အလက်များဖတ်ပြီး သူအံ့ဩသွားကာ_
"ဒီနှစ်မျိုးမှာ ပူဖောင်းမြက်ကထွက်တဲ့ပူဖောင်းက ဘယ်လောက်စွမ်းလဲ? အာကာသအကာအကွယ်လို အောက်စီဂျင်စက်လိုသုံးနိုင်တာလား? ပြီးတော့ အရောင်ပြောင်းပင်ရဲ့အရောင်ပြောင်းဓာတ်ကရော အာကာသဝတ်စုံလုပ်လို့ရတာလား?''
ခေါင်းဆောင်နှင့်ဝန်ကြီးလု အချင်းချင်းကြည့်လိုက်ကြသည်။
တော်ဝင်ပညာရှင်ဟောင်ထောက်ပြတဲ့အချက်ကြောင့် သူတို့ပိုစိုးရိမ်မိသည်။
ဘာပဲဖြစ်ဖြစ် ဒီနှစ်ပင်ကိုသဘာဝအလျောက်တိုက်ဆိုင်မှုမဟုတ်ကြောင်း သူတို့သံသယရှိထားသည်။
တော်ဝင်ပညာရှင်ဆက်စပ်ပြလိုက်တာ အားလုံးရှင်းသွားသလိုပင်။
သူတို့မျက်နှာထူးဆန်းနေသောကြောင့် တော်ဝင်ပညာရှင်ဟောင်က_
"ခေါင်းဆောင်တို့.. ဒီနှစ်ပင်မှာအထူးအာနိသင်ရှိတာ ဖန်တီးထားတယ်လို့ထင်တာလား?''
ခေါင်းဆောင်နှင့်ဝန်ကြီးလုကမငြင်းဘဲ ခေါင်းညိမ့်လိုက်သည်။
တော်ဝင်ပညာရှင်ဟောင် မျက်နှာထားတည်သွား၏။ ဒီလိုဆိုရင် ဘာအဓိပ္ပါယ်လဲသူသိသည်။
"တော်ဝင်ပညာရှင်ဟောင်''
ခေါင်းဆောင်က တန်းပြောသည်_
"နောက်အာကာသဒုံးပျံစူးစမ်းရှာဖွေရေးလုပ်ရင် ဒီကိစ္စကိုအာရုံစိုက်ရမယ်''
မှန်းဆချက်သာဖြစ်သော်လည်း သတိထားရမည်။ အကယ်၍များ?
"အင်း!''
တော်ဝင်ပညာရှင်ဟောင် ခေါင်းညိမ့်လိုက်သည်။ သူသဘောပေါက်သည်။ သူကချက်ချင်း သူ့သုတေသနအဖွဲ့ဆီပြန်ပြီး အာကာသဒုံးပျံစူးစမ်းရှာဖွေရေးအစီအစဉ်ကိုချိန်ညှိသည်။
လဝက်အကြာ_
နတ်ဘုရားမတောင်_
ချင်လင်ကတောလမ်းအတိုင်း ပူဖောင်းမြက်တောရှိသောရေကန်ဆီရောက်လာပြန်သည်။ ရောက်သည်နှင့် ပူဖောင်းမျိုးစေ့လိုက်ကောက်၏။
ဝန်ကြီးလုက ပူဖောင်းမြက်နည်းပညာမျှဝေရန်စာပို့သည်။
အခုပူဖောင်းမြက်ကို ကျယ်ကျယ်ပြန့်ပြန့်စိုက်ရတော့မည်။
တရုတ်သိပ္ပံအကယ်ဒမီသို့ ပူဖောင်းမြက်မျိုးစေ့ပထမအသုတ်ပို့ပေးရန်လိုလာသည်။
ထို့ကြောင့် ချင်လင်စလှုပ်ရှား၏။
ပူဖောင်းမြက်အာနိသင်က အလွန်တရာအကျိုးရှိသောကြောင့် သူအမြန်ဆုံးစိုက်ပျိုးချင်သည်။
ပူဖောင်းမြက်ပင်သုံးပင်တည်းကိုအားကိုးနေရင် အရှိန်ရမည်မဟုတ်။ သူအရှိန်တင်ရမည်။
ဘယ်လိုပဲဖြစ်ဖြစ် ဝန်ကြီးလုအလောတကြီးထွက်သွား၍ ပူဖောင်းမြက်ပင်ကမျိုးစေ့ဘယ်နှစ်စေ့ရမည်မသိနိုင်။ သူ့အပေါ်သာမူတည်သည်။
ဒီတော့ အဆပေါင်းများစွာအရှိန်တင်လည်း ပြဿနာမရှိ။
အိတ်လေးတစ်အိတ်ရပြီးနောက် ချင်လင်ကတောင်တက်လမ်းပြန်လာကာ ဂိမ်းထဲမှထွက်လိုက်သည်။
ပူဖောင်းမြက်ပင်သုံးပင်မှမျိုးစေ့များပါရောပြီး ဂိမ်းထဲပြန်ထည့်သည်။ ထိုမျိုးစေ့များကိုအထွက်တိုးစေရန် သူ့ဂိမ်းဇာတ်ကောင်အား သတ္တုမြို့တော်မျိုးစေ့ထုတ်စက်ထဲသွားထည့်စေသည်။
ပူဖောင်းမြက်မျိုးစေ့ထုတ်ပြီးနောက် ဂိမ်းအပြင်ပြန်ထုတ်သည်။ ရှန်လီကိုလည်း သူ့ရုံးခန်းထဲဖုန်းဆက်ခေါ်လိုက်၏။
"ဥက္ကဌချင်''
ရှန်လီကရောင်ရောက်ချင်းမေးသည်_
"ကျွန်တော့်ကိုခေါ်တာ အရေးကြီးကိစ္စပြောစရာရှိတယ်မလား?''
"ဥက္ကဌရှန်.. အာကာသမျိုးစေ့အကြောင်းသိတယ်မလား?''
ချင်လင်ကတန်းမေးသည်။
ရှန်လီကခေါင်းညိမ့်ပြီး_
"ပါမောက္ခလီခိုင်ပျိုးထောင်တဲ့အရောင်ပြောင်းပင်လေ... ကျွန်တော် အရောင်ပြောင်းပင်ရဲ့အချက်အလက်တွေကြည့်ပြီးပြီ... တကယ်အံ့ဩစရာကောင်းတယ်''
"ဝန်ကြီးလုအရောင်ပြောင်းပင်ပြန်ယူသွားတော့ အစောင့်အကြပ်ယာဉ်တောင် စီစဉ်ပေးရသေးတယ်''
ချင်လင်ကခေါင်းညိမ့်ပြီး ပူဖောင်းမျိုးစေ့အိတ်ကိုရှန်လီဆီပေးကာ_
"ဒါအာကာသမျိုးစေ့နောက်တစ်မျိုးပဲ... အစ်ကိုလီစိုက်တဲ့မျိုးစေ့နဲ့အတူ အာကာသထဲကပြန်ယူလာတဲ့မျိုးစေ့ပဲ... ဒီမျိုးစေ့တွေပြန်ယူသွားပြီး ရုက္ခဗေဒအဖွဲ့ကိုပျိုးထောင်ခိုင်းပါ... သက်ဆိုင်ရာအချက်အလက်တွေကို စီမံရေး app ကနေ ကျွန်တော်အီးမေးလ်ပို့လိုက်မယ်''
ချင်လင်စကားကြောင့် ရှန်လီနည်းနည်းအံ့ဩသွားသည်။ ဘာပဲဖြစ်ဖြစ် အာကာသပင်ဖြစ်နေသည်။
ဒီမတိုင်ခင်က ကမ္ဘာ့အပြင်ဘက်မှာအပင်ရှိမှန်း သူသိတောင်မသိ။ အခု တစ်ပင်ပြီးတစ်ပင် သူ့ရှေ့ရောက်လာသည်။
"ကောင်းပါပြီ ဥက္ကဌချင်''
ရှန်လီကခေါင်းညိမ့်ပြီး မျိုးစေ့ယူကာ ချင်းလင်ဓာတ်ခွဲခန်းပြန်သွားသည်။
သူ့ရုံးခန်းထဲရောက်ရောက်ချင်း အာကာသမျိုးစေ့အချက်အလက်ကိုကြည့်သည်။
ပူဖောင်းမြက်ဆိုပါလား။
သူပိုအံ့ဩရသည်က ပူဖောင်းမြက်အစွမ်းပင်။