အခန်း (၁၃၃၀-၁၃၃၂)

အခန်း ၁၃၃၀: ရှောင်ချင်ကိုဝေဖန်လို့ရလား? ၂

ဘာပဲဖြစ်ဖြစ် ပျက်သွားသောဗီဒီယိုအတော်များများ ရေပန်းစားခဲ့သည်။ မပျက်ခင်က ကြည့်ရှုသူတချို့ရခဲ့လိမ့်မည်။ အခုအားလုံးပျောက်သွား၍ ထူးဆန်းနေ၏။

သို့သော် မကြာခင် Tiktok မှတရားဝင်ကြေညာချက်ဗီဒီယိုကြောင့် အားလုံးအံ့ဩသွားသည်။

Tiktok မှလှုပ်ရှားခြင်းဖြစ်၍ အသုံးပြုသူတိုင်း ထိုကြေညာချက်ဗီဒီယိုကိုတွေ့ရသည်:

တချို့အကောင့်များသည် မမှန်မကန်ဗီဒီယိုများတင်ပြီး ကြော်ငြာပလက်ဖောင်း၏စည်းမျဉ်းများကိုဖောက်ဖျက်သောကြောင့် ဗီဒီယိုများအဖျက်ခံရမည်။ အမုန်းပွားစေသောဗီဒီယိုတင်သည့်အကောင့်များ တားမြစ်ခံရမည်!

တိုတိုတုတ်တုတ်ကြေညာချက်ဖြစ်သော်လည်း ကြေညာချက်ဗီဒီယိုတွေ့သူတိုင်းက မျက်စိတစ်မှိတ်အတွင်းဗီဒီယိုပျောက်သွားသောဖြစ်ရပ်ကိုအမှတ်တမဲ့တွေးမိကြသည်။

ပလက်ဖောင်းကုမ္ပဏီ၏တရားဝင်လှုပ်ရှားချက်ဖြစ်သည်။

အားလုံးအတွက်ထိချက်ပြင်းသည်။

တချို့ပလက်ဖောင်းများက ဒီလိုလုပ်ခဲသည်။ အထူးသဖြင့် ရေပန်းစားခေါင်းစဉ်ရှိသောအခါပင်။

Tiktok က ဒီလိုလှုပ်ရှားရင် ရေပန်းစားသတင်းက စည်းကမ်းနဲ့မညီတဲ့သဘော၊ အကောင်းမြင်အကြောင်းအရာမဟုတ်တဲ့သဘောရှိသည်။

အင်တာနက်ဆယ်လီများကိုအသုံးချပြီး ဝင်ငွေဖန်တီးသည်မှလွဲ၍ Tiktok က ဒိအပိုင်းမှာစိတ်ချရသေးသည်။ အထက်လူများစောင့်ကြည့်နေသောကြောင့် အမှားတစ်ခုဖြစ်ရင် Tiktok ဒုက္ခရောက်လိမ့်မည်။

ချင်းလင်မွေးမြူရေးခြံ_

ကျူးယွမ်ယွမ်နှင့်ဝမ်လီလီလည်း ရွက်ဖျင်တဲထဲရွှေ့လာသည်။

သူတို့နှစ်ယောက် တကယ်ကံထူးသည်။ ချင်းလင်မွေးမြူရေးခြံရွက်ဖျင်တဲနှင့်ချင်းလင်စံအိမ်သတို့သမီးခန်းရော နတ်သမီးပုံပြင်တောင်ပန်းအိမ်ပါ လက်မှတ်ရရန်အလွန်ခက်သောကြောင့်ပင်။

ခရီးအများစုက လက်မှတ်မရကြ။

သို့သော် သူတို့ကကံကောင်းပြီး သုံးနေရာလုံးယူနိုင်ခဲ့သည်။

သို့ဆိုရင်တောင် သူတို့စိတ်အခြေအနေမကောင်း။

ဘာပဲဖြစ်ဖြစ် သူတို့ကိုလိုင်းပေါ်အတင်ခံထားရသည်။

ဒီလိုအပြောခံရလို့ သူတို့မှားသည်မထင်။ မတရားခံရသလိုဖြစ်နေသည်။

ထို့ကြောင့် ဝမ်လီလီက ခရီးဆောင်အိတ်ထုပ်ပိုးပြီးနောက် ဖုန်းထုတ်ကာ လိုင်းပေါ်နောက်ဆုံးအခြေအနေကိုတစ်ချက်ကြည့်လိုက်သည်။ လိုင်းပေါ်တွင်အပြောခံရသောဗီဒီယိုများပျောက်သွားသောကြောင့် သူမအံ့ဩမိသည်။

ခဏအကြာ သူမကအားရဝမ်းသာနှင့်_

"ယွမ်ယွမ် လာကြည့်... ငါတို့ကိုပြောထားတဲ့ဗီဒီယိုတွေမရှိတော့ဘုး... ပြီးတော့ ဗီဒီယိုတွေကမဟုတ်မမှန်တွေ.. အကောင့်အတော်များများအပိတ်ခံရတယ်လို့လည်း တရားဝင်ကြေညာထားတယ်''

ကျူးယွမ်ယွမ်ကအံ့ဩသွားပြီး မယုံနိုင်ပုံနှင့်_

"ဘာတွေဖြစ်နေတာလဲ?''

ဝမ်လီလီက တန်းရှင်းပြသည်_

"ရှောင်ချင်နဲ့ပါမောက္ခလီခိုင်က ထမ်းစင်စီးတယ်လို့ ဗီဒီယိုတစ်ပုဒ်မှာပြောထားတယ်... ဒီနည်းနဲ့ ငါတို့မှန်ကြောင်းသက်သေပြတာပဲ... သူတို့က လွှမ်းမိုးနိုင်စွမ်းရှိတယ်... မီဒီယာဌာနကတောင် ရှေ့ထွက်လာတယ်''

"တကယ်လား?''

ကျူးယွမ်ယွမ်ကနားထောင်ရင်း မျက်နှာဝင်းပသွားသည်။

ရှောင်ချင်နဲ့ပါမောက္ခလီခိုင်တဲ့။

ဒီနှစ်​ယောက်ကိုမသိတဲ့သူရှိလို့လား? သူတို့အောင်မြင်မှုတင်မဟုတ်၊ ရှောင်ချင်ရဲ့ယောက်ျားပီသပုံ၊ အရည်အချင်း၊ ဘက်စုံကျွမ်းကျင်မှုတွေက မိန်းကလေးများအတွက်စိတ်ကူးယဉ်လက်တွဲဖော်ပုံစံမျိုးဖြစ်သည်။

ပါမောက္ခလီခိုင်လည်းရှိသေးသည်။ သူ့ဂျူနီယာညီမအပေါ်အချစ်ကြောင့် SMA ရောဂါအတွက်ပါဝင်ပစ္စည်းပျိုးထောင်လိုက်ကတည်းက 'အမျိုးသမီးများစွာ၏နိုင်ငံ့ယောက်ျား'အဖြစ်သိလာကြသည်။

အမှန်တရားကိုသိပြီး ကျူးယွမ်ယွမ်နှင့်ဝမ်လီလီဝမ်းသာသွားသည်။

သူတို့နှစ်ယောက်က ထမ်းစင်စီးပေးတယ်ပေါ့။ အရမ်းသဘောကောင်းတာပဲ။

သူတို့တင်မဟုတ်။ အချိန်တိုအတွင်း လိုင်းပေါ်တွင်စကားလမ်းကြောင်းဦးတည်ချက်လည်း လုံးဝပြောင်းသွားသည်။

ချင်လင်ရည်ရွယ်ချက်အထမြောက်ပြီ။

ဒီလိုအခြေအနေမျိုးမှာ ပြည်သူများက အရင်အွန်လိုင်းဗီဒီယိုကိုမဖြစ်မနေပြန်လည်ဆန်းစစ်ကြမည်။

ထိုအချိန်တွင် ချင်းလင်စံအိမ်တရားဝင်အကောင့်မှ အင်တာဗျူးဗီဒီယိုတစ်ပုဒ်တက်လာသည်။

ထိုဗီဒီယိုကို တခဏချင်း အားလုံးစိတ်ဝင်စားသွားသည်။ ဗီဒီယိုထွက်ထွက်ချင်း အရင်ကလိုင်းပေါ်ပေါက်နေသောနေရာအားလုံးယူလိုက်သည်ဟုဆိုနိုင်သည်။

ဗီဒီယို​ကို ရုံချန်းစီရင်စုကရိုက်ထားခြင်းပင်။ ဗီဒီယိုထဲတွင်အရင်ဆုံးပေါ်လာသူက လက်ထောက်ချန်ဖြစ်ပြီး အင်တာဗျူးထားသည်။

လိုင်းပေါ်ကအတော်များများ ချန်လီကိုသိကြသည်။ ဌာနအကြီးအကဲအဖြစ် Live လွှင့်ပြီးကတည်းက အင်တာနက်ဆယ်လီတပိုင်းဖြစ်နေပြီဟုပြောရမည်။

ချန်လီလည်း ကင်မရာနှင့်လိုက်လျောညီထွေရှိပြီး သဘာဝကျကျပြောထားသည်_

"ပြီးခဲ့တဲ့ ၂ နှစ် ၃ နှစ်အတွင်း ရုံချန်းကကောင်းကောင်းဖွံ့ဖြိုးခဲ့တယ်... ရုံချန်းသားအများစုကချမ်းသာတယ်လို့ပြောရမယ်... ဒါပေမဲ့ ရုံချန်းကကျယ်တဲ့အတွက် ဆင်းရဲသားအိမ်တွေရှိနေပါသေးတယ်... အကြောင်းရင်းတချို့ကြောင့် ဆင်းရဲတဲ့သူတွေရှိနေတယ်''

"အလုပ်မလုပ်လို့မဟုတ်ဘူး... ပျင်းလို့လည်းမဟုတ်ဘူး... သဘာဝအကြောင်းရင်းတချို့ ဒါမှမဟုတ် မထိန်းချုပ်နိုင်တဲ့အကြောင်းတချို့ကြောင့် ဆင်းရဲရတာ''

"အဲဒါကြောင့် နတ်သမီးပုံပြင်တောင်ပရောဂျက်ဖွင့်တဲ့အချိန်မှာ ကျုပ်တို့စီရင်စုကလည်း ဆင်းရဲသားပပျောက်ရေးပရောဂျက်လုပ်ခဲ့တယ်... အဲဒါကတော့ အလုပ်ကြမ်းပဲလုပ်နိုင်တဲ့သူတွေကို နတ်သမီးပုံပြင်တောင်မှာအထမ်းသမားလုပ်စေဖို့ပဲ... သူတို့မိသားစုကိုထောက်ပံ့ဖို့အတွက်ဝင်ငွေရမယ်''

နတ်သမီးပုံပြင်တောင်ပေါ် အထမ်းသမားတွေရှိနေရသောအကြောင်းရင်းကို သူရှင်းပြသွားသည်။

ထိုအခိုက်_

ဗီဒီယိုထဲမှလင်းလန်ဇီအသံထွက်လာပြန်သည်_

"လက်ထောက်ချန်.. အခုအထမ်းသမားနှစ်ယောက်ရဲ့မိသားစုကို အင်တာဗျူးလို့ရမလား?''

"ရတာပေါ့''

ချန်လီက ချက်ချင်းပြန်ဖြေသည်။

ထို့နောက် ကင်မရာက စီရင်စုအပြင်ထွက်ပြီး ရုံချန်းထဲမှအိုဟောင်းသောအဆောက်အဦတစ်ခုဆီရောက်သွားသည်။

အဆောက်အဦးတွင်နေထိုင်သူအများစုမှာ ငှားရမ်းနေထိုင်သူများဖြစ်​ကြောင်းသိနိုင်သည်။

မြန်မြန်ဆန်ဆန်ပင်_

ဗီဒီယိုထဲတွင် အထမ်းသမားတစ်ယောက်အိမ်ရောက်သွားသည်။ အိမ်ငှားနေသူဖြစ်၍ အခန်းကသိပ်မကျယ်။ ဧည့်ခန်းတွင် စုံစီနဖာပစ္စည်းများပြည့်နေသည်။ ထမင်းစားစားပွဲ၊ ကုလားထိုင်၊ ဆိုဖာများနှင့်ကြပ်ညှပ်သပ်နေသည်။

အိမ်စာအသည်းအသန်လုပ်နေသောကလေးတစ်ယောက်လည်းရှိပြီး သူ့အဝတ်အစားမှာ အကြိမ်ကြိမ်လျှော်ဖွတ်ခံထားရ၍ ဟောင်းနွမ်းနေသလိုပင်။

ဒီလိုအဝတ်အစားမျိုး သူများကိုပေးရင် လုံးဝဝတ်မှာမဟုတ်။

အထမ်းသမားမိသားစုက အလွန်ဆင်းရဲကြောင်းသိနိုင်သည်။

ချန်လီက စမိတ်ဆက်ပေး၏_

"ဒါကတော့ ဆရာဝူပါ... အရမ်းအလုပ်ကြိုးစားတဲ့အလုပ်သမားဖြစ်ပြီး သူပင်ပင်ပန်းပန်းရှာထားတဲ့ဝင်ငွေကို သူ့မိသားစုကိုထောက်ပံ့ပေးပါတယ်... ဒါပေမဲ့ မတော်တဆတစ်ခုကြောင့် သူ့မျက်လုံးထိခိုက်ပြီး အရောင်မခွဲခြားနိုင်တော့ပါဘူး... အဲဒါကြောင့် မူလအလုပ်ကိုဆက်မလုပ်နိုင်တော့လို့ အချိန်ပိုင်းပဲလုပ်ပါတယ်... ဒီတော့ နတ်သမီးပုံပြင်တောင်ပရောဂျက်က ဆရာဝူလိုလူအတွက်သင့်တော်ပါတယ်''

ဆရာဝူက နတ်သမီးပုံပြင်တောင်ဟူသောစကားကြောင့် နည်းနည်းစိတ်လှုပ်ရှားသွားပြီး_

"လက်ထောက်ချန်.. ဒါအင်တာဗျူးလား?''

"ဟုတ်ပါတယ် ဆရာဝူ.. အထမ်းသမားတစ်ယောက်အနေနဲ့ ဘာများပြောစရာရှိလဲ?''

ချန်လီ ခေါင်းညိမ့်သည်။

"ရှိပါတယ်.. ကျွန်တော်ပြောချင်တာရှိပါတယ်''

ဆရာဝူကချက်ချင်းကင်မရာဘက်လှည့်ပြီး လောလောနှင့်_

"ကျွန်တော်ဒီအလုပ်ကို တကယ်လိုအပ်ပါတယ်... ကျွန်တော့်မိသားစုကိုထောက်ပံ့ပေးရမှာပါ... နောက်လ ကျွန်တော့်သမီးလေးအတွက် အင်္ကျီနှစ်စုံဝယ်ပေးချင်ပါတယ်... အရင်ဆုံး နေရာကောင်းကောင်းလည်းငှားချင်တယ်... အဲဒါမှ ကျွန်တော့်မိန်းမနဲ့သမီး ကောင်းကောင်းနေရမှာ''

"ဟုတ်ပါတယ်.. ကျွန်တော်ပင်ပင်ပန်းပန်းအလုပ်လုပ်ခဲ့ပါတယ်... ဒီအလုပ်ကိုတကယ်လိုအပ်လို့ပါ... ကျွန်တော်တို့သိက္ခာကျတယ်မထင်ပါဘူး... အလုပ်မရှိရင် သိက္ခာမရှိနိုင်ပါဘူး... ကျွန်တော်တို့အလုပ်ကိုမဖျက်ဆီးလိုက်ပါနဲ့... ခရီးသည်တွေထမ်းစင်လာစီးပေးကြပါခင်ဗျာ''

ရိုးရိုးစကား၊ရိုးရိုးတောင်းဆိုချက်ဖြစ်သော်လည်း ဆရာဝူအသံက ငိုသံပါနေသည်။ နောက်ဆုံး ကင်မရာရှေ့ဒူးထောက်ပြီးတောင်းဆို၏။

ထိုမြင်ကွင်းကြောင့် အားလုံးရင်ထဲထိသွားကြသည်။

ဗီဒီယိုကြည့်သူတိုင်း မွန်းကြပ်သလိုခံစားရသည်။ ဆရာဝူ၏အခက်အခဲ၊အကြပ်အတည်းကိုတောင်ခံစားမိသည်။

ထိုအချိန်တွင် အရင်ကလိုင်းပေါ်ဖွခဲ့သောပြစ်တင်ရှုတ်ချမှုကို ပြန်သတိရကြသည်။

သတိရရချင်း အထမ်းသမားများ၏အတွင်းရေးပြဿနာကို သေချာသဘောပေါက်သွားသည်။

သူတို့အမြင်မှာ ပိုက်ဆံရဖို့အလုပ်လုပ်တာ ရှက်စရာမဟုတ်။ ပင်ပင်ပန်းပန်းအလုပ်လုပ်မှ မိသားစုကိုထောက်ပံ့နိုင်မည်။ သူတို့မိသားစုဘဝ ပြောင်​ပြောင်ရောင်ရောင်ရှိမည်။

ရုတ်ချည်းဆိုသလို အတွေးများသွားကြသည်။

တွေးတောပြီးနောက် ပုန်ကန်သည့်နည်းနှင့်ဆူပူကြသည်။ ဒီတစ်ခါ ကျူးယွမ်ယွမ်နှင့်ဝမ်လီလီကိုမဟုတ်၊ ချင်လင်နှင့်လီခိုင်လည်းမဟုတ်ဘဲ အရင်နာမည်ဖျက်သူများကိုအပြစ်ပြောကြသည်။

"တရားမျှတမှုတမန်တော်ဆိုတဲ့လူတွေက သူများကိုကူညီဖို့ကြိုးစားနေတာမဟုတ်ဘဲ သူတို့ကိုယ်သူတို့မြင့်မြတ်သူလိုလုပ်နေတာ အခုသိလိုက်ပြီ''

"အထမ်းသမား: စီးပွားပျက်အောင်လုပ်ပေးတဲ့ လိုင်းပေါ်ကသက်ရှိဗုဒ္ဓကို ကျေးဇူးပါ''

"ခရီးသည်တွေက ရတယ်.. အထမ်းသမားက ရတယ်... ဒါပေမဲ့ လိုင်းပေါ်ကကီးဘုတ်ဖိုက်တာတွေ တရားမျှတမှုတမန်တော်တွေက မရဘူးတဲ့''

"အပူဒဏ်ခံစားနေရတဲ့မီးသတ်သမားကို ရေတစ်ပုံးသုံးလို့အပြောခံရတယ်''

"နာရီပေါင်းများစွာခွဲစိတ်နေတဲ့ဆရာဝန်ကို အချိုရည်သောက်လို့အပြောခံရတယ်''

"သခင်ကြီးယွမ်ဇိမ်ခံကားစီးလို့အပြောခံရတယ်''

"သကြားရေကိုစျေးပေါပေါနဲ့ရောင်းလို့ အဘိုးအပြောခံရတယ်''

"ရဲခွေးကို သတ္တုရေသောက်လို့အပြောခံရတယ်''

"ရုတ်တရက် ဒီကမ္ဘာကြီးကဘာဖြစ်နေလဲမသိတော့ဘူး... ကမ္ဘာကြီးကမှားနေတာလား ဒါမှမဟုတ် လူတွေရဲ့စိတ်ကပဲမှားနေတာလား?''

ချင်လင်၏ထိန်းချုပ်မှုနှင့် လင်းလန်ဇီရိုက်ထားသောဗီဒီယိုကြောင့် အင်တာနက်တစ်ခုလုံးအတွေးများသွားသည်။

အခန်း ၁၃၃၁: အရောင်ထွက်တဲ့အစားအစာအသစ်!

ပန်းအိမ်အစုအဝေးတွင် များစွာဖြည့်ဆည်းပေးထားသည်။ ပန်းအိမ်တစ်လုံးစီတွင်သန့်စင်ခန်းပါသည့်အပြင် အပြင်မှာအများသုံးသန့်စင်ခန်းကြီးတစ်ခုရှိသည်။

နောက်ပြီး စားသောက်ဆိုင်များ၊စျေးဆိုင်များရှိသည်။

သို့ရာတွင် ပန်းအိမ်အစုအဝေးအလှမပျက်စေရန် ထိုဖြည့်စွက်ချက်အားလုံးကို သစ်သားနှင့်ဆောက်ထားသည်။ အရောင်ပုံစံက ပန်းအိမ်နှင့်ဆင်သည်။ ထိုဆိုင်များကိုလည်း မျိုးပြောင်းအာကာသနွယ်ပင်များဖုံးအုပ်ထားသည်။

ထို့ကြောင့် ညပိုင်းမျိုးပြောင်းအာကာနွယ်အရောင်ထွက်ပုံက ပန်းအိမ်ထက်မလျော့ပေ။

ချင်လင်က လီခိုင်အား ပန်းအိမ်အစုအဝေးနားလမ်းလျှောက်ခေါ်သွားသည်။ ပထမလာခါစနှင့်ယှဉ်လျှင် ပန်းအိမ်အစုအဝေးကဖွင့်ပြီးမှ တမျိုးထူးခြားနေသလို ချင်လင်ခံစားရသည်။

သူတို့နှစ်ဦးနောက်တွင် ပန်းအိမ်အစုအဝေးမန်နေဂျာက ညွှန်ကြားချက်စောင့်ရင်းတိတ်တဆိတ်လိုက်လာသည်။

အပြင်လူတွေက ရှောင်ချင်ဘယ်သူမှန်းမသိသော်လည်း မန်နေဂျာတစ်ဦးဖြစ်သောသူမက ကောင်းကောင်းသိသည်။

လီခိုင်မှာ ချင်းလင်ဓာတ်ခွဲခန်းတွင်နေနေကျဖြစ်ပြီး ပန်းအိမ်အစုအဝေးသို့ပထမဆုံးရောက်ဖူးခြင်းပင်။ မျက်စိကျစေခြင်း +၂၊ အလှအပ +၂ အရည်အသွေးကြောင့် သူစိတ်ဝင်စားနေသည်။

"ညီလေးချင်.. ငါလည်း မင်းရဲ့ပန်းအိမ်ဗီဒီယိုကိုကြည့်ပြီးပြီ... ညပိုင်းအရမ်းလှတာမှန်ပေမဲ့ နေ့ပိုင်းလည်း ချီးကျူးချင်စရာဖြစ်နေတာပဲ... ငါတကယ်ပြောစရာမရှိတော့ဘူး... ဒီရှုမျှော်ခင်းနေရာမှာ မင်းဖန်တီးတဲ့ပရောဂျက်တွေကို တခြားနေရာတွေမယှဉ်နိုင်ဘူး''

ဝန်ဆောင်မှုမန်နေဂျာက ထောက်ခံသည်။

သူတို့ချင်းလင်ရှုမျှော်ခင်းနေရာက ပြည်တွင်းမှာအကောင်းဆုံး၊ ဒါကိုလည်း ပြည်သူကအသိအမှတ်ပြုထားသည်။

ဒီအတွက် သူမဂုဏ်ယူသည်။ ဘာပဲဖြစ်ဖြစ် သူမက ချင်းလင်ရှုမျှော်ခင်းနေရာမှာကြီးကြပ်သူတစ်ဦးပင်။

"အရင်ဆုံး ကျွန်တော်တို့အတွက်အခန်းပြင်ပေးပါ!''

ချင်လင်ကမှာသည်။

"ကောင်းပါပြီ ဥက္ကဌချင်''

ဝန်ဆောင်မှုခေါင်းဆောင်က ချက်ချင်းခေါင်းညိမ့်ပြီး သူမကိုယ်တိုင်စီစဉ်ရန်ထွက်သွားသည်။

ပန်းအိမ်မှာလည်း သတို့သမီးခန်းနှင့်အတူတူပင်၊ ချန်ထားသောအခန်းများရှိသည်။

သို့သော် ချန်ထားသောပန်းအိမ်များက ပန်းအိမ်အစုအဝေးထဲမပါဘဲ သက်သက်တစ်နေရာဖြစ်သည်။

ထိုနေရာတွင် ပန်းအိမ်များများစားစားမရှိ၊ ၁၀ လုံးဝန်းကျင်သာရှိသော်လည်း တည်နေရာပိုကောင်းပြီး အပြင်အဆင်က ပိုသေသပ်လှပသည်။

ဘာပဲဖြစ်ဖြစ် ချင်းလင်ရှုမျှော်ခင်းနေရာက အကျယ်ကြီးဖြစ်သည်။ ချင်လင်နှင့်ကျောက်မိုချင်းအပြင် စီနီယာမန်နေဂျာများစွာရှိသည်။ ချင်းလင်ကုမ္ပဏီနှင့်ချင်းလင်ဓာတ်ခွဲခန်းမှစီနီယာမန်နေဂျာများလည်းရှိသည်။

သူတို့မိသားစုတွေ ရှုမျှော်ခင်းနေရာလာရင် သူတို့တည်းခိုနေထိုင်ရန်တောင်းဆိုနိုင်သည်။ သူတို့အဆက်အသွယ်၊လုပ်ပိုင်ခွင့်သုံးပြီး ချန်ထားသောအခန်းတွင်နေထိုင်ရန်လည်းစီစဉ်နိုင်သည်။

သတို့သမီးခန်း၊ ရွက်ဖျင်တဲ၊ ပန်းအိမ် အားလုံးအတူတူပင်။

ဥပမာ ပန်းအိမ်တစ်အိမ်တွင် မိသားစုဝင်သုံးယောက်လောက်နေဖို့ပြဿနာမရှိ။ လူများရင် ပန်းအိန်နှစ်အိမ်သုံးအိမ်ယူနိုင်သည်။

ဒါကလည်း လူ့သဘာဝပင်။

ဘယ်ကုမ္ပဏီမှာဖြစ်ဖြစ် စီမံရေးထိပ်ပိုင်းရောက်ရင် အပိုခံစားခွင့်ရှိသည်။ စာသံပေသံနှင့်ပြောရလျှင် အထူးခံစားခွင့်ဟုခေါ်သည်။

ဒီနေ့လည်း ပန်းအိမ်အစုအဝေးမှာစည်ကားနေသည်။

ဖွင့်ပွဲနှင့်ယှဉ်လျှင် ပန်းအိမ်အစုအဝေးတွင်အခန်းယူရန်ပိုခက်လာသည်။

ပန်းအိမ်အစုအဝေး၏လှပသောရှုခင်းကိုကြော်ငြာပြီးနောက် စာရင်းသွင်းစာမျက်နှာတွင် လူပိုအုံသွားပြီး ရနိုင်ခြေနည်းလာသည်။

ချင်လင်နှင့်လီခိုင်က လမ်းသွယ်တစ်ခုဖြတ်သွားသောအခါ ခရီးသည်တချို့စုပြီးဆွေးနွေးနေသံကြားရသည်။

"အရင်က ထမ်းစင်စီးတာ ပြဿနာမရှိဘူးထင်တာပဲ... အခုရော မင်းဘယ်လိုထင်လဲ?''

"ဟုတ်တယ်.. လိုင်းပေါ်ကမြင့်မြတ်သူတွေအကုန် တားမြစ်ခံလိုက်ရပြီ... သူများအလုပ်အကိုင်ကိုဖျက်ဆီးပြီး သူတို့ကိုယ်သူတို့မှန်တယ်ထင်နေတာ''

"ပင်ပင်ပန်းပန်းအလုပ်လုပ်ရတာ ရှက်စရာမဟုတ်ပါဘူး... ထမ်းစင်ကလည်း ဝန်ဆောင်မှုတစ်မျိုးပဲလေ''

သူ့အကြံအစည်အလုပ်ဖြစ်သောကြောင့် ချင်လင်ရယ်လိုက်သည်။

ကောင်းတယ်!

"ညီလေးချင်.. ငါစောစောကဗီဒီယိုကြည့်ပြီးမှ မင်းထမ်းစင်စီးဖို့ခေါ်လာတဲ့ရည်ရွည်ချက်ကိုသိတယ် ဟုတ်တယ်မလား?''

လီခိုင်ကပြုံးပြုံးနှင့်ပြောသည်။

"အင်း.. အဲဒါကျွန်တော့်ရည်ရွည်ချက်ပဲ''

ချင်လင်ကပြုံးပြီးပြန်ဖြေသည်။

"ငါမင်းကိုအလကားကူညီပေးတာ ဆုမချသင့်ဘူးလား? ချက်ချင်ပြုတ်ချင်စိတ်မရှိဘူးလား?''

လီခိုင်လည်းအခွင့်အရေးယူပြီးငေါ့သည်။

"နောက်မှစကားပြောရအောင်!''

ချင်လင်ကပြုံးပြီး ငြင်းသည်။

"ညီလေးချင်.. မင်းဘောင်းဘီဆွဲတင်ပြီးမှ မပေးလို့မရဘူး!''

လီခိုင်ကလောလိုက်သည်။

ချင်လင်ဆွံ့အသွားပြီး_

"အစ်ကိုလီ.. စကားပြောတာ သတိထားနော်... ကျွန်တော့်မှာမိန်းမရှိတယ်''

လိုင်းပေါ်အခြေအနေက လုံးဝပြောင်းပြန်လှန်သွားသည်။ လိုင်းပေါ်အကြမ်းဖက်မှုမှတဆင့် မြင့်မြတ်သည်ဆိုသူများ၊ တရားမျှတမှုတမန်တော်များက လူယုတ်မာများအဖြစ်ပြောင်းလဲရှုတ်ချခံရသည်။

ဗီဒီယိုတွေ၊မှတ်ချက်တွေကို အလောတကြီးပြန်ဖျက်သူတွေ ဘယ်လောက်များလိုက်မလဲ?

ဒါကြောင့် ထမ်းစင်စီးဖို့ ခရီးသည်တွေတွန့်ဆုတ်ခဲ့သည်။ အရင်က လိုင်းပေါ်မှာအပြောခံရမှာကြောက်၍မစီးရဲသော်လည်း အခုပျော်ပျော်ကြီးစီးကြသည်။

တောင်တက်လမ်းတလျှောက်တွင် ခရီးသည်များကိုတင်လာသောထမ်းစင်များတွေ့နိုင်သည်။

တဖြည်းဖြည်း မိုးချုပ်သွား၏။

နတ်သမီးပုံပြင်တောင်မှာ ညပိုင်းအချိန်ဖွင့်လှစ်လိုက်ပြန်သည်။

နတ်သမီးပုံပြင်တောင်အထမ်းသမားအားလုံး ချွေးတလုံးလုံးနှင့် အဝတ်အစားများစိုရွှဲနေသည်။

သို့သော် အားလုံးပြုံးနေကြ၏။

တစ်ခုခုရရှိပြီးကျေနပ်သည့်အပြုံးမျိုးပင်။

ခရီးသည်အများစုက သူတို့အနီးကပ်ပုံကိုဓာတ်ပုံရိုက်ပြီး လိုင်းပေါ်တင်ကြသည်။

ဒီလိုအပြုံးမျိုးကကူးစက်တတ်ပြီး လူတွေကိုပိုအတွေးများစေသည်။

ထို့ကြောင့် လိုင်းပေါ်တွင် ကိုယ်မှန်ကန်သည်အထင်နှင့်၊ကိုယ့်အတွေးနှင့် လိုင်းပေါ်မတင်သင့်။

အကြောင်းရင်းမသိ၊အမှန်တရားမသိရင် ကိုယ့်ထင်ရာမြင်ရာကြောင့် သူများဒုက္ခရောက်နိုင်သည်။

အထမ်းသမားများ တကယ်ဝမ်းသာနေကြသည်။

တစ်နေ့ယွမ် ၅၀၀ ကျော်ရသောကြောင့်ပင်။ အပြောကောင်းသူတချို့က ဘောက်ဆူးပိုရကြသည်။

သူတို့အင်အားနည်းသည်ကိုသာ မကျေမနပ်ဖြစ်မိသည်။

ချင်းလင်အားဖြည့်လက်ဖက်ရည်သောက်ပြီးအားဖြည့်ရင်တောင် ကုန်သွားတဲ့အားနဲ့မျှပါ့မလား?

သူတို့ဝင်ငွေများမှာ သံသယဖြစ်ဖွယ်မရှိ။

အနာဂတ်အတွက်မျှော်လင့်ချက်အပြည့်ပင်။

ပန်းအိမ်အစုအဝေး_

အခန်း ၁၃၃၂: အရောင်ထွက်တဲ့အစားအစာအသစ်! ၂

ချင်လင်နှင့်လီခိုင်လည်း သီးသန့်ထားသောပန်းအိမ်များဆီရောက်လာသည်။

သီးသန့်နေရာဟုဆိုရမည်။

အပြင်ကအပိုင်းကိုရပ်ကွက်ဟုဆိုလျှင် ဒီနေရာကိုအပန်းဖြေစံအိမ်ဟုဆိုနိုင်သည်။ သီးသန့်ဒန်း၊ စားပွဲ၊ ကုလားထိုင်များ၊ မျှော်စင်များအပြင် နေထွက်ရှုခင်းကြည့်ပလက်ဖောင်းလည်းသီးသန့်ရှိသည်။

အစ်ကိုလီကိုဒီနေရာခေါ်လာမှတော့ နေထွက်ရှုခင်းကြည့်မည်ဟုစီစဉ်ထားသော်လည်း အစ်ကိုလီလိုလူနှင့်ကြည့်ရမှာထူးဆန်းနေသည်။

ဒါပေမဲ့ ရောက်ပဲရောက်နေပြီ။

ပန်းအိမ်အစုအဝေးတွင်နေထွက်ရှုခင်းကြည့်ရန်အကြံပြုသူက သူဖြစ်သော်လည်း နေထွက်ရှုခင်းကိုမကြည့်ဖူးသောကြောင့် နတ်ဘုရားမတောင်နေထွက်ရှုခင်းနှင့်ယှဉ်ရင် ဘယ်လိုနေမည်မသိပေ။

တဖက်တွင် လီခိုင်ကစိတ်မဝင်စား။

သုတေသနသမားက ဘယ်လိုလုပ်နေထွက်တာကြည့်ချင်မလဲ? စားစရာကောင်းကောင်းမရမချင်းမထဟုတောင် ဆန္ဒပြလိုက်သည်။

ဒီအတွက် ချင်လင်မတတ်နိုင်။

ဒီအစ်ကိုလီက သူ့ကိုမိန်းမလှလေးထင်နေပေမဲ့ သူကနေထွက်ရှုခင်းကြည့်ဖို့သာပြောရမည်။

အစားကောင်း?

သူက ချက်ချင်းပင်_

"အစ်ကိုလီ.. ဒီတောင်ထိပ်မှာ ကျွန်တော်ဘာအစားကောင်းမှမချက်ချင်ဘူး... ဒီမှာကကြည့်ရုံသက်သက်ပဲလေ? အဲဒါရူးတာမလား?''

ချင်လင်ကပြောပြီးပြီးချင်း သူ့စိတ်ထဲမှဖန်သားပြင်ကိုတအံ့တဩကြည့်လိုက်သည်။

ရင်းနှီးနေသောပုံရိပ်တစ်ခုက စိုက်ပျိုးရေးခြံပေါက်တွင်ရုတ်တရက်ပေါ်လာသည်။

အစားတလိုင်းစားဖိုမှူးပင်။

အခုတလော ဒီလူခဏခဏရောက်လာသည်။

အစားတလိုင်းဇာတ်ကွက်နှင့်ကြုံစဉ်က လျှို့ဝှက်အမဲသားချက်နည်းရပြီး အရည်အသွေး ၄ အမဲသားဟင်းကိုချက်နိုင်ခဲ့သည်။

ဒီလူ ဒီတစ်ခါ ဘာပေးမလဲ?

ချင်လင်ကချက်ချင်း ဂိမ်းဇာတ်ကောင်အား စိုက်ပျိုးရေးခြံပေါက်သွားပြီး အစားတလိုင်းပေါ်နှိပ်စေသည်။

အစားတလိုင်းအသံထွက်လာ၏။

(မင်းနဲ့တွေ့ရတာကောင်းလိုက်တာ... မင်းကိုတောင်းဆိုစရာရှိတယ်... တန်ရာတန်ကြေးပေးပါမယ်!)

အစားတလိုင်းစကားက တဲ့တိုးဆန်သည်။ သူလောနေပုံရသည်။

ချင်လင်က ဂိမ်းဇာတ်ကောင်အားနှိပ်စေရာ စကားပြောပေါ်လာပြန်သည်။

(သတ္တုမြို့တော်မှာ အထူးပါဝင်ပစ္စည်းဆိုင်အသစ်ရှိတယ်... ရှားပါးအရည်အသွေးမြင့်ပါဝင်ပစ္စည်းတွေ အချိန်နဲ့အမျှပေါ်လာလိမ့်မယ်... ဒါပေမဲ့ ငါ့မှာရံပုံငွေမလောက်ဘူး... ဒီအတွက်ပိုက်ဆံသုံးရင် နောက်ခရီးထွက်ဖို့လက်မှတ်ဝယ်နိုင်မှာမဟုတ်တော့ဘူး... ရှားပါးပါဝင်ပစ္စည်းတချို့ဝယ်ပေးနိုင်မလား?)

"ကျွတ် ကျွတ်''

တာဝန်ကိုမြင်ပြီး ချင်လင်အတွန့်တက်လိုက်ချင်သည်။

အစားတလိုင်းက ဘာလို့လက်မှတ်ဝယ်ဖို့ပိုက်ဆံမရှိရတာလဲ?

နောက်နေတာလား?

ချင်းလင်မွေးမြူရေးခြံစားသောက်ပွဲကိုလာတဲ့အစားအသောက်အကဲဖြတ်သူတွေကိုစဉ်းစားကြည့်စမ်းပါ၊ မချမ်းသာတဲ့သူရှိလား?

အကဲဖြတ်သူအများစုကိုယ်တိုင်က သူဌေးကြီးတွေ။

ဂိမ်းထုတ်သူက အစားအသောက်ဒိုင်တွေကိုအထင်လွဲနေတာလား?

အစားတလိုင်းစားဖိုမှူးက ဒီအခြေအနေ ဘယ်လိုလုပ်ရောက်မလဲ? အံ့ဖွယ်ချက်နည်းမျိုးစုံသိတဲ့အစားကြမ်းပိုးလေ။

ချင်လင် ပြိုင်မငြင်းချင်တော့။

ဘာပဲဖြစ်ဖြစ် ဇာတ်ကွက်တာဝန်ရှိတာကောင်းသည်။

အနုတ်စုတ်ဂုတ်စုတ်ဂိမ်းထုတ်သူက အစားတလိုင်းကိုအထင်လွဲတာ ဂရုစိုက်နေရမလား?

တာဝန်ဆိုမှတော့ ဆုကြေးကဘာဖြစ်ဖြစ် သူ့အတွက်ကောင်းသည်။

သူကတာဝန်ကိုလက်ခံလိုက်ရာ အစားတလိုင်းကကျေးဇူးတင်စကားပြောသည်။

(ကျေးဇူးအများကြီးတင်ပါတယ်... သတ္တုမြို့တော်မှာ မင်းလိုမိတ်ဆွေမျိုးရှိတာ တကယ်ဝမ်းသာတယ်!)

စကားပြောပြီးနောက် ချင်လင်ကသူ့ဂိမ်းဇာတ်ကောင်အား သတ္တုမြို့တော်သွားစေသည်။

သတ္တုမြို့တော်ထဲလျှောက်သွားပြီး နောက်ဆုံးမျိုးစေ့ဆိုင်ဘေးတွင် အစားတလိုင်းပြောသောအသစ်ဖွင့်ထားသည့်အစားအစာဆိုင်ကိုတွေ့ရသည်။

သူ့ဂိမ်းဇာတ်ကောင်အား ဆိုင်ထဲဝင်ပြီးဝန်ထမ်းပေါ်နှိပ်စေရာ စာပေါ်လာသည်:

(သတ္တုမြို့တော်စီးပွားရေးဖွံ့ဖြိုးမှုကြောင့် သတ္တုမြို့တော်မှာဆိုင်ခွဲဖွင့်လိုက်ပါပြီ... ထုတ်ကုန်မျိုးစုံဝယ်ရုံသာမက ရှားပါးအစားအစာပါဝင်ပစ္စည်းတွေလည်း ရံဖန်ရံခါရောင်းပါမယ်!)

စာအောက်တွင်ပါသောအသေးစိတ်မှတ်ချက်များမှတဆင့် ဒုက္ခသိပ်မများကြောင်း၊ အသစ်ဖွင့်ထားသောဆိုင်တွင် ခြံထွက်ပစ္စည်းတစ်မျိုးပြီးတစ်မျိုးတိုက်ရိုက်ရောင်းချနိုင်ကြောင်း ချင်လင်သိလိုက်သည်။ ဒီလိုဆိုရင် ခြံမှာရောင်းတာထက်စျေးပိုရမည်။

သို့သော် ချင်လင်မှာဒီလိုလုပ်ချိန်မရှိသောကြောင့် အချိန်မဖြုန်းလို။

ဂိမ်းထဲမှာနေ့တိုင်းငါးရောင်း၊တောင်တန်းထွက်ကုန်များရောင်းပြီး ရွှေပြားအများကြီးရသည်။

အစားတလိုင်းပြောတဲ့ရှားပါးပစ္စည်းကိုသာ သိချင်သည်။

ထို့ကြောင့် ချက်ချင်းသူ့ဂိမ်းဇာတ်ကောင်အား စျေးရောင်းသူပေါ်နှိပ်ပြီး အရောင်းစာရင်းကြည့်စေသည်။

(မုန်လာဥဖြူ: အရည်အသွေး ၂)

(ပန်းပွင့်: အရည်အသွေး ၂)

(ငါးကြင်းနက်: အရည်အသွေး ၂)

(သခွားသီး: အရည်အသွေး ၂)

(ဂဏန်းလက်မ: အရည်အသွေး ၂)

ဆိုင်မှအရောင်းစာရင်းကို ချင်လင်ကြည့်လိုက်သည်။ ပစ္စည်းများတစ်ခုချင်းထွက်လာပြီး အားလုံးအရည်အသွေး ၂ ပါဝင်ပစ္စည်းများဖြစ်သည်။

သူနည်းနည်းစိတ်ပျက်မိသည်။

ဒီပါဝင်ပစ္စည်းတွေက သူ့ခြံမှာလည်းရှိသည်။

နောက်တစ်မျက်နှာလှန်လိုက်သောအခါတွင်လည်း အရည်အသွေး ၂ ပါဝင်ပစ္စည်းများသာဖြစ်နေသည်။ သို့သော် ပါဝင်ပစ္စည်းတချို့က ကမ္ဘာ့နာမည်ကြီးဖြစ်ပြီး ဂိမ်းမျိုးစေ့ဆိုင်တွင်ဝယ်မရပေ။

သို့ရာတွင် နောက်ဆုံးစာမျက်နှာလှန်လိုက်သောအခါ သူအံ့ဩဝမ်းသာဖြစ်သွားသည်။

(အထူးပါဝင်ပစ္စည်း ကြက်သား: အရည်အသွေး ၃ (×၂))

ချင်လင် အံ့ဩသွားသည်။

ဒါအစားတလိုင်းပြောတဲ့ရှားပါးပစ္စည်းလား?

ရုတ်တရက် ချင်လင်သွားရည်ကျလာသည်။

အဆင့်မြင့်အစားအစာများစားနေကျဖြစ်၍ အစားအသောက်လိုအပ်ချက်မြင့်မားသည်။

သူ့အဖို့ အရည်အသွေး ၂ အစားအစာက သာမန်အစားအစာနှင့်မခြား။ အခုဒီဆိုင်မှာအရည်အသွေး ၃ ပါဝင်ပစ္စည်းဝယ်နိုင်တော့မည်ဖြစ်၍ သေချာပေါက်ကြီးမားသောကောင်းချီးပင်။

အရည်အသွေး ၃ အထူးကြက်သားနှစ်ပုံရှိသည်။

ချင်လင်ကချက်ချင်း ဂိမ်းဇာတ်ကောင်အား အရည်အသွေး ၃ ကြက်သားနှစ်ပုံဝယ်စေသည်။ ထိုစာမျက်နှာမှထွက်ပြီးနောက် ချက်ချင်းပြန်ဆွဲကြည့်လိုက်သည်။

ဒီတစ်ခါ အရည်အသွေး ၃ ဘာမှမတွေ့ရတော့။

သုံးလေးကြိမ်ဆက်တိုက်လုပ်ကြည့်သော်လည်း ဒီအတိုင်းပင်။

ဒီတော့ အရည်အသွေး ၃ ပါဝင်ပစ္စည်းက ကံကောင်းဖို့လိုတာပေါ့။

ထို့နောက် သူ့ဂိမ်းဇာတ်ကောင်အား စိုက်ပျိုးရေးခြံပြန်စေရာ ခြံပေါက်တွင်အစားတလိုင်းကမတ်တပ်ရပ်နေဆဲပင်။

သူကခဏတွေးကြည့်ပြီး ဂိမ်းဇာတ်ကောင်အား သိုလှောင်ခန်းထဲတွင် ကြက်သားတစ်ပုံထားစေသည်။

တာဝန်အရပေးလိုက်သည်နှင့် အရည်အသွေး ၃ ကြက်သားနှစ်ပုံလုံးယူသွားမှာစိုးရသည်။

ရယ်စရာမကောင်းဘူးလား?

ချင်လင်က အရည်အသွေး ၃ ကြက်သားတစ်ပုံချပြီးနောက် ဂိမ်းဇာတ်ကောင်အား အစားတလိုင်းဆီတာဝန်အတိုင်းပေးစေသည်။

အစားတလိုင်းအသံပြန်ထွက်လာ၏။

(ဒီကြက်သားက ပြီးပြည့်စုံတယ်... မင်းတကယ်ဝယ်နိုင်ခဲ့တာပဲ... ကျေးဇူးအများကြီးတင်ပါတယ်... ကြက်သားဝယ်လာမှတော့ မင်းကိုကြက်သားနဲ့ဆိုင်တာပေးမယ် ဟုတ်လား? ဒါ မင်းအတွက်ပါ... ငါသေချာသုတေသနလုပ်ထားတယ်)

ထို့နောက် ဂိမ်းဇာတ်ကောင်လက်ထဲတွင် မှတ်ချက်နှင့်စာလိပ်ပေါ်လာသည်:

(ဂုဏ်ယူပါတယ်... အစားတလိုင်းသေချာသုတေသနလုပ်ထားတဲ့လျှို့ဝှက်သူတောင်းစားကြက်သားချက်နည်းရပါတယ်!)

သူတောင်းစားကြက်သား?

သူအရမ်းရင်းနှီးတဲ့ဟင်းပဲ။

ရုပ်ရှင်၊ TV ရှိုးပွဲများတွင်တောင်ပါဖူးသည်။

အစားတလိုင်းက ဒီဟင်းချက်နည်းတကယ်ပေးတာလား!

အစားတလိုင်းကတွန့်တိုလာသလားဟု သူထင်မိသည်။

ဘာပဲဖြစ်ဖြစ် အရင်က ငါးအမျိုးမျိုးချက်နည်း ဒါမှမဟုတ် အခွံမာမျိုးစုံချက်နည်းများ သူရခဲ့သည်။

အခုနောက်ပိုင်းတွင်မူ အမဲသားဟင်း ဒါမှမဟုတ် သူတောင်းစားကြက်သားဟင်း၊ ချက်နည်းတစ်မျိုးသာရသည်။ ကန့်သတ်ချက်အတော်များသည်။

"ညီလေးချင်.. ရုတ်တရက်ဘာတွေတွေးနေတာလဲ?''

ချင်လင်နားထဲတွင် လီခိုင်အသံကြားရသည်။

လီခိုင်က ချင်လင်ကိုကြည့်ပြီးခေါင်းခါနေသည်။ ဒီချင်လင်ဘာတွေတွေးနေမှန်း သူမသိ၊ ငေးငိုင်နေမှန်းသာသိသည်။

ချင်လင်ကအသိပြန်ဝင်လာပြီး အောင့်သက်သက်ပြုံးကာ လီခိုင်အား_

"အစ်ကိုလီ.. အစားကောင်းစားချင်လား?''

"ညီလေးချင်.. မင်းပဲပြောတော့ တောင်ထိပ်မှာမချက်ချင်ဘူးဆို?''

လီခိုင်ကကြောင်တောင်တောင်နှင့်မေးသည်_

"အရူးပဲချက်မှာဆို?''

"ကျွတ် ကျွတ်''

ချင်လင်ကနားထောင်ရင်း သူ့ခေါင်းထဲမှောင်မိုက်သွားပြီး လီခိုင်ကိုကြည့်ကာ_

"အစ်ကိုလီ.. စားချင်လားလို့?''

"စားမယ်!''

လီခိုင်က ခပ်ပြတ်ပြတ်ဖြေသည်။

"အဲဒါဆို ပန်းအိမ်အစုအဝေးမန်နေဂျာကိုသွားရှာပြီး ချက်ဖို့ပြင်ခိုင်းပေးပါ... ကျွန်တော် ကြက်သားယူလိုက်ဦးမယ်''

ချင်လင်က လီခိုင်ကိုပထုတ်ချင်သည်။

မဟုတ်ရင် သူဘယ်လိုလုပ်ဂိမ်းထဲဝင်ပြီးကြက်သားယူမလဲ?

လီခိုင်ကနှုတ်ခမ်းစူပြီး ချက်ချင်းပန်းအိမ်အစုအဝေးမန်နေဂျာကိုသွားရှာသည်။

လီခိုင်ထွက်သွားသည်နှင့် ချင်လင်ကပန်းအိမ်ထဲဝင်ပြီး အထဲမှတံခါးလော့ချလိုက်သည်။

ဝင်ပေါက်နှင့်ပတ်ဝန်းကျင်တွင် စောင့်ကြည့်ကင်မရာများထားသော်လည်း ပန်းအိမ်ထဲမှာကင်မရာမရှိသောကြောင့် သူများမြင်မှာပူစရာမလို။

အတွေးနှင့်သူကဂိမ်းထဲဝင်ပြီး သူတောင်းစားကြက်သားချက်နည်းမှတ်ချက်ကိုဖတ်လိုက်သည်:

(လျှို့ဝှက်သူတောင်းစားကြက်သားချက်နည်း: အထူးလက်ရာ!)

(အစားတလိုင်းဖန်တီးထားသောလက်ရာဖြစ်သည်။ အထူးသူတောင်းစားလက်ရာချက်နိုင်သည်။

စားကောင်းခြင်း +၁၊ အထိအတွေ့ +၁၊ အနံ့ +၁!

အထူးအာနိသင်: အရောင် +၁)

"အရောင်ထွက်ပြန်ပြီလား?''

ရုတ်တရက် အစားတလိုင်းတွန့်တိုနေတာမဟုတ်မှန်း ချင်လင်သိလိုက်သည်။

အစားတလိုင်းလျှို့ဝှက်နည်းက ကန့်သတ်ချက်များသော်လည်း အထူးအာနိသင်များလာပုံရသည်။