အခန်း (၄၆၉-၄၇၀)

အခန်း ၄၆၉ - ယွင်မိုခို ကောင်းကင်ဓားပြခေါင်းဆောင်၏ အထောက်အထား

ပိုင်ကျီဟန်အဖို့ ပိုင်မျိုးနွယ်စုထံသို့သာ ဆက်လက်သွားရန် ဆုံးဖြတ်လိုက်ရခြင်းသည် အကယ်၍ ရှေ့တွင် နောက်ထပ် ခြုံခိုတိုက်ခိုက်မှုများ စောင့်ကြိုနေလျှင်ပင် သူ၏ လက်ရှိစွမ်းအားဖြင့် ပြဿနာရှိမည်မဟုတ်ဟု သူ ယုံကြည်ထားသောကြောင့်ဖြစ်သည်။

ထိပ်တန်းမျိုးနွယ်စုကြီးတစ်ခု သို့မဟုတ် ဂိုဏ်းကြီးတစ်ခုလုံး အင်အားအပြည့်ဖြင့် ဝိုင်းဝန်းလုပ်ကြံခြင်းမျိုးမှလွဲ၍ ကျန်သူများမှာ သူ့အတွက် ခေါင်းခဲစရာ မဟုတ်ချေ။

သို့သော် နောက်ထပ် နှောင့်ယှက်မှုတစ်စုံတစ်ရာ မရှိဘဲ ပိုင်မျိုးနွယ်စုထံသို့ ချောမွေ့စွာ ဆိုက်ရောက်သွားလေသည်။

ကောင်းကင်ပျံသင်္ဘောသည် ပင်မဆိုက်ကပ်ကွင်းပြင်ပေါ်သို့ ညင်သာစွာ ဆင်းသက်လိုက်သည်။

သင်္ဘော အခြေကျသည်နှင့်

ပိုင်ကျီဟန် သင်္ဘောပေါ်မှ ဆင်းလာခဲ့သည်။

"သခင်လေးကို ဂါရဝပြုပါတယ်”

အစောင့်စစ်သည်များက ရိုသေစွာ ဦးညွှတ်ကြသည်။

ပိုင်ကျီဟန်သည် အပိုစကားများဖြင့် အချိန်မဖြုန်းပေ “မင်း”

အနီးရှိ အစေခံတစ်ဦးကို လက်ညှိုးထိုးကာ ခေါ်လိုက်သည်။

"ကျင်းယွမ်ကျန်းကို ရှာပြီး ငါ့ဆီ ခေါ်ခဲ့”

သူ့အသံမှာ တည်ငြိမ်၏

သို့သော်လည်း ငြင်းဆန်ရန် မဖြစ်နိုင်သော အရှိန်အဝါ ပါဝင်နေသည်။

"ဟုတ်ကဲ့ပါ သခင်လေး”

အစေခံမှာ ထိတ်လန့်သွားပြီး ချက်ချင်းပင် ပြေးထွက်သွားတော့သည်။

မိနစ်အနည်းငယ် ကြာသွား၏

ဝင်းအတွင်း၌ တိတ်ဆိတ်နေဆဲဖြစ်သည်။

ထို့နောက်တွင်မှ

အတွင်းဆောင်များဘက်မှ လာသော ခြေသံများကို ကြားလိုက်ရသည်။

ကျင်းယွမ်ကျန်းသည် အပြေးအလွှား ရောက်ရှိလာသည်။

သူ၏နောက်တွင် ဆံပင်ကို ကျောက်စိမ်းဆံထိုးဖြင့် သေသပ်စွာ ထုံးထားသော မိန်းကလေးငယ်တစ်ဦး ပါလာသည်။

သူတို့သည် ပိုင်ကျီဟန်၏ ရှေ့ မီတာအနည်းငယ်အကွာတွင် ရပ်တန့်ကာ ဦးညွှတ်နှုတ်ဆက်ကြသည်။

"ကျင်းယွမ်ကျန်းက သခင်လေးပိုင်ကို ဂါရဝပြုပါတယ်"

သူ့အသံသည် လေးစားမှုအပြည့်ရှိပြီး တုန်ရင်နေခြင်း မရှိပေ။

ဘေးမှ မိန်းကလေးကလည်း လိုက်၍ ဂါရဝပြုသည်။

"ကျင်းယွဲ့လင်းက သခင်လေးကို ဂါရဝပြုပါတယ်"

ပိုင်ကျီဟန်က သူတို့ကို အေးဆေးစွာ အကဲခတ်နေသည်။

သူ၏ အကြည့်သည် ကျင်းယွမ်ကျန်းတွင် ခဏမျှ ပို၍ ရပ်တန့်သွားသည်။

"ကြည့်ရတာ မင်းရဲ့ ဒဏ်ရာတွေ အကုန်ပျောက်ကင်းသွားပြီပဲ"

ပိုင်ကျီဟန်က ဆိုသည်။

ကျင်းယွမ်ကျန်းသည် ဝမ်းသာအားရဖြင့် ထပ်မံဦးညွှတ်ပြန်သည်။

"ဒါတွေအားလုံးက သခင်လေးရဲ့ စေတနာကြောင့်ပါပဲ”

သူ့အသံတွင် စစ်မှန်သော ကျေးဇူးတင်ရှိမှုများ အထင်အရှား ပါဝင်နေသည်။

ထို့နောက် ပိုင်ကျီဟန်က မိန်းကလေးဘက်သို့ အကြည့်ရွှေ့လိုက်သည်။

"မင်းလည်း ကြည့်ရတာ ကြိုးစားနေပုံရသားပဲ"

"ဟီး... ကျွန်မ သခင်လေးရဲ့ ကျေးဇူးကို အမြန်ဆုံး ပြန်ဆပ်ချင်လို့ပါ"

ကျင်းယွဲ့လင်းက ရှက်ကိုးရှက်ကန်းဖြင့် ပြန်ဖြေသည်။

ချူကျီယန်သည် ကျင်းယွဲ့လင်း၏ ပိုင်ကျီဟန်အပေါ် ဆက်ဆံပုံကို ကြည့်ပြီး သဘောမကျသလို မျက်မှောင်ကြုတ်လိုက်မိသည်။

သို့သော် ပိုင်ကျီဟန်ကမူ ထိုသို့သော အမူအရာများကို သတိပြုမိပုံမရချေ။

သူသည် ကျင်းယွမ်ကျန်း၏ ရှေ့သို့ ဖြည်းညှင်းစွာ လျှောက်သွားလိုက်သည်။

"အဓိက အကြောင်းအရာကို သွားရအောင်။ ငါ မင်းကို ခေါ်လိုက်တဲ့ အကြောင်းရင်းက ဒါကြောင့်ပဲ"

ပိုင်ကျီဟန်က လက်ကို မြှောက်လိုက်၏

ဟင်းလင်းပြင်ကြီး တုန်ခါသွားသည်။

မမြင်နိုင်သော အက်ကြောင်းတစ်ခုထဲမှ လေးလံသောအရာတစ်ခုကို ဆွဲထုတ်လိုက်သကဲ့သို့ လေထုက လိမ်ရှုံ့သွားသည်။

ထို့နောက်

ဝုန်း

အခြေအနေ ပျက်စီးနေသော လူတစ်ဦး၏ ခန္ဓာကိုယ်သည် ဝင်းအတွင်းရှိ ချောမွတ်သော ကျောက်ပြားများပေါ်သို့ ကျလာသည်။

ထိုသူကား... ကောင်းကင်ဓားပြခေါင်းဆောင်ပင် ဖြစ်သည်။

သူ၏ ခြေလက်များမှာ ပြတ်တောက်နေ၏ ကျင့်စဉ်ကြောများမှာလည်း လောင်ကျွမ်း ပျက်စီးနေပြီဖြစ်သည်။ တစ်ချိန်က ထည်ဝါခဲ့သော မဟာကောင်းကင်ဘုံတက်ခြင်း အရှိန်အဝါမှာ ယခုအခါ မသေရုံတမည် မှေးမှိန်နေသော မီးစာနှင့်တူလှသည်။

သို့သော်

သူ၏ မျက်နှာကိုမူ တမင်တကာ မပျက်စီးစေဘဲ ချန်ထားခဲ့သည်။

ကျင်းယွမ်ကျန်း၏ သူငယ်အိမ်များ ကျုံ့သွားသော်လည်း ခဏချင်းမှာပင် ပြန်လည်တည်ငြိမ်သွားသည်။

"ငါတို့ ပြန်လာတဲ့လမ်းမှာ ခြုံခိုတိုက်ခိုက်ခံခဲ့ရတယ်... တိုက်ခိုက်တဲ့သူတွေက..."

ပိုင်ကျီဟန်က တည်ငြိမ်စွာ ဆိုလိုက်သည်။

"ကောင်းကင်ဓားပြတွေပဲ”

ကျင်းယွမ်ကျန်းမျက်ခုံးနှစ်ဖက် စုကပ်သွားသည်။

"ကောင်းကင်ဓားပြ...?"

သူသည် မြေပြင်ပေါ်တွင် လဲလျောင်းနေသော လူကို ကြည့်လိုက်သည်။ ပိုင်ကျီဟန်၏ သင်္ဘောကို တိုက်ခိုက်ရဲသူမှာ မည်သို့သော အကျိုးဆက်မျိုး ရင်ဆိုင်ရမည်ကို သူ ခန့်မှန်းနိုင်ပါသည်။

"ဒီလူက တိုက်ပွဲအတွင်းမှာ သူ့ရဲ့ ကျင့်စဉ်အဆင့်ကို အင်မော်တယ်အဆင့်တစ်ပိုင်း အထိ အတင်းအဓမ္မ မြှင့်တင်ခဲ့ပြီး တိုက်ခိုက်ခဲ့တာ..."

ပိုင်ကျီဟန်က တည်ငြိမ်စွာ ပြောဆိုလိုက်

သည်။

"သူအသုံးပြုသွားတဲ့ နည်းစနစ်က..."

သူ စကားကို ခဏမျှ ရပ်လိုက်၏

"အရင်တုန်းက နဂါးနဲ့ ဖီးနစ်ပြိုင်ပွဲမှာ မင်းအသုံးပြုခဲ့တဲ့ နည်းစနစ်နဲ့ ဆင်တူနေတယ်"

လေထုက ပို၍ အေးစက်သွားသယောင် ရှိသည်။

"ဒါကြောင့်..." ပိုင်ကျီဟန်က ဆက်ပြောသည်။ "မင်း သူ့ကို မှတ်မိနိုင်မလားလို့ ငါ စဉ်းစားမိတာ"

ကျင်းယွမ်ကျန်းသည် ချက်ချင်း ပြန်မဖြေပေ။

သူသည် ရှေ့သို့ တစ်လှမ်းတိုးလိုက်၏

ဒဏ်ရာဗရပွနှင့်လဲလျောင်းနေသော ကောင်းကင်ဓားပြ ခေါင်းဆောင်၏ ဘေးတွင် ဒူးထောက်ထိုင်လိုက်သည်။ ထို့နောက် အလွန်ဂရုတစိုက်ဖြင့် ထိုသူ၏ မေးစေ့ကို မကာ မျက်နှာကို အကဲခတ်လေသည်။

သူ ရုပ်သွင်ပြင်ကို လေ့လာနေ၏

အရိုးတည်ဆောက်ပုံနှင့်

စွမ်းအင်စုရပ်ဝန်းကျင်တွင် ကျန်ရှိနေသော ဝိညာဉ်စွမ်းအား အကြွင်းအကျန်များ

သူ့မျက်နှာထက်မှ ဇဝေဇဝါဖြစ်မှုတို့သည် တဖြည်းဖြည်းနှင့်

လေးနက်သော အာရုံစိုက်မှုအဖြစ်သို့ ပြောင်းလဲသွားသည်။

သူသည် ဓားပြခေါင်းဆောင်၏ လက်ကောက်ဝတ်ပေါ်သို့ လက်ချောင်းနှစ်ချောင်း တင်လိုက်၏

မျက်စိမှိတ်ကာ ဝိညာဉ်အာရုံကို ခန္ဓာကိုယ်အတွင်းသို့ ထိုးဖောက်ကြည့်ရှုလိုက်သည်။

သူ၏ အာရုံသည် ပျက်စီးနေသော ကျင့်စဉ်ကြောများအတွင်းသို့ ရောက်ရှိသွားသည့် ခဏမှာပင်

သူ့အသက်ရှူသံများ ရပ်တန့်သွားသည်။

ဤပုံစံ

ဤလောင်ကျွမ်းနေသော အမာရွတ်များ

ကျင့်စဉ်အခြေခံ၏ အတွင်းပိုင်းအထိ နက်ရှိုင်းစွာ မြှုပ်နှံထားသော နေမင်းသဏ္ဍာန် ပုံဆောင်ခဲ အကြွင်းအကျန်များ

သူ့နှလုံးသား လေးလံသွားတော့သည်။

နေမင်း တာအိုကျောက်တုံး

သို့မဟုတ်

ကျင့်စဉ်အခြေခံနှင့် တိုက်ရိုက်ပေါင်းစပ်ထားသော နေမင်းတာအို၏ အစိတ်အပိုင်းတစ်ခု

သူ့ကိုယ်ထဲက အရာနှင့် တစ်ထေရာတည်းပင်။

သို့သော် ဤသူ၏ တည်ဆောက်ပုံမှာ မတည်ငြိမ်ဘဲ သူ့ထက်ပင် ပို၍ ကြမ်းတမ်းလှသည်။

နောက်ဆက်တွဲ ဒဏ်ရာအမာရွတ်များပင်လျှင်

ထပ်တူနီးပါး တူညီနေသည်။

ကျင်းယွမ်ကျန်းသည် မျက်လုံးကို ဖြည်းညှင်းစွာ ဖွင့်လိုက်သည်။

သူ၏လက်များမှာ သိသိသာသာ တုန်ရင်နေပြီးမှ ပြန်ရုပ်သိမ်းလေ၏

ထို့နောက် ရိုသေစွာ ဦးညွှတ်လိုက်သည်။

"ကျွန်တော်မျိုးကို ခွင့်လွှတ်ပါ သခင်လေး... ကျွန်တော် သူ့ကို မမှတ်မိပါဘူး"

သူ့အသံမှာ တည်ငြိမ်နေသော်လည်း အရင်ကထက် ပို၍ တိုးညှင်းသွားသည်။

"အကယ်၍ သူသာ မြစိမ်းရောင်နေမင်းဂိုဏ်း ရဲ့ အကြီးအကဲဟောင်း တစ်ယောက် ဒါမှမဟုတ် နာမည်ကျော် ပညာရှင်တစ်ယောက်ဆိုရင် ကျွန်တော် ချက်ချင်း မှတ်မိမှာပါ။ အထူးသဖြင့် သူက မဟာကောင်းကင်ဘုံတက်ခြင်း အဆင့်ဖြစ်နေတာကြောင့်လေ"

အကယ်၍ ထိုသို့ဆိုလျှင် ပိုင်ကျီဟန် ကနဦးက ထင်ထားသကဲ့သို့ ဤဓားပြခေါင်းဆောင်သည် မြစိမ်းရောင်နေမင်းဂိုဏ်းမှ မဟုတ်ဘဲ အခြားတစ်နေရာမှ ဖြစ်နိုင်ခြေ ပိုများနေသည်။

ပိုင်ကျီဟန်သည် တိတ်ဆိတ်စွာ နားထောင်နေသည်။

ကျင်းယွမ်ကျန်းက ပို၍ လေးနက်သော လေသံဖြင့် ဆက်ပြောသည်။

"ဒါပေမဲ့”

သူသည် မြေပြင်ပေါ်မှ ပျက်စီးနေသော ဓားပြကို နောက်တစ်ကြိမ် ငုံ့ကြည့်လိုက်သည်။

"သံသယဖြစ်စရာတော့ မရှိပါဘူး”

“ဒီလူက ကျွန်တော့်လိုပဲ အတင်းအဓမ္မ ပေါင်းစပ်တဲ့ စမ်းသပ်မှုမျိုးကို ခံယူထားရသူဆိုတာ ကျွန်တော် သေချာပေါက် အာမခံနိုင်ပါတယ်"

စမ်းသပ်မှုဆိုသည့် စကားလုံးမှာ လေထုထဲတွင် ပဲ့တင်ထပ်သွားသည်။

"နေမင်းအမြုတေ တာအိုကျောက်တုံး... ဒါမှမဟုတ် နေမင်းတာအိုရဲ့ အစိတ်အပိုင်းတစ်ခုကို သူ့ခန္ဓာကိုယ်ထဲမှာ မြှုပ်နှံထားတာပါ"

သူ့အကြည့်များ တင်းမာသွားသည်။

"ဒါပေမဲ့ ကျွန်တော့်ထက်စာရင် သူ့ရဲ့ ပေါင်းစပ်မှုက ပိုပြီး ကြမ်းတမ်းရက်စက်တယ်။ သူက အပြင်ပန်း လှုံ့ဆော်မှုအပေါ်မှာပဲ လုံးလုံးလျားလျား အားကိုးပြီး အဲဒီစွမ်းအားကို နှိုးဆွခဲ့တာ”

“အဲဒါကြောင့်ပဲ စွမ်းအားတွေ လျော့ကျသွားတဲ့အခါ သူ့ရဲ့ ကျင့်စဉ်ကြောတွေက ပြင်းပြင်းထန်ထန် ပျက်စီးသွားရတာပါ"

ပိုင်ကျီဟန်၏ မျက်နှာထားမှာ တည်ငြိမ်နေဆဲပင်။

"ဒါဆို..." ပိုင်ကျီဟန်က အသံတိုးတိုးဖြင့် မေးလိုက်သည်။ "မြစိမ်းရောင်နေမင်း ဂိုဏ်းက ဒီလူကို သိနေမှာပေါ့?"

ကျင်းယွမ်ကျန်းက ခေါင်းကို ပို၍ ငုံ့လိုက်သည်။

"ဟုတ်ပါတယ်”

အကြောင်းမှာ ထိုသို့သော စမ်းသပ်မှုမျိုးကို သူတို့သာလျှင် လုပ်ဆောင်နိုင်သောကြောင့် ဖြစ်သည်။ ထို့ပြင် နေမင်းတာအိုကျောက်တုံး အစိတ်အပိုင်းနှင့် အောင်မြင်စွာ ပေါင်းစပ်နိုင်ခဲ့သူကို သူတို့ သေချာပေါက် မှတ်မိနေပေလိမ့်မည်။

သို့သော် ထိုဂိုဏ်းက ဤလူကို သိနေရုံနှင့် ပိုင်ကျီဟန်ကို တိုက်ခိုက်သူမှာ သူတို့ဖြစ်သည်ဟုတော့ အပြည့်အဝ မပြောနိုင်သေးပေ။ ပိုင်ကျီဟန်ကလည်း ထိုအချက်ကို သိရှိပြီးသားဖြစ်သည်။

သို့သော်လည်း

"မြစိမ်းရောင်နေမင်း ဂိုဏ်းက ငါ့ကို တော်တော်လေး နှောင့်ယှက်နေတာပဲ။ အခုတော့ သူတို့နဲ့ စာရင်းရှင်းရမယ့် အချိန်

ရောက်ပြီ ထင်တယ်"

မိစ္ဆာအင်အားစုများနှင့် စစ်ပွဲအတွင်းမှာ ဖြစ်စေ၊ လီ-ကျောက် မဟာမိတ်အဖွဲ့တွင် ပါဝင်ရန် ဆုံးဖြတ်ခဲ့စဉ်က ဖြစ်စေ... မြစိမ်းရောင်နေမင်းဂိုဏ်းသည် သူ့ကို အဆုံးအထိ ဆန့်ကျင်ရန် ရွေးချယ်ခဲ့သည်မှာ သေချာပါသည်။

ယခု အခွင့်အရေး ရလာပြီဖြစ်ရာ သူသည် အငြိုးအတေးအားလုံးကို တစ်ခါတည်း အပြတ်ရှင်းရန် ရည်ရွယ်လိုက်သည်။

"ကျင်းယွမ်ကျန်း ပြင်ဆင်ထားတော့၊ ငါတို့ မြစိမ်းရောင်နေမင်း ဂိုဏ်းဆီကို သွားကြမယ်”

အခန်း ၄၇၀ - နေမင်းတာအို အစိတ်အပိုင်းများဖြင့် စမ်းသပ်ခြင်း

"အားးး အားးး”

"တ... တောင်းပန်ပါတယ်။ ကျွန်တော့်ကို သတ်လိုက်ပါတော့”

"ဘာလို့ ကျွန်တော့်ကို ဒီလိုလုပ်ရတာလဲ? အားးး..."

ကျောက်စင်္ကြံလမ်းတစ်လျှောက် အော်ဟစ်သံများ ဟိန်းထွက်နေသည်။

ထိုအသံသည် တောက်လောင်နေသော နေမင်းပုံစံများ ထွင်းထုထားသည့် နံရံများကို ရိုက်ခတ်ကာ လေထဲတွင် ငြိမ်းလုဆဲဆဲ မီးခဲတစ်ခဲကဲ့သို့ တိုးလိုက် ကျယ်လိုက် ဖြစ်နေသည်။

ထို့နောက်တွင်မူ

တိတ်ဆိတ်သွားလေသည်။

ဘုန်း

သွေးညှီနံ့များက လေထုထဲတွင် ပို၍ စူးရှလာသည်။

မြေအောက်ခန်းအတွင်းရှိ အစီအရင်တစ်ခုသည် တောက်လောင်နေသော ရွှေရောင်အလင်းတန်းများဖြင့် တုန်ခါနေသည်။

နေမင်းအသေးစားပုံသဏ္ဍာန်ရှိသော ရှေးဟောင်း အက္ခရာများသည် လေထဲတွင် ဖြည်းညှင်းစွာ လည်ပတ်နေပြီး ပြင်းထန်သောအပူရှိန်ကို ထုတ်လွှတ်နေသည်။

အလယ်ဗဟိုတွင်မူ

ခန္ဓာကိုယ်တစ်ခုသည် ပြင်းထန်စွာ တွန့်လိမ်နေသည်။

အရေပြားများ ကွဲအက်နေသည်။

နီရဲတောက်လောင်နေသော အရေပြားအောက်ရှိ သွေးကြောများမှာ မည်းနက်ကာ ဖောင်းကြွနေသည်။

အသားမျှင်များအတွင်းမှ ရွှေရောင်မီးလျှံများ ပွင့်ထွက်လာပြီး အပြင်ဘက်သို့ လောင်ကျွမ်းစေသည်။

ထိုလူသည် တစ်ချက်မျှ ကော့တက်သွားပြီးနောက်

ခွေကျသွားတော့သည်။

ကျွမ်းလောင်သွားချေပြီ။

သေဆုံးသွားချေပြီ

ရွှေရောင်အက္ခရာများ မှေးမှိန်သွားသည်။

အစီအရင်မျဉ်းများ၏ အေးခဲသွားသော အသံသဲ့သဲ့မှလွဲ၍ တစ်ခန်းလုံး တိတ်ဆိတ်သွားလေသည်။

အနီးအနားတွင် လူတစ်ဦး ရပ်နေကာ သူ၏လက်များကို နောက်ပစ်ထားသည်။

သူဝတ်ဆင်ထားသော ဝတ်ရုံပေါ်တွင် တောက်ပသော နေမင်းတံဆိပ်ကို ရွှေချည်မျှင်များဖြင့် ထိုးထားရာ မှောင်မှိုင်သော အခန်းထဲတွင်ပင် ဝင်းလက်နေသည်။

သူ့မျက်နှာထားကတော့ ပြောင်းလဲခြင်းမရှိပေ။

အော်ဟစ်သံကြောင့်လည်း မဟုတ်ပေ။

သေဆုံးမှုကြောင့်လည်း မဟုတ်ပေ။

သူ၏ မျက်လုံးများသာ လှုပ်ရှားနေသည်။

အေးစက်ပြီး စိစစ်တွက်ချက်နေသော မျက်လုံးများ...

"နောက်ထပ် ကျရှုံးမှုတစ်ခုပဲ"

သူ့အသံမှာ တည်ငြိမ်နေသည်။

ပျင်းရိငြီးငွေ့နေသည့်အလားပင်။

ခြေလှမ်းအနည်းငယ်အကွာတွင် ရပ်နေသော လက်အောက် ငယ်သားက ခေါင်းကို ပို၍ ငုံ့လိုက်သည်။

"ကျွန်တော်မျိုး တောင်းပန်ပါတယ် အကြီးအကဲ"

ထိုလူက တောင်းပန်စကားကို ဂရုမစိုက်ပေ။

သူသည် ရှေ့သို့လှမ်းကာ အလောင်းဘေးတွင် ဆောင့်ကြောင့်ထိုင်လိုက်သည်။ လက်ချောင်းနှစ်ချောင်းကို ဆန့်ထုတ်ကာ မည်းနက်နေသော ရင်ဘတ်ကို သာသာလေး ထိလိုက်သည်။

ဝိညာဉ်အာရုံတစ်ခုသည် အလောင်းအတွင်းသို့ စိမ့်ဝင်သွားသည်။

သူသည် ကျင့်စဉ်ကြောများကို စစ်ဆေးသည်။

စွမ်းအင်စုရပ်ကို စစ်ဆေးသည်။

ပျက်စီးသွားသော ဝိညာဉ်လမ်းကြောင်းများကို စစ်ဆေးသည်။

"လိုက်လျောညီထွေဖြစ်မှုနှုန်း... ၂၃ ရာခိုင်နှုန်း"

သူ့ဘာသာ ရေရွတ်လိုက်သည်။

"အရင်အသုတ်ထက်စာရင်တော့ တိုးတက်လာတယ်။ ဒါပေမဲ့ မလုံလောက်သေးဘူး"

သူ ဖြည်းဖြည်းချင်း မတ်တတ်ရပ်လိုက်သည်။

သူသည် အလောင်း၏ ပျက်စီးနေသော စွမ်းအင်စုရပ်အတွင်းမှ အပိုင်းအစလေးတစ်ခုကို မြှောက်လိုက်ရာ ရွှေရောင်အစီအရင်က တစ်ချက်မျှ လက်ခနဲ ဖြစ်သွားသည်။

လက်သည်းခွံထက် မကြီးသော အပိုင်းအစလေး

အားနည်းစွာ လင်းလက်နေသည်။

၎င်းသည် ငြိမ်းလုဆဲဆဲ နေမင်းတစ်စင်းကဲ့သို့

နေမင်းတာအို အစိတ်အပိုင်း

သူသည် လျှာတစ်ချက် သပ်လိုက်သည်။

"လူသားခန္ဓာကိုယ်က အလွန်နုနယ်လွန်းသေးတယ်။ အမှားအယွင်း အနည်းငယ်ရှိတာနဲ့ အသက်ပျောက်ကုန်တာပဲ"

သူ၏ အကြည့်သည် အခန်း၏ အခြားတစ်ဖက်သို့ ရောက်သွားသည်။

ထိုနေရာတွင်

နံရံတစ်လျှောက် သံလှောင်အိမ်များ ရှိနေသည်။

အချို့မှာ အလွတ်များဖြစ်၏

အချို့မှာမူ မဟုတ်ပေ။

လက်ကလေးများက သံတိုင်များကို တင်းကျပ်စွာ ဆုပ်ကိုင်ထားကြသည်။

မျက်လုံးများ ပြူးကျယ်နေကြသည်။

တုန်ရင်နေကြသည်။

သူတို့သည် စမ်းသပ်ပစ္စည်းများသာ ဖြစ်သည်။

ထိုထက် မပိုပေ။

"နောက်ထပ် နမူနာတစ်ခု ယူခဲ့စမ်း"

သူ့လေသံမှာ တည်ငြိမ်မြဲ တည်ငြိမ်နေဆဲသာ။

လက်အောက်ငယ်သားမှာ တွန့်ဆုတ်နေခြင်း မရှိပေ။

"ဟုတ်ကဲ့ပါ အကြီးအကဲ”

သူသည် လှည့်၍ အချက်ပေးလိုက်သည်။

တပည့်နှစ်ဦးက ပိန်လှီသော ဆယ်ကျော်သက် ကောင်လေးတစ်ဦးကို ဆွဲခေါ်လာကြပြီး သံခြေချင်းများက ကျောက်ကြမ်းပြင်ပေါ်တွင် တဂျိဂျိမြည်နေသည်။

ထိုကောင်လေးသည် အားနည်းစွာ ရုန်းကန်နေပြီး မှိုင်းပေနေသော ပါးပြင်ပေါ်တွင် မျက်ရည်များ စီးကျနေသည်။

"တောင်းပန်ပါတယ်... ကျေးဇူးပြုပြီး မလုပ်ပါနဲ့”

အကြီးအကဲမှာ မည်သို့မျှ မတုံ့ပြန်ပေ။

သူ၏လက်ချောင်းများက လေထဲတွင် တံဆိပ်တစ်ခုကို ရေးဆွဲလိုက်သည်။

အစီအရင်မှာ နောက်တစ်ကြိမ် တောက်လောင်လာပြန်သည်။

ရွှေရောင်အလင်းများသည် အခန်းတစ်ခုလုံးကို ဝါးမြိုသွားသည်။

အော်ဟစ်သံများ ပြန်လည်စတင်လာပြန်သည်။

အကြီးအကဲ၏ မျက်လုံးများ အနည်းငယ် ကျဉ်းမြောင်းသွားသည်။ နာကျင်မှုကြောင့် မဟုတ်ဘဲ

ကောင်လေး၏ ခန္ဓာကိုယ်အတွင်းရှိ တာအိုအစိတ်အပိုင်း၏ တုံ့ပြန်မှုကြောင့်သာ ဖြစ်သည်။

ထိုအစိတ်အပိုင်းမှာ ပြင်းထန်စွာ တုန်ခါနေသည်။

"မတည်ငြိမ်ဘူး။ ငြင်းဆန်မှုက အရမ်းများနေတယ်"

ကျင့်စဉ်ကြောများသည် ချက်ချင်းပင် စတင်ပေါက်ကွဲတော့သည်။

"ဟင်းးး"

သူက လက်တွေ့ဆန်စွာ စောင့်ကြည့်နေသည်။

"တည်ဆောက်ပုံက လိုက်လျောညီထွေမဖြစ်ဘူး။ ချက်ချင်း ပျက်စီးသွားတာပဲ။ သူတို့ ယူလာတဲ့ ကုန်ကြမ်းတွေက အရည်အသွေး ညံ့ဖျင်းနေပုံရတယ်"

အော်ဟစ်သံမှာ ရုတ်တရက် ရပ်တန့်သွားသည်။

အစီအရင်၏ အလယ်ဗဟိုမှ မီးခိုးများ ထွက်လာသည်။

နောက်ထပ် အလောင်းတစ်ခု။

နောက်ထပ် အလဟဿ ဖြစ်သွားသော အစိတ်အပိုင်းတစ်ခု။

အကြီးအကဲသည် သက်ပြင်းတစ်ချက်ကို ဖြည်းညှင်းစွာ ချလိုက်သည်။

၎င်းမှာ ဝမ်းနည်းခြင်းမဟုတ်ပေ

စိတ်ပျက်အားမလိုအားမရ ဖြစ်ခြင်းသာ။

အကြီးအကဲသည် သူ၏ဝတ်ရုံစကို ခါလိုက်လေတော့သည်။

ပြာပူများက အစီအရင်စင်္ကြံပေါ်တွင် လွင့်စင်သွားသည်။ "နောက်ထပ် သုံးယောက် ခေါ်ခဲ့။"

သူ့လေသံက အရင်အတိုင်းပင် မပြောင်းလဲချေ။

ဆေးဖော်စပ်ရန်အတွက် ဆေးပင်အပိုတောင်းနေသကဲ့သို့ အေးဆေးလွန်းလှသည်။

လက်အောက်ငယ်သားမှာ ကိုယ်ရှိန်သတ်သွား၏

တိတ်ဆိတ်မှုက လွှမ်းမိုးသွားသည်။

အကြီးအကဲက လှည့်မကြည့်ပေ

သို့သော်လည်း သူ့ပတ်ဝန်းကျင်ရှိ ရွှေရောင်အရှိန်အဝါများသည် ဖျတ်ခနဲ လှုပ်ခတ်သွားသည်။

"ဘာလဲ... ပြဿနာရှိလို့လား?"

လက်အောက်ငယ်သားမှာ ချက်ချင်းပင် ဒူးတစ်ဖက် ထောက်လိုက်ပြီး "အ... အကြီးအကဲ... ကျန်တဲ့သူ အများကြီး မရှိတော့လို့ပါ"

အခန်းတွင်းရှိ လေထုက ပို၍ အေးစက်လာသယောင်ရှိသည်။

သံတိုင်များနောက်ကွယ်မှ ကလေးငယ်များသည်လည်း ကြောက်လန့်တကြားဖြင့် နောက်သို့ ဆုတ်သွားကြသည်။

အကြီးအကဲက ခေါင်းကို ဖြည်းဖြည်းချင်း လှည့်လာသည်။

"တောက်၊ ပစ္စည်းရရှိမှုက ကျဆင်းလာတာပဲ"

သူက လက်အောက်ငယ်သားဘက်သို့ လှည့်လိုက်သည်။

"နောက်ဆုံးအသုတ်မှာ သုံးယောက်ပဲ အောင်မြင်တယ်..."

သူ့လေသံက အနည်းငယ် မာကျောသွားသည်။

"ဒါက လက်ခံနိုင်စရာ မဟုတ်ဘူး။"

လက်အောက်ငယ်သားက တံတွေးတစ်ချက် မြိုချလိုက်၏

"အခြေအနေက... လူတွေက ပိုပြီး သတိထားလာကြပါတယ်။ စမ်းသပ်ပစ္စည်းတွေ ရဖို့လည်း ပိုခက်ခဲလာပါတယ်။ အထူးသဖြင့် အရည်အသွေးမြင့်တဲ့ ပစ္စည်းတွေပေါ့"

အကြီးအကဲ၏ မျက်လုံးများက အေးစက်သွားသည်။

"တောက်၊ မိစ္ဆာအင်အားစုတွေနဲ့ စစ်ပွဲသာ အခုထက် ပိုကြာခဲ့ရင်၊ ငါတို့ ဘာပြဿနာမှမရှိဘဲ ပစ္စည်းတွေ အများကြီး ရနိုင်ခဲ့မှာ"

သူသည် ချောမွတ်သော ကျောက်ကြမ်းပြင်ပေါ်တွင် ရွှေရောင်အလင်းများ ရစ်ပတ်နေသည့် အစီအရင်ရှေ့တွင် ဟိုဟိုဒီဒီ ဖြည်းဖြည်းချင်း လျှောက်နေသည်။

စစ်ပွဲ အပြင်းထန်ဆုံး အချိန်များတုန်းက မြို့လုံးကျွတ် တစ်ညတွင်းချင်း ပျောက်ကွယ်သွားတတ်သည်။ ရွာများသည် ပြာအတိဖြစ်ခဲ့ရပြီး ဒုက္ခသည်စခန်းများမှာလည်း အစအနမကျန် ပျောက်ဆုံးခဲ့ကြသည်။ ထိုစဉ်က စုံစမ်းစစ်ဆေးရန်ဆိုသည်မှာ မည်သို့မျှ မဖြစ်နိုင်သော အရာဖြစ်သည်။

ဧကရာဇ်မင်းမြတ်၏ စစ်တပ်များက ရှေ့တန်းတွင် တပ်စွဲထားရပြီး၊ မျိုးနွယ်စုကြီးများသည်လည်း သူတို့၏ အထူးချွန်ဆုံး ပညာရှင်များကို စစ်မြေပြင်တွင် အကုန်အစင် အသုံးပြုနေရသည်။

ထိုစဉ်က ပျောက်ဆုံးသွားသူများကို လိုက်ရှာရန် အချိန်မရှိသလို၊ ကွယ်ပျောက်သွားသော ကလေးငယ်များ၊ ပြန်မလာတော့သော လေလွင့်ကျင့်ကြံသူများနှင့် အုပ်စုလိုက် ပျောက်ဆုံးသွားသော ဒုက္ခသည်များကိုလည်း မည်သူကမျှ အာရုံမစိုက်နိုင်ခဲ့ကြချေ

ဘေးဒုက္ခကြီးများ၏ နောက်ကွယ်တွင် ထိုသူအားလုံးမှာ ပရမ်းပတာ အခြေအနေများကြား၌ ဝါးမြိုခံခဲ့ကြရသည်။

အစီရင်ခံစာများ တင်ခဲ့ကြသော်လည်း သံသယများ ရှိခဲ့ကြသော်လည်း စစ်မြေပြင်ကသာ အရာရာကို ဆုံးဖြတ်နေသည့် အချိန်ဖြစ်ခဲ့သည်။

ပျောက်ဆုံးသူများကို လိုက်ရှာရန်အတွက် ပညာရှင်များကို အသုံးမပြုနိုင်ခဲ့ချေ။ ထိုကာလများသည် အကြီးအကဲအတွက် ရွှေရောင်ကာလများပင် ဖြစ်သည်။ ပရမ်းပတာ အခြေအနေက သူ့ကို လွတ်လပ်ခွင့် ပေးခဲ့သည်။

ပစ္စည်းအသုတ်လိုက်ကို မည်သည့် အဟန့်အတားမှမရှိဘဲ သယ်ယူနိုင်ခဲ့သည်။ ကောလာဟလများ ထွက်ပေါ်လာလျှင်ပင် စစ်ပွဲ၏ ဘေးထွက်ဆိုးကျိုးများအဖြစ်သာ သဘောထားပြီး မည်သူမျှ ဂရုမစိုက်ခဲ့ကြချေ။

၎င်းသည် မည်သည့် စစ်ဆေးမှု၊ မည်သည့် ကန့်သတ်ချက်မှမရှိဘဲ စမ်းသပ်မှုများကို လွတ်လပ်စွာ လုပ်ဆောင်ရန် အကောင်းဆုံးသော အကာအကွယ် ဖြစ်ခဲ့သည်။

ထိုစဉ်က စမ်းသပ်မှုပေါင်း ရာနှင့်ချီပြီး လုပ်ဆောင်နိုင်ခဲ့ကာ အောင်မြင်မှုနှုန်းမှာလည်း တဖြည်းဖြည်း မြင့်တက်လာခဲ့သည်။

နှောင့်ယှက်မှုများ မရှိခြင်းက နည်းစနစ်များ ပိုမိုကောင်းမွန်လာစေရန် အရှိန်အဟုန် မြှင့်တင်ပေးခဲ့သည်။

ယခုမူ စစ်ပွဲက ပြီးဆုံးသွားချေပြီ။ မိစ္ဆာအင်အားစုများ ဆုတ်ခွာသွားပြီး ရှေ့တန်းစစ်မျက်နှာပြင်များ တည်ငြိမ်သွားကာ စစ်တပ်များမှာလည်း နေရပ်သို့ ပြန်လာကြပြီ ဖြစ်သည်။

အုပ်ချုပ်သူများနှင့် ဂိုဏ်းအသီးသီးသည် အရေးပေါ် ခြိမ်းခြောက်မှုများမှ ကင်းဝေးသွားသောအခါ အတွင်းပိုင်းကိစ္စများကို ပြန်လည် အာရုံစိုက်လာကြသည်။

ဧကရာဇ်မိသားစုက အတွင်းပိုင်း စစ်ဆေးမှုများကို စတင်လုပ်ဆောင်လာပြီး၊လူကုန်ကူးမှု ကွန်ရက် အသေးစားများကိုလည်း ဖော်ထုတ် အမြစ်ဖြတ်လာကြသည်။ ဒေသတိုင်းတွင် စောင့်ကြည့်စစ်ဆေးမှုများ ပိုမို တင်းကျပ်လာသည်။ ယခင်ကကဲ့သို့ အဟန့်အတားမရှိ စမ်းသပ်နိုင်သော လွတ်လပ်မှုများမှာ ပျောက်ကွယ်သွားခဲ့ချေပြီ။ ပစ္စည်းရှာဖွေသည့် လမ်းကြောင်းများကို ပိုမိုကျဉ်းမြောင်းစေကာ သွယ်ဝိုက်ပြီး သတိကြီးစွာ လုပ်ဆောင်လာရသည်။

စမ်းသပ်ပစ္စည်းများ ရှားပါးလာပြီး အရည်အသွေးများ ကျဆင်းလာကာ အရည်အသွေးညံ့သော ပစ္စည်းများက လိုက်လျောညီထွေဖြစ်မှုနှုန်းကို ကျဆင်းစေသောကြောင့် စမ်းသပ်မှုများမှာလည်း တုံ့ဆိုင်းနေရသည်။

အကြီးအကဲ၏ စိတ်ပျက်အားမလိုအားမရ ဖြစ်မှုများသည် ပေါက်ကွဲထွက်လုမတတ် ဖြစ်နေပြီး သူ၏ ရွှေရောင်ချီ အရှိန်အဝါများကလည်း တုံ့ပြန်မှုအနေဖြင့် ပတ်ဝန်းကျင်၌ တဖျတ်ဖျတ် လှုပ်ခတ်နေသည်။

"ရှာဖွေမဲ့ ဧရိယာကို ထပ်ချဲ့လိုက်။ သာမန်လူလား၊ ကျင့်ကြံသူလားဆိုတာ အရေးမကြီးဘူး။ ရသမျှလူ အကုန်ဖမ်းခဲ့" သူ့အသံက ပို၍ တိုးညှင်းသွားသည်။

"ငါတို့ ဒီထက် ပိုနှောင့်နှေးနေရင် ဂိုဏ်းချုပ်က စိတ်ကျေနပ်တော့မှာ မဟုတ်ဘူး"

လက်အောက်ငယ်သားက ရိုသေစွာ ဦးညွှတ်လိုက်သည်။ "ဟုတ်ကဲ့ပါ အကြီးအကဲ”

ရွှေရောင်အလင်းများက နောက်တစ်ကြိမ် မှေးမှိန်သွားပြန်သည်။

အကြီးအကဲသည် သူ၏လက်ဖဝါးပေါ်ရှိ နေမင်းတာအို အစိတ်အပိုင်း၏ မှိန်ဖျော့နေသော အလင်းတန်းကို နောက်တစ်ကြိမ် ငုံ့ကြည့်လိုက်သည်။

"ကျရှုံးမှုတွေကတော့ များသားပဲ..."

သူ၏ နှုတ်ခမ်းများက အနည်းငယ် တွန့်ကွေးသွားသည်။

"ဒါပေမဲ့ အောင်မြင်မှုနှုန်းက တဖြည်းဖြည်း တက်လာနေပြီ။ ငါတို့ ၅၀ ရာခိုင်နှုန်းထက် ကျော်သွားတာနဲ့”

သူ၏ ဝိညာဉ်ချီစွမ်းအားကြောင့် ထိုအစိတ်အပိုင်းသည် အနည်းငယ် ပို၍ တောက်ပလာသည်။

"အဲဒီအခါကျရင် ငါတို့ ဒီကမ္ဘာကြီးကို စိုးမိုးနိုင်လိမ့်မယ်”

သူက လက်ကို ဆုပ်လိုက်သည်။

ထိုအစိတ်အပိုင်းမှာ ပျောက်ကွယ်သွားတော့သည်။

"သွားတော့။"

သူ့အသံက အေးစက်တည်ငြိမ်သော အခြေအနေသို့ ပြန်ရောက်သွားသည်။

"ပစ္စည်းတွေ အမြန်သွားဖြည့်တော့”