အခန်း (၁-၂)

စာစဉ်မိတ်ဆက်

အထွတ်အမြတ် တောင်ကြားလို့ ခေါ်တဲ့ တောင်ကြားလေးမှာ နေ့တဲ့ ဝေ့ရှီလင်းတုန်း ဆိုတဲ့ ကောင်လေး တစ်ယောက် ရှိပါတယ်။ အဲဒီက လောကကြီးမှာ လူတိုင်းဟာ မာဒြာလို့ ခေါ်တဲ့ မှော်စွမ်းအင်ကို သုံးနိုင်ပေမဲ့ လင်းတုန်းကတော့ ဝိညာဉ်မဲ့ အနေနဲ့ မွေးဖွားလာခဲ့ပါတယ်။

ဒါပေမဲ့ တစ်နေ့မှာ သူတို့တောင်ကြားကြီး တစ်စစီ ပျက်စီးသွားမယ့် အနာဂတ်ကို သူ ကြိုမြင်လိုက်ရပါတယ်။ အဲဒီ အခါမှာ သူ့ရဲ့ မိသားစုနဲ့ အိမ်ကို ကယ်တင်ဖို့ အတွက် အင်မတန် ကြမ်တမ်းပြီး အန္တရာယ်များတဲ့ ပြင်ပကမ္ဘာကြီးထဲကို ထွက်ခဲ့ပါတယ်။

…

ဘာသာပြန် အမှာစာ

နတ်ဘုရားပုခက်ဟာ

(၁) မြို့ပြနတ်ဘုရား (ချန်းပေ့ရွှမ်း) - မူယင်းထိ

(၂) အမွေခံအပြစ်သား (ဝေ့ဝူယင်) - ဘာသာပြန်ဆဲ

(၃) မိစ္ဆာနတ်ဘုရား၏ လက်ပါးစေ (လင်ကျဲ) - စဆုံး

ပြီးရင် ကျွန်တော့်ရဲ့ လေးအုပ်မြောက် စာစဉ်ပါ။ ဒါပေမဲ့ ကျွန်တော် ဘာသာပြန်ခဲ့တဲ့ စာအုပ်တွေထဲမှာ quality အကောင်းဆုံး၊ စိတ်ကျေနပ်မှု အရှိဆုံး စာအုပ်ပါ။

မူယင်းနာမည်က The Cradle ပါ။ နတ်ဘုရားပုခက်လို့ နာမည် ပေးဖြစ်ပါတယ်။

The Cradle က Western မှာ အတော်လေး နာမည်ကြီးပါတယ်။ ရေးတဲ့သူက Will Wight အမေရိကန် စိတ်ကူးယဉ် စာရေးဆရာ။ ဒီစာအုပ်က New York Times ရဲ့ Bestseller ဖြစ်ဖူးပြီး Amazon Kindle Store မှာ အထူးအောင်မြင်ခဲ့ပြီးတော့ Bestseller နံပါတ် (၁) နေရာတွေကို အကြိမ်ကြိမ် ယူနိုင်ခဲ့တဲ့ စာအုပ်ပါ။ စုစုပေါင်း (၁၂) အုပ် ထွက်ရှိထားပြီးတော့ အစအဆုံးလည်း ပြီးဆုံးသွားပါပြီ။ ကျွန်တော့်နှုန်းနဲ့ဆို အုပ် ၅၀ လောက်ထိ သွားပါလိမ့်မယ်။

ကျွန်တော် ဒီစာအုပ် အတွက် ပရောဂျက်ကို ၂၀၂၅၊ အောက်တိုဘာလောက်တည်းက တဖြည်းဖြည်းချင်း အစပျိုးနေခဲ့တယ်လို့ ပြောလို့ရပါတယ်။ အရမ်းကောင်းတဲ့ စာအုပ်ကို quality အကောင်းဆုံး ‌ဖြစ်စေချင်တဲ့ အတွက်ပါ။ ဖတ်မယ့် ပရိသတ်တွေ အတွက် အကောင်းဆုံး ကြိုးစားထားပါတယ်။ ဒီစာအုပ်ကို ဘာသာပြန်နိုင်ဖို့ အဘက်ဘက်က ကူညီပေးခဲ့တဲ့ ဆရာနေ ကိုလည်း ဒီနေရာကနေ ကျေးဇူးတင်လိုက်ပါတယ်။

နေး(ရိုးရာ)

အပိုင်း (၁)

အထွတ်အမြတ် တောင်ကြားရှိ ကလန်များသည် သူတို့ ကလေးငယ်များ၏ ဝိညာဉ်များကို တစ်နှစ်လျှင် နှစ်ကြိမ်တိုင်တိုင် စမ်းသပ်လေ့ရှိကြသည်။ အသက် ခြောက်နှစ်၊ ခုနစ်နှစ်၊ ရှစ်နှစ်အရွယ် ယောကျ်ားလေးများနှင့် မိန်းကလေးများသည် ကလန် အကြီးအကဲများ၏ ရှေ့မှောက်တွင် တန်းစီရပ်နေကြသည်။

ထိုကလေးငယ်များသည် သူတို့နှင့် မလိုက်ဖက်လှသော ဝတ်စုံကြီးများကို ဝတ်ဆင်ထားကြ၏။ ယောကျ်ားလေးများသည် အရောင်ဖျော့ဖျော့ ဝတ်ရုံထပ်များကို ဝတ်ဆင်ထားပြီး၊ မိန်းကလေးများမှာမူ ရှုပ်ထွေးနက်နဲသော ပိုးသားပဝါများကို ရစ်ပတ်ထားကြသည်။ မိဘများကမူ ကလေးငယ်များ၏ ဝိညာဉ် ပေါ်လွင်လာမည့်အချိန်ကို သိရှိရန် စိုးရိမ်တကြီးဖြင့် အနီးအနားရှိ နံရံများဘေးတွင် တန်းစီစောင့်ဆိုင်းနေကြသည်။

ကလေးငယ်များသည် ကလန်၏ ပထမ အကြီးအကဲရှေ့သို့ တစ်ယောက်ပြီးတစ်ယောက် တက်လှမ်းသွားကြသည်။

ပထမ အကြီးအကဲသည် ထမင်းစားပန်းကန်ပြားထက် နှစ်ဆခန့်ကျယ်သော ဇလုံတိမ်တိမ်လေးတစ်ခုကို ကိုင်ဆောင်ထား၏။ ထိုဇလုံထဲတွင် ငြိမ်သက်နေသော ရေများသာ ရှိသည်။ သို့သော် ထိုအရာသည် ရိုးရိုးရေမဟုတ်ကြောင်း မိဘများက သိထားကြသည်။ ၎င်းမှာ "မာဒြာ" ဟုခေါ်သော စစ်ထုတ်သန့်စင်ထားသည့် ဝိညာဉ်၏ အကြမ်းထည် စွမ်းအားဖြစ်သည်။ ဝိညာဉ်များကို ဖန်တီးဖွဲ့စည်းထားသည့် မူလအရာဝတ္ထုပင် ဖြစ်ပေသည်။

တန်းစီနေသည့်အထဲမှ ပထမဆုံး မိန်းကလေးသည် ဇလုံထဲသို့ သူမ၏ လက်ကို နှစ်ချလိုက်ရာ အလွန်အေးစက်လှသော အထိအတွေ့ကြောင့် လန့်ဖျပ်သွားသည်။ သူမ၏ အမြုတေထဲမှ တစ်ခါမှ မခံစားဖူးသော အရာတစ်ခု စီးဆင်းသွားပြီးနောက် အရည်များ ပြောင်းလဲသွားလေသည်။

မာဒြာများသည် သူမ၏ လက်တွင် ကပ်ငြိသွားကာ လက်ချောင်းများကို လက်အိတ်အကျပ်တစ်ခုကဲ့သို့ ရစ်ပတ်သွားလေသည်။ ပထမ အကြီးအကဲသည် ပြုံးလိုက်ပြီး သူမအား 'ဒိုင်း' ပုံစံ အမှတ်အသားပါသော သစ်သားတံဆိပ်ပြားတစ်ခုကို ပေးအပ်လိုက်ကာ သူမ၏ ဝိညာဉ်သဘာဝကို ကြေညာလိုက်သည်။

သူမတွင် 'ကာကွယ်သူ'၊ အစောင့်အရှောက် တစ်ဦး၏ ဝိညာဉ်ရှိပြီး ကလန်ကို ကာကွယ်ရန်အတွက် သူမ၏ ကြီးမားသော ခွန်အားကို အသုံးပြုရမည်ဖြစ်သည်။

မိန်းကလေးငယ် မိဘများထံ ပြန်သွားစဉ် မာဒြာများသည် ဇလုံထဲသို့ ပြန်လည်ရောက်ရှိသွားသည်။ သူမသည် တံဆိပ်ပြားလေးကို ကိုင်ဆောင်သွားလေသည်။

နောက်ယောကျ်ားလေးတစ်ယောက်၏ လက်မှမူ ရေများသည် သူ၏ တည်ရှိမှုက တွန်းထုတ်လိုက်သကဲ့သို့ ရှောင်ဖယ်သွားကြသည်။ ထိုကောင်လေးသည် စမ်းသပ်မှုကို ကျရှုံးသွားပြီဟု ထင်မှတ်ကာ ထိတ်လန့်တကြားဖြင့် ပထမ အကြီးအကဲကို ကြည့်လိုက်သော်လည်း ဤနေရာတွင် ကျရှုံးခြင်းဟူသည် မရှိပေ။ သူသည် 'မြှား' ပုံစံ အမှတ်အသားပါသော သစ်သားတံဆိပ်ပြားတစ်ခုကို ရရှိသွားသည်။

တန်းစီနေသော ကလေးငယ်တစ်ဦးစီတိုင်းသည် ရေကပ်ငြိခြင်း၊ ရေရှောင်ဖယ်သွားခြင်း၊ ရေမြင့်တက်လာခြင်း သို့မဟုတ် ရေခဲသွားခြင်း ဟူသော တုံ့ပြန်မှု လေးမျိုးထဲမှ တစ်ခုကို ကြုံတွေ့ရသည်။

သူတို့သည် ထိုတုံ့ပြန်မှုများအလိုက် တံဆိပ်ပြားများကို ရရှိကြသည်။

ကလန်ကို ရန်သူများဘေးမှ မိမိတို့၏ ခွန်အားဖြင့် ကာကွယ်ပေးမည့် 'ကာကွယ်သူ' များအတွက် ဒိုင်းများ။

အဝေးမှနေ၍ ပြိုင်ဘက်များကို တိုက်ခိုက်လေ့ရှိသော တိုက်ခိုက်သူများအတွက် မြှားများ။

ကောင်းကင်နှင့် မြေကြီး၏ စွမ်းအားများကို ချုပ်ကိုင်နိုင်သော 'အုပ်ချုပ်သူ' များအတွက် ရာဇလှံတံများ။

ကျင့်စဉ်ပညာရပ်များဖြင့် ကလန်အတွက် လက်နက်များနှင့် ဥစ္စာဓနများကို ဖန်တီးပေးမည့် 'ဖန်တီးရှင်' များအတွက် တူများ...

စသည်ဖြင့် အသီးသီး ဖြစ်ကြသည်။ အထွတ်အမြတ် တောင်ကြားရှိ အရာခပ်သိမ်းကို အပိုင်းလေးပိုင်း ခွဲခြားနိုင်သည်။

...

ဝေ့ ကလန်၊ ရှီ မိသားစုမှ လင်းတုန်း (ဝေ့ရှီလင်းတုန်း) သည် ထိုလေးမျိုးအနက် သူ မည်သည့်အရာကို လိုချင်ကြောင်း သေချာပေါက် သိထားသည်။

ဇလုံရှေ့သို့ သူ၏အလှည့်ရောက်လာချိန်တွင် သူသည် "တူ လေးဖြစ်ပါစေ" ဟု ကောင်းကင်ဘုံကို အာရုံပြုကာ တောင်းဆုပြုလိုက်သည်။ အရာအားလုံးထက် သူသည် မိခင်ဖြစ်သူကဲ့သို့ ဝိညာဉ်ပန်းပဲဆရာ တစ်ဦးဖြစ်လာရန်၊ မာဒြာမှတစ်ဆင့် အံ့သြဖွယ်ရာကောင်းသော မှော်ပစ္စည်းများကို ဖန်တီးရန် လိုလားလှသည်။ ဝိညာဉ်များနှင့် ဝိညာဉ် အကြွင်းအကျန်များကို ပုံသွင်းဖန်တီးခြင်းများ ပြုလုပ်ရန်အတွက် "ကျေးဇူးပြုပြီး ကျွန်တော့်ကို တူ တစ်လက် ပေးသနားတော်မူပါ" ဟု တောင်းဆုပြုနေမိသည်။

သူသည် လေ့လာမှုများ ပြုလုပ်ထားပြီးဖြစ်ရာ ရေခဲသွားရန် လိုအပ်ကြောင်း သိထားသည်။ မိရိုးဖလာအရ စမ်းသပ်မည့်နေ့တွင် ကလေးငယ်များအား ဘာဖြစ်လာမည်ကို ကြိုတင်ပြောပြထားခြင်းသည် ကံဆိုးစေတတ်သည်ဟု ယူဆကြသော်လည်း၊ သူ၏မိခင်ကမူ မသိနားမလည်ခြင်းသည် ကံဆိုးခြင်းထက် ပို၍အန္တရာယ်ကြီးသည်ဟု ခံယူထားသူဖြစ်သည်။

လင်းတုန်း ရှေ့သို့ တက်သွားသည်နှင့် ပထမ အကြီးအကဲ က "ဝေ့ရှီလင်းတုန်း" ဟု အသံနေအသံထားဖြင့် ခေါ်လိုက်သည်။ အကြီးအကဲသည် အရောင်တင်ထားသော လမ်းလျှောက်တုတ်တစ်ချောင်းကဲ့သို့ ဆန့်ဆန့်ကြီး ရပ်နေပြီး ကြမ်းပြင်အထိ ရှည်လျားနေသော မုတ်ဆိတ်မွေးကျဲကျဲများကို ပိုင်ဆိုင်ထားလေသည်။

"မင်းရဲ့လက်ကို ဆန့်ထုတ်လိုက်စမ်း၊ မင်းရဲ့ ဝိညာဉ်သဘာဝကို ပြသလိုက်ပါ"

လင်းတုန်း၏ မိခင်သည် သူ၏ နောက်တွင် စိုးရိမ်စွာ ရပ်နေသော်လည်း သူက မိခင်ကို လှည့်မကြည့်ခဲ့ပေ။ သူသည် မာဒြာ ဇလုံကိုသာ အာရုံစိုက်ထားသည်။

'ခဲသွားစမ်း၊ ခဲသွားစမ်း၊ ခဲသွားစမ်း'

လင်းတုန်းသည် စိတ်ထဲမှ ရွတ်ဆိုရင်း လက်ချောင်းများကို ဇလုံထဲသို့ နှစ်လိုက်သည်။ ထိုအရာသည် သူထင်ထားသည်ထက် ပိုအေးနေသောကြောင့် အစပိုင်းတွင် သူ စိတ်လှုပ်ရှားသွားသည်။ အဘယ်ကြောင့်ဆိုသော် ရေများသည် ခဲနေပြီဖြစ်ရမည်ဟု ထင်မှတ်လိုက်သောကြောင့်ဖြစ်သည်။

သို့သော် အရည်သည် ဆက်၍ အေးမလာသလို၊ အခဲလည်း ဖြစ်မလာခဲ့ပေ။ ငြိမ်သက်တိတ်ဆိတ်လျက် မတုန်မလှုပ်ဘဲ ရှိနေလေသည်။

အကြီးအကဲ၏ ဖြူဖြူဖွေးဖွေး မျက်ခုံးမွေးများသည် တစ်ဆက်တည်းဖြစ်သွားသည်အထိ တွန့်ချိုးသွားသည်။ လင်းတုန်း လိုချင်နေသော 'တူ' အမှတ်အသားပါဝင်သည့် အရောင်တင်ထားသော ကျောက်စိမ်းတံဆိပ်ပြားကို ဆွဲချိတ်ထားသော အကြီးအကဲသည် ဇလုံပေါ်သို့ ကိုင်းညွတ်ကြည့်လိုက်သည်။

စိတ်မရှည်စွာဖြင့် သူက လင်းတုန်း၏ လက်ကောက်ဝတ်ကို ဖမ်းဆွဲကာ ဆွဲထုတ်လိုက်သည်။ သဘာဝရေသာဆိုလျှင် လင်းတုန်း၏ အသားအရေတွင် ကပ်ကျန်နေမည်ဖြစ်သော်လည်း ဤမာဒြာသည် ရေကို အတုခိုးထားခြင်းသာဖြစ်သည်။ ဘာတစ်ခုမှ ကပ်မနေချေ။ သူ၏လက်သည် သန့်ရှင်းခြောက်သွေ့စွာ ထွက်ပေါ်လာသည်။

ဇလုံထဲတွင် အဝတ်လျှော်သကဲ့သို့ အကြီးအကဲသည် လင်းတုန်း၏ လက်ကို အထက်အောက် အကြိမ်ကြိမ် နှိုက်လိုက် ဆွဲထုတ်လိုက် လုပ်နေလေသည်။ တစ်စုံတစ်ခု မှားယွင်းနေပြီဖြစ်ကြောင်း နားလည်လိုက်သည်နှင့် လင်းတုန်း၏ ဗိုက်ထဲတွင် ဟာတာတာနှင့် အော့အန်ချင်စိတ်တစ်ခု ပေါ်ပေါက်လာသည်။

ဘေးဘက်တွင်မူ လင်းတုန်း၏ မိခင်သည် အခြားအကြီးအကဲတစ်ဦးနှင့် တီးတိုးစကားပြောနေသည်။ ယခုအခါ လူကြီးအများအပြား တီးတိုးပြောဆိုနေကြပြီဖြစ်ရာ၊ ၎င်းသည် ကောင်းသောလက္ခဏာ တစ်ခုတော့ လုံးဝမဟုတ်နိုင်ပေ။

နောက်ဆုံးတွင် ပထမ အကြီးအကဲက...

"သူ့ရဲ့ ဝိညာဉ်မှာ ဘာဆက်နွှယ်မှုမှ မရှိဘူး"

ဟု ပြောလိုက်ရာ အနီးအနားရှိ ကြားလိုက်ရသူများအားလုံး အံ့သြတကြီး အသံထွက်သွားကြသည်။

"သူက ဗလာပဲ... ဝိညာဉ်မဲ့...”

လင်းတုန်းသည် ဖြူရော်သွားသော သူ၏မိခင်ကို လှမ်းကြည့်လိုက်သည်။ သူသည် "ဝိညာဉ်မဲ့" ဟူသော ဤစကားလုံးကို တစ်ခါမှ မကြားဖူးသော်လည်း ကောင်းသောအရာမဟုတ်မှန်းတော့ သိလိုက်သည်။ အသက် ခုနစ်နှစ်အရွယ်ဆိုသည်မှာ အမှန်တရား၏ အနှစ်သာရကို ဆက်စပ်တွေးတောနိုင်လောက်သည့် အရွယ်ရောက်နေပြီဖြစ်သည်။ သူ တံဆိပ်ပြား ရမည်မဟုတ်ပေ။

"ကျွန်တော် ဘယ်တံဆိပ်ပြားကို ရမှာလဲ၊ လေးစားရပါသော အကြီးအကဲ"

သူက ဘာမှနားမလည်သည့်ဟန်ဖြင့် ယဉ်ကျေးစွာ မေးလိုက်သည်။ ပထမ အကြီးအကဲက ကောင်လေးကို စူးရဲစွာ စိုက်ကြည့်လိုက်သည်။

"မင်းက ဒီတံဆိပ်ပြားတွေနဲ့ မထိုက်တန်ဘူး ရှီလင်းတုန်း..."

သူသည် ကလန်အမည်ကိုပင် ထည့်မခေါ်တော့ချေ။ အကြီးအကဲ ဒေါသထွက်နေပြီဖြစ်ကြောင်း သေချာသော်လည်း လူကြီးများ၏ ဒေါသကို မသိဟန်ဆောင်နေလိုက်ပါက မကြာခင် ပျောက်ကွယ်သွားတတ်ကြောင်း လင်းတုန်း သိထားသည်။

"တကယ်လို့ ကျွန်တော့်အတွက် မရှိဘူးဆိုရင်၊ ကျွန်တော်ကိုယ်တိုင်ပဲ..."

လင်းတုန်းသည် ဖန်တီးရှင် တစ်ဦး၏ တူ အမှတ်အသားပါသော တံဆိပ်ပြားကို လှမ်းယူလိုက်သော်လည်း၊ ပထမ အကြီးအကဲက သူ၏လက်ကို ရိုက်ချလိုက်သည်။

"ဒါတွေက မင်းအတွက် မဟုတ်ဘူး..."

"ကျွန်တော် ရွေးလို့မရဘူးလား..."

၎င်းသည် လင်းတုန်းအတွက်မူ အပြည့်အဝ ယုတ္တိတန်နေသည်။ မည်သည့်တံဆိပ်ပြားကို ရွေးချယ်ရမည်ကို ဇလုံက ပြောပြလေ့ရှိပြီး ယခု ဇလုံက ဘာမှမပြောသောကြောင့် သူကိုယ်တိုင် ရွေးချယ်သင့်သည် မဟုတ်ပါလား။

သူ့မှာသာ တံဆိပ်ပြားတစ်ခု ရှိနေခဲ့လျှင် သူ့အမေ ဒီလောက် ထိတ်လန့်နေမည် မဟုတ်ဟု သူ တွေးမိသည်။ တံဆိပ်ပြားမရှိဘဲ နေရခြင်းက ဘာကိုဆိုလိုမှန်း သူ နားမလည်ပေ။ လူတိုင်းတွင် တံဆိပ်ပြားတစ်ခုစီ ရှိကြသည် မဟုတ်ပါလား။

ပထမ အကြီးအကဲက သူ၏ လက်အောက်ငယ်သား တစ်ဦးကို အချက်ပြလိုက်သည်။

"မင်းအတွက် တံဆိပ်ပြားတစ်ခု သီးသန့် လုပ်ပေးရလိမ့်မယ် ရှီလင်းတုန်း... တစ်လောကလုံးက မင်းဟာ ဘယ်အရာလဲ ဆိုတာကို သိသွားအောင်လို့ပေါ့..."

သူက ဘယ်သူလဲ ဟု မသုံးချေ။ ဘယ်အရာဟုသာ သုံးခဲ့သည်။

"ဝေ့ရှီစီရှား... မင်းရဲ့သားကို နောက်တစ်ကြိမ် စမ်းသပ်ပွဲကျမှ ပြန်ခေါ်လာဖို့ ငါ အကြံပြုချင်တယ်... အဲဒီအချိန်ကျရင် ကောင်းကင်ဘုံက သူ့အပေါ် သနားကရုဏာ သက်ကောင်း သက်လာနိုင်ပါတယ်..."

လင်းတုန်း၏ မိခင် စီရှားက သူမ၏သားကို ဆွဲယူကာ အကာအကွယ်ပေးသည့်ဟန်ဖြင့် ဖက်ထားလိုက်သည်။ ထို့နောက် ပထမ အကြီးအကဲကို ခေါင်းညိတ်ပြလိုက်၏။

"ကောင်းကင်ဘုံက ကရုဏာမသက်မချင်း သူဟာ ဝိညာဉ်မဲ့ တစ်ယောက် ဖြစ်နေမှာပါ"

ကလန်သား ဆွေမျိုးများ၏ တီးတိုးပြောဆို ဝေဖန်သံများကြားမှပင် လင်းတုန်း၏ မိခင်သည် သူ့ကို ခန်းမထဲမှ အမြန်ဆွဲခေါ်သွားလေသည်။ သူမက လင်းတုန်းကို ကိုယ်လုံးဖြင့် ကွယ်ကာထားရင်း ထိုနေရာမှ လွတ်ကင်းသည်အထိ ခေါ်ဆောင်သွားခဲ့သည်။

"ကျွန်တော် ဘာလို့ တံဆိပ်ပြား မရခဲ့တာလဲဟင်"

လူသူကင်းဝေးရာသို့ ရောက်သောအခါ သူက မေးလိုက်သည်။

"ကောင်းကင်ဘုံက ငါတို့ကို အရှက်ကွဲစေချင်လို့ပေါ့ကွယ်"

***

အပိုင်း(၂)

"ကောင်းကင်ဘုံက ငါတို့ကို အရှက်ကွဲစေချင်လို့ပေါ့ကွယ်"

ဝေ့ရှီစီရှား၏ အသံက နက်ရှိုင်းပြီး လေးလံနေသည်။ ထိုအချိန်တွင် သူ၏ ဝိညာဉ်သည် ရှက်ဖွယ်ကောင်းသော အရာတစ်ခုဖြစ်ကြောင်း လင်းတုန်း နားလည်လိုက်လေတော့သည်။ တံဆိပ်ပြားတစ်ခုကို ထိုက်ထိုက်တန်တန် မရရှိမချင်း သူသည် မိမိ၏ ကလန်အပေါ်သို့ အရှက်တကွဲ အကျိုးနည်းဖြစ်မှုများကို ဆက်လက် ယူဆောင်လာဦးမည် ဖြစ်ပေသည်။

ထို့ကြောင့် သူ တံဆိပ်ပြားတစ်ခု ရရန် လိုအပ်လာသည်။ နောက်ထပ် ခြောက်လအကြာ ဒုတိယအကြိမ် စမ်းသပ်ပွဲ၌ လင်းတုန်းသည် သူ၏ လက်ဖဝါးပေါ်တွင် မိခင်ဖြစ်သူ၏ သွေးတစ်စက်ကို ခိုး၍ သုတ်လိမ်းထားခဲ့သည်။ ထိုသွေးထဲတွင် ကပ်ငြိကျန်ရစ်နေသော မာဒြာစွမ်းအင်များကြောင့် ဇလုံထဲရှိရေများက တစ်ခဏမျှ လှုပ်ခတ်သွားခဲ့သော်လည်း၊ မကြာမီမှာပင် မူလအတိုင်း ပြန်လည် ငြိမ်သက်သွားလေတော့သည်။

ဝေ့ရှီလင်းတုန်း အသက်ရှစ်နှစ်အရွယ်သို့ ရောက်သောအခါ နောက်တစ်ကြိမ် စမ်းသပ်ခံရပြန်သည်။ ဤတစ်ကြိမ်တွင်တော့ သူ ကြိုတင်ပြင်ဆင်မှုများ ပြုလုပ်လာခဲ့သည်။ ညဘက်တွင် ခန်းမဆောင်အတွင်းသို့ အရိပ်များကြားမှ တိတ်တဆိတ် ခိုးဝင်ကာ ဇလုံတင်မည့် စားပွဲအောက်ခြေတွင် အက္ခရာစာလုံးများပါဝင်သည့် အစီအရင် စက်ဝိုင်းကြမ်းကြမ်းတစ်ခုကို ရေးခြစ်ခဲ့သည်။

သူသည် အစီအရင်ပညာရှင်တစ်ဦး မဟုတ်သော်လည်း၊ ဤအရာသည် အခြေခံအကျဆုံး အစီအရင်တစ်ခုဖြစ်ပြီး မိခင်ဖြစ်သူ၏ စာအုပ်တစ်အုပ်ထဲမှ သေချာဂရုတစိုက် ကူးယူခဲ့ခြင်းဖြစ်သည်။ နောက်တစ်နေ့နံနက်ပိုင်း စမ်းသပ်ခံရမည့် သူ့အလှည့်သို့ ရောက်လာသောအခါ၊ လေ့ကျင့်သင်ကြားထားခြင်းမရှိသည့် အသက်ရှစ်နှစ်အရွယ် ကလေးတစ်ယောက် ထိန်းချုပ်နိုင်စွမ်းရှိသော အနည်းငယ်မျှသော မာဒြာစွမ်းအင်လေးကို ထိုအစီအရင်ဆီသို့ စီးဆင်းသွားစေလိုက်သည်။

ဇလုံထဲရှိရေများ တုန်ခါသွားရာ၊ ဤသည်မှာ သူ့အတွက် ရာဇလှံတံ တံဆိပ်ပြားကို ရရှိစေမည့် လက္ခဏာဖြစ်သည်။ သူ အလိုရှိသော 'တူ' တံဆိပ်ပြား မဟုတ်သော်ငြားလည်း၊ ရေများ အေးခဲသွားစေရန် မည်သို့လုပ်ရမည်ကို သူ မစဉ်းစားတတ်ခဲ့ပေ။ သို့သော်လည်း မည်သည့် တံဆိပ်ပြားဖြစ်စေ သူ့အတွက် အဆင်ပြေပါသည်။ ဘာဝိညာဉ်မှ မရှိသည်ထက်စာလျှင် မည်သည့်ဝိညာဉ်မျိုးမဆို ရှိနေခြင်းက ပိုကောင်းသည် မဟုတ်ပါလော။

သို့သော်လည်း အဆုံးသတ်တွင်မူ ရေများသာမက ဇလုံပါ တုန်ခါလာပြီး စားပွဲကြီးပါ လိုက်ပါလှုပ်ခတ်လာလေတော့သည်။ ပထမ အကြီးအကဲက စားပွဲခင်းအောက်သို့ တစ်ချက်မျှ ငုံ့ကြည့်လိုက်ရုံဖြင့် လင်းတုန်း၏ လက်တက်စမ်းထားမှုများကို ချက်ချင်း သိရှိသွားလေသည်။

ဤတစ်ကြိမ်တွင်တော့ ပထမ အကြီးအကဲသည်လည်း ကြိုတင်ပြင်ဆင်ထားပုံရသည်။ လင်းတုန်းအတွက် တံဆိပ်ပြားတစ်ခုကို သူ အသင့်ယူဆောင်လာခဲ့သည်။

ထိုတံဆိပ်ပြား၏ အလယ်တည့်တည့်တွင် သင်္ကေတတစ်ခု ပါရှိသော်လည်း၊ ၎င်းမှာ 'တူ' ပုံစံမျိုး လုံးဝ မဟုတ်ပေ။

တံဆိပ်ပြားသည် အခြားသူများ ရရှိသော တံဆိပ်ပြားများနှင့် ပုံပန်းသဏ္ဍာန်တူညီပြီး သစ်သားအပျော့သားဖြင့် ပြုလုပ်ထားသော ချောမွေ့သည့် ဆဋ္ဌဂံပုံစံဖြစ်၏။ သို့သော် အလယ်ဗဟိုတွင် မည်သည့် ရုပ်ပုံမှ မပါရှိချေ။ မြှားလည်း မဟုတ်၊ ရာဇလှံတံလည်း မဟုတ်၊ ဒိုင်းလည်း မဟုတ်သလို တူလည်း မဟုတ်ပေ။ မိခင်ဖြစ်သူထံမှ သင်ကြားခဲ့ရဖူးသော ရှေးဟောင်းအက္ခရာ သင်္ကေတတစ်ခုသာ ပါရှိလေသည်။ ထိုစာလုံး၏ အဓိပ္ပာယ်ကား 'ဗလာကျင်းခြင်း' ပင် ဖြစ်သည်။

လင်းတုန်း၏ ကိုယ်တွင်း၌ ဟာလာဟင်းလင်း ဖြစ်နေသကဲ့သို့ပင် ဤတံဆိပ်ပြားသည်လည်း အလွတ်သာဖြစ်ကြောင်း အကြီးအကဲက သရော်လိုက်သည်။

...

အခြားသော ကလေးငယ်များသည် ကြီးပြင်းလာသည်နှင့်အမျှ သူတို့၏ သစ်သားတံဆိပ်ပြားများကို စွန့်ပစ်ခဲ့ကြပြီ ဖြစ်သည်။ မာဒြာအပေါ် စိုးမိုးနိုင်စွမ်းများနှင့် သန့်စင်သော ကျင့်စဉ်သိုင်းပညာရပ်များအပေါ် ကျွမ်းကျင်မှုတို့မှာ တစ်နေ့တခြား တိုးတက်မြင့်မားလာကြသည်။ သူတို့အနက် အစောဆုံး သူသည် အသက် ကိုးနှစ်အရွယ်မှာပင် 'ကြေး' အဆင့်သို့ ရောက်ရှိသွားကာ မိမိ၏ တံဆိပ်ပြားကို အဆင့်မြှင့်တင်နိုင်ခဲ့သည်။ အနှေးကွေးဆုံး သူပင်လျှင် အသက် ဆယ့်သုံးနှစ်၌ ထိုအဆင့်သို့ ရောက်ရှိကြလေသည်။

သို့သော် အသက် ဆယ့်ငါးနှစ်အရွယ်တိုင်အောင် ဝေ့ရှီလင်းတုန်း တစ်ယောက်တည်းသာ သူ၏ မူလတံဆိပ်ပြားလေးကို ကိုင်ဆောင်ထားဆဲ ဖြစ်သည်။ သစ်သားပြားလေးသာ ဖြစ်ပြီး၊ ယခုတိုင် 'ဗလာ' ဖြစ်နေဆဲပင်။

နှစ်ဝက် တစ်ကြိမ် ကလေးငယ်များ၏ စမ်းသပ်ပွဲ ပြီးဆုံးသွားတိုင်း လင်းတုန်းသည် တိတ်တဆိတ် ခိုးဝင်ကာ သူ၏ ဝိညာဉ်ကို အကဲဖြတ်စစ်ဆေးလေ့ ရှိသည်။ ထိုသို့ စစ်ဆေးတိုင်းမှာလည်း သူ၏ မိခင် ပြောခဲ့ဖူးသလို ကောင်းကင်ဘုံက သူ့အပေါ် တစ်နေ့နေ့တွင် သနားကရုဏာ သက်လာနိုးဖြင့် အမြဲ မျှော်လင့်မိခဲ့သည်။ ယခုဆိုလျှင် သူ ထိုသို့ စမ်းသပ်လာခဲ့သည်မှာ ဆယ့်ခုနစ်ကြိမ်တိုင်တိုင် ရှိခဲ့လေပြီ။

သို့တိုင်အောင် ဇလုံထဲရှိ ရေများမှာမူ တစ်ချက်ကလေးမျှပင် လှုပ်ခတ်မလာခဲ့ချေ။

…

လင်းတုန်းသည် အိုးရပ်စ် သစ်ပင်၏ ခရမ်းရောင် သစ်ရွက်များကို မော့ကြည့်လိုက်သည်။ ဒီသစ်ပင်ကတော့ ဟုတ်လောက်သည်ဟု သူ ခံစားနေရသည်။ ဤသစ်ပင်၏ အရိပ်အောက်တွင် ရပ်နေရသည်မှာ တစ်နည်းအားဖြင့် သူ့ကို ပိုမို တည်ငြိမ်စေပြီး ငြိမ်းချမ်းသော အငွေ့အသက်များကို ထုတ်လွှတ်ပေးနေသကဲ့သို့ပင်။

အလွန်အမင်း ရင့်ရော်နေသော အဖြူရောင် အသီးများသည် သစ်ရွက်များကြားတွင် ရှိနေပြီး လှမ်းမမီနိုင်လောက်အောင် မြင့်မားလွန်းလှသည်။ ထို့ပြင် အဖုအထစ်များဖြင့် ပြည့်နေသော သစ်ခေါက်များ၏ နောက်ကွယ်တွင် ရှေးဟောင်း ထာဝရ တည်ရှိမှုတစ်ခုကို သူ ခံစားသိရှိနေသည်။

သို့မဟုတ် ၎င်းမှာ သူ၏ စိတ်ကူးယဉ်မှုသက်သက်လည်း ဖြစ်နိုင်ပေသည်။

သူသည် တူနှင့် ဆောက်ကို မြှောက်ကိုင်လိုက်ပြီး အပြင်ဘက် သစ်ခေါက်လွှာကို ထွင်းထုတ်ဖယ်ရှားလိုက်သည်။ ထို့နောက် ဂရုတစိုက်ဖြင့် နူးညံ့သော သစ်သားပေါ်တွင် ရိုးရှင်းသော အက္ခရာ တစ်လုံးကို ထွင်းဆစ်လိုက်သည်။

ထွင်းဆစ်ပြီးသွားသောအခါ သစ်ပင်ပေါ်တွင် သူချန်ရစ်ခဲ့သည့် သင်္ကေတကို မိခင်ဖြစ်သူ ပေးထားသော မှတ်တမ်းပြားနှင့် တိုက်ဆိုင်စစ်ဆေးကြည့်လိုက်သည်။ သူသည် အစီအရင် ပညာရှင် တစ်ယောက် မဟုတ်သော်ငြားလည်း၊ အနည်းဆုံးတော့ ရိုးရှင်းသော အစီအရင်များကို ကူးယူရေးဆွဲနိုင်စွမ်း ရှိသည်။ အကယ်၍ သူသာ အက္ခရာများကို အတိအကျ ကူးယူနိုင်ခဲ့မည်ဆိုလျှင်၊ ဤအစီအရင် စက်ဝိုင်းကို ရှေးဟောင်း ဘိုးဘေးသစ်ပင် ပေါ်တွင် ထွင်းဆစ်လိုက်ပါက တောက်ပလာရမည် ဖြစ်သည်။

ဤအစီအရင်တွင် အက္ခရာ ခုနစ်လုံး ပါဝင်၏။ သူသည် ဒုတိယမြောက် အက္ခရာကို ဂရုတစိုက် ဆက်လက် ထွင်းဆစ်နေလိုက်သည်။ တောအုပ်ထဲ တစ်နေရာတွင် အဆင့်တက်တော့မည့် သစ်ပင်တစ်ပင် ရှိနေကြောင်း မိခင်ဖြစ်သူ သိရှိခဲ့ပြီးကတည်းက၊ လွန်ခဲ့သော သုံးရက်အတွင်း ဤသစ်ပင်သည် သူရှာဖွေ စမ်းသပ်ခဲ့သည့် နှစ်ဆယ့်ငါးပင်မြောက် သစ်ပင်ဖြစ်သည်။ ဝိညာဉ်သစ်သီး သီးနိုင်ခြေရှိသည့် သစ်ပင်အများစုကို ရွက်ဝါကြွေ ကျောင်းတော်က လက်ဝါးကြီးအုပ်ထားတတ်သော်လည်း၊ လင်းတုန်းသာ အလုပ်ကို မြန်မြန်ဆန်ဆန် လုပ်နိုင်မည်ဆိုလျှင် သူတို့ထက် လက်ဦးမှုရယူနိုင်ရန် အခွင့်အရေး ရှိနေသေးသည်။

အဆင့်တက်ရန်အတွက် အပင်များသည် တိရစ္ဆာန်များထက် သက်တမ်း ပိုမို ရှည်ကြာစွာ ရှင်သန်ရန် လိုအပ်လေသည်။ မြေခွေး သို့မဟုတ် လိပ်တစ်ကောင်သည် သူတို့၏ ပထမဆုံး ရာစုနှစ်တစ်ခုကို ဖြတ်ကျော် ရှင်သန်နိုင်ခဲ့ပါက၊ သူတို့၏ ပတ်ဝန်းကျင် လောကကြီးထံမှ သက်စောင့်အော်ရာ များကို အလုံအလောက် စုပ်ယူနိုင်ပြီး အထွတ်အမြတ် သားရဲများ အဖြစ်သို့ အဆင့်တက်လှမ်းသွားကြမည် ဖြစ်သည်။ ဤတိရစ္ဆာန်များသည် လူသားများကဲ့သို့ပင် မာဒြာ ကို လှည့်ပတ်ကျင့်ကြံကြပြီး၊ စွမ်းအားအဆင့်များ တက်လှမ်းလာကာ သေဆုံးသွားသည့်အခါတွင်လည်း ဝိညာဉ် အကြွင်းအကျန် များကို ချန်ရစ်ထားခဲ့တတ်ကြသည်။ သူတို့အထဲမှ သက်တမ်းအရင့်ဆုံး သားရဲများဆိုလျှင် စကားပင် ပြောဆိုနိုင်ကြပြီး၊ အချို့မှာ လူယောင်ဖန်ဆင်းနိုင်ကြသည်ဟု ဒဏ္ဍာရီများတွင် ဆိုကြသည်။

အပင်များသည်လည်း ထိုနည်းတူပင် ဖြစ်သော်လည်း၊ အချိန်များစွာ ပိုမို ကြာမြင့်တတ်သည်။ အချို့သော သစ်ပင်များသည် အခြေခံ ဝိညာဉ်တစ်ခု ဖြစ်တည်လာစေရန် လုံလောက်သော သက်စောင့်အော်ရာများကို မစုပ်ယူနိုင်မီ နှစ်ငါးရာ သို့မဟုတ် ထို့ထက်မက အနှောင့်အယှက်ကင်းစွာ ရှင်သန်နေထိုင်ရပြီး၊ သူတို့မှာ မည်သည့်အခါမျှ စကားပြောဆိုနိုင်မည် မဟုတ်ပေ။

သူရှာဖွေနေသော အိုးရပ်စ် သစ်ပင်သည် အနည်းဆုံး ရာစုနှစ်သုံးခုတိုင် ရှင်သန်ခဲ့ပြီးဖြစ်ကာ အဆင့်တက်လှမ်းမည့် ဆဲဆဲအချိန်သို့ ရောက်ရှိနေပြီ ဖြစ်သည်။ သစ်သားထဲတွင် စုစည်းနေသော ရာစုနှစ်ပေါင်းများစွာစာ သက်စောင့်အော်ရာများသည် ၎င်း၏ အသီးကို အားဖြည့်ပေးမည်ဖြစ်ပြီး၊ ထိုအသီးအား အလွန်အစွမ်းထက်သော ဝိညာဉ်စွမ်းအားကို ရရှိစေမည်ဖြစ်သည်။ သံမဏိအဆင့် သို့မဟုတ် ကျောက်စိမ်းအဆင့် ရှိ ကျင့်ကြံသူများ ပင်လျှင် ဤသို့သော အကျိုးကျေးဇူးအတွက် ငွေကြေးအမြောက်အမြား ပေးချေကြမည်မှာ သေချာသည်။

လင်းတုန်း အတွက်ကတော့... သူ စိတ်ကူးယဉ်ရဲရုံသာ တတ်နိုင်ပေသည်။ ဤ ဝိညာဉ်သစ်သီး သည် သူ မွေးရာပါ လိုအပ်နေသော ဝိညာဉ်စွမ်းအား အားနည်းချက်များကို အစားထိုးနိုင်လောက်သည်အထိ သူ့ကို ခွန်အားဖြည့်တင်းပေးနိုင်ကောင်း ပေးနိုင်ပေလိမ့်မည်။

မသိလိုက်မသိဘာနှင့်ပင်... သူသည် အစီအရင် စက်ဝိုင်းကို ထွင်းဆစ်၍ ပြီးသွားခဲ့ပြီဖြစ်သည်။ ဖြူဖျော့ဖျော့ သစ်သားပေါ်ရှိ သူ၏ ခပ်ကြမ်းကြမ်း လက်ရာကို စိုးရိမ်စိတ်ပါသည့် မျှော်လင့်ချက်ဖြင့် သူ ကြည့်နေမိသည်။

အသက်ရှူကြိမ် အနည်းငယ် ကြာပြီးနောက်တွင်လည်း၊ ထိုအက္ခရာများသည် အရောင်အဆင်းကင်းမဲ့ကာ အသက်မပါဘဲ ရှိနေဆဲပင်။ ဤသည်ကား အဆိုးရွားဆုံး အပိုင်းပင်ဖြစ်သည်။

အစီအရင် ကျရှုံးသွားရခြင်းမှာ ၎င်းကို အသက်သွင်းရန် သစ်သားထဲတွင် မာဒြာ မရှိသောကြောင့်လား၊ သို့မဟုတ် သူ တစ်ခုခု အမှားလုပ်မိသောကြောင့်လား။

မိခင်ဖြစ်သူ၏ မှတ်တမ်းပြားကို သေချာ ဂရုတစိုက် စစ်ဆေးကြည့်သော်လည်း သိသာထင်ရှားသော အမှားအယွင်းမျိုး မတွေ့ရပေ။ သို့သော်လည်း သူ ဘာကိုမှ အသေအချာ မပြောနိုင်ခဲ့ပေ။

သက်ပြင်းတစ်ချက်ချလိုက်ပြီးနောက် သူသည် တူနှင့် ဆောက်ကို ခါးပတ်တွင် ပြန်ချိတ်လိုက်ပြီး၊ တစ်နေ့တာအတွက် ရေဖြည့်ထားသော ရေဘူးကို ကောက်ကိုင်လိုက်သည်။ ရာသီပေါ်မဟုတ်သော အိုးရပ်စ် အသီး အနည်းငယ်သည်သာ သူ့အတွက် တစ်ခုတည်းသော အစားအစာ ဖြစ်ခဲ့သော်လည်း၊ သူသည် ဝေ့ ကလန် သို့ ပြန်သွားရန် အချိန်မဖြုန်းနိုင်ပေ။ ရက်အနည်းငယ်လောက်တော့ သူ တောင့်ခံနိုင်ပါသေးသည်။

သစ်ပင်မှ ခွာရန် သူ ပထမဆုံး ခြေလှမ်းကို လှမ်းလိုက်ချိန်တွင် ရုတ်တရက် တောက်ပသွားသော အလင်းရောင်တစ်ချက်က သူ၏ အာရုံကို ဖမ်းစားသွားခဲ့သည်။ လင်းတုန်းသည် အလင်းရောင် မည်သည့်နေရာမှ လာသနည်းဟု တောအုပ်၏ နက်ရှိုင်းသော နေရာများဆီသို့ ဦးစွာ အကဲခတ် ကြည့်ရှုလိုက်သည်။ ၎င်းမှာ သတ္တုပြားတစ်ခုပေါ်သို့ နေရောင်ဟပ်သွားခြင်း ဖြစ်နိုင်သလို၊ မေ့ကျန်ခဲ့သော ကိရိယာတစ်ခု သို့မဟုတ် ဒင်္ဂါးပြားတစ်ခုခုလည်း ဖြစ်နိုင်ပေသည်။

ထိုအခိုက်တွင်ပင် သူ ရေးဆွဲထားသည့် အစီအရင်က မှိတ်တုတ်မှိတ်တုတ် ဖြစ်သွားပြီး အလင်းပွင့်လေးတစ်ခု ထွက်ပေါ်လာသည်။ ထိုအလင်းမှာ မှိန်ဖျော့နေပြီး လေထဲမှ ဖယောင်းတိုင်မီးလို တဆတ်ဆတ် တုန်ခါနေသော်လည်း၊ လုံးဝ အမှားအယွင်း မရှိနိုင်ပေ။ သူ၏ အစီအရင် စက်ဝိုင်း အလုပ်လုပ်သွားလေပြီ။ သူသည် ရှေးဟောင်း ဘိုးဘေးသစ်ပင် တစ်ပင်ကို ရှာတွေ့ခဲ့ပြီ ဖြစ်သည်။

ငါးမျှားချိတ် မိနေသော ငါးတစ်ကောင်လိုပင် သူ၏ အကြည့်တို့က သစ်ပင်၏ ခရမ်းရောင် သစ်ရွက်များကြားရှိ အဖြူရောင် အစက်အပြောက်လေးများဆီသို့ ဆွဲငင်ခံလိုက်ရသည်။ သာမန် အိုးရပ်စ် အသီးတစ်လုံးသည် အဖြူရောင် မက်မွန်သီးတစ်လုံးနှင့် တူပြီး အထွတ်အမြတ် တောင်ကြား တွင်သာ ပေါက်ရောက်လေ့ရှိသည်။

လင်းတုန်းသည် ငယ်စဉ်ကတည်းက ထိုအသီးကို မုန့်များမှစ၍ သစ်သီးဖျော်ရည်အထိ မျိုးစုံထည့်သွင်း စားသောက်ကာ ကြီးပြင်းလာခဲ့သူ ဖြစ်သော်လည်း၊ ပြင်ပလောကရှိ လူများကတော့ ၎င်းတို့ကို ရှားပါးပြီး တန်ဖိုးကြီးသော စားဖွယ်ရာများအဖြစ် သတ်မှတ်ထားကြပုံရသည်။ ထိုအသီးများတွင် အထူးတလည် စွမ်းအင်ဂုဏ်သတ္တိများ မပါရှိဘဲ ထူးခြားသော အရသာ တစ်ခုတည်းသာ ရှိလေသည်။

ရှေးဟောင်း ဘိုးဘေး အိုးရပ်စ် သစ်ပင်မှ အသီးများသည်လည်း ပုံပန်းသဏ္ဍာန်အားဖြင့် ခြားနားမှု မရှိလှပေ။ သို့သော်လည်း တစ်ကိုက် ကိုက်စားလိုက်ရုံဖြင့် နှစ်ပေါင်းများစွာစာ သန့်စင်ပြီးသား သက်စောင့်အော်ရာများကို ရရှိစေမည်ဖြစ်ပြီး ထိုအရာများကို မာဒြာ အဖြစ် သူ ပြောင်းလဲ ကျင့်ကြံနိုင်မည် ဖြစ်သည်။

ဝေ့ရှီလင်းတုန်းသည် သစ်ခေါက်များပေါ်မှ ကုပ်တွယ် တက်သွားချင်စိတ်များ ပေါက်လာသော်လည်း၊ အနီးဆုံး သစ်ကိုင်းသည်ပင် လှမ်းမမီနိုင်လောက်အောင် အလွန်မြင့်မားလွန်းနေသည်။ သူ၏ အစ်မဖြစ်သူနှင့် အတူဖြစ်စေ၊ သို့မဟုတ် အနည်းဆုံး လှေကားတစ်စင်း ယူ၍ဖြစ်စေ သူ ပြန်လာခဲ့ရမည်။ ရွက်ဝါကြွေ ကျောင်းတော် မှ တပည့်များ မရောက်လာမီ သူသာ ပြန်လာနိုင်ခဲ့လျှင် ဘယ်လောက်ကောင်းလိုက်မည်နည်း။

***