ကျိကျွင်း တစ်ပိုင်း

ထူးဆန်းသော ဥကမ္ဘာက ဟင်းလင်းပြင်ထဲတွင် အမြစ်တွယ်ထားသည်။

ထန်ထျန်း၏ ထိန်းချုပ်မှုအောက်တွင် အဆုံးမရှိသော စွမ်းအားများက သူ၏ခန္ဓာကိုယ်ထဲသို့ အရူးအမူး စီးဝင်လာတော့သည်။

ကောင်းကင်ကို ဆန့်ကျင်သော ခန္ဓာကိုယ်ပိုင်ရှင်ဖြစ်၍သာ ဤသို့ လုပ်နိုင်ခြင်းဖြစ်ပြီး မဟုတ်ပါက ဤကြောက်မက်ဖွယ်ကောင်းသော စွမ်းအားများကြောင့် သူ၏ကိုယ်ခန္ဓာမှာ အစောကတည်းက ပျက်စီးသွားလောက်ပြီ ဖြစ်သည်။

ကျင့်ကြံခြင်းအဆင့် မြင့်တက်လာသည်နှင့်အမျှ ထန်ထျန်း၏ ခန္ဓာကိုယ်၊ သူပိုင်ဆိုင်သော တာအိုကျင့်စဉ်များ၊ မူလတာအိုကျင့်စဉ် ၉ မျိုး၊ အနန္တတာအိုနိယာမ ၊ အနန္တတာအိုနိယာမ နယ်မြေ နှင့် ရှင်းယွဲ့ အင်မော်တယ်ဓားတို့သည်ပင် တစ်ပြိုင်နက်တည်း ထူးခြားဆန်းပြားစွာ ပြောင်းလဲလာတော့သည်။

သူ၏ အလုံးစုံသော အစွမ်းနှင့် တိုက်ခိုက်ရေးစွမ်းရည်မှာ မယုံကြည်နိုင်စရာ ကောင်းသော အမြန်နှုန်း ဖြင့် အဆမတန် တိုးတက်နေသည်။

မကြာမီမှာပင် ထိုက်ယိတာအိုအဆင့် ၏ အထွတ်အထိပ်သို့ ရောက်ရှိသွားသည်။

နောက်တစ်ခုကတော့... ဟွမ်ယွမ်တာအိုအဆင့်

ဤအဆင့်မှာ ကမ္ဘာ၏ ဘောင်အတွင်းမှ စတင်ကျော်လွန်ရန် ပထမဆုံး ခြေလှမ်းပင် ဖြစ်သည်။

ပုံမှန်အားဖြင့် ဟင်းလင်းပြင်နိယာမ ဆိုသည်မှာ ထိတွေ့ရန်ပင် အလွန်ခက်ခဲလှပြီး ၎င်းနှင့် အပြီးတိုင် ပေါင်းစပ်နိုင်ဖို့ဆိုသည်မှာ ပို၍ပင် ခက်ခဲလှသည်။

ထို့ကြောင့် ဟွမ်ယွမ်တာအိုအဆင့် ကျွမ်းကျင်သူများက ကောင်းကင်ထိပ်ဆုံးတွင်ပင် စစ်မှန်သော ထိပ်တန်းအင်အားစုများ ဖြစ်ကြပြီး အနည်းဆုံးတော့ နယ်မြေ တစ်ခုကို စိုးမိုးထားသည့် အာဏာရှင်များ ဖြစ်ကြသည်။

သို့သော် ထန်ထျန်းကတော့ ဤစံနှုန်းကို ကြိုတင် ရောက်ရှိနေခဲ့ပြီ ဖြစ်သည်။

စွမ်းအားများ ဆက်တိုက် စီးဝင်လာပြီးနောက် သူက ဟွမ်ယွမ်တာအို အဆင့်သို့ တိုက်ရိုက် တက်လှမ်းလိုက်သည်။

"ဘုန်း ဘုန်း ဘုန်း"

လမ်းကြောင်း၏ အခြားတစ်ဖက်မှ ကမ္ဘာ့စိတ်ဆန္ဒက အလွန်အမင်း ဒေါသထွက်နေသည့် အော်ဟစ် သံများကို ထုတ်ဖော်လိုက်သည်။

၎င်းကိုယ်တိုင်က ကမ္ဘာကြီးဖြစ်နေသည့်အတွက် ၎င်းအတွင်းရှိ သက်ရှိတစ်ဦးက ၎င်းကို ကျော်လွန်သွားမည်ကို ဘယ်လိုလုပ် ခွင့်ပြုနိုင်ပါမည်နည်း။

အကယ်၍ သူသာ ယခု ကောင်းကင်ထိပ်ဆုံးတွင် ရှိနေပါက မည်မျှ ကြောက်စရာကောင်းသော ကောင်းကင်ကပ်ဘေးကို ရင်ဆိုင်ရမည်ကို ထန်ထျန်း ခန့်မှန်းနိုင်သည်။

သို့သော် လက်ရှိတွင် သူက လမ်းကြောင်းအတွင်း၌သာ ရှိနေသေးသဖြင့် ကောင်းကင်ထိပ်ဆုံး၏ ကမ္ဘာ့စိတ်ဆန္ဒပင်လျှင် လက်လှမ်းမမီနိုင်ဘဲ ဤနေရာသို့ ကောင်းကင်ကပ်ဘေးကို ဆင်းသက်စေ၍ မရပေ။

သက်ရှိတစ်ဦးက ဤကဲ့သို့သော နည်းလမ်းမျိုးဖြင့် ဟွန်ယွမ်တာအို အဆင့်သို့ တက်လှမ်းလိမ့်မည်ဟု ၎င်းကိုယ်တိုင်ပင် ထင်ထားမိမည် မဟုတ်ပေ။

ဟွမ်ယွမ်တာအို အဆင့်သို့ ရောက်ရှိပြီးနောက် ထူးဆန်းသော ဥကမ္ဘာ တစ်ခုလုံးမှာ စတင် တုန်ခါလာတော့သည်။

ပိုမိုကြီးမားလှသော စွမ်းအားများ ထွက်ပေါ်လာပြီး ထန်ထျန်း၏ ခန္ဓာကိုယ်အတွင်းသို့ စီးဝင်သွားသည်။

ဤအချိန်ကျမှသာ တာအိုနယ်ပယ် ကျွမ်းကျင်သူများက ဘာကြောင့် သူတို့ကိုယ်ပိုင် ကမ္ဘာငယ်လေးတစ်ခုကို တည်ဆောက်ရန် အသည်းအသန် ကြိုးစားကြသည်ကို ထန်ထျန်း အမှန်တကယ် နားလည်သွားတော့သည်။

ကျိကျွင်း အဆင့်ကို ရည်မှန်းရုံတင်မကဘဲ ဟွမ်ယွမ်တာအို အဆင့်သို့ ရောက်ပြီးနောက် လိုအပ်သော စွမ်းအားမှာ အလွန်တရာ ကြီးမားလွန်းသောကြောင့်ပင်။

အကယ်၍ အခြေခံအဖြစ် ကမ္ဘာငယ်လေးတစ်ခု မရှိပါက ဤအဆင့်မှ ရှေ့သို့ တစ်လှမ်းတိုးရန်မှာ အိပ်မက်တစ်ခုလိုပင် ဖြစ်နေပေလိမ့်မည်။

နှစ်ပေါင်း သောင်းချီကြာသော်လည်း တိုးတက်မှု ရှိလာမည် မဟုတ်ပေ။

ကံကောင်းသည်မှာ ထန်ထျန်းတွင် ထိုပြဿနာ မရှိပေ။

ကြောင်ကလေး၏ ကြိုးစားအားထုတ်မှုကြောင့် ထူးဆန်းသော ဥကမ္ဘာမှာ ပြည့်စုံနေပြီဖြစ်သလို ကောင်းကင်ကို ဆန့်ကျင်သော ကမ္ဘာ့သစ်ပင် လည်း ရှိနေသည်။

ဟင်းလင်းပြင်ထဲမှ စွမ်းအားများကို စုပ်ယူသည့်နှုန်းမှာ စိတ်ကူးကြည့်၍ပင် မရနိုင်ပေ။

ထန်ထျန်း၏ အဆင့်တက်နှုန်းကို အပြည့်အဝ အမှီလိုက်နိုင်သည်။

မကြာမီမှာပင် သူက ဟွမ်ယွမ်တာအို ၏ အထွတ်အထိပ်သို့ ရောက်ရှိသွားသည်။

နောက်တစ်ဆင့်မှာတော့... ဝူကျိတာအိုအဆင့်ပင်

သက်ရှိများ၏ အထွတ်အထိပ်၊ တာအိုလမ်းစဉ်၏ အဆုံးပင်

ဝူကျိတာအိုအဆင့် ဆိုသည်မှာ ကမ္ဘာပေါ်တွင် အတုမရှိ အနှိုင်းမဲ့ခြင်းဖြစ်ပြီး ၎င်းမှာ အလကား ပြောနေခြင်း မဟုတ်ပေ။

ဤအဆင့်က မြောက်မြားလှစွာသော ကောင်းကင်နိယာမများ၊ ဟင်းလင်းပြင်နိယာမများကို ထိန်းချုပ်ထားနိုင်ပြီ ဖြစ်ကာ အခွင့်အရေး တစ်ခုရသည်နှင့် ကမ္ဘာမှ ကျော်လွန်ပြီး ကျိကျွင်း ဖြစ်လာနိုင်မည် ဖြစ်သည်။

ဤနေရာသို့ ရောက်သောအခါ ထန်ထျန်းက သူထိန်းချုပ်ထားသော နိယာမအားလုံးကို ခန္ဓာကိုယ်အတွင်းသို့ တစ်ပြိုင်နက်တည်း ပေါင်းစပ်လိုက်သည်။

နောက်တစ်ခဏတွင် ကြောက်မက်ဖွယ်ကောင်းသော နိယာမလှိုင်းများက သူ၏ကိုယ်ပေါ်မှ ပေါက်ကွဲထွက်လာတော့သည်။

ထိုကြောက်စရာကောင်းသော အော်ရာ ကြောင့် ပတ်ဝန်းကျင်ရှိ လမ်းကြောင်းမှာပင် လိမ်တွန့်သွားခဲ့သည်။

ထန်ထျန်းသည်လည်း အရာအားလုံးကို ထိန်းချုပ်ထားနိုင်သည့် ခံစားချက်ကို ယခုအခိုက်အတန့်တွင် အမှန်တကယ် ခံစားလိုက်ရသည်။

ဤလောကရှိ အရာအားလုံးမှာ သူ၏ခြေဖဝါးအောက်တွင် ဝပ်စိုးနေသည့်အလားပင်။

"ဘုန်း"

လမ်းကြောင်း၏ အခြားတစ်ဖက်မှ ကမ္ဘာ့စိတ်ဆန္ဒမှာ ရူးသွပ်သွားပြီ ဖြစ်ကာ ပေါက်ကွဲသံများ အဆက်မပြတ် ထွက်ပေါ်နေသည်။

၎င်းသည် ဤသက်ရှိက ၎င်းကို ကျော်လွန်သွားမည်ကို တားဆီးချင်သော်လည်း ဘာမှ မတတ်နိုင်ဘဲ အချည်းနှီးသာ ဒေါသထွက်နေရသည်။

"ဆူ မနေနဲ့တော့"

"နားငြီးတယ်"

ထန်ထျန်းက စိတ်ထဲမှ ခပ်တိုးတိုး ဆဲလိုက်ပြီးနောက် သက်ပြင်းအရှည်ကြီး တစ်ချက် ချလိုက်သည်။

သူက ကောင်းကင်ထိပ်ဆုံးနှင့် ပို၍ ပို၍ နီးကပ်လာနေပြီဖြစ်ကာ ဖြစ်နိုင်ခြေရှိသော တိုက်ခိုက်မှုများ အချိန်မရွေး ရောက်လာနိုင်ကြောင်း သူ ခံစားနေရသည်။

သူ့အတွက် နောက်ဆုံးတစ်လှမ်းသာ ကျန်တော့သည်။

ကျိကျွင်း

ထန်ထျန်းမှာ အချိန်မဆွဲဘဲ အခြေအနေကို ပြင်ဆင်ပြီးနောက် ထူးဆန်းသော ဥကမ္ဘာကို နှိုးဆွကာ နောက်ဆုံးတိုက်ခိုက်မှုကို စတင်လိုက်တော့သည်

တစ်ခဏအတွင်းမှာပင် ထူးဆန်းသော ဥကမ္ဘာမှာ အရှိန်အဟုန်ဖြင့် တုန်ခါလာသည်။

သစ်ပင်ငယ်လေးအဖြစ် ကြီးထွားလာသော ကမ္ဘာ့သစ်ပင်မှာလည်း တရှဲရှဲနှင့် တုန်ခါနေပြီး မြည်သံများ ထွက်ပေါ်နေသည်။

အဆုံးမဲ့သော နိယာမစွမ်းအားများနှင့်အတူ ကြီးကျယ်ခမ်းနားသော ကမ္ဘာ့စွမ်းအားများ ထွက်ပေါ်လာပြီး ထန်ထျန်း၏ ခန္ဓာကိုယ်ထဲသို့ အတူတကွ ပေါင်းစပ်ဝင်ရောက်သွားသည်။

ထန်ထျန်းက နောက်ထပ် အသွင်ပြောင်းလဲခြင်း အသစ်တစ်ခုကို စတင်လိုက်ပြန်သည်။

စွမ်းအား၊ ခန္ဓာကိုယ်၊ ဝိညာဉ် နှင့် အသက်စွမ်းအား တို့သည်ပင် လျှို့ဝှက်ဆန်းကြယ်ပြီး ကြောက်မက်ဖွယ်ကောင်းသော အဆင့်တစ်ခုဆီသို့ ဆက်လက် ဦးတည်နေသည်။

ထိုအဆင့်ကို "ကျော်လွန်ခြင်း" သို့မဟုတ် "ကျိကျွင်း" ဟု ခေါ်သည်။

အရာအားလုံးမှာ သူနှင့် ကြောင်ကလေး ခန့်မှန်းထားသလိုပင်၊ ပြည့်စုံသော ကမ္ဘာတစ်ခုကို ပိုင်ဆိုင်ထားသည့် သူက ကျိကျွင်း အဆင့်၏ အစွန်းအဖျားကို အမှန်တကယ် ထိတွေ့နိုင်ခဲ့ပြီပင်

တစ်ခါက ကျိကျွင်း ဖြစ်လာပြီဆိုလျှင် သူက မည်သည့်အရာကိုမျှ ကြောက်စရာ မလိုတော့ဘဲ ဤကျယ်ပြောလှသော ကမ္ဘာကြီးထဲတွင် စိတ်ကြိုက် လှည့်လည်သွားလာနိုင်တော့မည် ဖြစ်သည်။

ထန်ထျန်း၏ အစွမ်းမှာ ဆက်တိုက် တိုးတက်လာသည်နှင့်အမျှ ကမ္ဘာ့သစ်ပင် ပျိုးပင်လေး၏ ကိုယ်ပေါ်တွင် မှိန်ပျပျ အလင်းတန်းတစ်ခု ဖုံးလွှမ်းလာသည်။

တစ်ချိန်တည်းမှာပင် ထန်ထျန်း၏ ခန္ဓာကိုယ်ပေါ်တွင်လည်း ထိုနည်းတူ အလင်းတန်းများ ဖုံးလွှမ်းလာသည်။

ဤအချိန်တွင် လမ်းကြောင်း တစ်ဖက်မှ ကမ္ဘာ့စိတ်ဆန္ဒပင်လျှင် ဆက်၍ ေဆူ မနေတော့ပေ။

အဘယ်ကြောင့်ဆိုသော် ထန်ထျန်းက ကျော်လွန်ခြင်း လမ်းစဉ်ပေါ်သို့ တရားဝင် တက်လှမ်းနေပြီဖြစ်ရာ ၎င်းအနေနှင့် မည်သို့မျှ တားဆီးရန် အချိန်မမီတော့သောကြောင့် ဖြစ်သည်။

ဤအခြေအနေမှာ အတန်ကြာအောင် ဆက်ရှိနေခဲ့သည်။

ဒါပေမဲ့ ဒီအချိန်မှာပဲ ထန်ထျန်းက မျက်လုံးဖွင့်လိုက်ပြီး မျက်မှောင်ကြုတ်လိုက်သည်။

"ဘာဖြစ်လို့လဲ"

အမြဲတမ်း စောင့်ကြည့်နေသည့် ကြောင်ကလေးက အလျင်အမြန် မေးလိုက်သည်။

ထန်ထျန်းက မျက်မှောင်ကြုတ်ရင်း ပြောလိုက်သည်။ "နည်းနည်း... လိုနေသလိုပဲ"

"ကမ္ဘာ့သစ်ပင်ဆီကနေ လာတဲ့ ကမ္ဘာ့စွမ်းအားက မပြည့်စုံသလိုပဲ"

"ဒါကြောင့် နောက်ဆုံးခြေလှမ်းကို တကယ် မလှမ်းနိုင်ဘူး ဖြစ်နေတယ်"

ကြောင်ကလေးက ရှေ့က ကမ္ဘာ့သစ်ပင်ကို ကြည့်ပြီး သူ့ခေါင်းကို ကုတ်လိုက်သည်။

"အာ... ဒါက..."

"မပြည့်စုံဘူးလား..."

"ဒါဆို ကမ္ဘာ့သစ်ပင်က မကြီးသေးလို့လား"

၎င်းက ခန့်မှန်းချက်တစ်ခု ထုတ်လိုက်သည်။

ထန်ထျန်း ခေတ္တ စဉ်းစားပြီး ခေါင်းညိတ်လိုက်သည်။

ဤအကြောင်းရင်းကြောင့်သာ ဖြစ်နိုင်ပေလိမ့်မည်။ အဘယ်ကြောင့်ဆိုသော် ပြဿနာမှာ ကမ္ဘာ့စွမ်းအားပေါ်တွင် ရှိနေသည်ဟု သူ အလွန်ရှင်းလင်းစွာ ခံစားနေရသောကြောင့်ပင်၊ သူ၏ ကမ္ဘာ့သစ်ပင်မှာ နုနယ်လွန်းသေးသည်။

"ဟုတ်လောက်တယ်၊ ကမ္ဘာ့သစ်ပင် ကြီးလာပြီး တာအိုအသီး သီးလာတဲ့အခါကျမှ တကယ့် ကျိကျွင်း ဖြစ်လာနိုင်လိမ့်မယ် ထင်တယ်"

ထန်ထျန်းက ပြောလိုက်သည်။

ကြောင်ကလေးက ခေါင်းညိတ်ပြီး သက်ပြင်းချကာ "အင်း... နှမြောစရာပဲ၊ နည်းနည်းလေး လိုသွားတယ်"

"ဒီလိုဖြစ်မယ်မှန်း သိရင် ငါ ပိုကြိုးစားပြီး သူ့ကို ပိုကြီးအောင် လုပ်ထားမှာ"

စိတ်ဓာတ်ကျနေသည့် ကြောင်ကလေးကို ကြည့်ပြီး ထန်ထျန်းက ရယ်လိုက်သည်။ "ဒီလောက်ဆိုရင် တော်တော် မိုက်နေပါပြီ"

"အင်မော်တယ်ဧကရာဇ်ကနေ ကျိကျွင်း တစ်ပိုင်း အဆင့်အထိ တိုက်ရိုက်ရောက်တာက ဒီကမ္ဘာမှာ ငါတို့ပဲ ဒီလို အံ့အားသင့်စရာကို လုပ်နိုင်တာ"

"ပြီးတော့ ကမ္ဘာ့သစ်ပင်က မကြာခင် ကြီးလာမှာပါ၊ ကျိကျွင်း ဖြစ်ဖို့က အချိန်တစ်ခုပဲ လိုတော့တာ"

ထန်ထျန်း ပြောတာကို ကြားတော့ ကြောင်ကလေးလည်း ပြန်ပြီး စိတ်လှုပ်ရှားလာကာ "ဟုတ်သားပဲ၊ ဒီလို အဆင့်တက်နှုန်းမျိုးဆိုရင် ငါ့သခင် မြင်ရင်တောင် မေးရိုးပြုတ်ကျသွားလောက်တယ်"

"ဒါနဲ့... အဲဒီကောင် လမ်းမှာ လာတားနိုင်တယ်လို့ မင်း ပြောထားတယ် မဟုတ်လား"

"သူ တစ်ခုခုကို တွက်ချက်မိပြီး မလာရဲတော့တာများလား၊ ဟားဟားဟား..."

လက်ရှိတွင် ကောင်းကင်ထိပ်ဆုံးနှင့် အလွန် နီးကပ်နေပြီ ဖြစ်သည်။

ထန်ထျန်းက ပြုံးလိုက်ပြီး တစ်ခုခု ပြောမည်အပြု...

ရုတ်တရက် သူ မျက်မှောင်ကြုတ်လိုက်ပြီး လမ်းကြောင်း၏ အပြင်ဘက်ကို လှမ်းကြည့်လိုက်သည်။

ကြောက်မက်ဖွယ်ကောင်းသော ဟင်းလင်းပြင်မုန်တိုင်း တစ်ခုက သူရှိရာဘက်သို့ ဦးတည်ပြီး တိုက်ခတ်လာနေသည်

....

ကြီးမားသော အစီအရင် စင်မြင့်တစ်ခုပေါ်တွင်

ပုံရိပ်အချို့က အစီအရင်ကြီး၏ ရှေ့တွင် ရပ်နေရင်း တစ်ခုခုကို စောင့်ဆိုင်းနေကြသည်။

အကယ်၍ ထန်ထျန်းသာ ဤနေရာမှာ ရှိနေပါက ထိုသူများထဲမှ တစ်ဦးမှာ တိမ်တိုက် ထျန်းဖူနန်းတော်၏ ယခင်အသုတ်မှ နတ်ဘုရားသားတော် ဖြစ်ခဲ့သည့် ကျန်းဖုန်း ဖြစ်ကြောင်း သိလိုက်ပေလိမ့်မည်။

နောက်တစ်ဦးမှာတော့ သူ ထာဝရစင်မြင့်ပေါ်တွင် တွေ့ခဲ့သည့် နှစ်တစ်ထောင် ထူးချွန်သူ လျိုထျန်းဟုန် ဖြစ်သည်။

အစီအရင်ပေါ်ရှိ လှိုင်းနှုန်းများ ပိုမို ပြင်းထန်လာသည်ကို ခံစားရသောအခါ ကျန်းဖုန်းမှာလည်း စိတ်လှုပ်ရှားလာတော့သည်။

"ဒီတစ်ခေါက် နတ်ဘုရားသားတော်က ချန်ဝူဟွေ့ တာအိုအရှင် ကိုယ်တိုင် နာမည်တပ်ပြီး ခေါ်ထားတာပဲ"

"ငါတို့ တိမ်တိုက် ထျန်းဖူနန်းတော် ဒီတစ်ခေါက်တော့ တကယ်ပဲ ကံကောင်းတော့မယ် ထင်တယ်"

သူက စိတ်လှုပ်ရှားစွာ ပြောလိုက်သည်။

တခြားလူများက ခေါင်းညိတ်ပြကြပြီး လျိုထျန်းဟုန်ကတော့ ဘာခံစားချက်မှ မပြဘဲ ငြိမ်သက်စွာ ရပ်နေသည်။

မကြာမီ အစီအရင်၏ လှိုင်းနှုန်းမှာ ဆက်တိုက် ပြင်းထန်လာပြီး လမ်းကြောင်းအတွင်းရှိ လူမှာ ရောက်ရှိတော့မည် ဖြစ်သည်။

ဒါပေမဲ့ အဲဒီအချိန်မှာပဲ... ကြောက်မက်ဖွယ်ကောင်းတဲ့ စွမ်းအားတစ်ခုက အစီအရင်စင်မြင့်ပေါ်မှာ ရုတ်တရက် ပေါက်ကွဲသွားပြီး အပေါ်က ပုံရိပ်အားလုံးကို လွင့်စင်သွားစေသည်။

ပြန်ပြီး သတိဝင်လာတဲ့အခါ ကျန်းဖုန်းက မျက်နှာဖြူလျော့ကာ အလန့်တကြား အော်လိုက်မိသည်။ "သောက်..."

"နှစ်ပေါင်း သောင်းချီမှ တစ်ခါဖြစ်တတ်တဲ့ ဟင်းလင်းပြင်မုန်တိုင်းကြီးပဲ သူနဲ့ သွားတိုးနေတာတော့ မဟုတ်ပါဘူးနော်"