အခန်း (၄၅၃-၄၅၄)

အခန်း (၄၅၃)။

“ကောင်းပြီ…၊ ကံကြမ္မာကျောက်စိမ်းခန္ဓာ၊ အမြင့်မြတ်ဆုံး တာအိုခန္ဓာ ... ငါ့တိုက်ကွက်ကို ခံစားကြည့်စမ်း၊ ယင်နှင့်ယန် ပြောင်းပြန်လှန်ခြင်းပညာ။”

ဟုန်ယွိ၏ လှံဦးမှာ သူ၏လည်ချောင်းဆီသို့ ဦးတည်နေသော်လည်း ချန်ပီယံမြို့စား ယန်အန်း၏ မျက်နှာတွင် ယုတ်မာသောအပြုံးတစ်ခု ထပ်မံပေါ်လာသည်။ တစ်ချိန်တည်း မှာပင် သူ၏ခန္ဓာကိုယ်အတွင်းရှိ စိတ်ဝိညာဉ်အတွေးစတိုင်းမှာ တုန်ခါမှုနှင့် အသံလှိုင်းများ ကို ထုတ်လွှတ်လိုက်သည်။

ထိုအသံမှာ အလွန်ပင် ရှေးကျပြီး၊ ဝေးကွာလှသောနေရာမှ လာနေသကဲ့ပင်။ ကောင်းကင် တာအိုကို ထိန်းချုပ်ထားသည့် မဟာစိတ်ဝိညာဉ်ကြီးက မလွန်ဆန်နိုင်သော အမိန့်တစ်ခု ကို ထုတ်ပြန်လိုက်သည့် ဂါထာရွတ်ဖတ်သံများနှင့် တူလှသည်။

ထိုအသံနှင့်အတူ ချန်ပီယံမြို့စား၏ တစ်ကိုယ်လုံးတွင် စွမ်းအားများ ပြည့်လျှံလာပြီး၊ တောင်တန်းများနှင့် ပင်လယ်ပြင်များကဲ့သို့၊ ကြည်လင်သော ကောင်းကင်ယံမှ တောက် လောင်နေသော နေမင်းကြီးကဲ့သို့ အရှိန်အဟုန်မှာ အဆက်မပြတ် မြင့်တက်လာတော့ သည်။

ချန်ပီယံမြို့စား၏ လက်ရှိခန္ဓာကိုယ်မှာ သူ၏ စိတ်ဝိညာဉ်အတွေးစ အားလုံးကို ထူးဆန်း သော စီစဉ်မူဖြင့် အစဉ်တကျ ဖွဲ့စည်းထားပြီး၊ ဖန်ဆင်းခြးဘူးသီးမှ ဟင်းလင်းပြင် စွမ်းအား များနှင့် ပေါင်းစပ်ထားသော အင်မော်တယ်ခန္ဓာကိုယ်တစ်ခု ဖြစ်သည်။

၎င်းမှာ ‘ရှေးဦးဖန်ဆင်းခြင်းတာအို’ ဂိုဏ်း၏ အမြင့်ဆုံး အင်မော်တယ်ပညာရပ် ဖြစ်သည့် ‘ကံကြမ္မာ ကျောက်စိမ်းခန္ဓာ’ ပင် ဖြစ်သည်။

ထိုအင်မော်တယ်ခန္ဓာသည် ကျိုးထိုက်ကျူ၏ ‘သွေးနီရောင် ကမ္ဘာဦး ကြေးသွန်းခန္ဓာ'၊ ယွမ်ရှန်းရှန်း၏ ‘'ကောင်းကင်ရနံ့ တိမ်တိုက်ခန္ဓာ'နှင့် ယွန်မင်နိုင်ငံ၏ ဧကရာဇ်အကြံပေး ယုဝမ်မူ၏ ‘ဘုံသုံးပါးကောင်းကင်ဓား’ တို့ထက်ပင် သာလွန်ကာ၊ ဟုန်ယွိ၏ ‘ဗုဒ္ဓဓမ္မခန္ဓာ’ နှင့်ပင် ယှဉ်နိုင်လောက်သည်။

သူ စွမ်းအားများကို လှည့်ပတ်လိုက်သည်နှင့် သူ၏လက်ထဲရှိ ဖန်ဟွမ်အသက်ဝိညာဉ်ဓား ထံမှ နီရွှေရောင် အလင်းတန်းများ ပွင့်ထွက်လာပြီး၊ အနှိုင်းမဲ့ မြင့်မြတ်ကာ၊ ပြင်းထန်သော ဟင်းလင်းပြင် ဝဲဂယက်များကိုပါ သယ်ဆောင်လာသည်။ မိုင်ပေါင်းများစွာအတွင်းရှိ ဥက္ကာခဲများအားလုံးမှာ ပေါက်ကွဲသွားပြီး ဖုန်မှုန့်များအဖြစ် ပြောင်းလဲသွားတော့သည်။

ဤသိုင်းကွက်မှာ ဟုန်ရွှန်ကျိ၏ ‘ကောင်းကင်ဘုံ သေမင်းဘီး’ နှင့် အနည်းငယ် ဆင်တူနေသည်။

၎င်းမှာ ဖန်ဆင်းခြင်းတာအိုဂိုဏ်း၏ အမြင့်ဆုံး ဓားသိုင်းပညာဖြစ်သော ‘ယင်နှင့်ယန် ပြောင်းပြန်လှန်ခြင်း’ ပညာရပ် ဖြစ်သည်။

ဟုန်ရွှန်ကျိ၏ ‘ကောင်းကင်ဘုံ သေမင်းဘီး’ ကိုလည်း ဖန်ဆင်းခြင်းတာအို ကိုယ်ခံပညာကို အခြေခံ၍ ဖန်တီးထားခြင်း ဖြစ်ရာ ၎င်းတို့နှစ်ခုကြား တူညီမှုများ ရှိနေခြင်းမှာ သဘာဝပင် ဖြစ်သည်။

ဤဓားသိုင်းကို အနှိုင်းမဲ့ နတ်ဘုရားလက်နက်ဖြစ်သော ဖန်ဟွမ်အသက်ဝိညာဉ်ဓားဖြင့် အသုံးပြုလိုက်သည့်အခါ ၎င်း၏ အစွမ်းမှာ အဆပေါင်း ရာချီ၍ တိုးလာခဲ့သည်။

...

ဖန်ဟွမ်အသက်ဝိညာဉ်ဓားသည် ထူးဆန်းသော ပတ်လမ်းတစ်ခုအတိုင်း ရွေ့လျားသွားပြီး ‘သေမင်းအလင်း နတ်ဘုရားလှံ’ ကို လွဲချော်ခြင်းမရှိဘဲ တိကျစွာ ထိတွေ့သွားသည်။

ဒေါင်…။

ဧရာမ ခေါင်းလောင်းကြီးကို ထုလိုက်သကဲ့သို့ အသံကြီး ဟိန်းထွက်သွားပြီး၊ နတ်ဘုရား လက်နက်နှစ်ခု၏ ရိုက်ခတ်မှုကြောင့် စွမ်းအားလှိုင်းများ အရပ်မျက်နှာအနှံ့ ပျံ့နှံ့သွားခဲ့ သည်။ လွန်ခဲ့သော နှစ်သုံးထောင်က ‘လေဟာနယ် ဖျက်ဆီးခြင်းအဆင့်သို့ ရောက်ရန် လက်တစ်လုံးသာ လိုတော့သည့် အထွက်အထိပ် ‘လူသားအင်မော်တယ်’ စစ်နတ်ဘုရား ရှန့်ကိုယ်တိုင် သွန်းလုပ်ခဲ့သော ဤ ‘သေမင်းအလင်း နတ်ဘုရားလှံ’ ၏ နက်မှောင်သော လှံဖျားတွင် အစင်းရာတစ်ခု ပေါ်လာခဲ့သည်။

၎င်းမှာ ဖန်ဟွမ်အသက်ဝိညာဉ်ဓားကြောင့် ဖြစ်ပေါ်လာသော အစင်းရာ ဖြစ်သည်။

ဤနတ်ဘုရားလှံမှာ အလွန်ပင် ခိုင်ခံ့လှပြီး ဤလောကရှိ နတ်ဘုရားသတ္တု အမျိုးအစား ပေါင်း ကိုးထောင်၊ မဟာယန်မီးလျှံ အမျိုးအစား ၄၉ မျိုး၊ နတ်ဘုရားအင်းကွက်ပေါင်း ၃၆၀ တို့ဖြင့် သန့်စင်၍ သွန်းလုပ်ထားခြင်း ဖြစ်သည်။ လှံသည် မဖျက်ဆီးနိုင်ဟု ဆိုနိုင်ပြီး ချော်ရည်များအတွင်း နှစ်ပေါင်း သောင်းချီ၍ ပစ်ထားလျှင်ပင် အရည်ပျော်ခြင်း သို့မဟုတ် ပျက်စီးခြင်း မရှိနိုင်ပေ။

လှံ၏ ကိုယ်ထည်တွင်လည်း ရှေးဦးမိစ္ဆာနတ်ဘုရား ၃၃ ပါး၏ သွေးများကို ထည့်သွင်း ပေါင်းစပ်ထားသည်။ ဤလှံကို ကိုင်ဆောင်သူသည် အဆုံးမဲ့ ခွန်အားကို ပိုင်ဆိုင်လိမ့်မည်။ (ယွန်ကုန်းမင်သည်လည်း ရှေးဦးမိစ္ဆာနတ်ဘုရား အမျိုးအစားဝင် တစ်ဦးဖြစ်သည်။)

သို့သော် ယခုအခါ ၎င်းပေါ်တွင် အစင်းရာတစ်ခု ထင်ကျန်ရစ်ခဲ့ပြီ ဖြစ်သည်။ ဤအချက်ကို ကြည့်ခြင်းဖြင့် ဖန်ဟွမ်အသက်ဝိညာဉ်ဓားမှာ မည်မျှအထိ အစွမ်းထက်ပြီး သေမင်းအလင်း နတ်ဘုရားလှံကိုပင် ထိခိုက်စေနိုင်ကြောင်း မြင်တွေ့နိုင်သည်။

အကယ်၍ သူတို့သည် ဆက်လက်၍ အကြိမ်ပေါင်း ထောင်ချီ၍ ထိတွေ့ရိုက်ခတ်မိပါက ဤ ‘သေမင်းအလင်း နတ်ဘုရားလှံ’ မှာ လုံးဝ ပျက်စီးသွားနိုင်ပေသည်။

ဒိုင်း….

လှံနှင့်ဓားတို့ အပြင်းအထန် တိုက်မိသည့်အခါ ဟုန်ယွိ၏ ခန္ဓာကိုယ်မှာ ကွေးညွတ်သွား သည်။ သူ၏ တစ်ကိုယ်လုံးမှာ လေးနှင့်ပစ်လိုက်သော မြားတစ်စင်းကဲ့သို့ မိုင်ပေါင်းများစွာ အဝေးသို့ ချက်ချင်း လွင့်စင်သွားပြီး ဖန်ဟွမ်အသက်ဝိညာဉ်ဓား၏ ထက်ရှသော ဓားစွမ်းအင်ကို ရှောင်တိမ်းလိုက်သည်။

“ဟွန့်၊ ငါ ‘သေမင်းအလင်း နတ်ဘုရားလှံ’ နဲ့ ‘ကောင်းကင်အလင်းဦးချို နတ်ဘုရားချပ်ဝတ်’ ကို ဖျက်ဆီးပစ်မယ်။ ပြီးရင် ‘ဝိညာဉ်ကျောက်တုံး နတ်ဘုရားသန္ဓေသား’ ရဲ့ လူသား အင်မော်တယ် ကိုယ်ပွားကောင်ကိုပါ သတ်ပစ်မယ်” ချန်ပီယံမြို့စား ယန်အန်းသည် ဟုန်ယွိ ရှောင်တိမ်းသွားသည်ကို မြင်သည့်အခါ သူ၏ခန္ဓာကိုယ်ကို လှုပ်ရှားလိုက်သည်။ ဓားစွမ်းအင်များက တည့်တည့်မတ်မတ် လွင့်စင်သွားပြီး တဝှီးဝှီး မြည်ဟီးသံနှင့်အတူ ဟုန်ယွိနောက်သို့ လိုက်လံ တိုက်ခိုက်တော့သည်။ သူ၏ အတွေးစတိုင်းမှ အေးစက်စက် အသံတစ်ခု ထွက်ပေါ်လာပြီး ဟင်းလင်းပြင်ကြီးကို တုန်ခါသွားစေသည်။ “ငါမရတဲ့အရာကို ဘယ်သူမှ မရစေရဘူး။”

ဟုန်ယွိကမူ ဘာမှပြန်မပြောဘဲ တည်ငြိမ်စွာပင် ရှိနေသည်။

စောစောက လှံချက်တစ်ချက်တည်းနှင့်ပင် ချန်ပီယံမြို့စား၏ မှော်အစွမ်းမှာ အမှန်တကယ် ပင် အဆမတန် တိုးတက်လာကြောင်းကို သူ မြင်နိုင်သည်။ သူကျင့်ကြံထားသော ‘ကံကြမ္မာ ကျောက်စိမ်းခန္ဓာ’ မှာ အလွန်ပင် အစွမ်းထက်လှသည်။ ၎င်းသည် ‘ကံကြမ္မာဘူးသီး’ ၏ ဟင်းလင်းပြင် စွမ်းအားများနှင့်သာမက ဖန်ဟွမ်အသက်ဝိညာဉ်ဓား၏ အနှိုင်းမဲ့ ဓား စွမ်းအင်များနှင့်ပါ ပေါင်းစပ်ထားသည်။ ယခုအချိန်တွင် ဤစိတ်ဝိညာဉ် ခန္ဓာကိုယ်ကို ‘ဖန်ဆင်းရှင်’ အဆင့်ရှိသူမှလွဲ၍ ဖျက်ဆီးရန် ခက်ခဲပေလိမ့်မည်။

ဟုန်ယွိသည် ‘အလင်းနှင့် အမှောင် မဟာအတားအဆီး’ ကို အသုံးပြု၍ ချိပ်ပိတ်ရန် မဝံ့ရဲ ပေ။ အကြောင်းမှာ ဖန်ဟွမ်အသက်ဝိညာဉ်ဓား၏ ထက်ရှမှုက သူ၏ စိတ်ဝိညာဉ် အတွေးစ များကိုပါ ဖြတ်တောက်နိုင်သောကြောင့်ပင်။ ထိုသို့ ဖြတ်တောက်ခံရပါက ‘အတိတ်ကျမ်း’ ဖြင့်ပင် ပြန်လည် ကုသနိုင်မည် မဟုတ်ပေ။

ချန်ပီယံမြို့စားက သူ့နောက်သို့ လိုက်လံတိုက်ခိုက်လာစဉ် ဟုန်ယွိ၏ မျက်လုံးများမှာ ကျဉ်းမြောင်းသွားသည်။ ဝှူး... ဝှူး... ဝှူး... သူသည် လှံဖြင့် သုံးကြိမ်ဆက်တိုက် ထိုးနှက် လိုက်သည်။ သူ့စွမ်းအားအားလုံးကို စုစည်းကာ ‘သေမင်းအလင်း နတ်ဘုရားလှံ’ ၏ ‘ကြယ်တာရာချေမှုန်း’ တိုက်ကွက်ဖြင့် တိုက်ခိုက်လိုက်ခြင်း ဖြစ်သည်။

လှပခမ်းနားသော လှံအလင်းတန်းများ ထွက်ပေါ်မလာဘဲ နက်မှောင်သော လိုင်းကြောင်း တစ်ကြောင်းသာ ပေါ်လာသည်။ ၎င်းမှာ ဟုန်ယွိက လှံ၏စွမ်းအားကို အစွမ်းကုန် ဖိသိပ်ထားခြင်းကြောင့် ဖြစ်သည်။ ချန်ပီယံမြို့စား၏ ‘ကံကြမ္မာ ကျောက်စိမ်းခန္ဓာ’ ကို ရင်ဆိုင်ရာတွင် စွမ်းအားများကို တစ်နေရာတည်းတွင် စုစည်း၍ အချက်အချာကျသော နေရာကို တိုက်ခိုက်မှသာ အောင်မြင်ပေလိမ့်မည်။ အခြားသော ပြန့်ကျဲသည့် တိုက်ခိုက်မှု များမှာ စွမ်းအားများ ပြန့်ကြဲနေသဖြင့် အကျိုးရှိမည် မဟုတ်ပေ။

“မင်းက မင်းရဲ့ စွမ်းအားတွေကို စုစည်းပြီး ငါ့ဓားသိုင်းကို ဖျက်ဆီးချင်တာလား။ မင်းရဲ့ သိုင်းတာအို ကျင့်ကြံမူ အခြေခံနဲ့လား။ မင်းရဲ့သိုင်းတာအိုက ငါ့ထက် အများကြီး နိမ့်ကျ နေပါသေးတယ်။”

ချန်ပီယံမြို့စားက လှောင်ပြောင်လိုက်သည်။ သူ၏လက်ထဲမှ ဖန်ဟွမ်အသက်ဝိညာဉ်ဓား ကို ဘယ်ညာ ထိုးယမ်းလိုက်ရာ ဟုန်ယွိ၏ လှံဖျားကို မထင်မှတ်ဘဲ ဟန့်တားနိုင်ခဲ့သည်။

“အလင်းတန်း တစ်သောင်း စုစည်းခြင်း။”

ဟုန်ယွိ၏ ‘ကြယ်တာရာ ချေမှုန်းခြင်း’ သိုင်းကွက်ကို ဟန့်တားပြီးနောက် ချန်ပီယံမြို့စား၏ ခန္ဓာကိုယ်မှာ တုန်ခါသွားပြီး ဖန်ဟွမ်အသက်ဝိညာဉ်ဓားကို အထက်အောက် ပြင်းထန်စွာ ဝှေ့ယမ်းလိုက်သည်။

ဇီ... ဇီ... ဇီ….

မြစ်ပေါင်းတရာ ပင်လယ်သို့ ပြန်လည်စီးဝင်သကဲ့သို့၊ အလင်းတန်း တစ်သောင်းမှာ ပြန်လည် စုစည်းသွားသည်။

ဤသို့ ဝှေ့ယမ်းလိုက်ချိန်တွင် ဖန်ဟွမ်အသက်ဝိညာဉ်ဓား၏ အလင်းတန်းများ အားလုံးမှာ ဓားကိုယ်ထည်အတွင်းသို့ ပြန်လည် စုစည်းသွားသည်။ ဓားတစ်စင်းလုံးမှာ ရိုးရှင်းသော် လည်း ရှေးကျပြီး ကြမ်းကြုတ်သော အငွေ့အသက်များဖြင့် ပြည့်နှက်သွားသည်။ စတုရန်း ပုံစံ နတ်ဘုရားဓားကြီးမှာ အမှန်တကယ်ဆို ကြင်နာမှုနှင့် တရားမျှတမှုများဖြင့် သွန်းထု ထားခြင်း ဖြစ်သော်လည်း ယခုအခါ သတ်ဖြတ်ခြင်းနှင့် သိမ်းပိုက်ခြင်း အငွေ့အသက်များ အဖြစ် ပြောင်းလဲသွားသည်။

ဓားပေါ်တွင် အလင်းတန်းများ မရှိတော့သော်လည်း ဓားဖျားတွင်မူ နီရွှေရောင် အလင်းတန်းတစ်ခုမှာ အဆုံးမရှိ စီးဆင်းနေ၏။ ၎င်းမှာ ဖန်ဟွမ်အသက်ဝိညာဉ်ဓား၏ စွမ်းအားအားလုံးကို ဓားဖျားတွင် စုစည်းထားခြင်း ဖြစ်ပေသည်။

ဤနီရွှေရောင် အလင်းတန်းမှာ ကျယ်ပြန့်ခြင်း မရှိသော်လည်း တစ်ချက်ကြည့်လိုက်ရုံဖြင့် အရာအားလုံးကို ဖျက်ဆီးနိုင်ပြီး စကြဝဠာကိုပါ ခွဲထုတ်နိုင်စွမ်း ရှိပုံရသည်။

အကယ်၍ ဤနီရွှေရောင် အလင်းတန်းသာ သူ၏လှံကို ထိမှန်သွားပါက ‘သေမင်းအလင်း နတ်ဘုရားလှံ’ မှာ ကျိန်းသေပေါက် ကျိုးပျက်သွားမည်ဖြစ်ပြီး ‘ကောင်းကင်အလင်းဦးချို နတ်ဘုရားချပ်ဝတ်’ ပင်လျှင် ပျက်စီးသွားမည်ဖြစ်ကြောင်း ဟုန်ယွိ ချက်ချင်း ခံစားလိုက်ရ သည်။ ဖန်ဟွမ်အသက်ဝိညာဉ်ဓား၏ ထက်ရှမှုဖြင့် ၎င်း၏ စွမ်းအားများကို ဖြန့်ထုတ်လိုက် ပါက မိုင်ပေါင်းများစွာ ကျယ်ပြန့်သော ဓားစွမ်းအင်ကို ဖန်တီးနိုင်သည်။ သို့သော် ထိုသို့ ဖြန့်ထုတ်ထားပါက နတ်ဘုရားလှံနှင့် နတ်ဘုရားချပ်ဝတ်ကို လှုပ်ခါစေနိုင်မည် မဟုတ်ပေ။

သို့သော် ယခုအခါ စွမ်းအားအားလုံးကို တနေရာတည်းတွင် စုစည်းထားသဖြင့် ၎င်း၏ အစွမ်းမှာ မိုးကြိုးကပ်ဘေး ခုနစ်ကြိမ် ကျော်ဖြတ်ထားသော ‘ဖန်ဆင်းရှင်’ အဆင့် ပညာရှင် တစ်ဦး၏ စိတ်ဝိညာဉ်ကိုပင် သတ်ဖြတ်နိုင်စွမ်း ရှိနေပြီ။

‘ကောင်းကင်အလင်းဦးချို နတ်ဘုရားချပ်ဝတ်’ကို မဆိုထားနှင့် ‘ကောင်းကင်နဂါးဘုရင် နတ်ဘုရားချပ်ဝတ်’ ပင်လျှင် ထိမှန်ခံရပါက ပြန်လည် ပြုပြင်၍မရနိုင်သော ပျက်စီးမှုများ ကို ကြုံတွေ့ရပေလိမ့်မည်။

ဤဓားအလင်းကို ရင်ဆိုင်ရာတွင် ဟုန်ယွိသည် ‘သေမင်းအလင်း နတ်ဘုရားလှံ’ကို ထိခိုက်မိခြင်းမရှိအောင် ဂရုစိုက်ရမည် ဖြစ်သည်။

...

ဓားအလင်းမှာ တနေရာတည်းတွင် စုစည်းနေပြီး ချန်ပီယံမြို့စား၏ တိုက်ကွက်များမှာ ပို၍ ထက်မြက်လာသည်။ နောက်ထပ် တိုက်ကွက်အနည်းငယ်မှာ ဖန်ဆင်းခြင်းတာအို၏ နက်ရှိုင်းလှသော ဓားသိုင်းများပင် ဖြစ်သည်။

ဟုန်ယွိသည် ဟင်းလင်းပြင်ရှိ ဥက္ကာခဲများကြားသို့ တိုးဝင်ကာ ရှောင်တိမ်းနေရပြီး ချန်ပီယံ မြို့စားနှင့် ထိပ်တိုက် မရင်ဆိုင်ရဲပေ။

ဤတစ်ကြိမ်တွင် ချန်ပီယံမြို့စား၏ နတ်ဘုရားစွမ်းအားများမှာ များစွာ တိုးတက်လာခဲ့ သည်။ သူက အေးစက်စွာ ရယ်မောလိုက်ပြီး ဟင်းလင်းပြင်ကို ဆွဲဖြဲကာ ဟုန်ယွိကို အကြိမ်ကြိမ် တိုက်ခိုက်ရန် ကြိုးစားသည်။ သို့သော် ဟုန်ယွိ၏ ခန္ဓာကိုယ်မှာ လျင်မြန်လှပြီး သူ၏ လူသားအင်မော်တယ် သိုင်းပညာ၏ ‘အလိုလိုအာရုံခံစားမူ’ ကြောင့် အရေးကြီးသော အချိန်တိုင်းတွင် ရှောင်တိမ်းနိုင်ခဲ့သဖြင့် ဖန်ဟွမ်အသက်ဝိညာဉ်ဓား၏ ဓားစွမ်းအင်မှာ သူ့ကို မထိမှန်နိုင်ခဲ့ပေ။ ဤသည်မှာ သူ၏ချပ်ဝတ်ကို မပျက်စီးစေရန် ကာကွယ်ခြင်း ဖြစ်သည်။

သို့သော် ချန်ပီယံမြို့စား၏ ‘ကံကြမ္မာ ကျောက်စိမ်းခန္ဓာ’ မှာ အဆုံးမရှိသော စွမ်းအားများ ရှိနေပုံရသည်။ သူသည် ရေကူးနေသည့် ငါးတစ်ကောင်ကဲ့သို့ ဟင်းလင်းပြင်ကို အားစိုက် ထုတ်စရာ မလိုဘဲ ဆွဲဖြဲသွားလာနိုင်သည်။

ဤသို့ဖြင့် လိုက်တမ်းပြေးတမ်း ကစားနေကြရင်း ပါရမီရှင် လူငယ်နှစ်ဦးမှာ သူတို့ မည်သည့်နေရာသို့ ရောက်နေသည် သို့မဟုတ် မည်မျှဝေးသွားပြီဖြစ်သည်ကိုပင် မသိတော့ ပေ။

သို့သော် သူတို့နှစ်ဦးစလုံးမှာ ၎င်းကို ဂရုမစိုက်ကြပေ။ ချန်ပီယံမြို့စားသည် စိတ်ပိုင်းဖြတ် ထားပြီး ဖြစ်သည်။ ကောင်းကင်ဘုံ ကိုးထပ်သို့ တက်ရသည်ဖြစ်စေ၊ ငရဲပြည်အထိ ဆင်းရ သည်ဖြစ်စေ ဟုန်ယွိကို သူ သတ်ကို သတ်ရမည်။

ဤအခိုက်အတန့်တွင် သူသည် အသာစီးရနေပြီဟု ခံစားလိုက်ရပြီး သူ၏စိတ်နှလုံးမှာ ပျော်ရွှင်မှုများဖြင့် ပြည့်နှက်လာသည်။ ဟုန်ယွိနှင့် ရင်ဆိုင်ရချိန်တိုင်းတွင် ရှုံးနိမ့်မှုများကို သာ ကြုံခဲ့ရသော်လည်း ယခုမူ သူ၏ စိတ်ဝိညာဉ်မှာ အလွန်ပင် ပေါ့ပါးလွတ်လပ်နေသည်။

သူ၏ ‘ကံကြမ္မာ ကျောက်စိမ်းခန္ဓာ’ အတွင်းရှိ စိတ်ဝိညာဉ် အတွေးစတိုင်းမှာ အလွန်ပင် ချောမွေ့နေသည်။ ဤသည်မှာ သူ၏ အတွေးများ ချောမွေ့သွားခြင်းနှင့် သူ၏ ကမ္မ ကုသိုလ်စွမ်းအားများ ပိုမို ခိုင်မာလာခြင်း၏ ရလဒ် ဖြစ်သည်။

သူ၏အတွေးများမှာ ပိုမိုချောမွေ့လာသည်နှင့်အမျှ သူသည် ကာလရှည်ကြာစွာ ပိတ်ဆို့နေ ခဲ့သော သူ၏ သိုင်းဆန္ဒမှာလည်း ချိုးဖြတ်နိုင်တော့မည့် လက္ခဏာများကို ပြသလာသည်။ သူသည် အထွတ်အထိပ် သိုင်းသူတော်စင်အဆင့်မှ ‘လူသားအင်မော်တယ်’ နယ်ပယ်သို့ ခွဲခြားထားသော ပါးလွှာသော အလွှာလေးကို ထိတွေ့လိုက်ရသည်။

ချန်ပီယံမြို့စားသည် သူ၏ သိုင်းပညာ အတွေ့အကြုံမှာ လူသားအင်မော်တယ် နယ်ပယ်၏ ကနဦးအဆင့်သို့ ရောက်ရှိသွားပြီဖြစ်ကြောင်း ဝိုးတဝါး ခံစားလိုက်ရသည်။ သူ၏ စိတ်ဝိညာဉ်အတွင်း၌ ပြင်းပြင်းထန်ထန် ပေါက်ကွဲထွက်မည့် လက္ခဏာများ ပြသနေသည်။

ဤလက္ခဏာမှာ ပိုးဖလံကောင်လေးတစ်ကောင်သည် ၎င်း၏ ပိုးအိမ်မျှင်ထဲမှ ရုန်းထွက်၍ လိပ်ပြာအဖြစ် ပြောင်းလဲသွားသည့် အခိုက်အတန့်နှင့် တူနေသည်။

“မျှော်လင့်ထားတဲ့အတိုင်းပဲ၊ ဟုန်ယွိကို လိုက်လံသတ်ဖြတ်တာက ငါ့သိုင်းတာအို အတွေ့ အကြုံကို မြှင့်တင်ပြီး လူသားအင်မော်တယ်နယ်ပယ်ကို ဝင်ရောက်နိုင်ဖို့ အကောင်းဆုံး နည်းလမ်းပဲ။ ဟုန်ယွိနောက်ကို ခဏလေး ထပ်လိုက်ရုံနဲ့ ငါ လူသားအင်မော်တယ် နယ်ပယ် ထဲ ဝင်နိုင်တော့မယ်။ အဲဒီအချိန်ကျရင် ဖန်ဟွမ်အသက်ဝိညာဉ်ဓားကို ကိုင်ဆောင်ရတာ ပိုတောင် လွယ်သွားဦးမယ်။ အခု ငါ့ရဲ့ ခန္ဓာကိုယ်ဟာ ‘အတွေးမဲ့ တည်ငြိမ်ခြင်း’ အဆင့်မှာ ရှိနေပြီး ‘ကောင်းကင်အနှစ်သာရ နတ်ဘုရားဆေးလုံး’ရဲ့ ဆေးရေတွေထဲမှာ စိမ်နေတာဆို တော့ ခန္ဓာကိုယ်ကို ပြန်လည် တည်ဆောက်ပြီး လိုအပ်တဲ့ သွေးနဲ့ အသက်စွမ်းအားတွေကို ဖြည့်တင်းပေးနေပြီ။ မကြာခင်မှာ ငါ လူသားအင်မော်တယ်တစ်ဦး ဖြစ်လာတော့မယ်။ အခု ငါ့မှာ လူသားအင်မော်တယ် ဖြစ်လာဖို့ သိုင်းတာအို အတွေ့အကြုံတွေ ရှိနေပြီဆိုတော့ ငါ စစ်မှန်တဲ့ လူသားအင်မော်တယ်တစ်ဦး ဖြစ်လာတော့မယ်။ လေဟာနယ် ဆွဲဖြဲဖို့တောင် ဖြစ်နိုင်ပြီ။ စိတ်ဝိညာဉ်နဲ့ ခန္ဓာကိုယ် ခွဲခွာထားတာကြောင့် ငါ့ရဲ့ သွေးအသားခန္ဓာကိုယ်ဟာ အားနည်းသွားပေမဲ့၊ အလွန်လျင်မြန်စွာ ပြန်ကောင်းလာလိမ့်မယ်။ ဟုန်ယွိကို သတ်ပြီး ပြန်သွားတဲ့အခါ အများဆုံး သုံးရက်ကနေ ငါးရက်အတွင်းမှာ ငါ့ရဲ့ ခန္ဓာကိုယ်ဟာ လုံးဝ ပြန်လည် ကောင်းမွန်သွားပြီး အဆင့်တစ်ခု ထပ်တက်သွားလိမ့်မယ်။ ဒီတစ်ကြိမ် ‘မုန့်ရှန်းကျီ’ နဲ့ မူလဝိညာဉ်နတ်ဘုရားတို့ ယာယီ ပူးပေါင်းနေကြချိန်မှာ ငါကတော့ အကြီးမားဆုံး အခွင့်အရေးကို ရလိုက်တာပဲ။”

ချန်ပီယံမြို့စားသည် သူ၏ စိတ်ဝိညာဉ်မှာ မကြာမီ လူသားအင်မော်တယ် အဆင့်သို့ ရောက်ရှိတော့မည်ဖြစ်ကြောင်း သိလိုက်သည်။

...

ဝှူး….။

ချန်ပီယံမြို့စား၏ စိတ်ဝိညာဉ်မှာ ပိုးအိမ်ထဲမှ လိပ်ပြာအဖြစ် ပြောင်းလဲတော့မည့် အခိုက် အတန့်မှာပင် ထွက်ပြေးနေသော ဟုန်ယွိသည် ရုတ်တရက် သိမ်မွေ့သော အခွင့်အရေး တစ်ခုကို ဖမ်းဆုပ်ကာ ပြန်လည် တိုက်စစ်ဆင်လိုက်သည်။ သူသည် ချက်ချင်းပင် နောက်လှည့်ကာ ချန်ပီယံမြို့စား၏ မျက်နှာကို လှံဖြင့် ထိုးလိုက်သည်။

ထန်း…၊ ထန်း…၊ ထန်း….။

ချန်ပီယံမြို့စားသည် သူ၏ အတွေးကမ္ဘာအတွင်းမှ ရုတ်တရက် နိုးထလာခဲ့ပြီး သူ၏ မျက်နှာတွင် နေမထိထိုင်မသာ ဖြစ်သွားသော အမူအရာ ပေါ်လာသည်။ အမှန်စင်စစ် သူ၏ ဉာဏ်အလင်းပွင့်မှုကို အနှောင့်အယှက် ခံလိုက်ရခြင်းမှာ၊ အထူးသဖြင့် လူသား အင်မော်တယ် အဆင့်သို့ တက်လှမ်းနိုင်မည့် အမြင့်ဆုံး ဉာဏ်အလင်းပွင့်မှုကို အနှောင့် အယှက် ခံလိုက်ရခြင်းမှာ ဝမ်းချုပ်နေရသည်ထက်ပင် ပို၍ နေရခက်လှသည်။ သူ၏ အတွေးစတိုင်းမှာ တစ်နေရာရာတွင် ပိတ်မိနေပြီး အပေါ်ကိုလည်း တက်မရ၊ အောက်ကို လည်း ဆင်းမရ ဖြစ်နေရာ ခံရခက်လှပေသည်။

ဤသို့ နေရခက်နေသည့် အခိုက်အတန့်တွင် ချန်ပီယံမြို့စားသည် ဖန်ဟွမ်အသက်ဝိညာဉ် ဓားကို အပြင်းထန် ဝှေ့ယမ်းကာ ခက်ထန်သော မျက်နှာထားဖြင့် ‘ဝိညာဉ်တုန်ခါ’ တိုက်ကွက်ကို ထုတ်ဖော်ပြီး ‘သေမင်းအလင်း နတ်ဘုရားလှံ’ကို ထိပ်တိုက် ရင်ဆိုင်လိုက် သည်။

ဖတ်….

‘သေမင်းအလင်း နတ်ဘုရားလှံ’ မှာ ဖန်ဟွမ်အသက်ဝိညာဉ်ဓား၏ ထိပ်ဖျားရှိ ထိုအလင်းစက်ကြောင့် အမှန်တကယ်ပင် နက်ရှိုင်းစွာ အက်ကွဲသွားတော့သည်။

ဟုန်ယွိသည် သူ၏နတ်ဘုရားလှံ ပျက်ဆီးသွားသော်လည်း သူ့အမူအရာက စိုးစဉ်းမျှ ပြောင်းလဲခြင်း မရှိပေ။ သူသည် လက်ထဲမှ လှံကို တစ်ချက် ဝှေ့ယမ်းလိုက်ပြီး စစ်နတ်ဘုရား၏ ‘သတ်ဖြတ်ခြင်းဗျူဟာခုနစ်သွယ်’ ကို တပြိုင်နက်နည်း အသုံးပြုလိုက် သည်။ ချက်ချင်းပင် လှံမှာ နဂါးတစ်ကောင်ကဲ့သို့ လှုပ်ရှားသွားပြီး မြွေတစ်ကောင်ကဲ့သို့ ကွေ့ကောက်ကာ ဖန်ဟွမ်အသက်ဝိညာဉ်ဓား၏ ဓားအလင်းများကို ပြင်းထန်စွာ တိုက်ခိုက် တော့သည်။

“သေမင်းအလင်း နတ်ဘုရားလှံ” “ဖန်ဟွမ်အသက်ဝိညာဉ်ဓား”

နတ်ဘုရားလက်နက် နှစ်ခုမှာ မျက်စိတ်တမှိတ်အတွင်း အပြည့်အဝ ထိပ်တိုက် တွေ့ဆုံမိ ကြသည်။ ဓားဖျားနှင့် လှံဖျားတို့မှာ မျက်စိတစ်မှိတ်အတွင်း အကြိမ်ပေါင်း ထောင်ချီ၍ ထိတွေ့မိကြသည်။ ထိုသို့ထိတွေ့ရာ အမှတ်သားသည် သေးငယ်သော်လည်း အလွန်ကြီး မား ပြင်းထန်သော စွမ်းအားများ စုစည်းနေသဖြင့် ‘အလင်းနှင့် အမှောင် မဟာအစီအရင်’ ကျုံ့သွားချိန်ကကဲ့သို့ သေးငယ်သော အစက်အပြောက်လေးတစ်ခု ဖြစ်ပေါ်လာခဲ့သည်။

စစ်နတ်ဘုရား၏ ‘သတ်ဖြတ်ခြင်းဗျူဟာ ခုနစ်သွယ်’ ကို အသုံးပြုပြီးနောက် ... ဟိုင်း… လှံ၏ကိုယ်ထည်အတွင်းမှ ပြင်းထန်သော ဟစ်ကြွေးသံတစ်ခု ထွက်ပေါ်လာပြီး စစ်နတ်ဘုရား၏ သူရဲကောင်း ဝိညာဉ်မှာ ဝိုးတဝါး ပေါ်ထွက်လာသည်။ သို့သော် ၎င်းသည် ဖန်ဟွမ်အသက်ဝိညာဉ်ဓားပေါ်ရှိ အလင်းစက်နှင့် ထိတွေ့မိသွားသည်။ ထို့နောက် စစ်နတ်ဘုရား၏ မျက်နှာမှာ ထိတ်လန့်သွားသော အမူအရာ ပေါ်လာပြီး အပိုင်းပိုင်း ပြတ်ထွက်သွားတော့သည်။

ဓားတစ်ချက်တည်းဖြင့် လှံ၏ ဝိညာဉ်ကို ဖျက်ဆီးပစ်လိုက်ပြီ ဖြစ်သည်။ စစ်နတ်ဘုရား၏ သူရဲကောင်း ဝိညာဉ်မှာ ပျက်စီးသွားပြီ။

ဂျွတ်…

ဓားနှင့် လှံမှာ ခဏတာ ကွဲကွာသွားသည်။

ဖန်ဟွမ်အသက်ဝိညာဉ်ဓားမှာ မူလအတိုင်း ရှိနေသော်လည်း ‘သေမင်းအလင်း နတ်ဘုရား လှံ’ ၏ ထိပ်ဖျားမှာမူ ရုတ်တရက် ဖုန်မှုန့်များအဖြစ် ပေါက်ကွဲသွားသည်။ ထိုသေးငယ်သော ဖုန်မှုန့်များမှာ လုံးဝ ပြန့်ကျဲသွားပြီး မဟာစကြာဝဠာကြီးအတွင်းမှ ပျောက်ကွယ်သွားတော့ သည်။

လှံတစ်စင်းလုံးမှာ ပြောင်ချောနေသော တုတ်တစ်ချောင်းအဖြစ် ပြောင်းလဲသွားသည်။ ၎င်းအပေါ်ရှိ အလင်းတန်းများလည်း မှိန်ဖျော့သွားပြီး ၎င်း၏ စိတ်ဝိညာဉ်နှင့် ထူးခြားချက် များ အားလုံးကို လုံးဝ ဆုံးရှုံးသွားခဲ့သည်။

နတ်ဘုရားလက်နက် နှစ်ခု၏ တိုက်ပွဲမှာ ‘သေမင်းအလင်း နတ်ဘုရားလှံ’ ၏ အရှုံးဖြင့် အဆုံးသတ်သွားခဲ့သည်။

... ...

“မင်း… သေပေတော့” ချန်ပီယံမြို့စားသည် ဓားကိုမြှောက်ကာ ရှေ့သို့ ခုန်ဝင်လိုက်သည်။ သူ၏ ဓားစွမ်းအားအတွင်းမှ အေးစက်စက်အသံ ထွက်ပေါ်လာသည်။

“မင်းရဲ့ ဉာဏ်အလင်းပွင့်တဲ့ အခိုက်အတန့်ကို ငါ အနှောင့်အယှက် ပေးလိုက်မိလို့ မင်း စိတ်ပျက်နေတာလား”။

လက်တစ်ချက် လှုပ်ရှားမူနှင့်အတူ ဟုန်ယွိသည် လက်ကျန်လှံတံကို ကောင်းကင်ယံထက် သို့ ပစ်တင်လိုက်သည်။ ထူးဆန်းသော လှုပ်ရှားမှုတစ်ခုကို လုပ်ဆောင်လိုက်ပြီးနောက် ချန်ပီယံမြို့စားက ထိုလှံကို အာရုံစိုက်နေချိန်မှာပင် ဟုန်ယွိ၏လက်ထဲတွင် ‘ဆေးမီးလျှံ နတ်ဘုရားဓား’ တစ်လက် ရုတ်တရက် ပေါ်လာသည်။ ဓားအလင်းမှာ တနေရာတည်းတွင် ပြင်းထန်စွာ စုစည်းသွားသည်။ ‘လေဓား’ တစ်လက်သည် ဖန်ဟွမ်အသက်ဝိညာဉ်ဓား၏ အတားအဆီးကို ဖောက်ထွက်သွားပြီး ချန်ပီယံမြို့စား၏ ရင်ဘတ်ဆီသို့ ထိုးစိုက်လိုက် တော့သည်။

“ငါ မင်းကို ပြောဖို့ မေ့သွားတယ်။ ငါ့ရဲ့သိုင်းတာအိုဟာ လူသားအင်မော်တယ် အဆင့်ကို ရောက်နေပြီဆိုတာပဲ။”

ချန်ပီယံမြို့စားက ထိတ်လန့်တုန်လှုပ်စွာ ကြည့်နေစဉ်မှာပင် ဟုန်ယွိ၏ ဓားစွမ်းအင် အတွင်း၌ လွှမ်းမိုးချုပ်ကိုင်နိုင်သော သိုင်းဆန္ဒများ ပါဝင်နေပြီး ပြင်းထန်စွာ ရိုက်ခတ်သွား သည်။

ချန်ပီယံမြို့စားမှာ လူသားအင်မော်တယ် အဆင့်သို့ မရောက်သေးသဖြင့် လူသား အင်မော်တယ် တစ်ဦး၏ သိုင်းတာအိုက မည်သို့ရှိသည်ကို သဘာဝအတိုင်း မသိရှိနိုင်ပေ။ ဟုန်ယွိသည် သူ၏ အစစ်အမှန် စွမ်းအားကို ဝှက်ထားခဲ့ပြီး ချန်ပီယံမြို့စားကို သူ့နောက်သို့ လိုက်လာစေကာ အသာစီးရနေသည်ဟု ထင်စေခဲ့သည်။ ချန်ပီယံမြို့စား စိတ်လက်ပေါ့ပါး နေချိန်တွင် သူသည် ရုတ်တရက် တိုက်ခိုက်လိုက်ခြင်း ဖြစ်သည်။ သူသည် အခွင့်အရေးကို အပိုင် ဖမ်းဆုပ်နိုင်ခဲ့သည်။

ဤအစီအစဉ် တစ်ခုလုံး၊ သူ၏ စိတ်အာရုံကို ထိန်းချုပ်နိုင်မှု၊ မိမိကိုယ်ကို ထိန်းချုပ်မှုနှင့် ရန်သူကို ထိန်းချုပ်မှုတို့မှာ အမှားအယွင်းမရှိ ပြည့်စုံလှပြီး သဘာဝအတိုင်း ဖြစ်ပေါ်နေခြင်း ဖြစ်သည်။

၎င်းသည် ချက်ချင်းပင် အကျိုးသက်ရောက်သွားပြီး ဖန်ဟွမ်အသက်ဝိညာဉ်ဓား၏ အကာကွယ်ကို ဖောက်ထွက်ကာ ‘ကံကြမ္မာ ကျောက်စိမ်းခန္ဓာ’ ဆီသို့ ထိုးစိုက်လိုက်သည်။

‘ကံကြမ္မာ ကျောက်စိမ်းခန္ဓာ’ သာ ထိုးစိုက်ခံရပြီး ပျက်စီးသွားပါက ချန်ပီယံမြို့စား၏ စိတ်ဝိညာဉ် အတွေးစတိုင်းကို ဖျက်ဆီးရန် နည်းလမ်းပေါင်း သောင်းခြောက်ထောင်မက ဟုန်ယွိတွင် ရှိနေသည်။

ဖန်ဟွမ်အသက်ဝိညာဉ်ဓား၏ ကိုယ်ပိုင်အသိစိတ်မှာ ဖျက်ဆီးခံထားရပြီး ဖြစ်ရာ ၎င်းတွင် အလိုအလျောက် သခင်ကို ကာကွယ်ပေးမည့် စိတ်ဝိညာဉ် မရှိတော့ပေ။ ၎င်းသည် စွမ်းအားအပြည့် ထုတ်လွှတ်နိုင်သော်လည်း ကာကွယ်ရေးစည်း ဖောက်ဖျက်ခံရပြီး နောက်တွင်မူ ၎င်း၏ အားနည်းချက်မှာ ပေါ်လွင်သွားခဲ့သည်။

ဓားဖျား…..က

ချန်ပီယံမြို့စား၏ ‘ကံကြမ္မာ ကျောက်စိမ်းခန္ဓာ’ ရင်ဘတ်ကို ထိမှန်သွားခဲ့သည်။ စွမ်းအား များ စုစည်းထားသော ဖန်ဟွမ်အသက်ဝိညာဉ်ဓားပင်လျှင် ၎င်းကို တားဆီးနိုင်ခြင်း မရှိခဲ့ ပေ။

အခန်း (၄၅၄)။

ဟုန်ယွိ၏ တိုက်ကွက်မှာ သာမန်ကိုယ်ခံပညာ တစ်ရပ် မဟုတ်ပေ။ ၎င်းမှာ သူကိုယ်တိုင် ဆင်ခြင်တွေးတော နားလည်ထားသည့် ‘ကောင်းကင်၊ မြေကြီး၊ လေ၊ မိုးကြိုး’ ဟူသည့် ဓားလေးလက်အနက် ‘လေ’ ဓားသိုင်းပင် ဖြစ်သည်။

‘ရွှန့်’ဆိုသည်မှာ ချောမွေ့ခြင်းနှင့် အတားအဆီးမရှိခြင်းကို ဆိုလိုသည်။ ၎င်းသည် လေ၏ သဘောသဘာဝကို အပြည့်အဝ ကိုယ်စားပြုသည်။

“လေရွှန့်ဓား ... လူကြီးလူကောင်းတစ်ဦးသည် မိမိ၏ဆန္ဒအတိုင်း ဆောင်ရွက်၏။”

သမိုင်းရေစီးကြောင်း၊ လူသားမျိုးနွယ်၏ ဖြစ်တည်မူ အရှိန်အဟုန်ကဲ့သို့ တားဆီး၍ မရနိုင် သည့် ကျယ်ပြောလှသော အငွေ့အသက်တစ်ခုက ဟုန်ယွိ၏ ဓားအတွင်း၌ အပြည့်အဝ ပေါ်လွင်ထင်ဟပ်နေတော့သည်။"

လေတာအိုသည် လိုက်လျောညီထွေရှိခြင်း ဖြစ်ပြီး လူသားမျိုးနွယ်၏ လည်ပတ်နေသော တာအိုလည်း ဖြစ်သည်။

လူကြီးလူကောင်းတစ်ဦးသည် လေ၏သဘောကို လေ့လာကြည့်ရှုသည့်အခါ မေတ္တာနှင့် တရားမျှတမှုကို ကြေညာကာ နိုင်ငံအုပ်ချုပ်ရေးကို မြှင့်တင်နိုင်လိမ့်မည်။ ထိုမှတဆင့် လူသားမျိုးနွယ်၏ မြင့်မြတ်သော ကိုယ်ကျင့်သီလများကို သမိုင်းနှင့်အတူ ရှေ့သို့ ချီတက် စေလိမ့်မည်။ ဤသည်မှာ ယေဘုယျကျသော လမ်းစဉ်ကြီး ဖြစ်သည်။ ၎င်းသည် စစ်မှန် သော ‘လေ’ ပင် ဖြစ်၏။

အချို့သူများသည် လေကို လေ့လာပြီး ၎င်း၏ မမြင်နိုင်သော သဘောတရားကို နားလည် ကြသည်။ အချို့က လေကိုကြည့်ပြီး ၎င်း၏ ‘လျင်မြန်မှု’ သဘောကို ထိုးထွင်းသိမြင်ကြ သည်။ အချို့က ‘လွင့်မျောမှု’၊ အချို့က ‘ပေါ့ပါးမှု’၊ အချို့က ‘အသက်စွမ်းအား စီးဆင်းမှု’ စသည်ဖြင့် အသီးသီး နားလည်ကြသည်။

သို့သော် ဤအရာများမှာ လေ၏ စစ်မှန်သော အဓိပ္ပာယ် မဟုတ်ကြပေ။ ‘ပြောင်းလဲခြင်း ကျမ်း’ ရှိ လေ၏နိယာမအရ လူကြီးလူကောင်းတစ်ဦးသည် သူ၏အမိန့်များကို ထုတ်ပြန် ပြီး၊ လိုက်နာဆောင်ရွက်ကာ လူသားမျိုးနွယ်၏ လမ်းစဉ်ကို ချောမွေ့စွာ စီးဆင်းစေခြင်း သည်သာ စစ်မှန်သော လေ၏နိယာမ၊ စစ်မှန်သော အင်မော်တယ်တို့၏ လမ်းစဉ်ပင် ဖြစ်သည်။

ဤစွမ်းအားမှာ အမြင်ကျဉ်းမြောင်းသော သိုင်းဆန္ဒထက်ပင် သာလွန်သော စွမ်းအားဖြစ် ပြီး၊ အင်မော်တယ်များကိုပါ လွှမ်းခြုံထားသည်။

ဟုန်ယွိ၏ ‘လေရွှန့်ဓား’သည် လူသားမျိုးနွယ်ကို ရှေ့သို့ တွန်းတင်ပေးနေသော လူကြီး လူကောင်းတစ်ဦးနှင့် တူနေပြီး၊ တရှိန်ထိုး လည်ပတ်နေသော ထိုသမိုင်းကြောင်းဘီးကြီး ကို မည်သူမျှ တားဆီး၍ မရနိုင်ပေ။

ထိုကြီးမားလှသော အရှိန်အဝါကြောင့် ချန်ပီယံမြို့စားမှာ လုံးဝ တုန်လှုပ်သွားခဲ့ရသည်။

လူသားအင်မော်တယ် တစ်ဦး၏ သိုင်းပညာသည် ဤအဆင့်သို့ ရောက်ရှိသွားသည့်အခါ ‘ကောင်းကင်အချိန်အခါ’၊ ‘မြေပြင်အားသာချက်’ နှင့် ‘လူသားတို့၏စည်းလုံးမူ’ ဟူသည့် အချက်အားလုံးမှာ ဤဆုံချက်တစ်ခုတည်းတွင် စုစည်းသွားတော့သည်။

...

ဤဓားချက်တွင် ‘ဆေးမီးလျှံ နတ်ဘုရားဓား’ သည် ဖန်ဟွမ်အသက်ဝိညာဉ်ဓားကဲ့သို့ပင် သူ၏ စွမ်းအားအားလုံးကို တနေရာတည်း၌ ဖိသိပ်စုစည်းထားသည်။

ကောင်းကင်နှင့် မြေကြီး၏ အနှစ်သာရ၊ လူသားအင်မော်တယ် သန္ဓေသား၏ အနှစ်သာရနှင့် ဆေးမီးလျှံ၏ တောက်ပသော အလင်းတန်းများ အားလုံးသည် ဓားဖျားတွင် စုစည်းနေပြီး၊ ဓားဖျားတစ်ခုလုံးက လူများ မျက်လုံးကွယ်သွားလောက်အောင် တောက်ပ သော အလင်းတန်းကို ထုတ်လွှတ်နေ၏။

အထွက်အထိပ် သိုင်းသူတော်စင်တစ်ဦးပင်လျှင် ဤဓားဖျားမှ အလင်းကို တည့်တည့် ကြည့်မိပါက မျက်စိကွယ်သွားနိုင်ပေသည်။

တားဆီး၍ မရနိုင်သော အငွေ့အသက်၊ ကျယ်ပြောလှသော အရှိန်အဝါနှင့် ထက်ရှလှသော နတ်ဘုရားဓား၊ ဤအရာအားလုံးသည် တနေရာတည်းတွင် စုစည်းသွားပြီး၊ ဤလောက၌ ၎င်း၏ လမ်းကြောင်းကို ပိတ်ဆို့တားဆီးနိုင်မည့်အရာ ဘာရှိဦးမည်နည်း။

ထို့ကြောင့် ဟုန်ယွိသည် အခွင့်အရေးကို ဖမ်းဆုပ်ကာ သူ၏ အပြင်းထန်ဆုံးသော တိုက်ကွက်ကို ထုတ်ဖော်ပြီး၊ ချန်ပီယံမြို့စား၏ ‘ကံကြမ္မာ ကျောက်စိမ်းခန္ဓာ’ ကို တစ်ချက် တည်းဖြင့် ချေမှုန်းနိုင်မည်ဟု ယုံကြည်ချက် အပြည့်ရှိနေသည်။

သို့သော် အရာအားလုံးမှာ သူဖြစ်စေချင်သလို ဖြစ်မလာခဲ့ပေ။ အခြေအနေမှာ ရုတ်တရက် ပြောင်းလဲသွားသည်။

‘ဆေးမီးလျှံ နတ်ဘုရားဓား’ သည် ချန်ပီယံမြို့စား၏ ရင်ဘတ်ကို ထိုးစိုက်လိုက်သည့် အခိုက်အတန့်တွင် ထူးဆန်းပြီး ဖရိုဖရဲအရောင်ဝါရှိသော အရာဝတ္ထုတစ်ခုက သူ့ရင်ဘတ်မှ ရုတ်တရက် ထွက်ပေါ်လာသည်။ ၎င်းမှာ မှန်တစ်ချပ်နှင့် တူသော်လည်း မှန်မဟုတ်ပေ။

ဤမှန်မှာ ကြိုတင်သတိပေးချက် မရှိဘဲ ထွက်ပေါ်လာပြီး ‘ဆေးမီးလျှံ နတ်ဘုရားဓား’ ၏ ဓားဖျားကို ပိတ်ဆို့လိုက်သည်။ ထိုနှစ်ခု တိုက်မိသည့်အခါ အလွန်ပြင်းထန်လှသော ဓားအလင်းမှာ ထိုထူးဆန်းသော ‘ရင်ဘတ်ကာမှန်’ အတွင်းသို့ လုံးဝ ဝါးမြိုခြင်း ခံလိုက်ရ သည်။

တစ်ချိန်တည်းမှာပင် ထိုရင်ကာမှန်မှာ အက်ကွဲသံများ ထွက်ပေါ်လာသည်။ ‘ဆေးမီးလျှံ နတ်ဘုရားဓား’ ၏ ဓားစွမ်းအားနှင့် ‘လေရွှန့်ဓား’ ၏ ကြီးမားလှသော အရှိန်အဟုန်ကို မခံနိုင်တော့သည့် ပုံပင်။ သို့သော် ၎င်းအက်ကွဲသွားပြီးနောက် ‘အတိတ်ကျမ်း’ ၏ ဗုဒ္ဓအလင်းနှင့် အဆုံးမဲ့အလင်းများထက်ပင် ပို၍ တောက်ပသော အလင်းတန်းတစ်ခုမှာ ပြင်းထန်စွာ စုစည်းလာခဲ့သည်။

လက်မောင်းခန့် တုတ်သော အလင်းတန်းတစ်ခုမှာ အမြောက်မြည်သံကဲ့သို့သော ဟိန်းသံ ကြီးနှင့်အတူ ချန်ပီယံမြို့စား၏ ရင်ဘတ်မှ ထွက်ပေါ်လာသည်။ ၎င်းသည် ဟုန်ယွိထံသို့ ဦးတည် ပစ်ခတ်လိုက်ခြင်း ဖြစ်သည်။ ဤအလင်းတန်း ပေါ်လာသည့်အခါ ဖန်ဟွမ် အသက် ဝိညာဉ်ဓား၏ တောက်ပမှုပင် မှေးမှိန်သွားရသည်။

၎င်းမှာ ဖျက်ဆီးခြင်း သက်သက်အတွက်သာ မွေးဖွားလာသော အလင်းတန်း ဖြစ်သည်။ အထူးသဖြင့် အမြောက်မြည်သံကြီးမှာ ထိုအလင်းတန်းအတွင်း၌ အရာဝတ္ထုပေါင်း ကုဋေကုဋာ ပေါက်ကွဲနေသကဲ့သို့ပင်။ ၎င်းသံကို ကြားလိုက်ရချိန်တွင် ဟုန်ယွိသည် ရှေးဟောင်းခေတ်က ကောင်းကင်ယံရှိ ကြယ်တာရာများ ပေါက်ကွဲသွားသည့် အသံမျိုးဟု ခံစားလိုက်ရသည်။

ကျယ်ပြောလှသော စကြဝဠာကြီးအတွင်း၌ မရေမတွက်နိုင်သော ကြယ်တာရာများ ရှိနေကြသည်။ နှစ်ပေါင်း ဘီလီယံနှင့်ချီ ကြာမြင့်ပြီးနောက် အချို့သော ကြယ်တာရာများ သည် ၎င်းတို့၏ သက်တမ်းကုန်ဆုံးချိန်တွင် ပြင်းထန်သော အသံကြီးနှင့်အတူ ပေါက်ကွဲ သွားကြသည်။ ဤအသံကို ကြားရသော မည်သည့် ပညာရှင်မဆို စိတ်နှလုံး တုန်လှုပ်သွား ရမည်ဖြစ်ပြီး မိုးကြိုးကပ်ဘေး ခုနစ်ကြိမ် ကျော်ဖြတ်ထားသော ‘ဖန်ဆင်းရှင်’ များပင်လျှင် ကင်းလွတ်မည် မဟုတ်ပေ။

၎င်းမှာ တွန်းလှန်၍မရနိုင်သော ဖျက်ဆီးခြင်း ဖြစ်သည်။

ယခုအခါ ဤအလင်းတန်းတွင် ရှေးဟောင်းကြယ်တာရာများ ပေါက်ကွဲသံ ပါဝင်နေသဖြင့် ၎င်း၏ အစွမ်းမှာ အရာအားလုံးကို ဖောက်ထွင်းနိုင်ကြောင်း သိသာလှသည်။ ဤလောက တွင် ဤကဲ့သို့သော စွမ်းအားမျိုး ရှိသည့် တာအိုကျင့်စဉ်မှာ တစ်ခုတည်းသာ ရှိသည်။ ၎င်းမှာ ‘မူလဝိညာဉ်နတ်ဘုရား၏ 'ဘုံသုံးပါးမူလစွမ်းအင်အမြောက်'ပင် ဖြစ်သည်။

အတိုင်းအဆမဲ့သော မူလဝိညာဉ်စွမ်းအားနှင့် နတ်ဘုရားတန်ခိုး စွမ်းအားများကို အသုံးပြု ၍ သက်တမ်းကုန်ဆုံးသွားသော ရှေးဟောင်းကြယ်တာရာတစ်ခု၏ ပေါက်ကွဲပုံကို ပုံတူ ဖန်တီးထားခြင်း ဖြစ်သည်။ အရာအားလုံးကို ဆွဲဖြဲဖျက်ဆီးနိုင်ပြီး မည်သည့်အရာကမျှ တားဆီးနိုင်ခြင်း မရှိပေ။ အနည်းဆုံးတော့ လက်ရှိ ဟုန်ယွိသည် ၎င်းကို တားဆီးနိုင်စွမ်း မရှိသေးပေ။

... ...

“ဘုံသုံးပါး မူလစွမ်းအင်အမြောက်”

ဟုန်ယွိသည် သူ၏ အလိုလိုအာရုံခံစားမူကြောင့် အန္တရာယ်ကို ကြိုတင်ခံစားလိုက်ရသဖြင့် ဤဖျက်ဆီးခြင်း တိုက်ကွက်ကို ထိပ်တိုက် ရင်မဆိုင်ခဲ့ပေ။ သူသည် ‘ဆေးမီးလျှံ နတ်ဘုရားဓား’ ကို ပြန်ရုပ်သိမ်းကာ အပေါ်သို့ ခုန်တက်လိုက်သည်။

'ဘုံသုံးပါး မူလစွမ်းအင်အမြောက်' ၏ အဖြူရောင်အလင်းတန်းမှာ ဟုန်ယွိ၏ ခန္ဓာကိုယ်မှ သီသီလေး လွဲချော်သွားပြီး အဝေးရှိ ဥက္ကာခဲအုပ်စုကြီးကို ထိမှန်သွားသည်။ ဝုန်း…၊ ဝုန်း..၊ တိုးညင်းသော အမြောက်အသံနှင့်အတူ ထိုအဖြူရောင်အလင်းနှင့် ထိမိသော သို့မဟုတ် အဖြူရောင် အလင်းတန်းအနားသို့ ကပ်မိသော ဥက္ကာခဲများအားလုံးမှာ စိမ်းဖန့်ဖန့် မီးခိုးများ အဖြစ် ပြောင်းလဲသွားပြီး အစအနပင် မကျန်တော့ပေ။ ဤအဖြူရောင်အလင်းမှာ အဝေးဆုံးသို့ ဖောက်ထွက်သွားပြီးမှ ဟုန်ယွိ၏ အမြင်အာရုံအတွင်းမှ ပျောက်ကွယ်သွား သည်။

ဟုန်ယွိ၏ မျက်စိရှေ့တွင် မိုင်ပေါင်း သောင်းချီ၍ ရှည်လျားသော ဟင်းလင်းပြင် လမ်းကြောင်းကြီးတစ်ခု ပွင့်သွားခဲ့သည်။ သူ၏ခန္ဓာကိုယ်ပေါ်ရှိ ‘ကောင်းကင်အလင်းဦးချို နတ်ဘုရားချပ်ဝတ်’ မှာ တုန်ခါသွားသည်။ ရှေးဟောင်းကြယ်တာရာ ပေါက်ကွဲပုံကို အတုယူဖန်တီးထားသော ထိုအသံသည် နတ်ဘုရားချပ်ဝတ်အပေါ် ပြင်းထန်သော ရိုက်ခတ်မှုကို ဖြစ်စေခဲ့ခြင်း ဖြစ်သည်။ ချပ်ဝတ်မှာ ပျက်စီးမသွားသော်လည်း မြင်ရသူအဖို့ ထိတ်လန့်စရာပင်။

အကယ်၍ သူသာ တည့်တည့် ထိမှန်ခဲ့ပါက နတ်ဘုရားချပ်ဝတ်၏ ခိုင်ခံ့မှုပင် ပျက်စီးသွား လိမ့်မည်ဟု ဟုန်ယွိ သံသယဝင်မိသည်။ ဤစွမ်းအားမှာ ကျိန်းသေပေါက် ဖန်ဟွမ် အသက်ဝိညာဉ်ဓားထက်ပင် အားမနည်းပေ။

သို့သော် အမြောက်က လွဲချော်သွားခဲ့ပြီး ဟုန်ယွိက ရှောင်တိမ်းနိုင်ခဲ့သည်။ ထို့ပြင် ဟုန်ယွိ သည် ဤအရာကို ချန်ပီယံမြို့စား ကိုယ်တိုင် ပစ်ခတ်လိုက်ခြင်း မဟုတ်ကြောင်း သိလိုက် သည်။ ၎င်းမှာ တစ်စုံတစ်ဦးက ချန်ပီယံမြို့စား၏ စိတ်ဝိညာဉ်ပေါ်တွင် ထည့်သွင်းပေးထား သော ရတနာ သို့မဟုတ် အင်အားကြီး နတ်ဘုရားတန်ခိုး စွမ်းအားတစ်ခုခု ဖြစ်ရမည်။

“ဒါက 'ဘုံသုံးပါး မူလစွမ်းအင်အမြောက်' ချန်ပီယံမြို့စားကို သတ်ဖို့ အကောင်းဆုံး အခွင့်အရေးကို ဆုံးရှုံးလိုက်ရတာ နှမြောစရာပဲ။ ဒါက တကယ့်ကို ပြဿနာပဲ။ ဒါပေမဲ့ ငါသာ ‘'ဘုံသုံးပါး မူလစွမ်းအင်အမြောက်'ရဲ့ အသံကို လေ့လာနိုင်မယ်ဆိုရင် ‘အလင်းနှင့် အမှောင် မဟာအတားအဆီး’ ဟာ ပိုပြီး ပြည့်စုံလာလိမ့်မယ်။ ငါ အဆင့် ၇ မိုးကြိုးကပ်ဘေး ကို ကျော်ဖြတ်ပြီး ‘ဖန်ဆင်းရှင်’ ဖြစ်လာနိုင်ဖို့အထိ ခြေလှမ်းလှမ်းနိုင်လိမ့်မယ်။ အဲဒီအချိန် ကျရင်တော့...”

'ဘုံသုံးပါး မူလစွမ်းအင်အမြောက်'ထဲမှ ရှေးဟောင်းကြယ်တာရာ ပေါက်ကွဲသံမှာ အလွန် ပင် နက်နဲလှသော တာအိုကျင့်စဉ်၏ အသံဖြစ်သည်။ ဟုန်ယွိသည် ၎င်းကို လေ့လာနိုင်ပါ က ‘အလင်းနှင့် အမှောင် မဟာအတားအဆီး’ ကို ချက်ချင်း ပြည့်စုံသွားစေမည်ဖြစ်ကြောင်း သိလိုက်သည်။ သူသည် စကြဝဠာ၏ ဖန်တီးခြင်းနှင့် ပျက်ဆီးခြင်းဆိုင်ရာ အစစ်မှန် အဓိပ္ပာယ်ကို နားလည်သွားမည်ဖြစ်ပြီး ‘ဖန်ဆင်းရှင်’ ဖြစ်လာပေလိမ့်မည်။

အကယ်၍ သူသာ အဆင့် ၇ မိုးကြိုးကပ်ဘေး ကျော်ဖြတ်နိုင်ခဲ့လျှင် ဟင်းလင်းပြင်မှတဆင့် အရာဝတ္ထုများကို ဖန်ဆင်းနိုင်သည့် စွမ်းအားကို ရရှိပေလိမ့်မည်။ ထိုအခါမှသာ သူသည် လေကိုဆင့်ခေါ်၍ မိုးကိုရွာသွန်းစေနိုင်သည့် အစစ်အမှန် စွမ်းအားရှင် ဖြစ်လာပေလိမ့်မည်။

...

“မထင်မှတ်ထားဘူး။ တကယ်ကို မထင်မှတ်ထားဘူး။ ဟုန်ယွိ... မင်းက တကယ်ကို အစွမ်းထက်တာပဲ။ မင်းကို သတ်ဖို့အတွက် အစာကျွေးထားတဲ့ ဝက်တစ်ကောင်လို့ပဲ ငါ ယူဆထားခဲ့တာ။ ဒါပေမယ့် မထင်မှတ်ဘဲ ပြိုင်ဘက်ကောင်းတစ်ယောက်ကို ငါကိုယ်တိုင် ဖန်တီးမိလိုက်သလိုပဲ။ ငါ့ရင်ဘတ်က ‘ဖရိုဖရဲ ရင်ဘတ်ကာမှန်’ သာ အလုပ်မလုပ်ခဲ့ရင် ငါသေရင်သေ၊ မသေရင်တောင် အပြင်းအထန် ဒဏ်ရာရသွားမှာပဲ။”

ချန်ပီယံမြို့စားသည် လျင်မြန်စွာ နောက်ဆုတ်လိုက်ပြီး ကောင်းကင်ယံရှိ ဟုန်ယွိကို ကြည့်လိုက်သည်။ သူတို့နှစ်ဦးမှာ တစ်ဦးကိုတစ်ဦး သတိထားရင်း ပြန်လည် လူခွဲသွားကြ သည်။ ဟုန်ယွိသည် 'ဘုံသုံးပါး မူလစွမ်းအင်အမြောက်'နှင့် ဖန်ဟွမ်အသက်ဝိညာဉ်ဓားကို သတိထားနေရသည်။

ချန်ပီယံမြို့စားမှာမူ ဟုန်ယွိ၏ ‘လေရွှန့်ဓား’ တိုက်ကွက်ကြောင့် အကြီးအကျယ် တုန်လှုပ် နေသည်။ သူသည် ဤမျှ အရှိန်အဝါကြီးမားသော ဓားသိုင်းမျိုးကို တစ်ခါမျှ မမြင်ဖူးပေ။ သူ၏မျက်နှာမှာ အလွန်ပင် ကြည့်ရဆိုးနေသည်။

“ငါ့ရဲ့ ကျောက်စိမ်းခန္ဓာကို တည်ဆောက်ပြီးတဲ့အခါ မူလဝိညာဉ်နတ်ဘုရားက သူ့ရဲ့ နတ်ဘုရားတန်ခိုး စွမ်းအား တစ်စိပ်တစ်ဒေသကို ‘ဖရိုဖရဲ ရင်ကာမှန်’ အဖြစ် ပြောင်းလဲပြီး ငါ့ရင်ဘတ်ထဲမှာ ဝှက်ပေးထားခဲ့တာ။ အရေးကြီးတဲ့အချိန်ကျရင် ဒါက ငါ့အသက်ကို ကယ်ပေးလိမ့်မယ်လို့ သူပြောခဲ့တယ်။ ငါကတော့ သူပြောတာကို မယုံခဲ့ဘူး၊ ဒီလူက ငါ့ကို ချုပ်နှောင်ထားချင်လို့ တစ်ခုခု လုပ်ထားတာလို့ပဲ ထင်ခဲ့တာ။ ငါနဲ့သူက သွေးသောက် ညီအစ်ကိုတွေ ဆိုပေမဲ့ ငါက သူ့ကို ဘယ်လိုလုပ် ယုံကြည်နိုင်ပါ့မလဲ။ ဒါပေမဲ့ အခုကြည့်ရ တာ ဒီလူက အန္တရာယ်ကို ကြိုမြင်နိုင်တဲ့ နယ်ပယ်ကို တကယ်ပဲ ရောက်နေပြီပဲ။”

ချန်ပီယံမြို့စားသည် မကြာခင်က ဖြစ်ပျက်ခဲ့သည်များကို ပြန်တွေးရင်း စိတ်သက်သာရာ ရသွားသည်။

“မင်းမှာ ‘ဖရိုဖရဲ ရင်ကာမှန်’ ဘယ်နှစ်ချပ် ကျန်သေးလဲ။ ခုနက အဲဒီနတ်ဘုရားစွမ်းအားဟာ ငါ့ရဲ့ထိုးချက်ကြောင့် ပျက်စီးသွားပြီး ‘'ဘုံသုံးပါး မူလစွမ်းအင်အမြောက်' အဖြစ် ပြောင်း သွားတာ။ ချန်ပီယံမြို့စား ... မင်းရဲ့သိုင်းတာအို အဆင့်နဲ့ဆိုရင် မင်း ငါ့ကို မယှဉ်နိုင်ပါဘူး။ မင်းရဲ့ စိတ်ဝိညာဉ်နဲ့ ခန္ဓာကိုယ် တသားတည်း ပေါင်းစပ်သွားရင်တောင် မင်း လူသား အင်မော်တယ် ဖြစ်လာမှာ မဟုတ်ဘူး။ ငါက တာအိုကျင့်စဉ်ကို ကျင့်ကြံရင်း လူသား အင်မော်တယ်လမ်းစဉ်ကို တိုက်ရိုက် နားလည်ထားတာ။ မင်း ငါ့ကို မယှဉ်နိုင်ဘူး။”

ဟုန်ယွိသည် ဓားဖြင့် ရှေ့သို့ ညွှန်လိုက်စဉ် ခန့်ညားထည်ဝါသော အသံတစ်ခု ထွက်ပေါ်လာ သည်။ ထိုအသံနှင့်အတူ သူ၏ဓားမှာလည်း လှုပ်ရှားသွားသည်။ ဤဓားမှာ ‘လေရွှန့်ဓား’ မဟုတ်ဘဲ ‘မိုးကြိုးဓား’ ဖြစ်သည်။

ဤဓားကို အသုံးပြုလိုက်သည့်အခါ ၎င်းသည် ကြောက်မက်ဖွယ် ကောင်းလှသလို တဖက်တွင်မူ သိမ်မွေ့မှု၊ စိုးရိမ်မှုနှင့် ဂရုတစိုက်ရှိမှုတို့လည်း ပါဝင်နေပြီး အားနည်းချက်နှင့် ဟာကွက်အားလုံးကို ဖြည့်ဆည်းပေးလိုက်သည်။

“မိုးကြိုးကျန့်ဓား ... လူကြီးလူကောင်းတစ်ဦးသည် ကြောက်ရွံ့မှုနှင့်အတူ မိမိကိုယ်ကိုယ် ပြန်လည်ဆင်ခြင်၍ ကျင့်ကြံ၏။”

ပြင်းထန်ပြီး ကျယ်ပြောလှသော ယန်စွမ်းအားနှင့် ထက်မြက်သော ယင်စွမ်းအားတို့မှာ တစ်ခုနှင့်တစ်ခု ထပ်တူကျသွားပြီး ကောင်းကင်ယံကြီးကို တုန်ခါသွားစေသည့် ပြင်းထန် သော မြည်ဟိန်းသံကြီး ထွက်ပေါ်လာသည်။

ဤဓားချက် ကျဆင်းလာသည့်အခါ ချန်ပီယံမြို့စားမှာ ရုတ်တရက် ထုံထိုင်းသွားသလို ခံစားလိုက်ရ၏။ သူသည် လက်ထဲမှ ဖန်ဟွမ်အသက်ဝိညာဉ်ဓားကိုပင် မကိုင်နိုင်တော့ပေ။ သူ၏ အငွေ့အသက်မှာ လုံးဝ ဖိနှိပ်ခြင်း ခံလိုက်ရပြီး သူ၏ အတွေးစများမှာ ပြင်းထန်သော သိုင်းဆန္ဒကြောင့် တုန်လှုပ်သွားရသည်။

၎င်းမှာ မိုးကြိုးသံကြောင့် ထိတ်လန့်သွားသော လူတစ်ဦး၏ တုံ့ပြန်မှုမျိုးပင်။

ချန်ပီယံမြို့စားသည် လူကြီးလူကောင်းတစ်ဦး မဟုတ်သဖြင့် “မိုင်တစ်ရာအတွင်း မိုးကြိုး ပစ်သော်လည်း လက်ထဲမှ ဝိုင်ခွက် မဖိတ်စင်စေရ” ဟူသည့် နယ်ပယ်သို့ မရောက်ရှိနိုင်ပေ။

ဤ ‘မိုးကြိုးဓား’ ၏ အရှိန်အဝါမှာ ကောင်းကင်တာအို၏ တိုးတက်မှုနှင့် လူသားတို့၏ ကိုယ့်ကိုယ်ကို ပြန်လည်ဆင်ခြင်မူ သဘောတရားတို့ ပေါင်းစပ်ထားခြင်း ဖြစ်သည်။ ၎င်းသည် မိုးကြိုးကပ်ဘေးထက်ပင် ပို၍ ထက်မြက်လှသည်။ ချန်ပီယံမြို့စားသည် မိုးကြိုး ကပ်ဘေးများကို ကျော်ဖြတ်ခဲ့ဖူးသော်လည်း ဤပြင်းထန်သော တိုက်ကွက်ကြောင့် သူ၏ စိတ်မှာ ခေတ္တမျှ ကမောက်ကမ ဖြစ်သွားခဲ့သည်။

သိုင်းပညာရှင်ကြီးများအတွက်မူ မျက်စိတစ်မှိတ်အတွင်း ဆိုသည်မှာ တိုက်ပွဲ၏ အရှုံးအနိုင် ကို ဆုံးဖြတ်ရန် လုံလောက်သည်။ မဟုတ်သေးပါ၊ မျက်စိတစ်မှိတ် ဆိုသည်မှာပင် အချိန် အလွန်ကြာလွန်းသေး၏။ ၎င်းမှာ လက်တစ်ဖျစ်စာ အချိန်၏ ခြောက်ဆယ်ပုံ တစ်ပုံမျှသာ ရှိသင့်သည်။ ထိုမျှသော အချိန်လေးမှာပင် သတ်ဖြတ်ရန် လုံလောက်သည်။

‘ဆေးမီးလျှံ နတ်ဘုရားဓား’ ကို ပိတ်ဆို့ရန် ကြိုးစားနေသော ဖန်ဟွမ်အသက်ဝိညာဉ်ဓား မှာ တစ်ဝက်ခန့်သာ ဝှေ့ယမ်းနိုင်သေးသည်။ ဟုန်ယွိ၏ ‘မိုးကြိုးဓား’ မှာ ချန်ပီယံမြို့စား၏ ပုခုံးပေါ်သို့ တည့်တည့်မတ်မတ် ကျရောက်သွားတော့သည်။

ဝုန်း….

ချန်ပီယံမြို့စား၏ ခန္ဓာကိုယ်တစ်ခုလုံးမှာ ကြွေထည်ပစ္စည်းတစ်ခုကဲ့သို့ အက်ကွဲကြောင်း များ ပေါ်လာသည်။ ‘ကံကြမ္မာ ကျောက်စိမ်းခန္ဓာ’ မှာ ပျက်စီးမသွားသော်လည်း ဝန်ထုပ် ဝန်ပိုးကို မခံနိုင်တော့သည့် လက္ခဏာများ ပြသလာသည်။ သူသည် အပြင်းအထန် ဒဏ်ရာရသွားခဲ့ပြီ။

ချန်ပီယံမြို့စားသည် ထိုဒဏ်ချက်ကို ထိပ်တိုက် ခံလိုက်ရသဖြင့် မရေမတွက်နိုင်သော အတွေးစများမှာ ကွဲကြေသွားရသည်။ သူသည် နာကျင်စွာ အော်ဟစ်လိုက်ပြီး သူ၏ ခန္ဓာကိုယ်ကို နောက်သို့ လွင့်ထွက်သွားစေကာ ရှောင်တိမ်းလိုက်သည်။

သို့သော် သူသည် အဝေးသို့ ရောက်ရှိသွားပြီး ဟင်းလင်းပြင်ကို ဆွဲဖြဲရန် ပြင်လိုက်ချိန်မှာပင် ...

ကိုးပေကိုးလက်မ မြင့်သော ‘ဗုဒ္ဓဓမ္မခန္ဓာ’ကြီးမှာ သူ၏ ရှေ့တွင် ပိတ်ဆို့လိုက်ပြီး၊ ဧရာမ လက်ဝါးကြီးကို မြှောက်လိုက်ရင်း ‘ဗောဓိတံဆိပ်’၊ ‘မဟာတံဆိပ်’ နှင့် ‘ပါရမီတံဆိပ်’ တို့မှာ အစွမ်းကုန် လည်ပတ်သွားပြီး အောက်သို့ ရိုက်ချလိုက်တော့သည်။

ထိတ်လန့်သွားသော ချန်ပီယံမြို့စားသည် သူ၏ လက်ဝါးကို မြှောက်၍ ခုခံလိုက်သည်။ လက်ဝါးနှစ်ခုမှာ ရိုက်မိသွားကြသည်။

ဖြောင်း... ဖြောင်း

‘ကံကြမ္မာ ကျောက်စိမ်းခန္ဓာ’ တစ်ခုလုံးမှာ ပေါက်ကွဲထွက်သွားပြီး မရေမတွက်နိုင်သော အတွေးစများမှာ အရပ်မျက်နှာအနှံ့သို့ လွင့်စင်သွားတော့သည်။

ဟင်းလင်းပြင်ထဲတွင်မူ ဖန်ဟွမ်အသက်ဝိညာဉ်ဓား တစ်လက်တည်းသာ လွင့်မျောလျက် ကျန်ရစ်ခဲ့တော့သည်။