အခန်း (၄၉၀-၄၉၁)

အခန်း ၄၉၀ ဝမ်ဟောင်ယုအား ကွပ်မျက်ခြင်း

နန်းတွင်း၌ ဖြစ်ပျက်ခဲ့သော သတင်းများသည် စိတ်ကူးထားသည်ထက်ပင် ပိုမိုမြန်ဆန်စွာ ပျံ့နှံ့သွားခဲ့သည်။

အမှန်စင်စစ် လူအများစုမှာ ဤဖြစ်ရပ်အပြီးတွင် ပိုင်မျိုးနွယ်စု၏ ကံကြမ္မာ မည်သို့ဖြစ်လာမည်ကို စောင့်ကြည့်နေကြခြင်းဖြစ်သည်။

သို့သော် သူတို့ရရှိလိုက်သော သတင်းမှာ မျှော်လင့်ထားသည်နှင့် လုံးဝတခြားစီ ဖြစ်နေခဲ့သည်။

ပိုင်ကျီဟန်သည် မြစိမ်းရောင်နေမင်းဂိုဏ်းကို အကြောင်းမဲ့ တိုက်ခိုက်ခဲ့ခြင်းမဟုတ်ဘဲ ထိုဂိုဏ်းသည် ကလေးသူငယ်များအပေါ် အန္တရာယ်ရှိပြီး တရားမဝင်သော စမ်းသပ်မှုများ ပြုလုပ်နေသောကြောင့်သာ တိုက်ခိုက်ခဲ့ခြင်းဖြစ်သည်။

ထို့အပြင် မြစိမ်းရောင်နေမင်းဂိုဏ်းသည် ကလေးများကို ပြန်ပေးဆွဲခြင်းနှင့် ပိုင်ကျီဟန်ကို လုပ်ကြံရန် ကြိုးပမ်းခြင်း အကြောင်း သတင်းများပါ ထွက်ပေါ်လာခဲ့သည်။

တစ်ရက်အတွင်းမှာပင်

ကောင်းကင်အင်ပါယာတစ်ခုလုံး သိရှိသွားကြတော့သည်။

အစပိုင်းတွင် မယုံကြည်နိုင်မှုများ

ထို့နောက် အံ့အားသင့်မှုများနှင့်

နောက်ဆုံးတွင် ဒေါသတကြီး ဖြစ်ကုန်ကြသည်။

"မြစိမ်းရောင်နေမင်းဂိုဏ်းက ကလေးတွေကို စမ်းသပ်မှုတွေ လုပ်ရဲတယ် ဟုတ်လား?"

"ဆယ်စုနှစ်နဲ့ချီပြီးတော့လား? ဒီလိုလုပ်ပြီးမှ သူတို့ကိုယ်သူတို့ သူတော်စင်တွေလို့ ခေါ်ရဲသေးတယ်”

"သူတို့ ငရဲမှာပဲ ပြာဖြစ်သင့်တာ။"

တစ်ချိန်က ပိုင်ကျီဟန်ကို ပြစ်တင်ရှုတ်ချခဲ့ကြသော လမ်းမထက်မှ အသံများသည် ယခုအခါ လုံးဝပြောင်းလဲသွားခဲ့သည်။

သူက မောက်မာတာ မဟုတ်ဘူးလား?

သူက ဥပဒေမဲ့တာ မဟုတ်ဘူးလား?

သူက နန်းတွင်းကို အန်တုခဲ့တာ မဟုတ်ဘူးလား?

ယခင်က လူများ ပြောခဲ့ကြသည့် စကားများဖြစ်သည်။

သို့သော်

ယခုမူ ဇာတ်လမ်းမှာ ပြောင်းပြန်ဖြစ်သွားခဲ့ချေပြီ။

"ဒါကြောင့်မို့လို့ သခင်လေးပိုင်က မြစိမ်းရောင်နေမင်းဂိုဏ်းကို တိုက်ခိုက်ခဲ့တာကိုး၊ မျှော်လင့်ထားတဲ့အတိုင်းပဲ၊ သူက မြင့်မြတ်တဲ့ အကြောင်းပြချက်ရှိခဲ့တာပဲ”

"သူက မဆင်မခြင် လုပ်ခဲ့တာမဟုတ်ဘူး၊ အဲဒီကလေးတွေကို ကယ်တင်ခဲ့တာ”

"နန်းတွင်းက ဘာတွေလုပ်နေတာလဲ? ဒါမျိုးတွေကို သူတို့အရင် သိသင့်တာလေ။ အခုတော့ သခင်လေးပိုင်က သူတို့အလုပ်ကို ဝင်လုပ်ပေးလိုက်ရပြီ။"

"အကယ်၍ ပိုင်ကျီဟန်သာ မရှိရင် ငါတို့တွေ အမှောင်ထဲမှာပဲ ရှိနေဦးမှာပဲ”

ပိုင်ကျီဟန်၏ နာမည်နောက်ကွယ်မှ ကဲ့ရဲ့ရှုတ်ချသံများ ပျောက်ကွယ်သွား၏

ထိုနေရာတွင်

အထင်ကြီး လေးစားမှုနှင့် ကျေးဇူးတင်မှုများ အစားထိုးဝင်ရောက်လာသည်။

"ဖြောင့်မတ်ခြင်းရဲ့ သူရဲကောင်း”

"သူက မိစ္ဆာသားရဲတွေနဲ့ မိစ္ဆာကျင့်ကြံသူတွေကို သတ်ပေးရုံတင်မကဘဲ အင်ပါယာထဲက မကောင်းဆိုးဝါးတွေကိုပါ ရှင်းလင်းပေးနေတာ။ ဒါမှ စစ်မှန်တဲ့ သူရဲကောင်းပဲ”

တစ်ဖက်တွင်မူ မြစိမ်းရောင်နေမင်းဂိုဏ်းအပေါ် ကျိန်ဆဲသံများသည် မုန်တိုင်းအလား မရပ်မနား ကျရောက်လာတော့သည်။

"လူ့အရေခွံခြုံထားတဲ့ တိရစ္ဆာန်တွေ”

"သူတော်စင်ယောင်ဆောင်ထားတဲ့ မိစ္ဆာဂိုဏ်း”

"ငါတို့ သူတို့ကို လေးစားခဲ့မိတာကို တွေးကြည့်စမ်း၊ သူတို့အားလုံး အပြစ်ပေးခံရမယ်”

မြစိမ်းရောင်နေမင်းဂိုဏ်းကို ဆန့်ကျင်သောအသံများ ပေါ်ထွက်လာ၏

ထိပ်သီးဂိုဏ်းကြီး ဖြစ်နေရင်ကော ဘာဖြစ်လဲ? သူတို့ စိတ်ကြိုက် လျှောက်လုပ်လို့ရသလား?

လူတိုင်း ညီညွတ်သွားကြသည့်အခါ မြစိမ်းရောင်နေမင်းဂိုဏ်းကဲ့သို့ အင်အားကြီးသူကိုပင် မကြောက်တော့ပေ။

ပိုင်မျိုးနွယ်စုအတွက်မူ

သူတို့၏ ဂုဏ်သတင်းမှာ အထူးမြင့်မားလာပြီး လူတိုင်းက ချီးမွမ်းနေကြသည်။ ယခင်က ဆဲဆိုခဲ့သူများသည်လည်း သတင်းအမှားများကြောင့် ဖြစ်ရပါသည်ဟု တောင်းပန်ခဲ့ကြသည်။

သုံးရက်အကြာတွင်

မြို့တော်၏ ဗဟိုရင်ပြင်ကြီးသည် လူများဖြင့် ပြည့်လျှံနေသည်။

အိမ်ခေါင်မိုးများပေါ်တွင်ပင် လူများ ပြည့်နေသည်ဟု ဆိုကြသည်။

ဈေးသည်များ စောစီးစွာ ဆိုင်ပိတ်ကြ၏ အနီးနားရှိ ကျင့်ကြံသူများသည်လည်း သမိုင်းဝင်ဖြစ်ရပ်ကို မျက်မြင်တွေ့ရှိရန် အပြေးအလွှား ရောက်ရှိလာကြသည်။

ရင်ပြင်၏အလယ်တွ မြင့်မားသော ကွပ်မျက်စင်ကြီး တစ်ခုရှိနေသည်။

အင်ပါယာ၏ အလံတော်များမှာ လေထဲတွင် တလွင့်လွင့် ဖြစ်နေပြီး သံခြေကျင်းများ၏ အသံများ မြည်ဟည်းနေသည်။

ဝမ်ဟောင်ယုအား ခေါ်ဆောင်လာခဲ့သည်။

တစ်ချိန်က သန့်ရှင်းသပ်ရပ်ခဲ့သော ဝတ်စုံများမရှိတော့ဘဲ ရိုးရှင်းသော အဖြူရောင် အကျဉ်းသားဝတ်စုံနှင့် ဖြစ်နေသည်။

သူ၏ ကျင့်စဉ်အဆင့်မှာ ချိပ်ပိတ်ခံထားရသည်။

စွမ်းအားဝိညာဉ်မရှိပေ။

အရှိန်အဝါမရှိပေ။

ဂိုဏ်းချုပ်တစ်ယောက်မဟုတ်တော့ပေ။

သာမန်လူတစ်ယောက်သာ။ မဟုတ်သေး... လူတစ်ယောက်အနေဖြင့် ရသင့်သော အခွင့်အရေးများနှင့်ပင် မထိုက်တန်သည့် ညစ်ပတ်သော ရာဇဝတ်ကောင် တစ်ဦးသာဖြစ်သည်။

လူအုပ်ကြီးက သူ့ကို မြင်လိုက်သည်နှင့် ဟိန်းဟောက်ကြတော့သည်။

"ဒါ သူပဲ၊ မြစိမ်းရောင်နေမင်းဂိုဏ်းရဲ့ ဂိုဏ်းချုပ်ဟောင်း၊ အဲဒီစမ်းသပ်မှုတွေကို စခဲ့တဲ့သူ”

"သတ်ပစ်၊ ကွပ်မျက်ပစ်”

ဝမ်ဟောင်ယု၏ မျက်နှာသည် ဖြူလျော်နေပြီး ကိုယ်ပေါ်တွင်လည်း ဒဏ်ရာဒဏ်ချက်များ ရှိနေသည်။

လွန်ခဲ့သော သုံးရက်မှာ သူ၏အတွက် ငြိမ်းချမ်းသော နေ့ရက်များ မဟုတ်ခဲ့ဘဲ နှိပ်စက်ညှဉ်းပန်းမှုများကို ခံခဲ့ရသည်မှာ သေချာသည်။

သို့သော် သူ၏ မျက်လုံးများထဲတွင်

နာကျည်းမှုနှင့် မုန်းတီးမှုများ တောက်လောင်နေသည်။

သူသည် လူအုပ်ထဲတွင် တစ်စုံတစ်ယောက်ကို ရှာဖွေနေသကဲ့သို့ ကြည့်နေသော်လည်း ကျင့်စဉ်ချိပ်ပိတ်ခံထားရသဖြင့် ထိုသူကို ရှာမတွေ့နိုင်ပေ။

ပိုင်ကျီဟန်

အကယ်၍ သူ့ကို မနှောင့်ယှက်ခဲ့လျှင်

အကယ်၍သာ သူ့ကို လုပ်ကြံဖို့ အမိန့်မပေးခဲ့လျှင်

ထိုသို့ လုပ်ခဲ့မိတောင် အခွင့်အရေးရတုန်းက သူ ထွက်ပြေးခဲ့သင့်သည်။

လီကျန်းဟုန်နှင့် ကျောက်ဝူထျန်းတို့၏ ထောက်ပံ့မှုဖြင့် ပိုင်မျိုးနွယ်စုကို ဖြိုလဲပြီး ဂိုဏ်းကို ပြန်ရနိုင်မည်ဟု သူ ဘာကြောင့်များ ယုံကြည်ခဲ့မိသနည်း

ကွပ်မျက်စင်ပေါ်တွင် အင်ပါယာ၏ ကွပ်မျက်ရေးအရာရှိသည် အမိန့်တော်စာလိပ်ကို ကိုင်ဆောင်ကာ ရပ်နေသည်။

သူ၏အသံသည် ရင်ပြင်တစ်ခုလုံး ဟိန်းထွက်သွားသည်။

"ဝမ်ဟောင်ယု မြစိမ်းရောင်နေမင်းဂိုဏ်းရဲ့ ဂိုဏ်းချုပ်ဟောင်း..."

"မင်းဟာ တားမြစ်ထားတဲ့ လူသားစမ်းသပ်မှုတွေကို ဆယ်စုနှစ်နဲ့ချီပြီး လုပ်ဆောင်ခဲ့တယ်။ နန်းတွင်းကို လှည့်စားခဲ့တယ်။ အင်ပါယာရဲ့ ကိုယ်ကျင့်တရားဥပဒေတွေကို ဖောက်ဖျက်ခဲ့တယ်။"

"ဧကရာဇ်မင်းမြတ်ရဲ့ အမိန့်တော်အရ... မင်းကို လူအများရှေ့မှာ ကွပ်မျက်ဖို့ စီရင်ချက်ချမှတ်လိုက်တယ်”

လူအုပ်ကြီးမှာ ဆူညံသွားကြသည်။

"သတ်ပစ်”

"တရားမျှတမှုအတွက်”

"ဒါကို သတိပေးချက်တစ်ခုအဖြစ် မှတ်ထားပါစေ”

"မင်းမှာ နောက်ဆုံးပြောချင်တဲ့ စကားရှိလား?"

ကွပ်မျက်ရေးအရာရှိက မေးလိုက်သည်။

ဝမ်ဟောင်ယုသည် ရုတ်တရက် ရူးသွပ်စွာ ရယ်မောလိုက်သည်။

"ဟဲဟဲ... ဟားဟားဟား..."

ထိုရယ်သံမှာ ပိုမိုကျယ်လောင်လာပြီး ရူးသွပ်နေသူတစ်ယောက်၏ အော်ဟစ်သံကဲ့သို့ ရင်ပြင်တစ်ခုလုံး ပဲ့တင်ထပ်သွားသည်။

သွေးဆာနေသော သူ၏မျက်လုံးများက လူအုပ်ကြီးကို ကြည့်လိုက်သည်။

ထို့နောက် သူ၏အသံသည် စူးရှစွာ ထွက်ပေါ်လာသည်။

"ပိုင်ကျီဟန်”

ထိုအမည်မှာ လူအုပ်ကြားထဲတွင် ဟိန်းထွက်သွားသည်။

"မင်းက ဖြောင့်မတ်တဲ့ လူသားယောင်ဆောင်နေရုံနဲ့ ငါနဲ့ မတူဘူးလို့ ထင်နေတာလား?”

သူ၏ နှုတ်ခမ်းများက အမုန်းတရားများဖြင့် တွန့်ကွေးသွားသည်။

"မင်းနဲ့ငါက အတူတူပဲ”

သူ၏ အသံသည် လူအုပ်ကြီးဘက်သို့ အော်ဟစ်လိုက်သဖြင့် အသံများ တုန်ယင်နေသည်။

"တစ်နေ့ကျရင် မင်းရဲ့ မျက်နှာဖုံးလည်း ကွာကျလာမှာပါ။"

"အဲဒီအချိန်ကျရင်... မင်းလည်း ငါ့လိုကံကြမ္မာမျိုးနဲ့ ကြုံရလိမ့်မယ်”

ခဏတာအကြာတွင်

တိတ်ဆိတ်မှုများ လွှမ်းမိုးသွားသည်။

ထို့နောက် လူအုပ်ကြီးသည် ဒေါသတကြီး ပေါက်ကွဲကုန်သည်။

"ပါးစပ်ပိတ်ထားစမ်း”

"မင်းက ဘယ်လိုလုပ် သခင်လေးပိုင်နဲ့ နှိုင်းရဲတာလဲ”

"မိစ္ဆာကောင်”

"မင်းလိုကောင်က သူ့နာမည်ကိုတောင် ခေါ်ဖို့ မထိုက်တန်ဘူး”

"အင်ပါယာက ငါတို့သူရဲကောင်းကို ဘယ်တော့မှ အထိခိုက်ခံမှာ မဟုတ်ဘူး”

"ဟုတ်တယ်”

"သူ့ကို မင်းနဲ့အတူ ဆွဲမချနဲ့”

လူအုပ်ကြီး၏ ကျိန်ဆဲသံများသည် ဝမ်ဟောင်ယု အသံကို ဖုံးလွှမ်းသွားသည်။

သို့သော်

ဝမ်ဟောင်ယုက ပို၍ပင် ပြင်းထန်စွာ ရယ်မောနေဆဲဖြစ်သည်။

“ဟားဟား”

အသံက ခြောက်ကပ်ကပ်နှင့်ပင်။

"မင်းတို့ လူအတွေ..."

"ဒီအင်ပါယာက တရားမျှတတယ်လို့ ထင်နေတာလား? သူတို့က လူတိုင်းကို ကာကွယ်ပေးမယ်တဲ့လား? ဟဲဟဲ... နန်းတွင်းကတောင်-"

"တိတ်စမ်း”

ကွပ်မျက်ရေးအရာရှိက ဝမ်ဟောင်ယု၏ စကားကို အဆုံးမသတ်မီ ဖြတ်ပြောလိုက်

သည်။

"ဧကရာဇ်မင်းမြတ်ရဲ့ အမိန့်တော်အရ... တရားမျှတမှုကို အခုပဲ အကောင်အထည်ဖော်မယ်။"

အရာရှိက သူ၏လက်ကို နှိမ့်ချလိုက်သည်။

"ကွပ်မျက်စေ”

ထိုအချိန်တွင် နေရောင်အောက်၌ ဝင်းလက်နေသော ဓားကြီးသည် အောက်သို့ ကျဆင်းလာခဲ့သည်။

ခဏတာမျှ

ငြိမ်သက်သွားသည်။

ဝမ်ဟောင်ယု၏ ရယ်သံများ ပျောက်ကွယ်သွားသည်။

ထို့နောက်တွင်မူ

မိုးခြိမ်းသံကဲ့သို့ ကျယ်လောင်သော လက်ခုပ်သံများ ထွက်ပေါ်လာသည်။

ဖြောင်း ဖြောင်း ဖြောင်း

အားလုံး ပြီးဆုံးသွားလေပြီ။

ကျောက်တုံးကို ပိုင်းဖြတ်သကဲ့သို့ လှိမ့်ထွက်သွားချေ၏

"တရားမျှတမှု အောင်နိုင်ပြီ”

"ကောင်းကောင်းသေသွားတာပဲ”

"သူ့ဝိညာဉ် ဘယ်တော့မှ လူပြန်မဖြစ်ပါစေနဲ့”

အားပေးသံများ ဆူညံသွား၏

လူအချို့က ကွပ်မျက်စင်ဆီသို့ တံတွေးနှင့် ထွေးကြသည်။

အချို့ကမူ ဝမ်ဟောင်ယုအတွက် မဟုတ်ဘဲ၊ ထိုညှဉ်းပန်းခံခဲ့ရသော ကလေးငယ်များအတွက် ဝမ်းသာမျက်ရည် ကျကြသည်။

အချို့က လက်သီးများကို လေထဲသို့ မြှောက်ကာ အော်ဟစ်ကြသည်။

"ဒါက ဖြောင့်မတ်ခြင်းခေါင်းစဉ်အောက်မှာ မကောင်းမှုလုပ်တဲ့သူတွေရဲ့ အဆုံးသတ်ပဲ”

"ဒါကို ဂိုဏ်းတိုင်းအတွက် သတိပေးချက်အဖြစ် မှတ်ထားကြ”

ကွပ်မျက်သူသည် နောက်သို့ဆုတ်လိုက်ပြီး ဓားကို ပုခုံးပေါ်မှချကာ အစောင့်များက ကွပ်မျက်စင်ကို အမြန်ရှင်းလင်းလိုက်ကြသည်။ နီညိုရောင်အလံများက တလူလူလွင့်နေ၏

ကွပ်မျက်ရေးအရာရှိသည် လူအုပ်ကို တိတ်ဆိတ်စေရန် လက်မြှောက်ပြလိုက်၏

သူ၏အသံကို ထပ်မံ ထုတ်ဖော်လိုက်သည်။

"ကောင်းကင်အင်ပါယာ တစ်ခုလုံး သိပါစေ၊ တားမြစ်ထားတဲ့ ပညာရပ်တွေကို ကျင့်ကြံသူ၊ အပြစ်မဲ့သူတွေကို နှိပ်စက်သူ ဒါမှမဟုတ် ဖြောင့်မတ်ခြင်းအမည်ခံပြီး မကောင်းမှုကို ဖုံးကွယ်ထားသူ ဘယ်သူမဆို ဒီလိုကံကြမ္မာမျိုးနဲ့ ကြုံတွေ့ရမှာပါ”

"အင်ပါယာက ဒီလို ရာဇဝတ်မှုတွေကို ဘယ်တော့မှ သည်းခံမှာ မဟုတ်ဘူး”အမိန့်တော်သည် မိုးခြိမ်းသံအလားပဲ့တင်ထပ်သွား၏

ဧက္ကရာဇ်မင်းမြတ်က ပြောဆိုလေ၏

ပြည်သူများကလည်း တစ်ခဲနက် ထောက်ခံခဲ့ကြလေသည်။

အခန်း ၄၉၁ ငြင်းပယ်ခွင့်မရှိသော ဖိတ်ကြားလွှာ

ကွပ်မျက်စင်နှင့် မလှမ်းမကမ်းတွင်

လူပင်လယ်ဝေနေသော ကွင်းပြင်ကြီး၏ လူအုပ်ကြားထဲ၌

ပိုင်ကျီဟန်သည် တိတ်ဆိတ်စွာ ရပ်နေ၏။

ယနေ့တွင် သူသည် သာမန်ဝတ်စုံကိုသာ ဝတ်ဆင်ထားပြီး မျက်နှာကိုလည်း ဖုံးအုပ်ထားသဖြင့် မည်သူ၏ အာရုံကိုမျှ ဆွဲဆောင်နိုင်ခြင်း မရှိပေ။

သူ၏ ကျင့်ကြံသူအငွေ့အသက်ကိုလည်း လုံးဝထိန်းချုပ်ထား၏

သာမန်မျက်စိဖြင့် ကြည့်လျှင် သမိုင်းဝင်ဖြစ်ရပ်ကို လာရောက်ကြည့်ရှုသည့် သာမန်လူသားတစ်ဦးနှင့်သာ တူနေလေသည်။

"မင်းနဲ့ ငါက အတူတူပဲ”

ဝမ်ဟောင်ယုက အော်ဟစ်လိုက်သည်။

ထိုစကားကို ကြားသောအခါ ပိုင်ကျီဟန်၏ နှုတ်ခမ်းဖျားတွင် လှောင်ပြုံးတစ်ခု ယှက်သန်းသွား၏။

(ဖြစ်နိုင်တာပဲ)

သူ မငြင်းဆိုခဲ့ပေ။ အမှန်စင်စစ် တရားမျှတမှုဆိုသည်မှာ အင်အားကြီးသူများက သူတို့၏ လုပ်ရပ်များကို အကြောင်းပြချက်ပေးရန် တပ်ဆင်ထားသည့် မျက်နှာဖုံးတစ်ခုသာ ဖြစ်သည်မဟုတ်ပါလော

သို့သော် ဝမ်ဟောင်ယု တစ်ခုတော့ မှားသွားသည်။

ပိုင်ကျီဟန်၏ မျက်နှာဖုံးသည် အမြဲတမ်း ပွင့်လင်းမြင်သာနေခဲ့ပြီးသားဖြစ်သည်။ သူသည် တစ်စုံတစ်ခု၏ နောက်ကွယ်တွင် ပုန်းကွယ်နေရန် မလိုအပ်ပေ။

ကွပ်မျက်သူက ဝမ်ဟောင်ယု၏ ခေါင်းကို ဖြတ်ချလိုက်သည်ကို သူ တိတ်တဆိတ် စောင့်ကြည့်နေခဲ့သည်။

သူ့ပတ်ဝန်းကျင်တွင်တော့ ဟိန်းဟောက်သံများ လှိုင်းတံပိုးသဖွယ် ဆက်လက် ထွက်ပေါ်နေဆဲသာ

"တရားမျှတမှုကို ဖော်ဆောင်နိုင်ပြီ”

"အဲဒီမိစ္ဆာက နောက်ဆုံးတော့ သူ့အပြစ်တွေအတွက် ပေးဆပ်သွားရပြီ”

"ထိုက်တန်တယ်”

သို့သော် ပိုင်ကျီဟန်၏ အကြည့်ကတော့ ဝမ်ဟောင်ယု၏ အလောင်းကို ဖယ်ရှားသွားသည့် ကွပ်မျက်စင်ထက်၌သာ မြဲမြံနေဆဲပင်။

သူ့မျက်နှာအမူအရာက တည်ငြိမ်လွန်းလှသည်။

အောင်ပွဲခံခြင်းလည်း မရှိသလို မျက်မှောင်ကြုတ်ခြင်းလည်း မရှိပေ

ကျေနပ်အားရမှုလည်း မရှိပေ

သနားဂရုဏာလည်း မရှိပေ။

သူ့အတွက်တော့

ဝမ်ဟောင်ယု၏ သေခြင်းတရားသည် အလေးထားစရာ အနှစ်သာရ အလွန်နည်းပါးလှသည်။

ထိုလူသည် မရေမတွက်နိုင်သော ရာဇဝတ်မှုများကို ကျူးလွန်ခဲ့သည်ဖြစ်စေ၊ မကျူးလွန်ခဲ့သည်ဖြစ်စေ ပိုင်ကျီဟန်အတွက် ဘာမှမထူးခြားပေ

အကြောင်းမူကား ဝမ်ဟောင်ယု ယခုကဲ့သို့ ကံကြမ္မာဆိုးနှင့် ရင်ဆိုင်ရခြင်း၏ အစစ်အမှန် အကြောင်းပြချက်မှာ အလွန်ရိုးရှင်းသောကြောင့် ဖြစ်သည်။

ဝမ်ဟောင်ယုသည် သူ့ကို လာရောက်ပတ်သက် မိခဲ့ခြင်းကြောင့်သာ။

ထိုစည်းကို ကျော်နင်းမိပြီးသည်နှင့်

အဆုံးသတ်ရလဒ်ကတော့ သတ်မှတ်ပြီးသား ဖြစ်သွားခဲ့သည်။

ပတ်ဝန်းကျင်တစ်ခုလုံးတွင် အောင်ပွဲခံသံများ ပဲ့တင်ထပ်နေစဉ် ပိုင်ကျီဟန်၏ မျက်လွှာများ အနည်းငယ် ကျဆင်းသွားသည်။

အကယ်၍သာ ပြောင်းလဲနိုင်သော အချက်တစ်ချက်သာ မရှိခဲ့လျှင်

ယနေ့ အဖြစ်အပျက်များစွာသည် ယခုထက် များစွာ ကွဲပြားသွားပေလိမ့်မည်။

ဤကွပ်မျက်ပွဲသည် အင်ပါယာ၏ ခမ်းနားသော တရားမျှတမှု ပြကွက်တစ်ခု ဖြစ်လာလိမ့်မည် မဟုတ်ပေ

ထိုထက် များစွာ ပိုမို ကြောက်မက်ဖွယ်ကောင်းသော အရာတစ်ခု ဖြစ်လာပေလိမ့်မည်။

သူ၏ အကြည့်တို့သည် မြို့တော်ထက်တွင် မြင့်မားစွာ တည်ရှိနေသော အင်ပါယာ နန်းတော်၏ ဝေးကွာသော အရိပ်အာဝါသဆီသို့ ဦးတည်သွားသည်။

နေကာရောင်အောက်တွင် ရွှေရောင်အမိုးများက တဖိတ်ဖိတ် တောက်ပနေ၏။

အင်ပါယာ၏ အာဏာစက် အခြေစိုက်ရာ အရပ်။

ကောင်းကင် အင်ပါယာတစ်ခုလုံးကို အုပ်စိုးရာ အာဏာဗဟိုချက်။

ကျင့်ကြံသူ အများစုအတွက်မူ

ထိုနန်းတော်သည် မထိပါးဝံ့သော အင်အားစုတစ်ခု ဖြစ်သည်။

ပိုင်ကျီဟန် အတွက်မူ?

၎င်းမှာ ကျော်ဖြတ်ရမည့် အဟန့်အတားတစ်ခုမျှသာ။

သူ၏ နှုတ်ခမ်းထောင့်တွင် သိသိသာသာ မရှိလှသော အပြုံးတစ်ခု ပေါ်လွင်လာ၏။

အမှန်အတိုင်း ပြောရလျှင် အင်ပါယာနန်းတွင်းသည် ပိုင်မျိုးနွယ်စုကို နှိပ်ကွပ်ရန် ကြိုးပမ်းစဉ်က... သူတို့သည် လီ-ကျောက် မဟာမိတ်အဖွဲ့နှင့် ပူးပေါင်းခဲ့ကြသည်။

ထိုစဉ်ကတည်းက ပိုင်ကျီဟန်သည် ဖြစ်နိုင်ခြေတစ်ခုကို စဉ်းစားထားပြီးသားဖြစ်သည်။

အကယ်၍ ဧကရာဇ်ကသာ သူ့ကို ရန်သူအဖြစ် သတ်မှတ်ရန် ဇွတ်အတင်း ဆုံးဖြတ်ခဲ့လျှင်—သူသည် ဧကရာဇ်ကို ရာထူးမှ ဖယ်ရှားပစ်ရုံသာ ရှိသည်။

အကယ်၍ အင်ပါယာ တော်ဝင်မိသားစုက ခုခံခဲ့လျှင်

သူသည် သူတို့ကိုပါ အမြစ်ပြတ် ချေမှုန်းပစ်မည်။

ထိုသို့ လုပ်ဆောင်ရာတွင် လီမျိုးနွယ်စု သို့မဟုတ် ကျောက်မျိုးနွယ်စုတို့က ကြားဖြတ်နှောင့်ယှက်ရန် ရွေးချယ်ခဲ့ပါက

သူတို့အားလုံးသည် အတူတကွ ပျက်သုဉ်းသွားကြပေလိမ့်မည်။

သို့သော်လည်း

ပိုင်ကျီဟန်သည် ထိန်းချုပ်မှုကိုသာ ရွေးချယ်ခဲ့သည်။

တော်ဝင်မိသားစုကို ကြောက်ရွံ့၍ မဟုတ်ပေ

သူ့တွင် အင်အားမရှိ၍လည်း မဟုတ်ပေ။

အချက်အလက် တစ်ခုတည်းသောကြောင့်သာ ဖြစ်သည်။

ချင်လင်းရှောင်

ကောင်းကင်ဘုံ၏ ရွေးချယ်ခံရသူ

မဟုတ်လျှင် ပိုင်ကျီဟန်သည် ဤကိစ္စများကို ဂရုစိုက်နေမည် မဟုတ်ပေ။ ပိုင်မျိုးနွယ်စုကို ဖြိုလဲရန် ကြိုးပမ်းသူ မည်သူ့ကိုမဆို သူ အစားထိုး လဲလှယ်ပစ်လိုက်မည်သာ ဖြစ်သည်။

သို့သော် ဝမ်းနည်းစရာမှာ ကံကြမ္မာက အခြားစီမံကိန်းတစ်ခု ရှိနေခဲ့ခြင်းပင်။

ချင်လင်းရှောင်သည် ယုဖေးယန် အဖြစ် ဟန်ဆောင်နေသရွေ့ သူသည် စောင့်ဆိုင်းရုံသာ တတ်နိုင်တော့သည်။

ချင်လင်းရှောင်နှင့် ရန်ဘက်ဖြစ်ရန် သို့မဟုတ် သူမနှင့် ထိပ်တိုက်တွေ့နိုင်မည့် ကိစ္စမျိုးကို လုပ်ဆောင်ရန်မှာ ပညာရှိရာမကျပေ။

အနည်းဆုံးတော့ သူမ ဤနေရာသို့ လာရသည့် အကြောင်းရင်း ကိစ္စရပ်များ ပြီးဆုံးသည်အထိ သို့မဟုတ် ပိုင်မျိုးနွယ်စုသည် သူမကို ယှဉ်ပြိုင်နိုင်လောက်အောင် အင်အားတောင့်တင်း လာသည်အထိ သူ စောင့်ဆိုင်းရမည် ဖြစ်သည်။

ထိုအတွေးသည် ပိုင်ကျီဟန်၏ စိတ်ထဲမှ ကွယ်ပျောက်သွားချိန်မှာပင်

သူ့ဘေးနားမှ နူးညံ့သော အသံတစ်ခု ထွက်ပေါ်လာ၏။

"သခင်လေးပိုင်”

ထိုအသံသည် နူးညံ့ပြီး ကျက်သရေရှိလှကာ ငြင်းဆို၍မရအောင်ပင် ယဉ်ကျေးသိမ်မွေ့လွန်းလှသည်။

မျက်နှာဖုံးအောက်ရှိ ပိုင်ကျီဟန်၏ မျက်လုံးများ အနည်းငယ် ကျဉ်းမြောင်းသွား၏။

သူမ အနားသို့ ချဉ်းကပ်လာသည်ကို သူ လုံးဝ မရိပ်မိခဲ့ပေ။

အရိပ်အယောင်မျှပင် မရှိပေ

ချီစွမ်းအင် လှုပ်ခတ်မှု အနည်းငယ်မျှပင် မခံစားရချေ

သို့သော် သူမသည် ယခုအခါ သူ့ထံမှ ခြေလှမ်းအနည်းငယ်အကွာတွင် ရပ်နေပြီဖြစ်သည်။

သူသည် သူ၏ ခေါင်းကို ဖြည်းညှင်းစွာ လှည့်ကြည့်လိုက်လေသည်။

ယုဖေးယန်သည် ထိုနေရာတွင် ရပ်နေ၏။

လူပင်လယ်ဝေနေသော ကွင်းပြင်ကြီးထဲတွင်ပင် သူမ၏ ပုံရိပ်မှာ သိသိသာသာ ထင်ရှားပေါ်လွင်နေသည်။

သူမ၏ ကိုယ်ဟန်အနေအထားသည် ကျက်သရေရှိလှပြီး ဝတ်စုံမှာလည်း စင်ကြယ်သန့်ရှင်းနေကာ ကွင်းပြင်တစ်ခုလုံးကို လှုပ်ခတ်သွားစေခဲ့သည့် မငြိမ်သက်မှုများကြားတွင်ပင် သူမ၏ မျက်နှာအမူအရာမှာ တည်ငြိမ်လွန်းလှသည်။

သူမကို မြင်လိုက်ရသူတိုင်းသည် သူမ၏ ဆွဲဆောင်မှုအောက်တွင် မိန်းမောသွားကြပြီး သူမ လျှောက်လှမ်းရန် လမ်းကို အလိုအလျောက် ဖယ်ပေးလိုက်ကြပုံရသည်။

ပိုင်ကျီဟန် အကြည့်များမှာ အနည်းငယ် စူးရှသွား၏။

သူမသည် သူ့ထံသို့ ရည်ရွယ်ချက်ရှိရှိ ရောက်ရှိလာခြင်းဖြစ်ကြောင်း ထင်ရှားနေသဖြင့် သူ သတိထားရန် လိုအပ်ပေသည်။

ထို့နောက် ယုဖေးယန်က ခပ်ပါးပါး ပြုံးလိုက်သည်။

"သာမန်ပရိသတ်တွေကြားထဲမှာ သခင်လေးပိုင်ကို တွေ့ရလိမ့်မယ်လို့ ကျွန်မ မထင်ထားမိဘူး"

သူမ၏ မျက်လုံးများထဲတွင် စူးစမ်းလိုစိတ်များ အရောင်ဟပ်နေ၏။

" ကိုယ်တိုင် စတင်ခဲ့တဲ့ မုန်တိုင်းရဲ့ အဆုံးသတ်ကို လာကြည့်တာလား?"

ပိုင်ကျီဟန်က ယဉ်ကျေးစွာ ခေါင်းညိတ်ပြလိုက်သည်။

"မင်းသမီးက ကျွန်တော့်ကို အထင်ကြီးလွန်းနေပါပြီ"

သူ့လေသံက တည်ငြိမ်ပြီး အေးစက်စက်နိုင်လှသည်။

"ကျွန်တော်က တခြားလူတွေလိုပဲ အင်ပါယာရဲ့ တရားမျှတမှုကို လာရောက်မျက်မြင်ပြုတာပါ"

ယုဖေးယန်က သူမ၏ခေါင်းကို အနည်းငယ် စောင်းလိုက်၏

"ဟုတ်လို့လား?"

သူမ၏ အကြည့်သည် သူ့ထံတွင် လိုအပ်သည်ထက် ပို၍ ကြာမြင့်စွာ တန့်နေခဲ့သည်။

ထို့နောက် သူမ ထပ်မံပြောဆိုပြန်သည်။

"တကယ်တော့ ကျွန်မက သခင်လေးပိုင်နဲ့ စကားပြောချင်လို့ပါ"

ပိုင်ကျီဟန်၏ အပြုံးက ပြောင်းလဲမသွားပေ

သို့သော်လည်း

သူ့စိတ်ထဲတွင်မူ အလွန်အမင်း သတိထားနေမိပြီဖြစ်သည်။

ဤအခိုက်အတန့်တွင် သူ အရှောင်ချင်ဆုံးလူစာရင်းကို ပြုလုပ်မည်ဆိုလျှင်

ချင်လင်းရှောင်သည် ထိပ်ဆုံးတွင် ရှိနေပေလိမ့်မည်။

သူက ခေါင်းကို အနည်းငယ် ငုံ့လိုက်၏

"ဒီနေ့တော့ အဆင်မပြေလောက်ဘူး ထင်ပါတယ်"

သူက လူစုခွဲနေသော လူအုပ်ကြီးကို လက်ဟန်ဖြင့် ညွှန်ပြ၏

"ကျွန်တော့်မှာ မြစိမ်းရောင်နေမင်း ဂိုဏ်းနဲ့ ပတ်သက်တဲ့ ကိစ္စတွေ၊ ပြီးတော့ ဒီဖြစ်ရပ်ရဲ့ နောက်ဆက်တွဲတွေကို ရှင်းဖို့ ရှိပါသေးတယ်။ နောက်တစ်ခေါက်မှပဲ ဖြစ်ဖြစ်လေ"

၎င်းမှာ ခိုင်လုံသော ဆင်ခြေတစ်ခုပင်။

သို့သော် ယုဖေးယန်က သူ့ကို လွယ်လွယ်ကူကူ ငြင်းပယ်ခွင့် ပေးမည်မဟုတ်ပေ။

"နောက်တစ်ခေါက်?"

သူမက သူ့အနားသို့ ခြေတစ်လှမ်း တိုးကပ်လိုက်သည်။

အခြားသူများကို သတိမမူမိစေလောက်သော အကွာအဝေးဖြစ်သော်လည်း

ပိုင်ကျီဟန်ကမူ သူမ၏ မျက်ဝန်းထဲမှ ရယ်ချင်နေမှုကို ရှင်းရှင်းလင်းလင်း မြင်တွေ့နေရပြီဖြစ်သည်။

"သခင်လေးပိုင်က ကျွန်မကို ရှောင်နေပုံရတယ်နော်"

ပိုင်ကျီဟန်က ခပ်တိုးတိုး ရယ်မောလိုက်၏

"အဲဒါ ဘယ်လိုလုပ် ဖြစ်နိုင်မှာလဲ?"

ပိုင်ကျီဟန်သည် နည်းလမ်းမျိုးစုံဖြင့် ရှောင်ထွက်ရန် ကြိုးပမ်းနေမိသည်။ အမှန်စင်စစ် သူသည် သူမကို တတ်နိုင်သမျှ ဝေးဝေးရှောင်ရန် လိုအပ်သည်။

မဟုတ်ပါက သူ မည်သို့ သေဆုံးသွားသည်ကိုပင် မည်သူမျှ သိရှိကြလိမ့်မည် မဟုတ်ပေ။

"ကျွန်မ အမြင်မှာတော့ အဲဒီလိုပဲ ထင်ရတယ်။ ကျွန်မကို စက္ကန့်အနည်းငယ်လောက်ပဲ အချိန်ပေးပါ၊ မဟုတ်ရင် ရှင် ငြင်းမယ်ဆိုရင် ကျွန်မက ပိုင်မျိုးနွယ်စုဆီအထိ လိုက်လာမိလိမ့်မယ်"

ယုဖေးယန်က ဆိုသည်။

(ကျေးဇူးပြုပြီး မလာပါနဲ့)

ပိုင်ကျီဟန် စိတ်ထဲမှ အော်ဟစ်နေမိသည်။

သူမတွင် မည်သို့သော ရည်ရွယ်ချက်များ ရှိနေသည်ကို မည်သူမျှ မသိနိုင်သော်လည်း သူမသည် ပိုင်မျိုးနွယ်စု၏ ကိစ္စရပ်များတွင် ပါဝင်ပတ်သက်ရန် ကြိုးစားနေသည်မှာတော့ သေချာလှသည်။

ပြီးခဲ့သည့်အကြိမ်က လက်ထပ်ရေးကိစ္စ၊ ယခုတစ်ခါတွင်မူ သူ့ကို တွေ့ဆုံရန် အကြောင်းပြချက်ကို အသုံးပြုနေပြန်ပြီလား?

ပိုင်ကျီဟန်၏ မျက်မှောင်များ အနည်းငယ် တွန့်သွား၏။

ယုဖေးယန်က သူ့အနားသို့ ပိုမိုတိုးကပ်လာ၏

"စိတ်အေးအေးထားပါ သခင်လေးပိုင်"

"ကျွန်မက စကားခဏလောက်ပဲ ပြောချင်တာပါ"

သူမ၏ မျက်လုံးများက ဝင်းလက်တောက်ပနေ၏

"ဒါမှမဟုတ် ရှင် ကြောက်နေတာလား?"

ပိုင်ကျီဟန်သည် သူမကို ခဏမျှ စိုက်ကြည့်နေမိသည်။

ထို့နောက် သူ ခပ်တိုးတိုး သက်ပြင်းချလိုက်၏။

ငြင်းပယ်ရန်မှာ ရွေးချယ်စရာ မဟုတ်တော့ပုံရသည်။ အကယ်၍ သူသာ ဆက်လက် ငြင်းဆန်နေမည်ဆိုလျှင် သူမ ဘာဆက်လုပ်

မည်ကို မည်သူ သိနိုင်မည်နည်း။

သူမသည် သူမ၏ အစစ်အမှန် မည်သူမည်ဝါဖြစ်ကြောင်းနှင့် စွမ်းအားများကို ဖုံးကွယ်ထားဆဲ ဖြစ်သော်လည်း လိုအပ်လာပါက သူမသည် အတင်းအကျပ် အင်အားသုံး၍ သူ့အား ခေါ်ဆောင်သွားနိုင်သူ ဖြစ်သည်။

မည်သို့ပင်ဆိုစေ သူမ အလိုရှိပါက ထိုသို့လုပ်ဆောင်ရန်မှာ အလွန်လွယ်ကူလှပေသည်။

"မင်းသမီးက လူတွေကို တကယ့်ကို အကျပ်ရိုက်အောင် လုပ်တတ်တာပဲ"

ယုဖေးယန်၏ အပြုံးက ပိုမိုကျယ်ပြန့်သွား၏

"ကျွန်မကတော့ အဲဒါကို ဇွဲကောင်းတယ်လို့ ခေါ်ချင်တယ်"

သူမက သူမ၏ လက်နှစ်ဖက်ကို နောက်ပစ်

လိုက်၏

"အဲဒီတော့ ဘယ်လိုလဲ?"

ပိုင်ကျီဟန်သည် ခဏမျှ တိတ်ဆိတ်သွား၏။

ထပ်မံငြင်းဆိုခြင်းသည် အခြေအနေကို ပို၍ ဆိုးရွားစေရုံသာ ရှိမည်။

ထို့အပြင် ချင်လင်းရှောင်ကို မလိုအပ်ဘဲ ရန်စမိခြင်းမှာ သူ အလိုချင်ဆုံး အရာမဟုတ်ပေ။

နောက်ဆုံးတွင်

သူ ခေါင်းညိတ်လိုက်၏။ "ကောင်းပါပြီ”

ယုဖေးယန်က ခပ်တိုးတိုး ရယ်မောလိုက်သည်။

"စိတ်မပူပါနဲ့"

သူမ၏ မျက်လုံးများထဲတွင် ထူးဆန်းသော စိတ်ဝင်စားမှုများဖြင့် တောက်ပနေ၏

"ရှင့်ရဲ့ အချိန်တွေကို အများကြီး မယူပါဘူး”

ထို့နောက် သူမသည် နောက်လှည့်ကြည့်ခြင်းပင် မရှိဘဲ ကွင်းပြင်ထဲမှ ထွက်ခွာသွားလေတော့သည်။

သူမသည် အဖြေကိုသိပြီးသားနှယ်

ပိုင်ကျီဟန်သည် ထွက်ခွာသွားသော သူမ၏ ကျောပြင်ကို ခဏမျှ ကြည့်နေ၏

"...ဒုက္ခပေးတဲ့ မိန်းမ" ဟု ခပ်တိုးတိုး ရေရွတ်လိုက်မိသည်။

သို့သော်လည်း

သူ နောက်က လိုက်သွားခဲ့ရလေသည်။