အခန်း (၃၇၃-၃၇၄)

အခန်း (၃၇၃) - ကြာညိုမီးလျှံ ဆေးလုံးကို စားသုံးခြင်း၊ သတ္တမအဆင့်။

အုတ်မြစ်တည်ဆောက်ခြင်းသို့ တက်လှမ်းခြင်း

နောက်ထပ် ရက်အနည်းငယ် ကြာပြီးနောက်၊ ကျန်းဖန်သည် နောက်ဆုံးတွင် မီးကြေးနီကျွန်းသို့ ပြန်လည် ရောက်ရှိလာခဲ့သည်။

သေချာသည်မှာ စုဝေဝေမှလွဲ၍ သူ ထွက်ခွာသွားကြောင်းကို မည်သူမျှ မသိရှိခဲ့ကြချေ၊ သူ ငါးနဂါးကျွန်းသို့ သွားရောက်ခဲ့သည့် ခရီးစဉ်ကိုမူ ဆိုဖွယ်ရာပင် မရှိတော့ပေ။

အခြား ကျင့်ကြံသူများကမူ ကျန်းဖန်သည် သူ၏ နေအိမ်တွင် ကျင့်ကြံနေခြင်းသာ ဖြစ်မည်ဟု ထင်မှတ်ထားခဲ့ကြ၏။

မည်သို့ပင်ဆိုစေကာမူ အုတ်မြစ်တည်ဆောက်ခြင်း ကျင့်ကြံသူ တစ်ဦးအနေဖြင့် တစ်လ၊ နှစ်လခန့် တံခါးပိတ် ကျင့်ကြံခြင်းမှာ အတော်လေး ဖြစ်ရိုးဖြစ်စဉ် ဖြစ်သော ကိစ္စတစ်ခုပင် ဖြစ်သည်။

ရက်အနည်းငယ်မျှသာ ဆိုလျှင် ပြောနေစရာပင် မလိုတော့ချေ။

"ယောကျ်ား... ငါးနဂါးကျွန်းကို သွားတဲ့ ခရီးစဉ်မှာ ဘာမှမဖြစ်ခဲ့ဘူး မဟုတ်လားဟင်။"

ကျန်းဖန် ပြန်ရောက်လာသည်ကို မြင်လိုက်ရသောအခါ စုဝေဝေသည် လွန်စွာ ဝမ်းသာပျော်ရွှင်သွားခဲ့သည်။

"ဘာမှမဖြစ်ခဲ့ပါဘူး၊ အရာအားလုံးက အရမ်းကို အဆင်ပြေချောမွေ့ခဲ့ပါတယ်။"

ကျန်းဖန်သည် အနည်းငယ် ပြုံးလိုက်၏။ သူသည် ရွှေအမြုတေ ဘေးဒုက္ခ ကျင့်ကြံသူ နှင့် သီသီလေး လွဲချော်ခဲ့ရသည့် အကြောင်းကို ထုတ်ဖော်မပြောခဲ့ချေ၊ မည်သို့ပင်ဆိုစေကာမူ အဆုံးသတ်တွင် အရာအားလုံးမှာ အလွန် ချောမွေ့ခဲ့ပြီး သေဘေးမှ သီသီလေး လွတ်မြောက်ခဲ့ပြီ ဖြစ်သောကြောင့်ပင်။

ထို့အပြင် ဤကိစ္စများကို ပြောပြခြင်းက သူ၏ တာအိုလက်တွဲဖော်ကို စိုးရိမ်ပူပန်စေရုံသာ ရှိမည် ဖြစ်၏။

"ဒါနဲ့ ကိုယ် မင်းအတွက် လက်ဆောင်တစ်ခု ယူလာခဲ့တယ်၊ သဘောကျရဲ့လား ကြည့်ပါဦး။"

ဤအခိုက်အတန့်တွင် ကျန်းဖန်သည် သူ၏ ကိုယ်ပေါ်မှ လက်ဆောင်အချို့ကို ထုတ်ယူလိုက်သည်။

ထိပ်တန်းအဆင့် မှော်လက်နက် တစ်ခုနှင့် ညီမျှသော လက်ရာမြောက်သည့် ဆံထိုးတစ်ချောင်းဖြစ်ပြီး၊ အလှဆင်ရန် သက်သက်သာမက တိုက်ခိုက်ရန်အတွက်ပါ အသုံးပြုနိုင်ပေသည်။

ထို့အပြင် သူသည် လှပတင့်တယ်သော ပိုးသားဝတ်ရုံများနှင့် ရွှေငွေ လက်ဝတ်ရတနာ အများအပြားကိုလည်း ဝယ်ယူလာခဲ့၏။

"တကယ်ပါပဲ... ပိုက်ဆံတွေကို ဖြစ်သလို လျှောက်သုံးပြန်ပြီ၊ ကျွန်မဆီမှာ ဒီပစ္စည်းတွေ အများကြီး ရှိနေပြီးသားပဲဟာကို၊ ပိုက်ဆံတွေ အလဟဿ အကုန်ခံနေစရာ မလိုပါဘူး။ ပုံမှန်ရက်တွေအတွက် စုဆောင်းထားတာက ပိုကောင်းပါတယ်။" စုဝေဝေက ချွဲနွဲ့ကာ အပြစ်တင်လိုက်သည်။

ထိုသို့ ပြောလိုက်သော်ငြားလည်း၊ သူမ၏ ရင်ထဲတွင်မူ ပျားရည် သောက်လိုက်ရသကဲ့သို့ ချိုမြိန်ကာ ဝမ်းသာကြည်နူးနေခဲ့၏။

သူမသည် ကျန်းဖန် ပေးအပ်သော လက်ဆောင်များကို မြတ်မြတ်နိုးနိုးဖြင့် လက်ခံယူလိုက်သည်။

"ယောကျ်ား... ကျွန်မ အဲဒါလေးတွေ ဝတ်ပြရမလားဟင်။"

စုဝေဝေသည် သူမ၏ လှပသော မျက်တောင်လေးများကို ပုတ်ခတ်ပုတ်ခတ် လုပ်လိုက်၏။

"ကိုယ်က မင်း ဘာမှ မဝတ်ထားတဲ့ ပုံစံလေးကို ပိုသဘောကျတာ။"

ကျန်းဖန်က ပြုံးလျက် ပြောလိုက်သည်။

"ဟွန်း... နှာဘူးကြီး။"

စုဝေဝေသည် ဤလူဆိုးကြီးကို သူမ၏ လှပသော မျက်စောင်းလေးဖြင့် ထိုးလိုက်တော့သည်။

သို့သော် ထိုညတွင် ကျန်းဖန်သည် ကြင်နာယုယမှုများဖြင့် ပြည့်နှက်နေသော ညတစ်ညကို မြတ်မြတ်နိုးနိုး ခံစားပိုင်ဆိုင်ခဲ့ရ၏။

…

နောက်တစ်နေ့နံနက်။

ကျန်းဖန်သည် ကြီးမားသော စိတ်စွမ်းအားကို ထုတ်သုံးကာ ကြင်နာယုယမှု နယ်ပယ်မှ ရုန်းထွက်၍ ထလိုက်သည်။

သူသည် ဤခရီးစဉ်မှ ရရှိလာသော အကျိုးအမြတ်များကို တွက်ချက်ရန်အတွက် အနီးအနားရှိ တံခါးပိတ် ကျင့်ကြံရာ အခန်းထဲသို့ ဝင်ရောက်သွားခဲ့၏။

မည်သို့ပင်ဆိုစေကာမူ ထိုအဆင့် (၆) အခွင့်အရေး ဆိုသည်မှာ မည်သည့်အရာ ဖြစ်ကြောင်း သူ မသိရသေးချေ။

"နေပါဦး၊ ဒါက လေလံပွဲက အဆင့် (၂) အစီရင်စုပြား 'ဓာတ်ကြီးငါးပါး ဝိညာဉ်စုစည်းခြင်း အစီရင်စု' မဟုတ်ဘူးလား။ အဲဒါက တကယ်ကြီး ဒီထဲကို ရောက်နေတာလား။"

ဤအခိုက်အတန့်တွင် သိုလှောင်အိတ် တစ်လုံး၏ အတွင်း၌ အဆင့် (၂) အစီရင်စုပြား တစ်ခု ပေါ်လာသည်ကို မြင်လိုက်ရသဖြင့် ကျန်းဖန်သည် အလွန်အမင်း ဝမ်းသာသွားခဲ့သည်။ ၎င်းမှာ ဝိညာဉ်ကျောက်တုံး သုံးသောင်းမှ လေးသောင်းအထိ လေလံဆွဲခဲ့ရသော အလွန် တန်ဖိုးကြီးမားလှသည့် ပစ္စည်းတစ်ခုပင် ဖြစ်၏။

အုတ်မြစ်တည်ဆောက်ခြင်း ကျင့်ကြံသူ အုပ်စုကြီး တစ်ခုလုံးက ၎င်းအတွက် ရူးသွပ်စွာ ယှဉ်ပြိုင်ခဲ့ကြခြင်း ဖြစ်သည်။

ဤအဆင့် (၂) အစီရင်စုသည် အုတ်မြစ်တည်ဆောက်ခြင်း မိသားစု တစ်ခု၏ အဓိက မဟာအစီရင်စုပင် ဖြစ်နိုင်ပေသည်။

အကယ်၍ မိသားစု၏ နေအိမ်တွင် တပ်ဆင်ထားပါက၊ ၎င်းသည် ကီလိုမီတာ ရာနှင့်ချီ ကျယ်ဝန်းသော ဧရိယာကို လွှမ်းခြုံနိုင်ပြီး ဝိညာဉ်စွမ်းအင် အကာအကွယ် တစ်ခုကို ဖွဲ့စည်းပေးနိုင်၏။

မိသားစု တစ်ခုကို တည်ထောင်လိုသော မည်သည့် အုတ်မြစ်တည်ဆောက်ခြင်း ကျင့်ကြံသူအတွက်မဆို၊ ဤကဲ့သို့သော အဆင့် (၂) အစီရင်စု တစ်ခုကို ရရှိခြင်းက မြတ်နိုးဖွယ်ရာ ရည်မှန်းချက်တစ်ခုပင် ဖြစ်သည်။

၎င်းသည် နှစ်ပေါင်းများစွာ အသုံးပြုနိုင်သော အစီရင်စုပြား တစ်ခု ဖြစ်၏။

အကယ်၍ ဝိညာဉ်ကြော တစ်ခုတွင် တပ်ဆင်ထားပါက၊ ဝိညာဉ်ကျောက်တုံး အများအပြား စားသုံးရန်ပင် လိုအပ်မည် မဟုတ်ချေ။

၎င်းသည် သယ်ဆောင်ရလွယ်ကူသော အစီရင်စု တစ်ခုနှင့် ညီမျှပြီး၊ ပုံသေ တပ်ဆင်ရသော အစီရင်စုထက် အများကြီး ပိုမို ကောင်းမွန်ပေသည်။

ထို့အပြင် ဤအစီရင်စုသည် ကောင်းကင်နှင့် မြေကြီးကြားရှိ ဝိညာဉ်စွမ်းအင်များကို စုစည်းပေးနိုင်ပြီး၊ ပတ်ဝန်းကျင်ရှိ ဝိညာဉ်စွမ်းအင် သိပ်သည်းဆကို လေးဆယ်မှ ငါးဆယ် ရာခိုင်နှုန်းအထိ မြှင့်တင်ပေးကာ ကျင့်ကြံခြင်းဆိုင်ရာ သေးငယ်သော ကောင်းချီးရနယ်မြေ တစ်ခုကို ဖွဲ့စည်းပေးနိုင်၏။

ရွှမ်ကွမ် ဖုံးကွယ်ခြင်း အစီရင်စု နှင့် နှိုင်းယှဉ်ပါက၊ ဓာတ်ကြီးငါးပါး ဝိညာဉ်စုစည်းခြင်း အစီရင်စုသည် အထောက်အကူပြုခြင်းနှင့် ကာကွယ်ရေး ရည်ရွယ်ချက်များဆီသို့ ပိုမို ဦးတည်ထားပေသည်။

တစ်ခုစီတွင် ၎င်းတို့၏ ကိုယ်ပိုင် အားသာချက်များ ရှိကြ၏။

သံသယဖြစ်စရာမလိုပါ။ သိုလှောင်အိတ်ထဲတွင် အခြား မည်သည့် ရတနာမျှ မရှိခဲ့လျှင်တောင်မှ၊ ဤ ဓာတ်ကြီးငါးပါး ဝိညာဉ်စုစည်းခြင်း အစီရင်စု တစ်ခုတည်း ရှိနေခြင်းကပင် လုံလောက်နေပြီ ဖြစ်သည်။

"ဒါတွေက အဆင့် (၂) မိုးကြိုးမီးလျှံ ဆေးလုံးတွေလား။ အလုံး နှစ်ဆယ်တောင် ရှိနေတာလား။"

"မိုးကြိုးမီးလျှံ ဆေးလုံး တစ်လုံးရဲ့ စွမ်းအားက နောက်ပိုင်းအဆင့် အုတ်မြစ်တည်ဆောက်ခြင်း ကျင့်ကြံသူ တစ်ဦးရဲ့ အစွမ်းကုန် တိုက်ခိုက်မှုနဲ့ ညီမျှတယ်။"

"ဒီမိုးကြိုးမီးလျှံ ဆေးလုံးတွေက အဲဒီ အုတ်မြစ်တည်ဆောက်ခြင်း ဘေးဒုက္ခ ကျင့်ကြံသူတွေရဲ့ လျှို့ဝှက်ကတ်ပြားများ ဖြစ်နေမလား။"

ကျန်းဖန်သည် မိုးကြိုးမီးလျှံ ဆေးလုံးများကို လျင်မြန်စွာ ရှာတွေ့သွားခဲ့၏။

၎င်းတို့ကို ဆေးဖော်စပ်သူများက အထူးတလည် ဖော်စပ်ထားခြင်း ဖြစ်သည်ဟု ဆိုကြပေသည်။

ဤဆေးလုံး အမျိုးအစားသည် စားသုံးရန် မဟုတ်ဘဲ တိုက်ခိုက်ရေးတွင် အသုံးပြုရန် ဖြစ်၏။

ဆေးဖော်စပ်သူများ အတွက်လည်း၊ သူတို့သည် တိုက်ခိုက်နိုင်စွမ်း မရှိသော ကျင့်ကြံသူများ မဟုတ်ကြချေ။

သူတို့သည် ကျင့်ကြံမှု တိုးတက်စေရန်အတွက် ဆေးလုံးများကို ဖော်စပ်နိုင်သလို တိုက်ခိုက်ရေး ဆေးလုံးများကိုလည်း ဖော်စပ်နိုင်ပေသည်။

ဥပမာအားဖြင့် မိုးကြိုးမီးလျှံ စွမ်းအားများ ပါဝင်သော မိုးကြိုးမီးလျှံ ဆေးလုံးသည် ပေါက်ကွဲသွားချိန်တွင် ကီလိုမီတာ အတော်များများ ကျယ်ဝန်းသော ဧရိယာကို လွှမ်းခြုံသွားပြီး၊ အုတ်မြစ်တည်ဆောက်ခြင်း ကျင့်ကြံသူ တစ်ဦး၏ အစွမ်းကုန် တိုက်ခိုက်မှုနှင့် နှိုင်းယှဉ်နိုင်သော ဖျက်ဆီးနိုင်စွမ်း ရှိကာ တောင်များကို ဖြိုခွဲနိုင်ပြီး မြေကြီးကိုပင် အက်ကွဲသွားစေနိုင်၏။

အလားတူ ဖျက်ဆီးနိုင်စွမ်း ရှိသော အခြား ဆေးလုံးများလည်း ရှိသေးသည်။

သေချာသည်မှာ ထိုကဲ့သို့သော ဆေးလုံးများသည် အလွန်တရာ ကုန်ကျစရိတ် များပြားလှပေသည်။

ဆေးဖော်စပ်သူ အနည်းငယ်မျှသာ ၎င်းတို့ကို အောင်မြင်စွာ ဖော်စပ်နိုင်စွမ်း ရှိကြ၏။

"ကံကောင်းလို့ ငါက လျင်မြန်တဲ့ တိုက်ပွဲတွေနဲ့ အမြန် အဆုံးသတ်လိုက်ပြီး၊ ဒီ အုတ်မြစ်တည်ဆောက်ခြင်း ဘေးဒုက္ခ ကျင့်ကြံသူတွေ အုပ်စုကို အလျင်အမြန် ဖြေရှင်းပစ်နိုင်ခဲ့တာ။"

"အကယ်၍ သူတို့သာ တုံ့ပြန်ဖို့ အချိန်ရသွားခဲ့ရင် အန္တရာယ် များသွားလိမ့်မယ်။"

ဤအခိုက်အတန့်တွင် ကျန်းဖန်သည် ယခင် တိုက်ပွဲများကို ပြန်လည် သတိရလိုက်၏။

သူသည် လျင်မြန်သော တိုက်ပွဲများကို အလေ့အထအရ ပိုနှစ်သက်ပြီး၊ ရန်သူများကို မည်သည့် ယဉ်ကျေးမှုမျှ မပြသဘဲ အစွမ်းကုန် တိုက်ခိုက်လေ့ ရှိသည်။

သားကောင်ကို မြင်လိုက်ရသော ကျားသစ် တစ်ကောင်ကဲ့သို့၊ သူသည် သူ၏ ရန်သူများကို သေစေနိုင်သော တိုက်ခိုက်မှုတစ်ခု ပေးစွမ်းမည် ဖြစ်၏။

ရန်သူများ တုံ့ပြန်ရန် အခွင့်အရေး အနည်းငယ်မျှပင် ရရှိမည် မဟုတ်ချေ။

ပြန်လည် စဉ်းစားကြည့်ပါက ဤအလေ့အထသည် အကျိုးကျေးဇူး ရှိခဲ့ပြီး၊ ဤအုတ်မြစ်တည်ဆောက်ခြင်း ကျင့်ကြံသူများကို တန်ပြန်တိုက်ခိုက်ရန် မည်သည့် အခွင့်အရေးမျှ မပေးခဲ့ချေ။

မဟုတ်ပါက၊ သူသည် မမျှော်လင့်ထားသော အန္တရာယ်များနှင့် ရင်ဆိုင်ခဲ့ရနိုင်ပေသည်။

သို့သော် မိုးကြိုးမီးလျှံ ဆေးလုံး နှစ်ဆယ်ကို ရရှိခြင်းက လျှို့ဝှက်ကတ်ပြားတစ်ခု ရရှိခြင်းနှင့် ညီမျှပေသည်။

သေချာသည်မှာ သူသည် ၎င်းတို့အားလုံးကို အသုံးပြုနိုင်မည် မဟုတ်ချေ။

သို့သော် သူသည် ဆေးလုံး ဆယ်လုံးကို စုဝေဝေအား ပေးထားခဲ့သည်။ သို့မှသာ သူမတွင်လည်း ကိုယ့်ကိုယ်ကိုယ် ကာကွယ်ရန် လျှို့ဝှက်ကတ်ပြားတစ်ခု ရှိနေမည် ဖြစ်၏။

အနာဂတ်တွင် အန္တရာယ်များနှင့် ကြုံတွေ့လာရပါက၊ စုဝေ့

ဝေသည် ကာကွယ်ရေးအတွက် ၎င်းတို့ကို အားကိုးနိုင်ပေသည်။

"ကျွတ်... ကျွတ်... ဝိညာဉ်ကျောက်တုံးတွေက တစ်သန်းတောင် ရှိနေတာလား။"

"ဒီအုတ်မြစ်တည်ဆောက်ခြင်း ဘေးဒုက္ခ ကျင့်ကြံသူ အုပ်စုက ရတနာတွေ ဘယ်လောက်တောင် လုယက်ထားခဲ့တာလဲ။"

ကျန်းဖန်သည် သိုလှောင်အိတ်ထဲရှိ ရတနာများကို ဆက်လက် တွက်ချက်နေခဲ့၏။

အတွင်း၌ သိုလှောင်ထားသော ဝိညာဉ်ကျောက်တုံး အမြောက်အမြားကို သူ ရှာတွေ့ခဲ့သည်။ စုစုပေါင်း တစ်သန်းတိတိ ရှိပေသည်။

……

အခန်း (၃၇၄) - ကြာညိုမီးလျှံ ဆေးလုံးကို စားသုံးခြင်း၊ သတ္တမအဆင့် အုတ်မြစ်တည်ဆောက်ခြင်းသို့ တက်လှမ်းခြင်း (၂)

ဤမျှ ကြီးမားလှသော ကြွယ်ဝချမ်းသာမှုကို ရွှေအမြုတေ အဆင့်သို့ အသစ်ဝင်ရောက်လာသော ကျင့်ကြံသူ တစ်ဦးပင်လျှင် ပိုင်ဆိုင်ထားနိုင်မည် မဟုတ်ချေ။

အုတ်မြစ်တည်ဆောက်ခြင်း မိသားစု တစ်ခုအနေဖြင့် နှစ်ပေါင်းရာနှင့်ချီ၍ ကြွယ်ဝချမ်းသာမှုများကို စုဆောင်းခဲ့လျှင်တောင်မှ ဤမျှလောက်သာ ရှိနိုင်ပေသည်။

သို့သော် ယခုအခါ အရင်းအနှီးမလိုသော အရောင်းအဝယ် တစ်ခုမှတစ်ဆင့် ဤမျှ အံ့မခန်း ကြွယ်ဝချမ်းသာမှုများကို ရရှိခဲ့ခြင်း ဖြစ်၏။

၎င်းမှာ တကယ်ကို စိတ်ကူးဖြင့်ပင် မှန်းဆမရနိုင်လောက်အောင် ဖြစ်ပေသည်။

ပို၍ အရေးကြီးသည်မှာ ဤဖြစ်ရပ်တစ်ခုလုံးကို ထိုအုတ်မြစ်တည်ဆောက်ခြင်း ဘေးဒုက္ခ ကျင့်ကြံသူများ အပေါ်တွင် ပုံချလိုက်နိုင်ခြင်းပင် ဖြစ်၏။

ထို့ကြောင့် သူသည် လုံးဝ ပါဝင်ပတ်သက်ခြင်း မရှိဘဲ နေနိုင်ပေသည်။

ရိလင် ကျွန်းစုရှိ ရွှေအမြုတေ အင်အားစု အသီးသီးသည် လာရောက်၍ ပြဿနာရှာနိုင်ရန် လုံးဝ မဖြစ်နိုင်ချေ။

အကျိုးကျေးဇူး အားလုံးကို သူက ရိတ်သိမ်းသွားခဲ့ပြီး၊ ဆိုးကျိုး အားလုံးမှာမူ အခြားသူများအပေါ်သို့ ကျရောက်သွားခဲ့သည်ဟု ဆိုရမည်ပင်။

ဤသည်ကို အမှန်တကယ်ပင် နှစ်ဦးနှစ်ဖက် အကျိုးရှိသော အခြေအနေ တစ်ခုဟု ခေါ်ဆိုနိုင်ပေသည်။

မူလက ဤလေလံပွဲတွင် သူသည် ဝိညာဉ်ကျောက်တုံး နှစ်သိန်းမှ သုံးသိန်းအထိ အသုံးပြုခဲ့သော်ငြားလည်း၊ မျက်စိတစ်မှိတ် အတွင်းမှာပင် ၎င်းကို ပြန်လည် ရရှိသွားခဲ့၏။

ထို့အပြင် သူ၏ ပိုင်ဆိုင်မှုများမှာလည်း အဆမတန် မြင့်တက်သွားခဲ့သည်။

သူ ဘာပြောရမှန်းပင် မသိတော့ချေ။

အစပိုင်းတွင် သူ၏ ကြွယ်ဝချမ်းသာမှုများကို အဆက်မပြတ် ဖြုန်းတီးပစ်နိုင်သည်ဟု သူ ထင်မှတ်ထားခဲ့သော်လည်း၊ ပို၍ ဖြုန်းတီးလေလေ၊ ကြွယ်ဝချမ်းသာမှုများကို ပို၍ ရရှိလာလေလေ ဖြစ်လိမ့်မည်ဟု မည်သူက ကြိုတင် မြင်နိုင်ခဲ့မည်နည်း။

ဝိညာဉ်ကျောက်တုံးများသည် အဆုံးမရှိ ပွားများလာနိုင်သကဲ့သို့ပင် ဖြစ်နေ၏။

ထင်ရှားသည်မှာ ဤရတနာများ အားလုံးကို ပေါင်းလိုက်ပါက အဆင့် (၆) အခွင့်အရေး တစ်ခုနှင့် ညီမျှပေသည်။

"ဒါပေမယ့် အရေးအကြီးဆုံးကတော့ ကျင့်ကြံခြင်းအပေါ်မှာ မူတည်နေသေးတာပဲ။"

"ဝိညာဉ်ကျောက်တုံးတွေ ဆိုတာက ပြင်ပ ပိုင်ဆိုင်မှုတွေ သက်သက်ပါပဲ။"

"ဒီတစ်ကြိမ်တော့ ငါ ကြာညိုမီးလျှံ ဆေးလုံးကို ရရှိခဲ့တယ်။"

"ဒီအဆင့် (၂) ဝိညာဉ်ဆေးလုံးတွေကို စားသုံးခြင်းက ငါ့ရဲ့ ကျင့်ကြံမှုကို သေချာပေါက် နောက်ထပ် တက်လှမ်းနိုင်စေလိမ့်မယ်။"

"ငါ သတ္တမအဆင့် အုတ်မြစ်တည်ဆောက်ခြင်းကို တက်လှမ်းနိုင်ကောင်း တက်လှမ်းနိုင်လိမ့်မယ်။"

"အဲဒီအချိန်ကျရင်၊ ငါက နောက်ပိုင်းအဆင့် အုတ်မြစ်တည်ဆောက်ခြင်း ကျင့်ကြံသူ တစ်ယောက် ဖြစ်လာတော့မှာပဲ။"

ကျန်းဖန်သည် သူ၏ လက်သီးကို ဆုပ်ထားလိုက်၏။

ဤရတနာများမှာ အမှန်တကယ်ပင် အံ့မခန်း ဖြစ်သော်ငြားလည်း၊ သူသည် သူ၏ အခြေခံ အာရုံစိုက်မှု ဖြစ်သော ကျင့်ကြံခြင်းကို ဘယ်သောအခါမှ မေ့လျော့သွားခြင်း မရှိချေ။

ဤသည်ကို တွေးတောရင်း သူသည် မြေပြင်ပေါ်တွင် တင်ပျဉ်ခွေ ထိုင်ချလိုက်ပြီး ကြာညိုမီးလျှံ ဆေးလုံးကို ထုတ်ယူလိုက်သည်။

ထို့နောက် ဤကြာညိုမီးလျှံ ဆေးလုံးများကို သောင်းပြောင်းလဲခြင်း ဆေးပေါင်းဖိုကြီးထဲသို့ ထည့်လိုက်၏။

ဤကြာညိုမီးလျှံ ဆေးလုံးများမှာ အမှန်တကယ်ပင် ကောင်းမွန်သော်ငြားလည်း၊ သာမန် အရည်အသွေးသာ ရှိပေသည်။

၎င်းတို့တွင် အညစ်အကြေး အမြောက်အမြားနှင့် ဆေးအဆိပ်များ ပါဝင်နေ၏။

ဤကဲ့သို့သော ကိစ္စရပ်များသည် သာမန် အုတ်မြစ်တည်ဆောက်ခြင်း ကျင့်ကြံသူများအတွက် စိုးရိမ်စရာ ဖြစ်ချင်မှ ဖြစ်ပေလိမ့်မည်။

သို့သော် ကျန်းဖန်အတွက်မူ မစားသုံးမီတွင် ကြာညိုမီးလျှံ ဆေးလုံးထဲမှ အညစ်အကြေးများနှင့် ဆေးအဆိပ်များကို လုံးဝ သန့်စင်ပစ်ရန် သဘာဝကျကျပင် လိုအပ်လှသည်။

ဤနည်းအားဖြင့် ဆေးစွမ်းကို ခံနိုင်ရည်ရှိလာခြင်းအား သိသိသာသာ လျှော့ချပေးနိုင်ရုံသာမက ဆေးစွမ်းကိုပါ ပိုမို အားကောင်းလာစေနိုင်ပေသည်။

ဝုန်း~~

မျက်တောင်တစ်ခတ် အတွင်းမှာပင် သောင်းပြောင်းလဲခြင်း ဆေးပေါင်းဖိုကြီး အသက်ဝင်လာပြီး၊ ကြာညိုမီးလျှံ ဆေးလုံး တစ်လုံးစီကို လျင်မြန်စွာ သန့်စင်ပေးလိုက်၏။

အနက်ရောင် အညစ်အကြေး အမြောက်အမြားသည် ဖယ်ရှားခံလိုက်ရသည်။

ကြာညိုမီးလျှံ ဆေးလုံး တစ်လုံးစီ၏ အရွယ်အစားမှာ ချက်ချင်း ထက်ဝက်တိတိ လျော့ကျသွားသော်ငြားလည်း၊ သင်းပျံ့လှသော ဆေးရနံ့တစ်ခုကို ထုတ်လွှတ်နေခဲ့၏။

တစ်ချိန်တည်းမှာပင် အပြာနုရောင် အလင်းတန်းများ ထွက်ပေါ်လာ၏။ ထိုဆေးလုံးသည် ချောမွေ့သော မျက်နှာပြင်နှင့်အတူ လုံးဝ အပြစ်အနာအဆာကင်းမဲ့ပုံ ရပေသည်။

ထင်ရှားသည်မှာ ဤသည်က ဆေးဖော်စပ်သူတိုင်း အိပ်မက်မက်လေ့ရှိသော ပြီးပြည့်စုံသည့် အရည်အသွေးရှိ ဆေးလုံးပင် ဖြစ်၏။

အကယ်၍ ဆေးဖော်စပ်သူ အချို့သာ လက်ရှိ ကြာညိုမီးလျှံ ဆေးလုံးများကို မြင်တွေ့ရမည်ဆိုပါက၊ သူတို့သည် မနာလိုမှုများဖြင့် သေချာပေါက် ရူးသွပ်သွားကြမည် ဖြစ်သည်။

သို့သော် ကျန်းဖန်အတွက်မူ ဤသည်မှာ ပုံမှန် ကိစ္စရပ်တစ်ခု ဖြစ်နေပြီ ဖြစ်၏။

သူ ဆေးလုံးများကို ဝယ်ယူလိုက်တိုင်း ၎င်းတို့ကို သောင်းပြောင်းလဲခြင်း ဆေးပေါင်းဖိုကြီးက ပြီးပြည့်စုံသည့် အရည်အသွေးရှိ ဆေးလုံးများအဖြစ် သန့်စင်ပေးလေ့ ရှိသည်။

သို့တိုင်အောင် ဤဆေးလုံး အများစုကို သူနှင့် စုဝေဝေတို့သာ စားသုံးလေ့ ရှိကြ၏။

သူသည် ဤပြီးပြည့်စုံသည့် အရည်အသွေးရှိ ဆေးလုံးများကို ပိုက်ဆံရရန် ရောင်းချဖို့ မလိုအပ်သောကြောင့်ပင်။

ထို့အပြင် အကယ်၍ ပြီးပြည့်စုံသည့် ဆေးလုံး အမြောက်အမြားကို ရောင်းချလိုက်မည်ဆိုပါက၊ ၎င်းသည် အခွင့်အရေးသမား အချို့၏ အာရုံစိုက်မှုကို သေချာပေါက် ဆွဲဆောင်နိုင်မည် ဖြစ်သည်။

ကျန်းဖန်အတွက်တော့ ထိုသည်က ကောင်းမွန်သည့်အရာနှင့် အလွန်တရာ ဝေးကွာလှပေသည်။

သူသည် တိတ်တဆိတ် ကျင့်ကြံကာ တည်ငြိမ်စွာ ကြီးထွားလာခြင်းကိုသာ ပိုနှစ်သက်၏။

ထို့အပြင် သူသည် ဝိညာဉ်ကျောက်တုံးများ လုံးဝ မရှားပါးလှသဖြင့်၊ သဘာဝကျကျပင် အန္တရာယ်ယူစရာ အကြောင်း မရှိချေ။

ဘုန်း။

ကျန်းဖန်သည် မြေပြင်ပေါ်တွင် တင်ပျဉ်ခွေ ထိုင်ချလိုက်ပြီး ကြာညိုမီးလျှံ ဆေးလုံး တစ်လုံးကို ချက်ချင်း မျိုချလိုက်၏။

သူသည် ဓာတ်ကြီးငါးပါး အင်းကျမ်းကို အသက်သွင်းလိုက်ပြီး ဆေးလုံးကို လျင်မြန်စွာ သန့်စင်လိုက်သည်။

ရုတ်တရက် ကြာညိုမီးလျှံ ဆေးလုံးသည် သူ၏ အစာအိမ်ထဲသို့ ဝင်ရောက်သွားပြီးနောက် အပြာနုရောင် မီးတောက်အစုအဝေး တစ်ခုအဖြစ် ပြောင်းလဲသွားခဲ့၏။

ဤကြီးမားလှသော ဆေးစွမ်းများသည် သူ၏ ချီကြောများ နက်ရှိုင်းရာသို့ စီးဝင်သွားပြီး၊ သူ၏ ခြေလက်အင်္ဂါများနှင့် အရိုးများ၊ ထို့အပြင် သူ၏ 'မိန်' နှင့် 'ချီပင်လယ်' ထဲသို့ အရှိန်အဟုန်ဖြင့် ဝင်ရောက်သွားခဲ့သည်။

ထို့နောက် မူလအင်း၏ ဝါးမြို စုပ်ယူခြင်းကို ခံလိုက်ရပြီး၊ မူလ ဝိညာဉ်စွမ်းအား အစက်များအဖြစ် လျင်မြန်စွာ ပြောင်းလဲသွားခဲ့၏။

အကယ်၍ ကောင်းကင်နှင့် မြေကြီးကြားရှိ ဝိညာဉ်ချီကို ဝါးမြိုကာ ပြင်းပြင်းထန်ထန် ကျင့်ကြံရမည်ဆိုပါက၊ မူလ ဝိညာဉ်စွမ်းအား တစ်စက်ကို စုစည်းရန် အချိန်မည်မျှ ကြာမြင့်မည်ကို သူ သိနိုင်မည် မဟုတ်ချေ။

သို့သော် ယခုအခါ ဆေးလုံးများ၏ အကူအညီဖြင့် လုပ်ဆောင်နိုင်စွမ်းမှာ အဆပေါင်းများစွာ ကြီးမားစွာ တိုးတက်လာခဲ့ပြီ ဖြစ်သည်။

မူလ ဝိညာဉ်စွမ်းအားများသည် သူ၏ 'မိန်' နှင့် 'ချီပင်လယ်' နက်ရှိုင်းရာ၌ တစ်စက်ပြီး တစ်စက် ပေါင်းစပ် ဖွဲ့စည်းလာခဲ့၏။

"ကျွတ်... ကျွတ်... သခင်ပီပီပဲ၊ ဒီဆေးလုံးတွေရဲ့ အကူအညီနဲ့ဆိုရင် သတ္တမအဆင့် အုတ်မြစ်တည်ဆောက်ခြင်းကို မကြာခင် တက်လှမ်းနိုင်တော့မှာပဲ။"

"ပါရမီ ရှိတာက တကယ်ကို စိတ်လှုပ်ရှားစရာ ကောင်းတာပဲ၊ ချိုးဖောက်ဖို့ ခက်ခဲတဲ့ အတားအဆီးတွေ မရှိသလောက်ဘဲ"

သောင်းပြောင်းလဲခြင်း ဆေးပေါင်းဖိုကြီးက ချီးကျူးလိုက်၏၊ ၎င်းသည် အသိဉာဏ်ပါရမီ နိမ့်ကျမှုကြောင့် အလွန်အမင်း ဒုက္ခရောက်ခဲ့ရပြီး မရေမတွက်နိုင်သော စိန်ခေါ်မှုများနှင့် ရင်ဆိုင်ခဲ့ရသည့် ယခင် ကံဆိုးသော သခင်ဖြစ်သူ တာအိုရဲဘော် ဝမ်ဟွာကို ပြန်လည် သတိရသွားခဲ့သည်။

…

အချိန်တွေ လျင်မြန်စွာ ကုန်ဆုံးသွားပြီး မကြာမီမှာပင် နောက်ထပ် တစ်လ ကုန်ဆုံးသွားခဲ့ပြန်သည်။

တိတ်ဆိတ်ငြိမ်သက်နေသော အခန်းတစ်ခု အတွင်း၌။

ကျန်းဖန်သည် လွန်ခဲ့သော တစ်လတာ ကာလအတွင်း ကြာညိုမီးလျှံ ဆေးလုံး၏ ဆေးစွမ်းများကို စုပ်ယူနေခဲ့၏။

ချီပင်လယ် နက်ရှိုင်းရာရှိ မူလ ဝိညာဉ်စွမ်းအားများသည် အဆက်မပြတ် တိုးပွားနေခဲ့သည်။

သူ၏ ခန္ဓာကိုယ်တွင်းရှိ ကြီးမားလှသော မူလ ဝိညာဉ်စွမ်းအားများသည် သူ၏ မြောက်များစွာသော ချီကြောများကို အားစိုက်ထုတ်စရာ မလိုဘဲ ထိုးဖောက် ဖြတ်သန်းသွားခဲ့၏။

ယခုအခါ သူသည် ချီကြော (၇၂) ခုကို အပြည့်အဝ စုပ်ယူ ပေါင်းစပ်နိုင်ခဲ့ပြီ ဖြစ်သည်။

ထင်ရှားသည်မှာ ဤတစ်လတာ ကာလအတွင်း အတွင်းပိုင်းရှိ မူလ ဝိညာဉ်စွမ်းအားများသည် ဒုတိယတန်းစား ချီကြော ၇၂ ခုကို ပြည့်နှက်သွားစေခဲ့ပြီး၊ သူ၏ ကျင့်ကြံမှုကို ဆဋ္ဌမအဆင့် အုတ်မြစ်တည်ဆောက်ခြင်း ပြီးပြည့်စုံသည့် အဆင့်သို့ အလွယ်တကူ ရောက်ရှိသွားစေခဲ့ခြင်းပင် ဖြစ်၏။

သံသယဖြစ်စရာမလိုပါ။ ကြာညိုမီးလျှံ ဆေးလုံး၏ ဆေးစွမ်းမှာ အမှန်တကယ်ပင် ထူးကဲလှပေသည်။

သူသည် ဆေး နှစ်ပုလင်းကိုသာ သောက်ရသေးသော်ငြားလည်း၊ အတွင်းပိုင်းရှိ မူလ ဝိညာဉ်စွမ်းအားများသည် ဆဋ္ဌမအဆင့် အုတ်မြစ်တည်ဆောက်ခြင်း ပြီးပြည့်စုံသည့်အဆင့်သို့ ရောက်ရှိသွားခဲ့ပြီး၊ သူ၏ ကျင့်ကြံခြင်း လုပ်ဆောင်နိုင်စွမ်းကို အကြီးအကျယ် မြှင့်တင်ပေးနိုင်ခဲ့၏။

ထို့အပြင် ပြီးပြည့်စုံသည့် အရည်အသွေးရှိ ဆေးလုံးကြောင့်၊ ဆေးစွမ်းကို သူ၏ ခံနိုင်ရည်ရှိလာခြင်းမှာလည်း အကြီးအကျယ် လျော့ကျသွားခဲ့သည်။

ထို့ကြောင့် ကျန်ရှိနေသော ကြာညိုမီးလျှံ ဆေးလုံး သုံးပုလင်းကပင်လျှင် အတွင်းပိုင်းရှိ မူလ ဝိညာဉ်စွမ်းအားများကို ဆက်လက် မြှင့်တင်ပေးနိုင်စွမ်း ရှိသေး၏။

သူ၏ ကျင့်ကြံခြင်း အရှိန်အဟုန်နှင့် လုပ်ဆောင်နိုင်စွမ်းကို မြန်ဆန်လာစေခဲ့သည်။

"စလိုက်ကြရအောင်။"

ကျန်းဖန်သည် သူ၏ ကျင့်ကြံမှု ချိုးဖောက်ဝင်ရောက်ခြင်းမှာ ဖြစ်ရိုးဖြစ်စဉ် ကိစ္စတစ်ခု ဖြစ်နေပြီဖြစ်ရာ၊ တည်ငြိမ်အေးချမ်းစွာဖြင့် မြေပြင်ပေါ်တွင် တင်ပျဉ်ခွေ ထိုင်ချလိုက်၏။

သူ၏ ချီပင်လယ် နက်ရှိုင်းရာရှိ မူလအင်းသည် အားစိုက်ထုတ်စရာ မလိုဘဲ လည်ပတ်နေခဲ့သည်။

၎င်းသည် အတွင်းပိုင်းရှိ မူလ ဝိညာဉ်စွမ်းအားများကို ဆွဲယူကာ တစ်ပတ်ပြီး တစ်ပတ် လည်ပတ်နေစေခဲ့၏။

ဝုန်း~~

ဤသို့သော ဆွဲငင်အားအောက်တွင် ကောင်းကင်နှင့် မြေကြီးကြားရှိ ဝိညာဉ်ချီများသည် အရှိန်အဟုန်ဖြင့် တက်လာပြီး၊ သူ၏ ခန္ဓာကိုယ်ကို ဝိညာဉ်ချီ ဝဲကတော့ တစ်ခုအဖြစ် ပြောင်းလဲသွားစေကာ၊ သူ၏ ဝိညာဉ်အမြစ် မှတစ်ဆင့် စီးဆင်းပြီး သူ၏ ခန္ဓာကိုယ်ထဲသို့ ဝင်ရောက်သွားခဲ့သည်။

ဤအခိုက်အတန့်တွင် ကြီးမားလှသော ဝိညာဉ်ချီများသည် သူ၏ ခန္ဓာကိုယ်ထဲသို့ ဝင်ရောက်လာပြီး၊ မူလ ဝိညာဉ်စွမ်းအားများကို ကြမ်းတမ်းသွားစေကာ သတ္တမအဆင့် အုတ်မြစ်တည်ဆောက်ခြင်း၏ ချိုးဖောက်ဖို့ ခက်ခဲသော မှတ်တိုင်ကို ဒေါသတကြီး ထိုးနှက်တိုက်ခိုက်စေခဲ့၏။

သတိပြုရမည့် အချက်မှာ ဆဋ္ဌမအဆင့်နှင့် သတ္တမအဆင့် အုတ်မြစ်တည်ဆောက်ခြင်း အကြားတွင် အဆင့်တစ်ခုသာ ကွာခြားသော်ငြားလည်း၊ ၎င်းသည် အလယ်အလတ်အဆင့်နှင့် နောက်ပိုင်းအဆင့် အုတ်မြစ်တည်ဆောက်ခြင်း အကြား ကြီးမားသော ချိုးဖောက်ဖို့ ခက်ခဲသည့် မှတ်တိုင်တစ်ခုကို ဖွဲ့စည်းထားခြင်းပင် ဖြစ်သည်။

မရေမတွက်နိုင်သော အုတ်မြစ်တည်ဆောက်ခြင်း ကျင့်ကြံသူများသည် ဆယ်စုနှစ်ပေါင်းများစွာတိုင်အောင် ဤမှတ်တိုင်တွင် ပိတ်မိနေခဲ့ကြ၏။

တစ်ခါတစ်ရံတွင် သူတို့သည် တစ်သက်လုံး ချိုးဖောက်ဝင်ရောက်နိုင်မည် မဟုတ်ချေ။

ဤမှတ်တိုင်က အုတ်မြစ်တည်ဆောက်ခြင်း ကျင့်ကြံသူ အများအပြားကို ဟန့်တားထားရသည့် အကြောင်းရင်းမှာ သတ္တမအဆင့်သို့ ချိုးဖောက်ဝင်ရောက်ရန်အတွက် ဒုတိယတန်းစား ချီကြော (၇၂) ခုကို လုံးဝ ထိုးဖောက်ဝင်ရောက်ကာ ကြီးမားကျယ်ပြန့်သော လည်ပတ်မှုစနစ် တစ်ခု ဖွဲ့စည်းရန် လိုအပ်သောကြောင့်ပင် ဖြစ်သည်။

သို့သော် အကယ်၍ အုတ်မြစ်တည်ဆောက်ခြင်း ကျင့်ကြံသူ တစ်ဦး၏ ဝိညာဉ်စွမ်းအားသည် လုံလောက်အောင် မသန့်စင်ပါက သို့မဟုတ် သူတို့၏ ချီကြောများသည် လုံလောက်အောင် ခံနိုင်ရည် မရှိပါက၊ ချီကြောများကို စုပ်ယူ ပေါင်းစပ်သည့် လုပ်ငန်းစဉ် အတွင်း၌ ခန္ဓာကိုယ်၏ ချီကြောများနှင့် အတွင်းအင်္ဂါများကို ထိခိုက်ပျက်စီးသွားစေနိုင်၏။

အချိန်ကြာလာသည်နှင့်အမျှ စုဆောင်းမိလာပါက ပြင်းထန်သော ဒဏ်ရာများကို ဖြစ်ပေါ်စေနိုင်သည်။

ထိုအချိန်ကျလျှင် တစ်ယောက်ယောက်သည် နတ်ဆိုးဝင်ပူးခြင်းသို့ ကျရောက်သွားနိုင်ပြီး ပြင်းထန်စွာ ဒဏ်ရာရကာ သေဆုံးသွားနိုင်ပေသည်။

ထို့ကြောင့် သာမန် အုတ်မြစ်တည်ဆောက်ခြင်း ကျင့်ကြံသူများအတွက် ဤသည်မှာ ဖြတ်ကျော်ရန် နီးပါး မဖြစ်နိုင်သော ချောက်ကမ်းပါးကြီး တစ်ခုပင် ဖြစ်၏။

သေချာသည်မှာ ကျန်းဖန်အတွက်မူ ဤသည်က ဘာမှမဟုတ်ချေ။

သူ၏ ခန္ဓာကိုယ် တည်ဆောက်ပုံမှာ အဆင့် (၂) နောက်ပိုင်းအဆင့်သို့ ရောက်ရှိနေပြီဖြစ်ပြီး၊ ချီကြောတစ်ခုစီတိုင်းမှာ အလွန်တရာ ခံနိုင်ရည် ရှိနေကာ၊ အတွင်းပိုင်းရှိ ဝိညာဉ်စွမ်းအားများ မည်မျှပင် ရိုက်ခတ်နေစေကာမူ ချီကြောများကို အနည်းငယ်မျှပင် ထိခိုက်စေနိုင်မည် မဟုတ်ချေ။

ထို့အပြင် ဓာတ်ကြီးငါးပါး အင်းကျမ်းကို ကျင့်ကြံထားသဖြင့် သူ၏ အတွင်းပိုင်းရှိ မူလ ဝိညာဉ်စွမ်းအားများမှာ အလွန်တရာ သန့်စင်နေပြီး မည်သည့် အညစ်အကြေးမျှ ပါဝင်ခြင်း မရှိချေ။

ထို့ကြောင့် သူ့အတွက် ဤသည်မှာ ချိုးဖောက်ဖို့ ခက်ခဲသော မှတ်တိုင်တစ်ခုဟု မသတ်မှတ်နိုင်ချေ။

တစ်ဟုန်ထိုး အောင်မြင်အောင် လုပ်ဆောင်နိုင်စွမ်း အပြည့်အဝ ရှိပေသည်။

ဘုန်း

ဤအခိုက်အတန့်တွင် ကျန်းဖန်သည် အတွင်းပိုင်းရှိ မူလ ဝိညာဉ်စွမ်းအားများကို အသက်သွင်းလိုက်ပြီး သတ္တမအဆင့် အုတ်မြစ်တည်ဆောက်ခြင်းကို စတင် ထိုးနှက်တိုက်ခိုက်လိုက်၏။

တိုက်ခိုက်မှု တစ်ချက်တည်းဖြင့်ပင် သတ္တမအဆင့်၏ ချိုးဖောက်ဖို့ ခက်ခဲသော အမှတ်သည် အပိုင်းပိုင်းအစအန ဖြစ်သွားခဲ့သည်။

အသစ်စက်စက် ချီကြောတစ်ခုကို အားစိုက်ထုတ်စရာ မလိုဘဲ ထိုးဖောက် ဝင်ရောက်သွားနိုင်ခဲ့၏။

သတ္တမအဆင့် အုတ်မြစ်တည်ဆောက်ခြင်း။

ဤအခိုက်အတန့်တွင် သူ၏ ကျင့်ကြံမှုမှာ ကြီးမားသော ချိုးဖောက်ဝင်ရောက်မှု တစ်ခုကို ရရှိသွားပြီး၊ ဆဋ္ဌမအဆင့်မှ သတ္တမအဆင့် နယ်ပယ်သို့ တက်လှမ်းသွား၏။ ယခုအခါ နောက်ပိုင်းအဆင့် အုတ်မြစ်တည်ဆောက်ခြင်း ကျင့်ကြံသူ တစ်ဦး ဖြစ်လာပြီ ဖြစ်ကြောင်း ကျန်းဖန် အာရုံခံနိုင်ပေသည်။

သာမန် အုတ်မြစ်တည်ဆောက်ခြင်း ကျင့်ကြံသူများအတွက် ပါရမီပါသူများပင်လျှင် သတ္တမအဆင့်သို့ ရောက်ရှိရန် အခွင့်အရေး မရမီ အသက် တစ်ရာ့ငါးဆယ် အထိ နေထိုင်ရမည် ဖြစ်၏။

ကျန်းဖန်အတွက်မူ အသက် သုံးဆယ်ပင် မပြည့်သေးသော်ငြားလည်း သတ္တမအဆင့်သို့ ချိုးဖောက်ဝင်ရောက်နိုင်ခဲ့ပြီ ဖြစ်သည်။

အကယ်၍ ဤသတင်းသာ ပြန့်နှံ့သွားပါက၊ ၎င်းသည် ရိလင် ကျွန်းစု တစ်ခုလုံးကို သေချာပေါက် တုန်လှုပ်သွားစေမည် ဖြစ်၏။

သို့သော် ဤသည်က သူ့ကို လူအများအပြား၏ ပစ်မှတ် ဖြစ်လာစေနိုင်ပေသည်။

မည်သို့ပင်ဆိုစေကာမူ သစ်တောထက် မြင့်မားစွာ မတ်တတ်ရပ်နေသော သစ်ပင်တစ်ပင်သည် လေတိုက်ခတ်မှုကြောင့် သေချာပေါက် ပျက်စီးသွားရမည် မဟုတ်ပါလော။

သူသည် သူ၏ ကျင့်ကြံမှုကို လူသိရှင်ကြား ထုတ်ဖော်ပြသလောက်အောင် မိုက်မဲသူ မဟုတ်ချေ။

ကျင့်ကြံသူများအတွက် တိတ်တဆိတ် ကြွယ်ဝချမ်းသာလာခြင်းက ပိုမို ပညာရှိကျသော ရွေးချယ်မှု တစ်ခုပင် ဖြစ်၏။

ထို့အပြင် ကျင့်ကြံခြင်းလောကတွင် လူတစ်ယောက်၏ အသက်အရွယ်ကို သူတို့၏ ရုပ်ရည်အသွင်အပြင်မှ ခန့်မှန်းရန်မှာ ခက်ခဲလှပေသည်။

တစ်ခါတစ်ရံတွင် သူတို့သည် နုပျိုနေပုံပေါ်သော်ငြားလည်း တကယ်တမ်းတွင် နှစ်ရာပေါင်း၊ ထောင်ပေါင်းများစွာတိုင်အောင် အသက်ရှင်နေထိုင်ခဲ့ကြပြီး ဖြစ်၏။

ထို့ကြောင့် ကျန်းဖန်က ကိုယ်တိုင် ထုတ်ဖော်မပြောသရွေ့ သူ၏ အသက်အရွယ် အမှန်ကို မည်သူကမျှ သိနိုင်မည် မဟုတ်ချေ။

လောလောဆယ်တွင် ဝေလငါးနီကျွန်းပေါ်ရှိ ထိုအုတ်မြစ်တည်ဆောက်ခြင်း ကျင့်ကြံသူများသည် ကျန်းဖန်ကို အသက် တစ်ရာကျော် နေထိုင်ခဲ့ပြီးဖြစ်သည်ဟု ယူဆထားကြ၏။