အခန်း (၂၃၅၁-၂၃၅၂)

အပိုင်း(၂၃၅၁)

အာရုဏ်ဦး နေမီးတောက် လောက ဆေးလုံး သည် သတ်မှတ်ချက်များကို သာမန် အာရုဏ်ဦး နေမီးတောက် ဆေးလုံးထက် ပိုမို မဖီဆန်ဘူး ဆိုလျှင်တောင်မှ တန်းတူညီမျှ ဖီဆန်နေပြီး၊ လျှို့ဝှက် အာဏာရှင် အောက်ခြေ အဆင့် ကျင့်ကြံသူများနှင့် ကြယ်တာရာ သခင် အဆင့် ရှိသူများကိုပင် လျှို့ဝှက်နယ်မြေ တစ်ခုကို ဖန်တီးနိုင်ရန် ခွင့်ပြုပေးလေသည်။

လျှို့ဝှက်နယ်မြေ တစ်ခုကို ပိုင်ဆိုင်ထားသော ကြယ်တာရာသခင် တစ်ပါးသည် ပြိုင်စံရှားလုနီးပါး ဖြစ်သည်။

ထို့အပြင်... လျှို့ဝှက်နယ်မြေ တစ်ခုနှင့်ဆိုလျှင်၊ လိုအပ်သော လျှို့ဝှက် သင်္ကေတ အားလုံးကို စုစည်းရန် လုံလောက်သော လျှို့ဝှက် အမတေ ကို အာရုံခံပြီး စုဆောင်းရသည့် အလွန်တရာ ခက်ခဲကြမ်းတမ်းသော ခရီးစဉ်သည် အသေးအမွှား ကိစ္စလေး တစ်ခုအဖြစ်သို့ ပြောင်းလဲသွားမည် ဖြစ်လေသည်။ သာမန် ကြယ်တာရာ သခင် အများစုကြီးကို သေဆုံးခြင်းဆီသို့ ဦးတည်သွားစေခဲ့သော အဟန့်အတားမှာ၊ သူတို့၏ နှစ်တစ်ထောင်ခန့်ရှိသော သက်တမ်းအတွင်း လျှို့ဝှက် အာဏာရှင် အဆင့်သို့ ခြေချခြင်း စတင်ရန် အတွက်ပင် လုံလောက်သော လျှို့ဝှက် အမတေ ကို မစုဆောင်းနိုင်ခြင်းပင် ဖြစ်ပေသည်။

၎င်းသည် နှုတ်မှ မထုတ်ဖော်ကြသော်လည်း 'ကျင့်ကြံခြင်းသည် ခက်ခဲလှသည်' ဟူသော စကားစုတွင် ပြီးပြည့်စုံစွာ ပေါ်လွင်နေသည့် အဖြစ်ဆိုး တစ်ခုပင် ဖြစ်လေသည်။

ဉာဏ်အလင်းရ သူတော်စင် နွေဦးကွင်းပြင် သို့မဟုတ် သူတော်စင် ရှစ်ပါးနှင့် တိုက်ခိုက်ခဲ့စဉ်က ဝေ့ဝူယင်သည် လျှို့ဝှက်နယ်မြေ ကို အသုံးမပြုခဲ့ချေ။ ၎င်းမှာ အဓိကအားဖြင့် သေမျိုး တစ်ဦးအနေဖြင့် သူတို့နှင့် မယှဉ်ပြိုင်နိုင်ခြင်းကြောင့် ဖြစ်လေသည်။ ကိုယ်ပိုင် ခွန်အား သို့မဟုတ် အရွယ်အစား မည်သို့ပင် ရှိစေကာမူ၊ လျှို့ဝှက် အာဏာရှင် အဆင့် ၏ လျှို့ဝှက်အရှင် အဆင့် သို့မဟုတ် ယင်းထက် ပိုမြင့်သော အဆင့်ရှိသူများသည် သာမန် သေမျိုး တစ်ဦးဖြစ်သော သူ ထုတ်လွှတ်နိုင်စွမ်းရှိသည်ထက် လျှို့ဝှက် စွမ်းအင် အပေါ်တွင် ပိုမို ကြီးမားသော ကြီးစိုးနိုင်စွမ်း ရှိကြမည်သာ ဖြစ်ပေသည်။

တစ်ချိန်တည်းမှာပင်... အလားတူ သဘောတရားအရ သေမျိုး အဆင့်ရှိ စွမ်းအင်များနှင့် အမတေများသည် မည်သည့် ကျင့်ကြံသူ၏ ရှေ့မှောက်တွင်မဆို သူ ထိန်းချုပ်နိုင်မည့် အရာများ အမြဲတမ်း ဖြစ်နေမည် ဖြစ်သော်လည်း၊ ၎င်းတို့သည် သူတော်စင် အဆင့်ရှိ ကျင့်ကြံသူများကို ယှဉ်ပြိုင်ရန် လုံလောက်မည် မဟုတ်ချေ။ ထို့ကြောင့်ပင် သူသည် သေမျိုး သို့မဟုတ် လျှို့ဝှက် အဆင့်ဟု ခွဲခြားဆက်ဆံခြင်း မရှိသော ဥပဒေသ အာဏာ ကိုသာ အစားထိုး အားကိုးခဲ့ရလေသည်။ ၎င်းမှာ အလွန်တရာ ထိရောက်မှု ရှိလှပေသည်။

သာလွန်ခြင်း အဆင့် အရည်အသွေး အာရုဏ်ဦး နေမီးတောက် လောက ဆေးလုံး နှင့် ပတ်သက်၍မူ၊ ၎င်းတွင် ဝေ့ဝူယင်ကိုပင် တုန်လှုပ်သွားစေလောက်သည့် မကြုံစဖူးသော အဂ္ဂိရတ် အကျိုးသက်ရောက်မှု တစ်ခု ပါဝင်နေခဲ့ပေသည်။

၎င်းသည် လောက နယ်မြေ တစ်ခု မဟုတ်တော့ချေ။

၎င်းသည် လျှို့ဝှက်နယ်မြေ တစ်ခုလည်း မဟုတ်တော့ပေ။

လျှို့ဝှက် အမြုတေ တစ်ခုစီတိုင်း၏ ထိပ်တွင်၊ ခဲတံ တစ်ချောင်းစာမျှ ပါးလွှာသော အလင်းတန်းလေး တစ်ခုသည် ထာဝရ အော်ရာ တစ်ခုကို ဖြာထွက်နေလေသည်။ ၎င်းသည် တောင့်တင်းမှု ကင်းမဲ့စွာဖြင့် အမြဲတစေ တည်ရှိနေပေသည်။ ၎င်းသည် နောက်ကျိမှု ကင်းမဲ့စွာဖြင့် သာမန်ဆန်နေလေသည်။ ၎င်းသည် မှန်းဆ၍မရနိုင်သော လျှို့ဝှက်ဆန်းကြယ်မှု တစ်ခုပင် ဖြစ်ပေသည်။

အကယ်၍ သာလွန်ခြင်း အဆင့် အာရုဏ်ဦး နေမီတောက် ဆေးလုံးက အတွင်း၌ ကိန်းအောင်းနေသော ဝိညာဉ် အလင်း ကို ဆွဲထုတ်နိုင်ပြီး နယ်မြေ၏ အရည်အသွေး၊ ပေါင်းစည်းညီညွတ်မှုနှင့် အလုံးစုံ ခွန်အားကို မြှင့်တင်ပေးနိုင်မည်ဆိုလျှင်၊ သာလွန်ခြင်း အဆင့် အာရုဏ်ဦး နေမီးတောက် လောက ဆေးလုံး သည် သေမျိုးနှင့် လျှို့ဝှက်ဆန်းကြယ်မှုတို့ကို ထာဝရ တည်တံ့ခြင်းနှင့် ဆက်သွယ်ပေးကာ၊ ထာဝရ အော်ရာ နှင့် ပဲ့တင်ထပ်စေရန် နည်းလမ်းတစ်ခုကို တည်ဆောက်ပေးခဲ့ခြင်းပင် ဖြစ်ပေသည်။ ၎င်းမှာ ထာဝရ တံတား ဟု အမည်ရလေသည်။

၎င်းသည် လျှို့ဝှက်နယ်မြေ တစ်ခု သို့မဟုတ် လောက နယ်မြေ တစ်ခု မဟုတ်တော့ဘဲ၊ ထာဝရ ပဲ့တင်ထပ် နယ်မြေ တစ်ခု ဖြစ်လာခဲ့ပြီ ဖြစ်ပေသည်။

ဝေ့ဝူယင်၏ ကြယ်တာရာ မျက်လုံးများသည် ထာဝရ တောက်ပမှု တစ်ခုဖြင့် လင်းလက်သွားပြီး၊ သူ၏ ဖြန့်ကျက်ထားသော နယ်မြေသည် ထိုနောက်ဆုံးသော မဟာတာအို ၏ မြင်တွေ့မရနိုင်သော စွမ်းအားကို ဆွဲယူ အသုံးပြုထားလေသည်။ သူ နယ်မြေကို ထုတ်လွှတ်လိုက်ရခြင်း၏ ခံစားချက်မှာ ဖော်ပြ၍မရနိုင်လောက်အောင် မူးယစ်စေလှပေသည်။ သူ၏ ကြယ်တာရာ ပါရဂွန် ခန္ဓာကိုယ် သို့မဟုတ် ထာဝရရှင်သန်ခြင်း မျက်လုံး မှတစ်ဆင့် သူ၏ ခန္ဓာကိုယ် အတွင်း၌သာ အာရုံခံနိုင်သော ထာဝရ အော်ရာ ကို ယခုအခါ သူ အလွယ်တကူ ခံစားသိရှိနိုင်နေပြီ ဖြစ်လေသည်။

ထိုအချိန်... သာလွန်ခြင်း အဆင့် အာရုဏ်ဦး နေမီးတောက် လောက ဆေးလုံး ကို သူ သန့်စင်လိုက်ချိန် ကျမှသာလျှင်... သူ ဖန်တီးခဲ့သော အတုမရှိသည့် ထုတ်ကုန်ကို သူ အမှန်တကယ် နားလည်သဘောပေါက်သွားခဲ့ခြင်း ဖြစ်လေသည်။

အတုမဲ့ ဖန်တီးခြင်း အဂ္ဂိရတ် ကြယ်တာရာများ ဆိုသည်မှာ လုံးလုံးလျားလျား ထိုက်တန်လှပေသည်။

ဤနယ်မြေသည် သာမန် အထွတ်အထိပ် သူတော်စင် အဆင့် ဖြစ်တည်မှု တစ်ခုအတွက်ပင် စွမ်းအားတစ်ခု မဟုတ်ကြောင်း ဝေ့ဝူယင် သိရှိထားလေသည်။ ပြောရလျှင်... သူသည် အာရုဏ်ဦး နေမီးတောက် ဆေးလုံး ကဲ့သို့ ကျင့်ကြံခြင်း အဆင့် တစ်ခုအတွင်း နောက်ထပ် တစ်ဆင့် နှင့် ခပ်လျော့လျော့ ဆက်စပ်နေရုံမျှသာ မဟုတ်ပဲ ကျင့်ကြံခြင်း အဆင့် တစ်ခုလုံး၏ သတ်မှတ်ချက်များကို ဖီဆန်လောက်သည့် ထုတ်ကုန်တစ်ခုကို အမှတ်မထင် ဖန်တီးမိသွားခဲ့ခြင်း ဖြစ်ပေသည်။

ထို့အပြင် ၎င်းသည် အဆင့် တစ်ဆင့်တည်းသာ မဟုတ်ဘဲ၊ အဆင့် တစ်ဆင့်ခွဲခန့်အထိပင် ဖြစ်နိုင်ချေ ရှိပေသည်။

ဤသည်ကား သူ၏ ထက်မြက်မှုပင် ဖြစ်လေသည်။ ဤသည်ကား သူ၏ ဖီဆန်မှုပင်။ ဤသည်ကား သူ၏ ပြိုင်ဘက်ကင်းသော ဖန်တီးမှုပင် ဖြစ်ပေတော့သည်။

လုံရှီယာသည် နောက်ဆုံးတွင် သူ၏ စိတ်ကို ပြန်လည် ထိန်းချုပ်လိုက်နိုင်ပြီး၊ သူ၏ ပဲ့တင်ထပ် ချီ ကို ဖြည်းညင်းစွာ စုစည်းကာ တွင်းကြီးထဲမှနေ၍ သူ့ကိုယ်သူ ပြန်လည် မြှင့်တင်လိုက်သည်။ သူ၏ အော်ရာသည် လောကနယ်မြေ အတွင်း စိတ်ကူးဖြင့် မှန်းဆ၍ မရနိုင်သည့် စွမ်းအားတိုင်းကို ပုံပျက်သွားစေ၏။ သူ၏ မျက်လုံးများမှာ ရန်လိုစွာ အေးစက်နေကာ ပြင်းထန်လွန်းလှပေသည်။

သူက စကားလုံးတိုင်းကို ပီပီသသ အသံထွက်ရင်း ဖြည်းညင်းစွာ စကားပြောလိုက်ရာ၊ သူ၏ အသံမှာ အာကာသနှင့် အချိန် အားလုံးကို ဝင်တိုက်နေသည့် မိုးကြိုးပစ်သံ တစ်သန်း၏ စွမ်းအားဖြင့် ဟိန်းဟောက်နေပေသည်။

"မင်း... ဘယ်သူ... လဲ..."

ဝေ့ဝူယင်၏ မျက်လုံးများ စူးရှသွားလေသည်။ ရှေ့သို့ ခြေတစ်လှမ်း လှမ်းလိုက်သည်နှင့်အတူ သူ၏ လျှို့ဝှက် ကြယ်တာရာ အဆင့် အော်ရာသည် အပြည့်အဝ ပေါက်ကွဲထွက်လာပြီး၊ ကုန်းမြေ အစိတ်အပိုင်းကို တစ်လက်မခန့် လျော့ကျသွားစေကာ အောက်ဘက်သို့ ရက်စက်စွာ ဖိသိပ်သွားစေခဲ့လေသည်။ သူက အမိန့်ပေးသည့် စကားလုံး အနည်းငယ်ဖြင့်သာ ပြန်လည် ဖြေကြားလိုက်၏။

"ဒူးထောက်မလား... တိုက်မလား…”

လုံရှီယာက အေးစက်စွာ ရယ်မောလိုက်လေသည်။ ဆူပွက်နေသော ဒေါသသည် အာကာသ လှိုင်းဂယက်များအဖြစ် ထွက်ပေါ်လာသော်လည်း၊ ထာဝရ ပဲ့တင်ထပ် နယ်မြေ ကြောင့် ကမ္ဘာကို ပုံပျက်သွားစေနိုင်သော ထိုလွှမ်းမိုးနိုင်စွမ်းမှာ ပြင်းထန်စွာ ကန့်သတ်ခံလိုက်ရသည်။ ပြောရလျှင်... ကောက်ရိုးအိမ် တစ်လုံးကိုပင် ပြိုကျအောင် မလုပ်နိုင်သော အနံ့ဆိုးထွက်သည့် လေလည်ခြင်း တစ်ခုနှင့်သာ တူညီနေပေသည်။

ဤရလဒ်ကို မြင်လိုက်ရသောအခါ သူ၏ ရယ်မောသံမှာ တိတ်ဆိတ်သွား၏။ အလွန်အမင်း ပြင်းထန်စွာ တောက်ပနေသော အကြည့်တစ်ခုနှင့်အတူ သူ၏ အမူအရာက လေးနက် မည်းမှောင် သွားခဲ့လေသည်။

သူ၏ ဝိညာဉ်အမြင်ဖြင့် ကြည့်လျှင်၊ ထာဝရ ပဲ့တင်ထပ် နယ်မြေ သည် အထွတ်အထိပ် သူတော်စင် တစ်ပါးထံမှ ထွက်ပေါ်လာသော အရာတစ်ခုအလား ခံစားရသည်။ ထို့အပြင်... ၎င်းက သူ၏ အော်ရာနှင့် လှုပ်ရှားမှုများကို ဖိနှိပ်ထားနိုင်စွမ်း ရှိကြောင်း အလွန် သိသာထင်ရှားနေသည်။

သို့သော်လည်း... သူ၏ ရှေ့မှောက်ရှိ ကြယ်တာရာ မျက်လုံးများဖြင့် အလွန် ချောမောနေသော လောကရှန့်ထို အဂ္ဂိရတ်ပညာရှင်မှာ အခြားသော မည်သည့် အဆင့် သို့မဟုတ် နယ်ပယ်၏ အရည်အသွေးများမှ မပါဝင်ဘဲ လျှို့ဝှက် ကြယ်တာရာ အဆင့် ၏ အော်ရာကိုသာ ငြင်းဆန်၍မရနိုင်လောက်အောင် ထုတ်လွှတ်နေပေသည်။ ၎င်းမှာ အားအနည်းဆုံးသော လျှို့ဝှက်အာဏာရှင် အဆင့်များ မြင်တွေ့နိုင်လောက်အောင်ပင် သိသာထင်ရှားနေလေသည်။

လုံရှီယာ စိတ်ရှုပ်ထွေးသွားပြီး လုံးလုံးလျားလျား တွေဝေသွားခဲ့လေသည်။ အခြား အထွတ်အထိပ် သူတော်စင် တစ်ပါးများ ရှိနေသလော ။ ၎င်းမှာ ထူးခြားသော ကျင့်စဉ် နည်းလမ်း သို့မဟုတ် ရတနာ တစ်ခု၏ ရလဒ်များ ဖြစ်နေမည်လော။ သူသည် မည်သည့် အဖြေတစ်ခုကိုမျှ တိကျစွာ မဆုံးဖြတ်နိုင် သို့မဟုတ် အတည်မပြုနိုင်ခဲ့ချေ။ ထို့အပြင်... အခြားသော အဖြေတစ်ခုခုကို ညွှန်ပြနေသည့် သက်သေအထောက်အထား အားလုံးသည် သူ၏ ကိုယ်ပိုင် အာရုံခံစားမှုများနှင့် ကျင့်ကြံခြင်းဆိုင်ရာ အသိပညာများကြောင့် ချက်ချင်းပင် ချေပခံလိုက်ရခြင်း ဖြစ်လေသည်။

ရိုးရှင်းစွာ ပြောရလျှင် ဤသည်မှာ လုံးဝ မဖြစ်နိုင်ချေ။

ဥပဒေသများလော။ မဟုတ်ပေ။

ရည်ရွယ်ချက်လော။ မဟုတ်ချေ။

ကောင်းကင် ရတနာများလော။ မဖြစ်နိုင်ပေ။

ပုံမှန်မဟုတ်သော ကျင့်ကြံခြင်း လမ်းကြောင်းလော။ ဖြစ်နိုင်ချေ မရှိလှချေ။

လျှို့ဝှက် ကြယ်တာရာ အဆင့် ကျင့်ကြံသူ တစ်ဦး၏ ခန္ဓာကိုယ် အတွင်း၌ ခိုအောင်းနေသည့် အထွတ်အထိပ် သူတော်စင် တစ်ပါး၏ ဝိညာဉ်ပူးကပ်ခြင်း မှော်အစီအရင် များ ဖြစ်နေမည်လော ဟုသာ နောက်ဆုံး တွေးမိလေသည်။

၎င်းမှာ ဖြစ်နိုင်ချေ အမြင့်ဆုံး ဖြစ်သော်လည်း၊ ဝိညာဉ် အာရုံခံနိုင်စွမ်း ဖြင့်ဆိုလျှင် ရှန်ဝမ်ချင်း၏ အတွင်း၌ ဝေ့ဝူယင် အာရုံခံမိခဲ့သကဲ့သို့ ကွဲပြားခြားနားသော ဝိညာဉ် အော်ရာ နှစ်ခုကို သူ အာရုံခံနိုင်စွမ်း ရှိရမည် ဖြစ်ပေသည်။

လုံရှီယာ မသိလိုက်သည်က အလွယ်ကူဆုံး ကောက်ချက်မှာ အမှန်ကန်ဆုံး ဖြစ်ပေသည်။ ဝေ့ဝူယင်သည် လျှို့ဝှက် ကြယ်တာရာ အဆင့် ကျင့်ကြံသူ တစ်ဦးပင် ဖြစ်လေသည်။

သို့သော်... လုံရှီယာအတွက်မူ၊ ဤကောက်ချက်မှာ ရိုးရှင်းခြင်း မရှိဘဲ၊ ဘယ်သောအခါမျှ မဖြစ်ပေါ်နိုင်သည့် လုံးလုံးလျားလျား မဖြစ်နိုင်သော အရာတစ်ခုပင် ဖြစ်နေပေသည်။ ကျင့်ကြံခြင်း လမ်းစဉ် အပေါ် မရေမတွက်နိုင်သော နှစ်ပေါင်းများစွာကြာ နားလည်သဘောပေါက်မှုများက ထိုအရာကို တားဆီးထားခဲ့လေသည်။ သူ ခြေလှမ်း တစ်သောင်းခန့် နောက်ဆုတ်ကာ၊ သေမျိုး အဆင့်များ ၏ ကန့်သတ်ချက်များနှင့်အညီ သူတို့၏ အခြေခံအုတ်မြစ်ကို အမြင့်ဆုံး အတိုင်းအတာအထိ မြှင့်တင်ထားသော ဖြစ်တည်မှုတစ်ခု၏ အလားအလာရှိသော စွမ်းအားကို ချိန်ဆကြည့်မည် ဆိုလျှင်တောင်မှ၊ လျှို့ဝှက် ကြယ်တာရာ အဆင့် ဖြင့် အထွတ်အထိပ် သူတော်စင် တစ်ပါးကို ယှဉ်ပြိုင်နိုင်စွမ်းရှိမည့် ဖြစ်တည်မှုမျိုးကို သူ စိတ်ကူးဖြင့်ပင် မှန်းဆနိုင်မည် မဟုတ်ချေ။ ဥပမာအားဖြင့်၊ ထိုလမ်းကြောင်းကို လိုက်ပါခဲ့ဖွယ်ရှိသူ စုရီ သည် လျှို့ဝှက် အရှင် တစ်ပါး ဖြစ်လာပြီးမှသာ အထွတ်အထိပ် သူတော်စင် တစ်ပါး၏ ခွန်အားကို ရရှိခဲ့ခြင်း ဖြစ်လေသည်။

ဝေ့ဝူယင် ရရှိခဲ့သော အမျိုးမျိုးသော စွမ်းဆောင်ရည်များ၊ မဟာ အဆင့် လောကရှန့်ထို အဂ္ဂိရတ်ပညာရှင် ဟူသော သူ၏ အဆင့်အတန်း၊ ဥပဒေသ အာဏာ များစွာကို ပိုင်ဆိုင်ပြီး ခြယ်လှယ်နိုင်သော ခွန်အား... ဤအရာများ အားလုံးက နှစ်ပေါင်းများစွာ တိုင်အောင် အသက်ရှင် နေထိုင်ခဲ့ပြီး ဖြစ်သည့် အထွတ်အထိပ် သူတော်စင် သို့မဟုတ် အထွတ်အထိပ် တက်လှမ်းပြီးသူ တစ်ဦးဆီသို့သာ ညွှန်ပြနေခဲ့ပေသည်။ လျှို့ဝှက် ကြယ်တာရာ အဆင့် တွင် ရှိနေသူများသည် အလွန်ဆုံးမှ နှစ်ပေါင်း ထောင်ဂဏန်း အနည်းငယ်ခန့်သာ သက်တမ်း ရှိနိုင်လေသည်။

ထို့အပြင်... အစွမ်းကုန် သန့်စင်ခြင်း ဂလက်ဆီ တွင် မွေးဖွားကြီးပြင်းလာသော မည်သည့် ကျင့်ကြံသူ တစ်ဦးတစ်ယောက်ကမျှ ဤအရာနှင့် ကွဲလွဲစွာ တွေးတောလိမ့်မည် မဟုတ်ချေ။

အသက်အရွယ်အားဖြင့် နှစ်ပေါင်း သောင်းဂဏန်း သို့မဟုတ် သိန်းဂဏန်းခန့် ရှိသော အထွတ်အထိပ် သူတော်စင်၊ ဉာဏ်အလင်းရ သူတော်စင်၊ အစစ်အမှန် သူတော်စင် သို့မဟုတ် လျှို့ဝှက် အရှင် တစ်ပါးကသာလျှင် သာလွန် သန့်စင် အဂ္ဂိရတ် ကြယ်တာရာများ ကို ရရှိပြီး မဟာ လောကရှန့်ထို အဂ္ဂိရတ်ပညာရှင် ဘွဲ့အမည်ကို ရယူနိုင်ပေလိမ့်မည်။

နှစ်ပေါင်း ထောင်ဂဏန်း အနည်းငယ်သာ ရှိသေးသော၊ သို့မဟုတ် ယင်းထက်ပင် ငယ်ရွယ်နိုင်သေးသော ကျင့်ကြံသူ တစ်ဦး ဆိုသည်မှာ... မှန်းဆ၍ မရနိုင်ချေ။ လုံးလုံးလျားလျား မှန်းဆ၍ မရနိုင်လောက်အောင်ပင် ဖြစ်လေသည်။

မည်သို့ပင် ဆိုစေ... လုံရှီယာသည် ဤပုံမှန်မဟုတ်သော ဖြစ်တည်မှု၏ တိုက်ကွက် သုံးကွက်ကို ခုခံရန် သဘောတူညီချက်ဖြင့် ချည်နှောင်ခံထားရပြီ ဖြစ်လေသည်။

***

အပိုင်း(၂၃၅၂)

"ခင်ဗျား စိတ်တည်ငြိမ်သွားပြီလား..."

ဝေ့ဝူယင်က မေးလိုက်လေသည်။ လုံရှီယာ၏ စိတ်ပိုင်းဆိုင်ရာ အခြေအနေတွင် များပြားလှသော ဟာကွက်များ ရှိနေပေသည်။ ၎င်းတို့သည် အခွင့်အရေး ယူရန် အလွန် သင့်တော်နေသော်လည်း၊ ထိုအရာက သူ၏ ရည်ရွယ်ချက်ကို အကောင်အထည်ဖော်ရန် သိပ်ပြီး အထောက်အကူ မပြုသောကြောင့်၊ ဤ အထွတ်အထိပ် သူတော်စင်အား စိတ်ခံစားချက်များနှင့် လိုက်လျောညီထွေ ဖြစ်အောင် ပြင်ဆင်ရန် ဝေ့ဝူယင်က တိတ်ဆိတ်စွာ အချိန်ပေးထားလိုက်လေသည်။

လုံရှီယာသည် လေကို ညင်သာစွာ ရှူသွင်းလိုက်ပြီး၏။ ထို့နောက်... ချီ မုန်တိုင်းတစ်ခုကို ဟိန်းဟောက် ထုတ်လွှတ်လိုက်သော်လည်း၊ ၎င်း၏ ကြီးမားလှသော ခွန်အား ရှိနေသည့်တိုင် ဤနယ်မြေ အတွင်းရှိ သဘာဝ ပတ်ဝန်းကျင် စွမ်းအင်များကို မလှုပ်ရှားစေနိုင်ခဲ့ချေ။ ထို့နောက်တွင်တော့ သူသည် မလိုအပ်သော အတွေးများ အားလုံးကို စွန့်ပစ်လိုက်ပြီး သူ၏ ရှေ့မှောက်ရှိ ပြိုင်ဘက်အပေါ်သို့သာ အာရုံစိုက်လိုက်လေသည်။

လုံရှီယာ မိုးကုပ်စက်ဝိုင်းများက ကမ်းလှမ်းခဲ့သော စည်းစိမ်ချမ်းသာများကို သူ့ကိုယ်သူ ပြန်လည် သတိပေးလိုက်သည်။ ၎င်းတို့မှာ သူ့ကဲ့သို့သော ကောင်းကင်ငယ် တမန်တော် အဆင့် အထွတ်အထိပ် သူတော်စင် တစ်ပါးကိုပင် စိတ်လှုပ်ရှားသွားစေရန် လုံလောက်လှပေသည်။

သို့သော်လည်း... သူသည် လူမိုက် တစ်ယောက် မဟုတ်ချေ။ ဤနယ်ခြားသားသည် အစွမ်းကုန် သန့်စင်ခြင်း ဂလက်ဆီ သို့ ခြေချကတည်းက လှုံ့ဆော်ရန် ကြိုးစားနေခဲ့သော အရာတစ်ခု ပင် ဖြစ်လေသည်။ ဤနေရာ၌ ဖြစ်ပျက်ခဲ့သမျှကို လျှို့ဝှက်ထားရန်အတွက် လျှို့ဝှက်ကျိန်စာ ကို ချက်ချင်း အလိုရှိနေပြီး စောင့်ကြည့်သူ အားလုံးကို တိုက်ရိုက် ပိတ်ဆို့လိုက်သည်ကို ထောက်ရှုလျှင်၊ ဤသည်မှာ သူ၏ ရည်ရွယ်ချက်များကို ဖုံးကွယ်ရန် ကြိုးပမ်းနေခြင်း ဖြစ်ကြောင်း အဓိပ္ပာယ်သက်ရောက်လေသည်။

"ကျုပ်ရဲ့ တည်ငြိမ်မှုကို ဆုံးရှုံးသွားတဲ့အတွက် တောင်းပန်ပါတယ်... ခင်ဗျားရဲ့ မှန်းဆလို့မရတဲ့ အခြေအနေက ကျုပ်ကို ခဏတာ တွေဝေသွားစေခဲ့တယ်..."

လုံရှီယာသည် လူမိုက် တစ်ဦး၏ အမှတ်အသားကို ယာယီ စွန့်ပယ်လိုက်ပြီး၊ အထွတ်အထိပ် သူတော်စင် တစ်ပါး၏ ပြိုင်ဘက်ကင်းသော ဟန်ပန်နှင့် ယုံကြည်မှုကို ထုတ်ဖော်ပြသလိုက်လေသည်။ သူသည် လက်ရှိ အဆင့်သို့ ရောက်ရှိရန် ကျင့်ကြံခဲ့ရာတွင် ဉာဏ်ရည်ဉာဏ်သွေး၊ ကောက်ကျစ်စဉ်းလဲမှု၊ ကျက်သရေ သို့တည်းမဟုတ်... သတိထားမှုတို့ ကင်းမဲ့နေခဲ့ခြင်း မဟုတ်ချေ။

အထွတ်အထိပ် သူတော်စင်အဆင့်သို့ သွားရာ လမ်းကြောင်းသည် ခက်ခဲကြမ်းတမ်းပြီး၊ အသွေးအသားများ၊ သေဆုံးမှုများဖြင့် ခင်းကျင်းထားခြင်း ဖြစ်လေသည်။ ဝေ့ဝူယင်သည် ထူးဆန်းမှုများစွာကို ပိုင်ဆိုင်ထားသည့်တိုင် သူနှင့် တန်းတူညီမျှ ရှိသူ တစ်ဦး ဖြစ်ကြောင်းကို သူ ကောက်ချက်ချထားပြီး ဖြစ်ပေသည်။

"ခင်ဗျားက ကျုပ်ကို ဒီ တိုတောင်းတဲ့ အနားယူချိန်လေး ပေးခဲ့တဲ့အတွက်၊ ကျုပ်ဘက်က ကြိုတင် ကာကွယ်မှုတွေ ဘာမှ မပြင်ဆင်ထားဘဲ ခင်ဗျားကို အရင် စတင် လှုပ်ရှားခွင့် ပြုပါ့မယ်…”

လုံရှီယာသည် မှန်းဆ၍မရနိုင်သော အဆိုပြုချက်တစ်ခုကို ကမ်းလှမ်းလိုက်၏။ ခေတ္တမျှ စိတ်လိုက်မာပါ ဖြစ်သွားကာ အရှက်ရစေခဲ့မိသည့်အတွက် သူ့ကိုယ်သူ အပြစ်ပေးနေပုံရသော်လည်း၊ တစ်ပြိုင်နက်တည်းမှာပင် သူသည် မိမိကိုယ်ကိုယ် ယုံကြည်မှုရှိခြင်းဟူသော မကြုံစဖူးသည့် အုတ်မြစ်တစ်ခုကို တည်ဆောက်နေခြင်း ဖြစ်လေသည်။

ဝေ့ဝူယင်သည် သူ၏ ကောင်းကင်ဘုံ နတ်မျက်လုံးများ ဖြင့် ပတ်ဝန်းကျင်ကို အကဲခတ်ရင်း ခေတ္တမျှ တွေးတောလိုက်လေသည်။ အရာရာကို သိမြင်နားလည်နေသော အပြုံးတစ်ခုနှင့်အတူ သူက ခေါင်းခါယမ်းလိုက်သည်။

"ဆန္ဒ အဟုန် ဥပဒေသကို ခင်ဗျားက ကျင့်ကြံတာပေါ့လေ..."

သူ ပြောလိုက်လေသည်။ လုံရှီယာက တုံ့ပြန်မှုအနေဖြင့် ခေါင်းညိတ်ပြလိုက်သည်။ သူသည် သူ၏ ပဲ့တင်ထပ် ချီ ကို စတင် ပြင်ဆင်လိုက်လေသည်။

သို့သော် ဝေ့ဝူယင်သည် မည်သည့် မကောင်းသော ရည်ရွယ်ချက်မျှ မပါဘဲ သူ၏ လက်ကို ဆန့်ထုတ်လိုက်လေသည်။

"ခင်ဗျားရဲ့ ရည်ရွယ်ချက် စွမ်းအားကို မြှင့်တင်ပေးမယ့် ဆန္ဒ အရှိန်အဟုန် တစ်ခုကို စုဆောင်းဖို့ ခင်ဗျားရဲ့ စကားလုံးတွေကို အသုံးချဖို့ ကြိုးစားနေမယ့်အစား၊ ကျုပ်ရဲ့ တောင်းဆိုမှု တစ်ခုကို လိုက်လျောပေးလိုက်ရင်ရော ဘယ်လိုလဲ... အဲဒါကမှ သင့်လျော်တဲ့ အပြစ်ပေးမှု တစ်ခု ဖြစ်လာလိမ့်မယ်..."

လုံရှီယာက အနည်းငယ် မျက်မှောင်ကြုတ်လိုက်ပြီး၊ သေးငယ်သော ခေါင်းညိတ်မှု တစ်ခုဖြင့် တိတ်ဆိတ်စွာ သဘောတူလိုက်လေသည်။ ဝေ့ဝူယင်သည် သူ့ကို အရှိန်အဟုန် စုဆောင်းခွင့် မပြုချေ။ သူက သူ၏ ရည်ရွယ်ချက်များကို ထိုးထွင်းမြင်နေကြောင်း သိသာထင်ရှားလှပေသည်။

မည်သို့ပင် ဆိုစေ... လုံရှီယာ၏ မိမိကိုယ်ကိုယ် ချမှတ်ထားသော အပြစ်ပေးမှုကို ခံယူရန် ဆန္ဒရှိမှုကြောင့် ဝေ့ဝူယင်သည် အနည်းငယ် အံ့အားသင့်မိပေသည်။

"ခင်ဗျား အသက်ရှင်နိုင်မယ့် ကျုပ်ရဲ့ တိုက်ကွက် တစ်ကွက်စီတိုင်းအတွက် မေးခွန်း တစ်ခုကို ဖြေပေးပါ..."

လုံရှီယာ၏ မျက်မှောင်ကြုတ်မှုသည် ပိုမို နက်ရှိုင်းသွားပြီး ထို့နောက် ပုံမှန် အနေအထားသို့ ပြန်လည် ပြေလျော့သွားလေသည်။ အထွတ်အထိပ် သူတော်စင် တစ်ပါးအနေဖြင့်၊ သူသည် များပြားလှသော အစစ်အမှန် ဝိညာဉ် နှင့် အစစ်အမှန် သူတော်စင် အဆင့် ကျင့်ကြံသူများ မသိရှိနိုင်သော အရေးပါသည့် ထိုးထွင်းသိမြင်မှု တစ်ခုကို ပေးစွမ်းနိုင်ပေသည်။ ထိုထိုးထွင်း သိမြင်မှုသည် သူတော်စင်များကိုပင် နောက်တစ်ဆင့်သို့ တက်လှမ်းရန် အဟန့်အတား ဖြစ်စေနိုင်သည်။

အရာအားလုံး အဆင်ပြေသွားပြီးနောက် ဝေ့ဝူယင်သည် သူ၏ ခွန်အားများကို စုစည်းလိုက်လေသည်။ ထာဝရ ပဲ့တင်ထပ် နယ်မြေ သည် လှုပ်ရှားသွား၏။ စွမ်းအင်၊ အမတေ နှင့် မာနာ အစရှိသည့် အရာအားလုံးသည် သူ၏ အသက်ရှူနှုန်းနှင့် တစ်ပြေးညီ ဖြစ်လာကာ သူ၏ ထိန်းချုပ်မှုအောက်သို့ သိမ်းပိုက်ခံလိုက်ရလေသည်။ ထို့နောက် သူ၏ သွေးမျိုးဆက်ကို အမြင့်ဆုံး အတိုင်းအတာအထိ လှုံ့ဆော်လိုက်၏။

နဂါး ချီတက်ခြင်း...

ဝေ့ဝူယင်၏ ခန္ဓာကိုယ်သည် အရပ် ဆယ့်သုံးပေ အထိ ကြီးထွားလာပြီး၊ ထောင့်ချိုး ဆယ့်သုံးခု ပါဝင်သော မီးခိုးရောင် အကြေးခွံများ ဖြစ်ပေါ်လာသည်။ ၎င်းတို့၏ ကွက်လပ်များ ကြားတွင် နတ်ဘုရားဆန်ဆန် လှပသော ငွေရောင် အလင်းတန်းများ စီးဆင်းနေ၏။ သူ၏ ကြယ်တာရာ မျက်လုံးများသည်လည်း အသွင်ပြောင်းသွားကာ အစစ်အမှန် နဂါး မျက်လုံးများ အဖြစ်သို့ ပြောင်းလဲသွားလေသည်။ အဂ္ဂိရတ် ကြယ်တာရာ တိုင်းသည် ငွေရောင်သို့ ပြောင်းလဲသွားပြီး၊ ဒဏ္ဍာရီလာ ရှေးဟောင်း အော်ရာတစ်ခုကို ဖြာထွက်စေကာ၊ အကန့်အသတ်မဲ့သော အာဏာရှင်ဆန်မှုနှင့် ကြီးစိုးလွှမ်းမိုးမှုတို့ကို ထုတ်လွှတ်လိုက်ပေသည်။

ဖီဆန်လေး၏ များပြားလှသော နေစွမ်းအင် သိုလှောင်မှုများကို အသုံးချခြင်းဖြင့်၊ ခရာတို သည် ၎င်းနှင့် အပြန်အလှန် ချိတ်ဆက်သွားပြီး၊ လျှို့ဝှက် အမြုတေ တစ်ခုတည်းဖြင့် ထိုအသွင်ပြောင်းလဲမှုကို ပံ့ပိုးပေးနိုင်ရန် ခွင့်ပြုပေးလိုက်လေသည်။ ပါခက် နှင့် တိုက်ပွဲအပြီးတွင်၊ ဝေ့ဝူယင်သည် သူ၏ ဥပဒေသများ ကိုသာမက၊ သူ၏ လျှို့ဝှက် အမြုတေ နှင့် ကျင့်ကြံခြင်း အဆင့် ကိုပါ အသုံးပြုရာတွင် အတော်လေး ကျွမ်းကျင်လာခဲ့ပြီ ဖြစ်ပေသည်။

"သိုင်းကျင့်ကြံသူ လား..."

လုံရှီယာသည် အံ့အားသင့်သွားခဲ့လေသည်။ ဝေ့ဝူယင်သည် အစစ်အမှန် သိုင်းပညာကျင့်ကြံသူများ နှင့် ဆင်တူသည့် အံ့ဖွယ် ရုပ်ပိုင်းဆိုင်ရာ အသွင်ပြောင်း သိုင်းကွက် တစ်ခုကို အသုံးပြုလိုက်ခြင်း ဖြစ်သည်။ သူ၏ ကြီးမားလှသော ရုပ်ပိုင်းဆိုင်ရာ တည်ရှိမှုသည် မည်သည့် လျှို့ဝှက် အာဏာရှင် အဆင့် ကျင့်ကြံသူကိုမဆို များစွာ ကျော်လွန်နေခဲ့ပေသည်။

"ဒါမှမဟုတ် နတ်ဘုရား သားရဲ လား..."

ပါခက် နှင့် ခြားနားစွာပင် လုံရှီယာသည် ဝေ့ဝူယင်၏ ပုံစံရှိ နတ်ဘုရားဆန်သော အရည်အသွေးများကို အာရုံခံနိုင်စွမ်း ရှိသည်။ သူ့ ခန္ဓာကိုယ်၏ မြင်တွေ့မရသော နတ်ဘုရား ပုံစံကို ဝိုးတဝါး အကဲခတ်နိုင်စွမ်း ရှိနေလေသည်။

ဆက်လက်၍ ထိန်းချုပ် မထားနိုင်တော့လေရာ ဝေ့ဝူယင်သည် ကြယ်တာရာ ဝိညာဉ် လေးခု၏ ဝိညာဉ် အော်ရာ ကို ထုတ်လွှတ်လိုက်လေတော့သည်။

သူ၏ ခန္ဓာကိုယ် အတွင်းရှိ ဝိညာဉ်အင်အား မှာ ယုတ္တိမတန်လောက်အောင် ဖြစ်နေပေသည်။ ပတ်ဝန်းကျင်ရှိ မန်နာ နှင့် အလင်း တို့မှနေ၍ အမျိုးမျိုးသော ဝိညာဉ် ဖြစ်စဉ်များ သဘာဝအလျောက် ဖြစ်ပေါ်လာပြီး၊ အတိတ်၊ ပစ္စုပ္ပန် နှင့် ဖြစ်လာနိုင်ချေရှိသော အနာဂတ် တို့၏ ထင်ရှားပြီး ခမ်းနားထည်ဝါသော မြင်ကွင်းများကို ဖန်တီးပေးနေလေသည်။

လုံရှီယာသည် တစ်ဖန် တုန်လှုပ်သွားပြန်လေသည်။

"ဝိညာဉ် ကျင့်ကြံသူ လား... မဟုတ်သေးဘူး... နေပါဦး..."

ဝိညာဉ်အင်အား သည် အလွန်အမင်း များပြားနေပြီး၊ မူလ အခြေအနေ ဟုလည်း လူသိများသော မူလလောက အခြေအနေ ၏ အရည်အသွေးများ ပါဝင်နေပေသည်။ သို့သော် ၎င်းမှာ အနည်းငယ် ကွဲပြားနေလေသည်။

တစ်ချိန်တည်း၌... ဝေ့ဝူယင်သည် ခွန်အားကို ဤအတိုင်းအတာအထိ ထုတ်လွှတ်ပြီးနောက် သူ၏ စွမ်းအားကို စမ်းသပ်လိုသဖြင့်၊ ဝိညာဉ်အင်အား နှင့် ရုပ်ပိုင်းဆိုင်ရာ ခွန်အား တို့ကို လက်သီးတစ်လုံးတည်း အတွင်းသို့ စုစည်းလိုက်လေသည်။ သူသည် သူ၏ သာမန် အာဏာရှင် ကျင့်စဉ် တစ်ခု ဖြစ်သော ကြယ်တာရာ နဂါး၏ လှံစွပ် လက်သီး ကို အသုံးပြုလိုက်ပေသည်။

ဝှစ်...

ပြင်းထန်သော အရှိန်နှုန်းဖြင့် သူသည် ဟင်းလင်းပြင်ကို ဖြတ်သန်းကာ လုံရှီယာ၏ ရှေ့မှောက်သို့ မျက်စိတစ်မှိတ်အတွင်း ရောက်ရှိသွားလေသည်။ တင်းကျပ်စွာ ဆုပ်ထားသော လက်သီး၊ ကြယ်တာရာ ဝိညာဉ် လေးခုစလုံး၏ ခွန်အား တို့အပြင် ပထမ အဆင့်၏ အထွတ်အထိပ်သို့ ရောက်ရှိနေသော အစစ်အမှန် နဂါး သွေးမျိုးဆက် တို့နှင့် အတူ သူသည် ရှေ့သို့ လှံတစ်ချောင်းအလား ထိုးနှက်လိုက်လေသည်။

ဤ လက်သီးတစ်ချက်တည်း အတွင်းရှိ ကြီးမားလှသော ခွန်အားသက်သက်ကြောင့် လောကနယ်မြေ တစ်ခုလုံး တုန်လှုပ်သွားပြီး၊ အပြင်းအထန် တုန်ယင်သွားခဲ့ပေသည်။

လုံရှီယာ၏ မျက်လုံးသူငယ်အိမ်များ အနည်းငယ် ပြူးကျယ်သွားလေသည်။

ဝုန်း...

ကမ္ဘာမြေကို ဆုတ်ဖြဲလုမတတ် အသံလှိုင်း ပေါက်ကွဲမှုကြီးတစ်ခု ထွက်ပေါ်လာခဲ့လေသည်။

"..."

ဝေ့ဝူယင်၏ မျက်လုံးသူငယ်အိမ်များ ကျုံ့ဝင်သွားခဲ့လေ၏။

"ဟမ်..."

လုံရှီယာက သူ၏ ပဲ့တင်ထပ် ချီ ကို သူ၏ လက်သီးတစ်ဝိုက်တွင် ရစ်ပတ်လိုက်ပြီး၊ ၎င်းကို ဆန့်ထုတ်ကာ၊ ဝင်ရောက်လာသော ဝေ့ဝူယင်၏ လက်သီးကို မိုင်တစ်ထောင် အကွာကတည်းက ကြိုတင် သိမြင်နေခဲ့သည့်အလား ဖမ်းဆုပ်လိုက်လေသည်။ လက်သီးအတွင်းရှိ ခွန်အား အားလုံး ချေဖျက်ခံလိုက်ရပေသည်။

အားလုံး ချေဖျက်ခံလိုက်ရခြင်းပင် ဖြစ်လေသည်။

"ကျုပ်ကို စမ်းသပ်တဲ့ တိုက်ခိုက်မှု တစ်ခုနဲ့ စော်ကားဖို့ လိုလို့လား..."

လုံရှီယာက သူ၏ အသံတွင် မကျေနပ်မှုများ ထင်ရှားစွာ ပါဝင်နေလျက် မေးခွန်းထုတ်လိုက်လေသည်။