အခန်း (၆၈၇-၆၈၈)

အခန်း ၆၈၇ ရှုံးနိမ့်ခြင်းကင်းမဲ့သော ဧကရာဇ်

ဆယ့်ခြောက်နှစ် ကြာပြီးနောက် ချမ့်ခွန်းဂိုဏ်းတွင် အဖြစ်အပျက်ကြီး တစ်ခု ဖြစ်ပွားခဲ့သည်။ အသက် ဆယ့်ခြောက်နှစ် အရွယ်ရှိ အမျိုးသား တပည့်တစ်ဦးကို ဂိုဏ်းချုပ်က သူ၏ နောက်ဆက်ခံမည့် ဂိုဏ်းချုပ်အဖြစ် ပြုစုပျိုးထောင်ရန် ရည်ရွယ်ချက်ဖြင့် တပည့်အဖြစ် လက်ခံလိုက်ခြင်း ဖြစ်၏။

ဤကိစ္စကို အကြီးအကဲချုပ် လေးဦးကလည်း သဘောတူ ခွင့်ပြုထားပြီး ဂိုဏ်းအတွင်း၌သာမက ကမ္ဘာအနှံ့သို့ပါ ကောလာဟလ အမျိုးမျိုး ပျံ့နှံ့သွားလေသည်။

ထိုကောင်လေး၏ အမည်မှာ ယွမ်လော့ ဖြစ်၏။ မူလက သူ၌ ဤအမည် မရှိခဲ့သော်လည်း ပထမဆုံးအကြိမ် ချီစုပ်ယူခြင်း ကျင့်စဉ်ကို စတင် ကျင့်ကြံပြီးနောက် ဤအမည်သို့ ပြောင်းလဲခဲ့ခြင်း ဖြစ်သည်။

သူ၏ ပထမဆုံး ချီစုပ်ယူခြင်းတွင်ပင် ခြေခံတည်ဆောက်ခြင်း အဆင့်သို့ အောင်မြင်စွာ တက်လှမ်းနိုင်ခဲ့သဖြင့် သူ့ကို လမ်းညွှန် သင်ကြားပေးနေသောဆရာကို မှင်သက်သွားစေခဲ့ပြီး ထိုသတင်းက ချမ့်ခွန်းဂိုဏ်း၏ အထက်လူကြီးများထံသို့ လျင်မြန်စွာ ရောက်ရှိသွားခဲ့၏။

ထို့နောက် ယွမ်လော့က ရွှေအမြုတေအဆင့်သို့ ရောက်ရှိရန် တစ်နှစ်သာ အချိန်ယူခဲ့ရပြီး အသက် ဆယ့်ခြောက်နှစ် အရွယ်တွင် ခြေတည်စိတ်ဝိညာဥ်အဆင့်သို့ ရောက်ရှိနေပြီ ဖြစ်ကာ သူ၏ ကျင့်ကြံခြင်း အရှိန်အဟုန်မှာ အလွန် အံ့မခန်း မြန်ဆန်လှပေသည်။

“ရီချင်းရှန်က ရက်အတော်ကြာအောင် တိုင်ပင် ဆွေးနွေးပြီးတော့ တာအိုခုံရုံးက ပါရမီရှင်တွေကို လေ့ကျင့်ပေးတဲ့ ပုံစံအတိုင်း ယွမ်လော့ကို ပြုစုပျိုးထောင်ဖို့ ဆုံးဖြတ်လိုက်တယ်... သူတို့က ယွမ်လော့ကို ကျောက်ရူရှန် ဒါမှမဟုတ် ထျန်းဟုန် ဧကရာဇ်တို့နဲ့ ယှဉ်နိုင်တဲ့အထိ ပြုစုပျိုးထောင်ပေးဖို့ စိတ်ပိုင်းဖြတ်ထားကြတယ်... ဒါပေမဲ့ ငါ့အမြင်မှာတော့ သူတို့က ဝူရှီရဲ့ ကာကွယ်မှုအပေါ် အားကိုးနေကြတာပဲ... ဝူရှီသာ မရှိရင် ဒီလို တပည့်မျိုးကို ပြုစုပျိုးထောင်တာက စောစီးသေဆုံးရတဲ့ လမ်းကိုပဲ ဦးတည်သွားလိမ့်မယ်...”

ဖူယိုသရဲမယ်တော် ဖန်တီးထားသော ကန်စပ်တွင် ငါးဖမ်းနေသည့် ကုအန်၏ ဘေး၌ ရပ်ရင်း အန်ရှင်းက ပြောလိုက်သည်။ ထိုကန်ထဲတွင် ကုအန်၏ ဖျော်ဖြေရေးအတွက် လျင်မြန် ဖျတ်လတ်သော ငါးများစွာ ထည့်သွင်းထား၏။

“ကိစ္စမရှိပါဘူး... ငါတို့ ဝန်ခံသည်ဖြစ်စေ၊ လက်မခံသည်ဖြစ်စေ အပြင်လောကကတော့ ဝူရှီကို ချမ့်ခွန်းဂိုဏ်းရဲ့ ထောက်တိုင်ကြီးတစ်ခု အဖြစ် မြင်နေကြတာပဲ... ပြီးတော့ တကယ်လည်း ငါတို့ အများကြီး လုပ်ပေးခဲ့တာပဲလေ...” ကုအန်က ကန်ရေပြင်ကို စိုက်ကြည့်ရင်း ပြောလိုက်သည်။

သူ၏ ကျင့်ကြံခြင်းအဆင့် မြင့်မားလာပြီး ဖြတ်သန်းခဲ့ရသော နှစ်ကာလများ များပြားလာသည်နှင့်အမျှ ကုအန်၏ စိတ်နေစိတ်ထားကလည်း ပြောင်းလဲလာခဲ့၏။

သူက သူ၏ ကိုယ်ပိုင် ခံစားချက်များကို ပို၍ အာရုံစိုက်လာခဲ့သည်။

အန်ရှင်းက စပ်စုချင်စိတ်ဖြင့် မေးလိုက်၏။ “ဆရာ... အဲဒီလောက် အံ့မခန်း ပါရမီပါတဲ့ ယွမ်လော့ရဲ့ ဇာစ်မြစ်က ဘာလဲဟင်... သူက အစွမ်းထက် ပုဂ္ဂိုလ်ကြီး တစ်ယောက် ဝင်စားတာ ဖြစ်ရမယ် မဟုတ်လား...”

“အင်း... သူရဲ့ အတိတ်ဘဝတုန်းက သူ့ကို ဖရိုဖရဲ နာကြည်းချက် လော့ လို့ ခေါ်တယ်... မဟာကမ္ဘာပေါင်းများစွာမှာ ဖျက်ဆီးမှုတွေ လုပ်ခဲ့တာလေ... လူသားကမ္ဘာမှာ ဖြစ်ခဲ့တဲ့ အရင်ကပ်ဘေးကလည်း သူ့ရဲ့ စွမ်းအားတွေကြောင့် ဖြစ်လာတာပဲ... သူက အမတနတ်ဘုရားတွေရဲ့ ဖမ်းဆီးတာကို ခံလိုက်ရပြီး ဝင်စားခြင်း သံသရာထဲကို ပစ်ချခံလိုက်ရတာ ဖြစ်နိုင်တယ်... အဲဒါကြောင့် ဒီလို အခြေအနေမျိုး ရောက်သွားတာပေါ့...” ကုအန်က ဘာကိုမှ ဖုံးကွယ်မထားဘဲ ယွမ်လော့၏ နောက်ခံအကြောင်းကို အတိုချုံး ရှင်းပြလိုက်သည်။

အန်ရှင်းက မျက်မှောင်ကြုတ်လျက် မေးလိုက်၏။ “အမတနတ်ဘုရားတွေရဲ့ လုပ်ရပ်လား... ဒီလောက် ဆိုးယုတ်တဲ့ သတ္တဝါက ချမ့်ခွန်းဂိုဏ်းထဲမှာ ဝင်စားလာတယ်ဆိုတော့ အဲဒီနောက်ကွယ်မှာ အကြံအစည် တစ်ခုခု ရှိနေမှာ မဟုတ်ဘူးလား...”

ကုအန်က သူမကို တစ်ချက် ကြည့်၍ ပြုံးလိုက်သည်။ “တကယ်ပဲ ဖုံးကွယ်ထားတဲ့ အကြံအစည် တစ်ခုခု ရှိနေနိုင်တာပေါ့... ဒါပေမဲ့ အဲဒီလို အကြံအစည်တွေဆိုတာ ဘယ်တုန်းကမှ မရပ်တန့်ခဲ့ဘူး... ကိုယ်တိုင် သေချာ မမြင်နိုင်သေးဘူးဆိုရင် ဒါက ကိုယ်တိုင်က လုံလောက်အောင် အစွမ်းမထက်သေးဘူးဆိုတဲ့ အဓိပ္ပာယ်ပဲ...”

သူ ပြုံးနိုင်သေးသည်ကို မြင်သောအခါ အရာအားလုံးက သူ၏ ထိန်းချုပ်မှုအောက်တွင် ရှိနေကြောင်း အန်ရှင်း သိလိုက်၏။ ထို့ကြောင့် သူမက မေးလိုက်သည်။

“ဆရာ... ကျွန်မကို တစ်ခုခု လုပ်ခိုင်းစရာ ရှိသေးလား...”

“ဟင်အင်...သဘာဝအတိုင်းပဲ ဖြစ်ပါစေ...”

ကုအန် အများကြီး ဆက်မပြောတော့ချေ။ အန်ရှင်း အနေဖြင့် သူ၏ ဆိုလိုရင်းကို နားလည်လိမ့်မည်ဟု သူ ယုံကြည်ထား၏။

နှစ်ပေါင်းများစွာ အတူနေထိုင်ခဲ့ကြပြီးနောက် သူတို့ နှစ်ယောက်ကြားတွင် မြင့်မားသော နားလည်မှု တစ်ခု ဖြစ်တည်လာခဲ့ပြီး အချို့သော ကိစ္စများကို ထပ်ခါတလဲလဲ ရှင်းပြနေရန် မလိုအပ်တော့ပေ။

အန်ရှင်းသည် ယွမ်လော့အကြောင်းကို ဆက်မပြောတော့ဘဲ ထျန်းဟုန် ဧကရာဇ်နှင့် ကျောက်ရူရှန်တို့ဘက်သို့ အကြောင်းအရာ ပြောင်းလိုက်သည်။

“တာအိုခုံရုံးက ကျောက်ရူရှန်ကို တာအိုဧကရာဇ် တစ်ပါး ဖြစ်လာအောင် ပြုစုပျိုးထောင်ဖို့ စီစဉ်နေတယ်လို့ ကြားတယ်... တာအိုဧကရာဇ် တစ်ပါး ဖြစ်လာဖို့အတွက် မဟာတာအိုရဲ့ လမ်းစဉ်မှာ ကိုယ်တိုင် သက်သေပြရမယ်လို့ ဆရာ ပြောခဲ့တယ် မဟုတ်လား... ကျောက်ရူရှန်က မဟာတာအိုရဲ့ လမ်းစဉ်ဆီကို ဆက်သွားတော့မှာလား...”

အန်ရှင်းမှာ တာအိုဧကရာဇ်များကို အလွန် စိတ်ဝင်စားပြီး အဆင့်တူ တာအိုဧကရာဇ် တစ်ပါးက သူမ၏ အမတဧကရာဇ် မျက်လုံးကို ယှဉ်နိုင်စွမ်း ရှိမရှိ သိချင်နေ၏။

“သူက သွားရမယ့် ကံကြမ္မာ ပါလာပြီးသားပါပဲ....သူကတာအိုဧကရာဇ် တစ်ပါး ဖြစ်လာဖို့လည်း ဖန်တီးခံထားရတယ်လေ...” ကုအန်က ပြန်ဖြေလိုက်သည်။

တာအိုဧကရာဇ်များအကြောင်း ပြောလာသောအခါ သူ၏ အာရုံက မဟာတာအို၏ လမ်းစဉ်ထံသို့ အလိုအလျောက် ရောက်သွားပြီး ကျိရှောင်ယုနှင့် ရှောင်လန်တို့ကို စောင့်ကြည့်လိုက်မိ၏။

ကျိရှောင်ယုသည် နှစ်ပေါင်းများစွာ တိုက်ပွဲဝင်နေခဲ့ပြီး သူမ၏ ကံကြမ္မာများ ဖြစ်တည်လာသည်နှင့်အမျှ တာအိုဧကရာဇ် တစ်ပါး ဖြစ်လာရန် နီးကပ်လာခဲ့ပြီ ဖြစ်သည်။ ရှောင်လန်သည်လည်း ဧကရာဇ် လမ်းစဉ်သို့ စတင် လျှောက်လှမ်းနေပြီ ဖြစ်၏။

တာအိုဧကရာဇ် ပြိုင်ပွဲတွင် ပါဝင်ပြီးနောက် သူတို့၏ ကျင့်ကြံခြင်းများက လျင်မြန်စွာ တိုးတက်လာခဲ့ပြီး တိုက်ပွဲများမှတစ်ဆင့် ပိုမို အစွမ်းထက်လာခဲ့ကြသည်။

ရှောင်လန်သည် နတ်တွေးစစ်မှန်အမတအဆင့်သို့ ရောက်ရှိနေပြီ ဖြစ်ပြီး အဝေးရှိ မြူခိုး အမတနန်းတော်မှ ထျန်ဟောင်ကိုပင် မှီလာခဲ့ပြီ ဖြစ်၏။

ကျိရှောင်ယုသည် ကောင်းကင်တက်လှမ်းခြင်းနှောင်ဖွဲ့ကင်းအမတ အဆင့်ကိုပင် ထိုးဖောက် ဝင်ရောက်နေပြီး စွမ်းအားအရ ယခုအခါ သူမက ယွမ်စုန်ကျီထက်ပင် ပို၍ အစွမ်းထက်နေပြီ ဖြစ်သည်။

နှစ်ပေါင်းများစွာ အတူယှဉ်တွဲ တိုက်ပွဲဝင်ခဲ့ပြီးနောက် ယွမ်စုန်ကျီသည် ကျိရှောင်ယုအား တာအိုခုံရုံးသို့ ဝင်ရောက်ရန် အောင်မြင်စွာ စည်းရုံးနိုင်ခဲ့သည်။ အကယ်၍ သူမနှင့် ရှောင်လန်တို့သာ အောင်မြင်သွားပါက တာအိုခုံရုံးတွင် တာအိုဧကရာဇ် နှစ်ပါး ရှိလာမည် ဖြစ်ပြီး ကောင်းကင်ဝိညာဉ် မဟာကမ္ဘာ အပြင်ဘက်ရှိ မဟာကမ္ဘာသုံးထောင်ကို ရင်ဆိုင်ရန် ယုံကြည်မှု ရရှိလာပေလိမ့်မည်။

ယွမ်စုန်ကျီ၏ ရင်ထဲမှ အသံကို ကုအန် ကြားနိုင်ပြီး သူ၏ စိတ်အခြေအနေမှာ မျက်နှာပေါ်တွင် ပေါ်လွင်နေသည်ထက် များစွာ ပိုမို စိတ်လှုပ်ရှားနေကြောင်း ခံစားမိ၏။

ကျိရှောင်ယုသည် ကျင့်ကြံနေပြီး တိုက်ပွဲအတွက် ပြင်ဆင်နေသည်။ သူမ၏ နောက်ထပ် ပြိုင်ဘက်မှာ မဟာတာအို၏ လမ်းစဉ်ပေါ်တွင် အဆင့်တူ ပြိုင်ဘက်များကို အနိုင်ယူ၍ အကြိမ်တစ်ထောင် အနိုင်ရရှိထားသော ယှဉ်ပြိုင်ဘက်ကင်း ပါရမီရှင် တစ်ဦး ဖြစ်သည့် မူလဧကရာဇ် နယ်မြေမှ ရှုံးနိမ့်ခြင်းကင်းမဲ့သော ဧကရာဇ် ဖြစ်၏။

ရှုံးနိမ့်ခြင်းကင်းမဲ့သော ဧကရာဇ်သည် မူလဧကရာဇ် နယ်မြေရှိ ထင်ရှားကျော်ကြားသော ပါရမီရှင် ထိပ်တန်း ငါးဦးစာရင်းဝင် ဖြစ်ပြီး သူ၏ အရှိန်အဟုန်မှာ အလွန် အားကောင်းလှပေသည်။

ဤတိုက်ပွဲ၏ ရလဒ်ကို ကုအန် ကြိုတင် တွက်ချက်ထားပြီး ဖြစ်ရာ သူ အံ့အားသင့်သွားခြင်း မရှိချေ။

အမတဧကရာဇ် မျက်လုံး၏ မူလပိုင်ရှင်ဟောင်း ဖြစ်သော ကောင်းကင်ခိုးယူသူ ဧကရာဇ် သည်လည်း မူလဧကရာဇ် နယ်မြေမှ လာခြင်း ဖြစ်သည်။ ထိုသူသည် ကောင်းကင်ခိုးယူသော အမတဂိုဏ်းကို တည်ထောင်ခဲ့ပြီး ကောင်းကင်နန်းတော်၏ လိုက်လံ ဖမ်းဆီးမှုကိုပင် ခံရခဲ့ရာ သူ၏ တာအိုကျင့်ကြံမှုမှာ မည်မျှ ကြောက်မက်ဖွယ် ကောင်းကြောင်း သက်သေပြနေ၏။

မူလဧကရာဇ် နယ်မြေ၏ နက်ရှိုင်းသော အုတ်မြစ်မှာ မဟာကမ္ဘာများ ယှဉ်ပြိုင်နိုင်စွမ်း မရှိပေ။

“ဆရာ... ကျွန်မတို့ ဝူရှီမှာရော တာအိုဧကရာဇ် တစ်ပါး ပြုစုပျိုးထောင်ဖို့ လိုမယ်လို့ ထင်လား...” အန်ရှင်းက မျှော်လင့်တကြီးဖြင့် မေးလိုက်သည်။

ဝူရှီသည် သာမန်အားဖြင့် ဂိုဏ်းတစ်ခု မဟုတ်သော်လည်း အကြီးအကဲ တပည့်တစ်ဦး အနေဖြင့် ဝူရှီကို ပို၍ အစွမ်းထက်လာစေရန် အန်ရှင်းက မျှော်လင့်နေ၏။

“အဲဒါက ကိုယ်ပိုင် ရည်မှန်းချက်တွေအပေါ်မှာပဲ မူတည်တယ်... ငါက အဲဒါကို မတောင်းဆိုပါဘူး... တာအိုဧကရာဇ် တစ်ပါးက အစွမ်းထက်တယ် ဆိုပေမဲ့ အဲဒီလမ်းက အရမ်း ခက်ခဲတယ်လေ...”

ကုအန်က ခပ်ဖွဖွ ပြောလိုက်၏။ သူ၏ အတွင်း၌ ယုံရှန်းဧကရာဇ်၏ မှတ်ဉာဏ်များ ရှိနေသဖြင့် တာအိုဧကရာဇ် တစ်ပါး ဖြစ်လာရန် လမ်းကြောင်းမှာ မည်မျှ ခက်ခဲကြမ်းတမ်းကြောင်း သူ သိထားသည်။

နယ်မြေအတွင်းရှိ တပည့်များကို ကြည့်ရလျှင် အမှန်တိုင်း ပြောရပါက တာအိုဧကရာဇ် တစ်ပါး ဖြစ်လာရန် အလားအလာ ရှိသူ မည်သူ့ကိုမျှ သူ မတွေ့ရသေးချေ။ အပြင်ထွက်ချိန်တွင် သူ၏ လျှို့ဝှက် ကာကွယ်မှုအပေါ် အားကိုးနေရသည့် ရှောင်လန်ပင်လျှင် မဖြစ်နိုင်ပေ။

အကယ်၍ ရှောင်လန်သာ တစ်ယောက်တည်း ထွက်သွားမည် ဆိုလျှင် သူမ သေဆုံးသွားသည်မှာ ကြာလှပြီ ဖြစ်သည်။

ထို့ပြင် သူသည် ရှောင်လန်ကို ဆက်လက် ကူညီနေမည် ဆိုပါက သူမ ဘယ်နှစ်ကြိမ်ပဲ အနိုင်ရပါစေ ဘယ်သောအခါမျှ တာအိုဧကရာဇ် တစ်ပါး ဖြစ်လာနိုင်မည် မဟုတ်ကြောင်းကို သူ ခံစားသိရှိနိုင်၏။

မဟာတာအို၏ လမ်းစဉ်ပေါ်ရှိ မဟာတာအို၏ ဆန္ဒမှာ တွေးတော၍ပင် မရနိုင်လောက်အောင် နက်နဲလှပေသည်။

နားထောင်ပြီးနောက် အန်ရှင်းမှာ တွေးတော ဆင်ခြင်မိသွားပြီး ကုအန် စကား၏ ဆိုလိုရင်းကို ဝိုးတဝါး နားလည်သွား၏။

ဤအချိန်တွင် ကုအန်၏ ငါးဖမ်းတံက လှုပ်ရှားသွားပြီး သူက အားစိုက်၍ ပြန်ရစ်ယူလိုက်ရာ သူ၏ လက်မောင်းများပင် တုန်ယင်နေ၏။

ကုအန်သည် သာမန် လူတစ်ယောက်လို အသည်းအသန် ရုန်းကန်နေရသည်ကို မြင်သောအခါ အန်ရှင်းက ပါးစပ်ကို အုပ်၍ ရယ်မောလိုက်ပြီး သူမ၏ ဆရာမှာ ဟန်ဆောင်ရသည်ကို အမှန်တကယ် နှစ်သက်ကြောင်း တွေးလိုက်မိသည်။

...

တောက်ပသော နန်းတော်တစ်ခု အတွင်း၌ ကျိရှောင်ယုသည် အပြာရောင် သလင်းကျောက် တစ်ခုရှေ့တွင် တရားထိုင်နေပြီး သလင်းကျောက်ပေါ်တွင် သူမ၏ ပုံရိပ်က ထင်ဟပ်နေ၏။

ယွမ်စုန်ကျီက အနားသို့ ချဉ်းကပ်လာပြီး ကျိရှောင်ယု၏ ရှေ့တွင် ရပ်ကာ စကားပြောရန် တုံ့ဆိုင်းနေသည်။

ကျိရှောင်ယုက မျက်လုံးများကို မှိတ်ထားရင်း မေးလိုက်၏။ “ပြောစရာရှိတာ ပြောပါ... ခုံရုံးအရှင်...”

ယွမ်စုန်ကျီက သက်ပြင်းရှည်ကြီး တစ်ချက်ချကာ ပြောလိုက်သည်။ “လက်လျှော့မယ်ဆိုလဲ လက်လျှော့လိုက်ပါ.. မင်းရဲ့ နောက်ထပ်ပြိုင်ဘက်က အနိုင်ယူဖို့ မဖြစ်နိုင်ဘူး...”

ထိုစကားကို ကြားသောအခါ ကျိရှောင်ယုက မျက်လုံးများကို ဖွင့်၍ သူ့ကို စိုက်ကြည့်လိုက်၏။

ယွမ်စုန်ကျီက ဆက်ပြောသည်။ “ငါ စုံစမ်းပြီးသွားပြီ... ရှုံးနိမ့်ခြင်းကင်းမဲ့သော ဧကရာဇ်က အကြိမ်တစ်ထောင် အနိုင်ရထားရုံသာမကဘဲ မူဧကရာဇ် နယ်မြေက အဆင့်တူ ပြိုင်ဘက်တွေကိုပါ အကုန်လုံး ဖိနှိပ်ခဲ့တာ... တစ်ခါက တာအိုဧကရာဇ် တစ်ပါးက အဆင့်တူ ဖိနှိပ်ပြီး သူ့ကို တိုက်ခိုက်ခဲ့တာတောင် ရှုံးနိမ့်သွားခဲ့တယ်တဲ့”

ဧကရာဇ် လမ်းစဉ်ပေါ်သို့ မလျှောက်လှမ်းမီ တာအိုဧကရာဇ် တစ်ပါးကို အနိုင်ယူနိုင်ခဲ့ခြင်းမှာ ထိုတာအိုဧကရာဇ်က သူ၏ အဆင့်ကို ဖိနှိပ်ထားသည် ဆိုလျှင်တောင် အလွန် ယုံကြည်နိုင်စရာ မရှိပေ။

ထိုအကြောင်းကို တွေးမိရုံဖြင့် ယွမ်စုန်ကျီ၏ ရင်ထဲတွင် ကြောက်ရွံ့မှုများ ပြည့်နှက်သွား၏။ ကျိရှောင်ယု ယုံကြည်မည် မဟုတ်ဟု သူ စိုးရိမ်သဖြင့် ထပ်လောင်း ပြောလိုက်သည်။

“မဟာတာအိုရဲ့ လမ်းစဉ်ပေါ်မှာ ရှုံးနိမ့်ခြင်းကင်းမဲ့သော ဧကရာဇ်က တာအိုဧကရာဇ် တစ်ပါး ဖြစ်လာဖို့ ဖန်တီးခံထားရသူလို့ လူတိုင်းက ယုံကြည်ကြတယ်... တာအိုရဲ့ ဆန္ဒအရ မင်းနဲ့ သူ ယှဉ်ပြိုင်ရတာက ကံဆိုးမှု တစ်ခုပဲ... တိုက်ပွဲကို ရှောင်လွှဲလိုက်ရင် ကြိုးစားအားထုတ်ခဲ့သမျှတွေ အလဟဿ ဖြစ်သွားနိုင်ပေမဲ့ အနည်းဆုံးတော့ မင်း အသက်ရှင်ခွင့် ရလိမ့်မယ်...”

တာအိုဧကရာဇ် အတွက် ယှဉ်ပြိုင်ရခြင်းမှာ ကလေးကစားစရာ မဟုတ်ပေ။ ရှုံးနိမ့်သူ ဆယ်ယောက်တွင် ကိုးယောက်မှာ သေဆုံးကြရ၏။

နှစ်များတစ်လျှောက်လုံး ပါရမီရှင်များစွာက ကျိရှောင်ယု၏ လက်ချက်ဖြင့် ကျဆုံးခဲ့ရသည်။

ကျိရှောင်ယုက မတုန်မလှုပ်ဘဲ မေးလိုက်၏။ “ခုံရုံးအရှင်... တာအိုဧကရာဇ် တစ်ပါး ဖြစ်လာဖို့ လမ်းကြောင်းက ကြောက်ရွံ့မူကင်းမဲ့ပြီး အားနည်းတဲ့သူတွေနဲ့ ပြည့်နေလို့ မရဘူးဆိုတာကို ရှင် တစ်ခါမှ မတွေးဖူးဘူးလား... အကယ်လို ဒီတစ်ကြိမ် ကျွန်မ လက်လျှော့လိုက်ရင် နောက်တစ်ကြိမ် ဒီနေရာကို ရောက်လာတဲ့အခါ ရှုံးနိမ့်ခြင်းကင်းမဲ့သော ဧကရာဇ်လိုပဲ အစွမ်းထက်တဲ့ အခြား ပါရမီရှင် တစ်ယောက်နဲ့ ကျွန်မ ရင်ဆိုင်ရဦးမှာပဲ... အမြဲတမ်း လက်လျှော့နေမယ် ဆိုရင် မဟာတာအိုရဲ့ လမ်းစဉ်ကို လျှောက်လှမ်းနေရတဲ့ အဓိပ္ပာယ်က ဘာလဲ...”

“တာအိုရဲ့ အသိအမှတ်ပြုမှုကို ရဖို့အတွက် တာအိုက ရွေးချယ်ပေးတဲ့ ပြိုင်ဘက်တွေကို အနိုင်ယူရမှာပဲ...”

ဤစကားများကြောင့် ယွမ်စုန်ကျီ မျက်မှောင်ကြုတ်သွား၏။ ယင်းက အဓိပ္ပာယ်ရှိသည်ဟု သူ ခံစားလိုက်ရသည်။ သူသည် တာအိုဧကရာဇ် တစ်ပါး ဖြစ်လာရန် အခက်အခဲကို အထင်သေးခဲ့မိခြင်း ဖြစ်နိုင်ပေသည်။

ရှောင်လန်လည်း ရှုံးနိမ့်ခြင်းကင်းမဲ့သော ဧကရာဇ်ကဲ့သို့ ပြိုင်ဘက်မျိုးနှင့် ရင်ဆိုင်ရနိုင်သည်ဟု တွေးမိသောအခါ သူ ရုတ်တရက် လမ်းပျောက်သွားသလို ခံစားလိုက်ရ၏။

သူသည် အလွန် အလောတကြီး လုပ်ဆောင်ခဲ့ခြင်း ဖြစ်ကောင်း ဖြစ်နိုင်ပေသည်။ လက်ရှိအချိန်တွင် တာအိုခုံရုံးအနေဖြင့် တာအိုဧကရာဇ် တစ်ပါးကို ပြုစုပျိုးထောင်ပေးနိုင်စွမ်း မရှိသေးချေ။

ကျိရှောင်ယုသည် ယွမ်စုန်ကျီကို ကြည့်၍ စိတ်ဓာတ် တက်ကြွစွာဖြင့် ပြုံးလိုက်ပြီး ညင်သာစွာ ပြောလိုက်သည်။ “နောက်ပြီး... ခုံရုံးအရှင်... ကျွန်မ သေချာပေါက် ရှုံးမယ်လို့ ရှင်က ဘယ်လိုလုပ် ရဲရဲဝံ့ဝံ့ ပြောရဲရတာလဲ...”

အခန်း ၆၈၈ ဧကရာဇ် မျိုးနွယ်စု၏ စွမ်းအား

ကျိရှောင်ယုနှင့် ရှုံးနိမ့်ခြင်းကင်းမဲ့သောဧကရာဇ်တို့၏ တိုက်ပွဲနေ့သို့ နောက်ဆုံးတွင် ရောက်ရှိလာခဲ့ပြီး တာအိုခုံရုံးမှ အဖွဲ့ဝင်များက ကျိရှောင်ယု၏ နောက်မှလိုက်ကာ ဥက္ကာပျံတစ်ခုဆီသို့ သွားရောက်ခဲ့ကြသည်။

ပတ်ဝန်းကျင်ကို ဝေ့ကြည့်လိုက်သောအခါ ဟင်းလင်းပြင်ကြီးက မှိုင်းညို့နေပြီး မရေမတွက်နိုင်သော ဥက္ကာပျံများက နေရာအနှံ့ ပြန့်ကျဲနေ၏။ တာအိုခုံရုံး အဖွဲ့၏ အထက် ဟင်းလင်းပြင် မျက်နှာကြက်ပေါ်တွင် ရောင်စုံ အလင်းတန်းများ ဖြာထွက်နေသော်လည်း ထိုမှိုင်းညို့နေသော အငွေ့အသက်ကိုမူ လျော့ကျသွားစေခြင်း မရှိချေ။

ကျိရှောင်ယုက ဟင်းလင်းပြင်ထဲသို့ ခြေချလိုက်ပြီး အခြားသူများကမူ မြေပြင်ပေါ်တွင်သာ စောင့်ဆိုင်းနေကြသည်။

ရှောင်လန်သည် ကျိရှောင်ယုကို စိုးရိမ်တကြီး စိုက်ကြည့်နေ၏။ သူမနှင့် နှစ်ပေါင်းများစွာ အတူ နေထိုင်ခဲ့ပြီးနောက် ကျိရှောင်ယုက သူမကို ကောင်းစွာ စောင့်ရှောက်ပေးခဲ့သည့်အပြင် ဂါထာမန္တန်များနှင့် နတ်ဘုရား ကျင့်စဉ်များကိုပင် သင်ကြားပေးခဲ့သည်။ သူမ၏ ရင်ထဲတွင် ကျိရှောင်ယုက ဆရာတစ်ယောက်ကဲ့သို့ ဖြစ်နေ၏။ ရှုံးနိမ့်ခြင်းကင်းမဲ့သော ဧကရာဇ်၏ စွမ်းအားကို သိထားသဖြင့် ကျိရှောင်ယုအတွက် သူမ မည်သို့ မစိုးရိမ်ဘဲ နေနိုင်မည်နည်း။

ဟင်းလင်းပြင်ကြီးက ကျယ်ဝန်းကာ တိတ်ဆိတ်နေပြီး ဖိနှိပ်မှု အငွေ့အသက်များ ပြည့်နှက်နေသည်။

ရှုံးနိမ့်ခြင်းကင်းမဲ့သော ဧကရာဇ် ထွက်ပေါ်မလာသေးသော်လည်း ဤဟင်းလင်းပြင်ကြီးထဲတွင် ကြီးမားလှသော ဖိအားများဖြင့် ပြည့်နှက်နေပြီ ဖြစ်၏။

ကျိရှောင်ယုက တာအိုခုံရုံး ရှိနေသော ဥက္ကာပျံနှင့် ခပ်လှမ်းလှမ်းသို့ ရောက်သွားပြီးနောက် ဟင်းလင်းပြင်ထဲတွင် တိတ်ဆိတ်စွာ ရပ်လျက် စောင့်ဆိုင်းနေသည်။

အချိန်အတော်ကြာ ကုန်လွန်သွား၏။

"ဟား..."

ဟင်းလင်းပြင်ထဲတွင် ဟစ်ကြွေးသံတစ်ခု ပဲ့တင်ထပ်သွားပြီး လူတိုင်း၏ အတွေးများကို အနှောင့်အယှက် ဖြစ်သွားစေသည်။

ထိုဟစ်ကြွေးသံ နောက်တွင် အခြားသော ဟစ်ကြွေးသံများ ဆက်တိုက် ထွက်ပေါ်လာပြီး ပိုမို ကျယ်လောင်ကာ ပိုမို ခမ်းနားလာသည်။ သန်းပေါင်းများစွာသော လူများက တစ်ပြိုင်နက်တည်း ဟစ်ကြွေးနေသကဲ့သို့ ဖြစ်နေပြီး ကြီးမားလှသော ဖိအားများဖြင့် ကောင်းကင်ယံကိုပင် တုန်လှုပ်သွားစေ၏။

တာအိုခုံရုံးမှ လူတိုင်းမှာ တင်းမာသွားကြပြီး သူတို့၏ အကြည့်များက ဟင်းလင်းပြင်၏ အနက်ရှိုင်းဆုံး အပိုင်းထံသို့ ရောက်ရှိသွားကြရာ ထိုနေရာတွင် အနီရောင် အလင်းတန်းတစ်ခု ထွက်ပေါ်လာပြီး လျင်မြန်စွာ ကြီးထွားလာသည်။

ရှောင်လန်သည် မျက်လုံးများကို မှေးကြည့်လိုက်ရာ ထိုအနီရောင် အလင်းတန်းအတွင်းရှိ ဧရာမ မီးတောက်များထဲမှ စစ်နတ်ဘုရား တစ်ပါးကဲ့သို့ ခမ်းနားထည်ဝါသော လူရိပ်တစ်ခု ထွက်ပေါ်လာသည်ကို တွေ့လိုက်ရ၏။

ရှုံးနိမ့်ခြင်းကင်းမဲ့သော ဧကရာဇ်

သူက အနီရင့်ရောင် သံကြိုးချပ်ဝတ်တန်ဆာကို ဝတ်ဆင်ထားပြီး ခါးတွင် အနီရောင် ခါးပန်းကို ပတ်ထားကာ သူ၏ ဘောင်းဘီအကျယ်ကြီးက လေထဲတွင် လွင့်ခါနေသည်။ သူ၏ မျက်နှာက ချောမောသော်လည်း အေးစက်စက် နိုင်လှပြီး နဖူးတွင် အနီရင့်ရောင် သရဖူတစ်ခုကို ဆောင်းထား၏။

သူ၏ အနက်ရောင် ဆံပင်ရှည်များက အရိုင်းဆန်စွာ လွင့်ခါနေပြီး သူ၏ လွှမ်းမိုးနိုင်စွမ်းရှိသော အရှိန်အဝါက ကောင်းကင်နှင့် မြေကြီးကိုပင် တုန်လှုပ်သွားစေမည့်အလား ဖြစ်နေသည်။

သူက အနီရောင် မီးတောက်များကို နင်းလျှောက်လာပြီး နဂါးတစ်ကောင်၊ ကျားတစ်ကောင်ကဲ့သို့ ကျက်သရေရှိစွာ လှုပ်ရှားနေကာ သူ၏ အရှိန်အဝါက ဟင်းလင်းပြင်ကိုပင် ပုံပျက်သွားစေမည့်အလား ရှိနေ၏။

သူ၏ နောက်ကျောဘက်ရှိ အနီရောင် မီးတောက်များထဲမှ ထူးကဲသော အရှိန်အဝါ ကိုယ်စီဖြင့် မရေမတွက်နိုင်သော လူရိပ်များ ထွက်ပေါ်လာကြသည်။ သူတို့က တိတ်ဆိတ်နေကြသော်လည်း နားကွဲမတတ် ဟစ်ကြွေးသံများကမူ ဟင်းလင်းပြင်ထဲတွင် အဆုံးမရှိ ပဲ့တင်ထပ်နေဆဲ ဖြစ်၏။

တာအိုခုံရုံးမှ အဖွဲ့ဝင်များက အဝေးမှ လှမ်းကြည့်နေကြပြီး သူတို့၏ မျက်နှာများက တင်းမာနေကာ ရင်တထိတ်ထိတ် ဖြစ်နေကြသည်။

"မူလဧကရာဇ် နယ်မြေက တကယ်ပဲ ဒီလောက်တောင် ကြောက်ဖို့ ကောင်းတာလား..." တာအိုခုံရုံးမှ အကြီးအကဲ တစ်ဦးက အံ့အားသင့်နေသော မျက်နှာဖြင့် ရေရွတ်လိုက်သည်။

ယွမ်စုန်ကျီက သက်ပြင်းရှည်ကြီး တစ်ချက်ချကာ ပြောလိုက်၏။ "ဒီဟာက မူလဧကရာဇ် နယ်မြေရဲ့ ဧကရာဇ် မျိုးနွယ်စု တစ်ခုတည်းပဲ ရှိသေးတယ်... မူလဧကရာဇ် နယ်မြေရဲ့ စွမ်းအားက ငါတို့ စိတ်ကူးယဉ်လို့ ရနိုင်တဲ့ အရာ မဟုတ်ဘူး... မဟာကမ္ဘာတွေထဲမှာတောင် မဟာကမ္ဘာ အနည်းငယ်လောက်ပဲ သူတို့နဲ့ ယှဉ်နိုင်ဖို့ ကပ်သီးလေး ဖြစ်နိုင်တာ..."

ဤစကားများကြောင့် လူအုပ်ကြားတွင် မူလဧကရာဇ် နယ်မြေနှင့် ပတ်သက်၍ ပိုမို တွေးတော မှန်းဆစရာများ ဖြစ်လာစေခဲ့သည်။

တစ်ချိန်တည်းမှာပင် ရှုံးနိမ့်ခြင်းကင်းမဲ့သော ဧကရာဇ်သည် သူ၏ ညာလက်ကို မြှောက်လိုက်ရာ လက်ဖဝါးထဲတွင် မီးတောက်များ စုစည်းလာပြီး သူ၏ အရပ်ထက် အဆပေါင်းများစွာ ရှည်လျားသော လှံရှည်ကြီး တစ်လက်အဖြစ် ပြောင်းလဲသွား၏။ ထိုလှံရှည်ကြီး၌ ဧရာမ လှံသွားကြီး တစ်ခု ပါရှိပြီး ချီလင် တစ်ကောင်က လှံသွားကို ထွေးထုတ်လိုက်သည့်အလား ရှိနေကာ အစွယ်များ ထုတ်၍ လက်သည်းများ ကုတ်ခြစ်နေသော နတ်ဘုရား သားရဲပုံရိပ်ယောင် တစ်ခုက ဝန်းရံထားသည်။

သူက အဝေးမှ ကျိရှောင်ယုကို ကြည့်၍ ပြောလိုက်သည်။

"မင်းက ပြန်လည်မွေးဖွားခြင်း တာအိုဧကရာဇ် လား... ပြန်လည်မွေးဖွားခြင်း ဆိုတဲ့ နာမည်ကို ခံယူထားမှတော့ ငါ့ကို စိတ်ပျက်အောင် မလုပ်နဲ့..."

သူ၏ စကားဆုံးသည်နှင့် တစ်ပြိုင်နက် ကျိရှောင်ယုထံသို့ လှံဖြင့် ထိုးချလိုက်၏။

မီးတောက် လမ်းကြောင်းတစ်ခုက ရုတ်တရက် ပစ်ထွက်သွားပြီး ဟင်းလင်းပြင် တစ်ခုလုံးကို နှစ်ခြမ်း ခွဲပစ်လိုက်သည့်အလား ရှိနေသည်။ အနီရောင် မီးတောက် နတ်ဘုရား သားရဲပုံရိပ်ယောင်က ကျိရှောင်ယု၏ ရှေ့တွင် အသံတိတ် ဟိန်းဟောက်လိုက်ပြီး ချီစွမ်းအင် လှိုင်းလုံးများက သူမ၏ ဆံပင်ရှည်များကို လွင့်ခါသွားစေရာ အေးစက်ပြီး ပြီးပြည့်စုံသော သူမ၏ မျက်နှာလေးကို ပေါ်လွင်သွားစေ၏။

ကျိရှောင်ယုက တိတ်ဆိတ်နေလျက် သူမ၏ ညာလက်ကို မြှောက်လိုက်ရာ လက်ဖဝါးထဲမှ မီးခိုးရောင် မြူခိုးများ လိမ့်တက်လာပြီး သူမကို ရစ်ပတ်ထားသော နဂါးများအဖြစ် ပြောင်းလဲသွားသည်။

တာအိုဧကရာဇ်များကြားရှိ ပြိုင်ဘက်ကင်း အားပြိုင်မှုကြီး တစ်ခု ပေါက်ကွဲထွက်ပေါ်လာတော့မည် ဖြစ်သည်။

ယွမ်စုန်ကျီက ရှုံးနိမ့်ခြင်းကင်းမဲ့သော ဧကရာဇ်ကို ကြည့်နေပြီး သူ၏ မျက်လုံးများထဲတွင် ကြောက်ရွံ့မှုများ ပြည့်နှက်နေ၏။

ရှုံးနိမ့်ခြင်းကင်းမဲ့သော ဧကရာဇ်သည် မူလဘူတအနှောင်ဖွဲ့ကင်းအမတအဆင့် တွင်သာ ရှိနေသေးကြောင်း သူ ခံစားသိရှိနိုင်သော်လည်း သူ၏ အရှိန်အဝါက ထိုအဆင့်၏ ပြီးပြည့်စုံသောအဆင့်သို့ ရောက်ရှိနေသည့် ယွမ်စုန်ကျီကိုပင် ပျက်သုဉ်းတော့မည့် ကြောက်မက်ဖွယ် ခံစားချက်မျိုးကို ပေးစွမ်းနေသည်။

ရှုံးနိမ့်ခြင်းကင်းမဲ့သော ဧကရာဇ်က သူ့ကို တစ်ချက်တည်းဖြင့် သတ်ဖြတ်နိုင်သည်ဟု သူ ခံစားလိုက်ရ၏။

ဤအချက်က ရှုံးနိမ့်ခြင်းကင်းမဲ့သော ဧကရာဇ်အပေါ် ကြောက်ရွံ့မှုကို ပြည့်နှက်သွားစေပြီး ကျိရှောင်ယုအတွက် သူ၏ စိုးရိမ်ပူပန်မှုကို ပိုမို တိုးပွားလာစေခဲ့သည်။

...

ချမ့်ခွန်းဂိုဏ်း၏ ပင်မမြို့တော်၌ ဧရာမ တိုက်ပွဲစင်မြင့်ကြီး၏ ပတ်ပတ်လည်ရှိ ကျောက်လှေကားထစ်များပေါ်တွင် တပည့် သိန်းပေါင်းများစွာက မတ်တတ်ရပ်လျက် စင်မြင့်ပေါ်မှ တိုက်ပွဲကို စောင့်ကြည့်နေကြသည်။

ကုအန်နှင့် သူ၏ သောက်ဖော်သောက်ဖက် မိတ်ဆွေများလည်း ထိုနေရာတွင် ရှိနေကြပြီး အန်ရှင်းကမူ အဝေး၌ ချမ့်ခွန်းဂိုဏ်း၏ အထက်လူကြီးများနှင့်အတူ ထိုင်နေ၏။

အန်ရှင်းသည် တည်ငြိမ်သော ဟန်ပန်ကို ထိန်းသိမ်းထားပြီး ကုအန်ကို မကြည့်ဘဲ စင်မြင့်ပေါ်မှ တိုက်ပွဲကိုသာ ခံစားချက်ကင်းမဲ့စွာ ငုံ့ကြည့်နေသည်။

ရီချင်းရှန်က သူ၏ လက်ဖက်ရည်ခွက်ကို ချ၍ အန်ရှင်းဘက်သို့ လှည့်ကာ ပြုံးလျက် မေးလိုက်၏။ "စီနီယာ... ဒီကလေးရဲ့ ပါရမီက ဘယ်လိုနေလဲ..."

ယွမ်လော့သည် နတ်ဘုရားအသွင်ပြောင်းအဆင့် သို့ တက်လှမ်းထားသည်မှာ မကြာသေးဘဲ ဆန်းကြယ်နှလုံးသားအဆင့် ရှိ တပည့်တစ်ဦးနှင့် တိုက်ခိုက်နေခြင်း ဖြစ်သည်။

နတ်ဘုရားအသွင်ပြောင်းအဆင့် နှင့် ဆန်းကြယ်နှလုံးသားအဆင့် ကြားတွင် ဟင်းလင်းပြင်ဖြတ်ကျော်အဆင့် နှင့် တစ်သားတည်းဖြစ်တည်ခြင်းအဆင့် တို့ ရှိနေ၏။ ချမ့်ခွန်းဂိုဏ်းက အတိတ်ကဲ့သို့ သာမန်ဂိုဏ်းတစ်ခု မဟုတ်တော့ချေ။ နိဗ္ဗာနအဆင့် ကျင့်ကြံမှု မရှိဘဲ ဂိုဏ်းထဲသို့ ဝင်ရောက်နိုင်ခြင်းက ထိုသူသည် ငယ်ရွယ်ပြီး ထူးခြားသော ပါရမီ ရှိကြောင်းကို ပြသနေ၏။

အဆင့်ကြီး နှစ်ဆင့်တိတိ နိမ့်ကျနေသော်လည်း ယွမ်လော့က အသာစီး ရနေဆဲ ဖြစ်သည်။

သူ၏ ပါရမီမှာ သာမန် မျက်စိဖြင့်ပင် သိသာထင်ရှားနေပြီး အမတအဆင့် ရှိ တပည့်များကိုပင် အံ့အားသင့်သွားစေခဲ့၏။

အန်ရှင်းက ပြန်ဖြေလိုက်သည်။ "တကယ်ပဲ အထင်ကြီးစရာကောင်းတယ်... ကမ္ဘာပေါ်က ပြိုင်ဘက်ကင်း ပါရမီရှင်တိုင်းနဲ့ ယှဉ်ပြိုင်နိုင်စွမ်း ရှိတယ်..."

ယွမ်လော့မှာ အသက် ဆယ့်ခြောက်နှစ်၊ ဆယ့်ခုနစ်နှစ်ခန့်သာ ရှိသေးပုံရပြီး ငယ်ရွယ်နေသေးသော်လည်း လက်ဝါးတစ်ချက်တည်းဖြင့် သူ၏ ပြိုင်ဘက်ကို ပြင်းထန်စွာ ဒဏ်ရာရသွားစေကာ ဆက်လက် မတိုက်ခိုက်နိုင်အောင် ပြုလုပ်နိုင်ခဲ့၏။

လေထဲတွင် ဝဲပျံနေရင်း သူက အထက်လူကြီးများ ရှိနေသော နေရာကို မော့ကြည့်ကာ ကျယ်လောင်စွာ ကြေညာလိုက်သည်။

"ကျွန်တော် ပိုမြင့်တဲ့ အဆင့်ကို စိန်ခေါ်ချင်ပါတယ်..."

သူ၏ စကားများကြောင့် လူအုပ်ကြားတွင် ဆူညံပွက်လောရိုက်သွား၏။

စောင့်ကြည့်နေသော တပည့်များက ယွမ်လော့ ဆက်လက် စိန်ခေါ်လိမ့်မည်ဟု မမျှော်လင့်ထားကြသဖြင့် သူ့အပေါ် မျှော်လင့်ချက်များ ပိုမို တိုးပွားလာခဲ့သည်။

အကြီးအကဲချုပ် လင်ချွမ်းက လက်ဖြင့် အချက်ပြလိုက်ရာ မဟာယာန အဆင့် ရှိ တပည့်တစ်ဦးက ဓားတစ်လက်ဖြင့် စင်မြင့်ပေါ်သို့ တက်လာ၏။

ယွမ်လော့က ပြိုင်ဘက်ကို အရိုအသေ ပေးလိုက်ပြီးနောက် ပထမဆုံး စတင် တိုက်ခိုက်လေတော့သည်။

"ဒီကောင်လေးက တကယ်ကို အစွမ်းထက်တာပဲ... အထက်လူကြီးတွေက သူ့ကို ဒီလောက်တောင် မြှင့်တင်ပေးနေတာ မဆန်းပါဘူး..."

ကုအန်၏ မိတ်ဆွေ တစ်ဦးက မှတ်ချက်ချလိုက်ရာ အခြား မိတ်ဆွေများကြားတွင်လည်း ဆွေးနွေးမှုများ ဖြစ်ပေါ်လာစေ၏။

ယွမ်လော့၏ စွမ်းဆောင်ရည်အပေါ် ကုအန် အံ့အားသင့်သွားခြင်း မရှိချေ။

ဤကလေး၏ သက်စွမ်းအင်များက သူ၏ အဆင့်ဖြင့် ကန့်သတ်ခံထားရသော်လည်း သူ၏ ချီနှင့် သွေးစွမ်းအားများက အလွန်အမင်း အားကောင်းလွန်းနေသည်။ နတ်ဘုရားအသွင်ပြောင်းအဆင့် တွင် ရှိနေပုံရသော်လည်း အမှန်တကယ်တွင်မူ သူက နိဗ္ဗာနအဆင့် နှင့် ယှဉ်နိုင်စွမ်း ရှိ၏။

စောင့်ကြည့်နေစဉ် ကုအန်က မဟာတာအို၏ လမ်းစဉ်ပေါ်ရှိ ကျိရှောင်ယု၏ တိုက်ပွဲကိုလည်း အာရုံစိုက်နေခဲ့သည်။

ကျိရှောင်ယုသည် ရှုံးနိမ့်ခြင်းကင်းမဲ့သော ဧကရာဇ်၏ ပြိုင်ဘက် မဟုတ်ချေ။ သူမ၏ အစွမ်းကုန် ထုတ်သုံးခဲ့သော်လည်း သူ့ကို အနိုင်မယူနိုင်ခဲ့ဘဲ သူ့ကို ဒဏ်ရာရစေရန်သာ စွမ်းဆောင်နိုင်ခဲ့ရာ ရှုံးနိမ့်ခြင်းကင်းမဲ့သော ဧကရာဇ်နှင့် မူလဧကရာဇ် နယ်မြေမှ အစွမ်းထက် ပုဂ္ဂိုလ်ကြီးများကို အံ့အားသင့်သွားစေခဲ့၏။

ရှုံးနိမ့်ခြင်းကင်းမဲ့သော ဧကရာဇ်ကို အနိုင်ယူရန်အတွက် ကျိရှောင်ယုကို ကုအန် ကူညီပေးမည် မဟုတ်ပေ။ အကြောင်းမှာ ထိုသို့ လုပ်ဆောင်ခြင်းက အဓိပ္ပာယ် မရှိသောကြောင့် ဖြစ်၏။ သူ၏ ရည်မှန်းချက်မှာ ကျိရှောင်ယု အသက်ရှင်နေစေရန် သေချာစေရေးသာ ဖြစ်သည်။

နတ်ဘုရား ကျင့်စဉ်များ၏ နောက်ဆုံး အကြိတ်အနယ် တိုက်ပွဲတွင် ကျိရှောင်ယု ရှုံးနိမ့်သွားခဲ့ပြီး သူမ၏ ခန္ဓာကိုယ်မှာ ပျက်စီးသွားကာ သေလုမျောပါး ဝိညာဉ်သာ ကျန်ရစ်ခဲ့၏။

ဤအချိန်တွင် မဟာတာအို၏ လမ်းစဉ်ပေါ်၌ သူမ စုဆောင်းထားခဲ့သော ကံကြမ္မာများ အားလုံးက ရှုံးနိမ့်ခြင်းကင်းမဲ့သော ဧကရာဇ်ထံသို့ အကုန်အစင် စီးဆင်းသွားလေသည်။

"မင်းက ငါ့ရဲ့ အရင်ပြိုင်ဘက်တွေထက် ပိုအားကောင်းတယ်... ပြီးတော့ ဝင်စားခြင်း(ပြန်လည်မွေးဖွား) လမ်းစဉ်အပေါ် မင်းရဲ့ နားလည်နိုင်စွမ်းကလည်း အတော်လေး အထင်ကြီးစရာ ကောင်းတယ်...ဒါက နောင်အနာဂတ် အချိန်အတော်ကြာတဲ့အထိ ငါ မင်းကို မှတ်မိနေစေမှာပါ"

ရှုံးနိမ့်ခြင်းကင်းမဲ့သော ဧကရာဇ်၏ အသံက ဟင်းလင်းပြင်ထဲတွင် ပဲ့တင်ထပ်သွားပြီး အရှိန်အဝါက ကြမ်းတမ်းနေဆဲ ဖြစ်ကာ သူ၏ ပါးပြင်ပေါ်ရှိ ဒဏ်ရာများက သူ့ကို ပို၍ပင် ခမ်းနားထည်ဝါစေသည်။

လှံရှည်ကို ကိုင်ဆောင်ထားရင်း သူက ကျိရှောင်ယု၏ ဝိညာဉ်ထံသို့ ချဉ်းကပ်လာ၏။ ပတ်ပတ်လည် ဟင်းလင်းပြင် တစ်ခုလုံးတွင် မီးခိုးငွေ့များနှင့် တိမ်တိုက်များ ပြည့်နှက်နေပြီး ၎င်းတို့မှာ ပျက်စီးသွားသော ဥက္ကာပျံများ၏ အကြွင်းအကျန်များ ဖြစ်ကြသည်။

ရှုံးနိမ့်ဖူးခြင်းကင်းမဲ့သော ဧကရာဇ်က သူမကို လုံးဝ အမြစ်ပြတ် ချေမှုန်းတော့မည်ကို မြင်သောအခါ ယွမ်စုန်ကျီက ကျိရှောင်ယု၏ ရှေ့သို့ ကမန်းကတန်း ပျံသန်းသွားပြီး အလောတကြီး ပြောလိုက်သည်။ "မင်း အနိုင်ရသွားပြီပဲ... ဒီလောက်လုပ်ဖို့ လိုလို့လား... ကျေးဇူးပြုပြီး သူ့ကို အသက်ရှင်ခွင့် တစ်ကြိမ်လောက် ပေးပါ..."

ရှုံးနိမ့်ဖူးခြင်းကင်းမဲ့သော ဧကရာဇ်က မေးစေ့ကို အနည်းငယ် မော့၍ ယွမ်စုန်ကျီကို အထင်သေးစွာ ငုံ့ကြည့်ကာ ပြောလိုက်၏။ "ပိုးကောင်တွေက တာအိုဧကရာဇ် တစ်ပါးကို ဘယ်အချိန်ကတည်းက တားဆီးရဲသွားရတာလဲ..."

အဝေးမှ မူလဧကရာဇ် နယ်မြေ၏ အစွမ်းထက် ပုဂ္ဂိုလ်ကြီးများက ရှေ့သို့ လှမ်းတက်လာကြပြီး သူတို့၏ အဆုံးမဲ့ စွမ်းအားများက ယွမ်စုန်ကျီကို အသက်ရှူကျပ်သွားစေသည်။