အခန်း (၉၁-၉၃)

အခန်း(၉၁)

သီရှီထျန်မသိသည်မှာ ကျားမျိုးနွယ်၏ အသံသုံးသံလျှို့ဝှက်နည်းလမ်းတွင် ပထမအသံသည် တစ်စုံတစ်ယောက်၏ စွမ်းအင်အရင်းအမြစ်နှင့် သူ့ကိုယ်ပိုင်မိစ္ဆာစံအိမ်ကို ဖွင့်လှစ်ရန် ရည်ရွယ်သည်။

ယင်းက မဟာနတ်ဘုရားပန်ဂု သူ၏ ကောင်းကင်ခွဲနတ်ပုဆိန်ဖြင့် ဗလာနတ္ထိဟင်းလင်းပြင်အား ခုတ်ပိုင်းကာ မိုးမြေကို ဖန်တီးခဲ့ခြင်းနှင့် ဆင်တူသည်။ သို့သော်လည်း ထိုသို့အခြေအနေမျိုးမှာ မိစ္ဆာစံအိမ်သည် အစောပိုင်းအသွင်သဏ္ဍာန်ဖြင့်သာ ရှိနေလိမ့်မည်။ ယင်းက မိစ္ဆာစံအိမ်၏ အားအနည်းဆုံးအချိန် ဖြစ်သည်။

အကယ်၍ မည်သည့်ထူးခြားမှုမှ မဖြစ်ပေါ်လာလျှင် အသစ်ဖွဲ့စည်းခဲ့သော မိစ္ဆာစံအိမ်သည် ဘေးပတ်ဝန်းကျင်မှ ဖိအားကြောင့် ဖျက်ဆီးခံရလိမ့်မည်။ ထို့ကြောင့် ဒုတိယမြောက်အသံရှိလာခြင်း ဖြစ်သည်။

ဒုတိယမြောက်အသံ၏ ရည်ရွယ်ချက်က ပျက်စီးလွယ်သော မိစ္ဆာစံအိမ်ကို မြန်ဆန်စွာ အခြေခိုင်မာလာစေပြီး သန်စွမ်းစေရန် ဖြစ်သည်။ သို့မှသာ ယင်းက စစ်မှန်သော မိစ္ဆာစံအိမ်အဖြစ် ပြောင်းလဲသွားလိမ့်မည်။

အမှန်မှာ ဒုတိယမြောက်အသံ ပဲ့တင်ထပ်သွားပြီးလျှင် မိစ္ဆာစံအိမ်က အမှန်တကယ် ဖွဲ့စည်းသွားလိမ့်မည်။ တတိယမြောက်အသံ မထွက်ပေါ်လာလျှင်ပင် မည်သည့်မတော်တဆမှုမှမဖြစ်သရွေ့ မိစ္ဆာစံအိမ်က ဖျက်ဆီးခံရလိမ့်မည် မဟုတ်ချေ။ ထို့ကြောင့် မိစ္ဆာစံအိမ်ကို အသံနှစ်သံတည်းဖြင့် ဖွင့်လှစ်နိုင်ပေသည်။

သို့သော်လည်း ကျားမျိုးနွယ်၏ မိစ္ဆာစံအိမ်ဖွင့်လှစ်သော အထူးလျှို့ဝှက်နည်းလမ်းတွင် အသံသုံးသံပါဝင်သည်။ ယင်း၏ နောက်ကွယ်မှာ သေချာပေါက် အကြောင်းအရင်းတစ်ခု ရှိရမည်။ ယင်းကို သီရှီထျန်က ရှင်းလင်းစွာ နားမလည်ထားပေ။

ဆန်းကြယ်သော အသံနှစ်သံကို ဆက်တိုက် ထုတ်လွှတ်ပြီးနောက် သူ၏ ဝိညာဉ်ထံမှ အလွန်ပြင်းထန်သော နာကျင်မှုကို စက်ကရာခံစားမိသွားသည်။ စွမ်းအားအများကြီး ကုန်ဆုံးသွားသောကြောင့် ပင်ပန်းနွမ်းနယ်မှုကို သူခံစားမိလာသည်။ ဤအခိုက်အတန့်မှာ သူက မည်သည့်အရာကိုမှ မတွေးချင်တော့ပေ။ သူက နှစ်ချိုက်စွာ အိပ်စက်အနားယူချင်နေသည်။ သူက မည်သည့်အရာကိုမှ မတွေးဘဲ အိပ်စက်ချင်သည်။ သို့သော်လည်း သူ၏ သန်စွမ်းသော စိတ်ခွန်အားက ယင်းကို လက်မခံရန် တိုက်တွန်းနေသည်။

“ မဖြစ်ဘူး… ငါအိပ်ပျော်လို့ မဖြစ်ဘူး… တတိယမြောက်အသံကို ငါမထုတ်လွှတ်ရသေးဘူး… ဒီတစ်ကြိမ် ငါကျရှုံးသွားရင် နောက်တစ်ကြိမ် မိစ္ဆာစံအိမ်ကို ဖွင့်လှစ်ဖို့ ကြိုးစားတဲ့အခါ အများကြီး ပိုခက်ခဲသွားလိမ့်မယ်… အဲ့ဒါကို ငါ့တစ်ဘဝလုံး မဖွင့်လှစ်နိုင်တော့မှာ စိုးရိမ်ရတယ်… ငါအရှုံးမပေးနိုင်ဘူး… တတိယမြောက်အသံကို ငါထုတ်လွှတ်ရမယ် ”

သီရှီထျန်သည် ပင်ပန်းနွမ်းနယ်မှုကြောင့် နှစ်ချိုက်စွာ အိပ်စက်ချင်နေသော်လည်း သူ၏ သန်စွမ်းသော စိတ်ခွန်အားကြောင့် အသိစိတ်က အနည်းငယ် ပြန်ရှင်းလင်းသွားသည်။ မိစ္ဆာစံအိမ်ကို ဖွင့်လှစ်ရန် သူကျရှုံးသွားလျှင် ဖြစ်ပေါ်လာနိုင်သော နောက်ဆက်တွဲအကျိုးဆက်များကို သူစဉ်းစားမိသည်။ အဆိုးဝါးဆုံး အကျိုးဆက်က ဤဘဝတွင် မည်သည့်အခါမှ သူမိစ္ဆာဖြစ်လာနိုင်တော့မည် မဟုတ်ချေ။

မိစ္ဆာလမ်းစဉ်ကို သူစတင်လျှောက်လှမ်းခဲ့သည့်အချိန်မှစ၍ မိစ္ဆာစွမ်းအားကို သူလိုချင်တောင့်တခဲ့သည်။ သူ့ဘဝတစ်လျှောက်လုံး သာမန်ကျားတစ်ကောင်အဖြစ် ဆက်နေသွားရန် သူဆန္ဒမရှိပေ။ သူက တခြားသားရဲများနည်းတူ ပုန်းလျှိုးကွယ်လျှိုးဘဝဖြင့် မရှင်သန်ချင်ပေ။ ထို့ကြောင့် ကြီးမြတ်သော စွမ်းအားကို သူပိုင်ဆိုင်ချင်သည်။ ယင်းက မေမေကျားဖြူနှင့် သူ့ညီငယ်ညီမငယ်ကို ကယ်တင်ရန်အတွက်သာ မဟုတ်ပေ။ ယင်းက အစသာ ဖြစ်သည်။

တစ်နေ့မှာ သူက မိစ္ဆာကျင့်ကြံခြင်း၏ အထွတ်အထိပ်သို့ တတ်လှမ်းသွားနိုင်ရန် မျှော်လင့်နေသည်။ ကျင့်ကြံခြင်း၏ အကန့်အသတ်မှာ သူက မည်မျှသန်မာလာမည်နည်း သိချင်သည်။ စွမ်းအားအကန့်အသတ်ကို သူရှာဖွေချင်သည်။

မိစ္ဆာစံအိမ်… ။

ယင်းက အထွတ်အထိပ်ဆီသို့ သူသွားမည့် ပထမဆုံး ခြေလှမ်း ဖြစ်သည်။ အကယ်၍ သူက ထိုပထမခြေလှမ်းကိုပင် မလှမ်းနိုင်လျှင် အနာဂတ်အကြောင်း မည်သို့ဆက်ပြောနိုင်မည်နည်း။

သို့သော် စိတ်ခွန်အားသည် စိတ်ခွန်အားမျှသာ ဖြစ်၏။ ယင်းက အရာအားလုံးကို ကိုယ်စားမပြုပေ။ တစ်စုံတစ်ယောက်၏ စိတ်ပင်ပန်းနွမ်းလျမှုကို ရိုးရှင်းသော ဆန္ဒတစ်ခုတည်းဖြင့် မဖြေရှင်းနိုင်ပေ။ နည်းနည်းလေး စိတ်ယိမ်းယိုင်သွားလျှင်ပင် သူက ပုံရိပ်ယောင်ထဲမှာ ထပ်မံ နစ်မြုပ်သွားလိမ့်မည်။ သို့သော်လည်း သူက နှလုံးသားထဲမှာ ခေါင်းမာစွာ အော်ဟစ်နေဆဲပင်။ “ အရှုံးမပေးဘူး ”ဟူသော စကားက သူ၏ စိတ်ထဲမှာ ကြိမ်ဖန်များစွာ ပဲ့တင်ထပ်နေသည်။

ကံမကောင်းစွာပင် သူက အလွန်ပင်ပန်းနွမ်းနယ်နေသည်။ သူ၏ စွမ်းရည်အရ ဒုတိယမြောက်အသံက သူ၏ လုပ်နိုင်စွမ်းအကန့်အသတ် ဖြစ်သည်။

သူ၏ အသိစိတ်က ပုံရိပ်ယောင်ထဲမှာ တဖြည်းဖြည်း နစ်မြုပ်သွားသည်။

သို့သော်လည်း ထိုအခိုက်အတန့်မှာ သီရှီထျန် စမ်းသပ်ကြည့်ရန် ထုတ်ယူခဲ့သော ပစ္စည်းက အံ့ဖွယ်အကျိုးသက်ရောက်မှုကို ထုတ်လွှတ်လိုက်သည်။ ယင်းက ယခုကဲ့သို့ အရေးကြီးအချိန်မှာ သက်ဝင်လှုပ်ရှားလာသည်။

စက်ကရာ၏ အောက်မှာ တိတ်တဆိတ် လဲလျောင်းနေသော အဖြူရောင်ကျောက်စိမ်းသန္ဓေသားသည် သူ့နှလုံးသားထဲမှ ဆန္ဒမရှိမှုကို ကြားသွားဟန် ရ၏။ သူ၏ ခေါင်းမာမှုက ကျောက်စိမ်းသန္ဓေသားထဲမှ လျှို့ဝှက်ဆန်းကြယ်သော စွမ်းအင်ကို လှုံ့ဆော်လိုက်သည်။

အဖြူရောင်ကျောက်စိမ်းအလင်းသည် အရပ်မျက်နှာအသီးသီးဆီသို့ ဒီရေသဖွယ် ပျံ့ပွားသွားသည်။ မျက်စိတစ်မှိတ်အတွင်းမှာ မည်းမှောင်နေသော လှိုဏ်ဂူက နေ့အချိန်ကဲ့သို့ လင်းထိန်သွားသည်။ လှိုဏ်ဂူထဲမှ အရာအားလုံးကို ရှင်းလင်းစွာ မြင်နိုင်သွားသည်။ ကျောက်စိမ်းအလင်းသည် သိမ်မွေ့ညင်သာသည်။ အလင်းရောင်၏ ဖုံးလွှမ်းမှုအောက်မှာ ကျောက်စိမ်းသန္ဓေသားက အံ့ဖွယ်ထူးခြားပုံပေါ်လာသည်။

သို့သော်လည်း ကျောက်စိမ်းအလင်းသည် လှိုဏ်ဂူထဲမှာ အချိန်ကြာကြာ တည်ရှိမနေပေ။ စက္ကန့်ပိုင်းမျှ ကြာမြင့်ပြီးနောက် ကျောက်စိမ်းအလင်းက မြန်ဆန်စွာ ပြန်ဆုတ်သွားသည်။ နောက်အခိုက်အတန့်မှာ ကျောက်စိမ်းအလင်းက သီရှီထျန်၏ ခန္ဓာကိုယ်ထဲသို့ ဝင်ရောက်သွားသည်။ လျှို့ဝှက်ဆန်းကြယ်သော စွမ်းအင်က တခြားမည်သည့်နေရာကိုမှ မသွားပေ။ ယင်းက သူ၏ ခန္ဓာကိုယ်ထဲသို့ ဝင်ရောက်သွားသည်နှင့် နှလုံးဆီသို့ တန်းမတ်စွာ ဦးတည်သွားသည်။

သန်စွမ်းကြံ့ခိုင်သော နှလုံးသည် မရပ်မနား ခုန်မြည်နေသည်။ သို့သော်လည်း နှလုံးခုန်သံ၏ စည်းချက်သည် ယခင်ကထက် အများကြီး ပိုပြင်းထန်လာသည်။ အပေါ်ယံတွင် မီးခိုးရောင်အငွေ့များ ရှိနေသည်။ လျှို့ဝှက်ဆန်းကြယ်သော စွမ်းအင်သည် နှလုံးအရှေ့မှာ ထွက်ပေါ်လာသည်နှင့်ချက်ချင်း မိစ္ဆာစွမ်းအားနှင့် မိုးမြေဝိညာဉ်စွမ်းအားကဲ့သို့ တစ်လုပ်တည်း ဝါးမျိုခံလိုက်ရသည်။

အသစ်ဖွင့်လှစ်ထားသော မိစ္ဆာစံအိမ်ထဲတွင် အဖြူရောင်ကျောက်စိမ်းအလင်းက လေထဲမှာ ထွက်ပေါ်လာသည်။ အဖြူရောင်ကျောက်စိမ်းအလင်းသည် မိစ္ဆာစံအိမ်၏ ဘေးပတ်ဝန်းကျင်မှာ စက်ဝိုင်းသဏ္ဍာန် လှည့်ပတ်နေသည်။ တစ်ခဏကြာပြီးနောက် ယင်းက မိစ္ဆာစံအိမ်၏ အလယ်မှာ ရပ်နေသော သီရှီထျန်ဆီသို့ ပျံသန်းသွားသည်။

“ အမ် ”

လျှို့ဝှက်ဆန်းကြယ်သော စွမ်းအင်က သူနှင့်ပေါင်းစပ်သွားသည့်အခါ မူလက ပင်ပန်းနွမ်းနယ်မှုက ချက်ချင်း ပျောက်ကွယ်သွားကြောင်း သီရှီထျန် ခံစားမိသွားသည်။ ရွှင်လန်းတတ်ကြွမှုက ရုတ်တရက် ပြန်ပေါ်လာသည်။ သူ၏ စိတ်ဝိညာဉ်တစ်ခုလုံးက ချက်ချင်း လန်းဆန်းသွားသည်။ ဆန်းကြယ်သော အသံကို ထုတ်လွှတ်ရာမှ ဖြစ်ပေါ်လာသော ဝိညာဉ်တုန်ခါမှုက ဖြည်းဖြည်းချင်း ပြန်ငြိမ်သက်သွားသည်။ နာကျင်မှုသည်လည်း သက်သာလျော့ပါးသွားသည်။ ထို့ပြင် သူ၏ ခန္ဓာကိုယ်ထဲမှ စွမ်းအားက အပြည့်အဝ ပြန်အားပြည့်သွားသည်။ ယခု သူ၏ အခြေအနေက ဖော်မပြနိုင်အောင် သက်တောင့်သက်သာရှိနေသည်။ ယခု သူက အထွတ်အထိပ်အခြေအနေသို့ ပြန်ရောက်သွားသည်။ ချက်ချင်းဆိုသလိုပင် သူက စိတ်ဓာတ်ကျနေရာမှ စိတ်ဓာတ်ပြန်တတ်ကြွသွားသည်။ သူ၏ စိတ်အခြေအနေက အမြင့်ဆုံးသို့ ရောက်ရှိသွားသည်။

“ အဲ့ဒါ ကျောက်စိမ်းသန္ဓေသား… အဲ့ဒါ ကျောက်စိမ်းသန္ဓေသားပဲ… စောစောက ငါလုပ်ခဲ့တဲ့ ပြင်ဆင်မှုက တကယ်အကျိုးသက်ရောက်မှုရှိတာပဲ... ကျောက်စိမ်းသန္ဓေသားကို ကြိုပြင်ဆင်ခဲ့တာ ကံကောင်းတာပဲ… မဟုတ်ရင် တတိယမြောက်အသံကို ထုတ်လွှတ်ဖို့ ငါ့မှာ စွမ်းအားအလုံအလောက်ရှိမှာ မဟုတ်ဘူး ”

သီရှီထျန်က မျက်လုံးဝင်းလက်သွားသည်။ သူ၏ နဖူးပေါ်မှ ခရမ်းရောင်ဘုရင်စာလုံးသည် မူလက အရောင်မှေးမှိန်နေရာမှ ပြန်လည်ထွန်းလင်းလာသည်။ ယင်းက ခရမ်းရောင်မီးတောက်တစ်ခုနှယ် တအိအိလှုပ်ယမ်းနေသည်။ သားရဲဘုရင်အရှိန်အဝါက သူ၏ ခန္ဓာကိုယ်တစ်ခုလုံးမှာ ပြည့်လျှံနေသည်။ သူက နောက်ထပ် စဉ်းစားမနေဘဲ တတိယမြောက် ဆန်းကြယ်အသံကို ချက်ချင်း ထုတ်လွှတ်လိုက်သည်။

“ ဝေါင်း ”

တတိယမြောက်အသံကို သူ၏ ပါးစပ်မှ ထုတ်လွှတ်ခဲ့ခြင်း မဟုတ်ပေ။ အဘယ့်ကြောင့်ဆိုသော် ဆန်းကြယ်အသံသုံးသံသည် လက်ရှိ သူ၏ စွမ်းရည်ဖြင့် ထိန်းချုပ်နိုင်သောအရာမဟုတ်ပေ။ သူက ယခုထက် ဆယ်ဆပိုပြီးသန်မာလျှင်ပင် ဆန်းကြယ်အသံသုံးသံကို အသုံးပြုနိုင်လိမ့်မည် မဟုတ်ပေ။ ယင်းကို အသံမှ ထွက်ပေါ်လာခြင်း ဖြစ်သည်ဟုပင် မဆိုနိုင်ပေ။ ယင်းက သူ့ဝိညာဉ်၏ တုန်ခါမှုမှ ထွက်ပေါ်လာခြင်း ဖြစ်သည်။ ထို့ကြောင့် အလွန်ပြင်းထန်သော နာကျင်မှုက ထပ်မံ ထွက်ပေါ်လာသည်။ အရှေ့နှစ်ခေါက်နှင့် နှိုင်းယှဉ်လျှင် ယင်းက အဆပေါင်းများစွာ ပိုပြင်းထန်သည်။ ဖော်မပြနိုင်သော နာကျင်မှုက ထွက်ပေါ်လာသည်။ ယင်းက အလွန်ပြင်းထန်လေရာ စိတ်ခွန်အားမသန်မာသော လူဆိုလျှင် နေရာမှာတင် ရူးသွပ်သွားနိုင်၏။

စိတ်ခွန်အား အလွန်သန်စွမ်းသော စက်ကရာသည်ပင် အံတင်းတင်းကြိတ်၍ နာကျင်မှုကို တောင့်ခံနေရသည်။

တတိယမြောက် ဆန်းကြယ်အသံ ပဲ့တင်ထပ်သွားသည့်အခါ ကြီးမားသော အပြောင်းအလဲတစ်ခုက မိစ္ဆာစံအိမ်ထဲမှာ ထွက်ပေါ်လာသည်။ မိစ္ဆာစံအိမ်သည် ရုတ်တရက် အရွယ်အစားကြီးမားလာပြီး အပြင်ဘက်သို့ မြန်ဆန်စွာ ကျယ်ပြန့်သွားသည်။ ထို့နောက် ဖျက်ဆီးခံလိုက်ရသော မီးခိုးရောင်နယ်မြေက မိစ္ဆာစံအိမ်၏ ပိုင်နက်ဖြစ်လာသည်။ မျက်စိတစ်မှိတ်အတွင်းမှာ မိစ္ဆာစံအိမ်က မူလထက် ဆယ်ဆပိုကြီးမားသွားသည်။

မိစ္ဆာစံအိမ်၏ ကြီးမားလာမှုက အကန့်အသတ်မရှိခြင်း မဟုတ်ပေ။ မူလထက် ဆယ်ဆပိုကြီးမားသွားပြီးနောက် ယင်းက ရုတ်တရက် ရပ်တန့်သွားသည်။ ထို့နောက် မိစ္ဆာစံအိမ်သည် အံ့ဖွယ်ကောင်းသော စုပ်အားကို ထုတ်လွှတ်လိုက်သည်။ ထိုစုပ်အားအောက်မှာ ဘေးပတ်ဝန်းကျင်မှ မူလစွမ်းအင်က အဆက်မပြတ် တုန်ယင်သွားသည်။ ယင်းတို့က လုံးဝ မခုခံနိုင်ဘဲ မိစ္ဆာစံအိမ်ထဲသို့ မြန်ဆန်စွာ စုပ်သွင်းခံလိုက်ကြရသည်။

မီးခိုးရောင်မူလစွမ်းအင်သည် မိစ္ဆာစံအိမ်ထဲသို့ ဝင်ရောက်သွားသည်နှင့် မပျံ့နှံ့သွားပေ။ ယင်းက မိစ္ဆာစံအိမ်နှင့်လည်း မပေါင်းစပ်သွားပေ။ ယင်းအစား မူလစွမ်းအင်သည် မိစ္ဆာစံအိမ်၏ အလယ်ဗဟိုမှာ အမြန်စုဝေးသွားသည်။ ပမာဏများပြားသော မူလစွမ်းအင်က အတူတကွ စုဝေးသွားသည့်အခါ ဝဲကတော့တစ်ခု ဖြစ်ပေါ်လာသည်။ ဝဲကတော့သည် မြန်ဆန်စွာ လှည့်ပတ်နေပြီး မူလစွမ်းအင်ကို ဝဲကတော့ထဲသို့ အဆက်မပြတ် စုပ်သွင်းနေသည်။

“ ဘာဖြစ်နေတာလဲ… သွေးမျိုးဆက်အမွေအနှစ်ထဲမှာ ငါရှာတွေ့ခဲ့တဲ့ သတင်းအချက်အလက်တွေထဲမှာ ဒီလိုအဖြစ်အပျက် မပါဝင်ပါဘူး… ငါ့ရဲ့ မိစ္ဆာစံအိမ်က ဘာဖြစ်နေတာလဲ ”

သူ့အရှေ့မှ အံ့ဖွယ်မြင်ကွင်းကို သီရှီထျန်မြင်သောအခါ သူက အံ့ဩသွားသည်။ သူ၏ သွေးမျိုးဆက်အမွေအနှစ်ထဲမှာ ထိုသို့မှတ်တမ်း မပါဝင်ပေ။ သို့သော်လည်း သူက တစ်ခဏမျှသာ အံ့ဩသွားသည်။ အဘယ့်ကြောင့်ဆိုသော် ယင်းက ကောင်းမွန်သော ကိစ္စဖြစ်ကြောင်း သူသိလိုက်သည်။

အသံက ဆက်ပြီး ပဲ့တင်ထပ်နေဆဲပင်။

ဝိညာဉ်တုန်ခါမှုသည် စွမ်းအားအများကြီးကို ကုန်ဆုံးစေသည်။ သို့သော်လည်း ကျောက်စိမ်းသန္ဓေသားကြောင့် အစောနက သူကုန်ခမ်းသွားခဲ့သော စွမ်းအားက အပြည့်အဝ ပြန်ဖြည့်တင်းသွားသည်။

ထို့ပြင် အသံပဲ့တင်ထပ်နေသရွေ့ မိစ္ဆာစံအိမ်၏ အပြင်ဘက်မှ မူလစွမ်းအင်က အထဲသို့ စုပ်သွင်းခံလိုက်ရပြီး ဝဲကတော့တစ်ခုအဖြစ် မြန်ဆန်စွာ လှည့်ပတ်သွားကြောင်း သူသတိထားမိသွားသည်။

ငတုံးတစ်ယောက်သည်ပင် ဆန်းကြယ်အသံက အချိန်ကြာကြာ ပဲ့တင်ထပ်နေလေ သူ့အတွက် အကျိုးပိုရှိလေဖြစ်ကြောင်း သိနိုင်ပေသည်။ ဤသို့အခွင့်အရေးကောင်းကို အမိအရမဖမ်းဆုပ်လျှင် သူက တကယ့်ငတုံး ဖြစ်သွားလိမ့်မည်။

ထို့ကြောင့် သီရှီထျန်သည် နောက်ထပ် တုံ့ဆိုင်းမနေဘဲ တတိယမြောက် ဆန်းကြယ်အသံကို အချိန်ကြာကြာ ထုတ်လွှတ်နိုင်စေရန် အစွမ်းကုန် ကြိုးစားအားထုတ်လိုက်သည်။

မိစ္ဆာစံအိမ်သည် သူ၏ နှလုံးထဲမှာ တည်ရှိသည်။ မူလစွမ်းအင်သည် အကန့်အသတ်မဲ့စွာ တည်ရှိနေခြင်းမဟုတ်ပေ။ ယင်း၏ တစ်စိတ်တစ်ပိုင်းက မိစ္ဆာစံအိမ်ဖွင့်လှစ်ရန် အသုံးပြုခြင်းခံလိုက်ရသည်။ ယခု ဆန်းကြယ်အသံ၏ ပဲ့တင်ထပ်မှုအောက်မှာ ကျန်ရှိသော မူလစွမ်းအင်က မိစ္ဆာစံအိမ်ထဲသို့ မြန်ဆန်စွာ စုပ်သွင်းခံလိုက်ရသည်။ အချိန်တစ်ခဏကြာပြီးနောက် မိစ္ဆာစံအိမ်၏ အပြင်ဘက်မှ မူလစွမ်းအင်သည် မိစ္ဆာစံအိမ်ထဲသို့ အကုန်အစင် စုပ်သွင်းခံလိုက်ရသည်။

ဤအခိုက်အတန့်မှာ မိစ္ဆာစံအိမ်၏ အလယ်ဗဟိုမှ မီးခိုးရောင်ဝဲကတော့သည် အံ့ဖွယ်ကောင်းသော အလျင်ဖြင့် မြန်ဆန်စွာ လှည့်ပတ်နေသည်။ မူလစွမ်းအင်သည် အစတွင် အငွေ့သာ ဖြစ်သည်။ သို့သော်လည်း ဤအခိုက်အတန့်မှာ ယင်းက ဝဲကတော့၏ လှည့်ပတ်မှုအောက်မှာ အရည်ဘောလုံးအဖြစ် အမှန်တကယ် ဖွဲ့စည်းသွားသည်။ ထို့ပြင် ဝဲကတော့၏ လှည့်ပတ်မှုအမြန်နှုန်းက လုံးဝ မလျော့ကျသွားပေ။ ယင်းအစား ဝဲကတော့က ပိုပြီးမြန်ဆန်စွာ လှည့်ပတ်သွားနေသည်။

အားကောင်းသော လှိုဏ်းဂယက်များက ဝဲကတော့ထံမှ အဆက်မပြတ် ထွက်ပေါ်လာသည်။

“ မကောင်းတော့ဘူး ”

ယင်းကို သီရှီထျန်မြင်သောအခါ သူက ထိတ်လန့်ချောက်ချားသွားပြီး တိတ်တဆိတ် အော်လိုက်သည်။ ဝဲကတော့သည် မရပ်တန့်နိုင်ပေ။ အကယ်၍ ယင်းက ရုတ်တရက် ပေါက်ကွဲသွားမည်ဆိုလျှင် ယင်းထဲမှာ ကိန်းအောင်းနေသော အံ့ဖွယ်စွမ်းအားက သူ၏ မိစ္ဆာစံအိမ်ကို တစ်ချက်တည်းဖြင့် ဖျက်ဆီးပစ်နိုင်သည်။

အခန်း(၉၂)

“ ရွှီး ”

သို့သော်လည်း သူစိုးရိမ်နေသောအရာက မဖြစ်ပေါ်လာပေ။

ဝဲကတော့၏ လှည့်ပတ်မှုအလျင်က ရုတ်တရက် အကန့်အသတ်သို့ ရောက်ရှိသွားသည့်အခါ ယင်းက မရေမတွက်နိုင်သော အဖြူရောင်အလင်းတန်းများကို ထုတ်လွှတ်လိုက်သည်။ အဖြူရောင်အလင်းက မိစ္ဆာစံအိမ်တစ်ခုလုံးမှာ ပြည့်နှက်သွားသည်။ သီရှီထျန်၏ အသိစိတ်သည်ပင် အဖြူရောင်အလင်းဖြင့် ဖုံးလွှမ်းခံလိုက်ရသည်။ သူ၏ အသိစိတ်က အံ့ဖွယ်ကောင်းစွာ ဗလာဖြစ်သွားသည်။ ဤသည်မှာ အရာအားလုံးက ရပ်တန့်သွားသည့်အလားပင်။ မိစ္ဆာစံအိမ်ထဲမှာ မည်သည့်အရာများ ဖြစ်ပျက်နေကြောင်း သူအာရုံမခံနိုင်တော့ပေ။

ထိုအဖြူရောင်အလင်းထဲမှာ မမျှော်လင့်ထားသော တစ်စုံတစ်ခု ဖြစ်ပေါ်လာသည်။

မူလစွမ်းအင်မှ ဖွဲ့စည်းထားသော အရည်ဘောလုံးသည် အဖြူရောင်အလင်းနှင့် အပြည့်အဝ ပေါင်းစည်းသွားသည်။

“ ဘီး ”

“ မူး ”

“ ဝေါင်း ”

ဆန်းကြယ်သော အသံသုံးသံက မိစ္ဆာစံအိမ်ထဲမှာ ထွက်ပေါ်လာသည်။ ယင်းတို့ကို သီရှီထျန် ထုတ်လွှတ်ခဲ့ခြင်း မဟုတ်ပေ။ ယင်းအစား အသံသုံးသံက မိစ္ဆာစံအိမ်ထဲမှာ သဘာဝအလျောက် မွေးဖွားလာကြသည်။ ထိုဆန်းကြယ်သော အသံသုံးသံသည် သီရှီထျန်ထုတ်လွှတ်ခဲ့စဉ်ကထက် အများကြီး ပိုဆွဲဆောင်မှုရှိပြီး အံ့ဖွယ်ကောင်းသည်။ ဆန်းကြယ်သော အသံသုံးသံ ထွက်ပေါ်လာသည်နှင့် ရှေးဟောင်းနတ်ဘုရားသင်္ကေတသုံးခုက မိစ္ဆာစံအိမ်၏ ကောင်းကင်ပေါ်မှာ လျှို့ဝှက်ဆန်းကြယ်စွာ ဖွဲ့စည်းသွားကြသည်။

နတ်ဘုရားသင်္ကေတများ၏ ထွက်ပေါ်လာမှုက အတော်လေး ထူးဆန်းသည်။ ယင်းတို့က ကိုယ်ပိုင်အသက်ဝိညာဉ်ရှိနေသည့်အလား အဆက်မပြတ် ပြောင်းလဲနေကြသည်။ ထို့ကြောင့် နတ်ဘုရားသင်္ကေတများ၏ စစ်မှန်သော အသွင်သဏ္ဍာန်ကို မမြင်နိုင်ပေ။

နတ်ဘုရားသင်္ကေတသုံးခုသည် ဖွဲ့စည်းသွားသည်နှင့်ချက်ချင်း မိစ္ဆာစံအိမ်၏ အလယ်မှ အရည်ဘောလုံးဆီသို့ မြန်ဆန်စွာ ပျံသန်းသွားကြသည်။ ယင်းတို့က အရည်ဘောလုံးနှင့် လွယ်ကူစွာ ပေါင်းစပ်သွားကြသည်။ ထိုသို့ပေါင်းစပ်သွားသည့်အခါ လျှို့ဝှက်ဆန်းကြယ်ပြီး အံ့ဖွယ်ကောင်းသော အပြောင်းအလဲတစ်ခုက ဖြစ်ပေါ်လာလေသည်။

အရည်ဘောလုံးမှာ ကိုယ်ပိုင်အသက်ဝိညာဉ် ရှိနေသည့်အလား အောက်မေ့ရ၏။ ယင်းက အစဉ်အမြဲ လူးလွန့်သွားပြီး ပုံသဏ္ဍာန်အမျိုးမျိုး ပြောင်းလဲသွားသည်။ အချိန်တစ်ခဏကြာပြီးနောက် ယင်းက ခြေသုံးချောင်းပါသော ဆေးမီးဖိုငယ်တစ်ခုအဖြစ် အသွင်ပြောင်းလဲသွားသည်။

ထိုဆေးမီးဖို ထွက်ပေါ်လာသည့်အခိုက် မိစ္ဆာစံအိမ်ထဲမှာ ပြည့်နှက်နေသော အဖြူရောင်ကျောက်စိမ်းအလင်းက ချက်ချင်း ပြန်ဆုတ်သွားသည်။ ဤသည်မှာ ငှက်များက သူတို့၏ အသိုက်ဆီသို့ ပြန်သွားသည့်အလားပင်။ အဖြူရောင်အလင်းက ကျောက်စိမ်းဆေးမီးဖိုဆီသို့ ဦးတည်သွားသည်။

ကျောက်စိမ်းဆေးမီးဖိုသည် အဖြူရောင်အလင်း၏ ဝင်ရောက်လာမှုကို လုံးဝ မငြင်းဆန်ပေ။ ယင်းက ဝေလငါး ရေစုပ်သကဲ့သို့ အဖြူရောင်အလင်းအားလုံးကို တစ်လုပ်တည်း ဝါးမျိုလိုက်သည်။

“ အဲ့ဒါက… ”

မိစ္ဆာစံအိမ်ထဲ၌ အဖြူရောင်အလင်း ပျောက်ကွယ်သွားသည့်အခါ သီရှီထျန်က သူ၏ စိတ်အာရုံကို ပြန်ရရှိသွားသည်။ သူသတိပြန်ဝင်သွားသည့်အခိုက် ပထမဆုံး လုပ်ဆောင်လိုက်သည်မှာ မိစ္ဆာစံအိမ်၏ အလယ်သို့ ကြည့်လိုက်ခြင်း ဖြစ်သည်။ ထိုသို့အပြောင်းအလဲက သူမမျှော်လင့်ထားသောအရာ ဖြစ်သည်။ မိစ္ဆာစံအိမ်သည် မိစ္ဆာကျင့်ကြံခြင်း၏ အခြေခံအုတ်မြစ် ဖြစ်သည်။ ထို့ကြောင့် ဆိုးဝါးသော တစ်စုံတစ်ခု ဖြစ်လာမည်ကို သူမစိုးရိမ်ဘဲ မနေနိုင်ပေ။

ယခု သူကြည့်လိုက်သည့်အခါ အံ့ဩမှင်သက်သွားသည်။

မိစ္ဆာစံအိမ်၏ အလယ်မှာ ကျောက်စိမ်းဆေးမီးဖိုတစ်လုံးက ရုတ်တရက် ထွက်ပေါ်လာကြောင်း သူမြင်သွားသည်။ ဆေးမီးဖိုမှာ ခြေသုံးချောင်းရှိပြီး ယင်း၏ မျက်နှာပြင်ပေါ်မှာ လျှို့ဝှက်ဆန်းကြယ်သော မှော်သင်္ကေတများကို အပြည့်ရေးထွင်းထားသည်။ ဆေးမီးဖိုသည် ရှေးဟောင်းဆန်သော အရှိန်အဝါနှင့် လျှို့ဝှက်ဆန်းကြယ်သော အငွေ့အသက်ကို ထုတ်လွှတ်နေသည်။ ထို့ပြင် ဆေးမီးဖိုသည် ရပ်မနေပေ။ ယင်းက နေရာမှာ ဖြည်းဖြည်းချင်း လှည့်နေသည်။

မိစ္ဆာစံအိမ်ဖွဲ့စည်းသွားသည့်အခိုက် အနက်ရောင်အခိုးအငွေ့များက စံအိမ်ထဲမှာ အစဉ်မပြတ် ထွက်ပေါ်လာသည်။ ထိုအခိုးအငွေ့မှ ထုတ်လွှတ်နေသော အရှိန်အဝါသည် သီရှီထျန် အလွန်ရင်းနှီးသောအရာ ဖြစ်သည်။ ယင်းက သူ၏ ခန္ဓာကိုယ်ထဲမှ မိစ္ဆာစွမ်းအားဖြစ်သည်။

မိစ္ဆာစံအိမ်သည် မိစ္ဆာစွမ်းအားကို သိုလှောင်ရန် တည်ရှိနေသောအရာ ဖြစ်သည်။ အတိတ်တွင် သူ့မှာ မိစ္ဆာစံအိမ်မရှိသောကြောင့် မိစ္ဆာစွမ်းအားကို သူ၏ မရီဒျန်များထဲမှာသာ သိုလှောင်ခဲ့သည်။ ထိုသို့လုပ်ဆောင်ရာတွင် ချို့ယွင်းချက်တစ်ခုရှိသည်။ သူ၏ မရီဒျန်အားလုံးထဲမှာ မိစ္ဆာစွမ်းအားဖြင့် ပြည့်လျှံနေသည့်အခါ သူ၏ ကျင့်ကြံခြင်းက အထွတ်အထိပ်သို့ ရောက်ရှိသွားသည်။ မိစ္ဆာစံအိမ်မရှိလျှင် သူက နောက်ထပ် ကျင့်ကြံနိုင်တော့မည် မဟုတ်ချေ။

မိစ္ဆာစံအိမ်ဖွဲ့စည်းသွားသည့်အခါ မိစ္ဆာစွမ်းအားကို မရီဒျန်များထဲမှာ သိုလှောင်ရန် မလိုအပ်တော့ပေ။ မိစ္ဆာစွမ်းအားက မိစ္ဆာစံအိမ်ထဲသို့ အလိုအလျောက် စီးဆင်းသွားလိမ့်မည်။

တစ်နည်းဆိုရသော် မရီဒျန်များသည် မိစ္ဆာစွမ်းအားအတွက် ယာယီခိုလှုံရာနေရာဖြစ်ပြီး မိစ္ဆာစံအိမ်သည် အစစ်အမှန်နေအိမ် ဖြစ်သည်။

ဤအခိုက်အတန့်မှာ သူ၏ ခန္ဓာကိုယ်ထဲမှ မိစ္ဆာစွမ်းအားက မိစ္ဆာစံအိမ်ထဲသို့ အဆက်မပြတ် စီးဆင်းသွားနေသည်။ မိစ္ဆာစွမ်းအား၏ ဝင်ရောက်လာမှုက ကျောက်စိမ်းဆေးမီးဖို၏ သက်ဝင်လှုပ်ရှားမှုကို နိုးထလာစေဟန် ရ၏။ ကျောက်စိမ်းဆေးမီးဖို၏ လှည့်ပတ်မှုက အနည်းငယ် ပိုမြန်လာစဉ် အရပ်မျက်နှာအသီးသီးမှ မိစ္ဆာစွမ်းအားက ကျောက်စိမ်းဆေးမီးဖို၏ စုပ်ယူခံလိုက်ရသည်။

“ အငွေ့ကို အရည်ပြောင်းခြင်း… ”

စက်ကရာသည် ကျောက်စိမ်းဆေးမီးဖို၏ အပြောင်းအလဲကို အံ့ဩစွာ ကြည့်လိုက်သည်။ မိစ္ဆာစွမ်းအားသည် အစတွင် အငွေ့အခြေအနေမှာ ရှိနေ၏။ သို့သော်လည်း ယင်းက ကျောက်စိမ်းဆေးမီးဖိုထဲ ဝင်ရောက်သွားသည့်အခါ ထူထဲသော အနက်ရောင်မြူခိုးထုအဖြစ် ချက်ချင်း ပြောင်းလဲသွားသည်။ အနက်ရောင်မြူခိုးထုသည် မိစ္ဆာစွမ်းအားမှ ပြောင်းလဲသွားသောအရာ ဖြစ်သည်။ မိစ္ဆာစွမ်းအားက ပိုမိုစုဝေးသွားပြီး ကျောက်စိမ်းဆေးမီးဖို၏ လှည့်ပတ်မှုက ပိုမိုမြန်ဆန်လာသည့်အခါ လျှို့ဝှက်ဆန်းကြယ်သော စွမ်းအင်တစ်မျိုးက ဆေးမီးဖိုထဲမှာ ထွက်ပေါ်လာဟန် ရ၏။ ထိုစွမ်းအင်က အနက်ရောင်မြူခိုးထုကို ပိုပိုပြီး သိပ်သည်းစေပြီး အရည်အဖြစ် ပြောင်းလဲပေးသည်။

“ ပေါက် ”

ကြည်လင်သော အသံတစ်သံက ဆေးမီးဖိုထံမှ ထွက်ပေါ်လာသည်။ မင်ရည်သဖွယ် အလွန်မည်းနက်သော အရည်တစ်စက်သည် ကျောက်စိမ်းဆေးမီးဖိုထဲမှ လျှို့ဝှက်ဆန်းကြယ်စွာ ကျဆင်းလာသည်။ ထိုအနက်ရောင်အရည်သည် ဆေးမီးဖို၏ အောက်ခြေမှာ လွင့်မျောနေသည်။

ယင်းက မိစ္ဆာစွမ်းအား၏ အရည်ဖွဲ့စည်းမှု ဖြစ်သည်။

မိစ္ဆာစွမ်းအားက အရည်အဖြစ် ပြောင်းလဲသွားခြင်းသည် “ ကျားဟိန်းသံကျင့်စဉ် ”၏ အဆင့်ချိုးဖြတ်မှု အောင်မြင်သွားသော လက္ခဏာ ဖြစ်သည်။ ယင်းက မိစ္ဆာသားရဲတစ်ကောင်အဖြစ် ဆင့်ကဲပြောင်းလဲသွားသော အဓိက အသွင်လက္ခဏာလည်း ဟုတ်၏။

ထိုအနက်ရောင်အရည်သည် အောင်မြင်မှု အမှတ်သင်္ကေတ ဖြစ်သည်။

ကျောက်စိမ်းဆေးမီးဖို သုံးကြိမ်လှည့်ပတ်သွားသည့်အခါတိုင်း အနက်ရောင်မြူခိုးထုက အရည်တစ်စက် ထုတ်လုပ်ပေးလိမ့်မည်။ သီရှီထျန်သည် ကျောက်စိမ်းဆေးမီးဖိုကို သေချာကြည့်လိုက်သည်။ သူက မိစ္ဆာအာရုံကို အသုံးပြု၍ စစ်ဆေးကြည့်လိုက်သည့်အခါ အံ့ဩမှင်သက်သွားသည်။ မိစ္ဆာအရည်တစ်စက်ထဲမှာ ကိန်းအောင်းနေသော မိစ္ဆာစွမ်းအားသည် အငွေပုံစံဖြင့် ရှိနေသော မိစ္ဆာစွမ်းအားထက် အဆတစ်ရာ ပိုပြီးသိပ်သည်းသည်။

မိစ္ဆာစွမ်းအားသည် ပိုပြီးသန့်စင်လာသည်။ ထိုမျှသာမဟုတ်ပေ။ ယင်းကို သူ၏ အတွေးတစ်ချက်ဖြင့် ဆန္ဒရှိသကဲ့သို့ ထိန်းချုပ်နိုင်သည်ဟု သူခံစားမိသည်။ ဤသည်မှာ အရည်ဖွဲ့စည်းသွားသော မိစ္ဆာစွမ်းအားက သူ့ကိုယ်ပိုင်ခြေလက်များ ဖြစ်သည့်အလားပင်။ ယခု သူက စွမ်းအား(၁)ရာခိုင်နှုန်းကိုသာ အသုံးပြုလျှင်ပင် အတိတ်၌ စွမ်းအား(၁၀)ရာခိုင်နှုန်းဖြင့် သူမလုပ်ဆောင်နိုင်ခဲ့သော အရာများကို လွယ်ကူစွာ လုပ်ဆောင်နိုင်သွားလိမ့်မည်။

ကျောက်စိမ်းဆေးမီးဖိုသည် အရွယ်အစား မကြီးမားပေ။ ယင်းက မြေအိုးအရွယ်အစားခန့်သာ ရှိ၏။ သို့သော်လည်း သူ၏ ခန့်မှန်းချက်အရ သူ၏ ခန္ဓာကိုယ်ထဲမှ မိစ္ဆာစွမ်းအင်အားလုံးကို အရည်အဖြစ် သိပ်သည်းမည်ဆိုလျှင် အများဆုံး အရည်စက်(၁၀၀)ခန့်သာ ရရှိနိုင်လိမ့်မည်။ အရည်စက်တစ်ရာသည် ကျောက်စိမ်းဆေးမီးဖို၏ အောက်ခြေကို ပြည့်သွားစေရန်သာ လုံလောက်သည်။

“ ကောင်းတယ်… အရမ်းကောင်းတယ် ”

သီရှီထျန်သည် မိစ္ဆာစံအိမ်၏ အပြောင်းအလဲများကို စစ်ဆေးလေ့လာလိုက်သည်။ ကျောက်စိမ်းဆေးမီးဖိုကို သူကြည့်နေစဉ် ဆင်ခြင်နားလည်သော အမူအရာက သူ၏ မျက်နှာပေါ်မှာ ထွက်ပေါ်လာသည်။

“ အခု ငါနားလည်ပြီ… အသံသုံးသံလျှို့ဝှက်နည်းလမ်းအရ သာမန်မိစ္ဆာစံအိမ်ကို ဖွင့်လှစ်မယ်ဆိုရင် ဒုတိယမြောက် အသံနဲ့တင် လုံလောက်ပြီ… တတိယမြောက်အသံ ပဲ့တင်ထပ်သွားတဲ့အခါ အဲ့ဒါက ပထမအသံနှစ်သံနဲ့ ပေါင်းစပ်သွားပြီး အံ့ဖွယ်ကောင်းတဲ့ ပြောင်းလဲမှုကို အစပျိုးပေးလိမ့်မယ်… အဲ့ဒါက မိုးမြေကို ဝါးမျိုပြီး မိစ္ဆာစံအိမ်ထဲမှာ ဆေးမီးဖိုကို ဖွဲ့စည်းပေးလိမ့်မယ်… ဆေးမီးဖိုက မိစ္ဆာစံအိမ်ရဲ့ အဓိကသော့ချက်ပဲ ”

မည်သို့ဖြစ်ပါစေ သူက သာမန်တိရိစ္ဆာန်တစ်ကောင် မဟုတ်ပေ။ သူက လူသားတစ်ယောက်ကဲ့သို့ အသိဉာဏ်ရှိသည်။

ယခု သူ့အရှေ့မှ အပြောင်းအလဲများကို သေချာစစ်ဆေးကြည့်လိုက်ပြီး ယင်းတို့ကို သွေးမျိုးဆက်အမွေအနှစ်မှ သူရရှိလာသော သတင်းအချက်အလက်များနှင့် ယှဉ်တွဲလိုက်သည့်အခါ မိစ္ဆာစံအိမ်ဖွင့်လှစ်ခြင်း၏ အဓိကအနှစ်သာရကို သူနားလည်သွားသည်။ မိစ္ဆာစံအိမ်ကို ဖွင့်လှစ်ရန် ဒုတိယမြောက်အသံနှင့်တင် လုံလောက်၏။ တတိယမြောက်အသံသည် မိစ္ဆာစံအိမ်၏ အရည်အသွေးကို တိုးမြှင့်ပေးသော လုပ်ငန်းစဉ် ဖြစ်သည်။

သူ၏ ခန့်မှန်းမှုက မမှားပေ။

အကယ်၍ သူသာ တတိယမြောက်အသံကို မထုတ်လွှတ်ဘဲ ဒုတိယမြောက်အသံနှင့်တင် နှစ်ချိုက်စွာ အိပ်မောကျသွားမည်ဆိုလျှင် သူပြန်နိုးလာသည့်အခါ မိစ္ဆာစံအိမ်၏ အမြင့်ဆုံး ရောက်ရှိနိုင်သော အဆင့်က မြေကြီးအဆင့်သာ ဖြစ်လိမ့်မည်။ ယင်းက သာမန်မိစ္ဆာစံအိမ်များထက် အများကြီး ပိုတည်ငြိမ်ပြီး ပိုကြီးမားသော်လည်း လက်ရှိ သူပိုင်ဆိုင်ထားသော အခြေအနေကို နှိုင်းယှဉ်နိုင်လိမ့်မည် မဟုတ်ချေ။

သူ၏ မိစ္ဆာစံအိမ်ထဲမှာ ဖွဲ့စည်းသွားသော ကျောက်စိမ်းဆေးမီးဖိုကို မိစ္ဆာသန့်စင်ခြင်းမီးဖိုဟု ခေါ်သည်။ ယင်းကို ရှေးဟောင်းမိစ္ဆာစံအိမ်များမှာသာ တွေ့ရလေ့ရှိသည်။

ယင်း၏ နာမည်ကြောင့် နားလည်မှုလွဲသွားနိုင်သည်။ “ မိစ္ဆာသန့်စင်ခြင်း ”သည် မိစ္ဆာသားရဲများကို သန့်စင်သည်ဟု မဆိုလိုပေ။ ယင်းအစား မိုးမြေကြားမှ စွမ်းအင်အားလုံးကို သန့်စင်ခြင်း ဖြစ်သည်။ ကျောက်စိမ်းဆေးမီးဖိုသည် မိုးမြေကြားမှ မည်သည့်စွမ်းအင်ကိုမဆို မိစ္ဆာစွမ်းအားအဖြစ် သန့်စင်နိုင်သည်။ ထိုသို့သန့်စင်ခြင်းကို မိစ္ဆာသန့်စင်ခြင်းမီးဖိုက သူ့ဘာသာ လုပ်ဆောင်လိမ့်မည်။ ယင်းကို သူကိုယ်တိုင် မထိန်းချုပ်လျှင်ပင် ဆေးမီးဖိုက အလိုအလျောက် လှည့်ပတ်နေလိမ့်မည်။ ဆေးမီးဖိုသည် အပြင်လောကမှ မိုးမြေဝိညာဉ်စွမ်းအားကို အလိုအလျောက် စုပ်ယူနိုင်သည်။

မှန်ပေသည်။ တစ်စုံတစ်ယောက်က ဆေးမီးဖိုကို ထိန်းချုပ်ပေးလျှင် စုပ်ယူမှုက အဆပေါင်းများစွာ ပိုမြန်လိမ့်မည်။

ထို့ပြင် မိစ္ဆာသန့်စင်ခြင်းမီးဖိုမှာ မိုးမြေကြားမှ စွမ်းအင်ကို သန့်စင်နိုင်သော စွမ်းရည်တစ်ခုတည်းရှိခြင်း မဟုတ်ပေ။ ယင်းဆီမှာ အံ့ဖွယ်ကောင်းသော စွမ်းရည်အများကြီး ရှိသည်။

ဥပမာ မိစ္ဆာသန့်စင်ခြင်းမီးဖိုမရှိသော မိစ္ဆာသားရဲတစ်ကောင်က ကျင့်ကြံမည်ဆိုလျှင် သူက မိစ္ဆာအရည်ဖွဲ့ရန် သူ၏ ခန္ဓာကိုယ်ထဲမှ မိစ္ဆာစွမ်းအားကို ဖြည်းဖြည်းချင်း သန့်စင်ရလိမ့်မည်။ ထိုသို့လုပ်ငန်းစဉ်က အချိန်အလွန်ကြာသည်။

ထိုအချက်ကို ကြည့်ခြင်းအားဖြင့် မိစ္ဆာသန့်စင်ခြင်းမီးဖိုက မိစ္ဆာသားရဲတစ်ကောင်အတွက် မည်မျှအံ့ဖွယ်ကောင်းသော တည်ရှိမှုဖြစ်ကြောင်း သိနိုင်ပေသည်။

မိစ္ဆာသန့်စင်ခြင်းမီးဖိုဆီမှာ တိုင်းတာသော လုပ်ဆောင်မှုတစ်ခုလည်း ရှိသည်။ မိစ္ဆာအရည်က ဆေးမီးဖိုတစ်ခုလုံးမှာ ပြည့်လျှံသွားသည့်အခါ ထိုအချိန်ကျလျှင် သူက အမြူတေဓာတ်လုံးကို ဖွဲ့စည်းပြီး စစ်မှန်သော မိစ္ဆာသားရဲတစ်ကောင်အဖြစ် ဆင့်ကဲပြောင်းလဲနိုင်လိမ့်မည်။

“ ရွှီး ”

သီရှီထျန်က တိတ်တဆိတ် ဝမ်းသာပျော်ရွှင်နေစဉ် မိစ္ဆာသန့်စင်ခြင်းမီးဖိုက သူ၏ ခန္ဓာကိုယ်ထဲမှ မိစ္ဆာစွမ်းအင်အားလုံးကို အရည်အဖြစ် သန့်စင်ပေးလိုက်သည်။ ဤအခိုက်အတန့်မှာ သူ၏ ခန္ဓာကိုယ်ထဲမှ မိစ္ဆာစွမ်းအင်အားလုံးက အငွေ့အခြေအနေမှ အရည်သို့ ပြောင်းလဲသွားသည်။ မိစ္ဆာစွမ်းအားကို မိစ္ဆာချီဟုလည်း ခေါ်ကြသည်။ ကျောက်စိမ်းဆေးမီးဖိုက ပြင်းထန်စွာ တုန်ယင်သွားသည့်အခါ အရည်အဖြစ် ပြောင်းလဲသွားသော မိစ္ဆာချီက ဆေးမီးဖိုထဲမှ မြန်ဆန်စွာ စီးကျလာသည်။ ယင်းက မိစ္ဆာစံအိမ်မှ ထွက်သွားပြီး သူ၏ ခန္ဓာကိုယ်ထဲမှ မရီဒျန်များထဲသို့ ပြန်စီးဆင်းသွားသည်။

မိစ္ဆာချီသည် မြစ်တစ်စင်းပမာ တသွင်သွင် စီးဆင်းနေသည်။ ယင်းက သူ၏ မရီဒျန်များထဲမှာ မြန်ဆန်စွာ လှည့်ပတ်နေသည်။

“ ဘန်း… ဘန်း… ဘန်း… ”

မိစ္ဆာစွမ်းအား၏ အရည်အသွေးက နောက်တစ်ဆင့်သို့ တိုးမြှင့်သွားသည့်အခါ “ ကျားဟိန်းသံကျင့်စဉ် ”၏ လှည့်ပတ်မှုအမြန်နှုန်းက ယခင်ကထက် အများကြီး ပိုမြန်ဆန်သွားသည်။ သူ၏ ခန္ဓာကိုယ်အပြင်ဘက်မှာ စုဝေးနေသော အနက်ရောင်မိစ္ဆာမြူခိုးက ပိုပြီးထူထဲသွားပြီး သိပ်သည်းသွားသည်။

သူ၏ ဦးခေါင်းထက်မှ မိုးမြေဝိညာဉ်စွမ်းအားဝဲကတော့က ရုတ်တရက် ပိုပြီးမြန်ဆန်စွာ လှည့်ပတ်သွားသည်။ ဝိညာဉ်စွမ်းအားသည် အရပ်မျက်နှာအသီးသီးမှ ထွက်ပေါ်လာပြီး သူ၏ ခန္ဓာကိုယ်ထဲသို့ အဆက်မပြတ် စီးဆင်းသွားသည်။

ထို့ပြင် သီရှီထျန် တံခါးပိတ်ကျင့်ကြံနေသော လှိုဏ်ဂူအပြင်ဘက်တွင် လေနှင့် တိမ်တိုက်၏ အရောင်က ပြောင်းလဲသွားသည်။ ချိုင့်ဝှမ်းထဲ၌ မူလက အလွန်သိပ်သည်းနေသော မိုးမြေဝိညာဉ်စွမ်းအားသည် “ ကျားဟိန်းသံကျင့်စဉ် ”၏ လမ်းညွှန်မှုအောက်မှာ သီရှီထျန်ရှိနေသော လှိုဏ်ဂူထဲသို့ မြန်ဆန်စွာ တိုးဝင်သွားသည်။

အခန်း(၉၃)

ပမာဏများပြားသော ဝိညာဉ်စွမ်းအားက ဝဲကတော့ထဲသို့ ဝင်ရောက်သွားပြီး သီရှီထျန်၏ ခန္ဓာကိုယ်ထဲသို့ အဆက်မပြတ် စီးဆင်းသွားသည်။

“ ဘန်း… ဘန်း… ဘန်း… ”

အရည်အဖြစ် ပြောင်းလဲသွားသော မိစ္ဆာချီက သူ၏ မရီဒျန်များထဲမှာ စီးဆင်းနေသည်။ မိစ္ဆာချီက မရီဒျန်များထဲမှာ ဖြတ်သန်းနေစဉ် မိစ္ဆာချီတစ်စိတ်တစ်ပိုင်းက သူ၏ အသွေးအသားနှင့် ပေါင်းစပ်သွားပြီး သူ၏ ရုပ်ခန္ဓာကိုယ်ကို အစွမ်းတိုးမြှင့်ပေးသည်။

မိစ္ဆာမြူခိုးကြားထဲမှာ သီရှီထျန်၏ ဧရာမကျားခန္ဓာကိုယ်က ကြီးမားစွာ စတင်ပြောင်းလဲသွားသည်။ သူ၏ တစ်ကိုယ်လုံးက လေထိုးလိုက်သော ပူဖောင်းတစ်လုံးနှယ် အဆမတန် ကြီးမားသွားသည်။ မိုးမြေဝိညာဉ်စွမ်းအားက သူ၏ ခန္ဓာကိုယ်ထဲသို့ ဒလဟော တိုးဝင်လာသည့်အခါ ထိုပြောင်းလဲမှုက ပိုပြီးသိသာထင်ရှားသွားသည်။ ဝိညာဉ်စွမ်းအားတစ်စိတ်တစ်ပိုင်းက သူ၏ မရီဒျန်များထဲသို့ စီးဆင်းသွားပြီး မိစ္ဆာချီနှင့်အတူ လှည့်ပတ်သွားသည်။ ထို့နောက် ဝိညာဉ်စွမ်းအားက မိစ္ဆာစံအိမ်ထဲသို့ ဝင်ရောက်သွားပြီး မိစ္ဆာသန့်စင်ခြင်းမီးဖို၏ စုပ်ယူသန့်စင်ခြင်း ခံလိုက်ရသည်။

ထိုနည်းဖြင့် မိုးမြေဝိညာဉ်စွမ်းအားက သန့်စင်သော မိစ္ဆာချီအဖြစ် ပြောင်းလဲသွားသည်။

အခြားတစ်စိတ်တစ်ပိုင်းက သူ၏ ခန္ဓာကိုယ်ထဲမှ အသွေးအသားထဲသို့ စီးဆင်းသွားပြီး သူ၏ အသွေးအသားနှင့် မြန်ဆန်စွာ ပေါင်းစပ်သွားသည်။ သူ့ခန္ဓာကိုယ်၏ တစ်လက်မစီတိုင်းမှာ စွမ်းအားဖြင့် ပြည့်လျှံသွားသည်။ ထိုစွမ်းအားကို သူမထုတ်လွှတ်နိုင်ပေ။ သို့ဖြစ်၍ သူ၏ ခန္ဓာကိုယ်က ထပ်မံ ကြီးမားသွားသည်။

ပေနှစ်ဆယ်…

ပေသုံးဆယ်…

ပေလေးဆယ်…

ဤတစ်ကြိမ်တွင် သီရှီထျန်၏ ခန္ဓာကိုယ်သည် ပေငါးဆယ်အမြင့်သို့ မြန်ဆန်စွာ ကြီးထွားသွားသည်။ သူ၏ ခန္ဓာကိုယ်က အလွန်ကြီးမားလေရာ မူလက သူဖွင့်လှစ်ထားသော လှိုဏ်ဂူသည်ပင် သူ့ကို မထိန်းသိမ်းနိုင်တော့ပေ။ သူ၏ ထွားကြိုင်းသန်မာသော ခန္ဓာကိုယ်က ဘေးပတ်ဝန်းကျင်မှ တောင်နံရံကို တိုက်ရိုက် အက်ကွဲစေသည်။

လှိုဏ်ဂူသည် ပေငါးဆယ်အမြင့်ထိ ရုတ်တရက် ကြီးမားသွားသည်။

ရက်စက်ကြမ်းကြုတ်သော အရှိန်အဝါက ဖုံးကွယ်ခြင်းမရှိဘဲ ပေါက်ကွဲထွက်လာသည်။ ယင်းက မိုးမြေတစ်ခုလုံးကို ဖုံးလွှမ်းသွားသည်။ ကြောက်မက်ဖွယ်ကောင်းသော သားရဲအရှိန်အဝါက ဆူနာမီလှိုင်းလုံးသဖွယ် အရပ်မျက်နှာအသီးသီးဆီသို့ ရိုက်ခတ်သွားသည်။ မည်သည့်အရာမှ ထိုအရှိန်အဝါကို မခုခံနိုင်ပေ။ သားရဲဘုရင်၏ လွှမ်းမိုးဗိုလ်ကျသော အရှိန်အဝါက ချိုင့်ဝှမ်းထဲမှာ ပြည့်နှက်သွားသည်။

ယင်းက မောက်မာထောင်လွှားပြီး ဤလောကမှ သက်ရှိအားလုံးကို အထင်သေးရှုံ့ချနေသည်။

ယင်းကို ပထမဆုံး တွေ့ကြုံခံစားလိုက်ရသည်မှာ မိစ္ဆာအသင်္ချေချိုင့်ဝှမ်းထဲမှ သက်ရှိများ ဖြစ်ကြသည်။ မျက်စိတစ်မှိတ်အတွင်းမှာ လွှမ်းမိုးဗိုလ်ကျသော အရှိန်အဝါက ချိုင့်ဝှမ်းထဲမှ သက်ရှိအားလုံးကို ဖိနှိပ်လိုက်သည်။

“ ဒီဟာ… အရှင်မင်းကြီးရဲ့ အရှိန်အဝါ… ”

“ အဲ့ဒါ အရှင်မင်းကြီးပဲ… အရှင်မင်းကြီးက ပိုပြီးသန်မာလာပြီ ”

ချိုင့်ဝှမ်းထဲမှ သက်ရှိအားလုံးသည် လွှမ်းမိုးဗိုလ်ကျသော ထိုအရှိန်အဝါကို ခုခံတားဆီးရန် မတွေးကြချေ။ သားရဲအားလုံးက ခန္ဓာကိုယ်တုန်ယင်သွားကြသည်။ သူတို့က သီရှီထျန် တံခါးပိတ်ကျင့်ကြံနေသော နေရာဆီသို့ လှည့်ကြည့်လိုက်ကြသည်။ ဝမ်းသာပျော်ရွှင်သော အမူအရာက သူတို့၏ မျက်နှာပေါ်မှာ ထွက်ပေါ်လာသည်။ သူတို့၏ မျက်လုံးထဲမှာ ကြည်ညိုလေးစားမှုဖြင့် ပြည့်နှက်နေသည်။

စက်ကရာ၏ အရှိန်အဝါက ယခင်ကထက် အဆပေါင်းများစွာ ပိုပြီးသန်မာလာကြောင်း ချီဟောင်နှင့် တခြားသားရဲဘုရင်လေးပါးသည်လည်း အာရုံခံမိသွားကြသည်။ သူတို့၏ အရှင်မင်းကြီးက တံခါးပိတ်ကျင့်ကြံပြီးနောက် ကြီးမားသော အဆင့်ချိုးဖြတ်မှုကို ပြုလုပ်နိုင်ခဲ့ကြောင်း ချက်ချင်း သူတို့နားလည်လိုက်ကြသည်။

လွှမ်းမိုးဗိုလ်ကျသော သားရဲအရှိန်အဝါက ကောင်းကင်ယံထိ ပျံတတ်သွားသည်။ ထို့ပြင် ယင်းက ချိုင့်ဝှမ်းထဲမှာသာ ပျံ့နှံ့သွားခြင်း မဟုတ်ပေ။ ယင်းက ချိုင့်ဝှမ်းအပြင်သို့ ဆက်လက် ပျံ့လွင့်သွားပြီး အရပ်မျက်နှာအသီးသီးဆီသို့ ပျံ့နှံ့သွားသည်။

လွှမ်းမိုးဗိုလ်ကျသော သားရဲအရှိန်အဝါ ဖြတ်သန်းသွားသည့်နေရာတိုင်း ငှက်များနှင့် တိရိစ္ဆာန်များသည် တောင်ကြီးတစ်တောင်နှယ် ကြီးမားသော ဖိအားကို ခံစားလိုက်ကြရသည်။ သူတို့က မြေကြီးပေါ်မှာ ဝပ်တွားလိုက်ကြပြီး ချက်ချင်း ခေါင်းငုံ့လိုက်ကြသည်။ ဝိညာဉ်အသိဉာဏ်ရှိသော ဝိညာဉ်သားရဲများသည်ပင် ယင်းကို မတောင့်ခံနိုင်ကြချေ။ သူတို့က ခုခံရန် မကြိုးစားလျှင် မည်သည့်ပြဿနာမှ မရှိပေ။ ထိုသို့မဟုတ်ဘဲ အကယ်၍ သူတို့က သားရဲဘုရင်အရှိန်အဝါကို ခုခံရန် ကြိုးစားမည်ဆိုလျှင် ဖိအားက အဆမတန် တိုးမြှင့်သွားလိမ့်မည်။ သူတို့က မြေကြီးပေါ်မှာ အတင်းအကျပ် ဝပ်တွားလိုက်ကြရသည်။

“ ဝေါင်း ”

ပိုပြီးထိတ်လန့်ဖွယ်ကောင်းသော ကျားဟိန်းသံက မိစ္ဆာအသင်္ချေချိုင့်ဝှမ်းထဲမှ ကျယ်လောင်စွာ ပဲ့တင်ထပ်လာသည်။ ထိုကျားဟိန်းသံသည် ယခင်ကထက် အဆပေါင်းများစွာ ပိုကြောက်စရာကောင်းသည်။ လှိုဏ်ဂူအဝင်ဝကို ချိပ်ပိတ်ထားသော ဧရာမကျောက်တုံးက ဟိန်းသံကြောင့် ချက်ချင်း ပေါက်ကွဲထွက်သွားသည်။ ချိုင့်ဝှမ်း၏ ကောင်းကင်ယံတွင် စုဝေးနေကြသော တိမ်မည်းများက ကျားဟိန်းသံကြောင့် ပြင်းထန်စွာ တုန်ယင်သွားပြီး လွင့်ပြယ်သွားကြသည်။ ကျားဟိန်းသံသည် အလွန်ကြာရှည်ပြီး တောင်ပိုင်းမြေရိုင်းဒေသတစ်ခုလုံးဆီသို့ ပဲ့တင်ထပ်သွားသည်။

ယင်းက မိစ္ဆာသားရဲဖြစ်လာပြီးနောက် သီရှီထျန်၏ ပထမဆုံးဟိန်းသံ ဖြစ်သည်။

ထိုဟိန်းသံသည် တောင်ပိုင်းမြေရိုင်းဒေသထဲမှာ မွေးဖွားလာသော မိစ္ဆာသားရဲတစ်ကောင်၏ ကိုယ့်ကိုယ်ကိုယ် ကြေညာချက်ဖြစ်သည်။ ယင်းက တောင်ပိုင်းမြေရိုင်းဒေသထဲမှ သက်ရှိများအပေါ် သူ၏ ကြီးမြတ်မှုအကြောင်း ဖော်ပြလိုက်ခြင်း ဖြစ်သည်။

“ ကျီး ”

သီရှီထျန်၏ ကျားဟိန်းသံက တောင်ပိုင်းမြေရိုင်းဒေသထဲမှ တခြားမိစ္ဆာသားရဲများအပေါ်ကိုလည်း သက်ရောက်မှုရှိကြောင်း ထင်ရှား၏။

ဤအခိုက်အတန့်မှာ မိစ္ဆာအသင်္ချေချိုင့်ဝှမ်း၏ တောင်ပိုင်းအရပ်တွင် နားဝင်စူးရှသော အော်သံက ကျယ်လောင်စွာ ထွက်ပေါ်လာပြီး ကောင်းကင်ပေါ်သို့ ပျံတတ်သွားသည်။

ယင်းက အလွန်စူးရှလေရာ ကျားဟိန်းသံသည်ပင် ထိုအော်သံ၏ စွမ်းအားကို မဖုံးလွှမ်းနိုင်ပေ။

ယင်းက ငှက်တစ်ကောင်၏ အော်သံဖြစ်ပြီး အလွန်စူးရှကျယ်လောင်သည်။ ယင်းထဲမှာ ငှက်ဘုရင်တစ်ပါး၏ မောက်မာထောင်လွှားမှုလည်း ပါဝင်သည်။ ၎င်းက သီရှီထျန်၏ ကျားဟိန်းသံကို နည်းနည်းမှ အလျော့မပေးပေ။

“ အူး… ”

ထိုငှက်အော်သံက အဆုံးသတ်မဟုတ်သေးပေ။ ကြမ်းတမ်းပြီး ရိုးရှင်းသော အော်သံက မြောက်ပိုင်းမှ ထွက်ပေါ်လာသည်။ ထိုအော်သံက အလွန်ထူးခြားသည်။ ယင်းက ကြားလိုက်ရသူတိုင်းကို လေးနက်သောအမြင် ကျန်ရစ်စေသည်။ ယင်းက ကျီးကန်းတစ်ကောင်၏ အော်သံ ဖြစ်သည်။

ကျီးကန်းအော်သံသည် နားဝင်စူးရှရုံမျှသာ မဟုတ်ပေ။ ယင်းက ကသိကအောက်ဖြစ်သော စိတ်ခံစားမှုကိုလည်း ပေးသည်။ ညှိုးမှိုင်သော အရှိန်အဝါက မြောက်ပိုင်းမှ ထွက်ပေါ်လာသည်။

“ ဝေါင်း ”

အရှေ့အရပ်တွင် ကောင်းကင်တုန်ခါသွားမည့် ဟိန်းသံက ထွက်ပေါ်လာသည်။ ယင်းမှာ သီရှီထျန်၏ ကျားဟိန်းသံကို တိမ်းရှောင်မည့် စိတ်ဆန္ဒ နည်းနည်းမှ မရှိပေ။ ဟိန်းသံသည် အလွန်လွှမ်းမိုးဗိုလ်ကျစွာ ထွက်ပေါ်လာပြီး ကောင်းကင်ပေါ်သို့ ပျံတတ်သွားသည်။ ထိုဟိန်းသံသည် ခြင်္သေ့တစ်ကောင်ထံမှ ဖြစ်သည်။

ခြင်္သေ့နှင့် ကျားသည် တောအုပ်၏ အရှင်သခင်များ ဖြစ်ကြသည်။ ထို့ကြောင့် သူတို့ဆီမှာ သဘာဝအလျောက် ဖြစ်ပေါ်နေသော လွှမ်းမိုးဗိုလ်ကျမှုအရှိန်အဝါ ရှိသည်။

“ ဂရား ”

အနောက်အရပ်တွင် အရိုင်းဆန်သော စိတ်ဆန္ဒပါရှိသည့် အော်သံက ကောင်းကင်ပေါ်သို့ ပျံတတ်သွားသည်။ ထိုအော်သံထဲတွင် ကြောက်မက်ဖွယ်ကောင်းသော အသံလှိုင်းပွတ်တိုက်မှုများ ပါဝင်နေသည်။ အကယ်၍ တစ်စုံတစ်ယောက်သည် ထိုအသံလှိုင်းဖြင့် ရိုက်ခတ်ခံရမည်ဆိုလျှင် အခြေအနေမကောင်းနိုင်ပေ။ ထိုအော်သံသည် ထူးဆန်းသည်။ ယင်းထဲမှာ တိုက်ပွဲဆာလောင်သော စိတ်ဆန္ဒရှိသည်။ ယင်းကို ကြားလိုက်ရသူတိုင်းက အလိုအလျောက် သွေးပွက်ပွက်ဆူလာလိမ့်မည်။

အလွန်သန်စွမ်းသော အော်သံများနှင့် ဟိန်းသံများသည် ဤအခိုက်အတန့်မှာ တောင်ပိုင်းမြေရိုင်းဒေသထံမှ တစ်ချိန်တည်း တစ်ပြိုင်နက်တည်း ထွက်ပေါ်လာကြသည်။

အော်သံများသည် တစ်ကောင်နှင့်တစ်ကောင် အလျော့မပေးကြချေ။ ထို့ကြောင့် အသံငါးသံသည် နိမ့်ချည်မြင့်ချည် ထွက်ပေါ်နေကြပြီး အပြန်အလှန် ပေါင်းစည်းသွားကြသည်။

ယင်းက တောင်ပိုင်းမြေရိုင်းဒေသထဲမှာ ထွက်ပေါ်လာသော အံ့ဖွယ်အဖြစ်အပျက် ဖြစ်သည်။ အသံငါးသံမှ ထွက်ပေါ်လာသော ဖိအားသည် တောင်ကြီးတစ်တောင်နှယ် ကြီးမားလှ၏။ ကြီးမားသော ဖိအားက တောင်တန်းဒေသတစ်ခုလုံးကို အပြည့်အဝ ဖုံးလွှမ်းသွားသည်။

မိစ္ဆာသားရဲများ… ။

ထိုအသံများသည် မိစ္ဆာသားရဲများထံမှ ဖြစ်သည်။

သူတို့ထဲမှ မည်သူမဆို ဝိညာဉ်သားရဲနယ်ပယ်မှ အောင်မြင်စွာ အဆင့်ချိုးဖြတ်သွားပြီး မိစ္ဆာသားရဲနယ်ပယ်သို့ တတ်လှမ်းပြီးကြသော အစွမ်းထက်ပညာရှင်များ ဖြစ်ကြသည်။

မိစ္ဆာသားရဲငါးကောင်၏ အရှိန်အဝါများက အတူတကွ ပေါင်းစည်းသွားသည့်အခါ တောင်ပိုင်းမြေရိုင်းဒေသတစ်ခုလုံး တုန်လှုပ်သွားမည့် ကြီးမားသော ဖိအားက ထွက်ပေါ်လာသည်။ ထိုဖိအားသည် ကမ္ဘာမြေတုန်ခါသွားစေရန် လုံလောက်သည်။

ဤအခိုက်အတန့်မှာ တောင်ပိုင်းမြေရိုင်းဒေသအတွင်းမှ သက်ရှိအားလုံးသည် မည်သည့်နေရာမှာဖြစ်စေ သို့မဟုတ် မည်သည့်ကိစ္စကို ဆောင်ရွက်နေပါစေ ရပ်တန့်လိုက်ကြသည်။ သူတို့အားလုံးက ကြီးမားသော ဖိအားအောက်၌ မြေကြီးပေါ်တွင် ဝပ်တွားလိုက်ကြသည်။ သူတို့၏ ခန္ဓာကိုယ်က အဆက်မပြတ် တုန်ယင်နေပြီး သူတို့က ခေါင်းငုံ့ထားကြသည်။ သူတို့က ခေါင်းမမော့ဝံ့ကြချေ။

တောင်တန်းဒေသထဲတွင် သားရဲတိရိစ္ဆာန်များသာ ရှိကြခြင်း မဟုတ်ပေ။ ကိုယ့်ကိုယ်ကိုယ် လေ့ကျင့်နေကြသော ကျင့်ကြံသူများနှင့် ရတနာများ ရှာဖွေနေကြသော ကျင့်ကြံသူများလည်း ရှိကြသည်။ မိစ္ဆာသားရဲငါးကောင်၏ ဖိအားက ရုတ်တရက်ဆန်စွာ ထွက်ပေါ်လာသည်။ မည်သည့်သတိပေးမှုမှ မရှိပေ။ ကြီးမားသော ထိုဖိအားသည် သားရဲတိရိစ္ဆာန်များနှင့် ငှက်များကိုသာ ဖိနှိပ်လိုက်ခြင်းမဟုတ်ဘဲ ကျင့်ကြံသူများအပေါ်သို့လည်း ကျရောက်လာသည်။ ထိုကျင့်ကြံသူများထဲမှ အများစုသည် ချီသန့်စင်ခြင်းနယ်ပယ်မှာသာ ရှိကြသေးသည်။

သူတို့က မိစ္ဆာသားရဲငါးကောင်၏ ဖိအားကို မည်သို့ခုခံနိုင်ကြမည်နည်း။ သူတို့၏ မျက်နှာက ဖြူဖျော့သွားပြီး အကြောက်တရားက သူတို့၏ နှလုံးသားထဲမှာ ပြည့်နှက်သွားသည်။ သူတို့၏ ခြေထောက်များက ဂျယ်လီသဖွယ် ပျော့ခွေသွားပြီး သူတို့က မြေကြီးပေါ်မှာ လဲကျသွားကြသည်။

“ ဘာဖြစ်သွားတာလဲ… တောင်ပိုင်းမြေရိုင်းဒေသထဲက မိစ္ဆာသားရဲတွေလား… အရင်က ဒီလို တစ်ခါမှမဖြစ်ဖူးပါဘူး… ”

“ အရမ်းကြောက်စရာကောင်းတာပဲ… ”

“ အို ဘုရားရေ… ဘယ်လိုသားရဲက ဒီလောက်ကြောက်စရာကောင်းတဲ့ အရှိန်အဝါကို ထုတ်လွှတ်နိုင်တာလဲ… အရမ်းကြောက်စရာကောင်းတာပဲ… အဲ့ဒီသားရဲတွေသာ ငါ့အရှေ့မှာ ပေါ်လာရင် အရှိန်အဝါနဲ့တင် ငါလဲကျသွားနိုင်တယ် ”

“ ယီးပဲ… တောင်ပိုင်းမြေရိုင်းဒေသထဲမှာ မိစ္ဆာသားရဲတွေမရှိဘူးလို့ ဘယ်ကောင်ပြောတာလဲ… အဲ့ဒီပြောတဲ့ကောင်ကို ငါရှာတွေ့လို့ကတော့ သူ့အမေ ပြန်မမှတ်မိနိုင်အောင် သမပစ်မယ် ”

ကြောက်မက်ဖွယ်ကောင်းသော အရှိန်အဝါအောက်မှာ တောင်ပိုင်းမြေရိုင်းဒေသထဲမှ ကျင့်ကြံသူများက အံ့ဩထိတ်လန့်သွားကြပြီး ကျိန်ဆဲလိုက်ကြသည်။ အတိတ်မှာ ထိုသို့ကိစ္စမျိုး တစ်ခါမှ မဖြစ်ပျက်ဖူးပေ။ ယင်းက အလွန်ကြောက်စရာကောင်းသည်။

ယင်းက အံ့ဩစရာမရှိပေ။ ဝိညာဉ်သားရဲတစ်ကောင်က တောင်ပိုင်းမြေရိုင်းဒေသထဲမှာ နှစ်ပေါင်းများစွာကြာ ရှင်သန်နိုင်ပြီး နေနှင့်လ၏ အနှစ်သာရ၊ မိုးမြေကြားမှ ဝိညာဉ်စွမ်းအားကို စုပ်ယူမည်ဆိုလျှင် သူတို့က လူသားတစ်ယောက်ကဲ့သို့ အသိဉာဏ်ရှိလာကြပြီး မည်သို့ကျင့်ကြံရမည်ဖြစ်ကြောင်း သိလာကြလိမ့်မည်။ မိစ္ဆာသားရဲဖြစ်လာပြီးနောက် သူတို့က ကိုယ်ပိုင်နယ်နိမိတ်ကို သတ်မှတ်ကြလိမ့်မည်။ အကြောင်းအရင်းတစ်စုံတစ်ရာမရှိလျှင် သူတို့က ပိုင်နက်ထဲမှ ထွက်သွားကြလိမ့်မည် မဟုတ်ချေ။ ထို့ကြောင့် သူတို့ကို ရန်သွားမစသရွေ့ မည်သည့်ပြဿနာမှ မရှိနိုင်ပေ။

ယေဘုယျအားဖြင့်ဆိုရသော် အစောနက ထွက်ပေါ်လာသော အော်သံများနှင့် ဟိန်းသံများသည် တောင်ပိုင်းမြေရိုင်းဒေသထဲမှ အရှင်သခင်များ၏ အသံများ ဖြစ်ကြသည်။ သီရှီထျန်ကို ဘေးဖယ်ထားလျှင် တောင်ပိုင်းမြေရိုင်းဒေသထဲမှာ အရှင်သခင်ငါးပါး ရှိကြသည်။ သူတို့တစ်ကောင်စီသည် တောင်ပိုင်းမြေရိုင်းဒေသ၏ မတူညီသော အရပ်ဒေသများမှာ နေထိုင်ကြသည်။ အပြင်လူများက သူတို့ကို မိစ္ဆာသားရဲဘုရင်ငါးပါးဟု ခေါ်ကြသည်။ သူတို့တစ်ကောင်စီသည် အလွန်ကျယ်ပြောသော ဧရိယာကို သိမ်းပိုက်ထားကြပြီး သူတို့၏ လက်အောက်မှာ ထောင်သောင်းချီသော လက်အောက်ငယ်သားများ ရှိကြသည်။

ဤတစ်ကြိမ်တွင် သီရှီထျန်၏ ထွက်ပေါ်လာမှုက ရုတ်တရက်ဆန်သည်။ ထို့ပြင် သူ၏ ကျားဟိန်းသံထဲမှာ သားရဲဘုရင်တစ်ပါး၏ အရှိန်အဝါလည်း ပါရှိသည်။ သူက တိတ်တဆိတ် ပုန်းကွယ်နေရန် ဆန္ဒမရှိဘဲ သူ၏ တည်ရှိမှုအကြောင်း ကြေညာလိုက်သည်။ ထုံးစံအားဖြင့် ယင်းက တခြားမိစ္ဆာသားရဲဘုရင်များ၏ တုံ့ပြန်မှုကို ဖြစ်ပေါ်စေသည်။ ထို့ကြောင့် မိစ္ဆာသားရဲဘုရင်များသည် သူတို့၏ အသံကို ထုတ်လွှတ်၍ သီရှီထျန်၏ ကျားဟိန်းသံကို ဖိနှိပ်ရန် ကြိုးစားကြသည်။ သို့သော်လည်း မိစ္ဆာသားရဲဘုရင်လေးပါး၏ အသံသာ ထွက်ပေါ်လာသည်။ တခြားမိစ္ဆာသားရဲဘုရင်တစ်ပါးသည် ထိုယှဉ်ပြိုင်မှုမှာ မပါဝင်ပေ။

ဤအခိုက်အတန့်မှာ တောင်ပိုင်းမြေရိုင်းဒေသ၏ ကောင်းကင်ယံတွင် ကျားဟိန်းသံ၊ ခြင်္သေ့ဟိန်းသံ၊ ကျီးကန်းအော်သံ၊ ငှက်အော်သံနှင့် သားရဲအော်သံက တစ်ပြိုင်နက် ထွက်ပေါ်လာကြသည်။ ယင်းတို့က နိမ့်ချည်မြင့်ချည် ထွက်ပေါ်နေကြပြီး အတူတကွ ပေါင်းစည်းသွားကြသည်။ သူတို့က တစ်ကောင်နှင့်တစ်ကောင် အပြန်အလှန် ဖိနှိပ်ရန် ကြိုးစားနေကြသော်လည်း မည်သည့်ရလဒ်မှ မထွက်ပေါ်လာချေ။ အချိန်တစ်ခဏကြာပြီးနောက် အသံအားလုံးက တစ်ပြိုင်နက် ပျောက်ကွယ်သွားကြသည်။