အခန်း (၁၃၃၃-၁၃၃၅)
Vol. 89 Ch. 1333-1335
အခန်း ၁၃၃၃: ကံကောင်းတဲ့နေ့!
ချင်လင်က သူတောင်းစားကြက်သားချက်နည်းမှတ်ချက်ဖတ်ပြီးနောက် 'လေ့လာသင်ယူမည်'ကိုတန်းရွေးလိုက်သည်။
ဟင်းချက်နည်းစာလိပ်က တခဏချင်းအလင်းရောင်များအဖြစ်ပြောင်းပြီး သူ့ကိုယ်ထဲဝင်လာသည်။
သူ့စိတ်ထဲတွင် ဟင်းချက်နည်းနှင့်အထူးလျှို့ဝှက်ပါဝင်ပစ္စည်းအပါအဝင် သူတောင်းစားကြက်သားချက်နည်းအချက်အလက်အားလုံးရလိုက်သည်။
တချိန်တည်းမှာ သူတောင်းစားကြက်သားချက်နည်းကိုအကြိမ်ကြိမ်ချက်ဖူးသလို ကြွက်သားမှတ်ဉာဏ်ကိုလည်း စနစ်ကပေးသည်။
သို့သော် အထူးပါဝင်ပစ္စည်းများနှင့်ချင်လင်ရင်းနှီးနေပြီ။
ဒါသူအမဲသားချက်ရင်သုံးတဲ့ပါဝင်ပစ္စည်းတွေမလား?
ဒီပါဝင်ပစ္စည်းများနှင့်စနစ်လက္ခဏာကြောင့် အမဲသားကအရောင်ထွက်သည်။
အခုသူတောင်းစားကြက်သားကလည်း ချက်နည်းတူသည်။ တထပ်တည်းနီးပါးတူသော်လည်း အမဲသားချက်နည်းထက်ပါဝင်ပစ္စည်းနည်းသည်။
သူတောင်းစားကြက်သားချက်နည်းကိုလေ့လာပြီးနောက် ချင်လင်ကသိုလှောင်ခန်းထဲအမြန်ပြန်လာပြီး အရည်အသွေး ၃ အထူးကြက်သားကိုရှာလိုက်သည်။
ကြက်သားက သေးသေးမဟုတ်။ သာမန်ကြက်သားထက်နှစ်ဆရှိပြီး အရမ်းကြီးသည်ဟုဆိုရမည်။
(အထူးပါဝင်ပစ္စည်းကြက်သား: အရည်အသွေး ၃)
(စားသုံးရန်အထူးမွေးမြူထားသောပြည်တွင်းကြက်သားဖြစ်သည်။ အလွန်အရသာရှိသောကြက်သားဟင်းပွဲဖန်တီးနိုင်သည်။
အာနိသင်: အရသာ +၃၊ စားကောင်းခြင်း +၃၊ အနံ့ +၃၊ နှုတ်မြိန်စေခြင်း +၃၊ အာဟာရဖြစ်စေခြင်း +၃၊ ပရိုတင်းဓာတ် +၂!)
အထူးပါဝင်ပစ္စည်းကြက်သားမှတ်ချက်ကိုဖတ်ပြီး ဘာကြောင့်အထူးမွေးမြူထားသောပြည်တွင်းကြက်သားဟုပြောမှန်း ချင်လင်သဘောပေါက်သည်။
အရသာ +၃၊ စားကောင်းခြင်း +၃၊ အနံ့ +၃ ထိုအရည်အသွေးသုံးမျိုးနှင့်တင် ဟင်းချက်တတ်သောဘယ်စားဖိုမှူးမဆို၊ မဲတူးနေအောင်မကြော်ရင် ဟင်းချက်နတ်ဘုရားလက်ရာမျိုးပြနိုင်သည်။
နှုတ်မြိန်စေခြင်း +၃ အရည်အသွေးကလည်း သွားရည်ကျစေသည်။ အစားပျက်သူတောင် အစားကြီးသူဖြစ်လာမည်။
အာဟာရဖြစ်စေခြင်း +၃၊ ပရိုတင်းဓာတ် +၂ အရည်အသွေးက ပြောစရာမလို။
လူတွေဘာကြောင့်ကြက်သားစားလဲ?
အာဟာရဖြစ်လို့မလား?
ဒီအရည်အသွေးနှစ်မျိုးက +၂ ပဲရှိပေမဲ့ အံ့ဩစရာကောင်းနေပြီဟုတ်?
အထူးသဖြင့် အစားတလိုင်းက သူ့ကိုသူတောင်းစားကြက်သားချက်နည်းပေးထားသောကြောင့် အရသာ +၁၊ စားကောင်းခြင်း +၁၊ အနံ့ +၁ ရှိသည်။
ဒီတော့ +၄ စားကောင်းသောက်ဖွယ်ထပ်လုပ်နိုင်တဲ့သဘောမလား?
ချင်လင်က အရည်အသွေး ၃ ကြက်သားယူပြီး ဂိမ်းထဲမှထွက်ကာ ပန်းအိမ်ပြန်ရောက်လာသည်။
တံခါးဖွင့်လိုက်သောအခါ အစ်ကိုလီပြန်မရောက်သေး၍ သက်ပြင်းချပြီး ကြက်သားကိုဘေးမှာချိတ်ထားလိုက်သည်။
ခဏအကြာ ပန်းအိမ်အစုအဝေးမန်နေဂျာနှင့်အတူ အစ်ကိုလီပြန်ရောက်လာပြီး ဟင်းချက်စရာတန်ဆာပလာမျိုးစုံသယ်လာသောအစောင့်များလည်းပါသည်။
ပန်းအိမ်အစုအဝေးတွင် ကိုယ်တိုင်ချက်ပြုတ်စားနိုင်သောဝန်ဆောင်မှုမရှိ။ အားလုံးက ပန်းအိမ်အစုအဝေးစားဖိုဆောင်အတွက်ဆောင်ထားသောအိုးခွက်ပစ္စည်းများဖြစ်သည်။
သူဌေးကသုံးချင်ရင် ချက်ချင်းယူလာပေးရမည်။ အထူးသဖြင့် စားဖိုဆောင်ကလည်းစိတ်ချသည်။ ဘာပဲဖြစ်ဖြစ် သူတို့သူဌေးက'မာစတာချက်ဖ်'မှန်းသူတို့သိသည်။
"ညီလေးချင်.. ဟင်းချက်စရာတွေယူလာပြီ''
လီခိုင်ကရှေ့ရောက်လာပြီး နာမည်ကောင်းယူသည်။
ချင်လင်ကမတတ်သာပုံနှင့် ဟင်းချက်စရာများကိုကြည့်လိုက်သည်။
အစားတလိုင်းကပေးထားတဲ့ သူတောင်းစားကြက်သားချက်နည်းကို သူမသိ။
ဒီဟင်းချက်စရာအများစုက သူတောင်းစားကြက်သားဟင်းချက်မရပေ။
ပန်းအိမ်မန်နေဂျာက ပစ္စည်းများချပြီး ချင်လင်ကိုတရိုတသေမေးသည်_
"ဥက္ကဌချင်.. တခြားမှာစရာရှိသေးလား?''
ချင်လင်ကခေါင်းခါပြီး_
"ခင်ဗျားတို့လုပ်စရာရှိတာ သွားလုပ်ကြပါ... လိုရင်ဖုန်းဆက်လိုက်မယ်''
"ကောင်းပါပြီ ဥက္ကဌချင်''
ပန်းအိမ်မန်နေဂျာကခေါင်းညိမ့်ပြီး ချက်ချင်းသူ့လူများခေါ်သည်။
သို့သော် မသွားသေးဘဲ အပြင်မှာသူ့လူများနှင့်စောင့်နေ၏။
ဘာပဲဖြစ်ဖြစ် သူဌေးကအထဲမှာ၊ မှာစရာရှိရင် တန်းမှာနိုင်သည်။
လီခိုင်လည်း ဘေးမှကြက်သားကိုကြည့်ပြီး တန်းမေးသည်_
"ညီလေးချင်.. မင်းဒီည ကြက်သားချက်မှာလား? ဒီကြက်က နည်းနည်းကြီးတယ်နော်''
ချင်လင်ကခေါင်းညိမ့်ပြီး တဆက်တည်း ကျောက်မိုချင်းကိုဖုန်းဆက်လိုက်သည်။
အရည်အသွေး ၄ ဟင်းပွဲလုပ်နိုင်မှတော့ သူ့မိန်းမနဲ့အမေကိုမေ့ထားလို့ရမလား?
ကျောက်မိုချင်းကိုဖုန်းဆက်ပြီး အမေကိုခေါ်လာခိုင်းသည်။ အစ်ကိုလီ၏ဇနီးဒေါက်တာထန်ကိုပါ အတူတူစားရန်ခေါ်လိုက်သည်။
ဒါကို ညလယ်စာလိုသဘောထားမည်။
နောက်ပြီး ကျောက်မိုချင်းကို အထူးပါဝင်ပစ္စည်းတချို့ယူလာခိုင်းလိုက်သည်။
သူအမဲသားချက်တုန်းက ပါဝင်ပစ္စည်းအများကြီးဝယ်ပြီး အပန်းဖြေစံအိမ်စားဖိုဆောင်ထဲသိမ်းထားသည်။ အဲဒီအတိုင်း ယူချက်ရုံပင်။
အချိန်ကျရင် သူတောင်းစားကြက်သားအတွက်လိုတဲ့ပါဝင်ပစ္စည်းတချို့ရွေးယူလိုက်မည်။
အဲဒီအပြင် တခြားပါဝင်ပစ္စည်းများလည်းယူရမည်။ တခြားဟင်းများနှင့်တွဲစားမည်။
မကြာမီ ကျောက်မိုချင်းက ချင်ဖုန်းလေးနှင့်ရောက်လာသည်။
သူမဘေးတွင် သမီးလေးချီထားသောထန်ရှိုးဝမ်လည်းပါသည်။
သူတို့နောက်တွင် အမျိုးသမီးကြီးတစ်ဦးနှင့်ဝမ်းသာအားရစကားပြောနေသောလင်းဖန်ပါသည်။ အမျိုးသမီးကြီးက ထန်ရှိုးဝမ်အမေပင်။ သူမက ကလေးမလေးတစ်ယောက်ကိုလက်ဆွဲထားသည်။
ဒီကလေးမလေးအတွက် လီခိုင်က SMA ဆေးဝါး၏ပါဝင်ပစ္စည်းကိုသုတေသနလုပ်ခဲ့ခြင်းပင်။
သို့သော် လီခိုင်ကအရှုံးမပေး။ ဘာပဲဖြစ်ဖြစ် 'တစ်ခုဝယ် တစ်ခုရ'စနစ်။
ကျောက်မိုချင်းနောက်တွင် ချင်လင်လိုအပ်သည့်ပါဝင်ပစ္စည်းများနှင့်တခြားပစ္စည်းများသယ်လာသောလူသုံးယောက်ပါသည်။
သူတို့ရောက်သောအခါ လူကြီးနှစ်ယောက်က ကလေးချီလိုက်ကြသည်။
ကျောက်မိုချင်းက ချင်လင်ဆီလျှောက်လာပြီး စူးစမ်းမေးသည်_
"ယောက်ျား.. ဘယ်လိုဖြစ်ပြီး ဒီအပေါ်မှာဟင်းချက်ဖို့စိတ်ကူးပေါက်တာလဲ?''
ချင်လင်ကဆင်ခြေပေးလိုက်သည်_
"ပန်းအိမ်အစုအဝေးကဖွင့်ခါစလေ... ပတ်ဝန်းကျင်က အရမ်းကောင်းတာ... လက်ရှိရုံချန်းရာသီဥတုနဲ့ဆို ဒီမှာညပိုင်းစားသောက်ရင် ရှားရှားပါးပါးပျော်စရာပဲ... ပြီးတော့ အစ်ကိုလီက ဒီနေ့အားနေတာဆိုတော့ တို့မိသားစုနှစ်စုပေါင်းလို့ရတာပေါ့''
ကျောက်မိုချင်းကခေါင်းညိမ့်ပြီး ဘာသံသယမှမရှိတော့။
သီးသန့်နေရာပတ်ဝန်းကျင်က တကယ်ကောင်းသည်။ ဒီမှာညစာစားရမှာ တကယ်ပျော်စရာပင်။ နောက်ပြီး မိသားစုနှစ်စုပေါင်းနိုင်သည်ဟုချင်လင်ပြောတာ သဘာဝကျသည်။
ချင်လင်က သူတောင်းစားကြက်သားအတွက်လိုအပ်သောပစ္စည်းတချို့ကိုရွေးထုတ်လိုက်သည်။
ထိုပါဝင်ပစ္စည်းများနှင့် သူတောင်းစားကြက်သားအရည်အသွေးပြနိုင်၊ အရောင်ထွက်နိုင်သည်။
သူ့မှာပါဝင်ပစ္စည်းတွေပဲရှိပြီး စနစ်ကပေးတဲ့သူတောင်းစားကြက်သားလျှို့ဝှက်ချက်နည်းမရှိရင် အာနိသင်ပြနိုင်မည်မဟုတ်။
ချင်လင်က ပါဝင်ပစ္စည်းများကိုခွဲခြမ်းပြီး ကြက်သားပေါ်စမ်းရန်ဆော့စပ်သည်။
ဆော့ပြင်ဆင်နည်းကိုလည်း အစီအစဉ်တကျလုပ်ရန်လိုသည်။ နောက်ပြီး ထည့်ရမည့်ပါဝင်ပစ္စည်းအချိုးအစားလည်းမတူသောကြောင့် လျှို့ဝှက်နည်းအတိုင်းလုပ်ရသည်။
စနစ်၏လျှို့ဝှက်နည်းအချက်အလက်က သူ့စိတ်ထဲစွဲထင်နေသည်။
ကြွက်သားမှတ်ဉာဏ်ကလည်း ပါဝင်ပစ္စည်းများနှင့်အသားကျစေသည်။
ဆော့ရသည်နှင့် ဘေးတွင်ချိတ်ထားသောအထူးကြက်သားကိုဖြုတ်ပြီး ဆော့အရသာဝင်အောင် အတုံးသေးသေးလေးများတုံးလိုက်သည်။
တကယ်တော့ သူတောင်းစားကြက်သားပေါ်လာတာကြာပြီဖြစ်သည်။ တရုတ်ပြည်တွင် ချက်နည်းအမျိုးမျိုးရှိသည်။ နိုင်ငံခြားမှာတောင်ရှိသည်။
သို့သော် ဟင်းချက်နည်းက အနည်းနှင့်အများတော့ အတူတူပင်။ အရင်ဆုံး ကိုင်ထားသောကြက်သားကို ပါဝင်ပစ္စည်းများနှင့်နယ်ပြီး ဆီသုတ်၊ကြာရွက်ပတ်၊ရွှံ့နှင့်ထုပ်ကာ မီးနှင့်နှပ်သည်။
ကွာခြားချက်က ပါဝင်ပစ္စည်းပင်။
ကြက်သားကျက်သောအခါ ရွှံ့နှင့်ကြာရွက်များဖယ်ပြီး အရသာရှိသောကြက်သားရလာသည်။
ချင်လင်က ကြက်သားပေါ်ဆော့စမ်းလိုက်သည်။ ဆော့အနည်းအများချိန်ဆရန် အတော်အာရုံစိုက်ရသည်။
မဟုတ်ရင် သူတောင်းစားကြက်သား၏အရသာနှင့်အသားအပေါ် အများကြီးသက်ရောက်မှုရှိနိုင်သည်။
တချိန်တည်းမှာ လီခိုင်ကိုလည်းညွှန်ကြားလိုက်သည်_
"အစ်ကိုလီ.. ထိုင်မနေနဲ့လေ... ရွှံ့လုပ်ဖို့မြေကြီးနည်းနည်းတူးပေးဦး... ပြီးရင် အသုံးလိုတယ်.. ဒီမှာကြာရွက်မရှိတော့ အသားကင်ခဲပတ်သုံးရမယ်''
လီခိုင်လည်း ချင်လင်၏လက်ရာကိုစောင့်စားနေသည်။ ချင်လင်စကားကြောင့် တုံ့ဆိုင်းမနေ။ ချက်ချင်းပေါက်ပြားလေးကိုင်ပြီးထွက်လာကာ စတူးသည်။
မြေကြီးအိတ်လေးတစ်အိတ်တူးပြီးနောက် ပန်းအိမ်ပြန်လာသည်။ ရေဇလုံထဲတွင်ရေထည့်ပြီး ရွှံ့ဖြစ်အောင်မွှေသည်။
"ခစ် ခစ်!''
လီခိုင်ရွှံ့လုပ်နေသောကြောင့် ချင်ဖုန်းလေးကတခစ်ခစ်ရယ်ပြီး သူလည်းရွှံ့နှင့်ဆော့ချင်သလိုလက်လှမ်းသည်။
သန္ဓေအားဆေးကြောင့် ဖွံ့ဖြိုးမြန်သော်လည်း ရွှံ့နှင့်ဆော့ချင်သောအဆင့်ကိုမကျော်လွှားနိုင်။
လင်းဖန်ကမူခွင့်မပြုဘဲ တင်းတင်းဖက်ထားသည်။
ခဏအကြာ_
ချင်လင်က ကြက်သားကိုဆော့စမ်းပြီး ကြာရွက်အစား အသားကင်ခဲပတ်နှင့်ပတ်သည်။ ထို့နောက် ကြိုးနှင့်တင်းတင်းချည်သည်။
လီခိုင်က ချက်ချင်းရွှံ့ယူလာပြီး_
"ညီလေးချင်.. ငါရွှံ့သုတ်ပေးမယ်... မင်းလက်တွေမညစ်ပတ်တော့ဘူးပေါ့... ရွှံ့သုတ်တာ ဘာနည်းစနစ်မှမလိုဘူးမလား?''
"နည်းစနစ်အများကြီးလိုတာပေါ့''
ချင်လင်ကပြုံးပြုံးနှင့်ပြောသည်။
"အာ.. လိုသေးတာလား?''
လီခိုင်က ရှက်ကိုးရှက်ကန်းနှင့်အလိုက်တသိဘေးဖယ်လိုက်သည်။
ချင်လင်ကမြေကြီးယူပြီး အလုပ်စသည်။
သူနောက်နေတာမဟုတ်။ စနစ်ကပေးတဲ့သူတောင်းစားကြက်သားချက်နည်းက ဒီလိုပင်။ ရွှံ့သုတ်ရင် အထူအပါးလိုအပ်ချက်ရှိသည်။
ထူလွန်းရင် မီးအရနည်းပြီး ပါးလွန်းရင် အပူများကာ သက်ရောက်မှုရှိနိုင်သည်။
ဒီတော့ ရိုးရိုးသူတောင်းစားကြက်သားဆိုရင်တောင် လုပ်ဖို့မလွယ်။ ဘာပဲဖြစ်ဖြစ် အရည်အသွေး ၄ သူတောင်းစားကြက်စားဟင်းဖြစ်သည်။
အားလုံးပြင်ဆင်ပြီးနောက် ချင်လင်ကမီးဖိုပေါ် သူတောင်းစားကြက်သားတင်လိုက်သည်။
ဒီအဆင့်မှာတောင် အပူချိန်ထိန်းချုပ်ရန်လိုသေးသည်။ သို့ရာတွင် အပူချိန်ထိန်းညှိနိုင်သောအထူးမီးဖိုလေးကြောင့် ဒီအပိုင်းမှာ သူသိပ်အားမစိုက်ရ။
ထို့ကြောင့် တခြားပါဝင်ပစ္စည်းများကိုစပြင်ဆင်သည်။
အားလုံး အရည်အသွေး ၂ ပါဝင်ပစ္စည်းများဖြစ်သည်။ သက်ဆိုင်ရာဟင်းချက်လက်ရာမရှိရင် စားကောင်းခြင်း +၂၊ အထိအတွေ့ +၂ သာရနိုင်သည်။
သူတောင်းစားကြက်သားဟင်းနှင့်လိုက်ဖက်သောဟင်းများပင်။
ချင်လင်က ပါဝင်ပစ္စည်းအားလုံးကို အရသာရှိဟင်းပွဲလုပ်ပြီးနောက် ဘေးမှစားပွဲပေါ်တင်လိုက်သည်။
ထိုမြင်ကွင်းကြောင့် လီခိုင်ကစားပွဲနားချက်ချင်းလျှောက်လာပြီး ပြုံးပြုံးနှင့်_
"ညီလေးချင်.. ငါအရင်မြည်းပေးမယ်''
ချင်လင်ခေါင်းခါလိုက်သည်။
စားချင်ရင် စားချင်တယ်ပေါ့။ ဒီလိုအသံကောင်းဟစ်ရတယ်လို့။
ထို့နောက် ပြန်လှည့်ပြီး သူတောင်းစားကြက်သားကိုအာရုံစိုက်လိုက်သည်။
သို့သော် ဒီတစ်ခါ သူ့စိတ်ထဲမှဂိမ်းဖန်သားပြင်ကိုကြည့်ပြီး အံ့ဩသွားသည်။
သူ့ခြံပေါက်ဝတွင် နောက်တစ်ယောက်ရောက်နေပြန်သည်။ မြို့တော်ဝန်သောမတ်ပင်။
နောက်ထပ်ဇာတ်ကွက်တာဝန်လား?
ချင်လင် မအံ့ဩဘဲမနေနိုင်တော့။
တစ်နေ့တည်း ဇာတ်ကွက်နှစ်ခုကြုံတာ ဒါပထမဆုံး။
ဒီနေ့ဥရောပဘုရင်ဖြစ်လာတာလား?
ကံကောင်းတဲ့နေ့လား?
အခန်း ၁၃၃၄: သူတောင်းစားကြက်သားလည်း အရောင်ထွက်?
ချင်လင်က ဂိမ်းထဲမှသောမတ်ကိုကြည့်ရင်း ရုတ်တရက်သိနေသလိုခံစားရသည်။
ဥရောပဘုရင်ဖြစ်လာရင် ဝမ်းမသာတဲ့သူရှိမလား?
အခုမှအစားတလိုင်းဆီက သူတောင်းစားကြက်သားချက်နည်းရခါစ။ သိပ်အသုံးမတည့်ပေမဲ့ တစ်ခါတလေ နှုတ်မြိန်စားကောင်းနိုင်သည်။
အခုသောမတ်ထပ်ရောက်လာတော့ မအံ့ဩရင် ထူးဆန်းနေမယ်မလား?
ဥရောပဘုရင်ဖြစ်စေချင်မှတော့ ပိုပြီးဥရောပဆန်ရတာပေါ့။
ချင်လင်တွေးတောနေစဉ် သူ့ရှေ့ရှိသူတောင်းစားကြက်သားမှ ကြွပ်ရွသံထွက်လာသည်။ ရွှံ့ဖုတ်ပြီး နည်းနည်းအက်လာခြင်းပင်။
သူတောင်းစားကြက်သား ရပြီ။
သူကချက်ချင်း အသိပြန်ဝင်လာသည်။
တာဝန်က ပြီးမှလုပ်လို့ရသည်။ သူတောင်းစားကြက်သားကို အရင်လတ်စသတ်ရမည်။
သူတောင်းစားကြက်သားအပေါ်မှရွှံ့ကွဲလာသောအခါ မီးအပူချိန်ပြန်ထိန်းရသည်။ သူက မီးနည်းနည်းလျှော့လိုက်၏။
ထိုမြင်ကွင်းကို ကျောက်မိုချင်းနှင့်ထန်ရှိုးဝမ်ကစိတ်ဝင်စားနေသည်။
သူတို့လည်းအမျိုးသမီးများဖြစ်၍ ချက်တတ်ပြုတ်တတ်သည်။ ဘာပဲဖြစ်ဖြစ် လူအများစုအမြင်မှာ မိသားစုတစ်စုသာယာဖို့ အမျိုးသမီးကချက်တတ်ပြုတ်တတ်ရမည်ဟူ၍။
မချက်ပြုတ်တတ်သူက သူဌေးသမီးဖြစ်ရင်ဖြစ်၊ မဖြစ်ရင် သူဌေးကတော်ဖြစ်မည်။ ဒါမှမဟုတ် သူတို့ဘဝမှာ အခက်အခဲသိပ်မရှိခဲ့သောကြောင့်ပင်။
ချက်ပြုတ်နည်းသိနေ၍ သူတို့အံ့ဩခြင်းဖြစ်သည်။
သူတောင်းစားကြက်သားလုပ်နည်းက ဒီလောက်အသေးစိတ်မည်ဟု သူတို့မထင်မိ။ မီးအပူချိန်တောင် သေချာစောင့်ကြည့်ရသည်။
သို့ရာတွင် အသည်းအသန်ချက်နေသောအမျိုးသားတစ်ယောက်က အလွန်ခန့်ညားပြီးဆွဲဆောင်မှုရှိသည်ဟုဆိုရမည်။
ထန်ရှိုးဝမ် အားမကျဘဲမနေနိုင်_
"မိုချင်း.. နင့်ကိုအားကျလိုက်တာ... ဥက္ကဌချင်က အရမ်းဟင်းချက်ကောင်းတာပဲ''
မိန်းမဖြစ်သူက သူများကိုချီးကျူးနေသောကြောင့် လီခိုင်ချက်ချင်းရောက်လာပြီး_
"ဂျူနီယာညီမ.. ကိုယ်ကမချက်တတ်ပေမဲ့ အရသာကောင်းကောင်းမြည်းတတ်ပါတယ်... ညီလေးချင်က သူတောင်းစားကြက်သားဟင်းလေ့လာပြီး ငါ့ကိုမြည်းခိုင်းတာ မင်းအမြင်ပဲ... မဟုတ်ရင် ဒီလိုညလယ်စာစားရပါ့မလား?''
သူကပြောရင်းဆိုရင်း ချင်လင်ကိုအော်ပြောလိုက်သေးသည်_
"ညီလေးချင်.. မင်းရော အဲလိုမထင်ဘူးလား?''
တကယ်တော့ သူကမေးရင်း အချက်ပြပြီးသား။
ချင်လင်မှာ EQ ကောင်းသူဖြစ်၍ ချက်ချင်းပင်_
"အင်း.. အစ်ကိုလီပြောတာမှန်တယ်''
လီခိုင်ကချက်ချင်း ထန်ရှိုးဝမ်ဘက်လှည့်ကာ_
"ဂျူနီယာညီမ.. မင်းရော အဲလိုမထင်ဘူးလား?''
ထန်ရှိုးဝမ်က မျက်စောင်းထိုးလိုက်သည်။
သူမစီနီယာအစ်ကိုလီက နာမည်ကြီးသုတေသနသမားဆိုပေမဲ့ တစ်ခါတလေ ရူးသလိုလိုကြောင်သလိုလို။
နောက်ဆုံး...
သူတောင်းစားကြက်သားဟင်းရပြီဖြစ်၍ ချင်လင်ကမီးပိတ်ပြီး မီးဖိုလေးပေါ်မှချလိုက်သည်။
ထိုအချိန်တွင် သူတောင်းစားကြက်သားကိုအုပ်ထားသောရွှံ့မှာအလွန်ပူနေသောကြောင့် ကိရိယာများသုံးပြီးသာ စားပွဲပေါ်ချလိုက်သည်။ မဟုတ်လို့ ရွှံ့အေးတဲ့အထိစောင့်ရင် အထဲကကြက်သား အရသာလျော့သွားမည်။
သူတောင်းစားကြက်သားကိုစားပွဲပေါ်တင်ပြီးနောက် လီခိုင်ချက်ချင်းရောက်လာသည်။
ကျောက်မိုချင်းနှင့်ထန်ရှိုးဝမ်လည်း စူးစမ်းပြီးရောက်လာ၏။
ချင်လင်၏လက်ရာကို သူတို့သိသည်။ စားသောက်ပွဲအပြီးမှာ သူ့ကိုကမ္ဘာ့အတော်ဆုံးစားဖိုမှူးလို့ပြောလည်းကိစ္စမရှိတော့။
ချင်လင်ချက်တဲ့သူတောင်းစားကြက်သားဟင်းက ဘယ်လိုများနေမလဲ သူတို့သိချင်နေသည်။
အပြင်မှာရပ်နေသောပန်းအိမ်အစုအဝေးမန်နေဂျာနှင့်အစောင့်များတောင် လှမ်းစပ်စုကြသည်။ သူတို့သူဌေးလက်ရာဘယ်လောက်ကောင်းမှန်း သူတို့လည်းသိသည်။
သူဌေးအကြာကြီးချက်နေတဲ့သူတောင်းစားကြက်သားဟင်းက အဓိကဟင်းပွဲပင်။ အစောင့်တစ်ယောက်က မနေနိုင်ဘဲ ဖုန်းနှင့်ဓာတ်ပုံရိုက်ထားသည်။
ချင်လင်ကတူလေးတစ်လက်ကိုင်ပြီး သူတောင်းစားကြက်သားပေါ်မှရွှံ့ကိုစထုသည်။ ခြောက်ပြီးမာနေသောရွှံ့များအားလုံးခွာပြီးနောက် ကြိုးကိုကတ်ကြေးနှင့်ညှပ်သည်။
အသားကင်ခဲပတ်နောက်ဆုံးအလွှာဖွင့်လိုက်သောအခါ မွှေးပျံ့သောအနံ့နှင့်အတူ အငွေ့ထွက်လာသည်။
ထို့နောက် အားလုံးအံ့ဩသွား၏။
အငွေ့ထွက်လာသောခဏတွင် အလင်းရောင်ပါထွက်လာပြီး အားလုံးမျက်စိကျိန်းသွားသည်။
"အရောင်ထွက်ပြန်ပြီ''
အပြင်မှအစောင့်တစ်ယောက်က တအံ့တဩပြောသည်။
ပန်းအိမ်အစုအဝေးမန်နေဂျာက အစောင့်များကိုစိုက်ကြည့်လိုက်သော်လည်း သူမမျက်နှာမှာ အံ့ဩမှုကအတိုင်းသား။
ကျောက်မိုချင်းနှင့်ထန်ရှိုးဝမ်လည်းအတူတူပင်။
ချင်လက်လက်ရာအရမ်းကောင်းကြောင်း၊ အရင်က အရောင်ထွက်သောအစားအစာချက်ဖူးကြောင်း သူတို့သိသည်။
စားသောက်ပွဲတွင် အရောင်ထွက်သောအစားအစာကိုရှောင်ချင်ချက်ခဲ့မှန်း ပြည်တွင်းကလူအများစုသိကြသည်။ ရုပ်ရှင်၊ကာတွန်းထဲမှာသာရှိသောမြင်ကွင်းမျိုးက အပြင်မှာတကယ်ဖြစ်ခဲ့သည်။
အစားအသောက်အကဲဖြတ်သူများကြောင့် နိုင်ငံခြားမှအစားကောင်းကြိုက်သူများပါ အရှေ့တိုင်းမှာ 'မာစတာချက်ဖ်' ရှိမှန်းသိသွားသည်။ သူ့အစားအစာက တခြားစားဖိုမှူးများထက်ပိုကောင်းသည်။
ဒါပေမဲ့ အမဲသားက အိုးထဲမှာချက်တာ။
အခုရွှံ့နဲ့အုပ်ထားတဲ့ချင်လင်ရဲ့သူတောင်းစားကြက်သားက အရောင်ထွက်လာမယ်လို့ ကျောက်မိုချင်းတို့မထင်ခဲ့။
အရင်တစ်ခါချက်တဲ့အမဲသားထက်တောင် မယုံချင်စရာကောင်းနေသေးတော့။
နောက်ပြီး သူတောင်းစားကြက်သားဖွင့်လိုက်သောအခါ အနံ့ပြင်းပြင်းထွက်လာပြီး သူတို့စိတ်မထိန်းနိုင်။
အနံ့ +၄ အရည်အသွေးကြောင့်ပင်။
အသားနံ့ကမြန်မြန်ဆန်ဆန်ပြန့်သွားပြီး အပြင်မှပန်းအိမ်အစုအဝေးမန်နေဂျာနှင့်အစောင့်များတောင် အနံ့ရသည်ဟုဆိုနိုင်သည်။
နောက်ပြီး +၄ အရည်အသွေးက ထိုနေရာတင်မရပ်။ အမွှေးနံ့ကသိပ်သည်း၍ပျောက်ကွယ်မသွားဘဲ လျှောက်လည်နေသောခရီးသည်များတောင် အနံ့ရသည်။
နည်းလမ်းတကျပြောရရင် အစားအစာအနံ့က ဒီလောက်ဝေးဝေးမရောက်နိုင်။
သို့သော် ခရီးသည်များသွားရင်းလာရင်း ထိုအနံ့ကိုစွဲသွားပြီး_
"အနံ့ကမွှေးလိုက်တာ... ဘယ်သူချက်နေတာလဲ?''
"အသားချက်တာလားလို့!''
"ဒီဘက်ကလာတာပဲ!''
ခရီးသည်များက ထိုနေရာလှမ်းကြည့်လိုက်ရာ သီးသန့်ပန်းအိမ်များကိုတွေ့ရသည်။ အပြင်မှာ ပန်းအိမ်မန်နေဂျာနှင့်ဝန်ဆောင်မှုပေးသောဝန်ထမ်းများကိုလည်းတွေ့ရသည်။
အခန်း ၁၃၃၅: သူတောင်းစားကြက်သားလည်း အရောင်ထွက်? ၂
ခရီးသည်တချို့ကအဖြေရှာချင်သော်လည်း ထိုမြင်ကွင်းကြောင့် လက်လျှော့လိုက်သည်။ သာမန်လူမဖြစ်နိုင်သောကြောင့် သူတို့ဒုက္ခသူတို့မရှာချင်။
သို့ရာတွင် ထိုအနံ့ကြောင့်သွားရည်ကျပြီး ဗိုက်ဆာသလိုလိုတောင်ရှိသည်။
"ရုတ်တရက်ကြီး အသားကင်စားချင်သလိုပဲ''
"အင်း.. စားထားတာတောင်မကြာသေးဘူး... ဗိုက်ဆာသလိုလိုဖြစ်လာပြီ''
"စားသောက်ဆိုင်သွားပြီး အသားကင်မှာစားရအောင်''
အထူးကြက်သား၏နှုတ်မြိန်ခြင်း +၃ အာနိသင်ကြောင့်ပင်။
ပန်းအိမ်မန်နေဂျာနှင့်အစောင့်များလည်း ထိုအာနိသင်ကိုခံစားရသည်။ သူတို့ဗိုက်ထဲအသံမြည်ပြီး ဆာလောင်သလိုဖြစ်လာသည်။
သို့သော် ဝန်ထမ်းဖြစ်၍ငြိမ်ငြိမ်နေရန် ကိုယ့်ကိုယ်ကိုယ်သတိပေးနေရသည်။
ကျောက်မိုချင်းနှင့်ထန်ရှိုးဝမ်က မတူ။ +၃ အရည်အသွေးကြောင့် သူတောင်းစားကြက်သားကို ချက်ချင်းမြည်းချင်လာသည်။
"ဥက္ကဌချင်.. ရှင်ချက်ရင် ကြက်သားတောင် ဆွဲဆောင်မှုရှိနေတာ... မယုံစရာပဲ!''
ထန်ရှိုးဝမ် မချီးကျူးဘဲမနေနိုင်တော့_
"ဒါဘယ်လောက်အရသာရှိမလဲမပြောတတ်ဘူး''
"ညီလေးချင်.. မြန်မြန်လုပ်ကွာ... အနံ့နဲ့တင် မခံနိုင်တော့ဘူး''
လီခိုင်က လောလိုက်သည်။
ချင်လင်ကပြုံးပြီး ဓားယူကာ ကြက်သားကိုစလှီးသည်။ လူတိုင်းကိုတပိုင်းစီပေးပြီး ထန်ရှိုးဝမ်သမီးကိုတောင် ကြက်ခြေထောက်တစ်ချောင်းပေးလိုက်သည်။
ရင်ပုံသားကိုမူ လင်းဖန်တို့ကရသည်။ အသားအရည်အသွေးကောင်းသော်လည်း လူကြီးသွားက လူငယ်လောက်မကောင်း။ ဒီအပိုင်းက လူကြီးများအတွက်သင့်တော်သည်။
လီခိုင်က အသားရရချင်းတန်းစားသည်။ သို့သော် တစ်ကိုက်ကိုက်ရုံနှင့် စားကောင်းခြင်း +၄၊ အထိအတွေ့ +၄ အရည်အသွေးကြောင့် မယုံနိုင်ပုံဖြစ်သွားပြီး_
"ညီလေးချင်.. အရသာရှိလိုက်တာ... မင်းက ကောင်းကောင်းဝှက်ထားတာပဲ... မင်းချက်တဲ့ကြက်သားက အရမ်းကောင်းတယ်... ငါတို့သိတာ ကြာလှပြီ... ဒါပေမဲ့ ငါ့ကိုအမြည်းတောင်မကျွေးဘူးနော်''
"ဥက္ကဌချင်လက်ရာက အံ့ဩစရာပါပဲ''
ထန်ရှိုးဝမ်က ချီးကျူးသည်_
"ကျွန်မလျှာကိုက်မိတော့မယ်''
ကျောက်မိုချင်းတောင် +၄ စားကောင်းသောက်ဖွယ်ကို တစ်ကြိမ်သာစားဖူးသည်။
စားသောက်ပွဲတုန်းက ချင်လင်သူမအတွက်ချက်ပေးသောအမဲသားပင်။
သူမယောက်ျားက အရောင်ထွက်သောအစားအစာလုပ်နိုင်မှန်းသိသောအချိန်ဖြစ်သည်။
ဒီလိုအရသာရှိတဲ့အစားအစာမျိုးပထမဆုံးအကြိမ်စားဖူးခြင်းလည်းဖြစ်သည်။
အခု သူတောင်းစားကြက်သားစားပြီး အမဲသားထက်လုံးဝမလျော့သလိုခံစားရသည်။ နူးနူးညံ့ညံ့ကြက်သားက အရင်ကအမဲသားထက်သာနေသလိုပင်။
ဘာရယ်မဟုတ်၊ ဒီလိုအရသာရှိတဲ့အစားအစာမျိုးချက်တတ်တဲ့ယောက်ျားကိုပိုင်ဆိုင်ထားတာ အရမ်းဂုဏ်ယူစရာကောင်းသည်ဟုခံစားရသည်။
ချင်လင်ကိုယ်တိုင်တောင် အရည်အသွေး ၄ စားကောင်းသောက်ဖွယ်ကိုမတွန်းလှန်နိုင်၊ သူကအတောင်ပံဖြတ်စားလိုက်သည်။
ထို့နောက် လီခိုင်က သူ့ကိုယ်ပိုင်ဓားပါယူလိုက်၏။
ကြက်ဖင်ကိုဖြတ်ပြီး ပါးစပ်ထဲတန်းထည့်လိုက်သောကြောင့် ချင်လင်အံ့ဩသွားသည်။
"ဒီနေရာမှာတောင် အစ်ကိုလီကဘာလို့ဒီလိုလုပ်နေတာလဲ?''
စားရင်းသောက်ရင်း ချင်လင်တစ်ခုသဘောပေါက်သွားသည်။ တခြားအစားအစာတွေက ဘာမှမဟုတ်၊ ဘယ်သူမှမစားတော့။ အားလုံးက သူတောင်းစားကြက်သားကိုသာအာရုံစိုက်နေကြသည်။
သူတောင်းစားကြက်သားကအနိုင်ပိုင်းထားပြီဖြစ်သော်လည်း တခြားအရည်အသွေး ၂ ဟင်းပွဲများကိုထိမည့်ပုံမရှိကြ။
နောက်ဆုံး ပန်းအိမ်မန်နေဂျာကိုသာ ထိုဟင်းပွဲများနှင့်မီးဖိုချောင်သုံးပစ္စည်းများပြန်ယူသွားခိုင်းလိုက်သည်။
တချိန်တည်းမှာ_
လင်းဖန်တို့တောင်အောက်ပြန်ဆင်းရန်မဖြစ်နိုင်၍ ပန်းအိမ်နှစ်အိမ်ရှင်းခိုင်းလိုက်သည်။
ကျောက်မိုချင်းနှင့်ချင်လင်က တစ်အိမ်နေသည်။
ချင်ဖုန်းလေးကိုမူ သူ့အဘွားလင်းဖန်လက်ထဲအပ်လိုက်သည်။
ညစာစားပြီးနောက် စကားစမြည်ပြောကြ၏။
အဓိကမှာ ကျောက်မိုချင်းနှင့်ထန်ရှိုးဝမ်၊ လင်းဖန်နှင့်ထန်ရှိုးဝမ်အမေဖြစ်သည်။ သက်တူရွယ်တူချင်းတွေ့ပါက စကားပြောစရာများသည်။
လီခိုင်က တင်းနေသောဗိုက်ကိုပွတ်နေသည်။ ချင်လင်နှင့်စကားပြောချင်သော်လည်း ချင်လင်ကငေးနေပြန်သည်။
ထို့ကြောင့် သူပျင်းသွားသည်။ ညီလေးချင်က အားလုံးကောင်းပေမဲ့ ခဏခဏငေးနေတတ်သည်။
ချင်လင်က သူ့စိတ်ထဲမှဖန်သားပြင်ကိုအာရုံစိုက်နေသည်။ သူ့ဂိမ်းဇာတ်ကောင်အား ခြံပေါက်ဝသွားပြီး မြို့တော်ဝန်သောမတ်အပေါ်နှိပ်စေသည်။
စောစောကသူတောင်းစားကြက်သားကိုအာရုံစိုက်နေသော်လည်း အခုစားပြီးချိန်တွင် ဇာတ်ကွက်တာဝန်ကိုအရင်အပြီးသတ်ရမည်။
သောမတ်အပေါ်နှိပ်ပြီးနောက် စကားပြောပေါ်လာ၏:
(မင်းပြန်ရောက်လာတာ ကောင်းလိုက်တာ... မင်းနတ်ဘုရားမတောင်ပေါ်ခဏခဏသွားတယ်လို့ကြားတယ်... ငါ့မှာတောင်းဆိုစရာရှိတယ်... မြို့ထဲမှာ ကြီးကြီးမားမားဖြစ်နေပြီ... ကားတွေအများကြီးမြစ်ထဲကျသွားပြီး ဆီယိုစိမ့်တယ်)
(အခုမြစ်ထဲဆီယိုစိမ့်ပြီး ရေအရည်အသွေးမကောင်းတော့ဘူး... ဒါတို့သတ္တုမြို့တော်အပေါ်သက်ရောက်မှုကြီးလို့ ဖြေရှင်းဖို့နည်းလမ်းရှာရမယ်)
(နတ်ဘုရားမတောင်မှာ မြေအောက်မြစ်စောင့်မှင်စာတွေရှိတယ်လို့ လူပုလေးတစ်ယောက်ဆီကကြားဖူးတယ်... သူတို့မြေအောက်ရေတွင်းတွေမှာလည်း ဆီယိုစိမ့်ဖူးတယ်တဲ့)
(ဒါပေမဲ့ မိုးမခဘဲစားမှော်ပင်နဲ့ပြဿနာဖြေရှင်းခဲ့တယ်... မင်းကနတ်ဘုရားမတောင်ပေါ်မကြာခဏသွားတယ်ဆိုတော့ ရင်းနှီးမှာပေါ့... ငါ့ကိုမှင်စာကူရှာပေးဖို့တောင်းဆိုချင်တယ်!)
(မင်းကူညီမယ်ဆိုရင် မှင်စာရှိနိုင်တဲ့နေရာတွေကို မြေပုံလမ်းကြောင်းပေးမယ်!)
ချင်လင်ကတာဝန်ကိုကြည့်ပြီး ဂိမ်းထဲဝင်ရင်းတွေ့ခဲ့သောမှင်စာကိုသတိရသွားသည်။
နောက်ပိုင်း ဂိမ်းထဲအကြိမ်ကြိမ်ဝင်ခဲ့သော်လည်း ဘာမှင်စာမှမတွေ့တော့။ သောမတ်က ဒီလိုဇာတ်ကွက်တာဝန်ပေးလာမည်ဟုမထင်မိပေ။
နောက်ပြီး တာဝန်က သူရင်းနှီးနေသောအရာနှင့်ဆက်စပ်နေသည်။
မိုးမခဘဲစားမှော်ပင်။
သူအရင် ဂိမ်းထဲမှထုတ်ဖူးသောပစ္စည်းတစ်ခုပင်။
ရေပေါ်တံတားရှုခင်းနေရာတွင် မျောနေသောအပင်များက မိုးမခဘဲစားမှော်ဖြစ်သည်။ မိုးမခဘဲစားမှော်ကြောင့် ရေပေါ်တံတားကပိုနာမည်ကြီးခြင်းဖြစ်သည်။
မိုးမခဘဲစားမှော်၏ဓာတ်ပုံစားခြင်း +၁၊ ရေနှင့်ပတ်ဝန်းကျင်သန့်စင်ပေးခြင်း +၁၊ အလှ +၁၊ ဆွဲဆောင်မှု +၁ တို့ကြောင့်ပင်။
ဓာတ်ပုံစားခြင်း +၁ ကြောင့် ရေပေါ်တံတားရှုခင်းကိုပိုကောင်းစေသည်။
ရေသန့်စင်ခြင်း +၁ ကလည်း ရေပေါ်တံတားရှုခင်းနေရာမှရေအရည်အသွေးကို အလွန်ကောင်းစေသည်။ တခြားအရည်အသွေးသုံးမျိုးက ခရီးသည်များ၏အာရုံခံစားမှုအပေါ်တိုက်ရိုက်သက်ရောက်မှုရှိသည်။
သောမတ်ပေးသောတာဝန်က မိုးမခဘဲစားမှော်၏ ရေနှင့်ပတ်ဝန်းကျင်သန့်စင်စေခြင်း +၁ အာနိသင်ကိုအမှတ်ရစေသည်။
သို့သော် ဆီကြောင့်ဖြစ်သောရေညစ်ညမ်းမှုက ရေသန့်စင်ခြင်း +၁ အရည်အသွေးနှင့်ဖြေရှင်းနိုင်မည့်အရာမဟုတ်။
ဒီလိုညစ်ညမ်းမှုမျိုးက ဆိုးရွားသည်။ သာမန်ရေညစ်ညမ်းခြင်းမဟုတ်ဘဲ မိုးမခဘဲစားမှော်တောင် ရှင်နိုင်မည်မဟုတ်ပေ။
မောရိသျှမှဆီယိုစိမ့်မှုဘယ်လောက်ဆိုးလဲသာ စဉ်းစားကြည့်ပါ။
ဒီတော့ သောမတ်ပေးတဲ့တာဝန်ထဲက မိုးမခဘဲစားမှော်မှာ သူထုတ်လာတဲ့အမျိုးအစားမဖြစ်နိုင်။
အမျိုးအစားချင်းသာတူရင် မြို့ထဲကမျိုးစေ့ဆိုင်မှာရောင်းသည်။ သောမတ် သူ့ကိုလာရှာစရာမလို။
ချင်လင်ကချက်ချင်း တာဝန်ကိုလက်ခံပြီး မှတ်ချက်ကြည့်လိုက်သည်။
သူလက်မခံရင် ရူးနေလို့ပေါ့။
သောမတ်တာဝန်က မြေပုံပေးပြီးဘာမှမရနိုင်သော်လည်း အထူးမိုးမခဘဲစားမှော်ပင်ရရင် ဖြေသာသေးသည်။
အဲဒါနဲ့ ဆီယိုစိမ့်တာဖြေရှင်းနိုင်ရင် လက်တွေ့ဘဝမှာဘယ်လောက်အသုံးဝင်လိုက်မလဲ?
ကမ္ဘာ့လူနေထိုင်ရာအများစုတွင် ရေပြဿနာရှိပြီး ငါးမျိုးတုံးပျောက်ကွယ်မှုဖြစ်စေသောအကြောင်းရင်းတစ်ရပ်လည်းဖြစ်သည်။
အမေရိကတောင် ရေ ၆၅% တွင် စွန့်ပစ်အစားအစာ၊ သတ္တု၊ မြေဩဇာ၊ ပိုးသတ်ဆေးများရောနေသည်။
ဥရောပမြစ် ၅၅ စင်းတွင် မြစ် ၅ စင်းမှရေကိုသာအသုံးပြုနိုင်သည်။
အသုံးမဝင်သလောက်ဖြစ်ပြီး အလုပ်မဖြစ်ချေ။
ဒီအပင်ကို အပြင်သယ်သွားရင် အနောက်နိုင်ငံတွေဘယ်လောက်အားကျလိုက်မလဲ?
မဖြစ်မနေလိုချင်မှာပဲမလား?
ဒါပေမဲ့ သူတို့လိုချင်လည်း အသုံးမဝင်။ သူတို့ကို အသုံးပြုခွင့်မပေးနိုင်။
တစ်ခုခုနှင့်အလဲအလှယ်လုပ်ရမည်။
တွေးကြည့်ရုံနှင့်တင် သူဂုဏ်ယူမိသည်။
ချင်လင်က ဂိမ်းဇာတ်ကောင်အား တာဝန်လက်ခံစေပြီးနောက် သူ့အတွေးနှင့်သူပြုံးလိုက်သည်။
လီခိုင်ကကြည့်နေရင်း မနေနိုင်ဘဲ_
"ညီလေးချင်.. ငေးတာတော့ ထားပါတော့... ဘာတွေရယ်နေတာလဲ? မဟုတ်မဟပ်တွေတွေးနေတာလား?''
ဂိမ်းဇာတ်ကောင်ကျောပိုးအိတ်ထဲတွင် အနီရောင်အစက်များပါသောမြေပုံတစ်ခါပေါ်လာသည်။ တစ်နေရာချင်း သူရှာကြည့်ရမည်။
ကံကောင်းရင် တစ်နေရာရာမှာရှာတွေ့ပြီး ကံမကောင်းရင်တော့ အရပ်လေးမျက်နှာလိုက်ရှာရနိုင်သည်။
(မြေပုံသုံးပြီး နတ်ဘုရားမတောင်တက်လမ်းကြောအသစ်ဖွင့်ချင်ပါသလား?)
ချင်လင်ကမှတ်ချက်ဖတ်ပြီး 'ဖွင့်မည်' ကိုတန်းရွေးလိုက်သည်။
ခဏအကြာ နောက်ထပ်အသိပေးစာရသည်။
(နတ်ဘုရားမတောင်ပေါ်လမ်းသစ်တချို့ပေါ်နေပါပြီ... သွားကြည့်ရအောင်!)
ချင်လင်က ဂိမ်းဇာတ်ကောင်အား မြေပုံဖွင့်ကြည့်စေသည်။ နတ်ဘုရားမတောင်ပေါ်တွင် အမှန်ပင်လမ်းအသစ်များတွေ့ရသည်။
သို့သော် ယာယီပေါ်ခြင်းသာဖြစ်ပြီး တာဝန်ပြီးလျှင်ပျောက်သွားမည်ဟု မှတ်ချက်ပါသည်။
ထိုအတွေးနှင့် ချင်လင်ကအချိန်ဆွဲမနေဘဲ ဂိမ်းဇာတ်ကောင်အား နတ်ဘုရားမတောင်ပေါ်ချက်ချင်းတက်စေသည်။