အခန်း (၆၁-၆၂)

အခန်း ၆၁ ။ ခန္ဓာပေါင်းစည်းခြင်းအဆင့်၏ အစွမ်းထက်မှု

ဤကမ္ဘာ၏ အဆင့်မြင့်ဆုံး လက်နက်နှစ်မျိုး ရှိသည်။ တစ်မျိုးမှာ နေတုဗုံးဖြစ်ပြီး၊ အခြားတစ်မျိုးမှာ ပျက်သုဉ်းစေသောအမြောက် ဖြစ်သည်။

နေတုဗုံးသည် ပေါက်ကွဲပြီးနောက် အပူချိန် ဒီဂရီ သန်းပေါင်းရာချီ ထုတ်လွှတ်နိုင်သည်။ ၎င်းမှာ နျူကလီးယားဗုံး ပေါက်ကွဲမှု၏ ဗဟိုချက် အပူချိန်နှင့် ဆင်တူသော်လည်း၊ အားသာချက်မှာ ပေါက်ကွဲမှု ဧရိယာတစ်ခုလုံးရှိ အပူချိန်ကို ထိုမျှအထိ မြင့်တက်စေခြင်းပင် ဖြစ်သည်။

လူသားများသည် နျူကလီးယား ရောင်ခြည်သင့်မှုထက် အပူချိန်မြင့်မားမှုက သားရဲဆိုးများကို ပိုမို ခြိမ်းခြောက်နိုင်ကြောင်း ရှာဖွေတွေ့ရှိခဲ့ကြသည်။

ပျက်သုဉ်းစေသောအမြောက်မှာမူ မမြင်နိုင်သော တိုက်ခိုက်မှုကို လွှတ်တင်ခြင်း ဖြစ်သည်။ ထိုအလင်းနှင့် ထိမိသမျှ အရာဝတ္ထုမှန်သမျှသည် အက်တမ်အဆင့်အထိ ပြိုကွဲသွားရသည်။ အားနည်းချက်မှာ ထုတ်လုပ်ရန် ခက်ခဲခြင်းနှင့် စွမ်းအင်သုံးစွဲမှု အလွန်များပြားခြင်းပင်ဖြစ်သည်။

အကယ်၍ အဝေးမှ တိုက်ခိုက်ပါက သားရဲဆိုးများသည် အလိုလို ရှောင်ကွင်းနိုင်သဖြင့်၊ ဤလက်နက်နှစ်မျိုးကို အနီးကပ် တိုက်ပွဲများတွင်သာ အသုံးပြုကြရသည်။

မက်ခါစစ်သည်တော်များသည် ထိုလက်နက်များထဲမှ တစ်ခုကို တပ်ဆင်ထားလေ့ရှိပြီး၊ အားနည်းသော သားရဲများကိုမူ 'အသံလှိုင်းတုန်ခါဓား' ဖြင့် ရင်ဆိုင်ကြသည်။ အကယ်၍ အစွမ်းထက်သော သားရဲနှင့် တွေ့ပါက နေတုဗုံးကို ဖောက်ခွဲပစ်ခြင်း သို့မဟုတ် ပျက်သုဉ်းစေသောအမြောက်ကို ပစ်ခတ်ခြင်းတို့ ပြုလုပ်ကြရသည်။

ကျန်းလီသည် မလှမ်းမကမ်းရှိ မက်ခါစစ်သည်တစ်ဦးက နေတုဗုံးကို အသုံးပြုလိုက်သည်ကို တွေ့လိုက်ရသည်။ ၎င်းသည် နေမင်းတစ်စင်းအလား လင်းလက်သွားပြီး၊ ထိုအလင်းတန်းအောက်ရှိ သားရဲများနှင့် မက်ခါစစ်သည်တော်များ အားလုံးမှာ အရည်ပျော် ပျောက်ကွယ်သွားကြသည်။ အကြွင်းအကျန်မျှပင် မကျန်ရစ်ခဲ့ပေ။

ဤကဲ့သို့သော နည်းဗျူဟာကို အသုံးပြု၍သာ လူသားမျိုးနွယ်သည် သားရဲဆိုးများ၏ တိုက်စစ်ကို ခဲယဉ်းစွာ တားဆီးထားနိုင်ခြင်းဖြစ်သည်။

သို့သော် ဤတိုက်ခိုက်မှုကို အမြဲတမ်း အသုံးမပြုနိုင်ပေ။ အကြောင်းမှာ သားရဲဆိုးများ၏ အရေအတွက်မှာ မက်ခါများထက် အဆပေါင်းများစွာ သာလွန်နေပြီး၊ ဤကဲ့သို့သော တိုက်ခိုက်မှုအောက်တွင်ပင် အသက်ရှင်ကျန်ရစ်သည့် သားရဲများ ရှိနေသောကြောင့်ပင်။

"ခန္ဓာပေါင်းစည်းခြင်းသားရဲနဲ့ ဝိညာဉ်အသွင်ပြောင်းခြင်းသားရဲတွေပဲ။" ကျန်းလီက မျက်မှောင်ကြုတ်ကာ ကြည့်လိုက်သည်။ နေတုဗုံး ပေါက်ကွဲပြီးနောက်၌ပင် ဧရာမ သားရဲကြီးတစ်ကောင်မှာ လန်းလန်းဆန်းဆန်း ရှိနေသည်ကို သူ မြင်လိုက်ရသည်။ အခြား သားရဲအချို့မှာမူ အသက်ငင်နေသော်လည်း အသက်ရှင်နေဆဲဖြစ်သဖြင့် လောလောဆယ်တွင် ခြိမ်းခြောက်မှု မရှိသေးပေ။

ခန္ဓာပေါင်းစည်းခြင်းအဆင့် သားရဲသည် စစ်မြေပြင်တွင် သောင်းကျန်းနေပြီး၊ မည်သည့် မက်ခါစစ်သည်မျှ ၎င်း၏ လက်သည်းချက်ကို မခုခံနိုင်ပေ။ မက်ခါစစ်သည်တစ်ဦးက ပျက်သုဉ်းစေသောအမြောက်ကို အားသွင်းကာ ထိုသားရဲဆီသို့ ပစ်လွှတ်လိုက်သည်။

မမြင်နိုင်သော တိုက်ခိုက်မှု ထွက်ပေါ်လာပြီး လေထုထဲရှိ အောက်ဆီဂျင်နှင့် ကာဗွန်ဒိုင်အောက်ဆိုက်များမှာ အက်တမ်များအဖြစ် ပြိုကွဲသွားသည်။ မြေကြီးနှင့် ထိမိသောအခါ၌လည်း မျက်စိဖြင့် မမြင်နိုင်သော ဆီလီကွန် အက်တမ်များအဖြစ် တိုက်ရိုက် ပျောက်ကွယ်သွားရသည်။

ထိုမက်ခါမှာလည်း စွမ်းအင်ကုန်ခမ်းသွားသဖြင့် ဆက်လက် မလှုပ်ရှားနိုင်တော့ပေ။

သို့သော် ထိုတိုက်ခိုက်မှုသည် ခန္ဓာပေါင်းစည်းခြင်းအဆင့် သားရဲနှင့် ထိတွေ့သွားသောအခါ ဒဏ်ရာတစ်စက်မျှပင် မရရှိခဲ့ပေ။

"ဘယ်လို ဖြစ်နိုင်မှာလဲ။" မင်ကျုံးသည် ဤမြင်ကွင်းကို မယုံကြည်နိုင် ဖြစ်နေသည်။ နေတုဗုံးနှင့် ပျက်သုဉ်းစေသောအမြောက် နှစ်ခုလုံး၏ တိုက်ခိုက်မှုကို ခံယူပြီးနောက်၌ပင် ဒဏ်ရာမရဘဲ ရှိနေသည့် သားရဲမျိုး တစ်ခါမျှ မရှိခဲ့ဖူးပေ။ ၎င်းမှာ တစ်ခါမျှ မကြုံဖူးသည့် အခြေအနေပင်။

မကြာမီမှာပင် အလင်းကွန်ပျူတာက အဖြေကို ထုတ်ပေးလိုက်ရာ မင်ကျုံး၏မျက်နှာမှာ ပြာနှမ်းသွားတော့သည်။

"သားရဲတွေက ထပ်ပြီး ဆင့်ကဲပြောင်းလဲသွားပြန်ပြီ။"

"မင်းတို့ အရင်က ကြုံဖူးတာတွေက ဝိညာဉ်အသွင်ပြောင်းခြင်းအဆင့် သားရဲတွေပဲ။ အခု ဒီတစ်ကောင်ကတော့ ခန္ဓာပေါင်းစည်းခြင်းအဆင့်ပဲ။" ကျန်းလီသည် လက်နက်နှစ်မျိုး၏ တိုက်ခိုက်မှု နိယာမကို မြင်လိုက်ရသဖြင့် ဤသားရဲ ဘာကြောင့် ဒဏ်ရာမရသည်ကို အလွယ်တကူ နားလည်လိုက်သည်။

"ခန္ဓာပေါင်းစည်းခြင်းဆိုတာ ဘာလဲဆိုတော့ အဲ့ဒါက စိတ်နဲ့ ဆန္ဒ ပေါင်းစည်းတာ၊ လူနဲ့ တာအို ပေါင်းစည်းတာ၊ ခန္ဓာနဲ့ ပုံသဏ္ဌာန် ပေါင်းစည်းတာပဲ။ ဒီသုံးမျိုးစလုံး တစ်သားတည်းဖြစ်ပြီး ခွဲခြားလို့မရတာကို ခန္ဓာပေါင်းစည်းခြင်းလို့ ခေါ်တာပါ။"

"ပျက်သုဉ်းစေသောအမြောက်က အရာရာကို အက်တမ်အဖြစ် ဖြိုခွဲနိုင်ပေမဲ့၊ ခန္ဓာပေါင်းစည်းခြင်းအဆင့်ရဲ့ ခန္ဓာနဲ့ ပုံသဏ္ဌာန်ဟာ တစ်သားတည်း ဖြစ်နေတဲ့အတွက် ကာယကံရှင်က မလိုလားရင် ခွဲခြားလို့ မရဘူး။ ဒါကြောင့် အမြောက်ဒဏ်ကို ခံနိုင်တာပေါ့။"

"ဒါ့အပြင် ခန္ဓာပေါင်းစည်းခြင်းအဆင့် ကျင့်ကြံသူတွေရဲ့ ခန္ဓာကိုယ်ဟာ အလွန်သန်မာတယ်။ နေရာလွတ်ထဲမှာ လှည့်လည်နိုင်တယ်၊ လပေါ်မှာ အနားယူနိုင်တယ်၊ ပြင်းထန်တဲ့ နေရောင်အောက်မှာ အပူဓာတ်နဲ့ရေချိုးနိုင်တယ်။ ဒါကြောင့် နေတုဗုံးရဲ့အပူဒဏ်က သူတို့ကို ဘာမှမလုပ်နိုင်ဘူး။"

"ဒါ... ဒါက..."

မင်ကျုံး ကြောင်အမ်းအမ်း ဖြစ်သွားသည်။ ယခင်က ကျန်းလီသည် အဆင့်များကိုသာ အကြမ်းဖျင်း မိတ်ဆက်ပေးခဲ့ပြီး ထိုအဆင့်များ၏ ဆန်းကြယ်မှုကို မပြောပြခဲ့ပေ။ ခန္ဓာပေါင်းစည်းခြင်းဆိုသည်မှာ ခွန်အားကြီးပြီး မြန်မြန်ပြေးနိုင်ခြင်းလောက်သာ သူ ထင်မှတ်ခဲ့ခြင်း ဖြစ်သည်။ ဘယ်သူက ထင်ပါ့မလဲ။ လက်တွေ့တွင်မူ ဤမျှအထိ ကြောက်စရာကောင်းနေသည် မဟုတ်လား။

ခန္ဓာပေါင်းစည်းခြင်းအဆင့် အထက်၌ အတိဒုက္ခဖြတ်ကျော်ခြင်းနှင့် မဟာယာနအဆင့်များ ရှိသေးသည်။

ကျန်းလီ မည်မျှအထိ သန်မာမလဲဆိုသည်ကို မင်ကျုံးအနေဖြင့် မှန်းဆ၍ပင် မရတော့ပေ။

သူသည် ကျန်းလီ၏ ကြောက်စရာကောင်းမှုကို သိပြီဟု ထင်လိုက်တိုင်း၊ သူ သိရှိလိုက်ရသည်မှာ ကျန်းလီ၏ စွမ်းအား အစအနလေးမျှသာ ဖြစ်နေခြင်းပင်။

ခန္ဓာပေါင်းစည်းခြင်းအဆင့်သည် အမှန်တကယ်ပင် အလွန်သန်မာလှသလို၊ ထိုအဆင့်သို့ ရောက်ရန်လည်း အလွန်ခက်ခဲလှသည်။ သို့မဟုတ်ပါက ဟုန်ချန်းသန့်စင်မြေ၊ ဖုန်လိုင်နတ်ကျွန်းနှင့် ကွန်ဖြူးရှပ်ဂိုဏ်းတို့တွင် အတိဒုက္ခဖြတ်ကျော်ခြင်းအဆင့် မရှိပါဘဲနှင့် ဂိုဏ်းကြီး (၆) ဂိုဏ်းအဖြစ် ဘယ်သူမှ မပြိုင်ရဲဘဲ ရှိနေမည် မဟုတ်ပေ။

အကြောင်းမှာ အခြားဂိုဏ်းများတွင် ခန္ဓာပေါင်းစည်းခြင်းအဆင့် ကျင့်ကြံသူ အရေအတွက် အလွန်နည်းပါးလှသောကြောင့်ဖြစ်သည်။

"ငါ ပြောတာကို မင်း နားလည်လား။"

ကျန်းလီသည် ထိုခန္ဓာပေါင်းစည်းခြင်းအဆင့် သားရဲအား လှမ်း၍ မေးလိုက်သည်။ ပုံမှန်အားဖြင့် မိစ္ဆာသားရဲများသည် ရွှေအမြုတေအဆင့်သို့ ရောက်လျှင် လူသားများနှင့်တန်းတူ ဉာဏ်ရည်ရှိလာကြသည်။ သို့သော် မင်ကျုံးကမူ ဤသားရဲများသည် ဉာဏ်ရည်မရှိသလို ဆက်သွယ်၍လည်း မရဟု ဆိုခဲ့သည်။

ဒါဆို ဒီသားရဲတွေက မိစ္ဆာသားရဲတွေ မဟုတ်ကြဘူးလား?

ထိုသားရဲသည် ကျန်းလီ ပြောသည်ကို နားမလည်ပေ။ သို့သော် လေထဲတွင် ပျံနေသော ကျန်းလီနှင့် မင်ကျုံးကို သတိထားမိသွားသဖြင့် ခုန်အုပ်ရန် ပြင်လိုက်သည်။

"ငါက ကျန်းလီကို မနိုင်ပေမဲ့ မင်းကိုတော့ နိုင်သေးတယ်ဟေ့။"

ယင်ယန်ကောင်းကင်စည်းတံဆိပ်သည် ထိုသားရဲ၏လုပ်ရပ်ကြောင့် ဒေါသထွက်သွားသည်။ ၎င်းသည် ကျိုကျိုး၏ နတ်ဘုရားလက်နက် အကြီးအကဲ ဖြစ်ပါလျက်နှင့် ဤသားရဲက လျစ်လျူရှုထားသောကြောင့် ဖြစ်သည်။ ၎င်းသည် သားရဲ၏ခေါင်းပေါ်သို့ အရှိန်ဖြင့် ဆောင့်ချလိုက်ရာ၊ သားရဲမှာ ခေါင်းမူးသွားပြီး မြေပြင်ပေါ်သို့ လဲကျသွားတော့သည်။

အခြားသော သားရဲများမှာမူ ယင်ယန်ကောင်းကင်စည်းတံဆိပ်၏ တိုက်ခိုက်မှုကို မြင်သော်လည်း အင်အားကွာခြားမှုကို ဂရုမစိုက်ဘဲ ပြေးဝင်လာကြသည်။ ကျန်းလီက ဝတ်ရုံစကို တစ်ချက် ဝှေ့ယမ်းလိုက်ရာ ထိုသားရဲများအားလုံး ပြာအဖြစ် ကြွေလွင့်သွားကြတော့သည်။

ဤခန္ဓာပေါင်းစည်းခြင်းအဆင့် တစ်ကောင်တည်းကိုသာ ချန်ထားခဲ့ပြီး ကျန်သည့် သားရဲများမှာမူ တန်ဖိုးမရှိပေ။

မင်ကျုံးမှာမူ စဉ်းစားခြင်းကို လက်လျှော့လိုက်ပြီဖြစ်သည်။ ကျန်းလီ၏နည်းလမ်းများကို သူ လုံးဝ နားမလည်နိုင်တော့သဖြင့် စိတ်ပင်ပန်းမခံတော့ရန် ဆုံးဖြတ်လိုက်သည်။

လူဆိုသည်မှာ မိမိကိုယ်ကိုယ် ကောင်းကောင်း ဆက်ဆံတတ်ဖို့က အရေးကြီးဆုံး မဟုတ်လား။

သူသည် သမ္မတ ဖြစ်သည်မှာ မှန်သော်လည်း၊ ဤ 'အသိပညာစုဆောင်းခြင်းခေတ်' တွင် သမ္မတ၏ တာဝန်မှာ တစ်ခုတည်းသာ ရှိသည်။ ၎င်းမှာ 'နည်းပညာထုတ်ဖော်ခြင်းခေတ်' သို့ မည်သည့်အချိန်တွင် ကူးပြောင်းမည်ကို ဆုံးဖြတ်ရန် ဖြစ်သည်။

အသိပညာစုဆောင်းခြင်းမှ နည်းပညာထုတ်ဖော်ခြင်းသို့ ကူးပြောင်းမည့် အချိန်ကို တွက်ချက်မှုများဖြင့် မဆုံးဖြတ်ဘဲ၊ စိတ်ခံစားချက်ရှိပြီး အမြော်အမြင်ရှိသော လူသားတစ်ဦး၏ ဆုံးဖြတ်ချက်ဖြင့်သာ လုပ်ဆောင်ရမည်ဟု လူသားများက ယူဆထားကြသည်။ ထို့ကြောင့် ဤခေတ်တွင် စိတ်ခံစားချက်ရှိသော သမ္မတကို ရွေးချယ်ထားခြင်းဖြစ်သည်။

သို့သော် နည်းပညာထုတ်ဖော်ခြင်းမှ အသိပညာစုဆောင်းခြင်းသို့ ပြန်လည်ကူးပြောင်းမည့် အချိန်ကိုမူ တွက်ချက်မှုများဖြင့်သာ ဆုံးဖြတ်လေ့ရှိသည်။ လူသားများ၏ စိတ်ခံစားချက်အရ ထိုရလဒ်ကို လက်ခံရန် ခက်ခဲနိုင်သဖြင့်၊ ထိုခေတ်တွင်မူ စိတ်ခံစားချက်မရှိသော သမ္မတကိုသာ ရွေးချယ်လေ့ရှိသည်။

တံတိုင်းကြီး၏ နောက်ကွယ်ရှိ ကွပ်ကဲမှုရုံးတွင်မူ စစ်ဗိုလ်ချုပ်ကြီးမှာ ဘာလုပ်ရမှန်း မသိဖြစ်နေသည်။ ဗိုလ်ချုပ်ကြီးတင်မကဘဲ စစ်တပ်တစ်ခုလုံးမှာလည်း နောက်ထပ် ဘာလုပ်ရမည်ကို မသိကြပေ။

သူတို့၏တာဝန်မှာ စစ်ဆင်ရေးကို ကွပ်ကဲရန်နှင့် တိုက်ခိုက်ရန် ဖြစ်သည်။

ယခုမူ စစ်မြေပြင်ကြီးမှာ ဟာလာဟင်းလင်းဖြစ်သွားပြီး သားရဲတစ်ကောင်မျှ မကျန်တော့ပေ။ သူတို့က ဘယ်သူ့ကို ကွပ်ကဲပြီး ဘယ်သူနဲ့ တိုက်ရမလဲ? သမ္မတကို သွားတိုက်ရမည်လား?

သူတို့အားလုံး အလုပ်ပြုတ်သွားပြီဟု ခံစားနေကြရသည်။

ကျန်းလီသည် ထိုသားရဲကို ပြန်နိုးလာအောင် လုပ်လိုက်သည်။ သားရဲ နိုးလာသည်နှင့် ကျန်းလီအား ဟိန်းဟောက်တော့သည်။ ကျန်းလီသည် သားရဲ၏ ပတ်ဝန်းကျင်ရှိ နေရာလွတ်ကို အင်အားသုံး၍ ချုပ်နှောင်လိုက်ရာ၊ သားရဲမှာ ဟိန်းဟောက်ရုံသာ တတ်နိုင်ပြီး လှုပ်ပင်မလှုပ်နိုင် ဖြစ်သွားရသည်။

"ထူးဆန်းတဲ့ သားရဲပဲ။ ခန္ဓာပေါင်းစည်းခြင်းအဆင့်အထိ ရောက်နေပြီဖြစ်ပေမဲ့ စိတ်ဝိညာဉ်ဆိုတာ လုံးဝ မရှိဘူး။" ကျန်းလီသည် နတ်ဘုရားအာရုံဖြင့် သားရဲ၏ ခန္ဓာကိုယ် တည်ဆောက်ပုံကို သေသေချာချာ စစ်ဆေးကြည့်လိုက်ရာ၊ ၎င်းမှာ မိစ္ဆာသားရဲ၏ ခန္ဓာကိုယ်ဖြစ်ပြီး အနည်းငယ်မျှသာ ကွဲပြားကြောင်း တွေ့ရှိရသည်။

ယင်ယန်ကောင်းကင်စည်းတံဆိပ်၏ ကံတရားစွမ်းအားမှာ ကျိုကျိုးတွင်သာ အလုပ်ဖြစ်သော်လည်း၊ အရာရာကို အသိဉာဏ်ပွင့်စေသည့် အစွမ်းမှာမူ ရှိနေဆဲ ဖြစ်သည်။ ၎င်းသည် သားရဲအား အသိဉာဏ်ပေးရန် ကြိုးစားသော်လည်း သားရဲမှာ မည်သည့် ပြောင်းလဲမှုမျှ မရှိပေ။

"ဟင်? ငါ့ရဲ့ အစွမ်းတွေက အလုပ်မလုပ်တော့တာလား။"

ယင်ယန်ကောင်းကင်စည်းတံဆိပ်မှာ နားမလည်နိုင် ဖြစ်သွားသည်။ ခုနက နေတုဗုံး ပေါက်ကွဲထားသဖြင့် ပတ်ဝန်းကျင်တွင် ဘာမှမရှိရာ၊ ၎င်းသည် မင်ကျုံး ဝတ်ထားသော ငွေဖြူရောင် ဝတ်စုံကိုသာ အသိဉာဏ် ပေးလိုက်မိသည်။

"ငါ ဘာလို့ အဝတ်အစားမပါဘဲ ဖြစ်နေတာလဲ။ ပြီးတော့ ဘာလို့ နှာဘူးကောင်ကြီးက ငါ့ကို လာကပ်နေရတာလဲ။"

ငွေဖြူရောင် ဝတ်စုံသည် စူးစူးဝါးဝါး အော်ဟစ်လိုက်သည်။ မင်ကျုံးသည် အဝတ်မပါဘဲ မိမိနှင့် ထိတွေ့နေသည်မှာ နှာဘူးကောင်တစ်ဦးဟု ယူဆကာ မင်ကျုံး၏ ကိုယ်ပေါ်မှ အလျင်အမြန် ခွာလိုက်တော့သည်။

"ငါ့အစွမ်းက အလုပ်လုပ်သားပဲ?" ယင်ယန်ကောင်းကင်စည်းတံဆိပ်မှာ ဇဝေဇဝါ ဖြစ်နေဆဲပင်။

မင်ကျုံးမှာမူ အဝတ်အစားများ မရှိတော့သဖြင့် လေထဲတွင် တုန်ရီနေပြီး ယင်ယန်ကောင်းကင်စည်းတံဆိပ်ကို စိတ်ပျက်စွာ စိုက်ကြည့်နေမိသည်။

ယင်ယန်ကောင်းကင်စည်းတံဆိပ်သည် အလျင်အမြန်ပင် အားနာဟန်ပြကာ ဝတ်စုံကို ပုံမှန်ပြန်ဖြစ်အောင် လုပ်ပေးလိုက်သည်။

မင်ကျုံးသည် ဝတ်စုံကို ပြန်ဝတ်လိုက်သော်လည်း၊ မိမိ၏ဝတ်စုံက မိန်းကလေးသံဖြင့် အော်ဟစ်ခဲ့သည်ကို ပြန်စဉ်းစားမိတိုင်း တစ်ကိုယ်လုံး နေရထိုင်ရ ခက်နေတော့သည်။

ကျန်းလီသည် ထိုသားရဲကို အချိန်အတော်ကြာ စိုက်ကြည့်နေပြီးနောက် မျက်မှောင်များ ပိုမို ကြုံ့လာကာ တိုးတိုးလေး ရေရွတ်လိုက်သည်။

"ဒါ... မဖြစ်နိုင်တာ..."

သူသည် ထူးထူးခြားခြား ဝေခွဲမရ ဖြစ်သွားပြီး၊ အဝေးရောက် ဆက်သွယ်ရေး အဆောင်စာရွက်ဖြင့် ပိုင်ဟုန်ထူကို လှမ်း၍ ခေါ်လိုက်လေတော့သည်။

***

wunzinnosp

မဟာယာနအဆင့်ရောက်မှ စနစ်က ပေါ်လာသတဲ့

အခန်း ၆၂ ။ နယ်ပယ်ပြင်ပ နတ်ဆိုးများ ချန်ထားခဲ့သော ခြေရာများ

"ဘာလဲ... ငါ့ကို လွမ်းပြန်ပြီလား။ ဟော... ယင်ယန်ကောင်းကင်စည်းတံဆိပ်ကို ရှာတွေ့သွားပြီလား။"

"အခုက နောက်နေရမယ့် အချိန်မဟုတ်ဘူး။ ဒီမိစ္ဆာသားရဲကို တစ်ချက်ကြည့်ပေးဦး၊ ဘာပြဿနာရှိနေလဲ။"

ကျန်းလီသည် အလွန်တည်ကြည်လေးနက်နေသည်ကို မြင်သောအခါ၊ ပိုင်ဟုန်ထူသည်လည်း နောက်ပြောင်ခြင်းမပြုတော့ဘဲ ကျန်းလီပြောသည့်အတိုင်း သားရဲကို စတင်လေ့လာတော့သည်။

ပိုင်ဟုန်ထူ၏ နတ်ဘုရားအာရုံသည် အဝေးရောက် ဆက်သွယ်ရေး အဆောင်စာရွက်မှတစ်ဆင့် ဖြတ်ကျော်မလာနိုင်သဖြင့် မျက်စိဖြင့်သာ ကြည့်ရှုရသည်။ ပိုင်ဟုန်ထူ သေသေချာချာ မြင်နိုင်စေရန်အတွက် ကျန်းလီသည် ရူးသွပ်နေသော သားရဲ၏နဖူးကို လက်ဖြင့် တစ်ချက်တို့လိုက်ရာ၊ 'ခန္ဓာနှင့် ပုံသဏ္ဌာန် ပေါင်းစည်းခြင်း' အဆင့်ရှိသော သားရဲသည် မရေမတွက်နိုင်သော အမှုန်အမွှားများအဖြစ် ပြိုကွဲသွားပြီး ပတ်ဝန်းကျင်သို့ ပြန့်နှံ့သွားခဲ့သည်။

ပိုင်ဟုန်ထူ၏ ပုံရိပ်ယောင်သည် ထိုအမှုန်အမွှားများကို ဝန်းရံကြည့်ရှုလိုက်သည်။

"ဒါက... နယ်ပယ်ပြင်ပ နတ်ဆိုးတွေ ချန်ထားခဲ့တဲ့ ခြေရာတွေပဲ မဟုတ်လား။"

ပိုင်ဟုန်ထူ မျက်လုံးပြူးသွားသည်။ သူကိုယ်တိုင်လည်း မိမိ၏ ခန့်မှန်းချက်ကို မယုံကြည်နိုင်ဘဲ ရှိနေသော်လည်း၊ အချို့သော ခြေရာများမှာ နယ်ပယ်ပြင်ပ နတ်ဆိုးများ၏ လက်ချက်နှင့် အလွန်တူလွန်းနေသည်။

ယခင်က နယ်ပယ်ပြင်ပ နတ်ဆိုးတစ်ပါးသည် 'နတ်ဆိုးခန္ဓာ ပြိုကွဲခြင်း' အတတ်ကို အသုံးပြု၍ မြို့တစ်မြို့လုံးကို ညစ်ညမ်းစေခဲ့ဖူးသည်။ ညစ်ညမ်းခြင်းခံရသူများသည် အသိဉာဏ်များ ပျောက်ဆုံးကာ ရူးသွပ်သွားကြပြီး၊ အကိုက်ခံရသူများသည်လည်း အသိဉာဏ်မဲ့သော ကူးစက်ခံရသူအသစ်များ ဖြစ်လာကြသည်။

တည်ဆောက်ပုံအရကြည့်လျှင် ဤသားရဲသည် အခြားသက်ရှိများကို ကူးစက်စေခြင်း မရှိသော်လည်း၊ အသိဉာဏ်မရှိဘဲ ဗီဇစိတ်အတိုင်းသာ လှုပ်ရှားနေခြင်းမှာ ထိုစဉ်က နတ်ဆိုးများ၏ လက်ရာနှင့် အလွန်ပင် ဆင်တူလှပေသည်။

"ငါတို့နှစ်ယောက်လုံးရဲ့ ကောက်ချက်က တူနေတာပဲ။ ဒါဟာ နယ်ပယ်ပြင်ပ နတ်ဆိုးတွေရဲ့ ပယောဂဆိုတာ သေချာသလောက် ရှိနေပြီ။" ဟု ကျန်းလီက ဆိုသည်။

"ဒီကမ္ဘာက ဒီလောက်တောင် သန်မာတာလား။ နယ်ပယ်ပြင်ပ နတ်ဆိုးတွေ ရှိနေတာတောင် အသိမ်းပိုက်မခံရသေးဘူးပေါ့။" ပိုင်ဟုန်ထူမှာ အလွန်ပင် အံ့သြနေရသည်။ လူသားဧကရာဇ်၊ ယုံကြည်မှုစွမ်းအား၊ နတ်ဘုရားလက်နက်နှင့် အတိဒုက္ခဖြတ်ကျော်ခြင်းအဆင့် ပုဂ္ဂိုလ်ကြီးများ စသဖြင့် ကျိုကျိုးတိုက်ကြီးသည် အစွမ်းကုန် ရုန်းကန်ပြီးမှသာ နတ်ဆိုးများကို ခဲယဉ်းစွာ တားဆီးထားနိုင်ခြင်း ဖြစ်သည်။

ကျိုကျိုးသည် နတ်ဘုရားဘုံအောက်တွင် အင်အားအကြီးဆုံး ကမ္ဘာတစ်ခု ဖြစ်သည်။ ဤကမ္ဘာမှာ ကြည့်ရသည်မှာ ထိုမျှအထိ မသန်မာပါဘဲနှင့် နယ်ပယ်ပြင်ပ နတ်ဆိုးများကို ဘယ်လိုများ တားဆီးနိုင်ရတာလဲ။ ပိုင်ဟုန်ထူသည် ဤကမ္ဘာကို လျှော့မတွက်ဝံ့တော့ဘဲ လေးစားမိသွားသည်။

ပိုင်ဟုန်ထူသည် မင်ကျုံးကို မြင်သောအခါ ဤကမ္ဘာ၏ လူသားဖြစ်မှန်း သိသဖြင့် သူ့အားလည်း လေးစားသော အကြည့်ဖြင့် ကြည့်လိုက်သည်။ မင်ကျုံးမှာမူ ပိုင်ဟုန်ထူ၏ ပုံရိပ်ယောင်က သူ့အား စိုက်ကြည့်နေသဖြင့် အနေရခက်နေရရှာသည်။ ဤလူသည် မိမိအပေါ် တစ်ခုခု အထင်မှားနေသည်ဟု သူ ခံစားနေရသည်။

"ဒါက တကယ်ကို ထူးဆန်းတဲ့ အချက်ပဲ။ နယ်ပယ်ပြင်ပ နတ်ဆိုးတွေက သားရဲတွေကိုပဲ လက်စွဲပြီး လူသားတွေကို တိုက်ခိုက်ခိုင်းနေပုံရတယ်။ သူတို့ကိုယ်တိုင် တိုက်ရိုက် လာတိုက်တာမျိုး မရှိဘူး။"

"မိတ်ဆက်ပေးပါရစေ။ ဒါက ဒီကမ္ဘာရဲ့ လူသားခေါင်းဆောင် သမ္မတ ၅၀၆ ပါ၊ သူ့ကို 'မင်ကျုံး' လို့ ခေါ်နိုင်တယ်။"

"ဒါကတော့ တာအိုဂိုဏ်းချုပ် ပိုင်ဟုန်ထူပဲ၊ အတိဒုက္ခဖြတ်ကျော်ခြင်းအဆင့် ကျင့်ကြံသူပေါ့။" ကျန်းလီက နှစ်ဦးနှစ်ဖက်ကို မိတ်ဆက်ပေးလိုက်သည်။

"မင်္ဂလာပါ။"

"ဂိုဏ်းချုပ်ပိုင်... မင်္ဂလာပါ။"

မင်ကျုံးသည် ပိုင်ဟုန်ထူအား အလွန်ကြည်ညိုသော အကြည့်ဖြင့် ကြည့်နေသဖြင့် ပိုင်ဟုန်ထူမှာ နားမလည်နိုင် ဖြစ်နေရသည်။

"မင်ကျုံး ပြောပြချက်အရတော့... ဒါဟာ သူတို့ ကြုံဖူးသမျှ အသန်မာဆုံး သားရဲပဲတဲ့။ ခုလေးတင် အဆင့်တက်ထားတာ ဖြစ်ရမယ်၊ အရင်က မတွေ့ဖူးဘူးတဲ့။ နယ်ပယ်ပြင်ပ နတ်ဆိုးဆိုတဲ့ ခြိမ်းခြောက်မှုမျိုးကိုတော့ သူတို့ တစ်ခါမှ မကြားဖူးဘူး။"

"ဘာ... ခန္ဓာပေါင်းစည်းခြင်းအဆင့်က အသန်မာဆုံး ဟုတ်လား။" ပိုင်ဟုန်ထူမှာ ကြောင်အသွားသည်။ နယ်ပယ်ပြင်ပ နတ်ဆိုးတွေ ဘာလုပ်နေကြတာလဲ။ ခန္ဓာပေါင်းစည်းခြင်းအဆင့်လောက်နဲ့ ကမ္ဘာတစ်ခုကို သိမ်းပိုက်ဖို့ ကြံနေတာလား။ ဒီလိုအဆင့်မျိုးသာ ကျိုကျိုးကိုလာရင်၊ တာအိုဂိုဏ်းက အဲ့ဒီနေ့မှာတင် 'သားရဲပေါင်းစုံ ဟော့ပေါ့' စားပစ်မှာ သေချာသည်။

သူသည် မင်ကျုံး၏ ထူးဆန်းသော မျက်နှာပေးကို မြင်လိုက်ရသောအခါမှ၊ ကျိုကျိုးအတွက် ဘာမှမဟုတ်သော အရာသည် ဤကမ္ဘာအတွက်မူ ကြီးမားသော ခြိမ်းခြောက်မှုဖြစ်မှန်း သတိပြုမိသွားသည်။

"ဪ... ငါပြောချင်တာက ခန္ဓာပေါင်းစည်းခြင်းအဆင့်ဆိုတာလည်း တော်တော်လေး သန်မာပါတယ်လို့။" ပိုင်ဟုန်ထူသည် အလျင်အမြန်ပင် ပြန်၍ ဖာထေးလိုက်ရသည်။

အကယ်၍ တစ်ဖက်လူမှာ အတိဒုက္ခဖြတ်ကျော်ခြင်းအဆင့်ရှိ ပုဂ္ဂိုလ်ကြီးမှန်း မသိလျှင် မင်ကျုံးသည် ထိုစကားကို ယုံကြည်မိပေလိမ့်မည်။ သို့သော် အခုတော့ သူ သိနေပြီ မဟုတ်လား။ အတိဒုက္ခဖြတ်ကျော်ခြင်းအဆင့်က ခန္ဓာပေါင်းစည်းခြင်းကို သန်မာပါတယ်လို့ ပြောတာက လိမ်နေတာ သိသာလွန်းလှသည် မဟုတ်လား။ ၎င်းမှာ ပို၍ပင် အရှက်ရစရာ ကောင်းနေတော့သည်။

မင်ကျုံးသည် ယခုအချိန်တွင် မိမိ၌ စိတ်ခံစားချက်မရှိလျှင် ပိုကောင်းမည်ဟု တွေးနေမိသည်။ သို့မှသာ ဤကဲ့သို့ အရှက်ရခြင်းမှ ကင်းဝေးပေလိမ့်မည်။

"နောက်ထပ် သိထားရမယ့် ကိစ္စတစ်ခုကတော့... ယင်ယန်ကောင်းကင်စည်းတံဆိပ်က ဒီကမ္ဘာမှာ တာအိုဘိုးဘေးရဲ့ ကံတရားတွေကို ခံစားနေရတယ်တဲ့။ သူ ကိုယ်တိုင် ဒီမှာ ရှိနေနိုင်တယ်လို့ ယူဆရတယ်။"

"ဘိုးဘေးက ဒီမှာရှိနေတာလား။" ပိုင်ဟုန်ထူသည် ဝမ်းသာအားရ မေးလိုက်ပြီး သူ့မျက်လုံးများမှာ ဝင်းလက်သွားသည်။ ၎င်းမှာ တာအိုဂိုဏ်းအတွက် မမျှော်လင့်ဘဲရရှိသော သတင်းကောင်းကြီးပင် ဖြစ်သည်။

"လောလောဆယ်တော့ ဘာခြေရာမှ မတွေ့သေးဘူး။ ဒါပေမဲ့ ယင်ယန်ကောင်းကင်စည်းတံဆိပ်ရဲ့ အာရုံခံစားမှုကတော့ မမှားနိုင်ဘူး။"

"မင်း ဘယ်လို ထင်လဲ။" ပိုင်ဟုန်ထူသည် စိတ်အေးအေးထားကာ မေးလိုက်သည်။ မဟာယာနအဆင့် ပုဂ္ဂိုလ်တစ်ဦး ဤကမ္ဘာသို့ ရောက်လာသည်ကို ဘိုးဘေးက မသိဘဲ မနေပေ။ သို့သော် အခုထိ ပေါ်မလာသေးခြင်းမှာ ဘိုးဘေးတွင် တစ်ခုခုဖြစ်နေခြင်းကြောင့်သာ ဖြစ်ရမည်။

"ငါ ထင်တာကတော့... တာအိုဘိုးဘေးဟာ နယ်ပယ်ပြင်ပ နတ်ဆိုးတွေနဲ့ ရင်ဆိုင်နေရလို့ ငါတို့ဆီကို မလာနိုင်တာ ဖြစ်ရမယ်။" ဤနေရာတွင် နတ်ဆိုးများ၏ခြေရာကို တွေ့ရှိပြီးနောက် ကျန်းလီက အသစ်တစ်ဖန် ခန့်မှန်းလိုက်ခြင်းဖြစ်သည်။

"ဒါဆိုရင်တော့ မင်းပဲ အပင်ပန်းခံပေးပါဦး။" ပိုင်ဟုန်ထူက လေးနက်စွာ ပြောဆိုသည်။ သူသည် ဤကိစ္စတွင် ကူညီနိုင်စွမ်းမရှိသဖြင့် ကျန်းလီကိုသာ အားကိုးရတော့မည် ဖြစ်သည်။

ဆက်သွယ်ရေးကို ဖြတ်တောက်ပြီးနောက်၊ ကျန်းလီသည် မိမိ၏ခြေဖျားကိုသာ ငုံ့ကြည့်နေသော မင်ကျုံးအား လှည့်၍ မေးလိုက်သည်။ "သားရဲဆိုးတွေက ဒီတစ်နေရာတည်းမှာပဲ ရှိတာလား။"

"မဟုတ်ပါဘူး၊ ဒါက အစိတ်အပိုင်းတစ်ခုပဲ ရှိပါသေးတယ်။ ကျန်တာတွေက သူတို့ရဲ့ နယ်မြေထဲမှာ လှုပ်ရှားနေကြတာပါ။" မင်ကျုံးသည် လူသားတို့၏နယ်မြေနှင့် ဆန့်ကျင်ဘက်အရပ်ကို ညွှန်ပြလိုက်သည်။ "ဒါပေမဲ့ ဟိုဘက်က အခြေအနေကိုတော့ ကျွန်တော် သေချာမသိဘူး။ မိစ္ဆာသားရဲနယ်မြေကို သွားစူးစမ်းတဲ့ စက်ရုပ်တွေ အကုန်လုံး အဖျက်ဆီးခံရလို့ သတင်းအချက်အလက် နည်းနည်းပဲ ရတာပါ။"

မင်ကျုံးသည်လည်း သားရဲဆိုးများကို ကျန်းလီတို့ကဲ့သို့ 'မိစ္ဆာသားရဲ' ဟု ပြောင်းလဲခေါ်ဆိုနေပြီ ဖြစ်သည်။

ကျန်းလီက ခေါင်းညိတ်ပြသည်။ "သွားကြစို့၊ ဟိုဘက်ကို သွားကြည့်ရအောင်။"

မိစ္ဆာသားရဲတို့၏ နယ်မြေမှာ လူသားတို့၏ နယ်မြေနှင့် လုံးဝ ကွဲပြားခြားနားလှသည်။ မီတာ ရာနှင့်ချီ မြင့်သော ရှေးဟောင်းသစ်ပင်ကြီးများကို နေရာတိုင်းတွင် တွေ့မြင်ရပြီး၊ သစ်ပင်ပေါ်၌ သားရဲများ ပုန်းခိုနေကာ အချင်းချင်း ချောင်းမြောင်း တိုက်ခိုက်နေကြသည်။ သိသာလှသည်မှာ ကျန်းလီတို့ အုပ်စုကို မြင်သောအခါတွင်လည်း ၎င်းတို့သည် ချောင်းမြောင်း တိုက်ခိုက်ရန် ပြင်ကြတော့သည်။

ထိုသားရဲများမှာ သနားစရာကောင်းလောက်အောင် သေဆုံးသွားကြရရှာသည်။ အားလုံးကို ပေါင်းလိုက်လျှင်ပင် အလောင်းတစ်ခုစာ ပြည့်ရန် မလွယ်ကူပေ။

ကျန်းလီက သားရဲ တစ်ကောင်ကို သတ်လိုက်တိုင်း၊ မင်ကျုံးက ဘေးကနေ တစ်ခါ ရယ်မောလိုက်သည်။ လမ်းတစ်လျှောက်လုံး သူ့ပါးစပ်မှာ ပိတ်မရဘဲ အသံပင် ဝင်သွားရတော့သည်။

လမ်းခရီးတွင် ခန္ဓာပေါင်းစည်းခြင်းအဆင့် သားရဲအချို့ကိုလည်း တွေ့ရှိခဲ့ရသည်။ မင်ကျုံးသည် ယခုမှပင် သားရဲများသည် လူသားများ လိုက်မမီနိုင်လောက်အောင် ဆင့်ကဲပြောင်းလဲနေမှန်း သိလိုက်ရတော့သည်။ အကယ်၍ ကျန်းလီသာ ရောက်မလာခဲ့ပါက၊ နောက်ထပ် နှစ်ပေါင်း ရာဂဏန်းအတွင်း၌ လူသားမျိုးနွယ်မှာ သားရဲများ၏ သတ်ဖြတ်ခြင်းကို ခံရကာ မျိုးတုန်းသွားပေလိမ့်မည်။

သေချာသည်မှာ မည်သည့်အရာက ဝိညာဉ်အသွင်ပြောင်းခြင်း ဖြစ်ပြီး၊ မည်သည့်အရာက ခန္ဓာပေါင်းစည်းခြင်းဖြစ်မှန်း သူ မခွဲခြားတတ်ပေ။ ယင်ယန်ကောင်းကင်စည်းတံဆိပ်ကသာ သူ့အား ပြောပြပေးနေခြင်းဖြစ်သည်။

မင်ကျုံးသည် ယခုမှပင် မျက်စိပွင့်သွားရသည်။ လူသားများ မသိရှိသေးသော သားရဲအမျိုးအစားပေါင်း များစွာ ရှိနေသေးသည် မဟုတ်လား။ သူတို့ အပင်ပန်းခံ သုတေသန လုပ်ခဲ့သော သားရဲများမှာ အလွန်ပင် နည်းပါးလှသေးသည်။

"သားရဲအားလုံးကို နယ်ပယ်ပြင်ပ နတ်ဆိုးတွေက လက်စွဲထားတာပဲ။" ကျန်းလီသည် သားရဲများစွာကို စစ်ဆေးကြည့်ပြီးနောက် ကောက်ချက်ချလိုက်သည်။ ၎င်းတို့အားလုံးမှာ အသိဉာဏ်မရှိဘဲ ဗီဇစိတ်ဖြင့်သာ လှုပ်ရှားနေကြပြီး၊ ခန္ဓာကိုယ်အတွင်း၌ နတ်ဆိုးများ၏ ကူးစက်ခြင်း ခံထားရသော ခြေရာများ ရှိနေကြသည်။

မိစ္ဆာသားရဲတို့၏နယ်မြေမှာ အလွန်ပင် ကျယ်ပြောလှသဖြင့်၊ သားရဲအများစုမှာ ကုန်းမြေ၏ တစ်ဖက်ခြမ်းတွင် လူသားများ ရှိနေသည်ကိုပင် မသိကြပေ။ မင်ကျုံးတို့ နှစ်ပေါင်း ထောင်ချီ ခုခံလာခဲ့သော သားရဲများမှာ သားရဲလောက၏ အားအနည်းဆုံး အစိတ်အပိုင်းဖြစ်ပြီး၊ အခြားသားရဲများ၏ မောင်းထုတ်ခြင်း ခံထားရသူများသာ ဖြစ်သည်။

သို့သော် အတိဒုက္ခဖြတ်ကျော်ခြင်းအဆင့်အထိ ရောက်ရှိသော သားရဲတစ်ကောင်မျှ မရှိသေးပေ။ ထိုအဆင့်မှာ သွေးမျိုးရိုး အစွမ်းတစ်ခုတည်းဖြင့် ရောက်ရှိနိုင်သော အဆင့် မဟုတ်ဘဲ၊ ကောင်းကင်တာအိုကို နက်နက်ရှိုင်းရှိုင်း နားလည်သဘောပေါက်ရန်နှင့် အခြားသော အချက်အလက်များစွာ လိုအပ်သည်။ အသိဉာဏ်မရှိသော ဤသားရဲများမှာ ထိုအဆင့်သို့ တက်လှမ်းနိုင်ရန် လုံးဝ မဖြစ်နိုင်ပေ။

"ဝိညာဉ်စွမ်းအား သိပ်သည်းဆက ပိုပိုများလာတယ်လို့ မင်း မခံစားရဘူးလား။" ယင်ယန်ကောင်းကင်စည်းတံဆိပ်က မေးလိုက်သည်။

"ဟုတ်တယ်။" ကျန်းလီသည် ဤနေရာရှိ ဝိညာဉ်စွမ်းအား သိပ်သည်းဆမှာ ကျိုကျိုးတိုက်ကြီးနှင့်ပင် ယှဉ်နိုင်နေပြီဖြစ်ကြောင်း သတိပြုမိလိုက်သည်။ အကယ်၍ ဤသားရဲများသာ အသိဉာဏ်ရှိကြပါက၊ အတိဒုက္ခဖြတ်ကျော်ခြင်း အဆင့် သားရဲ အချို့ ပေါ်ထွက်လာခြင်းမှာ မဆန်းတော့ပေ။

"ရပ်လိုက်။" ကျန်းလီက ရုတ်တရက် အော်ပြောလိုက်သည်။

"ဘာဖြစ်လို့လဲ။" ယင်ယန်ကောင်းကင်စည်းတံဆိပ်သည် ရှေ့ဆက်မတိုးတော့ဘဲ ရပ်လိုက်သည်။

"ရှေ့နားမှာ အန္တရာယ်ရှိနိုင်တယ်။"

ကျန်းလီသည် မျက်မှောင်ကြုတ်လိုက်သည်။ သူ၏ နတ်ဘုရားအာရုံက ကီလိုမီတာ ရာနှင့်ချီသော အကွာအဝေး၌ နတ်ဘုရားအဆင့်သို့ ရောက်ရှိနေပုံရသော သားရဲတစ်ကောင်ကို လှမ်းမြင်လိုက်ရသောကြောင့် ဖြစ်သည်။

သို့သော် အသိဉာဏ်မရှိသော သားရဲတစ်ကောင်သည် အတိဒုက္ခဖြတ်ကျော်ခြင်းအဆင့်သို့ပင် မရောက်နိုင်ပါဘဲနှင့်၊ ဘယ်လိုလုပ်ပြီး နတ်ဘုရား ဖြစ်နိုင်ပါ့မလဲ။

ထို့ပြင်... နတ်ဘုရားဘုံလှေကားကော ဘယ်မှာလဲ။

ဒီကမ္ဘာမှာ နတ်ဘုရားဘုံလှေကား ရှိနေတာလား။