အခန်း (၁၁-၁၂)
Vol. 2 Ch. 11-12
အခန်း (၁၁)- ကုန်သွယ်ရေးယာဉ်တန်း
“အဲ့ဒီဂိုဏ်းတွေ အားလုံးက ကျောက်မိသားစု ဘာတွေးနေလဲ ဆိုတာကို သိကြတယ်...”
“ကျောက်မိသားစု ကလည်း အဲ့ဒီဖြောင့်မတ်တဲ့ ဂိုဏ်းတွေ ဘာတွေးနေလဲ ဆိုတာကို သတိထားမိတယ်...”
“ငါတို့ ကျောက်မိသားစု အပေါ် အရေးယူမှု မလုပ်ရသေးတဲ့ အကြောင်းရင်းက နာမည်ကောင်းရှိပြီး ဖြောင့်မတ်တဲ့ ဂိုဏ်းတစ်ခု အဖြစ် သူတို့ရဲ့ ဂုဏ်သတင်းကို စိုးရိမ်နေလို့ပဲ...”
“ဒါပေမဲ့ သွေးသဲကန္တာရ ထဲကို ဝင်သွားတာနဲ့ ကိစ္စတွေက ရှုပ်ထွေးသွားနိုင်တယ်...”
“တကယ်လို့ သူတို့မှာ အသိတရားလေး ကျန်သေးရင် လူကိုပဲ ခေါ်သွားလောက်ပေမဲ့ အရာအားလုံး အဆင်ပြေချောမွေ့ဖို့အတွက် အကြမ်းဖက်တဲ့ နည်းလမ်းတွေကို အသုံးပြုလာမှာကို ငါ စိုးရိမ်တယ်...”
လျူချီရီ ၏ စကားများကို နားထောင်ပြီးနောက် ချန်လော့မှာ နက်ရှိုင်းစွာ တွေးတောနေမိသည်။
ထို့ကြောင့် ဤခရီးစဉ်သည် အတော်လေး အန္တရာယ်များပုံ ရသည်။
သို့သော် အကယ်၍ သူတို့သည် ကျောက်မိသားစု ၏ အဖွဲ့နှင့် အတူ မထွက်ခွာပါက အခြား ကုန်သွယ်ရေး ယာဉ်တန်းကို စောင့်ဆိုင်းရမည် သို့မဟုတ် သွေးသဲကန္တာရ ကို တစ်ယောက်တည်း ဖြတ်ကျော်ရမည် ဖြစ်၏။
သို့သော် နောက်ထပ် ကုန်သွယ်ရေး ယာဉ်တန်းသည် ဘယ်တော့ ရောက်လာမည်ကို မည်သူ သိနိုင်မည်နည်း။ အကယ်၍ တစ်ယောက်တည်း ထွက်သွားမည် ဆိုပါက အန္တရာယ်သည် ပို၍ပင် ကြီးမားနိုင်ဖွယ် ရှိသည်။
တစ်ခဏမျှ စဉ်းစားပြီးနောက် ချန်လော့က ပြုံးလိုက်၏။
“စိတ်မပူပါနဲ့ ဖြောင့်မတ်တဲ့ လမ်းစဉ် သက်သက်ပဲလေ ၊ ဘာတွေ ကြီးကျယ်နေလို့လဲ...”
“ငါက သွေးသဲကန္တာရ ကို သွားဖို့တောင် ရဲနေပြီပဲ သူတို့ကို ဘာလို့ ကြောက်နေရမှာလဲ...”
“ပြီးတော့ ငါ မနိုင်ရင်တောင် ထွက်ပြေးလို့ ရတာပဲ...”
ချန်လော့၏ စကားများကို ကြားပြီးနောက် လျူချီရီ မှာ မအောင့်နိုင်ဘဲ ရယ်မောလိုက်တော့သည်။
နောက်ထပ် နာရီဝက်ခန့် အရက်သောက်ပြီးနောက် လျူချီရီ သည် မြေပြင်ပေါ်သို့ နောက်တစ်ကြိမ် လဲကျသွားပြန်၏။
ဤတစ်ခေါက်တွင် စားပွဲထိုးသည် ချန်လော့ကို ဖော်ရွေသော အကြည့်ဖြင့် မကြည့်တော့ချေ။
ချန်လော့သည် အိတ်ကပ်ထဲမှ ငွေစများကို အားနာနာဖြင့် ထုတ်ယူကာ အကူအညီမဲ့စွာ သက်ပြင်းချလိုက်သည်။
တကယ်တော့ သူ၏ ကိုယ်ရည်ကိုယ်သွေးအရ ဆိုလျှင် အရက်ဖိုး ပေးရန် မလိုအပ်ခဲ့ပေ။
မည်သို့ပင်ဆိုစကောမူ၊ သူသည် လျူချီရီ ကို မူးအောင် တိုက်ခဲ့ပြီးဖြစ်ရာ၊ သူ့ အနေဖြင့် ထွက်ပြေးသွားပြီး လျူချီရီ နိုးလာသောအခါမှသာ စားပွဲထိုး၏ ငွေတောင်းခံမှုများကို ရင်ဆိုင်ရန် ချန်ထားခဲ့သင့်သည်။
သို့သော် အခြားသူ တစ်ယောက်၏ အမိုးအောက်သို့ ရောက်နေချိန်တွင် သင့်အနေဖြင့် ခေါင်းငုံ့ရုံမှလွဲ၍ အခြား ရွေးချယ်စရာ မရှိပေ။
ကုန်သွယ်ရေး ယာဉ်တန်းထဲသို့ ဝင်ရန် လျူချီရီ ၏ ထောက်ခံချက်ကို သူ လိုအပ်နေသည်။ ထို့ကြောင့် သူ့အနေဖြင့် ဤကဲ့သို့ တိရစ္ဆာန်ဆန်သော အပြုအမူမျိုးကို လုပ်လို့မဖြစ်ချေ။
“အမြတ်လေးတွေအတွက် အမြတ်ကြီးကို အဆုံးရှုံး မခံနိုင်ဘူး...”
ထိုသို့ ပြောလိုက်ရင်း သူသည် သွားကြိတ်ကာ အရက်ဖိုး ရှင်းလိုက်၏။
တစ်ခါတစ်ရံတွင် လူတစ်ယောက်၏ ကြင်နာမှုနှင့် ဖြောင့်မတ်မှု ဆိုသည်မှာ သူတို့၏ စစ်မှန်သော သဘာဝကြောင့် မဟုတ်ဘဲ ပိုမို ကြီးမားပြီး ပိုမို များပြားသော အရာတစ်ခုကို ရှာဖွေနေခြင်းကြောင့် ဖြစ်လေသည်။
…
နောက်တစ်နေ့ နံနက်။
ချန်လော့သည် ကျောက်မိသားစု ၏ အိမ်တော်သို့ မနက်စောစော ရောက်ရှိလာခဲ့သည်။
လျူချီရီ ၏ စီစဉ်ပေးမှုများကြောင့် ကိစ္စများက အတော်လေး အဆင်ပြေ ချောမွေ့စွာ တိုးတက်သွားခဲ့၏။
သူသည် စာရင်းတစ်ခုကို ဖြည့်စွက်ကာ သူ၏ အမည်နှင့် ကျင့်ကြံမှု အဆင့်ကို ရေးသားခဲ့သည်။ ဂိုဏ်းနေရာတွင်မူ ချန်လော့သည် “သီးခြားကျင့်ကြံသူ” ဟု ရေးသားခဲ့လေသည်။
ဖောင်ဖြည့်ပြီးနောက် ချန်လော့ကို ကျောက်မိသားစု ၏ အနောက်ဘက် ခြံဝင်းထဲသို့ ခေါ်ဆောင်သွားခဲ့သည်။
သို့သော် ကျောက်မိသားစု ၏ အနောက်ဘက် ခြံဝင်းထဲသို့ ဝင်ရောက်သွားသည်နှင့် တစ်ပြိုင်နက် ချန်းလော့မှာ မှင်တက်သွား၏။
ကျောက်မိသားစု ၏ ကျယ်ဝန်းသော ခြံဝင်းမှာ လူများဖြင့် အပြည့်အသိပ် ဖြစ်နေပြီး လူတစ်ထောင်နီးပါးခန့် ထိုနေရာတွင် စုဝေးနေကြသည်။
“မင်းလည်း ကုန်သွယ်ရေး ယာဉ်တန်းကို အစောင့်လိုက်ဖို့ လာတာလား...”
အရပ်ရှည်ရှည် လူတစ်ယောက်က ချန်လော့ကို ပွတ်တိုက်မိပြီး မေးလိုက်၏။
ချန်လော့သည် ထိုလူကို ကြည့်ကာ ခေါင်းညိတ်ပြလိုက်ပြီးနောက် လူတစ်ထောင်နီးပါး ပါဝင်သော ဧရာမ အဖွဲ့ကြီးကို ကြည့်လိုက်သည်။
“ဒီလူတွေ အားလုံးကလည်း...”
“ဟုတ်တယ် သူတို့အားလုံး ကုန်သွယ်ရေး ယာဉ်တန်းကို အစောင့်လိုက်ဖို့ လာကြတာ...”
ဤစကားကို ကြားပြီးနောက် ချန်လော့မှာ အတန်ကြာ တိတ်ဆိတ်သွားပြီး ဘာပြောရမှန်း မသိအောင် ဖြစ်သွား၏။
“ဒါပေမဲ့ အရင်က ငါ ဒီနေရာကို လာတုန်းက သီးသန့် လူတစ်ယောက်က ထောက်ခံပေးတဲ့ သူတွေပဲ ဝင်ခွင့်ရှိတယ်လို့ ပြောခဲ့တာ မဟုတ်ဘူးလား...”
ဤစကားကို ကြားလိုက်ရသောအခါ အရပ်ရှည်ရှည် ကျင့်ကြံသူက ရယ်မောလိုက်သည်။
“ဟုတ်တယ် လူတိုင်းမှာ ကိုယ်ပိုင် ထောက်ခံချက် ရှိကြတယ်...”
“ဟင်...” ချန်လော့ခမျာ မှင်တက်သွား၏။
လူတစ်ထောင်ကျော်လုံးလား...အားလုံးမှာ ကိုယ်ပိုင် ထောက်ခံချက် ရှိကြတယ်ပေါ့
ချန်လော့၏ နားမလည်နိုင်သော အမူအရာကို မြင်သောအခါ အရပ်ရှည်ရှည် လူက ဆက်လက် ရှင်းပြသည်။
“ဟိုမှာရှိတဲ့ ကျင့်ကြံသူယန် လေ ငါ့ကို သူက ထောက်ခံပေးထားတာ သူကိုတော့ ဟိုဘက်က ကျင့်ကြံသူကျန်း က ထောက်ခံပေးထားပြီး ကျင့်ကြံသူကျန်း ကိုကျတော့ ဟိုဘက်က ကျင့်ကြံသူချန် က ထောက်ခံပေးထားတာ...”
အရပ်ရှည်ရှည် လူက စကားပြောနေရင်း ကျင့်ကြံသူ အယောက် ၂၀ နီးပါးကို ချန်လော့အား မိတ်ဆက်ပေးလိုက်ရာ ချန်လော့မှာ ခေါင်းမူးမတတ် ဖြစ်သွားတော့၏။
“ဒီနေရာက လူအများစုက သီးခြားကျင့်ကြံသူ တွေချည်းပဲ သီးခြားကျင့်ကြံသူ တွေက ဂိုဏ်းတွေရဲ့ အကာအကွယ် မရှိကြတဲ့အတွက် များသောအားဖြင့် တစ်ယောက်ကိုတစ်ယောက် ကူညီလေ့ ရှိကြတယ်...”
“ဒီတစ်ကြိမ် ကျောက်မိသားစု က ကုန်သွယ်ရေး ယာဉ်တန်း အစောင့်လိုက်ဖို့ လူအကန့်အသတ်မရှိ စုဆောင်းတယ်လေ သီးခြားကျင့်ကြံသူ တွေမှာက ဝိညာဉ်ကျောက်တုံး ရှာဖို့ အခွင့်အရေး သိပ်မများဘူး...”
“ဒါကို မြင်တော့ လူတိုင်းက သူတို့သိတဲ့ လူတွေကို ခေါ်လာကြပြီး ပြင်ဆင်ဖို့ အချိန် အများကြီး ရထားတဲ့အတွက် တဖြည်းဖြည်းနဲ့ လူတစ်ထောင်နီးပါးလောက် ရှိတဲ့ အဖွဲ့ကြီး ဖြစ်သွားတော့တာပဲ...”
ဤစကားများကို ကြားပြီးနောက် ချန်လော့သည် သူ၏ ရင်ထဲတွင် စူးရှသော နာကျင်မှုကို ခံစားလိုက်ရသည်။
ဒါဆို ကိုယ်ပိုင် ထောက်ခံချက် ဆိုတာ ဘယ်သူမဆို အတည်ပြုပေးလို့ ရတယ် ဆိုတဲ့ သဘောပေါ့....
အဲဒါဆို လျူချီရီ ကို မျက်နှာချိုသွေးဖို့အတွက် ရက်ပေါင်းများစွာနဲ့ ပိုက်ဆံတွေ အများကြီး သုံးခဲ့ရတာ ဘာအဓိပ္ပာယ် ရှိတော့မှာလဲ.....
“တကယ်ကို အရှုံးကြီး ရှုံးခဲ့ရတာပဲ...”
“မဖြစ်ဘူး နောက်မှ အရက်ဖိုးတွေ အားလုံး ပြန်ရအောင် အခွင့်အရေး တစ်ခု သေချာပေါက် ရှာရမယ်...”
သက်ပြင်းချလိုက်ရင်း ချန်လော့သည် ခြံဝင်းအတွင်းရှိ အခြား ကျင့်ကြံသူများကို ကြည့်လိုက်၏။
ဈေးကွက်အတွင်းရှိ လူတစ်ထောင်နီးပါးအနက် ၉၀ ရာခိုင်နှုန်းကျော်မှာ ချန်လော့ကဲ့သို့ပင် ချီသန့်စင်ခြင်းအဆင့် တွင် ရှိကြသည်။
ကျန်ရှိနေသော အဖွဲ့တွင်မူ အခြေခံတည်ဆောက်ခြင်းအဆင့် ကျင့်ကြံသူ တစ်ရာခန့် ပါဝင်လေသည်။
“ကျင့်ကြံသူ တစ်ထောင်နီးပါး ဆိုတော့ ကျောက်မိသားစု က ဒီတစ်ကြိမ် ပိုက်ဆံတွေ အများကြီး အကုန်အကျ ခံထားတာပဲ...”
မည်သို့ပင်ဆိုစေ ပုံမှန်အားဖြင့် ပြောရလျှင် ကုန်ပစ္စည်း အနည်းငယ်သာ သယ်ဆောင်လာသော ကုန်သွယ်ရေး ယာဉ်တန်း တစ်ခုအတွက် လူတစ်ရာခန့်သာ လိုအပ်မည် ဖြစ်သည်။
ဤတစ်ကြိမ်တွင် ကျောက်မိသားစု သည် လူတစ်ထောင်နီးပါးကို စုစည်းခဲ့၏။
လက်ရှိ ပေါက်ဈေးများအရ ချီသန့်စင်ခြင်းအဆင့် ကျင့်ကြံသူ တစ်ယောက်သည် ကုန်ပစ္စည်းများ သယ်ယူပို့ဆောင်ရန်အတွက် ဝိညာဉ်ကျောက်တုံး ၅ တုံးမှ ၁၀ တုံးခန့် တောင်းဆိုမည် ဖြစ်သည်။
အခြေခံတည်ဆောက်ခြင်းအဆင့် ကျင့်ကြံသူများအတွက် ဈေးနှုန်းမှာ ပိုမို မြင့်မားမည် ဖြစ်ပြီး ဝိညာဉ်ကျောက်တုံး ၂၀ ခန့်မှ စတင်မည် ဖြစ်၏။ သို့သော် အခြေခံတည်ဆောက်ခြင်းအဆင့် နှောင်းပိုင်း ကျင့်ကြံသူများအတွက်မူ ဈေးနှုန်းမှာ ဝိညာဉ်ကျောက်တုံး ၅၀ အထိ မြင့်တက်သွားနိုင်သည်။
ဤတွက်ချက်မှုအရ ကျောက်မိသားစု သည် ဤခရီးစဉ်အတွက် ဝိညာဉ်ကျောက်တုံး ၅,၀၀၀ မှ ၆,၀၀၀ အထိ အနည်းဆုံး ပေးချေရမည် ဖြစ်သည်။
“ကျောက်မိသားစု က ကျောက်မန် ကို ချန်ရှင်းဂိုဏ်း ဆီ ပို့ဖို့အတွက် တကယ်ကို အားထုတ်ထားပုံ ရတယ်...”
သို့သော်လည်း အကယ်၍ ကျောက်မန် သာ ချန်ရှင်းဂိုဏ်း သို့ အမှန်တကယ် ဘေးကင်းစွာ ရောက်ရှိသွားပြီး မိစ္ဆာနှလုံးသား အဆိပ်မွေးမြူခန္ဓာ ၏ ကျင့်ကြံခြင်း နည်းလမ်းကို ရရှိသွားပါက…
ထိုအခါ သူမသည် အနာဂတ်တွင် အနည်းဆုံး နတ်ဝိညာဉ်အဆင့် ကျင့်ကြံသူ တစ်ယောက် ဖြစ်လာမည်ဟု ဆိုလိုသည်။
နတ်ဝိညာဉ်အဆင့် ကျင့်ကြံသူ တစ်ယောက်၏ တန်ဖိုးမှာ ဝိညာဉ်ကျောက်တုံး ထောင်ဂဏန်း အနည်းငယ်ဖြင့် ရရှိနိုင်သည့် အရာများထက် များစွာ ပိုမို ကြီးမားလှ၏။
ဝိညာဉ်ကျောက်တုံး သောင်းဂဏန်း သို့မဟုတ် သိန်းဂဏန်းပင်လျှင် နတ်ဝိညာဉ်အဆင့် ကျင့်ကြံသူ တစ်ယောက်ကို ရရှိရန် လုံလောက်မည် မဟုတ်ပေ။
ထို့ကြောင့် ယေဘုယျအားဖြင့် ဤအစီအစဉ်သည် တကယ်တော့ အတော်လေး တန်ကြေးရှိလေသည်။
ဤအကြောင်းကို တွေးတောနေစဉ် မလှမ်းမကမ်းမှ လူတစ်စု ပေါ်လာသည်ကို ချန်လော့ တွေ့လိုက်ရ၏။
သူတို့ သွားရာလမ်းတစ်လျှောက် ကျင့်ကြံသူများက အလျင်အမြန် လမ်းဖယ်ပေးကြသည်။
ထိုလူစုထဲတွင် ချန်လော့သည် ရင်းနှီးနေသော အရိပ်တစ်ခုကိုလည်း တွေ့လိုက်ရပြီး ထိုသူမှာ တခြားသူ မဟုတ်ဘဲ ကျောက်မိသားစု ၏ အိမ်တော်ထိန်း လျူချီရီ ပင် ဖြစ်သည်။
လျူချီရီ က လူတစ်ယောက်၏ အနောက်မှ အလျင်စလို မရှိဘဲ လျှောက်လာသည်ကို တွေ့လိုက်ရပြီး ၊ သူ့အရှေ့မှ လျှောက်လာသူမှာ ကျောက်မိသားစု ၏ ခေါင်းဆောင် ဖြစ်သည်မှာ သေချာသည်။
“ရွှေမြုတေအဆင့်...”
ချန်လော့သည် တစ်ဘက်လူ၏ ကျင့်ကြံမှု အဆင့်ကို တစ်ချက်ကြည့်ရုံဖြင့် သိနိုင်သော်လည်း သူ အံ့အားသင့်မသွားခဲ့ပေ။
မည်သို့ပင်ဆိုစေ ကျောက်မိသားစု မှာ ကျင့်ကြံသူ မိသားစု တစ်ခု ဖြစ်သဖြင့် ရွှေမြုတေအဆင့် ခေါင်းဆောင် တစ်ယောက် ရှိနေခြင်းက အံ့သြစရာ မဟုတ်ချေ။
ချန်လော့ကို အမှန်တကယ် အံ့အားသင့်စေခဲ့သည်မှာ သူ၏ ဘေးနားရှိ ကျင့်ကြံသူ အနည်းငယ်ပင် ဖြစ်သည်။
စုစုပေါင်း လူငါးယောက် ရှိပြီး အားလုံးမှာ ရွှေမြုတေအဆင့် များ ဖြစ်ကြ၏။
ကျောက်မိသားစု ၏ ခေါင်းဆောင်က ခြံဝင်း၏ အလယ်သို့ လျှောက်သွားကာ စုဝေးနေသော ကျင့်ကြံသူများကို တစ်ချက် ကြည့်လိုက်ပြီး အပိုစကားများ မဆိုတော့ပေ။
“ငါက ကျောက်မိသားစု ရဲ့ ခေါင်းဆောင် ကျောက်မင်သယ် ဖြစ်ပြီး ဒီကုန်သွယ်ရေး ယာဉ်တန်း ရဲ့ စီစဉ်သူလည်း ဖြစ်တယ်...”
“နောက်တစ်ဆင့် အနေနဲ့ မင်းတို့ကို အဖွဲ့ ၁၂ ဖွဲ့ ခွဲပြီး မတူညီတဲ့ ကုန်သွယ်ရေး လမ်းကြောင်းတွေကနေ သွေးသဲကန္တာရ ကို ဖြတ်ပြီး ကုန်ပစ္စည်းတွေကို အစောင့်အရှောက်နဲ့ အရိပ်မြို့တော် ထိ ရောက်အောင် ပို့ဆောင်ပေးရမယ်...”
“ကျောက်မိသားစု က မင်းတို့ ဖောင်ပေါ်မှာ ဖြည့်ထားတဲ့ ခွန်အားပေါ် မူတည်ပြီး ဝိညာဉ်ကျောက်တုံး တွေကို ခွဲဝေပေးမယ် ဆုကြေးရဲ့ တစ်ဝက်ကို မင်းတို့ မထွက်ခွာခင် ကြိုတင် ပေးချေသွားမှာ ဖြစ်ပြီး ကျန်တဲ့ တစ်ဝက်ကိုတော့ အရိပ်မြို့တော် ကို ရောက်ပြီးမှ ရယူနိုင်တယ်...”
“တကယ်လို့ အခု နောက်ဆုတ်ချင်တဲ့သူ ရှိရင် မသွားချင်တော့ရင် ဒီအတိုင်း ထွက်သွားလို့ ရပါတယ်...”
ထိုသို့ ပြောပြီးနောက် သူသည် အချိန်မဖြုန်းတော့ဘဲ နာမည်များကို စတင် ဖတ်ပြတော့၏။
“လီချန် ချီသန့်စင်ခြင်းအဆင့် ပဉ္စမအဆင့် ဆုကြေး ဝိညာဉ်ကျောက်တုံး ၇ တုံး ကြိုတင်ငွေ ၃ တုံး ကုန်သွယ်ရေး ယာဉ်တန်း နံပါတ်တစ်...”
“ကျန်းဝူ ချီသန့်စင်ခြင်းအဆင့် တတိယအဆင့် ဆုကြေး ဝိညာဉ်ကျောက်တုံး ၅ တုံး ကြိုတင်ငွေ ၂ တုံး ကုန်သွယ်ရေး ယာဉ်တန်း နံပါတ်သုံး...”
“ချန်းယွီရူ ချီသန့်စင်ခြင်းအဆင့် အဋ္ဌမအဆင့် ဆုကြေး ဝိညာဉ်ကျောက်တုံး ၉ တုံး ကြိုတင်ငွေ ၄ တုံး ကုန်သွယ်ရေး ယာဉ်တန်း နံပါတ်တစ်...”
…
ကျောက်မိသားစု ဝင်များမှာ နာမည်များကို ခေါ်ဆိုနေကြပြီး ၊ ကျင့်ကြံသူများသည် သူတို့၏ ကိုယ်ပိုင် ဝိညာဉ်ကျောက်တုံး များကို ရယူရန် ရှေ့သို့ အဆက်မပြတ် ထွက်လာကာ ကုန်သွယ်ရေး ယာဉ်တန်းဆီသို့ ဦးတည်သွားကြ၏။
“ချန်လော့ ချီသန့်စင်ခြင်းအဆင့် နဝမအဆင့်ရဲ့ အထွတ်အထိပ် ဆုကြေး ဝိညာဉ်ကျောက်တုံး ၂၀ ကြိုတင်ငွေ ၁၀ တုံး ကုန်သွယ်ရေး ယာဉ်တန်း နံပါတ်ခုနစ်...”
ချန်လော့သည် သူ၏ ကိုယ်ပိုင် နာမည်ကို ကြားလိုက်ရသောအခါ မှင်တက်သွားသည်။
အနီးအနားတွင် ရပ်နေသော ကျင့်ကြံသူများပင်လျှင် သူ့ကို အနည်းငယ် စူးစမ်းလိုစိတ်ဖြင့် ကြည့်လိုက်ကြ၏။
ချီသန့်စင်ခြင်းအဆင့် နဝမအဆင့်ရဲ့ အထွတ်အထိပ် က ဝိညာဉ်ကျောက်တုံး ၂၀ လား..
ဤဈေးနှုန်းသည် အခြေခံတည်ဆောက်ခြင်းအဆင့် ကနဦးပိုင်း ကျင့်ကြံသူ တစ်ယောက်၏ ဈေးနှုန်းနှင့် တူညီနေ၏။
ဈေးနှုန်းမှာ ဖောင်းပွနေသော်လည်း အခြား ကျင့်ကြံသူများသည် ဘာမှ မပြောကြသလို မည်သူကမှ ကန့်ကွက်ခြင်း မရှိကြပေ။
အဘယ်ကြောင့်ဆိုသော် ကျင့်ကြံသူတစ်ဦးမှ ရရှိသော ဝိညာဉ်ကျောက်တုံး များသည် သူတို့၏ ကိုယ်ပိုင် တန်ဖိုးနှင့် ကိုက်ညီသည် ဖြစ်စေ၊ မကိုက်ညီသည် ဖြစ်စေ သူတို့နှင့် သိပ်မသက်ဆိုင်ကြောင်း ရှင်းလင်းစွာ နားလည်ထားသောကြောင့် ဖြစ်သည်။
အကယ်၍ သူတို့သည် မတ်တတ်ရပ်ကာ ကန့်ကွက်မည် ဆိုလျှင်ပင် အများဆုံး အနေဖြင့် သူ၏ ဈေးနှုန်းကို ပုံမှန်အတိုင်း ပြန်ဖြစ်သွားစေရုံသာ ရှိပြီး သူတို့အတွက် မည်သည့် အကျိုးကျေးဇူးမျှ ရရှိမည် မဟုတ်ပေ။
ထို့အပြင် ထိုသို့သော ချဉ်းကပ်မှုက တစ်ဖက်လူ၏ မုန်းတီးမှုကိုသာ ရရှိစေနိုင်သည်။
ရောက်ရှိနေသော ကျင့်ကြံသူ အများစုမှာ ကျင့်ကြံခြင်း လောက၏ ကြမ်းတမ်းသော အမှန်တရားများကို ကိုယ်တွေ့ ကြုံဖူးကြသော သီးခြားကျင့်ကြံသူ များ ဖြစ်ကြ၏။
မိမိကိုယ်တိုင်အတွက် အကျိုးမရှိဘဲ သူတစ်ပါးကို ထိခိုက်စေမည့် အလုပ်မျိုးကို ရှောင်ကြဉ်ခြင်းက အကောင်းဆုံး ဖြစ်ကြောင်းကို သူတို့သည် မည်သူ့ထက်မဆို ပို၍ သိရှိကြသည်။
ချန်လော့သည် တစ်စုံတစ်ခုကို နားလည်သွားပုံ ရပြီး ကျောက်မင်သယ် ၏ နောက်တွင် ရပ်နေသော လျူချီရီ ကို ကြည့်လိုက်၏။
လျူချီရီ က ချန်လော့ကို ပြုံး၍ ခေါင်းညိတ်ပြလိုက်သည်။
ထိုအခိုက်အတန့်တွင် ချန်လော့မှာ အတော်လေး စိတ်လှုပ်ရှားသွားသည်။
“ငါ သိသားပဲ...”
“ငါ အသုံးပြုခဲ့တဲ့ အချိန်နဲ့ ပိုက်ဆံတွေ အားလုံးက တန်ပါတယ်...”
အကယ်၍ လူအုပ်ကြီးသာ ကြည့်မနေပါက ချန်လော့သည် လျူချီရီ ကို သွားရောက် ပွေ့ဖက်နိုင်သည်။
အခန်း (၁၂) - ကုန်သွယ်ရေး ယာဉ်တန်း နံပါတ်ခုနစ်
ကျင့်ကြံသူများကို အုပ်စုများ ခွဲနေသည်ကို ကြည့်ရင်း ချန်လော့က ပြုံးလိုက်၏။
ဤအချိန်တွင် ကျောက်မိသားစု ၏ ရည်ရွယ်ချက်ကို သူ တွေးမိနေပြီ ဖြစ်သည်။
အကယ်၍ ဤသည်က ကျောက်မန် ကို ချန်ရှင်းဂိုဏ်း တွင် တပည့်ခံရန် အမှန်တကယ် ပို့ဆောင်ပေးခြင်း ဖြစ်ပါက…
ထိုဖြောင့်မတ်သော သူများက သူတို့ကို လွယ်လွယ်ကူကူ လွှတ်ပေးမည် မဟုတ်သည်မှာ သေချာလှသည်။
ကျောက်မိသားစု သည် ဤအချက်ကို ကောင်းစွာ သတိပြုမိပြီး ၊ ချီသန့်စင်ခြင်းအဆင့် ကျင့်ကြံသူ တစ်ထောင်ခန့်ဖြင့် ထိုဖြောင့်မတ်သော ဂိုဏ်းများ၏ ခွန်အားကို မယှဉ်နိုင်ကြောင်လည်း သိရှိထား၏။
ဤအခြေအနေတွင် လူတိုင်းကို စုစည်းထားခြင်းက သေချာပေါက် သေလမ်းဆီသို့သာ ဦးတည်သွားစေလိမ့်မည်။
အဖွဲ့ကို ခွဲလိုက်ပြီး ကျောက်မန် ကို ကုန်သွယ်ရေး ယာဉ်တန်း တစ်ခုတွင် ပါဝင်ခွင့်ပေးလိုက်သည်က ပိုကောင်းပေလိမ့်မည်။
ဤသို့ ပြုလုပ်ခြင်းက ကုန်သွယ်ရေး ယာဉ်တန်း တစ်ခုစီ၏ ယေဘုယျ ခွန်အားကို အားနည်းသွားစေမည် ဖြစ်သော်လည်း သူတို့၏ ရှင်သန်နိုင်စွမ်းကိုမူ တိုးလာစေမည် ဖြစ်သည်။
သို့သော်လည်း ဤသို့ ပြုလုပ်ခြင်း၏ ဖြစ်နိုင်ခြေကို ချန်လော့အနေဖြင့် သံသယ ရှိနေဆဲပင်။
“ဘာပဲဖြစ်ဖြစ် တကယ်လို့ ငါတို့ အချင်းချင်း ဆုံမိရင်တောင် ၊ အမြန် ထွက်ပြေးဖို့ မြေလျှိုးကျင့်စဥ် ကို ငါ သုံးလိုက်ရုံပဲ...”
“ဘာပဲဖြစ်ဖြစ် ငါ့ရဲ့ ပန်းတိုင်က အဲ့ဒီဝိညာဉ်ကျောက်တုံး ၁၀ တုံးရဲ့ နောက်ဆုံးပေးချေမှု မဟုတ်ဘူးလေ...”
ဤအခိုက်အတန့်တွင် ချန်လော့၏ စိတ်ထဲတွင် အလွန် ရှင်းလင်းနေ၏။ အကယ်၍ လူတစ်ယောက်နှင့် တွေ့လျှင် ၊ နိုင်နိုင်ပါက သူသည် ပြန်လည်တိုက်ခိုက်မည် ဖြစ်ပြီး မနိုင်ပါက သူသည် ထွက်ပြေးမည် ဖြစ်သည်။
ဘာပဲဖြစ်ဖြစ် ထိုဖြောင့်မတ်သော သူများ၏ အဓိက ပစ်မှတ်မှာ ကျောက်မန် ဖြစ်သဖြင့် သူတို့ အနေဖြင့် သူတို့ကိုယ်သူတို့ သိပ်ပြီး အခက်တွေ့အောင် လုပ်လိမ့်မည် မဟုတ်ပေ။
ငါးမိနစ်ခန့် အချိန်အတွင်းမှာပင် ကုန်သွယ်ရေး ယာဉ်တန်း ၁၂ ခုကို မတူညီသော အုပ်စုများ ခွဲဝေပေးပြီး ဖြစ်၏။
ချန်လော့သည်လည်း အဖွဲ့ ခွဲဝေမှု လုပ်ငန်းစဉ်ကို လေ့လာရန် ဤအခွင့်အရေးကို အသုံးချခဲ့သည်။
ကုန်သွယ်ရေး ယာဉ်တန်း ၁၂ ခုလုံးမှာ အရွယ်အစားအားဖြင့် ခန့်မှန်းခြေ တူညီကြပြီး လူ ၈၀ သို့မဟုတ် ၉၀ ခန့် ပါဝင်ကြသော်လည်း သူတို့၏ ခွန်အားမှာမူ များစွာ ကွာခြားလှ၏။
အင်အားအကြီးဆုံး ကုန်သွယ်ရေး ယာဉ်တန်းမှာ ကုန်သွယ်ရေး ယာဉ်တန်း နံပါတ်သုံး ဖြစ်ပြီး အခြေခံတည်ဆောက်ခြင်းအဆင့် ကျင့်ကြံသူ လေးဆယ်နီးပါးနှင့် ရွှေမြုတေအဆင့် ကျင့်ကြံသူ သုံးယောက် ပါဝင်သည်။
ထို့နောက်တွင် ကုန်သွယ်ရေး ယာဉ်တန်း နံပါတ်ငါး နှင့် ကုန်သွယ်ရေး ယာဉ်တန်း နံပါတ်ရှစ် တို့ ဖြစ်ကြပြီး တစ်ခုစီတွင် ရွှေမြုတေအဆင့် ကျင့်ကြံသူ တစ်ယောက်နှင့် အခြေခံတည်ဆောက်ခြင်းအဆင့် ကျင့်ကြံသူ ဆယ်ယောက်ကျော်စီ ပါဝင်ကြ၏။
အခြား ကုန်သွယ်ရေး ယာဉ်တန်းများ အားလုံးမှာ ပုံမှန်ဖြစ်ကြပြီး လူ ရှစ်ဆယ် သို့မဟုတ် ကိုးဆယ်တိုင်းတွင် အခြေခံတည်ဆောက်ခြင်းအဆင့် ကျင့်ကြံသူ နှစ်ယောက် သို့မဟုတ် သုံးယောက်စီ ပါဝင်ကြသည်။
အင်အားအနည်းဆုံး ကုန်သွယ်ရေး ယာဉ်တန်းမှာ ကုန်သွယ်ရေး ယာဉ်တန်း နံပါတ် ၁၁ ဖြစ်ပြီး အခြေခံတည်ဆောက်ခြင်းအဆင့် အဖွဲ့ဝင်များ မပါဝင်ဘဲ ချီသန့်စင်ခြင်းအဆင့် အဖွဲ့ဝင်များသာ ပါဝင်လေသည်။
ချန်လော့ ပါဝင်သော ကုန်သွယ်ရေး ယာဉ်တန်း နံပါတ်ခုနစ် မှာမူ သာမန် ကုန်သွယ်ရေး ယာဉ်တန်း တစ်ခုသာ ဖြစ်ပြီး အခြေခံတည်ဆောက်ခြင်းအဆင့် ကနဦးပိုင်းရှိ လူနှစ်ယောက်သာ ပါဝင်ကာ ထူးခြားမှု မရှိပေ။
“ဒီအချက်ကို ကြည့်ရင် ကုန်သွယ်ရေး ယာဉ်တန်း နံပါတ်သုံး က အတော်လေး အင်အားကြီးတယ်...”
“ဒါပေမဲ့ ဒီလို ဖြစ်လေလေ အမှန်တကယ် ဖြစ်ဖို့ အခွင့်အလမ်း နည်းလေလေပဲ...”
ချန်လော့၏ စကားများက အကြောင်းပြချက် မရှိသည်တော့ မဟုတ်ချေ။
မည်သို့ပင်ဆိုစေ ဖြောင့်မတ်သော ဂိုဏ်းများ အားလုံးက ယခု သူတို့ကို စောင့်ကြည့်နေကြပြီး သူတို့ ထွက်ခွာသွားသည်နှင့် တစ်ပြိုင်နက် သူတို့အားလုံး အုပ်စုလိုက် ပြေးဝင်လာကြပေလိမ့်မည်။
ဤမျှ ကြီးမားသော အင်အားရှိသည့် ကုန်သွယ်ရေး ယာဉ်တန်း တစ်ခုက အာရုံစိုက်မှုများစွာကို ဆွဲဆောင်နိုင်မည် ဖြစ်ပြီး ဖြောင့်မတ်သော ဂိုဏ်းများ အားလုံးကို ၎င်းထံသို့ ဆွဲဆောင်သွားစေမည် ဖြစ်၏။
သို့သော် ကုန်သွယ်ရေး ယာဉ်တန်း နံပါတ်သုံး ၏ အဓိက ရည်ရွယ်ချက်မှာ ရန်သူ၏ အာရုံစိုက်မှုကို ဆွဲဆောင်ရန်သာ ဖြစ်ပါက ၎င်းသည် အမှန်တကယ်ပင် အလွန် အသုံးဝင်ပေသည်။
ထို့အပြင် ၎င်းက ရာခိုင်နှုန်းပြည့်နီးပါး ထိရောက်မှု ရှိ၏။ အဘယ်ကြောင့်ဆိုသော် ဤတတိယ ကုန်သွယ်ရေး ယာဉ်တန်း မှာ တွက်ချက်ထားသော လှုပ်ရှားမှု တစ်ခု ဖြစ်နေသောကြောင့်ပင်။
“ဖြောင့်မတ်သော သူတွေက ကျောက်မိသားစု ရဲ့ လှည့်ကွက်တွေကို သိမြင်ပြီး ကျောက်မန် က ကုန်သွယ်ရေး ယာဉ်တန်း နံပါတ်သုံး ထဲမှာ မရှိဘူးလို့ ခန့်မှန်းမိရင်တောင် သူတို့က ကုန်သွယ်ရေး ယာဉ်တန်း နံပါတ်သုံး ကို ကြားဖြတ် တိုက်ခိုက်ဖို့ လူအများကြီး စေလွှတ်ကြဦးမှာပဲ...”
“တကယ်လို့ ကျောက်မိသားစု က သူမကို ကုန်သွယ်ရေး ယာဉ်တန်း နံပါတ်သုံး ထဲမှာ ရှိနေအောင် တကယ် စီစဉ်ထားရင်ရော... တကယ်လို့ ကျောက်မိသားစု က မီးနဲ့ ကစားပြီး အကွေ့အကောက်တွေနဲ့ ကစားနေရင်ရော...”
“ကျောက်မန် ကို လွတ်မြောက်ခွင့် ပေးလိုက်ခြင်းရဲ့ အကျိုးဆက်တွေကို သူတို့ မခံနိုင်ဘူး ဆိုတာကို သူတို့ သိတယ် ကျောက်မန် က ကုန်သွယ်ရေး ယာဉ်တန်း နံပါတ်သုံး ထဲမှာ မရှိတော့ဘူး ဆိုတာကို သူတို့ မျက်စိနဲ့ ကိုယ်တိုင် မြင်ရမှသာ သူတို့ စိတ်သက်သာရာ ရကြမှာ...”
ကုန်သွယ်ရေး ယာဉ်တန်းများကို ခွဲဝေပြီးနောက် ကုန်သွယ်ရေး ယာဉ်တန်း တစ်ခုစီမှာ ကျောက်မိသားစု ဝင်များ၏ ဦးဆောင်မှုဖြင့် ရွှင်ယန်မြို့ မှ တဖြည်းဖြည်း ထွက်ခွာလာကြပြီး သွေးသဲကန္တာရ သို့ ဦးတည်သွားကြ၏။
ကျောက်မင်သယ် က ကုန်သွယ်ရေး ယာဉ်တန်းများကို ကြည့်လိုက်ရာ သူ၏ မျက်လုံးများထဲတွင် စိုးရိမ်ပူပန်မှု အရိပ်အယောင်တစ်ခု ဖြတ်ပြေးသွားသည်။
ဤအခိုက်အတန့်၌ အခြေခံတည်ဆောက်ခြင်းအဆင့် ကျင့်ကြံသူ တစ်ယောက်က တဖြည်းဖြည်း လျှောက်လာပြီး မျက်မှောင်ကြုတ်ကာ တိုးတိုးလေး မေးလိုက်၏။
“ခေါင်းဆောင်ကြီး ကျွန်တော်တို့ သခင်မလေးရဲ့ ကုန်သွယ်ရေး ယာဉ်တန်းကို ရွှေမြုတေအဆင့် ကျင့်ကြံသူ တစ်ယောက် မသတ်မှတ်ပေးသင့်ဘူးလား...”
ကျောက်မင်သယ် က ခေါင်းခါလိုက်သည်။
“မလိုဘူး အဲဒါက သူမ ထွက်ပြေးဖို့ ပိုခက်ခဲသွားစေရုံပဲ ရှိလိမ့်မယ်...”
အစကတည်းက ကျောက်မင်သယ် သည် ကျောက်မန် က ချန်ရှင်းဂိုဏ်း သို့ ဘေးကင်းစွာနှင့် မည်သူမျှ မသိစေဘဲ ရောက်ရှိသွားနိုင်မည်ဟု မျှော်လင့်မထားချေ။
ကုန်သွယ်ရေး ယာဉ်တန်း ၁၂ခုကို ထည့်မဆိုခင်၊ သူသည် ကုန်သွယ်ရေး ယာဉ်တန်း တစ်ရာကို စုစည်းနိုင်လျှင်ပင် ဖြောင့်မတ်သော သူများက မည်သည့် ယာဉ်တန်းကိုမျှ လွှတ်ပေးမည် မဟုတ်ချေ။
ရွှေမြုတေအဆင့် ကျင့်ကြံသူ တစ်ယောက်စီ ပါဝင်သော ထိုကုန်သွယ်ရေး ယာဉ်တန်း သုံးခု၏ အမှန်တကယ် ရည်ရွယ်ချက်မှာ ချန်လော့ ခန့်မှန်းခဲ့သကဲ့သို့ပင် ဖြောင့်မတ်သော လမ်းစဉ် ၏ ခွန်အားများကို ဖြန့်ကျက်သွားစေရန် ဖြစ်၏။
ဖြောင့်မတ်သော လမ်းစဉ် က အင်အားကြီးမားသော်လည်း ၎င်း အသုံးပြုနိုင်သော ခွန်အားမှာ အမြဲတမ်း ကန့်သတ်ချက် ရှိနေသည်။
အကယ်၍ ထိုကုန်သွယ်ရေး ယာဉ်တန်း သုံးခုသည် အင်အားကြီးမားသော ကျင့်ကြံသူများကို တတ်နိုင်သမျှ များများ မြှူဆွယ်နိုင်ပါက အခြား ကုန်သွယ်ရေး ယာဉ်တန်းများမှာ ပျမ်းမျှအားဖြင့် ရန်သူ အနည်းငယ်နှင့်သာ ကြုံတွေ့ရမည် ဖြစ်ပြီး သူတို့၏ ခွန်အားမှာလည်း လျော့ကျသွားမည် ဖြစ်သည်။
လွတ်မြောက်ရေး ကိရိယာ အချို့နှင့်ဆိုလျှင် ကျောက်မန် မှာ လွတ်မြောက်ရန် အခွင့်အရေး ရှိနေဆဲပင်။
သူသည် ချန်လော့ ပါဝင်သော ကုန်သွယ်ရေး ယာဉ်တန်း နံပါတ်ခုနစ် ကို အဓိပ္ပာယ်ပါပါ တစ်ချက် ကြည့်လိုက်ပြီး သက်ပြင်းချကာ ထွက်ခွာသွားတော့၏။
…
ရွှင်ယန်မြို့ မှ ထွက်ခွာလာပြီး နာရီဝက်ခန့် ခရီးနှင်ပြီးနောက် ချန်လော့သည် မလှမ်းမကမ်းမှ သွေးသဲကန္တာရ ၏ ပုံရိပ်ကို နောက်ဆုံးတွင် တွေ့လိုက်ရသည်။
ထိုအချိန်တွင် သူတို့၏ ပတ်လည်ရှိ လူများက နေရာတစ်ခုခုမှ ကြားခဲ့ရသော ကောလာဟလများ အကြောင်း စတင် ပြောဆိုလာကြ၏။
“မင်းတို့ ကြားပြီးပြီလား ဒီတစ်ကြိမ် ကျောက်မိသားစု က လူတွေ အများကြီး စုဆောင်းထားတာ ကုန်ပစ္စည်းတွေ သယ်ဖို့ မဟုတ်ဘူးတဲ့...”
ကျင့်ကြံသူ တစ်ယောက်က စကားပြောလိုက်ရာ သူ၏ အသံမှာ တိုးသော်လည်း ချန်လော့သည် ကြားနေရဆဲပင်။
“ကုန်ပစ္စည်းတွေ သယ်ဖို့ မဟုတ်ဘူး ဆိုရင် ငါတို့ အများကြီးကို ဘာလို့ စုဆောင်းရတာလဲ ကုသိုလ်ဖြစ် လုပ်ဖို့လား...”
“ဘာ ကုသိုလ်ဖြစ်လဲ ငါ ကြားတာတော့ ကျောက်မိသားစု က ဟိုဘက်က နတ်ဆိုးဂိုဏ်း နဲ့ ပတ်သက်နေပြီး သူတို့ကို တစ်ခုခု သွားပို့ပေးမလို့တဲ့...”
“ဟင် ဟုတ်လား အဲ့ဒီဖြောင့်မတ်တဲ့ သူတွေက သူတို့ကို လွှတ်ပေးပါ့မလား...”
ထိုလူက အနည်းငယ် အံ့အားသင့်သွားပုံဖြင့် ပြောလိုက်၏။
“အဲလို ဘယ်ဖြစ်နိုင်ပါ့မလဲ ဖြောင့်မတ်တဲ့ သူတွေက သွေးသဲကန္တာရ ထဲမှာ စောင့်နေကြပြီလို့ ငါ ကြားတယ် ငါတို့ရဲ့ ကုန်သွယ်ရေး ယာဉ်တန်း ရောက်တာနဲ့ သူတို့ ကလှုပ်ရှားကြတော့မှာ...”
“တကယ်လို့ ငါတို့က အဲ့ဒီဖြောင့်မတ်တဲ့ သူတွေနဲ့ ပတ်သက်မိသွားရင် ကိစ္စတွေက ရှုပ်ထွေးသွားလိမ့်မယ်...”
“ဟုတ်တယ် ဒါက အခြေအနေ မကောင်းဘူး...”
ချန်လော့သည် သူ အဖြေသိပြီးသား ဖြစ်သော ပျံ့နှံ့နေသည့် ကောလာဟလများကို နားထောင်ရင်း ညင်သာစွာ သက်ပြင်းချလိုက်ပြီး ဆွေးနွေးမှုတွင် မပါဝင်ခဲ့ပေ။
သူ၏ အကြည့်များက လူအုပ်ကြီးကို ဖြတ်သန်းသွားပြီး တစ်စုံတစ်ခုကို ရှာဖွေနေ၏။
“ကျောက်မိသားစု ရဲ့ သမီးကြီးက ငါတို့ရဲ့ ကုန်သွယ်ရေး ယာဉ်တန်း တစ်ခုခုထဲမှာများ ပါနေမလား မသိဘူး...”
သူသည် အဖွဲ့ထဲရှိ ကျင့်ကြံသူများကို ကြည့်လိုက်ရာ အမျိုးသမီး ကျင့်ကြံသူ အတော်များများ ရှိပြီး စုစုပေါင်း အယောက်နှစ်ဆယ်ခန့် ရှိလေသည်။
သို့သော် အပြင်ပန်းကို ကြည့်ရုံဖြင့် ဘာကိုမျှ သိနိုင်ရန် မဖြစ်နိုင်ပေ။
ပထမအချက်မှာ ချန်လော့သည် ကျောက်မန်၏ ပုံပန်းသဏ္ဍာန်ကို မသိရှိချေ။
ဒုတိယအချက်မှာ သူ သိလျှင်တောင်မှ ကျောက်မန်သည် သူမ၏ မျက်နှာအစစ်ကို သေချာပေါက် ပြသမည် မဟုတ်ပေ။
ကျောက်မိသားစု အတွက်မူ သူတို့၏ အသွင်အပြင် အစစ်အမှန်ကို ဖုံးကွယ်ရန် တစ်ခုခု ဝယ်ယူခြင်းက ခက်ခဲသော အလုပ်တစ်ခု မဟုတ်ပေ။
ထို့အပြင် ကျောက်မန် နှင့် နှိုင်းယှဉ်ပါက ချန်လော့မှာ သူ၏ ကိုယ်ပိုင် အခြေအနေအတွက် ပို၍ပင် စိုးရိမ်နေမိ၏။
“ငါတို့ ယွင်ထျန်းဂိုဏ်း က တပည့် တွေနဲ့ မတွေ့ပါစေနဲ့လို့ ဆုတောင်းပါတယ်...”
ချန်လော့သည် စကားပြောနေရင်း သက်ပြင်းရှည်ကြီး တစ်ချက် ချလိုက်သည်။
မည်သို့ပင်ဆိုစေ ယွင်ထျန်းဂိုဏ်း မှာ ဖြောင့်မတ်သော လမ်းစဉ် ၏ အဖွဲ့ဝင် တစ်ခု ဖြစ်ပြီး ရွှင်ယန်မြို့ နှင့် အတော်လေး နီးကပ်သော ဂိုဏ်းအနည်းငယ်ထဲမှ တစ်ခု ဖြစ်သည်။
ယွင်ထျန်းဂိုဏ်း မှ တပည့် များက ဤစစ်ဆင်ရေးတွင် မလွဲမသွေ ပါဝင်ကြမည် ဖြစ်၏။
အကယ်၍ သူတို့သည် တိုက်တိုက်ဆိုင်ဆိုင် သူ့ကို တွေ့သွားပြီး အတွင်းဂိုဏ်း အကြီးအကဲ ကို သတ်ဖြတ်ကာ ယန်ချန်ထျန်း ၏ သိုလှောင်အိတ် ကို ခိုးယူသွားသူ အဖြစ် မှတ်မိသွားမည် ဆိုပါက ၊ သူ၏ ကံကြမ္မာသည် ကျောက်မန် ထက် ပိုကောင်းလာနိုင်မည်မဟုတ်ပေ။
“ကျောက်မန် က ဒီ ကုန်သွယ်ရေး ယာဉ်တန်း နံပါတ်ခုနစ် ထဲမှာ ပါပါစေလို့ မျှော်လင့်ပါတယ်...”
အဘယ်ကြောင့်ဆိုသော် ထိုသို့ ဖြစ်ပါက ထိုဖြောင့်မတ်သော ကျင့်ကြံသူများ၏ အာရုံစိုက်မှု အားလုံးမှာ ကျောက်မန် အပေါ်သို့သာ ရောက်ရှိသွားမည် ဖြစ်သောကြောင့်ပင်။
ထိုအခါကျလျှင် လူသိမများလှသော ဤချီသန့်စင်ခြင်းအဆင့် ကျင့်ကြံသူလေး သူ့အကြောင်းကို မည်သူကမျှ ဂရုစိုက်ကြတော့မည် မဟုတ်ချေ။