ကောင်းကင်ဘုံ၏ရွေးချယ်ခံ

ဆူပွက်နေသော ချော်ရည်များနံဘေးတွင် ကျုံးချင်၏မျက်လုံးများထဲ၌ အံ့အားသင့်မှု အရိပ်အယောင်တစ်ရပ် ထင်ဟပ်လာခဲ့သည်။

တစ်ချိန်တည်းမှာပင် ထိုဆန်းကြယ်မီးတောက်ကို သူ မည်သို့သိမ်းယူရမည်အား တွေးတောနေခဲ့သည်။

သို့သော် အချိန်တခဏကြာမျှ စဉ်းစားပြီးနောက် သူ ဘာကိုမှ စဉ်းစားမရသေးချေ။

ထိုအချိန်မှာပင်...

အသံတစ်သံက သူ၏နားထဲသို့ ဝင်ရောက်လာပေ၏။

"သခင်... ဒီ ဆန်းကြယ်မီးတောက်ကို ကျွန်တော် သိမ်းယူနိုင်တယ်..."

ထိုအသံ ထွက်ပေါ်လာသည်နှင့်အတူ ချီလင်တစ်ကောင်က ကျုံးချင်၏လက်မောင်းမှ ထွက်ပေါ်လာခဲ့သည်။

ထိုအရာမှာ ကျုံးချင် ယခင်ကတည်းက နှိမ်နင်းထားခဲ့သော ချီလင်လေး ရှောင်ဟေးပင်။

ရှောင်ဟေးက သူ၏အစစ်အမှန်ပုံရိပ်ကို ထုတ်ဖော်လိုက်ပြီး လေနှင့်အတူ ကြီးထွားလာခဲ့သည်။

မျက်စိတစ်မှိတ်အတွင်း သူသည် ပေအနည်းငယ်အမြင့်သို့ ရောက်ရှိသွားခဲ့ပေ၏။

သူ၏ အမည်းရောင် အကြေးခွံများက ပူပြင်းသော ချော်ရည်များ အောက်တွင် မှေးမှိန်သော အလင်းတန်းတစ်ခုကို ရောင်ပြန်ဟပ်နေခဲ့သည်။

သူ၏မျက်လုံးများက ချော်ရည်များ၏ အောက်ခြေဆီသို့ အနည်းငယ် စိတ်အားထက်သန်စွာ ကြည့်နေသည်။

ကျုံးချင်က ချီလင်ကို မြင်တွေ့ချိန်၌ အနည်းငယ် အံ့အားသင့်သွားပြီး မေးမြန်းလိုက်သည်။

"ရှောင်ဟေး... မင်းက ဘယ်လို သိမ်းယူမှာလဲ..."

သို့သော် သူသည် သတိမပေးဘဲ မနေနိုင်ခဲ့ချေ။

"ဒီဆန်းကြယ်မီးတောက်က အရမ်းကို သာမန်ထက်လွန်ကဲတယ်... ယန်သုံးပါးနယ်ပယ် ကျွမ်းကျင်သူ တစ်ယောက်တောင် ဒီချော်ရည်ထဲ ဝင်သွားရင် ကြာကြာတောင့်ခံနိုင်မှာ မဟုတ်ဘူး... မင်းက အခု ယင်သုံးပါးနယ်ပယ်မှာပဲ ရှိသေးတာ... မင်း လုပ်နိုင်ပါ့မလား..."

ချီလင်သည် ရှောင်ဟေးဟူသော နာမည်အပေါ် နက်ရှိုင်းသော မကျေနပ်မှု ရှိနေခဲ့ပေ၏။

သူက ဤနာမည်ပြောင်ကို ပြင်ပေးနိုင်မလားဟု ကျုံးချင်အား အကြိမ်ကြိမ် မေးရန် ကြိုးစားခဲ့ဖူးသည်။

သို့သော် တစ်ဖက်လူသည် မလှုပ်မယှက် ရှိနေပြီး သူ၏သဘောအတိုင်းသာ ဆက်လက်လုပ်ဆောင်နေသဖြင့် ရှောင်ဟေးကို အနည်းငယ် ဝမ်းနည်းစေပေ၏။

ထိုသို့ဆိုသော်လည်း ကျုံးချင်၏မေးခွန်းကို ကြားချိန်၌ သူက ချက်ချင်းဆိုသလိုပင် တုံ့ပြန်လိုက်သည်။

"သခင်... ကျွန်တော်ရဲ့ ချီလင်မျိုးနွယ်စု က နတ်ဘုရားသားရဲတွေ ဖြစ်လို့ ကျွန်တော်တို့ မျိုးနွယ်စုမှာ ကိုယ်ပိုင်နည်းလမ်းတချို့ ရှိတယ်... ကျွန်တော်က ယင်သုံးပါးနယ်ပယ်မှာပဲ ရှိသေးတယ် ဆိုတာကို ဂရုမစိုက်ပါနဲ့... အဲဒါက ကျွန်တော် ကလေးဘဝမှာပဲ ရှိသေးလို့ပါ... ကျွန်တော် အရွယ်ရောက်လာတာနဲ့ ဆရာ့အတွက် သေချာပေါက် ပိုပြီးကူညီပေးနိုင်မှာပါ..."

"ဒါ့ပြင် ချီလင်မျိုးနွယ်စုမှာ ကျွန်တော်တို့ရဲ့ ကိုယ်ပိုင် ထူးခြားတဲ့ မွေးရာပါ နတ်ဘုရားစွမ်းရည်လည်း ရှိပါတယ်..."

ရှောင်ဟေး၏ ယုံကြည်မှု ရှိသော စကားများကို ကြားချိန်၌ ကျုံးချင်က တစ်ချက်ကြည့်လိုက်၏။

ရှောင်ဟေးကို သူ ဖိနှိပ်ခဲ့ပြီးကတည်းက ခရီးသွားရန် ရံဖန်ရံခါ အသုံးပြုခြင်းမှလွဲ၍ ရှောင်ဟေးအကြောင်း သူ အမှန်တကယ်ကို အနည်းငယ်သာ သိထားခဲ့သည်။

ယခုအချိန်၌ တစ်ဖက်လူက စွမ်းရည်ပြချင်နေမှတော့ ရှောင်ဟေး၏စွမ်းအားကို သူ အမှန်တကယ် မျက်မြင်ကိုယ်တွေ့ မြင်တွေ့ချင်မိသည်။

ကျုံးချင်က ပြောဆိုသည်။

"အဲဒီလိုဆိုရင်လည်း စမ်းကြည့်လိုက်လေ... တကယ်လို့ ဒီဆန်းကြယ်မီးတောက်ကို မနှိမ်နင်းနိုင်ဘူးဆိုရင်လည်း ကိုယ့်ကိုယ်ကိုယ် အတင်းအကြပ် မလုပ်နဲ့..."

"ဟုတ်ကဲ့ပါ သခင်..."

ချီလင်သည် ထပ်မပြောတော့ဘဲ သူ၏ ခန္ဓာကိုယ် လှုပ်ရှားသွားကာ ချော်ရည်ထဲသို့ တိုက်ရိုက်ခုန်ဆင်းသွားပေ၏။

ဤသည်က ပေအနည်းငယ်မြင့်သော ချော်ရည် လှိုင်းလုံးများကို ဖြာကျသွားစေခဲ့သည်။

ချီလင်သည် အမှန်တကယ်ပင် အံ့အားသင့်ဖွယ်ကောင်းသည်ဟု ဆိုရပေမည်။

ထိုချော်ရည်များ၏အပူချိန်မှာ အလွန် မြင့်မားလွန်းသဖြင့် ကျုံးချင်၏ လက်ရှိ ဓမ္မသောင်းချီနယ်ပယ် ဆဋ္ဌမအဆင့် ကျင့်ကြံမှုဖြင့်ပင် ထိုအရာများကို လုံးဝမထိတွေ့ချင်ခဲ့ချေ။

သို့သော် ချီလင်၏ရုပ်ခန္ဓာကိုယ်သည် ယင်သုံးပါးနယ်ပယ် ကျင့်ကြံမှုဖြင့်ပင် ထိုထိတ်လန့်ဖွယ် မြင့်မားသော အပူချိန်ကို အမှန်တကယ် မကြောက်ရွံ့ခဲ့ချေ။

ချော်ရည်ထဲတွင် တခဏကြာမျှ ကူးခတ်သွားပြီးမှသာ ရှောင်ဟေးက ဆန်းကြယ်မီးတောက်ဆီသို့ စတင်၍ ပြေးဝင်သွားခဲ့သည်။

ကျုံးချင်က သူ၏ကောင်းကင်ဘုံ မျက်လုံး ကို ဖွင့်လိုက်ပြီး သူ၏ အကြည့်က ရှောင်ဟေး၏ ခန္ဓာကိုယ်နောက်သို့ လိုက်ပါသွားခဲ့သည်။

သူသည် အကူအညီပေးရန် အမြဲတစေ အဆင်သင့် ရှိနေခဲ့ပေ၏။

ရှောင်ဟေးက ယုံကြည်မှုရှိစွာ ပြောဆိုခဲ့သော်လည်း သတိထားခြင်းက အမြဲတမ်း ပိုကောင်းသည်။

သူသည် နောက်ဆုံးတွင် နတ်ဘုရားသားရဲ ချီလင် တစ်ကောင်ကို ရရှိခဲ့ပြီး ချီလင်ကို ဤနေရာတွင် မဆုံးရှုံးလိုချေ။

ချော်ရည်များ၏ နက်ရှိုင်းသော နေရာတွင် ဆန်းကြယ်မီးတောက်က သက်ရှိတစ်ကောင် ဝင်ရောက်လာသည်ကို ခံစားမိပုံရသည်အား မြင်တွေ့နိုင်သည်။

ဆန်းကြယ်မီးတောက်က စတင်၍ ရုန့်ရင်းကြမ်းတမ်းလာခဲ့ကာ ကြောက်မက်ဖွယ် အပြာရောင် မီးတောက်များ တလိမ့်လိမ့်ထလာခဲ့သည်။

မျက်စိတစ်မှိတ်အတွင်း မီးတောက်များက ချော်ရည်များအားလုံးကို ဖုံးလွှမ်းသွားပေ၏။

ထိတ်လန့်ဖွယ် မီးတောက်များ တောက်လောင်လာပြီး လေဟာနယ်ကိုပင် ပုံပျက်ကာ ပြိုကျသွားသည်အထိ လောင်ကျွမ်းသွားစေသည်။ ထိုမီးတောက်များသည် ပတ်ဝန်းကျင်ရှိ ဥပဒေသ စွမ်းအားများ အရည်ပျော်ကာ ပျက်စီးသွားသည်အထိ လောင်ကျွမ်းသွားခဲ့သည်။

အချိန်တခဏအတွင်း လေဟာနယ် အက်ကွဲကြောင်းများ ရုတ်တရက် ထွက်ပေါ်လာပြီး အဆုံးမဲ့ မုန်တိုင်းများ သောင်းကျန်းလာပေ၏။

လေက မီးကို အားပေးနေခဲ့ကာ မိုးကောင်းကင်ယံတခွင်လုံး ပြည့်နှက်နေသော ကြောက်မက်ဖွယ် အပြာရောင် မီးတောက်များ ထွက်ပေါ်လာခဲ့သည်။

ကျုံးချင်ပင်လျှင် ကူကယ်ရာမဲ့စွာဖြင့် ချွေးများ စတင်၍ ထွက်လာသည်။

ကျုံးချင်က တီးတိုးရေရွတ်လိုက်သည်။

"ဘယ်လောက်တောင် ထိတ်လန့်ဖို့ ကောင်းတဲ့ ဆန်းကြယ်မီးတောက်လဲ..."

ကျုံးချင်၏မျက်ခုံးများ တွန့်ကွေးသွားခဲ့ကာ သူက ဥပဒေသစွမ်းအား အကာအကွယ်တစ်ခုကို သူ၏ခန္ဓာကိုယ်ပေါ်တွင် နောက်တစ်ကြိမ်လွှမ်းခြုံလိုက်သည်။

ထိုအချိန်မှသာ သူ၏ခန္ဓာကိုယ်ပေါ်ရှိ ပူလောင်သော ခံစားချက် အနည်းငယ် လျော့ကျသွားပေ၏။

သောင်းကျန်းနေသော ဆန်းကြယ်မီးတောက်ကို ရင်ဆိုင်ရချိန်တွင်...

ချီလင်က အလွန်အမင်း စိတ်လှုပ်ရှားစွာ ပြုမူနေခဲ့သည်။

ဤအရာက ကျုံးချင်ကို လွန်စွာထူးဆန်းသော ခံစားချက်တစ်မျိုးအား ခံစားရစေခဲ့သည်။

ထိုခံစားချက်မှာ... မင်းက ပိုပြီး ခုခံလေ ငါက ပိုပြီး စိတ်လှုပ်ရှားလေလေပဲ...

သောင်းကျန်းနေသော ဆန်းကြယ်မီးတောက်အောက်တွင် ချီလင်က ပါးစပ်ဖွင့်ဟလိုက်သည်ကို သူ မြင်တွေ့လိုက်ရ၏။

ထို့နောက် အကန့်အသတ်မဲ့ ရွှေရောင်နတ်ဘုရား အလင်းတန်းများ ပွင့်အံ့ထွက်လာပြီး ချီလင်၏ ခန္ဓာကိုယ်မှာ ဝါးမျိုနေသော တွင်းနက်ကြီး တစ်ခုအဖြစ်သို့ ပြောင်းလဲသွားပုံရသည်။

သူသည် ပတ်ဝန်းကျင်ရှိ ချော်ရည်မီးတောက်များအားလုံးကို အလိုရမ္မက်ကြီးစွာ ဝါးမျိုနေခဲ့သည်။

ဤအရာက ကျုံးချင်၏မျက်ခုံးများကို တွန့်သွားစေခဲ့သည်။

ချီလင်ပြောခဲ့သော နှိမ်နင်းခြင်းမှာ ဤကဲ့သို့ နည်းလမ်းဖြင့် ဖြစ်လိမ့်မည်ဟု သူ လုံးဝမျှော်လင့်မထားခဲ့ချေ။

တိုက်ရိုက်ဝါးမျိုခြင်း...

ဤမြင်ကွင်းကို ရိုးရှင်းပြီး ကြမ်းတမ်းသည်ဟု ဖော်ပြနိုင်သည်။

"ဝုန်း..."

ချော်ရည်များ၏အထက်တွင် ဟိန်းဟောက်သံ တစ်သံ ပေါက်ကွဲထွက်လာသည်ကို မြင်တွေ့နိုင်သည်။

ထို့နောက် အလယ်ဗဟိုနေရာတွင် အချင်းသုံးပေခန့် ရှိသော စုပ်ဝဲကြီးတစ်ခု ထွက်ပေါ်လာပေ၏။

ချီလင်၏ခန္ဓာကိုယ်မှာ အောက်ခြေမရှိသော ချောက်နက်ကြီးတစ်ခုနှင့် တူညီနေကာ ချော်ရည်မီးတောက်များအားလုံးကို အလိုရမ္မက်ကြီးစွာ ဝါးမျိုနေခဲ့သည်။

ထို့ပြင် ဆန်းကြယ်မီးတောက်ကို သူ အနည်းငယ် ဝါးမျိုလိုက်သည်နှင့်အမျှ သူ၏အရှိန်အဝါ စတင်၍ လှိုင်းထလာခဲ့သည်။

အကယ်၍ ချီလင်သည် ယခင်က ယင်သုံးပါးနယ်ပယ် ကျင့်ကြံမှုသာ ရှိခဲ့သည်ဟု ဆိုပါက...

ယခုအချိန်၌ သူ၏စွမ်းအားသည် မြင်နိုင်သောအမြန်နှုန်းဖြင့် စတင်၍ မြင့်တက်လာခဲ့လေပြီ။

အချိန်တိုလေး အတွင်းမှာပင် သူသည် ယန်သုံးပါးနယ်ပယ်သို့ ဝင်ရောက်သွားခဲ့သည်။

ထို့ပြင် ဤမြင့်တက်နေသော အမြန်နှုန်းမှာ ရပ်တန့်သွားမည့် အရိပ်အယောင် မပြခဲ့ချေ။

ချီလင်၏ကျင့်ကြံမှု မြင့်တက်လာသည်နှင့်အမျှ ဆန်းကြယ်မီးတောက်ကို သူ ဝါးမျိုသည့် အမြန်နှုန်းမှာ နောက်တစ်ကြိမ် အဆပေါင်းများစွာ တိုးလာခဲ့ပေ၏။

အကယ်၍ ယခင်က ချော်ရည်များသည် ကတော့ တစ်ခုထဲမှ ယိုစိမ့်ကျနေသော ရေများနှင့် တူခဲ့မည်ဆိုပါက ယခုအချိန်၌ မြေပြင်ပြိုကျသွားသကဲ့သို့ ဖြစ်နေသည်။

ချော်ရည်များက မြင်နိုင်သော အမြန်နှုန်းဖြင့် လျှင်မြန်စွာ လျော့ကျလာခဲ့သည်။

"ဂီး..."

ချီလင်က ဟိန်းဟောက်လိုက်ရာ မိုးကောင်းကင်ကို တုန်ခါသွားစေခဲ့သည်။

နောက်ဆုံးတွင် ချော်ရည်များအားလုံး ချီလင်၏ခန္ဓာကိုယ်ထဲသို့ တိုက်ရိုက်ဝင်ရောက်သွားသည်။

ထိုအရာကို မြင်တွေ့ချိန်၌ ဆန်းကြယ်မီးတောက် မူလအစသည် ထွက်ပြေးချင်ခဲ့ပေ၏။

ချီလင်၏ခန္ဓာကိုယ် လှုပ်ရှားသွားသည်။

သူ၏ခန္ဓာကိုယ်တစ်ခုလုံး မီးတောက်များ လောင်ကျွမ်းနေပြီး ထိတ်လန့်ဖွယ် အမြန်နှုန်းဖြင့် ပြေးဝင်သွားခဲ့သည်။

ချီလင်သည် ပါးစပ်ကို ကျယ်ကျယ်ဟထားပြီး သောင်းကျန်းနေသော ဆန်းကြယ်မီးတောက်ကို သူ၏ဗိုက်ထဲသို့ တိုက်ရိုက်ဝါးမျိုလိုက်သည်။

ဆန်းကြယ်မီးတောက်က သူ၏ခန္ဓာကိုယ်ထဲသို့ ဝင်ရောက်သွားသည်နှင့်အမျှ ရှောင်ဟေး၏ ထိတ်လန့်ဖွယ် အရှိန်အဝါက နောက်တစ်ကြိမ် ကြီးမားသော ပမာဏဖြင့် တိုးလာခဲ့သည်။

မျက်စိတစ်မှိတ်အတွင်းမှာပင် သူသည် ယန်သုံးပါးနယ်ပယ်မှ ဓမ္မသောင်းချီနယ်ပယ်သို့ ရောက်ရှိသွားခဲ့သည်။

ဤကဲ့သို့ တိုးတက်မှုအမြန်နှုန်းက ကျုံးချင်၏ မျက်ခုံးများကို အထိန်းအကွပ်မဲ့စွာ တွန့်ကွေးသွားစေပေ၏။

သူသည် သူ့ကိုယ်သူ မိုးကောင်းကင်ကို ဆန့်ကျင်နိုင်လောက်အောင် စွမ်းဆောင်နိုင်သည်ဟု ထင်မှတ်ထားခဲ့သည်။

သူသည် တပည့်များကို လက်ခံခဲ့ကာ တစ်နှစ်မပြည့်မီ အချိန်အတွင်း သူတို့သည် သေမျိုးများမှ ဓမ္မသောင်းချီနယ်ပယ်ရှိ ကြီးမြတ်သော ကျင့်ကြံသူများ ဖြစ်လာခဲ့ကြသည်။

ပိုင်လင်း၏ အင်မော်တယ်ခန္ဓာကိုယ်သည်လည်း ထိတ်လန့်ဖွယ် ကောင်းလှ၏။

တစ်ရက်အတွင်း သူမသည် ကောင်းကင်နက်နဲသိမ်မွေ့ အလယ်အလတ်အဆင့် မှ ယန်သုံးပါးနယ်ပယ် တတိယအဆင့် ပြီးပြည့်စုံခြင်းသို့ ရောက်ရှိသွားခဲ့သည်။

သို့သော် ယခုချိန်၌ ချီလင်ရှောင်ဟေး၏ စွမ်းဆောင်ရည်မှာ သူတို့၏တိုးတက်မှု အမြန်နှုန်းထက် လုံးဝနောက်ကျမနေခဲ့ချေ။

ဆန်းကြယ်မီးတောက်တစ်ခုလုံးကို ဝါးမျိုပြီးနောက် သူသည် ယင်သုံးပါးနယ်ပယ်မှ ဓမ္မသောင်းချီနယ်ပယ်သို့ အမှန်တကယ် မြင့်တက်သွားပေ၏။

ရှောင်ဟေးသည် ချီလင်နတ်ဘုရားသားရဲ ဟူသော နာမည်ကို ရရှိထားခြင်းမှာ အံ့အားသင့်စရာ မဟုတ်ပေ။

ဤတိုးတက်မှုနည်းလမ်း တစ်ခုတည်းကပင် လောကတခွင်ရှိ ကျင့်ကြံသူများကို ရှက်ရွံ့သွားစေနိုင်သည်။ သူသည် ကောင်းကင်ဘုံ၏ရွေးချယ်ခံ တစ်ယောက် ဖြစ်ရန် အမှန်တကယ်ကို ထိုက်တန်လှသည်။

ထို့ပြင် ချီလင်သည် ဆန်းကြယ်မီးတောက်ကို အပြည့်အဝ သန့်စင်ပြီးနောက် သူ၏ကိုယ်ပိုင်စွမ်းအားသည် ဓမ္မသောင်းချီနယ်ပယ် ပဉ္စမအဆင့်သို့ တစ်ဟုန်ထိုး မြင့်တက်သွားပေ၏။

သူ၏ကျင့်ကြံဆင့်သည် ကျုံးချင်ထက် အနည်းငယ်သာ နိမ့်ကျနေတော့သည်။

ထိုမျှသာ မကသေးဘဲ ယခုအချိန်၌ သူ၏ခန္ဓာကိုယ်တစ်ခုလုံး နီမြန်းနေကာ မီးတောက်များ လောင်ကျွမ်းနေခဲ့သည်။

သူ၏ အရေပြားတစ်လက်မတိုင်း အကြေးခွံတိုင်းမှာ မီးတောက်များ၏ အရင်းအမြစ် တစ်ခု ဖြစ်လာပုံရသည်။

သူသည် မီးချီလင်တစ်ကောင်နှင့် တူညီနေပေ၏။

သူ၏စွမ်းအားသည် အကြီးအကျယ် တိုးတက်လာရုံသာမက သူ၏အရေပြားအရောင်ပင် ပြောင်းလဲသွားခဲ့သည်။

သူသည် လေထဲတွင် မတ်တတ်ရပ်နေကာ မိုးကောင်းကင်ယံဆီသို့ ဦးတည်ပြီး ကြာရှည်စွာ ဟိန်းဟောက်လိုက်သည်။

ထိတ်လန့်ဖွယ်ကောင်းသည့် ကြမ်းတမ်းသော စွမ်းအားများ ရုတ်တရက် ထွက်ပေါ်လာပြီး ရှေးဟောင်းဆန်ကာ ကျယ်ပြန့်သော အရှိန်အဝါတစ်ရပ်ကို သယ်ဆောင်လာခဲ့ပေ၏။

သူသည် ရှေးဟောင်းကာလမှ ဖြတ်သန်းလာသော ဧရာမသားရဲကြီးတစ်ကောင်နှင့် တူညီနေသည်။

အချိန်တခဏကြာမျှ စိတ်လှုပ်ရှားနေပြီးနောက် ချီလင်သည် အလင်းတန်းတစ်တန်းအဖြစ် ပြောင်းလဲသွားပြီး ကျုံးချင်၏လက်မောင်းတွင် နောက်တစ်ကြိမ် တွယ်ကပ်သွားခဲ့သည်။

ယခုတစ်ကြိမ်တွင်မူ သူသည် အဆောင်လက်ဖွဲ့ တစ်ခုအလား ကျုံးချင်၏အရေပြားပေါ်တွင် ကပ်ငြိနေခဲ့သည်။

တစ်ချိန်တည်းမှာပင် အက်ရှရှအသံတစ်သံက တိုက်ရိုက်ထွက်ပေါ်လာခဲ့ပေ၏။

"သခင်... ဒီ ဆန်းကြယ်မီးတောက်ကို မျိုစုပ်ပြီးတဲ့နောက် ကျွန်တော်က မွေးရာပါ နတ်ဘုရားစွမ်းရည် အသစ်တစ်ခုကို နားလည်သွားတယ်... ဒီနတ်ဘုရားစွမ်းရည်ရဲ့ အံ့အားသင့်ဖို့ကောင်းတာတွေကို နားလည်ဖို့ လောလောဆယ်မှာ ကျွန်တော် အချိန်လိုတယ်... နောက်တစ်ကြိမ် သခင် လိုအပ်တဲ့အချိန်ကျရင် ကျွန်တော့်ကို ဆင့်ခေါ်လိုက်ပါ..."