အခန်း (၁၇-၁၈)

အခန်း (၁၇) - ခရုကပ်ပါးများတွယ်နေသော ပင်လယ်လိပ်ကြီး။

သူ ဤတာဝန်ကို အောင်မြင်အောင် ထမ်းဆောင်နိုင်မည်ကိုယုံကြည်သွားသည်။

ချက်ချင်းပင် သူသည် ရေပေါ်သို့ ပြန်ကူးတက်ကာ ကျောပိုးအိတ်ထဲမှ ရေငုပ်မျက်မှန်ကို ထုတ်တပ်လိုက်ပြီး တူတစ်လက်နှင့် သစ်သီးလှီးဓားတစ်ချောင်းကို ဆွဲယူကာ ပင်လယ်ထဲသို့ ပြန်ဆင်းသွားတော့သည်။

စနစ်၏ လမ်းညွှန်မှုက ဦးတည်ရာကို စဉ်ဆက်မပြတ် ပြသနေသည်။

ပင်လယ်ကြမ်းပြင်တွင်လုပေါင်သည် ငါးတစ်ကောင်ကဲ့သို့ လျင်မြန်စွာ ကူးခတ်သွားလာနေသည်။ သူ၏ ရင်ထဲတွင် စိတ်လှုပ်ရှားမှုများ ပြည့်နှက်နေ၏။ ရတနာရှာဖွေခြင်းသည် လူတိုင်း၏ အိပ်မက်ဖြစ်ပြီး လျှို့ဝှက်ဆန်းကြယ်သော ပင်လယ်ကြမ်းပြင်သည် ထိုအိပ်မက်အတွက် အကောင်းဆုံးရတနာသိုက်ပင် ဖြစ်သည်။

သို့သော်လည်း လူသားတို့အဖို့ ပင်လယ်ပြင်သို့ ရောက်အောင်သွားရသည်မှာ ခဲယဉ်းလွန်းလှသည်။

ကမ္ဘာ့ချန်ပီယံ၏ ရေငုပ်နိုင်သည့် အနက်သည် မီတာတစ်ရာကျော်သာ ရှိသသည်။ယခုတွင်လုပေါင်သည် မီတာတစ်ရာအနက်သို့ ရောက်ရှိနေပြီဖြစ်၍သူ၏ ခန္ဓာကိုယ်ပေါ်သို့ သက်ရောက်နေသော ရေဖိအားမှာ အံ့သြစရာကောင်းလောက်အောင် ပေါ့ပါးနေဆဲ ဖြစ်သည်။

၁၃၀ မီတာ... ၁၅၀ မီတာ... မီတာ ၂၂၀ အရောက်တွင်မူစနစ်၏ အသံ ထွက်ပေါ်လာသည်။

“မစ်ရှင်ဧရိယာသို့ ရောက်ရှိလာပါပြီ။ Super Live Eye စတင်ပါပြီ။”

တိုက်ရိုက်ထုတ်လွှင့်မှုစတင်သွားလေပြီ။

ရတနာနတ်ဘုရား၏ Live Room တွင် Follower (၃) သန်းကျော် ရှိနေပြီဖြစ်သည်။ သူ Live မလွှင့်သည့်ရက်များတွင်ပင် Follower အရေအတွက်မှာ တစ်ရက်လျှင် တစ်သိန်းကျော်နှုန်းဖြင့်ဆက်လက် တိုးပွားနေသည်။ မရေမတွက်နိုင်သော လူအများအပြားသည် သူ၏ ထုတ်လွှင့်မှုကို စိတ်အားထက်သန်စွာ စောင့်ဆိုင်းနေကြသည်။

ဝံပုလွေအုပ်နှင့်အတူ အိပ်စက်ခြင်း ကျားဂူထဲတွင် ကျားများကို ပွတ်သပ်ခြင်းနှင့် မျောက်ဖြူဂူရှိ ထွားကျိုင်းလွန်းသော မျောက်ဘုရင်ကြီးနှင့် ယှဉ်ပြိုင်ခြင်းတို့သည် ကြည့်ရှုသူတို့အတွက် အလွန်ပင် ရင်ခုန်စိတ်လှုပ်ရှားဖွယ် ကောင်းလှသည် မဟုတ်ပါလား။

Live စတင်သည်နှင့် Notification ပေးထားသူများက ချက်ချင်းပင် အလုအယက် ဝင်ရောက်လာကြသည်။

“သူ Live လွှင့်နေပြီ။”

“ရတနာနတ်ဘုရား Live လာပြီဟေ့။”

“ဟာ... ပင်လယ်ကြမ်းပြင်လား။ရတနာနတ်ဘုရားကတော့ တကယ်ကို လန်းတယ်ဗျာ။”

“အား... နောက်ဆုံးတော့ Live လာပြီ။စိတ်လှုပ်ရှားလိုက်တာ ပင်လယ်ကြမ်းပြင်ကြီးပါလား။”

“ဒီတစ်ခါ ပင်လယ်အောက်မှာ ငါးမန်းတွေနဲ့များ စကားပြောဖို့ ပြင်နေတာလား မသိဘူး။”

“ရေအောက်မှာ ဘာလို့ ဒီလောက်တောင် ကြည်လင်နေရတာလဲ။ဘုရားရေ... ပင်လယ်ကြမ်းပြင်က အရမ်းလှတာပဲ ရွှံ့နွံတွေနဲ့ မှောင်မည်းနေမယ် ထင်ထားတာ။ ကမ်းခြေတွေထက်တောင် ပိုလှနေသေးတယ်။”

Live လွှင့်ပြီး တစ်မိနစ်အတွင်းမှာပင် လူပေါင်း သိန်းချီ၍ဝင်ရောက်ကြည့်ရှုလာသည်။ ရေအောက်ကမ္ဘာ၏ မြင်ကွင်းများ ပေါ်လာသည်နှင့် ကြည့်ရှုသူများ အလွန်အမင်း စိတ်လှုပ်ရှားသွားကြသည်။ ဤသည်မှာ တကယ့်ပင်လယ်အောက်ခြေ ရတနာရှာဖွေမှုပင်။

လုပေါင်သည် နှစ်တစ်ထောင်လိပ်ကြီးကို လိုက်လံရှာဖွေနေခြင်း ဖြစ်သည်။ သူသည် သန္တာကျောက်တန်းများရှိရာ နေရာသို့ ရောက်ရှိလာသည်။စနစ်က နှစ်တစ်ထောင်လိပ်ကြီးသည် အနီးအနားတွင် ရှိနေကြောင်း သတိပေးသော်လည်း သူ ရှာမတွေ့သေးပေ။

အရမ်းကြီးလွန်းနေလို့လား။

လုပေါင်သည် ကျောက်ဆောင်ကြီးများကို တစ်ခုပြီးတစ်ခု စစ်ဆေးကြည့်သော်လည်း ရှာမတွေ့သေးပေ။

Ocean Live Stream ရုံးချုပ်တွင်လုလင်းဟွာ သည် ကြီးမားသော screen ကြီးကို စိတ်လှုပ်ရှားစွာ ကြည့်နေပြီး သူ၏လက်ထောက်ကို ချက်ချင်းအမိန့်ပေးလိုက်သည်။

“ချက်ချင်း Banner တွေ ပြင်လိုက် screen ပေါ်မှာ ကြော်ငြာတွေတင် Pop-up တွေပါ ထည့်လိုက်တော့။ အမြန်လုပ်လိုက် Operations အဖွဲ့ကို ပြောလိုက် လုပ်နိုင်သမျှ အကုန်လုပ်ခိုင်းလိုက်။”

သူတို့ပလက်ဖောင်းတွင် ထိပ်တန်း Streamer တစ်ဦး အမြဲတမ်း လိုအပ်နေခဲ့သည်။ Streamer အကြီးစားအချို့ ရှိသော်လည်း ပလက်ဖောင်းတစ်ခုလုံးကို ဆွဲတင်နိုင်လောက်သည့် စွမ်းဆောင်နိုင်သူတော့ မရှိခဲ့ပေ။

ထို့ကြောင့် လုပေါင်သည် အသင့်တော်ဆုံး streamer ပင်။ လုပေါင်ကို အခြားပလက်‌ဖောင်းတစ်ခုခုက ခေါ်သွားမှာ သို့မဟုတ် သူက အပျော်တမ်း live လွှင့်နေတာမျိုး ဖြစ်နေမှာကို သူ အလွန်စိုးရိမ်နေခဲ့သည်။

ယခုမူ သူ ထပ်မံ Live လွှင့်လာပြီ။

“သူ့ရဲ့ တည်နေရာကို ရှာလို့ရမလား ကြည့်စမ်း။”

သူသည်လုပေါင်နှင့် ကိုယ်တိုင်ကိုယ်ကျတွေ့ဆုံပြီး မည်သည့်စျေးနှင့်မဆို စာချုပ်ချုပ်ဆိုချင်နေသည်။

အခြားသော Live streaming ပလက်ဖောင်း များမှာလည်း ဤမိနစ်အနည်းငယ်အတွင်း ရိုက်ခတ်မှုဒဏ်ကို ခံလိုက်ရသည်။ နာမည်ကြီး ပလက်ဖောင်းအချို့တွင် လူကြည့်နှုန်း၁၀ရာခိုင်နှုန်းကျော် ကျဆင်းသွားပြီး လူတိုင်းက ရတနာနတ်ဘုရားကို ကြည့်ရန် Ocean Live Stream သို့ စုပြုံရောက်ရှိသွားကြသည်။

Live ထဲတွင်ပင်လယ်ရတနာဟုခေါ်သော လက်ဆောင်များကို အကြိမ်ပေါင်းများစွာကိုရာနှင့်ချီ၍ ပေးပို့နေကြသည်။ ထိုအထဲတွင် ၅ ခုမှာ ကြည့်ရှုသူကို ပိုမိုဆွဲဆောင်ရန် Ocean Live Stream အဖွဲ့က ပေးပို့ခြင်း ဖြစ်သည်။

၅ မိနစ်အတွင်းမှာပင် တကယ့်ကြည့်ရှုသူ

၂ သန်းအထိ ရှိလာခဲ့သည်။ လူတိုင်းသည် လုပေါင်ကို ကြည့်ကာ အံ့သြမှင်သက်နေကြရသည်။

“ဒါ တကယ့်ပင်လယ်အောက်ခြေလား။ သူ အသက်ရှူဖို့ မလိုဘူးလား။”

“ဘယ်လို အသက်ရှူနေတာလဲ။”

“ရေအောက်မှာ ၅ မိနစ်တောင် အောင့်ထားတာလား။စောစောက အပေါ်ကို လှမ်းပြတဲ့ပုံအရဆိုရင် တော်တော်နက်မယ့်ပုံပဲ။ သူ ဘယ်လောက်အနက်အထိ ငုပ်သွားတာလဲ။”

လူအများ အံ့သြနေစဉ်မှာပင် လုပေါင်အတွက် System Prompt အသံ ထွက်ပေါ်လာသည်။

“Check-in ဝင်နေပါသည်...”

သူသည် ကားတစ်စီးခန့် ပမာဏရှိပြီးခရုကပ်ပါးများ ဖုံးလွှမ်းနေသည့် ကျောက်ဆောင်ကြီးကို ငုံ့ကြည့်လိုက်သည်။ သူရှာနေသည့် နှစ်တစ်ထောင်လိပ်ကြီးမှာ ဤကျောက်ဆောင်ကြီး ဖြစ်နေမှန်း သူ သိလိုက်ရပြီ

သူသည် အောက်သို့ အမြန်ဆင်းသွားပြီး သဲများကို ဖယ်ရှားကာ လိပ်ကြီး၏ခန္တာကိုယ်ကိုရှာဖွေလိုက်သည်။ ထို့နောက် လက်နှစ်ဖက်ဖြင့် အားကုန်သုံး၍ မလိုက်သည်။

“ဝူး...” သဲများ လွင့်စင်သွားပြီး ရေလှိုင်းများ ထသွားသည်။

အရမ်းလေးလွန်းသည်။

လုပေါင် လက်လွှတ်လိုက်ရသည်။ ဆက်ကိုင်ထားပါက သူ အသက်ရှူရန် လိုအပ်တော့မည်ဖြစ်သည်။ ဤနေရာရှိ ရေဖိအားမှာ ပြင်းထန်လွန်းလှသည်။ သူ၏ ထူးကဲသော ခန္ဓာကိုယ်ကြံ့ခိုင်မှုနှင့်ပင် လုံးဝပေါ့ပေါ့ပါးပါး မနေပေ။

နှစ်တစ်ထောင်လိပ်ကြီးသည် လန့်နိုးသွားပြီး ကြီးမားသော ဦးခေါင်းကို ဖြည်းညှင်းစွာ ထုတ်လာသည်။ အခွံဝတွင် ထူထပ်စွာ ကပ်ငြိနေသော ခရုကပ်ပါးများမှာ စတင်ကွဲအက်ပြီး ပြုတ်ကျလာသည်။ လိပ်အိုကြီးမှာ အကြာကြီး အိပ်ပျော်နေခဲ့သဖြင့် ခေါင်းကို ချက်ချင်း အပြည့်အဝ မထုတ်နိုင်ဘဲ ဖြစ်နေသည်။

“အသက်ရှူဖို့ အချိန်တန်ပြီ။”

လုပေါင်သည် ရေပေါ်သို့ ငါးမန်းတစ်ကောင်ကဲ့သို့ အရှိန်ဖြင့် ထိုးတက်သွားသည်။ သူသည် လတ်ဆတ်သော လေကို အဝရှူသွင်းပြီးနောက် ရေအောက်သို့ တစ်ဖန် ပြန်ငုပ်ဆင်းသွားပြန်သည်။

လိပ်ကြီးမှာ လုံးဝနိုးကြားခြင်း မရှိသေးဘဲ အပေါ်သို့တက်ရန်သာ ကြိုးစားနေသည်။ သို့သော် သူ၏ အခွံပေါ်တွင် ခရုကပ်ပါးများ အလွန်အမင်း ကပ်ငြိနေသည်။

လုပေါင်သည် တူကိုယူကာ ခရုခွံများကို စတင်ထုရိုက် ဖယ်ရှားပေးတော့သည်။ သူသည် ယခု Check-in လုပ်ငန်းစဉ်ထဲတွင် ရှိနေသည်။ အချိန်ကန့်သတ်ချက် မရှိသော်လည်း ဤလိပ်ကြီးပေါ်ရှိ ခရုခွံအားလုံးကို စင်ကြယ်အောင် ရှင်းလင်းပေးနိုင်မှသာ အောင်မြင်မည်ဖြစ်သည်။

လိပ်ကြီးပေါ်ရှိ ခရုကပ်ပါးများမှာ အံ့သြစရာကောင်းလောက်အောင် ကြီးမားလှသည်။ အချို့မှာ သေနေပြီဖြစ်သော်လည်း အများစုမှာ အသက်ရှင်နေဆဲဖြစ်ပြီး အလွန်ထူထပ်လှသည်။ လိပ်ကြီး၏ ခေါင်းထွက်လာချိန်တွင် လုပေါင်ပင် အံ့သြလွန်း၍ ပါးစပ်အဟောင်းသား ဖြစ်သွားရသည်။

လိပ်ကြီး၏ ခေါင်းပေါ်မှာပင် ခရုကပ်ပါးများ အပြည့်အသိပ် ကပ်ငြိနေသည်။

သူ၏ ခြေလက်များမှာလည်း အပြည့်ဖုံးလွှမ်းခံထားရသည်။ လိပ်အိုကြီးတစ်ကောင်လုံးမှာ ကျောက်သားဝတ်စုံ ဝတ်ထားသည့် နဂါးတစ်ကောင်နှင့်ပင် တူနေတော့သည်။ လိပ်ကြီးမှာ အလွန်ပင် နာကျင်စွာ ရှင်သန်နေရပုံရသည်။

သူသည် ခေါင်းလှည့်ကြည့်ပြီး လုပေါင်ကို မြင်သောအခါ ခေတ္တမျှ ရပ်တန့်သွားပြီးနောက် ခေါင်းကို ဟိုဘက်ဒီဘက် ခါလိုက်သည်။ ထို့နောက် သူ၏ ခန္ဓာကိုယ်ကို အထပ်ထပ် ညွှန်ပြကာ လုပေါင်ကို အကူအညီတောင်းသည့်အနေဖြင့် ပွတ်သပ်လေသည်။

ရွှေရောင်စွမ်းရည်ကြောင့် ဤလိပ်ကြီးသည် လုပေါင်ကို ချက်ချင်း အကူအညီ တောင်းခံလာခြင်း ဖြစ်သည်။

လုပေါင်ကလက်ဖြင့် OK ဟု အမှတ်အသားပြပြီးလိပ်ကြီး၏ ခေါင်းကို ပုတ်ပေးလိုက်သည်။ ထို့နောက် ဓားနှင့် တူကို အသုံးပြု၍ ခေါင်းပေါ်မှ ခရုခွံများကို ဂရုတစိုက် ခွာပေးတော့သည်။ လိပ်အိုကြီးသည် ငြိမ်သက်စွာ နေပေးပြီး မျက်တောင်ကိုသာ ခဏခဏ ခတ်နေရှာသည်။

Live ထဲတွင်မူ ကြည့်ရှုသူများ ပေါက်ကွဲထွက်ကုန်ကြပြီ။

“ဘုရားရေ...”

“ဒါ တကယ့်ကို အံ့သြဖို့ကောင်းတာပဲ။ရေအောက်မှာ ခရုကပ်ပါးကိုခွာပေးပြီး ကယ်တင်တာမျိုး တစ်ခါမှ မမြင်ဖူးဘူး။ လိပ်တွေက ကမ်းပေါ်တက်လာပြီး လူတွေကို အကူအညီတောင်းတာပဲ မြင်ဖူးတာ။ တကယ့်ကို ဉာဏ်ကောင်းလိုက်တာ။”

“ဟာ... အဲ့ဒီ ခရုကပ်ပါးတွေက ရွံစရာကြီးပဲ။ ကျွန်တော်တော့ကြက်သည်းတွေတောင်ထတယ်။”

လူအများအပြား သတိမထားမိသော အချက်တစ်ခုမှာ လုပေါင် ရောက်ရှိနေသည့် ရေအနက်ပင် ဖြစ်သည်။

“လုပေါင် အသက်ရှူဖို့ ရေပေါ်တက်သွားတဲ့ အကွာအဝေးကို ကျွန်တော် ခန့်မှန်းကြည့်တာ မီတာ ၁၅၀ လောက် ရှိတယ်။ ကမ္ဘာ့စံချိန်တောင် ဒီလောက် မနက်ဘူးဆိုတာ မင်းတို့ သိလား။”

“သနားစရာ လိပ်ကြီးပါလား။”

အခန်း (၁၈) - ရေအောက်တွင် ခရုကပ်ပါးများခွာပေးနေသော အမျိုးသား။

ခရုကပ်ပါးအဟောင်းများကို ရှင်းလင်းရသည်မှာ ရိုးရှင်းပါသည်။

လုပေါင်သည် ခရုကပ်ပါးများကို လက်ဗလာဖြင့် ချေမွကာ ခွာထုတ်ခြင်းက ပို၍ပင် မြန်ဆန်ကြောင်း ရှာဖွေတွေ့ရှိခဲ့သည်။ နှစ်တစ်ထောင်လိပ်ကြီးသည် အလွန်ပင် ပူးပေါင်းဆောင်ရွက်ရှာသည်။ နာကျင်မှုရှိနိုင်သော ခေါင်းပေါ်မှ ခရုခွံများကို ခွာပေးနေချိန်တွင်ပင် သူသည် လုံးဝမလှုပ်ရှားဘဲ ငြိမ်သက်စွာ နေပေးသည်။

သို့သော်လည်း အလုပ်ပမာဏမှာ အလွန်ပင် များပြားလှသည်။ ခရုခွံများမှာ စိပ်လွန်းပြီး အချို့နေရာများတွင် အထပ်ထပ် ဖြစ်နေသည်။ အချို့နေရာများကိုမူ ဖြည်းညှင်းစွာ ရှင်းလင်းပေးရန် လိုအပ်သည်။

“ဟူး... ဟူး...”

လုပေါင်သည် အသက်ရှူရန်အတွက် ရေပေါ်သို့ တစ်ခေါက်တက်လိုက်ပြီး ပြန်အဆင်းတွင် အကြံတစ်ခု ရသွားသည်။ သူသည် လိပ်ကြီးကို လက်ယပ်ခေါ်ကာ အနည်းငယ် ပိုနက်သော နေရာသို့ ကူးခတ်သွားသည်။ လိပ်ကြီးမှာ အနည်းငယ် လေးကန်နေသော်လည်း အမှီလိုက်လာခဲ့သည်။

ကျန်းချင်းမြို့အရှေ့ဘက်ကမ်းခြေ။

ဤနေရာတွင်ကမ္ဘာ့အနက်ဆုံး အောက်ဆီဂျင်မဲ့ ရေငုပ်စိန်ခေါ်ပွဲကို ကျင်းပနေသည်။ ဤသည်မှာ အလွန်ပင် အန္တရာယ်များပြီး မတော်တဆမှု အလွယ်တကူ ဖြစ်နိုင်သော အားကစားမျိုး ဖြစ်သည်။

သတင်းထောက်များကလည်း ဤပွဲကို တိုက်ရိုက်ထုတ်လွှင့်နေကြသည်။

သတင်းထောက်တစ်ဦးသည် Eagle Country မှ ရွှေအိုရောင်ဆံပင်နှင့် မျက်လုံးပြာပိုင်ရှင် ရေငုပ်အားကစားသမား တစ်ဦးကို အင်တာဗျူးနေသည်။ ဤအားကစားသမားမှာ အလွန်ကျော်ကြားသူဖြစ်ပြီး လွန်ခဲ့သော ၃ နှစ်က ၁၃၀ မီတာအနက်အထိ ငုပ်နိုင်ခဲ့သူ ဟီလီယိုပင် ဖြစ်သည်။ သူသည် ယနေ့စိန်ခေါ်ပွဲ၏ အဓိကဇာတ်ဆောင် ဖြစ်သည်။

“၁၄၀ မီတာ..”

ဟီလီယိုသည် စကားပြောရပ်လိုက်ပြီး သူ၏ အခြေအနေကို စတင်ထိန်းညှိလိုက်သည်။

“ဘုရားရေ... ဟီလီယိုသာ ဒီစိန်ခေါ်မှုကို အောင်မြင်ရင် သူဟာ ကမ္ဘာ့စံချိန်ကို ထပ်ပြီးချိုးဖျက်နိုင်မှာပါ။”

သတင်းထောက်ကအံ့သြတကြီး ရေရွတ်လိုက်သည်။

“ကြည့်ရှုသူ မိဘပြည်သူများခင်ဗျာ... ၁၄၀ မီတာအနက်ကို စိန်ခေါ်ရာမှာ ဟီလီယိုဟာ စိတ်ပိုင်းဆိုင်ရာရော ရုပ်ပိုင်းဆိုင်ရာပါ အခက်အခဲများစွာကို ရင်ဆိုင်ရမှာပါ။ အဆုတ်ထဲက လေကိုပဲ အားကိုးပြီး ၅ မိနစ်နီးပါး အသက်အောင့်ထားရမှာ ဖြစ်ပါတယ်။ ရေအောက်ကို ဆင်းနေချိန်မှာ သူဟာ တရားမှတ်နေသလို အခြေအနေမျိုး ရောက်အောင် ကြိုးစားရမှာဖြစ်ပြီး မျက်လုံးကို အမြဲမှိတ်ထားရမှာပါ။ နှလုံးခုန်နှုန်းဟာ တစ်မိနစ်ကို အကြိမ် ၃၀ အောက်အထိ ကျဆင်းသွားပါလိမ့်မယ်။ မီတာ ၁၀၀ ကျော်သွားတာနဲ့ နားစည်တွေဟာ မတွေးဝံ့စရာ ရေဖိအားဒဏ်ကို ခံရမှာပါ။ နားစည်မပေါက်ထွက်သွားဖို့အတွက် နားတွင်းဖိအားကို မျှတအောင် ထိန်းညှိနိုင်တဲ့ ကျွမ်းကျင်မှု အဆင့်မြင့်ဖို့ လိုအပ်ပါတယ်။”

ဤသည်မှာ လူသားတို့၏ ကန့်သတ်ချက်ကို စိန်ခေါ်ခြင်းပင်။

“ဒီစိန်ခေါ်ပွဲအတွက် ထိပ်တန်းရေငုပ်သမားတွေနဲ့ လုံခြုံရေးအဖွဲ့တွေ စုဖွဲ့ထားပါတယ်။ ဒါဟာ အောက်ဆီဂျင်မဲ့ ရေငုပ်ခြင်း လုပ်ငန်းစဉ်တစ်ခုလုံးကို ပထမဆုံးအကြိမ် မှတ်တမ်းတင်တာလည်း ဖြစ်ပါတယ်။ အခု ဟီလီယို အသက်ရှူနှုန်းကို နောက်ဆုံးအကြိမ် ထိန်းညှိနေပါပြီ။ ကျွန်တော်တို့ ခဏလောက် ငြိမ်ပေးကြရအောင်ပါ။”

ကျွမ်းကျင်ရေငုပ်သမားများ နည်းပြများနှင့် ဝါသနာရှင်များစွာ စောင့်ကြည့်နေကြသည်။ သို့သော် ပင်လယ်ကြမ်းပြင်အောက်တွင် မဖိတ်ခေါ်ဘဲ ရောက်ရှိနေသည့် ဧည့်သည်နှစ်ဦး ရှိနေသည်ကိုမူ သူတို့ မသိကြပေ။

၎င်းတို့မှာ ကြီးမားလွန်းသော လိပ်ကြီးတစ်ကောင်နှင့် ခရုခွံခွာပေးနေသော လူသားတစ်ဦးပင်။

“ဒီကြိုးက ဘာလဲ။”

လုပေါင်သည် လိပ်ကြီးကိုခေါ်ကာ ခရုခွံကပ်ပါးခွာရန် သဲသောင်ပြင်တစ်ခုကို ရွေးလိုက်စဉ် အမှတ်အသားများပါသည့် ကြိုးတစ်ချောင်း ရေအောက်သို့ တန်းဆင်းနေသည်ကို တွေ့လိုက်ရသည်။

“၁၅၀ မီတာ...”

၎င်းမှာ ထူးဆန်းသော အပြာရောင်ဘောလုံးလေး ဖြစ်သည်။ လုပေါင်၏ အမြင်အာရုံမှာ အလွန်ကောင်းမွန်သဖြင့် ထိုအပေါ်တွင် ရေးထားသော စာလုံးများကို အတိုင်းသား မြင်နေရသည်။

လိပ်ကြီးက သူ၏ ခေါင်းကြီးဖြင့် လုပေါင်ကို တွန်းလိုက်သည်။ ဤအချိန်တွင် လိပ်ကြီး၏ ခေါင်းပေါ်၌ ခရုခွံများ တစ်ခုမှ မရှိတော့သော်လည်း ခြေလက်များနှင့် အခွံအောက်ပိုင်းတွင်မူ ထူထပ်စွာ ကျန်ရှိနေသေးသည်။ လုပေါင်သည် ထိုကြိုးကို ဂရုမစိုက်ဘဲ ဆက်လက်၍ ခရုခွံများကို ရှင်းလင်းပေးနေသည်။

လုပေါင်၏ Live Room မှာလည်း အလွန်အမင်း စိတ်လှုပ်ရှားနေကြပြီး Ocean Live Stream အဖွဲ့ကမူ လုပေါင်ကို သူတို့၏ သံတမန်အဖြစ် ခန့်အပ်ချင်နေကြသည်။ သူ၏ ပုံစံမှာ သူတို့ပလက်‌ဖောင်းအမည်နှင့် အလွန်လိုက်ဖက်လွန်းနေသောကြောင့် ဖြစ်သည်။

ခရုကပ်ပါးများက အလွန်များပြားလှသည်။ လုပေါင်က တရစပ်ထုရိုက်လိုက်ရာ ခရုခွံအချပ်ကြီးများ ပြုတ်ကျလာသည်။ လိပ်ကြီးသည် သူ၏ လည်ပင်းရှည်ကြီးကို ဆန့်ထုတ်ကာ ခရုကပ်ပါးများ လျော့နည်းသွားသည်ကို ကြည့်နေသည်။

သူ၏ ပါးစပ်နှင့် မျက်လုံးများမှာ ပြုံးနေသကဲ့သို့ပင်။

“ဟားဟား... ချစ်စရာကြီး။”

“သူ တကယ် ပြုံးတတ်တာပဲ။”

“ဒါတွေကို မခွာပေးရင် သူ သေမှာမဟုတ်ပေမဲ့ တစ်သက်လုံး နာကျင်စွာ နေသွားရမှာဗျ။”

“လိပ်ကြီးက တကယ့်ကို ချစ်စရာပဲ ရတနာနတ်ဘုရား ကူညီနေတာကို သိလို့ နောက်ကနေ ပျော်ပျော်ကြီး လိုက်လာတာ။”

ကြည့်ရှုသူများ ပိုမိုများပြားလာပြီး လက်ဆောင်များနှင့် Follower များမှာလည်း တရှိန်ထိုး တိုးတက်လာသည်။ လုပေါင်၏ Live များမှာ တစ်ခုထက်တစ်ခု ပို၍ စိတ်လှုပ်ရှားဖွယ် ကောင်းနေတော့သည်။

“ဟင်..”

လုပေါင် ခရုကပ်ပါးများခွာ၍ ပြီးခါနီးအချိန်တွင် သူ၏ခေါင်းပေါ်၌ အရိပ်တစ်ခုကို ခံစားလိုက်ရသဖြင့် အပေါ်သို့ မော့ကြည့်လိုက်သည်။

ဝေဝါးသော လူရိပ်တစ်ခုမှာ တဖြည်းဖြည်း ငုပ်ဆင်းလာသည်။ ထိုသူမှာ အောက်ဆီဂျင်ဘူး ၆ ဘူးနှင့် ရေငုပ်ဝတ်စုံ အပြည့်အစုံ ဝတ်ဆင်ထားသော ရေငုပ်သမားတစ်ဦး ဖြစ်သည်။

“ငါ အပျော်တမ်း ရေငုပ်ဧရိယာထဲ ရောက်နေတာလား ဒါမှမဟုတ် ရတနာရှာသူတစ်ယောက်များလား။”

စက်ကိရိယာ မပါဘဲ အနက်ဆုံး ငုပ်နိုင်သည့် စံချိန်မှာ ၁၃၂ မီတာ ဖြစ်ပြီး စက်ကိရိယာ ပါပါက ၃၃၂ မီတာ ဖြစ်သည်။

မဟုတ်သေးဘူး။

လုပေါင် တစ်ခုခု မှားနေပြီဟု ရုတ်တရက် သိလိုက်ရသည်။ ဤလူသည် အပေါ်မှ တစ်စုံတစ်ယောက် ဆင်းလာမည်ကို စောင့်နေပုံရသည်။

ဤအချိန်တွင် ဟီလီယိုသည် ငါးတစ်ကောင်ကဲ့သို့ ကြိုးတစ်လျှောက် မီတာ ၃၀ ခန့်အထိ ငုပ်ဆင်းလာပြီ ဖြစ်သည်။ သတင်းထောက်ကလည်း ရေအောက် ဗီဒီယိုကို ကြည့်ကာ စိတ်လှုပ်ရှားစွာ ရှင်းပြနေသည်။

“ဟီလီယို အောင်မြင်နိုင်မလား ဆိုတာကိုဆက်လက် စောင့်ကြည့်ကြရအောင်ပါ။”

“ဒီ ၅ မိနစ်အတွင်းမှာ ရေဖိအားဟာ အနက်နဲ့အမျှ တိုးလာမှာ ဖြစ်ပါတယ်။ ၂.၅ တန် အလေးချိန်ရှိတဲ့ အရာတစ်ခုက သူ့အပေါ် ဖိထားသလို ခံစားရမှာပါ။ လူရဲ့ အဆုတ်ဟာ လက်သီးဆုပ်လောက်အထိ ကျုံ့သွားပါလိမ့်မယ်။ အခု မီတာ ၅၀ ရောက်ရှိ‌နေပါပြီ။”

“၆၀ မီတာ..ဟီလီယိုရဲ့ အခြေအနေက အလွန်ကောင်းမွန်နေပါတယ်။”

ဟီလီယို ဆင်းလာသည်ကို လုပေါင် မြင်လိုက်ရပြီး ခေတ္တမျှ ကြောင်သွားသည်။ ငါတို့ တခြားလူတွေ ရေငုပ်နေတဲ့ နေရာထဲ ရောက်သွားတာလား။

လိပ်ကြီးကမူ သူ၏ ကိုယ်ပေါ်တွင် ကျန်ရှိနေသေးသော ခရုကပ်ပများကို ခွာပေးရန် လုပေါင်ကို ခေါင်းဖြင့် ထိုးပြီး အချက်ပြနေသည်။

လုပေါင် သတိပြန်ဝင်လာပြီး ခရုကပ်ပါးများကို အမြန်ခွာပေးလိုက်သော်လည်း မျက်လုံးကမူ အပေါ်သို့ ခဏခဏ ရောက်နေသည်။ လူအချို့မှာ တောက်လျှောက် ငုပ်ဆင်းလာနေကြပြီး တစ်ယောက်မှာမူ အောက်ခြေတွင် ရုပ်ရှင်ရိုက်ရန် အသင့်ပြင်နေသည်။

တစ်ချိန်တည်းမှာပင် Live ထဲမှ ပရိသတ်များသည်လည်း ဤအံ့အားသင့်ဖွယ် မြင်ကွင်းကို မြင်တွေ့လိုက်ရသည်။ Super Live Eye၏ ကြည်လင်မှုမှာ လွန်ကဲလွန်းလှသဖြင့် မှောင်မည်းနေသော ပင်လယ်အောက်ခြေမှာပင် အလွန်တောက်ပနေသည်။

“ဒါ အနက်စိန်ခေါ်ပွဲအတွက် သုံးတဲ့ ကြိုး မဟုတ်လား။”

“အပေါ်က ဆင်းလာတဲ့ ရေငုပ်သမားက အောက်မှာ ဘောင်းဘီတိုတစ်ထည်နဲ့ တူနဲ့ ဓားကို ကိုင်ထားတဲ့ ဗလာကိုယ်လုံးနဲ့ လူတစ်ယောက်ကို မြင်ရင် ဘယ်လို ခံစားရမလဲ။”

“ဟာ... Streamer ကတော့ တကယ်ကို ကြမ်းတယ်ဗျာ။”

“ဟားဟား... ဆင်းလာတဲ့လူ စိတ်ဓာတ်တွေ ပြိုကျကုန်တော့မှာပဲ။”

“ဒါ ကျန်းချင်းမြို့က အနက်စိန်ခေါ်ပွဲ ဇုန်ပဲ။”

“ဟိုးမှာ... ရေငုပ်သမားက ရတနာနတ်ဘုရားကို မြင်သွားပြီ။”

၁၄၀ မီတာအနက်သို့ ရောက်နေသော ရေငုပ်သမားသည် ဘေးပတ်ဝန်းကျင်ကို ကြည့်ရှုနေစဉ် အောက်ဘက်မှ သူ့ကို မော့ကြည့်နေသော လုပေါင်ကို မြင်လိုက်ရသောအခါ အေးခဲသွားတော့သည်။ တစ်ချိန်တည်းမှာပင် ရေပေါ်ရှိ လူအများအပြားထံသို့ ဖုန်းများ ဝင်လာတော့သည်။

“ဘာ...ရတနာနတ်ဘုရားက ငါတို့အောက်မှာ ရှိနေတယ် ဟုတ်လား။အဲ့ဒါ ဘာကို ဆိုလိုတာလဲ “

“Ocean Live Stream က ရတနာနတ်ဘုရားလား။”

“ဘာဖြစ်လို့လဲ။”

“ဘုရားရေ... ဟိုမှာ ကြည့်လိုက်ပါဦး။”

၁၄၀ မီတာအနက်ရှိ ရေငုပ်သမားသည် သူ၏ ကင်မရာကို လုပေါင်ဘက်သို့ လှည့်လိုက်သည်။ လုပေါင်သည် ခရုကပ်ပါးများကို ခွာပေးရင်း သူတို့ကို မော့ကြည့်နေသည်။ ဟီလီယိုမှာမူ ဤအချိန်တွင် သူ၏ စိန်ခေါ်မှုကိုပင် လုံးဝ မေ့သွားပုံရသည်။

သတင်းထောက်များ အပါအဝင် ထိုနေရာရှိ လူအားလုံးသည် တစ္ဆေတစ်ကောင်ကို မြင်လိုက်ရသကဲ့သို့ အံ့သြမှင်သက်နေကြတော့သည်။