အခန်း (၃-၄)

အခန်း (၃) ကြက်တူရွေးနှင့် တောနက်က မျောက်ဝံဖြူဂူ

ကြက်တူရွေးကြီးသည် အောက်သို့ ပြန်လည်ပျံသန်းလာပြီး လုပေါင်ကို တစ်ချက်ဆိတ်လိုက်သည်။ ထို့နောက် သူ၏လက်ကိုပါ လိုက်ဆိတ်နေသော်လည်း သူ့ကို ကြောက်ရွံ့ပုံမပြပေ။

ကြက်တူရွေးကြီးသည် အပင်အမြစ်ကို မတူးရန် သူ့ကို တားနေခြင်းလော။ သို့မဟုတ် ၎င်းနှစ်သက်သော အသီးဖြစ်နေ၍လော။

“တောက်... မင်းနော်”

လုပေါင် မျက်စိလှန်ကြည့်လိုက်သည်။ ကျားကြီးတောင် သူ့ကို ရန်မမူဝံ့တာ ဒီငှက်စုတ်လေးက သူ့ကို လာဆိတ်ရဲတယ်ပေါ့။ ဒါပေမဲ့ ကြည့်ရတာ ချစ်ဖို့ကောင်းနေလို့ ဒီတစ်ခါတော့ လွှတ်ပေးလိုက်မယ်။

“ဂူး... တောက်... မင်းနော်”

ကြက်တူရွေးကြီးက ခေါင်းကိုမော့လိုက်ပြီး ပါးစပ်ဟလိုက်ချိန်တွင် လုပေါင် ဆွံ့အသွားရသည်။ အသံက စူးရှနေသော်လည်း ၎င်းပြောလိုက်သည့် အသံမှာ လုပေါင်၏ အသံအတိုင်းပင် ဖြစ်နေသည်။

၎င်းက သူ့အသံကို တုပနေခြင်းလော။ထိပ်တန်းအဆင့် ကြက်တူရွေးပဲ။

လုပေါင် မယုံနိုင်ဘဲ ကြည့်နေမိသည်။ ခေတ္တစဉ်းစားပြီးနောက် သူက

“ငါက သောက်ပေါ။

“ဂူး... ငါက လူ‌သောက်‌ပေါ။”

လုပေါင် ပါးစပ်အဟောင်းသား ဖြစ်သွားသည်။ ဤကြက်တူရွေးသည် ရိုးရိုးမဟုတ်ပေ။ စကားပြောရုံတင်မကဘဲ လေယူလေသိမ်းကိုပါ ထပ်တူတုပနိုင်စွမ်းရှိသေးသည်။

ကြက်တူရွေးသည် ခေါင်းကိုစောင်းကာ စဉ်းစားနေပြီးနောက် အခြားအသံများကို ဆက်တိုက် တုပလေတော့သည်။

“ကျိကျိ... ကျိကျိ..” (မျောက်သံ)

“ဆရာကြီး... ဂူး... ဒီမျောက်ဂူထဲမှာ ရတနာတွေ ရှိတယ်။ ငါတို့ ချမ်းသာပြီဟေ့။”

“ဂူး... ရွှေတွေရှိတယ်။”

“မြန်မြန်ပြေး... ပြေးကြတော့။ ဂူး... ဒါတွေက ရက်စက်တဲ့ မျောက်ဝံအုပ်တွေပဲ။ နှင်းလုံးလေး မြန်မြန်ပျံတက်တော့။ အားလုံးကို လွတ်အောင်ပြေးခိုင်းလိုက်။”

“အိုထျန်း... ကယ်ပါဦးးး အားးး”

မျောက်ဝံဟိန်းသံများ အမျိုးသားတစ်ဦး၏အသံအမျိုးသမီးတစ်ဦး၏အသံနှင့် စူးရှသောအော်သံများကိုကြက်တူရွေးကတုပလိုက်သောကြောင့် လုပေါင်ကြက်သီးများ ထသွားရသည်။ တစ်ချိန်တည်းမှာပင် နောက်ကျောမှ တစ်စုံတစ်ယောက်က စိုက်ကြည့်နေသကဲ့သို့ ခံစားလိုက်ရသည်။

[တီ... တီ...:] မတော်တဆတာဝန် ပေါ်လာပါပြီ။ မျောက်ဝံဖြူဂူတွင် Check-in လုပ်ပါ။

မျောက်ဝံဖြူဂူ။

ဤကြက်တူရွေးသည် ယခင်က သေဆုံးသွားသူတစ်ဦးဦး၏ အိမ်မွေးတိရစ္ဆာန် ဖြစ်ပုံရသည်။ ၎င်းသည် သူ့ကို မြင်သောအခါ အန္တရာယ်ရှိကြောင်း သတိပေးရန် ပျံသန်းလာခြင်း ဖြစ်နိုင်သည်။

သူ့အတွေးကို အတည်ပြုသည့်အလား။မျောက်ဝံဖြူကြီးတစ်ကောင်သည် သစ်ပင်ပေါ်မှ ခုန်ဆင်းလာသည်။ ၎င်း၏လက်ထဲတွင် ဟောင်းနွမ်းနေသော မြေတူးဂေါ်ပြား တစ်ခုကို ကိုင်ထားပြီး လုပေါင်ကို အကဲခတ်၍ နေသည်။

ဘေးပတ်ဝန်းကျင်ကို ကြည့်လိုက်ရာ သစ်ပင်နောက်ကွယ်မှ သူ့ကို စောင့်ကြည့်နေသော ပိုကြီးသည့် မျောက်ဝံဖြူကြီး တစ်ကောင်ကိုလည်း ထပ်မံတွေ့လိုက်ရသည်။

ကြက်တူရွေးသည် တောင်ပံခတ်ကာ ပျံသန်းသွားရင်း...

“မြန်မြန်ပြေး... ပြေးကြတော့။”

နှင်းလုံးလေး ၏ သခင်မှာ ဤနေရာတွင်ပင် သေဆုံးသွားခဲ့ခြင်း ဖြစ်ပေလိမ့်မည်။

လုပေါင်သည် အမည်မသိအသီး၏ အမြစ်ကို အိတ်ထဲသို့ အသာအယာထည့်ကာ မတ်တတ်ရပ်လိုက်သည်။ ဤမျောက်ဝံဖြူများက ဘာကြောင့် ဤမျှ ဒေါသကြီးနေရသနည်း။

သို့သော် သူ၏ ရွှေရောင်စွမ်းရည်မှာ အလွန်အစွမ်းထက်လှသည်။ ခေတ္တမျှ စောင့်ကြည့်ပြီးနောက် မျောက်ဝံဖြူများမှာ ရန်လိုစိတ်များ လျော့ပါးသွားကြသည်။ ၎င်းတို့သည် သူ့အနားသို့ လာရောက်ကာ လူသားတစ်ဦးကဲ့သို့ စူးစမ်းကြည့်နေကြတော့သည်။

အချို့မျောက်ဝံများက သူ၏ ကျောပိုးအိတ်ကို လုယူရန် ကြိုးစားကြသည်။ အခြားလူများ၏ အိတ်များကို ဖွင့်ကြည့်ဖူးသည့် အတွေ့အကြုံ ရှိပုံရသည်။

“ဒါ ငါ့ပိုင်တဲ့ဟာ”

လုပေါင်က ရှောင်လိုက်သည်။

လုပေါင်သည် Check-in လုပ်ရန် တာဝန်ရှိရာ ဧရိယာသို့ ရောက်ရှိသွားသည်နှင့် သူ၏ ကောင်းကင်မျက်လုံး ကင်မရာသည် အလိုအလျောက် ပွင့်သွားပြီး တိုက်ရိုက်ထုတ်လွှင့်မှု စတင်လေတော့သည်။

ရက်အနည်းငယ်အတွင်း လုပေါင်၏ Follower အသစ်များမှာ အလွန်တိုးပွားနေသည်။ ဝံပုလွေဂူနှင့် ကျားဂူထဲတွင် အိပ်ခဲ့သော ထိုလူငယ်ကို လူတိုင်း စိတ်ဝင်စားနေကြခြင်းဖြစ်သည်။

မျောက်ဝံဖြူနှစ်ကောင်ကို မြင်လိုက်ရသည်နှင့် ပရိသတ်များမှာ ရုတ်ရုတ်သဲသဲ ဖြစ်သွားကြပြန်သည်။

“ဘုရားရေ... သူ ပျောက်သွားတာ နှစ်ရက်ရှိပြီ။အခုထိ တောထဲမှာရှိ‌နေတာလား။”

“မျောက်ဝံဖြူတွေလား။ ကြည့်ရတာ တော်တော် ရက်စက်မယ့်ပုံပဲ။ လက်ထဲမှာ မြေတူးဂေါ်ပြားကြီးနဲ့ အိုးးး”

“ရတနာနတ်ဘုရားရေ... ပုလွေလေး မှုတ်ပြပါဦးလားဗျာ။”

လုပေါင်သည် ပရိသတ်များကို အာရုံမစိုက်နိုင်သေးပေ။ သူသည် မျောက်ဝံဖြူဂူရှိရာ လမ်းကြောင်းအတိုင်း တစ်လှမ်းချင်း လျှောက်နေသည်။ ဂူသည် သူနှင့် မီတာတစ်ထောင်ပင် မဝေးတော့ပေ။

ဤနေရာသည် မျောက်ဝံဖြူများ၏ နယ်မြေဖြစ်သည်မှာ သိသာလှသည်။ လမ်းတစ်လျှောက်တွင် ဖြူမျောက်ဝံ ၇ ကောင် ၈ ကောင်ခန့်ကို ထပ်မံတွေ့ရှိရသည်။

“ဂူးးးး”

ကြက်တူရွေး၏ အော်သံ ထပ်မံထွက်ပေါ်လာပြန်သည်။

လုပေါင် မော့ကြည့်လိုက်ရာ သစ်ပင်ပေါ်တွင် ချိတ်ဆွဲထားသော ခြောက်ကပ်နေသည့် လူသေအလောင်းတစ်ခုကို တွေ့လိုက်ရသဖြင့် ကြက်သီးထသွားသည်။ ကြက်တူရွေးသည် ထိုအလောင်းဘေးတွင် နားကာ နှုတ်ဆက်သည့်အလား အော်မြည်နေသည်။

ဒါ သူ့၏သခင်ဖြစ်မည်လော။

လုပေါင် အနားသို့ သွားကြည့်လိုက်ရာ အလောင်းတွင် လက်သည်းရာကြီးများ ပြည့်နှက်နေပြီး လက်တစ်ဖက်မှာလည်း ဆွဲဖြုတ်ခံထားရသကဲ့သို့ ပျောက်ဆုံးနေသည်။ မျောက်ဝံဖြူများ၏ တိုက်ခိုက်မှုကြောင့် သေဆုံးခဲ့ရခြင်းဖြစ်နိုင်သည်။

ကြက်တူရွေးက လုပေါင်ကို ငုံ့ကြည့်ကာ

“ပြေး... မြန်မြန်ပြေးးး ရက်စက်တဲ့ မျောက်ဝံဖြူတွေကလူသတ်တယ်။”

လုပေါင် ထိတ်လန့်သွားသည်။ ဤကြက်တူရွေးကလိမ်မပြောကြောင်း သူသိသည်။ အကယ်၍ သူသာတိရိစ္တာန်များ၏ နှစ်သက်မှုစွမ်းရည်မရှိခဲ့လျှင်မျောက်ဝံဖြူများ၏ လက်ချက်ဖြင့် သေဆုံးနေသည်မှာ ကြာပြီဖြစ်သည်။

“ဘုရားရေ... Streamer ရေ မြန်မြန်ပြေးတော့။”

“တောနက်ထဲက မျောက်ဝံဖြူတွေက တကယ်ရက်စက်တာ၊။ လူဆိုတာ သူတို့ရဲ့ အစာပဲ မြန်မြန် ပြေး..ပြေးး။”

“အဲဒီ ကြက်တူရွေးက သေခါနီး လူတွေ ပြောသွားတဲ့ စကားတွေကို လိုက်ပြောနေတာလားးးကြောက်စရာကြီးး။”

မျောက်ဝံဖြူအုပ်စုများသည် အသိဉာဏ်ရှိပြီး အုပ်စုလိုက် စနစ်တကျ တိုက်ခိုက်တတ်သဖြင့် ကျားများပင် ၎င်းတို့၏ နယ်မြေထဲသို့ မဝင်ရဲကြပေ။

လုပေါင်သည် တုန်လှုပ်နေသော်လည်း မျောက်ဝံဖြူဂူရှိရာသို့ ဆက်လက် လျှောက်လှမ်းသွားသည်။

“ဆရာကြီး... ဂူး... ရွှေတွေ ငါတို့ ချမ်းသာပြီ။”

ကြက်တူရွေးက ထပ်မံအော်လိုက်ပြန်သည်။

ရွှေ။

လုပေါင်သည် ချမ်းသာသော မိသားစုမှ လာသူဖြစ်သော်လည်း ယခုအခါ စိုက်ပျိုးရေးမြေ ဧရိယာ ၂၀၀ ကို ရရှိထားရာ ငွေကြေးပိုမို လိုအပ်လာမည်ဖြစ်သည်။ အကယ်၍ ရွှေအချို့ ရှာတွေ့ပါက အကျိုးရှိမည်မှာ အသေအချာပင်။

“တိုက်ရိုက်ထုတ်လွှင့်မှုကို ကြိုဆိုပါတယ်ခင်ဗျာ။ ကျွန်တော်တို့ အခု ဖြူမျောက်ဝံဂူထဲမှာ ရတနာတွေ ရှိ မရှိ သွားရောက် စစ်ဆေးကြည့်ကြရ‌အောာင်ခင်ဗျာ။”

လုပေါင်သည် ပရိသတ်များကို နှုတ်ဆက်ရင်း ဂူအတွင်းသို့ စတင်ဝင်ရောက်ရန် ပြင်ဆင်လိုက်တော့သည်။

အခန်း (၄) တောင်ပေါ်က ရွှေများ။

သူ တောနက်ထဲသို့ ပိုတိုးဝင်လာသည်နှင့်အမျှ မျောက်ဝံများဖြူ၏ အရေအတွက်မှာ တဖြည်းဖြည်း များပြားလာလေသည်။

အရွယ်အစားမျိုးစုံရှိသော မျောက်ဝံနက်များနှင့် မျောက်ဝံဝါအချို့ပင် ရှိနေသေးသည်။ အချို့က သူ၏အိတ်ကို လုယူရန် ကြိုးစားနေကြသဖြင့် လုပေါင်မှာ တကယ်ပင် ခေါင်းခဲနေရသည်။

“ထွက်သွားကြစမ်းးးး”

အိတ်ထဲတွင်ဆေးဝါးများ အစားအစာများနှင့် အပြင်ထွက်လျှင် သုံးသည့် ပစ္စည်းများပါဝင်ပြီး အားလုံးမှာ မရှိမဖြစ် အရေးကြီးသောအရာများ ဖြစ်သည်။ အကယ်၍ ဤမျောက်များက လုသွားပါက ဤတောနက်ကြီးထဲတွင် သူ အကြီးအကျယ် ဒုက္ခရောက်ပေလိမ့်မည်။

မျောက်ဝံဖြူပေါက်လေးတစ်ကောင်က သွားဖြဲပြကာ အိတ်ကို လုရန် ကြိုးစားသဖြင့် သူ ကန်ထုတ်ပြစ်လိုက်သည်။

“ဒီမျောက်စုတ်လေးကတော့ မင်းရဲ့ လက်သည်းတွေနဲ့ငါ့ကို လာထပ်ထိရင် မင်းအမေတောင် မမှတ်မိအောင် ငါမင်းကိုရိုက်လွှတ်လိုက်မယ်။”

လုပေါင်သည် ကျောပိုးအိတ် အနည်းငယ် ပြဲသွားသည်ကို မြင်သောအခါ ဒေါသထွက်သွားပြီး နောက်ထပ်တစ်ချက် ထပ်ကန်လိုက်သည်။

တိုက်ရိုက်ထုတ်လွှင့်မှုမှ ပရိသတ်များမှာ ဆွံ့အသွားကြသည်။ တကယ်ကြီးလား။ ရက်စက်တဲ့ မျောက်ဝံအုပ်ကြီးကြားထဲမှာ မျောက်ဖြူကလေးကို ချနေတာလား။အခြေအနေကိုလည်း ကြည့်ဦးလေ။

သို့သော် အံ့ဩစရာကောင်းသည်မှာ မည်သည့် မျောက်ဝံဖြူမှ ဒေါသထွက်မလာခြင်းပင်။ ထိုအစား မျောက်ဝံဖြူလေးများနှင့် မျောက်ဝံနက်အချို့မှာ ကြောက်လန့်တကြား ထွက်ပြေးကုန်ကြသည်။ ၎င်းမှာ ပျော့လျှင်ဖိ နာလျှင်ရှိဟူသော သဘောကို ကောင်းကောင်း သက်သေပြနေခြင်းပင်ဖြစ်သည်။

ဤနေရာ၏ အနံ့အသက်မှာ အလွန်ဆိုးဝါးလှပြီးမျောက်ဝံဖြူများ၏ ဆီးနံ့များမှာအလွန် နံစော်နေသည်။ အကယ်၍ မျောက်ဝံဖြူဂူထဲတွင် သုံးနာရီကြာ Check-in လုပ်ရမည်ဆိုပါက သူ အသက်ရှူကျပ်ကာ သေသွားနိုင်သည်ဟု လုပေါင် ခံစားနေရသည်။

ဖောက်။

တစ်ခုခုကို နင်းမိလိုက်သကဲ့သို့ ခံစားလိုက်ရသည်။ လုပေါင်သည် ခြေထောက်ကို အမြန်ဖယ်လိုက်ပြီး မြင်လိုက်ရသည့် မြင်ကွင်းကြောင့် အသက်ရှူမှားသွားသည်။ ၎င်းမှာ အဝတ်အိတ်တစ်ခုကို ကျစ်ကျစ်ပါအောင် ဆုပ်ကိုင်ထားသော လက်တစ်ဖက် ဖြစ်နေသည်။ တစ်ချိန်တည်းမှာပင် သစ်ရွက်များအောက်တွင် အမျိုးသမီးတစ်ဦး၏ အလောင်းကို ထပ်မံတွေ့ရှိလိုက်ရပြန်သည်။

လုပေါင် ဆက်မကြည့်ရဲတော့‌ပေ။ဒီနေရာတွင် အဘယ်ကြောင့် အနံ့ဆိုးနေရသနည်းဆိုသည်မှာ မဆန်းတော့။ သူသည် သေသည်အထိ မလွှတ်တမ်း ဆုပ်ကိုင်ထားသော အဝတ်အိတ်ကို ကန်လိုက်ရာ ရွှေတုံးနှစ်တုံး ထွက်ကျလာသည်။

“ဘုရားရေ”

လုပေါင်၏ မျက်လုံးများ ပြူးသွားပြီး တိုက်ရိုက်ထုတ်လွှင့်မှု အခန်းမှာလည်း ဆူညံပွက်လောရိုက်သွားသည်။ မူလက အလောင်းကို တွေ့သဖြင့် ကြောက်လန့်နေကြသော်လည်း ရွှေတုံးများ ထွက်ကျလာသည်ကို မြင်လိုက်ရသောအခါ ထိုကြောက်စိတ်များမှာ ချက်ချင်းပင် ပျောက်ကွယ်သွားတော့သည်။

“Streamer ရေ... မင်းတော့ သူဌေးဖြစ်ပြီဟ”

လုပေါင်သည်ရွှေတုံးများကို အမြန်ကောက်ယူလိုက်သည်။ နေရောင်အောက်တွင် ၎င်းတို့မှာ ဆွဲဆောင်မှုရှိသော အလင်းတန်းများဖြင့် ဖြာထွက်နေသည်။

ပိုက်ဆံနံ့လေးပဲ။

သူသည် အိတ်ထဲရှိ ရွှေတုံးအားလုံးကို သွန်ချလိုက်သည်။ စုစုပေါင်း ၁၁ တုံး ရှိသည်။ အလွန်မကြီးသော်လည်း တစ်တုံးလျှင် ၁၀၀ ဂရမ်ခန့် အလေးချိန် ရှိသည်။

‘တစ်တုံးကို ၁၀၀ ဂရမ်ဆိုတော့ ၁၁ တုံးဆို ၁၁၀၀ ဂရမ်ပေါ့။ လက်ရှိ ရွှေဈေးနဲ့ တွက်ရင် ယွမ် ၄ သိန်း ၄ သောင်း (မြန်မာငွေ သိန်းထောင်ချီ) ကျော်တန်တာပေါ့။ အရည်အသွေး မပြည့်ရင်တောင် အနည်းဆုံး ၃ သိန်းကျော်တော့ ရမှာပဲ။

လုပေါင်စိတ်ထဲတွင် တွက်ချက်နေသည်။

“ယွမ် ၅၀၀ နဲ့ ဂုဏ်ပြုမှတ်တမ်းလွှာပဲ ရမှာနော်။ Streamer ရေ... နုံအမနေနဲ့။ အခု ကင်မရာရှေ့မှာ လွှင့်ပစ်လိုက်သလို လုပ်ပြီးမှ Live ပိတ်ရင် ပြန်လာကောက်လိုက်တော့။”

“ဘုရားရေ... သူ‌တော့ချမ်းသာပြီ။”

ရွှေတွေ့လျှင် အပ်ရမည်ဆိုသော စည်းကမ်းကို လုပေါင်လည်း သိသည်။ သူသည် ရွှေတုံးများကို ပြန်ထည့်ကာ အလောင်းကို အလေးပြုလိုက်ပြီး ရှေ့သို့ ဆက်လျှောက်လာခဲ့သည်။

“Liveပိတ်ရင် ငါ မင်းဆီ ပြန်လာခဲ့မယ်။”

ထိုအမူအရာကြောင့် ပရိသတ်များက ဆရာကျတယ်ဟု ဝိုင်းချီးကျူးကြတော့သည်။

မျောက်ဝံဖြူများ၏ အသိုက်မှာ ချိုင့်ဝှမ်းအတွင်း၌ ရှိသည်။ သူ တောနက်ထဲသို့ ပိုတိုးဝင်လာသည်နှင့်အမျှ မျောက်ဝံဖြူများ ပို၍ များပြားလာသည်။

ဤနေရာတွင် လူများ စိုက်ပျိုးထားသည့်အလား သစ်သီးပင်များမှာ အစီအရီ ရှိနေသည်။ ဤသစ်သီးပင်များကြောင့်ပင် ဤမျှကြီးမားသော ဖြူမျောက်ဝံအုပ်စုကြီး တည်ရှိနေခြင်း ဖြစ်သည်။

နှင်းလုံးလေးဟု အမည်ရသော ကြက်တူရွေးသည် လုပေါင်၏ ကျောပိုးအိတ်ပေါ်သို့ ဆင်းနားလိုက်သည်။

ထူးခြားချက်မှာ မည်သည့် ဖြူမျောက်ဝံမှ သစ်ပင်ပေါ်သို့ တက်၍ အသီးမခူးကြခြင်းပင်။ သို့သော် အသီးတစ်လုံး ကြွေကျလာတိုင်း ဖြူမျောက်ဝံများမှာ လုယက်ရန် ပြေးဝင်သွားကြပြီး ရန်ပင် ဖြစ်ကြသေးသည်။

“အားလုံး သတိထားမိလား။ဒီက မျောက်ဝံဖြူတွေက သစ်ပင်ပေါ်က အသီးတွေကို မခူးရဲကြဘူး။ သူတို့မှာ စည်းမျဥ်း စည်းကမ်းတွေ ရှိပုံရတယ်။ ခုနက ငှက်တစ်ကောင် သစ်ပင်ပေါ် နားတာကို မျောက်အိုကြီးတစ်ကောင်က ခဲနဲ့ ထုသတ်လိုက်တာ တွေ့လိုက်ကြလား။”

လုပေါင်သည် ဤထူးခြားသော အချက်ကို ရှာဖွေတွေ့ရှိသွားသည်။ ဤဖြူမျောက်ဝံများသည် လူသားများကဲ့သို့ စနစ်တကျ နေထိုင်နေကြခြင်းပင်။

ဤနေရာတွင် ကြီးမားသော မျောက်ဝံဖြူဘုရင် တစ်ကောင် ရှိနေပေဦးမည်။

ခေတ္တအကြာတွင် သူ၏ ထင်မြင်ချက်မှာ အတည်ဖြစ်သွားသည်။ ဝါးတောင်းများ လွယ်ထားသော သန်မာသည့် မျောက်ဝံဖြူ ဒါဇင်ပေါင်းများစွာသည် သစ်ပင်များပေါ်မှ မှည့်နေသော အသီးများကို ခူးဆွတ်နေကြသည်။

သူတို့သည် အသီးများကိုအောက်တွင် စောင့်နေသည့် မျောက်ဝံများထံ ပစ်ချပေးနေကြ‌သည်။ အသီးကောင်းများကိုမူ သစ်ရွက်များဖြင့် ပတ်ကာ ဝါးတောင်းများထဲသို့ သေချာ ထည့်ကြသည်။ မျောက်ဝံဖြူအိုကြီး တစ်ကောင်က ခေါင်းဆောင်အဖြစ် ညွှန်ကြားနေပုံရသည်။

ဤအံ့ဩဖွယ် မြင်ကွင်းကြောင့် ပရိသတ်များမှာ ဆွံ့အသွားကြသည်။

“Rise of the Planet of the Apes ဇာတ်ကားက တကယ်ကြီးအပြင်မှာရှိတာပဲ။”

“ဒီမျောက်အိုကြီးရဲ့ မျက်လုံးတွေက ဉာဏ်ပညာရှိတဲ့ပုံပဲ အံ့ဩဖို့ကောင်းလိုက်တာနော်။”

လုပေါင်သည် မျောက်များ နေထိုင်ရာ ကျောက်တောင် ကမ်းပါးသို့ ရောက်ရှိလာသည်။

ကမ်းပါးတွင် ဂူပေါက်ပေါင်းများစွာ ရှိနေပြီး မျောက်ဝံဖြူများ ပြည့်နှက်နေသည်။ သူ Check-in လုပ်ရမည့် မျောက်ဝံဖြူဂူမှာ တောင်တစ်ဝက်ခန့်တွင် ရှိသော ကြီးမားသည့် ဂူကြီးပင် ဖြစ်သည်။

“ကျောက်လှေကားတွေတောင် ရှိတာပဲ...”

လုပေါင်သည် ဂူဆီသို့ တိုက်ရိုက် ဦးတည်နေသော ကြီးမားသည့် ကျောက်လှေကားများကို တွေ့လိုက်ရသည်။

“ပြေးတော့... ပြေးတော့။”

“ဂူး ဆရာကြီး... ပြေးတော့ အထဲမှာ မျောက်ဝံဖြူဘုရင် ရှိတယ် ပြေးတော့”

ကြက်တူရွေးက အော်ဟစ်ကာ လုပေါင်ကို လာဆိတ်ပြီး သူ၏ ယခင်သခင် ပြောခဲ့သော စကားများကို တုပပြောဆိုနေသည်။

၎င်း၏ အသံမှာ အလွန် ထိတ်လန့်နေပုံရသည်။

လုပေါင်သည် မြေပြင်ရှိ သစ်ရွက်ခြောက်များကြားတွင် ရွှေရောင် တဖိတ်ဖိတ် တောက်နေသည်ကို တွေ့လိုက်ရသည်။ သူ သစ်ရွက်များကို ဖယ်လိုက်ရာ ရွှေတုံးတစ်တုံးကို တွေ့ရသည်။ သူ ဆက်ရှာကြည့်ရာ နောက်ထပ် ရွှေတုံးတစ်တုံးကို ထပ်တွေ့ပြီး ၎င်းမှာ ပို၍ပင် ကြီးမားသေးသည်။

‘ဒါက ရတနာသိုက်ပဲ။ဒီမှာ ရွှေတုံးတွေ ဒီလောက်တောင် များနေတာလား။’

လုပေါင်သည် ခေတ္တစဉ်းစားပြီးနောက် ၎င်းတို့ကို အိတ်ကပ်ထဲသို့ တိတ်တဆိတ် ထည့်လိုက်သည်။

မျောက်ဝံများ ပိုမို စုရုံးလာကြပြီး ၎င်းတို့ထဲတွင် ခေါင်းဆောင်ကဲ့သို့သော မျောက်ဝံအိုကြီးများလည်း ပါဝင်ကာ ဆူညံစွာ အော်ဟစ်နေကြသည်။

၎င်းတို့မှာ သူ့အပေါ် ရန်လိုစိတ် မရှိသည်ကို အတည်ပြုပြီးနောက် လုပေါင်သည် ကျောက်လှေကားများအတိုင်း ဖြည်းညင်းစွာ တက်လာခဲ့လိုက်သည်။

ကျောက်လှေကားများမှာ ကြမ်းတမ်းပြီး မျောက်များ ကိုယ်တိုင် ထွင်းထုထားသည့်အလား ဖြစ်နေတော့သည်။