အခန်း (၅၂၉-၅၃၁)

အပိုင်း ၅၂၉ : တစ်သက်တစ်ကျွန်း ထောင်ဒဏ်

ဤလူတစ်စုက လူလိမ်များဖြစ်​ကြောင်း လူအများအပြား သတိထားမိနေကြပြီဖြစ်၏။

ထို့ပြင် ဤတစ်ကြိမ်တွင် သူတို့က ငွေတစ်သန်းအထိ လိမ်လည်တောင်းရမ်းလိုက်ခြင်းပင်။

"ကောင်လေး.. ဒီလောက်ပိုက်ဆံအများကြီး ပေးစရာမလိုပါဘူးကွာ"

"ဟုတ်တယ်။ ခုနကတင် ဒီအဘွားကြီးက အကောင်းကြီးရှိနေသေးတာ။ အခု သူ ဟန်ဆောင်နေတာ ရှင်းနေတာပဲ"

"ကောင်​လေး.. အဆင်မပြေရင် ရဲသာခေါ်လိုက်။ တရားရုံးရောက်သွားရင်တောင် မင်း ဒီလောက်အများကြီးပေးရမှာ မဟုတ်ဘူး"

ယဲ့ချန်းက အေးအေးလူလူပြောလိုက်သည်။

"ကဲပါ။ ငွေမြန်မြန်လွှဲလိုက်။ ကျုပ် လုပ်စရာရှိသေးလို့"

ထိပ်ပြောင်အမျိုးသားက ဘဏ်အကောင့်နံပါတ်ပြောပြရန် သူ့ဖုန်းကို အမြန်ထုတ်လိုက်သည်။

သူ့ဘေးနားရှိ အမျိုးသမီးက မျက်မှောင်ကြုတ်လိုက်လေသည်။

တစ်ခုခုတော့ မှားနေပြီဟု သူ(မ) ခံစားရသည်။

ဒီလူငယ်လေးက ငတုံးမှမဟုတ်တာ။ ဒီလောက်များတဲ့ငွေကို ဘာလို့ပေးချင်ရတာလဲ။

သူ(မ)က ထိပ်ပြောင်အမျိုးသားကို ဘေးနားသို့ ဆွဲခေါ်သွားပြီး တီးတိုး​ပြောလိုက်လေသည်။

"ယောက်ျား.. ဒီလူ တစ်ခုခုထူးဆန်းနေတယ်လို့ ထင်တယ်နော်။ ဒီပိုက်ဆံကို မယူသင့်ဘူးလားလို့"

အမျိုးသားဖြစ်သူကလည်း မျက်မှောင်ကြုတ်လျက် အနည်းငယ် သံသယဝင်သွားသည်။

အရာအားလုံးက ချောမွေ့လွန်းနေချေသည်။

သို့သော် ဤသည်မှာ ငွေတစ်သန်းပင်။ သူ့အနေနှင့် မည်သို့နှယ် မမက်မောဘဲ နေနိုင်မည်နည်း။

ထိုအချိန်တွင် ယန်ရှောင်ကျစ်က မနေနိုင်တော့ဘဲ ဝင်ပြောလိုက်သည်။

"ဘာလို့ သူတို့ကို ပိုက်ဆံပေးမှာလဲ။ ဒီလူတွေက လူလိမ်တွေဆိုတာ အသိသာကြီး"

ယဲ့ချန်းက ဆို၏။

"ဒီလူတွေက လူလိမ်တွေဖြစ်နေရင်တောင် ကိုယ်တို့ ဘာမှလုပ်လို့မရဘူးလေ။ သူတို့ဆီမှာ ဗီဒီယိုသက်သေ ရှိနေတယ်။ မင်းမှာ သက်သေမှမရှိတာ။ အဲဒါကြောင့် ကံဆိုးတယ်လို့သဘောထားပြီး လက်ခံလိုက်ပါ"

ယဲ့ချန်းက သူ(မ)ကို မျက်စိမှိတ်ပြလိုက်ကြောင်း ယန်ရှောင်ကျစ် မြင်လိုက်ရသဖြင့် ဤလူများကို ကိုင်တွယ်ရန် သူ့တွင် အစီအစဉ်ရှိကြောင်း သဘောပေါက်သွားသဖြင့် သရုပ်ဆောင်ရာတွင် အမြန်ပူးပေါင်းလိုက်သည်။

ယန်ရှောင်ကျစ်သည် အစကတည်းက မင်းသမီးတစ်လက်ဖြစ်သောကြောင့် သရုပ်ဆောင်ခြင်းကား သူ(မ)၏ ကျွမ်းကျင်ရာအလုပ်ပင်။

သူ(မ)က ယဲ့ချန်း၏လက်ကို ရှက်သွေးဖြာနေဟန်ဖြင့် ဆုပ်ကိုင်ရင်း ပြောလိုက်သည်။

"အချစ်.. ရှင်က သဘောကောင်းလွန်းတယ်နော်။ နောက်ဆိုရင် အဘွားအိုတွေ မြေကြီးပေါ် လဲကျနေတာ မြင်ရင်တောင် ကျွန်မ ဘယ်တော့မှ ဝင်မပါတော့ပါဘူး"

သရုပ်ဆောင်နေခြင်း ဖြစ်သော်လည်း အချစ်ဟု ခေါ်လိုက်ရသောကြောင့် ယန်ရှောင်ကျစ်၏မျက်နှာလေးမှာ နီမြန်းသွားသည်။

သူ(မ)က နှာခေါင်းစည်းနှင့် နေကာမျက်မှန်ကို တပ်ဆင်ထားသောကြောင့် ယဲ့ချန်း မမြင်နိုင်ပေ။

ယဲ့ချန်းကလည်း အချိတ်အဆက်မိမိ ပူးပေါင်းကာ သူ(မ)၏ခေါင်းလေးကို ကြင်နာစွာ ပွတ်သပ်ပေးရင်း ပြုံးလိုက်သည်။

"ကဲပါ... လိမ္မာတယ်နော်။ ငွေတစ်သန်းတည်းပဲလေ။ ခွေးကျွေးလိုက်တယ်လို့ပဲ သဘောထားလိုက်ပါ"

ထိပ်ပြောင်အမျိုးသားက ဤအဖြစ်ကို မြင်သောအခါ မည်သည့်ဟာကွက်ကိုမှ သတိမထားမိသဖြင့် သူ့အကောင့်နံပါတ်ကို ပြောပြလိုက်သည်။

ယဲ့ချန်းက ထိုလူ၏အကောင့်ထဲသို့ ငွေကို တိုက်ရိုက် လွှဲပေးလိုက်သည်။ ငွေတစ်သန်း ဝင်လာသောအခါ ထိုလူ၏ မျက်နှာထက်တွင် ဝမ်းသာပျော်ရွှင်မှုများ အထင်းသား ပေါ်လွင်လာသည်။

အမျိုးသမီးက တစ်ခုခုပြောချင်နေသော်လည်း ငွေတစ်သန်းဆိုသည်မှာ သူတို့အတွက် စင်စစ်များပြားလှသော ပမာဏဖြစ်နေချေသည်။

ငွေဝင်လာသည်ကို မြင်သောအခါ ထိုအမျိုးသားလည်း တောက်တောက်ပပပြုံးလိုက်သည်။

ဘေးနားရှိ လူအုပ်ကြီးမှာမူ တိတ်တဆိတ် ခေါင်းခါမိကြသည်။

"ဒီကောင်လေးက တော်တော်အတာပဲ"

"ဟုတ်ပါ့။ ကြည့်လေ ကြည့်လေ ဒီလူတွေက လူလိမ်တွေနဲ့ ပိုတူလေပဲ"

"သူတို့စကားပြောနေတာကို ငါ ခုနတုန်းက ကြားလိုက်တယ်။ သူတို့တွေက မိသားစုဝင်တွေ ထင်တယ်"

ထိုလူလေးယောက်၏ ပျော်ရွှင်နေလေဟန် အမူအရာများကို ကြည့်ခြင်းအားဖြင့် သူတို့အချင်းချင်း ပေါင်းကြံနေကြကြောင်း အရူးပင် သိနိုင်လေသည်။

ယဲ့ချန်းက လှောင်ပြုံးပြုံးလိုက်၏။

"ဘယ်လိုလဲ။ ပိုက်ဆံရောက်လား"

ထိပ်ပြောင်အမျိုးသားက စိတ်လှုပ်ရှားစွာ ခေါင်းညိတ်ပြလိုက်၏။

"အင်း ရောက်တယ်။ ရောက်တယ်"

ယဲ့ချန်းက ပြောလိုက်သည်။

"ဒါပေမဲ့ ကျုပ်ကောင်မလေး ဒီအဘွားကို တကယ်ဝင်တိုက်မိလို့ ဒီတစ်သန်းကိုပေးရတာဆိုရင် ဆေးကုသစရိတ်လို့ သတ်မှတ်လို့ရတယ်။ တကယ်လို့ ခင်ဗျားတို့ ကျုပ်တို့ဆီက သက်သက်ငွေညှစ်တာဆိုရင်တော့ တစ်သန်းဆိုတဲ့ပမာဏက ခင်ဗျားတို့ကို တစ်သက်တစ်ကျွန်း ထောင်ချဖို့ လုံလောက်တယ်နော်"

ယဲ့ချန်း၏စကားကို ကြားသော် ထိပ်ပြောင်အမျိုးသားလည်း အံ့အားသင့်သွားပြီးနောက် လှောင်ပြုံးပြုံးလိုက်သည်။

"မင်းကောင်မလေးက ငါ့အမေကို ဝင်တိုက်မိတာ အမှန်ပဲလေ။ ငါတို့လိမ်တယ်ဆိုတဲ့ သက်သေ မင်းဆီမှာရှိလို့လား"

ထိပ်ပြောင်အမျိုးသားမှာ ယခု ပိုက်ဆံရထားပြီဖြစ်ရာ ဤနေရာက အမြန်ထွက်သွားပြီး အောင်ပွဲခံချင်နေပေသည်။

ယဲ့ချန်းက အသာပြုံးလိုက်လေသည်။

"တကယ်တော့ ခင်ဗျားတို့ သတိမထားမိတာဖြစ်မယ်။ ဟိုဘက်မှာ ကင်မရာတစ်လုံး ရှိတယ်။ ဒီက အဖြစ်အပျက်တွေအားလုံးကို မှတ်တမ်းတင်ထားလောက်ပြီ။ လိမ်လည်တာ ဟုတ်မဟုတ်ဆိုတာ ရဲတွေအနေနဲ့ ဗီဒီယိုမှတ်တမ်းကို စစ်ဆေးကြည့်လို့ရတာပဲ"

ဤစကားကို ကြားသောအခါ သူတို့ မျက်နှာပျက်သွားကြသည်။

သူတို့ လိမ်လည်မှုမလုပ်ခင် စစ်ဆေးခဲ့စဉ်က အနီးပတ်ဝန်းကျင်တွင် ကင်မရာများ မရှိခဲ့ပေ။

ယခုမှသာ မျက်နှာချင်းဆိုင်ရှိ စူပါမားကတ်မှ ကင်မရာသည် သူတို့ရှိရာဘက်သို့ အတိအကျ ချိန်ရွယ်ထားကြောင်း သတိထားမိလိုက်ကြသည်။

သူတို့မှာ လွန်ခဲ့သည့် မိနစ်အနည်းငယ်ကပင် အလွန်ကျေနပ်နေခဲ့ကြသော်လည်း ယခုမူ သူတို့၏အမူအရာများ ရုတ်တရက် ပြောင်းလဲသွားလေပြီ။

အမျိုးသမီးက မနေနိုင်တော့ဘဲ ပြောလိုက်၏။

"လောဘကြီးတဲ့ ရှင့်အပြစ်တွေချည်းပဲ။ ဒီပိုက်ဆံကို ကျွန်မတို့ မယူသင့်ဘူးလို့ ပြောသားပဲ။ ဒါပေမဲ့ ရှင် လက်မခံခဲ့ဘူးလေ။ ကျွန်မတို့ ထောင်ကျရင် ဘယ်လိုလုပ်မလဲ။ ကျွန်မတို့ကလေးရော ဘယ်လိုလုပ်မလဲ။ ရှင့်ကြောင့် ကျွန်မပါ ဒုက္ခရောက်ပြီ"

အမျိုးသမီးက အမျိုးသားကို 'ယောက်ျား' ဟု ခေါ်လိုက်သည်ကို ကြားရသဖြင့် ပတ်ဝန်းကျင်တွင် ဆူညံသွားတော့သည်။

"သေလိုက်ပါတော့... သူတို့က မိသားစုတွေ ဖြစ်နေတာကိုး"

"လူလိမ်တွေဆိုတာ ပေါ်သွားပြီပဲ။ သူတို့ကို လွှတ်ပေးလိုက်လို့ မဖြစ်ဘူး"

"အရမ်းရွံစရာကောင်းတာပဲ။ ငါ ရဲကို ဖုန်းဆက်ပြီးသွားပြီ။ သူတို့ကို ဖမ်းကိုဖမ်းရမယ်"

"ဒီလူငယ်လေးက သူတို့ကို ငွေတစ်သန်းတောင် ပေးလိုက်သေးတယ်။ အရမ်းလောလွန်းတယ်"

လူအုပ်ကြီး၏ ပြောဆိုသံများကို ကြားရသောအခါ ထိပ်ပြောင်အမျိုးသား၏ မျက်နှာကား မည်းမှောင်သွားတော့သည်။

အမျိုးသမီးက သူ့ကို 'ယောက်ျား'ဟု ခေါ်လိုက်သည်နှင့်တစ်ပြိုင်နက် အရာအားလုံး ပေါ်သွားပြီဖြစ်၏။

ထိုအချိန်တွင် အမျိုးသမီးခမျာ မည်သည့်အရာကိုမှ ဂရုမစိုက်နိုင်တော့ဘဲ ယဲ့ချန်း၏ရှေ့တွင် ဒူးထောက်ချလိုက်သည်။

"လူကြီးမင်း... ကျွန်မတို့ မှားသွားပါတယ်။ ကျွန်မတို့က လူလိမ်တွေပါ။ ကျေးဇူးပြုပြီး ကျွန်မတို့ကို ခွင့်လွှတ်ပေးပါ။ ငွေတစ်သန်းကို အခုချက်ချင်းပြန်ပေးပါ့မယ်"

"ဘာပြန်ပေးရမှာလဲ။ နင် ရူးနေတာလား။ ဒါက ငွေတစ်သန်းတောင်နော်"

အဘိုးအိုကလည်း မနေနိုင်တော့ဘဲ ဒေါသတကြီး အော်ဟစ်လိုက်သည်။

မြေပြင်ပေါ်ရှိ အဘွားအိုကလည်း ရုတ်တရက်ကြီး ခြေထောက်ပြန်ကောင်းသွားပြီး မတ်တတ်ထရပ်လိုက်သည်။

"ငတုံးမ.. ကြောက်တတ်လိုက်တာ။ ဒီကောင့်ဆီက အလကားရတဲ့ ငွေတစ်သန်းကို ငါတို့က ဘာလို့မယူရမှာလဲ"

ယခုဆိုလျှင် အရာအားလုံးက ဘူးပေါ်သလို ပေါ်သွားခဲ့လေပြီ။

အမျိုးသမီးမှာမူ ကြောက်လန့်တကြား တုန်ယင်နေချေသည်။

သူ(မ)တွင် ကလေးအများကြီးရှိသည်။ အကယ်၍ သူ(မ)သာ ထောင်ကျသွားပါက သူတို့ ဘာဖြစ်သွားကြမလဲ။

"လူကြီးမင်း... ကျွန်မတို့ ပိုက်ဆံပြန်ပေးပါ့မယ်။ ကျွန်မတို့ကို ချမ်းသာပေးပါ"

ထိုအမျိုးသမီးက တောင်းပန်လေသည်။

ထိပ်ပြောင်အမျိုးသားက ဒေါသမထိန်းနိုင်တော့ဘဲ ထိုမိန်းမကို ပါးချလိုက်သည်။

"ငတုံးမ... နောက်ဆုံးမှာမှ ငါတို့မိသားစု ထီပေါက်သလို အခွင့်အရေးရလိုက်တာကို မင်းက ငါပိုက်ဆံရမှာကို မကြည့်ရက်ဘူးလား"

ပါးရိုက်ခံရပြီးနောက် ထိုအမျိုးသမီးခမျာ မအောင့်နိုင်တော့ဘဲ ငိုချလိုက်လေသည်။

"ဒီလိုနှလုံးသားမဲ့တဲ့အလုပ်တွေ မလုပ်သင့်ဘူးလို့ ကျွန်မပြောသားပဲ။ ရှင်တို့က ငွေတစ်သန်းရဖို့အတွက် အတင်းလိမ်လည်ချင်နေကြတာ။ ဒါက ပြစ်မှုကြီးနော်။ ကျွန်မတို့ထောင်ကျသွားရင် ကျွန်မတို့ကလေးတွေ ဘယ်လိုလုပ်ကြမလဲ"

အနည်းဆုံးတော့ ဤအမျိုးသမီးတွင် အသိတရားနည်းနည်း ရှိနေသေးသည်ဟု ဆိုရပေမည်။

ဝိုင်းအုံကြည့်နေကြသော လူအုပ်ကြီးမှာ အံ့သြမှင်တက်သွားကြသည်။

တစ်ထောင်နှစ်ထောင်လောက်ဆိုလျှင် သူတို့အနေနှင့် ရက်အနည်းငယ်သာ အချုပ်ကျနိုင်သော်လည်း တစ်သန်းဆိုလျှင်မူ...

အစတုန်းက ဤလူငယ်လေး ဘာကြောင့် ငွေတစ်သန်းလွှဲပေးလိုက်ရသလဲဆိုသည်ကို ယခုမူ လူတိုင်း နားလည်သွားကြပြီဖြစ်၏။

သို့သော် တစ်ပါးသူကို ကူညီပေးတတ်သည့် လူမှုရေးဓလေ့စရိုက်ကောင်းများကို ဖျက်ဆီးပစ်သည့် ထိုကဲ့သို့သောလူများမှာ တစ်သက်တစ်ကျွန်းထောင်ဒဏ်နှင့်သာ ထိုက်တန်ကြောင်း သိထားသဖြင့် လူတိုင်း ကျေနပ်အားရသွားကြသည်။

"ဒါ​ပေါ့။ ဒီမိသားစုက လူဘယ်နှယောက်ကို လိမ်ခဲ့ပြီးပြီလဲဆိုတာ ဘယ်သူသိမှာလဲ။ တစ်သက်တစ်ကျွန်းဆိုတာတောင် ပေါ့သေးတယ်လို့ ခံစားရတယ်။ သူတို့ကို သေဒဏ်ပေးသင့်တာ"

"ဟုတ်တယ်။ သူတို့လိုလူတွေကြောင့် နောင်တစ်ချိန် ငါတို့ လဲကျခဲ့ရင်တောင် ကူညီမယ့်လူ ရှိမှာမဟုတ်ဘူး။ သူတို့နဲ့တန်တယ်"

"သူတို့ကို လွှတ်ပေးလို့ မဖြစ်ဘူး။ ရဲခေါ်ပြီး ဖမ်းခိုင်းရမယ်"

ဤအချိန်တွင် လူအုပ်ကြီးက အခြေအနေအရပ်ရပ်ကို အပြည့်အဝ နားလည်သဘောပေါက်သွားကြသည်။

ကြောက်ရွံ့သွားသော အဘိုးအိုက ကပျာကယာပြောလိုက်၏။

"မောင်ရင်... ငါတို့ကိုသနားပါကွာ။ ပိုက်ဆံပြန်ပေးပါ့မယ်။ ငါတို့ကိုသာ လွှတ်ပေးပါ"

ယဲ့ချန်းက အေးစက်စက် ရယ်မောလိုက်သည်။

"သနားရမယ်ပေါ့။ ခင်ဗျားတို့ သူများကို ဒုက္ခပေးတုန်းကရော သနားဖို့တွေးခဲ့လို့လား"

ယဲ့ချန်း၏စကားကို ကြားသော် လူတိုင်း သဘောတူလက်ခံဟန်ဖြင့် ခေါင်းညိတ်လိုက်သည်။

တစ်ခါတုန်းက အဘွားအိုတစ်ယောက် လဲကျသွားခဲ့ပြီး မည်သူကမှ မကူညီရဲသောကြောင့် အသက်ဆုံးရှုံးခဲ့ရဖူးသည်။

ထိုကဲ့သို့သော အခြေအနေမျိုး ပေါ်ပေါက်လာရခြင်းမှာ လူလိမ်များ အလွန်များပြားလွန်းသောကြောင့်ပင်။

ထို့ကြောင့် ဤလူများမှာ သေချာပေါက် အရေးယူခံရပေမည်။ သူတို့နှင့် ထိုက်တန်သော ပြစ်ဒဏ်ကို ခံယူသင့်သည်။

ထိုအချိန်တွင် အဝေးမှ အရေးပေါ်အချက်ပေးသံများကို ကြားလိုက်ရသည်။ ရဲအရာရှိများ ရောက်ရှိလာခဲ့ပြီဖြစ်၏။

အချက်ပေးသံများကို ကြားလိုက်ရသောအခါ ထိုအမျိုးသား၏ မျက်နှာကား ပို၍ပင် ပျက်ယွင်း​သွားလေတော့သည်။

အဘွားအို၏ ခြေထောက်များမှာ ခွေကျသွားပြီး ဤတစ်ကြိမ်တွင်မူ မြေပြင်ပေါ်သို့ အမှန်တကယ် လဲကျသွားတော့သည်။

••••••••••••••••

အပိုင်း ၅၃၀ - အလှပဂေးလေးကို ကယ်တင်ခဲ့သည့် သူရဲကောင်း

ရဲကားဥသြဆွဲသံများကို ကြားလိုက်ရသောအခါ လူလိမ်များအားလုံး ကြက်သေသေသွားကြသည်။

သူတို့မှာ ထွက်ပြေးဖို့ အခွင့်အရေးလုံးဝမရှိတော့ပေ။

ဘေးနားရှိ လူအုပ်ကြီးက သူတို့ကို ဝိုင်းရံထားပြီးဖြစ်နေချေသည်။

ထိုအချိန်တွင် အမျိုးသမီးဖြစ်သူက မြေပြင်ပေါ်သို့ ခွေကျသွားပြီး ဝမ်းနည်းပက်လက်ဖြင့် ရှိုက်ကြီးတငင် ငိုကြွေးနေတော့သည်။

ဘေးနားမှ ဝိုင်းကြည့်နေသူများအားလုံးလည်း တိတ်တဆိတ် ခေါင်းခါမိကြသည်။

"ဒီကောင်လေးက အရမ်းရက်စက်တာပဲ။ ငွေတစ်သန်းတဲ့။ ဒီမိသားစုတော့ ထောင်ထဲမှာ အကြာကြီးနေရတော့မယ်ထင်တယ်"

"ဒီလူငယ်လေးလုပ်တာ မှန်တယ်လို့ထင်တာပဲ။ သူတို့လို လူတွေကပဲ လူ့အသိုင်းအဝိုင်းရဲ့ ပတ်ဝန်းကျင်ကောင်းကို ဖျက်ဆီးနေကြတာလေ။ သူတို့ကို ပြင်းပြင်းထန်ထန် အပြစ်ပေးသင့်တယ်"

ဘေးနားမှ ပြောဆိုဆွေးနွေးသံများကို နားထောင်ရင်း ယန်ရှောင်ကျစ် သက်ပြင်းရှည်ကြီးတစ်ချက် ချလိုက်မိသည်။

ယဲ့ချန်းကို ကျေးဇူးတင်ရပေမည်။ သို့မဟုတ်ပါက ယနေ့ကြုံတွေ့ရသော ဤအကျပ်အတည်းကို ဤမျှလွယ်လွယ်ကူကူ ဖြတ်ကျော်နိုင်မည်မဟုတ်ပေ။

သို့သော် ထိုစဉ်မှာပင် အမျိုးသားဖြစ်သူ၏ မျက်နှာထက်တွင် ကြမ်းကြုတ်ခက်ထန်သော အမူအရာတစ်ခု ပေါ်လာသည်။

"မင်းကြောင့်။ မင်းကြောင့်ဖြစ်တာ။ တုံးလိုက်တဲ့မိန်းမ။ မင်းသာ ငါ့အမေကို မကူညီခဲ့ရင် ငါတို့တစ်မိသားစုလုံး ထောင်ကျစရာ အကြောင်းရှိပါ့မလား"

ယန်ရှောင်ကျစ်ခမျာ ပြောစရာစကားပင် မရှိတော့ပေ။

ဒီလူက အရှက်မရှိလိုက်တာ

သူ့အမှားဖြစ်ကြောင်း သိသာနေသည့်တိုင် ယခုမူ တခြားလူကို အပြစ်ဖို့နေသေးသည်။

သို့သော် ထိုအချိန်တွင် ထိုလူက ဓားတစ်ချောင်းကို ရုတ်တရက်ဆွဲထုတ်ပြီး ယန်ရှောင်ကျစ်ကို ထိုးလေတော့သည်။

ထိပ်ပြောင်အမျိုးသားက သူ(မ)ကို ရုတ်တရက်တိုက်ခိုက်လိမ့်မည်ဟု ယန်ရှောင်ကျစ် လုံးဝထင်မှတ်မထားခဲ့သဖြင့် ရှောင်တိမ်းရန် နောက်ကျသွားခဲ့သည်။

ဓားထက်ထက်တစ်လက်က သူ(မ)ကို ထိုးစိုက်တော့မည်ဖြစ်ကြောင်း မြင်လိုက်ရသောအခါ ယန်ရှောင်ကျစ်လည်း မျက်လုံးသာ မှိတ်ထားလိုက်သည်။

"သွားပြီ။ ဒီနေ့တော့ ငါသေရဖို့ သေချာသွားပြီပဲ"

ဤမျှနီးကပ်သော အကွာအဝေးတွင် ဓားနှင့်သာ အထိုးခံရပါက သူ(မ)အနေနှင့် အသက်ရှင်ရန် လုံးဝလမ်းမမြင်တော့ပေ။

သို့သော် ထိုအချိန်မှာပင် နောက်ကျောဘက်မှ လက်တစ်ဖက် ထွက်ပေါ်လာပြီး ထိုဓားထက်ထက်ကို ဆုပ်ကိုင်ဖမ်းဆွဲလိုက်သည်။

ထို့နောက် ယဲ့ချန်းက ခြေထောက်ဖြင့် ကန်ထုတ်လိုက်လေရာ ထိပ်ပြောင်ပြောင်အမျိုးသားမှာ လွင့်စင်လဲကျသွားလေတော့သည်။

ယန်ရှောင်ကျစ် အံ့သြမှင်တက်သွားသည်။ ယဲ့ချန်းက ရုတ်တရက်ရှေ့ထွက်ပြီး သူ(မ)ကို ကယ်တင်ပေးလိမ့်မည်ဟု လုံးဝထင်မထားပေ။

ယဲ့ချန်း၏လက်တွင် သွေးထွက်နေသည်ကို မြင်လိုက်ရသောအခါ သူ(မ)၏အမူအရာ အနည်းငယ်ပျက်ယွင်းသွားသည်။

"ယဲ့ချန်း ရှင့်လက်..."

"ငါ အဆင်ပြေပါတယ်"

ယဲ့ချန်းကမူ ခေါင်းခါပြလိုက်သည်။

"ရှင်ကသာ အဆင်ပြေတယ်ပြောနေတာ။ ရှင့်လက်က သွေးတွေထွက်နေပြီလေ"

ယန်ရှောင်ကျစ်၏ မျက်လုံးထဲတွင် မျက်ရည်များ ဝဲတက်လာသည်။

သူ(မ)ကြောင့်သာမဟုတ်လျှင် ယဲ့ချန်းလည်း ထိခိုက်ဒဏ်ရာရမည်မဟုတ်ပေ။

ထိုအချိန်တွင် ရဲများ ရောက်လာကြသည်။

ရဲအရာရှိများက လူလိမ်မိသားစုကို အမြန်ဖမ်းဆီးလိုက်ကြသည်။

ရဲတစ်ယောက်က ယဲ့ချန်းထံသို့ ရောက်လာပြီး ပြောလိုက်၏။

"လူကြီးမင်း.. ထွက်ဆိုချက်ပေးဖို့အတွက် ကျေးဇူးပြုပြီး ကျွန်တော်နဲ့ လိုက်ခဲ့ပေးပါ"

ထိုအချိန်တွင် ယန်ရှောင်ကျစ်ခမျာ ထိတ်လန့်သွားတော့သည်။

သူ(မ)က ခိုးထွက်လာခဲ့ခြင်းဖြစ်ရာ အကယ်၍ ရဲအရာရှိများက သူ(မ)၏ ထွက်ဆိုချက်ကို ယူမည်ဆိုပါက သူ(မ) မည်သူမည်ဝါဖြစ်ကြောင်း ပေါ်သွားပေလိမ့်မည်။

ယဲ့ချန်းက ရယ်မောလိုက်သည်။

"မင်း ဘာအမှားမှမလုပ်ထားပါဘူးလေ။ ဟုတ်တယ်မလား။ ရဲတွေကို ဘာလို့ ဒီလောက်တောင်ကြောက်နေရတာလဲ"

ယန်ရှောင်ကျစ် ရှက်သွေးဖြာသွားလေသည်။

"မဟုတ်ပါဘူး။ ကျွန်မက ဒီတစ်ခေါက် ခိုးထွက်လာတာမလို့ပါ။ အပြင်လောကကို မသိစေချင်လို့"

ယဲ့ချန်းလည်း ခေါင်းညိတ်ပြပြီး ဖုန်းတစ်ချက် ခေါ်လိုက်သည်။

ရဲစခန်းတွင် ကျိုးစုစုက ယဲ့ချန်းနှင့် ယန်ရှောင်ကျစ်တို့ကို စိုက်ကြည့်နေသည်။

"ဝိုး... ရက်ပိုင်းအတွင်းမှာတင် နာမည်ကြီးအနုပညာရှင်တစ်ယောက်နဲ့ သူငယ်ချင်းတွေ ဖြစ်နေပြီပေါ့လေ"

ကျိုးစုစုက စနောက်လိုက်သည်။

ယဲ့ချန်းက ရယ်မောရင်း ပြောလိုက်သည်။

"တိုက်ဆိုင်သွားရုံပါ။ ဟုတ်တယ်မလား။ သြော်... ဒီကိစ္စကို လျှို့ဝှက်ထားပေးရမယ်နော်"

ကျိုးစုစုက ပြောလိုက်သည်။

"စိတ်မပူပါနဲ့။ ကျွန်မကလွဲပြီး တခြားဘယ်သူမှ သိမှာမဟုတ်ပါဘူး။ ဟိုလူတွေက အရင်ကလည်း ခဏခဏအဖမ်းခံရဖူးတဲ့ ဝါရင့်တွေလေ။ ဒါပေမဲ့ ဒီတစ်ကြိမ်တော့ ရှင်တို့က သူတို့ကို အသေအချာမိသွားအောင် လုပ်လိုက်နိုင်တာဆိုတော့ ထောင်ထဲမှာ အေးအေးဆေးဆေး နေရတော့မှာပါ"

ယဲ့ချန်းက အေးစက်စက် နှာမှုတ်လိုက်သည်။

"သူတို့လိုလူတွေက လူ့အသိုင်းအဝိုင်းကို ပျက်စီးစေတယ်လေ။ သူတို့နဲ့တန်ပါတယ်"

ရဲစခန်းမှ ထွက်လာပြီးနောက် ယန်ရှောင်ကျစ်လည်း အားတုံ့အားနာဖြင့် ပြောလိုက်သည်။

"ရှင့်လက် ထိခိုက်သွားတာ အားလုံး ကျွန်မအပြစ်တွေပါ"

ယဲ့ချန်းက ခပ်ဖွဖွပြုံးလိုက်လေသည်။

"ရပါတယ်။ သူတို့ မင်းကို ဓားနဲ့ထိုးမှာကို ငါက ဒီအတိုင်း ရပ်ကြည့်မနေနိုင်လို့ပါ"

ယန်ရှောင်ကျစ်ခမျာ ရှက်သွေးဖြာသွားလေသည်။

"ယဲ့ချန်း.. ရှင်က ဟိုနာမည်ကြီးမင်းသားတွေထက်တောင် ပိုချောတယ်လို့ ကျွန်မ ထင်တယ်"

ယဲ့ချန်းက ခဏမျှ ငြိမ်သက်သွားသည်။

"ကိုယ်လည်း အမြဲတမ်း အဲဒီလိုပဲထင်နေခဲ့တာ"

"ရှင်..."

သူတို့နှစ်ယောက်သား ရဲစခန်းထဲက ထွက်လာခဲ့ကြသည်။

ယန်ရှောင်ကျစ်၏ ဗိုက်ထဲမှ ရုတ်ခြည်း အသံမြည်လာသည်။

ယဲ့ချန်းလည်း မနေနိုင်တော့ဘဲ ရယ်မောလိုက်မိသည်။

ဒီကောင်မလေး ဗိုက်ဆာနေပုံရတယ်။

"သြော်... ဟုတ်သားပဲ.. မင်းကို အရသာရှိတာ တစ်ခုခုလိုက်ကျွေးမယ်လေ"

ယဲ့ချန်းက ရုတ်တရက်ပြောလိုက်သည်။

"ဘယ်လို အရသာရှိတဲ့အစားအစာလဲ"

ယဲ့ချန်းက လျှို့ဝှက်ဆန်းကြယ်စွာ ပြုံးလိုက်သည်။

"ဟိုရောက်ရင် သိမှာပေါ့"

သူတို့နှစ်ယောက်သား အလွန်ချောင်ကျသော လမ်းကြားလေးတစ်ခုသို့ ရောက်လာခဲ့ကြသည်။

သူတို့နှစ်ယောက်သား နေဝင်ဆည်းဆာအောက်တွင် လမ်းလျှောက်နေကြစဉ် ယန်ရှောင်ကျစ်၏ လက်လေးက ပတ်တီးစည်းထားသော ယဲ့ချန်း၏လက်ကို ညင်သာစွာ ထိတွေ့လာသည်။

အနည်းငယ် စိတ်မကောင်းဖြစ်သွားသဖြင့် သူ(မ) ယဲ့ချန်း၏လက်ကို ဆုပ်ကိုင်ထားလိုက်မိသည်။

ယဲ့ချန်း အနည်းငယ်လန့်သွားသော်လည်း နှုတ်ခမ်းထောင့်စွန်းများမှာ အနည်းငယ် ကွေးတက်သွားသည်။

"ဟိုမှာကြည့်လိုက်..အရင်က ကိုယ် အဲဒီမှာ မူလတန်းတက်ခဲ့တာလေ"

ယဲ့ချန်းက သိပ်မဝေးလှသော နေရာသို့ လက်ညှိုးထိုးပြလိုက်သည်။

ယန်ရှောင်ကျစ်က လှမ်းကြည့်လိုက်၏။

"ရှင် အရင်က ဒီမှာနေခဲ့တာလား"

"အင်း... အရင်က ကိုယ်တို့မိသားစုက ဒီနေရာမှာနေခဲ့ကြတာ။ အခြေအနေပိုကောင်းလာမှ ပြောင်းခဲ့တာပေါ့"

သူတို့နှစ်ယောက် ငါးမိနစ်ခန့် လမ်းလျှောက်ပြီးနောက် လူနေတိုက်ခန်းတစ်ခုသို့ ရောက်သွားကြသည်။

ယဲ့ချန်းက တဲအိမ်လေးတစ်ခုကို လက်ညှိုးထိုးပြရင်း ရယ်မောလိုက်သည်။

"ဒီနေရာလေ"

"ဝိုး... ရင်းနှီးနေတဲ့အရသာလေး"

သိပ်မဝေးလှသော နေရာတစ်ခုတွင် ရိုးရှင်းလှသည့် ဆန်ခေါက်ဆွဲဆိုင်လေးတစ်ဆိုင်ကို မြင်လိုက်ရသဖြင့် ယန်ရှောင်ကျစ် အနည်းငယ် အံ့အားသင့်သွားသည်။

နာမည်ကြီးကြယ်ပွင့်တစ်ဦးအနေနှင့် ယန်ရှောင်ကျစ်သည် များသောအားဖြင့် ကြယ်ပွင့်အဆင့်ရှိ ဟိုတယ်များကိုသာ သွားလေ့ရှိသည်ဖြစ်ရာ ဤကဲ့သို့ လမ်းဘေးဆိုင်တွင် တစ်ခါမှမစားဖူးပေ။

ဤဆိုင်လေးမှာ အလွန်စုတ်ချာလှပြီး စားပွဲခုံများနှင့် ဆေးရောင်များပင် ဟောင်းနွမ်းနေပြီဖြစ်၏။

ယဲ့ချန်းက ပြုံးလိုက်သည်။

"ဒီဆိုင်လေးက ကိုယ် မူလတန်းတက်ကတည်းက ရှိတာ။ သူတို့ရဲ့ဆန်ခေါက်ဆွဲက အရမ်းအရသာရှိတယ်"

ယန်ရှောင်ကျစ်က ပြောလိုက်၏။

"ကောင်းပါပြီ။ ကျွန်မလည်း အရင်က ကြားဖူးရုံပဲကြားဖူးတာ။ ဆန်ခေါက်ဆွဲကို ပထမဆုံးအကြိမ် စားဖူးတာပဲ"

ယဲ့ချန်းက ရယ်မောလိုက်၏။

"မြည်းကြည့်လိုက်။ မင်း နောင်တရမှာ မဟုတ်ဘူး"

သူတို့နှစ်ယောက်သား ဆိုင်ငယ်လေးထဲသို့ ဝင်သွားပြီးနောက် ယဲ့ချန်းက ပြောလိုက်သည်။

"ဦးလေးဝမ်.. သီးသန့်အခန်းထဲမှာ နေရာကျန်သေးလားဗျ"

"ရှိတာပေါ့။ ရှောင်ချန်း ဒီကိုမလာတာတောင် တော်တော်ကြာနေပြီနော်။ ဒါ မင်းရဲ့ကောင်မလေးလား"

တစ်စုံတစ်ယောက်က သူ(မ)ကို ချစ်သူကောင်မလေးဟု အထင်မှားသွားကြောင်း ကြားလိုက်ရသဖြင့် ယန်ရှောင်ကျစ်၏မျက်နှာလေး နီမြန်းသွားသည်။

ယဲ့ချန်းက ရယ်မောလိုက်၏။

"မဟုတ်ပါဘူးဗျာ။ ရိုးရိုးသူငယ်ချင်းတွေပါ"

ဆိုင်ရှင်က အားရပါးရ ရယ်မောလိုက်သည်။

"ရှက်မနေပါနဲ့ကွာ။ အထဲဝင်ထိုင်ကြလေ"

ယဲ့ချန်းက ခေါင်းတညိတ်ညိတ်လုပ်၍ ယန်ရှောင်ကျစ်ကို သီးသန့်အခန်းထဲသို့ ခေါ်သွားလေသည်။

"တကယ်တော့ အပြင်မှာစားရတာကမှ ပိုနေလို့ကောင်းတာ။ ဒါပေမဲ့ မင်းက ပြဿနာတက်နေတာဆိုတော့ ကိုယ်တို့ သီးသန့်အခန်းထဲမှာပဲ စားရတာပေါ့"

ယန်ရှောင်ကျစ်က ပြုံးလိုက်သည်။

"ကျွန်မတော့ ရှင့်ကို အားကျမိတယ်။ ဒီနေရာမှာထိုင်ပြီး ဆန်ခေါက်ဆွဲစားခွင့်ရတယ်။ သာမန်ဘဝနဲ့နေရတာ ကောင်းပါတယ်"

ယဲ့ချန်းက ဆို၏။

"အနုပညာရှင်တစ်ယောက် ဖြစ်ရတာရော မကောင်းဘူးလား။ ပိုက်ဆံလည်း အများကြီးရှာနိုင်သလို ပရိသတ်တွေလည်း အများကြီး ရနိုင်တယ်လေ"

ယန်ရှောင်ကျစ်က သက်ပြင်းချလိုက်လေသည်။

"အာ... အနုပညာရှင်တစ်ယောက်ဖြစ်ရတဲ့ ဒုက္ခကို ရှင် မှန်းကြည့်လို့တောင်ရမှာမဟုတ်ပါဘူး"

မကြာခင်မှာပင် အပြင်ဘက်မှ ဆန်ခေါက်ဆွဲ၏ မွှေးကြိုင်လှသောရနံ့လေး လွင့်ပျံ့လာသည်။

ယန်ရှောင်ကျစ်လည်း လေကို ရှူသွင်းလိုက်သည်။

"မွှေးလိုက်တာ"

ယဲ့ချန်းက ရယ်မောလိုက်သည်။

"ဟုတ်တယ်။ ဒီဆိုင်လေးက အရသာမပြောင်းလဲဘဲ ဖွင့်လာခဲ့တာ ဆယ်စုနှစ်တွေအများကြီး ကြာပြီလေ။ စားကြည့်လိုက်။ နောင်တမရစေရဘူး"

ထိုအချိန်တွင် ဆိုင်ရှင်က အငွေ့တထောင်းထောင်းထနေသော ဆန်ခေါက်ဆွဲနှစ်ပန်းကန်ကို ယူလာပေးသည်။

ယန်ရှောင်ကျစ်လည်း ဇွန်းအသေးလေးတစ်ချောင်းကိုယူကာ ဟင်းရည်ကို မြည်းကြည့်လိုက်သည်။

"ဝိုး... အရမ်းမွှေးပြီး အရမ်းအရသာရှိတာပဲ"

ယဲ့ချန်းက ပြုံးလိုက်လေသည်။

"ဘယ်လိုလဲ။ ကြယ်ငါးပွင့်စားသောက်ဆိုင်တွေက အစားအသောက်တွေနဲ့ ယှဉ်ရင်တောင် မနိမ့်ဘူးမလား"

ယန်ရှောင်ကျစ် ခေါင်းညိတ်ပြလိုက်လေသည်။

ဆန်ခေါက်ဆွဲတစ်လုတ် စားပြီးနောက် ယန်ရှောင်ကျစ်က တအံ့တသြရေရွတ်လိုက်သည်။

"ဝိုး... ဒီအထိအတွေ့လေးက အံ့ဩစရာကောင်းလိုက်တာ။ ကျွန်မစားဖူးတဲ့ ကြယ်ပွင့်အဆင့်ဟိုတယ်တွေထက်တောင် ပိုကောင်းနေသေးတယ်"

ယဲ့ချန်းက ရယ်မောလိုက်၏။

"မြင်လား။ ကိုယ် မင်းကို မလိမ်ဘူးနော်"

ယန်ရှောင်ကျစ်လည်း ဆန်ခေါက်ဆွဲပန်းကန်လုံးကြီးတစ်လုံးကို အကုန်စားပစ်လိုက်ပြီး ဟင်းရည်ကိုပင် တစ်စက်မကျန် သောက်ချလိုက်သည်။

စားသောက်ပြီးနောက် ဖောင်းကားနေသော သူ(မ)၏ဗိုက်လေးကို ပုတ်လိုက်သည်။

"ယဲ့ချန်း...ကျွန်မ ရှင့်ကိုမုန်းတယ်။ ကျွန်မ ဝလာတော့မှာပဲ"

ယန်ရှောင်ကျစ်က ရယ်မောလိုက်၏။

"ဒါနဲ့ ဆန်ခေါက်ဆွဲစားပြီးရင် ကျွန်မ ရှင့်ကို တစ်နေရာကိုခေါ်သွားမယ်"

"ဘယ်နေရာလဲ"

ယဲ့ချန်းက စူးစမ်းလိုစိတ်ဖြင့် မေးလိုက်သည်။

ယန်ရှောင်ကျစ်က လျှို့ဝှက်ဆန်းကြယ်ဟန်ဖြင့် ပြောလိုက်သည်။

"ခဏနေရင် သိရမှာပေါ့"

ယန်ရှောင်ကျစ်၏ လျှို့ဝှက်ဆန်းကြယ်နေသော ဟန်ပန်ကို မြင်လိုက်ရသဖြင့် ယဲ့ချန်းလည်း ခပ်ဖွဖွပြုံးလိုက်သည်။

"ကောင်းပြီလေ"

ဆန်ခေါက်ဆွဲစားပြီးနောက် ယဲ့ချန်းက ကားမောင်းရင်း မေးလိုက်သည်။

"အခု ဘယ်သွားကြမှာလဲဆိုတာ ပြောပြလို့ ရပြီလား"

ယန်ရှောင်ကျစ် ပြုံးလိုက်လေသည်။

"ကျွန်မ သဘောအကျဆုံးနေရာတစ်ခုကိုလေ"

•••••••••••••••••

အပိုင်း ၅၃၁ - မြင့်တက်လာသော သဘောကျနှစ်သက်မှု

ယန်ရှောင်ကျစ်၏ လမ်းညွှန်မှုအတိုင်း ယဲ့ချန်းလည်း ဘားတစ်ခုသို့ ရောက်လာခဲ့သည်။

ဤနေရာရှိ မီးရောင်များမှာ အလွန်မှိန်ပျနေပြီး ယန်ရှောင်ကျစ်ကလည်း နေကာမျက်မှန် တပ်ထားသောကြောင့် သူ(မ)ကို မှတ်မိရန် ခက်ခဲလှသည်။

ယန်ရှောင်ကျစ် ပြုံးလိုက်လေသည်။

"ကျွန်မ စိတ်အခြေအနေ မကောင်းတဲ့အခါ သီချင်းနားထောင်ဖို့ ဒီကိုလာလေ့ရှိတယ်"

"သီချင်းနားထောင်ဖို့လား"

ယဲ့ချန်းခမျာ ခဏမျှအံ့အားသင့်သွားသည်။

ထိုအချိန်တွင် စင်မြင့်ပေါ်၌ လူငယ်အချို့ ဂစ်တာတီးနေကြသည်။

သူတို့သည် လက်ရှိတွင် အလွန်ရေပန်းစားနေသော သီချင်းတစ်ပုဒ်ကို သီဆိုနေကြခြင်းပင်။

တကယ်တော့ ဤဘားက လူငယ်များကို အပန်းဖြေစရာ နေရာတစ်ခုပေးရန် ရည်ရွယ်ထားခြင်းပင်။

ဘားထဲရှိ သီချင်းများမှာ အလွန်ငြိမ့်ညောင်းလှပြီး လူအများကို သက်သောင့်သက်သာဖြစ်စေသည်။

ယဲ့ချန်းနှင့် ယန်ရှောင်ကျစ်တို့လည်း ထောင့်တစ်နေရာသို့ သွားလိုက်ကြသည်။

ဤနေရာက အလွန်တိတ်ဆိတ်ပြီး အပြင်ဘက်မှ အတွင်းဘက်သို့ မြင်ရရန် ခက်ခဲလှသည်။

ယန်ရှောင်ကျစ်က ဂုဏ်ယူဝင့်ကြွားစွာဖြင့် ပြောလိုက်သည်။

"ဒီပတ်ဝန်းကျင်လေးက ကောင်းတယ်မဟုတ်လား"

ယဲ့ချန်းက ခေါင်းညိတ်ပြလိုက်၏။

"အင်း... ပတ်ဝန်းကျင်က တော်တော်ကောင်းပါတယ်"

ထို့နောက် ယဲ့ချန်းက သစ်သီးဖျော်ရည်နှင့် အချိုပွဲအသေးစားလေးများကို မှာလိုက်ပြီးနောက် သူတို့နှစ်ယောက်သား သောက်ကြစားကြရင်း ကောင်းမွန်သော ခံစားချက်ကို တည်ဆောက်နေကြသည်။

စင်မြင့်ပေါ်တွင် အသက်သုံးဆယ်အရွယ် အမျိုးသမီးတစ်ယောက်က ဂစ်တာတီးနေချေသည်။

"မင်းအပေါ်ထားတဲ့ ငါ့အချစ်တွေက လရောင်လေးလို နူးညံ့ပါတယ်"

"မင်းကို လွမ်းဆွတ်နေရတာကလည်း လေပြေလေးလို သိမ်မွေ့ပါတယ်"

...

ထိုမိန်းကလေးက ခံစားချက်အပြည့်ဖြင့် သီဆိုနေပြီး သူ(မ)ကိုယ်တိုင်လည်း သီချင်း၏ခံစားချက်ထဲတွင် နစ်မျောနေကြောင်း သိသာလှသည်။

"လွဲချော်ခဲ့ရတဲ့ အခွင့်အရေးတွေကို ငါ ဘယ်လိုပြန်ပြီး အစားထိုးရမလဲ"

"မင်းထားရစ်ခဲ့တဲ့ လွမ်းဆွတ်မှုတွေကို ငါ ဘယ်လိုဖျောက်ဖျက်ရမလဲ"

...

ယန်ရှောင်ကျစ် ပြုံးလိုက်မိသည်။

"ဒီက အဆိုတော်တွေအားလုံးက သူတို့ရဲ့ ကိုယ်ပိုင်သီချင်းတွေကိုပဲ ဆိုကြတာ။ ရှင် ဘယ်လိုခံစားရလဲ"

ယဲ့ချန်းလည်း ခေါင်းညိတ်ပြလိုက်၏။

"အင်း... အရမ်းကောင်းတယ်"

"ဒီအဆိုတော်ရဲ့နာမည်က အစ်မယွမ်ယွမ်တဲ့။ သူက ဒီဘားက လောင်ပိုင်ရဲ့ အမျိုးသမီးလေ။ အရမ်းသဘောကောင်းတာ။ ဒီနေရာလေးက သူ ကျွန်မအတွက် အထူးသီးသန့်ဖယ်ထားပေးတာ"

ယဲ့ချန်းမှာ ထိုစကားကို ကြားပြီးနောက် ခဏမျှအံ့အားသင့်သွားသည်။

"သြော်... အဲဒီလိုကိုး"

ယဲ့ချန်းက ပြောလိုက်လေသည်။

"အစ်မယွမ်ယွမ်ရဲ့ သီချင်းဆိုသံက နားထောင်လို့ အရမ်းကောင်းတာပဲ။ သူသာ ပွဲဦးထွက်ရင် နာမည်ကြီးအဆိုတော်တွေထက်တောင် ပိုကောင်းလိမ့်မယ်လို့ ထင်တယ်။ မဟုတ်ဘူးလား"

ယန်ရှောင်ကျစ်ကလည်း ခေါင်းညိတ်ပြလိုက်သည်။

"တကယ်တော့ အစ်မယွမ်ယွမ်က အရင်တုန်းက နာမည်ကြီးအဆိုတော်တစ်ယောက်လေ။ ဒါပေမဲ့ နောက်တော့ အအောင်မြင်ဆုံးအချိန်မှာ အနားယူဖို့ ရွေးချယ်ခဲ့တာ"

အစ်မယွမ်ယွမ် သီချင်းဆိုပြီးသွားသောအခါ စင်မြင့်ပေါ်က ဆင်းသွားပြီးနောက် ဧည့်သည်တချို့က စင်မြင့်ပေါ်တက်၍ သီချင်းဆိုကြသည်။

ဧည့်သည်တချို့က လှပစွာ သီဆိုနိုင်ကြသော်လည်း အချို့မှာမူ တစ္ဆေငိုကြွေးသံအလားပင်။

ပရိသတ်များက အကျယ်ကြီးလှောင်ပြောင်လိုက်ကြသဖြင့် ထိုလူ့ခမျာ ရှက်ရှက်ဖြင့် စင်ပေါ်က ဆင်းသွားလေတော့သည်။

ယန်ရှောင်ကျစ် ရယ်မောလိုက်လေသည်။

"ယဲ့ချန်း.. ရှင်ရော စင်ပေါ်တက်ပြီး သီချင်းတစ်ပုဒ်လောက် သွားမဆိုတော့ဘူးလား"

ယဲ့ချန်းက ဆို၏။

"မင်း ကိုယ့်ကို သီချင်းလာဆိုခိုင်းဖို့ ဒီကိုခေါ်လာတာတော့ မဟုတ်ပါဘူးနော်"

ယန်ရှောင်ကျစ်က ရယ်မောလိုက်သည်။

"မဟုတ်ပါဘူး။ ကျွန်မက ဒီမှာနေရတာကို သဘောကျလို့ပါ။ တခြားလူတွေ သီချင်းဆိုတာကို နားထောင်လိုက်ရရင် ကျွန်မ အရမ်းစိတ်အပန်းပြေပြီး စိတ်ဖိစီးမှုတွေလည်း လျော့ကျသွားတယ်"

ထိုသို့ပြောရင်း ယန်ရှောင်ကျစ်က စင်မြင့်ထက်တွင် သီချင်းဆိုနေကြသော လူငယ်များကို ကြည့်လိုက်သည်။

"တကယ်တော့လေ တစ်ခါတလေကျရင် ကျွန်မ သူတို့ကို အရမ်းအားကျမိတယ်။ ဘာအပူအပင်မှ မရှိကြဘူး။ လူတော်တော်များများက အနုပညာရှင်တစ်ယောက်ကို အားကျကြပေမဲ့ တကယ်တမ်းကျတော့ အရမ်းပင်ပန်းတယ်။ တစ်ခါတလေကျရင် အသက်ရှူလို့တောင် မရတော့ဘူးလို့ ခံစားရတယ်"

ယန်ရှောင်ကျစ်က သက်ပြင်းချရင်း ပြောလိုက်လေသည်။

"နေ့တိုင်း မဆုံးနိုင်တဲ့ကြေညာချက်တွေ၊ ရိုက်စရာရုပ်ရှင်တွေအများကြီးနဲ့ အင်တာဗျူးတွေကလည်း ဆက်တိုက်ဆိုသလိုရှိနေတာ။ ကျွန်မ အရမ်းပင်ပန်းနေပြီ"

"လက်လျှော့လိုက်ချင်ပေမဲ့ စာချုပ်ချုပ်တုန်းက ကျွန်မရဲ့ဘဝတစ်ခုလုံးကို ပေးလိုက်ရသလိုမျိုး ဖြစ်သွားတာလေ။ အခုဆို ကျွန်မမှာ လွတ်လပ်ခွင့်တောင် မရှိတော့ဘူး"

"ဒါကြောင့်မို့ ဒီနေ့ ကျွန်မ သေသေချာချာလေး အနားယူချင်ခဲ့တာ"

ယဲ့ချန်းမှာ ယန်ရှောင်ကျစ်၏ စကားများကို နားထောင်ရင်း ကောင်းကောင်းနားလည်လိုက်သည်။

သုန်းရှောင်ယာက အနုပညာရှင်တစ်ယောက်ဖြစ်ရခြင်း၏ အခက်အခဲများကို ပြောပြခဲ့ဖူးသည်။

ယဲ့ချန်း ရယ်မောလိုက်ချေသည်။

"ကိုယ်က နောက်နေတာပါ။ မင်း အရင်က ဒီမှာ သီချင်းဆိုဖူးလား"

"ကျွန်မလား။ ဟင့်အင်း.. နောက်နေ့ သတင်းတွေထဲ ပါမသွားချင်ပါဘူး"

ယဲ့ချန်းက ခပ်ဖွဖွပြုံးလိုက်လေသည်။

"ခဏလောက်စောင့်နေနော်"

ထို့နောက် ယဲ့ချန်းက အပြင်သို့ ခဏထွက်သွားပြီး လက်ထဲတွင် တစ်ခုခုကိုကိုင်လျက် ပြန်ရောက်လာသည်။

သူ့လက်ထဲတွင် မျက်နှာဖုံးတစ်ခု ပါလာခဲ့သည်။

ယဲ့ချန်းက ပြုံးလျက် ပြောလိုက်၏။

"ကိုယ့်ကို ခဏလေးစောင့်ဦး"

ထို့နောက် အစ်မယွမ်ယွမ်ကို သွားရှာပြီး စကားအနည်းငယ်ပြောလိုက်သည်။

ထို့နောက် အစ်မယွမ်ယွမ်က စင်ပေါ်သို့ တက်သွားလေသည်။

"အားလုံးပဲ.. ဒီနေ့ ကျွန်မတို့ မျက်နှာဖုံးစွပ်အဆိုတော်ဆိုတဲ့ ဂိမ်းအသစ်တစ်ခုကို ဆော့ကြမယ်နော်"

အစ်မယွမ်ယွမ်၏စကားကို ကြားလိုက်ရသောအခါ အားလုံး ခဏမျှအံ့အားသင့်သွားချေသည်။

"ကျွန်မတို့ရဲ့ အဆိုတော်တွေအားလုံးက မျက်နှာဖုံးတွေတပ်ပြီး စင်ပေါ်တက်လာကြမှာဆိုတော့ အားလုံးအတွက် ပိုပြီး လျှို့ဝှက်ဆန်းကြယ်သွားအောင်လို့ပါ။ ဘယ်လိုသဘောရလဲ"

"မဆိုးဘူး။ ဒီအကြံက မိုက်တယ်"

"ဟားဟား.. ဒီလိုဆိုရင်တော့ သီချင်းဆိုတာ မကောင်းရင်တောင် ဘယ်သူမှ ကိုယ့်ကို မမှတ်မိတဲ့အတွက် အလှောင်ခံရမှာ ကြောက်စရာမလိုတော့ဘူးပေါ့"

ပရိသတ်များထံမှ လက်ခုပ်သံများ ချက်ချင်းထွက်ပေါ်လာသည်။

အစပိုင်းတွင် ကောင်လေးတချို့ စင်ပေါ်သို့ တက်သွားကြသည်။

ထင်ထားသည့်အတိုင်းပင် မျက်နှာဖုံးတပ်ထားသည့်အတွက် အစောက စင်ပေါ်မတက်ရဲသည့် ကောင်လေးများလည်း ဖျော်ဖြေရန် သတ္တိရှိလာကြသည်။

ယဲ့ချန်းက ပြုံးလိုက်၏။

"ကဲ... မင်း ဖျော်ဖြေရမယ့် အလှည့်ရောက်ပြီ"

ယန်ရှောင်ကျစ်လည်း ခေါင်းညိတ်ပြလိုက်ပြီးနောက် စနိုးဝှိုက်မင်းသမီးမျက်နှာဖုံးကို တပ်၍ စင်မြင့်ပေါ်သို့ တက်သွားလေသည်။

"ကျွန်မ 'ဆုံဆည်းခြင်း'ဆိုတဲ့ သီချင်းလေးတစ်ပုဒ်ကို တင်ဆက်ပေးပါ့မယ်။ အားလုံး နှစ်သက်ကြလိမ့်မယ်လို့ မျှော်လင့်ပါတယ်"

"မင်းနဲ့ဆုံတွေ့ခွင့်ရတာက ငါ့ဘဝရဲ့ကံကောင်းခြင်းလေးပါပဲ"

"မင်းနဲ့ ဆုံတွေ့ခွင့်ရတာက ငါ့ရဲ့ အလှပဆုံးသော အမှတ်တရလေးပါပဲ"

"အချိန်တိုင်းကို ငါ့နှလုံးသားထဲမှာ သိမ်းဆည်းထားချင်တယ်"

"နူးညံ့ကြင်နာမှုလေးတွေအားလုံးကို ငါ့လက်နှစ်ဖက်နဲ့ ဆုပ်ကိုင်ထားချင်တယ်"

...

ယန်ရှောင်ကျစ်၏ အသံက အလွန်တရာလှပသည့်အပြင် ဤသီချင်းကလည်း လွမ်းဆွတ်တမ်းတမှု အရိပ်အယောင်ကို သယ်ဆောင်ထားသည်။

ယန်ရှောင်ကျစ်က နောက်တစ်နေ့တွင် တကယ်ပြန်သွားရတော့မည်ဖြစ်ကြောင်း ယဲ့ချန်း နားလည်သွားသည်။

သူ(မ)၏ နာမည်ကြီးအနုပညာရှင်ဘဝသို့ ပြန်သွားရပေတော့မည်။

သီချင်းသံစဉ်များမှတစ်ဆင့် ယန်ရှောင်ကျစ် သူ့အား မခွဲနိုင်မခွာရက်ဖြစ်နေသည်ကို ကြားလိုက်ရသည်။

သီချင်းဆုံးသောအခါ ပရိသတ်များထံမှ မိုးခြိမ်းသံအလား လက်ခုပ်သံများ ထွက်ပေါ်လာသည်။

"ဒီမိန်းကလေးရဲ့သီချင်းသံက အရမ်းနားထောင်လို့ကောင်းတယ်နော်"

"ဒီသီချင်းက အရမ်းမိုက်တာပဲ"

"မိန်းကလေး.. ကျေးဇူးပြုပြီး နောက်တစ်ပုဒ်လောက် ထပ်ဆိုပြပါဦး"

ယန်ရှောင်ကျစ်က ကျီစယ်လိုဟန်အပြုံးဖြင့် ယဲ့ချန်းကို တစ်ချက်ကြည့်လိုက်သည်။

"အခုတော့ ကျွန်မရဲ့သူငယ်ချင်း ဧည့်သည်နံပါတ်၂၈ကို အားလုံးအတွက် သီချင်းတစ်ပုဒ်လောက်ဆိုပြဖို့ ဖိတ်ခေါ်ချင်ပါတယ်"

မျက်လုံးအားလုံးက ယဲ့ချန်းရှိရာဘက်သို့ လှည့်လာကြသည်။

ဤကောင်မလေးက သူ့ကို အလွယ်တကူ လွှတ်ပေးမည်မဟုတ်ကြောင်း သိလိုက်သဖြင့် ယဲ့ချန်း ကူကယ်ရာမဲ့စွာ ခေါင်းခါလိုက်မိသည်။

ထို့နောက် မတ်တတ်ထရပ်ကာ စင်ပေါ်သို့ တက်သွားပြီး ယန်ရှောင်ကျစ်၏ လက်ထဲမှ မိုက်ခရိုဖုန်းကို ယူလိုက်၏။

"အရမ်းလှတဲ့ ဒီမိန်းကလေးနဲ့ ဆုံတွေ့ခွင့်ရတဲ့အတွက် ကျေးဇူးတင်ပါတယ်။ မင်းနဲ့ဆုံတွေ့ရလို့ ကိုယ် အရမ်းပျော်ပါတယ်။ အခု 'လေပြေလေးတိုက်ခတ်လာတဲ့အခါ'ဆိုတဲ့ သီချင်းလေးတစ်ပုဒ်နဲ့ ဖျော်ဖြေပါ့မယ်"

ခြေလျင်လျှောက်ရတဲ့ ဒီခရီးရှည်ကြီးနဲ့ ရပ်တန့်မှု...

လှည့်လည်သွားလာနေတဲ့ လူငယ်လေးတစ်ယောက်ရဲ့ခြေရာတွေကို လိုက်ရင်း..

ဘူတာရုံထဲက အပြင်မထွက်ခင် အဲဒီအခိုက်အတန့်လေးမှာ...

ငါ နည်းနည်းတုံ့ဆိုင်းသွားခဲ့တယ်...

ဒီကမ္ဘာကြီးကို ငါ ပထမဆုံးသိကျွမ်းခွင့်ရခဲ့တုန်းက...

အရာအားလုံးကို စွဲလမ်းနှစ်သက်နေမိတာ

မိုးကုပ်စက်ဝိုင်းက ကိုယ့်မျက်စိရှေ့မှာတင် ရှိနေသလိုမျိုး လှမ်းကြည့်ရင်း

အဲဒီလမ်းကို ထပ်လျှောက်ရမယ်ဆိုရင် မီးကိုနင်း ရေကိုကျော်ဖြတ်ရမယ်ဆိုရင်တောင် လိုလိုလားလား ရင်ဆိုင်ဝံ့ပါတယ်

အခုတော့ ဒီကမ္ဘာကြီးကို ဖြတ်သန်းခဲ့ပြီးပြီ

အရာအားလုံးကို စွဲလမ်းနှစ်သက်နေမိတယ်

နှစ်တွေကြာလာတာနဲ့အမျှ အချိန်ကာလရဲ့ ဆန့်ကျင်ဘက်မှာရှိတဲ့ မျက်နှာတွေဟာ

မင်းရဲ့အပြုံးတွေဆီကို သတိမထားမိဘဲ ဝင်ရောက်လာခဲ့တယ်

.....

ယဲ့ချန်းတွင် နတ်ဘုရားအဆင့် သီချင်းဆိုစွမ်းရည်ရှိပြီး တမ်းတဖွယ်ကောင်းသော ဤသီချင်းကို အလွန်ဆွဲဆောင်မှုရှိသော နည်းလမ်းဖြင့် သီဆိုခဲ့သည်။

ယဲ့ချန်း၏သီချင်းကို နားထောင်ရင်း ယန်ရှောင်ကျစ်မှာ လုံးဝအံ့အားသင့်သွားလေသည်။

ဒါက ထမင်းစားပွဲမှာ ထွင်းထုထားတဲ့ ကဗျာလေး မဟုတ်ဘူးလား။

အစကတော့ ထိုအရာကို ယဲ့ချန်းရေးထားသော ကဗျာတစ်ပုဒ်ဟု ထင်ခဲ့သော်ငြား တကယ်တမ်းတော့ သူရေးထားသည့် သီချင်းတစ်ပုဒ် ဖြစ်နေခဲ့သည်။

ထိုအချိန်တွင် ယဲ့ချန်း၏သီချင်းကို နားထောင်ရင်း ယန်ရှောင်ကျစ်ခမျာ အနည်းငယ်စွဲလမ်းသွားသလို ခံစားလိုက်ရသည်။

အရမ်းလည်းချောတယ်။ အရမ်းလည်း ချမ်းသာတယ်။ အရေးအကြီးဆုံးကတော့ အရမ်းအရည်အချင်းရှိတာပဲ။

ဤသည်မှာ ကောင်းကင်ဘုံက သူ(မ)ကို လက်ဆောင်အဖြစ် ပေးသနားလိုက်သော ယောက်ျားများလား။

...

ယဲ့ချန်းက ယန်ရှောင်ကျစ်ကို ဟိုတယ်သို့ ကားဖြင့် ပြန်ပို့ပေးခဲ့သည်။

ယန်ရှောင်ကျစ်မှာမူ အနည်းငယ် မခွဲနိုင်မခွာရက်ဖြစ်နေပေသည်။

"ကျွန်မ မနက်ဖြန်ကျရင် ပြန်တော့မယ်"

"အင်း... ဒါပေမဲ့ မင်းကို တီဗီမှာ မြင်နေရဦးမှာပဲလေ"

"ဒါပေမဲ့ ကျွန်မက ရှင့်ကိုမမြင်ရဘူးလေ"

ယန်ရှောင်ကျစ်ခမျာ လွမ်းဆွတ်တမ်းတလေဟန် လေသံဖြင့် ပြောလိုက်သည်။

"မင်း ကိုယ့်ကိုလွမ်းရင် ဖုန်းဆက်လို့ရတာပဲ"

ယန်ရှောင်ကျစ်က ခေါင်းညိတ်ပြလိုက်သည်။

"ဟုတ်သားပဲ။ ရှင်က တက္ကစီမောင်းနေတာဆိုတော့ ကျွန်မ ရှင့်ကို ကြယ်ငါးပွင့်ပေးရမလား"

"တင်! ကြယ်ငါးပွင့်အဆင့်သတ်မှတ်ချက်ကို ရရှိတဲ့အတွက် ပိုင်ရှင့်ကို ဂုဏ်ပြုပါတယ်။ ငါးခုမြောက်ကြယ်ငါးပွင့်ကို အသက်သွင်းလိုက်နိုင်တဲ့အတွက် စနစ်ဆုကြေးအဖြစ် စိတ်ခံစားချက်သဘောကျနှစ်သက်မှု အမှတ်ပေးစနစ်ကို ရရှိပါတယ်"

ယဲ့ချန်းမှာ ခဏမျှအံ့အားသင့်သွားသည်။

အမှတ်ပေးစနစ်လား။

နာမည်က ဖော်ပြထားသည့်အတိုင်း မိန်းကလေးတစ်ယောက် သူ့အပေါ်ထားသော သဘောကျနှစ်သက်မှုကို သိရှိနိုင်ခြင်းပင်။

သူ့အပေါ်ထားရှိသော ယန်ရှောင်ကျစ်၏ စိတ်ခံစားမှုရမှတ်ကို သူ ကြည့်လိုက်သည်။

ယခုအချိန်တွင် ယဲ့ချန်းအပေါ်ထားသော ယန်ရှောင်ကျစ်၏ သဘောကျနှစ်သက်မှုမှာ ရှစ်ဆယ့်ငါးမှတ်အထိ မြင့်တက်သွားသည်။

ဤသဘောကျနှစ်သက်မှုရမှတ်ကို ကြည့်ပြီးနောက် ယဲ့ချန်း အနည်းငယ်အံ့အားသင့်သွားသည်။

ဤမိန်းကလေးက သူ့အပေါ် ခံစားချက်ရှိနေပုံရပြီး သဘောကျနှစ်သက်မှုသာ ကိုးဆယ်အထိ ရောက်သွားပါက သူတို့နှစ်ယောက် ချစ်သူများ ဖြစ်သွားတော့မည့်အကြောင်း သူ နားလည်လိုက်သည်။