အခန်း (၁၆၀၀-၁၆၀၂)

အခန်း( ၁၆၀၀ )

နတ်ဘုရင်ခံတစ်ဦး စေလွှတ်ခြင်း

နောက်တစ်လတာကာလအတွင်း ကစဉ့်ကလျား ပင်လယ်၌ ကြုံတွေ့ခဲ့ရသော အတွေ့အကြုံများကို ဝေမျှရင်း ရှောင်ရွှီရင်နှင့် ဆက်ဆံရေးကို လုချန်း ပျိုးထောင်နေခဲ့သည်။

စနစ်အကြောင်းကိုတော့ ရှောင်ရွှီရင်အား လုချန်း မပြောပြခဲ့ချေ။ အတိတ်ဘဝမှ ဇနီးများကို မည်သို့ ဆုံတွေ့ခဲ့ကြောင်းနှင့် တစ်ဦးချင်းစီကို မည်သို့ တစ်ယောက်ပြီးတစ်ယောက် ရှာဖွေတွေ့ရှိခဲ့ကြောင်းကိုသာ သူမအား သူ ပြောပြခဲ့၏။

လုချန်း ဇနီးတစ်ဦးကို ရှာတွေ့သည့်အကြောင်း ကြားတိုင်း ရှောင်ရွှီရင်၏ စိတ်ထဲတွင် ခံစားချက်ကလေးတစ်ခု နိုးထလာပြီး သူမ၏ ခန္ဓာကိုယ်ကို ထိန်းချုပ်နိုင်စွမ်း ကင်းမဲ့သွားတတ်သည်။

ထိုအရာက လုချန်းအား အလွန်စိတ်ဝင်စားသွားစေ၏။ ပုံပြင်များကို နားထောင်ရုံမျှဖြင့် ရှောင်ရွှီရင်စိတ်ထဲ ခံစားချက်များ ဖြစ်ပေါ်လာလိမ့်မည်ဟု သူ လုံးဝ မမျှော်လင့်ထားခဲ့ပေ။

မျက်စိတစ်မှိတ်အတွင်းမှာပင် တစ်လတာ အချိန်ကာလ ကုန်ဆုံးသွားခဲ့ပြီ ဖြစ်သည်။

အတူတကွ အချိန်ကုန်ဆုံးခဲ့ပြီးနောက် ရှောင်ရွှီရင်လည်း စတင်ဆုံတွေ့စဉ်ကကဲ့သို့ ရှက်ရွံ့မနေတော့ပဲ တဖြည်းဖြည်း ပွင့်လင်းလာခဲ့၏။ နှစ်ပေါင်း သန်းသောင်းချီ၍ အသက်ရှင်ခဲ့သူဖြစ်ရာ အခြေအနေနှင့် လိုက်လျောညီထွေဖြစ်အောင် သူမ လျင်မြန်စွာ ပြောင်းလဲနိုင်စွမ်း ရှိသည်။

အထူးသဖြင့် လုချန်းသည် သူမ အလွန် လေးစားကြည်ညိုရသည့် အမျိုးသား မဟုတ်ပါလား။

ထိုအခိုက်အတန့်တွင် လုချန်းဘေး၌ ရှောင်ရွှီရင် ထိုင်နေရင်း စူးစမ်းစွာ မေးမြန်းလိုက်၏။

“အင်း... ရှင်က ဖန်တီးခြင်း လမ်းစဉ်ကို ကျင့်ကြံတာဆိုတော့ သက်ရှိတွေကို ဖန်တီးတဲ့နေရာမှာ အရမ်း တော်မှာပဲနော်။”

ထိုအရာကို ကြားလျှင် လုချန်းက ပြုံးလျက် ရှောင်ရွှီရင်ကို

“ဘယ်လိုသက်ရှိမျိုးကို အစ်မက ဆိုလိုတာလဲ”

နတ်မိမယ်က အရှက်အကြောက်မရှိပဲ

“သဘာဝအတိုင်း... လူသားမျိုးနွယ်ပေါ့”

လုချန်းက

“လောလောဆယ် ထျန်းရန် နတ်ဘုရား နယ်မြေရဲ့ မျိုးပွားခြင်းလမ်းစဉ်က စွမ်းအားတစ်စုံတစ်ခုရဲ့ ကန့်သတ်တာ ခံထားရသလိုပဲ။ ကျုပ်က ဖန်တီးခြင်း လမ်းစဉ်ကို ကျင့်ကြံတယ်ဆိုပေမဲ့ ရင်သွေးတွေ ဖန်တီးဖို့က အရမ်းခက်ခဲနေတုန်းပဲ။”

ထိုအချိန်တွင် ရှောင်ရွှီရင်၏ ရီဝေနေသော မျက်ဝန်းများကို လုချန်း ကြည့်လိုက်သည်။

လုချန်းကဆက်လက်၍

“ဒါပေမဲ့ နတ်တွေရဲ့ သက်တမ်းက ရှည်လျားတာကြောင့် ဒီလိုကိစ္စတွေအတွက် လောစရာမလိုပါဘူး။”

ဂုဏ်ယူနေသည့် ဗျိုင်းမလေးကဲ့သို့ သူမ၏ ဖြူဝင်းသော လည်တိုင်ကို မော့ရင်း ရှောင်ရွှီရင် အသက်ပြင်းပြင်းရှူလိုက်သည်။ ထို့နောက် လုချန်းကို

“ရှင်... ပြောတာက...”

……

တစ်ချိန်တည်းမှာပင်။

ကောင်းကင်ဝံပုလွေမြို့ရှိ တည်းခိုခန်းတစ်ခုအတွင်း။

အနီရောင် ဝတ်ဆင်ထားသော အမျိုးသမီးတစ်ဦးသည် ကုတင်ပေါ်တွင် မတ်မတ်ထိုင်နေ၏။ သူမသည် သူမ၏ နတ်အာရုံကို အပြင်ဘက်သို့ ဖြန့်ကြက်ကာ လမ်းမများ၊ အရက်ဆိုင်များနှင့် အပျော်ဂေဟာများမှ ဆွေးနွေး ပြောဆိုနေမှု အမျိုးမျိုးကို နားထောင်နေသည်။

“အဲဒီ တိန့်မျိုးနွယ် လူကို ကျုပ် ကြည့်မရတာ ကြာပြီ။ သူက လျှို့ဝှက်လဝန်းနန်းတော်ကို သစ္စာဖောက်ရဲတယ်... အထူးသံတမန်ရဲ့ ဖမ်းဆီးတာ ခံရတာ ထိုက်တန်ပါတယ်။”

“တိန့်ချင်းဖုန်းရဲ့ ဝိညာဉ်က အခုလောက်ဆို ပျက်စီးသွားပြီလို့ ခင်ဗျား ထင်လား။”

“မပျက်စီးသေးဘူး။ သူနဲ့အတူ ချီယန်ဂိုဏ်းဘက်က ပါဝင်ခဲ့တဲ့ မိသားစုကြီး အားလုံးကိုလည်း အထူးသံတမန်က ဖမ်းဆီးထားတယ်။”

“တိန့်ချင်းဖုန်းနဲ့ အဲဒီမိသားစုကြီးတွေက လျှို့ဝှက်လဝန်းနန်းတော်ကို သစ္စာဖောက်ခဲ့တာဆိုတော့ သတ်ပစ်ရမှာ မဟုတ်လား။ ဘာလို့ တစ်လကြာတဲ့အထိ အကျဉ်းချထားရတာလဲ”

“ဘယ်သူသိမှာလဲ။ ဒါက ချီယန်ဂိုဏ်းနဲ့ ပတ်သက်နေတာဆိုတော့ အထူးသံတမန်က သူတို့ကို သက်သေအဖြစ် လိုချင်နေတာလည်း ဖြစ်နိုင်တယ်။”

“ဒီအထူးသံတမန်က သာမန်ပုဂ္ဂိုလ်မဟုတ်ဘူးလို့ ကျုပ်ကြားတယ်...လျှို့ဝှက်လဝန်းနန်းတော် သခင်ရဲ့ တပည့်ရင်းတဲ့။”

“တကယ်လား”

…..

ကီလိုမီတာ အမြောက်အမြား အကွာအဝေးမှ ဆွေးနွေးမှုများကို ကြားလျှင် ရှုကျင့်ရှူး၏ အေးစက်သော မျက်နှာထက်၌ ဇဝေဇဝါဖြစ်သော အရိပ်အ‌ယောင်များ ပေါ်လာခဲ့၏။

ချီယန်ဂိုဏ်းနှင့် လျှို့ဝှက်လဝန်းနန်းတော်တို့စစ်ဖြစ်တော့မည်ဟု ဝိညာဉ်ဆိုး နတ်ဘုရင်က သူမအား ပြောခဲ့သည်။ သို့သော် ကောင်းကင်ဝံပုလွေမြို့၏ အခြေအနေအရ စစ်ပွဲတစ်ပွဲ ဖြစ်ပွားတော့မည့်ပုံ လုံးဝမပေါ်ပေ။

အကယ်၍ ကြီးကျယ်သော နတ်ဂိုဏ်းကြီး နှစ်ခုသည် စစ်ဖြစ်ရန် တကယ်တမ်း နီးကပ်နေပါက ကောင်းကင်ဝံပုလွေမြို့၏ အခြေအနေက ယခုထက် များစွာ ကွဲပြားနေပေလိမ့်မည်။

တကယ်တမ်း ဘာတွေ ဖြစ်ပျက်နေသနည်း။

ကောင်းကင်ဝံပုလွေမြို့၏ လက်ရှိအခြေအနေကို အစီရင်ခံရန် အင်းစာရွက်တစ်ရွက်ကို ရှုကျင့်ရှူး ချက်ချင်းထုတ်ယူကာ ဝိညာဉ်ဆိုး နတ်ဘုရင်နှင့် ဆက်သွယ်လိုက်သည်။

…….

တစ်ရက်အကြာ။

သွေးလင်းယုန်ခန်းမ၏ အလောင်းတောင်ထိပ်တစ်ခုပေါ်တွင်။

ဝိညာဉ်ဆိုး နတ်ဘုရင်သည် အဝေးမှ သွေးပင်လယ်ပြင်ကြီးကို ကြည့်ရင်း တောင်ထိပ်တွင် ရပ်နေ၏။ ထိုစဉ် သူ၏ရှေ့၌ အလင်းစက်တစ်စက် ပေါ်လာသည်။

လက်ကို သာမန်ကာလျှံကာ မြှောက်လိုက်သည်နှင့် အလင်းစက်ထဲမှ သတင်းစကား သူ၏ စိတ်ထဲသို့ ရောက်ရှိသွားသည်။

ရှုကျင့်ရှူး၏ အစီရင်ခံစာကို နားထောင်ပြီးနောက် ဝိညာဉ်ဆိုး နတ်ဘုရင်၏ မျက်ခုံးများ တွန့်သွားခဲ့၏။

လျှို့ဝှက်လဝန်းနန်းတော် သခင်၏ တပည့်ရင်းက အသက်ရှင်နေသေးတာလား။

ဒါက ဘယ်လိုလုပ် ဖြစ်နိုင်မည်နည်း။

စီကုန်းယုဖုန်းက သူ့ကို သတ်ဖို့ သွားပြီဟု ပြောခဲ့တာ မဟုတ်ပါလား။

လုချန်းသည် မြေနတ်အဆင့်သာရှိပြီး သူ့ကို ကာကွယ်ပေးနေသည့် တပည့်မနှစ်ဦးမှာလည်း ကောင်းကင်နတ်အဆင့်တွင်သာ ရှိကြောင်း စီကုန်းယုဖုန်းက ပြောခဲ့သည်။

စီကုန်းယုဖုန်းကဲ့သို့ ရွှေနတ်အဆင့် တစ်ဦးအတွက် ကောင်းကင်နတ် နှစ်ဦးနှင့် မြေနတ်တစ်ဦးကို သတ်ရန် မည်သည့် အခက်အခဲမှ ရှိမနေသင့်ပေ။

ထို့ပြင် သူတို့၏ နတ်အငွေ့အသက်သည် သာမန်နတ်များအပေါ် ကြောက်မက်ဖွယ်ကောင်းသော ဖိနှိပ်မှု အာနိသင် ရှိသည်။

လုချန်းက ဘယ်လိုလုပ် အသက်ရှင်နေရသေးသနည်း။

ကြီးကျယ်သော နတ်ဂိုဏ်းကြီး နှစ်ဂိုဏ်း စစ်ဖြစ်မည့် လက္ခဏာလည်း လုံးဝမတွေ့ရပေ။

ဝိညာဉ်ဆိုး နတ်ဘုရင်၏ ပုံရိပ် ဝေဝါးသွားပြီးနောက် သွေးမီးအိမ်ပေါင်းများစွာ ထွန်းညှိထားသည့် ဂူအတွင်းသို့ ချက်ချင်း ရောက်ရှိသွား၏။ ထို့နောက် စီကုန်းယုဖုန်း၏ သွေးမီးအိမ်အား သူ ကြည့်လိုက်ရာ ငြိမ်းသတ်ခြင်း ခံထားရသည်ကို တွေ့လိုက်ရသည်။

သွေးမီးအိမ် ငြိမ်းသွားခြင်းက ပိုင်ရှင်ဖြစ်သူ သေဆုံးသွားပြီဖြစ်ကြောင်း ဖော်ပြနေသည်။

ဒါက...

ရွှေနတ်အဆင့်ဖြစ်သော စီကုန်းယုဖုန်းသည် မြေနတ်တစ်ဦးနှင့် ကောင်းကင်နတ် နှစ်ဦးကို ချောင်းမြောင်း တိုက်ခိုက်ခဲ့သော်လည်း ရှုံးနိမ့်ကာ အသတ်ခံလိုက်ရတာလား။

ဝိညာဉ်ဆိုး နတ်ဘုရင် အေးစက်စွာ နှာခေါင်းရှုံ့လိုက်၏။

“အသုံးမကျတဲ့ကောင်”

ထို့နောက် ရှုကျင့်ရှူးထံသို့ သူ ဆက်သွယ်ကာ လောလောဆယ်တွင် ဘာမှ မဆင်မခြင် မလုပ်ရန် ညွှန်ကြားလိုက်သည်။

ရှုကျင့်ရှူးသည် သွေးလင်းယုန်ခန်းမ၏ သူတော်စင်မ ဖြစ်ရာ မည်သည့် အမှားအယွင်းမှ ဖြစ်၍ မရပေ။

သို့သော် လုချန်းဆိုသူကတော့ ဧကန်မုချ သေရမည်သာ ဖြစ်သည်။

သို့သော် ထိုအတွက် ရှုကျင့်ရှူး ကိုယ်တိုင် ပါဝင်လုပ်ဆောင်ရန် မလိုအပ်ပေ။

ရွှေနတ်အဆင့်က လုချန်းကို မသတ်နိုင်ပါက နတ်ဘုရင်ခံတစ်ဦးကို စေလွှတ်ရုံသာ ရှိသည်။

သို့သော် နတ်ဘုရင်ခံတစ်ဦး ကောင်းကင်ဝံပုလွေမြို့သို့ ရောက်ရှိလာလျှင် လျှို့ဝှက်လဝန်းနန်းတော် သခင် သို့မဟုတ် ချီယန်ဂိုဏ်းချုပ်၏ အာရုံကို ဆွဲဆောင်မိသွားနိုင်သည်။

ထို့နောက် တစ်စုံတစ်ဦးကို ဝိညာဉ်ဆိုး နတ်ဘုရင် ဆက်သွယ်လိုက်သည်။

“ထျန်းရှောင်... ကျုပ်ဆီ လာခဲ့”

ထိုစကားများနှင့်အတူ သွေးစွန်းနေသော အမျိုးသားတစ်ဦး ဝိညာဉ်ဆိုး နတ်ဘုရင်၏ ရှေ့၌ ပေါ်လာ၏။

ထျန်းရှောင်က

“သခင်... ကျုပ်ကို ဘာခိုင်းဖို့ ရှိလို့လဲ”

ဝိညာဉ်ဆိုး နတ်ဘုရင်က

“လျှို့ဝှက်လဝန်းနန်းတော် သခင်ရဲ့ တပည့်ရင်းက ကောင်းကင်ဝံပုလွေမြို့မှာ ရှိနေတယ်။ သူ့ကို သွားသတ်ပြီး လျှို့ဝှက်လဝန်းနန်းတော်နဲ့ ချီယန်ဂိုဏ်းကြား စစ်ပွဲဖြစ်အောင် ချီယန်ဂိုဏ်းကို အပြစ်ပုံချလိုက်။”

ထိုအရာကို ကြားလျှင် နတ်ဘုရင်ခံ ထျန်းရှောင်၏ နှုတ်ခမ်းများ အနည်းငယ် ကွေးညွှတ်သွားသည်။

ထို့နောက် ထျန်းရှောင်က

“ကျုပ် အခုချက်ချင်း သွားလိုက်မယ်”

နတ်ဘုရင်ခံ ထျန်းရှောင်သည် လုချန်း၏ စွမ်းအားနှင့် ပတ်သက်၍ပင် မမေးမြန်းခဲ့ပေ။ ဝိညာဉ်ဆိုး နတ်ဘုရင်က သူ့အား သတ်ခိုင်းသည်ဆိုမှတော့ ထိုပစ်မှတ် သူ့ထက် အားနည်းရမည်ဟု သူ ယူဆထား၏။ ပစ်မှတ်၏ အစွမ်းကို မေးမြန်းနေခြင်းက အပိုသာ ဖြစ်လိမ့်မည်။

ထိုသို့ပြောပြီးနောက် နတ်ဘုရင်ခံ ထျန်းရှောင်လည်း အလင်းစက်တစ်ခုအဖြစ် ပြောင်းလဲသွားကာ ကောင်းကင်ဝံပုလွေမြို့ဆီသို့ ပျံသန်းသွားခဲ့သည်။

ဝိညာဉ်ဆိုး နတ်ဘုရင်က အဝေးသို့ ပျံသန်းသွားသော သွေးရောင်အလင်းစက်ကို ကြည့်လိုက်ကာ

“နတ်ဘုရင်ခံတစ်ဦးတောင် ခင်ဗျားကို မသတ်နိုင်ဘူးဆိုတာ ကျုပ် လုံးဝ မယုံဘူး”

ထိုအခိုက်အတန့်တွင် ဝိညာဉ်ဆိုး နတ်ဘုရင်က နတ်ဘုရင်ခံတစ်ဦးကို စေလွှတ်လိုက်ကြောင်း လုချန်းနှင့် ရှောင်ရွှီရင်တို့ သိထားခြင်း မရှိသေးပေ။ ဖန်တီးခြင်း လမ်းစဉ်ကိုသာ သူတို့ ဆက်လက် ရှာဖွေကျင့်ကြံနေကြသည်။

………

တစ်ချိန်တည်းမှာပင်။

လျှို့ဝှက်လဝန်းနန်းတော်။

ပြန်လည်ရောက်ရှိလာသည်နှင့် ကောင်းကင်ဝံပုလွေမြို့တွင် ဖြစ်ပျက်ခဲ့သည့် အရာများကို ယဲ့ချူယောင်ထံသို့ ကောက်ရှီယွမ် ချက်ချင်း အစီရင်ခံလိုက်သည်။ ထို့ကြောင့် အခြေအနေကို ဆွေးနွေးရန် လျှို့ဝှက်လဝန်းနန်းတော်ရှိ အတွင်းစည်း အကြီးအကဲ အားလုံးကို အလျင်အမြန် စုဝေးစေခဲ့၏။

အတွင်းစည်း အကြီးအကဲ အားလုံးကို ယဲ့ချူယောင်က အရေးတကြီး ခေါ်ယူခြင်းအပေါ် အကြီးအကဲများ ဇဝေဇဝါ ဖြစ်နေကြသည်။ ပုံမှန်အားဖြင့် လျှို့ဝှက်လဝန်းနန်းတော်သို့ ရန်သူများ ကျူးကျော်လာခြင်းမျိုး မရှိပါက အတွင်းစည်း အကြီးအကဲ အားလုံးကို စုဝေးလေ့ မရှိပေ။

သို့သော် ယခု လျှို့ဝှက်လဝန်းနန်းတော်အပေါ် မည်သည့် ရန်သူ၏ တိုက်ခိုက်မှုကိုမှ သူတို့ မတွေ့ရှိခဲ့ကြပေ။

နတ်ဘုရင်ခံ အဆင့်ရှိကြသော အတွင်းစည်း အကြီးအကဲများသည် လျှို့ဝှက်လဝန်းနန်းတော်၏ နယ်မြေအတွင်း ဖြစ်ပျက်သမျှကို ကောင်းစွာ ခံစားသိနိုင်စွမ်း ရှိကြ၏။ အကယ်၍ တိုက်ခိုက်မှု တစ်စုံတစ်ရာ ရှိခဲ့လျှင် သူတို့ ဧကန်မုချ သိကြမည် ဖြစ်သည်။

နန်းတော်သခင်၏ ရေခဲကျောက်ဖျာ ထိုင်ခုံပေါ်တွင် ထိုင်ရင်း အောက်ရှိ အတွင်းစည်း အကြီးအကဲများကို ယဲ့ချူယောင် ကြည့်လိုက်သည်။

ယဲ့ချူယောင်က

“အားလုံး စုံပြီဆိုတော့... ကောင်းကင်ဝံပုလွေမြို့မှာ ဘာတွေ ဖြစ်ခဲ့သလဲဆိုတာ ညီမ ကောက် ရှင်းပြလိုက်ပါဦး။”

“ကောင်းကင်ဝံပုလွေမြို့” ဟူသော အမည်ကို ကြားလိုက်ရသည်နှင့် အချို့သော အတွင်းစည်း အကြီးအကဲများ၏ စိတ်ထဲ မကောင်းသော အငွေ့အသက်များကို ချက်ချင်း ခံစားလိုက်ရသည်။

ကောက်ရှီယွမ်က

“မောင်လေး လုချန်းနဲ့အတူ လေ့ကျင့်ဖို့ ကောင်းကင်ဝံပုလွေမြို့ကို ကျွန်မ လိုက်သွားခဲ့ပါတယ်။ အဲဒီကို ရောက်ရောက်ချင်းမှာပဲ ကောင်းကင်ဝံပုလွေ မြို့တော်ဝန်နဲ့ မိသားစုကြီး တွေဟာ ချီယန်ဂိုဏ်းနဲ့ ပူးပေါင်းနေကြတာကို တွေ့ခဲ့ရတယ်...”

ထိုအခိုက်တွင် အကြီးအကဲတစ်ဦးက ချက်ချင်း ဖြတ်မေးလိုက်သည်။

“ခင်ဗျား ဘာလို့ တစ်ယောက်တည်း ပြန်လာတာလဲ ... ရှီယွမ်။ လုချန်း ဘာဖြစ်သွားလို့လဲ။”

………….

အခန်း (၁၆၀၁ )

လျှို့ဝှက်လဝန်းနန်းတော်မှ လူများရောက်လာခြင်း

ကောင်းကင်ဝံပုလွေမြို့နှင့် ချီယန်ဂိုဏ်းတို့မှာ ပူးပေါင်းနေကြကြောင်း ကောက်ရှီယွမ်က ပြောခဲ့သော်လည်း ကောက်ရှီယွမ် တစ်ယောက်တည်းသာ ပြန်လည်ရောက်ရှိလာခဲ့သဖြင့် လုချန်း တစ်စုံတစ်ခု ဖြစ်ပွားခဲ့သလား သို့မဟုတ် ချီယန်ဂိုဏ်းက သူ့ကို ဖမ်းဆီးသွားသလားဟု အကြီးအကဲ များ မလွဲမသွေ တွေးတောမိကြ၏။

လုချန်းသည် လျှို့ဝှက်လဝန်းနန်းတော် သခင်၏ တပည့်ရင်း ဖြစ်၏။

အကယ်၍ သူ့အပေါ် တစ်စုံတစ်ခု ဖြစ်ခဲ့ပါက လျှို့ဝှက်လဝန်းနန်းတော်နှင့် ချီယန်ဂိုဏ်းတို့သည် ဧကန်မုချ စစ်ဖြစ်ကြပေလိမ့်မည်။

ကောက်ရှီယွမ်က

“မောင်လေး လုချန်း အဆင်ပြေပါတယ်။ သူနဲ့ ညီမ ရှောင်ရွှီရင်တို့ ကောင်းကင်ဝံပုလွေမြို့မှာ ကျန်နေခဲ့တယ်”

ထိုအရာကို ကြားလျှင် အကြီးအကဲတစ်ဦးက က အသံကျယ်ကျယ်ဖြင့်

“ဒါက တကယ်ကို ရယ်စရာပဲ။ ကောင်းကင်ဝံပုလွေမြို့နဲ့ ချီယန်ဂိုဏ်းတို့ ပူးပေါင်းနေတာကို သိသိကြီးနဲ့ လျှို့ဝှက်လဝန်းနန်းတော်ကို ချက်ချင်း ပြန်မလာပဲ ဘယ်လိုလုပ် နေနိုင်ရတာလဲ။”

လုချန်းသည် သူတို့ နန်းတော်သခင်၏ တပည့်ရင်း ဖြစ်သည်။

အကယ်၍ လုချန်းအပေါ် တစ်စုံတစ်ခု ဖြစ်ပျက်သွားပါက နန်းတော်သခင် တံခါးပိတ် ကျင့်ကြံရာမှ ထွက်လာသည့်အခါ သူတို့ မည်သို့ ပြန်လည်ဖြေရှင်းကြမည်နည်း။

ကောက်ရှီယွမ် ခဏခန့် မှင်တက်သွားပြီးနောက်

“မောင်လေးမှာ နန်းတော်သခင် ပေးထားတဲ့ အသက်ကယ် ရတနာတစ်ခု ရှိတယ်။ ပြီးတော့...”

ထိုအခိုက်တွင် ကောက်ရှီယွမ် ခဏခန့် ရပ်တန့်သွားပြီးနောက်

“ကောင်းကင်ဝံပုလွေမြို့က ကိစ္စတွေက ချီယန်ဂိုဏ်းနဲ့ မပတ်သက်တာလည်း ဖြစ်နိုင်တယ်လို့ မောင်လေးက ပြောတယ်။

“ကျွန်မတို့ကို တိုက်ခိုက်ခဲ့တဲ့ သူဟာ တကယ်တမ်း ချီယန်ဂိုဏ်းက အကြီးအကဲ မ မဟုတ်ပဲ ချီယန်ဂိုဏ်းထဲမှာ ထည့်ထားတဲ့ သွေးလင်းယုန်ခန်းမက သူလျှို ဖြစ်နိုင်တယ်လို့ သူက ပြောပါတယ်။”

“သွေးလင်းယုန်ခန်းမရဲ့ ရည်ရွယ်ချက်က သူ့ကို သတ်ဖို့ပဲ။ ချီယန်ဂိုဏ်းနဲ့ လျှို့ဝှက်လဝန်းနန်းတော်ကြားမှာ ပဋိပက္ခဖြစ်အောင် သွေးထိုးပြီး ကြီးကျယ်တဲ့ နတ်ဂိုဏ်းကြီး နှစ်ဂိုဏ်းကို စစ်ဖြစ်စေချင်တာ။”

သွေးလင်းယုန်ခန်းမ...

ထိုစကားလုံး သုံးလုံးကို ကြားလိုက်ရသည်နှင့် ရှိနေကြသော အကြီးအကဲ အားလုံး၏ မျက်နှာများ တည်သွားခဲ့သည်။

သွေးလင်းယုန်ခန်းမသည် မိစ္ဆာ နတ်ဂိုဏ်း တစ်ဂိုဏ်းဖြစ်ပြီး သူတို့၏ နတ်အငွေ့အသက်က သာမန်နတ်များ၏ အငွေ့အသက်ကို ဖိနှိပ်နိုင်စွမ်း ရှိသည်။

သွေးလင်းယုန်ခန်းမသည် လွန်ခဲ့သော နှစ်များအတွင်း အလွန်ပင် လှုပ်ရှားမှု များပြားလာခဲ့ပြီး အပြင်ဘက်သို့ အစဉ်တစိုက် နယ်မြေချဲ့ထွင်နေခဲ့၏။

ထိုအခိုက်အတန့်တွင် ယဲ့ချူယောင်က

“ရှင်တို့ကို သတ်ဖို့ ကြိုးစားခဲ့တာ တကယ်ပဲ ချီယန်ဂိုဏ်း အကြီးအကဲလား။

“သူက နန်းတော်သခင် ပေးထားတဲ့ အသက်ကယ် ကျောက်စိမ်းလိပ်ကို သုံးခဲ့တာလား။”

“ပြီးတော့ အဲ့ဒီလူက ချီယန်ဂိုဏ်းထဲမှာ ထည့်ထားတဲ့ သွေးလင်းယုန်ခန်းမက သူလျှိုဆိုတာကို မောင်လေး လုချန်းက ဘယ်လိုသိတာလဲ။”

လုချန်းတို့ အသက်ရှင် နေခြင်းအပေါ် ယဲ့ချူယောင် မအံ့ဩပေ။

နတ်ဘုရင်တစ်ဦး ပေးခဲ့သော ကျောက်စိမ်းလိပ် ရှိပါက လုချန်း၏ အသက်ကို ထိန်းသိမ်းစောင့်ရှောက်ရန် အခက်အခဲ ရှိမည် မဟုတ်ချေ။

သူမကို စူးစမ်းလိုစိတ် အဖြစ်စေဆုံးအရာက သူတို့ကို တိုက်ခိုက်ခဲ့သော ချီယန်ဂိုဏ်း အကြီးအကဲ သွေးလင်းယုန်ခန်းမမှ လူဖြစ်ကြောင်း လုချန်း မည်သို့ အတည်ပြုနိုင်သနည်း ဟူသည့် အချက် ဖြစ်၏။

ကောက်ရှီယွမ်က

“ဟုတ်ကဲ့ အစ်မ။ ကျွန်မတို့ဟာ ရွှေနတ်တစ်ဦးရဲ့ ဝိုင်းရံတိုက်ခိုက်တာကို ခံခဲ့ရပေမဲ့ နန်းတော်သခင် ပေးထားတဲ့ မှော်ရတနာကို သုံးပြီး မောင်လေး လုချန်းက အဲဒီရွှေနတ်ကို ပြန်သတ်နိုင်ခဲ့တယ်။”

“အဲ့ဒီလူက ချီယန်ဂိုဏ်းထဲက သွေးလင်းယုန်ခန်းမ သူလျှိုဆိုတာကို မောင်လေး လုချန်း ဘယ်လိုသိသလဲဆိုရင်တော့ သူ့အဆိုအရ သူ့မှာ လူတစ်ယောက်ရဲ့ သရုပ်မှန်ကို ခွဲခြားသိမြင်နိုင်တဲ့ နန်းတော်သခင် ပေးထားတဲ့ အထူးမှော်ရတနာတစ်ခု ရှိတယ်လို့ ပြောပါတယ်။”

ကောက်ရှီယွမ်၏ အဖြေကို ကြားလျှင် ယဲ့ချူယောင် အနည်းငယ် မှင်တက်သွားခဲ့၏။

သူမသည် ဆရာ့နောက်သို့ နှစ်ပေါင်းများစွာ လိုက်ပါခဲ့သော်လည်း တစ်စုံတစ်ဦး၏ သရုပ်မှန်ကို သိမြင်နိုင်သည့် ထိုကဲ့သို့သော မှော်ရတနာမျိုးအကြောင်း သူမ တစ်ခါမှ မကြားဖူးခဲ့ချေ။

အကယ်၍ ထိုကဲ့သို့သော မှော်ရတနာမျိုး ရှိခဲ့လျှင် ၎င်းသည် ကောင်းကင်လျှို့ဝှက်ချက်ကိုပင် စုံစမ်းထောက်လှမ်းနိုင်သည့် စွမ်းရည် ရှိရပေမည်။

ကောင်းကင်လျှို့ဝှက်ချက်ကို စုံစမ်းထောက်လှမ်းနိုင်သော ထိုကဲ့သို့သော ရတနာမျိုးကို အသုံးပြုခြင်းက ဆိုးကျိုးများ ဖြစ်ပေါ်လာစေနိုင်သည်။

ထားလိုက်ပါတော့......

လက်ရှိကိစ္စက သွေးလင်းယုန်ခန်းမက ကြီးကျယ်သော နတ်ဂိုဏ်းကြီး နှစ်ဂိုဏ်းကြား စစ်ပွဲဖြစ်အောင် တကယ် သွေးထိုးလိုခြင်း ရှိမရှိ အတည်ပြုရန် ဖြစ်၏။

ယဲ့ချူယောင်က

“မောင်လေး လုချန်း ပြောတာသာ အမှန်ဆိုရင် ကျွန်မတို့ နိုးနိုးကြားကြား ရှိနေရမယ်။ ပြီးတော့ ချီယန်ဂိုဏ်းကိုလည်း ပြင်ဆင်ထားနိုင်ဖို့ အသိပေးရမယ်။”

“သွေးလင်းယုန်ခန်းမက နတ်ဂိုဏ်းကြီး နှစ်ဂိုဏ်းကြားမှာ စစ်ပွဲဖြစ်အောင် သွေးထိုးချင်နေတာ... ဖြစ်နိုင်တာက ကျွန်မတို့ နှစ်ဖက်လုံး တိုက်ပွဲကြောင့် မောပန်းနွမ်းနယ်နေချိန်မှာ ကျွန်မတို့ကို ဝါးမြိုပစ်ဖို့ ရည်ရွယ်တာ ဖြစ်နိုင်တယ်။”

“အခု သူတို့ လုချန်းကို သတ်ဖို့ မအောင်မြင်တော့ ဂိုဏ်းနှစ်ဂိုဏ်းကြားမှာ သဘောထားကွဲလွဲမှုတွေ ဖြစ်အောင် တခြားနည်းလမ်းတွေနဲ့ ဧကန်မုချ ကြိုးစားကြဦးမှာပဲ။”

ထိုအခိုက်တွင် ခရမ်းရောင် တိမ်တိုက်ဝတ်ရုံ ဝတ်ဆင်ထားသော လှပသည့် အမျိုးသမီးတစ်ဦးက ရှေ့သို့ လှမ်းထွက်လာပြီး

“ကျွန်မ ကောင်းကင်ဝံပုလွေမြို့ကို သွားလိုက်မယ်။ ပြီးတော့ ချီယန်ဂိုဏ်းကိုလည်း ပြင်ဆင်နိုင်အောင် ဒီကိစ္စကို အသိပေးလိုက်မယ်”

ယဲ့ချူယောင်က

“ချီယန်ဂိုဏ်းက ဒါကို ယုံချင်မှ ယုံလိမ့်မယ်လို့ ကျွန်မ စိုးရိမ်မိတယ်။

“မောင်လေး လုချန်းက ချီယန်ဂိုဏ်းက ရွှေနတ်တစ်ဦးကို သတ်ခဲ့တယ်။ အဲ့ဒီလူက အဲဒီမှာ ရာထူးကြီး တစ်ခုခု ရထားတဲ့သူ ဖြစ်နိုင်တယ်။”

“သူတို့ကို တိုက်ရိုက်ပြောပြရင် သူတို့လူ အသတ်ခံရတာကို ကျွန်မတို့က ဆင်ခြေပေးနေတယ်လို့ သူတို့ ထင်သွားနိုင်တယ်။”

နတ်ဘုရင်ခံ တစ်ဦးက အေးစက်စွာ နှာခေါင်းရှုံ့လိုက်ပြီး

“ချီယန်ဂိုဏ်းက ရွှေနတ်တစ်ဦးက ကျွန်မတို့ လျှို့ဝှက်လဝန်းနန်းတော် နယ်မြေထဲကို ခွင့်ပြုချက်မရှိပဲ လာခဲ့တာ။ ဒါ့‌‌ကြောင့်ကျွန်မတို့ သူ့ကို သတ်လိုက်တယ် ... ဒါပဲလေ။

“ချီယန်ဂိုဏ်းက တစ်ခုခု ပြောနိုင်လိမ့်မယ်လို့ ကျွန်မ မယုံဘူး။”

ထိုအချက်ကို ယဲ့ချူယောင် စဉ်းစားကြည့်ရာ အမှန်တရား အချို့ ရှိနေသည်ကို တွေ့လိုက်ရသည်။

ချီယန်ဂိုဏ်းက အရင် ကျူးကျော်ခဲ့ခြင်း ဖြစ်ရာ ထိုရွှေနတ် ရာထူးကြီးနေလျှင်လည်း အမှားက ချီယန်ဂိုဏ်းဘက်တွင်သာ ရှိ၏။

သို့သော် ယဲ့ချူယောင်က

“နတ်ဘုရင်ခံ လင်ရင်။ ရှင် ကောင်းကင်ဝံပုလွေမြို့ကို သွားပြီးရင် အဲဒီက အခြေအနေကို အရင်ဆုံး လေ့လာပါ။အဲဒီနောက်မှ ချီယန်ဂိုဏ်းဆီကို သွားပါ”

ဟု သတိပေးလိုက်၏။

နတ်ဘုရင်ခံ လင်ရင်က

“ကောင်းပါပြီ နန်းတော်သခင်မလေး”

ယဲ့ချူယောင်က ဆက်လက်၍

“နောက်တစ်ချက်က သွေးလင်းယုန်ခန်းမရဲ့ ကျူးကျော်မှုကို ဘယ်လို ကာကွယ်မလဲဆိုတာ ဆွေးနွေးကြရအောင်။”

“သွေးလင်းယုန်ခန်းမက လျှို့ဝှက်လဝန်းနန်းတော်ကို အရေးယူဖို့ ပြင်ဆင်ထားတာဆိုတော့ တစ်ခုထက်မက ပြင်ဆင်ထားမှာပဲ။

“သူတို့က ချီယန်ဂိုဏ်းထဲမှာ သူလျှိုတွေ ထားနိုင်တယ်ဆိုရင် လျှို့ဝှက်လဝန်းနန်းတော်ထဲမှာလည်း ထားနိုင်တာပဲ။”

ယဲ့ချူယောင်၏ စကားကို ကြားလျှင် ရှိနေကြသော အကြီးအကဲများ တစ်ဦးကိုတစ်ဦး ကြည့်လိုက်ကြသည်။

သူတို့၏ အမူအရာများကလည်း အလွန်လေးနက်နေခဲ့၏။

ယဲ့ချူယောင် ပြောသကဲ့သို့ပင် အကယ်၍ သွေးလင်းယုန်ခန်းမက ပဋိပက္ခတစ်ခုကို သွေးထိုးလှုံ့ဆော်လိုပါက ချီယန်ဂိုဏ်းထဲတွင်သာ သူလျှိုများ ထားမည် မဟုတ်ချေ။

လျှို့ဝှက်လဝန်းနန်းတော်ထဲတွင်လည်း သူတို့၏ သူလျှိုများ ရှိနေနိုင်သည်။

သို့သော် လျှို့ဝှက်လဝန်းနန်းတော်အတွင်းရှိ သွေးလင်းယုန်ခန်းမ၏ သူလျှိုများကို ရှာဖွေရန်က လွယ်ကူသော ကိစ္စ မဟုတ်ပေ။

ထို့နောက် ယဲ့ချူယောင်နှင့် အကြီးအကဲများလည်း သွေးလင်းယုန်ခန်းမ၏ ကျူးကျော်မှုကို တားဆီးရန်အတွက် စည်းမျဉ်းများကို ဆွေးနွေးရေးဆွဲရာ နာရီဝက်ခန့် ကြာသွားခဲ့သည်။

အစည်းအဝေး ပြီးဆုံးသွားပြီးနောက်

နတ်ဘုရင်ခံ လင်ရင်က ကောက်ရှီယွမ်ထံ ချဉ်းကပ်သွားကာ

“ရှီယွမ်... သွေးလင်းယုန်ခန်းမရဲ့ သူလျှိုကို လုချန်းက ဘယ်လို သတ်လိုက်တာလဲဆိုတာ ကျွန်မကို ပြောပြပါဦး။”

ကျောက်နက်တောင်ကြားတွင် ဖြစ်ပျက်ခဲ့သည့် အဖြစ်အပျက်များကို ကောက်ရှီယွမ် ပြန်လည်စဉ်းစားလိုက်ကာ စီကုန်းယုဖုန်းအား လုချန်း မည်သို့ သတ်ခဲ့ကြောင်းကို အသေးစိတ် ပြောပြလိုက်၏။

ကောက်ရှီယွမ်၏ စကားကို နားထောင်ပြီးနောက် နတ်ဘုရင်ခံ လင်ရင်လည်း အတွေးထဲသို့ နစ်မြောသွားခဲ့သည်။

ခဏအကြာတွင် သူမက

“မျက်စိတစ်မှိတ်အတွင်းမှာ နတ်ဘုရင်တစ်ဦးရဲ့ စွမ်းအားကို ရရှိသွားတာလား။ အဲဒါက ဘယ်လို မှော်ရတနာမျိုးလဲ။ ဒါမှမဟုတ် လုချန်းက နန်းတော်သခင်ရဲ့ နတ်ဝိညာဉ် အပိုင်းအစ တစ်ခုကို ဆောင်ထားတာလား။”

ထိုအရာကို ပြန်လည်စဉ်းစားကြည့်ရာတွင် ၎င်းသည် သာမန် မှော်ရတနာ တစ်ခု မဟုတ်နိုင်ပဲ နန်းတော်သခင်၏ နတ်ဝိညာဉ် အပိုင်းအစတစ်ခု လုချန်းနှင့်အတူ ရှိနေခြင်းဖြစ်မည်ဟု နတ်ဘုရင်ခံ လင်ရင် ယုံကြည်နေခဲ့သည်။

ဖြစ်နိုင်သည်က နန်းတော်သခင်သည် အစကတည်းက သွေးလင်းယုန်ခန်းမ၏ လှုပ်ရှားမှုများကို သိထားပြီး လျှို့ဝှက်လဝန်းနန်းတော်အတွင်း ပုန်းအောင်းနေသော သွေးလင်းယုန်ခန်းမ သူလျိုများကို ဖော်ထုတ်ရန်အတွက် ရည်ရွယ်ချက်ရှိရှိ တံခါးပိတ် ကျင့်ကြံနေခြင်း ဖြစ်ပေလိမ့်မည်။

ထိုသို့တွေးရင်း နတ်ဘုရင်ခံ လင်ရင်လည်း ထပ်မံ၍ တွေဝေမနေတော့ပဲ ကောက်ရှီယွမ်ကို ခေါ်ကာ ကောင်းကင်ဝံပုလွေမြို့သို့ တိုက်ရိုက် ထွက်ခွာခဲ့သည်။

နတ်ဘုရင်ခံအဆင့် ရှိသူတစ်ဦးဖြစ်သည့် လင်ရင်အတွက် ကောက်ရှီယွမ်ကို ကောင်းကင်ဝံပုလွေမြို့သို့ ပြန်လည်ခေါ်ဆောင်လာရန် နှစ်ရက်သာ ကြာမြင့်ခဲ့သည်။

ထိုအချိန်တွင် လုချန်းနှင့် ရှောင်ရွှီရင်တို့ကတော့ ကုတင်ပေါ်တွင် ဖန်တီးခြင်း လမ်းစဉ်ကို ရှာဖွေကျင့်ကြံနေကြဆဲ ဖြစ်သည်။

ကောင်းကင်ဝံပုလွေမြို့၏ အထက်တွင် အစွမ်းထက်သော ပုဂ္ဂိုလ်တစ်ဦး၏ အငွေ့အသက်ကို ခံစားလိုက်ရလျှင် သူတို့နှစ်ဦးလုံး တောင့်တင်းသွားခဲ့ကြ၏။

လုချန်း အလျင်အမြန် ထလိုက်ပြီး လက်တစ်ချက် ဝှေ့ယမ်းလိုက်သည်နှင့် သူ၏ အဝတ်အစားများကို ချက်ချင်း ဝတ်ဆင်ပြီးသား ဖြစ်သွားခဲ့သည်။

ရှောင်ရွှီရင်လည်း ကုတင်ပေါ်မှ အလျင်အမြန် ထကာ အဝတ်အစားများကို လျင်မြန်စွာ ဝတ်လိုက်၏။ ထို့နောက် ကောင်းကင်ဝံပုလွေမြို့ အထက်ရှိ အစွမ်းထက်သော ပုဂ္ဂိုလ်များက ချီယန်ဂိုဏ်းမှလား သို့မဟုတ် လျှို့ဝှက်လဝန်းနန်းတော်မှလား ဆိုသည်ကို ကြည့်ရန် သူတို့နှစ်ဦးလုံး အပြင်သို့ လှမ်းထွက်လာခဲ့ကြသည်။

သူတို့ အခန်းထဲမှ ထွက်ထွက်ချင်းမှာပင် အလင်းတန်း နှစ်ခု လုချန်းနှင့် ရှောင်ရွှီရင်၏ ရှေ့သို့ ဆင်းသက်လာခဲ့၏။

ရှောင်ရွှီရင်ထံသို့ ချဉ်းကပ်လာရင်း တစ်စုံတစ်ရာသော အကြောင်းပြချက်ကြောင့် ရှောင်ရွှီရင်သည် အခြားလူတစ်ယောက် ဖြစ်သွားသကဲ့သို့ ကောက်ရှီယွမ် စိတ်ထဲ ခံစားလိုက်ရသည်။

သူမသည် ပို၍ လှပလာသကဲ့သို့ ရှိပြီး ထူးခြားသော နတ်အငွေ့အသက် တစ်ခုကို ထုတ်လွှတ်နေပေသည်။

ကောက်ရှီယွမ်က ရှောင်ရွှီရင်ကို သံသယဖြင့် ကြည့်လိုက်၏။

………….

အခန်း (၁၆၀၂)

နတ်ဘုရင်ခံ လင်ရင်

ကောက်ရှီယွမ်၏ စူးစိုက်ကြည့်မှုကို တိုက်ရိုက် ခံလိုက်ရသဖြင့် ရှောင်ရွှီရင် ရုတ်တရက် စိတ်မလုံမလဲ ဖြစ်သွား၏။ အထူးသဖြင့် သူမ၏ မျက်နှာပေါ်တွင် နီမြန်းနေဆဲဖြစ်သော အငွေ့အသက်များကြောင့် ပို၍ပင် ရှက်ရွံ့နေပုံ ပေါ်နေသည်။

ကောက်ရှီယွမ်က ဇဝေဇဝါဖြစ်စွာဖြင့် ရှောင်ရွှီရင်ကို

“ညီမလေးရှောင်... ဘာဖြစ်လို့လဲ။ မျက်နှာက ဘာလို့ ဒီလောက်တောင် နီနေရတာလဲ။”

ရှောင်ရွှီရင်က

“ဒါ... ဘာမှမဟုတ်ပါဘူး... ခုနက ကျွန်မ ကျင့်ကြံနေရင်း နည်းနည်း လမ်းကြောင်းလွဲသွားလို့ပါ။”

ရှောင်ရွှီရင်၏ စကားကို ကြားလျှင် နတ်ဘုရင်ခံ လင်ရင်က ရှောင်ရွှီရင်၏ ခန္ဓာကိုယ်ကို စစ်ဆေးရန် နတ်အငွေ့အသက် တစ်စွန်းတစ်စကို ချက်ချင်း ထုတ်လွှတ်လိုက်၏။ နတ်အငွေ့အသက်ကို ခံစားမိလိုက်သောကြောင့် ရှောင်ရွှီရင် ခဏခန့် မှင်တက်သွားသည်။

နတ်ဘုရင်ခံ အဆင့်ရှိသော တည်ရှိမှုတစ်ခုသည် သူမ၏ ခန္ဓာကိုယ် အခြေအနေကို ချက်ချင်း စစ်ဆေးနိုင်သည် မဟုတ်ပါလား။

ရှောင်ရွှီရင် အမျိုးသမီးစစ်စစ် တစ်ဦး ဖြစ်သွားပြီဖြစ်ကြောင်း ခံစားမိလိုက်သဖြင့် နတ်ဘုရင်ခံ လင်ရင်က သူမ၏ လျှို့ဝှက်ချက်ကို မဖော်ထုတ်ပဲ ခပ်ဖျော့ဖျော့သာ ပြုံးလိုက်၏။

လုချန်းသည် နန်းတော်သခင်၏ တပည့်ရင်းဖြစ်သည့်အပြင် အလွန် ရုပ်ရည်ချောမောသဖြင့် ရှောင်ရွှီရင် စိတ်ညွှတ်သွားခြင်းက မဆန်းပေ။ ယခင်က ဤကဲ့သို့ အတွေ့အကြုံမျိုး ရှိခဲ့ဖူးသည့် နတ်ဘုရင်ခံ လင်ရင်အတွက်တော့ ၎င်းက ထူးဆန်းသည့် အရာတစ်ခု လုံးဝ မဟုတ်ပေ။

နတ်ဘုရင်ခံ လင်ရင်က ရှောင်ရွှီရင်ကို ကြည့်ကာ

“ရွှီရင်... နောက်ဆိုရင် ကျင့်ကြံနေတုန်း ရုတ်တရက်ကြီး မရပ်လိုက်နဲ့။ အဲဒါက မင်းရဲ့ ကျန်းမာရေးအတွက် မကောင်းဘူး။”

နတ်ဘုရင်ခံ လင်ရင်၏ စကားကို ကြားသောအခါ လုချန်းနှင့် သူမ၏ ကိစ္စကို ရိပ်မိသွားပြီဖြစ်ကြောင်း ရှောင်ရွှီရင် သိလိုက်၏။ သူမက မျက်နှာနီမြန်းစွာဖြင့်

“ကျွန်မ... နတ်ဘုရင်ခံ လင်ရင်ရဲ့ အကြံပေးချက်ကို မှတ်သားထားပါ့မယ်။”

နတ်ဘုရင်ခံ လင်ရင်က ထိုအကြောင်းအရာကို ဆက်မပြောတော့ပဲ လုချန်းကို ကြည့်ကာ

“လုချန်း... ရှင့်ဆီမှာ တခြားသူတွေရဲ့ သရုပ်မှန်ကို ခွဲခြားနိုင်တဲ့ ပစ္စည်းတစ်ခု ရှိတယ်လို့ ရှီယွမ်ဆီက ကြားတယ်။ ဟုတ်လား”

လုချန်းက

“ဟုတ်ပါတယ်။”

နတ်ဘုရင်ခံ လင်ရင်က

“ဒါဆိုရင် ကျွန်မ ဘယ်သူ ဆိုတာကိုရော ရှင် ပြောနိုင်မလား”

ဒါက...

လုချန်း ခဏခန့် ဇဝေဇဝါ ဖြစ်သွား၏။

သူမက လျှို့ဝှက်လဝန်းနန်းတော်မှ မဟုတ်လား။

သူ ထပ်ပြောပြရန် လိုအပ်ပါသလား။

စပ်စုချင်စိတ်ဖြင့် နတ်ဘုရင်ခံ လင်ရင်ကို လုချန်း စစ်ဆေးလိုက်၏။

[အမည် : လင်ရင်]

[အချက်အလက်: လျှို့ဝှက်လဝန်းနန်းတော်၏ အတွင်းစည်းအကြီးအကဲ။ ထျန်းရှနတ်ဘုရားနိုင်ငံတော်မှ ချန်ဘုရင်၏ လက်အောက်ခံဟောင်း။]

[စွမ်းအား : နတ်ဘုရင်ခံ]

[သစ္စာရှိမှု : ၁၀၀]

အာ...

နတ်ဘုရင်ခံ လင်ရင်ကို ဘာကြောင့် ရင်းနှီးနေသလဲဟု သူ တွေးနေခဲ့ခြင်း ဖြစ်သည်။ သူမက သူ၏ အိပ်ရာနွေး အစေခံ မဟုတ်ပါလား။

လုချန်းသည် ထျန်းရှနတ်ဘုရားနိုင်ငံတော်၏ တော်ဝင်မိသားစုတွင် မွေးဖွားလာခဲ့သူ ဖြစ်သည်။ သူ မွေးဖွားပြီးနောက်တွင် သူ့အား ပြုစုစောင့်ရှောက်ရန် ကောင်းကင်နတ်အဆင့်ရှိသော အစေခံ နှစ်ဦးကို သူ၏ မိခင်က ခန့်အပ်ပေးခဲ့သည်။

ထိုအစေခံ နှစ်ဦးသည် သူ၏ နေ့စဉ်လိုအပ်ချက်များကို ပြုစုရုံသာမက အမျိုးသားနှင့် အမျိုးသမီးကြားရှိ ကိစ္စရပ်များ အပါအဝင် အရာများစွာကို သင်ကြားပေးရသော ကိုယ်ရံတော် အစေခံများ ဖြစ်ကြ၏။ နတ်ဘုရင်ခံ လင်ရင်သည် လုချန်း၏ ဆရာမများထဲမှ တစ်ဦး ဖြစ်သည်။

သူ ရှုံးနိမ့်သွားပြီးနောက် သူမကို အမွေးဖြူမြို့တွင် ထားခဲ့ခြင်း ဖြစ်သည်။ ယခု ထိုနေရာတွင် သူမကို မတွေ့ရသဖြင့် သူမ သေဆုံးသွားပြီဟု လုချန်း ထင်မှတ်ထားခဲ့သည်။

စနစ် မျက်နှာပြင်ကို ကြည့်ကာ လုချန်း အနည်းငယ် နောင်တရမိသွား၏။ သူ၏ ယခင်ဘဝမှ ဆရာမက စနစ်၏ သတ်မှတ်ချက်များကို မမှီဟု သူ မထင်ထားခဲ့ပေ။

သို့သော်လည်း နားလည်နိုင်စရာတော့ ရှိ၏။ ထျန်းရန်နတ်ဘုရားနယ်မြေတွင် သူ၏ အမျိုးသမီးများစွာ ရှိခဲ့ရာ အားလုံးက စနစ် ၏ လိုအပ်ချက်များကို ဖြည့်ဆည်းပေးနိုင်မည် မဟုတ်ပေ။

လုချန်း တွေဝေပြီး တိတ်ဆိတ်နေသည်ကို မြင်သောအခါ နတ်ဘုရင်ခံ လင်ရင်က

“ဘာဖြစ်လို့လဲ”

လုချန်း သတိပြန်ဝင်လာကာ

“နတ်ဘုရင်ခံ လင်ရင်... ခင်ဗျားက ထျန်းရှနတ်ဘုရားနိုင်ငံတော်က လာတာပါ။ ကျန်တဲ့ အကြောင်းအရာတွေကိုတော့ ပြောဖို့ မသင့်တော်ပါဘူး။”

လုချန်း၏ စကားကို ကြားသောအခါ နတ်ဘုရင်ခံ လင်ရင် အနည်းငယ် မှင်တက်သွား၏။

တကယ်ပဲ သူမ၏ ဇစ်မြစ်ကို သိသွားခြင်းဖြစ်နိုင်သည်။

ဤချန်းလုက တကယ်ပဲ လုချန်း ဖြစ်နိုင်မလားဟု သူမ သံသယ ဝင်လာ၏။ ချန်းလုကို တွေ့ချင်သောကြောင့် ကောင်းကင်ဝံပုလွေမြို့သို့ လိုက်လာရန် သူမ စီစဉ်ခဲ့ခြင်းဖြစ်သည်။

လျှို့ဝှက်လဝန်းနန်းတော်သို့ ချန်းလု ရောက်လာစဉ်က သူမ သူ့ကို အဝေးမှ လှမ်းကြည့်ခဲ့ဖူးသည်။

ထိုစဉ်က နတ်ဘုရင်ခံ လင်ရင် အံ့အားသင့်ခဲ့ရ၏။ နှစ်သန်း‌ပေါင်းများစွာအတွင်း ချန်ဘုရင်နှင့် ဤမျှတူသော အမျိုးသားတစ်ဦးကို သူမ ပထမဆုံးအကြိမ် မြင်ဖူးခြင်းဖြစ်သည်။

ဤချန်းလုသည် ချန်ဘုရင် ဝင်စားသူ ဖြစ်နိုင်မလားဟုပင် သူမ သံသယ ဖြစ်ခဲ့သည်။

နတ်ဘုရင်ခံ လင်ရင်က

“နောက်ဆိုရင် ဒီပစ္စည်းကို လျှော့သုံးတာ ပိုကောင်းမယ်။ လူတွေရဲ့ သရုပ်မှန်ကို သိနိုင်တဲ့ စွမ်းရည်ဟာ ကောင်းကင်ဘုံရဲ့ လျှို့ဝှက်ချက်တွေကို ဖော်ထုတ်တာမျိုး ဖြစ်တဲ့အတွက် တန်ပြန်သက်ရောက်မှုတွေ ရှိနိုင်တယ်။”

လုချန်းက

“သတိပေးတဲ့အတွက် ကျေးဇူးတင်ပါတယ် နတ်ဘုရင်ခံ လင်ရင်။ နောက်ဆိုရင် ကျုပ် လျှော့သုံးဖို့ ကြိုးစားပါ့မယ်။”

ထို့နောက် နတ်ဘုရင်ခံ လင်ရင်က လုချန်းကို ကြည့်ကာ

“ကောင်းကင်ဝံပုလွေမြို့က မြို့တော်ဝန်နဲ့ အဲ့ဒီ မိသားစုကြီးတွေကို ဘယ်လို ကိုင်တွယ်လိုက်လဲ။”

“ကျုပ် သူတို့ကို မသတ်ခဲ့ပါဘူး...အားလုံးကို ဖမ်းချုပ်ထားပါတယ်။”

နတ်ဘုရင်ခံ လင်ရင်က

“ရှင် ကောင်းကောင်း လုပ်ခဲ့တာပဲ”

“ကျွန်မကို အဲဒီလူတွေဆီ ခေါ်သွားပေးပါ”

“ကောင်းပါပြီ”

ထို့နောက် တိန့်ချင်းဖုန်းနှင့် မိသားစုကြီးများ အကျဉ်းချခံထားရသည့် နေရာသို့ နတ်ဘုရင်ခံ လင်ရင်ကို လုချန်း ခေါ်ဆောင်သွား၏။

တိန့်ချင်းဖုန်းကို မြင်လျှင် နတ်ဘုရင်ခံ လင်ရင်သည် ဝိညာဉ်ရှာဖွေခြင်း အတတ်ကို တွေဝေခြင်းမရှိပဲ အသုံးပြုလိုက်၏။ တိန့်ချင်းဖုန်းသည် လူနတ်အဆင့်တစ်ဦး ဖြစ်သဖြင့် ဝိညာဉ်ရှာဖွေခြင်း ခံရသော်လည်း သေဆုံးခြင်းမရှိပဲ အသက်ရှင်နေဆဲ ဖြစ်သော်လည်း ဇဝေဇဝါဖြစ်သည့် လက္ခဏာများ စတင်ပြသလာသည်။

ထို့နောက်တွင် နတ်ဘုရင်ခံ လင်ရင်က ကျန်ရှိနေသူများကိုလည်း ဝိညာဉ်ရှာဖွေခြင်း အတတ်ကို ဆက်လက် အသုံးပြုလိုက်၏။

နတ်ဘုရင်ခံ လင်ရင် ဝိညာဉ်ရှာဖွေပြီးသည်ကို မြင်သောအခါ ကောက်ရှီယွမ်က

“ဆရာ... ကျွန်မတို့ နောက်ထပ် ဘာဆက်လုပ်ကြမလဲ။”

နတ်ဘုရင်ခံ လင်ရင်က တုံ့ပြန်မနေပဲ အင်းစာရွက်တစ်ရွက်ကို တိုက်ရိုက် ထုတ်ယူလိုက်ပြီးနောက် ရေရွတ်လိုက်သည်။

“လျှို့ဝှက်လဝန်းနန်းတော်က နတ်ဘုရင်ခံ လင်ရင်ဟာ ချီယန်ဂိုဏ်းရဲ့ ဒုတိယဂိုဏ်းချုပ်ကို ကောင်းကင်ဝံပုလွေမြို့မှာ တွေ့ဆုံဖို့ ဖိတ်ကြားပါတယ်။”

သူမ၏ စကားအဆုံးတွင် အင်းစာရွက်သည် အလင်းတန်းတစ်ခုအဖြစ် ပြောင်းလဲသွားကာ ချီယန်ဂိုဏ်းဆီသို့ ပျံသန်းသွားသည်။

ထို့နောက် နတ်ဘုရင်ခံ လင်ရင်က ကောက်ရှီယွမ်နှင့် ရှောင်ရွှီရင်ကို လှည့်ကြည့်ကာ

“မင်းတို့နှစ်ယောက် အရင်သွားပြီး ကျင့်ကြံကြတော့။ ငါ လုချန်းနဲ့ ဆွေးနွေးစရာ ကိစ္စတွေ ရှိသေးတယ်။”

အမျိုးသမီး နှစ်ဦးက

“ဟုတ်ကဲ့ပါ”

ဟု တစ်ပြိုင်နက်တည်း တုံ့ပြန်ကြ၏။

သူတို့၏ စကားအဆုံးတွင် ချင်ချင်းလှည့်ထွက်သွားကြသည်။

ထိုအခိုက်အတန့်တွင် နတ်ဘုရင်ခံ လင်ရင်က လက်ကို မြှောက်ကာ သူတို့နှစ်ဦး ပတ်ပတ်လည်၌ အသံလုံ အတားအဆီးတစ်ခုကို ဖန်တီးလိုက်၏။ နတ်ဘုရင်ခံ လင်ရင် ဘာမေးချင်သည်ကို လုချန်း ကြိုသိနေပြီးသား ဖြစ်သည်။

နတ်ဘုရင်ခံ လင်ရင်က လုချန်းကို ကြည့်ကာ

“လုချန်း... ရှင် ဘယ်ကနေ လာတာလဲ”

လုချန်းက ထိုမေးခွန်းကို မဖြေပဲ

“မတွေ့တာ ကြာပြီ လင်ရင် ။ အမွေးဖြူမြို့မှာ ခင်ဗျားကို မတွေ့ရတော့ ခင်ဗျားရဲ့ သက်တမ်း ကုန်ဆုံးသွားပြီလို့ ကျုပ် ထင်နေခဲ့တာ။”

လုချန်း၏ စကားကို ကြားသောအခါ အနည်းငယ် စမ်းသပ်ရန် ကြံရွယ်ထားသည့် နတ်ဘုရင်ခံ လင်ရင် ခဏခန့် မှင်တက်သွား၏။ နတ်ဘုရင်ခံ လင်ရင်က မယုံကြည်နိုင်စွာဖြင့်

“တကယ်ပဲ... ရှင်လား”

လုချန်းက

“ကျုပ်ပါပဲ။ ဒါပေမဲ့ ကျုပ်ဘယ်သူ ဆိုတာကို အခုလောလောဆယ် လျှို့ဝှက်ထားပေးပါ။ ကျုပ်ရဲ့ ဆရာနဲ့ စီနီယာအစ်မ နှစ်ယောက်လုံးက ကျုပ်အပေါ် အငြိုးရှိနေကြတယ်။ အကယ်၍ သူတို့သာ ကျုပ်ဘယ်သူလဲ သိသွားရင် ကျုပ် လျှို့ဝှက်လဝန်းနန်းတော်မှာ ဆက်နေနိုင်မှာ မဟုတ်ဘူး။”

နတ်ဘုရင်ခံ လင်ရင်က

“ဒါပေမဲ့ ရှင်က ကစဉ့်ကလျား ပင်လယ်ထဲကို ဝင်သွားတယ်လို့...”

ကစဉ့်ကလျား ပင်လယ်ထဲသို့ ဝင်ရောက်ခြင်းသည် ခန္ဓာကိုယ်နှင့် နတ်အာရုံကို ပျက်စီးစေသည်ဟု ကောလာဟလများ ရှိခဲ့သည်။ လုချန်း ကစဉ့်ကလျား ပင်လယ်ထဲတွင် ကျဆုံးသွားပြီဟု သူမ ထင်မှတ်ခဲ့သဖြင့် သူမ၏ ကိုယ်ပိုင်လမ်းစဉ်ကို ရှာဖွေရန် အမွေးဖြူမြို့မှ ထွက်ခွာခဲ့ခြင်း ဖြစ်သည်။

ယခု မျှော်လင့်မထားပဲ လုချန်း ပြန်လည် ရောက်ရှိလာခဲ့ပြီဖြစ်သည်။

လုချန်းက

“အဲဒီအကြောင်းတွေကို နောက်မှ ပြောကြတာပေါ့။ အခုတော့ ကျုပ် အသက်ရှင်နေသေးတယ်ဆိုတာ ခင်ဗျား သိထားရင် ရပြီ။”

နတ်ဘုရင်ခံ လင်ရင်က ချက်ချင်း ဂါရဝပြုကာ

“ဘုရင်ကြီးကို ဂါရဝပြုပါတယ်”

နတ်ဘုရင်ခံ လင်ရင် ဦးညွှတ်တော့မည့် အခိုက်တွင် သူမကို လုချန်းက နတ်စွမ်းအားဖြင့် ထိန်းမပေးလိုက်ကာ

“ကျုပ်ရဲ့ စွမ်းအားတွေ ပြန်မရမချင်း ကျုပ်ဟာ လျှို့ဝှက်လဝန်းနန်းတော်ရဲ့ တပည့်တစ်ယောက်သာ ဖြစ်တယ်။ ခင်ဗျား အခုလို လုပ်ဖို့ မလိုပါဘူး။”

နတ်ဘုရင်ခံ လင်ရင်က

“ကျွန်မ နားလည်ပါပြီ”

နတ်ဘုရင်ခံ လင်ရင်က

“ရှင် နောက်ထပ် ဘာဆက်လုပ်ဖို့ စဉ်းစားထားလဲ”

လုချန်းက

“အရင်ဆုံး ကျုပ်ရဲ့ စွမ်းအားတွေကို ပြန်လည် တည်ဆောက်ရမယ်။ ကျန်တာတွေကိုတော့ နောက်မှပဲ စဉ်းစားတော့မယ်”

နတ်ဘုရင်ခံ လင်ရင်က

“ရှင် အမွေးဖြူမြို့ကို သွားခဲ့သေးလား။ အဲ့ဒီမြို့ရဲ့ အခြေအနေကိုရော ရှင် သိလား”

လုချန်းက

“လူသူ မကျန်သလောက် ဖြစ်နေပြီ”

လုချန်း၏ စကားကို ကြားသောအခါ နတ်ဘုရင်ခံ လင်ရင်လည်း အနည်းငယ် အပြစ်မကင်းသလို ခံစားလိုက်ရ၏။ သူမသာ အမွေးဖြူမြို့တွင် ရှိနေခဲ့ပါက ချန်ဘုရင် ပြန်လာချိန်၌ ခိုကိုးရာမဲ့ ဖြစ်နေမည် မဟုတ်ပေ။

ထို့နောက် လုချန်းက

“ကဲ... လောလောဆယ် ဒီမှာပဲ တော်ကြဦးစို့”

နတ်ဘုရင်ခံ လင်ရင်က

“ကောင်းပါပြီ”

ထို့နောက် နတ်ဘုရင်ခံ လင်ရင်က အသံလုံ အတားအဆီးကို ဖယ်ရှားလိုက်၏။

ခဏအကြာတွင် ကောင်းကင်ဝံပုလွေမြို့ ပြင်ပမှ အမျိုးသားတစ်ဦး၏ အသံ ထွက်ပေါ်လာ၏။

“နတ်ဘုရင်ခံ လင်ရင်က ဒီအဖိုးကြီးဆီက ဘာများ လိုချင်လို့ပါလိမ့်”

ထိုစဉ် နတ်ဘုရင်ခံ လင်ရင်က လက်ကို မြှောက်လိုက်ကာ တိန့်ချင်းဖုန်းနှင့် ဩဇာကြီး မိသားစုဝင်အားလုံးကို သူမ၏ နတ်ဝတ်ရုံအတွင်းရှိ အာကာသထဲသို့ ပြောင်းရွှေ့လိုက်၏။

မကြာမီတွင် ကောင်းကင်ဝံပုလွေမြို့ ပြင်ပသို့ နတ်ဘုရင်ခံ လင်ရင် ရောက်ရှိသွားသည်။