အခန်း (၅၃-၅၄)

အခန်း ၅၃ နတ်လမ်းစဉ်ကျင့်ကြံသူ

ညဦးပိုင်း မရောက်မီအချိန်တွင် အရာခပ်သိမ်းက ပျစ်ချွဲနေသော အမှောင်ထုထဲတွင် ရစ်ပတ်ခံထားရသည်။ လမ်းဘေး နှစ်ဖက်ရှိ သစ်ပင်တောအုပ်များက ပြည့်နှက်နေပြီး သစ်ကိုင်းများက တဝူးဝူး တိုက်ခတ်နေသော လေပြင်းများထဲတွင် ရှုပ်ထွေးစွာ ဆန့်တန်းနေကြရာ တစ္ဆေအရိပ်များ တစ်အုပ်လုံး လှုပ်ရှားနေသကဲ့သို့ ဖြစ်နေသည်။

ဤကဲ့သို့ နက်ရှိုင်းသော ညအမှောင်ထုထဲတွင် ချင်မင်က ပြတ်သားစွာ ဓားခုတ်လိုက်ရာ မှောင်မည်းနေသော ကောင်းကင်ယံကို လျှပ်စီးတစ်ကြောင်း ဖောက်ထွင်းသွားသကဲ့သို့ ဖြစ်သွားပြီး စောစောက ဖိနှိပ်ထားသော ခံစားချက်ကို မျက်စိတစ်မှိတ်အတွင်း ချိုးဖျက်ပစ်လိုက်သည်။

အမည်းရောင် မြူခိုးကလည်း ထိုအချိန်တွင် အတိအကျပင် ပြေးဝင်လာပြီး ပြင်းထန်သော မကောင်းသည့် ရည်ရွယ်ချက်များဖြင့် သူတို့နှစ်ဦးကို ဖုံးလွှမ်းကာ ကြီးမားလှသော အရိပ်အမည်းကြီးထဲတွင် ဝါးမြိုပစ်ရန် ကြိုးစားလာသည်။

ဤကဲ့သို့ ကြယ်ရောင်လရောင် မရှိသော ပတ်ဝန်းကျင်တွင် အခြားလူများက သဘာဝအားဖြင့် ဘာကိုမှ မမြင်တွေ့နိုင်ကြသော်လည်း ချင်မင်ကတော့ အလွန် ရှင်းလင်းစွာ မြင်တွေ့နေရသည်။ ထို့အပြင် အမည်းရောင် မြူခိုး၏ အေးစက်မှုကိုလည်း ခံစားနေရပြီး အနီးသို့ ရောက်လာသောအခါ အရိုးထိတိုင် အေးစိမ့်သွားသော အအေးဒဏ်ကို ခံစားလိုက်ရသည်။

ရွှတ်ခနဲ အသံနှင့်အတူ ပူနေသော ဓားဖြင့် ထောပတ်ကို လှီးဖြတ်လိုက်သကဲ့သို့ သတ္တုဆိုးဆေးများ သုတ်လိမ်းထားသော ဓားမြှောင်လေးက အမည်းရောင် မြူခိုးထဲသို့ နစ်ဝင်သွားရာ အေးစက်သော အအေးဓာတ်များ ပွက်ပွက်ဆူလာစေသည်။

အဘိုးကြီးလျူက အော်ဟစ်လိုက်သည်။

"ဘာဖြစ်တာလဲဟ"

သူက အံ့ဩစရာကောင်းလောက်အောင် အလျင်အမြန် တုံ့ပြန်နိုင်ခဲ့ပြီး ရွှတ်ခနဲ အသံနှင့်အတူ တစ်ချိန်တည်းမှာပင် ဓားမကြီးကို ဆွဲထုတ်ကာ ချင်မင်၏ နောက်မှနေ၍ ထိုဗလာနယ်ဆီသို့ ခုတ်ပိုင်းလိုက်သည်။

သို့သော် သူ၏ လက်ထဲမှ ဓားမကြီးက အမည်းရောင် မြူခိုးထဲသို့ နစ်ဝင်သွားသော်လည်း လေထဲကို ခုတ်လိုက်ရသကဲ့သို့ ဖြစ်သွားပြီး ဘာကိုမှ မထိခိုက်မိချေ။

ချင်မင်က အော်ဟစ်လိုက်သည်။

"အဘိုး မြန်မြန် နောက်ဆုတ်"

ထိုအချိန်မှာပင် သူက အလွန် စူးရှသော အော်ဟစ်သံကို ကြားလိုက်ရပြီး အမည်းရောင် မြူခိုးက အလျင်အမြန် ကျုံ့ဝင်သွားကာ လူ့ပုံစံတစ်ခုအဖြစ် ပြောင်းလဲသွားသည်။

အဘိုးကြီးလျူက အလွန် စကားနားထောင်ပြီး ချက်ချင်း ဓားကို ရုပ်ကာ ပြတ်သားစွာ နောက်ဆုတ်သွားသည်။

အဘယ်ကြောင့်ဆိုသော် သူက ဘာကိုမှ မမြင်ရသလို ဘာကိုမှလည်း မကြားရဘဲ ဘာဖြစ်နေမှန်း မသိသော်လည်း ပင်ကိုယ်အသိစိတ်အရ အခြေအနေက အလွန် ဆိုးရွားနေပြီး အလွန် ပုံမှန်မဟုတ်ကြောင်းကို သူ သတိပြုမိသွားသောကြောင့် ဖြစ်သည်။

အမည်းရောင် မြူခိုးထဲမှ အမျိုးသားတစ်ဦး ပေါ်လာသည်။ လူ့ပုံစံ ကောက်ကြောင်းက အနည်းငယ် ဝေဝါးနေသော်လည်း ချင်မင်၏ အမြင်အာရုံဖြင့် ရှင်းလင်းစွာ မြင်တွေ့နိုင်သည်။ ထိုသူက လူငယ်တစ်ဦးဖြစ်ပြီး မျက်နှာတွင် အလွန် နာကျင်နေသော အမူအရာ ရှိနေကာ အေးစက်သော မျက်လုံးများဖြင့် သူ့ကို ကြည့်နေသည်။

ချင်မင်၏ လက်ထဲမှ ဓားမြှောင်က သူ၏ ခန္ဓာကိုယ်ထဲသို့ ဝင်ရောက်သွားရာ အမည်းရောင် မြူခိုးများဖြင့် ဖွဲ့စည်းထားသော လူ့ပုံစံ သတ္တဝါက အံ့ဩဖွယ်ရာ သွေးများ အမြောက်အမြား ထွက်ကျလာပြီး မြေပြင်ပေါ်သို့ ပေကျံသွားသည်။

ထိုမြင်ကွင်းကြောင့် ချင်မင် မျက်နှာပျက်သွားရသည်။

လူငယ်က ပါးစပ်ဟလိုက်ချိန်တွင် အမည်းရောင် မြူခိုးတစ်အုပ်ကို မှုတ်ထုတ်လိုက်ရာ မင်ရည်အရောင်ရှိသော မြားတစ်စင်းအဖြစ် ပြောင်းလဲသွားပြီး ချင်မင်၏ မျက်ခုံးနှစ်ခုကြားသို့ ပစ်လွှတ်လိုက်သည်။ အေးစက်ပြီး မှောင်မည်းကာ အရိုးထိတိုင် အေးစိမ့်သွားသော အအေးဒဏ်များ ပါဝင်နေသည်။

ချင်မင်က ခေါင်းကို စောင်းလိုက်ပြီး အမည်းရောင် မြူခိုးများဖြင့် ဖွဲ့စည်းထားသော မြားကို ရှောင်တိမ်းလိုက်သည်။ တစ်ချိန်တည်းမှာပင် သိုးဆီကျောက်စိမ်းသံဓားကို အပြင်းအထန် တုန်ခါလိုက်ရာ ၎င်းအပေါ်တွင် ကပ်နေသော သတ္တုဆိုးဆေးများ အားလုံး ကွာကျသွားသည်။

ဤအရာအားလုံးက လျှပ်စီးလက်သကဲ့သို့ မျက်စိတစ်မှိတ်အတွင်း ဖြစ်ပျက်သွားခြင်း ဖြစ်သည်။ အမည်းရောင် မြူခိုးက အသံမထွက်ဘဲ ခုန်အုပ်လာချိန်တွင် ချင်မင်က နောက်ပြန် ဓားတစ်ချက် ခုတ်လိုက်သည်။ အကြောင်းပြချက်မရှိ ပုံပေါ်လာသော အမျိုးသားက ချက်ချင်း တန်ပြန်တိုက်ခိုက်ပြီး သူ့ကို သတ်ဖြတ်ရန် ကြိုးစားလာသည်။ ဖြစ်စဉ်အတွင်း အနည်းငယ်မျှပင် နှောင့်နှေးကြန့်ကြာမှု မရှိဘဲ သူတို့အားလုံးက ချက်ချင်း တုံ့ပြန်ခဲ့ကြခြင်း ဖြစ်သည်။

ချင်မင်က ကြီးမားလှသော အန္တရာယ်ကို သတိပြုမိသွားပြီး သူ သေချာပေါက် သေသွားနိုင်ကြောင်း ခံစားလိုက်ရသည်။ ဤကဲ့သို့သော မသိရသေးသည့် အရာများက အကြောင်းပြချက်မရှိ ဖိနှိပ်ထားသော ခံစားချက်ကို ယူဆောင်လာပြီး သေမင်း၏ အငွေ့အသက်များကို တကယ်ပင် ခံစားမိစေသည်။

သို့သော် သူ ဓားကို တုန်ခါလိုက်သည်နှင့် အလျင်အမြန် ပြောင်းလဲသွားစေသည်။ သူ့ဆီသို့ ပြေးဝင်လာသော အေးစက်ပြီး မှောင်မည်းသည့် မြူခိုးများနှင့် အလွန်အမင်း အေးစက်သော အငွေ့အသက်များက အလျင်အမြန် အားနည်းလာသည်။

ညအမှောင်ထုထဲတွင် တောက်ပသော ဓားအလင်းတန်းများ ပေါ်ထွက်လာပြီး တောက်လောင်နေသော မီးတောက်များကဲ့သို့ ဤသစ်တောကို လင်းထိန်သွားစေသည်။

ချင်မင်၏ လက်ထဲမှ သိုးဆီကျောက်စိမ်းသံဓားက ဆိုးဆေးများ ကွာကျသွားပြီးနောက် ထိုသတ္တဝါမျိုးနှင့် တွေ့သောအခါ လုံးဝ ကွာခြားသွားသည်။

ထိုဖြစ်စဉ်အတွင်း အမည်းရောင် မြူခိုးများဖြင့် ဖွဲ့စည်းထားသော လူငယ်က သဘာဝကျကျ နောက်ဆုတ်သွားပြီး ထိုဓားမှ လွတ်ကင်းအောင် ကြိုးစားနေသည်။ သို့သော် ဓားအလင်းတန်းများက မီးတောက်များကဲ့သို့ တောက်လောင်လာသောအခါ သူ၏ ပုံရိပ်က တွန့်လိမ်သွားပြီး အဆက်မပြတ် တုန်ယင်နေတော့သည်။

"ရပ်လိုက်..."

သူက စူးရှစွာ အော်ဟစ်နေပြီး ပြင်းပြင်းထန်ထန် ရုန်းကန်ကာ အမည်းရောင် မြူခိုးအဖြစ် ပြန်လည်ပြောင်းလဲပြီး ကောင်းကင်သို့ ပျံတက်ရန် ကြိုးစားသော်လည်း ကျရှုံးသွားသည်။

ချင်မင်က ဘယ်လိုလုပ် ရပ်တန့်မည်နည်း။ လူငယ် မြေပြင်ပေါ်သို့ ကျလာသော သွေးများက လေတိုက်သည်နှင့် ပြာများကဲ့သို့ ပျောက်ကွယ်သွားပြီး တကယ့် လူသွေး မဟုတ်ကြောင်း သူ တွေ့ရှိလိုက်သည်။

ဒါကြီးက တကယ်ကို ဘာကြီးလဲ။

ထိုကဲ့သို့ ဝေးလံခေါင်ဖျားသော ဒေသတွင် ကျပန်းတွေ့ရသည့် မုဆိုးလူငယ်လေး တစ်ယောက်က ကျောက်စိမ်းသံဓား တစ်လက်ကို ထုတ်ယူလာနိုင်မည်ကို လူငယ်က လုံးဝ မယုံကြည်နိုင်အောင် ဖြစ်နေသည်။

သူက မြူခိုးအဖြစ် ပြောင်းလဲ၍ မရတော့ဘဲ အစွမ်းကုန် နောက်ဆုတ်ကာ လူ၏ ခန္ဓာကိုယ် လှုပ်ရှားမှုများဖြင့် အချုပ်အနှောင်ကို ရုန်းထွက်ပြီး ဤတောက်ပနေသော ဓားနှင့် ဝေးရာသို့ သွားရန် ကြိုးစားနေသည်။

ချင်မင်က ဤဓားကို သွန်းလုပ်ပြီးနောက်ပိုင်း တစ်ခါမှ အသုံးမပြုရသေးရာ ၎င်း၏ လက္ခဏာများကို လုံးဝ မသိခဲ့ချေ။ ယခု အကြောင်းပြချက်မရှိ ပေါ်လာသော သတ္တဝါကို ခုတ်ပိုင်းလိုက်ပြီးနောက်မှ ၎င်း၏ အံ့ဩဖွယ် အသုံးဝင်မှုကို တွေ့ရှိသွားခြင်း ဖြစ်သည်။

သူ၏ ကောင်းကင်အလင်း စွမ်းအင်က ထိုဓားထဲသို့ အလွန် ချောမွေ့စွာ ဝင်ရောက်နိုင်နေသည်။ အကယ်၍ အခြား လက်နက်များသာဆိုလျှင် ဒီအဆင့်တွင် လုံးဝ မဖြစ်နိုင်ချေ။

သေချာတာပေါ့ သူ၏ ကောင်းကင်အလင်း စွမ်းအင်က ကျောက်စိမ်းသံဓားက ဤလူငယ်အပေါ် သက်ရောက်သည့် သတ်ဖြတ်နိုင်စွမ်းလောက်တော့ မပြင်းထန်ချေ။ သို့သော် ၎င်းကြောင့် သူက နည်းလမ်းများစွာကို အသုံးပြုနိုင်လာသည်။ ဥပမာအားဖြင့် သူ၏ ကိုယ်ပိုင် ကောင်းကင်အလင်း စွမ်းအင်၏ စေးကပ်ရစ်ပတ်ခြင်း သတ္တိမျိုး ဖြစ်သည်။

ချင်မင်က ကျောက်စိမ်းသံဓားကို ဝှေ့ယမ်းလိုက်ရာ ဖြူဖွေးသော အလင်းတန်းများ ထွက်ပေါ်လာပြီး ရုန်းထွက်ရန် ကြိုးစားနေသော လူငယ်ကို စေးကပ်ရစ်ပတ်ထားလိုက်ရာ တစ္ဆေကို မီးရှို့နေသကဲ့သို့ ဖြစ်နေသည်။

"မလုပ်နဲ့ ရပ်လိုက်"

လူငယ်က ထိတ်လန့်တုန်လှုပ်စွာဖြင့် အပြင်းအထန် ရုန်းကန်နေသည်။

သို့သော် ချင်မင်က လုံး၀ မရပ်တန့်ရဲပေ။ ဒါက ဘာသတ္တဝါကြီးမှန်း သူ လုံးဝ မသိချေ။ အကယ်၍ သူ့ကို ထွက်ပြေးခွင့် ပြုလိုက်မည်ဆိုလျှင် မိမိကိုယ်တိုင် အန္တရာယ် ရှိလာမည် ဖြစ်သည်။

လူငယ်က အကြိမ်ပေါင်းများစွာ လက်ကို မြှောက်ကာ ပါးစပ်ကို ဟပြီး အမည်းရောင် မြူခိုးများ ထုတ်လွှတ်၍ ချင်မင်ကို တိုက်ခိုက်ရန် ကြိုးစားသော်လည်း ဓားအလင်းတန်းများက အားလုံးကို လောင်ကျွမ်းသွားစေသည်။

သူ တစ်ကိုယ်လုံး မီးတောက်များ ဖုံးလွှမ်းနေပြီး ယခုအခါ ပူနေသော ဓားဖြင့် ထောပတ်ကို လှီးဖြတ်နေသည်ထက် မီးရဲနေသော ဓားကိုယ်ထည်က မြက်ခြောက်များထဲသို့ ကျသွားပြီး မီးစွဲလောင်သွားသည်နှင့် ပို၍ တူနေသည်။

ချင်မင်က ဖြတ်တောက်ခြင်း စွမ်းအင်ကို အသုံးပြု၍ ကျောက်စိမ်းသံဓားကို လူငယ်၏ ခန္ဓာကိုယ်ထဲတွင် ကန့်လန့်ဖြတ် ခုတ်ပိုင်းကာ နေရာအနှံ့ မီးရှို့နေသည်။ အမည်းရောင် မြူခိုးများ လှုပ်ရှားလာပြီး လူငယ်က အသေအလဲ ရုန်းထွက်ရန် ကြိုးစားတိုင်း သူက ပိုးကြိုးရစ်ပတ်ခြင်း စွမ်းအင်နှင့် စေးကပ်ရစ်ပတ်ခြင်း စွမ်းအင်အဖြစ် ပြောင်းလဲကာ သူ့ကို တင်းကျပ်စွာ ချုပ်ထားလိုက်သည်။

သိသာလှသည်မှာ ကောင်းကင်အလင်းများက ညအမှောင်ထုကို ဖောက်ထွင်းပြီး ဝိညာဉ်ဓာတ်ရှိသော တောင်ကြီးထဲသို့ ကျဆင်းလာသောအခါ အားဖြည့်ပေးလိုက်သည့် လျှို့ဝှက်ဆန်းပြားသော ပစ္စည်းများ အားလုံးတွင် ခန့်မှန်း၍မရသော စွမ်းအားများ ပါဝင်နေသည်။

ထိုအချိန်တွင် ချင်မင်က ယခင်က ချောင်လုံ၊ မုချင်းတို့ ပြောခဲ့သော စကားများကို အလွန် နက်ရှိုင်းစွာ ခံစားနားလည်သွားပြီ ဖြစ်သည်။

(သိုးဆီကျောက်စိမ်းသံဓားကို ကျောက်စိမ်းဖြူသံမဏိဓား လို့ ပြောင်းသုံးပါမယ် မူရင်းရဲ့ အခေါ်အဝေါ်က ဖတ်ရတာ အဆင်မပြေလို့ပါ)

ကျောက်စိမ်းဖြူသံမဏိဓားက အလင်းတန်းများ ဖြာထွက်နေပြီး အမည်းရောင် မြူခိုးများဖြင့် ဖွဲ့စည်းထားသော အမျိုးသားကို လုံးဝ အသေအလဲ ဖိနှိပ်ထားသည်။

အဝေးမှ အဘိုးကြီးလျူက ကြက်သီးထနေသည်။ သူ ဘာကိုမှ မမြင်ရဘဲ ချင်မင်၏ ဖြူဖွေးသော ဓားမြှောင်က တောက်ပလာပြီးနောက် မီးတုတ်တစ်ခုအဖြစ် ပြောင်းလဲသွားသည်ကိုသာ မြင်တွေ့ရသည်။

"ငါက ဘယ်လိုဖြစ်လို့ မျက်လုံးနှစ်လုံးစလုံး ကန်းနေသလို ဘာမှ မမြင်ရတာလဲ"

ချင်မင်က သူ၏ စကားကို ကြားသောအခါ အမည်းရောင် မြူခိုးများဖြင့် ဖွဲ့စည်းထားသော လူငယ်က မျှော်လင့်ထားသည်ထက် ပိုမို ကြောက်စရာကောင်းကြောင်း ချက်ချင်း သတိပြုမိသွားသည်။ သာမန်လူများက လုံးဝ သတိမထားမိနိုင်ရာ ဘယ်လိုလုပ် ရင်ဆိုင်နိုင်မလဲ။

လူငယ်က မျှော်လင့်ချက်မဲ့သွားပြီ ဖြစ်သည်။ အဘယ်ကြောင့်ဆိုသော် တစ်ကိုယ်လုံး မီးလောင်နေပြီး သူ ရုန်းထွက်၍ မရသောကြောင့် ဖြစ်သည်။

"နေမရှိတဲ့ ခေတ်ကြီးမှာ ငါ ဒီအဆင့်ကို ရောက်လာပြီးမှ အပြင်ထွက်တာ အရမ်း ဘေးကင်းသင့်တာ ဘယ်လိုဖြစ်လို့ ဒီနေရာမှာ ဘေးဒုက္ခ ကြုံရတာလဲ..."

သူ အလွန် နာကျင်နေပြီး ထိုကဲ့သို့ မသေချင်သည်မှာ သဘာဝပင် ဖြစ်ရာ ချိန်ဆကြည့်ပြီးနောက် တစ်ခုခုကို စွန့်လွှတ်လိုက်ရတော့သည်။

ချင်မင်က အော်မေးလိုက်သည်။

"မင်းက ကိုယ်ပိုင် ရုပ်ခန္ဓာ မမြင်ရဘဲ မိသားစုကြီးတွေတောင် ကြောက်ရတဲ့ အဲဒီအကောင်မျိုးလား"

လူငယ်က အော်ဟစ်လိုက်သည်။

"ငါက အဲဒီလို အရာမျိုး မဟုတ်ဘူး ငါက လူ မင်း မြန်မြန် ရပ်ပြီး ငါပြောတာ နားထောင်ဦး"

ချင်မင် ကြားသောအခါ ဓားကို ပို၍ ပြင်းပြင်းထန်ထန် ဝှေ့ယမ်းလိုက်ပြီး သူ၏ ခန္ဓာကိုယ်ထဲတွင် ဓားသိုင်းများ အသုံးပြုကာ ကန့်လန့်ဖြတ် ခုတ်ပိုင်းပြီး ဓားသိုင်းကျမ်းပေါ်ရှိ ဓားတာအို၏ စိတ်သဘောထားကိုပါ အသုံးပြုလိုက်သည်။

အမည်းရောင် မြူခိုးများဖြင့် ဖွဲ့စည်းထားသော အမျိုးသားက တကယ်ကို ဆဲဆိုချင်နေပြီ ဖြစ်သည်။ ဘာဖြစ်လို့ လူ လို့ ပြောတာကို ပိုပြီး ပြင်းပြင်းထန်ထန် ပစ်မှတ်ထား ခံနေရတာလဲ။

ချင်မင်က ပြောလိုက်သည်။

"မင်းလို လူမျိုးက သရဲထက်တောင် ပိုကြောက်စရာကောင်းတယ်"

လူငယ်က အလောတကြီး အော်ဟစ်လိုက်သည်။

"ငါက နတ်လမ်းစဉ်ကျင့်..."

သူ အလွန် ထိတ်လန့်နေသော်လည်း စကားပြောရန် အချိန်မမီတော့ချေ။ အဘယ်ကြောင့်ဆိုသော် ခန္ဓာကိုယ်က ကျောက်စိမ်းဖြူသံမဏိဓားမှ ဖြာထွက်နေသော မီးတောက်များကြောင့် လုံးဝ လောင်ကျွမ်း ပျောက်ကွယ်တော့မည် ဖြစ်သောကြောင့် ဖြစ်သည်။

ချင်မင်က အဓိပ္ပာယ်မရှိဟု ထင်လိုက်သည်။ သူ၏ လက်ထဲမှ ဓားက အမျိုးသား၏ ဦးခေါင်းထဲသို့ အကြိမ်ကြိမ် ခုတ်ပိုင်းဝင်ရောက်သွားသော်လည်း တစ်ဖက်လူက အံ့ဩဖွယ်ရာ ဘာမှမဖြစ်ဘဲ နောက်ဆုံးတွင် အလင်းမီးတောက်များကို အားကိုး၍သာ သူ့ကို မီးရှို့သတ်ပစ်နိုင်တော့မည် ဖြစ်သည်။

"ဖောင်း"

နောက်ဆုံးအချိန်တွင် အမျိုးသားက အံ့ဩဖွယ်ရာ ကိုယ့်ကိုယ်ကိုယ် ပေါက်ကွဲပစ်လိုက်ပြီး ထိုထူထပ်သော မြူခိုးခန္ဓာကိုယ်ကို စွန့်လွှတ်လိုက်ကာ အဝတ်စုတ်တစ်ခုက သူ၏ အနှစ်သာရ အနည်းငယ်ကို ရစ်ပတ်ပြီး ရုန်းထွက်ကာ ညကောင်းကင်ယံသို့ ပျံတက်ရန် ကြိုးစားသည်။

သို့သော် သူက အလွန် အားနည်းနေပြီဖြစ်ရာ ထူးဆန်းသော အဝတ်စုတ်ကို အသုံးပြုရာတွင် အမြန်နှုန်းက ပုံမှန်ထက် အများကြီး နှေးကွေးနေသည်။

ချင်မင်က လျှပ်စီးကဲ့သို့ မြန်ဆန်စွာ တုံ့ပြန်လိုက်ပြီး ဓားတစ်ချက်တည်းဖြင့် ခုတ်ချလိုက်သည်။

"ဟင်"

လက်ဝါးအရွယ်ရှိသော အဝတ်စုတ်က ဘာမှမဖြစ်ကြောင်း သူ တွေ့ရှိလိုက်သည်။ ၎င်းက ပြုတ်ကျလာသော်လည်း အမည်းရောင် မြူခိုးတစ်အုပ်ကို ရစ်ပတ်ထားဆဲဖြစ်ပြီး ထပ်မံ ပျံတက်ရန် ကြိုးစားနေဆဲ ဖြစ်သည်။

ချင်မင်က ကောင်းကင်အလင်းထဲရှိ စေးကပ်ရစ်ပတ်ခြင်း စွမ်းအင်ကို အသုံးပြု၍ ၎င်းကို ပြန်လည် ရစ်ပတ်ယူဆောင်လာပြီးနောက် ဆူးချွန် စွမ်းအင်ကို အသုံးပြုလိုက်ရာ ဓားသွားက အဝတ်စုတ် လုံခြုံစွာ မရစ်ပတ်ထားနိုင်သော အက်ကွဲကြောင်းမှတစ်ဆင့် ထိုးဖောက်ဝင်ရောက်သွားသည်။

"အား ရပ်လိုက် ငါက နတ်လမ်းစဉ်ကျင့်ကြံ..."

လူငယ်က အော်ဟစ်လိုက်သော်လည်း ဘာမှ မပြောင်းလဲနိုင်တော့ဘဲ နောက်ဆုံး အမည်းရောင် မြူခိုးများ အားလုံး လောင်ကျွမ်းသွားတော့သည်။

လက်ဝါးအရွယ်ရှိသော အဝတ်စုတ်လေးက မြေပြင်ပေါ်သို့ ပြုတ်ကျလာပြီး မြူခိုးများဖြင့် ဖွဲ့စည်းထားသော လူငယ်က လုံးဝ မပေါ်လာခဲ့ဖူးသကဲ့သို့ ဖြစ်သွားသည်။

ချင်မင်က ကျောက်စိမ်းဖြူသံမဏိဓားကို တင်းတင်းကျပ်ကျပ် ဆုပ်ကိုင်ထားပြီး မျက်နှာအမူအရာက လေးနက်နေသည်။ သူက လူငယ်၏ လာရာလမ်းကြောင်းကို ခန့်မှန်းကြည့်လိုက်ရာ အကြမ်းဖျင်းအားဖြင့် နတ်လမ်းစဉ်ကျင့်ကြံသူ ဖြစ်လောက်သည်။

ဒါက သူ ထင်ထားသည်နှင့် မတူချေ။ တစ်ဖက်လူက မမြင်ရသော အကြောင်းပြချက်မရှိသည့် အရာ မဟုတ်ဘဲ တကယ့် လူသားတစ်ဦး ဖြစ်သော်လည်း သူ၏ အခြေအနေက အလွန် အထူးဆန်း ဖြစ်နေသည်။

ချင်မင်၏ ရင်ထဲတွင် လေးလံသွားပြီး တွေးလိုက်သည်။

"နတ်လမ်းစဉ်ကျင့်ကြံသူတွေက ဒီလောက်တောင် ရင်ဆိုင်ရ ခက်တာလား"

ထိုလူက တကယ်ပဲ ပျံသန်းနိုင်ပြီး သာမန်လူများက မမြင်တွေ့နိုင်ရာ ဘယ်လိုလုပ် ရင်ဆိုင်နိုင်မည်နည်း။

အဘိုးကြီးလျူက ဓားမကြီးဖြင့် ထိုလူကို ခုတ်ပိုင်းခဲ့သော်လည်း လေကို ခုတ်ပိုင်းလိုက်သကဲ့သို့ ဘာအကျိုးသက်ရောက်မှုမှ မရှိခဲ့ချေ။

ချင်မင် ငြိမ်သက်စွာ ရပ်နေပြီး မျက်နှာအမူအရာက ယခင်ကထက် ပိုမို လေးနက်နေသည်။ အဘယ်ကြောင့်ဆိုသော် သူ၏ ပြိုင်ဘက် တစ်ဦးကလည်း နတ်လမ်းစဉ်ကျင့်ကြံသူ ဖြစ်သောကြောင့် ဖြစ်သည်။

ထိုညက လူခေါ်လာပြီး ရွာတစ်ရွာလုံးကို မီးရှို့ခဲ့သော၊ လောကီအညစ်အကြေးများနှင့် ကင်းစင်နေသည့် အမွေးအတောင် အင်္ကျီနှင့် လူငယ်လေးက အကယ်၍ ဤလမ်းကြောင်းအတိုင်း သွားနေသည်ဆိုလျှင် နောင်ကျရင် သေချာပေါက် ထိုနည်းလမ်းများကို တတ်မြောက်လာမည်ဖြစ်ပြီး သေဆုံးသွားသော ဒီလူငယ်ထက် အများကြီး ပိုမို အစွမ်းထက်လာမည် ဖြစ်သည်။

စောစောက ချင်မင်က မိမိ လျင်မြန်စွာ အစွမ်းထက်လာခြင်းအတွက် ဝမ်းသာနေခဲ့ပြီး အချိန်တိုအတွင်းမှာပင် ထူးခြားသော အောင်မြင်မှုများ ရရှိခဲ့သည်ဟု ထင်နေခဲ့သော်လည်း ယခုအခါ အေးစက်သော လေပြင်းများက နှင်းပွင့်များကို သယ်ဆောင်လာပြီး မျက်နှာပေါ်သို့ ရိုက်ခတ်လာသောအခါ သူ သတိပြန်ဝင်လာသည်။ ကျေနပ်နေ၍ မရသေးဘဲ ပိုမို အစွမ်းထက်လာရန် လိုအပ်နေသေးသည်။

အဘယ်ကြောင့်ဆိုသော် သူ နောင်တွင် ရင်ဆိုင်ရမည့် ထိုအင်အားစုကြီးက တကယ်ကို လျှို့ဝှက်ဆန်းပြားပြီး ခန့်မှန်း၍ မရသောကြောင့် ဖြစ်သည်။

ချင်မင်က ပိုးထည်ကျမ်းစာ ဘာကြောင့် ပေါ်လာရသလဲဆိုသည်ကို စဉ်းစားမိလိုက်သည်။ အဘိုးကြီး အချို့က မိမိတို့ သွားနေသော လမ်းကြောင်းတွင် လိုအပ်ချက်များစွာ ရှိနေသေးသည်ဟု ထင်မြင်ကာ အတောက်ပဆုံးသော လမ်းကြောင်း အချို့နှင့် ယှဉ်ပြိုင်နိုင်ရန် ကျင့်စဉ်သစ်ကို ပူးပေါင်း ဖော်ထုတ်ခဲ့ခြင်း ဖြစ်သည်။

ချင်မင်က ကိုယ့်ကိုယ်ကိုယ် ပြန်ပြောလိုက်သည်။

"နတ်လမ်းစဉ်ကျင့်ကြံသူတွေရဲ့ နည်းလမ်းတွေက တကယ်ကို လျှို့ဝှက်ဆန်းပြားပြီး ကြောက်စရာကောင်းတယ်"

သူ၏ လမ်းခရီးက အလွန် ရှည်လျားနေသေးပြီး ခြေတစ်လှမ်းချင်းစီ ပိုမို မြင့်မားသော နေရာသို့ တက်လှမ်းသွားရန် လိုအပ်သည်။

အဘိုးကြီးလျူက ဓားမကြီးကို ကိုင်၍ လျှောက်လာပြီး မေးလိုက်သည်။

"ရှင်းလင်းပြီးပြီလား အဲဒါက ဘာကောင်ကြီးလဲ ငါက မျက်လုံးကန်းနေတဲ့ လူတစ်ယောက်လိုပဲ တစ္ဆေအရိပ်လေးတောင် မမြင်ရဘူး"

ချင်မင်က ပြောပြလိုက်သည်။

"နတ်လမ်းစဉ်ကျင့်ကြံသူပဲ"

အဘိုးကြီးလျူ၏ မျက်နှာအမူအရာက လေးနက်သွားပြီး ပြောလိုက်သည်။

"နောက်ခံက... တကယ် မသေးဘူးပဲ"

ဒီလို လူမျိုးကိုများ သွားစမိတာလား။

ချင်မင်က ကျောက်စိမ်းဖြူသံမဏိဓားဖြင့် ထိုအဝတ်စုတ်ကို ကော်ယူလိုက်ပြီး သူ၏ ကောင်းကင်အလင်း စွမ်းအင်ကို အသုံးပြုလိုက်ရာ ဓားကိုယ်ထည်က ဖြူဖွေးစွာ တောက်ပလာသော်လည်း အဝတ်စုတ်က ဘာတုံ့ပြန်မှုမှ မရှိချေ။

အဘိုးကြီးလျူ၏ ရင်ထဲတွင် လှိုင်းတံပိုးများ ထန်နေပြီး သူ့ရှေ့မှ ချင်မင်ကို အနည်းငယ် စိမ်းသက်နေသည်ဟု ခံစားလိုက်ရသည်။ ထိုကဲ့သို့ ထူးဆန်းသော ဓားတစ်လက်ကို သွန်းလုပ်နိုင်ခဲ့ပြီး မမြင်ရသော နတ်လမ်းစဉ်ကျင့်ကြံသူတစ်ဦးကိုပင် သတ်ဖြတ်ခဲ့သေးသည်။

သို့သော် သူက အသက်အရွယ် ကြီးရင့်နေပြီဖြစ်ပြီး အမည်းနှင့် အဖြူရောင် တောင်တန်းကြီးကို နှစ်ပေါင်းများစွာ စောင့်ရှောက်လာခဲ့ရာ ပုံမှန်မဟုတ်သော ကိစ္စများကို အများအပြား ကြားဖူးခဲ့သဖြင့် စိတ်ခံစားမှုများက အလျင်အမြန် ပြန်လည် တည်ငြိမ်သွားသည်။

ချင်မင်က ဓားပေါ်ရှိ အဝတ်စုတ်ကို သေသေချာချာ အကဲခတ်ကြည့်လိုက်ရာ အလွန် မရိုးရှင်းကြောင်း တွေ့ရှိရသည်။ သတ္တုကြိုးများ ရက်လုပ်ထားပြီး တိမ်တိုက်ပုံစံများ ထိုးထားကာ အခြား ပုံစံများလည်း ပါဝင်လောက်သော်လည်း အဝတ်စုတ်က သေးငယ်လွန်းသဖြင့် အဓိကပုံစံက ဘာလဲဆိုတာ မသိနိုင်ချေ။

အဘိုးကြီးလျူက မေးလိုက်သည်။

"ငါတို့ ရွာအရင် ပြန်ကြမလား"

ချင်မင်က ခေါင်းခါလျက် ပြန်ဖြေလိုက်သည်။

"ယင်ထိန်မြို့နယ်ကိုပဲ သွားကြတာပေါ့ မနက်စာ အရင်စားမယ် ပြီးတော့မှ ချိန်းထားတဲ့ အဲဒီမိသားစုဆီ သွားမယ်"

အဘိုးကြီးလျူက မေးလိုက်သည်။

"မင်း ပြန်ပြီး စိတ်ငြိမ်အောင် မလုပ်ဘူးလား စိတ်က ဒီလောက်တောင် ကြီးတာလားဟ"

ချင်မင်က ခေါင်းခါလျက် ပြန်ဖြေလိုက်သည်။

"ဘာလို့ စိတ်ငြိမ်အောင် လုပ်နေရမှာလဲ အဲဒီ အမည်မသိ လျှို့ဝှက်ဆန်းပြားမှုတွေကို အခု နားမလည်နိုင်သေးတာက ကျုပ်ရဲ့ အစွမ်းအစက မလုံလောက်သေးလို့ပဲ အခု လျှို့ဝှက်ကျမ်းစာ သွားငှားဖတ်တယ်ဆိုတာက ကိုယ့်ကိုယ်ကိုယ် မြှင့်တင်နေတာပဲ တကယ့်ကို ခရီးစတင်နေတာပဲ"

အခန်း ၅၄ လျှို့ဝှက်ချက်နှင့် အစစ်အမှန် နာမည်

ချင်မင်က လမ်းဘေးရှိ သစ်ပင်တောအုပ်ထဲသို့ ဝင်ရောက်သွားပြီး ကျောက်စိမ်းဖြူသံမဏိဓားဖြင့် တွင်းနက်တစ်ခု တူးကာ လက်ဝါးအရွယ်ရှိသော အဝတ်စုတ်လေးကို မြှုပ်နှံလိုက်သည်။

အဘိုးကြီးလျူက မေးလိုက်သည်။

"ပြဿနာတက်မှာ ကြောက်လို့လား"

ချင်မင်က ခေါင်းညိတ်လိုက်ပြီး အမဲလိုက်ရရှိခဲ့သော တောယုန်တစ်ကောင်ကိုပါ တွင်းထဲသို့ ပစ်ထည့်လိုက်သည်။

အမည်းရောင် မြူခိုးအဖြစ် ပြောင်းလဲသွားသော လူငယ်က အေးစက်ပြီး အရိုးထိတိုင် အေးစိမ့်သွားကာ သူ့ကို အလွန် မကောင်းသော ခံစားချက်မျိုး ပေးခဲ့သည်။ ထိုသူ တစ်ပါတည်း ယူဆောင်လာသော တစ်ခုတည်းသော ပစ္စည်းကို ရင်ဆိုင်ရာတွင် သတိထားသင့်ပေသည်။

သူတို့နှစ်ဦးက ယင်ထိန်မြို့နယ်တွင် အငွေ့တထောင်းထောင်း ထနေသော မနက်စာကို စားပြီးနောက် လမ်းပေါ်တွင် နောက်ထပ် တစ်နာရီခန့် လှည့်လည်သွားလာပြီးမှ ချိန်းဆိုထားသော ထိုမိသားစုဆီသို့ လျှောက်သွားကြသည်။

ဝူမိသားစု၏ အိမ်က မသေးသော်လည်း ယိုယွင်းပျက်စီးနေသော အသွင်အပြင်များ အပြည့်အဝ ပေါ်လွင်နေပြီ ဖြစ်သည်။ ခြံတံခါးကြီးပေါ်ရှိ အနီရောင် ဆေးများ ကွာကျနေပြီး ကြေးကွင်းများကလည်း အရောင်မတောက်ပတော့ချေ။

အဘိုးကြီးလျူက တံခါးကွင်းကို ခေါက်လိုက်သည်။

"အဘိုးဝူ တံခါးဖွင့်ပါဦး"

"လာပြီ"

အဘိုးကြီးတစ်ဦး ထွက်လာပြီး သူတို့နှစ်ဦးကို အိမ်ထဲသို့ ဖိတ်ခေါ်လိုက်သည်။

ခြံဝင်းက အလွန် ကြီးမားသော်လည်း အတိတ်က ခမ်းနားထည်ဝါမှုမျိုး မရှိတော့ချေ။ လမ်းခင်းထားသော ကျောက်ပြားအချို့က အက်ကွဲနေပြီး ကြီးမားလှသော ပန်းခင်းကြီးကလည်း ဟင်းသီးဟင်းရွက်ခင်းအဖြစ် ပြောင်းလဲသွားကာ ကျောက်ဆောင်တုများပေါ်တွင် ခြောက်သွေ့နေသော ဘူးနွယ်ပင်များ တွယ်တက်နေကြသည်။

ဝူမိသားစု၏ ဘိုးဘေးများက ချမ်းသာကြွယ်ဝခဲ့ဖူးသော်လည်း ယခုအခါ ကျဆင်းသွားပြီ ဖြစ်သည်။ ထိုနေရာတွင် ခြံဝင်း လေးထပ်တိုင်တိုင် ရှိသော်လည်း အိမ်များက နှစ်ပေါင်းများစွာ ပြုပြင်ထိန်းသိမ်းမှု မရှိသဖြင့် ဟောင်းနွမ်းနေပြီး လူကို လူသူကင်းမဲ့သော ခံစားချက်မျိုးပင် ပေးစွမ်းနေသည်။

အကယ်၍ ထိုသို့ မဟုတ်လျှင် သူတို့က ဘိုးဘေးများ ချန်ရစ်ခဲ့သော လျှို့ဝှက်စာအုပ်ကို အပြင်လူများကို ပြသရန် သဘောတူမည် မဟုတ်ကြောင်း ခန့်မှန်းရသည်။

အဘိုးဝူ၏ ခန္ဓာကိုယ်က ပထမအကြိမ် ဘဝသစ်ရုံမျှသာ ရှိခဲ့ဖူးပြီး မြင့်မြတ်သော မိသားစုကြီး၏ မာနမျိုး လုံးဝ မရှိတော့ဘဲ သာမန် အဘိုးကြီးများနှင့် အတူတူပင် ဖြစ်နေသည်။

ဝူမိသားစုတွင် အစေခံများ မရှိဘဲ အိမ်ရှိ လူငယ်တစ်ဦးက လက်ဖက်ရည်ကို လာချပေးသည်။

အဘိုးကြီးလျူက အဓိက အကြောင်းအရာကို တိုက်ရိုက် ပြောလိုက်ပြီး အချိန်မဆွဲချင်တော့ချေ။

"အဘိုးဝူ ငါတို့လည်း ပိုမပြောတော့ဘူး ငါတို့ လာတဲ့ ရည်ရွယ်ချက်ကို မင်းလည်း သိတာပဲ ဈေးတစ်ခု ပြောလိုက်"

အဘိုးဝူက သက်ပြင်းချလိုက်သည်။

"အမှန်အတိုင်း ပြောရရင် ငါ့စိတ်ထဲမှာ အရမ်း ရှုပ်ထွေးနေတယ် အဲဒီတုန်းက ငါတို့ ဝူမိသားစုက အရမ်း ဂုဏ်ကျက်သရေ ရှိခဲ့တာ လွန်ခဲ့တဲ့ မျိုးဆက် လေးဆက်တုန်းက ငါးကြိမ် ဘဝသစ်ရထားတဲ့ ဆရာကြီးတစ်ယောက် ပေါ်ထွက်ခဲ့ဖူးပြီး ဒီဒေသကို အထက်စီးကနေ ကြည့်နိုင်ခဲ့တာ အရင် ဘိုးဘေးတွေဆိုရင် ပိုပြီးတောင် ပြောစရာ မလိုတော့ဘူး အခုတော့ ငါ ဒါကို... မိဘဘိုးဘွားတွေရဲ့ အမွေကို ရောင်းစားတဲ့ သားဆိုးလို့ ခေါ်ရမလား ဟူး သေသေချာချာ စဉ်းစားကြည့်ရင် ငါ့ရင်ထဲမှာ အရမ်း အရှက်ရမိတယ်"

သူက ကျယ်ဝန်းလှသော ဧည့်ခန်းကြီးကို တစ်ချက် ကြည့်လိုက်သည်။ တစ်ချိန်က ပန်းချီကားများနှင့် ပန်းပုများဖြင့် အလှဆင်ထားခဲ့သော်လည်း ယခုအခါ စားပွဲထောင့်များ ပျက်စီးနေပြီး ကြီးမားလှသော တိုင်လုံးကြီးများပေါ်တွင် မြှုပ်နှံထားသည့် ရွှေကြိုး၊ ငွေကြိုးများလည်း ပျောက်ကွယ်သွားပြီ ဖြစ်သည်။

အဘိုးကြီးလျူက လက်ဖက်ရည် တစ်ငုံသောက်လိုက်ပြီး ပြောလိုက်သည်။

"အဘိုးဝူ လူဆိုတာ ဖြေတွေးတတ်ရမယ် ဘယ်မျိုးရိုးနာမည်က မထွန်းတောက်ခဲ့ဖူးလို့လဲ ငါ့လျူမိသားစုကို ကြည့်ပါလား အရင်ကဆိုရင် မင်းမျိုးမင်းနွယ်တွေပဲ ငါက နဂါးသွေး၊ နဂါးမျိုးနွယ် ဖြစ်ပေမယ့် ဘာပြောဖူးလို့လဲ"

အဘိုးဝူက ပြန်ပြောလိုက်သည်။

"မင်းပြောတဲ့ ကိစ္စက ဘယ်ခေတ်က ကိစ္စလဲ ပြီးတော့ မင်းနဲ့ကော တစ်မျိုးတည်း 'လျူ' ဟုတ်လို့လား ဟူး ငါ ဒီရက်ပိုင်း အိပ်လို့တောင် မပျော်ဘူး"

ချင်မင်က အလွန် တိုက်ရိုက်ဆန်စွာဖြင့် နေ့ရွှေဒင်္ဂါး ငါးပြားကို ထုတ်ယူကာ ပျက်စီးနေသော စားပွဲမျက်နှာပြင်ပေါ်သို့ တင်လိုက်သည်။

"အဘိုးဝူ ကျွန်တော်တို့က ငှားဖတ်ရုံသက်သက်ပါ အပြင်ကို မပေါက်ကြားစေရဘူးလို့ ကတိပေးပါတယ်"

ဤဒေသလို ဝေးလံခေါင်ဖျားသော နေရာတွင် နေ့ရွှေဒင်္ဂါး တစ်ပြားက မိသားစုဝင် သုံးဦးအတွက် တစ်နှစ်စာ စားဝတ်နေရေး ပြဿနာကို ဖြေရှင်းပေးနိုင်သဖြင့် ၎င်းက အလွန် စေတနာထားရာ ရောက်နေပြီ ဖြစ်သည်။

အဘိုးဝူက ခေါင်းခါလျက် ပြောလိုက်သည်။

"မလောက်ဘူး"

အဘိုးကြီးလျူက ပြောလိုက်သည်။

"အဘိုးဝူ မင်း အရမ်း မလွန်နဲ့နော် ငါတို့က ဒီမှာ တစ်ရက်လောက်ပဲ ငှားဖတ်မှာ အပြင်ကို မပေါက်ကြားစေရဘူးလို့လည်း ကတိပေးထားတယ် မင်းက ဒါကို နတ်ကျမ်းစာအုပ်လို့ တကယ် ထင်နေတာလား"

အဘိုးဝူက သက်ပြင်းချလိုက်သည်။

"ငယ်ငယ်တုန်းက ငါ ချီရှမြို့တော်က လမင်းတိုက်ကို တက်ပြီး တစ်ညတည်းနဲ့ နေ့ရွှေဒင်္ဂါး နှစ်ပြားတောင် သုံးခဲ့တာ"

အဘိုးကြီးလျူက ချက်ချင်း ရယ်မောလိုက်ပြီး ပြောလိုက်သည်။

"အရင်က ကိစ္စတွေကို ပြောနေသေးတယ် မင်း မိန်းမ ကြားသွားရင် ဒုက္ခရောက်မယ်နော်"

ဝူမိသားစုက အဘယ်ကြောင့် ဤမျှ လျင်မြန်စွာ ကျဆင်းသွားရသည်ကို ချင်မင် နောက်ဆုံးတွင် နားလည်သွားပြီ ဖြစ်သည်။ အဘိုးဝူ ငယ်စဉ်က အလွန် ပျော်ပါးခဲ့ပုံရပြီး ပိုက်ဆံကို အတော်လေး ရက်ရက်ရောရော သုံးစွဲခဲ့ပုံရသည်။

သူ ဘာမှ မပြောတော့ဘဲ စားပွဲပေါ်သို့ နောက်ထပ် နေ့ရွှေဒင်္ဂါး နှစ်ပြား ထပ်တင်လိုက်သည်။

အဘိုးကြီးလျူက သက်ပြင်းချလိုက်သည်။

"အဘိုးဝူ ငါနဲ့ ရှောင်ချင် မကြာသေးခင်က အသက်စွန့်ပြီး မျိုးဗီဇပြောင်း သားရဲတချို့ကို သတ်ခဲ့တယ် ပြီးတော့ မြေကွဲကြောင်းကြီးထဲကနေ ပျက်စီးနေတဲ့ လက်နက်လေး တချို့ ကောက်ရခဲ့တယ် အဲဒါတွေကို ရောင်းပြီးရတဲ့ ပိုင်ဆိုင်မှု အကုန်လုံး ဒီမှာပဲ ရှိတော့တာ မင်း အရမ်း ခေါင်းပုံမဖြတ်ပါနဲ့"

အဘိုးဝူက စကားမပြောဘဲ ထိုနေရာတွင် တိတ်ဆိတ်စွာ ထိုင်ကာ လက်ဖက်ရည် သောက်နေသည်။

ချင်မင်က နေ့ရွှေဒင်္ဂါး ဆယ့်ငါးပြားအထိ တိုးပေးလိုက်မှသာ အဘိုးဝူက သက်ပြင်းချလိုက်သည်။

"အသုံးမကျတဲ့ သားသမီးတွေက ဘဝအတွက် ပင်ပန်းနေရလို့ မတတ်သာဘဲ လျှို့ဝှက်စာအုပ်ကို အပြင်လူကို ပြရတာပဲ"

သူက ရင်ဘတ်ထဲမှ ခေတ်ဟောင်းအငွေ့အသက်များ အပြည့်အဝ ပါရှိသော သားရေစာအုပ် တစ်အုပ်ကို ထုတ်ယူကာ စားပွဲပေါ်သို့ တင်လိုက်ပြီးနောက် ဝမ်းနည်းပူဆွေးပြီး စိတ်ပျက်အားငယ်နေသော အမူအရာဖြင့် အပြင်သို့ ထွက်သွားသည်။

ချင်မင်က သားရေစာအုပ်ကို ကိုင်ကာ အလွန် စူးစိုက်စွာဖြင့် စိတ်ကို နစ်မြုပ်၍ ဖတ်ရှုနေသည်။ ယခုက အကဲဆတ်ပြီး အထူး အခြေအနေ တစ်ခုဖြစ်ရာ သူက အစွမ်းအစကို တတ်နိုင်သမျှ အမြန်ဆုံး မြှင့်တင်ချင်နေသည်။

အဘိုးဝူက လှည့်စားခြင်း မရှိချေ။ ဤဘိုးဘေးများ ချန်ရစ်ခဲ့သော လျှို့ဝှက်စာအုပ်က ဝူမိသားစု ဘိုးဘေးများ၏ နှလုံးသွေးများနှင့် ကြိုးစားအားထုတ်မှု ရလဒ်များဖြစ်ပြီး ပြင်းထန်သော စိတ်ခံစားမှု တစ်ခုကို သယ်ဆောင်ထားသည်။

ချင်မင်က သေသေချာချာ လေ့လာဖတ်ရှုလိုက်ရာ ဘဝသစ်ရခြင်း ကျင့်စဉ်နှင့် ပတ်သက်သည့် အပိုင်းက ပိုးထည်ကျမ်းစာကို မမီသော်လည်း ကိုးကားစရာ အချို့တော့ ရှိသည်။

အချိန်အတော်ကြာပြီးနောက် သူက သားရေစာအုပ်ကို အဘိုးကြီးလျူထံ ပေးလိုက်ပြီး ကိုယ်တိုင် မျက်လုံးများကို ပိတ်ကာ ရရှိလာသည်များကို ချေဖျက်နေသည်။

အဘိုးကြီးလျူကလည်း အားနာမနေဘဲ ယူလိုက်ပြီးနောက် စာမျက်နှာ တစ်ရွက်ချင်းစီကို သေသေချာချာ ဖတ်ရှုကာ တောင်စောင့်ဟောင်းကြီးထံမှ သူသင်ယူခဲ့ရသော အရာများနှင့် နှိုင်းယှဉ် အတည်ပြုနေသည်။

ရုတ်တရက် သူက တစ်ခုခုကို သတိပြုမိသွားပြီး မျက်နှာချင်းဆိုင်သို့ မော့ကြည့်လိုက်ရာ ချက်ချင်းပင် မငြိမ်မသက် ဖြစ်သွားရသည်။

ချင်မင်က မျက်လုံးများကို ပိတ်ကာ ထိုနေရာတွင် ထိုင်နေပြီး လက်ချောင်းဖျားများတွင် ထက်မြက်သော ကောင်းကင်အလင်း အနည်းငယ် ပေါ်လာသည်။

အဘိုးကြီးလျူက ကိုယ့်ကိုယ်ကိုယ် သင်ယူတတ်မြောက်မှု မြန်ဆန်ပြီး ပါရမီ အလွန် ကောင်းသည်ဟု ထင်ထားခဲ့သော်လည်း ယခုအခါ လုံးဝ စိတ်ဓာတ်ကျလုနီးပါး ဖြစ်သွားသည်။ သူ ဘာကို မြင်လိုက်ရတာလဲ။ ချင်မင်က ခုလေးတင် ဖတ်ပြီးတာနဲ့ စာအုပ်ထဲတွင် မှတ်တမ်းတင်ထားသော ကောင်းကင်အလင်း စွမ်းအားကို ကျင့်ကြံနိုင်သွားပြီ ဖြစ်သည်။

ချင်မင်က မတ်တပ်ရပ်လိုက်သည်။

"အဘိုး ဒီမှာ ဖြည်းဖြည်းချင်း ဖတ်ပါ ဘာပဲဖြစ်ဖြစ် ပိုက်ဆံပေးထားတာပဲ ကျွန်တော် အိမ်ပြန်ပြီး သေသေချာချာ လေ့လာလိုက်ဦးမယ်"

အဘိုးကြီးလျူ တစ်ကိုယ်လုံး ကြောင်အသွားသည်။ လူနှင့်လူ တကယ်ပဲ နှိုင်းယှဉ်လို့ မရချေ။ သူက အဲဒီတုန်းက ချီရှမြို့တော်တွင် ဆရာတပည့် ခံလုနီးပါး ဖြစ်ခဲ့သော်လည်း ယခုအခါ သူ၏ ပါရမီက ဘာကြောင့် ဤမျှ အသုံးမကျ ဖြစ်နေရတာလဲး။

ခြံဝင်းထဲရှိ အဘိုးဝူက အံ့ဩသွားပြီး ချင်မင် ဒီလောက် မြန်မြန် ထွက်လာကာ သူ့ကို နှုတ်ဆက်မည်ဟု မမျှော်လင့်ထားခဲ့ချေ။

"လူငယ်လေး မင်းက ပြန်တော့မလို့လား"

ချင်မင်က ခေါင်းညိတ်လိုက်ပြီး ပြောလိုက်သည်။

"အင်း ဒီစာအုပ်က အကြောင်းအရာတွေ အရမ်း ခက်ခဲပြီး လမ်းကြောင်းက ကျုပ်နဲ့ မကိုက်ညီဘူး"

အဘိုးဝူ၏ ဝမ်းနည်းနေသော မျက်နှာက နောက်ဆုံးတော့ အများကြီး ကောင်းလာပြီး အပြုံးတစ်ခု ပေါ်လာကာ လျှောက်လာပြီး ချင်မင်၏ ပခုံးကို ပုတ်ရင်း ပြောလိုက်သည်။

"ဒါက အရမ်း ပုံမှန်ပါပဲ ငါ့ဘိုးဘေးတွေ ချန်ရစ်ခဲ့တဲ့ လျှို့ဝှက်စာအုပ်က အရမ်းကို နက်နဲတယ် မင်းက ဒီလောက် အချိန်တိုလေး ဖတ်ရုံနဲ့ မပြောနဲ့ ငါတောင် တစ်သက်လုံး လေ့လာတာတောင် နားမလည်သေးဘူး"

"ဟုတ်တယ် တကယ်ကို အံ့မခန်း စာအုပ်ပါပဲ"

ချင်မင်က ခေါင်းညိတ်လိုက်ပြီး ဝူမိသားစု၏ ခြံတံခါးမှ ထွက်လာခဲ့သည်။

"ခွပ်"

ဧည့်ခန်းထဲမှ အသံထွက်လာသဖြင့် အဘိုးဝူက အလျင်အမြန် ခြေလှမ်းကျဲကြီးများဖြင့် ဝင်သွားလိုက်ရာ အဘိုးကြီးလျူ အခြေအနေ ပျက်ယွင်းသွားပြီး လက်ဖက်ရည်ပန်းကန်ကို မြေပြင်ပေါ်သို့ မတော်တဆ ပုတ်ချမိသွားကြောင်း တွေ့လိုက်ရသည်။

ချင်မင် ပြန်ရောက်လာချိန်တွင် ရွာထိပ်တွင် နေထိုင်သော ယန်ယုံချင်းက ထိုအရပ်ရှည်ပြီး ကြီးမားလှသော တောင်ဆိတ်မည်းကြီးကို ညင်သာစွာ ပုတ်ကာ တိုးတိုးလေး ပြောနေသည်ကို အတိအကျ တွေ့လိုက်ရသည်။

"ယုံဟေးရေ နောက်ထပ် လေးရက်နေရင် ငါတို့ ရွှေကြက်မတောင်ကုန်းကို သွားရတော့မယ်..."

ချင်မင်က သူ၏ ခြံဝင်းလေးထဲသို့ ပြန်လာပြီး ကောင်းကင်အလင်း စွမ်းအင် အသစ်ကို စတင် ကျင့်ကြံလိုက်သည်။

ထက်မြက်ခြင်း စွမ်းအားကို သားရေစာအုပ်ပေါ်တွင် မှတ်တမ်းတင်ထားရာ ကျင့်ကြံ အောင်မြင်ပြီးနောက် လက်ဗလာဖြင့် ချပ်ဝတ်တန်ဆာကို အလွယ်တကူ ဖျက်ဆီးပစ်နိုင်ပြီး မချိုးဖျက်နိုင်သောအရာ မရှိချေ။ ၎င်းက ထိုးဖောက်နိုင်စွမ်း အလွန် ပြင်းထန်သော ကောင်းကင်အလင်း စွမ်းအင် တစ်မျိုး ဖြစ်သည်။

၎င်းက ဆူးချွန်စွမ်းအင်နှင့် တူညီသော အပိုင်းများ အများကြီး ရှိသည်မှာ သေချာပေါက်ဖြစ်ရာ ထိုနှစ်မျိုးကို အတူတူ ကျင့်ကြံပါက တစ်ခုနှင့်တစ်ခု အပြန်အလှန် ဖြည့်စွက်ပေးနိုင်ပြီး ထိရောက်စွာ ပေါင်းစပ်နိုင်မည်ဟု သူ ခန့်မှန်းလိုက်သည်။

ဝူမိသားစု၏ ဘိုးဘေးများက ဤဒေသတွင် လှံနှင့် မြား အလွန် ကျွမ်းကျင်သူဟု နာမည်ကြီးပြီး လေးပစ်ရာတွင် ကျွမ်းကျင်ကာ လှံကြီးတစ်ချောင်းကို အသုံးပြုရာတွင် အားလုံးက ထက်မြက်ခြင်း စွမ်းအင်ကို အခြေခံထားသည်။ ကောင်းကင်အလင်း စွမ်းအင်များကို အပြင်သို့ ထုတ်လွှတ်နိုင်သောအခါ သူ ပစ်လွှတ်လိုက်သော မြားများနှင့် ထိုးစိုက်လိုက်သော လှံကြီးက အလွန် ကြောက်စရာကောင်းလှသည်။

ထို့အပြင် သားရေစာအုပ်ပေါ်ရှိ သက်ဆိုင်ရာ မှတ်တမ်းများနှင့် အတွေ့အကြုံများက ချင်မင်၏ အသိအမြင်များကို တိုးပွားစေခဲ့သည်။ ဥပမာအားဖြင့် သုံးရောင်ခြယ်ပန်း၏ ဆေးအာနိသင် စသည်တို့ကို ဖော်ပြထားသည်။

စာအုပ်ထဲရှိ မှတ်တမ်းများအရ ဝိညာဉ်တောင်မှ ထွက်ရှိသော သုံးရောင်ခြယ်ပန်းက အဆင့်မြင့်ဖြစ်ပြီး ဆေးအာနိသင်က နူးညံ့ကာ လူ့ခန္ဓာကိုယ်ထဲရှိ ကောင်းကင်အလင်းကို ပြုစုပျိုးထောင်ပေးပြီး ကြီးထွားလာစေကာ ကောင်းကင်အလင်း စွမ်းအင်များကို တိုးတက်လာစေနိုင်သည်။

တကယ်တမ်းတော့ အရာအားလုံး၏ အခြေခံက ကောင်းကင်အလင်းပင် ဖြစ်သည်။ လူ့ခန္ဓာကိုယ်မှ ဖြစ်ပေါ်လာသော ကောင်းကင်အလင်းက ပုံမှန်အခြေအနေတွင် ငြိမ်းချမ်းပြီး နူးညံ့ကာ မိမိကိုယ်ကို ပြုစုပျိုးထောင်ပေးနိုင်သည်။ သို့သော် အပြင်သို့ ထုတ်လွှတ်လိုက်သောအခါ နည်းလမ်းအမျိုးမျိုးဖြင့် စွမ်းအင်များကို ထုတ်လွှတ်ပါက သူ၏ ကြမ်းတမ်းသောဘက်ကို ဆွဲထုတ်လိုက်မည် ဖြစ်သည်။

သားရေစာအုပ်ထဲတွင် ကောင်းကင်အလင်း စွမ်းအင် အမျိုးမျိုးကို ပေါင်းစပ်ရာတွင် သေချာပေါက် သတိထားရမည်ဖြစ်ပြီး အလွန် ဂရုစိုက်ရမည်ဟု သတိပေးထားသည်။ အကယ်၍ မလိုက်ဖက်ပါက ခန္ဓာကိုယ်ထဲရှိ ကောင်းကင်အလင်းများ ကြီးမားစွာ ပေါက်ကွဲထွက်လာစေနိုင်ပြီး နောက်ဆက်တွဲ ရလဒ်က အလွန် ဆိုးရွားမည် ဖြစ်သည်။

ထက်မြက်ခြင်း စွမ်းအင်က သာမန် စွမ်းအင် သုံးမျိုးကို ပေါင်းစပ်ထားသော ကောင်းကင်အလင်း စွမ်းအားဖြစ်ပြီး ထို့ထက် ပိုများလာလျှင် ဝူမိသားစု၏ ဘိုးဘေးများက မစမ်းသပ်ရဲတော့ချေ။

ချင်မင်က လေးနက်စွာ တွေးတောလိုက်သည်။ သူ ဤကဲ့သို့သော ပြဿနာမျိုးနှင့် မကြုံတွေ့ခဲ့ရဘဲ သူ၏ ကောင်းကင်အလင်း စွမ်းအင်က အလွန် ကြီးမားသော လက်ခံနိုင်စွမ်း ရှိသည်ဟု သူ ထင်မြင်မိသည်။

ညအမှောင်ထုကို ဖောက်ထွင်းပြီး ကောင်းကင်အလင်းများ ကျဆင်းလာရာ ၎င်းကျဆင်းလာသော နေရာမှ ပေါက်ဖွားလာသည့် သုံးရောင်ခြယ်ပန်းက အကောင်းဆုံးဖြစ်ပြီး ဝိညာဉ်တောင်မှ အဆင့်မြင့်ပန်းများထက် အများကြီး ပိုမို တန်ဖိုးကြီးကြောင်း စာအုပ်ထဲတွင် ဖော်ပြထားသည်။

သို့သော် ဤသုံးရောင်ခြယ်ပန်းက ပြင်ပမှ ကောင်းကင်အလင်းများ ပါဝင်နေသဖြင့် ဆေးအာနိသင် အလွန် ပြင်းထန်ပြီး ထိုးဖောက်ဖျက်ဆီးနိုင်စွမ်း အလွန် ပြင်းထန်ရာ လူ့ခန္ဓာကိုယ်က မခံနိုင်သဖြင့် ပြင်းထန်သော အသက်ဓာတ် ပါဝင်သည့် အရာများနှင့် တွဲဖက်၍ အတူတူ စားသုံးမှသာ ဘေးကင်းမည် ဖြစ်သည်။

သေချာတာပေါ့ ပင်ကိုယ်ပါရမီ ထူးခြားသူ အနည်းငယ်ကတော့ အကောင်းဆုံး သုံးရောင်ခြယ်ပန်း၏ ကြမ်းတမ်းသော ဆေးအာနိသင် ထိုးဖောက်ဖျက်ဆီးခြင်းကို မကြောက်လောက်ချေ။

ချင်မင်က ထိုးဖောက်ဖျက်ဆီးခြင်း ဆိုသည်က ညအမှောင်ထုကို ဖောက်ထွင်းလာသော ကောင်းကင်အလင်းက သုံးရောင်ခြယ်ပန်းထဲတွင် ချန်ရစ်ခဲ့သည့် ဝိညာဉ်အနှစ်သာရများနှင့် သက်ဆိုင်လောက်မည်ဟု ခန့်မှန်းလိုက်သည်။

အဲဒီတုန်းက မြေအောက်လိုဏ်ဂူထဲတွင် ဟွမ်ကျင့်တက်က ပြုံးရွှင်နေပြီး မေးသမျှကို ဖြေကြားပေးနေသကဲ့သို့ ထင်ရသော်လည်း ဤအရာများကို မပြောပြခဲ့ဘဲ နောက်ဆုံးတော့ အကျင့်ပါနေသကဲ့သို့ အစိတ်အပိုင်းအချို့ကို ဖုံးကွယ်ထားခဲ့ခြင်း ဖြစ်သည်။

ချင်မင်က မိမိ၏ ခန္ဓာကိုယ်က ကောင်းကင်အလင်း၏ ထိုးဖောက်ဖျက်ဆီးခြင်းကို ခံနိုင်ရည်ရှိပြီး မသေဆုံးနိုင်ရာ အကောင်းဆုံး သုံးရောင်ခြယ်ပန်း၏ ဆေးအာနိသင်ကို ခံနိုင်ရည်ရှိလောက်မည်ဖြစ်ပြီး ပြင်းထန်သော အသက်ဓာတ် ပါဝင်သည့် အရာများကို ထပ်မံ ရှာဖွေရန် မလိုအပ်တော့ကြောင်း တွေးတောလိုက်သည်။

...

တောင်ထဲရှိ မြေကွဲကြောင်းကြီး အနီးတွင် ရွှေကြက်မတောင်ကုန်းမှ ဓားပြကြီးနှစ်ဦးက ကိုယ်တိုင် လူများကို ဦးဆောင်ကာ ဤနေရာတွင် စောင့်ကြပ်နေကြသည်။

"သူက လူငယ်တွေကို ထပ်ပြီး ဒုက္ခပေးတော့မှာ မဟုတ်ဘူးနော် သူ့ကို အကြိမ်ကြိမ် သတိပေးထားပြီးပြီ လူတွေ ဆက်တိုက် သေရင် ပြဿနာ တက်လိမ့်မယ် အကယ်၍ ချီရှမြို့တော်က အထက်လူကြီးတွေ သတိထားမိသွားရင် ဒုက္ခ အကြီးအကျယ် ရောက်လိမ့်မယ်"

"သူက တကယ်ပဲ နတ်လမ်းစဉ်ကျင့်ကြံသူလား အေးစက်ပြီး အရိုးထိတိုင်အောင် အေးစိမ့်နေတယ် နတ်ဘုရားတွေလိုလို ဘာလိုလို လူမျိုးနဲ့ လုံးဝ မတူဘူး"

"သူက ကိုယ်တိုင် ကိုယ်ထင် မပြဘူးဆိုရင် မင်းနဲ့ငါက လုံးဝ မြင်ရမှာ မဟုတ်ဘူး ဒါက သေချာပေါက် နတ်လမ်းစဉ်ကျင့်ကြံသူတွေရဲ့ နည်းလမ်းပဲ ဒါပေမယ့် သူ့ရဲ့ နည်းလမ်းတွေကို ကြည့်ရတာ မှန်ကန်တဲ့ လမ်းကြောင်းက မဟုတ်လောက်ဘူး"

ဓားပြကြီးနှစ်ဦးက တိတ်တဆိတ် ပြောဆိုနေကြပြီး အမည်းရောင် မြူခိုးအဖြစ် ပြောင်းလဲသွားသော လူငယ် သေဆုံးသွားပြီဖြစ်ကြောင်း မသိကြသေးချေ။

စောစောပိုင်းက ထိုလူငယ်က ရွှေရောင် ဓားပြများ ပေးထားသော အမှတ်အသားကို ကိုင်ဆောင်ကာ ရောက်လာပြီး ရွှေကြက်မတောင်ကုန်းမှ ဓားပြကြီးများကို ဤနေရာတွင် ကောင်းကောင်း စောင့်ကြပ်ပေးရန်နှင့် မည်သူ့ကိုမျှ အနီးသို့ မလာစေရန် အကူအညီ တောင်းခံခဲ့ခြင်း ဖြစ်သည်။

"ဒီလူက သေချာပေါက် အသက်ကြီးတဲ့ အဘိုးကြီးတွေကိုပဲ ပစ်မှတ်ထားမယ် ပုံမှန် သေဆုံးတာနဲ့ တူအောင် လုပ်မယ် ဘာပြဿနာမှ မဖြစ်စေရဘူးလို့ ကတိပေးထားပြီးပြီ ဒါပေမယ့် ညဉ့်နက်ပိုင်း ကုန်ဆုံးသွားပြီလေ သူ ဘယ်လိုဖြစ်လို့ ပြန်မရောက်သေးတာလဲ"

"ထပ်ပြီး စောင့်ကြည့်ကြတာပေါ့"

"အဲဒီတုန်းက တောင်ထဲက သားရဲအိုကြီးက သင်္ချိုင်းမှာ ငိုကြွေးပြီး မြေကြီးပေါ် တစ်ခါ ထိမိတိုင်း ထူးဆန်းတဲ့ မြင်ကွင်း တစ်ခု ပေါ်လာတယ် သူက မြန်မြန်ဆန်ဆန် မျိုးဗီဇပြောင်းသွားပြီး ဆက်တိုက် အဆင့်တက်သွားတော့ ကြီးမားတဲ့ လှုပ်ရှားမှုတွေ ဖြစ်သွားခဲ့တယ် အဲဒီနောက်ပိုင်း ချီရှမြို့တော်က အထက်လူကြီးတွေက ဒီကိစ္စရဲ့ နောက်ဆက်တွဲ သတင်းတွေကို ပိတ်ပင်လိုက်တယ် အခု ဒီနတ်လမ်းစဉ်ကျင့်ကြံသူက အရင်နေရာကို လာပြီး လှုပ်ရှားနေပြန်ပြီ ဆိုတော့ သူက အဲဒီသားရဲအိုကြီးကို အတုခိုးချင်နေတာတော့ မဟုတ်ပါဘူးနော် အဲဒီလိုသာဆိုရင် ကိစ္စ ပေါက်ကြားသွားတဲ့အခါ မင်းနဲ့ငါ အခါတစ်ရာ သေရင်တောင် မလောက်ဘူး"

"သူက နတ်လမ်းစဉ်ကျင့်ကြံသူပဲ အဲဒီမျိုးဗီဇပြောင်း သားရဲရဲ့ လမ်းကြောင်းအတိုင်းတော့ သွားမှာ မဟုတ်လောက်ပါဘူး"

ဓားပြကြီးနှစ်ဦး၏ မျက်နှာအမူအရာက လေးနက်နေပြီး ထိုအေးစိမ့်စိမ့် လူငယ်နှင့် လုံးဝ အဆက်အသွယ် မလုပ်ချင်ကြချေ။

"အစွမ်းထက်တဲ့ နတ်လမ်းစဉ်ကျင့်ကြံသူတစ်ယောက်ယောက်က သူ့လက်ကို ငှားပြီး အမည်းနဲ့ အဖြူရောင် တောင်တန်းကြီးကို စမ်းသပ်ချင်နေတာများလား"

"အဲဒီလောက်တော့ မဟုတ်ပါဘူး သူက မကြာခင် ထွက်သွားတော့မယ်လို့ ငါထင်တယ် သူ့ပုံစံကို ကြည့်ရတာ လောလောလောလောနဲ့ ဒီနေရာကနေ လမ်းကြုံ ဖြတ်သွားရင်း ကိစ္စတချို့ကို လမ်းကြုံ ဝင်လုပ်သွားတာ ဖြစ်မယ်"

...

ချင်မင်က ငြိမ်သက်စွာ ထိုင်နေပြီး ပိုးကြိုးရစ်ပတ်ခြင်း စွမ်းအင်၊ ဖြတ်တောက်ခြင်း စွမ်းအင်၊ သံမှိုစွမ်းအင်၊ ထက်မြက်ခြင်း စွမ်းအင်တို့အပြင် သူ၏ ကိုယ်ပိုင် ထူးခြားသော ကောင်းကင်အလင်း စွမ်းအင်တို့ကိုပါ ကျင့်ကြံနိုင်ခဲ့ပြီ ဖြစ်သည်။ ယခု သူ သုံးရောင်ခြယ်ပန်းကို စားသုံး၍ ရပြီဟု ထင်မြင်လိုက်ပြီး ထို့နောက် အားလုံးကို လုံးဝ ပေါင်းစပ်လိုက်မည်ဆိုလျှင် သူ၏ အစွမ်းအစက သေချာပေါက် သိသိသာသာ တိုးတက်လာမည် ဖြစ်သည်။

သူက ကျောက်စိမ်းသေတ္တာထဲရှိ သုံးရောင်ခြယ်ပန်းကို စိုက်ကြည့်ရင်း အနည်းငယ် စိတ်လွင့်သွားသည်။

"ဒီမြင်ကွင်းက ရင်းနှီးနေသလိုပဲ..."

ထိုမိုးမခရွက်နှင့် တူပြီး ဓားများနှင့်လည်း တူကာ တစ်လွှာပြီးတစ်လွှာ ထပ်နေသော သုံးရောင်ခြယ် ပွင့်ချပ်များက အရောင်အသွေးစုံလင်လှသော မြူခိုးများ အများအပြား ထွက်ပေါ်နေပြီး ဝိညာဉ်အလင်းများ စီးဆင်းကာ သူ့ကို ဖုံးလွှမ်းသွားသည်။

တတိယအကြိမ် ဘဝသစ်ရပြီးကတည်းက ချင်မင်က ငယ်စဉ်က ကိစ္စအချို့ကို မှတ်မိလာရုံသာမက ခေါင်းထဲတွင် အခြား ဝေဝါးပြီး အပိုင်းအစဖြစ်နေသော မှတ်ဉာဏ်အချို့လည်း စတင် ပေါ်လာခဲ့သည်။

"စွန့်လွှတ်"

သူက ထိုစကားလုံး တစ်လုံးကို တိုးတိုးလေး ရေရွတ်လိုက်ပြီး လက်ဖက်ရည်နှင့် ဆွတ်ကာ စားပွဲပေါ်တွင် ရေးလိုက်သည်။

ယခုအချိန်တွင် သူက သုံးရောင်ခြယ်ပန်းကို ကြည့်ရင်း အတိတ်က ဆင်တူသော မြင်ကွင်းမျိုးကို မြင်တွေ့လိုက်ရသကဲ့သို့ ဖြစ်နေသည်။

"ချွေချုံဟယ်"

ထို့နောက် သူက စားပွဲမျက်နှာပြင်ပေါ်တွင် စကားလုံး သုံးလုံးကို ရေးသားလိုက်ပြီး သေသေချာချာ စိုက်ကြည့်ကာ ပြောလိုက်သည်။

"စွမ်းအင်တွေ ရောစပ်ပြီး ဟန်ချက်ညီအောင် လုပ်တယ် ဆိုတာက နတ်လမ်းစဉ်ကျင့်ကြံသူတွေရဲ့ အပြင်ကို ပျံ့နှံ့နေတဲ့ ရှေးဟောင်းကျမ်းစာတွေကနေ လာတာ ချွေ မျိုးရိုးနာမည်၊ ချွေချုံဟယ် ဆိုတာက ငါ့ရဲ့ အစစ်အမှန် နာမည်လား ဒါပေမယ့် အခု ငါက နတ်လမ်းစဉ်ကျင့်ကြံသူတွေကို အရမ်း ရွံမုန်းနေတာ"