အခန်း (၁-၂)

အခန်းး (၁) ကျားဂူထဲ၌ ပုလွေမှုတ်ခြင်း။

နီရဲလှ‌သောနေမင်းသည် အရှေ့အရပ်မှ ထွက်ပေါ်လာ၍ သစ်တောကြီးတစ်ခုလုံးကို နံနက်ခင်းအလင်းရောင်များဖြင့် လွှမ်းခြုံထားလိုက်သည်။

၎င်းသည် နှစ်ပေါင်းထောင်ချီ သက်တမ်းရှိသော သစ်ပင်ကြီးများနှင့် ရစ်ပတ်နေသော နွယ်ပင်များ အမြစ်များ ရှုပ်ထွေးယှက်တင်နေသည့် ရှေးဟောင်း တောနက်ကြီးတစ်ခု ပေဖြစ်သည်။

“ဝေါင်းးး”

တောင်တန်းကြီး၏ အနက်ရှိုင်းဆုံးနေရာမှ ဟိန်းဟောက်သံတစ်သံ ထွက်ပေါ်လာခဲ့သည်။ ထိုအသံမှာ ကျယ်လောင်လှသဖြင့် အစာရှာထွက်နေသော ငှက်အုပ်များသည်ကြောက်လန့်တကြား ပျံသန်းပြေးကြကုန်သည်။

အမဲလိုက်ထွက်သွားသော ကျားမကြီး ပြန်လာခြင်းဖြစ်သည်။

တောင်အောက်ခြေရှိ ကျားဂူအတွင်း၌...

ကျားပေါက်လေးနှစ်ကောင်သည် ဂူထောင့်တစ်နေရာတွင် ပုန်းအောင်းနေရင်း ၎င်းတို့၏ဂူထဲသို့ ကျူးကျော်ဝင်ရောက်လာသော လူထူးဆန်းကို မပီသ‌သော အသံလေးများဖြင့် ဟိန်းဟောက်နေကြသည်။

ထိုလူထူးဆန်းမှာ လူငယ်တစ်ဦးဖြစ်ပြီး နာမည်မှာ လုပေါင် ပင်ဖြစ်သည်။

လုပေါင်သည် ခေါက်ကုလားထိုင်တစ်ခုကို ဖြန့်လိုက်သည်၍ ကျားပေါက်လေးနှစ်ကောင်ကို တစ်ချက်ကြည့်လိုက်ပြီး ခေတ္တစဉ်းစားလိုက်သည်။ ထို့‌နောက် အကြီးကောင်ကို လှမ်းဖမ်းလိုက်သည်။ ကျားပေါက်လေး၏ ရုန်းကန်မှုကို ဂရုမစိုက်ဘဲ ကုလားထိုင်ပေါ်တွင် သက်သောင့်သက်သာ လှဲလျောင်းလိုက်သည်။

သူသည် ကျားပေါက်လေးကို ကြောင်တစ်ကောင်ကဲ့သို့ ပွတ်သပ်ပေးလိုက်သည်။ကျားပေါက်လေးမှာ ငြိမ်ကျသွားပြီး နားရွက်ကလေးများ ကုပ်ကာ ချစ်စဖွယ် အမူအရာလေး ဖြစ်သွားသည်။

“ဝူး...”

အပြင်ဘက်မှ လေပြင်းတစ်ချက် တိုးဝင်လာသည်။ ကျားပေါက်လေးနှစ်ကောင်သည် ချက်ချင်းပင် ခေါင်းထောင်လာပြီး အကူအညီတောင်းသည့်သံဖြင့် တညည်းညည်း လုပ်လာကြသည်။

မေမေရေ... ကယ်ပါဦးသားတို့ကို သူပြန်ပေးဆွဲသွားပြီ။

“နဂါးလာရင် တိမ်တိုက်တွေပါလာသလို ကျားလာရင်လည်း လေပြင်းတွေ ပါလာတတ်တယ်။ ပရိသတ်ကြီးတို့ရေ... အမဲလိုက်ထွက်သွားတဲ့ ကျားမကြီး ပြန်လာပြီ ထင်တယ်ဗျို့

လုပေါင်သည် သူ၏ကောင်းကင်မျက်လုံးတိုက်ရိုက်ထုတ်လွှင့်မှု ကင်မရာကို သင့်တော်တဲ့ အနေအထားညှိလိုက်ပြီး ကျားပေါက်လေးကို ပွတ်သပ်ရင်း ဆက်လက်လဲလျောင်းလိုက်နေသည်။

ဒီနေ့ သူ၏တာဝန်မှာ ကျားဂူထဲတွင် သုံးနာရီကြာအောင် နေထိုင်ပြရန်ပင်ဖြစ်သည်။

Ocean Live Stream ပလက်ဖောင်းပေါ်ရှိ ရတနာနတ်ဘုရား၏ တိုက်ရိုက်ထုတ်လွှင့်မှု အခန်းထဲတွင် ကျားကြီးပေါ်လာသည်နှင့် ပရိသတ်များမှာ ရုတ်ရုတ်သဲသဲ ဖြစ်သွားကြရသည်။

လုပေါင်သည် တိုက်ရိုက်ထုတ်လွှင့်သူ အသစ်တစ်ဦး ဖြစ်သော်လည်း လွန်ခဲ့သော လဝက်ခန့်ကပင် ရေပန်းစားလာခဲ့သူဖြစ်သည်။

အကြောင်းရင်းမှာသူသည် ဝံပုလွေဂူထဲတွင် အိပ်ပျော်နေသည့် မြင်ကွင်းကို တိုက်ရိုက်ထုတ်လွှင့်ခဲ့သောကြောင့် ဖြစ်သည်။ ဝံပုလွေအုပ်ကြီးက သူ့ကို ကြောင်ကြည့်ကြည့်နေသည့်ပုံရိပ်မှာ အင်တာနက်ပေါ်တွင် အကြီးအကျယ် နာမည်ကြီးသွားခဲ့သည်။

သူတို့တို့မှာ တောရိုင်းဝံပုလွေများ ဖြစ်ကြကုန်သည်။

သူသည် တစ်ရက်အတွင်းမှာပင် Follower ၈ သိန်း ရရှိခဲ့သည်။ ထိုထုတ်လွှင့်မှုတစ်ခုတည်းဖြင့် သူသည် ချက်ချင်းပင် လူသိများလာခဲ့ပေသည်။

လဝက်ကြာပြီးနောက် လု‌ပေါင်သည် တိုက်ရိုက်ထုတ်လွှင့်မှု အသစ်တစ်ခုကိုပြန်လည်စတင်ခဲ့ပြီး ပရိသတ်များကို ပို၍ပင် အံ့အားသင့်စေခဲ့သည်။ ယခုတစ်ကြိမ်တွင် သူသည် ကျားဂူထဲ၌ အိပ်စက်ပြနေခြင်းပင်ဖြစ်သည်။

သူ့ဦးနှောက်ကို မြည်း ကန်သွားတာလား။

ကျားပေါက်လေးတွေကိုပါ ပွတ်သပ်နေသေးသည်။ဒါက ကျားလေ။ကြောင်မဟုတ်ဘူ။လုပေါင်သည် ကျားပေါက်လေးကို ပွေ့ချီထားရင်း သူ၏စနစ် ကို စစ်ဆေးလိုက်သည်။

[တိုက်ရိုက်ထုတ်လွှင့်မှု အကောင်းဆုံး Check-in စနစ်]

ပိုင်ရှင်: လုပေါင် (Lu Bao)။

စွမ်းရည်: သားရဲတိရစ္ဆာန်များ၏ နှစ်သက်မှု +၁၀၀ (ရွှေရောင်အဆင့်)။

ကျွမ်းကျင်မှု: ဆရာကြီးအဆင့် ပုလွေမှုတ်ခြင်း (ဝံပုလွေဂူမှ ရရှိခဲ့သည်)။

စနစ်သုံးပစ္စည်း: စူပါတိုက်ရိုက်ထုတ်လွှင့်မှု ကောင်းကင်မျက်လုံး (အစပြုသူ လက်ဆောင်မှ ရရှိသည်)။

လွန်ခဲ့သော လဝက်က တောင်ပေါ်တွင် ဆေးမြစ်ရှာနေစဉ် ဝံပုလွေအုပ်၏ ဝိုင်းရံခြင်းကို ခံခဲ့ရသည်။

ထိုစဉ်က ဤစနစ် ပေါ်ထွက်လာပြီး သူ့ကို သားရဲတိရစ္ဆာန်များ၏ နှစ်သက်မှု +၁၀၀ဟူသော ရွှေရောင်စွမ်းရည်ကို ပေးအပ်ခဲ့သည်။ ထို့ကြောင့် မည်သည့်သားရဲတိရစ္ဆာန်မှ သူ့အပေါ် ရန်လိုစိတ် မရှိတော့ပေ။

သူ၏ ပထမဆုံးတာဝန်မှာ ဝံပုလွေဂူတွင် Check-in လုပ်ရန် ဖြစ်ပြီး အောင်မြင်ပြီးနောက် ဆရာကြီးအဆင့် ပုလွေမှုတ်ခြင်း ကျွမ်းကျင်မှုကို ရရှိခဲ့သည်။

တစ်ခဏ စဉ်းစားပြီးနောက် လုပေါင်သည် သူ၏အိတ်ထဲမှ ပုလွေ ကို ထုတ်ကာ အသံညှိလိုက်သည်။

“ကျွန်တော့်မှာ တမူထူးခြားနေတဲ့ အရည်အချင်းတော့ သိပ်မရှိလှပါဘူး။ အားလုံးအတွက် ပုလွေလေးတစ်ပုဒ် မှုတ်ပြပါရစေ။”

သူသည် ဆရာကြီးအဆင့် ကျွမ်းကျင်မှုရှိသူ ဖြစ်သည်။ ဤခရီးစဉ်မတိုင်မီကပင် သူသည် ဈေးကြီးသော ပုလွေတစ်လက်ကို ဝယ်ယူခဲ့သည်။

တိုက်ရိုက်ထုတ်လွှင့်မှုအတွင်း လက်ဆောင်များစွာ တဖွဲဖွဲကျလာပြီး မှတ်ချက်များမှာလည်း အရမ်းမိုက်တယ် ဟူသော စာသားများဖြင့် ပြည့်နှက်နေသည်။ ပိုက်ဆံချမ်းသာသော ပရိသတ်တစ်ဦးဆိုလျှင် ယွမ် ၅၀၀၀ တန် ရတနာသေတ္တာကိုပင် ဖွင့်ပေးလိုက်သည်။

လူအများအပြား ဝင်ရောက်ကြည့်ရှုလာကြပြီး မြင်ကွင်းကိုကြည့်ကာ အံ့အားသင့်နေကြသည်။

“ဘုရားရေ... ကျားကို ပွတ်သပ်နေတာလားးး။”

“ဒါ ဟိုတစ်ခါက နာမည်ကြီးသွားတဲ့ Streamer မဟုတ်လား၊ ကျားဂူထဲ ရောက်နေတာလားးး။”

“ပုလွေထုတ်လိုက်ပြီ... သူ့ဘာသာသူအသုဘကို ကြိုဆိုနေတာလား။ ဘယ်လို လူမျိုးက ကျားဂူထဲ ပုလွေယူလာတာလဲ။”

“ဒီတောနက်ထဲမှာ ဘယ်လိုလုပ် အင်တာနက်လိုင်း ရနေတာလဲ။”

လုပေါင်သည် ရင်ထဲတွင် အနည်းငယ်တော့ တုန်လှုပ်နေဆဲဖြစ်သည်။ သို့သော် လွန်ခဲ့သော လဝက်အတွင်း သူသည် တောဝက်များကို ကန်ခြင်း။မြွေမြီးကို နင်းခြင်းနှင့် ဝံပုလွေများထံမှ အစာလုခြင်း စသည်တို့ကို စမ်းသပ်ခဲ့ပြီးဖြစ်ရာ ယခုအခါတွင် မိမိကိုယ်ကိုယ် ယုံကြည်မှု ရှိနေပြီဖြစ်သည်။

“တူရိယာအားလုံးထဲမှာ ပုလွေက အမြင့်မြတ်ဆုံးပါပဲ။ မင်္ဂလာဆောင်ဖြစ်ဖြစ်။ နတ်ရွာစံတာပဲဖြစ်ဖြစ် ပုလွေသံထွက်လာရင် အားလုံးပြီးဆုံးသွားပြီ။”

လုပေါင်သည် မိတ်ဆက်ပြီးနောက် “Spectre” အမည်ရှိ တေးသွားကို စတင်မှုတ်လိုက်သည်။

ထိုအသံမှာ ကျောက်ဆောင်များကိုပင် ကွဲအက်စေနိုင်လောက်အောင် စွမ်းအားပါလှသည်။

“တူ တူ တူ တူ...”

လုပေါင်၏ ရင်ခွင်ထဲမှ ကျားပေါက်လေးမှာ ကြောက်လန့်လွန်းသဖြင့် မလှုပ်ဝံ့တော့ပေ။ ကျန်တစ်ကောင်မှာလည်း ထောင့်ထဲသို့ ပို၍ တိုးဝင်သွားသည်။

“ဝူး... ဝေါင်းးးး”

အမဲလိုက်ထွက်ရာမှ ပြန်လာသော ကျားမကြီးသည် ထိုအသံကို ကြားသည်နှင့် ဟိန်းဟောက်ကာ ဂူထဲသို့ ပြေးဝင်လာတော့သည်။

ကြောက်မက်ဖွယ်ကောင်းသော မျက်နှာနှင့်သွေးဆာနေသော အစွယ်များရှိ‌နေသည်။

သို့သော် ဂူထဲသို့ ရောက်ရှိလာသောအခါ ကျားကြီး၏ အမူအရာမှာ တောင့်တင်းသွားပြီး ဇဝေဇဝါ ဖြစ်သွားသည်။ သူသည် ဘာဖြစ်နေမှန်း မသိဘဲ ကြောင်သာကြည့်နေတော့သည်။

သုံးမိနစ်ခန့်အကြာတွင်...

ပုလွေမှုတ်ခြင်း ပြီးဆုံးသွားသည်။ လုပေါင်သည် ပုလွေကို ချလိုက်ပြီး ကျားကြီးကို သတိထားကာ ကြည့်လိုက်သည်။

“ဝု...”

လုပေါင်သည် ခေတ္တတုံ့ဆိုင်းသွားပြီးနောက် ခွေးဟောင်သံကို တုပကာ နှုတ်ဆက်လိုက်သည်။

“ဝူး...”

ကျားကြီးကတိုးတိုးလေး ပြန်ဟိန်းသည်။

“ဝူး... အု...”

လုပေါင်သည်ကျားပေါက်လေးများ၏ အသံကို တုပလိုက်ပြန်သည်။

ခေတ္တမျှ ငြိမ်သက်သွားပြီးနောက် ကျားကြီးသည် သူ၏ကျားပေါက်လေးနှစ်ကောင်ကို ကြည့်ကာ ဂူအပြင်ဘက်သို့ ပြန်ဆုတ်သွားသည်။ မကြာမီ သွေးညှီနံ့များ လွင့်ပျံ့လာပြီး ကျားကြီးသည် တောဆိတ်တစ်ကောင်ကို ကိုက်ချီကာ ဂူထဲသို့ ပြန်လည်ရောက်ရှိလာသည်။

ကျားကြီးသည် လုပေါင်၏ ရှေ့မှောက်မှာပင် ဆိတ်သားကို ကိုက်ဖြတ်ကာ စားသောက်လေတော့သည်။

“ပရိသတ်တို့ရေ... Streamer တော့ အိပ်တော့မယ်။ Follow လုပ်ထားဖို့ မမေ့နဲ့ဦးနော်။ နိုးလာရင် တောကျားပေါက်လေးတစ်ကောင် လက်ဆောင်ပေးနိုင်ရင် ပေးပါ့မယ်ဗျာ။”

လုပေါင်သည် ကင်မရာကို လက်ပြကာ ပြန်လည်လဲလျောင်းလိုက်သည်။ Check-in အချိန်ပြည့်ရန် ၃ နာရီခန့် လိုသေးသဖြင့် သူသည် အေးအေးဆေးဆေး အိပ်စက်ရန် သာဆုံးဖြတ်လိုက်သည်။

ကျားကြီးသည် လုပေါင်ကို စိုက်ကြည့်နေပြီးနောက် ကစားနေသော ကျားပေါက်လေးကို ကိုက်ချီကာ အစာကျွေးရန် ခေါ်ဆောင်သွားသည်။

“ကောင်းသောညပါ။”

အခန်း (၂) ရွှေရောင်ကမ်းခြေရှိ မြေ ဧရိယာ ၂၀၀ အသုံးပြုခွင့်။

လုပေါင်သည် အိပ်မက်တစ်ခု မက်နေသည်။ အိပ်မက်ထဲတွင် သူသည် ကျောင်းပြန်တက်နေရပြီး သူတိတ်တခိုး ချစ်နေရသော နတ်မိမယ်လေးက သူ့ကို ချစ်ခွင့်ပန်ကာ ချွဲနွဲ့ပြီး ဖက်လှဲတကင်း နမ်းရှုပ်ရန်ပင် တောင်းဆိုနေသဖြင့် သူ အလွန်စိတ်လှုပ်ရှားနေမိသည်။

သို့သော် မျက်တောင်တစ်ခတ်အတွင်းမှာပင် ထိုနတ်မိမယ်လေးမှာ သူ၏ ထိပ်ပြောင်ပြောင် ကျောင်းအုပ်ဆရာကြီးအဖြစ် ပြောင်းလဲသွားပြီး သူ့ကို လာဖက်ရန် ကြိုးစားနေသည်။

“သွားစမ်းးး”

လုပေါင်သည် မဆိုင်းမတွဘဲ လက်ဝါးဖြင့် ထိပ်ကိုရိုက်ချလိုက်တော့သည်။ ရိုက်ချက်ထိမှန်သွားပြီးနောက် ထိုထိပ်ပြောင်ပြောင်ကြီးမှာ အဘယ်ကြောင့် ဤမျှ နူးညံ့နေရသနည်းဟု သူတွေးမိသွားသည်။

“ဟင်...”

သူ ရုတ်တရက် နိုးလာပြီး မျက်လုံးပွင့်လိုက်သည်နှင့် တစ်ပြိုင်နက် တစ်ကိုယ်လုံး တောင့်တင်းသွားတော့သည်။

သူ မြင်လိုက်ရသည်မှာ သားရဲတို့၏ ဘုရင်ဖြစ်သောကျားကြီးသည် ဒေါသတကြီးဖြင့် ဟိန်းဟောက်နေပြီး သူ၏လက်မှာ ကျားခေါင်းဘေးတွင် ရောက်နေ၍ ကျားကြီးမှာ ခေါင်းကို အနည်းငယ် စောင်းသွားရသည်။

“ပေါင်... မင်းနိုးပြီလား။”

လုပေါင် တစ်ယောက် အာခေါင်များ ခြောက်ကပ်သွားသည်။ သွားပြီ... သူ အိပ်မက်ထဲမှာ ကျားကြီးကို မှားပြီး ပါးရိုက်လိုက်မိသည်လား။

ကျားကြီး၏ ဒေါသထွက်နေသော မျက်နှာကို ကြည့်ရသည်မှာ သူရိုက်မိသွားတာဟုတ်ပုံရသည်။ ခေတ္တစဉ်းစားပြီးနောက် သူသည် ကျားခေါင်းကို အမြန်ပင် အသာအယာ ပွတ်သပ်ပေးလိုက်သည်။

“ ငါ ကျောင်းအုပ်ဆရာကြီးကို အိပ်မက်မက်တာ မဆန်းပါဘူး မင်းတို့ နှစ်ယောက်က အရမ်းတူလွန်းတာကိုး နှစ်ယောက်လုံးက ကျားတွေပဲ‌လေ။”

Ocean Live Stream ပလက်ဖောင်း။ ရတနာနတ်ဘုရား ၏ အခန်းထဲတွင်...

ဤကျားကြီးသည် လုပေါင်ကို စိုက်ကြည့်နေသည်မှာ အတော်ပင် ကြာလှပြီဖြစ်ရာ ထိုင်လျက်ပင် အိပ်ပျော်သွားခဲ့သည်။ တိုက်ရိုက်ထုတ်လွှင့်မှု အခန်းထဲတွင်မူ ပရိသတ်များမှာ ဗိုက်နာအောင် ရယ်မောနေကြသည်။

လူတိုင်းက လုပေါင် နိုးလာမည့်အချိန်ကို စောင့်နေကြခြင်းဖြစ်သည်။ ကျားကြီး ထိုင်လျက် အိပ်ပျော်နေသည်ကို ကြည့်နေစဉ်မှာပင်...

အိပ်ပျော်နေသောလုပေါင်က ရုတ်တရက် ကျားကြီးကို ပါးရိုက်လိုက်သဖြင့် ကျားကြီးမှာ ကြောင်အသွားပြီးနောက် အံဩဖွယ် မျက်နှာပေး ဖြစ်သွားသည်။

“ဘုရားရေ... ဒီလောက် ကြောက်စရာ‌‌ကောင်းတဲ့ကျားကြီးကို ဘယ်လိုစိတ်နဲ့များ ရိုက်ရဲတာလဲ။”

“ဟားဟားဟား... ကျားကြီးက ပါးရိုက်ခံလိုက်ရလို့ ကြောင်သွားတာ ကြည့်ကြပါဦး။”

“Streamer တော့ သွားပြီ... သွားပြီ။”

“ရတနာနတ်ဘုရား နိုးလာပြီ။”

လု‌ပေါင်၏ ရုတ်တရက် ပါးရိုက်လိုက်မှုကြောင့် တိုက်ရိုက်ထုတ်လွှင့်မှု အခန်းတစ်ခုလုံး ပွက်လောရိုက်သွားပြီး လက်ဆောင်များ တဖွဲဖွဲ ကြလာသည်။

တောရိုင်းကျားကြီးကို ပါးရိုက်ဝံ့သော Streamer မှာ တကယ်ပင် ရဲတင်းလှပေသည်။

လုပေါင်သည် သူ၏လက်ကို သတိထားကာ ပြန်ရုပ်လိုက်သည်။ ကျားကြီး၏ ဒေါသမျက်နှာမှာ အနည်းငယ် ပြေလျော့သွားပြီး လုပေါင်ကို တစ်ချက်ကြည့်ကာ အိပ်ပျော်နေဆဲဖြစ်သော ကျားပေါက်လေးနှစ်ကောင်ဆီသို့ လှည့်သွားသည်။

သူ အချိန်ကို အမြန်စစ်ဆေးလိုက်သည်။

Check-in အောင်မြင်သွားပြီ။

သူသည် ၃ နာရီခွဲခန့် အိပ်ပျော်သွားခဲ့ပြီး ထူးခြားသော ဆုလာဘ်တစ်ခုကို ရရှိလိုက်သည်။

လုပေါင်က ဆုလာဘ်ကို နှိပ်၍ ကြည့်လိုက်သည်။

[စနစ်:] သားရဲဘုရင်၏ ဂူတွင် Check-in အောင်မြင်ပါသည်။

ဆုလာဘ်- ရွှေရောင်ကမ်းခြေရှိ စိုက်ပျိုးရေးမြေဧရိယာ ၂၀၀ခန့်။

ဤမြေကို လွှဲပြောင်းရောင်းချ၍မရပါ။ပိုင်ရှင်ကိုယ်တိုင် စိုက်ပျိုးရေးနှင့် မွေးမြူရေးအတွက်သာ အသုံးပြုနိုင်သည်။

တစ်ချိန်တည်းမှာပင် သူ၏ စနစ်အချက်အလက်များ ပြောင်းလဲသွားသည်။

ပိုင်ရှင်: လုပေါင်။

စွမ်းရည်: သားရဲတိရစ္ဆာန်များ၏ နှစ်သက်မှု +၁၀၀ (ရွှေရောင်အဆင့်)။

ကျွမ်းကျင်မှု: ဆရာကြီးအဆင့် ပုလွေ မှုတ်ခြင်း။

စနစ်သုံးပစ္စည်း: စူပါကောင်းကင်မျက်လုံး၊ ရွှေရောင်ကမ်းခြေ မြေအသုံးပြုခွင့် ဧရိယာ ၂၀၀ (စိုက်ပျိုးရေးမြေအဖြစ်သာ ကန့်သတ်ထားသည်)။

“တကယ်ကြီးလား။မြို့ပြဧရိယာထဲကရွှေရောင်ကမ်းခြေမှာ မြေဧရိယာ ၂၀၀ တောင်ရတာလား။”

လုပေါင် အံ့အားသင့်သွားသည်။ ထိုနေရာသည် ရွှေထက်ပင် တန်ဖိုးရှိသော နေရာဖြစ်သည်။ အကယ်၍ ထိုနေရာကို လေလံတင်မည်ဆိုပါက တစ်စတုရန်းမီတာလျှင် ယွမ်သောင်းဂဏန်းအထိ တန်ဖိုးရှိပေမည်။

ဧရိယာ ၂၀၀ ဆိုလျှင် စုစုပေါင်းတန်ဖိုးမှာ ယွမ်သန်းပေါင်း ထောင်ချီတန်ဖိုးရှိပေမည်။

သူ ခေါင်းထဲ မူးသွားသည်။ ဤစနစ်က ဤမျှ အစွမ်းထက်လိမ့်မည်ဟု သူ မထင်ထားခဲ့ပေ။ ကျားဂူထဲတွင် Check-in တစ်ခါလုပ်ရုံဖြင့် သန်းပေါင်းများစွာ တန်ဖိုးရှိသည့်အရာကို ရလိုက်ခြင်းပင်။

နှမြောစရာတစ်ခုမှာ ထိုနေရာတွင် ပင်လယ်မြင်ကွင်းရ ဗီလာများ ဆောက်၍မရဘဲ စိုက်ပျိုးရေးအတွက်သာ အသုံးပြုရမည် ဖြစ်သည်။ သို့သော်လည်း ထိုနေရာသည် လူစည်ကားသော ခရီးသွားဇုန်ဖြစ်သဖြင့် စည်းစိမ်ဥစ္စာများစွာကို ဖန်တီးပေးနိုင်မည်မှာ အသေအချာပင်။

“ငါ ချမ်းသာပြီ ဟား ဟား..”

လုပေါင်သည် စိတ်လှုပ်ရှားစွာဖြင့် သူ့ပေါင်ကိုပြန်ကို ရိုက်လိုက်သည်။

“ဝူးးး”

လေးလျောင်းနေသော ကျားမကြီးမှာ သူ၏ရိုက်သံကြောင့် ရုတ်တရက် လန့်နိုးလာပြီး အမွေးများ ထောင်သွားကာ သူ့ကို သတိဖြင့် လှည့်ပတ်ကြည့်နေသည်။ ပါးရိုက်ခံထားရသဖြင့် ကြောက်စိတ်ဝင်သွားပုံရသည်။

“ရပါတယ်... ဘာမှမဖြစ်ဘူးနော်။”

လုပေါင်သည် ပျော်ရွှင်စွာဖြင့် ကျားမကြီး၏ ခေါင်းကို ပွတ်သပ်ပေးလိုက်သည်။ ဤစနစ်သည် အလွန်အံ့ဩစရာ ကောင်းလှသည်။ စနစ်သည် သူ့ကို တစ်ခဏချင်းအတွင်းမှာပင် သူဌေးတစ်ဦး ဖြစ်စေခဲ့သည်။

လုပေါင်သည် ပစ္စည်းများကို သိမ်းဆည်းကာ ကျားပေါက်လေးတစ်ကောင်ကို ချီ၍ နဖူးကို နမ်းလိုက်သည်။ ကျားပေါက်လေးမှာ ကြောက်လန့်တကြား အော်ဟစ်နေသည်။

“ဧည့်ဝတ်ကျေပွန်မှုအတွက် ကျေးဇူးပဲ နောက်မှ ထပ်တွေ့ကြတာပေါ့။”

လုပေါင်သည် ကျားဂူထဲမှ ထွက်လာခဲ့သည်။ တိုက်ရိုက်ထုတ်လွှင့်မှုအတွင်းမှ ပရိသတ်များမှာလည်း ကျားကြီး၏ ဖိအားပေးမှုမှ လွတ်မြောက်သွားသဖြင့် သက်ပြင်းချနိုင်ကြတော့သည်။

ထုတ်လွှင့်မှု စာရင်းဇယားကို စစ်ဆေးလိုက်သောအခါ Follower ၁.၀၄ သန်းအထိ ရှိနေသည်ကို တွေ့ရသည်။ Follower တစ်သန်းရှိသော Streamer မှာ အလွန်ကျော်ကြားသူတစ်ဦး ဖြစ်နေပြီဖြစ်သည်။

“အားလုံးပဲ... ထုတ်လွှင့်မှုအစီအစဥ်ကို ဒီမှာပဲ ခေတ္တရပ်ပါမယ်။ နောက်ထပ် စိတ်ဝင်စားစရာကောင်းတဲ့ တိရစ္ဆာန်တွေ တွေ့ရင် ပြန်လာခဲ့ပါမယ်ခင်‌ဗျာ”

လုပေါင်သည် ထုတ်လွှင့်မှုကို ပိတ်လိုက်ပြီး သူ၏ မြေ ဧရိယာ ၂၀၀ ကို သွားကြည့်ရန်အမြန် ပြင်ဆင်တော့သည်။

သူ နောက်လှည့်ကြည့်လိုက်သောအခါ ကျားမကြီးက ဂူထဲမှ လိုက်ထွက်လာသည်ကို တွေ့ရသည်။ လုပေါင်က လက်ပြနှုတ်ဆက်လိုက်ပြီး အနာဂတ်တွင် ကျားမွေးမြူရန် စိတ်ကူးရှိလာပါက ပြန်လာနိုင်ရန် စနစ်မြေပုံပေါ်တွင် တည်နေရာကို မှတ်သားထားလိုက်သည်။

နောက်ထပ် Check-in တာဝန်က ဘယ်တော့လောက်လာဦးမလဲ။

အိမ်အပြန်လမ်းတွင် လုပေါင်သည် စနစ်မြေပုံကို ကြည့်လိုက်ရာ လမ်းကြောင်းနှစ်ခု တွေ့ရသည်။ တစ်ခုမှာ ၅၉ နာရီ လမ်းလျှောက်ရမည်ဖြစ်သည်။စနစ်က အကြံပြုထားသော လမ်းကြောင်းမှာ ၇၀ နာရီ ကြာမြင့်မည်ဖြစ်သည်။

၁၁ နာရီ ကွာခြားသည်။ သူသည် သားရဲတိရစ္ဆာန်များကို ကြောက်စရာ မလိုသဖြင့် ပိုတိုသောလမ်းကိုသာ ရွေးချယ်လိုက်သည်။

သူသည် နှစ်ရက်တိုင်တိုင် လမ်းလျှောက်လာခဲ့သည်။ ဗိုက်ဆာလျှင် ဟမ် စားသည်။ရေဆာလျှင် မြစ်ရေသောက်သည်။ငါးဖမ်း၍ ကင်စားသည်။သို့မဟုတ် တောသီးများ ရှာစားသည်။

“စနစ်... တောသီးတွေကို ရှာဖွေစစ်ဆေးပေးပါ။”

[စနစ်:] စစ်ဆေးနေပါသည်... အမည်မသိ တောသီး အဆိပ်မရှိပါ၊ ဗီတာမင်ကြွယ်ဝပြီး ချိုချဉ်အရသာရှိသည်။ ၎င်းသည် အစာစားချင်စိတ် မရှိခြင်း ရောဂါကို ကုသပေးနိုင်ပါသည်။

လုပေါင်သည် ထိုသတင်းကြောင့် အလွန်ဝမ်းသာသွားသည်။ သူ၏ ညီမလေးမှာ အနည်းငယ် ဝဖြိုးသော်လည်း အစာစားချင်စိတ် မရှိသည့် ရောဂါ အနည်းငယ် ရှိနေသောကြောင့် ဖြစ်သည်။ သူသည် ထိုအသီးများကို ခူးဆွတ်ကာ အမြစ်များကိုပါ တူးယူလိုက်သည်။ အိမ်တွင် ပြန်လည်စိုက်ပျိုးရန် ဖြစ်သည်။

“ဖုန်းးး”

လုပေါင် အမြစ်တူးနေစဉ် ရုတ်တရက် ခေါင်းကို တစ်ခုခုဖြင့် ထိမှန်သွားသဖြင့် နာကျင်သွားရသည်။ သူလှည့်ကြည့်လိုက်သောအခါ အဖြူရောင် ကြက်တူရွေး အကြီးကြီးတစ်ကောင်က သူ၏ခေါင်းပေါ်မှ ဖြတ်သန်းကာ ပျံသန်းသွားသည်ကို တွေ့လိုက်ရသည်။

ဘာလို့ ငါ့ကို လာတိုက်တာလဲ။

လုပေါင်သည် ထိုကြက်တူရွေးကြီးကို ကြည့်ကာ အလွန်ပင် ဇဝေဇဝါ ဖြစ်သွားတော့သည်။