အခန်း (၂၃၄၇-၂၃၄၈)

အပိုင်း(၂၃၄၇)

စူးဟောင်ရန်သည် သူ၏ ကောင်းကင် အဂ္ဂိရတ် ရှန့်ထိုနှင့် အတူ ထျန်းရှီယာကိုပါ ကာကွယ်ပေးလိုက်၏။ ထျန်းရှီယာမှာ မူးဝေသွားကာ သူမ၏ အတွေးများ အားလုံး အရည်ပျော်ပြီး ပေါင်းစပ်သွားသကဲ့သို့ ခံစားလိုက်ရပေသည်။ စူးဟောင်ရန်က ကာကွယ်ပေးထားသည့်တိုင် သူတို့၏ စိတ်စွမ်းအားများမှာ အထွတ်အထိပ် သူတော်စင်များ ပင်လျှင် ခုခံရန် ခက်ခဲသော ထူးခြားသည့် ဂုဏ်သတ္တိများဖြင့် အံ့မခန်း ဖြစ်နေလေသည်။

အဂ္ဂိရတ် စွမ်းအင် သည် အများအားဖြင့် ထိခိုက်နစ်နာစေခြင်း မရှိသော်လည်း၊ ၎င်း၏ ထူးခြားသော ဂုဏ်သတ္တိများသည် အခြေခံ ကာကွယ်မှုများစွာကို ကျော်ဖြတ်သွားနိုင်စွမ်း ရှိပေသည်။ ချက်ချင်းဆိုသလိုပင် စူးဟောင်ရန် သည် ထျန်းရှီယာ ကို ကာကွယ်ရန် ခက်ခဲလာကြောင်း တွေ့ရှိလိုက်ရလေသည်။

"စူးခိုင်မင်..."

မိုးခြိမ်းသံကဲ့သို့ ပြင်းထန်မှု မရှိသော်လည်း နယ်မြေ တစ်ခုလုံး ကြားနိုင်လောက်အောင် လုံလောက်သော အသံဖြင့် စူးဟောင်ရန် က အော်ဟစ်လိုက်လေသည်။

စူးခိုင်မင် ဟုလည်း လူသိများသော မိုးကုပ်စက်ဝိုင်း ထိန်းချုပ်ခြင်း အဂ္ဂိရတ် ရှန့်ထိုက လှမ်းကြည့်လိုက်ရာ၊ ထျန်းရှီယာ ၏ စိတ်အာရုံ ကိုယ်ပွားမှာ ရုန်းကန်နေရသည်ကို မြင်တွေ့လိုက်ရလေသည်။ သူမက လေကို အနည်းငယ် ရှူသွင်းလိုက်ပြီး သူမ၏ စိတ်စွမ်းအားကို ပြန်လည် ရုပ်သိမ်းလိုက်လေသည်။

မိုးကုပ်စက်ဝိုင်း ပေါင်းစပ်ခြင်း လည်း အလားတူ ပြုလုပ်လိုက်၏။ သူ၏ စိတ်အာရုံ ကိုယ်ပွား မှာ အနည်းငယ် မှုန်ဝါးနေပေသည်။ သူ၏ အိုမင်းသော မျက်လုံးများက စူးခိုင်မင် ကို သတိထားမှု အရိပ်အယောင်များဖြင့် ကြည့်လိုက်လေသည်။ သူမသည် အစစ်အမှန် သိုင်းကျင့်ကြံသူ တစ်ဦး ဖြစ်လင့်ကစား၊ သူမ၏ စိတ်ပိုင်းဆိုင်ရာ စွမ်းအင်မှာ မှင်တက်သွားစေလောက်အောင် စွမ်းအားကြီးမားလှပေသည်။

ပဲ့တင်ထပ် ဝိညာဉ် အဆင့် သို့ ဝင်ရောက်မည့် ကောင်းကင် ရှန့်ထို အဂ္ဂိရတ်ပညာရှင်လောင်း ဆိုသည့် ဂုဏ်ပုဒ်နှင့် သူမ အမှန်တကယ် ထိုက်တန်ပေသည်။

ယခုအခါ၌ပင် သူမသည် ထိုအဆင့်သို့ တက်လှမ်းတော့မည့်ဆဲဆဲ ဖြစ်နေသော အစစ်အမှန် ဝိညာဉ် အဆင့် ကျင့်ကြံသူ တစ်ဦး ပင် ဖြစ်လေသည်။

ထျန်းရှီယာမှာ စိတ်သက်သာရာ ရသွားကာ သက်ပြင်းတစ်ချက် ချလိုက်မိသည်။ သူမ၏ ခန္ဓာကိုယ်က အနည်းငယ် ပျော့ခွေသွားကာ စူးဟောင်ရန်ကို မှီတွယ်လိုက်လေသည်။ သူမက မိုးကုပ်စက်ဝိုင်း ထိန်းချုပ်ခြင်းကို လှမ်းကြည့်လိုက်၏။ သူမ၏ နှလုံးသားက ကြည်ညိုလေးစားမှုများနှင့် ပြည့်နှက် နေခဲ့လေသည်။ သူမသည် မိုးကုပ်စက်ဝိုင်း ထိန်းချုပ်ခြင်းကို စံပြပုဂ္ဂိုလ် တစ်ယောက် အလား ကိုးကွယ်မိသွားခဲ့ပေသည်။

"ဘာလို့လဲ ဆိုတော့... ငါ ပွင့်ပွင့်လင်းလင်းပဲ ပြောမယ်..."

မိုးကုပ်စက်ဝိုင်း ထိန်းချုပ်ခြင်းက ရေခဲပြင်တစ်ခုအလား အေးစက်သော လေသံဖြင့် စတင် ပြောဆိုလိုက်လေသည်။

"ဒီတိုက်ပွဲက သံသယဝင်စရာ မလိုလောက်အောင် သေခြင်းနဲ့ ရှင်ခြင်း တိုက်ပွဲတစ်ခုဆီကို ဦးတည်သွားနိုင်တယ်... အဲဒါက ရှင်းနေပါတယ်... နောက်ပြီးတော့ သူက တိုက်ကွက် သုံးကွက် အတွင်းမှာ မင်းတို့ထဲက ဘယ်သူ့ရဲ့ အသက်ကိုမဆို သိမ်းပိုက်နိုင်တယ်... အနည်းဆုံးတော့ လုံးလုံးလျားလျား အနိုင်ယူနိုင်တယ် ဆိုတာကို... သေချာပေါက် ယုံကြည်နေတယ်... တာအိုမိတ်ဆွေ စု ရဲ့ လျှို့ဝှက်ချက်တွေအပေါ် မင်းတို့ အားလုံးရဲ့ လောဘကြောင့် ငါ့ရဲ့ တာအို တရားဥပဒေ ထိန်းသိမ်းသူ ကို ထိခိုက်ခံရစေမှာ မဟုတ်ဘူး..."

"ဒါဆို မင်း ဘာအကြံပေးချင်လဲ... ငါတို့ ခွန်အားတွေကို တစ်ခုတည်းအဖြစ် စုစည်းပြီး သူ့ကို အတူတကွ တိုက်ခိုက်ကြမလား... သူ့ကို ဖိနှိပ်ပြီး တာအိုမိတ်ဆွေ စု ရဲ့ တည်နေရာကို အတင်းအဓမ္မ ရယူကြမလား..."

ထျန်းရှီကျောက်ရွှမ်က ထိုအကြံအစည်၏ ဖြစ်နိုင်ချေကို ချိန်ဆနေသည့်အလား မျက်လုံးများကို ကျဉ်းမြောင်းကာ မေးမြန်းလိုက်လေသည်။

"လုံးဝ မဖြစ်ဘူး..."

မိုးကုပ်စက်ဝိုင်း သန့်စင်ခြင်း က ထိုအကြံအစည်ကို ချက်ချင်း ငြင်းပယ်လိုက်လေသည်။ အကယ်၍ အထွတ်အထိပ် သူတော်စင် အဆင့် ပဋိပက္ခတစ်ခုသာ စတင်ခဲ့ပါက… ဂလက်ဆီဇုန်များ အန္တရာယ် ကျရောက်သွားမည် ဖြစ်သည်။ ယခင်ကဆိုလျှင် သူသည် ထိုကဲ့သို့သော ကိစ္စများကို အများအားဖြင့် သဘောတူခဲ့မည် ဖြစ်သည်။ သို့သော်လည်း... ယခုမူ သူ၏ မိုးကုပ်စက်ဝိုင်း သန့်စင်ခြင်း မျှော်စင် သည် လည်ပတ်၍ မရနိုင်တော့လောက်အောင် ပြင်းထန်စွာ ပျက်စီးနေခဲ့ပြီး၊ သူတို့ ဂလက်ဆီဇုံ၏ တာအို တရားဥပဒေ ထိန်းသိမ်းသူ ဖြစ်သော ဆင်ကျား အရှင်သခင် မှာလည်း လျှို့ဝှက်ပြစ်ဒဏ် မှ သီသီလေး လွတ်မြောက်လာပြီးနောက် ခွန်အား မရှိသလောက်ပင် ဖြစ်နေလေသည်။

အကယ်၍ ထိုနယ်ခြားသားသည် သူ၏ နောက်ဆုံး အချိန်များတွင် အလွန်အမင်း သဘောထား သေးသိမ်ခဲ့မည်ဆိုလျှင် သူသည် ကောင်းကင် သန့်စင်ခြင်း ဂလက်ဆီဇုံ ၏ နယ်မြေကို အမြစ်ပြတ် ချေမှုန်းပစ်နိုင်သည်။ ထိုအခါ.. သူ၏ မဟာမိတ်ဆိုသူများက ထိုအဖြစ်အပျက်ကို ဂရုမစိုက်သော အကြည့်များဖြင့် သေချာပေါက် စောင့်ကြည့်နေကြမည်သာ ဖြစ်ပေသည်။ သူက ထိုရလဒ်မျိုးကို မည်သို့ စွန့်စားနိုင်မည်နည်း။

“ဒါဆိုရင် မင်း ဘာအကြံပေးချင်လဲ..."

မိုးကုပ်စက်ဝိုင်း ပေါင်းစပ်ခြင်း ရှန့်ထိုက မေးလိုက်လေသည်။ သူတို့သည် အမှန်တကယ်ပင် အကျပ်အတည်း အခြေအနေ တစ်ခုသို့ ရောက်ရှိနေခဲ့ကြခြင်း ဖြစ်လေသည်။

"ငါ့မှာ ပြီးပြည့်စုံတဲ့ ကိုယ်စားလှယ်လောင်း တစ်ယောက် ရှိတယ်..."

စူးဟောင်ရန်က ပြောလိုက်ရာ လူတိုင်းက သူ့ဆီသို့ လှည့်ကြည့်လိုက်ကြလေသည်။

"သူ့ကို တွန်းအားလေး နည်းနည်း ပေးဖို့ပဲ လိုလိမ့်မယ်... ဘာပဲဖြစ်ဖြစ် တိုက်ကွက် သုံးကွက်တည်းပဲလေ..."

"..."

မိုးကုပ်စက်ဝိုင်း အဂ္ဂိရတ် ရှန့်ထိုများ။

"..."

တာအို တရားဥပဒေ ထိန်းသိမ်းသူ များ။

မိုးကုပ်စက်ဝိုင်း ဖန်တီးခြင်း မျှော်စင် ၏ တာအို တရားဥပဒေ ထိန်းသိမ်းသူသည် မျက်လုံးများထဲတွင် တောက်ပမှုတစ်ခုနှင့်အတူ လုံရှီယာ ထံသို့ လှည့်ကြည့်လိုက်လေသည်။

စူးဟောင်ရန်၏ အကြည့်ကို ခံစားလိုက်ရပြီးနောက် လုံရှီယာ ၏ မနှစ်မြို့ဖွယ် မျက်နှာအမူအရာက ပြောင်းလဲသွားကာ၊ သူ၏ ဘယ်ဘက် မျက်ခုံးမှာလည်း စူးစမ်းလိုစိတ်ဖြင့် ပင့်တက်သွားလေသည်။

'ဒီခွေးသူတောင်းစားက ဘာလိုချင်နေတာလဲ...'

ထျန်းရှီယာ နှင့် ဖြစ်ပွားခဲ့သော ပြဿနာအပြီးတွင် လုံရှီယာ သည် စူးဟောင်ရန် အပေါ် စိတ်ထဲတွင် မကျေမနပ် ဖြစ်နေခဲ့လေသည်။ အငြိုးအတေး ထားတတ်သူ တစ်ဦးအနေဖြင့် သူသည် ၎င်းကို လုံးလုံးလျားလျား အခဲမကြေ ဖြစ်နေခဲံပြီး စုရီ ၏ အခြေအနေက ထိုအရာကို ပိုမို ဆိုးရွားသွားစေခဲ့ပေသည်။ စုရီ ကို တိုက်ရိုက် အရေးယူ လှုပ်ရှားခြင်း မပြုဘဲ သူ၏ ကိုယ်စား လက်အောက်ငယ်သားများကိုသာ စေလွှတ်ခဲ့မိပြီး၊ ထိုပိုးလောက်လန်းလေးကို ကျားတစ်ကောင်အဖြစ် ကြီးထွားလာခွင့် ပြုခဲ့မိသည့်အတွက် သူသည် နောင်တရနေခဲ့ပြီ ဖြစ်လေသည်။ အကယ်၍ ထိုကျိန်စာသင့် နေမင်းအလင်းတန်းများ ထုတ်လွှတ်နေသော ခွေးမကြောင့်သာ မဟုတ်ခဲ့လျှင်၊ သူသည် စုရီ ကို ကိုင်တွယ်ဖြေရှင်းပြီးရုံသာမက သူ၏ လျှို့ဝှက်ချက်များကိုပါ သိမ်းပိုက်ပြီးဖြစ်နေပေလိမ့်မည်။

သို့သော်... ထိုအချိန်က လျှို့ဝှက် အာဏာရှင် အဆင့် ပုရွက်ဆိတ်လေး တစ်ကောင်အတွက် သူ၏ တစ်ဦးတည်းသော ဂိုဏ်းပြိုင်ဘက် နှင့် ပဋိပက္ခ ဖြစ်ရသည်မှာ တန်ကြေး မရှိခဲ့ချေ။ မည်သို့ပင်ဆိုစေ သူတို့သည် အစွမ်းကုန် သန့်စင်ခြင်း ဂလက်ဆီ အတွင်း၌ ဒုတိယ အကြီးဆုံး နန်းတော် ဖြစ်ကြသည်။ ဤသည်မှာ ဦးဆောင်သူအဖြစ် အထွတ်အထိပ် သူတော်စင် နှစ်ပါးတည်းသာ ရှိခြင်းဖြင့် ရရှိခဲ့သော ကြီးမားသည့် အောင်မြင်မှု တစ်ရပ်ပင် ဖြစ်လေသည်။

အကယ်၍ ဤသို့ ဖြစ်လာမည်ကို သူ သိခဲ့မည်ဆိုလျှင်...

ပိုးလောက်လန်းက ကျားအဖြစ် ကြီးထွားလာကာ တစ်နေ့တွင် သူ့ဖင်ကို ပြန်ကိုက်လိမ့်မည်ဟူသော စက်ဆုပ်ဖွယ် အချက်အပါအဝင်ကို သူ သိခဲ့မည်ဆိုလျှင်..

နောင်တ ဆိုသည်မှာ နောင်မှရသော တရားပင် ဖြစ်လေသည်။

"ဘာလဲ..."

လုံရှီယာက ခက်ထန်သည့် လေသံဖြင့် မေးလိုက်၏။

စူးဟောင်ရန် က ပြုံးလိုက်သည်။

"စက်ဆုပ်ဖွယ် ကောင်းကင် အရှင်သခင်... မိုးကုပ်စက်ဝိုင်းတွေက ခင်ဗျားနဲ့ ကိစ္စတချို့ ဆွေးနွေးချင်နေကြတယ်..."

"မိုးကုပ်စက်ဝိုင်း ရှန့်ထိုတွေကလား..."

လုံရှီယာ ချက်ချင်း အံ့အားသင့်သွားခဲ့လေသည်။ မိုးကုပ်စက်ဝိုင်းတွေ ဆိုသည်မှာ ဂလက်ဆီ၏ ကောင်းကင် ရှန့်ထို အဂ္ဂိရတ်ပညာရှင် ခုနစ်ပါးစလုံး၏ စုပေါင်း ကိုယ်ပိုင် အမှတ်အသားနှင့် ဘွဲ့အမည် ဖြစ်သည်။ တစ်ပါးစီတွင် ကောင်းကင်ဘုံကို ယှဉ်ပြိုင်နိုင်စွမ်းရှိသော အဂ္ဂိရတ် ထုတ်ကုန်များ သို့မဟုတ် စွမ်းရည်များဖြင့် တည်ထောင်ထားသည့် စစ်မှန်ပြီး သင့်လျော်သော သွေးဆက်များ ရှိကြပေသည်။

ဂလက်ဆီ အတွင်းရှိ အဆင့်နိမ့် ထုတ်ကုန်များကို အသုံးပြုသူများ သို့မဟုတ် ဘိုးဘေးများ၏ အရှိန်အဝါကို တိုက်ရိုက် မှီခိုသူများကဲ့သို့သော အခြား ကောင်းကင် ရှန့်ထို အဂ္ဂိရတ်ပညာရှင်များ နှင့် ခြားနားစွာပင်... မိုးကုပ်စက်ဝိုင်း တစ်ပါးချင်းစီတိုင်းသည် သူတို့ ကိုယ်ပိုင် လျှို့ဝှက်-ကောင်းကင် အဂ္ဂိရတ် သွေးဆက် တစ်ခုစီကို ပိုင်ဆိုင်ထားသော အဂ္ဂိရတ်ပညာရှင်များ ဖြစ်ကြလေသည်။

သူ ချက်ချင်း သံသယ ဝင်သွားခဲ့ပေသည်။ စူးဟောင်ရန်က သူ့ကို ဘွဲ့အမည်ဖြင့် ခေါ်ဝေါ်လေ့ အလွန် ရှားပါးလှပေသည်။ သူသည် သူ့ကို အမြဲလိုလို အစစ်အမှန် နာမည်ဖြစ်သော လုံရှီယာ ဟုသာ ခေါ်ဝေါ်လေ့ ရှိသည်။ သူက အတည်တကျ ပြောနေသည့်ပုံ ရလေသည်။

ထို့အပြင်... စူးဟောင်ရန်သည် မိုးကုပ်စက်ဝိုင်း အဂ္ဂိရတ် ရှန့်ထိုများနှင့် ကစားရဲမည် မဟုတ်ကြောင်း သေချာသည်။ ထို့ကြောင့်ပင် လုံရှီယာသည် စူးဟောင်ရန် ၏ ရည်ရွယ်ချက်ကို ဆက်လက် မေးခွန်းထုတ်ခြင်း မပြုခဲ့ချေ။

"ဘယ်အချိန်လဲ..."

သူ၏ မျက်နှာအမူအရာက လေးနက်သည့် အသွင်သို့ ပြောင်းလဲ သွားခဲ့၏။

"အခုပဲ..."

စူးဟောင်ရန်က နေရာတစ်ခုကို ညွှန်ပြလိုက်လေသည်။ ရွှေရောင် ညဉ့်ဦးယံ အရှင်သခင် က ထိုအရပ်သို့ လှမ်းကြည့်လိုက်လေသည်။ သူမသည် အရောင် ခုနစ်မျိုးရှိသော ဂြိုဟ်တစ်လုံးကို ရှာတွေ့သည်အထိ ချဲ့ကြည့်ရင်း၊ ဂလက်ဆီ စောင့်ကြည့်ရေး မျက်လုံး အစီအရင် ကို အသုံးပြုလိုက်ချိန်တွင် သူမ၏ မျက်လုံးများ တောက်ပသွားလေသည်။ ၎င်းသည် လူလုပ်ဂြိုဟ်တစ်လုံး ဖြစ်ကာ အဂ္ဂိရတ် စွမ်းအား ဖြင့် လုံးလုံးလျားလျား ဖန်တီးထားခြင်း ဖြစ်သည်။

"မိုးကုပ်စက်ဝိုင်း ကမ္ဘာပဲ..."

သူမ၏ မျက်လုံးများ ပြူးကျယ်သွားလေတော့သည်။

***

အပိုင်း(၂၃၄၈)

“မိုးကုပ်စက်ဝိုင်းကမ္ဘာ..”

တစ်ချိန်တည်း၌... လုံရှီယာ ၏ နှလုံးသားသည် မယုံကြည်နိုင်မှုများဖြင့် အပြင်းအထန် ခုန်ပေါက်သွားလေသည်။ သူ ချက်ချင်းပင် မျက်လုံးများကို မှိတ်ကာ သူ၏ အစစ်အမှန် ခန္ဓာကိုယ်နှင့် ဆက်သွယ်လိုက်လေသည်။ သူ၏ ကိုယ်ပွား မှာ အံ့သြဖွယ်ကောင်းလောက်အောင် အသက်မဲ့သွားခဲ့ပေသည်။

ဤအရာကို မြင်လိုက်ရသဖြင့် စူးဟောင်ရန် က အနည်းငယ် ခေါင်းညိတ်လိုက်လေသည်။ မိုးကုပ်စက်ဝိုင်း ကမ္ဘာ သည် လူလုပ် ဂြိုဟ်တစ်လုံး ဖြစ်သည်။ သို့သော်လည်း... ၎င်းကို ဝိညာဉ် အစီအရင် တစ်ခုဖြင့် ဖန်တီးထားခြင်း ဖြစ်ပေသည်။

ထိုဂြိုဟ်ကို ဖန်တီးရန် မိုးကုပ်စက်ဝိုင်း ခုနစ်ပါးစလုံး၏ ဝိညာဉ်စွမ်းအား နှင့် သီးသန့် သန့်စင်ထားသော အသန့်စင်ဆုံး မြူနှင်း များကို ပူးပေါင်းပါဝင်ရန် လိုအပ်သည်။ ၎င်းသည် အစွမ်းကုန် ပေါင်းစည်းခြင်း စိတ်အာရုံ နယ်မြေ နှင့် အလွန် ဆင်တူသော စင်မြင့်တစ်ခုအဖြစ် လုပ်ဆောင်ပေးလေ့ ရှိသည်။ ၎င်းသည် အချိန်ကြာမြင့်စွာ မတည်တံ့နိုင်သော်လည်း၊ ၎င်း တည်တံ့နေစဉ်အတွင်း ၎င်းအပေါ်သို့ ခြေချခွင့်ရလောက်အောင် ကံကောင်းသော မည်သည့် အဂ္ဂိရတ်ပညာရှင် မဆို ကောင်းကင်ဘုံနှင့် နှိုင်းယှဉ်နိုင်သည့် အခွင့်အရေး တစ်ခုကို ပေးသနားခံရမည် ဖြစ်ပေသည်။

၎င်းတို့ကို ဖော်ပြရန် အလွန်တရာ အချိန်ကြာမြင့်စွာ ယူခဲ့ရသော်လည်း၊ ဝေ့ဝူယင် တန်ပြန် စိန်ခေါ်မှုကို ကြေညာခဲ့သည့် အချိန်မှစ၍ ယခုအချိန်အထိ၊ လက်တွေ့တွင် စက္ကန့်အနည်းငယ်သာ ကုန်ဆုံးခဲ့သေးပေသည်။ သေမျိုးများ အတွက်မူ ဤသည်မှာ မျက်တောင် အနည်းငယ် ခတ်လိုက်ရုံထက် သိပ်မပိုသော်လည်း၊ လျှို့ဝှက် အာဏာရှင် အဆင့် ၏ အထက်ပိုင်း အဆင့်ရှိ သူများနှင့် အထွတ်အထိပ် သူတော်စင်များ အတွက်မူ၊ ၎င်းသည် ဂလက်ဆီ တစ်ခုခွဲ၏ ကံကြမ္မာကို ဆုံးဖြတ်ရန် လုံလောက်နေခဲ့ပြီ ဖြစ်လေသည်။

ဝေ့ဝူယင်သည် လောကဖိအား များကို ဆက်လက် ထုတ်လွှတ်နေခဲ့၏။ သူသည် သာမန် အမြင်အာရုံအရ လွယ်ကူစွာဖြင့် မိုးကုပ်စက်ဝိုင်း မျှော်စင် ခြောက်ခု၏ ကောင်းကင် စွမ်းအား ကို ကာကွယ်နေသော်လည်း၊ အတွင်းပိုင်းတွင်မူ သူ၏ ကြယ်တာရာ ဝိညာဉ် လေးခုစလုံးသည် အမြင့်ဆုံး အရှိန်ဖြင့် အလုပ်လုပ်နေရပေသည်။

သူတို့သည် ကျောက်စရစ်ခဲ တစ်လုံးကို နောက်သို့ တွန်းထုတ်ရန် ကြိုးစားနေသော ပုရွက်ဆိတ် လေးကောင်နှင့် မည်သို့မျှ မကွာခြားချေ။ ၎င်းမှာ အလွန်တရာ ခက်ခဲလှပေသည်။

ရဲတင်းယောင်ဆောင်မှုများနှင့် လွယ်ကူဟန်ဆောင်မှုများ အားလုံးသည် ကောင်းစွာ ဖန်တီးထားသော ဟန်ဆောင်မှု တစ်ခုသာ ဖြစ်လေသည်။ သူ၏ ကျင့်ကြံခြင်း အဆင့်သည် လျှို့ဝှက် ကြယ်တာရာ အဆင့် သို့ ရောက်ရှိနေပြီ ဖြစ်သော်လည်း၊ အုတ်မြစ်ကို အမြင့်ဆုံး အတိုင်းအတာအထိ ရောက်အောင် မမြှင့်တင်ရသေးချေ။

"ဂါး... ငါ... ဒါကို... မုန်းတယ်..."

ခရာတို က မည်သည့်အရာကိုမျှ တားဆီးမထားဘဲ ငြီးတွားလိုက်လေသည်။

"သူတို့ကို ချေမွပစ်... သူတို့ကို ချေမွပစ်... သူတို့ကို ချေမွပစ်..."

အိုရီ သည် ပုံမှန်မဟုတ်ဘဲ ကြမ်းတမ်းနေပြီး၊ မိုးကုပ်စက်ဝိုင်း မျှော်စင် ခြောက်ခုကို ဆန့်ကျင်ရန် အကြမ်းဖက်မှုအတွက် အော်ဟစ်နေလေသည်။

"..."

ဘုရင်မှာမူ တိတ်ဆိတ်နေလေသည်။ ၎င်းသည် ပေါက်ကွဲထွက်တော့မတတ် အလားအလာများကို ဖိနှိပ်ထားရသည့် ခက်ခဲသော လုပ်ရပ်ကြောင့် ဤသို့ ဖြစ်ရကြောင်းကို ဝေ့ဝူယင် သိရှိထားပေသည်။

"ငါတို့ ရောက်လုနီးပါး ဖြစ်နေပြီ..."

ဧဒင်သည် လေးဦးအနက် ပို၍ ယုတ္တိရှိပြီး တာဝန်သိသော မောင်နှမ တစ်ဦးအဖြစ် စစ်မှန်စွာ လုပ်ဆောင်ရင်း အိုရီ နှင့် ခရာတို တို့ကို နှစ်သိမ့်ပေးလိုက်လေသည်။ သို့တိုင်အောင် ၎င်း၏ စကားလုံးများ အတွင်းရှိ စိတ်ပျက်ဒေါသထွက်မှုများကို ဖုံးကွယ်ရန် ခက်ခဲလှပေသည်။

ဝေ့ဝူယင်သည် စိတ်ထဲမှ ကူကယ်ရာမဲ့စွာ ပြုံးလိုက်ရုံသာ တတ်နိုင်လေသည်။ သူ လက်ရှိ ဖော်ထုတ်ထားသော လောကဖိအားများမှာ သူ၏ အစစ်အမှန် စွမ်းအားထက် သိသိသာသာ လျော့နည်းနေပေသည်။ ဤကြယ်တာရာ ဝိညာဉ်များ အတွက်မူ... သူတို့သည် ကျောက်စရစ်ခဲ တစ်လုံးကို အပိုင်းပိုင်းအစစ ဝါးစားပစ်နိုင်စွမ်းရှိသော ဝံပုလွေများ ဖြစ်နေပါလျက်နှင့် ၎င်းကို တားဆီးထားရသော ပုရွက်ဆိတ်များအဖြစ် လုပ်ဆောင်နေရသကဲ့သို့ ဖြစ်နေပေသည်။

သို့သော် ထိုအခြေအနေကို သူ ဘာလုပ်နိုင်မည်နည်း။

အမှန်စင်စစ်... သူ၏ လောကဖိအား သည် မိုးကုပ်စက်ဝိုင်း မျှော်စင်များ ကဲ့သို့သော လျှို့ဝှက်ကောင်းကင် အဆင့် ရတနာ ခြောက်ခု၏ ကောင်းကင် စွမ်းအား ကို ခုခံနိုင်စွမ်း ရှိနေခြင်း ဟူသော အချက်လေး တစ်ခုတည်းကပင် မကြုံစဖူးသော စွမ်းဆောင်ရည် တစ်ရပ် ဖြစ်နေခဲ့ပြီ ဖြစ်လေသည်။

အကယ်၍ သူသာ သူ၏ လောကနယ်မြေ ကို ဖြန့်ကျက်လိုက်မည် ဆိုလျှင်...

ဝှစ်... ဝှစ်...

ရုတ်တရက် မိုးကုပ်စက်ဝိုင်း မျှော်စင်များ ၏ ကောင်းကင် စွမ်းအား သည် ဒီရေ ဆုတ်သွားသကဲ့သို့ နောက်ဆုတ်သွားခဲ့လေသည်။ စောင့်ကြည့်နေသူများမှာ ဤအပြောင်းအလဲကြောင့် အံ့အားသင့်သွားခဲ့ကြပေသည်။

အခြေအနေ ပြောင်းလဲသွားကြောင်း ပြသနေသည့် ဤအားတက်ဖွယ် လက္ခဏာကို မြင်တွေ့လိုက်ရပြီးနောက်၊ ဝေ့ဝူယင်သည် လေတစ်ချက်ကို ရှူသွင်းလိုက်သကဲ့သို့ သူ၏ လောကဖိအား ကို ကျွမ်းကျင်စွာ ပြန်လည် ရုပ်သိမ်းလိုက်လေသည်။ ထိုသို့ ပြုလုပ်ပြီးနောက် သူ၏ အတွင်း၌ ဆူပွက်နေသော အော်ရာသည် လုံးဝ ပေါက်ကွဲထွက်တော့မည့်ဆဲဆဲ ဖြစ်နေသည်ကို ခံစားလိုက်ရပြီး သူ မျက်မှောင်မကြုတ်ဘဲ မနေနိုင်အောင် ဖြစ်သွားခဲ့ရပေသည်။ ဤမျက်နှာအမူအရာကို စောင့်ကြည့်နေသူများက ချက်ချင်းပင် သတိပြုမိသွားကြ၏။ သူတို့သည် ထိပ်တန်း အဆင့် အာရုံခံနိုင်စွမ်းများမှတစ်ဆင့် အမျိုးမျိုးသော အတွေးများနှင့် ကြုံရာကျပန်း ကောက်ချက်ချမှုများကို ဖန်တီးလိုက်ကြလေသည်။

ဝေ့ဝူယင်သည် အာရုံစိုက်မှုကို များပြားလွန်းအောင် ဆွဲဆောင်နေခဲ့ပြီး၊ အနည်းငယ်မျှသော အမှားအယွင်းလေး တစ်ခုတောင် မရှိစေရန် သူ၏ လှုပ်ရှားမှုတိုင်းကို ထပ်ခါတလဲလဲ ခွဲခြမ်းစိတ်ဖြာခြင်း ခံနေရပေသည်။

ရုတ်တရက်...

"မိုးကုပ်စက်ဝိုင်း မျှော်စင် ခုနစ်ခု ရဲ့ မိုးကုပ်စက်ဝိုင်းတွေ အနေနဲ့ ကျုပ်ကို ခင်ဗျားတို့ရဲ့ ဆန္ဒ အကောင်အထည်ဖော်သူ အဖြစ် ဆောင်ရွက်ခွင့် ပြုဖို့ တောင်းဆိုပါတယ်... ကျုပ်တို့ရဲ့ ကြီးမြတ်တဲ့ ဂလက်ဆီမှာရှိတဲ့ မူလ ပြိုင်ဘက်ကင်း ဂိုဏ်း ရဲ့ တည်ထောင်သူ ဘိုးဘေး စက်ဆုပ်ဖွယ် ကောင်းကင် ဖြစ်တဲ့ ကျုပ်ကို ခင်ဗျားတို့ ကိုယ်စား ဆောင်ရွက်ခွင့် ပြုပြီး လောကရှန့်ထို အာရုဏ်ဦး ရဲ့ စိန်ခေါ်မှုကို လက်ခံခွင့် ပြုပါ..."

ခိုင်မာပြီး လေးလံကာ မုန်တိုင်းတစ်ခုအလား ပြင်းထန်သော အသံကြီး တစ်ခုသည် သေမျိုးများနှင့် ကျင့်ကြံခြင်းတွင် လုံးလုံးလျားလျား အာရုံစိုက်နေသူများမှလွဲ၍ မရေမတွက်နိုင်သော သူများ ကြားသိနိုင်ရန် ဂလက်ဆီ တစ်ခွင်လုံး မိုးခြိမ်းသံအလား ပဲ့တင်ထပ်သွားလေသည်။

အလွန်အမင်း ချောမောခန့်ညားပြီး၊ အဆုံးစွန်သော ယောက်ျားပီသမှုများကို ထုတ်လွှတ်ကာ၊ တောင်တန်းကြီးတစ်ခုအလား ကြီးမားသော အော်ရာဖြင့် တုန်ခါနေသည့် ဧရာမ အမျိုးသားကြီး တစ်ဦးသည် သံချပ်ကာကောင်းချီး ကြယ်ကွင်းပြင် ၏ ကောင်းကင် နယ်နိမိတ်များမှ မိုင်ပေါင်း သိန်းဂဏန်းအနည်းငယ် အကွာသို့ ရောက်ရှိလာခဲ့ပေသည်။ သူသည် အရပ် ရှစ်ပေခန့်သာ ရှိသော်လည်း၊ ကီလိုမီတာ ရာပေါင်းများစွာ မြင့်မားပြီး အရွယ်အစားနှင့် ပမာဏအရ အချို့သော ဂြိုဟ်များကိုပင် ကျော်လွန်နေသည့် ခိုင်မာသော ဝိညာဉ် ကိုယ်ပွားကြီး တစ်ခုကို ထုတ်ဖော်ပြသထားလေသည်။

ဤသည်မှာ အစစ်အမှန် ဆင်းတု ကိုယ်ပွား ပင် ဖြစ်သည်။ ၎င်းမှာ ဝိညာဉ် ဆင်းတု အဆင့် ကျင့်ကြံသူများ၏ ထူးခြားသော ကျင့်ကြံခြင်း စွမ်းရည် မဟုတ်ဘဲ၊ အစစ်အမှန် ဝိညာဉ် အဆင့် နှင့် ပဲ့တင်ထပ် ဝိညာဉ် အဆင့် ကျင့်ကြံသူများသာ ထုတ်လွှတ်နိုင်စွမ်းရှိသော ဝိညာဉ်ချီ သိုင်းပညာ တစ်မျိုး ဖြစ်လေသည်။ ၎င်းသည် တိုက်ပွဲရှုထောင့်မှ ကြည့်လျှင် သိပ်ပြီး လက်တွေ့မကျသော်လည်း၊ ကောင်းကင်ဘုံ၏ စွမ်းအား တစ်စိတ်တစ်ပိုင်းကို စုပ်ယူထားသော နတ်ဘုရား တစ်ပါးနှင့် ဆင်တူကာ အလွန်တရာ မေ့ဖျောက်၍မရနိုင်သော ခမ်းနားသည့် ပုံရိပ်တစ်ခုကို ဖန်တီးပေးထားပေသည်။

မူလအာရုဏ်ဦး နန်းတော် အတွင်းရှိ အမျိုးမျိုးသော လောကငယ် နေရာများတွင်... ဖြစ်ပေါ်လာသော အဖြစ်အပျက်များကို စောင့်ကြည့်နေကြသော ဝေ့ရှောင်ထျန်း၊ ယွီစွန်းလီ၊ ချင်ချူးမူ၊ ချောင်စွေ့ဖုန်း၊ လျူစုယင်နှင့် ရှီနင်တို့ အားလုံး၏ နှလုံးသားများသည် တစ်ပြိုင်နက်တည်း လေးလံ သွားကြလေသည်။ လုံရှီယာ ကို မြင်တွေ့လိုက်ရခြင်းက နက်ရှိုင်းသော အံ့အားသင့်မှု ခံစားချက်များကို ဖြစ်ပေါ်စေခဲ့ပေသည်။

“ငါ့ယောကျ်ား..."

ချောင်စွေ့ဖုန်း သည် အလွန်တရာ ရှည်လျားလှသော အချိန်ကာလ တစ်ခုအတွင်း ပထမဆုံးအကြိမ်အဖြစ် မသေချာမရေရာ ဖြစ်သွားခဲ့လေသည်။ ဝေ့ဝူယင်၏ အစီအစဉ်က အထွတ်အထိပ် သူတော်စင် တစ်ပါးကို တိုက်ခိုက်ရန်လော။ သူမသည် ဝေ့ဝူယင်အပေါ် အကြွင်းမဲ့ ယုံကြည်မှု ရှိသော်လည်း၊ ပဲ့တင်ထပ် ဝိညာဉ် အဆင့် ဟူသော သဘောတရားမှာ စိတ်ကူးဖြင့်ပင် မှန်းဆ၍မရနိုင်လောက်အောင် ကြောက်မက်ဖွယ် ကောင်းလှသည်။ ဝိညာဉ် ကိုယ်ပွားတစ်ခုမှတစ်ဆင့် သူတို့၏ ခမ်းနားထည်ဝါမှုကို မြင်တွေ့လိုက်ရခြင်းကပင်လျှင် ဖော်ပြ၍မရနိုင်လောက်အောင် ထိတ်လန့်ဖွယ် ကောင်းလှပေသည်။

ဝေ့ရှောင်ထျန်းသည် ဤအခြေအနေမျိုး ဖြစ်လာမည်ကို စိုးရိမ်နေခဲ့ခြင်း ဖြစ်သည်။ ထို့ကြောင့်ပင် သူမသည် သူမ၏ ဝိညာဉ်အတွင်း အသုံးမချရသေးသော အသိပညာများ အားလုံးကို သူ့အား ပေးသနားကာ၊ ဝေ့ဝူယင်အား သူမ၏ အရာအားလုံးကို ပေးအပ်ချင်နေခဲ့ခြင်း ဖြစ်လေသည်။ အကယ်၍ သူသာ ရရှိခဲ့မည်ဆိုလျှင်၊ ကောင်းကင်အောက်ရှိ အရာအားလုံးအပေါ် နားလည်သဘောပေါက်မှုက သူ၏ အကြံအစည်များကို ပိုမို ထိရောက်စွာ လမ်းကြောင်းပြောင်းနိုင်ရန် ခွင့်ပြုပေးနိုင်မည်သာ ဖြစ်ပေသည်။

သို့သော် ထိုနေ့က ဝေ့ဝူယင်၏ စကားလုံးများကို သူမ တွေးတောလိုက်မိသောအခါ၊ စိုးရိမ်ပူပန်မှုများနှင့် ပြည့်နှက်နေသည့် သူမ၏ နှလုံးသားမှာ ပုံမှန်မဟုတ်လောက်အောင် ပြန်လည် တည်ငြိမ်ပြီး ယုံကြည်မှု ရှိလာခဲ့လေသည်။ သူမ သူ့ကို ယုံကြည်မည်သာ ဖြစ်သည်။ သူမ ယုံကြည်ရမည် ဖြစ်ပေသည်။

တစ်ချိန်တည်း၌ မည်သူမှ သတိမထားလိုက်မိသော အခိုက်အတန့်ကလေး တစ်ခု အတွင်းမှာပင် ဝေ့ဝူယင်သည် လုံရှီယာ ကို ချိန်ဆနေသော အကြည့်တစ်ချက်ဖြင့် အကဲခတ်လိုက်လေသည်။ ထို့နောက်တွင်တော့... မိုးကုပ်စက်ဝိုင်း ခုနစ်ပါးစလုံး၏ အသံသည် ညီညွတ်စွာ ပဲ့တင်ထပ် ထွက်ပေါ်လာပေသည်။ ၎င်းသည် နတ်ဘုရားများ စကားပြောဆိုနေပြီး လူတိုင်း နားထောင်ရမည့်အလား ဖြစ်နေပေသည်။

"ခွင့်ပြုတယ်..."

စကားလုံး သုံးလုံးတည်း။ သို့သော်... စောင့်ကြည့်နေသူများကို ချက်ချင်း ကယောက်ကယက် ဖြစ်သွားစေခဲ့လေသည်။ အထွတ်အထိပ် သူတော်စင် နှစ်ပါး တိုက်ခိုက်ကြတော့မည်လော။ ဘယ်နေရာမှာနည်း။ သူတို့၏ ဂလက်ဆီ အတွင်းမှာ မဟုတ်ဖို့သာ မျှော်လင့်ရပေသည်။

"မင်းကိုယ်မင်း ပြင်ဆင်ပြီးပြီလား... လောကရှန့်ထို အာရုဏ်ဦး..."

လုံရှီယာက လောကကြီးတွင် ကန့်သတ်ချက်များ ရှိနေခြင်းကို မုန်းတီးနေသည့်အလား လွှမ်းမိုးနိုင်သော အရှိန်အဟုန် တစ်ခုဖြင့် မေးမြန်းလိုက်လေသည်။