အိမ်တော်သခင် ဖြစ်လာခြင်း

အကြီးအကဲအဖွဲ့ဝင်များ တစ်ယောက်ပြီးတစ်ယောက် သဘောထားဖော်ပြလာကြသည်နှင့်အမျှ ဤရလဒ်ကြောင့် စတင်ဆူညံလှုပ်ရှားနေသော အစည်းအဝေးခန်းမကြီးက ပြန်လည်ငြိမ်သက်သွားတော့သည်။

လူတိုင်း၏ မျက်နှာထက်မှ အံ့ဩတုန်လှုပ်မှုနှင့် မယုံကြည်နိုင်မှုများက နက်ရှိုင်းသော ကြောက်ရွံ့ထိတ်လန့်မှုအဖြစ်သို့ လျင်မြန်စွာ ပြောင်းလဲသွားကြသည်။

ဤနေရာသို့ ရောက်လာနိုင်သူများထဲတွင် မည်သူမျှ မိုက်မဲသူ မပါဝင်ပေ။

ဤမျှ ပေါက်ကရဆန်သော အဆိုပြုလွှာတစ်ခုကို အကြီးအကဲအဖွဲ့ဝင် အားလုံးက တညီတညွတ်တည်း ချီးကျူးထောက်ခံပြီး ကန့်ကွက်သူ တစ်ဦးမျှမရှိခြင်းမှာ ၎င်း၏နောက်ကွယ်၌ ဖုံးကွယ်ထားသော သတင်းစကားမှာ အလွန်ပင် ထိတ်လန့်ဖွယ်ကောင်းလှသည်။

မြောင်ယွမ်တွင် အကြီးအကဲအဖွဲ့ တစ်ခုလုံးကို ဗြောင်ကျကျ လိမ်ညာခိုင်းပြီး သူမဘက်က ရပ်တည်ပေးရလောက်အောင် အင်အားမျိုး ရှိနေသည် တဲ့လား။

ဤအမှန်တရားမှာ မြောင်ယွမ် နောက်တစ်ကြိမ် အသင်းခေါင်းဆောင်နှင့် အိမ်တော်သခင် ဖြစ်လာခြင်းထက်ပင် ပို၍ စဉ်းစားမရနိုင်အောင် ဖြစ်ရသည်။

လူတိုင်း၏ မြောင်ယွမ်အပေါ် ကြည့်သည့် အကြည့်များမှာလည်း ချက်ချင်း ပြောင်းလဲသွားတော့သည်။

သူမက ဒါကို ဘယ်လိုများ လုပ်နိုင်ခဲ့တာလဲ။

သို့သော်လည်း အချို့သောသူများမှာမူ ရှေ့မှ အမှန်တရားကို လက်မခံနိုင်ကြပေ။

"ငါ မကျေနပ်ဘူး"

မြောင်ယွီရှန်းက ချက်ချင်း မတ်တတ်ရပ်လိုက်ပြီး အကြီးအကဲအဖွဲ့ကို အော်ဟစ်လိုက်တော့သည်။ "ဘာလို့ သူမ ဖြစ်ရတာလဲ"

"မြောင်ယွမ်ရဲ့ ဒီနေ့ အဆိုပြုလွှာက ဟာသလုပ်နေတာဆိုတာ ဘယ်သူမဆို သိနိုင်တာပဲ၊ ငါ့ရဲ့ အဆိုပြုလွှာကမှ ဝမ်ဟဲကုန်သွယ်ရေးအသင်းရဲ့ အနာဂတ် တိုးတက်မှုနဲ့ အကိုက်ညီဆုံးပဲ"

"ဘာလို့ သူမ ဖြစ်ပြီး ငါ မဟုတ်ရတာလဲ"

ထိုအချိန်တွင် သူ၏ မျက်လုံးများမှာ နီရဲနေပြီး စိတ်လှုပ်ရှားလွန်းသဖြင့် နှုတ်ခမ်းများပင် ဖြူလျော့နေတော့သည်။

သို့သော်လည်း အကြီးအကဲအဖွဲ့ကတော့ သူ့ကို အေးစက်စွာသာ စိုက်ကြည့်နေကြသည်။ ယခင်က သူ့ဘက်က ပါခဲ့သော အကြီးအကဲများပင်လျှင် ယခုအခါ အလွန်ပင် တည်ငြိမ်နေကြပြီး သူ့ဘက်က ကူညီပြောပေးမည့်သူ တစ်ဦးမျှ မရှိပေ။

"မြောင်ယွီရှန်း... မင်းရဲ့ အပြောအဆိုကို ဆင်ခြင်ပါ"

အကြီးအကဲခေါင်းဆောင်က အေးစက်စွာ ပြောလိုက်သည်။

ရှေ့မှ အခြေအနေအားလုံးကို မြင်လိုက်ရချိန်တွင် မြောင်ယွီရှန်း တစ်ယောက် အမှန်တရားကို နားလည်သွားတော့သည်။ ယနေ့ ကိစ္စမှာ အဆိုပြုလွှာဖြင့် အိမ်တော်သခင် ရွေးချယ်သည်ဟု ထင်ရသော်လည်း တကယ်တမ်းမှာတော့ ကြိုတင် သတ်မှတ်ပြီးသား ဖြစ်နေခြင်းပင်။

အခြားသူများ၏ အဆိုပြုလွှာက မည်မျှပင် ထူးချွန်ပါစေ၊ မြောင်ယွမ်၏ အဆိုပြုလွှာက မည်မျှပင် ပေါက်ကရဆန်ပါစေ၊ ရလဒ်ကိုတော့ ပြောင်းလဲနိုင်မည် မဟုတ်ပေ။

သို့သော် မြောင်ယွီရှန်းကတော့ မကျေမနပ် ဖြစ်နေဆဲပင်။ ဤနေ့အတွက် သူ အကြာကြီး စောင့်ဆိုင်းခဲ့ရသည် မဟုတ်ပါလား။

ငယ်စဉ်ကတည်းက မြောင်ယွမ် ပေးခဲ့သော အရိပ်အောက်မှ နောက်ဆုံးတော့ လွတ်မြောက်ပြီဟု ထင်ခဲ့သော်လည်း လွတ်မြောက်ဖို့ နေနေသာသာ ထိုအရိပ်က ပို၍ပင် ကြီးမားလာခဲ့သည်။

ဘာမှ ပြောင်းလဲ၍ မရတော့ကြောင်း သိသွားချိန်တွင် မြောင်ယွီရှန်းက အေးစက်စွာ ရယ်မောလိုက်ပြီးနောက် ပြောလိုက်သည်။ "အကြီးအကဲတို့"

"မြောင်ယွမ်က ခင်ဗျားတို့ကို ဘယ်လောက်တောင် အကျိုးအမြတ်တွေ ပေးထားလို့လဲ၊ ဒါမှမဟုတ် တခြား ရှက်စရာကောင်းတဲ့ နည်းလမ်းတွေ သုံးထားလို့လဲတော့ ငါ မသိဘူး"

"ဒါပေမဲ့ ခင်ဗျားတို့ ဒီနေ့ လုပ်ရပ်က ဘိုးဘေး အစဉ်အလာကို ချိုးဖောက်တာပဲ ခင်ဗျားတို့ရဲ့ ကိုယ်ကျင့်သိက္ခာကိုပါ ဖောက်ဖျက်တာပဲ"

"မိသားစုရဲ့ ကံကြမ္မာကို မြောင်ယွမ် လက်ထဲ အပ်လိုက်တာဟာ ခင်ဗျားတို့ ဘဝအတွက် တစ်သက်စာ အမည်းစက်နဲ့ ဆေးကြောလို့ မရတဲ့ အပြစ်ပဲ"

မြောင်ယွီရှန်းက လူပုံအလယ်တွင် ဒေါသတကြီး ကြိမ်းမောင်းလိုက်သည်။

သို့သော် သူ၏ ပြင်းထန်သော စကားလုံးများကို ရင်ဆိုင်ရာတွင် အကြီးအကဲခေါင်းဆောင်က တည်ငြိမ်စွာပင် ပြောလိုက်သည်။ "မြောင်ယွီရှန်း... အကြီးအကဲအဖွဲ့ကို စော်ကားတယ်"

"မိသားစု စည်းမျဉ်းကို ချိုးဖောက်တယ်"

"ဒီနေ့က စပြီး တိုက်ရိုက်မျိုးဆက် တစ်ဦးအနေနဲ့ ရှိတဲ့ လုပ်ပိုင်ခွင့် အားလုံးကို ပြန်သိမ်းတယ်၊ မိသားစုကနေ နှင်ထုတ်တယ်၊ မြောင်မိသားစုနဲ့ ဝမ်ဟဲကုန်သွယ်ရေးအသင်းထဲကို တစ်သက်လုံး ခြေဦး မလှည့်စေရဘူး"

အကြီးအကဲခေါင်းဆောင်၏ အေးစက်သော အမိန့်သံအဆုံးတွင် မြောင်ယွီရှန်း၏ ခန္ဓာကိုယ်မှာ တောင့်တင်းသွားပြီး မျက်နှာမှာ လုံးဝ ဖြူလျော့သွားတော့သည်။

စိတ်လှုပ်ရှားပြီး ပြောလိုက်မိတဲ့ စကားအချို့ကြောင့် ရလဒ်က ဤမျှအထိ ပြင်းထန်လိမ့်မည်ဟု သူ မထင်ထားခဲ့ပေ။

ပို၍ မယုံနိုင်စရာ ကောင်းသည်မှာ အကြီးအကဲခေါင်းဆောင်က အမိန့်ထုတ်ပြန်ပြီးနောက် အကြီးအကဲ တစ်ယောက်မျှပင် သူ့အတွက် ကူညီပြောဆိုခြင်း မရှိကြခြင်းပင်။

သူ့ဖခင်ကိုယ်တိုင်ပင်လျှင် တိတ်ဆိတ်နေခြင်းကို ရွေးချယ်ခဲ့ပြီး မိသားစု အစောင့်အရှောက်များက သူ့ကို အစည်းအဝေးခန်းမထဲမှ အတင်းအကျပ် ဆွဲထုတ်သွားသည်ကို လျစ်လျူရှုထားခဲ့သည်။

ခန်းမထဲရှိ ကျန်ရှိသူများမှာမူ ကြောက်ရွံ့လွန်းသဖြင့် အသက်ပင် ပြင်းပြင်းမရှူရဲကြပေ။

သူတို့အားလုံး သိလိုက်ကြပြီ ဖြစ်သည်။ ယနေ့ ရွေးချယ်ပွဲမှာ အပေါ်ယံ မြင်နေရသကဲ့သို့ မရိုးရှင်းကြောင်းကိုပင်။

မြောင်ယွမ်က နောက်မျိုးဆက်၏ အသင်းခေါင်းဆောင်နှင့် အိမ်တော်သခင် ဖြစ်လာမည်မှာ အသေအချာပင် ဖြစ်သည်။

ထို့ပြင် မည်သည့် အိမ်တော်သခင်ထက်မဆို ပို၍ ခိုင်မာသော ထောက်ခံမှုကို ရရှိထားခြင်းပင်

....

ရွေးချယ်ပွဲ အခမ်းအနား ပြီးဆုံးသွားပြီး အကြီးအကဲခေါင်းဆောင်နှင့် ဖခင်ဖြစ်သူ မြောင်ဟွေ့ဝမ်တို့က အသင်းခေါင်းဆောင်နှင့် အိမ်တော်သခင် အဆောင်အယောင် တံဆိပ်ပြားများကို သူမလက်ထဲသို့ တရားဝင် အပ်နှင်းချိန်အထိ မြောင်ယွမ် တစ်ယောက် ကြောင်တောင်တောင် ဖြစ်နေဆဲပင်။

မြောင်ယွီရှန်းကို ထားလိုက်ပါဦး၊ သူမကိုယ်တိုင်ပင်လျှင် ဤရာထူးက သူမလက်ထဲသို့ တကယ် ရောက်လာသည်ကို လက်မခံနိုင်ဘဲ ဖြစ်နေသည်။

တကယ်ပဲ ထိုအဆိုပြုလွှာက အကြီးအကဲအဖွဲ့ဝင် အားလုံးကို ဆွဲဆောင်နိုင်ခဲ့တာလား။

မြောင်ယွမ်က မိုက်မဲသူ မဟုတ်ပေ၊ ၎င်းမှာ လုံးဝ မဖြစ်နိုင်ကြောင်း သူမ သိသည်။ သူမကို တစ်စုံတစ်ယောက်က ကြိုတင် သတ်မှတ်ထားပြီး အကြီးအကဲအဖွဲ့ကို ဘာပဲဖြစ်ဖြစ် သူမဘက်က ရပ်တည်ပေးရန် ခိုင်းစေခဲ့ခြင်းသာ ဖြစ်ရမည်။

ဒါဆိုရင် အဲဒီလူက ဘယ်သူလဲ။

မြောင်မိသားစုထဲက လူလား။

မြောင်ယွမ်က ခေါင်းယမ်းလိုက်သည်။ အကယ်၍ ထိုလူက မြောင်မိသားစုထဲကသာ ဆိုလျှင် နှစ်ပေါင်းများစွာအတွင်း သူမ ယခုကဲ့သို့ မတရား ဖိနှိပ်ခံရမှုများကို ကြည့်နေမည် မဟုတ်ဘဲ စောစောကတည်းက လက်တွဲခေါ်ယူခဲ့လိမ့်မည်။

ဒါဆိုရင်တော့ အပြင်လူပဲ ဖြစ်ရမည်။

အပြင်လူ တစ်ယောက်က မြောင်မိသားစု တစ်ခုလုံးကို တိတ်တဆိတ် ပြောင်းလဲပစ်နိုင်သည် ဆိုပါက ထိုလူ၏ အင်အားမှာ မည်မျှအထိ ကြောက်စရာကောင်းလောက်အောင် ကြီးမားမည်ကို မြောင်ယွမ် ခန့်မှန်းရုံမျှဖြင့် သိနိုင်သည်။

ရှောင်းရွှယ်ရဲ့ နောက်ကွယ်က လူများလား။

အဲဒီလူက တကယ်ပဲ ဘာကို လိုချင်နေတာလဲ။

သူတို့က ဘာကြောင့်များ ငါ့ကိုမှ ရွေးချယ်ခဲ့ရတာလဲ။

မြောင်ယွမ်၏ ဦးနှောက်မှာ ရှုပ်ထွေးနေတော့သည်။ သူမ၏ နှစ်ပေါင်းများစွာ အတွေ့အကြုံများဖြင့်ပင် လုံလောက်သော အကြောင်းပြချက် တစ်ခုမျှ ရှာမတွေ့နိုင်ပေ။

ထိုအချိန်တွင် မြောင်ယွမ်၏ ဖခင် မြောင်ဟွေ့ဝမ်၊ ဆိုလိုသည်မှာ ယခုလေးတင် ရာထူးမှ နုတ်ထွက်သွားသော မြောင်မိသားစု အိမ်တော်သခင်က သူမရှေ့သို့ ရောက်လာသည်။

"ယွမ်အာ... အဖေ့ နောက် လိုက်ခဲ့"

"အဖေ သမီး ကို ပြောစရာ ရှိတယ်"

ထို့နောက် မြောင်ဟွေ့ဝမ်က မြောင်ယွမ်ကို ပန်းခြံအတွင်းရှိ တိတ်ဆိတ်သော နေရာတစ်ခုသို့ ခေါ်ဆောင်သွားသည်။

ခေတ္တမျှ ငြိမ်သက်စွာ ရပ်နေပြီးနောက် မြောင်ဟွေ့ဝမ်က ရုတ်တရက် စကားစလိုက်သည်။ "ယွမ်အာ... သမီး အဖေ့ ကို မုန်းလား"

"အဖေ က အိမ်တော်သခင် တစ်ယောက်အနေနဲ့ သမီး နှစ်ပေါင်းများစွာအတွင်း ခံစားခဲ့ရတဲ့ မတရားမှုတွေကို သိရက်သားနဲ့ ဘာမှ မလုပ်ပေးခဲ့ဘူး၊ တချို့ ကိစ္စတွေဆိုရင် အဖေ ကိုယ်တိုင်တောင် ဦးဆောင်ခဲ့သေးတယ်"

"အဖေ သာ သမီး နေရာမှာဆိုရင် အဖေ့ ကို သေလောက်အောင် မုန်းမိမှာပဲ"

မြောင်ယွမ် ခေတ္တ တိတ်ဆိတ်သွားပြီးနောက် အေးဆေးစွာ ပြောလိုက်သည်။ "ဒါပေါ့... မုန်းခဲ့တာပေါ့"

"အဲဒီ ကိစ္စတွေ ကြုံတွေ့နေရတုန်းက တစ်စုံတစ်ယောက်က သမီး ရှေ့မှာ မတ်တတ်ရပ်ပြီး လေဒဏ်မိုးဒဏ်တွေကို ကာကွယ်ပေးပါစေလို့ ဘယ်နှစ်ကြိမ်တောင် ဆုတောင်းခဲ့မိလဲ မသိဘူး"

"ဒါပေမဲ့ မျှော်လင့်ချက် အားလုံးက စိတ်ပျက်စရာတွေပဲ ဖြစ်ခဲ့ရတယ်၊ တစ်ခုမှ ကင်းလွတ်ခွင့် မရခဲ့ဘူး"

"အတွေ့အကြုံတွေ များလာတာနဲ့အမျှ မိသားစုရဲ့ ထူးခြားတဲ့ အခြေအနေတွေရယ်၊ အိမ်တော်သခင် တစ်ယောက်အနေနဲ့ အဖေ့ ရဲ့ အခက်အခဲတွေကို ငါ တဖြည်းဖြည်း နားလည်ပေးလာနိုင်ခဲ့ပေမဲ့..."

"တခြားအိမ်က ဖခင်တွေရဲ့ ကြင်နာတဲ့ မျက်နှာတွေကို မြင်ရတိုင်း သမီး အဖေကလည်း အဲဒီလိုဆိုရင် ဘယ်လောက်တောင် ကောင်းမလဲလို့ စိတ်ကူးယဉ်မိတုန်းပဲ"

မြောင်ယွမ်၏ စကားကို ကြားရသောအခါ မြောင်ဟွေ့ဝမ်က သက်ပြင်းကို ခပ်ပြင်းပြင်း ချလိုက်သည်။

"ဒီကမ္ဘာကြီးက အရမ်း ရှုပ်ထွေးလွန်းတယ်"

"အဖေ တို့ လူတိုင်းရဲ့ ဘဝမှာ ကိုယ့်စိတ်နဲ့ကိုယ် မဟုတ်ဘဲ လုပ်ရတဲ့ ကိစ္စတွေက အနည်းနဲ့အများ ရှိကြတာပဲ"

"ရာထူး အဆင့်အတန်း ပိုမြင့်လေလေ၊ အဲဒီလို ကိစ္စတွေက ပိုများလေလေပဲ"

"ဥပမာ... ဒီနေ့ ကိစ္စလိုမျိုးပေါ့"

ထိုသို့ပြောရင်း မြောင်ဟွေ့ဝမ်က လှည့်ကြည့်ကာ မြောင်ယွမ်ကို စိုက်ကြည့်ရင်း အလေးအနက် ပြောလိုက်သည်။ "ဒီနေ့ တကယ်တမ်းကျတော့ ဘယ်သူကမှ သမီး ကို ဝမ်ဟဲအသင်းခေါင်းဆောင်ရော မြောင်မိသားစု အိမ်တော်သခင်ရော ဖြစ်စေချင်ကြတာ မဟုတ်ဘူး"

"အဖေ ကိုယ်တိုင်လည်း အပါအဝင်ပဲ"

"အကြောင်းရင်းကိုတော့ သမီး လည်း သိမှာပါ၊ အကြီးအကဲအဖွဲ့က မိသားစုကို အန္တရာယ် မကျရောက်စေချင်ဘူး၊ အဖေ ကတော့ သမီးကို ဒီလို ရှုပ်ထွေးလှတဲ့ ရွှံ့ညွန်ထဲကို မနစ်စေချင်ဘူး"

"ဒါပေမဲ့ ရလဒ်ကတော့ အဖေ တို့ အားလုံး သမီးဘက်က ရပ်တည်ပေးဖို့ အတင်းအကျပ် ခိုင်းစေခံခဲ့ရပြီး ဘာမှလည်း ပြောင်းလဲလို့ မရခဲ့ဘူး"

"ဘာဖြစ်လို့လဲဆိုတော့..."

"ဝမ်ဟဲကုန်သွယ်ရေးအသင်းက အဖေ တို့ မြောင်မိသားစုနဲ့ မပတ်သက်တော့လို့ပဲ"

မြောင်ယွမ် တစ်ယောက် ချက်ချင်း မှင်သက်သွားတော့သည်။

"ဘာ... ဘာပြောတယ်"