အခန်း (၁၃၂၁-၁၃၂၃)

အခန်း ၁၃၂၁: ကောင်းကင်ကရွေးချယ်သူ! ၂

သူကအမြန်ငွေရှင်းလိုက်သည်။ သူမဲပေါက်ရင် အလှလေးတွေနဲ့အတူတူဖြစ်သွားပြီမလား?

ဒီအလှလေးတွေနဲ့ နတ်သမီးပုံပြင်တောင်ပေါ်ခရီးသွားရရင် သူအခွင့်အရေးရနိုင်တယ်ဟုတ်?

ထိုအတွေးနှင့် ငွေရှင်းရန်အပြေးသွားသည်။

"လူကြီးမင်း.. စုစုပေါင်း ယွမ် ၂၃၀၀ ပါ... ၂၃ ကြိမ်မဲနှိုက်လို့ရပါတယ်''

ကောင်တာမှတွက်ချက်ပေးသည်။

လူငယ်ကအမြန်စကင်န်ဖတ်ပြီး မဲနှိုက်သည်။

အချစ်နတ်ဘုရားက မဲပေါက်ခွင့်ပေးပါစေ၊ အချစ်ရှာဖို့အခွင့်အရေးပေးပါစေ!

"ပါဝင်ပေးတဲ့အတွက်ကျေးဇူးတင်ပါတယ်!''

"ပါဝင်ပေးတဲ့အတွက်ကျေးဇူးတင်ပါတယ်!''

"ပါဝင်ပေးတဲ့အတွက်ကျေးဇူးတင်ပါတယ်!''

ပါဝင်ပေးတဲ့အတွက်ကျေးဇူးတင်ပါတယ်!'ဟု ၂၃ ​ကြိမ်ဆက်တိုက်ကြားပြီးနောက် လူငယ်ပါးစပ်အဟောင်းသားနှင့်ကြောင်သွားသည်။

အခွင့်အရေးက သူ့ရှေ့မှာ၊ ဒါပေမဲ့ ကံကြမ္မာက သူ့ကိုအခွင့်အရေးမပေး။

ကျူးယွမ်ယွမ်နှင့်ဝမ်လီလီထွက်သွားပြီးနောက် စျေးဝယ်စင်တာထဲချက်ချင်းပြေးဝင်ကာ ပစ္စည်းများဝယ်ပြီးမဲထပ်နှိုက်သည်။

အလှလေးတွေက ပန်းအိမ်ထဲဝင်ချင်တယ်တဲ့။ သူမဲပေါက်ရင် ပန်းအိမ်မှာဆုံလို့ရပြီမလား?

ကျူးယွမ်ယွမ်နှင့်ဝမ်လီလီက စျေးဝယ်စင်တာမှထွက်သွားကြပြီ။ ဒီလူငယ်အရူးတပိုင်းဖြစ်နေသည်ကို သူတို့မသိ။

သူတို့နှစ်ဦးက နတ်သမီးပုံပြင်တောင်လက်မှတ်ယူရန် ဧည့်ကြိုခန်းမတန်းသွားကြသည်။

ပေါက်မဲတွင် ကေဘယ်ကား၊ တောင်တက်လက်မှတ်၊ တောင်ပေါ်ပရောဂျက်တချို့နှင့် ပန်းအိမ်တစ်ညအိပ်ခွင့်ပါသည်။

သို့သော် လက်မှတ်ရပြီး ချက်ချင်းတောင်ပေါ်တက်မရသေး။ မနက်ဖြန်နေ့လယ်၊ညနေရောက်အောင် စောင့်ရဦးမည်။ နောက်ပြီး တောင်ပေါ်သို့အုပ်စုလိုက်ခွဲတက်ရမည်။

ချင်းလင်ရှုမျှော်ခင်းနေရာက သတ်မှတ်ထားခြင်းပင်။ ဘာပဲဖြစ်ဖြစ် တောင်ပေါ်ကို ခရီးသည်အကုန်လုံးတက်ခွင့်မပေးနိုင်။

ပထမဆုံးအကြိမ်လုပ်ငန်းလည်ပတ်ခြင်းဖြစ်၍ အတွေ့အကြုံမရှိသေးသောကြောင့် ပြဿနာရှိနိုင်သည်။

အသုတ်လိုက်ခွဲဝင်မှ ဝန်ထမ်းများအသားကျသွားမည်။

ထို့ကြောင့် ကျူးယွမ်ယွမ်နှင့်ဝမ်လီလီစောင့်ရုံသာရှိသည်။

ချင်းလင်အပန်းဖြေစံအိမ်၊ ချင်လင်ရုံးခန်း_

ရုတ်တရက် လင်းလန်ဇီနှင့်ချန်လီအတူတူရောက်လာသည်။

သူတို့အတူတူရောက်လာသောကြောင့် နတ်သမီးပုံပြင်တောင်ကိစ္စဖြစ်မည်ဟု ချင်လင်သိလိုက်သည်။

မဟုတ်ရင် ချန်လီနှင့်လင်းလန်ဇီ ဆက်သွယ်စရာအကြောင်းမရှိ။

"သူဌေးချင်.. ထပ်အနှောင့်အယှက်ပေးရတာ အားနာပါတယ်''

ချန်လီကတွေ့တွေ့ချင်းပြောသည်။

ချင်လင်ကပြုံးပြီး_

"လက်ထောက်ချန်က ကျွန်တော့်ကိုသူစိမ်းလိုသဘောထားနေတာပဲ... အစ်မလင်း အားလုံးထိုင်ရအောင်... ခင်ဗျားတို့အတူတူလာတယ်ဆိုတော့ တစ်ခုခုဖြစ်နေပြီပေါ့''

နှစ်ယောက်သားထိုင်ပြီးသည်နှင့် လင်းလန်ဇီကလိုရင်းတန်းပြောသည်_

"ဥက္ကဌချင်.. နတ်သမီးပုံပြင်တောင်က ဖွင့်ပြီမလား? ကေဘယ်ကားအပြင် တောင်တက်လမ်းမှာမြင်းစီးလို့လည်းရတယ်''

"ဒီတော့ တောင်ပေါ်ခြေလျင်တက်တဲ့လမ်းကြောင်းအတွက် စီရင်စုက ဆင်းရဲသားသက်သာချောင်ချိရေးပရောဂျက်ဖော်ဆောင်ချင်တယ်တဲ့... ဥပမာ ပစ္စည်းတင်တာပေါ့''

"ပစ္စည်းသယ်တဲ့သူတွေက ထမ်းစင်နဲ့ ခရီးသည်တွေကိုတောင်ပေါ်ပို့နိုင်တယ်... ခရီးသည်တွေက သယ်ပို့ခပေးရမယ်''

"နတ်သမီးပုံပြင်တောင်ထိပ်က အရမ်းမြင့်တယ်... ကိုယ့်အင်ကိုယ့်အားသက်သက်ဆိုရင် ခရီးသည်တွေခဏခဏနားပြီးလျှောက်ရမယ်''

"ဒီတော့ ဒီပရောဂျက်ရှိရင် ခရီးသည်တွေကထမ်းစင်ပေါ်ထိုင်ပြီး ရှုခင်းကြည့်ချင်မှာပဲ... ဝိုင်လုပ်ငန်းအတွက်လည်း အခွင့်အရေးအများကြီးရမယ်''

"သူဌေးချင်.. ဒီကိစ္စ မင်းကိုဒုက္ခပေးရဦးမယ်''

ချန်လီကပြောရင်းဆိုရင်း ချင်လင်ကိုစာဖိုင်ပေးသည်။

ချင်လင်လည်း ယူဖတ်လိုက်၏။

ဆင်းရဲသားပပျောက်ရေးမှာ အစိုးရတာဝန်တစ်ရပ်ဖြစ်သည်။ နောက်ပြီး မြို့တစ်မြို့ဘယ်လောက်ဖွံ့ဖြိုးသည်ဖြစ်စေ ဆင်းရဲသားကရှိစမြဲ။

ရုံချန်းလည်းအတူတူပင်။

ရုံချန်းတွင် အလုပ်အကိုင်အခွင့်အလမ်းများသည်။ ကျေးလက်တွင် ချင်းလင်ဓာတ်ခွဲခန်းမှသီးနှံစိုက်ပြီး စီရင်စုထဲတွင်မူ စက်ရုံမှာအလုပ်လုပ်နိုင်သည်။

သို့ရာတွင် အလုပ်မရှိ၊ဝင်ငွေမရသူက ရှိနေသေးသည်။

အပျင်းကြီးသူများမှာ ဆင်းရဲထိုက်သည်။

သို့သော် တချို့က ဒီလိုမဟုတ်။ သီးနှံစိုက်ချင်သော်လည်း ကျေးရွာမှာမြေမရှိ။ စက်ရုံမှာလုပ်ချင်သော်လည်း စာမတတ်၍စက်အကြောင်းနားမလည်။ အနုစိတ်အလုပ်ကိုအဆင်ပြေအောင်မလုပ်နိုင်ပေ။

တချို့က မွေးရာပါနားမကြားသူတောင်ရှိသည်။

ဒီလိုလူမျိုးတွေက ပင်ပင်ပန်းပန်းအလုပ်လုပ်ပြီးသာ ပိုက်ဆံရှာတတ်သည်။ အလုပ်ကြမ်းဆို သူများထက်ပိုလုပ်နိုင်သည်။

ဒီလိုလူမျိုးက စီရင်စုကကူညီပေးချင်သောဆင်းရဲသားမျိုးပင်။

ဘာပဲဖြစ်ဖြစ် ချင်းလင်ရှုမျှော်ခင်းနေရာက စီရင်စုအတွက်ဘယ်လောက်အကျိုးရှိလဲ သူတို့သိသည်။ သူတို့အတွက်ခက်ခဲအောင်မလုပ်ချင်သလို ဒုက္ခလည်းမပေးချင်။

သူတို့ကူညီရန်ရွေးထားသောဆင်းရဲသားများမှာ သေချာပေါက်လူရိုးများဖြစ်သည်။

ချင်လင်က အချက်အလက်ဖတ်ပြီး ခေါင်းညိမ့်ကာ_

"ကိစ္စမရှိပါဘူး.. ဥက္ကဌလင်း စီရင်စုကိုသွားပြီးလက်ခံလိုက်ပါ... ပစ္စည်းသယ်တဲ့သူတွေကို ကျွန်တော်တို့ပိုက်ဆံမကောက်ဘူး... စာရင်းသွင်းဖို့ပဲလိုတယ်... တစ်ခုခုအမှားလုပ်မယ် ရှုမျှော်ခင်းနေရာကိုထိခိုက်မယ်ဆိုရင်တော့ သူတို့ကိုစည်းကမ်းအတိုင်းအပြစ်ပေးရပါမယ်''

လူအမျိုးမျိုးရှိမှန်း ချင်လင်လည်းသိသည်။ အတော်များများမှာ ပြင်မရသောမွေးရာပါအားနည်းချက်ရှိတတ်သည်။

နောက်ပြီး ဆင်းရဲသားအများစုက အလုပ်မလုပ်၍​မဟုတ်၊ အခက်အခဲနှင့်ပင်ပန်းမှုကိုကြောက်၍လည်းမဟုတ်။ တစ်ခါတလေ နေရာမှန်မှာ အားစိုက်ထုတ်မှုမမှန်ခြင်းသာဖြစ်သည်။

လူတချို့ကိုအခွင့်အရေးပေးဖို့သာလိုသည်။

အခွင့်အရေးပေးချင်စိတ်ရှိရင်ပေါ့။

"ကောင်းပါပြီ ဥက္ကဌချင်''

လင်းလန်ဇီခေါင်းညိမ့်လိုက်သည်။

"ကျေးဇူးအများကြီးတင်ပါတယ် သူဌေးချင်''

ချန်လီလည်း ကျေးဇူးတင်စကားပြောသည်။

ထိုကိစ္စပြောပြီးသည်နှင့် ချန်လီနှင့်လင်းလန်ဇီလည်း စီရင်စုထဲသွားသည်။ ဒီကိစ္စသူတို့ချက်ချင်းဖြတ်မည်ဖြစ်သော်လည်း စီရင်စုက ထမ်းစင်ဖြစ်စေ၊ ဝါးကုလားထိုင်ဖြစ်စေ အားလုံးပြင်ဆင်ထားပြီးဖြစ်မည်ဟုမထင်မိချေ။

အချိန်ကုန်လွန်သွားပြီး ဒုတိယမြောက်နေ့ရောက်လာသည်။

ရုံချန်းမှာ စောစောစီးစီးစည်ကားနေသည်။ နတ်သမီးပုံပြင်တောင်လက်မှတ်ရသောခရီးသည်များမှာ ရထားနှင့်ဖြစ်စေ၊ကားနှင့်ဖြစ်စေ ရုံချန်းသို့အစောကြီးရောက်လာကြသည်။

ချန်လီလည်း စီရင်စုထဲအစောကြီးရောက်နေပြီး ဆင်းရဲပပျောက်ရေးပရောဂျက်ကိုစောင့်ကြည့်ရန် သီးသန့်လူတစ်ယောက်စီစဉ်သည်။

အခန်း ၁၃၂၂: ကောင်းကင်ကရွေးချယ်သူ! ၃

ဒီကိစ္စဆုံးဖြတ်ပြီးမှတော့ သူလိုရာထူးနှင့်လူက မျက်စိဒေါက်ထောက်ကြည့်နေဖို့မဖြစ်နိုင်။ အစီအစဉ်သာဆွဲရမည်။

မနက်ပိုင်း ထိုကိစ္စစီစဉ်ပြီးနောက် စွန်းရှန်ကအစည်းအဝေးခန်းထဲဖုန်းဆက်ခေါ်သည်။

အစည်းအဝေးခန်းထဲရောက်သောအခါ ယာဉ်လမ်းကြောင်းတာဝန်ခံတချို့ကိုတွေ့ရသည်။

ထို့ကြောင့် သူကအမှတ်တမဲ့မေးလိုက်၏_

"ယာဉ်လမ်းကြောပျက်ပြန်ပြီလား?''

အရာရှိတစ်ဦးက ချက်ချင်းခေါင်းညိမ့်ပြီး_

"ဟုတ်တယ်.. လမ်းစပိတ်နေပြီ... တတိယပတ်လမ်းပါ စပိတ်နေတာ''

စွန်းရှန်က သက်ပြင်းချကာ_

"ထင်တဲ့အတိုင်းပဲ.. ရာသီဥတုကပြောင်းနေပြီ... ခရီးသည်တွေအပန်းဖြေထွက်ဖို့အကောင်းဆုံးအချိန်ပဲ... ချင်းလင်စံအိမ်မှာ ဒီလောက်ကြီးတဲ့ပရောဂျက်ရှိတာ မပိတ်ဘဲမနေဘူး''

"ဒီတစ်ခါယာဉ်လမ်းကြောကိုကြိုးစားထိန်းပါ... သယ်ယူပို့ဆောင်ရေးအတွက် ခင်ဗျားတို့အပြင်းအထန်လုပ်ပါ... စတုတ္ထနဲ့ပဥ္စမမြောက်ပတ်လမ်းကိုအမြန်ဆောက်ရမယ့်ပုံရှိတယ်''

ထို့နောက် စွန်းရှန်က ချန်လီကိုခေါ်ပြီးဆွေးနွေးသည်။

အနောက်ဘက်တွင်နေဝင်ပြီးချိန် နတ်သမီးပုံပြင်တောင်က ပိုစည်ကားလာသည်။ နတ်သမီးပုံပြင်တောင်ဖွင့်ပြီးနောက် လက်မှတ်ရခရီးသည်များအစောကြီးရောက်လာကာ တောင်ပေါ်အမြန်ဆုံးတက်ပြီးအတွေ့အကြုံခံစားချင်ကြသည်။

ကျူးယွမ်ယွမ်နှင့်ဝမ်လီလီလည်း အတူတူပင်။

သူတို့လည်းဝတ်စားပြင်ဆင်လာသည်။ လှလှပပနှင့်ကိုယ်လုံးကိုယ်ပေါက်ကောင်းသောကြောင့် အမျိုးသားခရီးသည်များစိတ်ဝင်စားကြသည်။

အထူးသဖြင့် တဏှာရူးများက အကြည့်မခွာနိုင်ကြ။

ထိုတဏှာရူးများဘေးတွင် မကျေမနပ်ဖြစ်နေသောအမျိုးသမီးအဖော်များပါသည်။

အဆီတဝင်းဝင်း၊ဗိုက်ရွှဲရွှဲနှင့်အမျိုးသမီးက သူမဘေးမှတဏှာရူးကိုကန်လိုက်ပြီး_

"ဘာကြည့်စရာရှိလို့လဲ? အလည်လာတာကို ကလက်တက်တက်ဝတ်စားထားတာ လူကောင်းနဲ့လုံးဝမတူဘူး... အကြွေးတင်နေရင်တင်တယ်ပြော... ဒီလာပြီး *** ရောင်းစားစရာမလိုဘူး''

ဗိုက်ရွှဲရွှဲနှင့်အမျိူးသမီးကပြောရင်းပြောရင်း စိတ်အနှောင့်အယှက်ဖြစ်လာပြီးဆဲရေးကာ သူမဘေးမှအမျိုးသမီးများကိုတောင်​မြှောက်ပေးသည်။

ထိုအမျိုးသမီးများကိုလည်း ပတ်ဝန်းကျင်မှခရီးသည်များအာရုံစိုက်မိပြီး ခေါင်းခါလိုက်ကြသည်။ ဒီအပြုအမူကို စကားလုံးနည်းနည်းနှင့်ရှင်းပြရခက်သည်။

ကျူးယွမ်ယွမ်နှင့်ဝမ်လီလီက ထိုအမျိုးသမီးများဆူပူသံကိုကြားပြီး အမှတ်တမဲ့ခြေလှမ်းသွက်သွက်ထွက်လာသည်။ တစ်ခါတလေ အတော်စိတ်ပျက်စရာကောင်းသည်။

သူတို့ဘာမှမလုပ်တာအမှန်။ ခပ်မိုက်မိုက်ဝတ်စားတာ သူတို့အပြစ်မဟုတ်။

"လီလီ.. အခုကေဘယ်ကားစီးကြမလား?''

ကျူးယွမ်ယွမ်က ဝင်ဝင်ချင်းမေးသည်။

ဝမ်လီလီက ချက်ချင်းဘေးကိုညွှန်ပြပြီး_

"ယွမ်ယွမ်.. ဟိုမှာထမ်းစင်ရှိတယ်ထင်တယ်... တောင်ပေါ်ထမ်းစင်နဲ့တက်လို့ရမလားပဲ... သွားစီးရအောင်''

"ဟုတ်ပြီ!''

ကျူးယွမ်ယွမ်ကအကြံကောင်းဟုထင်ပြီး ခေါင်းညိမ့်သည်။ ကေဘယ်ကားလက်မှတ်ရှိသော်လည်း ရှုခင်းကြည့်ရင်း အထမ်းသမားများ၏စီးပွားရေးကိုဂရုစိုက်ပေးတာလည်း အကြံကောင်းပင်။

ဒီလိုပင်ပင်ပန်းပန်းလုပ်ပြီး ဘယ်သူကအသက်မွေးချင်မလဲ?

"ဦးလေး.. အထမ်းစီးရင် ဘယ်လောက်လဲ?''

ကျူးယွမ်ယွမ်က အထမ်းသမားတစ်ဦးကိုမေးသည်။

အထမ်းသမားများ တန်းစီနေသည်။ ခရီးသည်များကိုမြင်သောအခါ သူတို့မျက်နှာလင်းထိန်သွား၏။ သူတို့အားလုံးမှာ အလုပ်ကြိုးစားဖို့သာသိသူများပင်။ ရှုမျှော်ခင်းနေရာက အခွင့်အရေးပေးသောကြောင့် သူတို့တန်ဖိုးထားသည်။

"အလှလေး.. တစ်ခေါက် ယွမ် ၁၀၀ ပါ!''

အထမ်းသမားကချက်ချင်း ဝမ်းသာအားရပြောသည်။ ရှုမျှော်ခင်းနေရာကအခွန်မကောက်သောကြောင့် ထမ်းစင်ကိုလူနှစ်ယောက်သယ်သည်။ တစ်ခေါက်ကို တစ်ယောက်ယွမ် ၅၀ သာရသည်။

"ဒါဆို ထမ်းစင်နှစ်ခု''

ကျူးယွမ်ယွမ်ကတန်း​ပြောသည်။

"ဟုတ်ပြီ.. လူမစေ့ရင် ရှေ့ဆုံးကနှစ်ခုယူလိုက်... ငါတို့တန်းစီမယ်''

အထမ်းသမားတစ်ယောက်က ဝမ်းသာအားရပြောသည်။

အမှန်ပင်။ အထမ်းသမားများ ခရီးသည်မလုစေရန် တန်းစီရသည်။ တောင်ပေါ်မှဆင်းလာသောအထမ်းသမားက နောက်ဆုံးမှာတန်းစီရသည်။

ခန္ဓာကိုယ်သန်မာရင်သန်မာသလောက် တောင်ပေါ်နောက်မှတက်ပြီး သူများထက်အရင်ဆင်းကာ ရှေ့လည်းပြန်ရောက်နိုင်သည်။

အထမ်းသမားများမှာ ကျူးယွမ်ယွမ်နှင့်ဝမ်လီလီကြောင့် ဝမ်းသာနေသည်။ ခရီးသည်ရရုံသာမက ပေါင် ၉၀ လောက်သာရှိပြီးပေါ့လည်းပေါ့သောကြောင့် အသာလေးသယ်နိုင်သည်။

မကြာမီ နှစ်ယောက်သားထမ်းစင်နှင့်တောင်ပေါ်တက်သွားသည်။

တိုက်တိုက်ဆိုင်ဆိုင်ပင်၊ စောစောကဆဲရေးသောအမျိုးသမီးတချို့လည်းရောက်လာ၏။ ဗိုက်ရွှဲရွှဲအမျိုးသမီးက လှောင်တောင်လှောင်သည်_

"အားလုံး ကြည့်စမ်းပါဦး... ဒီလိုမိန်းမမျိုးက အရှက်မရှိဘူး... တောင်ပေါ်ကေဘယ်ကားရှိရဲ့သားနဲ့ ထမ်းစင်စီးတယ်... ပိုက်ဆံသုံးပြီး သူများကိုအရှက်ခွဲတာ''

ထိုစကားကို ပတ်ပတ်လည်မှအမျိုးသမီးများက တရားမျှတမှုရှိသလိုခံစားရသည်။

"ဟုတ်ပါ့.. လူတိုင်းမွေးလာတာ အတူတူပဲဟာ... သူတို့က ဘာကော*င်မမလို့လဲ? ကြည့်ရုံနဲ့ လူကောင်းမဟုတ်မှန်းသိသားပဲ''

"ဒီလိုလူမျိုး သေသွားအေးတာပဲ... အရှက်မရှိဘူး''

သူတို့ဖုန်းများနှင့်တောင် ကျူးယွမ်ယွမ်နှင့်ဝမ်လီလီကိုဓာတ်ပုံရိုက်ထားသည်။

ထိုမြင်ကွင်းကြောင့် တောင်ပေါ်ထမ်းစင်နှင့်တက်ချင်သောခရီးသည်များမှာ အလှလေးနှစ်ယောက်ကိုမြင်ပြီး နောက်ပြန်ဆုတ်သွားကြသည်။ ထိုသူတော်ကောင်းကြေညာချက်စကားကြောင့် ထမ်းစင်စျေးမေးသောခရီးသည်တချို့ ချက်ချင်းပြန်ထွက်သွား၏။

ထို့ကြောင့် အထမ်းသမားများက ဗီဒီယိုရိုက်နေသောအမျိုးသမီးများကို မကြည်ကြည့်နှင့်ကြည့်လိုက်ကြသည်။

သို့သော် ထိုအမျိုးသမီးများက သတိမထားမိဘဲ သူတို့စကားသူတို့ဂုဏ်ယူနေသည်။

"အဲဒီမိန်းမပျက်နှစ်ယောက်ကိုအလွတ်မပေးနိုင်ဘူး... ဖော်ထုတ်မယ်!''

"ဟုတ်တယ်.. သူတို့အကြောင်းဖော်မယ်''

"သူတို့သိက္ခာချမယ်... နာမည်ကြီးပါစေ''

အခန်း ၁၃၂၃: ထူးဆန်းထွေလာကမ္ဘာ!

ကျူးယွမ်ယွမ်နှင့်ဝမ်လီလီက နောက်မှအသံများကြားသော်လည်း မငြင်း။ သက်ပြင်းသာချလိုက်သည်။

အမှန်အတိုင်းပြောရရင် အထမ်းသမားတွေကိုစော်ကားခြင်းမဟုတ်။ ဘာပဲဖြစ်ဖြစ် အထမ်းသမားတွေရှိနေမှတော့ ထမ်းဖို့ပဲပေါ့။

ဒါကလည်း ဝန်ဆောင်မှုပေးသူနဲ့ယူသူကြား ဆက်ဆံရေးသာ။

တောင်မတက်ချင်သောကြောင့် သူတို့ကဝန်ဆောင်ခပေးသည်။ မိသားစုကိုထောက်ပံ့ရန်အလုပ်ကြမ်းလုပ်နေသူများအတွက်မျှတသည်။

"ယွမ်ယွမ် သူတို့ကိုဂရုမစိုက်နဲ့... တို့ဘာသာလည်ကြစို့''

ဝမ်လီလီက စိတ်ကြည်ကြည်နှင့် ကျူးယွမ်ယွမ်ကိုပြောသည်။

"အင်း!''

ကျူးယွမ်ယွမ်ခေါင်းညိမ့်လိုက်သည်။

အထမ်းသမားများသယ်ရင်း တောင်ပေါ်ရောက်လာသည်နှင့် ပတ်ဝန်းကျင်ရှုခင်းကိုစချီးကျူးရသည်။

တောင်တက်လမ်းတွင် စိမ်းစိမ်းစိုစိုအပင်များစွာရှိပြီး အတော်များများကတန်ဖိုးရှိပုံရသည်။ ထင်သာမြင်သာရှိသည်။

သို့ရာတွင် ကျူးယွမ်ယွမ်နှင့်ဝမ်လီလီက မျက်မှောင်ကြုတ်လိုက်သည်။

သူတို့လာတာ နတ်သမီးပုံပြင်တောင်၊ ဒီမှာ တခြားနေရာတွေလိုစိမ်းစိမ်းစိုစိုအပင်များသာရှိသောကြောင့်ပင်။

ဒီတောင်တက်လမ်းက ဗီဒီယိုထဲမှာပြထားသလိုလှပတဲ့ရှုခင်းမျိုးမဟုတ်။

ညမရောက်သေးမှန်း သူတို့လည်းသိသည်။ နတ်သမီးပုံပြင်တောင်မိတ်ဆက်တွင် နေ့နှင့်ညက ကမ္ဘာခြားသည်ဟုဆိုထားသည်။

နေ့တွင် သာမန်စိမ်းစိမ်းစိုစိုရှုမျှော်ခင်းနေရာဟုသာယူဆနိုင်သည်။ ညပိုင်းတွင်မူ တောင်က နတ်သမီးပုံပြင်ကမ္ဘာပြောင်းသွားမည်။

ဒါကြောင့်လည်း ညရောက်ရန်မျှော်လင့်စောင့်စားမိသည်။

အချိန်လွန်သည်နှင့် အနောက်ဘက်တွင်နေလုံးလုံးဝင်သွားပြီး အထမ်းသမားများတင်လာသောကျူးယွမ်ယွမ်နှင့်ဝမ်လီလီမှာ တောင်ထိပ်ရှိပန်းအိမ်အစုအဝေးသို့ရောက်လာသည်။

နှစ်ယောက်သားဆင်းပြီးနောက် ငွေရှင်း၍ စာရင်းသွင်းကောင်တာအပြေးသွားကာ လက်မှတ်နှင့် ID ကတ်များပြသည်။

စာရင်းသွင်းသူက အခန်းစစ်ဆေးပြီးနောက် သူတို့နှစ်ဦးကိုစာရင်းသွင်းကာ အခန်းကတ်ပေးသည်။ သူတို့ကကံကောင်းပြီး နှစ်မဲဆက်တိုက်ရခဲ့သူများပင်။

နောက်အစောင့်တစ်ယောက်က ချက်ချင်းရောက်လာပြီး လမ်းပြသည်_

"ဧည့်သည်တို့.. ကျွန်တော့်နောက်လိုက်ခဲ့ပါ''

ကျူးယွမ်ယွမ်နှင့်ဝမ်လီလီက သူ့နောက်လိုက်ပြီး ပန်းအိမ်အစုအဝေးဆီရောက်လာသည်။

ပန်းအိမ်တစ်ခုနှင့်တစ်ခုဆက်စပ်နေသောအစုအဝေးမှာ ပြောမပြတတ်အောင်ခမ်းနားသည်။

"လှလိုက်တာ''

ကျူးယွမ်ယွမ် ကြည်နူးအံ့ဩသွားသည်။

"အင်း.. ပန်းအိမ်က အရမ်းဆွဲဆောင်မှုရှိတာပဲ''

ဝမ်လီလီ ခေါင်းညိမ့်လိုက်သည်။

တစ်ချက်ကြည့်ရုံနှင့် ပန်းအိမ်၏ အလှ +၂၊ ဆွဲဆောင်မှု +၂ က အကြည့်မခွာနိုင်အောင်ဖြစ်စေသည်။

သူတို့တင်မဟုတ်၊ တခြားခရီးသည်များလည်း စိတ်ဝင်စားနေသည်။

"အရင်က လိုင်းပေါ်မှာပဲမြင်ဖူးတာ... ကိုယ်တိုင်မြင်ရမယ်မထင်ထားဘူး''

"အင်း.. လှလိုက်တာ.. ညကျ အထဲမှာနေလို့ရတယ်''

"ပန်းအိမ်တွေအများကြီးဆိုပေမဲ့ တစ်အိမ်တည်းမှာပဲနေရမှာ... အကုန်လုံးလိုက်နေချင်တယ်''

"အချစ် သတိထားဦး.. ကိုယ်တို့မှာ အဲလောက်ပိုက်ဆံမရှိဘူး''

ပန်းအိမ်ထဲတွင် အင်းဆက်ပိုးမွှားဘာမှမတွေ့သောကြောင့် ခရီးသည်များပိုအံ့ဩရသည်။

ထူးဆန်းလိုက်တာ။

တောင်ထိပ်မှာ ခြင်အပေါဆုံးနေရာဖြစ်သည်။

ခြင်ဆေးဘယ်လောက်ကောင်းကောင်း ခြင်လုံးဝကင်းစင်ဖို့မဖြစ်နိုင်။

ချင်းလင်စံအိမ်က ဘယ်လိုလုပ်ထားလဲ?

ရွက်ဖျင်တဲနှင့်တည်းခိုဆောင်များအပါအဝင် နတ်သမီးပုံပြင်တောင်တခြားနေရာများတွင် ခြင်ဆေး၊ပိုးသတ်ဆေးများသုံးရပြီး ပန်းအိမ်တွင်မသုံးရကြောင်း ထိုခရီးသည်များမသိကြ။

ပန်းအိမ်တွင် အင်းဆက်ပိုးသတ်အာနိသင် +၂ ရှိသော​ကြောင့်ပင်။

ပန်းအိမ်ကိုစိတ်ဝင်စားပြီး ခရီးသည်များဖုန်းထုတ်ကာဓာတ်ပုံရိုက်ကြသည်။ ဒီအချိန်ကို မဖြစ်မနေမှတ်တမ်းတင်ရမည်။

ကျူးယွမ်ယွမ်နှင့်ဝမ်လီလီလည်း အတူတူပင်။

အရင်ဆုံး သူတို့ဖုန်းနှင့်မြင်ကွင်းကိုဓာတ်ပုံရိုက်သည်။ ထို့နောက် သူတို့နှစ်ယောက်တွဲပုံနှင့် သူများကိုဓာတ်ပုံရိုက်ခိုင်းသည်။

ပြီးလျှင် Wechat အခိုက်အတန့်များတွင်တင်သည်။ ခေါင်းစဉ်မှာ:

'ချင်းလင်နတ်သမီးပုံပြင်တောင်သို့ ပထမဆုံးခရီးသွားအဖွဲ့'

ခေါင်းစဉ်မှာ ဂုဏ်ဆာမှုအပြည့်နှင့်။ ပို့စ်တင်ပြီးမကြာမီ လူတွေက Like ပေးကြသည်။ အားကျသောမှတ်ချက်များရေးကြသည်။ သူတို့မပြုံးဘဲမနေနိုင်။

နတ်သမီးပုံပြင်တောင်ပေါ်ပထမဆုံးတက်ခွင့်ရတဲ့အခွင့်အရေးက တစ်ခါတည်း။

"ညအိပ်မယ့်ပန်းအိမ်ကိုတစ်ချက်သွားကြည့်ရအောင်''

ဝမ်လီလီကပြောသည်။

"အင်း.. သွားစို့!''

ကျူးယွမ်ယွမ် ခေါင်းညိမ့်လိုက်သည်။

သူတို့နှစ်ယောက်ပန်းအိမ်က ကပ်လျက်ဖြစ်သည်။

ကျူးယွမ်ယွမ်က သူမပန်းအိမ်ဆီသွားပြီး အခန်းကတ်ဖြတ်ကာတံခါးဖွင့်လိုက်သည်။ အထဲဝင်လိုက်သောအခါ ထူးထူးခြားခြားပန်းရနံ့ရသည်။

ပန်းရနံ့မှာ အနံ့သင်းသင်းနှင့်နှစ်လိုဖွယ်ကောင်းသည်။

အထူးသဖြင့် အတွင်းပိုင်းအပြင်အဆင်ကြောင့် မျက်လုံးကျယ်သွားသည်။ ပန်းရောင်အပြင်အဆင်နှင့်မူလစိမ်းစိမ်းစိုစိုအလှကြောင့် နတ်သမီးအိပ်ခန်းနှင့်တူသည်။

သူမကမနေနိုင်ဘဲ ပိုက်ဆံအိတ်ပစ်ချကာ ကုတင်ကြီးပေါ်တက်လိုက်သည်။ လှဲချလိုက်သောအခါ ထူးထူးခြားခြားအားပြည့်သလိုခံစားရသည်။ စိတ်တည်ငြိမ်ပြီး အပူအပင်အားလုံးပျောက်သွားသလိုပင်။

ပန်းအိမ်၏လန်းဆန်းခြင်း +၂ အာနိသင်ကြောင့်ဖြစ်သည်။

ကျူးယွမ်ယွမ်မှာ အံ့ဩနေသည်။

ခရီးသွားရတာသဘောကျသူဖြစ်၍ ဟိုတယ်မျိုးစုံတွင်နေဖူးသော်လည်း ဘယ်ဟိုတယ်မှာမှဒီလိုခံစားချက်မျိုးမရဖူး။

ဒီလိုခံစားချက်အားလုံးရသောကြောင့် ပြန်ရမှာနည်းနည်းတွန့်ဆုတ်မိသည်။

ထို့နောက် ယွမ် ၁၀ သန်းပေးရသောပန်းအိမ်မျိုးစေ့ကိုသတိရသည်။

ဒီတော့ အခုယွမ် ၁၀ သန်းတန်အခန်းထဲမှာနေရတာပေါ့။ ဒါကြောင့် သက်သောင့်သက်သာရှိတာမထူးဆန်း။

ကျူးယွမ်ယွမ်က ပန်းအိမ်ထဲမှအမြန်ထွက်ပြီး ဝမ်လီလီအိမ်သွားသည်။

ဝမ်လီလီမှာ အိပ်ရာပေါ်လှဲနေပြီဖြစ်ပြီး မထချင်တော့။

ဝမ်လီလီပန်းအိမ်ဒီဇိုင်းက သူမအိမ်နှင့်မတူ။ အပြာရောင်နတ်သမီးပုံပြင်အိမ်ပုံစံဖြစ်သည်။

ဝမ်လီလီအိပ်ရာပေါ်လှဲနေပုံကိုကြည့်ရင်း ကျူးယွမ်ယွမ်ကခုန်တက်လိုက်သည်။

ဒီကောင်မလေး ဒီလောက်သက်သောင့်သက်သာအိပ်နေတာ၊ သူ့ကိုအနိုင်ကျင့်ရမည်။