အခန်း (၂၃၄၃-၂၃၄၄)

အပိုင်း(၂၃၄၃)

အမှန်စင်စစ်... ဥပဒေသ အပေါ် အာဏာများသည် အထွတ်အထိပ် သူတော်စင်များ အတွက် ရည်ရွယ်ထားခြင်း ဖြစ်သည်။ ပဲ့တင်ထပ် ဝိညာဉ် အဆင့် အတွက် ရည်ရွယ်ထားခြင်း ဖြစ်ပေသည်။

သို့သော်လည်း... ကျင့်ကြံခြင်း ခေတ်ကာလ တစ်လျှောက် ကျင့်ကြံခြင်းက တိုးတက်လာခဲ့သည်။ ဝိညာဉ်ဆင်းတု အဆင့် တစ်ဦးက လောကသခင် တစ်ဦးသာ ပိုင်ဆိုင်နိုင်မည့် လောကနယ်မြေကို ပိုင်ဆိုင်လာကြသည်။ ချီပျစ်ခဲခြင်း အဆင့် ကျင့်ကြံသူ တစ်ယောက်က အာကာသနှင့် သက်ဆိုင်သည့် ကျင့်စဉ် နည်းလမ်းများကို အသုံးပြုလာနိုင်ကြသည်။

ကျင့်ကြံခြင်းသည် ပုံမှန် စံနှုန်းများကို များစွာ ကျော်လွန်သွားခဲ့ပြီ ဖြစ်ပေသည်။ ယခုအခါတွင် ပါရမီရှင် တစ်ဦးအဖြစ် သတ်မှတ်ခံရရန်အတွက်၊ ကြယ်တာရာ အုတ်မြစ်တစ်ခု သို့မဟုတ် ထူးခြားသည့် ခန္ဓာကိုယ်တစ်ခုမျှသာ မဟုတ်ဘဲ ဥပဒေသ မျိုးစေ့ သို့မဟုတ် ထူးခြားသော ရည်ရွယ်ချက် တစ်ခုကို ပိုင်ဆိုင်ထားရန် လိုအပ်လာပြီ ဖြစ်လေသည်။

ထိုအခိုက်တွင်ပင် မိုးကုပ်စက်ဝိုင်း သန့်စင်ခြင်း မျှော်စင်၏ တာအို တရားဥပဒေ ထိန်းသိမ်းသူက နှာခေါင်းတစ်ချက် ရှုံ့၍ ပြောလိုက်ရာ သူမ၏ အသံမှာ အမြဲလိုလို ရန်လိုနေဆဲပင် ဖြစ်လေသည်။

"နင် တိုက်ချင်ရင်... ငါတို့ တိုက်မယ်... ဒါပေမယ့် မင်းက ယောက်ျား တစ်ယောက်ဆိုရင်... အထူးသဖြင့် မင်းကိုယ်မင်း တန်ဖိုးရှိတဲ့ အရှင်သခင် တစ်ပါးလို့ သတ်မှတ်ထားရင်... နင် ဘယ်စိန်ခေါ်မှုကိုမှ ထွက်ပြေးမနေသင့်ဘူး... ငါတို့ရဲ့ စိန်ခေါ်မှုကို နင် လက်ခံရဲသလား...”

"..."

ဆွေးနွေးမှုများ မြင့်တက်လာ၏။ လူအုပ်ကြီးသည် မျှော်လင့်ချက်များဖြင့် ပြည့်နှက်နေကြပေသည်။ ဤနယ်ခြားသားသည် သူတို့၏ အဂ္ဂိရတ် တာအို စိန်ခေါ်မှုကို လက်ခံရဲမည်လော ။ ယေဘုယျဆန်သော်လည်း ဤသည်မှာ အစွမ်းကုန် သန့်စင်ခြင်း ဂလက်ဆီ ရှိ အဂ္ဂိရတ်ပညာရှင်များ အားလုံး၏ စိန်ခေါ်ခံရခြင်းနှင့် မည်သို့မျှ မကွာခြားချေ။

ဝေ့ဝူယင်၏ အော်ရာမှာ မသိမသာ တုန်လှုပ်လာ၏။ သူ၏ မျက်နှာအမူအရာမှာ တဖြည်းဖြည်း မှိုင်းညို့လာကာ သူ၏ အကြည့်များထဲတွင် သတ်ဖြတ်လိုသော ရည်ရွယ်ချက်များ လောင်ကျွမ်းလာလေသည်။ ဤအပြောင်းအလဲများကို အာရုံခံနိုင်သူ တစ်ဦးတစ်ယောက်ကမျှ ၎င်းတို့မှာ အကြောင်းပြချက် မရှိဘဲ ဖြစ်ပေါ်လာခြင်းဟု မခံစားရချေ။

ဤအမျိုးသမီးသည် သူ၏ အင်ပါယာ ဥပဒေသ အာဏာ ကို သက်ရောက်မှု ရှိစေရန် ကြိုးစားနေခြင်း ဖြစ်ပေသည်။ သူ၏ အရှိန်အဟုန်ကို ချေမွပစ်နေခြင်းပင်။

ချက်ချင်းပင်... ဝေ့ဝူယင်၏ အင်ပါယာ ဥပဒေသ အော်ရာမှာ သခင်ဖြစ်သူထံမှ အဖြေကို စောင့်ဆိုင်းနေသည့်အလား ပြင်းထန်စွာ ထကြွလာသည်ကို သူတို့ အားလုံး ခံစားလိုက်ရလေသည်။ ထိုမြင်ကွင်းက အချို့သော ထိပ်တန်း ပညာရှင်များကို ပို၍ပင် စိတ်အားထက်သန် သွားစေ၏။

ထိုအခိုက်တွင်ပင် မိုးကုပ်စက်ဝိုင်း သန့်စင်ခြင်း ရှန့်ထို၏ ပညာရှိဆန်သည့် အသံမှာ လှောင်ပြောင်မှုများ ပြည့်နှက်နေသည့် ညင်သာသော လေသံဖြင့် ထွက်ပေါ်လာလေသည်။

"မင်း ကြောက်နေတာလား..."

ဝေ့ဝူယင်၏ ကြယ်တာရာ မျက်လုံးများမှာ မျက်စိကျိန်းမတတ် တောက်ပသော ခုနစ်ရောင်ခြယ် အလင်းတန်းများဖြင့် ပြင်းထန်စွာ လက်ဖြာသွားလေသည်။

"ကျုပ် ကြောက်နေတယ်လို့ ခင်ဗျားတို့ ထင်နေတာလား..."

သူ၏ အသံသည် မိုးခြိမ်းသံတစ်ခုအလား ပြည့်နှက်နေပေသည်။

"ဘာကိုလဲ..."

ဝေ့ဝူယင်သည် မိုးကြိုးမုန်တိုင်း တစ်သန်း၏ စွမ်းအားဖြင့် ဟိန်းဟောက်လိုက်လေသည်။

"ဘယ်သူ့ကိုလဲ..."

ဒေါသတကြီး ဖြစ်နေသော လောကဖိအား များသည် ကယောက်ကယက် ထကြွလာပြီး မိုးကုပ်စက်ဝိုင်း မျှော်စင် ခြောက်ခုစလုံး၏ ကောင်းကင် စွမ်းအား ကို ဖိနှိပ်သွားလေသည်။ ၎င်းကို တားဆီး၍ မရနိုင်ချေ။ အမှောင် ဟင်းလင်းပြင် အတွင်း၌ အပျက်အစီး မန်နာ လေပြင်းများ ဖြစ်ပေါ်လာကာ ကောင်းကင်ခန္ဓာ များ၏ ပတ်လမ်းများကို ပုံပျက်သွားစေရန်နှင့် နေမင်းကြယ် များကို ငြိမ်းသတ်ပစ်ရန် ကြိုးပမ်းလာကြပေသည်။

ဤအထွတ်အထိပ် သူတော်စင်များ သည် ဝေ့ဝူယင်ကို သွေးဆောင်ရန် မည်သည့် ပြဇာတ်ကို ကစားနေသည်ဖြစ်စေ လုံးဝ ပြီးပြည့်စုံစွာ အလုပ်ဖြစ်သွားပြီ ဖြစ်ကြောင်း လူအုပ်ကြီးက ချက်ချင်း သဘောပေါက်သွားကြလေသည်။ သူ ထိုပြဇာတ်ကို စီးမျောမိသွားပြီ ဖြစ်ပေသည်။

ထိုစဉ် ဝေ့ဝူယင်၏ အတွေးများမှာမူ သက်ဝင်လှုပ်ရှားနေပေသည်။

'ဘယ်လောက်တောင် အံ့သြဖို့ကောင်းလဲ... တွင်းထဲကို ခုန်ဆင်းဖို့ အသင့်ဖြစ်နေတဲ့ လူတွေ ရှိနေတဲ့အခါ၊ ငါ ဒီလောက် အများကြီးတောင် စီစဉ်ဖို့ မလိုခဲ့ဘူးလို့ ခံစားရတယ်... ဟားဟား...'

ပြဇာတ် အပိုင်း တစ် သည် နိဂုံးချုပ်လုနီးပါး ဖြစ်နေပြီ ဖြစ်လေသည်။ နောက်ထပ် ခြေလှမ်း တစ်လှမ်းသာ ကျန်ရှိတော့ပေသည်။

...

မောက်မာခြင်း...

လွှမ်းမိုးလိုခြင်း...

ဂုဏ်ယူဝင့်ကြွားလိုခြင်း...

အင်ပါယာ ဥပဒေသ အာဏာကို ကျင့်ကြံသူများသည် အဓိက ကိုယ်ရည်ကိုယ်သွေး အစိတ်အပိုင်းတစ်ခု အဖြစ် ဤဝိသေသလက္ခဏာ သုံးရပ်ကို အမြဲလိုလို ပိုင်ဆိုင်ထားတတ်ကြလေသည်။ ၎င်းတို့မှာ ‘အင်ပါယာ အုပ်စိုးခြင်း’ ဟူသော သဘောတရားကို နားလည်သဘောပေါက်ရန်နှင့် ဤဥပဒေသ၏ ကောင်းချီးကို ရယူရန်အတွက် မရှိမဖြစ် လိုအပ်သော အကြွင်းမဲ့ လိုအပ်ချက်များ နီးပါးပင် ဖြစ်ပေသည်။

အခြားအရာများထက် မိမိကိုယ်ကိုသာ အာရုံစိုက်တတ်သော အေးဆေးသည့် အုပ်စိုးသူများ၊ သို့မဟုတ် မိမိ၏ အုပ်ချုပ်မှုအောက်ရှိ သူများ၏ ကျန်းမာရေး၊ ကြီးပွားတိုးတက်ရေးနှင့် ကျေနပ်ရောင့်ရဲမှုတို့ကို ဦးစားပေးတတ်သော ကရုဏာရှင် အုပ်စိုးသူများ စသဖြင့် ပုံစံအမျိုးမျိုးဖြင့် ထွက်ပေါ်လာနိုင်သော်လည်း၊ သူတို့၏ အုပ်ချုပ်မှု အချိန်မတိုင်မီ နိဂုံးချုပ်သွားခြင်းမျိုး မဖြစ်စေရန် ဤအရည်အသွေးများ ကင်းမဲ့နေ၍ မရနိုင်ချေ။

ထျန်းရှီယာ ၏ နှလုံးသားသည် သူမ၏ ရင်ဘတ်အတွင်း၌ မိုးခြိမ်းသံအလား ပြင်းထန်စွာ ခုန်ပေါက်နေ၏။ သူမ၏ လေးလံသော အသက်ရှူမှုကြောင့် ရင်အုပ်မှာ အပြင်းအထန် နိမ့်ချည်မြင့်ချည် ဖြစ်နေကာ၊ သူမ၏ အသားအရေပေါ်တွင်လည်း ကြက်သီးမွေးညင်းများ ထနေခဲ့ပေသည်။ ဝေ့ဝူယင်၏ စကားလုံးများသည် အံ့မခန်းလောက်အောင် ဖိနှိပ်မှု ပြင်းထန်ပြီး၊ အစစ်အမှန် ကြောက်ရွံ့မှုကင်းမဲ့သော ဖြစ်တည်မှုတစ်ခု၏ စစ်မှန်သော ပြသမှုတစ်ခုပင် ဖြစ်လေသည်။

အရှင်သခင် တစ်ပါး...

အင်ပါယာ တစ်ပါး...

ကြောက်ရမည်လော။ ဘာကို ကြောက်ရမည်နည်း၊ ဘယ်သူ့ကို ကြောက်ရမည်နည်း။

အထွတ်အထိပ် သူတော်စင်များ နှင့် ကောင်းကင် အဂ္ဂိရတ် ရှန့်ထိုများ သည် အခြေအနေကို သူတို့၏ အကျိုးအမြတ်အတွက် လမ်းကြောင်းပြောင်းနေကြခြင်း ဖြစ်ပြီး ၊ အခြေအနေတိုင်းကို ပြီးပြည့်စုံစွာ အသုံးချကာ အနည်းဆုံး ဆုံးရှုံးမှုနှင့် အတူ သူတို့အတွက် အကျိုးရှိစေမည့် ရလဒ်တစ်ခုကို ကျွမ်းကျင်ပိုင်နိုင်စွာ ကြိုးကိုင်ဖန်တီးနေကြကြောင်း သူမ အပြည့်အဝ သိရှိထားသည်။ သို့သော်လည်း.. နယ်ခြားသား၏ ပြိုင်ဘက်ကင်းသော အော်ရာကြောင့် သူမ အမှန်တကယ် အံ့သြမှင်တက်သွားခြင်းကို မထိန်းချုပ်နိုင်ခဲ့ချေ။

သို့သော်လည်း ထိုအထွတ်အထိပ် သူတော်စင်များ နှင့် ကောင်းကင် ရှန့်ထို အဂ္ဂိရတ်ပညာရှင်များ အပေါ် သူမ၏ ကြည်ညိုလေးစားမှုမှာ များစွာ သာလွန်နေခဲ့ရာ၊ လက်ခုပ်တီးချင်စိတ်ကို သူမ ထိန်းချုပ်ထားလိုက်လေသည်။ သူမ၏ အမြင်အရ ဝေ့ဝူယင်သည် ရိုးရှင်းစွာ ချခင်းထားသော်လည်း သခင်တစ်ဦးကဲ့သို့ အကောင်အထည်ဖော်ထားသော ထောင်ချောက်တစ်ခု အတွင်းသို့ ကျရောက်သွားခဲ့ပြီ ဖြစ်ပေသည်။ သူမ၏ မျက်စိထဲတွင် ဝေ့ဝူယင်သည် သူ၏ အင်ပါယာ ဥပဒေသ အာဏာ ကို မြှင့်တင်ရန်အတွက် အကာအကွယ်မဲ့သော အနေအထားတစ်ခုသို့ ရောက်ရှိသွားခဲ့ပြီဟု မြင်ယောင်မိလေသည်။

သူတို့က သူ့ကို ဓားသွေးကျောက် အဖြစ် အသုံးပြုခွင့် ပြုလိမ့်မည်လော။ ထို့အပြင် ထိုဗျူဟာသည် အလွန်အမင်း ရည်မှန်းချက်ကြီးမားပြီး မောက်မာသော စရိုက်လက္ခဏာများ ရှိကြသည့် စည်းစိမ် ပျက်သုဉ်းခြင်း ဂလက်ဆီ သို့မဟုတ် ရတနာချိုင့်ဝှမ်း ဂလက်ဆီ ကဲ့သို့သော ဂလက်ဆီတစ်ခုကို ဆန့်ကျင်ရာတွင် အလုပ်ဖြစ်နိုင်သော်လည်း၊ အစွမ်းကုန် သန့်စင်ခြင်း ဂလက်ဆီ သည် အဓိက ခေါင်းဆောင်မှု မရှိဘဲ ကိုယ်ကျိုးစီးပွားများဖြင့်သာ ကွဲပြားနေခဲ့ခြင်း ဖြစ်လေသည်။ သူတို့သည် အဂ္ဂိရတ် တာအို နှင့် လူ့အဖွဲ့အစည်း၏ တိုးတက်လာမှုကိုသာ လိုက်နာကြပြီး အခြား မည်သည့်အရာကိုမျှ ဂရုမစိုက်ကြချေ။

ထိုနယ်ခြားသားက ဤနေရာတွင် တိုက်ပွဲတစ်ခုကို ရှာဖွေနေသည်လား။ အကယ်၍ သူက အရာအားလုံးကို လျစ်လျူရှုပြီး သူတို့၏ ဌာနချုပ်များ သို့မဟုတ် ဂလက်ဆီဇုံ များကို တိုက်ရိုက် မတိုက်ခိုက်ဘူးဆိုလျှင်၊ သူတို့သည် ထိုကဲ့သို့သော ပဋိပက္ခမျိုးထဲ အလွယ်တကူ ကျရောက်သွားမည့် နည်းလမ်း လုံးဝ မရှိခဲ့ချေ။

သူမ၏ အမြင်တွင် ဝေ့ဝူယင်သည် ဂလက်ဆီ၏ လူမှုရေး သဘာဝကြောင့် ရိုးရှင်းစွာ အားနည်းချက်တစ်ခု ဖြစ်ပေါ်လာခဲ့ခြင်း ဖြစ်ပေသည်။ ထို့အပြင် မည်သည့် အကြောင်းကြောင့်ပင် ဖြစ်စေ သူက ပထမဆုံး စတင်သူ မဖြစ်နိုင်ကြောင်း ရှင်းလင်းစွာ မြင်တွေ့နေရလေသည်။

ကျင့်ကြံခြင်း လမ်းစဉ်သည် ခက်ခဲပြီး စိတ်ဝင်စားဖွယ်ကောင်းသော ကန့်သတ်ချက် များစွာ ရှိနေသောကြောင့်၊ သူတို့ထဲမှ မည်သူကမျှ ဤအရာကို ထူးဆန်းသည်ဟု မထင်မှတ်ခဲ့ကြချေ။

ဥပမာအားဖြင့် ယခုအခါ ပြတ်သားသော ဆည်းဆာ ဂလက်ဆီ ဟု အမည်တွင်သော ဂလက်ဆီ၏ အစောင့်အရှောက် နတ်ဘုရား ဖြစ်သည့် အဆုံးမဲ့ ကောင်းကင် နတ်ဘုရား သည် ပဲ့တင်ထပ် ဝိညာဉ် အဆင့် ၏ သာမည ကောင်းကင် တမန်တော် အဆင့် ထက် ကျော်လွန်သော ကျင့်ကြံခြင်း အဆင့် ကို ပိုင်ဆိုင်ထားပြီး တကယ်ကို စွမ်းအားကြီးမားသော အထွတ်အထိပ် ဖြစ်တည်မှု တစ်ခု ဖြစ်သော်လည်း၊ ပဲ့တင်ထပ် ဝိညာဉ် အဆင့် အောက်ရှိ မည်သည့် နယ်ခြား ကျင့်ကြံသူကိုမဆို အရေးယူ လှုပ်ရှားခြင်းမှ တားဆီးထားသည့် ကန့်သတ်ချက်များ ရှိနေခဲ့ပေသည်။

ဤကန့်သတ်ချက်ကပင် ဝေ့ဝူယင်အား ဒေသခံ သူတော်စင်များ မှလွဲ၍ မည်သည့် ပြင်းထန်သော ခုခံမှုမျှ မရှိဘဲ ထိုဂလက်ဆီကို လက်အောက်ခံအဖြစ် သိမ်းပိုက်ခွင့် ပြုပေးခဲ့ခြင်း ဖြစ်လေသည်။

***

အပိုင်း(၂၃၄၄)

ထျန်းရှီယာသည် စူးဟောင်ရန် နှင့် ဆက်သွယ်လိုသည့် ဆန္ဒကို ထိန်းချုပ်ထားလိုက်လေသည်။ သူမသည် ကွဲပြားခြားနားသော အရာပေါင်း တစ်ထောင်ခန့်ကို ပြောချင်နေခဲ့သည်။ စူးဟောင်ရန်ကလည်း ဆုပ်ကိုင်ထားသော သူမ၏ လက်မှ တစ်ဆင့် သူမ၏ စူးစမ်းလိုစိတ်ကို သတိပြုမိသွားခဲ့ပေသည်။ သူ၏ အတွေးများအတွင်း ဆုံးဖြတ်ချက်တစ်ခု တဖျပ်ဖျပ် လင်းလက်သွားစဉ် သူက သူမကို ခေတ္တမျှ အကဲခတ်လိုက်လေသည်။ သူ၏ အတွေးများ ခိုင်မာသွားသောအခါ ဆင်ကျား အရှင်သခင်၊ လုံရှီယာ နှင့် ရွှေရောင် ညဉ့်ဦးယံ အရှင်သခင် တို့သည် သူ၏ ဦးတည်ရာဆီသို့ တစ်ပြိုင်နက်တည်း လှမ်းကြည့်လိုက်ကြပေသည်။

အံ့သြဖွယ်ကောင်းလောက်အောင်ပင်၊ ဝေ့ဝူယင်၏ ပေါက်ကွဲမှုအပေါ် သူတို့၏ တုံ့ပြန်မှုများမှာ သိမ်မွေ့နေခဲ့လေသည်။ ၎င်းမှာ သူတို့က ထိုအရာကို မျှော်လင့်ထားခဲ့သည့်အလားပင် ဖြစ်ပေသည်။

မဟုတ်ပေ၊ သူတို့က ၎င်းကို အပြည့်အဝ ကြိုတင် ခန့်မှန်းထားခဲ့သည့်အလားပင် ဖြစ်လေသည်။

"ယာအာ... မင်းရဲ့ မျက်လုံးတွေကို မှိတ်ထားပြီး အသိစိတ် ပင်လယ် ကို ဖွင့်ထားလိုက်... မင်း အတွေ့အကြုံ ရအောင်လို့ တစ်နေရာရာကို ငါ ခေါ်သွားပေးမယ်..."

စူးဟောင်ရန်က ညင်သာစွာ ညွှန်ကြားလိုက်၏။

ရွှေရောင် ညဉ့်ဦးယံ အရှင်သခင်က သူတို့ဘက်သို့ လှည့်ကြည့်ကာ ပွင့်လင်းစွာ မေးခွန်းထုတ်လိုက်လေသည်။

"ဖန်တီးခြင်း စည်းမျဉ်းထိန်းသိမ်းသူ စူး... ရှင်ရဲ့ လုပ်ရပ်တွေက မသင့်တော်ဘူး..."

သို့သော် စူးဟောင်ရန် က ဂရုမစိုက်သကဲ့သို့ ပခုံးတွန့်ပြလိုက်လေသည်။ ထျန်းရှီယာမှာ စိတ်ရှုပ်ထွေးသွားပြီး လုံရှီယာ နှင့် ရွှေရောင် ညဉ့်ဦးယံ အရှင်သခင်တို့ကို လှမ်း၍ အကဲခတ် လိုက်သည်။ ရွှေရောင် ညဉ့်ဦးယံ အရှင်သခင်က ပထမ တစ်ကြိမ် သတိပေးချက်ပြီးနောက်တွင် ဆက်လက် အနှောင့်အယှက် မပေးတော့ချေ။ သူမက စူးဟောင်ရန် ကို လျစ်လျူရှုလိုက်လေသည်။

ဆင်ကျား အရှင်သခင်ကတော့ စိတ်ပျက်မှုကြောင့် မဟုတ်ဘဲ မနာလိုမှု အငွေ့အသက်လေးတစ်ခုကြောင့် နှုတ်ခမ်းဆူလိုက်လေသည်။ သူမက ထျန်းရှီယာ ၏ အဆင့်အတန်းမျိုးတွင် ရှိနေစဉ်က စူးဟောင်ရန် ကဲ့သို့ သူမကိုယ်စား ပြင်းပြင်းထန်ထန် တိုက်ခိုက်ပေးမည့်သူ တစ်ဦးရှိရန် အခွင့်အရေး မရရှိခဲ့ချေ။ ၎င်းက အမျိုးသမီး အချို့ ပိုင်ဆိုင်ထားသော ကံကောင်းခြင်းများပင် ဖြစ်လေသည်။

ထျန်းရှီယာသည် သူမထံ နှစ်သိမ့်ပေးသော အကြည့်တစ်ချက် ပေးပို့လာသည့် စူးဟောင်ရန် ကို လှမ်းကြည့်လိုက်လေသည်။ သူမ သူ့ကို ယုံကြည်ရန် ဆုံးဖြတ်လိုက်ပြီး မျက်လုံးများကို မှိတ်ကာ သူမ၏ အသိစိတ် ပင်လယ် ကို ဖွင့်ဟလိုက်လေသည်။ ထိုသို့ ပြုလုပ်လိုက်သောအခါ၊ တဒင်္ဂမျှ နာကျင်မှု တစ်ချက်နှင့်အတူ နွေးထွေးသော ခံစားမှုတစ်ခုက သူမ၏ စိတ်မျက်လုံးကို မထိတွေ့မီ သူမ၏ အသိစိတ် ပင်လယ် ကို လွှမ်းခြုံသွားခဲ့ပေသည်။

ရုတ်တရက် လုံးဝ ငြင်းဆန်၍မရနိုင်သော လေပြင်းကြီး တစ်ခုက သူမ၏ ဝိညာဉ်ကို လွှင့်စဉ်သွားစေသည့်အလား သူမ ခံစားလိုက်ရ၏။ သူမ၏ အာရုံခံစားမှုများ အားလုံး ပိတ်လှောင်ခံလိုက်ရလေသည်။

ထိုအတွေ့အကြုံသည် မူးဝေခြင်း ဟူသော သဘောတရားကို ကျော်လွန်နေပြီး၊ စိတ်ကူးကြည့်နိုင်သမျှ ခန္ဓာကိုယ်ပြင်ပသို့ ရောက်ရှိသွားသော အတွေ့အကြုံတစ်ခုနှင့် အနီးစပ်ဆုံး ဖြစ်နေပေသည်။ သူမ မျက်လုံးများကို ဖွင့်လိုက်သောအခါ ခမ်းနားထည်ဝါသော ခန်းမကြီး တစ်ခုထဲသို့ ရောက်ရှိနေကြောင်း တွေ့လိုက်ရလေသည်။ ခန်းမကြီးမှာ ကျယ်ဝန်းကြီးမားလှ၏။ အံဖွယ် အဂ္ဂိရတ် ဖြစ်စဉ်များကို နံရံများပေါ်တွင် ပန်းချီကားများ အဖြစ် ရိုက်နှိပ်ထားသည်။

မျက်နှာကျက်မှာ အလှတရား၏ ပြယုဂ်တစ်ခုဖြစ်သော ကျယ်ပြောလှသည့် ကြယ်တာရာ ကောင်းကင်ယံ ဖြစ်နေပေသည်။ ၎င်းက ထိုကြယ်များကို နီးကပ်နေသယောင်၊ အယုံအကြည်မဲ့လောက်အောင် ဝေးကွာနေသယောင် ထင်ရစေပြီး၊ လုံးလုံးလျားလျား ဆန့်ကျင်ဘက်ဖြစ်သော ခံစားချက်တစ်ခုကို ပေးစွမ်းနေလေသည်။

ဟင်းလင်းပြင် ပတ္တူစ တစ်ခုပေါ်တွင် အရောင်အသွေး စုံလင်သည့် ကြယ်များသည် ဤမျှလောက် ကွဲပြားခြားနားပြီး လှပနိုင်လိမ့်မည်ဟု သူမ တစ်ခါမျှ မတွေးထင်ခဲ့ဖူးချေ။

သူမသည် အပေါ်ဆုံး ပြခန်းအဖြစ် အသုံးပြုသော မြင့်မားသည့် စင်မြင့်တစ်ခုပေါ်တွင် ရောက်ရှိနေခြင်း ဖြစ်လေသည်။ ဤနေရာတွင် ရပ်နေရင်း၊ လသာဆောင် အတန်းများဖြင့် ကွပ်ထားသော အောက်ဘက်ရှိ စင်မြင့်ဆီသို့ လှမ်းကြည့်လိုက်သောအခါ သူမသည် နတ်ဘုရား တစ်ပါးအလား ခံစားလိုက်ရပေသည်။

အောက်ဘက်ရှိ စင်မြင့်မှာ အလယ်ဗဟိုတွင် ကြယ်တာရာ မျက်လုံးများဖြင့် ဝေ့ဝူယင်၏ ပုံရိပ်ကို ပုံဖော်ထားသော အကြည်ရောင် ကျောက်စိမ်းဖြင့် ပြုလုပ်ထားသည့် အပြားလိုက် ခုနစ်ထောင့်ပုံစံ ဖြစ်နေပေသည်။ တစ်ခုကို ဖယ်ရှားလိုက်ပါက၊ ခုနစ်ထောင့်၏ ထောင့်တိုင်းတွင်…

လွတ်လပ်နေသော ထိုနေရာတွင်မူ အခြားသော မြင်ကွင်းများ သို့မဟုတ် အခြားသော ပုဂ္ဂိုလ်များ၏ ပုံရိပ်များ ရှိနေ၏။ ပတ်ဝန်းကျင် တစ်ခုမှ တစ်ခုသို့ အရိုင်းအစိုင်းများအလား တဖျပ်ဖျပ် ပြောင်းလဲနေကာ၊ တစ်ခါတစ်ရံတွင် ဂြိုဟ်ကြီးများ သို့မဟုတ် တိုက်ကြီးများ တစ်ခုလုံးပင် ပါဝင်နေပေသည်။

ထိုထောင့် ခြောက်ခုသည် တစ်စုံတစ်ရာကို ရှာဖွေနေကြောင်း ရှင်းလင်းလှပေသည်။ ဤသည်မှာ စုရီကို ရှာဖွေရန် နက်နဲသော ကိရိယာတစ်ခု ဖြစ်မည်ဟုသာ သူမ ကောက်ချက်ချနိုင်လေသည်။

သူမ ဘယ်ဘက်သို့ လှည့်ကြည့်လိုက်သောအခါ သူမ၏ ဘေးတွင် စင်မြင့်တစ်ခု ရှိနေပြီး၊ ဆင်ကျား အရှင်သခင် သည် ထိုနေရာတွင် ရှိနေခဲ့ပေသည်။ သူမ၏ အကြည့်နှင့် မျက်နှာအမူအရာမှာ သူမ ရင်းနှီးကျွမ်းဝင်ခဲ့သော အလွန်အမင်း စိတ်ခံစားမှု ပြင်းထန်လွန်းသည့် ပုံစံမျိုးနှင့် များစွာ ကွာခြားနေပေသည်။ သူမသည် လေးနက်ပြီး အေးစက်နေလေသည်။

ရုတ်တရက်... ထျန်းရှီယာမှာ ရင်းနှီးသော နွေးထွေးမှု တစ်ခုကို ခံစားလိုက်ရ၏။ သူမ လှည့်ကြည့်လိုက်သော မျက်လုံးများတွင် သိမ်မွေ့သော အပြုံးတစ်ခုကို ဖော်ဆောင်ထားသော်လည်း နှုတ်ခမ်းများတွင်မူ လေးနက်သော အရိပ်အယောင်တစ်ခုကို ပိုင်ဆိုင်ထားသည့် စူးဟောင်ရန် ကို တွေ့လိုက်ရလေသည်။ ဤနေရာတွင် သူပင်လျှင် သူ၏ ပြင်ပ အော်ရာကို ရဲတင်းစွာ မထုတ်ဖော်ရဲကြောင်း ရှင်းလင်းလှပေသည်။

တိတ်ဆိတ်စွာပင် စူးဟောင်ရန်က သူ၏ လက်ချောင်းဖြင့် အပြင်ဘက်သို့ ညွှန်ပြလိုက်လေသည်။ သူမသည် သူ၏ လက်ချောင်း ညွှန်ပြရာ နောက်သို့ လိုက်ကြည့်လိုက်ရာ သူမ၏ နှလုံးသားသည် ချက်ချင်းပင် ကယောက်ကယက် ခုန်ပေါက်သွားခဲ့လေသည်။

ပုံရိပ် ခုနစ်ခု...

တစ်ခုစီသည် ကွဲပြားသော အရောင်ရှိသည့် ဝတ်စုံများကို ဆင်မြန်းထားကြကာ၊ ထုတ်ယူခြင်း၊ ကြီးထွားခြင်း၊ ထိန်းချုပ်ခြင်း၊ သန့်စင်ခြင်း၊ ဖန်တီးခြင်း၊ အသွင်ပြောင်းခြင်း နှင့် ပေါင်းစပ်ခြင်း ဟူသော အဂ္ဂိရတ်ပညာ၏ ရှုထောင့် ခုနစ်ခုအနက်မှ တစ်ခုကို ကိုယ်စားပြုနေ၏။ ၎င်းတို့သည် ကောင်းကင်ဘုံကိုပင် ယှဉ်ပြိုင်နိုင်စွမ်းရှိသော မှန်းဆ၍မရနိုင်သည့် အော်ရာများကို ထုတ်လွှတ်နေကြပေသည်။

မိုးကုပ်စက်ဝိုင်းများ...

ပိုမို ရှင်းလင်းစွာ ဆိုရသော်... အစွမ်းကုန် သန့်စင်ခြင်း ဂလက်ဆီ မိုးကုပ်စက်ဝိုင်း မျှော်စင် ခုနစ်ခု ၏ ကောင်းကင် အဂ္ဂိရတ် ရှန့်ထို ခုနစ်ပါး ပင်...။

စူးဟောင်ရန်၏ စကားများသည် သူမ၏ ဝိညာဉ်အတွင်းသို့ စီးဆင်း ဝင်ရောက်လာလေ၏။

"ဒါက အစွမ်းကုန် ပေါင်းစည်းခြင်း စိတ်အာရုံ နယ်မြေ ပဲ... လုံလောက်တဲ့ အဆင့်အတန်း ဒါမှမဟုတ် ခွင့်ပြုချက် ရှိသူတွေသာ သူတို့ရဲ့ စိတ်အာရုံ ကိုယ်ပွား နဲ့ ဒီနေရာကို ဝင်ရောက်နိုင်တယ်..."

သူ ရှင်းပြနေစဉ်မှာပင်၊ သူမ၏ လက်ရှိ စိတ်အာရုံ ခန္ဓာကိုယ်သည် အလွန်တရာ စူးရှလှသော အကြည့်များ၏ ဝိုင်းရံခြင်းကို ခံလိုက်ရလေသည်။ သူမ၏ စိတ်တစ်ခုလုံးကို ရေခဲကန်တစ်ခုထဲသို့ နှစ်ချလိုက်သကဲ့သို့ သူမ ခံစားလိုက်ရပေသည်။

"သူ့ကို ကျုပ် ခေါ်လာခဲ့တာပါ..."

စူးဟောင်ရန်က ခံစားချက်ကင်းမဲ့စွာ ပြောလိုက်၏။ သူ၏ လေသံတွင် ပါးလွှာစွာ ဖုံးကွယ်ထားသော သတ်ဖြတ်လိုသည့် ရည်ရွယ်ချက်တစ်ခု ရောယှက်နေပေသည်။

ချက်ချင်းပင် ထိုအကြည့်များ ပျောက်ကွယ်သွားပြီး သူမ၏ ခန္ဓာကိုယ်သည် သိမ်မွေ့သော နွေးထွေးမှုဖြင့် ပြည့်နှက်သွားလေသည်။ သူမ စူးဟောင်ရန် အနီးသို့ ပိုမို တိုးကပ်သွားချိန်တွင် ကြီးမားသော သက်သာရာရမှု တစ်ခုကို ရှာဖွေ တွေ့ရှိသွားခဲ့သလို ခံစားလိုက်ရပေသည်။ သူမ၏ မျက်လုံးများမှာ ပိုမို၍ တောက်ပသွားခဲ့လေ၏။

အစွမ်းကုန် ပေါင်းစည်းခြင်း စိတ်အာရုံ နယ်မြေ အကြောင်းကို သူမ သိရှိထားပေသည်။ ၎င်းသည် အထွတ်အထိပ် သူတော်စင် အားလုံးက မနာလို အားကျရသည့် စိတ်နှင့် ဝိညာဉ် ကျင့်ကြံခြင်းအတွက် ကောင်းကင်ဘုံ တစ်ခုပင် ဖြစ်လေသည်။

မည်သို့ပင်ဆိုစေ... အထွတ်အထိပ် သူတော်စင် အဆင့်သို့ ဝင်ရောက်ပြီးနောက်၊ နောက်ထပ် ခြေလှမ်းမှာ မိမိ၏ အစစ်အမှန် ဝိညာဉ် ကို ကျင့်ကြံရန် ဖြစ်ပြီး၊ ၎င်းမှာ နာမည်ဆိုးဖြင့် ကျော်ကြားလောက်အောင် ခက်ခဲလှကြောင်း သူမ သိရှိထားလေသည်။ လျှို့ဝှက် ဝိညာဉ်အင်အား ဆေးလုံး ကဲ့သို့သော ထုတ်ကုန်များ ရှိသော်လည်း ၎င်းတို့မှာ အလွန်တရာ ရှားပါးပြီး လက်တွေ့မကျလှချေ။

သို့သော်လည်း အစွမ်းကုန် ပေါင်းစည်းခြင်း စိတ်အာရုံ နယ်မြေ သည် ပေါင်းစည်းခြင်း အမတေ ကို စုစည်းနိုင်စွမ်းရှိသော ကောင်းချီးခံ ကျင့်ကြံခြင်း နယ်မြေ တစ်ခု ဖြစ်ပေသည်။ ဤအမတေသည် အလွန်တရာ ထူးခြားလှ၏။ ၎င်းသည် သန့်စင်ထားသော စိတ်ပိုင်းဆိုင်ရာ စွမ်းအင်များမှနေ၍ ဝိညာဉ်ကို အာဟာရ ဖြည့်တင်းပေးရန် အရန် အမတေ တစ်မျိုးအဖြစ်သို့ ပြောင်းလဲထားခြင်း ဖြစ်သည်။ ၎င်းတွင် မူလ အခြေအနေများ သို့မဟုတ် သေမျိုး အခြေအနေများ ကဲ့သို့သော ကျင့်ကြံခြင်း၏ ရှုထောင့် အမျိုးမျိုးကို မြှင့်တင်ပေးခြင်းလည်း ပါဝင်လေသည်။ ဝိညာဉ်ကို ပြုစုပျိုးထောင်ခြင်းက နားလည်သဘောပေါက်မှုကို ပိုမို လွယ်ကူစေပြီး အစစ်အမှန် ဝိညာဉ် အဆင့် နှင့် ပဲ့တင်ထပ် ဝိညာဉ် အဆင့် သို့ တက်လှမ်းရန် ပိုမို လွယ်ကူစေသောကြောင့်၊ ၎င်းသည် မည်သည့် ကျင့်ကြံသူအတွက်မဆို ကောင်းချီးတစ်ရပ်ပင် ဖြစ်ပေသည်။

ပို၍ အရေးကြီးသည်မှာ အဆင့်တက်ချိန်တွင် ဥပဒေသ မျိုးစေ့များ လိုအပ်မှုကို လျှော့ချပေးနိုင်ပြီး၊ သင့်လျော်သော ကိုယ်စားလှယ် တစ်ခုအဖြစ် လုပ်ဆောင်ပေးကာ၊ လူတစ်ဦး၏ အောင်မြင်နိုင်ချေကို များစွာ မြှင့်တင်ပေးနိုင်ခြင်းပင် ဖြစ်လေသည်။ ၎င်းသည် ရှားပါးသော အခွင့်အရေး တစ်ခုပင်တည်း။

စူးဟောင်ရန်က သူမကို ဤနေရာ သို့ ခေါ်လာခဲ့ခြင်း ဖြစ်ပေသည်။ အစွမ်းကုန် ပေါင်းစည်းခြင်း စိတ်အာရုံနယ်မြေသို့ ဝင်ရောက်ခွင့် ရရှိရန် သူမသည် ပြီးခဲ့သော နှစ်ပေါင်း သုံးသောင်း တစ်လျှောက်လုံး အသနားခံ တောင်းဆိုခဲ့သော်လည်း အမြဲတမ်း ငြင်းပယ်ခံခဲ့ရလေသည်။ ဤသည်ကပင် ဤနေရာသို့ ဖိတ်ကြားခံရခြင်း၏ ခက်ခဲမှု အဆင့်အတန်းကို ပြသနေပေသည်။

သူမသည် အစစ်အမှန် ကောင်းကင် အဂ္ဂိရတ် ရှန့်ထို တစ်ပါးဖြစ်သော ထျန်းရှီကျောက်ရွှမ် ၏ သွေးမျိုးဆက် တစ်ဦး ဖြစ်လေသည်။ ထို့အပြင် တစ်နေ့တွင် ကောင်းကင် အဂ္ဂိရတ် ရှန့်ထို တစ်ပါး ဖြစ်လာမည့် ကြီးမားသော အလားအလာများကို ပြသထားသည့် လောကရှန့်ထို အဂ္ဂိရတ်ပညာရှင် တစ်ဦးလည်း ဖြစ်ပေသည်။ ၎င်းပင်လျှင် မလုံလောက်ခဲ့ချေ။

ထျန်းရှီယာသည် အလွန်ပင် စိတ်လှုပ်ရှားသွားခဲ့ပြီး အော်ဟစ်ချင်စိတ်ကို မနည်း ထိန်းချုပ်ထားနေရလေသည်။