အခန်း (၇၇-၇၈)

မဟာယာနအဆင့်ရောက်မှ စနစ်က ပေါ်လာသတဲ့

Mahayana 77

အခန်း ၇၇ ။ သေဆုံးသူ တစ်ဦး

နတ်ဘုရားသိုက်ဂိုဏ်းသည် လွန်ခဲ့သော နှစ် ၄၀၊ ၅၀ ခန့်က စတင် ပေါ်ပေါက်လာခဲ့ပြီး၊ ထျန်းယွမ်အင်ပါယာတွင်သာ သူတို့၏ ခြေရာများကို တွေ့ရှိရသည်။ ကောလာဟလများအရ ကျင့်ကြံသူတစ်ဦးသည် အိပ်မက်ထဲတွင် 'နတ်ဘုရားသိုက် ဆရာတော်' ကို ဖူးတွေ့ခဲ့ရပြီး၊ ထိုဆရာတော်ထံမှ နတ်ဘုရားသိုက် စွမ်းအားများအကြောင်း လျှို့ဝှက်ချက်ကို သိရှိခဲ့သည်ဟု ဆိုသည်။ အိပ်ရာမှ နိုးလာသောအခါ ထိုကျင့်ကြံသူသည် နတ်ဘုရားသိုက်ဂိုဏ်းကို တည်ထောင်ကာ ဂိုဏ်းချုပ်ဖြစ်လာပြီးနောက်၊ လူများကို စည်းရုံးသွေးဆောင်ကာ နတ်ဘုရားသိုက် စွမ်းအားကို ရရှိမည့် နည်းလမ်းများ ဖြန့်ဝေခဲ့ခြင်း ဖြစ်သည်။

နတ်ဘုရားသိုက်ဂိုဏ်း၏ ယုံကြည်ချက်အရ လူသားခန္ဓာကိုယ်အတွင်း၌ လျှို့ဝှက်သိုက်ကြီးတစ်ခု ရှိနေပြီး၊ ၎င်းကိုသာ ဖော်ထုတ်နိုင်မည်ဆိုပါက နတ်ဘုရားအဖြစ်သို့ တက်လှမ်းရန်မှာ အလွန်လွယ်ကူသော ကိစ္စဖြစ်သွားမည်ဟု ဆိုသည်။ သို့သော် ကျင့်ကြံသူများ၏ အသိဉာဏ် ကန့်သတ်ချက်နှင့် အတွေ့အကြုံ နည်းပါးမှုကြောင့် ကိုယ်ပိုင်လျှို့ဝှက်သိုက်ကြီးကို ရှာဖွေတွေ့ရှိရန်မှာ မဖြစ်နိုင်ပေ။ ကံကောင်းထောက်မစွာဖြင့် နတ်ဘုရားသိုက် ဆရာတော်က နည်းလမ်းများကို ချပေးခဲ့သည်။ ကောင်းကင်တာအိုတွင် ပုံသေနိယာမများရှိသော်လည်း အခွင့်အရေး တစ်ခုတော့ ချန်ထားပေးလေ့ရှိရာ၊ အခြားသူများ၏ အသက်ကို အသုံးပြု၍ မိမိ၏ နတ်ဘုရားသိုက် စွမ်းအားကို ဖွင့်လှစ်နိုင်သည်ဟု ဆိုထားသည်။

သို့သော် ဤကိစ္စမှာ ကောင်းကင်၏ လျှို့ဝှက်ချက်ဖြစ်သဖြင့် အပြင်သို့ အလွယ်တကူ မပေါက်ကြားစေရ။ ဆရာတော်ကို မယုံကြည်သူများသည် ထိုနည်းလမ်းကို သိရှိခွင့်မရှိပေ။ ထို့ပြင် သူတစ်ပါး၏ အသက်ကို သတ်ဖြတ်ခြင်းမှာ ကောင်းကင်၏ မျှတမှုကို ထိခိုက်စေသဖြင့် လူတစ်ဦးလျှင် အများဆုံး လူ ၁,၀၀၀ ကိုသာ သတ်ဖြတ်ခွင့်ရှိသည်ဟု ကန့်သတ်ထားသည်။

ဤအချက်များမှာ ကောင်းကင်လျှို့ဝှက်ချက်မျှော်စင်က သိရှိထားသော နတ်ဘုရားသိုက်ဂိုဏ်း၏ အချက်အလက် အားလုံးပင် ဖြစ်သည်။ ထိုအချက်အလက်များထဲတွင် 'နတ်ဘုရားသိုက်စွမ်းအား' ဟုသာ ရေးသားထားပြီး ကုသိုလ်တော်စွမ်းအားဟု တစ်လုံးမျှ မပါဝင်ပေ။

စဉ်းစားကြည့်လျှင်လည်း သဘာဝကျလှသည်။ အကယ်၍သာ နတ်ဘုရားသိုက် စွမ်းအားသည် ကုသိုလ်တော်စွမ်းအားဖြစ်မှန်း သူတို့ သိရှိခဲ့ပါက၊ ကျန်းလီ လာမေးသည်အထိ စောင့်နေစရာ မလိုဘဲ သူတို့ဘာသာ လာရောက် သတင်းပေးမည်မှာ သေချာသည်။

ကုသိုလ်တော်စွမ်းအားဆိုသည်မှာ ကောင်းကင်တာအိုက ကျင့်ကြံသူများ၏ လုပ်ရပ်အပေါ် အသိအမှတ်ပြုခြင်းဖြစ်သည်။ ယခုလို အခြေအနေအရဆိုလျှင်၊ ကောင်းကင်တာအိုက လူသတ်ခြင်းကို အားပေးနေသည်ဟု ဆိုလိုရာရောက်နေသည် မဟုတ်လား။

ဤအချက်၏နောက်ကွယ်တွင် ပါဝင်နေသော သတင်းအချက်အလက်များမှာ အလွန် ကြီးမားလွန်းလှသည်။

တာအိုဂိုဏ်းရော ကောင်းကင်လျှို့ဝှက်ချက်မျှော်စင်ပါ ထျန်းယွမ်အင်ပါယာသို့ ဦးတည်ညွှန်ပြနေသဖြင့် ကျန်းလီသည် ထိုနေရာသို့ သေချာပေါက် သွားရောက်ရမည်ဖြစ်သည်။ ထို့အပြင် လုံမိသားစု ဘိုးဘေးကြီး ပြောခဲ့သော 'စစ်သူကြီးချုပ်၏ လျှို့ဝှက်ချက်' ဆိုသည်မှာလည်း ဤနတ်ဘုရားသိုက်ဂိုဏ်းအကြောင်း ဖြစ်မည်ဟု သူ သံသယဝင်နေမိသည်။

တကယ်တော့ ကျန်းလီသည် ယွီယင်ထံသို့ သွားရောက်ကာ အခြေအနေများကို မေးမြန်းချင်သော်လည်း၊ သူမသည် အတိဒုက္ခဖြတ်ကျော်ခြင်းအဆင့်သို့ တက်လှမ်းရန် အားယူနေချိန်ဖြစ်ရာ မနှောင့်ယှက်လိုတော့သဖြင့် ထိုအကြံကို လက်လျှော့လိုက်ရသည်။

…..

ယခုအချိန်တွင် ထျန်းယွမ်မြို့တော်တစ်ခုလုံး၌ တင်းမာသော အငွေ့အသက်များ လွှမ်းခြုံနေသည်။ နိုင်ငံရေးကို စိတ်မဝင်စားသော ကျင့်ကြံသူများပင်လျှင် ထျန်းယွမ်ဧကရီသည် အတိဒုက္ခဖြတ်ကျော်ခြင်းအဆင့်သို့ တက်လှမ်းရာတွင် ကျရှုံးခဲ့ပြီး အတွင်းဒဏ်ရာရသွားခဲ့ကြောင်း ကြားသိနေကြရသည်။ နန်းတွင်းသမားတော်များမှာ ဘာမှမတတ်နိုင်ကြသလို၊ တာအိုဂိုဏ်းမှ ပင့်ဖိတ်ထားသော အဂ္ဂိရတ်တောင်မှ အကြီးအကဲများကလည်း ခေါင်းခါလျက်၊ ဤအတွင်းဒဏ်ရာကို ကုသရန်အတွက် ငြိမ်သက်စွာ အနားယူရန်သာ လိုအပ်ပြီး ဒေါသထွက်ခြင်း၊ စိတ်လှုပ်ရှားခြင်းများ လုံးဝ မပြုလုပ်ရန် မှာကြားထားခဲ့ကြသည်။

ထျန်းယွမ်ဧကရီသည် သမားတော်များ၏ အကြံပြုချက်ကို နားထောင်ကာ ယန်ရှင်းခန်းမတွင်သာ အနားယူနေပြီး၊ နိုင်ငံတော်အရေးကိစ္စများကို အမတ်မင်းများထံ လွှဲအပ်ထားခဲ့သည်။

ယခင် တော်ဝင်မိသားစုဝင်ဟောင်းများသည် ဤအခြေအနေကို တွေ့သောအခါ နှစ်ထောင်ချီမှ တစ်ခါကြုံရခဲသော အခွင့်အရေးကြီးအဖြစ် မှတ်ယူလိုက်ကြသည်။ ဧကရီ၏ မာနကြီးမှုကြောင့် သူတို့အား အမြစ်ပြတ် မချေမှုန်းခဲ့ခြင်းအပေါ် ယခုအချိန်တွင် နောင်တရစေရမည်ဟု ဆုံးဖြတ်လိုက်ကြသည်။ သူမကို ရာဇပလ္လင်ပေါ်မှ ဆွဲချကာ မြေကြီးပေါ်တွင် အညှာအတာမဲ့စွာ နင်းခြေပစ်ရန် ကြံစည်နေကြတော့သည်။

သူတို့သည် အင်အားစု အသီးသီးနှင့် နန်းတွင်းအမတ်များကို ဆက်သွယ်ကာ ယွီယင်၏အုပ်ချုပ်မှုကို တစ်ခါတည်း အမြစ်ပြတ် ဖြုတ်ချရန် ပြင်ဆင်နေကြသည်။

နယ်စပ်တွင် အမြဲတမ်း တပ်စွဲထားလေ့ရှိသော စစ်သူကြီးချုပ် ချယ်ဝူ ပင်လျှင် မြို့တော်သို့ ပြန်လည် ရောက်ရှိလာခဲ့ပြီး၊ လက်ရှိတွင် မဟာကျိုးနှင့် အသေးစား ပဋိပက္ခများသာရှိသဖြင့် စိုးရိမ်စရာမရှိကြောင်း အကြောင်းပြချက် ပေးခဲ့သည်။

သို့သော် ဤကိစ္စသည် ဧကရီ၏အမိန့်ဖြင့် ပြန်လာခြင်း မဟုတ်ဘဲ၊ အမတ်များ၏ ဆုံးဖြတ်ချက်ဖြင့်သာ ပြန်လာခြင်းဖြစ်ကြောင်း လူတိုင်း သိရှိကြသည်။ သို့သော် ၎င်းမှာ ဧကရီက သွယ်ဝိုက်၍ ခွင့်ပြုထားခြင်းလား၊ သို့မဟုတ် အမတ်များက သဘောကျ ဆုံးဖြတ်လိုက်ခြင်းလား ဆိုသည်ကိုမူ မည်သူမျှ အတိအကျ မသိကြပေ။

လူပေါင်းများစွာကို သတ်ဖြတ်ခဲ့ဖူးသော ခန္ဓာပေါင်းစည်းခြင်းအဆင့် ကျင့်ကြံသူတစ်ဦး၏ ဝင်ရောက်လာမှုသည် မကြာမီ ဖြစ်ပွားတော့မည့် ပုန်ကန်မှုအပေါ် အကြီးအကျယ် သက်ရောက်မှု ရှိနိုင်ပေသည်။

ယခင်က မြို့တော်သည် ထျန်းယွမ်အင်ပါယာ၏ မြို့များထဲတွင် အစည်ကားဆုံးနှင့် စည်းကမ်းအကျဆုံး ဖြစ်ခဲ့သည်။ နိုင်ငံရေးခေါင်းဆောင်များမှာ အချင်းချင်း ပြုံးပြုံးရွှင်ရွှင်နှင့် မျက်နှာဖုံးစွပ်ကာ ဆက်ဆံနေခဲ့ကြသောကြောင့် ဖြစ်သည်။ သို့သော် ယခုအခါ လမ်းမများပေါ်တွင် ရာဇဝတ်ဌာနက လူသတ်မှုများကို စုံစမ်းစစ်ဆေးနေခြင်း၊ သို့မဟုတ် တာ့လီရုံးတော်က တရားခံများကို ဖမ်းဆီးနေခြင်း စသည့် မြင်ကွင်းများကိုသာ တွေ့မြင်နေရပြီး၊ တစ်ခါတစ်ရံ ဌာနနှစ်ခု၏တာဝန်များပင် ပြောင်းပြန် ဖြစ်နေတတ်သည်။

သူတို့၏ တာဝန်ဝတ္တရားများမှာ စတင်ရှုပ်ထွေးနေပြီဖြစ်သည်။

ကျန်းလီသည် စစ်သူကြီးချုပ် ချယ်ဝူ၏ အိမ်တော်ရှေ့တွင် ရပ်နေသည်။ အိမ်တော်အတွင်း အဝင်အထွက် လုပ်နေသော ရာဇဝတ်ဌာနနှင့် တာ့လီရုံးတော်မှ အရာရှိများသည် လူသတ်မှုကို စုံစမ်းစစ်ဆေးနေကြသည်။

သေဆုံးသူ၏အမည်မှာ ချယ်ဝူ ဖြစ်ပြီး၊ ရာထူးမှာ စစ်သူကြီးချုပ် ဖြစ်သည်။ ကနဦး စုံစမ်းစစ်ဆေးချက်များအရ သေဆုံးချိန်မှာ လွန်ခဲ့သော တစ်နာရီခန့်ကဖြစ်ပြီး၊ တိုက်ကွက် တစ်ကွက်တည်းဖြင့် အသတ်ခံရကာ ဝိညာဉ်ပါ ပျက်စီးသွားခဲ့သည်။ လူသတ်သမားကို မသိရသေးသော်လည်း၊ ချယ်ဝူ၏ ယုံကြည်ရသော လူယုံတစ်ဦးဖြစ်နိုင်ကြောင်း ခန့်မှန်းထားကြသည်။

…..

လွန်ခဲ့သော တစ်နာရီက... ကျန်းလီသည် နတ်ဘုရားသိုက်ဂိုဏ်းမှ အဘိုးအိုနှင့် ဆုံတွေ့ခဲ့ချိန်ဖြစ်သည်။

ရာဇဝတ်ဌာနသည် ယခင် တော်ဝင်မိသားစုဟောင်းကို ထောက်ခံပြီး၊ တာ့လီရုံးတော်သည် ထျန်းယွမ်ဧကရီကို ထောက်ခံကြသည်။ နှစ်ဖက်စလုံးက တစ်ဖက်လူ၏လက်ချက်ဖြင့် ချယ်ဝူ အသတ်ခံရသည်ဟု သံသယဝင်နေကြပြီး အပြန်အလှန် စမ်းသပ်မေးမြန်းနေကြသော်လည်း မည်သည့်အရာမျှ ထွက်မလာခဲ့ပေ။

ကျန်းလီသည် ချယ်ဝူ၏အိမ်တော်အတွင်းသို့ ဝင်သွားပြီး၊ ချယ်ဝူ၏ မျက်နှာအမူအရာကို တိတ်တဆိတ် ကြည့်ရှုလိုက်သည်။ ကြောက်ရွံ့ခြင်း၊ ဝေခွဲမရဖြစ်ခြင်း၊ နားမလည်နိုင်ခြင်း စသည်ဖြင့် ကျန်းလီ မြင်တွေ့ခဲ့ဖူးသော မရေမတွက်နိုင်သည့် သေဆုံးသူများကဲ့သို့ပင် ချယ်ဝူ၏မျက်နှာအမူအရာမှာလည်း စုံလင်လှသည်။

သူလည်း ဘာမှ မခန့်မှန်းနိုင်သော်လည်း ကိစ္စမရှိပေ။ ဤကိစ္စအတွက် ကျွမ်းကျင်သူ မိသားစုတစ်ခု ရှိနေပြီး သူတို့ထံမှ အကူအညီ တောင်းခံနိုင်သည်ကို သူ သိထားသည်။

"အခု အားလား။" ကျန်းလီသည် မဟာကျိုးနန်းတော်သို့ ရောက်လာပြီး၊ တာအိုဂိုဏ်းမှ ထုတ်လုပ်သော ဉာဏ်လင်းဆေးကို မျိုချကာ ညီလာခံမှတ်တမ်းများကို ဖတ်ရှုနေသော ကျီကျစ်ကို တွေ့လိုက်ရသည်။

"ငါ မမေးလိုက်ဘူးလို့ပဲ သဘောထားလိုက်ပါ။" ကျန်းလီသည် ကျီကျစ်၏ အကြည့်နှင့် ဆုံလိုက်သောအခါ၊ ဒီလူ အဘယ်ကြောင့် ဝိညာဉ်အသွင်ပြောင်းခြင်းအဆင့်၌သာ တစ်ဝဲလည်လည် ဖြစ်နေရသလဲဆိုသည်ကို သဘောပေါက်သွားသည်။

အလုပ်များလွန်းသဖြင့် ကျင့်ကြံရန် အချိန်မရှိသောကြောင့်ဖြစ်သည်။

"ရတနာတွေနဲ့ပတ်သက်တဲ့ ယာယီဥပဒေ ပြဌာန်းလိုက်လို့ ပြဿနာ ဘယ်လောက်တောင် တက်နေလဲ မင်း သိလား။" ကျီကျစ်၏ ရှေ့မှောက်ရှိ မှတ်တမ်းစာအုပ်များမှာ အခြားအရာများ မဟုတ်ဘဲ၊ စမ်းသပ်မြို့အချို့တွင် ဥပဒေကို စတင်ကျင့်သုံးပြီးနောက် ဖြစ်ပေါ်လာသော ဆိုးကျိုးများအကြောင်း ရေးသားထားခြင်း ဖြစ်သည်။ အမတ်များက စုစည်းတင်ပြလာသော ဖြေရှင်းနည်းများကို ကျီကျစ်က တစ်ချက်ချင်းစီ ပြန်လည်ချေပကာ ဥပဒေပြင်ဆင်ရမည့် အချက်များကို ရေးသားနေရခြင်းဖြစ်သည်။

"ပြော... ငါ့ဆီ ဘာကိစ္စ လာတာလဲ။"

"သတင်းကောင်း တစ်ခုရှိတယ်။ မင်းတို့ မဟာကျိုးနယ်စပ်ကို အမြဲတမ်း နှောင့်ယှက်နေတဲ့ စစ်သူကြီးချုပ် ချယ်ဝူ သေသွားပြီ။"

ကျီကျစ် ကြောင်အမ်းသွားသည် - "ဘယ်တုန်းက ဖြစ်တာလဲ။"

"လွန်ခဲ့တဲ့ တစ်နာရီလောက်က။"

"မင်းက အဲ့ဒီ သတင်းကောင်းကို ငါ့ဆီ လာပြောပြတာ သက်သက်ပဲလား။" ကျီကျစ်ကတော့ ကျန်းလီ ဤမျှအထိ သဘောကောင်းမည်ဟု မယုံကြည်ပေ။

"ဟုတ်တယ်။ ပြီးတော့ လူသတ်သမား ဘယ်သူလဲဆိုတာ စုံစမ်းဖို့ မင်းအကူအညီ လာတောင်းတာ။"

"လတ်တလော ဥပဒေကိစ္စတွေ အဆင်ပြေအောင် ငါ ထပ်ဆင့်သူငယ်အိမ်ကို ခဏခဏ သုံးနေရလို့ မျက်စိတောင် ကွယ်တော့မလို ဖြစ်နေပြီ၊ မင်းလည်း မြင်တဲ့အတိုင်းပဲလေ။ ဥပဒေမှာလည်း ပြင်စရာတွေ အများကြီး ရှိသေးတယ်။ မင်း သိပ်မလောဘူးဆိုရင် နောက်ဆယ်ရက်လောက်နေမှ ငါ့မျက်စိ သက်သာသွားတဲ့အခါ ကူရှာပေးမယ်။"

"မင်း လောနေတယ်ဆိုရင်တော့... ကျီခုံးခုံးကို အကူအညီ တောင်းလို့ ရတယ်။"

ထိုအခါမှ ကျန်းလီသည် ကျီကျစ်၏ အငယ်ဆုံးသမီးလေး၊ မဟာကျိုး၏ ၁၉ ဆက်မြောက် မင်းသမီးလေး 'ကျီခုံးခုံး' ကို သတိရသွားသည်။

"သူက အသက် ၇ နှစ်၊ ၈ နှစ်လောက်ပဲ ရှိသေးတာ မဟုတ်လား။ ကျင့်ကြံမှုကလည်း ချီသန့်စင်ခြင်း အဆင့် (၃) လောက်ပဲ ရှိဦးမှာကို... အချိန်ပြန်လှန်ခြင်းကို သုံးတတ်နေပြီလား။"

မိမိ၏ အငယ်ဆုံးသမီးအကြောင်း ပြောလိုက်သည်နှင့် ကျီကျစ်၏မျက်နှာမှာ ဂုဏ်ယူမှုများဖြင့် ပြည့်နှက်သွားသည် - "မင်း မသိသေးဘူး မဟုတ်လား။ ငါ့သမီး ခုံးခုံးလေးက မွေးကတည်းက လူပုံစံ မဟုတ်ဘူး၊ မှတ်တမ်းတွေထဲက ဘိုးဘေးဧကရာဇ်အတိုင်း ငါးဖြူလေးတစ်ကောင်အဖြစ် မွေးလာတာကွ။ အသက် ၃ နှစ်ရောက်မှ လူအသွင် ပြောင်းနိုင်ခဲ့တာ။ သူရဲ့ အချိန်တာအိုပါရမီက ငါ့ထက်တောင် သာသေးတယ်၊ ဘိုးဘေးဧကရာဇ်ကိုတောင် မှီနိုင်တဲ့ အဆင့်ပဲ။"

အကယ်၍ ထိုအတိုင်းသာဆိုလျှင် ကျီခုံးခုံး၏အနာဂတ်မှာ အလွန်တောက်ပနေပြီဖြစ်သည်။

ကျန်းလီက ကျီခုံးခုံးကို သွားရှာရန် ပြင်လိုက်စဉ်၊ ကျီကျစ်က စိုးရိမ်တကြီးဖြင့် လှမ်းမှာလိုက်သည် - "ငါ့သမီးကို သေချာ ကာကွယ်ပေးနော်။ သူ ဆံပင်တစ်ပင်လောက် ကျွတ်သွားရင်တောင် မင်းနဲ့ ငါ အဆက်အသွယ် ဖြတ်မယ်။"

ကျီကျစ် စကားမပြင်နိုင်မီမှာပင် ကျန်းလီသည် မင်းသမီးနန်းဆောင်သို့ ပျံသန်းသွားကာ ကျီခုံးခုံးကို ရှာဖွေလိုက်သည်။

……

ထိုအချိန်တွင် ကျီခုံးခုံးမှာ ရေကန်ထဲ၌ ပေါလောပေါ်နေပြီး၊ စာအုပ်တစ်အုပ်ကို ကိုင်ကာ စာအုပ်ထဲမှ အကြောင်းအရာများအတိုင်း လက်တစ်ဆစ်ခန့်ရှိသော ငါးဖြူလေးအဖြစ် ပြောင်းလဲ၍ အချိန်တာအိုကို ကျင့်ကြံနေခဲ့သည်။

"ဟင်း... တကယ်ပဲ ငါးဖြူလေးပုံစံနဲ့ကမှ အချိန်တာအိုကို နားလည်ဖို့ ပိုလွယ်တာကိုး... ဟယ်... ဦးလေးကျန်း။" ကျီခုံးခုံးသည် မည်သည့်ပုံစံဖြင့် ကျင့်ကြံရမည်ကို စဉ်းစားနေစဉ်၊ ကျန်းလီ ပြုံးပြုံးရွှင်ရွှင်ဖြင့် ဆင်းသက်လာသည်ကို မြင်လိုက်ရသည်။

မင်းသမီးလေး လူအသွင် ပြန်ပြောင်းတော့မည်ကို မြင်သောအခါ၊ နန်းတွင်းသူများက အလျင်အမြန် ပြေးလာပြီး အဝတ်များဖြင့် ကာကွယ်ပေးကာ အဝတ်အစားများ လဲလှယ်ပေးကြသည်။ ကျန်းလီကလည်း အလိုက်တသိဖြင့် ကျောခိုင်းပေးထားလိုက်သည်။

အဝတ်အစား လဲလှယ်ပြီးနောက်၊ ကျီခုံးခုံးသည် ချစ်စရာကောင်းပြီး သပ်ရပ်လှပသော မင်းသမီးလေးအဖြစ် ပြန်လည်ရောက်ရှိသွားသည်။

"ဒါက မင်းတို့ မဟာကျိုး တော်ဝင်မိသားစုရဲ့ အချိန်တာအို ကျင့်စဉ်စာအုပ်လား။" ကျန်းလီသည် ကျီခုံးခုံး၏ ခွင့်ပြုချက်ကို ရယူပြီးနောက် သူမ ဖတ်နေသော စာအုပ်ကို ယူကြည့်လိုက်သည်။ မိမိလည်း အချိန်တာအိုကို တတ်မြောက်နိုင်မည်လားဟု မျှော်လင့်မိသောကြောင့်ဖြစ်သည်။

သို့သော် စာအုပ်၏ ပထမစာမျက်နှာတွင် ကျီကျစ် ရေးသားထားသော စာတစ်ကြောင်းကို သူ တွေ့လိုက်ရသည် - အစ်ကိုကြီးကျန်း... မဖတ်ပါနဲ့တော့၊ မင်း ဘယ်လိုပဲဖြစ်ဖြစ် တတ်လာမှာ မဟုတ်ဘူး။

ကျီခုံးခုံးက ဘေးမှနေ၍ သတိပေးလိုက်သည် - "ခမည်းတော်က အချိန်တာအိုနဲ့ ပတ်သက်တဲ့ စာအုပ်တိုင်းရဲ့ ပထမဆုံး စာမျက်နှာမှာ အဲ့ဒီစာကြောင်းကို ရေးထားတာပါ။"

***

မဟာယာနအဆင့်ရောက်မှ စနစ်က ပေါ်လာသတဲ့

Mahayana 78

အခန်း ၇၈ ။ မျိုးရိုးနာမည် ပျောက်သွားတာက ရိုးနေပါပြီ

ကျီကျစ်၏ အလုပ်များလွန်းသော နိုင်ငံရေး တာဝန်များကို ထောက်ထား၍၊ ဒဏ်ရာကုသနေစဉ်မှာပင် အစီရင်ခံစာများ ဖတ်ရှုနေရခြင်းမှာ အလွန် လူမဆန်ရာ ကျရောက်သဖြင့်၊ ကျန်းလီသည် ဤကိစ္စကို မှတ်ထားပြီး နောက်မှ စာရင်းရှင်းရန် ဆုံးဖြတ်လိုက်သည်။

ကျန်းလီသည် အခြေအနေကို အကြမ်းဖျင်း ရှင်းပြလိုက်ရာ၊ မိမိက ကူညီနိုင်မည်ဆိုသည်ကို သိသောအခါ ကျီခုံးခုံးမှာ အလွန်ဝမ်းသာသွားပြီး ချက်ချင်း သဘောတူလိုက်သည်။

"သမီးက အချိန်ဘယ်လောက် နောက်ဆုတ်ပြီး ကြည့်နိုင်လဲ။"

"ဟီးဟီး... ၆ နာရီလောက် ရတယ်။" ကျီခုံးခုံးက ဂုဏ်ယူစွာဖြင့် ပြောလိုက်သည်။ ဖေဖေက သူမအား ပြောပြဖူးသည်။ မှတ်တမ်းများအရ သူမ၏ ပါရမီသည် ကျီမိသားစု သမိုင်းတစ်လျှောက်တွင် ပထမအဆင့်၌ ရှိသည်ဟု ဆိုသည်။

သူမသည် ချီသန့်စင်ခြင်း အဆင့် (၃) သာ ရှိသေးသော်လည်း၊ တာအို၏ အနှစ်သာရကို ထိတွေ့နိုင်ရုံသာမက လွတ်လပ်စွာ အသုံးပြုနိုင်စွမ်း ရှိနေခြင်းမှာ စိတ်ကူး၍ပင် မရနိုင်လောက်အောင် အံ့ဩဖွယ်ကောင်းလှသည်။

"အင်း... မဆိုးပါဘူး။" ကျန်းလီက ခပ်ပေါ့ပေါ့ပင် မှတ်ချက်ပေးလိုက်ရာ ကျီခုံးခုံးမှာ ရင်ထဲတွင် ကြည်နူးသွားသည်။ သို့သော် သူ မသိသည်မှာ ကျန်းလီ၏ စိတ်ထဲတွင်မူ - သူများ ကလေးတွေက ချီသန့်စင်ခြင်း အဆင့် (၃) နဲ့တင် ၆ နာရီလောက်ကို အချိန်နောက်ဆုတ်နိုင်နေပြီ။ ငါက မဟာယာနအဆင့် ရောက်နေတာတောင် တစ်စက္ကန့်လေးတောင် နောက်ဆုတ်လို့ မရဘူးကွာ ဟု တွေးကာ စိတ်မကောင်း ဖြစ်နေခြင်းပင်။

ကျန်းလီသည် ကျီခုံးခုံးကို ပွေ့ချီကာ ထျန်းယွမ်အင်ပါယာသို့ ပျံသန်းသွားခဲ့သည်။ ကျီခုံးခုံး၏ ဖြူဖွေးသော ခြေတံလေးများမှာ လေထဲတွင် တလွှဲလွှဲဖြစ်နေ၏။

"သမီး လူသေအလောင်း မြင်ဖူးလား။"

ကျန်းလီ ရုတ်တရက် သတိရသွားသည်။ တစ်ဖက်လူမှာ အသက် ၇ နှစ်၊ ၈ နှစ်အရွယ် ကလေးမလေးတစ်ဦးသာဖြစ်ရာ၊ သူမကို အတိတ်သို့ ပြန်သွားပြီး လူသတ်သည့် မြင်ကွင်းကို ကြည့်ခိုင်းခြင်းမှာ အလွန် ရက်စက်ရာ ကျမည်လား။ ကလေးလေးကို စိတ်ဒဏ်ရာ ရသွားစေမည်ကို သူ စိုးရိမ်မိသည်။

ကျီခုံးခုံး ခဏ တိတ်ဆိတ်သွားပြီး၊ သူမ၏အသံမှာ အနည်းငယ် တိုးဝင်သွားသည် - "မြင်ဖူးတယ်။ သမီးရဲ့ ပါရမီကို မနာလိုတဲ့ အစ်မတစ်ယောက်က သမီးကို သတ်ဖို့ ကြိုးစားတုန်းက... မေမေက သမီးကို ကာကွယ်ပေးခဲ့တယ်။ သမီးက အချိန်တာအိုကို သေချာလေ့ကျင့်ပြီး မေမေ့ဆီ ပြန်သွားချင်လို့ပါ..."

ကျန်းလီသည် အဖြစ်အပျက်ကို အသေးစိတ် ဆက်မမေးတော့ဘဲ ကျီခုံးခုံး၏ ခေါင်းလေးကိုသာ သနားကြင်နာစွာ ပွတ်သပ်ပေးလိုက်သည်။

ထျန်းယွမ်မြို့တော်သို့ ရောက်သောအခါ ကျန်းလီသည် စစ်သူကြီးချုပ်အိမ်တော်သို့ တန်းမသွားဘဲ၊ ကျီခုံးခုံးကို ခေါ်ကာ မြို့ထဲတွင် လျှောက်လည်ခဲ့သည်။ လက်ဖက်ရည်ဆိုင်တွင် လက်ဖက်ရည်သောက်ရင်း မုန့်စားကြသည်၊ လက်တွေ့နှင့် တစ်လွဲစီ ဖြစ်နေသော "လူသားဧကရာဇ် ရာဇဝင်" ပုံပြင်များကို နားထောင်ကြသည်၊ ပြီးတော့ ဆန္ဒပြည့်ဘူးသီးကို ထုတ်ပေးကာ ကျီခုံးခုံးကို ဆော့ကစားစေခဲ့သည်... လမ်းတစ်လျှောက်လုံး ကျီခုံးခုံး၏ ရယ်မောသံများဖြင့် ပြည့်နှက်နေခဲ့သည်။

ကျီခုံးခုံး၏ စိတ်အခြေအနေ ပြန်လည်ကောင်းမွန်လာသည်ကို တွေ့သောအခါမှသာ ကျန်းလီက စိုးရိမ်တကြီး မေးလိုက်သည် - "တကယ် အဆင်ပြေရဲ့လား။ ကိုယ့်ကိုယ်ကိုယ် အတင်းအကျပ် မလုပ်ပါနဲ့။ ငါ့မှာ တခြားနည်းလမ်းတွေ ရှိပါသေးတယ်။"

သူပြောသော အခြားနည်းလမ်းများဆိုသည်မှာ အခြားသော ကျီမိသားစုဝင်များကို သွားရောက် အကူအညီတောင်းခြင်းပင်ဖြစ်သည်။ သို့သော် ထိုစကားကို ကျီခုံးခုံးအား တိုက်ရိုက် ပြော၍မရပေ။

ကျီခုံးခုံးကို ခေါ်လာမိခြင်းအတွက် သူ အနည်းငယ် နောင်တရနေမိသည်။ အခု ပြန်စဉ်းစားကြည့်လျှင်၊ ၎င်းမှာ ကျီကျစ် ဤခွေးကောင်က သူ့သမီးကို စိတ်ဓာတ်ကြံ့ခိုင်လာစေရန် လေ့ကျင့်ပေးချင်သော်လည်း ကိုယ်တိုင် မလုပ်ရက်သဖြင့်၊ သူ့အား အကူအညီတောင်းခြင်းအဖြစ် အကြောင်းပြကာ အခိုင်းအစေ လုပ်လိုက်ခြင်းသာဖြစ်သည်။

နိုင်ငံရေးလုပ်ငန်းတွေက သူ့ဦးနှောက်ကို ကောင်းကောင်း မစားသေးဘူးထင်တယ်။ ငါ့ကိုတောင် အကွက်ချဖို့ အချိန်အားနေသေးတာကိုး။

"ပြဿနာမရှိပါဘူး။" ကျီခုံးခုံးက လက်သီးလေးကို ဆုပ်ပြလိုက်သည်။ ထို့နောက် စစ်သူကြီးချုပ်အိမ်တော်သို့ ရောက်သောအခါ သူမသည် ကျန်းလီရှေ့မှ ပျောက်ကွယ်သွားပြီး၊ အမောတကောဖြင့် ပြန်လည်ထွက်ပေါ်လာခဲ့သည်။

"လူသတ်သမားက စစ်သူကြီးချုပ်ရဲ့ နောက်ကျောဘက်ကနေ ရုတ်တရက် ပေါ်လာပြီး ချက်ချင်း သတ်လိုက်တာပဲ။ စစ်သူကြီးချုပ်က ဘာမှတောင် မတုံ့ပြန်လိုက်နိုင်ဘူး။ လူသတ်သမားရဲ့ မျက်နှာကိုတော့ သမီး သေချာ မမြင်လိုက်ရဘူး၊ သူ ဒီဘက်ကို ထွက်ပြေးသွားပြီး လျှို့ဝှက်နယ်မြေတစ်ခုထဲ ဝင်သွားတယ်ဆိုတာလောက်ပဲ သိတယ်။"

ကျီခုံးခုံး မြင်တွေ့ခဲ့ရသည့်အတိုင်း ကျန်းလီကို လမ်းပြပေးလိုက်ရာ၊ သူတို့သည် မြို့ပြင်ရှိ တောင်တန်းကြီးများထဲမှ နေရာတစ်ခုသို့ ရောက်ရှိသွားကြသည်။ ထိုနေရာမှာ တောင်ခါးပန်းတွင် တည်ရှိပြီး တိမ်မြူများ ဖုံးလွှမ်းနေသဖြင့် သာမန်မျက်စိဖြင့်ကြည့်လျှင် မီတာ ၂၀ ခန့်အထိသာ မြင်နိုင်သည်။ တစ်စုံတစ်ခုကို ဖုံးကွယ်ထားရန် အလွန်သင့်တော်သော နေရာပင် ဖြစ်သည်။

ကျန်းလီသည် တိမ်မြူများကြားတွင် ဝိညာဉ်သန္ဓေအဆင့် ကျင့်ကြံသူတစ်ဦးက ရွှေအမြုတေအဆင့် ကျင့်ကြံသူတစ်ဦးကို လျှို့ဝှက်နယ်မြေဝင်ပေါက်ဆီသို့ ခေါ်ဆောင်သွားနေသည်ကို မြင်လိုက်ရသည်။

"လူသတ်သမားက အဲ့ဒီ လျှို့ဝှက်နယ်မြေထဲကနေ ပြန်ထွက်လာတာ တွေ့သေးလား ကြည့်ပေးပါဦး။" ကျန်းလီက ကျီခုံးခုံးကို အချိန်ပြန်လှန်ရန် ခိုင်းလိုက်သည်။

မကြာမီမှာပင် ကျီခုံးခုံးက အဖြေပေးလိုက်သည် - "ဒီနာရီပိုင်းအတွင်းမှာ အထဲကို ဝင်သွားတဲ့လူပဲ ရှိတယ်၊ ပြန်ထွက်လာတဲ့လူ တစ်ယောက်မှ မရှိဘူး။"

လူသတ်သမားမှာ မသင်္ကာစရာများစွာ ရှိနေပြီး၊ နတ်ဘုရားသိုက်ဂိုဏ်းမှာလည်း အလွန် လျှို့ဝှက်ဆန်းကြယ်လှသည်။ ကျန်းလီသည် မြွေမမြင်ဘဲ တုတ်မရမ်းချင်သဖြင့် ဤသဲလွန်စကို အလွတ်မပေးလိုပေ။

"မိတ်ဆွေနှစ်ဦးက ဒီကနေတစ်ဆင့် အဖွဲ့အစည်းထဲ ဝင်ကြမလို့လား။" ကျန်းလီသည် ကျီခုံးခုံးကို လက်ဆွဲကာ ထိုကျင့်ကြံသူနှစ်ဦးအား ယဉ်ကျေးစွာ သွားရောက် မေးမြန်းလိုက်သည်။

ထိုရွှေအမြုတေအဆင့် ကျင့်ကြံသူ၏မျက်နှာမှာ ချက်ချင်း သတိထားသွားသော်လည်း၊ ဝိညာဉ်သန္ဓေအဆင့် ကျင့်ကြံသူကမူ မစိုးရိမ်ရန် အချက်ပြလိုက်သည်။ သူက ကျန်းလီကိုလည်း ဝိညာဉ်သန္ဓေအဆင့်မှန်း ရိပ်မိသွားသဖြင့် ယဉ်ကျေးစွာပင် ပြန်ဖြေလိုက်သည် - "မိတ်ဆွေက လူမှားနေပြီထင်တယ်။ အခု မြို့တော်ထဲမှာ အခြေအနေတွေက အရမ်းရှုပ်ထွေးနေတော့ ငါတို့ ညီအစ်ကို နှစ်ယောက်က မြို့ပြင်ကို ရှောင်ထွက်လာတာပါ။ အဖွဲ့အစည်းဆိုတာ ဘာကို ပြောတာလဲ။"

"မိတ်ဆွေ... ဒါလေးကို အရင်ကြည့်ပါဦးလား။" ကျန်းလီ၏ လက်ချောင်းထိပ်မှ ရွှေရောင် တောက်ပနေသော အငွေ့အသက်လေးတစ်ခု ထွက်ပေါ်လာသည်။ ၎င်းမှာ အလွန် အေးချမ်းတည်ငြိမ်ပြီး အိပ်မက်တစ်ခုအလား လှပနေသည်။

၎င်းမှာ သူ အဘိုးအိုထံမှ ခွဲထုတ်ယူထားသော ကုသိုလ်တော်စွမ်းအားပင်ဖြစ်သည်။

ဝိညာဉ်သန္ဓေအဆင့် ကျင့်ကြံသူ၏မျက်နှာမှာ ချက်ချင်း ပြောင်းလဲသွားပြီး၊ ကျန်းလီ၏လက်ကို အလျင်အမြန် ဖုံးအုပ်လိုက်ကာ မန္တန်တစ်ခု ရွတ်ဆိုလိုက်သည်။ လျှို့ဝှက်နယ်မြေပွင့်သွားပြီး ကျန်းလီ၊ ကျီခုံးခုံးနှင့် ရွှေအမြုတေအဆင့်ကျင့်ကြံသူတို့ကို အတွင်းသို့ ဆွဲသွင်းလိုက်သည်။

"မိတ်ဆွေက တော်တော် သတိမရှိတာပဲ။ နတ်ဘုရားသိုက်စွမ်းအားကို အပြင်မှာ ဒီလို လွယ်လွယ်ကူကူ ထုတ်ပြလို့ ဘယ်ဖြစ်မလဲ။"

လျှို့ဝှက်နယ်မြေထဲသို့ ရောက်သည်နှင့် ထိုဝိညာဉ်သန္ဓေအဆင့် ကျင့်ကြံသူက ကျန်းလီကို အပြစ်တင်လိုက်သည်။ တစ်ဖက်လူတွင် နတ်ဘုရားသိုက်စွမ်းအား ရှိနေသည်ဆိုကတည်းက ဂိုဏ်း၏ အတွင်းရေးများကို သိရှိနေသူ ဖြစ်ရမည်။ ရန်သူဖြစ်စေ၊ မိတ်ဆွေဖြစ်စေ ဂိုဏ်းအတွင်းရှိ အထက်လူကြီးများ၏ စစ်ဆေးမှုအောက်တွင် အားလုံး ပေါ်လွင်သွားမည်မှာ သေချာသည်။

သူသည် နတ်ဘုရားသိုက်ဂိုဏ်း၏ နည်းလမ်းများကို အပြည့်အဝ ယုံကြည်မှုရှိပြီး၊ နတ်ဘုရားသိုက် ဆရာတော်၏ ရုပ်တု ရှေ့မှောက်တွင် ကျန်းလီ ဘယ်လိုမှ အကွက်ဆင်၍ မရနိုင်ဟု ယုံကြည်နေသည်။

"အဲ့ဒီတုန်းက အခြေအနေက အရမ်းလောနေတော့ ဘိုးဘေးကြီးက သေသေချာချာ မမှာလိုက်ရဘူး။ နားလည်ပေးပါ။" ကျန်းလီက ရှင်းပြလိုက်သည်။

"ကျွန်တော်တို့ မောင်နှမ နှစ်ယောက်က လုံယင်မြို့က လုံမိသားစုကပါ။ ကျွန်တော့်နာမည်က လုံလီ၊ သူက ကျွန်တော့် ညီမလေး လုံခုံးခုံး လေ။" ကျန်းလီက အံကြိတ်ကာ ပြောဆိုလိုက်သည် - "ဘယ်ကနေ သတင်းရသွားလဲမသိတဲ့ ဟိုမြို့စားခွေးကောင်က ဘိုးဘေးကြီး လုံဆန်းရွှေကို ဆေးကုပေးနေတာကို သိသွားတယ်။ အဲ့ဒီအချိန်က အနှောင့်အယှက်ခံလို့မရတဲ့ အချိန်ဆိုတာကို အခွင့်ကောင်းယူပြီး ဘိုးဘေးကြီးကို ခိုးတိုက်ခိုက်ခဲ့တာ။ ဘိုးဘေးကြီးက ဒဏ်ရာနဲ့ တိုက်ရတော့ နောက်ဆုံးမှာ တစ်ကွက်လွတ်ပြီး ရှုံးသွားခဲ့ရတယ်။"

"ကျွန်တော်တို့ မောင်နှမက လုံမိသားစုရဲ့ နောက်ဆုံး ကျန်ရစ်တဲ့ သွေးဆက်တွေပါ။ ဘိုးဘေးကြီး မသေခင်မှာ ကျွန်တော်တို့ကို မှာခဲ့တယ်... မြို့တော်အနီးက အမြင့်ဆုံးတောင်ကို သွားပါ၊ တောင်ခါးပန်းမှာ တိမ်မြူတွေ ဖုံးနေလိမ့်မယ်၊ အဲ့ဒီတောင်ခါးပန်းရဲ့ တောင်ဘက်ခြမ်းမှာ လူသူသွားလာတဲ့ ခြေရာတွေတွေ့ရင် အဲ့ဒါ အဖွဲ့အစည်းက လူတွေပဲတဲ့။"

"ပြီးတော့ ဘိုးဘေးကြီးက ဒီရွှေရောင် အလင်းတန်းလေးကို ပေးခဲ့ပြီး... အဖွဲ့အစည်းက လူတွေကို ပြလိုက်ရင် အကုန် နားလည်သွားလိမ့်မယ်လို့ ပြောခဲ့တယ်။" ကျန်းလီ၏စကားများမှာ အလိမ် (၉) ပုံ၊ အမှန် (၁) ပုံ ရောနှောနေသဖြင့် ထိုဝိညာဉ်သန္ဓေအဆင့် ကျင့်ကြံသူမှာ ယုံတစ်ဝက်၊ မယုံတစ်ဝက် ဖြစ်သွားရသည်။

သူ ကြားထားသည်မှာ လုံယင်မြို့က အဘိုးကြီးလုံ အသတ်ခံလိုက်ရသည်ဟုသာ ဖြစ်သည်။ အဘိုးကြီးလုံသည် ဂိုဏ်းထဲ မဝင်ထားသော်လည်း၊ နတ်ဘုရားသိုက်ဂိုဏ်း၏ 'ယဇ်ပုရောဟိတ်လီ' နှင့် အဆက်အသွယ်ရှိပြီး၊ လူသားလောင်စာများကို မကြာခဏ ပေးပို့လေ့ရှိကြောင်း သူ သိထားသည်။ ယဇ်ပုရောဟိတ်လီကများ ဂိုဏ်း၏တည်နေရာကို အဘိုးကြီးလုံအား ပြောပြခဲ့တာများလား။

နှမြောစရာကောင်းသည်မှာ ယဇ်ပုရောဟိတ်လီမှာ အပြင်ထွက်သွားပြီး မည်သည့်နေ့ ပြန်လာမည်ကို မသိရသေးပေ။

ကျီခုံးခုံးမှာမူ မျက်တောင်လေး ပုတ်ခတ်ပုတ်ခတ်ဖြင့် ဘာမှ ဝင်မပြောပေ။ သူမ၏ခမည်းတော် ပြောပြဖူးသော စကားကို သတိရသွားသည်။ ကျန်းလီနှင့်အတူ အပြင်ထွက်လျှင် မိမိ၏ မျိုးရိုးနာမည် ပျောက်သွားတတ်ကြောင်း၊ သို့သော် စိုးရိမ်စရာမလိုဘဲ ယင်းမှာ ပုံမှန်ကိစ္စသာဖြစ်ကြောင်း ခမည်းတော်က ပြောခဲ့ဖူးသည်။

"မိတ်ဆွေ... ဒါက ဘာစွမ်းအားလဲဆိုတာ ပြောပြလို့ရမလား။ ကျွန်တော်က ဘာလို့ စုပ်ယူလို့ မရတာလဲ။" ကျန်းလီက မေးလိုက်သော်လည်း ဝိညာဉ်သန္ဓေအဆင့် ကျင့်ကြံသူက ပြန်မဖြေပေ။

"မင်းတို့က ဒီလျှို့ဝှက်နယ်မြေအထိ ရောက်လာပြီဆိုမှတော့ ငါတို့ဂိုဏ်းထဲကို မဖြစ်မနေဝင်ရတော့မှာပဲ။ အခု လူ ၁၀ ယောက် ကွက်တိ ပြည့်သွားပြီဆိုတော့ ဂိုဏ်းဝင်တဲ့ အခမ်းအနား လုပ်လို့ရပြီ။ ခဏနေရင် အခမ်းအနားကို ငါ ဦးဆောင်မယ်။ ငါ့ကို ဖုန်းကျန်းရန်လို့ ခေါ်လို့ရတယ်။"

"ကျွန်တော်က ချန်ကျီချီ ပါ။" ရွှေအမြုတေအဆင့် ကျင့်ကြံသူက သူ့ကိုယ်သူ မိတ်ဆက်လိုက်သော်လည်း၊ မည်သူကမျှ သူ့နာမည်ကို ဂရုမစိုက်ကြပေ။

ကျန်းလီသည် နတ်ဘုရားအာရုံဖြင့် လျှို့ဝှက်နယ်မြေတစ်ခုလုံးကို အာရုံခံကြည့်လိုက်ရာ၊ ဤနေရာတွင် အမြင့်ဆုံး ကျင့်ကြံမှုမှာ ဝိညာဉ်အသွင်ပြောင်းခြင်းအဆင့်သာရှိကြောင်း တွေ့ရသည်။ လူသတ်သမားမှာ ဤလူများထဲတွင် သေချာပေါက် မပါဝင်နိုင်ပေ။

ဝိညာဉ်အသွင်ပြောင်းခြင်းအဆင့်က စစ်ပွဲတွေ အမြဲတိုက်နေတဲ့ ခန္ဓာပေါင်းစည်းခြင်းအဆင့်ကို ဘယ်လိုလုပ် သတ်နိုင်မှာလဲ။

ဒါပေမဲ့ လျှို့ဝှက်နယ်မြေက ထွက်ပေါက်တစ်ခုတည်းရှိတာကို၊ လူသတ်သမားက ဘယ်ကိုများ ရောက်သွားတာလဲ။

ကျန်းလီသည် မည်သူမျှ မိမိ၏ နတ်ဘုရားအာရုံအောက်တွင် ပုန်းကွယ်နိုင်မည် မဟုတ်ကြောင်း ယုံကြည်ချက် အပြည့်ရှိသည်။ တစ်ဖက်လူက နတ်ဘုရားအဆင့်ဖြစ်နေလျှင်သာ ချွင်းချက်ဖြစ်မည်။

လူသတ်သမားကို မတွေ့ရသေးသဖြင့်၊ ဤဂိုဏ်းဝင် အခမ်းအနား ဆိုသည်မှာ မည်သို့သော အရာဖြစ်သည်ကို အရင်ကြည့်ရှုရန် ကျန်းလီ ဆုံးဖြတ်လိုက်သည်။ သူသည် ဆန္ဒပြည့်ဘူးသီးကို ကျီခုံးခုံးအား ပေးလိုက်ပြီး၊ လည်လည်ဝယ်ဝယ်နေရန်နှင့် ကျီခုံးခုံးကို သေချာကာကွယ်ပေးရန် ဘူးသီးကို မှာကြားလိုက်လေတော့သည်။

***