အခန်း (၂၈၃-၂၈၄)

အခန်း။ ၂၈၃

ထို့နောက် တစ်ကောင်ပြီးတစ်ကောင် လုံယီ၏ ခန္ဓာကိုယ်ပေါ်မှ ပြုတ်ကျကာ မြေပြင်ပေါ်သို့ ရောက်ရှိသွားပြီး ၎င်းတို့၏ ဝိညာဉ်များ ချုပ်ငြိမ်းကာ ပြန်လည်နိုးထနိုင်စွမ်း မရှိတော့ပေ။

တစ်ချိန်တည်းမှာပင် စွမ်းဆောင်ရည်ပြမျက်နှာပြင်ထဲရှိ စွမ်းအင်များမှာ ၄၀ မှ ၅၀ မှတ်အထိ တိုးပွားလာခဲ့သည်။ ရွှေရောင်ပိုးကောင်များမှာ လက်သည်းခွံအရွယ်သာ ရှိသော်လည်း တစ်ကောင်ချင်းစီမှာ လုံယီအတွက် ပျမ်းမျှ စွမ်းအင် ၂ မှတ်စီ ပေးစွမ်းနိုင်ရာ ကိုးပိုင်းပိုးကောင်များထက် များစွာ ပိုမိုအားကောင်းလှသည်။

“အရေပြားသန့်စင်ခြင်း”

လုံယီသည် အခြားထူးဆန်းသော အင်းဆက်များ၏ ကိုက်ခဲမှုကို ခံနိုင်ရည်ရှိစေရန် သူ၏ ကျောက်စိမ်းဖြူရောင် အရေပြားကို ပိုမိုခိုင်မာအောင် အရေပြားသန့်စင်ခြင်းအတတ်ကိုပါ တစ်ပြိုင်နက် အသက်သွင်းလိုက်သည်။

ဒေါင်…

အနက်ရောင် အလင်းတန်းတစ်ခုမှာ လုံယီ၏ ဘယ်ဘက်မျက်လုံးထဲသို့ ပစ်မှတ်ထားကာ ပြေးဝင်လာသော်လည်း သူက အချိန်မီ မှိတ်လိုက်နိုင်သည်။ အနက်ရောင်အလင်းတန်းမှာ ကျောက်ဖြစ်ခြင်းနှင့် အရေပြားသန့်စင်ခြင်းတို့ဖြင့် အားဖြည့်ထားသော လုံယီ၏ မျက်ခွံကို ထိမှန်သွားသည်။ ၎င်းမှာ ဘေးသို့ အလွယ်တကူ လွင့်စဉ်သွားပြီး ယခင်အင်းဆက်နှစ်မျိုးနှင့် မတူသော ပုံသဏ္ဌာန်မှာ ပေါ်လွင်လာတော့သည်။

၎င်းမှာ လက်သည်းခွံတစ်ဝက်ခန့်သာ အရွယ်ရှိသော ကတ္တရာစေးကဲ့သို့ နက်မှောင်နေသည့် ပိုးကောင်တစ်ကောင် ဖြစ်သည်။ ၎င်း၏ ဝမ်းဗိုက်အောက်တွင် သေးငယ်သော အနက်ရောင်

ခြေထောက်များစွာ ခပ်စိပ်စိပ်ပေါက်နေပြီး နဖူးပေါ်တွင်မူ ဓားငယ်တစ်စုံကဲ့သို့ ချွန်ထက်သော မီးခိုးရောင် အာရုံခံဦးမှင်တစ်ခု ရှိနေသည်။ သို့သော် ထိုဓားငယ်မှာ လုံယီ၏ မျက်ခွံနှင့် တိုက်မိခြင်းကြောင့် သိသိသာသာ ကွေးညွတ်၍ ပျက်စီးသွားခဲ့သည်။

“တော်တော်လေး ယုတ်မာတာပဲ”

လုံယီသည် ထိုအနက်ရောင်ပိုးကောင်ကို လက်ဖြင့်ညှစ်၍ အနည်းငယ် ဖိအားပေးလိုက်ရာ ပိုးကောင်မှာ အရည်ပျော်ကာ ကြေမွသွားတော့သည်။

သူသည် စိုက်ခင်းများကို ဆက်လက်ရှာဖွေခဲ့ရာ ထူးဆန်းအံ့သြဖွယ်ကောင်းသော အင်းဆက်များစွာမှာ သူ၏ ထောင်ချောက်အတွင်းသို့ တရစပ် ကျရောက်လာခဲ့သည်။ သို့သော် စောစောက ရွှေရောင်ပိုးကောင်များကဲ့သို့ ဒုက္ခပေးနိုင်သူ တစ်ကောင်မျှ မပါရှိဘဲ အားလုံးကို အားစိုက်စရာမလိုဘဲ သုတ်သင်နိုင်ခဲ့သည်။

ညဦးပိုင်းသို့ ရောက်ရှိလာချိန်တွင် လုံယီမှာ သတ်ဖြတ်ရလွန်းသဖြင့် ထုံထိုင်းနေပြီဖြစ်သည်။ စိုက်ခင်းများထဲမှ လမ်းလျှောက်ထွက်လာချိန်တွင် သူ၏ တာအိုဝတ်စုံမှာ ပိုးကောင်များ၏ ဝါ၊ဖြူ၊ နီ အရောင်စုံ အရည်များဖြင့် ပေကျံနေပြီး ရွံရှာဖွယ်ကောင်းသော အနံ့ဆိုးများ ထွက်ပေါ်နေသည်။

“ဒုက္ခပဲ... နောက်ကျရင် အသစ်တစ်ထည် ဝယ်မှဖြစ်တော့မယ်”

လုံယီမှာ အနည်းငယ် စိတ်ရှုပ်သွားရသည်။ လက်ရှိတွင် သူသည် ငွေတစ်ပြားမှ မရှိဘဲ ငွေရှာရန် နေရာလည်း မရှိသေးပေ။

ကံကောင်းထောက်မစွာဖြင့် နောက်ထပ် တာအိုဝတ်စုံတစ်ထည် ကျန်ရှိနေသေးသဖြင့် မနက်ဖြန်အတွက်မူ အညစ်အကြေးများ ပေကျံမည်ကို စိုးရိမ်စရာမလိုတော့ပေ။

သို့သော်လည်း စွမ်းအင်မှတ်များ တိုးပွားလာသည့် စွမ်းဆောင်ရည်ပြမျက်နှာပြင်ကို ကြည့်ရင်း လုံယီ၏ မျက်နှာတွင် မသိမသာ အပြုံးတစ်ခု ပေါ်လာခဲ့သည်။

[စွမ်းအင်: ၁၉၈၆]

ဒီနေ့ တစ်ရက်တည်းတင် စွမ်းအင်မှတ် ၈၀၀ ကျော် တိုးလာတာပဲ။

၎င်းမှာ လုံယီ၏ မှတ်တမ်းတွင် အများဆုံးဖြစ်ပြီး သားရဲလှိုင်းများကို နှိမ်နင်းစဉ်ကထက်ပင် ပို၍ များပြားလှသည်။

မသေမျိုးကျင့်ကြံသူများ၏ ဂိုဏ်းကြီးတစ်ခုဖြစ်၍သာ ဤသို့ ပျက်စီးနေသော ဝိညာဉ်စိုက်ခင်းတစ်ခုမှပင် ဤမျှ များပြားလှသော စွမ်းအင်များကို ပေးစွမ်းနိုင်ခြင်း ဖြစ်ပေလိမ့်မည်။

ယခုမူ လုံယီသည် အကြီးအကဲများထံ အယူခံဝင်ရန် စိတ်မကူးတော့ပေ။ သူသည် ဤ တိတ်တဆိတ် ခံလိုက်ရသော အရှုံးကို လက်ခံလိုက်ပြီး ဝမ်ဝင်ပိုင်နှင့်မူ နောက်မှသာ စာရင်းရှင်းရန် ဆုံးဖြတ်လိုက်သည်။

နောက်တစ်နေ့တွင် အမည်မသိ အကြီးအကဲတစ်ဦးထံမှ အလောင်းထိန်းချုပ်အတတ် သင်ခန်းစာကို တက်ရောက်ပြီးနောက် သူသည် ဝူကျိုဇုန်ရှိ ဝိညာဉ်စိုက်ခင်းသို့ အပြေးအလွှား သွားခဲ့သည်။ ဤတစ်ကြိမ်တွင်မူ သူ၏ နောက်ကွယ်၌ အနက်ရောင် အရိပ်တစ်ခု တိတ်တဆိတ် ပါလာခဲ့သည်။

၎င်းမှာ လုံယီထက် အရပ်အနည်းငယ် ပုပြီး မျက်နှာသွင်ပြင်မှာ ရိုးရိုးရှင်းရှင်းပင် ရှိသော်လည်း ဆံပင် မုတ်ဆိတ်နှင့် မျက်ခုံးမွေးများ လုံးဝမရှိပေ။ မျက်ဝန်းများမှာ ပယင်းဝါရောင်နှင့် သွေးနီရောင် ရောယှက်နေသည်။ ခြေဗလာဖြင့် တိတ်ဆိတ်စွာ လျှောက်လှမ်းနေသော ထိုအရာမှာ လုံယီ၏ ဝိညာဉ်အလောင်း လုံအာပင်။

တစ်နေ့ကျရင် ဝိညာဉ်အလောင်းအိတ်တစ်လုံး ဝယ်နိုင်အောင် ကြိုးစားရမယ်ဟု လုံယီ တွေးလိုက်သည်။

မဟုတ်ပါက အပြင်ထွက်တိုင်း အလောင်းတစ်လောင်းကို နောက်က တကောက်ကောက် ပါခိုင်းနေရသည်မှာ ကြည့်ရသည်မှာ အဓိပ္ပာယ်မရှိလှပေ။

ပေါင်းပင်များ ထူထပ်သော စိုက်ခင်းသို့ ရောက်ရှိလာသောအခါ ….

ဝှူး

ရွှေရောင်အရိပ်တစ်ခုမှာ မကြောက်မရွံ့ ပျံထွက်လာခဲ့သည်။ ၎င်းမှာ ကြောက်မက်ဖွယ်

ကောင်းသော ရွှေရောင်ပိုးကောင်ပင်။ လုံအာသည် ဗီဇအရ လုံယီ၏ ရှေ့သို့ တက်လာပြီး ၎င်း၏ ဖြူဖျော့သော ညာလက်ဝါးကို ရွှေရောင်ပိုးကောင်ဆီသို့ ဆန့်ထုတ်လိုက်သည်။

ဖတ်…

ဝိညာဉ်အလောင်းသည် ရွှေရောင်ပိုးကောင်၏ ကိုက်ခဲမှုကို မခံနိုင်ဘဲ လက်ဝါးပေါ်တွင် သွေးစို့နေသော အက်ကြောင်းတစ်ခု ချက်ချင်း ပေါ်လာတော့သည်။

နက်မှောင်သော သွေးစိမ်းရောင်များ စီးထွက်လာပြီး ရွှေရောင်ပိုးကောင်ကို လွှမ်းခြုံသွားတော့သည်။ ခဏအကြာတွင် ရွှေရောင်ပိုးကောင်မှာ လှုပ်ရှားမှုမရှိတော့ဘဲ ငြိမ်သက်သွားသည်။ ဝိညာဉ်အလောင်း၏ သွေးထဲရှိ အဆိပ်ကြောင့် သေဆုံးသွားခြင်းဖြစ်သည်မှာ သိသာလှသည်။

ဒါက ထိရောက်တာပဲလား။

လုံယီသည် လုံအာကို ဆက်လက်၍ အန္တရာယ်မပြုစေတော့ဘဲ စိုက်ခင်းများထဲသို့ တစ်ဦးတည်းဝင်ကာ စွမ်းအင်များရရှိရန် ပိုးကောင်များကို ဆက်လက်သုတ်သင်ခဲ့သည်။ ပထမနေ့က အစုလိုက်အပြုံလိုက် သတ်ဖြတ်ခဲ့မှုကြောင့်လားမသိ ဒုတိယနေ့တွင် စုဆောင်းရရှိသော စွမ်းအင်မှာ ၃၀၀ ကျော်သာရှိပြီး နောက်ရက်များတွင်လည်း ထိုပမာဏဝန်းကျင်တွင်သာ ရှိတော့သည်။

ယနေ့တွင်မူ လုံယီသည် စိုက်ခင်းပြင်ပရှိ မြေကွက်လပ်တွင် ရပ်နေသည်။ စွမ်းဆောင်ရည်ပြမျက်နှာပြင်ထဲရှိ နယ်ပယ်ကဏ္ဍအောက်တွင် ကျောက်အရေပြား ကိုယ်ခံပညာရှင်သည် နောက်ဆုံးတွင် ပြီးပြည့်စုံခြင်းအဆင့်သို့ ရောက်ရှိသွားပြီး ၎င်း၏ဘေးတွင် အပေါင်းလက္ခဏာလေးတစ်ခု ပေါ်လာခဲ့သည်။

လုံယီသည် စိတ်ထဲမှ ထိုအပေါင်းလက္ခဏာကို နှိပ်လိုက်ရာ ၎င်း၏ အခြေအနေမှာ ချက်ချင်းပင် ပြောင်းလဲသွားတော့သည်။

[ကျောက်အရေပြား ကိုယ်ခံပညာရှင် (၆၀၀/၆၀၀) → သံအရေပြား ကိုယ်ခံပညာရှင်(၀/၆၀၀)]

ချက်ချင်းပင် မရေမတွက်နိုင်သော စွမ်းအင်များသည် သူ၏ ခန္ဓာကိုယ်အတွင်းသို့ စီးဝင်လာပြီး အရေပြား၊ အသား၊ အရိုး၊ ကိုယ်တွင်းအင်္ဂါများ၊ အကြောများနှင့် သွေးကြောများကို အဆက်မပြတ် အသွင်ပြောင်းလဲစေတော့သည်။ လုံယီသည် သူ၏ တာအိုဝတ်စုံကို အလျင်အမြန် ချွတ်လိုက်သည်။

သူ၏ ခန္ဓာကိုယ်သည် ကြေးနီရောင်မှ အနက်စပ်သော အနီရောင်သို့ သိသိသာသာ ပြောင်းလဲသွားပြီး အပူချိန်မြင့်မားစွာ ပေးထားသော သတ္တုတစ်ခုကဲ့သို့ နက်မှောင်သော အလင်းတန်းများ ထွက်ပေါ်လာသည်။ သူ၏ ခန္ဓာကိုယ်မျက်နှာပြင်မှ အဖြူရောင် ရေငွေ့များစွာ ထွက်ပေါ်လာပြီး ပတ်ဝန်းကျင် အနည်းငယ်အတွင်း မြူခိုးများ ဖုံးလွှမ်းသွားသကဲ့သို့ ချက်ချင်းပင် ပြည့်နှက်သွားတော့သည်။

ဝီ... ဝီ...

စိုက်ခင်းထဲမှ အင်းဆက်များသည် သူတို့၏ အတောင်ပံများကို ခတ်ကာ လုံယီရှိရာသို့ ပြေးဝင်လာကြပြီး သူ့ကို ကိုက်သတ်ရန် ကြိုးစားကြသည်။ အသိဉာဏ်နည်းပါးသော ထိုအင်းဆက်များသည် လုံယီ ယခုအချိန်တွင် ဘာလုပ်နေသည်ကို နားမလည်ကြပေ။

၎င်းတို့၏ ခန္ဓာကိုယ်များသည် လုံယီနှင့် ထိတွေ့မိသည်နှင့် တဖြတ်ဖြတ် မြည်ကာ ချက်ချင်းပင် လောင်ကျွမ်းသွားကြပြီး ကင်ထားသော အင်းဆက်ခွံများအဖြစ်သို့ ပြောင်းလဲသွားကာ မွှေးကြိုင်သော အနံ့တစ်ခု ထွက်ပေါ်လာသည်။

လုံယီ မျက်လုံးများကို ဖွင့်လိုက်သောအခါ သူ့ပတ်ဝန်းကျင်တွင် ကင်ထားသော အင်းဆက်အလောင်းများ ဝန်းရံနေသည်ကို တွေ့လိုက်ရပြီး စွမ်းဆောင်ရည်ပြမျက်နှာပြင်ရှိ စွမ်းအင်များမှာလည်း အမှတ်အနည်းငယ် တိုးပွားလာခဲ့သည်။

သူသည် အရေပြားသန့်စင်ခြင်းအတတ်ကို အသက်သွင်းလိုက်ရာ အရေပြား၏ မျက်နှာပြင်

အရောင်မှာ ချက်ချင်းပင် အနီရောင်သို့ ပြောင်းလဲသွားသည်။ နက္ခတ်ကြယ်ကြွေ သံပုဆိန်ဖြင့် အသာအယာ ခြစ်ကြည့်လိုက်သော်လည်း အရေပြားမှာ အနည်းငယ် ချိုင့်ဝင်သွားရုံမှလွဲ၍ တစ်စုံတစ်ရာ ထိခိုက်ပျက်စီးခြင်း မရှိပေ။

လုံယီ၏ သွေးစွမ်းအင်မှာ အံ့မခန်းဖွယ် ကောင်းလှသည်။

သံအရေပြား အဆင့်သို့ ချိုးဖောက်ရောက်ရှိပြီးနောက် သူ၏ အရေပြားခုခံကာကွယ်မှုမှာ သာမန် ဖျန်းအန်းရွာမှ သံအရေပြားကိုယ်ခံပညာရှင်များထက် များစွာ သာလွန်သွားခဲ့သည်။ နက္ခတ်ကြယ်ကြွေသံပင်လျှင် သူ၏အရေပြားကို ဖောက်ထွင်းနိုင်ခြင်း မရှိတော့ပေ။

အကယ်၍ ကျောက်ဖြစ်ခြင်းပါရမီကိုပါ ထပ်မံပေါင်းစပ်အသုံးပြုလိုက်မည်ဆိုပါက သူ၏ ခုခံနိုင်စွမ်းမှာ မည်သည့်အဆင့်အထိ ရှိသွားမည်ကို လုံယီကိုယ်တိုင်ပင် အတပ်မပြောနိုင်တော့ချေ။ သို့သော် သူ၏ ခွန်အားကိုမူ ကိန်းဂဏန်းဖြင့် တိကျစွာ တိုင်းတာနိုင်သည်။

ဟူး…

လုံယီ လက်သီးဖြင့် တစ်ချက်ထိုးလိုက်ရာ သူ၏လက်သီးရှေ့တွင် အဖြူရောင် လေစီးကြောင်းတစ်ခု ပေါ်လာပြီး ယပ်တောင်ပုံစံ လှိုင်းဂယက်များအဖြစ် အဝေးသို့ ပျံ့နှံ့သွားကာ ခဏချင်းပင် ပျောက်ကွယ်သွားတော့သည်။

အခြေခံခွန်အားက ပေါင် သုံးသောက်ခြောက်ထောင်ကနေ လေးသောင်းအထိ တိုးလာတယ်။ ၁၀ ရာခိုင်နှုန်းလောက် တက်လာတာပဲ။

အနက်ရောင်အရေပြား အဆင့်ကို ချိုးဖောက်နိုင်ရင်တော့ ခွန်အားက သိသိသာသာကို ခုန်ပျံတိုးတက်သွားမှာပဲ။ အရေပြားသန့်စင်ခြင်းအတတ်က ခံနိုင်ရည်ကို အဓိကထား လေ့ကျင့်တာဖြစ်ပြီး အနက်ရောင်အရေပြားက နောက်ဆုံးအဆင့်ဖြစ်တဲ့အတွက် ထူးခြားမှာ အသေအချာပဲ။

နှမြောစရာကောင်းတာက သံအရေပြားအဆင့် ရောက်ပြီးနောက်မှာ အရေပြားသန့်စင်ခြင်းအတတ်ရဲ့ ကျွမ်းကျင်မှုတိုးနှုန်းက သိသိသာသာ ကျဆင်းသွားပြီး တစ်ရက်ကို ၂ မှတ်ပဲ တက်တော့တယ်။ ဒီအရှိန်နဲ့ဆိုရင် အနက်ရောင်အရေပြားအဆင့် ရောက်ဖို့ ရက်ပေါင်း ၃၀၀ လောက် ကြာဦးမှာ…

အရေပြားသန့်စင်ခြင်းအတတ်ကို ကျင့်ကြံနေစဉ်မှာပင် လုံယီသည် အသက်ရှူကျင့်စဉ်ကိုပါ ဆက်လက်လုပ်ဆောင်နေသည်။ သူ၏ ခန္ဓာကိုယ်အတွင်းရှိ သွေးစွမ်းအင်များမှာ သာမန်ထက် အဆတစ်ရာခန့် ပိုမိုမြန်ဆန်စွာ လည်ပတ်နေပြီး ရှဲ... ရှဲ... ဟူသော မြစ်ရေစီးသံကဲ့သို့ အသံများ ထွက်ပေါ်နေသည်။

သွေးစွမ်းအင်၏ ကြွယ်ဝမှုမှာ ကျင့်ကြံသူများ၏ စိတ်ကူးစိတ်သန်းထက်ပင် ကျော်လွန်နေပြီဖြစ်သည်မှာ ထင်ရှားလှသည်။ သွေးစွမ်းအင်လည်ပတ်မှုမှာ တစ်စုံတစ်ရာ ပေါက်ကွဲထွက်တော့မည့်အလား အရှိန်မြင့်တက်လာသော်လည်း အဆုံးသတ်တွင် အသွင်ကူးပြောင်းမှုဖြစ်စေရန် လိုအပ်သော အရေးကြီးသည့် တွန်းအားတစ်ခု လိုအပ်နေသေးသည်။

ကွိ…

သူ၏စိတ်ထဲမှ လင်းယုန်ငှက်ကလေးမှာ ဝမ်းသာအားရ အော်ဟစ်နေသည်။ ခန္ဓာကိုယ်နှင့် စိတ်ဝိညာဉ် အတူတကွ ဖွံ့ဖြိုးခြင်းအရ လုံယီ၏ ရုပ်ပိုင်းဆိုင်ရာ မြှင့်တင်မှုသည် လင်းယုန်ငှက်ကလေးကိုလည်း သဘာဝအတိုင်း အကျိုးကျေးဇူး ခံစားရစေသည်။

တပည့်တောင်ထိပ်၏ တောင်ခါးပန်းသို့ ပြန်ရောက်သောအခါ လုံယီသည် ယို့ချင်းယီ၏ လိုဏ်ဂူအိမ်ဘေးသို့ သွားကာ လှမ်းခေါ်လိုက်သည်။

“ညီမလေးယို့... ရှိပါသလား”

“ဘာကိစ္စလဲ”

ခဏအကြာတွင် ယို့ချင်းယီ ထွက်လာသည်။

မီးခိုးရောင် တာအိုဝတ်စုံကို ဝတ်ဆင်ထားသော်လည်း သူမ၏ သွယ်လျသော ကိုယ်လုံးကိုယ်ပေါက်ကို ဖုံးကွယ်ထားနိုင်ခြင်း မရှိပေ။ ထူးကဲယင်ကျင့်စဉ်ကို ကျင့်ကြံပြီးနောက် သူမ၏ အရေပြားမှာ ပိုမိုဖြူဖျော့ကာ အလွန်အေးစက်သော အဖြူရောင်သို့ ပြောင်းလဲသွားပြီး သူမ၏ အေးစက်သော အမူအရာနှင့် ပေါင်းစပ်လိုက်သောအခါ ပို၍ပင် လူသူမနီးသော ပုံစံ ပေါက်နေတော့သည်။

“အကူအညီတစ်ခုလောက် တောင်းချင်လို့ပါ ကူညီပေးနိုင်မလား”

လုံယီက ခဏရပ်ကာ ပြောလိုက်သည်။

“လက်ရှိ ကျွန်တော့်ရဲ့ ကျင့်ကြံမှုမှာ အရေးကြီးတဲ့ ပစ္စည်းတစ်ခု လိုအပ်နေလို့ပါ"

အခန်း။ ၂၈၄

“အဲ့ဒါက ဘာလဲ”

“ဝိညာဉ်ဆင့်ကဲပန်းပါ"

လုံယီက ခေတ္တစဉ်းစားပြီးနောက် ထပ်ဖြည့်ပြောလိုက်သည်။

“တကယ်လို့ ဝိညာဉ်ဆင့်ကဲပန်း မရှိရင်လည်း မျှော့ကော်ဒါမှမဟုတ် နဂါးပူစီနံဆိုရင်လည်း ရပါတယ်"

ဝိညာဉ်ဆင့်ကဲပန်းသည် ဟွမ်ကျီ အသက်ရှူကျင့်စဉ်ကို မြှင့်တင်ရန်အတွက် အလွန်အရေးကြီးသည်။ မျှော့ကော်ကိုမူ အရေပြားသန့်စင်ခြင်းအတတ်အတွက် အသုံးပြုပြီး နဂါးပူစီနံကိုမူ ထူးကဲယင်ကျင့်စဉ် အတွက် အသုံးပြုသည်။

ဤသုံးမျိုးထဲမှ မည်သည့်အရာမဆို လုံယီ၏ ခွန်အားကို များစွာတိုးတက်စေနိုင်သဖြင့် သူ့အတွက် အရှုံးမရှိပေ။

“မင်း ငါ့အသက်ကို ကယ်ခဲ့တာပဲ ဒါတွေကို ရှာဖွေပေးဖို့ ငါ အသေအချာ ကူညီပါ့မယ်”

ယို့ချင်းယီက အေးစက်စွာ ပြောလိုက်သည်။

သူမသည် လုံယီ၏ ကျေးဇူးကို အမြန်ဆုံးဆပ်ပြီး ပတ်သက်မှုအားလုံးကို ရှင်းလင်းပစ်ချင်ပုံပင်။

ဒီမိန်းမကတော့ တကယ့်ကို ခေါင်းမာတာပဲ။

လုံယီက စိတ်ထဲမှ ခေါင်းခါလိုက်မိသည်။

အမှန်အတိုင်းပြောရလျှင် သူကိုယ်တိုင် အကြာကြီးရှာဖွေခဲ့သော်လည်း မတွေ့ရှိခဲ့သဖြင့် သူမအပေါ်တွင်လည်း မျှော်လင့်ချက် သိပ်မထားခဲ့ပေ။ သို့သော် မထင်မှတ်ဘဲ သုံးရက်အကြာတွင် ယို့ချင်းယီသည် ဝိညာဉ်ဆင့်ကဲပန်းကို တကယ်ရှာတွေ့ခဲ့သည်။

ဝိညာဉ်ဆင့်ကဲပန်းသည် သုံးပေခန့်ရှည်သော ပင်စည်ရှိပြီး ထိပ်ဖျားတွင် ပန်းခိုင်တစ်ခုရှိကာ အောက်ဘက်တွင် သေးငယ်သော ပန်းပွင့်လေးပေါင်း ရာနှင့်ချီ၍ စုပြုံပေါက်နေသည်။ ပန်းပွင့်လေးတစ်ပွင့်စီတွင် ပွင့်ချပ်ငါးခုပါရှိပြီး အပြာရင့်ရောင်သန်းသော ခရမ်းရောင်ရှိကာ သင်းပျံ့သော ရနံ့တစ်ခု ထွက်ပေါ်နေသည်။

ဒီမိန်းကလေးက တကယ့်ကို အားကိုးရတာပဲ။

လုံယီမှာ အလွန်ဝမ်းသာသွားခဲ့သည်။ ယခုဆိုလျှင် အားလုံးအဆင်သင့်ဖြစ်နေပြီဖြစ်ရာ စွမ်းအင်သာ လိုအပ်တော့သဖြင့် သူ အပြင်းအထန် ကြိုးစားရတော့မည်ပင်။

သူသည် စွမ်းအင်မှတ် ၄၀၀၀ ကျော် စုဆောင်းမိထားပြီးဖြစ်သည်။

တစ်ရက်လျှင် ၃၀၀ မှတ်နှုန်းဖြင့်ဆိုပါက ဆယ်ရက်ကျော်အတွင်း စွမ်းအင်မှတ် ၁၀၀၀၀ ပြည့်နိုင်ပေလိမ့်မည်။ လုံယီသည် အလွန်တက်ကြွနေပြီး နေ့စဉ် အကြီးအကဲများ၏ သင်ခန်းစာများကို နားထောင်ပြီးသည်နှင့် ပိုးကောင်သတ်ရန် စိုက်ခင်းများဆီသို့ အပြေးအလွှား သွားတော့သည်။

လုံယီအတွက်မူ ဝူကျိုဇုန် ဝိညာဉ်စိုက်ခင်းရှိ ထူးဆန်းသော အင်းဆက်များသည် အင်းဆက်များမဟုတ်ဘဲ တောက်ပနေသော စွမ်းအင်မှတ်များသာ ဖြစ်တော့သည်။

ဝိညာဉ်ဆင့်ကဲပန်းကို ရရှိပြီးနောက် သူ၏စွမ်းအင်မှာ ခြောက်ရက်အတွင်း ခြောက်ထောင်ကျော် ဆယ်ရက်အတွင်း ကိုးထောင်ကျော်သို့ ရောက်ရှိလာပြီး နောက်ဆုံးတွင် ဆယ့်သုံးရက်မြောက်နေ့၌ တစ်သောင်းကျော်အထိ ကျော်လွန်သွားခဲ့သည်။

ဟွမ်ကျီ အသက်ရှူကျင့်စဉ်၏ ဘေးတွင် မှိန်ဖျော့ဖျော့ အပေါင်းလက္ခဏာလေးတစ်ခု ပေါ်လာသည်။

လုံယီသည် ထပ်မံတွန့်ဆုတ်မနေတော့ဘဲ အသက်ရှူကျင့်စဉ်ကို အဆင့်မြှင့်တင်လိုက်သည်။

[ဟွမ်ကျီ အသက်ရှူကျင့်စဉ် (ဒုတိယအဆင့် အဆင့်မြင့် ၀/၁၀၀၀၀ + ဝိညာဉ်ဆင့်ကဲပန်း ၁ ပွင့်) → ဟွမ်ကျီ အသက်ရှူကျင့်စဉ် (ဒုတိယအဆင့် ပြီးပြည့်စုံခြင်း)]

ရင်းနှီးမှုမရှိသော မှတ်ဉာဏ်အသစ်များ သူ၏စိတ်ထဲတွင် ပေါ်လာသည်။

ယခင်မှတ်ဉာဏ်များကို အခြေခံ၍ တစ်ပါးသော လူမျိုးနွယ်စုများ၏ ကျူးကျော်မှုကို ခုခံရင်း လုကျွမ်း မျိုးနွယ်စုခေါင်းဆောင်မှာ အင်အားကုန်ခမ်းလုနီးပါး ဖြစ်သွားခဲ့ရာ သူ၏ မျိုးနွယ်စုဝင်များက သူ့ကို ကုသရန် ကြက်သွေးရောင် စုန်းမထံသို့ ခေါ်ဆောင်သွားခဲ့ကြသည်။

ထိုစုန်းမမှာလည်း အစွမ်းထက်သော စမ်းသပ်ချက်ပစ္စည်းတစ်ခု လိုအပ်နေချိန်နှင့် အတော်ပင် တိုက်ဆိုင်သွားခဲ့သည်။

သူမသည် မျိုးနွယ်စုခေါင်းဆောင်ကို ကျောက်ခေါင်းတစ်ခုထဲတွင် ထည့်ထားပြီး နေ့စဉ် မတူညီသော အရည်များကို ထည့်ပေးခဲ့သည်။ သို့သော်လည်း ခေါင်းဆောင်မှာ မည်သည့်တုံ့ပြန်မှုမျှ မရှိဘဲ အသက်မျှင်မျှင်လေးဖြင့်သာ ဆက်နေခဲ့ရသည်။

တစ်နေ့တွင်မူ စုန်းမသည် ခရမ်းရောင် ဝေလငါး၏ နှလုံးသွေးမှ ထုတ်ယူထားသော အရည်တစ်ခွက်ကို ထည့်ပေးလိုက်ရာ မျိုးနွယ်စုခေါင်းဆောင်၏ အဆုတ်တွင် ထူးကဲသော အသွင်ပြောင်းလဲမှုတစ်ခု ဖြစ်ပေါ်လာခဲ့သည်။

သူ၏ အဆုတ်မှာ နီရဲသောအရောင်မှ ခရမ်းဖျော့ရောင်သို့ ပြောင်းလဲသွားပြီး အသက်ဝင်လာသည့်အလား သဘာဝအတိုင်း တဒိတ်ဒိတ် ခုန်လှုပ်လာကာ ၎င်းတို့၏ အသက်ရှူနိုင်စွမ်းမှာ သားရဲကြီးများနှင့်ပင် ယှဉ်နိုင်လာတော့သည်။

ထိုအချိန်မှစ၍ ခေါင်းဆောင်၏ သွေးစွမ်းအင်လည်ပတ်မှုနှုန်းမှာ ဆယ်ဆခန့် တိုးလာပြီး စွမ်းအားများမှာလည်း အရှိန်အဟုန်ဖြင့် တိုးတက်လာခဲ့သည်။

သူ ပိုမိုသန်မာလာလေလေ သူ၏ အဆုတ်မှာ ပိုမိုဖွံ့ဖြိုးလာလေလေဖြစ်ပြီး ၎င်းက သွေးစွမ်းအင်ကို တစ်ဖန်ပြန်၍ မြှင့်တင်ပေးရာ ကောင်းမွန်သော သံသရာတစ်ခု ဖြစ်ပေါ်လာစေသည်။

အနှစ်နှစ်ဆယ်အကြာ အသက်အရွယ်ရလာချိန်တွင်ပင် ခေါင်းဆောင်၏ ဆံပင်များမှာ လုံးဝနက်မှောင်နေဆဲပင်။

သူ၏ ခန္ဓာကိုယ်မှာ ဆယ်ပေခန့်အထိ မြင့်မားလာပြီး တစ်ကိုယ်လုံးတွင် လျှံထွက်နေသော သွေးစွမ်းအင်များ ပြည့်နှက်နေကာ အံ့အားသင့်ဖွယ် ကောင်းလောက်အောင် အပူရှိန်များ ထွက်ပေါ်နေသည်။

သူ၏ ပြောင်းလဲသွားသော အဆုတ်မှာ နက်မှောင်သော ခရမ်းရောင်သို့ ပြောင်းလဲသွားပြီး အဆုတ်၏ မျက်နှာပြင်ပေါ်တွင် သေးငယ်သော လေပြွန်များစွာ ဖုံးလွှမ်းနေတော့သည်။

ဓာတ်ငွေ့ဖလှယ်နိုင်သည့် ဧရိယာ တိုးပွားလာမှုမှာ လူသားတို့၏ အဆင့်ထက် များစွာ ကျော်လွန်သွားခဲ့ပြီး ပင်လယ်နက်ထဲရှိ ဧရာမ ခရမ်းရောင် ဝေလငါး ကြီးများနှင့်ပင် နှိုင်းယှဉ်နိုင်တော့သည်...

လက်တွေ့ကမ္ဘာတွင်မူ စွမ်းအင်အမြောက်အမြားမှာ လုံယီ၏ ခန္ဓာကိုယ်အတွင်းသို့ စီးဝင်လာတော့သည်။

သူ၏ အဆုတ်နှင့်တကွ ဆက်စပ်နေသော တစ်ရှူးများ အာရုံကြောများ သွေးကြောများနှင့် ဆဲလ်များအားလုံးကို ပြင်းထန်စွာ အသွင်ပြောင်းလဲစေတော့သည်။

လုံယီ၏ အဆုတ်သည် သူ၏ မှတ်ဉာဏ်ထဲ၌ မြင်တွေ့ခဲ့ရသကဲ့သို့ပင် စတင်ပြောင်းလဲလာသော်လည်း အဆပေါင်း ထောင်နှင့်ချီ၍ ပိုမိုမြန်ဆန်လှသည်။ ခရမ်းဖျော့ရောင်မှသည် နက်မှောင်သော ခရမ်းရောင်သို့ ပြောင်းလဲသွားပြီး သိပ်သည်းဆမှာလည်း အဆပေါင်းများစွာ ပိုမိုအားကောင်းလာသည်။ အဆုတ်၏ မျက်နှာပြင်ပေါ်တွင် သေးငယ်သော လေပြွန်လေးများစွာ ဖြစ်ပေါ်လာပြီး အသက်ရှူနှုန်းနှင့် စွမ်းဆောင်ရည်ကို များစွာ မြင့်တက်စေသည်။

အသက်ရှူကျင့်စဉ်ကို ကိုယ်တိုင်တကူးတက လုပ်ဆောင်နေစရာ မလိုတော့ဘဲ အဆုတ်သည် အသိဉာဏ်ရရှိသွားသည့်အလား အလိုအလျောက် အသက်သွင်း အသက်ထုတ် လုပ်ဆောင်နိုင်လာသည်။

“ရှူသွင်း... ရှူထုတ်...”

လုံယီသည် အသက်ရှူကျင့်စဉ်ကို အားစိုက်၍ လုပ်ဆောင်ကြည့်လိုက်ရာ ခန္ဓာကိုယ်အတွင်းမှ တောင်ကျရေလျှံသကဲ့သို့ ဝုန်းဝုန်း မြည်သံများကို ကြားလိုက်ရသည်။ အားကောင်းလှသော သွေးစွမ်းအင်များသည် သူ၏ ခန္ဓာကိုယ်အတွင်း စီးဆင်းသွားပြီး ကြွက်သားများကို နီရဲတောက်ပလာစေကာ ခန္ဓာကိုယ်မျက်နှာပြင်မှ အဖြူရောင်ရေငွေ့များ အလိပ်လိုက် ထွက်ပေါ်လာစေသည်။

အသွင်ပြောင်းလဲမှု ပြီးဆုံးသွားသောအခါ သွေးစွမ်းအင်လည်ပတ်သံမှာ သိသိသာသာ ပြန်လည်တိတ်ဆိတ်သွားသည်။ သို့သော် အစွမ်းမှာမူ ယခင်ကထက် မနိမ့်ကျသွားဘဲ တောင်ကျရေခဲပြင်မှသည် နက်ရှိုင်းသော သမုဒ္ဒရာကြီးအလား ငြိမ်သက်သော်လည်း ခန့်မှန်းရခက်ပြီး စွမ်းအားအပြည့် ရှိနေတော့သည်။

လုံယီသည် သတ္တမအဆင့်ချီစွမ်အား ကိုယ်ခံပညာရှင်နယ်ပယ်၏ ညာဘက်အပေါ်ထောင့်ရှိ လက္ခဏာကို နှိပ်လိုက်ရာ အကြောင်းကြားချက်အသစ်များ ပေါ်လာသည်။

[အသက်ရှူကျင့်စဉ် ပြီးပြည့်စုံသွားပြီဖြစ်သည်။ ကိုယ်တိုင်တက်ကြွစွာ လေ့ကျင့်ပါက တစ်ရက်လျှင် ကျွမ်းကျင်မှုမှတ် ၂၀ တိုးမည်ဖြစ်ပြီး မလေ့ကျင့်ပါကလည်း ၁၀ မှတ် အလိုအလျောက် တိုးမည်ဖြစ်သည်]

[လက်ရှိ ကိုယ်ခံပညာရှင်အဆင့် သတ္တမအဆင့်ချီစွမ်းအားကိုယ်ခံပညာရှင် (၃၉၂/၆၀၀)]

တစ်ရက်လျှင် ကျွမ်းကျင်မှုမှတ် ၂၀ နှုန်းဖြင့် တွက်ချက်ကြည့်ပါက နောက်ထပ် ဆယ်ရက်အတွင်း နယ်ပယ်အသစ်တစ်ခုသို့ ရောက်ရှိတော့မည်ဖြစ်သည်။ ဤအချက်ကို တွေးမိသောအခါ လုံယီ၏ စိတ်ထဲတွင် အနည်းငယ် စိတ်လှုပ်ရှားသွားရသည်။

တခြားသူတွေက ကိုယ်ခံပညာရှင်အဆင့်မှာတင် အစွမ်းတွေ အများကြီး တိုးလာကြတာ။ ငါ့ရဲ့ အခြေအနေက သူတို့နဲ့ မတူဘဲ ဘယ်လောက်အထိတောင် ထူးခြားပြီး အစွမ်းထက်နေမှာလဲ။

...

“မိုးခေါ်အတတ်က ရိုးရှင်းပုံရပေမဲ့ ဝိညာဉ်စွမ်းအား အသုံးချပုံကတော့ တကယ့်ကို စေ့စပ်သေချာဖို့ လိုအပ်တယ်။ ဒါက အခြေခံကျွမ်းကျင်မှုတွေကို ပိုပြီး ထက်မြက်လာအောင် လေ့ကျင့်ပေးဖို့ မရှိမဖြစ်လိုအပ်တဲ့ အရာပဲ။

ဒါကို ကျွမ်းကျင်သွားပြီဆိုရင် တခြားသော အတတ်ပညာတွေကို လေ့ကျင့်တဲ့အခါမှာလည်း အလိုလို နားလည်သဘောပေါက်ပြီး အလွယ်တကူ ဆုပ်ကိုင်နိုင်လာလိမ့်မယ်။ ဒီနည်းလမ်းမှာ အဆင့်သုံးဆင့်ရှိတယ်။ ပထမက တိမ်တိုက်လက်ဝါး၊ ဒုတိယက မိုးဂါထာ၊ တတိယက လေခေါ်အတတ်တို့ပဲ...”

ဧည့်ကြိုတောင်ထိပ်ပေါ်ရှိ ထင်းရှူးပင်ရိပ်အောက်တွင် ဝတ်စုံနက်ဝတ်ဆင်ထားသော အမျိုးသားတစ်ဦးသည် တပည့်ပေါင်း တစ်ရာကျော်ကို မိုးခေါ်အတတ်အကြောင်း သင်ကြားပို့ချနေသည်။

ထိုဝတ်စုံနက်နှင့် အမျိုးသားမှာ အမည်ရင်း ဟယ်ဖြစ်ပြီး အသက်ငါးဆယ်ဝန်းကျင်ခန့် ရှိကာ အသားညိုပြီး မျက်နှာတွင် အမာရွတ်တစ်ခု ရှိသည်။ သူသည် တင်းမာခက်ထန်သော အလောင်းထိန်းချုပ်ဂိုဏ်း၏ အကြီးအကဲတစ်ဦးထက် ဂိုဏ်းစတားခေါင်းဆောင်တစ်ဦးနှင့် ပို၍ တူနေသည်။

လုံယီနှင့် အခြားတပည့်သစ်များသည် အကြီးအကဲဟယ်၏ သင်ကြားမှုများကို အာရုံစိုက်နားထောင်နေကြပြီး အချို့ကမူ အရေးကြီးသောအချက်များကို စုတ်တံဖြင့် မှတ်စုထုတ်နေကြသည်။ ယခုကဲ့သို့ အကြီးအကဲများ၏ သင်ကြားမှုကို မကြာခဏ နားထောင်ခွင့်ရနေခြင်းမှာ တပည့်သစ်များအတွက် ပထမသုံးလတာကာလအတွင်း ရရှိသည့် အကြီးမားဆုံးသော အထူးအခွင့်အရေးပင်။

ဝေကျန်း၏ ပြောပြချက်အရ ဤသုံးလတာ ကာကွယ်စောင့်ရှောက်ရေးကာလ ကုန်ဆုံးသွားပါက အကြီးအကဲများ၏ သင်ကြားမှုကို နားထောင်ရန်အတွက် အခြေခံတပည့်အများစု မတတ်

နိုင်သော အကျိုးပြုမှတ်များ ပေးဆောင်ရမည်ဖြစ်သည်။

“အတိုချုပ်ပြောရရင် များများလေ့ကျင့်ကြ... ငါ မိုးခေါ်အတတ်ကို သင်ပေးခဲ့တာ ဆယ်

ရက်တောင် ရှိပြီ ဘယ်သူတွေ တတ်မြောက်သွားပြီလဲ”

အကြီးအကဲဟယ်က မေးလိုက်သည်။

သူ၏အသံမှာ မကျယ်လှသော်လည်း ကွင်းပြင်တစ်ခုလုံးရှိသူများ ဘေးနားတွင် လာပြောနေသကဲ့သို့ ကြားရသည်မှာ သူ၏ စွမ်းရည်ထက်မြက်မှုကို ဖော်ပြနေသဖြင့် လူတိုင်းက ရိုသေကြသည်။ သို့သော်လည်း မည်သူမျှ ပြန်လည်ဖြေကြားခြင်း မရှိပေ။ လူအများစုမှာ အကြီးအကဲနှင့် မျက်လုံးချင်းမဆုံမိစေရန် ခေါင်းငုံ့ထားကြပြီး အခေါ်ခံရမည်ကို စိုးရိမ်နေကြသည်။

“တောက်... လူတွေက လိပ်တွေလိုပဲ။ ကဲ... ယို့ချင်းယီ မင်းရော ဘယ်လောက်အထိ တိုးတက်နေပြီလဲ”

နောက်ဆုံးတွင် အကြီးအကဲဟယ်သည် ဝိညာဉ်အမြစ် အကောင်းဆုံးဖြစ်သည့် ယို့ချင်းယီကို လှမ်းခေါ်လိုက်သည်။

ယို့ချင်းယီသည် လှပသော်လည်း အေးစက်သော အမူအရာဖြင့် ရှိနေဆဲပင်။ အကြီးအကဲက ခေါ်လိုက်သည့်တိုင် သူမ၏ မျက်နှာထားမှာ ပြောင်းလဲခြင်းမရှိဘဲ အသာအယာ ဦးညွှတ်

လိုက်သည်။

“ကျွန်မ တစ်ချက်လောက် စမ်းကြည့်ပါ့မယ်"

ပြောပြီးသည်နှင့် သူမသည် ထိုနေရာမှာပင် မှော်အတတ်ကို စတင်အသက်သွင်းတော့သည်။ သူမ၏ အေးစက်ဖြူဖွေးသော ကျောက်စိမ်းကဲ့သို့ လက်အစုံသည် မြင်နိုင်ရန်ခက်ခဲသော ရှုပ်ထွေးသည့် လက်ဟန်များကို ပြုလုပ်လိုက်သည်။ တစ်ချိန်တည်းမှာပင် သူမသည် မိုးဂါထာကို တိုးတက်စွာ ရွတ်ဆိုနေသည်။

ခဏအကြာတွင် လန်းဆန်းသော လေပြေတစ်ခု တိုက်ခတ်သွားသဖြင့် လူတိုင်း အံ့အားသင့်သွားကြသည်။ သို့သော် ထိုလေပြေတိုက်ပြီးနောက် မည်သည့်ထူးခြားမှုမျှ ထပ်မံဖြစ်ပေါ်မလာဘဲ ဂါထာမှာ အောင်မြင်ခြင်း မရှိခဲ့ပေ။ ယို့ချင်းယီသည် သူမ၏ မျက်ခုံးကို အနည်းငယ်တွန့်

လိုက်ပြီး လက်ဟန်များကို ရုတ်သိမ်းကာ ဦးညွှတ်လိုက်သည်။

“ကျွန်မ သေချာ မတတ်မြောက်သေးပါဘူး"

“မိုးဂါထာကို ရွတ်တဲ့အခါ ဝိညာဉ်စွမ်းအားကို တစ်ခါတည်း အကုန်မထုတ်လိုက်နဲ့။ ချောချောမွေ့မွေ့နဲ့ အဆက်မပြတ် ထုတ်ရမယ်”

အကြီးအကဲဟယ်က မှတ်ချက်ပေးလိုက်ပြီးနောက် စကားလမ်းကြောင်း ပြောင်းလိုက်သည်။

“ဒါပေမဲ့ ဆယ်ရက်အတွင်း ဒီအဆင့်ထိ ရောက်တာကတော့ မင်းရဲ့ နားလည်သဘောပေါက်မှုက အတော်လေး ကောင်းမွန်တာပဲ"

ထို့နောက် သူသည် ယို့ချင်းယီပြီးလျှင် ဝိညာဉ်အမြစ် အကောင်းဆုံးဖြစ်သည့် ဝမ်ဝင်ပိုင်ကို ကြည့်လိုက်သည်။

“ဝမ်မိသားစုက ကောင်လေး... ဝမ်အဘိုးကြီးက မင်းကို ဘယ်လိုများ သင်ပေးထားလဲဆိုတာ ငါ့ကို စမ်းပြစမ်း"

ဝမ်ဝင်ပိုင်၏ မျက်နှာမှာ ချက်ချင်းပျက်သွားပြီး ဝန်လေးနေပုံရသော်လည်း အကြီးအကဲ၏ တောင်းဆိုမှုကို မငြင်းရဲပေ။