အခန်း (၄၈၄-၄၈၅)

အခန်း ၄၈၄ ဖြောင့်မတ်ခြင်းနှင့် အရေခြုံခြင်း

ဝမ်ဟောင်ယု နောက်ဆုံးစကားသံများက ခန်းမကြီးအတွင်း ပဲ့တင်ထပ်သွား၏

ထို့နောက် ဧကရာဇ်၏ အကြည့်များသည် ပိုင်ကျီဟန်ထံသို့ ဖြည်းညင်းစွာ ရောက်ရှိလာသည်။

"ပိုင်ကျီဟန်... မင်းအပေါ် စွပ်စွဲထားတဲ့ ပြစ်ချက်တွေကို မင်း ဝန်ခံသလား"

ရာနှင့်ချီသော မျက်လုံးများသည် ခန်းမအလယ်တွင် တစ်ဦးတည်း ရပ်နေသော လူငယ်လေးထံ၌ စုပြုံကျရောက်နေသည်။

သို့သော် ပိုင်ကျီဟန်က တုံ့ဆိုင်းခြင်း မရှိပေ။

"ဝန်ခံရမယ်?" သူ၏ လေသံမှာ တည်ငြိမ်လွန်းလှသည်။ "သူ့မှာ ဘာသက်သေရှိလို့လဲ"

"တော်ဝင်ညီလာခံဆိုတာ လူတစ်ယောက်ရဲ့ စကားတစ်ခွန်းတည်းနဲ့ အပြစ်ရှိမရှိ ဆုံးဖြတ်တတ်တာမျိုးတော့ မဟုတ်လောက်ဘူးမလား" ပိုင်ကျီဟန်က ခန်းမအတွင်းရှိ လူများကို ဝေ့ကြည့်ရင်း ဆက်ပြောလိုက်သည်။

သူ၏ မျက်လုံးများက ဧကရာဇ်နှင့် ဆုံသွား၏။

"ဒါမှမဟုတ် ကျွန်တော့်မျိုးနွယ်စုကို အပြစ်ပေးဖို့ဆိုရင် သက်သေမလိုဘဲ စွပ်စွဲချက်တစ်ခုတည်းနဲ့တင် လုံလောက်နေပြီလား"

ထိုစကား၏ ဆိုလိုရင်းသည် ရှင်းလင်းလှသည်။

အကယ်၍ သက်သေမရှိဘဲ စွပ်စွဲရုံသက်သက်ဆိုလျှင် စွပ်စွဲသူမှာ ပျာယာခတ်ပြီး အားနည်းစွာ တုံ့ပြန်ရမည်ဖြစ်၏

သို့သော်လည်း ဝမ်ဟောင်ယုသည် ပျာယာခတ်သွားခြင်းမရှိဘဲ ယုံကြည်မှုအပြည့်ဖြင့် ပြုံးလိုက်သည်။

"ဒါပေါ့... စကားသက်သက်နဲ့တင် မလုံလောက်ဘူးဆိုတာ သိပါတယ်" သူက ဆိုရင်း လက်ကို မြှောက်လိုက်သည်။

သူ၏ လက်ဖဝါးပေါ်တွင် ကြည်လင်သော မှော်ရတနာတစ်ခု ပေါ်လာ၏။

၎င်းမှာ အဝိုင်းပုံသဏ္ဌာန်ရှိပြီး ဖောက်ထွင်းမြင်နိုင်ကာ အတွင်းမှ မှိန်ပျပျ အလင်းရောင်များ ထွက်ပေါ်နေသည်။

"မှတ်ဉာဏ်ပုံရိပ်လွှာကြေးမုံ “

စုဝေးနေသော အင်အားကြီး ပုဂ္ဂိုလ်များကြားတွင် တီးတိုးရေရွတ်သံများ ထွက်ပေါ်လာသည်။

၎င်းမှာ ဖြစ်ပျက်ခဲ့သမျှကို အရှိအတိုင်း မှတ်တမ်းတင်နိုင်သော ရတနာဖြစ်၏

အတုအယောင်ဖန်တီးရန် အလွန်ခက်ခဲလှသည်။

ဝမ်ဟောင်ယုသည် ထိုမှန်ချပ်အတွင်းသို့ ကျင့်စဉ်စွမ်းအား အနည်းငယ် ထည့်သွင်းလိုက်၏

မှန်ချပ်တွင် လင်းလက်သွားချေသည်။

ပုံရိပ်များ လွင့်ပျံထွက်ပေါ်လာသည်။

ဟင်းလင်းပြင်တွင် ပေါ်လာသော ပုံရိပ်မှာ မြစိမ်းရောင်နေမင်းဂိုဏ်း၏ တောင်တံခါးဝပင် ဖြစ်သည်။ ထို့နောက်

ပိုင်မျိုးနွယ်စုဝင်များက ထိုဂိုဏ်း၏ တပည့်များနှင့် အကြီးအကဲများကို သတ်ဖြတ်နေသည့် မြင်ကွင်းများ ထင်ထင်ရှားရှား ပေါ်ထွက်လာသည်။

မှတ်တမ်းမှာ မရှည်လျားပေ

သို့သော်လည်း အလွန်ပင် ရှင်းလင်းပြတ်သားပြီး ခိုင်လုံလှသည်။

ပိုင်ကျီဟန်က ထိုပုံရိပ်များကို တည်ငြိမ်စွာ စောင့်ကြည့်နေသည်။

သူ၏ မျက်နှာအမူအရာမှာ အပြောင်းအလဲမရှိပေ။

သူနားလည်ချေပြီ

ဝမ်ဟောင်ယုသည် သူထွက်ပြေးမသွားမီတွင် ထိုပုံရိပ်များကို မှတ်တမ်းတင်ရန် ခေတ္တစောင့်ဆိုင်းခဲ့ခြင်းဖြစ်၏

ဝမ်ဟောင်ယုသည် အမှန်တကယ်ပင် ကောင်းကောင်းပြင်ဆင်လာခဲ့ခြင်း ဖြစ်သည်။

ပုံရိပ်များ ပြီးဆုံးသွားချေပြီ

ကြေးမုံသည်လည်း မှိန်သွားချေ၏

ခန်းမအတွင်း တိတ်ဆိတ်မှုက လေးလံစွာ ဖိနှိပ်ထားဆဲပင်။

အပေါ်ယံကြည့်လျှင် ပိုင်မျိုးနွယ်စုသည် ငြင်းမရသော အပြစ်ကို ကျူးလွန်ခဲ့သည်မှာ ထင်ရှားနေသည်။

မြစိမ်းရောင်နေမင်းဂိုဏ်းကို ကျူးကျော်ခဲ့ချေသည်။

ဧကရာဇ်၏ အကြည့်များက ပိုင်ကျီဟန်ထံ ပြန်လည်ရောက်ရှိလာသည်။

"ဒီသက်သေတွေနဲ့ ပတ်သက်ပြီး မင်းမှာ ဘာပြောစရာရှိသေးလဲ"

ယခုတစ်ကြိမ်တွင် ဧကရာဇ်၏ လေသံမှာ ရာဇဝတ်သားတစ်ဦးကို မေးမြန်းနေသည့်အလား ပြတ်သားလှသည်။

နဂါးပလ္လင်အောက်ရှိ တစ်ဦးတည်းသော ထိုလူရိပ်အပေါ်သို့ အားလုံး၏ အကြည့်များ စုပြုံကျရောက်နေသည်။

သို့သော် ပိုင်ကျီဟန်သည်လည်း တုန်လှုပ်

ချောက်ချားသွားခြင်း မရှိပေ။

"မရှိပါဘူး”

ပိုင်ကျီဟန်က ပြတ်သားစွာ ပြောလိုက်သည်။

ရန်သူများက ပိုင်မျိုးနွယ်စု တစ်ခန်းရပ်တော့မည်ဟု တွေးကာ ဝမ်းသာနေကြ၏

ချူရှင်း ကဲ့သို့သော မဟာမိတ်များကမူ ခေါင်းခါနေကြသည်။

သက်သေခိုင်လုံနေလျှင်တောင် ချက်ချင်း ဝန်ခံလိုက်ခြင်းမှာ မုချမိုက်မဲရာ ရောက်သည်ဟု သူတို့ ယူဆနေကြသည်။

ပိုင်ကျီဟန်သည် လူငယ်လေးဖြစ်၍ အတွေ့အကြုံမရှိဟု သူတို့က ထင်မှတ်နေကြခြင်း ဖြစ်သည်။

မည်သို့ပင်ဆိုစေကာမူ သူတို့သည် ပိုင်မျိုးနွယ်စုအပေါ်တွင် ချမှတ်နိုင်သမျှ အပြင်းထန်ဆုံး ပြစ်ဒဏ်ကို ချမှတ်ကြပေလိမ့်မည်။

ထိုအချိန်ကျလျှင် သူသည် ပိုင်မျိုးနွယ်စုဘက်မှ ကူညီပြီး အနည်းဆုံးတော့ ပြစ်ဒဏ်၏ ပြင်းထန်မှုကို လျော့ပါးသွားအောင် ကြိုးပမ်းပေးရမည်ဖြစ်သည်။

လီကျန်းဟုန်က ထိုအခွင့်အရေးကို ချက်ချင်း အရယူလိုက်သည်။

"အရှင်မင်းကြီး၊” သူကရှေ့တက်ကာ ဂါရဝပြုလေ၏ “ပိုင်မျိုးနွယ်စုက ဘာအကြောင်းပြချက်မှမရှိဘဲ တခြားဂိုဏ်းကို ကျူးကျော်ပြီး သတ်ဖြတ်လုယက်ခဲ့ပါတယ်။ သက်သေလည်း ခိုင်လုံသလို ပိုင်ကျီဟန်ကိုယ်တိုင်လည်း ဝန်ခံနေပြီဖြစ်လို့ သူတို့ကို အပြင်းထန်ဆုံး ပြစ်ဒဏ်ခတ်သင့်ပါတယ်”

အခြားသူများကလည်း ထောက်ခံကြသည်။

"အင်ပါယာရဲ့ စည်းစနစ်ကို ထိန်းသိမ်းရပါမယ်”

"ဒါကို လျစ်လျူရှုထားရင် ဧကရာဇ်ရဲ့ အာဏာစက်က ဘာအဓိပ္ပာယ်ရှိတော့မှာလဲ”

"ဒီနေ့တော့ မြစိမ်းရောင်နေမင်းဂိုဏ်းပေါ့၊ နောင်ခါကျရင် ဘယ်သူဖြစ်လာဦးမလဲဆိုတာ ဘယ်သူသိနိုင်မှာလဲ"

ညီလာခံခန်းမအတွင်းရှိ ဖိအားများသည် သိသိသာသာ မြင့်တက်လာခဲ့သည်။

တည်ငြိမ်နေသော အပြင်ပန်းသဏ္ဌာန်များအောက်တွင် ကျင့်စဉ်စွမ်းအား အရှိန်အဝါများမှာ လှိုင်းထနေကြ၏။

သို့သော် ပိုင်ကျီဟန်ကမူ မည်သို့မျှ မတုန်လှုပ်ဘဲ အေးဆေးစွာပင် ရှိနေသည်။

ဧကရာဇ်မင်းမြတ်သည် ချက်ချင်း စကားမဆိုသေးပေ

သူ၏ အကြည့်များက ပိုင်ကျီဟန်အပေါ်တွင်သာ စွဲမြဲစွာ ရပ်တန့်နေလေသည်။

ဧကရာဇ်က လက်ကို အသာမြှောက်ေလ၏

ခန်းမကို ပြန်လည်တိတ်ဆိတ်စေလိုက်သည်။

"မင်းမှာ ဘာမှ ထပ်ပြောစရာမရှိဘူးဆိုရင်... မြစိမ်းရောင် နေမင်းဂိုဏ်းကို ကျူးကျော်ခဲ့တာကို ဝန်ခံသလား"

"ဝန်ခံပါတယ်”

ပိုင်ကျီဟန်က ရိုးရိုးသားသားပင် ဝန်ခံလိုက်ရာ ရန်သူများမှာ အတိုင်းမသိ ဝမ်းသာသွားကြသည်။

ဧကရာဇ်က နှုတ်ခမ်းဟလိုက်သည်။

အမိန့်တော်ကို စတင်ကြေညာဖို့ပင်

"ပိုင်မျိုးနွယ်စုသည် ကျူးကျော်စော်ကားမှု ပြုလုပ်ခဲ့သဖြင့်”

"ခဏလေး”

ထိုစကားတစ်ခွန်းက ခန်းမတစ်ခုလုံးကို ဓားဖြင့်ပိုင်းလိုက်သကဲ့သို့ ပြတ်တောက်သွားစေသည်။

ဧကရာဇ်က မျက်မှောင်ကြုတ်ကာ အောက်မှ လူငယ်လေးကို စိုက်ကြည့်လိုက်သည်။

"မင်းက ဧကရာဇ်ရဲ့ အမိန့်တော်ထုတ်ပြန်ချက်ကို ကြားဖြတ်နှောင့်ယှက်ရဲတယ်ပေါ့” သူကပြောလေ၏ “မင်းမှာ ဘာထပ်ပြောစရာရှိလို့လဲ"

ပိုင်ကျီဟန်သည် ထိတ်လန့်ခြင်း အလျဉ်းမရှိဘဲ ဧကရာဇ်ကို တည့်တည့်ကြည့်လေ၏

"ရှိပါတယ်”

သူ၏ လေသံမှာ ဧကရာဇ်ကို သာမန်လူတစ်ယောက်ကဲ့သို့ ဆက်ဆံနေသလို ပေါ့ပေါ့ပါးပါးပင်

ဧကရာဇ်၏ မျက်နှာမှာ အေးစက်သွားသည်။

"ပြောစမ်း”

ပိုင်ကျီဟန်က ခေါင်းကို အနည်းငယ် စောင်းလိုက်၏

"အရှင်မင်းကြီးက ပိုင်မျိုးနွယ်စုမှာ အပြစ်ရှိတယ်လို့ အမိန့်တော်ထုတ်တော့မလို့ မလား"

ဧကရာဇ်က တုံ့ဆိုင်းခြင်းမရှိဘဲ ပြန်လည်ဖြေကြားလိုက်သည်။

"မှန်တယ်၊ သက်သေတွေက အထင်အရှားရှိနေသလို မင်းကိုယ်တိုင်လည်း ဝန်ခံပြီးပြီဆိုတော့ ငါ ကိုယ်တော်အနေနဲ့ ပြစ်ဒဏ်စီရင်ခြင်းကို ဆက်လုပ်ရတော့မယ်။”

"ဘာကြောင့်လဲ? ကျွန်တော်ရဲ့မျိုးနွယ်စုက ဘာလို့ အပြစ်ရှိတာလဲ?"

ပိုင်ကျီဟန်က မေးလိုက်သည်။

ပထမဆုံးအကြိမ်အဖြစ် ခန်းမဆောင်အတွင်းရှိ လူအများအပြား၏ မျက်နှာပေါ်တွင် ဇဝေဇဝါဖြစ်မှုများ ယှက်သန်းသွားသည်။

"ဘာကြောင့်လဲ ဟုတ်လား?"

ဧကရာဇ်က တည်ငြိမ်သော်လည်း ဒေါသသံစွက်လျက် ထပ်ပြောသည်

"ဘာလို့လဲဆိုတော့ ပိုင်မျိုးနွယ်စုက ခိုင်လုံတဲ့ အကြောင်းပြချက်မရှိဘဲ တခြားဂိုဏ်းတစ်ခုကို ကျူးကျော်ခဲ့လို့ပဲ။ သူတို့ဟာ အင်ပါယာရဲ့ ဥပဒေကို ချိုးဖောက်ခဲ့ပြီး အင်ပါယာရဲ့ တည်ငြိမ်မှုကို ပျက်ပြားစေခဲ့တယ်။"

အကြောင်းပြချက်က ရိုးရှင်းသည်။ တိုက်ရိုက်ကျသည်။ ဥပဒေနှင့်အညီဖြစ်သည်။

အရာရှိများနှင့် ခေါင်းဆောင်အချို့က ခေါင်းညိတ်ထောက်ခံကြသည်။

သို့သော် ပိုင်ကျီဟန်က ခပ်ဖျော့ဖျော့သာ ပြုံးလိုက်၏

"ကျွန်တော်တို့မှာ အကြောင်းပြချက် မရှိဘူးလို့ ဘယ်သူပြောလဲ?"

တိုးညင်းစွာ မေးလိုက်သည်။

တစ်ခန်းမလုံး ပြန်လည်တိတ်ဆိတ်သွားပြန်သည်။

ဧကရာဇ်၏ မျက်လုံးများ အနည်းငယ် ကျဉ်းမြောင်းသွား၏

"ဒါဆို... မြစိမ်းရောင်နေမင်းဂိုဏ်းကို အမြစ်ပြတ်ချေမှုန်းဖို့ ဘယ်လိုအကြောင်းပြချက်ကများ တရားမျှတမှု ရှိစေမှာလဲ?" ဟု တည်ငြိမ်စွာ မေးလိုက်သည်။

အားလုံး၏ အကြည့်များက ပိုင်ကျီဟန် ထံသို့ ကျရောက်လာသည်။

ပိုင်ကျီဟန်၏ တည်ငြိမ်အေးဆေးသော အမူအရာက တစ်ချက်ကလေးမျှ တုန်လှုပ်

ခြင်း မရှိပေ။

ဝမ်ဟောင်ယုမှာမူ အမှန်တရား ပေါ်ပေါက်လာသည်နှင့် သူသည် မိစ္ဆာကျင့်ကြံသူတစ်ဦးကဲ့သို့ ရှုတ်ချခံရတော့မည်ကို သိသဖြင့် အလွန်

တုန်လှုပ်နေသည်။

သို့သော် လီကျန်းဟုန်နှင့် ကျောက်ဝူထျန်းတို့ရှိရာဘက်သို့ တစ်ချက်ကြည့်လိုက်ပြီးနောက် ဧကရာဇ်ကိုပါ လှမ်းကြည့်လိုက်သည့်အခါ သူ၏ ယုံကြည်မှုများ ပြန်လည်အားကောင်းလာသည်။

ဤကဲ့သို့သော နောက်ခံအင်အားများ ရှိနေမှတော့ သူက ပိုင်ကျီဟန်ကို ကြောက်နေဖို့ လိုဦးမည်လော?

ပိုင်ကျီဟန်က သူ၏လက်နှစ်ဖက်ကို နောက်ပစ်ထားလိုက်ပြီး စကားစပြောသည်။

"ဘာလို့လဲဆိုတော့... ကျွန်တော်လုပ်ချင်လို့ပဲ။"

ထိုစကားလုံးများသည် ကျယ်လောင်ခြင်းလည်း မရှိ၊ အားပါခြင်းလည်း မရှိပေ။

သို့သော် အသက်ရှူကျပ်မတတ် တိတ်ဆိတ်နေသော အင်ပါယာနန်းရင်ပြင်အတွင်း၌ ထိုစကားသည် မိုးကြိုးပစ်ချလိုက်သကဲ့သို့ ပဲ့တင်ထပ်သွားသည်

ခဏမျှ မည်သူမျှ တုံ့ပြန်ခြင်း မပြုနိုင်ကြပေ။

ဧကရာဇ်၏ မျက်နှာထားပင်လျှင် တောင့်တင်းသွားရသည်။

"...မင်း ဘာပြောလိုက်တာလဲ?"

ဧကရာဇ်က ဖြည်းညှင်းစွာ ပြန်မေးသည်။

ပိုင်ကျီဟန်၏ အကြည့်က မယိမ်းမယိုင် တည်ရှိနေဆဲဖြစ်သည်။

" ပြောတဲ့အတိုင်းပါပဲ ။ မြစိမ်းရောင်နေမင်း ဂိုဏ်းကို ကျူးကျော်ခဲ့တာက လုပ်ချင်လို့ လုပ်ခဲ့တာပါ”

တစ်ခန်းမလုံး၌ အံ့ဩတုန်လှုပ်သံများ ပျံ့လွင့်သွားသည်။

အကြီးအကဲအချို့က သူ့ကို အရူးတစ်ယောက်ကို ကြည့်သကဲ့သို့ ကြည့်နေကြသည်။

ဧကရာဇ်၏ မျက်လုံးများ ပို၍ ကျဉ်းမြောင်းသွား၏

"မင်းက အင်ပါယာရဲ့ တည်ငြိမ်မှုအတွက် အရေးပါတဲ့ အဓိကဂိုဏ်းကြီးတစ်ခုကို အမြစ်ပြတ်ချေမှုန်းဖို့အတွက် ဒီလိုအကြောင်းပြချက်မျိုးကို ပေးနေတာလား?"

"ဟုတ်ပါတယ်”

ပိုင်ကျီဟန်က တုံ့ဆိုင်းခြင်းမရှိဘဲ ဖြေလိုက်သည်။

"အကြီးမားဆုံး အကြောင်းပြချက်ကတော့ လုပ်ချင်လို့ပါပဲ။ အဲဒါမှမဟုတ်ရင်... ဒီလို အရေးမပါတဲ့ ဂိုဏ်းငယ်လေးတစ်ခုအတွက် ဘာလို့ အားအင်တွေ အကုန်ခံနေမှာလဲ?"

ဝိုင်းပြီး ဟစ်အော်သံများ၊

အံ့ဩတုန်လှုပ်မှုများနှင့်

ဒေါသသံများ ထွက်ပေါ်လာသည်။

သူ၏ လေသံထဲတွင် ပါဝင်နေသော မောက်မာမှုသည် ဖုံးကွယ်၍မရအောင် ထင်ရှားနေသည်။

မြစိမ်းရောင်နေမင်းဂိုဏ်းက...

အရေးမပါဘူးတဲ့လား?

လီကျန်းဟုန်၏ မျက်နှာတစ်ခုလုံး နီမြန်းလာသည်။

"မင်းက အရမ်းမောက်မာလွန်းတယ်” သူက ဆက်၍ မအောင့်အီးနိုင်တော့ဘဲ ပေါက်ကွဲထွက်လာသည်။ "ဒီလို ရယ်စရာကောင်းတဲ့ အကြောင်းပြချက်မျိုးကို ဒီနန်းရင်ပြင်က ဘယ်တော့မှ လက်ခံမှာ မဟုတ်ဘူး”

ခန်းမဆောင်အတွင်းရှိ ဖိအားများက အနည်းငယ် တုန်ခါလာသည်။

ပိုင်ကျီဟန်၏ မျက်လုံးများက သူ့ထံသို့ အေးစက်စွာ ရောက်ရှိလာသည်။

"ဒါဆို လွန်ခဲ့တဲ့ နှစ်နှစ်က ခင်ဗျားတို့ရဲ့ လီမျိုးနွယ်စုက ပိုင်မျိုးနွယ်စုကို ကျူးကျော်တုန်းကရော ဘာအကြောင်းပြချက် ရှိခဲ့လို့လဲ?" ဟု ပိုင်ကျီဟန်က တိုးညင်းစွာ မေးလိုက်သည်။

လီကျန်းဟုန် ပါးစပ်ဟလိုက်သော်လည်း

ပိုင်ကျီဟန်က အခွင့်အရေး မပေးခဲ့ပေ။

"အဲဒါကရော တစ်ကိုယ်ကောင်းမဆန်ဘဲ ဖြောင့်မတ်မှန်ကန်တဲ့ အကြောင်းပြချက် တစ်ခုခုကြောင့်လို့ မျှော်လင့်ရတာပဲလား?"

နှုတ်ခမ်းအစွန်းတွင် လှောင်ပြုံးတစ်ခု ပေါ်လာသည်။

အရာရှိအချို့မှာမူ စိတ်မသက်မသာဖြင့် အကြည့်ချင်း ဖလှယ်လိုက်ကြသည်။

ထိုဖြစ်ရပ်ကို

လူတိုင်း မှတ်မိကြသည်။

"အဟမ်း” လီကျန်းဟုန်က သူ၏ကိုယ်ကိုတောင့်တောင့်မတ်မတ် ပြန်ပြင်ထိုင်လိုက်

သည်။

"မင်းက ငယ်သေးတော့ နားမလည်တာပါ။ မသေမျိုးကရာဇ်ရဲ့ အမွေအနှစ် ဆိုတာ မျိုးနွယ်စုတစ်ခုတည်းရဲ့ လက်ထဲမှာ ထားဖို့အတွက် အရမ်းအန္တရာယ်များလွန်းတယ်။ ငါတို့က အင်ပါယာရဲ့ တည်ငြိမ်မှုအတွက် လုပ်ဆောင်ခဲ့တာပဲ။"

အချို့သောအဖွဲ့အစည်းများထံမှ ထောက်ခံသည့် တိုးတိုးသံများ ထွက်ပေါ်လာသည်။

ပိုင်ကျီဟန်က နှာခေါင်းရှုံ့လိုက်၏

"တကယ့်ဟာသပဲ၊ ခင်ဗျားတို့ရဲ့ အသုံးမကျတဲ့ ဆင်ခြေတွေကို အိမ်မှာပဲ သိမ်းထားလိုက်ပါ။"

သူ၏လေသံမှာ ပျင်းရိခြင်း မရှိတော့ပေ။

သူ၏အကြည့်က အထက်သို့ မြင့်တက်သွား၏

ဧကရာဇ်နှင့် တိုက်ရိုက်ဆုံသွားချေသည်။

သိသိသာသာ တင်းမာမှုတစ်ခု ဖြစ်ပေါ်လာသည်။

"ကျွန်တော်ရဲ့ ပိုင်မျိုးနွယ်စု ဝိုင်းရံခံရတုန်းက... ဖြောင့်မတ်ပါတယ်ဆိုတဲ့ အင်အားစုတွေက ကျွန်တော်တို့ကို လုယက်ဖို့ ကြိုးစားတုန်းက..."

သူက ခေါင်းကို အနည်းငယ် စောင်းလိုက်၏

"အဲဒီအချိန်တုန်းက အင်ပါယာရဲ့ တည်ငြိမ်မှုအတွက် စိုးရိမ်မှုတွေက ဘယ်ရောက်နေတာလဲ?"

တိတ်ဆိတ်သွားပြန်သည်။

ဧကရာဇ်၏ မျက်နှာထားသည် အနည်းငယ် တင်းမာခက်ထန်သွားသည်။

ပိုင်ကျီဟန်က အကြည့်လွှဲမသွားပေ။

"ဒါပေမဲ့ အခုကျမှ...ရုတ်တရက်ကြီး အင်ပါယာက အရမ်းဖြောင့်မတ်သွားတာလား?

ထိုစကားများကို အော်ဟစ်ပြောဆိုခြင်း မဟုတ်သော်လည်း

လေထုထဲတွင် ဓားသွားများကဲ့သို့ စူးရှစွာ ကျန်ရစ်ခဲ့သည်။

အမတ်အချို့ စိတ်မသက်မသာ ဖြစ်လာကြသည်။

ဧကရာဇ်၏ အကြည့်မှာ ပိုင်ကျီဟန်ထံတွင်သာ ရှိနေဆဲဖြစ်သည်။

"မင်း အန္တရာယ်ရှိတဲ့ နယ်မြေထဲကို ခြေလှမ်းနေပြီ" ဟု ဧကရာဇ်က တိုးညင်းစွာ ပြောလိုက်သည်။

ပိုင်ကျီဟန်၏ အမူအရာက မပြောင်းလဲပေ။

"အမှန်တရားကိုပဲ ပြောတာပါ။ အကယ်၍အရှင်မင်းမြတ်ကသာ အင်ပါယာရဲ့ တည်ငြိမ်မှုအတွက် တကယ်စိုးရိမ်တယ်ဆိုရင် လီကျန်းဟုန်နဲ့ ကျောက်ဝူထျန်းတို့ကို ကျွန်တော်တို့နယ်မြေထဲကို ကျူးကျော်ခဲ့တဲ့အတွက် ခိုင်လုံတဲ့ အကြောင်းပြချက်ပေးဖို့ ဘာလို့ မတောင်းဆိုတာလဲ?"

ခဏမျှ တိတ်ဆိတ်သွားပြီးနောက်

နဂါးပလ္လင်အောက်မှ ကြီးမားလှသော အင်ပါယာအရှိန်အဝါ ဖိအားများ စတင်ထွက်ပေါ်လာသည်။ သို့သော် ပိုင်ကျီဟန်သည် ထိုဖိအားအောက်တွင် မယိုင်မလဲ တည့်မတ်စွာ ရပ်နေဆဲဖြစ်သည်။ နန်းရင်ပြင်သည် ရိုးရိုးစမ်းသပ်စစ်ဆေးမှုတစ်ခု မဟုတ်တော့ပေ

ထိပ်တိုက်ရင်ဆိုင်မှုတစ်ခုကဲ့သို့ ခံစားလာရသည်။

"ဒါဆို... ပိုင်မျိုးနွယ်စုဖြစ်နေလို့ ဘာအကြောင်းပြချက်မှ မလိုဘူးဆိုတဲ့ သဘောပါလား?"

အခန်း ၄၈၅ သန့်စင်သောဂိုဏ်း၏ အရှိန်အဝါအောက်ဝယ်

"ဒါဆို... ပိုင်မျိုးနွယ်စုဖြစ်နေလို့ ဘာအကြောင်းပြချက်မှ မလိုဘူးဆိုတဲ့ သဘောလား?"

ပိုင်ကျီဟန်က လှောင်ပြောင်သရော်သော လေသံဖြင့် မေးလိုက်သည်။

ခန်းမဆောင်ကြီးတစ်ခုလုံး တိတ်ဆိတ်ခြင်းက ဝါးမြိုသွားသည်။

အချို့က အကြည့်လွှဲသွားကြ၏ အချို့မှာမူ ကိုယ်ဟန်များ တောင့်တင်းသွားကြသည်။

အကြောင်းမှာ ပိုင်ကျီဟန် ပြောနေသည်မှာ အမှန်တရားဖြစ်ကြောင်း လူတိုင်း သိနေကြသောကြောင့် ဖြစ်သည်။

လီမျိုးနွယ်စုနှင့် ကျောက်မျိုးနွယ်စုတို့သည် ပိုင်မျိုးနွယ်စုအပေါ် ပို၍ကြီးမားသော ကျူးကျော်မှုများ ပြုလုပ်ခဲ့ဖူးသော်လည်း ထိုစဉ်က မည်သည့်အကျိုးဆက်မျှ ကြီးကြီးမားမား မရှိခဲ့ပေ။

တိတ်ဆိတ်မှုက ရှည်လျားနေ၏

ထိုစဉ်

ကျောက်ဝူထျန်းက မတ်တပ်ရပ်လိုက်သည်။

သူ၏ အမူအရာက တည်ငြိမ်နေပြီး အသံမှာလည်း ခိုင်မာနေသည်။

"အတိတ်ကကိစ္စတွေက အတိတ်မှာပဲ ထားခဲ့ပါ" သူက အေးဆေးစွာ ပြောလိုက်သည်။ "အခု ငါတို့ ဆွေးနွေးနေတာက လက်ရှိကိစ္စကိုပါ။"

ကျောက်ဝူထျန်းသည် အကြောင်းအရာကို ချက်ချင်း လွှဲပြောင်းလိုက်ပြီး လူတိုင်း၏ အာရုံကို လက်ရှိပြဿနာထံသို့ ပြန်လည်ရောက်ရှိအောင် ကြိုးပမ်းလိုက်သည်။

"အခု မင်းပေးနေတဲ့ အကြောင်းပြချက်က အရမ်းကို ရယ်စရာကောင်းလွန်းတယ်။ တကယ်လို့ မြစိမ်းရောင်နေမင်း ဂိုဏ်းကို ကျူးကျော်ဖို့အတွက် မင်းရဲ့ တစ်ခုတည်းသော အကြောင်းပြချက်ဆိုရင်တော့ ငါတို့အနေနဲ့ ပိုင်မျိုးနွယ်စုကို အပြစ်ပေးဖို့ပဲ ဆက်လုပ်ရတော့မယ်။"

အခြားသူများကလည်း ထိုစကားကို ထောက်ခံသည့်အနေဖြင့် ခေါင်းညိတ်ကြသည်။

မှန်ပါသည်။ ပြီးခဲ့သည့်ကိစ္စကို ပြန်ပြောနေ၍ ဘာထူးမည်နည်း?

ထိုအချက်က ပိုင်မျိုးနွယ်စုအနေဖြင့် မြစိမ်းရောင်နေမင်း ဂိုဏ်းအား ကျူးကျော်ရန် ခိုင်လုံသော အကြောင်းပြချက် ဖြစ်မလာနိုင်ပေ။

"ဟဲဟဲ။"

ပိုင်ကျီဟန်က ခပ်တိုးတိုး လှောင်ရယ်လိုက်သည်။

"ပြောလို့မပြီးသေးဘူးလေ။"

သူ၏လေသံမှာ တစ်ခုခုကို သဘောကျနေသယောင် ရှိနေသည်။

"မြစိမ်းရောင်နေမင်း ဂိုဏ်းကို ကျူးကျော်ခဲ့တဲ့ အကြီးမားဆုံး အကြောင်းပြချက်ကိုပဲ ပြောရသေးတာ။"

သူက တမင်တကာ စကားကို ရပ်လိုက်သည်။

"တခြား အကြောင်းပြချက်တွေလည်း ရှိပါသေးတယ်။"

ပိုင်ကျီဟန်၏ မျက်လုံးများ အနည်းငယ် မဲမှောင်သွား၏

"ဒုတိယအချက်အနေနဲ့..." သူက တည်ငြိမ်စွာ ဆက်ပြောသည်။ "...သူတို့က ကျွန်တော်ကို လုပ်ကြံဖို့ ကြိုးစားခဲ့ကြတယ်။"

နန်းရင်ပြင်တစ်ခုလုံး ဆူညံပွက်လောရိုက်သွားသည်။

"ဘာ”

"လုပ်ကြံတာလား? မြစိမ်းရောင်နေမင်း ဂိုဏ်းကလား?"

တီးတိုးပြောဆိုသံများ ထွက်ပေါ်လာပြီး တင်းမာမှုများ ချက်ချင်း မြင့်တက်လာသည်။

ဝမ်ဟောင်ယု၏ မျက်နှာပျက်သွားရ၏

"ဒါက မဟုတ်မတရား စွပ်စွဲတာပဲ”ဟု သူက အော်ဟစ်လိုက်သည်။ "ငါတို့က မင်းကို ဘာလို့ လုပ်ကြံရမှာလဲ? မင်းနဲ့ ငါတို့ကြားမှာ ဘာရန်ငြိုးမှ မရှိဘူး”

သူက အတင်းအကျပ် လှောင်ရယ်လိုက်၏

"မြစိမ်းရောင်နေမင်း ဂိုဏ်းက မင်းလိုကောင်ကို ဘာလို့ ပစ်မှတ်ထားနေမှာလဲ?"

ဝမ်ဟောင်ယု၏ စကားကို ကြားရသောအခါ အခြားသူများလည်း ထိုအတိုင်းပင် ခံစားလိုက်ရသည်။

ပိုင်ကျီဟန် မြစိမ်းရောင်နေမင်း ဂိုဏ်းကို ကျူးကျော်ခဲ့သည့် အချိန်မှလွဲ၍ ထိုနှစ်ဖက်ကြားတွင် မည်သည့် ထိပ်တိုက်ရင်ဆိုင်မှု သို့မဟုတ် ပဋိပက္ခမျှ ရှိခဲ့ပုံမပေါ်ပေ။

ထို့ကြောင့် ပိုင်ကျီဟန်ကို လုပ်ကြံရန် ကြိုးစားသည်ဟူသော ကိစ္စမှာ ခိုင်လုံသော အကြောင်းပြချက် ဖြစ်နိုင်သော်လည်း လက်တွေ့တွင် ဖြစ်နိုင်ခြေ အလွန်နည်းပါးသည်ဟု ထင်ရသည်။

ပိုင်ကျီဟန်က သူ၏လုပ်ရပ်ကို ဖြောင့်မတ်အောင် လိမ်ညာနေခြင်းလော? သို့မဟုတ် ဝမ်ဟောင်ယုက တစ်ခုခုကို ဖုံးကွယ်ထားခြင်းလော?

မည်သို့ပင်ဆိုစေ အကယ်၍ ဝမ်ဟောင်ယုက သူ့ကို အရင်သတ်ရန် ကြိုးစားခဲ့ကြောင်း ပိုင်ကျီဟန် သက်သေပြနိုင်ပါက ဤနန်းရင်ပြင်၏ ဆုံးဖြတ်ချက် ရလဒ်သည် ပြောင်းလဲသွားနိုင်ပေသည်။

ပိုင်ကျီဟန်က ရယ်မောလိုက်သည်။

"ရန်ငြိုးမရှိဘူး ဟုတ်လား?"

သူသည် ဝမ်ဟောင်ယုကို သနားစဖွယ် သတ္တဝါတစ်ခုကို ကြည့်သကဲ့သို့ ကြည့်လိုက်၏

"အကြောင်းပြချက်ကတော့..." ပိုင်ကျီဟန်က ခပ်ပေါ့ပေါ့ ပြောလိုက်သည်။ "...မင်းတို့ ကြောက်နေလို့ပဲ။"

ဝမ်ဟောင်ယု၏ လက်ချောင်းများ တုန်ခါသွားသည်။

"ဘာကို ကြောက်တာလဲ? မင်း ဘာတွေ လျှောက်ပြောနေတာလဲ?"

သူက အနည်းငယ် ပျာယာခတ်နေသော လေသံဖြင့် ချက်ချင်း ပြန်ပြောသည်။

"မင်းတို့ ကြောက်တာက..." ပိုင်ကျီဟန်က သူ့ကို ဂရုမစိုက်ဘဲ ဆက်ပြောသည်။ "...ငါက မင်းတို့ဂိုဏ်းရဲ့ လျှို့ဝှက်ချက်ကို ဖော်ထုတ်လိုက်မှာကိုပဲ။ ငါ့ကို အစွမ်းအစမရှိတဲ့ လူဖျင်းတစ်ယောက်လို့ ထင်ပြီး ငါ့ကိုသတ်ဖို့ မင်းတို့ရဲ့ ကောင်းကင်ဓားပြတွေကို လွှတ်ခဲ့တာ မလား။"

ဝမ်ဟောင်ယု၏ တည်ငြိမ်မှုများ ခဏမျှ ပြိုကွဲသွားသည်။

"လိမ်ညာနေတာ၊ မင်းလုပ်ခဲ့တဲ့ မကောင်းမှုတွေကို အကြောင်းပြဖို့ ကြိုးစားနေတာပဲ”

ဝမ်ဟောင်ယုက သူ့ကိုယ်သူ ချက်ချင်း ခုခံကာကွယ်ပြီး အပြစ်အားလုံးကို ပိုင်ကျီဟန် အပေါ် ပုံချကာ သူအား လူလိမ်တစ်ယောက်ဖြစ်အောင် ကြိုးစားလိုက်သည်။

ကြားနေအဖွဲ့အစည်း အများစုမှာမူ မည်သူ့ကို ယုံကြည်ရမည်မှန်း မသိဖြစ်နေကြသည်။

ဝမ်ဟောင်ယုဘက်မှ လူများသည် သူ့ဘက်က ရပ်တည်နေကြသော်လည်း ပိုင်ကျီဟန်ဘက်က လူများမှာမူ သူ၏ ရှင်းပြချက်ကို စိတ်ရှည်လက်ရှည် စောင့်ဆိုင်းနေကြသည်။

"ဟွန့်၊ ဘာတွေလုပ်ခဲ့သလဲဆိုတာ ခင်ဗျား အသိဆုံးဖြစ်မှာပါ။"

ပိုင်ကျီဟန်က စိုက်ကြည့်လျက် ပြောလိုက်ရာ ဝမ်ဟောင်ယုသည် စိုးရိမ်စိတ်နှင့် ကြောက်ရွံ့မှုတို့ကြောင့် တံတွေးကို ခက်ခဲစွာ မျိုချလိုက်ရသည်။

ယခုအခါ ပိုင်ကျီဟန်၏ အသံတွင် မောက်မာမှုများ မရှိတော့ပေ။

"မြစိမ်းရောင်နေမင်း ဂိုဏ်းက” သူက စကားလုံး တစ်လုံးချင်းစီကို ပြတ်သားစွာ ပြောလိုက်သည်။ "...ကလေးသူငယ်တွေအပေါ်မှာ စမ်းသပ်မှုတွေ လုပ်ဆောင်နေခဲ့တာပါပဲ။"

တစ်ခန်းမလုံး သေလုမတတ် တိတ်ဆိတ်သွားတော့သည်။

"သူတို့က ကလေးတွေကို ပြန်ပေးဆွဲနေခဲ့ကြတာ" ပိုင်ကျီဟန်က နန်းရင်ပြင်တစ်ခုလုံးကို ဝေ့ကြည့်ရင်း ဆက်ပြောသည်။

"တားမြစ်ထားတဲ့ ကျင့်စဉ်စမ်းသပ်မှုတွေအတွက် အဲဒီကလေးတွေကို အသုံးပြုခဲ့ကြတာပဲ။"

တုံ့ပြန်မှုများက ပေါက်ကွဲထွက်လာသည်။

"မဖြစ်နိုင်တာ”

"ဒါက မဖြစ်နိုင်တဲ့ စွပ်စွဲချက်ပဲ”

"ဒါက အရမ်းပြင်းထန်တဲ့ စွပ်စွဲချက်ပဲနော်”

အမတ်အချို့ ရုတ်တရက် မတ်တပ်ရပ်လိုက်ကြသည်။

အကယ်၍ ပိုင်ကျီဟန် ပြောသည်မှာ အမှန်ဖြစ်ပါက ၎င်းသည် ပိုင်ကျီဟန်၏ လုပ်ရပ်ကို တရားမျှတစေရုံသာမက မြစိမ်းရောင်နေမင်း ဂိုဏ်းကိုပါ သေချာစုံစမ်းစစ်ဆေးပြီး အပြင်းအထန် အပြစ်ပေးရတော့မည်

ဖြစ်သည်။

ကျောက်ဝူထျန်း၏ မျက်နှာထားပင် ပြောင်းလဲသွားသည်။

ဝမ်ဟောင်ယု၏ မျက်နှာမှာမူ သွေးမရှိသကဲ့သို့ ဖြူလျော်သွား၏

"မင်း လူလိမ်”သူက အော်ဟစ်လိုက်သည်။ "မင်းမှာ ဘာသက်သေရှိလို့လဲ? မင်းက မြစိမ်းရောင်နေမင်း ဂိုဏ်းကို ဒီလိုရာဇဝတ်မှုမျိုးနဲ့ စွပ်စွဲရဲတယ်ပေါ့လေ”

ပိုင်ကျီဟန်က အသံကို မြှင့်မပြောပေ။

"သက်သေလိုချင်တာလား?"

သူ၏ အကြည့်က ဧကရာဇ်ထံသို့ ခဏမျှ ရောက်ရှိသွားသည်။

"ကျုပ်ဆီမှာ ကယ်တင်ထားတဲ့ အသက်ရှင်ကျန်ရစ်သူတွေ ရှိတယ်။"

တစ်ခန်းမလုံး လှုပ်လှုပ်ရှားရှား ဖြစ်သွားသည်။

"မြစိမ်းရောင်နေမင်း ဂိုဏ်းမှာရှိတဲ့ ခင်ဗျားတို့ရဲ့ စမ်းသပ်ခန်းကိုလည်း တူတူသွားကြည့်ပြီး အတည်ပြုလို့ရတာပဲ။"

လူတိုင်းက ထိုနှစ်ယောက်ကို ကြည့်ပြီး မည်သူ့ကို ယုံရမည်မှန်း မသိဘဲ ဇဝေဇဝါ ဖြစ်နေကြသည်။

သို့သော် ပိုင်ကျီဟန်၏ ယုံကြည်ချက်အပြည့်ရှိသော အမူအရာကို ကြည့်ရသည်မှာ လိမ်နေပုံမရပေ။ အကယ်၍ သူပြောသည်ကို အတည်ပြုလိုက်လျှင် အမှန်တရားက ပေါ်လာမည် မဟုတ်ပါလော

အလွယ်တကူ အတည်ပြုနိုင်မည့် အရာမျိုးကို ပိုင်ကျီဟန်က ဘာကြောင့်

လိမ်ပြောရမည်နည်း?

ယခုအခါ ဝမ်ဟောင်ယုကို သနားသလို ကြည့်နေသည့် အကြည့်များက စတင်ပြောင်းလဲလာသည်။

အကယ်၍ ပိုင်ကျီဟန် ပြောသည်မှာ အမှန်ဆိုလျှင် ဝမ်ဟောင်ယုနှင့် မြစိမ်းရောင်နေမင်း ဂိုဏ်းတို့သာ အပြစ်ပေးခံရမည်ဖြစ်သည်။

သို့သော် ဝမ်ဟောင်ယုကမူ ထိုစွပ်စွဲချက်အားလုံးကို ဆက်လက်ငြင်းဆိုနေဆဲပင်။

"ပိုင်ကျီဟန်က သူလုပ်ခဲ့တာတွေကို လူတွေ အာရုံလွဲသွားအောင် လုပ်နေတာပဲ။ စောစောက ပြောသလိုပဲ... မင်းရဲ့ စကားကလွဲရင် အခုတင်ပြနိုင်တဲ့ တခြားဘာသက်သေ ရှိသေးလို့လဲ?"

ဝမ်ဟောင်ယုက ချွေးများ စီးကျနေသော်လည်း ပြုံးလျက် မေးလိုက်သည်။

"မင်းစကားကို လူတိုင်းက အလွယ်တကူ ယုံလိမ့်မယ်လို့ မထင်နဲ့လေ။ ဒါမှမဟုတ် တစ်ယောက်ယောက် သွားစစ်ဆေးတဲ့အထိ ငါတို့အားလုံး စောင့်နေရမှာလား?"

ဝမ်ဟောင်ယုက ယုံကြည်မှုရှိရှိ မေးလိုက်ခြင်းဖြစ်သည်။

သိသာသည်မှာ သူ၏ဘက်တော်သား တစ်ဦးဦးကသာ သွားရောက်စစ်ဆေးမည်ဆိုလျှင် အမှန်တရားဖြစ်နေပါစေဦးတော့ ရိုးရိုးသားသား တင်ပြပါမည်လော?

မတင်ပြသည်မှာ သေချာသည်။

ထို့ပြင် လူတိုင်းကလည်း ထိုနေရာသို့ အတူတူ သွားရောက်ရန်မှာ မဖြစ်နိုင်ပေ။

ထို့ကြောင့် ဝမ်ဟောင်ယုသည် သူ ဘေးကင်းသေးသည်ဟု ယူဆထားသည်။

ဧကရာဇ်က လူလွှတ်မည်ဆိုလျှင်ပင် အမှန်တရားကို သိသွားသည့်တိုင် သူ့ကို ကူညီလိမ့်မည်ဟု သူက ယုံကြည်နေသည်။

နန်းရင်ပြင်တစ်ခုလုံး သံသယစိတ်များဖြင့် ဆူပွက်နေသည်။

ဝမ်ဟောင်ယုက သူ၏ ယုံကြည်မှုကို အတင်းအကျပ် ဟန်ဆောင်လျက် မတ်တပ်ရပ်နေသည်။

သူသည် ပိုင်ကျီဟန်ကို "မင်း နောက်ထပ် ဘာလုပ်နိုင်ဦးမှာလဲ?" ဟု မေးနေသည့်အလား စိုက်ကြည့်နေသည်။

သို့သော် ထိုအချိန်တွင်

ပိုင်ကျီဟန်က ပြုံးလိုက်သည်။

"ခင်ဗျားက တော်တော် ယုံကြည်မှုရှိနေတာပဲ" ဟု သူက ခပ်ပေါ့ပေါ့ ပြောလိုက်သည်။

" သက်သေတောင်းနေတာလား? ကျုပ်ပြောတာတွေကို အတည်ပြုဖို့က အချိန်တွေ အများကြီး လိုလိမ့်မယ်။ ဒါကြောင့် သိပ်မြင်ချင်နေတဲ့ သက်သေကို အခုပဲ ပြပေးမယ်။"

ပိုင်ကျီဟန်၏ လက်ချောင်းများက သူ၏ ဝိညာဉ်လက်စွပ်ကို ထိလိုက်သည်။

"မှတ်ဉာဏ်ပုံရိပ်လွှာကြေးမုံရှိတာ ခင်ဗျားတစ်ယောက်တည်း မဟုတ်ဘူးဗျ။"

ထိုစကားက မိုးကြိုးပစ်ချလိုက်သကဲ့သို့ပင်။

ပိုင်ကျီဟန်သည် သူ၏ သိုလှောင်လက်စွပ်ထဲမှ ထိုပစ္စည်းကို ထုတ်ယူလိုက်သည်။

တစ်ခန်းမလုံး ရုတ်ရုတ်သဲသဲ ဖြစ်သွားသည်။

ဝမ်ဟောင်ယု၏ သူငယ်အိမ်များ ကျုံ့သွား၏

ထိုပစ္စည်းထဲတွင် ဘာတွေ ရှိနေနိုင်သည်ကို သူ စတင် စိတ်ကူးကြည့်မိသွားသည်။

ပိုင်ကျီဟန်က ၎င်းအတွင်းသို့ ချီစွမ်းအင်များ ထည့်သွင်းလိုက်သည်။

အလင်းတန်းများ ပွင့်ထွက်လာ၏

နန်းရင်ပြင်ပေါ်ရှိ လေထုက တစ်ဖန် တုန်ခါသွားပြန်သည်။

ပုံရိပ်လွှာတစ်ခု ထွက်ပေါ်လာသည်။

ဤတစ်ကြိမ်တွင်မူ

ပထမဆုံး ပုံရိပ်သည် ပိုင်ကျီဟန် ဂိုဏ်းအတွင်းသို့ တိတ်တဆိတ် ဝင်ရောက်သွားသည့် ပုံစံဖြစ်သည်။ ထို့နောက် မှောင်အတိ ကျသွားသည်။

မြစိမ်းရောင်နေမင်း ဂိုဏ်း၏ နက်ရှိုင်းသော မြေအောက် လျှို့ဝှက်စင်္ကြံလမ်းတစ်ခု။

ပိုင်ကျီဟန်က လျှို့ဝှက်အခန်း တံခါးများကို ရိုက်ချိုးပြီး ဝင်သွားသည့် ပုံရိပ်က ပေါ်လာသည်။

ထို့နောက်တွင်မူ

မှတ်တမ်းထဲ၌ အရာအားလုံး ပါဝင်နေသည်။

သံလှောင်အိမ်တန်းကြီးများ။

၎င်းတို့အတွင်းရှိ သေးငယ်သော အရိပ်အယောင်များ

ကလေးငယ်များ။

အချို့မှာ သတိမေ့မြောနေကြ၏

အချို့မှာမူ ကြောင်တောင်တောင် ငေးကြည့်နေကြသည်။

အချို့ကမူ အားနည်းစွာ ရုန်းကန်နေကြသည်။

နန်းရင်ပြင်တစ်ခုလုံးမှ အသက်ရှူသံများ အောင့်ထားကြရသည်။

ပုံရိပ်လွှာက ဆက်လက် ပြသနေသည်။ အခင်းအကျင်းက ထပ်မံ ပြောင်းလဲသွားပြန်သည်။

ကြမ်းပြင်ပေါ်တွင် ထွင်းထုထားသော ထူးဆန်းသည့် စက်ဝိုင်းများ

သွေးရောင်စာသားများ

လှောင်အိမ်များ၊ စမ်းသပ်မှုများ။

ထိတ်လန့်နေသော ကလေးငယ်များ။

ဝိညာဉ်စွမ်းအင်များကို အတင်းအကျပ် ထုတ်ယူရန် ဒီဇိုင်းထုတ်ထားသော စွမ်းအင်ခင်းကျင်းမှုများ

စမ်းသပ်မှုအကြောင်း အလုံးစုံကို ပြောပြနေသော အကြီးအကဲ၏ ဝန်ခံချက်အထိ ပုံရိပ်များက ဆက်လက်ပြသသွားသည်။

ပုံရိပ်လွှာ ပြသမှု ပြီးဆုံးသွားသည့်အခါ

မည်သူမျှ စကားမပြောနိုင်ကြတော့ပေ။

ဝမ်ဟောင်ယု၏ မျက်နှာမှာ သေလူကဲ့သို့ ဖြူလျော်သွားသည်။

"ဒါ... ဒါက လုပ်ကြံဖန်တီးထားတာပဲ” သူက အသံဗလုံးဗထွေးဖြင့် အော်ဟစ်လိုက်သည်။ "မင်း တစ်နေရာရာက ပုံတွေကို ရိုက်ကူးပြီး ငါတို့အပေါ် အပြစ်ပုံချနေတာ”