ပထမဆုံးအကြိမ် တွေ့ဆုံခြင်း

လူငယ် ဝူရှန့်ကျိကျွင်းက လက်ကို မြှောက်လိုက်သည့် ခဏ၌ ပြင်ပရှိ ထန်ထျန်း၏ ပုံရိပ်မှာ ရုတ်တရက် အမှောင်ကျသွားတော့သည်။

မင်ရွှမ် အင်မော်တယ်အရှင်က မအောင့်နိုင်ဘဲ အော်ဟစ်လိုက်မိသည်။ " ဟမ်... ဘာဖြစ်သွားတာလဲ"

"ဒါက ဘာအခြေအနေကြီးလဲ"

"ဒီနောက်ဆုံး အဆုံးအဖြတ် တိုက်ပွဲအချိန်ကျမှ ဘာလို့ ပျောက်သွားရတာလဲ"

လန်တင်း အင်မော်တယ်အရှင်ကတော့ ထူးဆန်းသော မျက်နှာပေးဖြင့် "ဒီကောင်က... စီးပွားရေးသမားတွေလိုပဲ VIP မဝယ်ရင် ဇာတ်သိမ်းပိုင်း ပေးမကြည့်ဘူးဆိုတဲ့ ပုံစံမျိုးလား"

လူတိုင်းက တစ်ယောက်တစ်ပေါက် ဝိုင်းဝန်းပြောနေကြတော့သည်။ အရေးကြီးဆုံး အခိုက်အတန့်ရောက်မှ ရပ်တန့်သွားခြင်းမှာ စိတ်အနှောင့်အယှက်ဖြစ်စရာ အကောင်းဆုံးပင် မဟုတ်ပါလား။

သို့သော် ထိုက်ယန် အင်မော်တယ်ဧကရာဇ်ကမူ မျက်နှာပျက်နေသည်။

"ဒီပုံရိပ်တွေက နိယာမစွမ်းအားတွေနဲ့ ဖန်တီးထားတာပဲ၊ ပုံမှန်ဆိုရင် ဒီလိုမျိုး မဖြစ်နိုင်ဘူး"

"ဒါမျိုး ဖြစ်လာပြီဆိုရင် အဖြေက တစ်ခုပဲ ရှိတယ်..."

"တစ်ယောက်ယောက်က စစ်မှန်တဲ့ ကောင်းကင်နိယာမ ကို အသုံးပြုလိုက်တာပဲ"

သူက လေးနက်သော အသံဖြင့် ပြောလိုက်သည်။

လူတိုင်းမှာ ဆွံ့အသွားကြပြီးနောက် ထိတ်လန့်တုန်လှုပ်သော အရိပ်အယောင်များ အသီးသီး ပြလာကြသည်။

စစ်မှန်သော ကောင်းကင်နိယာမ ဆိုသည်မှာ သူတို့တစ်သက်လုံး မည်သို့မျှ မရောက်ရှိနိုင်သည့် အဆင့်တစ်ခု ဖြစ်သည်။ အဘယ်ကြောင့်ဆိုသော် ဤကမ္ဘာ၏ ကန့်သတ်ချက်မှာ ဤမျှသာ ရှိသောကြောင့်ပင်။

တာအိုအဆင့် ကျွမ်းကျင်သူ မဖြစ်မချင်း စစ်မှန်သော နိယာမများကို ထိန်းချုပ်နိုင်မည် မဟုတ်ပေ။

သို့သော် ထာဝရ စင်မြင့်ပေါ်တွင်မူ လူငယ် ဝူရှန့်ကျိကျွင်းရော၊ ထန်ထျန်းပါ အင်မော်တယ်ဧကရာဇ် အဆင့်မှာပဲ ရှိနေကြသေးသည် မဟုတ်ပါလား

သူတို့ထဲက တစ်ယောက်ယောက်က အင်မော်တယ်ဧကရာဇ် အဆင့်မှာတင် နိယာမတွေကို ထိန်းချုပ်နိုင်နေပြီလား

"လူငယ် ဝူရှန့်ကျိကျွင်းပဲ ဖြစ်ရမယ်။ သူရှိခဲ့တဲ့ ခေတ်က ကမ္ဘာက ငါတို့ အခုလိုမျိုး ကန့်သတ်ချက်တွေ ရှိချင်မှ ရှိမှာ။ ဒါကြောင့် ဒီလို အံ့ဖွယ်ကိစ္စကို သူ လုပ်နိုင်တာ ဖြစ်လိမ့်မယ်"

ဝမ်ဟဲ နန်းတော်သခင်က ပြောလိုက်သည်။

လူတိုင်းကလည်း ထောက်ခံကာ ခေါင်းညိတ်ကြသည်။

မှန်ပေသည်၊ ထိုကဲ့သို့သော ထာဝရ ပြိုင်ဘက်ကင်း ပုဂ္ဂိုလ်မျိုးကသာ မဖြစ်နိုင်သည့် အရာကို လုပ်နိုင်ခြင်း ဖြစ်ပေလိမ့်မည်။

ထန်ထျန်းမှာလည်း အံ့ဖွယ်များကို ဖန်တီးနိုင်စွမ်း ရှိသော်လည်း ကမ္ဘာ၏ ကန့်သတ်ချက်က ရှိနေဆဲပင်။ ဆန်မရှိဘဲ ထမင်းချက်၍ မရသကဲ့သို့ မည်မျှပင် ထူးချွန်ပါစေ၊ နိယာမ ကန့်သတ်ချက်ကိုတော့ ကျော်ဖြတ်နိုင်မည် မဟုတ်ဟု သူတို့ တွေးနေကြသည်။

"ဒါဆိုရင်... ထန်ထျန်းက ရှုံးမှာပေါ့ ဟုတ်လား"

မင်ရွှမ် အင်မော်တယ်အရှင်က မေးလိုက်သည်။

ထိုက်ယန် အင်မော်တယ်ဧကရာဇ်က ခေါင်းညိတ်ပြကာ "စစ်မှန်တဲ့ နိယာမဆိုတာ တာအို အဆင့် အောက် က လူ တွေအတွက်တော့ အပြတ်အသတ် ချေမှုန်းနိုင်တဲ့ တည်ရှိမှုပဲ"

"ဘယ်လိုနည်းနဲ့မှ ကျော်ဖြတ်လို့ မရဘူး"

"အကယ်၍ လူငယ် ဝူရှန့်ကျိကျွင်းက တကယ်ပဲ အဲဒါကို ထိန်းချုပ်နိုင်ခဲ့ရင် ထန်ထျန်း အနိုင်ရဖို့ အခွင့်အရေး လုံးဝ မရှိတော့ဘူး"

မင်ရွှမ် အင်မော်တယ်အရှင်မှာ တိတ်ဆိတ်သွားသည်။ ၎င်းမှာ သူ မြင်လိုသော ရလဒ် မဟုတ်ပေ။

သို့သော် ကျန်သည့်လူများကတော့ အကောင်းမြင်နေကြဆဲပင်။

"ထန်ထျန်းက ဝူရှန့်ကျိကျွင်းကို ဒီလို ကြောက်စရာကောင်းတဲ့ ဝှက်ဖဲတွေ ထုတ်သုံးလာအောင်အထိ ဖိအားပေးနိုင်ခဲ့တာပဲ"

"သူက ထာဝရ ပြိုင်ဘက်ကင်းလို့ အမည်မတွင်ရင်တောင်မှ လူတစ်ယောက်အောက်၊ လူသန်းပေါင်းများစွာ အထက်မှာ ရှိနေပြီ"

"ငါတို့ရှေ့မှာ ဒီလို ပါရမီရှင်တစ်ယောက် ထွက်ပေါ်လာတာကို မြင်တွေ့ရတာကလည်း ဂုဏ်ယူစရာ တစ်ခုပါပဲ"

သူတို့က ကိုယ်တိုင် အောင်မြင်နေသကဲ့သို့ ပြုံးရွှင်ကာ ပြောဆိုနေကြသည်။

ခဏအကြာတွင် အမှောင်ကျနေသော မျက်နှာပြင်မှာ ပြန် ပေါ်လာသည်။

သို့သော် ယခုအချိန်တွင် ထန်ထျန်း တစ်ဦးတည်းသာ ထိုနေရာတွင် ရပ်နေတော့သည်။ သူနှင့် လူငယ် ဝူရှန့်ကျိကျွင်းတို့၏ တိုက်ပွဲမှာ အပြီးတိုင် ပြီးဆုံးသွားခဲ့ပြီ ဖြစ်သည်။

တိုက်ပွဲဖြစ်စဉ်ကို ကိုယ်တိုင် မမြင်လိုက်ရသော်လည်း လူအများစုကတော့ ထန်ထျန်းက ဝူရှန့်ကျိကျွင်း၏ နောက်ဆုံးဝှက်ဖဲအောက်တွင် ကပ်သီးကပ်သတ် ရှုံးနိမ့်သွားခဲ့သည်ဟု ယူဆလိုက်ကြသည်။

မင်ရွှမ် အင်မော်တယ်အရှင် တစ်ဦးတည်းသာ မျက်တောင်တခတ်ခတ်ဖြင့် တိုးတိုးလေး ရေရွတ်နေမိသည်။ "ဖြစ်စဉ်ကို မမြင်ရပေမဲ့ ထန်ထျန်း အနိုင်ရတာလည်း ဖြစ်နိုင်တာပဲလေ"

"ထန်ထျန်းရဲ့ ကျင့်စဉ် တွေက ဝူရှန့်ကျိကျွင်းထက် ပိုများနေရင်ရော..."

.....

ထာဝရ စင်မြင့်ပေါ်တွင်

ထန်ထျန်းသည် ထိုနေရာ၌ပင် ရပ်နေပြီး လူငယ် ဝူရှန့်ကျိကျွင်း သူ့ရှေ့မှ ပျောက်ကွယ်သွားသည်ကို တိတ်တဆိတ် ကြည့်နေမိသည်။

သတိထားပါ

၎င်းမှာ လူငယ် ဝူရှန့်ကျိကျွင်းက သူ့ကို ပေးခဲ့သည့် သတိပေးချက်တစ်ခုပင်။

"ငါက အဲဒီအပိုင်းအစကို ရှာတွေ့ခဲ့တာ မဟုတ်ဘူး၊ အဲဒါက ငါ့ကို လာရှာခဲ့တာ"

ဤစကားမှာ ထန်ထျန်းအတွက်လည်း အကျုံးဝင်နေသည်။

ဟင်းလင်းပြင်ခေါင်းလောင်း အပိုင်းအစ၊ ကျန်းရှီ ကျောက်စာတိုင်၊ ကြောင်ကလေး၊ လနတ်သမီး စသည်တို့မှာ ထန်ထျန်း ကျင့်ကြံခြင်းလမ်းခရီးတွင် တွေ့ကြုံခဲ့ရသည့် အရာများပင် ဖြစ်သည်။

သို့သော် ၎င်းတို့က ထန်ထျန်း၏ လမ်းကြောင်းပေါ်တွင် ကြိုတင် စောင့်ကြိုနေခဲ့ခြင်း မဟုတ်ဟု မည်သူက အာမခံနိုင်မည်နည်း

ဤကမ္ဘာကြီး၏ အမှန်တရားကို တဖြည်းဖြည်း နားလည်လာပြီးနောက်တွင် ဒုတိယမြောက် အချက်မှာ ပို၍ ဖြစ်နိုင်သည်ဟု သူ ခံစားလာရသည်။

ကံကြမ္မာအရ သတ်မှတ်ထားသည်ဟု ဆိုခြင်းမှာ တစ်နည်းအားဖြင့် တစ်စုံတစ်ယောက်က ကြိုတင် စီစဉ်ထားခြင်းပင် မဟုတ်ပါလား။

ထို့အပြင် ထန်ထျန်း၏ အစစ်အမှန် ဝှက်ဖဲဖြစ်သည့် သူနှင့်အတူ ပါလာသော စနစ် နှစ်ခု...

ဒီ စနစ် တွေက တကယ်တမ်း ဘာတွေလဲ

သူတို့ရဲ့ မူလက ဘာလဲ၊ ပြီးတော့ သူ့ခန္ဓာကိုယ်ထဲကို ဘယ်လို ရောက်လာတာလဲ

ထန်ထျန်းက ဤမေးခွန်းများကို ထိပ်တိုက်ရင်ဆိုင်ရန် ခဲယဉ်းနေခဲ့သည်။ အဘယ်ကြောင့်ဆိုသော် သူကိုယ်တိုင်လည်း ရှင်းပြနိုင်စွမ်း မရှိသောကြောင့် ဖြစ်သည်။

လူငယ် ဝူရှန့်ကျိကျွင်း ပြောသွားသည့် စကားတစ်ခွန်းမှာ အလွန်မှန်ကန်လှသည်။ "စွမ်းအားတွေကြောင့် ငါက အရာအားလုံးကို မစွန့်လွှတ်နိုင်ခဲ့ဘူး"

မှန်ပေသည်၊ ၎င်းမှာ အဓိက အချက်ပင်။

စွမ်းအား မရှိဘဲနှင့် ထိုပြဿနာများကို သင် မဖြေရှင်းနိုင်ပေ။

စွမ်းအားကို ရယူလိုက်ပြန်လျှင်လည်း သင်က တစ်စုံတစ်ယောက်၏ ကစားပွဲ ထဲမှ နယ်ရုပ်တစ်ခု ဖြစ်သွားနိုင်သည်။

ဒီကစားပွဲကို ဘယ်လို ဖျက်မလဲ

လူငယ် ဝူရှန့်ကျိကျွင်း ပေးခဲ့သော အဖြေမှာ "ကိုယ့်ကိုယ်ကိုယ် ယုံကြည်ချက်ကို ခိုင်ခိုင်မာမာ ဆုပ်ကိုင်ထားပါ"

ထန်ထျန်းသည်လည်း ယခင်က ဤသို့ပင် တွေးခဲ့ဖူးသည်။

သို့သော် နှစ်ပေါင်းများစွာ ကြာပြီးနောက် ဝူရှန့်ကျိကျွင်းက တကယ်ပဲ ထိုကစားပွဲကို ဖျက်နိုင်ခဲ့ပါသလား

ထန်ထျန်း မသိနိုင်ပေ။

သူကိုယ်တိုင်လည်း အဆုံးသတ်တွင် ထိုကစားပွဲကို ဖျက်နိုင်မည်လား ဆိုသည်ကို မသေချာပေ။

အတန်ကြာပြီးနောက် သူက သက်ပြင်းအရှည်ကြီး တစ်ချက်ကို ချလိုက်သည်။

မည်သို့ပင်ဖြစ်စေ သူက လက်ရှိ ပိုင်ဆိုင်ထားသော စွမ်းအားများကို စွန့်လွှတ်ရန် မဖြစ်နိုင်ပေ။

စနစ် နှစ်ခုမှာ သူ ရှာဖွေ၍ပင် မရသည့် နေရာတွင် ရှိနေရာ စွန့်လွှတ်ဖို့ဆိုသည်မှာ ပို၍ပင် မဖြစ်နိုင်တော့ပေ။

ထို့ကြောင့် လောလောဆယ်တွင် သူ လုပ်နိုင်သည်မှာ သူ့ကိုယ်သူ ပိုမို သန်မာအောင် ကြိုးစားရင်း ကစားပွဲကို ဖျက်ဆီးမည့် အခွင့်အရေးကို စောင့်ဆိုင်းရန်သာ ရှိတော့သည်။

ကိုယ့်ကိုကိုယ် ယုံကြည်ချက်ကို ခိုင်မာအောင် ထားခြင်းမှာ တကယ့် စစ်မှန်သော ကစားပွဲဖျက်နည်း မဟုတ်သေးပေ။

သို့သော် ဤကဲ့သို့သော အခြေအနေမျိုးတွင်မူ ၎င်းမှာ တစ်ခုတည်းသော လမ်းကြောင်း ဖြစ်နေသည်။

ထန်ထျန်းက အနာဂတ်တွင် သူ့ကိုယ်သူ မည်သို့သော ပုံစံမျိုး ဖြစ်လာမည်ကို မသိပေ။

သို့သော် သူ၏ ဆုံးဖြတ်ချက်ကတော့ ဘယ်တော့မှ ပြောင်းလဲလိမ့်မည် မဟုတ်ပေ။ ၎င်းမှာ သူ့ ကံကြမ္မာကို သူကိုယ်တိုင် ထိန်းချုပ်ရန်ပင် ဖြစ်သည်။

အကယ်၍ တကယ်ပင် မတတ်နိုင်တော့လျှင်လည်း အရာအားလုံးကို ဖျက်ဆီးပစ်ရန် ဝန်လေးနေမည် မဟုတ်ပေ။

အရာအားလုံးကို တွေးတောပြီးနောက် သူက သက်ပြင်းတစ်ချက် ချ လိုက်ပြီး လူငယ် ဝူရှန့်ကျိကျွင်း၏ ပါရမီရှင်ဝိညာဉ်ကို သိမ်းဆည်းလိုက်သည်။

ယခုဆိုလျှင် ထာဝရ စင်မြင့် တိုက်ပွဲ ၅ ကြိမ်စလုံးမှာ အပြီးတိုင် ပြီးဆုံးသွားပြီ ဖြစ်သည်။

နောက်ထပ် လုပ်ရန်မှာ ကျန်ရှိသော မြင့်မြတ် သားတော် များ၏ တိုက်ပွဲများ ပြီးဆုံးသည်ကို စောင့်ဆိုင်းရန်နှင့် နတ်ဘုရားသားတော် နေရာကို ရယူရန်သာ ကျန်တော့သည်။

ထိုမြင့်မြတ် သားတော်များမှာ သူ့အတွက် ခြိမ်းခြောက်မှု မဖြစ်နိုင်ဟု သူ ယူဆထားသည်။

သို့သော် သူက ဝူရှန့်ကျိကျွင်း၏ ပါရမီရှင်ဝိညာဉ်ကို သိမ်းဆည်းလိုက်ရုံရှိသေး၊ အလွန်တရာ ကြောက်မက်ဖွယ်ကောင်းသော စိတ်ဆန္ဒတစ်ခုမှာ ကောင်းကင်မှ ရုတ်တရက် ကျဆင်းလာတော့သည်။

ထိုစိတ်ဆန္ဒ၏ အစွမ်းမှာ သူ ယခင်က ရှေးဟောင်းဘိုးဘေးနယ်မြေတွင် တွေ့ခဲ့ရသော ဘိုးဘေး ပိုင်ရွှီ နှင့် မခြားနားပေ

ထန်ထျန်းသည်လည်း ထိုသူ၏ မည်သူဖြစ်ကြောင်းကို ချက်ချင်း သိလိုက်ရသည်။

လက်တွေ့လောကရှိ ဝူရှန့်ကျိကျွင်း အရှင်

သူကိုယ်တိုင် ဆင်းသက်လာခဲ့ခြင်းပင်။ သူက မမြင်နိုင်သော ဟင်းလင်းပြင်ထဲမှနေ၍ ထန်ထျန်းကို တိတ်တဆိတ် စိုက်ကြည့်နေသည်။

ထန်ထျန်းက မျက်မှောင်ကြုတ်လိုက်မိသည်။

သူက ဝူရှန့်ကျိကျွင်း အရှင်နှင့် တွေ့လိုစိတ် ရှိခဲ့သည်မှာ ကြာပြီဖြစ်သည်။ အဘယ်ကြောင့်ဆိုသော် ဝမ်ကျိယွီ ကိစ္စနှင့် မဟာကောင်းကင်အရှင် ပြန်လည်ရှင်သန်ခြင်း ကိစ္စများကို ပြောပြရန် လိုအပ်သောကြောင့် ဖြစ်သည်။

သို့သော် ယခု တကယ်တမ်း ထိပ်တိုက်တွေ့ရချိန်တွင်မူ သူ ဝေခွဲမရ ဖြစ်နေတော့သည်။

တစ်ဖက်လူမှာ အလွန်တရာ သန်မာလွန်းလှသည်

အကယ်၍ တစ်စုံတစ်ရာ မှားယွင်းသွားခဲ့လျှင် သို့မဟုတ် တစ်ဖက်လူက သူကိုယ်တိုင်ပင် မသိသေးသော သူ့ကိုယ်ပေါ်က အရာများကို မြင်သွားခဲ့လျှင် အခြေအနေမှာ ပြောရခက်သွားပေလိမ့်မည်။

အဓိကမှာ ဝူရှန့်ကျိကျွင်း အရှင်က မည်သည့်ဘက်တော်သား ဖြစ်သည်ကို သူ မသိရသေးခြင်းပင်။

ဖြစ် နိုင်ခြေ များက များလွန်းလှသည်။

သူကိုယ်တိုင်လည်း စစ်မှန်သော ကျိကျွင်း အဆင့်သို့ ရောက်ရှိပြီး အနည်းဆုံး သူ့ကိုယ်သူ ကာကွယ်နိုင်စွမ်း ရှိလာမှသာ ဤကိစ္စကို လုပ်ခြင်းက ပို၍ စိတ်ချရပေလိမ့်မည်။

ထိုသို့ဖြင့် ထန်ထျန်းက ထိုနေရာတွင် ငြိမ်သက်စွာ ရပ်နေရင်း မမြင်နိုင်သော ထိုအစွမ်းထက် ပုဂ္ဂိုလ်နှင့် တိတ်တဆိတ် အကြည့်ချင်း ဆိုင်နေမိသည်။

ဝူရှန့်ကျိကျွင်း အရှင်ကလည်း အရင် စကားမပြောပေ။

အတန်ကြာပြီးနောက် ထိုကြောက်မက်ဖွယ် စိတ်ဆန္ဒမှာ ရုတ်တရက် ပျောက်ကွယ်သွားရာမှ ထန်ထျန်းမှာ သက်ပြင်းတစ်ချက်ကို ချ နိုင်တော့သည်။

ဖိအားကတော့ တကယ်ကို ကြီးမားလှသည်။

ဤပုဂ္ဂိုလ်မှာ အဆင့်မြင့်ဆုံး ကျိကျွင်း အဆင့်သို့ ရောက်ရှိနေပြီး ကမ္ဘာ၏ ထိပ်ဆုံးတွင် ရပ်တည်နေသူ ဖြစ်သည်။

အကယ်၍ သူက တကယ် တိုက်ခိုက်ခဲ့မည်ဆိုလျှင် ထန်ထျန်းတွင် ထူးဆန်းသော ဥကမ္ဘာ ရှိနေသော်လည်း သူ့လက်မှ လွတ်မြောက်နိုင်ရန်မှာ အကြွင်းမဲ့ ယုံကြည်မှု မရှိပေ။

"ကောင်းကင်ထိပ်ဆုံး ကို မြန်မြန် တက်လှမ်းရမယ်"

ကျိကျွင်း အဆင့်သို့ ရောက်ရှိသွားလျှင်မူ...

ပင်လယ်က ကျယ်လွန်းလို့ ငါးတွေ စိတ်ကြိုက် ကူးခတ်နိုင်သလို ကောင်းကင်ကလည်း မြင့်လွန်းလို့ ငှက်တွေ စိတ်ကြိုက် ပျံသန်းနိုင်တော့မည် မဟုတ်ပါလား