အခန်း (၁၉၉-၂၀၀)

အခန်း (၁၉၉) - ပင်လယ်နီမိစ္ဆာအရှင်သခင်၏ တာအိုနယ်ပယ် ဆေးဖော်စပ်ခြင်းဆိုင်ရာ အမွေအနှစ်

ဖန်လိရှင်သည် မူလက ရွှီနင်ကို ကြောက်ရွံ့နေခဲ့သည်။ အကြောင်းမှာ ချူယဲ့ယန်ကို အောက်သို့ ပစ်ချလိုက်ပြီးနောက် သူ သေလား ရှင်လား မသိရတော့သောကြောင့် ဖြစ်ပေသည်။

သို့သော် ရွှီနင်သည် ကျန်လီကို မထိခိုက်စေဘဲ ဘေးမှ ဖြတ်ကျော်သွားသည်ကို မြင်လိုက်ရသောအခါ ဖန်လိရှင် စိတ်သက်သာရာ ရသွားတော့သည်။

သူ၏ အမြင်တွင် ရွှီနင်သည် ရက်စက်ကြမ်းကြုတ်သောသူ မဟုတ်ပေ။ သူ ချူယဲ့ယန်ကို တိုက်ခိုက်ခဲ့ရခြင်းမှာလည်း ချူယဲ့ယန်က သူ့အပေါ် အရင်ဆုံး စတင် ပရိယာယ်ဆင်ခဲ့သောကြောင့်သာ ဖြစ်သည်။

‘ဘာပဲဖြစ်ဖြစ်... ငါ တတ်နိုင်သမျှ အမြန်ဆုံး လှေကားထိပ်ကို တက်ရမယ်...’

ဖန်လိရှင်သည် လက်ရှိတွင် လှေကားထစ် အဆင့်လေးဆယ်သို့ ရောက်ရှိနေပြီ ဖြစ်သည်။

ထူထပ်သော မီးခိုးရောင် မြူထုများကို ဖြတ်ကျော်ပြီးနောက် ဖန်လိရှင်သည် လှေကား၏ အဆုံးသတ်ကို လှမ်းမြင်နေရပြီ ဖြစ်သည်။

‘စုစုပေါင်း လှေကားထစ် လေးဆယ့်ငါးထစ်ရှိတာပဲ၊ နောက်ထပ် ငါးထစ်ပဲ ကျန်တော့တယ်’

ဖန်လိရှင်သည် အံကြိတ်ကာ အားတင်းပြီး ဆက်လက် တက်လှမ်းသွားလေသည်။

အချိန်များ ဖြည်းညင်းစွာ ကုန်ဆုံးသွားသည်။

ဖန်လိရှင်သည် လေးဆယ့်လေးထစ်မြောက် အဆင့်သို့ ရောက်ရှိသွားချိန်တွင် ရွှီနင်မှာ လေးဆယ့်သုံးထစ်မြောက် အဆင့်သို့ ရောက်ရှိနေပြီ ဖြစ်သည်။

‘နောက်ထပ် နှစ်ထစ်ပဲ...’

ရွှီနင်သည် ပြင်းထန်သော ဖိအားများကို ခံစားနေရသည်။

သူ၏ အစစ်အမှန်ချီနှင့် ဂုဏ်သတ္တိစွမ်းအားများမှာ ခန္ဓာကိုယ်အတွင်း၌သာ ပိတ်မိနေပြီး အပြင်သို့ ထုတ်ဖော်၍ မရနိုင်လောက်အောင် ဖိနှိပ်ခံထားရရုံသာမက သူ၏ ဂုဏ်သတ္တိပိုင်နက်သည်ပင် မီတာဝက်ခန့်ရှိသော အကွာအဝေးသို့ပင် မပြန့်ကားနိုင်တော့ချေ။

ပြင်းထန်လှသော ဖိအားများကြောင့် ရွှီနင်၏ အရိုးများပင် တကျွတ်ကျွတ် မြည်ဟီးလာတော့သည်။

‘ငါ လေးဆယ့်သုံးထစ်မြောက်အထိ ရောက်နေပြီ၊ ဒါပေမဲ့ ဖန်လိရှင် ဆိုတဲ့လူကို အခုထိ မမြင်ရသေးဘူး။ သူ ထိပ်ဆုံးကို ရောက်သွားပြီလား’

ရွှီနင် အနည်းငယ် စိုးရိမ်သွားမိသည်။

သူသည် သိုလှောင်လက်စွပ်ထဲမှ အဖြူရောင် ဆေးလုံးအချို့ကို ထုတ်ယူကာ မျိုချလိုက်သည်။

ဆေးလုံး၏ အာနိသင်ကြောင့် ရွှီနင်၏ အစစ်အမှန်ချီ၊ ဂုဏ်သတ္တိစွမ်းအားနှင့် ကိုယ်ခံစွမ်းအားများမှာ ပြန်လည် ပြည့်ဝလာခဲ့သည်။

ရွှီနင်သည် ခြေလှမ်းကို မြှောက်ကာ လေးဆယ့်လေးထစ်မြောက် အဆင့်သို့ တက်လှမ်းလိုက်လေသည်။

‘ဟင်...’

လေးဆယ့်လေးထစ်မြောက် အဆင့်သို့ ရောက်ရှိသွားသည်နှင့် ရွှီနင်သည် မျက်နှာတစ်ခုလုံး ဖြူဖျော့နေသော ဖန်လိရှင်ကို တွေ့လိုက်ရသည်။

လေးဆယ့်လေးထစ်မြောက် အဆင့်၏ ဖိအားမှာ ဖန်လိရှင်အတွက် မခံမရပ်နိုင်လောက်အောင် ဖြစ်နေပြီဖြစ်ရာ လေးဆယ့်ငါးထစ်မြောက် အဆင့်ကိုမူ ဆိုဖွယ်ရာ မရှိတော့ချေ။

သူတို့နှစ်ဦး မျက်လုံးချင်း ဆုံသွားကြသည်။

ဖန်လိရှင်က ဖော်ဖော်ရွေရွေ ပြုံးပြလိုက်သည်။

လက်ရှိ အခြေအနေတွင် သူသည် ရွှီနင်နှင့် မည်သည့် ပဋိပက္ခမျှ မဖြစ်လိုတော့ပေ။

ရွှီနင်ကလည်း အနည်းငယ် ခေါင်းညိတ်ပြလိုက်သည်။ သူသည် ကျန်လီကို ဆက်ဆံခဲ့သလိုပင် ဖန်လိရှင်ကိုလည်း ထိုနည်းအတိုင်းပင် ဆက်ဆံလိုက်ခြင်း ဖြစ်သည်။

‘အဆင့်လေးဆယ်ကို ကျော်ပြီးတဲ့နောက်မှာ ဖိအားတိုးလာပုံက အရင်အဆင့် ဆယ်ဆင့်ပေါင်းထားတာနဲ့ တူနေပြီ’

ရွှီနင်ကိုယ်တိုင်ပင် လေးဆယ့်ငါးထစ်မြောက် အဆင့်သို့ တက်လှမ်းရန် ကြိုးစားချိန်တွင် မကျော်လွှားနိုင်သော ဖိအားကြီးကို ခံစားလိုက်ရပြီး နောက်တစ်လှမ်း ထပ်တက်လိုက်ပါက သူ၏ ခန္ဓာကိုယ် ပေါက်ကွဲသွားတော့မည်ဟု ခံစားနေရသည်။

‘ဖိအားက အရမ်းများလွန်းတယ်။ ငါ့ရဲ့ ချီစွမ်းအင်နဲ့ ဂုဏ်သတ္တိစွမ်းအားတွေကို ခန္ဓာကိုယ်အပြင်ဘက် ထုတ်လို့ မရတော့သလို ငါ့ရဲ့ ပိုင်နက်ကိုလည်း ထပ်ပြီး မချဲ့နိုင်တော့ဘူး၊ တာအိုလက်နက်ကို အသက်သွင်းဖို့ဆိုတာကတော့ ပိုတောင် မဖြစ်နိုင်ဘူး...’

ရွှီနင်သည် အင်အားများ ပြန်လည်ပြည့်ဝစေရန် ဆေးလုံးမျိုချနေသော ဖန်လိရှင်ကို ကြည့်ရင်း စိတ်ထဲမှ တွေးလိုက်မိသည်။

ဤဆေးလုံးမှာ ဖန်လိရှင်ကို ဆက်လက် တက်လှမ်းနိုင်စေရန် မကူညီနိုင်သော်လည်း သူ အောက်သို့ လဲမကျသွားအောင်သာ ထိန်းထားနိုင်ပေလိမ့်မည်။

ရွှီနင်သည် အသက်ပြင်းပြင်း တစ်ချက်ရှူလိုက်ပြီး သူ့ကို ကြည့်နေခြင်းအား ရပ်တန့်လိုက်သည်။

‘သွားကြစို့’

ခေတ္တမျှ ကိုယ်ကို ပြင်ဆင်လိုက်ပြီးနောက် ရွှီနင်သည် ခြေလှမ်းကို မြှောက်ကာ လေးဆယ့်ငါးထစ်မြောက် အဆင့်သို့ လှမ်းတက်လိုက်လေသည်။

ဂျွတ်... ဂျွတ်... ဂျွတ်...

မိမိ၏ အရိုးများ အက်ကွဲသွားသည်ကို ရွှီနင် ရှင်းလင်းစွာ ခံစားလိုက်ရသည်။

‘ငါ တောင့်ခံနိုင်ပါတယ်’

ရွှီနင်သည် အားတင်းထားလိုက်သည်။

နောက်ဆုံးတွင် ရွှီနင်သည် လေးဆယ့်ငါးထစ်မြောက် အဆင့်သို့ တက်ရောက်နိုင်ခဲ့ချေပြီ။

ဘုန်း...

ရွှီနင်၏ ပတ်ဝန်းကျင်ရှိ ဖိအားများ အားလုံး ရုတ်တရက် ပျောက်ကွယ်သွားချိန်တွင် သူသည် သွေးတစ်လုတ်ကို အန်ထုတ်လိုက်ရသည်။

ထိုအခိုက်အတန့်တွင် သူ၏ အတွင်းကလီစာများနှင့် အရိုးများမှာ ဒဏ်ရာရရှိသွားခဲ့ပြီ ဖြစ်သည်။

ရွှီနင်သည် အရိုးမီးလျှံသမထကျင့်စဉ်ကို အသက်သွင်းကာ ဆေးလုံးတစ်လုံးကို မျိုချလိုက်ပြီး ပတ်ဝန်းကျင်ကို ကြည့်ရှုရင်း ဒဏ်ရာများကို ကုသလိုက်လေသည်။

လေးဆယ့်ငါးထစ်မြောက် အဆင့်သို့ ရောက်ရှိပြီးနောက် သိပ်မခန်းနားလှသော စင်မြင့်လေးတစ်ခု ရှိနေလေသည်။

ထိုစင်မြင့်ပေါ်တွင် ကျောက်တုံးစင်တစ်ခု ရှိနေပြီး ၎င်းပေါ်တွင် မီတာဝက်ခန့် မြင့်သော ကျောက်ဆစ်ရုပ်တုတစ်ခု ရှိနေသည်။ ထိုရုပ်တုမှာ ကြက်တူရွေးကြီးတစ်ကောင်နှင့် တူသော အတောင်ပံပါသည့် ငှက်ပုံသဏ္ဌာန် ထွင်းထုထားခြင်း ဖြစ်သည်။

‘အမွေအနှစ်က ဘယ်မှာလဲ’

ရွှီနင် ဇဝေဇဝါ ဖြစ်သွားသည်။ ချူယဲ့ယန် ပြောခဲ့သော အမွေအနှစ် သုံးမျိုးကို သူ မတွေ့ရှိရပေ။

ရွှီနင် နားမလည် ဖြစ်နေစဉ်မှာပင် ကျောက်ဆစ်ရုပ်တုမှာ ရုတ်တရက် တုန်ခါလာသည်။

မျက်စိတစ်မှိတ်အတွင်းမှာပင် ကျောက်ဆစ်ရုပ်တုမှာ သက်ရှိတစ်ခုအဖြစ် ပြောင်းလဲသွားပြီး နက်မှောင်သော ငှက်ကြီးတစ်ကောင် ဖြစ်လာတော့သည်။

‘ဒါက...’

ရွှီနင်သည် အတွေ့အကြုံ များပြားသူ ဖြစ်သော်လည်း ဤမြင်ကွင်းကို မြင်လိုက်ရသောအခါ တုန်လှုပ်သွားရသည်။

‘ဒါက စိတ်ထင်ယောင်ထင်မှား ဖြစ်နေတာ မဟုတ်ဘူးလား’

ရွှီနင် ဤကဲ့သို့သော အရာမျိုးကို တစ်ခါမျှ မမြင်ဖူးချေ။ သူသည် မမြင်နိုင်သော ပုံရိပ်ယောင်တစ်ခုထဲသို့ ကျရောက်သွားသလို ခံစားနေရသည်။

“ဒါက ပုံရိပ်ယောင် မဟုတ်ဘူး”

ရုတ်တရက် နက်မှောင်သော ငှက်ကြီးက ရွှီနင်၏ အတွေးကို သိနေသကဲ့သို့ လူသားဘာသာစကားဖြင့် စကားပြောလာလေသည်။

“မင်းဟာ မိစ္ဆာအရှင်သခင်ရဲ့ စမ်းသပ်မှုကို အောင်မြင်သွားပြီ။ အမွေအနှစ် သုံးမျိုးထဲက ဘယ်တစ်ခုကို လိုချင်လဲ”

အနက်ရောင် ငှက်ကြီးမှာ တောင်ပံခတ်ကာ ရွှီနင်၏ ခေါင်းပေါ်တွင် ပျံသန်းနေလေသည်။

ရွှီနင်သည် ထိုငှက်ကို စိုက်ကြည့်ရင်း တွေးလိုက်မိသည်။

‘ဒါက မိစ္ဆာအရှင်သခင်ရဲ့ စွမ်းဆောင်ချက်လား’

သူသည် အစစ်အမှန် တာအိုနယ်ပယ် ပညာရှင်တစ်ဦးကို မတွေ့ဖူးသော်လည်း ဤလုပ်ရပ်က ရွှီနင်၏ တာအိုနယ်ပယ်သို့ ရောက်ရှိလိုသော ဆန္ဒကို ပိုမို ပြင်းပြစေခဲ့သည်။

“ပြောစမ်းပါ၊ အချိန်ဆွဲမနေနဲ့”

ရွှီနင် ပြန်မဖြေသေးသည်ကို မြင်သောအခါ အနက်ရောင် ငှက်ကြီးက တိုက်တွန်းလိုက်သည်။

“ဆေးဖော်စပ်ခြင်းပညာ... ကျွန်တော် ဆေးဖော်စပ်ခြင်းဆိုင်ရာ အမွေအနှစ်ကိုပဲ လိုချင်ပါတယ်”

ရွှီနင်က ငှက်ကြီးကို ပြန်ဖြေလိုက်သည်။

“မင်း သေချာပြီလား”

အနက်ရောင် ငှက်ကြီးသည် ကျောက်တုံးစင်ပေါ်သို့ ပြန်လည် ဆင်းသက်လိုက်သည်။ ၎င်းက ခေါင်းကို စောင်းကာ လူသားတစ်ယောက်ကဲ့သို့ အမူအရာဖြင့် ရွှီနင်ကို ကြည့်လိုက်သည်။

“သေချာပါတယ်”

ရွှီနင် ခေါင်းညိတ်ပြလိုက်သည်။

“မိစ္ဆာအနှစ်သာရကို မျိုချလိုက်ရင် မင်းဟာ မိစ္ဆာလမ်းစဉ်မှာ ပါရမီရှင်တစ်ယောက် ဖြစ်လာလိမ့်မယ်။ မိစ္ဆာလမ်းစဉ်ကို ကျင့်ကြံပြီးရင် တာအိုနယ်ပယ်ကို ချိုးဖြတ်ကျော်လွှားပြီးရင်တောင် အရှိန်အဟုန်နဲ့ ဆက်ပြီး တိုးတက်နိုင်ဦးမှာ။ မိစ္ဆာကျင့်စဉ်ကို ကျင့်ကြံရင်တော့ မင်းဟာ လျင်မြန်စွာ အဆင့်တက်နိုင်သလို တာအိုနယ်ပယ်ကို ရောက်သွားတဲ့အခါ မင်းထက် အဆင့်မြင့်တဲ့ ရန်သူတွေကိုတောင် သတ်နိုင်လိမ့်မယ်။ ဒီအမွေအနှစ်တွေကို လက်လွှတ်ဖို့ မင်း တကယ်ပဲ ဆုံးဖြတ်လိုက်ပြီလား”

အနက်ရောင်ငှက်ကြီးမှာ ရွှီနင် နောင်တရသွားမည်ကို စိုးရိမ်နေပုံရသည်။ ၎င်းက ထပ်မံ မေးမြန်းရုံသာမက ဤအမွေအနှစ်များ၏ ထူးခြားချက်များကိုပါ ရှင်းပြနေလေသည်။

“ဟုတ်ကဲ့၊ ကျွန်တော် တာအိုနယ်ပယ် ဆေးဖော်စပ်ခြင်းပညာကိုပဲ ရွေးချယ်ချင်ပါတယ်”

ရွှီနင်၏ အဖြေမှာ ယခင်အတိုင်းပင် ဖြစ်သည်။

ရွှီနင်သည် မိစ္ဆာကျင့်စဉ်နှင့် မိစ္ဆာအနှစ်သာရတို့၏ အကျိုးသက်ရောက်မှုကို ချူယဲ့ယန်ထံမှ သိရှိထားပြီး ဖြစ်သည်။

သို့သော် ထိုအရာများမှာ သူ့အတွက် မလိုအပ်ပေ။

“ကောင်းပြီ၊ မင်း ဆေးဖော်စပ်ခြင်းပညာကို ရွေးချယ်လိုက်ပြီဆိုတော့ ဒါကို ပြန်ပြင်လို့ မရတော့ဘူးနော်”

ရွှီနင် ဆုံးဖြတ်ချက်ချပြီးသည်ကို မြင်သောအခါ အနက်ရောင် ငှက်ကြီးမှာ ပါးစပ်ကို ဟလိုက်ပြီး ဝမ်းဗိုက်ကို ကျုံ့လိုက်သည်။

မကြာမီတွင် အနက်ရောင် ပုံဆောင်ခဲလုံးတစ်လုံးမှာ ငှက်ကြီး၏ ပါးစပ်မှ ထွက်လာပြီး ရွှီနင်၏ ရှေ့တွင် လွင့်မြောနေလေသည်။

“မင်းရဲ့ အစစ်အမှန်ချီကို ထည့်သွင်းလိုက်၊ ဒါဆိုရင် ဆေးဖော်စပ်ခြင်းပညာက မင်းဆီကို သဘာဝအတိုင်း ရောက်လာလိမ့်မယ်”

အနက်ရောင် ငှက်ကြီးက ပြောလိုက်သည်။

“ပြီးတော့ ဒီအနက်ရောင်လုံးက အမှတ်အသား တစ်ခုလည်း ဖြစ်တယ်။ ဆေးဖော်စပ်ခြင်း အမွေအနှစ်ကို ရပြီးသွားရင် ဒါကို လွှင့်မပစ်လိုက်နဲ့ဦး။ နောင်တစ်ချိန်မှာ မင်း တာအိုနယ်ပယ်ကို ရောက်ပြီး အဆုံးမဲ့ပင်လယ်ချောက်နက်ကြီးကို ဖြတ်ကျော်ပြီးတော့ ဝမ်ရှန့်ပြည်နယ်ကို ရောက်သွားတဲ့အခါ ဒါကို ပင်လယ်နီမိစ္ဆာဂိုဏ်းဆီ ယူသွားလိုက်ပါ။ ဒါရှိရင် မင်းဟာ ပင်လယ်နီမိစ္ဆာဂိုဏ်းရဲ့ တပည့်တစ်ယောက် ဖြစ်လာနိုင်လိမ့်မယ်”

“ပင်လယ်နီမိစ္ဆာဂိုဏ်း...”

ရွှီနင် တိုးတိုးလေး ရေရွတ်လိုက်သည်။

ရွှီနင်သည် သူ့လက်ထဲမှ အနက်ရောင် ပုံဆောင်ခဲလုံးလေးကို ကြည့်လိုက်သည်။

၎င်းမှာ ငှက်ကြီး၏ ပါးစပ်မှ ထွက်လာခြင်း ဖြစ်သော်လည်း မည်သည့် အနံ့ဆိုးမျှ မရှိချေ။

ထိုအနက်ရောင်လုံးကို ထိလိုက်သည်နှင့် ရွှီနင်သည် ၎င်းကို အသုံးပြုကာ ဤနက်နဲသော နယ်မြေထဲမှ ထွက်ခွာနိုင်မည်ဖြစ်ကြောင်း ခံစားလိုက်ရသည်။

‘ပင်လယ်နီမိစ္ဆာအရှင်သခင်ရဲ့ ဆေးဖော်စပ်ခြင်းပညာက ဘာတွေများ ထူးခြားမလဲ ကြည့်ရသေးတာပေါ့’

ရွှီနင်သည် စိတ်လှုပ်ရှားစွာဖြင့် သူ၏ အစစ်အမှန်ချီကို ထိုအလုံးထဲသို့ ထည့်သွင်းလိုက်လေသည်။

ဝူး...

ရွှီနင် သူ၏ချီကို အနက်ရောင်အလုံးထဲသို့ ထည့်လိုက်သည်နှင့် သတင်းအချက်အလက်များစွာမှာ သူ၏ စိတ်အာရုံထဲသို့ လှိုင်းလုံးကြီးများပမာ စီးဝင်လာတော့သည်။ ရွှီနင်မှာ ခေါင်းကွဲမတတ် နာကျင်မှုကို ခံစားလိုက်ရသည်။

နောက်ဆုံးအကြိမ် ဤသို့သော ခံစားမှုကို ခံစားခဲ့ရသည်မှာ သူ ဤလောကသို့ စတင်ရောက်ရှိလာပြီး မူလပိုင်ရှင်၏ မှတ်ဉာဏ်များကို ဆက်ခံခဲ့စဉ်က ဖြစ်ပေသည်။

‘သတင်းအချက်အလက်တွေက တကယ်ကို များပြားလွန်းတာပဲ’

ခုနလေးတင် လှေကားပေါ်တွင် အံကြိတ်ကာ တောင့်ခံနိုင်ခဲ့သော ရွှီနင်သည် ရုတ်တရက် မြေပြင်ပေါ်သို့ လဲကျသွားတော့သည်။

သူသည် ခေါင်းကို ပိုက်လျက် အသိစိတ်မလွတ်သွားအောင် အစွမ်းကုန် ကြိုးစားနေရသည်။ ‘ဒီလောက် သတင်းအချက်အလက် ပမာဏမျိုးက သာမန် မှတ်ဉာဏ်ပုံဆောင်ခဲတွေနဲ့ ယှဉ်ရင်တောင် များပြားလွန်းနေပြီ...’

အနက်ရောင်အလုံးထဲမှ သတင်းအချက်အလက်များမှာ ဆက်လက် စီးဝင်နေဆဲပင်။

ရွှီနင်သည် ပါးစပ်များ တဆတ်ဆတ် တုန်ယင်လျက် မြေပြင်ပေါ်တွင် လဲလျောင်းနေရလေသည်။

“ဟား... ဟား... ဟား...”

ရွှီနင်၏ သနားစရာကောင်းသော အခြေအနေကို မြင်သောအခါ အနက်ရောင် ငှက်ကြီးက လှောင်ရယ်လိုက်သည်။

၎င်းသည် ရွှီနင်၏ ကိုယ့်ကိုယ်ကိုယ် အထင်ကြီးလွန်းမှုကို လှောင်ပြောင်နေပုံရလေသည်။

အချိန်အတော်ကြာပြီးနောက်တွင်မှ ရွှီနင်သည် အနက်ရောင်အလုံးထဲမှ ဆေးဖော်စပ်ခြင်းဆိုင်ရာ အမွေအနှစ်များကို စုပ်ယူပြီးသွားတော့သည်။

သူသည် အသက်ကို ပြင်းပြင်းရှူနေရသော်လည်း သိသိသာသာကို စိတ်သက်သာရာ ရသွားချေပြီ။

‘နှစ်ခုလုံးက တာအိုနယ်ပယ် ဆေးဖော်စပ်သူ အရှင်သခင်တွေရဲ့ အမွေအနှစ်တွေပဲ၊ ဒါပေမဲ့ ဘာလို့ ဒီလောက်တောင် ကွာခြားနေရတာလဲ’

ရွှီနင်သည် မိစ္ဆာသားရဲကျမ်းစာ လျှို့ဝှက်နယ်မြေတွင် ရွှီးဟူကျွင်း၏ အကူအညီဖြင့် တာအိုနယ်ပယ် ဆေးဖော်စပ်သူ အရှင်သခင်တစ်ဦး၏ အမွေအနှစ်ကို ရရှိခဲ့ဖူးသည်။

ထိုတာအိုနယ်ပယ် ဆေးဖော်စပ်ခြင်းပညာတွင် ကန့်သတ်ချက်များ ရှိနေခဲ့သည်။ ထိုအချိန်က ရွှီနင်သည် ၎င်းကို လုံးဝ မချိုးဖျက်နိုင်ခဲ့ဘဲ တံဆိပ်တော်နယ်ပယ်သို့ ရောက်ရှိပြီးနောက်တွင်မှ ထိုကန့်သတ်ချက်များကို ချိုးဖျက်နိုင်ခဲ့ခြင်း ဖြစ်သည်။

သူသည် တာအိုနယ်ပယ်သို့ မရောက်သေးသဖြင့် တာအိုနယ်ပယ် ဆေးဖော်စပ်ခြင်းပညာကို မသင်ယူနိုင်သေးသော်လည်း ၎င်းကို ဖတ်ရှုပြီးနောက် အကြမ်းဖျင်းအားဖြင့် နားလည်ထားပြီး ဖြစ်သည်။

သို့သော် ယခု ပင်လယ်နီမိစ္ဆာအရှင်သခင်ထံမှ တာအိုနယ်ပယ် ဆေးဖော်စပ်ခြင်း အမွေအနှစ်ကို လက်ခံရရှိပြီးနောက်တွင်မူ ယခင်က သူရရှိခဲ့သော ဆေးဖော်စပ်ခြင်းပညာမှာ အပေါ်ယံမျှသာ ဖြစ်ကြောင်း ရွှီနင် သိလိုက်ရတော့သည်။

ဗဟုသုတ၊ အခြေခံမူများနှင့် ဆေးဖော်စပ်နည်းများအရ ယခင်ဆေးဖော်စပ်ခြင်းပညာမှာ ပင်လယ်နီမိစ္ဆာအရှင်သခင်၏ ပညာနှင့်ယှဉ်လျှင် များစွာ နိမ့်ကျနေသည်။ ၎င်းတို့နှစ်ခုကြားရှိ ကွာခြားချက်မှာ နယ်ပယ်ကြီးတစ်ခုလုံးစာလောက် ကွာခြားနေလေသည်။

‘ဒါဆိုရင် ဝမ်ရှန့်ပြည်နယ်မှာ ဆေးဖော်စပ်ခြင်းပညာကို အုပ်စုနှစ်စု ခွဲထားတာပေါ့၊ ပုံမှန်ဆေးဖော်စပ်ခြင်းပညာနဲ့ ဆန်းကြယ်သောဆေးဖော်စပ်ခြင်းပညာဆိုပြီးတော့...’

ရွှီနင်သည် ဆေးဖော်စပ်ခြင်းပညာ နှစ်မျိုး၏ အနှစ်သာရမှာ ကွဲပြားနေသည်ဟု အမြဲခံစားခဲ့ရသော်လည်း ယခုမှသာ အကြောင်းရင်းကို သဘောပေါက်သွားတော့သည်။

ချောက်နက်ကြီးမြောင်းပိုင်း၏ ပြည်နယ် ၁၇ ခုတွင် ကျယ်ပြန့်စွာ ပျံ့နှံ့နေသော ဆေးဖော်စပ်နည်းများမှာ ပုံမှန်ဆေးဖော်စပ်နည်းများသာ ဖြစ်ကြသည်။ ၎င်းတို့သည် ငြိမ်းချမ်းမှုနှင့် တည်ငြိမ်မှုကို အလေးထားပြီး ဆေးဖက်ဝင် ပစ္စည်းများကို မျှတအောင် ပေါင်းစပ်ကာ ဆေးလုံးများကို ဖော်စပ်ကြသည်။

သို့သော် ဆန်းကြယ်သောဆေးဖော်စပ်နည်းများမှာမူ ကွဲပြားသည်။ ၎င်းတို့သည် ပုံမှန်မဟုတ်သော လမ်းစဉ်ကိုသာ အာရုံစိုက်ကြသည်။

ဆေးလုံး၏ အာနိသင်ဖြစ်စေ၊ ဆေးဖော်စပ်သည့် လုပ်ငန်းစဉ်ဖြစ်စေ အားလုံးမှာ အစွန်းရောက်လွန်းလှပေသည်။

ဝမ်ရှန့်ပြည်နယ်တွင်ပင် ဆေးဖော်စပ်သူ အနည်းငယ်သာ ဆန်းကြယ်သောဆေးဖော်စပ်နည်းများကို ကျင့်ကြံနေကြခြင်း ဖြစ်သည်။

‘ဆေးဖော်စပ်ခြင်းမှာ မှန်ကန်တဲ့လမ်းစဉ် ဒါမှမဟုတ် မိစ္ဆာလမ်းစဉ်ဆိုတာ မရှိဘူး။ ငါသာ ပင်လယ်နီမိစ္ဆာအရှင်သခင်ရဲ့ အမွေအနှစ်ကို သင်ယူလိုက်ရင် မိစ္ဆာအုပ်စုထဲ ရောက်သွားမလားလို့ စိုးရိမ်နေတာ၊ အခုတော့ ငါ စိုးရိမ်တာ များသွားပုံရတယ်’

အကယ်၍ သူသည် နောင်တစ်ချိန်တွင် တာအိုနယ်ပယ်သို့ ရောက်ရှိပြီး ပင်လယ်နီမိစ္ဆာအရှင်သခင်၏ တာအိုနယ်ပယ် ဆေးဖော်စပ်ခြင်းပညာကို ကျင့်ကြံခဲ့လျှင်ပင် ရွှီနင်ကို ဆန်းကြယ်သော ဆေးဖော်စပ်သူအဖြစ်သာ သတ်မှတ်ခံရမည်ဖြစ်ပြီး မိစ္ဆာဆေးဖော်စပ်သူအဖြစ် သတ်မှတ်ခံရမည် မဟုတ်ပေ။

‘တကယ့်ကို ကောင်းမွန်တဲ့ ရလဒ်ပဲ’

ရွှီနင်သည် လျှို့ဝှက်နယ်မြေထဲမှ ရရှိခဲ့သော အမွေအနှစ်အတွက် အလွန်ကျေနပ်နေသည်။

သူသည် အစစ်အမှန်ပိုင်နက်နယ်ပယ်သို့ ရောက်ရှိခဲ့ရုံသာမက ဤကဲ့သို့သော အဆင့်မြင့် ဆေးဖော်စပ်သူတစ်ဦး၏ အမွေအနှစ်ကိုပါ ရရှိခဲ့သဖြင့် အလွန်ပင် ကျေနပ်အားရ ဖြစ်နေလေသည်။

‘နောက်တစ်ဆင့်အနေနဲ့ ဒီနယ်မြေထဲက ထွက်သွားပြီးတာနဲ့ တာအိုနယ်ပယ် နည်းစနစ်တွေကို စတင်သင်ယူပြီး တာအိုနယ်ပယ်ကို တက်လှမ်းရမယ်...’

ရွှီနင်သည် နောက်ထပ် ဆေးလုံးအချို့ကို မျိုချလိုက်ပြီး အရိုးမီးလျှံသမထကျင့်စဉ်နှင့် ပေါင်းစပ်ကာ သူ၏ ဒဏ်ရာ ၈၀ ရာခိုင်နှုန်းခန့်ကို ကုသလိုက်သည်။

ရွှီနင် ချူယဲ့ယန်၏ အခြေအနေကို သွားရောက်စစ်ဆေးရန် လှေကားအတိုင်း ပြန်ဆင်းရန် ပြင်လိုက်စဉ်မှာပင် ဖန်လိရှင်သည် လေးဆယ့်ငါးထစ်မြောက် အဆင့်သို့ လျှောက်လှမ်းလာသည်ကို မြင်လိုက်ရသည်။

“ငါ တက်လာပြီ”

ဖန်လိရှင်၏ နှာခေါင်းနှင့် ပါးစပ်များမှ သွေးများ ထွက်နေပြီး မျက်လုံးများမှာလည်း နီမြန်းနေလေသည်။ သူ ရှေ့သို့ တစ်လှမ်း လှမ်းလိုက်သည်နှင့် မျက်ဖြူလန်သွားကာ သတိလစ် မေ့မြောသွားတော့သည်။

‘သူ သူ့ရဲ့ အလားအလာကို အလွန်အကျွံ သုံးစွဲစေတဲ့ ဆေးလုံးတစ်လုံးကို သောက်ခဲ့တာပဲ’

ရွှီနင် ချက်ချင်း သတိပြုမိလိုက်သည်။

“နောက်ထပ် စမ်းသပ်မှုကို အောင်မြင်တဲ့သူ တစ်ယောက်ပေါ့၊ သိပ်ကောင်းတာပဲ”

အနက်ရောင် ငှက်ကြီးသည် ပျော်ရွှင်စွာဖြင့် တောင်ပံခတ်လိုက်သည်။ ၎င်းက ရွှီနင်ကို လျစ်လျူရှုလိုက်ပြီး ဖန်လိရှင်၏ ခေါင်းပေါ်သို့ ပျံသန်းသွားလေသည်။

“ဟား... ဖွီး...”

အခန်း (၂၀၀) - လျှို့ဝှက်နယ်မြေမှ ထွက်ခွာခြင်းနှင့် ဂိုဏ်းသို့ ပြန်လာခြင်း

အနက်ရောင်ငှက်ကြီးက ဖန်လိရှင်၏ မျက်နှာပေါ်သို့ တံတွေးဖြင့် ထွေးလိုက်သည်။

မကြာမီမှာပင် ဖန်လိရှင်မှာ သတိလစ်နေရာမှ နိုးလာပြီး မျက်လုံးများကို ဖွင့်လိုက်သည်။

ရွှီနင်သည် ဤမြင်ကွင်းကို ကြည့်ပြီး ထူးဆန်းအံ့သြနေမိသည်။ အနက်ရောင်ငှက်ကြီး၏ တံတွေးမှာ အဆင့်မြင့် ကုသရေးဆေးပြားများနှင့်ပင် နှိုင်းယှဉ်နိုင်ပုံရပေသည်။

“မင်းက ပင်လယ်နီမိစ္ဆာသခင်ရဲ့ စမ်းသပ်မှုကို အောင်မြင်သွားပြီ။ ကျန်နေတဲ့ အမွေအနှစ်တွေကတော့ မိစ္ဆာကျင့်စဉ်နဲ့ မိစ္ဆာအဆီအနှစ်ပဲ။ မင်း ဘယ်တစ်ခုကို ရွေးချယ်မှာလဲ။”

ဖန်လိရှင် နိုးလာသည်ကို မြင်သောအခါ အနက်ရောင်ငှက်ကြီးက မေးလိုက်သည်။

‘မိစ္ဆာအဆီအနှစ်ကို မရွေးရသေးဘူးပဲ။’

သတိပြန်ရလာကာစ ဖန်လိရှင်မှာ အတိုင်းထက်အလွန် ဝမ်းသာသွားလေသည်။ သူက ရွှီနင်ကို ကြည့်လိုက်သည်။ ဤလူမှာ မိစ္ဆာလမ်းစဉ်ကို စိတ်ဝင်စားပုံမရချေ။

“ကျွန်တော် မိစ္ဆာအဆီအနှစ်ကို ရွေးပါတယ်” ဖန်လိရှင်သည် မနည်းရုန်းကန်ကာ မတ်တတ်ရပ်လိုက်သည်။

အနက်ရောင်ငှက်ကြီး၏ ဝမ်းဗိုက်မှာ နောက်တစ်ကြိမ် ကျုံ့သွားပြီး ပါးစပ်ကို ကျယ်ကျယ်ဟလိုက်သည်။ ဤတစ်ကြိမ်တွင်မူ ငှက်ကြီးမှာ အနက်ရောင်ပုလင်းတစ်လုံးကို ထွေးထုတ်ပေးလိုက်လေသည်။

“မိစ္ဆာအဆီအနှစ်က အထဲမှာ ရှိတယ်။ မင်းရဲ့ ဒဏ်ရာတွေ လုံးဝပျောက်ကင်းသွားမှ ဒါကို သုံးစွဲလို့ ရမယ်။” အနက်ရောင်ငှက်ကြီးက ပြောလိုက်သည်။

“ဒီအနက်ရောင်ပုလင်းကို သေသေချာချာ သိမ်းထားလိုက်။ နောင်တစ်ချိန်မှာ ဝမ်ရှန့်ပြည်နယ်ကို ရောက်လာခဲ့ရင် ဒီအမှတ်အသားနဲ့ ပင်လယ်နီမိစ္ဆာဂိုဏ်းကို ဝင်ရောက်နိုင်လိမ့်မယ်။”

‘ပင်လယ်နီမိစ္ဆာဂိုဏ်းကိုတောင် ဝင်လို့ရမှာလား’

ဖန်လိရှင်၏ ဘိုးဘေးမှာ ပင်လယ်နီမိစ္ဆာသခင်၏ နောက်လိုက်တစ်ဦး ဖြစ်ခဲ့ဖူးသဖြင့် ပင်လယ်နီမိစ္ဆာသခင်အပေါ် ရိုသေကိုးကွယ်မှုမှာ စိတ်ထဲတွင် နက်နက်ရှိုင်းရှိုင်း ကိန်းအောင်းနေခဲ့ခြင်း ဖြစ်သည်။

“ကောင်းပါပြီ... ကံပါရင်တော့ ဝမ်ရှန့်ပြည်နယ်မှာ ပြန်ဆုံကြတာပေါ့”

အနက်ရောင်ငှက်ကြီးသည် ဟင်းလင်းပြင်လှေကားထစ်များကို တစ်ချက်ကြည့်လိုက်ပြီးနောက် တစ်ပတ်ဝဲပျံကာ ကျောက်စင်မြင့်ထံသို့ ပြန်သွားပြီး ကျောက်ရုပ်အဖြစ် ပြန်လည်ပြောင်းလဲသွားတော့သည်။

‘ဝမ်ရှန့်ပြည်နယ်မှာ ပြန်ဆုံမယ် ဟုတ်လား။’

ရွှီနင်သည် အနက်ရောင်ငှက်ကြီး၏ စကားများမှာ စိတ်ဝင်စားစရာ ကောင်းနေသည်ဟု ခံစားလိုက်ရသည်။

ဤနေရာတွင် ကျောက်ရုပ်အဖြစ် ပြောင်းလဲသွားပြီးဖြစ်ပါလျက်နှင့် အဘယ်ကြောင့် ဝမ်ရှန့်ပြည်နယ်တွင် ပြန်ဆုံမည်ဟု ပြောရသနည်း။

သို့သော် ရွှီနင်မှာ ထိုကိစ္စကို ဆက်လက် မတွေးတောတော့ချေ။

သူက ဖန်လိရှင်ကို တစ်ချက် ကြည့်လိုက်သည်။ ဖန်လိရှင်သည်လည်း ရွှီနင်၏ အကြည့်ကို သတိထားမိသဖြင့် စိုးရိမ်တကြီး ပြန်ကြည့်လာသည်။

သူ၏လက်ထဲတွင် မိစ္ဆာအဆီအနှစ် ရှိနေပြီး လက်ရှိခန္ဓာကိုယ် အခြေအနေအရ ရွှီနင်ကို ယှဉ်နိုင်စွမ်း လုံးဝမရှိချေ။ အကယ်၍ ရွှီနင်သာ မိစ္ဆာအဆီအနှစ်ကို လုယူချင်ပါက သူ မည်သို့မျှ ခုခံနိုင်မည်မဟုတ်ပါ။

“မင်း အထင်မလွဲပါနဲ့... မင်းရဲ့ မိစ္ဆာအဆီအနှစ်ကို ငါ စိတ်မဝင်စားပါဘူး။”

ရွှီနင်က ရှင်းပြလိုက်သည်။

မိစ္ဆာအဆီအနှစ်ဆိုသည်မှာ အဆင့်မြင့် တာအိုနယ်ပယ် ပညာရှင်တစ်ဦးမှသာ ထုတ်လုပ်နိုင်သော မိစ္ဆာစွမ်းအားတစ်မျိုး ဖြစ်ကြောင်း ချူယဲ့ယန်က ရွှီနင်အား ပြောပြခဲ့ဖူးသည်။

အနာဂတ်တွင် မိစ္ဆာလမ်းစဉ်သို့ ကူးပြောင်းကျင့်ကြံခြင်း မပြုသရွေ့ ဤမိစ္ဆာအဆီအနှစ်မှာ သူ့အတွက် အသုံးမဝင်ချေ။

‘ငါ အစိုးရိမ်လွန်သွားတာပဲ။’ ဖန်လိရှင်သည် ခေါင်းကို ညင်သာစွာ ငြိမ့်လိုက်သည်။

ဖန်လိရှင်သည် ရွှီနင်မှာ မည်သို့သောသူဖြစ်ကြောင်း မသိသော်လည်း ရွှီနင်အပေါ် ကောင်းသော အထင်အမြင် ရှိသွားခဲ့သည်။

“မိတ်ဆွေ... ကျွန်တော့်မှာ မေးစရာတစ်ခု ရှိတယ်။ ကျွန်တော့်ရဲ့ သံသယကို ဖြေရှင်းပေးနိုင်မလား။”

ရွှီနင်က စဉ်းစားပြီးနောက် ဖန်လိရှင်အား မေးလိုက်သည်။

မေးမြန်းနေရင်းနှင့်ပင် ရွှီနင်သည် ကုသရေးဆေးပြားတစ်ပြားကို ထုတ်ကာ ဖန်လိရှင်ထံ ပစ်ပေးလိုက်သည်။

ဖန်လိရှင်သည် ဆေးပြားကို ဖမ်းယူလိုက်ပြီး ခေတ္တမျှ တွေဝေသွားသော်လည်း နောက်ဆုံးတွင် မျိုချလိုက်လေသည်။

အနက်ရောင်ငှက်ကြီး၏ တံတွေးကြောင့် သတိရလာခဲ့သော်လည်း သူ၏ဒဏ်ရာများမှာ ပျောက်ကင်းခြင်း မရှိသေးပေ။ အကယ်၍ ဤလူက သူ့ကို ရန်ပြုလိုပါက ဤမျှအထိ ဒုက္ခခံနေရန် မလိုကြောင်း သူသိပေသည်။

“မေးပါ... မေးနိုင်ပါတယ်။”

ဆေးပြားကို မျိုချပြီးနောက် ဖန်လိရှင်သည် ရွှီနင်အပေါ် ထားရှိသော ရန်လိုစိတ်များ လုံးဝ ပျောက်ကွယ်သွားခဲ့ပြီ ဖြစ်သည်။

ယခင်က ရွှီနင်အား ကြောက်နေခြင်းမှာ ချူယဲ့ယန်ကြောင့် ရွှီနင်သည် သူ့အား ဒေါသထွက်နေမည်စိုး၍ ဖြစ်သည်။ ယခုမူ ရွှီနင်မှာ အကျိုးအကြောင်းမသိတတ်သူ မဟုတ်ကြောင်း သူ မြင်လိုက်ရချေပြီ။

“မင်းက မိစ္ဆာလမ်းစဉ် ကျင့်ကြံသူတစ်ယောက် မဟုတ်လား။”

ရွှီနင်က မေးလိုက်သည်။

“ဒါပေမဲ့ မင်းဆီကနေ မိစ္ဆာကျင့်ကြံသူတွေဆီမှာ ရှိတတ်တဲ့ ကြမ်းတမ်းခက်ထန်မှုနဲ့ သတ်ဖြတ်လိုတဲ့ အငွေ့အသက်တွေကို ငါ မခံစားရဘူး။”

ရွှီနင်သည် မိစ္ဆာလမ်းစဉ် ကျင့်ကြံသူများစွာနှင့် ထိတွေ့ဖူးခဲ့သည်။ သာမန်လူသားနယ်ပယ်မှဖြစ်စေ၊ ဟင်းလင်းပြင်နယ်ပယ်မှဖြစ်စေ ၎င်းတို့အားလုံးတွင် ပြင်းထန်သော မကောင်းသည့် အငွေ့အသက်များ ရှိနေတတ်သည်။

တာအိုနယ်ပယ်သို့ ခြေတစ်လှမ်းလှမ်းထားသော ဖုန်းချန်ကောပင်လျှင် သူ၏ မကောင်းသော အငွေ့အသက်များကို မဖုံးကွယ်နိုင်ခဲ့ချေ။

သို့သော် ရွှီနင်သည် ဖန်လိရှင်၊ ကျန်လီ သို့မဟုတ် ချူယဲ့ယန်တို့ထံမှ မကောင်းသော အငွေ့အသက်များကို လုံးဝ မခံစားရပေ။ ထို့ကြောင့်ပင် ရွှီနင်က ဖန်လိရှင်အပေါ် ယဉ်ကျေးစွာ ဆက်ဆံနေခြင်း ဖြစ်သည်။

ဤမေးခွန်းကို ကြားသောအခါ ဖန်လိရှင်က ပြုံးလိုက်ပြီး ကျောကို မတ်လိုက်သည်။

“ကျွန်တော့်ရဲ့ ဘိုးဘေးဟာ တစ်ချိန်က ပင်လယ်နီမိစ္ဆာသခင်ရဲ့ နောက်လိုက်တစ်ဦး ဖြစ်ခဲ့တာကြောင့် ကျွန်တော်တို့ အမွေဆက်ခံခဲ့တာက စစ်မှန်တဲ့ မိစ္ဆာလမ်းစဉ် ဖြစ်ပါတယ်။”

ဖန်လိရှင်က ပြောလိုက်သည်။

“စစ်မှန်တဲ့ မိစ္ဆာလမ်းစဉ် ဟုတ်လား။”

ရွှီနင် မျက်မှောင်ကြုတ်ကာ အံ့သြသွားသည်။

“မိစ္ဆာလမ်းစဉ်မှာ စစ်မှန်တာနဲ့ မစစ်မှန်တာ ရှိလို့လား။”

ဖန်လိရှင်က ပြုံးလျက် “ချောက်နက်ကြီးမြောက်ပိုင်းဒေသရဲ့ ပြည်နယ် ၁၇ ခုမှာ မိစ္ဆာကျင့်ကြံသူ အများစုဟာ လမ်းမှားကို လျှောက်လှမ်းနေကြတာပါ။ ကမ္ဘာပေါ်က သိုင်းပညာအားလုံးက ဝမ်ရှန့်ပြည်နယ်ကနေ အခြေတည်လာခဲ့တာ။”

ဖန်လိရှင်က ဆက်ပြောလေသည်။

“အစပိုင်းမှာ သိုင်းပညာရဲ့ အနှစ်သာရကို တစ်ဦးချင်းစီရဲ့ အလားအလာကို ဖော်ထုတ်တာလို့ အဓိပ္ပာယ်ဖွင့်ဆိုခဲ့ကြတယ်။ သိုင်းပညာနဲ့ ကိုက်ညီတဲ့ ဘယ်သူမဆို ဒီလမ်းစဉ်ပေါ်မှာ သူတို့ရဲ့ ပါရမီကို ပြသနိုင်ကြတယ်။ ဒါပေမဲ့ တစ်ချိန်တည်းမှာပဲ အဆင့်မြင့် သိုင်းပညာတွေကို တောင့်တပေမဲ့ ကိုယ်ပိုင်ပါရမီ အကန့်အသတ်ရှိနေသူတွေကတော့ ပုံမှန်မဟုတ်တဲ့ လမ်းစဉ်ကို ရွေးချယ်ခဲ့ကြတယ်။ သူတို့က မူလသိုင်းပညာစနစ်ကို စွန့်လွှတ်ပြီး လမ်းစဉ်သစ်တစ်ခုကို ဖောက်လုပ်ခဲ့ကြတယ်။ ဒါဟာ မိစ္ဆာလမ်းစဉ်စနစ်ရဲ့ အခြေခံအစပဲ ဖြစ်ပါတယ်။”

“ရိုးရာသိုင်းပညာက ကိုယ့်ရဲ့ သိုင်းပညာအလားအလာကို အသုံးချတာ ဖြစ်ပေမဲ့ မိစ္ဆာလမ်းစဉ်ကတော့ ပါရမီအကန့်အသတ် ရှိသူတွေရဲ့ ကန့်သတ်ချက်ကို မြှင့်တင်ဖို့ အထူးနည်းလမ်းတွေကို သုံးစွဲကြတာပါ။”

“မင်းပြောတဲ့ အထူးနည်းလမ်းတွေဆိုတာ မိစ္ဆာကျင့်စဉ်တွေ၊ လျှို့ဝှက်ကျမ်းစာတွေနဲ့ အဲဒီလို အရာမျိုးတွေကို ပြောတာလား။” ရွှီနင်က မေးလိုက်သည်။

“မှန်ပါတယ်။”

ဖန်လိရှင်က ပြောလေသည်။

“ဒါတွေကတစ်ဆင့် မိစ္ဆာလမ်းစဉ် ကျင့်ကြံသူတွေက အစောပိုင်းအဆင့်တွေမှာ သူတို့ရဲ့ ပါရမီအားနည်းချက်ကို ဖြည့်ဆည်းနိုင်ပြီး ရိုးရာသိုင်းပညာရှင်တွေကို ကျော်တက်နိုင်ကြတာပါ။”

“ဒါပေမဲ့ မိစ္ဆာလမ်းစဉ်ရဲ့ ပြင်းထန်လှတဲ့ သဘာဝကြောင့် အန္တရာယ်လည်း အလွန်များပါတယ်။ မိစ္ဆာလမ်းစဉ် စတင်ပေါ်ပေါက်လာစက နည်းစနစ်က မပြည့်စုံသေးတော့ လူအတော်များများက မိစ္ဆာကျင့်စဉ်ရဲ့ တန်ပြန်သက်ရောက်မှုကို မခံနိုင်ဘဲ ဒဏ်ရာအပြင်းအထန်ရတာ၊ စိတ်ရူးပေါက်တာ၊ သေဆုံးတာတွေအထိ ဖြစ်ခဲ့ကြတယ်။ ဒီဆိုးကျိုးတွေကို နှစ်ပေါင်းထောင်ချီပြီး ပြုပြင်မွမ်းမံခဲ့ကြပြီးမှ တည်ငြိမ်တဲ့ သိုင်းပညာလမ်းစဉ်တစ်ခုအဖြစ် ပြောင်းလဲနိုင်ခဲ့တာပါ။”

“ကျွန်တော်တို့ ကျင့်ကြံတာက ဒီလို မိစ္ဆာလမ်းစဉ်မျိုးပါ။ အန္တရာယ်ရှိနေတုန်းပဲဆိုပေမဲ့ ကျွန်တော်တို့ရဲ့ ကန့်သတ်ချက်ကို မြှင့်တင်ပေးနိုင်ပြီး ကျင့်ကြံမှုကို မြန်ဆန်စေပါတယ်။ ဒါ့အပြင် ကျွန်တော်တို့ရဲ့ သိုင်းပညာစနစ်က အတော်လေး ပြည့်စုံတာကြောင့် တန်ပြန်သက်ရောက်မှု ဖြစ်နိုင်ခြေကလည်း အတော်လေး နည်းပါးပါတယ်။”

“ဒါပေမဲ့...”

ဖန်လိရှင်က စကားလမ်းကြောင်း ပြောင်းလိုက်သည်။

“ပြည့်စုံတဲ့ မိစ္ဆာလမ်းစဉ်စနစ်ကို နှစ်ပေါင်းများစွာ ကြိုးစားအားထုတ်ခဲ့ကြရတာကြောင့် အဖွဲ့အစည်း အသီးသီးက ဒါကို တန်ဖိုးကြီး ရတနာတစ်ခုလို သတ်မှတ်ထားကြတယ်။ ဒါကြောင့် ဒါကို ပြင်ပလူတွေကို သင်ကြားပေးလေ့ မရှိကြဘူး။ ချောက်နက်ကြီးမြောက်ပိုင်းဒေသရဲ့ ပြည်နယ် ၁၇ ခုမှာ တွေ့ရတဲ့ မိစ္ဆာကျင့်ကြံသူ အများစုက တကယ်တော့ လူသားတွေကို အန္တရာယ်ပေးတဲ့သူတွေ ဖြစ်နေကြတာပါ။ သူတို့ရဲ့ မိစ္ဆာကျင့်စဉ်တွေက ကိုယ့်ရဲ့ ကန့်သတ်ချက်ကို မြှင့်တင်ဖို့ မဟုတ်ဘဲ ကိုယ်ကျိုးအတွက် တခြားသူတွေကို သတ်ဖြတ်ဖို့နဲ့ ဒုက္ခပေးဖို့ပဲ သုံးစွဲကြတာ။”

“ဒီလူတွေက ပြင်ပစွမ်းအားတွေကိုပဲ အားကိုးနေကြတာ။ သူတို့ရဲ့ သိုင်းပညာအခြေခံက မတည်ငြိမ်တာကြောင့် တစ်လက်မတောင် ရှေ့တိုးဖို့ ခက်ခဲကြပါတယ်။”

ဖန်လိရှင်၏ စကားများကြောင့် ရွှီနင်သည် ဖုန်းချန်ကော၏ မိစ္ဆာသွေးဆေးလုံး ဖော်စပ်နည်းကို သတိရသွားသည်။

မိစ္ဆာသွေးဆေးလုံး ဖော်စပ်ရန်အတွက် အဆင့်မြင့် ဟင်းလင်းပြင်နယ်ပယ် မိစ္ဆာသားရဲ၏ သွေး လိုအပ်သော်လည်း ဖုန်းချန်ကောမှာမူ လူသားသွေးများကိုပါ ထည့်သွင်းအသုံးပြုခဲ့သည်။

သူသည် စစ်မှန်သော မိစ္ဆာကျင့်စဉ်ကို သုံးပြီး လမ်းမှားမှ ကျင့်ကြံနေသည့် ပုံစံမျိုးပင်။

“နားလည်ပါပြီ... ရှင်းပြပေးတာ ကျေးဇူးတင်ပါတယ်။”

ရွှီနင်၏ စိတ်ထဲတွင် အတွေးများစွာ ဝင်ရောက်လာလေသည်။

ဖန်လိရှင် ပြောသည်ကို ကြားပြီးနောက် ရွှီနင်သည် မိမိတွင် သိုင်းပညာမျက်နှာပြင်သာ မရှိပါက သူ၏ ပါရမီအရ စစ်မှန်သော မိစ္ဆာလမ်းစဉ်ကို ကျင့်ကြံခြင်းက ပိုသင့်လျော်မည်ဟု ခံစားလိုက်ရသည်။

သို့သော် သိုင်းပညာမျက်နှာပြင် ရှိနေမှတော့ ထိုသို့လုပ်ရန် မလိုအပ်တော့ချေ။

စစ်မှန်သော မိစ္ဆာလမ်းစဉ်နှင့်ပင် အဆင့်တက်နှုန်းမှာ သူ၏ သိုင်းပညာမျက်နှာပြင်ကို မမီနိုင်ပေ။

ထို့အပြင် စစ်မှန်သော မိစ္ဆာလမ်းစဉ်ဖြစ်ပါစေ၊ တန်ပြန်သက်ရောက်မှု ဖြစ်နိုင်ခြေ ရှိနေဆဲပင်။ အကယ်၍ မအောင်မြင်ပါက ရလဒ်မှာ အလွန်ဆိုးရွားပေလိမ့်မည်။

ထို့ကြောင့် မိစ္ဆာကျင့်စဉ်သို့ ပြောင်းလဲကျင့်ကြံရန် စွန့်စားဖို့ မလိုချေ။

“မိတ်ဆွေ...”

ဖန်လိရှင်က နှုတ်ခမ်းကို စေ့လိုက်ပြီး ရွှီနင်ကို မေးလိုက်သည်။

“ခင်ဗျားက ဘယ်သူလဲဆိုတာ မေးလို့ ရမလား။”

ရွှီနင်မှာ ငယ်ရွယ်သော်လည်း ရိုးရာသိုင်းပညာစနစ်ကို ကျင့်ကြံပြီး အစစ်အမှန်ပိုင်နက်နယ်ပယ်သို့ ရောက်ရှိနေသည်ကို ဖန်လိရှင် သတိထားမိလိုက်သည်။

ယခင်က အထင်လွဲမှုများ ရှိခဲ့သော်လည်း ယခုအခါ ထိုအထင်လွဲမှုများ ပျောက်ကွယ်သွားပြီဖြစ်ရာ သူတို့ သူငယ်ချင်း ဖြစ်နိုင်ပေသည်။

ရွှီနင် ခေတ္တမျှ စဉ်းစားပြီးနောက် နောက်ဆုံးတွင် ပြောလိုက်သည်။

“ကျိဖုန်းပြည်နယ်၊ ယွဲ့လန်ဂိုဏ်းက ရွှီနင်ပါ”

“ကျိဖုန်းပြည်နယ်၊ ယွဲ့လန်ဂိုဏ်း...”

ဖန်လိရှင် ခေါင်းညိတ်လိုက်သည်။

“ကျွန်တော်ကတော့ လုယယ်ပြည်နယ်က ဖန်လိရှင်ပါ။”

ဖန်လိရှင်၏ နောက်ခံကို ရွှီနင်သည် ချူယဲ့ယန်ထံမှ သိထားပြီးသား ဖြစ်သည်။

ဖန်လိရှင်၊ ကျန်လီနှင့် ချူယဲ့ယန်တို့မှာ လုယယ်ပြည်နယ်မှ ဖြစ်ကြသော်လည်း သူတို့၏ မိသားစုများမှာ မတူညီကြပေ။

သူတို့သည် ပြည်နယ်တစ်ခုတည်းမှ ဖြစ်ကြသော်လည်း ဤလျှို့ဝှက်နယ်မြေကို လာရောက်ရှာဖွေခြင်း မပြုပါက ဆက်သွယ်မှု ရှိကြလိမ့်မည် မဟုတ်ပေ။

ခဏမျှ စကားပြောပြီးနောက် သူတို့နှစ်ဦးမှာ ဟင်းလင်းပြင်လှေကားထစ်များမှ အောက်သို့ ဆင်းလာခဲ့ကြသည်။ ယခုတစ်ကြိမ်တွင်မူ သူတို့ မည်သည့် ဖိအားမှ မခံစားရတော့ပေ။

‘ကျန်လီကတော့ ဆက်မတိုးနိုင်ခဲ့ဘူးပဲ။’ လှေကားထစ်များမှ ဆင်းလာပြီးနောက် ကျန်လီသည် မြေပြင်ပေါ်တွင် တင်ပျဉ်ခွေထိုင်ကာ အနားယူနေသည်ကို တွေ့လိုက်ရသည်။

“နှစ်ယောက်လုံးကို ဂုဏ်ပြုပါတယ်နော်။”

ကျန်လီက ရှုပ်ထွေးသော မျက်နှာထားဖြင့် မျက်လုံးဖွင့်ကြည့်လိုက်သည်။ သူတို့နှစ်ဦး၏ အခြေအနေကို ကြည့်ရုံနှင့်ပင် သူတို့၏ ရည်မှန်းချက်များ အောင်မြင်ခဲ့ကြောင်း သူမ သိလိုက်ရချေပြီ။

“ကျန်လီ... မင်း စိတ်ဓာတ်မကျပါနဲ့။ ဒီလျှို့ဝှက်နယ်မြေကို လူတစ်ယောက်က အများဆုံး သုံးကြိမ်အထိ ဝင်ခွင့်ရှိတာပဲ။ နောက်တစ်ခါကျရင် မင်း မိစ္ဆာကျင့်စဉ်ကို ရနိုင်မှာပါ။” ဖန်လိရှင်က နှစ်သိမ့်လိုက်သည်။

“အင်း...”

သူမ စိတ်ပျက်နေသော်လည်း အခြေအနေကို လျင်မြန်စွာ ပြန်လည် ထိန်းချုပ်လိုက်လေသည်။

“အစ်ကိုရွှီ... ဒီချူယဲ့ယန်ကရော...”

ဖန်လိရှင်က ရွှီနင်ကို လှမ်းကြည့်လိုက်သည်။

ရေခဲတံဆိပ်ဆေးပြားနှင့် အဆိပ်ဆေးပြား အမျိုးမျိုးကို တိုက်ကျွေးထားပြီးနောက် ချူယဲ့ယန်မှာ ရွှီနင်၏ လက်အောက်တွင် လုံးဝ ရောက်ရှိသွားခဲ့ချေပြီ။

“မင်းတို့နဲ့ ရင်းနှီးလား။”

ရွှီနင်က မေးလိုက်သည်။

“ဟင့်အင်း... လုံးဝ မရင်းနှီးပါဘူး။”

သူတို့နှစ်ဦးမှာ ချက်ချင်းပင် ငြင်းလိုက်ကြသည်။

“ကျွန်တော်တို့က လုယယ်ပြည်နယ်က ဆိုပေမဲ့ သူ့နဲ့ မရင်းနှီးကြပါဘူး။”

“နားလည်ပြီ... ဒါဆိုရင် ဒီလူကို ငါ ခေါ်သွားမယ်။”

ရွှီနင်သည် ချူယဲ့ယန်ကို ကျိဖုန်းပြည်နယ်သို့ ခေါ်သွားရန် ဆုံးဖြတ်လိုက်သည်။

သူသည် နှလုံးမဲ့ဆေးပြားကို ဖော်စပ်ရန် ပြင်ဆင်နေပြီး ချူယဲ့ယန်ကို စမ်းသပ်သူအဖြစ် အသုံးပြုမည် ဖြစ်သည်။ အကယ်၍ အောင်မြင်သွားပါက သူ့ကို လက်ပါးစေတစ်ဦးအဖြစ် အသုံးပြုနိုင်မည် ဖြစ်သည်။

“အစ်ကိုရွှီ စိတ်ချပါ။ ချူယဲ့ယန်နဲ့ ပတ်သက်ပြီး ကျွန်တော်တို့ ဘာမှ ပြောမှာ မဟုတ်ပါဘူး။”

ဖန်လိရှင်လည်း ချူယဲ့ယန်က ရွှီနင်ကို အရင်သတ်ရန် ကြိုးစားခဲ့ခြင်းဖြစ်သဖြင့် ဤဆက်ဆံရေးကို ပြန်လည် ပြုပြင်ရန် မဖြစ်နိုင်ကြောင်း သိထားသည်။

“ချူယဲ့ယန်က လျှို့ဝှက်နယ်မြေထဲမှာ သေဆုံးသွားတယ်လို့ပဲ ကျွန်မတို့ ပြောလိုက်ပါ့မယ်။”

ကျန်လီက ပြောလိုက်သည်။

“ဒါဆိုရင်တော့ ကျေးဇူးတင်ပါတယ်ဗျာ။”

ဤသည်က ရွှီနင်အတွက် ဒုက္ခများစွာ သက်သာသွားစေသည်။

ရွှီနင်၏ အင်အားဖြင့် လက်စားချေခံရမည်ကို မကြောက်သော်လည်း အေးအေးဆေးဆေး နေချင်သည် မဟုတ်ပါလား။

ထို့နောက် သူတို့ သုံးဦးလုံးသည် ကိုယ်စီနည်းလမ်းများဖြင့် ပင်လယ်နီမိစ္ဆာသခင်၏ လျှို့ဝှက်နယ်မြေမှ ထွက်ခွာခဲ့ကြလေသည်။

ရွှီနင်သည် ဤခရီးစဉ်မှ အကျိုးအမြတ်များစွာ ရရှိခဲ့သည်။ သူသည် တာအိုနယ်ပယ်မှ ထူးချွန်သော ဆေးဖော်စပ်သူတစ်ဦး၏ အမွေအနှစ်အားလုံးကို ရရှိခဲ့ခြင်း ဖြစ်သည်။

ရွှီနင်သည် အဆင့်မြင့် တာအိုနယ်ပယ်သို့ ရောက်ရှိပြီးသည့်တိုင်အောင် ၎င်းက သူ့အတွက် စွမ်းအင်များကို အမြဲတမ်း ပံ့ပိုးပေးနိုင်မည် ဖြစ်သည်။

ယွင်ဖုန်းရေကန်မှ ထွက်ခွာပြီးနောက် ရွှီနင်သည် ရှောင်ဟေးကို ခေါ်ယူလိုက်ပြီး အေးခဲနေဆဲဖြစ်သော ချူယဲ့ယန်ကို သယ်ဆောင်ကာ ယွဲ့လန်ဂိုဏ်းသို့ ပြန်လာခဲ့သည်။

ဤတစ်ကြိမ်တွင် ရွှီနင်သည် ရှောင်ဟေးကို ဂိုဏ်းထဲသို့ ပေးမဝင်တော့ဘဲ ချူယဲ့ယန်ကို ထားရှိရန် နေရာတစ်ခု ရှာခိုင်းပြီး သူ့ကို စောင့်ခိုင်းထားလိုက်သည်။

နှလုံးမဲ့ဆေးပြားကို ဖော်စပ်ပြီးသည်နှင့် သူ ပြန်လာခဲ့မည် ဖြစ်သည်။

ထို့နောက်တွင်တော့ ရွှီနင်သည် ဂိုဏ်းသို့ တစ်ဦးတည်း ပြန်လာခဲ့လေသည်။

အချိန်အတော်ကြာအောင် ထွက်ခွာသွားခဲ့သဖြင့် ယွဲ့လန်ဂိုဏ်းသည် ပြည်နယ်သုံးခုရှိ ဂိုဏ်းများ မဟာမိတ်ဖွဲ့ခြင်းနှင့် ပတ်သက်ပြီး တစ်စုံတစ်ခု ဆုံးဖြတ်ပြီးပြီလားဆိုသည်ကို ရွှီနင် သိချင်နေတော့သည်။