အခန်း (၂၆၂-၂၆၃)

အခန်း (၂၆၂) - အစွမ်းထက်လှသော ခုခံရေးစနစ်

ကပ်ပါးသစ်ပင်အိမ်ရဲ့ အတွင်းပိုင်းကို ရောက်သည်နဲ့ ရွှီရှင်းဟာ ဒုတိယထပ်ကို ချက်ချင်း တက်သွား၏။

"တွေ့ပြီ"

ပြတင်းပေါက်နားမှာ ထိန်းချုပ်စနစ်ပြားလေး ရှိနေသေးတာကို မြင်လိုက်ရတော့ သူ အတော်လေး ဝမ်းသာသွားရ၏။

တကယ်ပဲ... သစ်ပင်အိမ်ရဲ့ ဖြုတ်ယူလို့မရတဲ့ အစိတ်အပိုင်းတွေဟာ သစ်ပင်အိမ်နဲ့အတူ ဒီကို ပြောင်းရွှေ့လာတာပါလား..။

သူက စနစ်ပြားနားကို အမြန်လျှောက်သွားပြီး စခရင်လေးကို အသာအယာ ထိကြည့်လိုက်၏။

[သစ်ပင်အိမ် ပြင်ပလက်နက် ထိန်းချုပ်စနစ်ပြား (အပြာရောင်အဆင့်) - သစ်ပင်အိမ်ရှိ ပြင်ပလက်နက်အားလုံး၏ ထိန်းချုပ်စနစ်များနှင့် ချိတ်ဆက်နိုင်ပြီး၊ လက်နက်အားလုံးကို ဤစနစ်ပြားတစ်ခုတည်းမှနေ၍ ထိန်းချုပ်လုပ်ဆောင်နိုင်သည်။]

အရင်တိုင်း ဖော်ပြချက်ချင်း တူတူပင်၊ ပျက်စီးသွားတာ ဒါမှမဟုတ် အဆင့်နိမ့်သွားတာမျိုး မရှိဘဲ အရင်က စနစ်ပြားအတိုင်းပင် ဖြစ်ပေသည်။

ဒါပေမဲ့ သူ ထိလိုက်တဲ့အခါမှာတော့ စနစ်ပြားက ပွင့်မလာဘဲ မှောင်နေဆဲဖြစ်ရာ အသုံးပြုလို့ မရသေးချေ။

ထိုအချိန်တွင် သူ့နောက်က လူသုံးယောက်လည်း ဒုတိယထပ်ကို တက်လာကြ၏။

ကျိချောင်းယန်က စနစ်ပြားကို မြင်လိုက်ရတဲ့အခါ မျက်လုံးတွေ ဝင်းခနဲ ဖြစ်သွားပြီး အနားကို အမြန်တိုးကာ စစ်ဆေးကြည့်သည်။

"ဒါက မင်းပြောတဲ့ သစ်ပင်အိမ် ပြင်ပလက်နက် ထိန်းချုပ်စနစ်ပြား ဆိုတာလား"

"ဟုတ်တယ်"

ရွှီရှင်းက သူကိုယ်တိုင် ထိန်းချုပ်လို့ မရတာ သေချာအောင် နောက်ထပ် အကြိမ်အနည်းငယ် ထပ်ထိကြည့်ပြီးမှ နောက်က လိုက်လာတဲ့ ချီရွှယ်ဖေးဘက် လှည့်ကာ..

"အစ်မရွှယ်ဖေး၊ အစ်မက ဒီအိမ်ရဲ့ အရှင်သခင်ဆိုတော့ အစ်မတစ်ယောက်ပဲ ဒီစနစ်ပြားကို ထိန်းချုပ်လို့ ရမှာ" ဟု ပြောလိုက်၏။

"အိုကေ... ငါ စမ်းကြည့်မယ်လေ"

ချီရွှယ်ဖေးက ရှေ့သို့ တိုးလာပြီး ထိန်းချုပ်စနစ်ပြားကို ခံစားချက်မျိုးစုံနဲ့ ကြည့်နေမိသည်။

ဒါဟာ သူမကို အကြီးအကျယ် အရှက်ရအောင် လုပ်ခဲ့တဲ့ အရာပင်။

အရင်က မာဟုန်ယွီရဲ့ သစ်ပင်အိမ်ထဲကို သူမ မဝင်ခဲ့ဖူးတာကြောင့် ဒီစနစ်ပြားကို မြင်ဖူးတာ ပထမဆုံးပင်။

ဒီပစ္စည်းက သူမအပေါ်မှာတော့ အရမ်းကို အမှတ်ရစရာ ဖြစ်နေ၏။

ဘာလို့လဲဆိုတော့ သူမကို လွင့်ထွက်သွားအောင် လုပ်ခဲ့တဲ့အပြင် အရိုးတွေ ကျိုးသွားအောင်အထိ လုပ်ခဲ့တဲ့ လေးလံတဲ့မြှား တွေဟာ ဒီပစ္စည်းနဲ့ပဲ ထိန်းချုပ်ထားတာ မဟုတ်လား။

ဒီပစ္စည်းသာ မရှိခဲ့ရင် သူမ ဒီလောက်အထိ အရှုံးပေးစရာ မလိုသလို၊ ရွှီရှင်းနဲ့ လီဝမ်ရှီးတို့ ရှေ့မှာလည်း ဒီလောက်အထိ အရှက်ရမှာ မဟုတ်ချေ။

သူမက လက်ကိုဆန့်ပြီး စနစ်ပြားကို ထိလိုက်၏။

"ဟာ... လင်းလာပြီ"

လီဝမ်ရှီးက ဝမ်းသာအားရ အော်လိုက်၏။

"အီး"

ပန်းသီးစားပြီးသွားတဲ့ ခဲခဲလေးကလည်း လီဝမ်ရှီးရဲ့ ရင်ခွင်ထဲကနေ ပြတင်းပေါက်ဘောင်ပေါ် ခုန်တက်သွားပြီး စနစ်ပြားရဲ့ ပြောင်းလဲမှုတွေကို စူးစမ်းစွာ ကြည့်နေချေသည်။

လူအနည်းငယ် စိုက်ကြည့်နေတဲ့ အောက်မှာတင် ထိန်းချုပ်စနစ်ပြားရဲ့ စခရင်လေးဟာ ကြည်လင်လာ၏။

စနစ်ပြားပေါ်မှာ ပတ်ဝန်းကျင်ရဲ့ အပေါ်စီးမြင်ကွင်း ကို တကယ့် မြင်ကွင်းအတိုင်း ပြသနေ၏။

ဒရုန်း တစ်စင်းနဲ့ အပေါ်ကနေ ရိုက်ကူးထားသလိုမျိုးပင်။

ကပ်ပါးသစ်ပင်အိမ်က အလယ်ဗဟိုမှာ ရှိနေပြီး၊ ဘေးနားက တခြား ကပ်ပါးအိမ်၊ ချီရွှယ်ဖေးရဲ့ ပင်မအိမ်နဲ့ ပင်မအိမ်ဘေးက ဖြည်းဖြည်းချင်းစီးဆင်းနေတဲ့ မြစ်ကြီးကိုပါ ရှင်းရှင်းလင်းလင်း မြင်နေရ၏။

မြင်ကွင်းတစ်ခုလုံးက မီတာ တစ်ရာ ပတ်လည်လောက်ကို လွှမ်းခြုံထားချေသည်။

ချီရွှယ်ဖေးက စခရင်ကို အောက်ဘက်သို့ အနည်းငယ် ဆွဲချလိုက်တဲ့အခါ မြင်ကွင်းတစ်ခုလုံးက အပေါ်ကို နည်းနည်း တက်သွား၏။

သစ်ပင်အိမ်ရဲ့ တည်နေရာကို မြင်ကွင်းရဲ့ အောက်ခြေမှာ ထားလိုက်တဲ့အခါမှာတော့ ထပ်ပြီး ရွှေ့လို့ မရတော့ချေ။

ကြည့်ရသည်မှာ ဒီထိန်းချုပ်စနစ်ပြားပါတဲ့ သစ်ပင်အိမ်ဟာ မြင်ကွင်းရဲ့ အကွာအဝေးအတွင်းမှာပဲ ရှိနေရမယ့် သဘောပင်။

"ဒါက ဂိမ်းထဲမှာ မြေပုံအသေး ကို ဆွဲရွှေ့နေရသလိုပဲနော်"

လီဝမ်ရှီးက တိုးတိုးလေး ရေရွတ်လိုက်၏။

ချီရွှယ်ဖေးက နောက်ထပ် အကြိမ်အနည်းငယ် ထပ်ပြီး ပွတ်ကြည့်သော်လည်း တခြား လုပ်ဆောင်လို့ရတဲ့ နေရာတွေကိုတော့ ရှာမတွေ့ချေ။

"ဒီသစ်ပင်အိမ်မှာ လက်နက်တွေ မတပ်ရသေးလို့ ဖြစ်မှာပါ"

ကျိချောင်းယန်က ပြောလိုက်၏။

မှန်ပေသည်၊ ထိန်းချုပ်စနစ်ပြားက ကပ်ပါးသစ်ပင်အိမ်နဲ့အတူ ပါလာတယ်ဆိုပေမဲ့၊ သစ်ပင်အိမ်အပြင်ဘက်က မြှားပစ်စက်ကြီးတွေ အားလုံးကတော့ သစ်ပင်အိမ် ခြောက်သွေ့ပျက်စီးသွားတုန်းက ပျက်စီးကုန်ပြီး အိမ်အဟောင်းရဲ့ အပျက်အစီးပုံတွေထဲမှာပဲ ကျန်ခဲ့တာကြောင့်ပင်။

"ငါ အခု နှစ်လက်လောက် လုပ်လိုက်မယ်"

ချီရွှယ်ဖေးက သစ်ပင်အိမ်ရဲ့ ပထမထပ်ကို ချက်ချင်း ပြေးဆင်းသွား၏။

သူမဆီမှာ သစ်သား မြှားပစ်စက် နှစ်ခု လုပ်ဖို့ လုံလောက်တဲ့ အရင်းအမြစ်တွေ ရှိနေသည်မဟုတ်ပါလား။

ချီရွှယ်ဖေးက သစ်ပင်အိမ်ရဲ့ ဒုတိယထပ်မှာ မြှားပစ်စက်ကြီး တွေကို တပ်ဆင်လိုက်သည်။

ဒုတိယထပ်မှာ ရှိနေတဲ့သူတွေဟာ သစ်ပင်အိမ်အပြင်ဘက်ကနေ "ဂျောက် ဂျောက်" ဆိုတဲ့ အသံနှစ်ချက်ကို ချက်ချင်း ကြားလိုက်ရ၏။

နံရံမှာ ပြတင်းပေါက် အသေးလေး နှစ်ခု ပွင့်သွားပြီး အောက်ဘက်မှာတော့ မြှားတွေ ထည့်ဖို့ အပေါက်လေးတွေ ပါလာသည်။

"မမရွှယ်ဖေး၊ မြန်မြန်တက်လာဦး၊ စနစ်ပြားပေါ်မှာ တစ်ခုခု ပြောင်းလဲသွားပြီ"

လီဝမ်ရှီးက စနစ်ပြားပေါ်က အပြောင်းအလဲကို သတိထားမိပြီး ပထမထပ်ကို လှမ်းအော်ပြောလိုက်၏။

စနစ်ပြားက တကယ်ပဲ ပြောင်းလဲသွားသည်။

သစ်ပင်အိမ် ပုံစံလေးရဲ့ ဘေးမှာ မြှားပစ်စက် ပုံစံလေး နှစ်ခု ပေါ်လာပြီး၊ စခရင်ရဲ့ အောက်ခြေမှာလည်း ရွေးချယ်စရာ နှစ်ခု ပေါ်လာသည်။

[သစ်ပင်အိမ် အလိုအလျောက် မြှားပစ်စက် ၁ ၊ သစ်ပင်အိမ် အလိုအလျောက် မြှားပစ်စက် ၂ ။]

ရွှီရှင်းက စနစ်ပြားကို ထိကြည့်သော်လည်း စခရင်က သူ့ရဲ့ ထိတွေ့မှုကို ဘာမှ တုံ့ပြန်ခြင်း မရှိချေ။

ဒီကောင်ကတော့...

ပွင့်နေတဲ့ စနစ်ပြားကိုတောင် သူ ထိန်းချုပ်လို့ မရဘူးလား။

ချီရွှယ်ဖေး ထိန်းချုပ်စနစ်ပြားနားကို ရောက်လာပြီး နှစ်စက္ကန့်လောက် ကြည့်လိုက်ကာ သစ်ပင်အိမ် အလိုအလျောက် မြှားပစ်စက် ၁ ကို နှိပ်လိုက်သည်။

စခရင်ပေါ်မှာ ဒီမြှားပစ်စက် ကို ကိုယ်စားပြုတဲ့ ပုံလေးက လင်းလာပြီး ဘေးမှာလည်း (၀/၅) လို့ ပြနေ၏။

"(၀/၅) ဒါက မြှား အရေအတွက်ကို ပြောတာလား"

မြှား တွေကိုတော့ အလုပ်စားပွဲ မလိုဘဲ လုပ်လို့ရတာကြောင့်၊ ရွှီရှင်းက သူ့ရဲ့ နာရီကို သုံးပြီး မြှား ငါးစင်းကို ချက်ချင်း လုပ်လိုက်ကာ မြှားပစ်စက် ထဲကို ထည့်ပေးလိုက်၏။

ကျန်တဲ့သူ သုံးယောက်စလုံး ရွှီရှင်းရဲ့ လျင်မြန်တဲ့ လုပ်ဆောင်ချက်ကို ခဏလောက် ကြောင်ကြည့်နေပြီးမှ သတိဝင်လာကြ၏။

"မင်းရဲ့ နာရီက တကယ်ကို အသုံးဝင်တာပဲဟ"

ကျိချောင်းယန်က သက်ပြင်းချရင်း ဘာမှမတတ်နိုင်သလို ဖြည့်ပြောလိုက်သည်။

"မင်းသာ ဒီမှာ မရှိရင် ဒီနာရီက ငါ့ဟာ ဖြစ်မှာပါ"

"ဟားဟား... ဆက်ပြီး ကြိုးစားပါဦး၊ နောက်ကျရင် ထပ်ရှိလာနိုင်တာပဲလေ"

ရွှီရှင်းက ရယ်မောလိုက်၏။

"မဖြစ်နိုင်လောက်ပါဘူး၊ ပထမအဆင့်ရဲ့ ဆုလာဘ်တွေက ကန့်သတ်ထားတာ နေမှာပါ"

ကျိချောင်းယန်ကတော့ ဒီအတိုင်း ပြောလိုက်ခြင်းသာဖြစ်ပြီး ရွှီရှင်း ပြောသလို ဖြစ်လာဖို့တော့ မျှော်လင့်ချက် သိပ်မရှိလှချေ။

အားလုံးက စနစ်ပြားကို ကြည့်လိုက်ကြ၏။

အမှန်ပါပင် သစ်ပင်အိမ် အလိုအလျောက် မြှားပစ်စက် ၁ ရဲ့ နောက်က (၀/၅) ဆိုတာက (၅/၅) ဖြစ်သွားပြီဖြစ်ရာ၊ ဒီမြှားပစ်စက် ထဲမှာ မြှားတွေ အသင့် ရှိနေပြီဖြစ်ကြောင်း ပြနေပေသည်။

"ဒါကို ဘယ်လို ထိန်းချုပ်ရမလဲ"

ချီရွှယ်ဖေးက တစ်ယောက်တည်း ရေရွတ်ရင်း မြေပုံပေါ်ကို အသာအယာ နှိပ်လိုက်၏။

"ဂျောက်"

ရုတ်တရက် သစ်ပင်အိမ်အပြင်ဘက်ကနေ စက်ယန္တရားသံတစ်ခု ထွက်ပေါ်လာ၏။

"အီး..."

ဒီအသံက ခဲခဲလေးရဲ့ ဘေးနားတင် ထွက်လာတာကြောင့် ကောင်မလေးမှာ အကြီးအကျယ် လန့်သွားပြီး ရွှီရှင်းရဲ့ ပုခုံးပေါ်ကို လွှားကနဲ ခုန်တက်သွားလေတော့သည်။

အခန်း ၂၆၂ ပြီး။

အခန်း (၂၆၃) - အစွမ်းထက်လှသော ခုခံရေးစနစ် (၂)

အဖွဲ့သားများမှာ ထိုအသံကို ကြားသည်နှင့် ပြတင်းပေါက်မှတစ်ဆင့် အပြင်သို့ လှမ်းကြည့်လိုက်ကြရာ၊ မြှား တစ်စင်းမှာ တစ်ဟုန်ထိုး ထွက်သွားပြီး မလှမ်းမကမ်းရှိ မြေပြင်ပေါ်သို့ "ဗုန်း" ကနဲ အသံနှင့်အတူ စိုက်ဝင်သွားသည်ကို မြင်လိုက်ရ၏။

"အဲဒါ ငါ နှိပ်လိုက်တဲ့ နေရာပဲ"

ချီရွှယ်ဖေးက ထိန်းချုပ်စနစ်ပြားကို ကြည့်ရင်း အံ့သြတကြီး အော်လိုက်သည်။

စနစ်ပြားပေါ်တွင် ချီရွှယ်ဖေး စောစောက ကျပန်းနှိပ်လိုက်သော နေရာ၌ ယခုအခါ မြှား တစ်စင်း စိုက်ဝင်နေချေပြီ။

တစ်ပြိုင်နက်တည်းမှာပင် စခရင်ပေါ်၌ အနီရောင်အစက်လေးတစ်ခု လက်ခနဲ ပေါ်လာပြီးမှ ဖြည်းဖြည်းချင်း ပျောက်ကွယ်သွား၏။

ဤအနီရောင်အစက်မှာ လတ်တလော တိုက်ခိုက်လိုက်သည့် တည်နေရာကို ပြသခြင်း ဖြစ်ပေလိမ့်မည်။

ချီရွှယ်ဖေးသည် စမတ်ဖုန်း သုံးသလိုမျိုး လက်ချောင်း သုံးချောင်းဖြင့် မြေပုံကို ချဲ့ကြည့်လိုက်ရာ အံ့သြစရာကောင်းလောက်အောင်ပင် မြင်ကွင်းမှာ ကြီးလာ၏။

ချဲ့လိုက်သော မြင်ကွင်းမှာ အလွန်ပင် ကြည်လင်လှသဖြင့် မြေပြင်ပေါ်တွင် တုန်ခါနေဆဲဖြစ်သော မြှား အမြီးပိုင်းကိုပင် သူတို့ အထင်သား မြင်နေရပေသည်။

သူမ ထပ်မံ စူးစမ်းကြည့်သည့်အခါတွင်မူ မြေပုံကို အဝေးဆုံး ဆွဲရွှေ့နိုင်သည့် အကွာအဝေးမှာ သစ်ပင်အိမ်မှ မီတာ နှစ်ရာခန့်အထိ ဖြစ်သည်ကို တွေ့ရ၏။

မီတာ နှစ်ရာထက် ကျော်လွန်ပါက ဘာမှ မမြင်ရတော့သလို နှိပ်၍ တိုက်ခိုက်ရန်လည်း မဖြစ်နိုင်တော့ချေ။

"လက်နက်ကို ရွေးပြီး စနစ်ပြားပေါ်က တိုက်ခိုက်ချင်တဲ့ နေရာကို နှိပ်လိုက်ရုံနဲ့ ချက်ချင်း တိုက်ခိုက်နိုင်တာပဲ။ တိုက်ခိုက်မှု အကွာအဝေးက မီတာ နှစ်ရာ ပတ်လည်ပေါ့..."

ကျိချောင်းယန်က တစ်ယောက်တည်း ရေရွတ် ပြောရင်းနှင့်ပင် သူ၏ အံ့သြမှုကို မဖုံးကွယ်နိုင်တော့ချေ။

ဒီစနစ်ပြားက စစ်ပွဲဂိမ်းတစ်ခုလိုမျိုး ဒီလောက်အထိ အသုံးချရ လွယ်ကူလိမ့်မည်ဟု မည်သူမျှ မထင်ထားခဲ့ကြပေ။

ရွှီရှင်းက - "သစ်ပင်အိမ်ရဲ့ အနောက်ဘက်ကို တစ်ချက် ချိန်ကြည့်ပါဦး၊ အဲဒီနေရာက ဒီ မြှားပစ်စက် ရဲ့ ပစ်ခတ်မှု နယ်ပယ်အပြင်ဘက်မှာ ရှိတာလေ" ဟု အကြံပြုလိုက်၏။

"ကောင်းပြီလေ"

ချီရွှယ်ဖေးက အနောက်ဘက်ကို နှိပ်လိုက်သော်လည်း မြှားပစ်စက် မှာ ဘာမှ တုံ့ပြန်မှု မရှိချေ။

"ပစ်ကွင်းအပြင်ဘက်ဆိုရင်တော့ တုံ့ပြန်မှု မရှိဘူးပေါ့၊ ဟုတ်လား"

ကျိချောင်းယန်က ခေတ္တစဉ်းစားပြီးနောက် ရွှီရှင်းဘက် လှည့်ကာ - "ရွှီရှင်း... နောက်ထပ် အချို့... ဪ မင်း လုပ်နေပြီပဲဟ"

ရွှီရှင်းသည် နောက်ထပ် မြှား ငါးစင်းကို ပြုလုပ်ပြီး မြှားသေနတ် ထဲသို့ ထည့်ပေးလိုက်ပြီး ဖြစ်ပေသည်။

"အစ်မရွှယ်ဖေး... မြှားပစ်စက် နှစ်ခုလုံးကို တစ်ပြိုင်နက်တည်း ထိန်းချုပ်ကြည့်ပါဦး"

"အိုကေ"

ချီရွှယ်ဖေးက မြှားပစ်စက် နှစ်ခုလုံးကို ရွေးလိုက်ပြီး နေရာတစ်ခုကို နှိပ်လိုက်၏။

"ဂျောက်"

စက်ယန္တရားသံနှင့်အတူ မြှားပစ်စက် နှစ်ခုလုံးက မြှား များကို တစ်ပြိုင်နက်တည်း ပစ်လွှတ်လိုက်ရာ၊ ချီရွှယ်ဖေး နှိပ်လိုက်သော နေရာသို့ ဘေးချင်းယှဉ်လျက် စိုက်ဝင်သွားကြချေသည်။

ထို့နောက် သူမသည် မြှားပစ်စက် တစ်ခုတည်းသာ ပစ်နိုင်သည့် အကွာအဝေးထဲက နေရာတစ်ခုကို နှိပ်ကြည့်ရာ၊ ဒီတစ်ခါတွင်မူ ထို မြှားပစ်စက် တစ်လက်တည်းကသာ တိုက်ခိုက်မှု ပြုလုပ်တော့၏။

ဒါက တကယ်ကို အစွမ်းထက်လှပေသည်...။

ဒီထိန်းချုပ်စနစ်ပြားက တကယ့်ကို အသုံးဝင်လွန်းလှပေ၏။

အထူးတလည် လေ့ကျင့်နေစရာ မလိုဘဲ အလွယ်တကူ ကျွမ်းကျင်နိုင်သည်။

လက်နက်ကို ရွေးပြီး တိုက်ခိုက်မည့် နေရာကို နှိပ်၊ ဒါဆိုရင် သစ်ပင်အိမ်ရဲ့ ပြင်ပလက်နက်တွေကို အပီအပြင် ထိန်းချုပ်နိုင်ပြီ မဟုတ်ပါလား။

ဒါ့အပြင် ဒီစခရင်က ပတ်ဝန်းကျင် မြင်ကွင်းကိုလည်း ပြသပေးနေသေး၏။

ဆိုလိုတာက သူတို့အနေနဲ့ ရန်သူဘယ်မှာလဲဆိုတာ သိဖို့ ပြတင်းပေါက်ကနေ လှမ်းကြည့်နေစရာ မလိုတော့ဘဲ၊ စနစ်ပြားပေါ်က အပေါ်စီးမြင်ကွင်းကနေတင် အကုန်မြင်နေရခြင်း ဖြစ်ပေသည်။

ရွှီရှင်းမှာ မာဟုန်ယွီကို နှိမ်နင်းဖို့ သစ်ပင်အိမ်အောက်မှာ ပုန်းနေတုန်း သူ အာရုံမခံမိသွားတာကို တွေးပြီး ရုတ်တရက် စိတ်သက်သာရာ ရသွားမိ၏။

သူက အနောက်ဘက်ကနေ ခိုးဝင်ဖို့ ရွေးချယ်ခဲ့တာဖြစ်ပြီး၊ အထဲကလူက တခြားပြတင်းပေါက်မှာ ရှိနေတာမို့ အနောက်ကို မြင်ရမှာ မဟုတ်ဘူးလို့ သူ ထင်ခဲ့၏။

ဒါပေမဲ့ ဒီစနစ်ပြားက အပေါ်စီးမြင်ကွင်းကနေ ပတ်ပတ်လည် အကုန်လုံးကို ကြည့်လို့ရနေသည်။

မာဟုန်ယွီသည် ချီရွှယ်ဖေးကို ပိုပြီး တိတိကျကျ ပစ်မှတ်ထားနိုင်ဖို့အတွက် မြင်ကွင်းကို သူမရှိရာဘက်ကိုပဲ အဓိကထားပြီး ချဲ့ကြည့်နေခဲ့လို့သာ ဖြစ်ရမည်။

ထို့ကြောင့်လည်း ရွှီရှင်းနှင့် လီဝမ်ရှီးတို့ အနောက်ကနေ ခိုးဝင်လာတာကို သူ မမြင်လိုက်ရခြင်း ဖြစ်ပေလိမ့်မည်။

သူ့ဘက်က နည်းနည်းတော့ ဇွတ်တရွတ်ဆန်ခဲ့သည်ဆိုပေမဲ့၊ ကံကောင်းတာက မာဟုန်ယွီက ပိုပြီး မိုက်မဲနေခဲ့လို့ပင်။

ထိန်းချုပ်စနစ်ပြားဟာ သစ်ပင်အိမ်ရဲ့ လက်နက်တွေကို ထိန်းချုပ်ပေးရုံတင်မကဘဲ၊ ပတ်ဝန်းကျင်ကိုပါ အပေါ်စီးကနေ စောင့်ကြည့်ပေးနိုင်တာကြောင့် ဒါဟာ လက်ရှိအချိန်မှာတော့ အပြည့်စုံဆုံး သစ်ပင်အိမ် ခံစစ်စနစ်တစ်ခု ဖြစ်ပေသည်။

"မင်း မာဟုန်ဝေကို တစ်ယောက်တည်း ကိုင်တွယ်နိုင်ပါ့မလား။ ငါ့အကူအညီ လိုဦးမလား"

ကျိချောင်းယန်က ထိန်းချုပ်စနစ်ပြားကို အတော်လေး သဘောကျသွားပြီး ရွှီရှင်းကို လှည့်မေးလိုက်၏။

ရွှီရှင်းလိုပဲ သူသည်လည်း မာဟုန်ဝေကို ကျိန်းသေပေါက် သိမ်းသွင်းရမည်ဟု ယုံကြည်ထား၏။

ဒီစွမ်းရည်က တကယ်ကို သန်မာလွန်းလှသည်မဟုတ်ပါလား။

ဒါဟာ သာမန်သစ်ပင်အိမ်ကိုတောင် အလွန်အမင်း ခုခံနိုင်စွမ်းရှိတဲ့ ခံတပ်ကြီးတစ်ခုအဖြစ် ပြောင်းလဲပေးနိုင်တာပင်။

ဒီလို ကပ်ပါးသစ်ပင်အိမ်တွေသာ အများကြီး ရှိလာမယ်ဆိုရင် သူတို့ဟာ အင်အားကြီးမားတဲ့ ခံစစ်စနစ်တစ်ခုကို တည်ဆောက်နိုင်မှာ ပင်။

"စိတ်မပူပါနဲ့၊ မနက်ဖြန်ကျရင် ငါ အကုန်ဖြေရှင်းနိုင်မှာပါ။ မင်းပါ ပါလာရင် သူ သတိထားမိသွားလိမ့်မယ်"

ရွှီရှင်းက သူ၏ အစီအစဉ်အပေါ် ယုံကြည်ချက် အပြည့်ရှိနေ၏။

"ကောင်းပြီလေ၊ မင်းဆီက သတင်းကောင်းကို ငါ စောင့်နေပါ့မယ်"

ကျိချောင်းယန်က ခေါင်းညိတ်ပြလိုက်၏။

"နင်တို့ ဘာတွေ ပြောနေကြတာလဲ"

လီဝမ်ရှီးက အနည်းငယ် ဇဝေဇဝါဖြစ်လျက် မေးလိုက်သည်။

"မနက်ဖြန်ကျရင် ဖြေရှင်းနိုင်မယ် ဟုတ်လား။ ဒီစနစ်ပြားကို ဘယ်သူ လုပ်နိုင်လဲဆိုတာ နင်တို့ သိသွားကြပြီလား"

ရွှီရှင်းက သူမကို တောင်ဘက်က သုံးထပ်သစ်ပင်အိမ်အကြောင်း ပြောပြခဲ့ဖူးသော်လည်း ထိုရှင်ကျန်သူ၏ နာမည်မှာ မာဟုန်ဝေ ဖြစ်ကြောင်းကိုတော့ မပြောပြရသေးချေ။

"ဪ... ဒီလိုရှိတယ်"

ရွှီရှင်းက ပြုံးလျက် ရှင်းပြလိုက်၏။

"တကယ်တော့ မာဟုန်ဝေဆိုတာ နင်ပြောတဲ့ တောင်ဘက်က ရှင်ကျန်သူပဲလေ"

"ဟင်"

လီဝမ်ရှီး မျက်လုံးပြူးသွား၏။

"တောင်ဘက်ကလူလား၊ ဒါဆို... ဒါဆို ရှင်က အန္တရာယ်ကြားထဲ ရောက်နေခဲ့တာပေါ့ တော်သေးတာပေါ့ သူ ဘာမှ မလုပ်ခဲ့လို့..."

ထိုကဲ့သို့သော လူမျိုးရဲ့ သစ်ပင်အိမ်အောက်မှာ ရွှီရှင်း အကြာကြီး စကားပြောခဲ့တာကို ပြန်တွေးမိပြီး သူမ အနည်းငယ် ကြောက်လန့်သွားရ၏။

ရွှီရှင်းကတော့ စိုးရိမ်ခြင်း မရှိချေ။

မာဟုန်ဝေသည် သူ၏ညီထက် အများကြီး ပိုပြီး သတိကြီးသူ ဖြစ်၏။

သူသည် သူ၏စွမ်းရည်ကို လျှို့ဝှက်လက်နက်တစ်ခုအနေနဲ့ သိမ်းထားပုံရပြီး အလွယ်တကူ ထုတ်မပြခဲ့ချေ။

ထို့ကြောင့် ခြိမ်းခြောက်ခံရသည့်အချိန်မှာတောင် မာဟုန်ဝေသည် ပြတင်းပေါက်မှာ နေပြီး လေးနှင့်သာ ချိန်ရွယ်ခြိမ်းခြောက်ခဲ့ခြင်း ဖြစ်ပြီး မြှားပစ်စက် များကို အသုံးမပြုခဲ့ချေ။

နောက်ဆုံးမှာ ရွှီရှင်းက သူတို့လူ ဖြစ်ကြောင်း သိသွားပြီး လုဖေးအာနဲ့ နီးစပ်မှုရှိတာကို သိသွားတဲ့တိုင် မာဟုန်ဝေက သူ့ရဲ့စွမ်းရည်ကို ထုတ်မပြောဘဲ အမြန်ထွက်သွားဖို့ပဲ တိုက်တွန်းခဲ့၏။

ဒီလိုလူမျိုးက အလွန်ပင် စေ့စပ်သေချာပြီး ပါရမီကို အလွယ်တကူ ထုတ်မပြတတ်ချေ။

တစ်ခါ လှုပ်ရှားပြီဆိုလျှင်လည်း ပြင်းထန်လှသဖြင့် ကိုင်တွယ်ရ အလွန်ခက်ခဲပေလိမ့်မည်။

သို့သော်လည်း သူ၏ စွမ်းရည်ကို ကြိုတင်သိထားခြင်းက ကိုင်တွယ်ရ ပိုလွယ်ကူစေသည်။

မာဟုန်ယွီထက်တောင် ပိုလွယ်ဦးမည် ဖြစ်ပေသည်။

မာဟုန်ယွီကတော့ သူ့အစ်ကိုကြီးကို တကယ့်ကို ဒုက္ခပေးလိုက်တာပင်။

မနက်ဖြန်ကျရင်တော့ လုဖေးအာရဲ့ သရုပ်ဆောင်ချက်အပေါ်မှာပဲ မူတည်တော့မည်။

ရွှီရှင်းကတော့ သူမရဲ့ သရုပ်ဆောင်မှုက အပြစ်ပြောစရာ မရှိတာကို သိထားတာကြောင့် စိတ်ချနေသည်။

"ဒါပေမဲ့ တကယ့်ကို တိုက်ဆိုင်တာပဲနော်၊ အဲဒီ ညီအစ်ကိုနှစ်ယောက်ရဲ့ သစ်ပင်အိမ်တွေက ဒီလောက်အထိ နီးနေကြတာ"

လီဝမ်ရှီးက အံ့သြတကြီး မှတ်ချက်ပေးလိုက်၏။

သစ်ပင်အိမ် အနည်းငယ်သာ ခြားနေသည်ဆိုသော်လည်း၊ ရှင်ကျန်သူ သောင်းဂဏန်းရှိသည့်အထဲတွင် သူတို့၏ အိမ်တွေက အလွန်ပင် နီးကပ်နေခြင်း ဖြစ်ပေသည်။

"ဒါက တိုက်ဆိုင်မှု မဟုတ်လောက်ဘူး"

ကျိချောင်းယန်က စဉ်းစားလိုက်သည်။

"ညီအစ်ကိုတွေဖြစ်တဲ့ ချင်ယွမ်လုံနဲ့ ချင်ယွမ်ဟုတို့လည်း နီးနီးလေးမှာပဲ ရှိနေကြတာလေ။ သိထားတဲ့ ညီအစ်ကို နှစ်ယောက်လုံးက ဒီလိုဖြစ်နေမှတော့ ဒါက တိုက်ဆိုင်မှုသက်သက် ဟုတ်ပါ့မလား"

"ငါလည်း အဲဒီလိုပဲ ထင်တယ်"

ရွှီရှင်း ခေါင်းညိတ်ပြလိုက်၏။

"ဖြစ်နိုင်တာက သွေးသားတော်စပ်တဲ့သူတွေကို အနီးအနားက နေရာတွေမှာပဲ နေရာချပေးခဲ့တာ ဖြစ်လိမ့်မယ်"

"ဟင်"

စနစ်ပြားကို စမ်းသပ်နေဆဲဖြစ်တဲ့ ချီရွှယ်ဖေးက သူတို့စကားကို ကြားတော့ ရုတ်တရက် လှည့်ကြည့်လာပြီး အသံမြှင့်ကာ မေးလိုက်၏။

"နင်တို့ ဘာပြောလိုက်တာလဲ။သွေးသားတော်စပ်တဲ့သူတွေကို အနီးအနားမှာပဲ နေရာချပေးခဲ့တာ ဟုတ်လား"

သူမ၏ အသံထဲတွင် အံ့သြမှု၊ သံသယရှိမှုနှင့်အတူ စိတ်လှုပ်ရှားမှု အရိပ်အယောင်လေးတွေ ပါဝင်နေ၏။

အာ...

ချီရွှယ်ဖေးမှာ ဒီကမ္ဘာထဲကို ရောက်နေတဲ့ သူမ၏မောင်လေး ချီကျိရွှမ် ရှိနေတာကို ရွှီရှင်း ရုတ်တရက် သတိရသွား၏။

အကယ်၍ သူတို့ရဲ့ ခန့်မှန်းချက်သာ မှန်ခဲ့မယ်ဆိုရင်၊ အရင်က ဆေးဆရာဝန်တွေကို ထိန်းချုပ်ခဲ့တဲ့ ချီကျိရွှမ်ဟာလည်း အနီးအနားမှာပဲ ရှိနေနိုင် ပေသည်။

အခန်း ၂၆၃ ပြီး။