အခန်း (၁၃၂၇-၁၃၂၉)
Vol. 89 Ch. 1327-1329
အခန်း ၁၃၂၇: ဖြေရှင်းရမယ်! ၂
နှစ်ယောက်သား ကားပေါ်တက်ပြီး ကားစက်နှိုးကာ နတ်သမီးပုံပြင်တောင်ခြေကားပါကင်သို့တန်းမောင်းလာခဲ့သည်။
ကားပါကင်ထိုးပြီးနောက် ချင်လင်ကလီခိုင်အား ကားပါကင်အပြင်ခေါ်လာသည်။
"ညီလေးချင်.. မင်းနှာခေါင်းစည်းမတပ်ချင်တာ သေချာလား?''
လီခိုင်က ကားအပြင်ထွက်လာပြီး သတိပေးသည်။
အခုသူနှင့်ညီလေးချင်က နာမည်ကြီးဖြစ်၍ အပြင်ထွက်ရင် သူများမှတ်မိသည်။ ဆယ်လီပရိသတ်များဝန်းရံနေခြင်းမဟုတ်သော်လည်း ဖုန်းနှင့်ဓာတ်ပုံရိုက်ခံရမည်။
အရမ်းစိတ်ရှုပ်စရာကောင်းသည်။
"အစ်ကိုလီက စတားမှမဟုတ်တာ.. ဘာလို့နှာခေါင်းစည်းတပ်မှာလဲ?''
ချင်လင်က စနောက်ပြီးပြောသည်။ သူနှာခေါင်းစည်းမတပ်ခြင်းမှာ မတပ်ချင်သောကြောင့်ပင်။
ဘာလို့တပ်နေမှာလဲ?
ပိုက်ဆံသုံးပြီး အထမ်းသမားတွေရဲ့ဂုဏ်သိက္ခာကိုချနင်းတယ်လို့ လိုင်းပေါ်မှာဝေဖန်ခံရတဲ့အမျိုးသမီးခရီးသည်နှစ်ဦးက သာမန်လူတွေသာဖြစ်သည်။
ထမ်းစင်စီးတဲ့သူက နာမည်ကြီး၊ သိက္ခာရှိ၊ ဒါမှမဟုတ် တော်ဝင်ပညာရှင်ဆိုရင်ရော? အဲဒါထက် အရမ်းကြီးတဲ့ခေါင်းဆောင်ဆိုရင်ရော?
ဒီလိုဆို ပြည်သူတွေလက်လွတ်စပယ်ရှုတ်ချမှာမဟုတ်။ အနည်းဆုံး သေချာတွေးကြဦးမည်။
အလွန်ရိုးရှင်းသောပြဿနာပင်။ အထမ်းသမားတွေက ပင်ပင်ပန်းပန်းအသက်မွေးပြီး မြင့်မြတ်သည်ဆိုသူများကြောင့်သာ လိုင်းပေါ်မှာဒီလိုပေါက်သွားခဲ့သည်။
တော်ဝင်ပညာရှင်တစ်ဦး ဒါမှမဟုတ် ခေါင်းဆောင်ကြီးတစ်ဦးကို ဒီကိုလာပေးဖို့သွားမခေါ်နိုင်။
သို့သော် သူနှင့်အစ်ကိုလီက အတူတူပင်။ သူတို့နှစ်ယောက်သာဆိုရင် သွားပုပ်လေလွင့်မပြောခင် နှစ်ခါပြန်စဉ်းစားကြလိမ့်မည်။
သူလှူဒါန်းထားသောငွေများ၊ လှူဒါန်းထားသောနည်းပညာများ၊ အစ်ကိုလီနာမည်ခံထားသောအရာများ...
အခြေအမြစ်မရှိဘဲ သူတို့ကိုပြောရင် ဒုက္ခအကြီးအကျယ်ရောက်မည်။
သူတို့ကိုနာမည်ဖျက်ရဲသူ၊သားပုပ်လေလွင့်ပြောရဲသူရှိရင် Tiktok ကတောင်မိတ်ဆက်ပေးလိမ့်မည်။ စိုးရိမ်ပြီး သက်ဆိုင်ရာအကောင့်များချက်ချင်းရှင်းထုတ်ခံရနိုင်သည်။
ဒီလိုဆိုရင် အင်တာနက်မှာနာမည်ဖျက်သည့်အရှိန်လျော့ကျသွားပြီး တခြားလူပြောစကားနားဝင်လာမည်။
ဒါဆို လင်းလန်ဇီရိုက်ထားတဲ့ဗီဒီယိုက ချက်ကောင်းထိပြီ။
ချင်လင်နှင့်လီခိုင် နတ်သမီးပုံပြင်တောင်ပေါ်ရောက်လာသောအခါ အတော်များများက သူတို့နှစ်ဦးကိုမှတ်မိကြသည်။
"ရှောင်ချင်နဲ့ ပါမောက္ခလီခိုင်ပဲ!''
"တကယ်သူတို့ပဲ!''
"အတူတူထွက်လာကြတယ်... သူတို့ဆက်ဆံရေးက လိုင်းပေါ်မှာပြောကြသလို တကယ်ကောင်းတာပဲ''
အများစုက ဖုန်းထုတ်ပြီး ချင်လင်နှင့်လီခိုင်ကိုဓာတ်ပုံစရိုက်ကြသည်။
သွားရင်းလာရင်း ရုတ်တရက် ကူလီလဲ့နှင့်အစ်ကိုဟူကိုတွေ့လိုက်ရသလို ဖုန်းထုတ်ပြီးဓာတ်ပုံရိုက်ကြသည်။
ချင်လင်နှင့်လီခိုင်ကိုတွေ့ခြင်းက ဆယ်လီများကိုတွေ့သည်ထက်ပိုပြီး အတိုင်းအတာတစ်ခုအထိအံ့ဩစရာဖြစ်စေသည်။
ဝိုင်းကြည့်ပြီးဓာတ်ပုံရိုက်နေသူများကြောင့် ချင်လင်ပိုပြုံးလိုက်သည်။
ဒါသူဖြစ်စေချင်တဲ့အတိုင်း။
လီခိုင်ကိုလည်း အထမ်းသမားများရှိရာသို့ခေါ်သွားသည်။
နတ်သမီးပုံပြင်တောင်ဖွင့်တာတစ်ရက်သာရှိသေးသော်လည်း အထမ်းသမားများမျက်နှာပျက်နေကြပြီ။
ပရောဂျက်တစ်ခုဖွင့်ခါစမှာ စီးပွားရေးလုပ်ရန်အကောင်းဆုံးအချိန်ဖြစ်သော်လည်း လိုင်းပေါ်မှကောလာဟလများကြောင့် ခရီးသည်များထမ်းစင်လုံးဝမစီးရဲ။ အထမ်းသမားများလည်း လုံးဝစီးပွားမဖြစ်ချေ။
ထိုအထမ်းသမားများမှာ အင်တာနက်နှင့်အထိအတွေ့နည်းသည်။ အထိအတွေ့ရှိရင်တောင် ချင်လင်နှင့်လီခိုင်ကိုစိတ်ဝင်စားမည်မဟုတ်။
ထို့ကြောင့် ချင်လင်နှင့်လီခိုင်ကို ဘယ်သူမှမသိကြပေ။
အထမ်းသမားများမှာ ချင်လင်နှင့်လီခိုင်အရောက်ကိုစောင့်နေကြသည်။ ထမ်းစင်များလာစီးမလားဟုမျှော်နေကြ၏။
သူတို့မိသားစုကိုထောက်ပံ့ရန် ဝင်ငွေရှာချင်သည်။
ချင်လင်လည်းပြုံးပြီး အထမ်းသမားများအား_
"ဆရာတို့.. တောင်ပေါ်တက်ဖို့ထမ်းစင်နှစ်စင်လိုပါတယ်... ခင်ဗျားတို့ကိုဒုက္ခပေးရဦးမယ်''
အထမ်းသမားများ မျက်လုံးကျယ်သွားသည်။
တစ်ယောက်ကချက်ချင်းမတ်တပ်ရပ်ပြီး အံ့ဩသံနှင့်_
"ထမ်းစင်စီးမယ့်သူရှိတယ်... အားလုံး စိတ်ဓာတ်မကျနဲ့... အခုဘယ်သူ့အလှည့်လဲ? မြန်မြန်လုပ်.. ထမ်းစင်ယူခဲ့''
ချက်ချင်းပင် အထမ်းသမားနှစ်ဖွဲ့မှာဝမ်းသာအားရမတ်တပ်ထရပ်ပြီး ချင်လင်နှင့်လီခိုင်အား ထမ်းစင်ပေါ်တက်ရန်ခေါ်သည်။
"ညီလေးချင်.. မင်းကရှုခင်းကြည့်ဖို့ခေါ်လာတာလား?''
လီခိုင်က ဘာဖြစ်နေမှန်းမသိ။ ချင်လင်ထမ်းစင်ပေါ်တက်သွားသောကြောင့် သူလည်းလိုက်တက်သည်။
အထမ်းသမားများက ချက်ချင်းမပြီး သူတို့နှစ်ဦးကိုနတ်သမီးပုံပြင်တောင်ပေါ်ပို့သည်။
ထိုမြင်ကွင်းကို အနားဝန်းကျင်မှခရီးသည်အားလုံးမြင်သည်။
ချင်လင်နှင့်လီခိုင် အထမ်းသမားဆီလျှောက်သွားကတည်းက ခရီးသည်များသတိထားမိသည်။
သူတို့ထမ်းစင်ပေါ်တက်ပြီး အထမ်းသမားများကသယ်သွားသောအခါ ခရီးသည်များငြိမ်ငြိမ်မနေနိုင်တော့။
ဘာပဲဖြစ်ဖြစ် လိုင်းပေါ်မှာထမ်းစင်စီးတဲ့အမျိုးသမီးနှစ်ယောက်ဗီဒီယိုကနာမည်ကြီးနေဆဲဖြစ်၍ ဘယ်သူမှထမ်းစင်မစီးရဲ။
ရှောင်ချင်နဲ့ပါမောက္ခလီခိုင်က ထမ်းစင်တန်းစီးသွားမယ်လို့ဘယ်ထင်မလဲ? လိုင်းပေါ်ရောက်သွားမှာမကြောက်ဘူးလား?
အမှန်ပင်။ ထိုမြင်ကွင်းကြောင့် ခရီးသည်တချို့အတွေးများသွားသည်။
"ရှောင်ချင်နဲ့ပါမောက္ခလီခိုင်က ဘာလို့ထမ်းစင်စီးတာလဲ?''
ခရီးသည်တချို့က မျက်မှောင်ကြုတ်သည်_
"သူတို့က ဘာလို့ဒါမျိုးလုပ်တာလဲ?''
ထိုလူမှာ လိုင်းပေါ်မှလမ်းကြောင်းနေသူကိုမှန်ကန်သည်၊ သူ့ကိုယ်သူ အမှန်တရားဘက်မှာရပ်တည်နေသည်ဟုထင်နေသူပင်။
သို့သော် သူ့စကားကြောင့် အနားရှိခရီးသည်များချက်ချင်းမကျေမနပ်ဖြစ်သွားသည်။
"မင်းမှာ ဦးနှောက်ရှိလား? လျှောက်မပြောနဲ့''
"ရှောင်ချင်နဲ့ပါမောက္ခလီခိုင်လို့ပဲပြောတာပါ''
"ဦးနှောက်မရှိရင် ပါးစပ်ပိတ်ထားလေ''
ထိုလူကို ခရီးသည်များ မကျေမနပ်ဖြစ်နေကြသည်။
ရှောင်ချင်နှင့်ပါမောက္ခလီခိုင်အကြောင်းပြောသောကြောင့်ပင်။
တချို့ဆယ်လီတွေကိုနာမည်ဖျက်ဖို့လွယ်ပေမဲ့ တချို့ဆယ်လီတွေကိုကျ ဘာလို့မပြောကြတာလဲ? ထုတ်ပြောလိုက်တာနဲ့ သူ့နောက်ကွယ်မှာရည်ရွယ်ချက်ရှိမှန်း သူများသိသွားမည်။
ကိုယ်ပြောမည့်သူဘယ်သူလဲ ကြည့်သင့်သည်။
ရှောင်ချင်နှင့်ပါမောက္ခလီခိုင်ဆိုမပြောနှင့်တော့။
သွေးခဲပလိပ်ရောဂါဖြစ်ချိန်က ရှောင်ချင်ရဲ့ကျေးဇူးကို လူတွေဘယ်လောက်များခံစားရလဲ? ပါမောက္ခလီခိုင်နဲ့ရှောင်ချင်က နည်းပညာဘယ်လောက်တောင်လှူဒါန်းခဲ့လဲ?
အခန်း ၁၃၂၈: ဖြေရှင်းရမယ်! ၃
နောက်ပြီး သူတို့အသစ်တီထွင်တိုင်း ပြည်တွင်းမှာအရင်ရောင်းခဲ့သည်။ တိုင်းပြည်အကျိုးအတွက် နိုင်ငံရပ်ခြားကိုတောင် ဒဏ်ခတ်ခဲ့သည်။
နိုင်ငံခြားကိုရောင်းရင်လည်း စျေးကတရုတ်ပြည်မှာပိုသက်သာသည်။
ဒီတော့ ဒီလိုလူတွေပိုက်ဆံသုံးတာ သူများသိက္ခာချနင်းဖို့လား?
မဖြစ်နိုင်။ ဘယ်သူမှမယုံ။
ဒါဆို ရှောင်ချင်နဲ့ပါမောက္ခလီခိုင်က ဘာလို့ထမ်းစင်စီးတာလဲ?
အထမ်းသမားတွေပင်ပင်ပန်းပန်းအသက်မွေးပြီး ခရီးသည်တွေကဝန်ဆောင်ခပေးတာ နားလည်ရလွယ်သောဆက်ဆံရေးတစ်ခုဖြစ်သည်။
ထမ်းစင်ကလည်း ဝန်ဆောင်မှုပေးသောအသက်မွေးဝမ်းကျောင်းတစ်ခုပင်။
နားမလည်လည်း ကိစ္စမရှိ။ တစ်ခါတလေ လူမှန်နောက်လိုက်ရုံသာ။
ရှောင်ချင်နဲ့ပါမောက္ခလီခိုင်က ထမ်းစင်စီးမှတော့ သူတို့စီးလည်းပြဿနာမရှိနိုင်။
ထမ်းစင်စီးချင်သောခရီးသည်အများစုက ဒီလိုတွေးပြီး အထမ်းသမားများဆီလျှောက်သွားသည်။
"ဆရာ.. တောင်ပေါ်တက်ရင်ဘယ်လောက်လဲ?''
"ဟုတ်တယ်.. တစ်ယောက်ဘယ်လောက်လဲ? တစ်စီးယူမယ်''
အထမ်းသမားများရုတ်တရက်အံ့ဩသွားသည်။ မနေ့ကဖြစ်ရပ်ကြောင့် ခရီးသည်များမှာ သူတို့ထမ်းစင်ကိုလာမစီးရဲ။
အထမ်းသမားက ချက်ချင်းခရီးသည်များကိုအော်ပြောသည်_
"တစ်ယောက် ၁၀၀... တောင်ထိပ်ပန်းအိမ်အထိတိုက်ရိုက်ပါ''
စိတ်ဝင်စားသောခရီးသည်များက ချက်ချင်းထမ်းစင်ပေါ်တက်ပြီး အထမ်းသမားကိုတောင်ပေါ်ပို့ခိုင်းသည်။
ချင်းလင်ရှုမျှော်ခင်းနေရာလာမှတော့ ယွမ် ၁၀၀ ကို ဘယ်သူကတွက်ကပ်နေမလဲ?
တစ်နေရာတွင်စုနေသောခရီးသည်များမှာ ချီတုံချတုံဖြစ်ခြင်းမရှိတော့။ တောင်ပေါ်တက်ရန် အထမ်းသမားများကိုသွားကြည့်ကြသည်။
သို့သော် မကျေမနပ်ဖြစ်နေသောခရီးသည်တချို့လည်းရှိသည်။
ဥပမာ သူများအပြောခံရသောခရီးသည်ကစိတ်မကြည်သောကြောင့် ချင်လင်နှင့်လီခိုင်ထမ်းစင်စီးသောဗီဒီယိုကို လိုင်းပေါ်တန်းတင်လိုက်သည်။
လမ်းကြောင်းသောခေါင်းစဉ်တပ်ဖို့လည်း မမေ့:
'ပိုက်ဆံသုံးပြီး သူများသိက္ခာချနင်းတဲ့နောက်တစ်ယောက်'
တချိန်တည်းမှာ ဗီဒီယိုထဲထည့်မည့်စာသားကိုကပျာကယာတည်းဖြတ်လိုက်သည်။
"ပိုက်ဆံပေးပြီး သူများသိက္ခာချနင်းတဲ့အမျိုးသမီးနှစ်ယောက်ကို မှတ်မိသေးတယ်မလား?''
"အခု ရှောင်ချင်နဲ့ချင်းလင်ဓာတ်ခွဲခန်းက ပါမောက္ခလီခိုင်လည်း ဒီလိုလုပ်တယ်... သူများသိက္ခာကိုပိုက်ဆံနဲ့နင်းတာ မှန်တယ်ထင်နေကြတယ်''
"သူတို့က နာမည်ကြီးတွေ... ဘာကြောင့် ဒီလိုလုပ်ရတာလဲ? တနည်းပြောရရင် ဒါချင်းလင်စံအိမ်ကစီစဉ်တာ... ချင်းလင်ကုမ္ပဏီကပဲ ဒီနှစ်ယောက်အတွက်စီစဉ်ပေးနိုင်မှာ''
"ဒါမှမဟုတ် ချင်းလင်စံအိမ်က သူဌေးကြီးမာလို တဖြည်းဖြည်းအရင်းရှင်ဆန်ပြီး အစွယ်ထုတ်ပြလာတာလား?''
ပြင်းပြင်းထန်ထန်လမ်းကြောင်းထားခြင်းပင်။ လိုင်းပေါ်နာမည်ကြီးနေသောကြောင့် ဗီဒီယိုတင်ပြီးမကြာမီ ရေပန်းစားစာရင်းထဲတွင်တွေ့ရသည်။ ရုတ်ချည်းဆိုသလို လိုင်းပေါ်လှုပ်လှုပ်ရှားရှားဖြစ်သွားပြီး ပြည်သူ့အမြင်တစ်ရပ်ဖြစ်လာသည်။
ကျူးယွမ်ယွမ်နှင့်ဝမ်လီလီဗီဒီယိုကိုတင်သောအမျိုးသမီးလည်း ထိုဗီဒီယိုကိုမြင်သွားသည်။
ဗိုက်ရွှဲရွှဲအမျိုးသမီးက ဗီဒီယိုကြည့်ပြီး မကျေမချမ်းနှင့်_
"ရှောင်ချင်နဲ့လီခိုင်က ဘယ်လိုဖြစ်တာလဲ?''
တခြားအမျိုးသမီးများလည်း မျက်မှောင်ကြုတ်နေသည်။
လိုင်းပေါ်မှာ မြေခွေးမနှစ်ယောက်ကိုအားလုံးဝေဖန်အောင်အပြစ်ပေးနိုင်ခဲ့ပြီးမှ ရှောင်ချင်နဲ့လီခိုင်ကဝင်ပါမယ်လို့ ဘယ်ထင်မလဲ?
ရှောင်ချင်နှင့်လီခိုင်က နာမည်ကြီး၊သိပ္ပံပညာရှင်မှန်း သူတို့သိသည်။
သို့သော် ဂရုမစိုက်။ အခုသူတို့နှစ်ယောက်ကိုနာမည်ဖျက်သောဗီဒီယိုတက်လာပြီဖြစ်၍ လုံးဝအားမနာနိုင်။
ကိုယ့်ကိုယ်ကိုယ်နေရခက်အောင်လုပ်လို့မဖြစ်ဘူးမလား?
ရှောင်ချင်နှင့်လီခိုင်လုပ်ပုံက သူတို့အနေခက်စေသည်။
ဗိုက်ရွှဲရွှဲအမျိုးသမီးက ချက်ချင်းပင်_
"ကိုယ့်အလုပ်ကိုယ်လုပ်မယ်... ငါတို့အကောင့်က အခုမှလူဝင်ခါစ... ဒါကိုပြန်တင်ပြီး ဝိုင်းရှုတ်ချမယ်''
တခြားသူများကခေါင်းညိမ့်ပြီး ကိုယ်ပိုင်ခေါင်းစဉ်တပ်ကာပြန်တင်ကြသည်။
လိုင်းပေါ်တွင်သူတို့ဖွထားသောကြောင့် သူတို့အကောင့်နာမည်ကြီးနေသည်။ ထင်ထားသည့်အတိုင်း ချင်လင်နှင့်လီခိုင်ထမ်းစင်စီးသောဗီဒီယိုက ရုတ်တရက်ထိပ်ဆုံးရောက်သွားသည်။
ဒါကြောင့်လည်း သူတို့ဂုဏ်ယူမိသည်။
သို့သော် နောက်ဆက်ဖြစ်သောကိစ္စကြောင့် သူတို့အံ့ဩသွားသည်။
အခန်း ၁၃၂၉: ရှောင်ချင်ကိုဝေဖန်လို့ရလား?
အမျိုးသမီးတချို့က ချင်လင်နှင့်လီခိုင်အားရှုတ်ချထားသောဗီဒီယိုမှာ ရေပန်းစားစာရင်းထိပ်ဆုံးရောက်နေသည်ကိုသတိပြုမိသည်။ သူတို့ဝမ်းသာနေစဉ် သူတို့မျှဝေထားသောဗီဒီယိုကရုတ်တရက်ပျောက်သွား၏။
"ဘာဖြစ်တာလဲ? ဗီဒီယိုပျောက်သွားတာလား?''
ဗိုက်ရွှဲရွှဲအမျိုးသမီးက သံသယသံနှင့်ပြောသည်။
သူမမျှဝေထားသောဗီဒီယိုကိုနှိပ်ကြည့်လိုက်ရာ မှတ်ချက်တွေ့ရ၏:
ဗီဒီယိုဖျက်ခံရသည် သို့မဟုတ် ကြည့်မရပါ။
တခြားသူများလည်း အံ့ဩသွားသည်။
သူတို့မျှဝေထားသောဗီဒီယိုလည်း ပျောက်သွားပြီး မှတ်ချက်မှာ:
'ဗီဒီယိုဖျက်ခံရသည် သို့မဟုတ် ကြည့်မရပါ'
"ဘယ်လိုဖြစ်တာလဲ?''
"ဆန်းစစ်ခံရတယ်ထင်တယ်... တို့ခေါင်းစဉ်က လွန်သွားလားပဲ''
"ခေါင်းစဉ်ပြောင်းတင်ကြည့်''
ထိုအချိန်တွင်_
ဗိုက်ရွှဲရွှဲအမျိုးသမီးသာမက လိုင်းပေါ်မှလူအများစုလည်း ဒီလိုဖြစ်ကြသည်။
ချင်လင်နှင့်လီခိုင်ကို အတော်များများကချီးကျူးလေးစားကြသော်လည်း သူတို့ကိုသဘောမကျသူတွေလည်းရှိသည်။
မနာလိုဝန်တိုစသည့်အကြောင်းရင်းများကြောင့်ပင်။
ထို့ကြောင့် ချင်လင်နှင့်လီခိုင်ကိုဝေဖန်သူတွေ့သည်နှင့် မီးလောင်ရာလေပင့်ကြသည်။
သို့သော် ချင်လင်နှင့်လီခိုင်အားရှုတ်ချထားသောဗီဒီယိုထိပ်ဆုံးရောက်သောအခါ သူတို့ဗီဒီယိုများတချိန်တည်းပျောက်သွားလေသည်။
Tiktok ဌာနချုပ်၌_
ဗီဒီယိုတည်းဖြတ်ရေးအဖွဲ့ခေါင်းဆောင်မှာ ဒါရိုက်တာတစ်ဦးရှေ့တွင် ခေါင်းငုံ့ပြီးမတ်တပ်ရပ်နေသည်။
"မင်းတို့ကောင်တွေ ဘာတွေလုပ်နေတာလဲ? ဒီလိုရှောင်ချင်နဲ့ပါမောက္ခလီခိုင်ကိုနာမည်ဖျက်ထားတဲ့ဗီဒီယိုမျိုးကိုလည်း ရေပန်းစားအောင်လုပ်နိုင်တာလား?''
ဒါရိုက်တာမှာ ဒေါသမထိန်းနိုင်။
ဒေါသမထွက်ရင် ထူးဆန်းနေမည်။
သူဟိုတယ်တစ်ခုတွင် အမျိုးသမီးဆယ်လီတစ်ဦးနှင့် စာချုပ်အကြောင်း၊ကြော်ငြာအကြောင်းဆွေးနွေးနေသည်။
ရုတ်တရက် သူဌေးကြီးကဖုန်းဆက်ပြီး ပယ်ပယ်နယ်နယ်ဆူလိမ့်မယ်လို့ဘယ်ထင်မလဲ?
ဒီတော့မှ ရှောင်ချင်နှင့်ပါမောက္ခလီခိုင်အကြောင်းကို လိုင်းပေါ်မှာတွေ့သည်။
ဒီလူနှစ်ယောက်လွှမ်းမိုးနိုင်စွမ်းကို တခြားလူတွေမသိလောက်သော်လည်း သူကသိသည်။
Tiktok မှာ အထက်လူများလောင်းရိပ်အောက်တွင်ရှိပြီး ပြည်သူ့အမြင်ကိုဖောက်သည်ချရသည်နှင့်အမျှ အတွင်းရေးသိရန်သူတို့အဖို့လွယ်ကူသည်။
ပေကျင်းသို့ သူဌေးကြီးနှင့်အတူအလုပ်ကိစ္စသွားရင်း ဒီလူနှစ်ယောက်အကြောင်းကြားဖူးသည်။
ဒီနှစ်ယောက်က အထက်လူများဘက်မှာဖြစ်ပြီး အခြေအနေကောင်းသည်။
ဒီလိုလူမျိုးကို သူတို့လိုဗီဒီယိုအတိုပလက်ဖောင်းက ဘယ်လိုလုပ်နှောင့်ယှက်နိုင်မလဲ?
ပွင့်ပွင့်လင်းလင်းပြောရရင် Tiktok က အရမ်းကောင်းသည်ဟု အပြင်လူတွေထင်ကြသည်။ သူတို့က ဗီဒီယိုအတိုလောကတွင်ဦးဆောင်နိုင်သည်၊ ပင်ဂွင်းနှင့်ယှဉ်နိုင်သည်၊ စျေးကွက်တန်ဖိုးအများကြီးရှိသည်ဆိုသော်လည်း အထက်လူတွေမျက်စိထဲမှာ သူတို့ကဘာမှမဟုတ်။
အထက်လူတွေက သူတို့နေရာအစားထိုးချင်ရင် သူတို့ကိုနည်းနည်းဖိနှိပ်ပြီး တခြားကုမ္ပဏီကိုအားပေးလိုက်ရုံပင်။
ဒီတော့ 'ဘာကိုထိလို့ရလဲ၊ ဘာကိုထိလို့မရဘူးလဲ' သူတို့ရှင်းရှင်းလင်းလင်းသိသည်။
"သက်ဆိုင်တဲ့ဗီဒီယိုတွေအမြန်ဆုံးဖျက်ထားပါတယ်''
တည်းဖြတ်သူခေါင်းဆောင်ကပြောသည်။
ဒါရိုက်တာကဒေါသပြေသည်အထိ ကြိမ်းမောင်းပြီးမှ_
"ဒါမျိုးထပ်မဖြစ်စေနဲ့... ငါစာချုပ်ကိစ္စဆွေးနွေးရဦးမယ်''
ထိုသို့ပြောပြီး ဒါရိုက်တာကအလောတကြီးထွက်သွားသည်။
သူကြော်ငြာချင်တဲ့အင်တာနက်ဆယ်လီကရေချိုးပြီးပြီဆိုတော့ ဒီမှာဘာလို့အချိန်ဖြုန်းချင်မလဲ?
စာချုပ်အကြောင်းဆွေးနွေးတာ ရေချိုးစရာလိုလား? ဒါကတော့ အသန့်အရှင်းကြိုက်၍လော၊ အခမ်းအနားပီသရန်လော...
ဒါရိုက်တာထွက်သွားမှ ခေါင်းဆောင်တည်းဖြတ်သူလည်း သက်ပြင်းရှည်ကြီးချလိုက်သည်။ ထို့နောက် ဒေါသလက်ကျန်နှင့် ဌာနပြန်သွားသည်။ ပယ်ပယ်နယ်နယ်အပြောခံရပြီး ဘယ်သူမှစိတ်မကြည်နိုင်။
ဒီအချိန်မှာ ဘယ်သူမှသူ့ကိုဝင်မတိုးတာ အကောင်းဆုံးပင်။
ဌာနပြန်ရောက်ရောက်ချင်း လက်အောက်ငယ်သားတစ်ယောက်က အစီရင်ခံသည်_
"ကြီးကြပ်သူ.. ခင်ဗျားညွှန်ကြားချက်အတိုင်း ရှောင်ချင်နဲ့ပါမောက္ခလီခိုင်ကိုနာမည်ဖျက်ထားတဲ့ဗီဒီယိုတွေဖျက်ပြီးပါပြီ... ဒါပေမဲ့ ပြန်တင်တဲ့သူတွေရှိနေသေးတယ်''
ထိုစကားကြောင့် ကြီးကြပ်သူဒေါသထွက်သွားပြီး_
"ဘယ်သူပဲဖြစ်ဖြစ် အကောင့်ကိုဖျက်ချပစ်လိုက်... ပြီးတော့ ထမ်းစင်စီးတဲ့အမျိုးသမီးနှစ်ယောက်ဗီဒီယိုပါဖျက်... ပြီးရင် မရိုးမသားဗီဒီယိုတင်တဲ့အကောင့်ကို သက်ဆိုင်ရာစည်းမျဉ်းအတိုင်းဖျက်ချရလိမ့်မယ်လို့ တရားဝင်ကြေညာချက်ထုတ်ပြန်ပါ''
"ကောင်းပါပြီ ကြီးကြပ်သူ!''
ဝန်ထမ်းကနားလည်ပုံနှင့်ခေါင်းညိမ့်ပြီး ချက်ချင်းသူ့လုပ်ဖော်ကိုင်ဖက်များကိုညွှန်ကြားသည်။
တဖက်တွင်_
ဗိုက်ရွှဲရွှဲအမျိုးသမီးနှင့်တသိုက်ကလည်း မီဒီယာတစ်ခုတွင် ဗီဒီယိုတင်ပြန်သည်။
ဗီဒီယိုတင်ရသောအခါ သူတို့ဝမ်းသာကြပြန်သည်။
ဒါကိုစာရင်းကနေ ဖျက်မရဘူးမလား?
သို့သော် ကြာကြာမပျော်လိုက်ရ။ ဖန်သားပြင်မှာ ၄၀၄ ဟုပြောင်းပြီး လက်ရှိဖန်သားပြင်စာမျက်နှာကိုမမြင်ရတော့ချေ။
“???”
ဗိုက်ရွှဲရွှဲအမျိုးသမီး ချက်ချင်းဇဝေဇဝါဖြစ်သွားသည်။
ဘာလဲဟ?
ထို့နောက် အဓိကစာမျက်နှာကိုအမြန်သွားလိုက်ရာ အသိပေးစာတက်လာသည်:
'တရားမဝင်လုပ်ရပ်ကြောင့် သင့်အကောင့်ကိုတားမြစ်လိုက်ပါပြီ'
"ငါ့အကောင့်ကိုပိတ်လိုက်ပြီ... ဘယ်လိုဖြစ်တာလဲ?''
ဗိုက်ရွှဲရွှဲအမျိုးသမီး ချက်ချင်းစိတ်ပူသွားသည်။
ဒီအကောင့်မှာပရိသတ်သိပ်မရှိသောကြောင့် အကြာကြီးသုံးခဲ့ရသည်။ အရင်တစ်ခါ အမျိုးသမီးနှစ်ဦးကိုနာမည်ဖျက်ပြီးမှ ပရိသတ်အများကြီးရခဲ့သည်။
အခုအကောင့်ကိုရုတ်တရက်တားမြစ်ခံရတာ ဘယ်လိုလုပ်လက်ခံနိုင်မလဲ? ဝမ်းနည်းတာပေါ့။
ထိုအချိန်တွင်_
သူမမိတ်ဆွေများ မျက်နှာပျက်သွားပြီး_
"ငါ့အကောင့်လည်း ဖျက်ခံရပြီ''
"ငါရောပဲ... ဘာဖြစ်တာလဲ?''
"ရှောင်ချင်နဲ့လီခိုင်ဗီဒီယိုကိုတင်လို့ဖြစ်မယ်... ဗီဒီယိုဖျက်ပစ်လိုက်တာ သတိပေးတာပဲ!''
ဒီတစ်ခါ ဗိုက်ရွှဲရွှဲအမျိုးသမီးနှင့်တခြားသူများလည်း တုံ့ပြန်ပြီးမျက်နှာပိုပျက်သွားကြသည်။
ဘယ်လောက်တောင်လက်မခံချင်စရာကောင်းလဲ?
သူတို့ကိုထောက်ခံတဲ့သူတွေဒီလောက်များတာ Tiktok က ဘာလို့ဖျက်ပစ်တာလဲ?
သူတို့တင်မဟုတ်။ လိုင်းပေါ်ကအတော်များများလည်း အကောင့်အဖျက်ခံရသည်။
ပထမအချက်၊ ကိုယ့်ကိုယ်ကိုယ်အမှန်ထင်သူတွေများနေသည်။
ဒုတိယအချက်၊ နာမည်ကြီးချင်သူတွေများနေ၏။ တချို့ကမှန်မှန်မှားမှားဂရုမစိုက်ဘဲ နာမည်ကြီးဖို့သာကြည့်သည်။
ထို့ကြောင့် သူတို့အကောင့်အားလုံး တခါတည်းပါသွားသည်။
ထိုဗီဒီယိုများ ကြက်ပျောက်ငှက်ပျောက်ပျောက်သွား၏။ ပြည်သူအာရုံစိုက်သော ပရိသတ်များများနှင့်အကောင့်တချို့တောင်ပါသွားသည်။