အခန်း (၇၉-၈၀)

မဟာယာနအဆင့်ရောက်မှ စနစ်က ပေါ်လာသတဲ့

Mahayana 79

အခန်း ၇၉ ။ ကုသိုလ်တော်စွမ်းအား ရယူသည့် နည်းလမ်း

"ဒီနေရာမှာ ရောက်နေတဲ့ လူတွေက ကျိုကျိုးရဲ့ နေရာအနှံ့အပြားက လာကြတာပဲ။ နချို့က အသက် ၈ နှစ်ပဲ ရှိသေးတယ်။ တိုက်ဆိုင်လို့ ရောက်လာတာဖြစ်ဖြစ်၊ တမင် ရောက်လာတာဖြစ်ဖြစ် အရေးမကြီးပါဘူး။ ငါတို့ နတ်ဘုရားသိုက်ဂိုဏ်းကို ရောက်လာပြီဆိုမှတော့ ငါတို့နဲ့ ပူးပေါင်းဖို့ တစ်လမ်းပဲ ရှိတော့တယ်။"

ဖုန်းကျန်းရန်သည် နောက်ဆက်တွဲဖြစ်သော "မပူးပေါင်းရင် သေရမယ်" ဟူသော စကားကိုမူ ထည့်မပြောခဲ့ပေ။

လျှို့ဝှက်နယ်မြေအတွင်းရှိ အခန်းတစ်ခန်းထဲတွင် လူဆယ်ဦး ထိုင်နေကြပြီး၊ ဖုန်းကျန်းရန် ပြောပြနေသော ဂိုဏ်း၏ သမိုင်းကြောင်းနှင့် 'နတ်ဘုရားသိုက် ဆရာတော်' အကြောင်းကို နားထောင်နေကြသည်။

သူပြောပြသော အကြောင်းအရာများမှာ ကောင်းကင်လျှို့ဝှက်ချက်မျှော်စင်က ပေးထားသော အချက်အလက်များနှင့် များစွာ ကွာခြားမှု မရှိပေ။ သို့သော် ဖုန်းကျန်းရန်က လူသတ်ရမည်ဆိုသော အချက်ကိုတော့ ချန်လှပ်ထားခဲ့သည်။

"လူကြီးမင်းတို့အနေနဲ့ နတ်ဘုရားသိုက်ဆိုတာကို ဒဏ္ဍာရီလို့ထင်ပြီး မယုံကြည်တာမျိုး ဖြစ်နိုင်ပါတယ်။ ကျွန်တော် လက်တွေ့ သက်သေပြပါ့မယ်။"

ဖုန်းကျန်းရန်သည် ရင်ဘတ်ကို လက်ဝါးဖြင့် အားကုန် ရိုက်ချလိုက်ရာ၊ သူ၏ ဝိညာဉ်သန္ဓေမှာ ကွဲကြေသွားခဲ့သည်။ ထိုမြင်ကွင်းကြောင့် ကျန်ရှစ်ဦးစလုံးမှာ မျက်လုံးပြူးသွားကြသည်။ ဝိညာဉ်သန္ဓေဆိုသည်မှာ ရွှေအမြုတေမှတစ်ဆင့် တက်လှမ်းလာရခြင်းဖြစ်ရာ၊ ဝိညာဉ်သန္ဓေ ကွဲသွားပါက ရွှေအမြုတေအဆင့်သို့ ပြန်မဆင်းဘဲ အခြေခံတည်ဆောက်ခြင်းအဆင့်သို့ တိုက်ရိုက် ကျဆင်းသွားမည် ဖြစ်သည်။

တရားဟောရုံလေးနဲ့ ဒီလောက်တောင် အရင်းအနှီး ကြီးရသလား။

ထိုလူများသည် နတ်ဘုရားသိုက်ဂိုဏ်းအကြောင်း အများကြီး မသိကြပေ။ ဂိုဏ်းသားများ၏ အကြိမ်ကြိမ် စစ်ဆေးမှုနှင့် သွယ်ဝိုက်သော စည်းရုံးမှုများကြောင့်သာ ဤနေရာသို့ ရောက်လာကြခြင်း ဖြစ်သည်။ ဂိုဏ်းထဲဝင်လျှင် 'နတ်ဘုရားသိုက်စွမ်းအား' ဟူသော အံ့ဖွယ်စွမ်းအားတစ်မျိုးကို ရရှိမည်ဖြစ်ပြီး၊ ကျင့်ကြံမှုအဆင့် တိုးတက်ခြင်း၊ စိတ်မိစ္ဆာကို ရှောင်ရှားနိုင်ခြင်း၊ ဒဏ်ရာများကို ကုသနိုင်ခြင်း စသည့် အကျိုးကျေးဇူးများ ရရှိမည်ဟုသာ ကြားဖူးထားကြသည်။ အမှန်တကယ် ဟုတ်မဟုတ်ကိုမူ သူတို့ တစ်ခါမှ မမြင်ဖူးကြပေ။

ကျန်းလီနှင့် ကျီခုံးခုံးတို့ကမူ မျက်နှာသေဖြင့်သာ ကြည့်နေကြသည်။

ဝိညာဉ်သန္ဓေ ကွဲတာလေးလောက်ကတော့ သေးသေးလေးပါ။

ဖုန်းကျန်းရန် ပြောခဲ့သော 'နတ်ဘုရားသိုက်စွမ်းအား' များသည် သူ၏ကိုယ်တွင်းမှ စီးဆင်းလာပြီး၊ ကွဲကြေသွားသော ဝိညာဉ်သန္ဓေကို ပြန်လည် ပြုပြင်ပေးလိုက်သည်။ အသက်ရှူကြိမ် အနည်းငယ်အတွင်းမှာပင် ဝိညာဉ်သန္ဓေမှာ မူလအတိုင်း ပြန်လည်ကောင်းမွန်သွားခဲ့သည်။

ဤလူရှစ်ဦးမှာ ထိုကဲ့သို့သော မြင်ကွင်းမျိုးကို တစ်ခါမှ မမြင်ဖူးကြပေ။ ဝိညာဉ်သန္ဓေကွဲသွားပါက တာအိုဂိုဏ်းမှ ရောင်းချသော အလွန် ဈေးကြီးလှသည့် 'မီးပြန်လေဆန်ဆေးလုံး'ကို ပိုင်ဆိုင်သမျှ ပုံအောဝယ်ယူ၍ ကုသမှသာ ရနိုင်ကြောင်း လူတိုင်း သိထားကြသည်။ သို့သော် ဤကဲ့သို့ စွမ်းအားတစ်မျိုးဖြင့် ကုသလိုက်သည်ကိုမူ တစ်ခါမှ မမြင်ဖူးကြပေ။

နတ်ဘုရားသိုက်စွမ်းအားဆိုတာ တကယ် ရှိနေတာပဲ။

ထိုလူများ၏ယုံကြည်မှုမှာ တစ်ဝက်ကျော်သွားသော်လည်း၊ အချို့ကမူ သံသယ ဝင်နေဆဲ ဖြစ်သည်။

ဖုန်းကျန်းရန်သည် ဂရုမစိုက်ဘဲ ဂိုဏ်းချုပ် အိပ်မက်ထဲတွင် ရရှိခဲ့သော 《မဟာဆင်းရဲခံ ကျမ်းစာ》ကို စတင် ရွတ်ဆိုတော့သည်။ ကျမ်းစာမှာ အလွန် ရှည်လျားရှုပ်ထွေးပြီး နားလည်ရန် ခက်ခဲလှကာ၊ နတ်ဘုရားသိုက်ဆရာတော်၏ ဘဝအကြောင်းကို ရေးသားထားခြင်းဖြစ်သည်။

ကျန်းလီသည် အကြောင်းပြချက်မရှိဘဲ ကျန်းခုန်းဟူကို သတိရသွားသည်။ ထိုငတုံးသာ ဤကျမ်းစာကို လာနားထောင်ပါက၊ "ဒါကြီးက ဘာတွေ လျှောက်ပြောနေတာလဲ" ဟုသာ မှတ်ချက်ပေးမည်မှာ သေချာသည်။

ကျန်းလီကတော့ ကျန်းခုန်းဟူထက် အများကြီး ပညာပိုတတ်သည်။ ကျန်းလီ၏အမြင်ဖြင့် ကျမ်းစာကို ဘာသာပြန်ရမည်ဆိုလျှင် - နတ်ဘုရားသိုက်ဆရာတော်သည် နတ်ဘုရားဘုံတွင် မွေးဖွားလာပြီး၊ မွေးရာပါ မြင့်မြတ်ကာ အရာရာကို သိမြင်စွမ်းဆောင်နိုင်သော လောက၏ တစ်ပါးတည်းသော တည်ရှိမှု ဖြစ်သည်။ သူသည် လူသားများ၏ ခန္ဓာကိုယ်အတွင်း၌ အဆုံးအစမရှိသော အလားအလာများနှင့် နတ်ဘုရားသိုက်များ ရှိနေပြီး၊ ၎င်းတို့ကိုသာ ဖွင့်လှစ်နိုင်ပါက လူတိုင်း မြင့်မြတ်သူများ ဖြစ်လာနိုင်ကြောင်း မွေးကတည်းက သိရှိခဲ့သည်။

သူ့မျက်လုံးထဲတွင် နတ်ဘုရားများရော၊ လူသားများပါ အသိဉာဏ်ကင်းမဲ့သော သူများသာ ဖြစ်ကြသော်လည်း၊ လူသားများက ပို၍ အသိဉာဏ် နည်းပါးသည်ဟု မြင်သည်။ ထို့ကြောင့် သူသည် ဂင်္ဂါမြစ်ဝါသဲပွင့်မျှ များပြားလှသော လောကီကမ္ဘာများထဲမှ တစ်ခုစီတွင် ကိုယ်စားလှယ်တစ်ဦးစီ ရွေးချယ်ကာ၊ ထိုကိုယ်စားလှယ်များမှတစ်ဆင့် အသိဉာဏ်မဲ့သော သတ္တဝါများကို နတ်ဘုရားသိုက်၏ လျှို့ဝှက်ချက်များကို ပြောပြစေခဲ့သည်။ သူ့ရည်ရွယ်ချက်မှာ သူ့ကဲ့သို့ မြင့်မြတ်သော တည်ရှိမှုများ ပေါ်ထွက်လာပြီး၊ သူ၏ ပျင်းရိမှုကို ဖြေဖျောက်ပေးရန်နှင့် တာအိုအကြောင်း ဆွေးနွေးနိုင်ရန်ဖြစ်သည်... ဟူ၍ ဖြစ်သည်။

ကျန်းလီ၏ မှတ်ချက်မှာတော့ "ကြွားတာက နည်းနည်း လျော့နေသေးတယ်" ဟူ၍ပင်။ ဘာသာရေး ယုံကြည်မှုတစ်ခုအနေနဲ့ဆိုရင် ကိုယ့်ကိုယ်ကိုယ် ကောင်းကင်တာအို မပေါ်ခင်ကတည်းက မွေးဖွားခဲ့တယ်၊ ကမ္ဘာကြီး စတင်ဖန်တီးတာကို မျက်မြင်ကိုယ်တွေ့ ကြုံခဲ့တယ်၊ ကိုယ်ပွားပေါင်း သန်းချီပြီး လောကအနှံ့ ပြန့်ကျဲနေတယ်၊ စိတ်ကူးတစ်ချက်နဲ့ ခေတ်တစ်ခေတ်ကို ဖန်တီးနိုင်တယ်၊ အချိန်မြစ်ကြီးရဲ့ အထက်ပိုင်းမှာ မားမားမတ်မတ် ရပ်တည်နိုင်တယ်၊ ကံတရားတွေကလည်း ကိုယ့်ကို မထိခိုက်နိုင်ဘူး၊ လက်တစ်ဖျစ်တီးရုံနဲ့ ကမ္ဘာလောကကြီးကို ပြောင်းလဲပစ်နိုင်တယ်... လို့ မကြွားဘဲနဲ့ ဘယ်လိုလုပ် ဘာသာရေး ယုံကြည်မှု ဖြစ်လာနိုင်မှာလဲ။

《မဟာဆင်းရဲခံ ကျမ်းစာ》 သည် ဗုဒ္ဓဘာသာနှင့် ကွန်ဖြူးရှပ်ဂိုဏ်းတို့၏ ကျမ်းစာများနှင့် အလွန် ဆင်တူသည်။ ထပ်ခါတလဲလဲ ရွတ်ဆိုပေးခြင်းဖြင့် နားထောင်သူများ၏ ယုံကြည်မှုကို ပိုမို ခိုင်မာလာစေသည်။ သေချာပေါက် မသင့်လျော်သောနည်းလမ်းဖြင့် သုံးပါက ဦးနှောက်ဆေးရာတွင်လည်း အသုံးပြုနိုင်သည်။

ဖုန်းကျန်းရန်သည် ကျမ်းစာကို အသုံးပြု၍ လူများကို ဦးနှောက်ဆေးရန် မကြိုးစားဘဲ၊ ကျမ်းစာ၏ အဓိက ရည်ရွယ်ချက်ဖြစ်သော ယုံကြည်မှုတိုးပွားစေရန်ကိုသာ အာရုံစိုက်ခဲ့သည်။ ဆရာတော်ကို ယုံကြည်သူများသည် ပို၍ ယုံကြည်လာကြပြီး၊ သံသယရှိသူများမှာမူ သံသယရှိမြဲ ရှိနေဆဲပင်။

ကျန်းလီကဲ့သို့ တစ်လုံးမှ မယုံကြည်သူအတွက်ကတော့၊ နားထောင်ပြီးသွားလည်း တစ်လုံးမှ မယုံကြည်မြဲပင်။

ကျန်းလီသည် နတ်ဘုရားအာရုံဖြင့် ကျီခုံးခုံးကို ကြည့်လိုက်ရာ၊ ဆန္ဒပြည့်ဘူးသီးက ကျီခုံးခုံးအပေါ် 'အသံမဲ့အတိဒုက္ခ' ကို တိုက်ရိုက် ကျရောက်စေထားသည်ကို တွေ့လိုက်ရသည်။ အသံမဲ့အတိဒုက္ခ ဧရိယာအတွင်းတွင် မည်သည့်အသံမျှ မရှိသဖြင့်၊ ကျီခုံးခုံးမှာလည်း 《မဟာဆင်းရဲခံ ကျမ်းစာ》 ၏ လွှမ်းမိုးမှုကို လုံးဝ မခံရတော့ပေ။

မူလက 'အသံမဲ့အတိဒုက္ခ' ဆိုသည်မှာ "ပြောသည့်အတိုင်း ဖြစ်စေရမည်"၊ "စိတ်ကူးဖြင့် ဖန်တီးခြင်း" စသည့် အတတ်ပညာများကို ကျင့်ကြံသူများအပေါ် ကျရောက်လေ့ရှိသော ကောင်းကင်အတိဒုက္ခ ဖြစ်သည်။ ထိုအတိဒုက္ခအတွင်း၌ စကားပြော၍ မရသလို၊ စိတ်ထဲမှ အသံများလည်း ထွက်မလာတော့သဖြင့် မိုးကြိုးအတိဒုက္ခနှင့် ပေါင်းစပ်ကာ ထိုသူများကို အသေအလဲ မိုးကြိုးပစ်ခံရစေရန် ရည်ရွယ်ခြင်းဖြစ်သည်။

အသံမဲ့အတိဒုက္ခကို ဤကဲ့သို့လည်း အသုံးပြု၍ရကြောင်း ကျန်းလီ ယခုမှပင် မျက်စိပွင့်သွားရသည်။

ကျမ်းစာ ရွတ်ဆိုပြီးနောက် ဖုန်းကျန်းရန်သည် လူအားလုံးကို ခမ်းနားကြီးကျယ်သော ဧည့်ခန်းမကြီးတစ်ခုသို့ ခေါ်ဆောင်သွားခဲ့သည်။ ခန်းမကြီးတစ်ခုလုံးကို ကြေးဝါများဖြင့် တည်ဆောက်ထားပြီး အရောင်အသွေးမှာ မှိုင်းညို့နေသည်။ ဖယောင်းတိုင်နီ အတန်းလိုက် ထွန်းညှိထားသော်လည်း မှောင်မိုက်နေဆဲ ဖြစ်သည်။ ခန်းမကို ထောက်ထားသော ကြေးတိုင်ကြီးများပေါ်တွင် ကျန်းလီ တစ်ခါမှ မမြင်ဖူးသော ကြောက်မက်ဖွယ်ကောင်းသည့် သတ္တဝါဆန်းများ၏ပုံများကို ထွင်းထုထားသည်။ ခန်းမအတွင်းရှိ တံခါးအပါအဝင် ပစ္စည်းအားလုံးမှာ လူသားများ အသုံးပြုရန် မဟုတ်သကဲ့သို့ အလွန် ကြီးမားလှသည်။

ကြေးခန်းမ၏အဆုံးတွင် လူ့အရိုးများဖြင့် တည်ဆောက်ထားသော ဧရာမ နတ်ဘုရားရုပ်တုကြီးတစ်ခု ရှိနေပြီး၊ ခန်းမကြီးထဲရှိ ပစ္စည်းများမှာ ထိုရုပ်တုအတွက် ရည်ရွယ်ထားသကဲ့သို့ ရှိနေသည်။

ထို လူ့အရိုးနတ်ဘုရားရုပ်တုမှာ မျက်နှာတွင် ကျား/မ ခွဲခြား၍ မရဘဲ မျက်လုံးကို မှိတ်ထားကာ အေးချမ်းတည်ငြိမ်သော အမူအရာရှိနေသည်။ သတ္တဝါများကို သနားကြင်နာနေသည့်ပုံစံ ပေါက်နေသော်လည်း၊ လူ့အရိုးများနှင့် ပေါင်းစပ်ထားသဖြင့် အလွန်ပင် ကိုက်ညီမှုမရှိဘဲ ဖြစ်နေသည်။

နတ်ဘုရားသိုက်ဆရာတော်၏ ရုပ်တုပင် ဖြစ်သည်။

ဖုန်းကျန်းရန်နှင့် ကျန်းလီတို့ ဆယ်ဦးအပြင်၊ ခန်းမအတွင်း၌ အခြား ဂိုဏ်းဝင်အချို့နှင့် ကြိုးတုပ်ခံထားရပြီး ရုန်းကန်နေသော လူဆယ်ဦးလည်း ရှိနေသည်။

ထိုဂိုဏ်းဝင်အားလုံးမှာ ဝိညာဉ်အသွင်ပြောင်းခြင်းအဆင့်များဖြစ်ပြီး ရာထူးမနိမ့်ကြောင်း ကျန်းလီ သိလိုက်သည်။ သူတို့သည် ဂိုဏ်းဝင် အခမ်းအနားကို စောင့်ကြည့်ရန် လာရောက်ကြခြင်း ဖြစ်ရမည်။

"ခုနက ပြောခဲ့တာက ပထမအဆင့် အခမ်းအနားဖြစ်တဲ့ 'တရားနာယူခြင်း' ပါ။ အခု ဒုတိယအဆင့် အခမ်းအနားဖြစ်တဲ့ 'သစ္စာစစ်ဆေးခြင်း' ကို စပါမယ်။"

ဖုန်းကျန်းရန်သည် ဘေးတွင် ရပ်နေသော ဂိုဏ်းဝင်များကို မိတ်ဆက်ပေးခြင်း မရှိဘဲ၊ မြေကြီးပေါ်တွင် ရုန်းကန်နေသော လူဆယ်ဦးကို ညွှန်ပြလိုက်သည်။

"မင်းတို့ တစ်ယောက်ကို တစ်ယောက်စီ သတ်ရမယ်။ ရလဒ်အပေါ်မူတည်ပြီး ဒုတိယအဆင့် အခမ်းအနားကို အောင်မြင်၊ မအောင်မြင် ဆုံးဖြတ်မယ်။"

ကျန်းလီနှင့်အတူ ဝင်လာသော ချန်ကျီချီက တွန့်ဆုတ်စွာဖြင့် မေးလိုက်သည် - "ဒီ အပြစ်မရှိတဲ့ လူတွေကို မဖြစ်မနေ သတ်ရမှာလား။ ဒီလို လုပ်တာက နည်းနည်းများ..."

သူက "မိစ္ဆာလမ်းစဉ်နဲ့ တူလွန်းတယ်" ဟူသော နောက်ဆက်တွဲ စကားကို ဆက်မပြောရဲပေ။

အခြားသူများကလည်း ခေါင်းညိတ် ထောက်ခံကြသည်။ သူတို့သည် လူသတ်ရမည်ဆိုသည်ကို တစ်ခါမှ မကြားဖူးခဲ့ပေ။ နတ်ဘုရားသိုက်ဆရာတော်က ယုံကြည်သူများကို စွမ်းအားတွေ ဖော်ထုတ်ပေးမယ် ဆိုတာပဲ ကြားဖူးခဲ့တာ မဟုတ်ဘူးလား။

ဖုန်းကျန်းရန်က ဤမေးခွန်းကို ကြိုတင် ခန့်မှန်းထားပြီးသားဖြစ်သဖြင့် ရှင်းပြလိုက်သည် - "ဒီလူတွေက ထျန်းယွမ်အင်ပါယာရဲ့ ထောင်ထဲကနေ ခေါ်လာတဲ့ သေဒဏ်ကျ အကျဉ်းသားတွေပါ။ သူတို့က ဘယ်လိုဖြစ်ဖြစ် သေရမယ့်လူတွေမို့၊ အခု သူတို့ရဲ့သေဆုံးမှုကို ပိုပြီး တန်ဖိုးရှိသွားအောင် လုပ်ပေးလိုက်တာပါ။"

ဖုန်းကျန်းရန်က ထိုသို့ ပြောလိုက်သဖြင့်၊ လူတစ်ယောက်က ဓားကိုကိုင်ကာ ရှေ့သို့ တက်သွားပြီး ကြိုးတုပ်ခံထားရသူ တစ်ဦးကို ပြတ်သားစွာ ထိုးသတ်လိုက်သည်။

သို့သော် မည်သည့်အရာမျှ ဖြစ်မလာခဲ့ပေ။

"ဒီလိုဆိုရင် အောင်မြင်ပြီလား။" ထိုသူမှာ လူခဏခဏ သတ်ဖူးသူဖြစ်ကြောင်း သိသာလှပြီး လုပ်ရှားမှုများမှာ အလွန် သွက်လက်သေသပ်လှသည်။ မိမိ၏ရလဒ်ကိုသာ သူ စိတ်ဝင်စားနေသည်။

ဖုန်းကျန်းရန်က မေးလိုက်သည် - "မင်း နတ်ဘုရားသိုက် ဆရာတော်ရဲ့ တန်ခိုးကို မယုံကြည်ဘူးလား။"

ထိုသူက ဟန်ဆောင်ပြီး ရိုးသားသည့် မျက်နှာထားဖြင့် ပြန်ဖြေသည် - "ကျွန်တော် သေချာပေါက် ယုံကြည်ပါတယ်။"

ဖုန်းကျန်းရန်က သက်ပြင်းချကာ ခေါင်းခါလိုက်ပြီး၊ ထိုသူကို ရှင်းပြခွင့်ပင် မပေးတော့ဘဲ ချက်ချင်း ပြန်လည် သတ်ဖြတ်လိုက်သည် - "နတ်ဘုရားသိုက်ဆရာတော်ကို တကယ် မယုံကြည်ရင်၊ မကိုးကွယ်ရင်၊ နတ်ဘုရားသိုက်စွမ်းအားဆိုတာ ပေါ်လာမှာ မဟုတ်ဘူး။"

ဂိုဏ်းထဲ ဝင်ပြီးသည်နှင့် ဂိုဏ်းဝင်တိုင်းသည် နတ်ဘုရားသိုက်စွမ်းအားကို ဖုံးကွယ်ထားနိုင်သည့် မန္တန်တစ်မျိုးကို သင်ယူရသည်။ ယခုမူ ဖုန်းကျန်းရန်သည် ဖုံးကွယ်ထားခြင်းကို ရပ်တန့်လိုက်ပြီး၊ နတ်ဘုရားသိုက်စွမ်းအား ရရှိလာပုံကို လူတိုင်းအား ပြသလိုက်သည်။

ဖုန်းကျန်းရန် လူသတ်လိုက်ပြီးနောက်၊ မည်သည့်နေရာမှ ရောက်လာမှန်းမသိသော ရွှေရောင် စွမ်းအားများ ရုတ်တရက် ထွက်ပေါ်လာပြီး သူ့အား ရစ်ပတ်သွားသည်။ ၎င်းက သူ့အား ကုသိုလ်ကံ ကြီးမားသော သူတော်စင်တစ်ဦးအလား ထင်မှတ်ရစေပြီး၊ လူတိုင်းကို ဦးညွှတ် ရှိခိုးချင်စိတ် ပေါ်ပေါက်လာစေသည်။

"ဒါဟာ နတ်ဘုရားသိုက်စွမ်းအားပဲ။"

ထိုစွမ်းအားများမှာ အလျင်အမြန်ပေါ်လာသလို အလျင်အမြန်ပင် ပျောက်ကွယ်သွားပြီး၊ ဖုန်းကျန်းရန်၏ ကိုယ်တွင်းသို့ ဝင်ရောက်ကာ သူ၏ ကိုယ်ပိုင်စွမ်းအားများအဖြစ် ပြောင်းလဲသွားတော့သည်။ အပြင်မှနေ၍ မည်သို့မျှ အာရုံခံ၍ မရတော့ပေ။

ကျန်းလီ၏မျက်နှာမှာ တည်ကြည်သွားသည်။ ကုသိုလ်တော်စွမ်းအားရရှိသည့် လုပ်ငန်းစဉ်ကို သူ ပထမဆုံးအကြိမ် မျက်မြင်ကိုယ်တွေ့ မြင်ဖူးခြင်းပင်။

***

မဟာယာနအဆင့်ရောက်မှ စနစ်က ပေါ်လာသတဲ့

Mahayana 80

အခန်း ၈၀ ။ ဆရာတော်သည် တစ်ပါးတည်းသော တည်ရှိမှုဖြစ်သည်

"မြင်ကြလား၊ နတ်ဘုရားသိုက်စွမ်းအားက ခန္ဓာကိုယ်ထဲကနေ ထွက်ပေါ်လာပြီး၊ ခန္ဓာကိုယ်ထဲကိုပဲ ပြန်ဝင်သွားတာ။ ဒီလို အကြိမ်ကြိမ်လုပ်ပေးရင် တဖြည်းဖြည်း စုဆောင်းမိလာပြီး၊ ကိုယ့်ကိုယ်ကိုယ် ပိုမို သန်မာလာစေပြီး ကိုယ်ပိုင်စွမ်းအားအဖြစ် အသုံးပြုလို့ ရသွားပြီ။" ဖုန်းကျန်းရန်သည် နတ်ဘုရားသိုက် စွမ်းအားကို ရယူရန် မှန်ကန်သော နည်းလမ်းကို လူတိုင်းအား ပြသလိုက်သည်။

အခြားသူများ အမြင်တွင်မူ နတ်ဘုရားသိုက် စွမ်းအားသည် ခန္ဓာကိုယ်တွင်းမှ ထွက်ပေါ်လာခြင်း ဖြစ်သည်ဟု ထင်ရသော်လည်း၊ ကျန်းလီ၏အမြင်တွင်မူ ၎င်းမှာ ကုသိုလ်တော်စွမ်းအားကြီးဖြစ်ပြီး ဗလာနယ်အတွင်းမှ ထွက်ပေါ်လာကာ ဖုန်းကျန်းရန်၏ကိုယ်ပေါ်သို့ ကပ်တွယ်သွားပြီးမှ ခန္ဓာကိုယ်တွင်းသို့ ဝင်ရောက်သွားခြင်းဖြစ်ကြောင်း ရှင်းလင်းစွာ မြင်တွေ့နေရသည်။

၎င်းမှာ ရှေးဟောင်းမှတ်တမ်းများထဲတွင် ရေးသားထားသော ကုသိုလ်တော်စွမ်းအား ကျဆင်းလာသည့် ဖြစ်စဉ်နှင့် အတိအကျ တူညီနေသည်။

ဤဖြစ်စဉ်ကို သာမန်ကျင့်ကြံသူများ မမြင်တွေ့နိုင်ဘဲ၊ နတ်ဘုရားလမ်းစဉ်ကို ထိတွေ့နိုင်ပြီဖြစ်သော အတိဒုက္ခဖြတ်ကျော်ခြင်းအဆင့် ပုဂ္ဂိုလ်ကြီးများသာ မြင်တွေ့နိုင်သည်။ ထို့ပြင် ကုသိုလ်တော်စွမ်းအားမှာ တစ်ဦးတည်းအတွက်သာ သီးသန့်ဖြစ်တည်လာခြင်းဖြစ်သဖြင့် အခြားသူများအား ပေးအပ်၍ မရပေ။ ထို့ကြောင့် နတ်ဘုရားသိုက် ဂိုဏ်းဝင်များအနေဖြင့် ဤစွမ်းအားကို ခန္ဓာကိုယ်တွင်းမှ နတ်ဘုရားသိုက် စွမ်းအားဟု အခိုင်အမာ ယုံကြည်နေကြခြင်းမှာလည်း အဆန်းမဟုတ်ပေ။

သူတို့သည် နောက်ဆုံး ရလဒ်ကိုသာ မြင်တွေ့နိုင်ကြခြင်းဖြစ်သည်။

ထိုမြင်ကွင်းကို မြင်လိုက်ရသောအခါ လူတစ်ယောက်မှာ မျက်နှာပျက်သွားပြီး နောက်လှည့်၍ ထွက်ပြေးရန် ပြင်လိုက်သည်။

သူသည် အပြင်လောကတွင် လူသတ်ပစ္စည်းလုသည့် အလုပ်များကို မကြာခဏ လုပ်ကိုင်ခဲ့သဖြင့် ရန်သူများပြားလှသည်။ ဤအဖွဲ့အစည်းမှာ လျှို့ဝှက်ပြီး အင်အားကြီးမားကြောင်း ကြားသိရသဖြင့် ခိုလှုံရန် ရောက်လာခဲ့ခြင်းဖြစ်သည်။ နတ်ဘုရားသိုက်ဆရာတော်ဆိုသည်ကိုမူ သူ လုံးဝ အထင်သေးလှသည်။ ဤအဖွဲ့အစည်းက ဤမျှ ကြောက်စရာကောင်းသော နည်းလမ်းဖြင့် ယုံကြည်မှုကို စစ်ဆေးမည်ဟု သူ မထင်ထားခဲ့ပေ။

ဝိညာဉ်အသွင်ပြောင်းခြင်းအဆင့် ကျင့်ကြံသူများထဲတွင် သူ၏ ထွက်ပြေးလွတ်မြောက်ခြင်းအတတ်မှာ အလွန်ကောင်းမွန်ကြောင်း သူကိုယ်တိုင် ယုံကြည်ထားပြီး၊ အဆင့်တူကျင့်ကြံသူများ သူ့ကို ဖမ်းမိရန် လုံးဝ မဖြစ်နိုင်ဟု တွေးထားသည်။

သို့သော် ဘေးတွင် ရပ်နေသော ဂိုဏ်းဝင်များက ရုတ်တရက် ဝင်ရောက် တားဆီးလိုက်ကြသည်။ သူတို့သည် ဝိညာဉ်အသွင်ပြောင်းခြင်းအဆင့်တွင် နတ်ဘုရားသိုက်စွမ်းအားကိုပါ ပေါင်းစပ် အသုံးပြုလိုက်ရာ၊ ထွက်ပြေးခြင်း၌ ကျွမ်းကျင်လှသော ထိုကျင့်ကြံသူကို အလျင်အမြန် ဖမ်းဆီးနိုင်ခဲ့ပြီး ချက်ချင်း သတ်ဖြတ်ကာ နတ်ဘုရားသိုက် စွမ်းအားကို ခွဲဝေယူလိုက်ကြသည်။

လူနှစ်ဦး အလျင်အမြန် အသတ်ခံလိုက်ရသည်ကို မြင်သောအခါ၊ ကျန်လူများမှာ ကြောက်လန့်တကြားဖြစ်ကာ ရှေ့မတိုးဝံ့ကြတော့ပေ။ ဖုန်းကျန်းရန်က စိတ်မရှည်တော့ဘဲ တစ်ယောက်ကို အတင်းဆွဲထုတ်လာချိန်တွင်မှ၊ လူတစ်ယောက်က သူ့ကိုယ်သူ နတ်ဘုရားသိုက် ဆရာတော်ကို ယုံကြည်သဖြင့် ပြဿနာမရှိနိုင်ဟု ယူဆကာ ရှေ့တက်လာသည်။

သူ လူတစ်ယောက်ကို သတ်လိုက်သော်လည်း နတ်ဘုရားသိုက် စွမ်းအား မရရှိခဲ့ပေ။

"ကျွန်... ကျွန်တော် နတ်ဘုရားသိုက်ဆရာတော် ရှိတယ်ဆိုတာကို တကယ် ယုံကြည်ပါတယ်။" ထိုလူက အလန့်တကြား အော်ဟစ်ရှင်းပြသည်။

"ဆရာတော် ရှိတယ်လို့ ယုံကြည်ရုံနဲ့ မလုံလောက်ဘူး။ ဆရာတော်ဟာ တစ်ပါးတည်းသော တည်ရှိမှု ဖြစ်တယ်လို့ ယုံကြည်ရမယ်။ ယုံကြည်မှုမှာ အပြစ်အနာအဆာ မရှိရဘူး။" ဖုန်းကျန်းရန်က စိတ်မကောင်းစွာ ခေါင်းခါလိုက်ပြီးနောက် ထိုလူ၏ပခုံးကို ပုတ်ပေးလိုက်သည်။

"ဒါပေမဲ့ စိတ်မပူပါနဲ့။ နတ်ဘုရားသိုက်ဂိုဏ်းဆိုတာ လူတွေ့တိုင်းသတ်နေတဲ့ မိစ္ဆာဂိုဏ်း မဟုတ်ပါဘူး။ မင်းကို အချိန်နည်းနည်းပေးပြီး အသားကျအောင် လုပ်ခိုင်းလို့ ရပါတယ်။ အရင်ဆုံး အပြင်စည်းအဖွဲ့ဝင်အနေနဲ့ နေလိုက်ပါဦး။ ဒါဟာ ဆရာတော်က မင်းကို စမ်းသပ်တာပဲ၊ ဟုတ်ပြီလား။"

"ဟုတ်... ဟုတ်ကဲ့။"

ဖုန်းကျန်းရန်က နွေးထွေးစွာ ပြုံးပြလိုက်သည် - "မင်း ဘေးမှာရပ်ပြီး တတိယအဆင့် အခမ်းအနားကို စောင့်နေလိုက်။"

အမှန်တကယ်တော့ ဘေးတွင် ရပ်နေသော ဂိုဏ်းဝင်များက အသံလွှင့်ခြင်းအတတ်ကိုသုံးကာ ဖုန်းကျန်းရန်ထံ လှမ်း၍ ညွှန်ကြားနေခြင်းဖြစ်ကြောင်း ကျန်းလီ သိနေသည်။

ကျန်းလီ၏ ရှေ့မှောက်တွင် ဤ 'အသံလွှင့်' အတတ်ကို အသုံးပြုခြင်းမှာ လော်စပီကာဖြင့် အော်ပြောနေသည်နှင့် မခြားဘဲ၊ တစ်လုံးမကျန် ရှင်းလင်းစွာ ကြားနေရသည်။

ရှောင်ဖုန်း... ဒီကောင်ကို သတ်လိုက်။

ရှောင်ဖုန်း... သူ့ကိုတော့ ချန်ထားခဲ့။

ထိုဝိညာဉ်အသွင်ပြောင်းခြင်းအဆင့် ယဇ်ပုရောဟိတ်များသည် အတွေ့အကြုံများပြားလှသဖြင့်၊ မည်သူက ဆရာတော်ကို တစ်ဝက်တစ်ပျက် ယုံကြည်ပြီး၊ မည်သူက လုံးဝ မယုံကြည်သည်ကို တစ်ချက်ကြည့်ရုံနှင့် သိရှိနိုင်ကြသည်။

ထို့နောက် လူလေးဦး ဆက်တိုက် စမ်းသပ်ကြည့်သော်လည်း မည်သည့် တုံ့ပြန်မှုမျှ မရှိခဲ့ပေ။ သို့သော် သူတို့အားလုံးမှာ ဆရာတော်အပေါ် ယုံကြည်မှု မခိုင်မာသေးဘဲ တိုးတက်ရန် လိုအပ်သေးသူများအဖြစ် သတ်မှတ်ကာ အပြင်စည်းအဖွဲ့ဝင်များအဖြစ်သာ လက်ခံလိုက်သည်။

ပထမအဆင့် အခမ်းအနားမှာ အတော်လေး အသုံးဝင်ပုံရသည်။

ကျန်းလီနှင့်အတူ ဝင်လာသော ချန်ကျီချီ အလှည့်သို့ ရောက်သောအခါ၊ သူသည် လူမသတ်မီ မေးလိုက်သည် - "ဆရာကြီး... ခုနက ဆရာတော်ဟာ တစ်ပါးတည်းသော တည်ရှိမှု ဖြစ်တယ်လို့ ယုံကြည်ရမယ်ဆိုတာ ဘာကို ဆိုလိုတာလဲ။"

ဖုန်းကျန်းရန်သည် လက်အုပ်ချီကာ ကြီးမားလှသော နတ်ဘုရားသိုက်ဆရာတော်၏ အရိုးရုပ်တုကြီးကို ဦးညွှတ် ရှိခိုးလိုက်ပြီးမှ ဖြေကြားလိုက်သည် - "အိပ်တာ၊ စားတာ၊ အိမ်ထောင်ပြုတာ၊ ပိုက်ဆံရှာတာ၊ ကျင့်ကြံတာ... အရာအားလုံးဟာ နတ်ဘုရားသိုက်ဆရာတော်ကို ဗဟိုပြုပြီး လည်ပတ်နေရမယ်။ အရာအားလုံးဟာ ဆရာတော်ရဲ့ အလိုတော်ကို ဖော်ပြနေတာပဲ။ ဆရာတော်ဟာ မင်းရဲ့ အရာရာတိုင်း ဖြစ်ရမယ်။"

"ဆရာကြီး အခုလို ဂိုဏ်းဝင်အခမ်းအနားကို ဦးဆောင်နေတာကလည်း နတ်ဘုရားသိုက်ဆရာတော်ရဲ့ အလိုတော်ပဲလား။"

"အရာအားလုံးဟာ နတ်ဘုရားသိုက်ဆရာတော်ရဲ့ အလိုတော်ကို ဖော်ပြနေတာပဲ။"

ကျန်းလီ မျက်မှောင်ကြုတ်သွားသည်။ နတ်ဘုရားသိုက်ဂိုဏ်းထဲ ဝင်ရမည့် စံနှုန်းမှာ အတော်လေး မြင့်မားလှသည်။ ဤကဲ့သို့သော စိတ်ပိုင်းဆိုင်ရာ အသိအမြင်မျိုး လိုအပ်နေသည်။ အကယ်၍ သူကိုယ်တိုင် 'နတ်ဘုရားသိုက် ဆရာတော်' ဟူသော ပုဂ္ဂိုလ် တကယ်ရှိသည်ဟု ယုံကြည်လျှင်တောင်မှ၊ မိမိ လုပ်ဆောင်သမျှ အရာအားလုံးသည် ဆရာတော်နှင့် မကင်းကွာဘူးဟုတော့ တွေးနိုင်မည် မဟုတ်ပေ။

ထို့ပြင်... ကုသိုလ်တော်စွမ်းအားရရှိရန်အတွက် ဘာကြောင့် ဒီနတ်ဘုရားသိုက် ဆရာတော်ကို မဖြစ်မနေ ဖြတ်သန်းနေရတာလဲ။ ဒါက ဘယ်ကမှန်းမသိ ပေါ်လာတဲ့ နတ်ဘုရားလဲ။

ကျန်းလီ၏စိတ်ထဲတွင် မိမိကိုယ်တိုင်ပင် မယုံကြည်ချင်လောက်အောင် ရဲတင်းသော ခန့်မှန်းချက်တစ်ခု ပေါ်ထွက်လာသည်။

ချန်ကျီချီသည် တစ်ခုခုကို သဘောပေါက်သွားသကဲ့သို့ ခေါင်းညိတ်လိုက်ပြီး၊ တစ်စုံတစ်ဦးကို ပြတ်သားစွာ သတ်ဖြတ်လိုက်ရာ ရွှေရောင် အလင်းတန်းများက သူ့အား လွှမ်းခြုံသွားခဲ့သည်။

သူသည် ဤလူအုပ်စုထဲတွင် ပထမဆုံး နတ်ဘုရားသိုက်စွမ်းအားကို ရရှိသူ ဖြစ်လာခဲ့သည်။

ယဇ်ပုရောဟိတ်များသည် ပြုံးလိုက်ကြသည်။ ဤအကြိမ်တွင် မျိုးစေ့ကောင်းတစ်ခု ပါလာပြီဟု တွေးလိုက်ကြသည်။

ချန်ကျီချီပြီးနောက် ကျန်းလီ၏အလှည့်သို့ ရောက်လာသည်။

ယဇ်ပုရောဟိတ်များ အားလုံး သိနေကြသည်။ လုံလီ ဟုခေါ်သော ဤကောင်သည် နတ်ဘုရားသိုက် ဆရာတော်ကို လုံးဝ မယုံကြည်ဘဲ ဟန်တောင် မဆောင်ကြောင်းကို သိရှိနေကြသည်။

သို့သော် အခမ်းအနားကို ရပ်တန့်၍ မရသဖြင့်၊ သူ လူသတ်ပြီးသည်နှင့် ဆရာတော်အပေါ် ယုံကြည်မှု တစ်စက်မျှ မရှိသော ဤကောင်ကို ချက်ချင်း သတ်ပစ်ရန် ယဇ်ပုရောဟိတ်များက တိတ်တဆိတ် ဆုံးဖြတ်ထားကြသည်။

ကောင်းပြီ... သူ လူသတ်လိုက်ပြီ... အခု ဝင်တိုက်မယ်... ဟင်... သူ့ဆီမှာ နတ်ဘုရားသိုက်စွမ်းအားက ဘယ်ကနေ ရောက်လာတာလဲ။

ယဇ်ပုရောဟိတ်များသည် ပထမဆုံးအကြိမ်အဖြစ် မိမိတို့၏မျက်စိကို သံသယ ဝင်သွားကြသည်။ ဤလုံလီဆိုသောကောင်သည် လူသတ်ပြီးနောက် နတ်ဘုရားသိုက်စွမ်းအားကို ရရှိသွားခဲ့သည်တဲ့လား။

ကျန်းလီ၌ သေချာပေါက် ကုသိုလ်တော်စွမ်းအား ရှိနေသည်။ ပေါက်ကွဲသွားသော အဘိုးအိုထံမှ သူ အများအပြား ခွာယူထားခဲ့သည် မဟုတ်လား။ ၎င်းတို့ကို အသုံးပြု၍ မရသော်လည်း၊ ယခုလို နေရာမျိုးတွင် ဟန်ဆောင်ပြရန်အတွက်တော့ လုံလောက်ပေသည်။

ဒါဆို ဒီကောင်မလေးကကော? ပထမအဆင့် အခမ်းအနားတုန်းက ပုံဆွဲလိုက်၊ ကြိုးခုန်လိုက်နဲ့ နောက်ဆုံးတော့ အိပ်တောင် အိပ်ပျော်သွားသေးတယ်။ သူမက ဆရာတော်ကို ငါတို့လို ယုံကြည်တယ်ဆိုတာကိုတော့ ငါတို့ လုံးဝ မယုံဘူး။

ယဇ်ပုရောဟိတ်များသည် မျက်လုံးပြူးကာ နတ်ဘုရားအာရုံကို ဖွင့်ထားပြီး၊ ကျီခုံးခုံး လူသတ်ပြီးနောက် ကုသိုလ်တော်စွမ်းအား မရရှိသည့် မြင်ကွင်းကို စောင့်ကြည့်နေကြသည်။

သူတို့ မျက်စိ နှစ်ခါဆက်တိုက် လည်သွားမည် မဟုတ်ကြောင်း ယုံကြည်ထားကြသည်။

သို့သော်... သူတို့၏ မျက်စိရှေ့မှာပင် နတ်ဘုရားသိုက်စွမ်းအားများ ထွက်ပေါ်လာပြီး ကျီခုံးခုံးအား လွှမ်းခြုံသွားသည်ကို တွေ့လိုက်ရပြန်သည်။

"မင်း... အောင်မြင်သွားပြီ။" ဖုန်းကျန်းရန်က ကျီခုံးခုံးကို ဝေခွဲမရသော မျက်နှာထားဖြင့် ကြည့်ကာ ပြောလိုက်သည်။

ကျီခုံးခုံးမှာမူ ဇဝေဇဝါ ဖြစ်နေသည်။ သူမ ဓားကိုတောင် မကိုင်ရသေးဘဲ ဘယ်လိုလုပ် အောင်မြင်သွားတာလဲ။ သူမက ချစ်စရာကောင်းလွန်းလို့လား။

"ဟဲဟဲ... ဒါကို 'လွတ်လပ်သော စိတ်ကြိုက် အတိဒုက္ခ' လို့ ခေါ်တယ်။ အတိဒုက္ခကြုံရတဲ့သူတွေကို ကိုယ်လိုချင်တဲ့ စိတ်ကူးယဉ်ကမ္ဘာထဲကို လွတ်လပ်စွာ ရောက်သွားအောင် လုပ်ပေးနိုင်တယ်။" ဆန္ဒပြည့်ဘူးသီးက 'အသံလွှတ်အတတ်' ဖြင့် ဂုဏ်ယူဝင့်ကြွားစွာ ပြောလိုက်သည်။ "သူတို့က မင်း ကုသိုလ်တော်စွမ်းအား ရသွားတဲ့ ပုံရိပ်ယောင်ကို မြင်အောင် ငါ လုပ်ပေးလိုက်တာလေ။"

"ဘူးသီးက တော်တော်အစွမ်းထက်တာပဲ။" ကျီခုံးခုံးက ပါးစပ်လေးဟကာ ခရမ်းရောင် ဆန္ဒပြည့်ဘူးသီးလေးကို ပုတ်ပေးလိုက်သည်။

"ငါ ပြောပြမယ်၊ ငါ့နောက်ကိုသာ လိုက်ခဲ့ရင်... ဒီလောကကြီးမှာ မင်း သွားချင်တဲ့နေရာ သွားလို့ရပြီး လုပ်ချင်တာ အကုန် လုပ်လို့ရတယ်။"

"နင်က လူသားဧကရာဇ်ကျန်းလောက် သန်မာလားဟင်။" ကျီခုံးခုံး၏မျက်လုံးလေးများ အရောင်လက်သွားသည်။ သူမ၏ အကြီးမားဆုံး ဆန္ဒမှာ ကျန်းလီကဲ့သို့ သန်မာလာရန်ပင် ဖြစ်သည်။

"... ငါက ဘာလို့ ငါ့သခင်မနားမှာ မရှိဘဲ ဒီကို ရောက်နေရတာလဲလို့ မင်း ထင်လဲ။"

ဖုန်းကျန်းရန်သည် စစ်မှန်သော ဂိုဏ်းဝင်တစ်ဦး၊ ယာယီ ဂိုဏ်းဝင်ငါးဦးနှင့် အတုအယောင် ဂိုဏ်းဝင်နှစ်ဦး (ကျန်းလီနှင့် ကျီခုံးခုံး) ကို ရှေ့သို့ ခြေလှမ်းအနည်းငယ် တိုးခိုင်းလိုက်ပြီး၊ ဆရာတော်၏ ရုပ်တုရှေ့တွင် ရပ်စေလိုက်သည်။

သူသည် အသွေးအချို့ ပါဝင်နေသော ဖလား ရှစ်လုံးကို ထုတ်ယူလိုက်သည် - "အခု တတိယအဆင့် အခမ်းအနားကို စမယ်။ ဒါဟာ နောက်ဆုံးအဆင့်ဖြစ်ပြီး 'ရေဖြင့် သစ္စာဆိုခြင်း' ပဲ။"

"ဒါက ဂိုဏ်းချုပ်က ဆရာတော်ဆီကနေ ရထားတဲ့ ဆရာတော်ရဲ့ ကောင်းချီးပေးခံထားရတဲ့ သန့်စင်သောရေတွေပါ။ ဒီအထဲမှာ 'စကားပိတ်၊ အပြုအမူပိတ်' ဆိုတဲ့ အစွမ်းတွေ ပါဝင်တယ်။ ဒီရေကို သောက်လိုက်ရင် မင်းတို့ဟာ ဘယ်လိုနည်းလမ်းနဲ့မှ ဂိုဏ်းရဲ့ သတင်းအချက်အလက်တွေကို အပြင်ကို ပေါက်ကြားအောင် လုပ်လို့ မရတော့ဘူး။"

"ချန်ကျီချီ၊ လုံလီ၊ လုံခုံးခုံး... မင်းတို့ သုံးယောက်က ဆရာတော်အပေါ် ယုံကြည်မှု ကြီးမားတယ်ဆိုတာ လူတိုင်း အသိပဲ။ ဒါကြောင့် မင်းတို့က တရားဟောပြောခွင့်ရှိသူတွေဖြစ်ဖို့ အရည်အချင်း ပြည့်မီတယ်။"

ဖုန်းကျန်းရန်က ဖလား သုံးလုံးကို သီးသန့် ဖယ်ထုတ်လိုက်သည် - "ဒီဖလား သုံးလုံးကတော့ နည်းနည်း ကွာခြားတယ်။ သောက်ပြီးသွားရင် ဂိုဏ်းရဲ့ သတင်းအချက်အလက် တချို့ကို အပြင်ကို ပြောပြလို့ ရတယ်။ မင်းတို့ သုံးယောက်မှာ မေးစရာ ရှိသေးလား။"

ကျန်းလီက ရင်းနှီးဖော်ရွေသော အပြုံးဖြင့် လက်မြှောက်ကာ မေးလိုက်သည် - "တခြား မေးစရာတော့ မရှိပါဘူး။ ကျွန်တော်တို့ရဲ့ ဂိုဏ်းချုပ်က ဘယ်မှာလဲလို့ သိချင်ရုံလေးပါ။"

***