အခန်း (၁၃၁၈-၁၃၂၀)

အခန်း ၁၃၁၈: ရုံချန်းရဲ့ကျေးဇူးရှင် သူဌေးချင်!

ပန်းအိမ်မှာ ဓာတ်ပုံစားခြင်း +၂ ဂိမ်းအာနိသင်ရှိသည်။

ဗီဒီယိုထဲတွင် ပန်းအိမ်အလှကဖော်မပြနိုင်အောင်ပင်။

ပန်းအိမ်နှင့်တင် အကြည့်မခွာနိုင်အောင်ဖြစ်သည်။

အခုပန်းအိမ်အစုအဝေးဖြစ်၍ ဓာတ်ပုံစားခြင်း +၂ အာနိသင်က ခမ်းနားသည်။

မျိုးပြောင်းအာကာသနွယ်နှင့်ညဘုရင်မထပ်ပေါင်းလိုက်သောအခါ ပိုအံ့ဩစရာဖြစ်သွားသည်။

ဗီဒီယိုထဲတွင် အသံတစ်သံလည်းကြားရသည်_

"လား လား.. ဒါချင်းလင်စံအိမ်ကဖွင့်မယ့်ပရောဂျက်အသစ်ပါ... နတ်သမီးပုံပြင်တောင်က ချင်းလင်စံအိမ်သေချာဆောက်ထားတဲ့ပရောဂျက်အသစ်ဖြစ်ပါတယ်... လည်ပတ်ဖို့ကေဘယ်ကားသုံးနိုင်ရုံတင်မကဘူး... ညပိုင်း နတ်သမီးပုံပြင်နွယ်နဲ့ပန်းတွေကထွက်တဲ့နတ်သမီးပုံပြင်ကမ္ဘာကိုလည်းခံစားနိုင်ပါတယ်''

"နတ်သမီးပုံပြင်တောင်မှာလည်း တည်းခိုခန်းပရောဂျက်လေးနေရာပါပါတယ်... အဲဒီထဲက သုံးနေရာက ရွက်ဖျင်တဲတွေပါ''

"နောက်ဆုံးကတော့ တောင်ထိပ်ပေါ်က ပန်းအိမ်အစုအဝေးပါ... တည်းခိုနိုင်တဲ့အပြင် နေထွက်တာကိုလည်းကြည့်နိုင်ပါတယ်''

ချန်ရွှယ်တို့မှာ ပန်းအိမ်အစုအဝေးထဲနစ်မျောနေကြသည်။

ဒါကိုဖော်ပြနိုင်မည့်စကားမရှိ။

ဗီဒီယိုမိတ်ဆက်နားထောင်ပြီးနောက် ပန်းအိမ်တွင်ညအိပ်မည်ဟု စိတ်ထဲမှကြိတ်သဘောတူထားကြသည်။

အင်တာနက်တွင်လည်း ချင်းလင်စံအိမ်တရားဝင်အကောင့်မှတင်သောကြော်ငြာဗီဒီယိုကြောင့် အံ့ဩနေကြသည်။

ချင်းလင်စံအိမ်ကိုအာရုံစိုက်ထားသူအများစုက ပန်းအိမ်ကိုစိတ်ဝင်စားကြသည်။

အရင်ကပန်းအိမ်ပွဲကျင်းပပြီး အင်တာနက်တစ်ခုလုံး ပန်းအိမ်သတင်းများပြည့်ခဲ့ဖူးသည်။

ချင်းလင်စံအိမ်က ပန်းအိမ်ကိုဖွံ့ဖြိုးအောင်လုပ်မည်ဟုအားလုံးထင်ကြသော်လည်း စံအိမ်တွင်ပန်းအိမ်အလှဆင်ခြင်း၊ မွေးမြူရေးခြံတွင် ခရီးသည်များအနားယူရန်ပန်းအိမ်စိုက်ခြင်းမှလွဲ၍ တခြားဘာမှလုပ်သည်ကိုမတွေ့ရ။

သို့သော် ချင်းလင်စံအိမ်က ပန်းအိမ်အစုအဝေးပရောဂျက်လုပ်ထားမည်ဟုမထင်မိပေ။

အချိန်နှင့်အမျှ အင်တာနက်ပေါ်တွင်လှုပ်ခတ်နေသည်။

"၆၆၆... ချင်းလင်စံအိမ်က ဘယ်တော့မှစိတ်မပျက်ရမှန်းသိသားပဲ!''

"ဒီရွက်ဖျင်တဲပတ်ဝန်းကျင်က ချင်းလင်မွေးမြူရေးခြံထက်ပိုကောင်းတယ်... အထူးသဖြင့် တောင်ထိပ်ပေါ်က ပန်းအိမ်အစုအဝေးပဲ''

"ကိုယ်တိုင်မျက်စိနဲ့မမြင်ရရင် လူ့လောကမှာဒီလောက်လှတဲ့မြင်ကွင်းမျိုးရှိတာယုံနိုင်မှာမဟုတ်ဘူး!''

အချိန်တိုအတွင်း ချင်းလင်စံအိမ်၏နတ်သမီးပုံပြင်တောင်ရေပန်းစားမှုက ထိပ်တန်းသုံးခုထဲရောက်သွားသည်။

ချင်းလင်စံအိမ်ကိုစောင့်ကြည့်နေသောပရိသတ်တိုင်းလိုလို ဒီအကြောင်းသိကြသည်။

ဗီဒီယိုကြည့်ပြီးနောက် အတွေးတစ်ခုဝင်သွားသည်။ အရင်ဆုံးအတွေ့အကြုံခံစားကြည့်မည်။

အတော်များများက ဗီဒီယိုကြည့်ပြီး ချင်းလင်စံအိမ်အွန်လိုင်းစာမျက်နှာတွင်စာရင်းဝင်သွင်းကြသည်။

အထဲတွင် နတ်သမီးပုံပြင်တောင်လက်မှတ်အရောင်း၊ ရွက်ဖျင်တဲကြိုတင်စာရင်းသွင်းခြင်းနှင့် နေထွက်ရှုခင်းကြည့်ပန်းအိမ်အစုအဝေးများပါသည်။

ဖြစ်ချင်တော့ Link ထဲဝင်ပြီး ဝန်ဆောင်မှုမရသေး။ အချိန် ၁၂ နာရီစောင့်ရမည်။

ထို့ကြောင့် စိတ်ပိုလောစေသည်။

အချိန်ကျရင် လူတွေဘယ်လောက်များအလုအယက်ဝယ်လိုက်ကြမလဲ? ၅ နှစ်တစ်ကိုယ်တည်းလူပျိုကြီးရဲ့လက်အရှိန်မျိုးမရှိဘဲမရနိုင်။

ရုံချန်းစီရင်စု_

မိုးမှောင်သွားပြီဖြစ်သည်။

သို့သော်လည်း စီရင်စုမှာလင်းထိန်လျက်ရှိသည်။ ခေါင်းဆောင်များအလုပ်ဆက်လုပ်နေသောကြောင့် ဝန်ထမ်းအတော်များများအလုပ်မဆင်းရသေး၊ အစည်းအဝေးထိုင်နေကြသည်။

အမှန်ပင်။ စွန်းရှန်နှင့်လက်ထောက်ချန်က ညလုံးပေါက်အစည်းအဝေးလုပ်သည်။ အဓိကအချက်မှာ ရာသီဥတုအေးလာပြီးနောက် ရုံချန်းရာသီဥတုက ခရီးသည်အတော်များများကိုဆွဲဆောင်နိုင်သောကြောင့်ပင်။ သူတို့ရုံချန်းမှာအပြောင်းအလဲလုပ်ရန်လိုလာသည်။

စွန်းရှန်က စာဖိုင်တစ်ခုယူပြီး_

"ခရိုင်အသစ်မှာ ဟိုတယ်ကြီးဆောက်ထားတယ်ဆိုပေမဲ့ အိမ်ရာတည်းခိုတာက ရုံချန်းအနှံ့အပြားမှာခေတ်စားနေတယ်... သဘာဝဘေးမဲ့တောတည်ဆောက်တာနဲ့ရာသီဥတုပြောင်းလဲတာက ရုံချန်းခရီးသွားတည်းခိုရေးအတွက် နည်းနည်းဝန်ပိလာတယ်''

"အခုတခြားနေရာတွေမှာ ရာသီဥတုအေးလာပြီဆိုတော့ ခရီးသည်တွေက ရုံချန်းရာသီဥတုကိုစိတ်ဝင်စားလာကြတယ်... တည်းခိုနေထိုင်ရေးပြဿနာကို ငါတို့မဖြေရှင်းနိုင်သေးဘူး''

"ပြီးတော့ စီရင်စုတစ်ခုလုံးမှာ ချင်းလင်စံအိမ်စိုက်ခင်းနဲ့ချင်းလင်ကုမ္ပဏီစက်ရုံတွေချဲ့ထွင်ထားလို့ စီးပွားရေးလုပ်ငန်းရှင်တွေစိတ်ဝင်စားလာတယ်... ရင်းနှီးမြှုပ်နှံမှုအကျိုးက သိသာလာတယ်... ရွှေ့ပြောင်းအလုပ်သမားတွေအများကြီးကိုလည်းဆွဲဆောင်နိုင်တယ်''

"ငါတို့စုံစမ်းထားချက်အရ အလုပ်သမားအတော်များများက ရုံချန်းမှာရေရှည်အိမ်ရာဝယ်ဖို့စိတ်ဝင်စားကြတယ်... အဲဒါကြောင့် ခရိုင်အသစ်ဖွင့်ပြီး ရုံချန်းကိုဒုတိယအကြိမ်ချဲ့ထွင်ဖို့ စီရင်စုကဆုံးဖြတ်ထားတယ်... အိမ်ရာအပြင် ဟိုတယ်ကြီးလည်းဆောက်ချင်တယ်!''

သူ့စကားကြောင့် အစည်းအဝေးခန်းထဲတွင် အပူတပြင်းဆွေးနွေးကြသည်။

ရုံချန်းက ခရိုင်အသစ်ဖွင့်ပြီးခါစ။ အလွန်ကြီးသည်။

သာမန်စီရင်စုအဖို့ မြို့ပြလိုအပ်ချက်နှင့်လုံလောက်ပြီဖြစ်၍ ခရိုင်အသစ်သည် လူသူကင်းမဲ့ပြီး လူဦးရေနည်းပါးနိုင်သည်။

သို့သော် ရုံချန်းကမတူ။ ခရိုင်အသစ်ဆောက်ပြီးခါစဖြစ်သော်လည်း အိမ်ရာများရောင်းကုန်သွားပြီ။ လွန်ခဲ့သောနှစ်နှစ်အတွင်း ရုံချန်းသားများဝင်ငွေအများကြီးရှာနိုင်ခဲ့သည်။

အဓိကအချက်မှာ စီရင်စုတွင်လူဦးရေများလာခြင်းကြောင့်ပင်။

မူလက ရုံချန်း​လူဦးရေ ၄၅၀၀၀၀ ရှိသည်။ ကျေးလက်နေပြည်သူ ၁၀၀၀၀၀ နှင့် အပြင်ထွက်အလုပ်လုပ်နေသူများကိုထည့်မတွက်လျှင် စီရင်စုလူဦးရေမှာ ၂၅၀၀၀၀ သာရှိသည်။

နောက်ပိုင်း ရုံချန်းဖွံ့ဖြိုးလာပြီး အပြင်ထွက်အလုပ်လုပ်နေသူအများစုပြန်လာသည်။ မြို့နယ် သို့မဟုတ် ရုံချန်းကိုပြန်လာကြ၏။ ရုံချန်းတွင်လူဦးရေ ၃၀၀၀၀၀ ကျော်စုလာသည်။

အခု ရုံချန်းသားသာမက တခြားစီရင်စုမှလူများလည်း ရုံချန်းကိုအလုပ်လာရှာကြသည်။

ရုံချန်းသားတချို့က သူများဆီမှာအလုပ်မလုပ်ချင်သောကြောင့်ပင်။ မြို့ရွာတွင်​မြေရှိသူက သူများဆီအလုပ်လုပ်မည့်အစား ချင်းလင်ဓာတ်ခွဲခန်းမှဖရဲသီးစိုက်ကြသည်။

ထို့ကြောင့် ချင်းလင်ကုမ္ပဏီက စက်ရုံများ၊ကုမ္ပဏီများပိုတိုးချဲ့လာပြီး ရုံချန်းကစိတ်ဝင်စားလာသည်။ တဖြည်းဖြည်းနှင့် ဒေသခံများကိုအလုပ်ခေါ်ရန်ခက်သောကြောင့် ရွှေ့ပြောင်းအလုပ်သမားများလာသည်။

အဓိကအချက်မှာ ချင်းလင်ကုမ္ပဏီလစာက အလွန်မြင့်သောကြောင့်ပင်။ နိုင်ငံခြားကုမ္ပဏီလစာအဆင့်အတန်းကလည်း သာမန်စီရင်စုကုမ္ပဏီထက်မြင့်သည်။ ထို့ကြောင့် နိုင်ငံခြားအလုပ်သမားများလည်း ရုံချန်းတွင်အခြေချချင်သည်။

အခန်း ၁၃၁၉: ရုံချန်းရဲ့ကျေးဇူးရှင် သူဌေးချင်! ၂

လက်ရှိရုံချန်းလူဦးရေ ၄၅၀၀၀၀ ကျော်နေပြီ။

ထို့ကြောင့် ခရိုင်အသစ်ဖွင့်လျှင် လူဦးရေနှင့်အိမ်ရာအရောင်းအဝယ်ပြဿနာအတွက်လုံးဝပူစရာမလိုဘဲ ရုံချန်းတစ်ခုလုံး၏ဖိအားကိုလျှော့ချပေးနိုင်သည်။

အချိန်တိုအတွင်း ရုံချန်းကဒီလောက်ပြောင်းလဲသွားမည်ဟုမထင်မိ!

သူဌေးချင် ချင်းလင်စံအိမ်ဝယ်လိုက်ကတည်းက ရုံချန်းအပေါ်ဒီလောက်သက်ရောက်မှုကြီးမားမည်ဟုမထင်ခဲ့ကြ။

အမှန်ပင်။ ချင်းလင်စံအိမ်နှင့်ချင်းလင်ကုမ္ပဏီ၏အထောက်အပံ့မပါဘဲ ရုံချန်းကဒီလောက်အထိမဖွံ့ဖြိုးနိုင်ပေ။

ဒါကိုလည်း ရုံချန်းကလက်ခံထားသည်။ ရုံချန်းရာသီဥတုပြောင်းပြီး ပိုင်ရွှင်နှင့်ပိုင်ကျီရောက်လာရင်တောင် အားလုံးကသူဌေးချင်ကျေးဇူးကြောင့်ဖြစ်သည်။

သူဌေးချင်သာ ချင်းလင်စံအိမ်မဖွင့်ခဲ့ရင် ချန်ရှန်းဖေနှင့်မာလဲ့ဝမ်ဆိုသောသူဌေးကြီးနှစ်ယောက်က စိတ်ဝင်စားမည်မဟုတ်။

ချင်းလင်ဓာတ်ခွဲခန်းမှာ သူဌေးချင်နှင့်ယွမ်သန်း ၄၀၀ ရင်းနှီးမြှုပ်နှံဖို့မဖြစ်နိုင်။

ရုံချန်းမဟုတ်ရင်တောင် သူဌေးကြီးနှစ်ဦးက ယွမ်သန်း ၄၀၀ ရင်းနှီးမြှုပ်နှံဦးမည်။ ချင်းလင်ဓာတ်ခွဲခန်းက မင်မြို့တော်မှာဖြစ်သွားနိုင်သည်။

ဒီလိုဖြစ်ခဲ့ရင် သူဌေးချင်နှင့်ပါမောက္ခလီခိုင်မိတ်ဆွေဖြစ်ဖို့နေနေသာသာ ချင်းလင်ဓာတ်ခွဲခန်းသန့်စင်မြက်ဆိုတာမျိုးဖြစ်မလာနိုင်။

သန့်စင်မြက်မရှိရင် ရုံချန်းရာသီဥတုအပေါ်သက်ရောက်မှုရှိဖို့မဖြစ်နိုင်။ ဥက္ကာခဲကြောင့် ရာသီဥတုလုံးဝပြောင်းသွားဖို့မဖြစ်နိုင်။ ပိုင်ရွှင်နှင့်ပိုင်ကျီလိုမျိုးတုံးနိုင်ငံ့ရတနာများကိုဆွဲဆောင်ဖို့ပိုမဖြစ်နိုင်ပေ။

နောက်ဆုံး အားလုံးက သူဌေးချင် ချင်းလင်စံအိမ်ဝယ်သည့်အချိန်မှစခဲ့သည်။

ဒါတွေအားလုံးရဲ့အကြောင်းရင်းက သူဌေးချင်!

ရုံချန်းတစ်မြို့လုံး သူဌေးချင်အပေါ်အကြွေးတင်နေသည်ဟုဆိုနိုင်သည်။

တစ်ခါတလေ သူစဉ်းစားကြည့်သည်။ သူဌေးချင်သာ ချင်းလင်စံအိမ်ကိုလေလံမဆွဲဘဲ ဂန္တဝင်ချင်းလင်စံအိမ်ဖြစ်မလာရင် လက်ရှိရုံချန်းက ဘယ်လိုဖြစ်နေမလဲ?

ခရိုင်အသစ်အကြောင်းဆွေးနွေးမှုမြန်မြန်ဆန်ဆန်ပြီးသွားသည်။ အမြော်အမြင်ရှိသူက ရုံချန်းမှာခရိုင်အသစ်ဖွင့်မည်မှန်းသိသည်။ အ​မြော်အမြင်မရှိရင် ဒီအစည်းအဝေးခန်းထဲထိုင်နိုင်မည်မဟုတ်။

ခရိုင်အသစ်ဖွံ့ဖြိုးရေးအတည်ပြုပြီးနောက် စွန်းရှန်ကအစည်းအဝေးပြီးကြောင်းကြေညာပြီး ချန်လီသာကျန်ခဲ့သည်။

ချန်လီမှာ ခရီးသွားတာဝန်ခံဖြစ်၍ ရုံချန်းခရီးသွားလုပ်ငန်းကိုအာရုံစိုက်ထားသည်။

သူတို့နှစ်ဦးရုံးခန်းထဲရောက်သောအခါ စွန်းရှန်၏အတွင်းရေးမှူးလောလောနှင့်ရောက်လာပြီး_

"စွန်းရှန် လက်ထောက်ချန်... ချင်းလင်စံအိမ်မှာ ပရောဂျက်အသစ်ရှိတယ်''

နှစ်ယောက်သား ချက်ချင်းစိတ်ဝင်စားသွားသည်။

ချင်းလင်စံအိမ်မှာ ပရောဂျက်အသစ်မရှိတာကြာပြီ။

ထို့နောက် နှစ်ယောက်သားတစ်ခုခုတွေးမိပြီး စွန်းရှန်က တန်းမေးသည်_

"အဲဒီတောင်က ပြီးပြီလား?''

ချန်လီလည်း ဇဝေဇဝါနှင့်အတွင်းရေးမှူးကိုကြည့်လိုက်သည်။

ထိုတောင်မှာ မူလကထိတ်လန့်စရာအခြေအနေရှိပြီး လူဦးရေနည်းပါးခဲ့သည်။ ထို့ကြောင့် ချင်းလင်စံအိမ်ကတောင်ကိုစာချုပ်ချုပ်ချင်သည်ဟု ဟွားယွမ်ကအသိပေးသောအခါ ချက်ချင်းလွှဲပေးလိုက်သည်။

သို့သော် ချင်းလင်စံအိမ်က တောင်ပေါ်မှာဘာလုပ်မှန်း သူတို့မသိ။ ကေဘယ်ကားဆောက်ပြီး ပန်းအိမ်များစိုက်သည်ကိုသာသိသည်။

ချင်းလင်စံအိမ်ကအမြဲလျှို့ဝှက်သောကြောင့် သူတို့သိပ်မသိချေ။

နောက်ပြီး သူတို့ကမစပ်စုဘဲ ချင်းလင်စံအိမ်ပရောဂျက်ကိုအမြဲယုံကြည်ထားသည်။

အတွင်းရေးမှူးကခေါင်းညိမ့်ပြီး အစီရင်ခံသည်_

"ဟုတ်တယ်.. တောင်ကပြီးသွားပြီ... ဖွင့်တော့မှာ... ချင်းလင်စံအိမ်က နတ်သမီးပုံပြင်တောင်လို့ခေါ်တယ်... ပြီးတော့ နတ်သမီးပုံပြင်တောင်က ထင်မထားလောက်အောင်အံ့ဩစရာကောင်းတယ်''

အတွင်းရေးမှူးကပြောရင်းဆိုရင်း အံ့ဩပုံပေါက်နေသည်။ ထို့နောက် ချင်းလင်စံအိမ်ကြော်ငြာဗီဒီယိုထုတ်ပြီး စွန်းရှန်နှင့်ချန်လီကိုပေးသည်။

ဗီဒီယိုစဖွင့်သည်။

ဗီဒီယိုထဲမှနတ်သမီးပုံပြင်တောင်ကို စွန်းရှန်နှင့်ချန်လီအာရုံစိုက်ထားသည်။

ကြည့်ရင်းကြည့်ရင်း သူတို့နှစ်ယောက်မျက်လုံးမှာအံ့ဩပုံပေါက်လာသည်။

"ချင်းလင်စံအိမ်ဆိုတဲ့အတိုင်းပဲ''

ချန်လီမျက်နှာတွင် လေးစားပုံအပြည့်။

ချင်းလင်စံအိမ်ကတော့ ချင်းလင်စံအိမ်ပါပဲ။

ပရောဂျက်အားလုံး လန့်လောက်စရာချည်း။

စွန်းရှန်လည်း ခေါင်းညိမ့်သဘောတူသည်_

"အံ့ဩစရာကောင်းလိုက်တာ... သူဌေးချင်စတိုင်က အံ့ဩစရာကောင်းတုန်းပဲ''

အတွင်းရေးမှူးက ချက်ချင်းပင်_

"စွန်းရှန်.. ဒီအထဲကအပင်တွေကို သူဌေးချင်လေ့လာပြီးပျိုးထောင်ခဲ့တာဆိုပေမဲ့ ဒီတစ်ခါနတ်သမီးပုံပြင်တောင်ရဲ့အဓိကဒီဇိုင်နာက သူဌေးချင်မဟုတ်ဘူး... ဥက္ကဌကျောက် ကျောက်မိုချင်းနဲ့ ဥက္ကဌလင်း လင်းလန်ဇီပဲ... ပြီးတော့ တချို့ဒီဇိုင်နာလေးတွေပါသေးတယ်... ဗီဒီယိုအဆုံးမှာမှတ်ချက်ပါတယ်''

ထို့ကြောင့် စွန်းရှန်နှင့်ချန်လီအံ့အားသင့်သွားသည်။

သူတို့သိသလောက် ချင်းလင်စံအိမ်နှင့်ချင်းလင်မွေးမြူရေးခြံပရောဂျက်များက သူဌေးချင်လက်ရာဖြစ်သည်။ ဒီတစ်ခါ ကျောက်မိုချင်းနှင့်လင်းလန်ဇီဖြစ်နေမည်ဟုမထင်မိ။

ဒီအမျိုးသမီးနှစ်ယောက်ကိုသူတို့သိသည်။ သူဌေးချင်အမျိုးသမီးနှင့်လက်ရှိချင်းလင်စံအိမ်အထွေထွေမန်နေဂျာပင်။

နတ်သမီးပုံပြင်တောင်မှာ သူဌေးချင်လေ့လာနေသောအပင်နှင့်ခွဲခြားမရသော်လည်း သတင်းက မဆိုး။

ဘာပဲဖြစ်ဖြစ် ခရီးသွားလုပ်ငန်းမှာ သူဌေးချင်ဖန်တီးနိုင်စွမ်းက အကန့်အသတ်ရှိသည်။ အခုချင်းလင်စံအိမ်မှာ ဒီလိုအံ့ဖွယ်ပရောဂျက်မျိုးဖန်တီးနိုင်သူများရှိသေးသောကြောင့် သူဌေးချင်အကူအညီပါရင်တောင် ကောင်းသောကိစ္စပင်။

စွန်းရှန်နှင့်ရှန်လီလည်း ချင်းလင်စံအိမ်စာရင်းသွင်း link ထဲဝင်ပြီး နတ်သမီးပုံပြင်တောင်ပရောဂျက်စာရင်းကိုကြည့်လိုက်သည်။

သို့သော် နှစ်ယောက်သား link ထဲဝင်ကြည့်လိုက်သောအခါ ကြိုတင်စာမျက်နှာတွင်အကြာကြီးပိတ်နေပြီးဝင်မရသောကြောင့် အံ့ဩသွားသည်။

နှစ်ယောက်သား အမှတ်တမဲ့အင်တာနက်ကိုကြည့်လိုက်ကြသည်။ လိုင်းကဘာမှမဖြစ်။ ချင်းလင်စံအိမ်စာမျက်နှာက ဝင်မရခြင်းပင်။

ချင်းလင်စံအိမ်ဆာဗာမှာ အကောင်းဆုံးဖြစ်သော်လည်း တိုးမရ။ link ဝင်သူအရေအတွက်က ထင်မထားလောက်အောင်များနိုင်သည်။

စွန်းရှန်နှင့်ချန်လီက အမှတ်တမဲ့အချင်းချင်းကြည့်လိုက်ကြသည်။

ဒါရုံချန်းယာဉ်လမ်းကြောပျက်ဦးမှာလား?

အခုတလော တခြားနေရာမှာရာသီဥတုအေးလာ၍ အတော်များများက ရုံချန်းတွင်အပန်းဖြေရန်စိတ်ဝင်စားကြသည်။ အခု ချင်းလင်စံအိမ်မှာ ဒီလိုပရောဂျက်မျိုးရှိလာပြီ။

အထူးသဖြင့် ခရီးသည်အများကြီးတည်းခိုနိုင်မည့်တောင်ဖြစ်နေခြင်းပင်။

လိုင်းပေါ်တွင် နတ်သမီးပုံပြင်တောင် link ထဲဝင်နေသူများလည်း နတ်သမီးပုံပြင်တောင်အဓိကစာမျက်နှာမနိုင်တော့ကြောင်းတွေ့ရသည်။

ကျူးယွမ်ယွမ်နှင့်ဝမ်လီလီလည်း အတူတူပင်။ အဓိကစာမျက်နှာမရောက်ခင် အကြာကြီးပိတ်နေသည်။

နှစ်ယောက်သား ၁၂ နာရီမြင်ပြီးရေတွက်ကြည့်ရာ နောက်တစ်နေ့မနက် ၁၂ နာရီဖြစ်သည်။

ထို့ကြောင့် နှိုးစက်ပေးကာ စောစောအိပ်လိုက်ကြသည်။ နောက်တစ်နေ့အိပ်ရာနိုးမှ လက်မှတ်ထယူမည်။

နောက်ပြီး နှိုးစက်ကို ၁၀ မိနစ်စောပေးထားသည်။

"လီလီ.. နှိုးစက်တစ်ခုတည်းပေးလို့မရဘူး! စိတ်ချရအောင် ငါတို့ဖုန်းနဲ့ပါပေးမယ်!''

ကျူးယွမ်ယွမ်ကပြောသည်။

ဝမ်လီလီကခေါင်းညိမ့်ပြီး ဖုန်းယူကာနှိုးစက်ပေးသည်။

နောက်ပြီး နှိုးစက်တစ်ခုပြီးတစ်ခု တစ်မိနစ်ခြားဆက်တိုက်ပေးထားသည်။

ဒီလိုဆို အတိမ်းအစောင်းမရှိ၊ လက်မှတ်မရဘဲမနေ။

အချိန်ကုန်လွန်သွားပြီး ဒုတိယမြောက်နေ့ရောက်လာသည်။

မကြာမီ သတို့သမီးခန်းတွင် နှိုးစက်သံကြားရသည်။

ကျူးယွမ်ယွမ်နှင့်ဝမ်လီလီက နှိုးစက်သံကြားပြီး တပြိုင်တည်းလိုလိုထလိုက်သည်။

စိတ်မကြည်မလင်မရှိဘဲနိုးထခြင်းမှာ ဒါပထမဆုံးဖြစ်မည်။ နတ်သမီးပုံပြင်တောင်လက်မှတ်အကြောင်းသာတွေးနေသောကြောင့်ပင်။

သို့သော် အလောတကြီးထပြီးဖုန်းကိုင်ကာ နတ်သမီးပုံပြင်တောင်စာမျက်နှာ link ထဲဝင်လိုက်သော်လည်း သူတို့ကြောင်သွားသည်။

စာမျက်နှာမှာဝင်မရ၊ ရှေ့တိုးမရ။ သူတို့ဖုန်းနှစ်လုံးစလုံး တန့်နေသည်။

အထူးသဖြင့် စာမျက်နှာတန့်နေသည်က တစ်ခဏလည်းမဟုတ်၊ နှစ်ခဏလည်းမဟုတ်၊ အကြာကြီး။

"ဘာလို့ရပ်နေတာလဲ?''

ဝမ်လီလီ ချက်ချင်းစိတ်လောသွားသည်။

နတ်သမီးပုံပြင်တောင်လက်မှတ်ထဝယ်ဖို့ နှိုးစက်တွေအများကြီးပေးထားရတာ၊ အခုတော့ ဒီစာမျက်နှာကနေ မတက်ဘူးတဲ့လား။

"မြန်မြန်ဝင် မြန်မြန်ဝင်''

ကျူးယွမ်ယွမ်က အချိန်ကြည့်ပြီးစိတ်လောသွားသည်။

စောစောက ၁၀ မိနစ်စောထပြီး စာမျက်နှာထဲအမြန်ဆုံးဝင်ကာလက်မှတ်ယူသည်။

အချိန်လွန်သည်နှင့် ဖုန်းအသီးသီးကိုင်ရင်း စိတ်လောနေကြသော်လည်း ဝင်မရ။

လူတွေဘယ်လောက်များဝင်နေတာလဲ? မဟုတ်ရင် ဒီလောက်ပိတ်မလား?

နောက်ဆုံး သူတို့စိုးရိမ်တကြီးကြည့်နေသည့်အချိန် ဝမ်လီလီဖုန်းနှင့်ဝင်ရသွားသည်။

"ရပြီ''

ဝမ်လီလီအပျော်လွန်သွားသည်။ နတ်သမီးပုံပြင်တောင်လက်မှတ်ကိုအမြန်စာရင်းသွင်းလိုက်သည်။

ကျူးယွမ်ယွမ်လည်း မျှော်လင့်တကြီးလာကြည့်သည်။

သို့သော် ဝမ်လီလီနှိပ်ပြီးပြီးချင်း ရပ်ပြီးအဝိုင်းလည်သွားပြန်သည်။

စက္ကန့်အနည်းငယ်အကြာ ပြန်တက်လာ၏။ ဒီတစ်ခါ စာတစ်ကြောင်းနှင့်:

'စိတ်မကောင်းပါ.. နတ်သမီးပုံပြင်တောင်လက်မှတ်ကုန်သွားပါပြီ'

ဝမ်လီလီ: 'ကျွတ် ကျွတ်'

ကျူးယွမ်ယွမ်: 'ကျွတ် ကျွတ်'

နှစ်ယောက်လုံးကြောင်သွားသည်။

စက္ကန့်ပိုင်းနဲ့ကုန်သွားပြီလား?

သူတို့အများကြီးပြင်ဆင်ထားပေမဲ့ ဘယ်လိုလုပ်သူများနောက်ပါသွားပါလိမ့်?

အခန်း ၁၃၂၀: ကောင်းကင်ကရွေးချယ်သူ!

ကျူးယွမ်ယွမ်ရော ဝမ်လီလီပါစိတ်ပျက်သွားသည်။

ဘာလဲဟ?

ဘာမှမရဘဲနှိုးစက်တွေအများကြီးပေးခဲ့တာ၊ ဘာမှမရဘဲမျှော်လင့်နေခဲ့တာပေါ့။

သူတို့ဝင်ရုံရှိသေး၊ ခဏရပ်ပြီး ပြီးသွားပြီတဲ့။

နှစ်ယောက်သားစိတ်ပျက်လက်ပျက်နှင့် သတို့သမီးခန်းထဲမှထွက်လာသည်။

နတ်သမီးပုံပြင်တောင်လက်မှတ်မရသောကြောင့် ချင်းလင်စံအိမ်ထဲမှာသာလျှောက်လည်ရမည်။

အရင်ဆုံး စျေးဝယ်စင်တာသွားကြသည်။

လည်ပတ်မည်ဖြစ်သောကြောင့် မုန့်၊ အသီးနှင့် ချင်းလင်အားဖြည့်လက်ဖက်ရည်နှစ်ပုလင်းဝယ်ရမည်။

မုန့်နှင့်အသီးက ဗိုက်ပြည့်ပြီး ချင်းလင်အားဖြည့်လက်ဖက်ရည်က အားပြည့်နိုင်သည်။ ခရီးသွားရင် ဒါတွေကမရှိမဖြစ်။ သူတို့ပိုက်ဆံရှင်းမည်အပြုတွင် ကောင်တာမှာလူအများကြီးပြည့်နေသည်ကိုတွေ့ရသည်။

နောက်ပြီး ခပ်ဝဝလူတစ်ယောက်ခြေထောက်နားတွင် ပစ္စည်းတချို့တောင်လိုပုံနေသည်ကိုသတိထားမိသည်။

အမျိုးသမီးနှစ်ယောက် ကြောင်သွားသည်။

ဒီလူက ခရီးသွားမှာလား၊ လက္ကားဝယ်မှာလား?

ဒီလိုလူတွေလည်း အများကြီးရှိသည်။ တစ်ယောက်က စျေးအကြီးဆုံးပစ္စည်းတွေရွေးဝယ်သည်။ ငွေရှင်းချိန်တွင် ကောင်တာမှာကတ်နှင့်ရှင်းသည်။

ကျူးယွမ်ယွမ် ချက်ချင်းသိချင်စိတ်ဖြစ်သွားသည်။ သူမဘေးနားတွင်လည်း အိတ်ကြီးအိတ်ငယ်ဆွဲထားသောလူငယ်လေးတစ်ယောက်ရှိ၍_

"မောင်လေး.. သူတို့ဘာတွေလုပ်နေတာလဲ? ဘာလို့ဒီလောက်အများကြီးဝယ်ကြတာလဲ?''

ကျူးယွမ်ယွမ်ကိုမြင်ပြီး လူငယ်လေးမျက်လုံးကျယ်သွားသည်။ ဘာပဲဖြစ်ဖြစ် ကိုယ်လုံးကိုယ်ပေါက်ကောင်းကောင်းနှင့်ကြည့်ကောင်းသောမျက်နှာပိုင်ရှင်မျိုးက ဓာတ်ပုံမော်ဒယ်ဖြစ်နိုင်သည်။ လူအများစုမျက်လုံးထဲတွင် အလှလေးပင်။

အလှလေးက လာမေးသောကြောင့် လူငယ်ကအားတက်သရောရှင်းပြသည်_

"ချင်းလင်ရှုမျှော်ခင်းထဲမှာ နတ်သမီးပုံပြင်တောင်ပရောဂျက်ဖွင့်လိုက်ပြီမလား?''

"အွန်လိုင်းလက်မှတ်ပြည့်သွားပေမဲ့ ချင်းလင်စံအိမ်မှာလည်း နတ်သမီးပုံပြင်တောင်လက်မှတ်မဲနှိုက်ပေးတယ်''

"မဲနှိုက်ပေးတာ သိတယ်မလား? အရင်တုန်းကချင်းလင်စံအိမ်မှာလုပ်ဖူးတယ်လေ... ယွမ် ၁၀၀ သုံးရင် မဲနှိုက်ခွင့်ရပြီး နတ်သမီးပုံပြင်တောင်လက်မှတ်အလကားရမယ်''

"ဒါပေမဲ့ မဲပေါက်နိုင်ခြေရှိတယ်... သီအိုရီအရတော့ မဲများများနှိုက်လေလေ ပေါက်နိုင်ခြေများလေလေပဲ... ပိုက်ဆံမရှားရင်ပေါ့... မဲပေါက်ရင် ဝယ်ထားသမျှတွေမကြည့်ဘဲ ထွက်ရင်ထွက်သွားနိုင်တယ်''

"အဲဒါကြောင့် အများကြီးဝယ်ကြတာ... လျှောက်လည်ချင်လို့လေ''

ကျူးယွမ်ယွမ်နှင့်ဝမ်လီလီ မျက်စိကျယ်သွားပြန်သည်။

နတ်သမီးပုံပြင်တောင်နှင့်လုံးလုံးလွဲပြီဟု သူတို့ထင်ခဲ့သည်။ ဒီလိုနည်းရှိမှန်းမသိ။

"သော*က်.. နောက်နေတာလား? မဲနှိုက်တာ အကြိမ် ၃၀၀ ကျော်ပြီ... မပေါက်သေးဘူးလား?''

ဝတုတ်က စိတ်ပျက်လက်ပျက်အော်သည်။

ထို့နောက် ပစ္စည်းဝယ်ရန်စျေးဝယ်စင်တာထဲဝင်သွားပြန်သည်။ မဲမပေါက်မချင်း သူမရပ်။

သူဘာလို့ဒီလောက်ကံဆိုးမှန်းမသိ။ အရင်တစ်ခါအကြီးအကဲစားပွဲမဲနှိုက်တုန်းကလည်း ဆုတစ်ဆုတောင်မရခဲ့။

ကမ္ဘာ့နံပါတ်တစ်ဖရဲသီးဘုရင်မဲနှိုက်တုန်းကတောင် အကြိမ်ကြိမ်ဆက်နှိုက်ပြီးမပေါက်ခဲ့။

ဝတုတ်စကားကြောင့် ကျူးယွမ်ယွမ်နှင့်ဝမ်လီလီက စိတ်လှုပ်ရှားစွာနှင့်ငွေရှင်းလိုက်သည်။ သူတို့ဝယ်ထားတာ သိပ်မများသောကြောင့်ပင်။

ကောင်တာမှ_

"စုစုပေါင်း ၂၀၄ ယွမ်ကျပါတယ် အလှလေး... မဲနှစ်ကြိမ်နှိုက်လို့ရပါတယ်... မဲပေါက်ရင် နတ်သမီးပုံပြင်တောင်လက်မှတ်အလကားရမှာပါ''

ကောင်တာမှညွှန်ကြားချက်အတိုင်း ကျူးယွမ်ယွမ်က QR ကုဒ်စကင်န်ဖတ်လိုက်သည်။

စောစောကလူငယ်ကကြည့်ပြီးရယ်ကာ_

"အလှလေးတို့.. မဲနှစ်ခုတည်းပေါက်ဖို့ခက်တယ်... ပြီးရင် ကျွန်တော်အများကြီးနှိုက်ပြီး မဲတစ်ခုပေးမယ်''

သူက ကိုယ်ရည်သွေးပြခြင်းပင်။ မိန်းကလေးတစ်ယောက်ကလာပတ်သက်ရင် ယောက်ျားတိုင်းညစ်ညစ်ပတ်ပတ်အတွေးရှိတတ်သည်။

"ဂုဏ်ယူပါတယ်.. နတ်သမီးပုံပြင်တောင်လက်မှတ်ရပါတယ်!''

"ဂုဏ်ယူပါတယ်.. နတ်သမီးပုံပြင်တောင်လက်မှတ်ရပါတယ်!''

ကောင်တာတွင် ကျူးယွမ်ယွမ်မဲနှိုက်သည်နှင့်အသံနှစ်သံထွက်လာသည်။

ထိုအသံကြောင့် ပတ်ဝန်းကျင်မှာတိတ်ဆိတ်သွားပြီး လူတိုင်းအသက်ရှူသံကြားရလောက်သည်။

လူငယ် တန်းရှက်သွား၏။

စောစောကပဲ မဲပေါက်ဖို့မဖြစ်နိုင်ဘူးပြောထားတာလေ၊ ဒါကဘာလဲ? နှစ်မဲလုံးပေါက်တာလား?

စျေးဝယ်စင်တာထဲဝင်လာသောဝတုတ်လည်း အသံကြားသည်။ သူကတအံ့တဩရပ်ပြီး ပါးစပ်အဟောင်းသားနှင့်စိုက်ကြည့်နေသည်။

ထိုအချိန်တွင် သူ့မှာကံကြမ္မာနတ်ဘုရားစွန့်ပစ်ထားသလိုခံစားလိုက်ရသည်။ စွန့်ပစ်ခံရရုံသာမက လှောင်ပြောင်ပါခံရသည်။

မဟုတ်ရင် သူများအလွယ်တကူရတဲ့အချိန်မှာ သူကအကြိမ် ၃၀၀ ကျော်ရှုံးနေမလား?

အနားဝန်းကျင်မှခရီးသည်များလည်း အံ့ဩပြီးအားကျကုန်သည်။

ဘယ်လောက်ကောင်းတဲ့ကံလဲ?

မဟုတ်ရင် နှစ်ခါနှိုက် နှစ်ခါပေါက်မလား?

လုပ်ကြံထားသည်ဟု ဘယ်သူမှသံသယမရှိကြ။ ချင်းလင်စံအိမ်အတွက်မလိုအပ်သလို လက်ရှိသူ့အတိုင်းအတာအရ နာမည်ပျက်ခံမည်မဟုတ်ပေ။

အထူးသဖြင့် အလှလေးနှစ်ယောက်ကို နတ်သမီးပုံပြင်တောင်ပေါ်တက်ခွင့်ပေးချင်ရင် ဒီအတိုင်းသီးသန့်ပေးလိုက်ရုံပင်။

သူတို့ဝင်ခွင့်ရမရ ဘယ်သူသိမလဲ?

အလှလေးများကိုကြည့်ပြီး ခရီးသည်များစိတ်ကြည်မည်။

ဒီလိုလူမြင်ကွင်းမှာ အကွက်ရွှေ့စရာမလို။

ဒီအလှလေးများကို နတ်ဘုရားစောင်မသည်ဟုသာပြောရတော့မည်။

ကျူးယွမ်ယွမ်မှာ တအောင့်ကြာမှသတိဝင်ပြီး စိတ်လှုပ်ရှားစွာနှင့် ဝမ်လီလီကိုဖက်ကာ_

"လီလီ.. ငါပေါက်တယ်.. နှစ်မဲတောင်ပေါက်တာ''

"ဒါဆို ပန်းအိမ်အစုအဝေးကိုသွားလို့ရပြီလား?''

ဒီလိုအံ့ဩစရာမျိုးဖြစ်လာမည်ဟု ဝမ်လီလီမထင်မိ။

နှစ်ယောက်သားဝမ်းသာလွန်း၍ လက်ချင်းဆုပ်ကိုင်ကာ ခုန်ပေါက်ကြသည်။ နတ်သမီးပုံပြင်တောင်က ဆွဲဆောင်မှုရှိလွန်းသောကြောင့်ပင်။ ကြော်ငြာဗီဒီယိုကတင် စိတ်ဝင်စားစရာကောင်းလှပြီ။ စိတ်မလှုပ်ရှားဘဲမနေနိုင်။

သို့ရာတွင် ကိုယ်လုံးကိုယ်ပေါက်ကောင်းကောင်းနှင့်ခုန်ပေါက်နေသောမိန်းမလှများကြောင့် အနားရှိအမျိုးသားခရီးသည်များအာရုံစိုက်မိနေကြသည်။

အမေးခံရသောလူငယ်မှာ ရေပိုငတ်လာပြီး စကားဝင်ရောချင်စိတ်ပေါက်လာ၏။