အခန်း (၃၆၅-၃၆၆)

အခန်း။ ၃၆၅

ရှန်းယွီသည် ဝိညာဉ်စမ်းရေတွင်းဘေးတွင် ထိုင်နေစဉ် သူ၏မျက်နှာမှာ ပြင်းထန်သော ဝေဒနာကြောင့် ရှုံ့မဲ့နေတော့သည်။

သူ၏ အရေပြားအောက်တွင် တစ်စုံတစ်ရာက တိုးဝှေ့လှုပ်ရှားနေသည်ကို အထင်အသား မြင်တွေ့နေရသည်။

ရုတ်တရက်ဆိုသလို သူ၏အရေပြား တစ်နေရာမှာ ဖောင်းကြွလာပြီး ပေါက်ထွက်သွားခဲ့သည်။ သို့သော် သွေးများ စီးကျမလာမီမှာပင် ဒဏ်ရာမှာ ချက်ချင်း ပြန်လည်ပျောက်ကွယ်သွားခဲ့သည်။

အတွင်းပိုင်း ဖိအားများ ပိုမိုပြင်းထန်လာသည်နှင့်အမျှ သူ၏ အမူအရာမှာ ပို၍ပင် ဆိုးရွားလာတော့သည်။

ထို့နောက် သူ၏အရေပြားပေါ်တွင် တစ်ပြိုင်နက်တည်း အက်ကွဲရာပေါင်း ဆယ်ခုထက်မက ပေါ်လာပြန်သည်။ ယခင်ကကဲ့သို့ပင် ထိုဒဏ်ရာများက ချက်ချင်း ပြန်လည်စေ့သွားခဲ့သည်။ ဤဖြစ်စဉ်မှာ အရေပြားအောက်ရှိ လှုပ်ရှားမှုများ ရပ်တန့်သွားပြီး ပုံမှန်အခြေအနေသို့ ပြန်ရောက်သွားသည်အထိ အတော်ကြာအောင် ဆက်လက်ဖြစ်ပွားနေခဲ့သည်။

ထို့နောက်တွင်မူ သူ၏အရေပြားမှာ တဖြည်းဖြည်းချင်း ကြည်လင်ဖောက်ထွင်း၍ မြင်နိုင်သောအခြေအနေသို့ ပြောင်းလဲလာတော့သည်။

အရေပြားအတွင်းဘက်တွင် သွေးများအစား လုံးဝဥဿုံ မှောင်မိုက်နေသော အမှောင်ထုကြီးကိုသာ မြင်တွေ့နေရသည်။

တဖြည်းဖြည်းနှင့် သူ၏ခန္ဓာကိုယ်အနှံ့တွင် သေးငယ်သော အဖြူရောင် အလင်းစက်လေးများ ပေါ်ထွက်လာသည်။ ထိုအလင်းစက်များသည် တစ်ခုနှင့်တစ်ခု ဆွဲငင်ရင်း ပိုမိုကြီးမားလာကြသည်။ အချို့မှာ တစ်ခုတည်းအဖြစ် ပေါင်းစပ်သွားကြပြီး အချို့မှာမူ ဝေးရာသို့ လွင့်စင်သွားကြသည်။

ဤအခြေအနေများ ဖြစ်ပျက်နေစဉ်အတွင်း ရှန်းယွီသည် ကိုယ့်ကိုကိုယ် လုံးဝဟင်းလင်းပြင်ဖြစ်နေသော နယ်ပယ်တစ်ခုအတွင်း၌ လွင့်မျောနေသည်ဟု ခံစားလိုက်ရသည်။

သူ မြင်နိုင်သမျှနေရာတိုင်းတွင် လွင့်မျောနေသော သေးငယ်သည့် အမှုန်အမွှားအချို့မှလွဲ၍ ဘာမျှမရှိတော့ချေ။ ထိုအမှုန်အမွှားလေးများသည် တဖြည်းဖြည်း စုစည်းလာပြီး အလွန်သိပ်သည်းသော အမြုတေတစ်ခုအဖြစ် ပြောင်းလဲသွားသည်ကို သူ စောင့်ကြည့်နေမိသည်။

ထိုအမြုတေမှာ ကြီးထွားလာသည်နှင့်အမျှ ပတ်ဝန်းကျင်ရှိ ဒြပ်ဝတ္ထုများကို ပိုမိုဆွဲငင်ယူတော့သည်။

ဤဖြစ်စဉ်မှာ အရှိန်အဟုန်ဖြင့် ဆက်လက် ဖြစ်ပေါ်နေခဲ့သည်။

ဗဟိုချက်သည် အလွန်တရာ သိပ်သည်းလွန်းလာသည့်အတွက် နျူကလီးယား ပေါင်းစပ်မှုအရှိန်အဟုန်မှာ စတင်တောက်လောင်လာပြီး စုဝေးထားသမျှ ဒြပ်ဝတ္ထုများကို တောက်ပသော ကြယ်တစ်စင်းအဖြစ်သို့ ပြောင်းလဲပစ်လိုက်သည်။ ထိုကြယ်ကို ဗဟိုပြု၍ သေးငယ်သော ဒြပ်ထုများမှာလည်း ပြီးပြည့်စုံသော ဟန်ချက်ဖြင့် လှည့်ပတ်နေကြတော့သည်။

ရုတ်တရက် မြင်ကွင်းမှာ အလိုအလျောက် ပြောင်းလဲသွားပြန်သည်။

ယခုအခါတွင်မူ ကုဋေကုဋာမကသော ကြယ်တာရာများနှင့် အခြားသော ကောင်းကင်ဘုံ ဝတ္ထုပစ္စည်းများမှာ ဟင်းလင်းပြင်ကြီးတစ်ခုလုံးကို ပြည့်နှက်သွားစေသည်။

ဤကျယ်ပြောလှသော စကြဝဠာကြီးအတွင်း၌ အရာရာတိုင်းသည် မမြင်နိုင်သော ကြိုးမျှင်များဖြင့် ဆက်နွှယ်နေကြပြီး တစ်ခုနှင့်တစ်ခု တဖြည်းဖြည်းချင်း ဆွဲငင်နေကြသည်ကို ရှန်းယွီ သတိပြုမိလိုက်သည်။ စကြဝဠာ၏ အဝေးဆုံးအစွန်းရှိ အသေးငယ်ဆုံးသော ဂြိုဟ်ပေါ်မှ အမှုန်အမွှားလေးတစ်ခုအထိ အရာအားလုံးမှာ အပြန်အလှန် ဆက်နွှယ်နေကြခြင်းပင်။

သူသည် ကိုယ့်ကိုကိုယ် ပြန်လည်ကြည့်ရှုလိုက်သည်။

လက်နှစ်ဖက်ကို မြှောက်လိုက်သည့်အခါ ပတ်ဝန်းကျင်ရှိ အရာအားလုံးထံမှ ကြိုးမျှင်တန်းလေးများသည် သူ့ကို လာရောက်ရစ်ပတ်နေကြသည်ကို မြင်လိုက်ရသည်။ သူသည်လည်း ထိုကြယ်တာရာများကို ပြန်လည်ဆွဲငင်နေသည်။ ၎င်းမှာ အလွန်သေးငယ်သော ဆွဲငင်မှုမျိုးဖြစ်သဖြင့် ဒသမကိန်း ခြောက်နေရာအထိပင် သတိထားမိရန် ခဲယဉ်းလှသည်။ သို့သော် တဖြည်းဖြည်းနှင့် ထိုဆွဲငင်မှုမှာ ပြောင်းလဲလာသည်။ သိသိသာသာ ခံစားလာရပြီးနောက် များမကြာမီမှာပင် ကောင်းကင်ဘုံ ဝတ္ထုပစ္စည်းမျိုးစုံသည် သူ့ကို ဗဟိုပြု၍ လှည့်ပတ်လာကြတော့သည်။

"ဒါက... ဒြပ်ဆွဲအားပဲ"

သူ တွေးလိုက်မိသည်။

ရှန်းယွီမှာ အံ့အားသင့်သွားရသည်။ သူသည် နိယာမအသစ်တစ်ခုကို အမှတ်မထင် မြင်တွေ့ခွင့်ရလိုက်ခြင်းပင်။

"အချိန်ဖြုန်းနေလို့ မဖြစ်ဘူး"

ထိုသို့တွေးကာ သူသည် တရားထိုင်သည့် အနေအထားသို့ ချက်ချင်းပြောင်းလဲလိုက်ပြီး ရရှိထားသော သိမြင်မှုများကို စတင်စုစည်းလေတော့သည်။

သူသည် နိယာမကို မြင်တွေ့ခဲ့ရသော်လည်း လက်ရှိအချိန်တွင် ထိုအရာမှာ သူ့အတွက် အသုံးမတည့်သေးပေ။ သူ၏ လက်ရှိအဆင့်ဖြင့် ထိန်းချုပ်နိုင်မည့် နယ်ပယ်တစ်ခုအဖြစ်သို့ ဦးစွာ ပြောင်းလဲရန် လိုအပ်သည်။ သူသည် ထိုနယ်ပယ်ကို အောင်မြင်စွာ ဖန်တီးပြီးနောက် မျက်လုံးများကို ဖွင့်လိုက်သည့်အခါ အလွန်အမင်း အံ့အားသင့်သွားရတော့သည်။

သူသည် လက်များကို မြှောက်ကာ သူ၏ ခန္ဓာကိုယ်ကို ပြန်လည်ကြည့်ရှုလိုက်သည်။

"ဒါ... ဒါက ဘယ်လိုဖြစ်ရတာလဲ"

ရှန်းယွီသည် သူ၏ ခန္ဓာကိုယ်ကို အံ့အားသင့်စွာ ကြည့်ရှုနေမိသည်။ သူ၏ ကိုယ်ခန္ဓာမှာ အာကာသဟင်းလင်းပြင်ကို သရုပ်ဖော်ထားသည့် ပန်းချီကားတစ်ချပ်အလား ဖြစ်နေသည်။ အရေပြားမှာ အနည်းငယ် ဖောက်ထွင်းမြင်နေရပြီး အတွင်းဘက်တွင် မှောင်မိုက်သော နောက်ခံနှင့်အတူ ကြယ်တာရာများအလား တောက်ပသော အဖြူရောင်အစက်အပြောက်လေးများက သူ၏ခန္ဓာကိုယ်အနှံ့ လှည့်ပတ်စီးဆင်းနေကြသည်။

စနစ်ထံမှ အကြောင်းကြားစာက သူ၏မျက်စိရှေ့တွင် ပေါ်လာတော့သည်။

[သင်သည် ကိုယ်ပိုင်ထူးခြားသော ခန္ဓာကိုယ်အမျိုးအစား ဖြစ်သည့် ကြယ်တာရာစု နိယာမခန္ဓာ] ကို ဖန်တီးနိုင်ခဲ့ပြီဖြစ်သည်။ ဆုလာဘ်တစ်ခုကို ရွေးချယ်ပါ]

[၁။ ရှိရင်းစွဲ စနစ်လုပ်ဆောင်ချက်တစ်ခုကို အဆင့်မြှင့်တင်ရန်]

[၂။ စနစ်လုပ်ဆောင်ချက်အသစ်တစ်ခုကို ဖွင့်လှစ်ရန်]

"ငါ... ငါ ဘာကို ရလိုက်တာလဲ"

ရှန်းယွီ တစ်ယောက်တည်း ရေရွတ်လိုက်မိသည်။

"ကြယ်တာရာစု ခန္ဓာကိုယ် ဟုတ်လား"

ဘာတွေဖြစ်ပျက်နေသည်ကို သူ မစဉ်းစားနိုင်သေးမီမှာပင် သူ၏အတွင်းပိုင်း၌ တစ်စုံတစ်ရာ စတင်လှုပ်ရှားလာသည်ကို ခံစားလိုက်ရပြန်သည်။

"ငါ့ရဲ့ အမြုတေလား"

သူ သိချင်စိတ်ဖြင့် မေးလိုက်မိသည်။

သူ၏ ပင်မအမြုတေမှာ ရုတ်တရက် တုန်ခါလာပြီး ဒုတိယအမြုတေဖြစ်သော သားရဲအမြုတေမှာလည်း လိုက်ပါတုန်ခါလာသည်။ ထို့နောက် ထိုအမြုတေနှစ်ခုစလုံးမှာ နေရာရွှေ့ပြောင်းလာကြတော့သည်။

"ဒါ... ဒါတွေက ဝိညာဉ်ပင်လယ်ဆီကို ရွှေ့နေကြတာပဲ"

သူ တွေးလိုက်မိသည်။

သူသည် ရွှေရောင်အမြုတေအဆင့်သို့ အမှန်တကယ်ပင် တက်လှမ်းနေခြင်း ဖြစ်သည်။

သို့သော် ဤသည်မှာ သဘာဝမကျလှပေ။ ပုံမှန်အားဖြင့် ရွှေရောင်အမြုတေအဆင့်သို့ တက်

လှမ်းရာတွင် ရှိရင်းစွဲအမြုတေကို ရွှေရောင်အဖြစ်သို့ သန့်စင်ရုံသာ ဖြစ်ပြီး ယခုကဲ့သို့ ဝိညာဉ်

ပင်လယ်အတွင်းသို့ နေရာရွှေ့ပြောင်းလေ့မရှိပေ။ သူသည် နတ်သားငယ်အဆင့်သို့ တိုက်ရိုက် ခုန်တက်သွားခြင်းပင်။ သူ၌ ဝိညာဉ်မှာ ရှိပြီးသားဖြစ်ရာ အသစ်မှစ၍ မွေးမြူနေရန် မလိုသဖြင့် ဤသို့ဖြစ်နိုင်သည်ဟု သူ ယူဆလိုက်သည်။

"ကောင်းကင်ဘုံရဲ့ ပြစ်ဒဏ်ခတ်ခြင်းကို ငါ မေ့နေတာပဲ"

ရှန်းယွီ ရုတ်တရက် သတိရလိုက်သည်။ သို့သော် သူသည် ကောင်းကင်ဘုံ နိယာမ၏ အမြင်အာရုံမှ ကွယ်ပျောက်နေသူဖြစ်ကြောင်း ပြန်လည်အမှတ်ရမိသည့်အခါမှ သက်ပြင်းချကာ စိတ်အေးသွားတော့သည်။ အကယ်၍သာ ကောင်းကင်ဘုံ၏ မိုးကြိုးများ ကျရောက်လာပါက သူ ဇနီးလောင်းအတွက် ဖန်တီးထားသော အိမ်ဂေဟာလေးမှာ ပျက်စီးသွားပေလိမ့်မည်။

ထိုသို့တွေးနေစဉ်မှာပင် အမြုတေနှစ်ခုစလုံးမှာ သူ၏ ဝိညာဉ်ပင်လယ်အတွင်းသို့ ရောက်ရှိသွားကြသည်။

ထိုအမြုတေများသည် ပြင်းထန်စွာ တုန်ခါလာပြီးနောက် ဝိညာဉ်ပင်လယ်အတွင်း လွင့်မျောနေသော ချီစွမ်းအင်များအားလုံးကို သူတို့ထံသို့ အရှိန်အဟုန်ဖြင့် စုပ်ယူလေတော့သည်။ အမြုတေများသည် ချီစွမ်းအင်များကို အဆက်မပြတ် သိပ်သည်းစေပြီး အရွယ်အစားမှာလည်း တဖြည်းဖြည်း ကြီးထွားလာသည်။

"ဒါကို ငါ တစ်နေရာရာမှာ မြင်ဖူးသလိုပဲ"

ရုတ်တရက် အမြုတေတစ်ခုမှာ မီးတောက်များအလား ဝင်းခနဲ ဖြစ်သွားသည်။ ၎င်းမှာ တကယ့်မီးတောက်မဟုတ်ဘဲ ချီစွမ်းအင်များက ကြယ်တာရာများ၏ အလင်းရောင်အလား ထွက်ပေါ်လာခြင်းပင်။ ဒုတိယအမြုတေမှာလည်း ထိုနည်းတူပင် ဖြစ်လာပြီးနောက် ၎င်းတို့နှစ်ခုမှာ ကြယ်နှစ်စင်းကဲ့သို့ တစ်ခုကိုတစ်ခု ဗဟိုပြု၍ စတင်လှည့်ပတ်လာကြသည်။

သူသည် အခြေအနေပြမျက်နှာပြင်ကို အမြန်ဆွဲဖွင့်ကြည့်လိုက်ရာ တွေ့လိုက်ရသည်မှာ

[ကြယ်တာရာစု နိယာမခန္ဓာ: အဆင့် ၁ (၁/၁,၀၀၀,၀၀၀)]

လိုအပ်သော အတွေ့အကြုံရမှတ်ကို မြင်လိုက်ရသည့်အခါ ရှန်းယွီ ပို၍ပင် အံ့အားသင့်သွားရသည်။ သူသည် သာလွန်မြင့်မြတ်သောတာအိုခန္ဓာနှင့် အဆင့်အတန်းတူညီသော ခန္ဓာကိုယ်

အမျိုးအစားတစ်ခုကို ဖန်တီးနိုင်ခဲ့ခြင်းပင်။ ထိုခန္ဓာကိုယ်နှင့်ပတ်သက်သော အသိပညာများမှာလည်း သူ၏ဦးနှောက်အတွင်းသို့ စီးဝင်လာတော့သည်။

ဤခန္ဓာကိုယ်သည် သူ၏ကိုယ်ခန္ဓာတစ်ခုလုံးကို ကြယ်တာရာ နျူကလီးယားစွမ်းအင်ပေးစက် တစ်ခုအဖြစ် ပြောင်းလဲပေးလိုက်ခြင်း ဖြစ်သည်။ သူ၏ အမြုတေများသည် သေးငယ်သော ကြယ်များအဖြစ်သို့ ပြောင်းလဲသွားသည်။

သူ၏ ခန္ဓာကိုယ်အတွင်းရှိ သွေးကြောဆုံမှတ်များမှာလည်း ကြယ်တာရာစုအမှတ်များဖြစ်လာပြီး ၎င်းတို့သည် ချီစွမ်းအင်များကို အဆုံးမရှိ သန့်စင်ပေးမည့် နျူကလီးယားစခန်းများအဖြစ် လုပ်ဆောင်ကြမည်ဖြစ်သည်။ သွေးမျိုးဆက်များသည်လည်း ၎င်းတို့အတွင်း၌ အမြဲမပြတ် ပေါင်းစပ်ခြင်းကို လုပ်ဆောင်နေမည်ဖြစ်သည်။ ထွက်ပေါ်လာသော စွမ်းအင်များကို အသုံးပြု၍ ပေါင်းစပ်မှုအသစ်များအတွက် ပေးချေခြင်း ရှိရင်းစွဲကြယ်များကို အားဖြည့်ခြင်း သို့မဟုတ် စွမ်းအင်အလုံအလောက်ရှိပါက ကြယ်အသစ်များပင် ထပ်မံဖန်တီးခြင်းတို့ကို လုပ်ဆောင်နိုင်မည်ဖြစ်သည်။

တစ်နေ့တာလုံးတွင် သူ၏ခန္ဓာကိုယ်မှာ ကြယ်တစ်စင်းကဲ့သို့ပင် ကိုယ့်ကိုကိုယ် အစဉ်အမြဲ သန့်စင်နေမည်ဖြစ်သည်။ ကြွက်သားအင်အား၊ ခန္ဓာကိုယ်ကြံ့ခိုင်မှု၊ သိမြင်နားလည်နိုင်စွမ်း၊ ချီစွမ်းအင်အရည်အသွေးနှင့် သွေးမျိုးဆက်အရည်အသွေး ထိုအရာအားလုံးမှာ အချိန်နှင့်အမျှ ပိုမိုမြင့်မားလာမည်ဖြစ်သည်။

ကြယ်အရေအတွက် ပိုမိုများပြားလာလေ သူသည် ပိုမိုအစွမ်းထက်လာလေ ဖြစ်ပေလိမ့်မည်။

ရှန်းယွီသည် လက်ဖဝါးကို ဖြန့်လိုက်ပြီး အင်အားအနည်းငယ်မျှ စိုက်ထုတ်ကာ ဆုပ်ကိုင်လိုက်

သည်။ ထိုခဏမှာပင် သူ၏ ပတ်ဝန်းကျင်ရှိ ဟင်းလင်းပြင်မှာ သူ၏ ရုပ်ပိုင်းဆိုင်ရာအင်အားကြောင့်ပင် အက်ကွဲသွားတော့သည်။ သူသည် ဖြည်းဖြည်းချင်း ထရပ်လိုက်ရင်း ယခုအခါ သူ မည်မျှအထိ အစွမ်းထက်နေပြီလဲဟု တွေးတောနေမိသည်။

"ငါ ဘေးဒုက္ခနယ်ပယ်အဆင့်နဲ့ ယှဉ်လို့ရနေပြီလား"

ဘေးဒုက္ခအကြောင်း တွေးမိသည်နှင့်တစ်ပြိုင်နက် သူသည် စနစ်လုပ်ဆောင်ချက်တစ်ခုကို အဆင့်မြှင့်တင်ရန် အခွင့်အရေးရှိနေသည်ကို သတိရသွားသည်။ သူသည် မဆိုင်းမတွပင်

တိုက်ပွဲအတုယူစနစ်ကို ရွေးချယ်လိုက်သည်။

[မြေကမ္ဘာမသေမျိုး × ၈]

အခန်း။ ၃၆၆

ရှန်းယွီသည် တိုက်ပွဲအတုယူစနစ်ကို အဆင့်မြှင့်တင်လိုက်သည်နှင့် တစ်ပြိုင်နက် ကျင့်ကြံသူပေါင်း ထောင်သောင်းချီကို စတင်ထောက်လှမ်းမိလိုက်သည်။

ပို၍အရေးကြီးသည်မှာ ထိုအထဲတွင် မြေကမ္ဘာမသေမျိုးအဆင့်ရှိသူ ရှစ်ဦးကိုပါ ရှာဖွေတွေ့ရှိလိုက်ခြင်းပင်။

ရှန်းယွီ ချက်ချင်းပင် ထိတ်လန့်သွားမိသည်။ မသေမျိုးအဆင့် ကျင့်ကြံသူ ရှစ်ဦးတောင်လား။ သူသည် မသေမျိုးအဆင့် ခုခံစစ်အစီအရင်ကိုပင် အောင်မြင်အောင် မတည်ဆောက်နိုင်သေးချေ။

သို့သော် အဆင့်မြှင့်တင်ထားသော စနစ်လုပ်ဆောင်ချက်အသစ်အကြောင်း အသေးစိတ် အချက်အလက်များကို ဖတ်ရှုပြီးနောက်တွင်မှ သူ အနည်းငယ် စိတ်အေးသွားတော့သည်။

အဆင့်မြှင့်တင်ပြီးနောက်တွင် အတုယူစနစ်၏ ထောက်လှမ်းနိုင်စွမ်းမှာ သူ၏ ဝိညာဉ်အာရုံအတိုင်းအတာနှင့် ထပ်တူကျသွားခြင်းပင်။ လက်ရှိတွင် သူ၏ ဝိညာဉ်အာရုံမှာ မိုင်ပေါင်း လေးသန်းကျော်အထိ ဖြန့်ကျက်နိုင်စွမ်းရှိရာ လူသားလောကတစ်ခုလုံးကို အလွယ်တကူ လွှမ်းခြုံသွားခြင်း ဖြစ်သည်။

ဤထောက်လှမ်းမှုစနစ်မှာ သူ၏ ဝိညာဉ်အာရုံကို တကူးတက ဖြန့်ကျက်နေရန် မလိုဘဲ အလိုအလျောက် အလုပ်လုပ်ခြင်း ဖြစ်သဖြင့် လောကတခွင်ရှိ မသေမျိုးများကို သူ သတိပြုမိသွားခြင်းပင်။

သို့သော်လည်း ရှန်းယွီမှာ စိုးရိမ်စိတ် အနည်းငယ် ရှိနေဆဲပင်။

ဤမသေမျိုးများသည် ဗဟိုတိုက်ကြီးတွင်သာ ရှိနေနိုင်သည်ဟု သူ ခန့်မှန်းထားသော်လည်း သူတို့မှာ သူ့အတွက် ခြိမ်းခြောက်မှုတစ်ခု ဖြစ်နေဆဲဖြစ်သည်။ သူတို့သည် ထျန်းလင်းကို အနိုင်

ယူခဲ့ကြသူများဖြစ်ပြီး သူမပိုင်ဆိုင်သော ဗဟိုတိုက်ကြီးမှ မသေမျိုးရတနာကို ရှန်းယွီတို့အုပ်စုက လုယူသွားပြီဟု ထင်မှတ်ထားကြပေလိမ့်မည်။

သူ သက်ပြင်းချလိုက်မိသည်။ အကယ်၍ ထိုရတနာကို သူ အမှန်တကယ် ရရှိခဲ့လျှင် ဤမျှ စိုးရိမ်နေမည် မဟုတ်ပေ။ ကံဆိုးစွာဖြင့် ထိုရတနာမှာ ထျန်းလင်းနှင့်အတူ ပျက်စီးသွားခဲ့သည်။

သို့သော် တစ်ဖက်က ပြန်စဉ်းစားကြည့်လျှင် သူတို့ ထိုသို့ထင်နေခြင်းမှာ မဆိုးဘူးဟု သူ တွေးမိပြန်သည်။ ဗဟိုတိုက်ကြီးမှ လူများသည် ထိုရတနာ ရှိမရှိ အသေအချာ မသိနိုင်ကြချေ။ ထျန်းလင်း ရတနာပိုင်ဆိုင်ထားစဉ်ကပင် ၎င်းတို့က သူမကို သတိထားခဲ့ရလျှင် ယခု ထိုရတနာကိုပါ လက်ဝယ်ပိုင်ဆိုင်ထားပြီး သူမကို အနိုင်ယူနိုင်ခဲ့သူများကို ပို၍ပင် ကြောက်ရွံ့နေကြမည်ပင်။

သူ ခေါင်းညိတ်လိုက်သည်။ လောလောဆယ်တွင် သူတို့ကို စိုးရိမ်နေရန် မလိုသေးပေ။ မသေမျိုးအဆင့် အစီအရင်ကိုသာ အမြန်ဆုံး တည်ဆောက်နိုင်ခဲ့လျှင် သူ အမှန်တကယ် ဘေးကင်းသွားပေလိမ့်မည်။

သူ ပတ်ဝန်းကျင်ကို ဝေ့ဝဲကြည့်လိုက်သည်။ ဂူဟောင်းကို ပြန်လည်မွမ်းမံသည့် လုပ်ငန်းမှာ ဆက်လက်ဖြစ်ပေါ်နေဆဲ ဖြစ်သည်။ ယခုအခါ ဂူနံရံများမရှိတော့ဘဲ ကောင်းကင်ယံကို တိုက်ရိုက်မြင်နေရပြီဖြစ်ရာ ထွက်ပေါ်လာသော နေမင်းကို သူ ငေးကြည့်နေမိသည်။ ပြင်ဆင်မှုများ စတင်ရန် အချိန်တန်ပြီဖြစ်သည်။ မင်္ဂလာပွဲမစမီ သူ၏ စွမ်းအားအသစ်ကို စမ်းသပ်ရန်အတွက် တိုက်ပွဲအတုယူမှုအချို့ကို အရင်လုပ်ကြည့်ရလျှင် ကောင်းမလားဟု သူ တွေးနေမိသည်။

သူသည် အတုယူစနစ်ထဲသို့ မဝင်မီ စနစ်မျက်နှာပြင်ပေါ်ရှိ အပြောင်းအလဲများကို အသေအချာ စစ်ဆေးကြည့်လိုက်သည်။

ရှန်းယွီသည် သူ၏ ကျင့်ကြံမှုအခြေအနေကို ကြည့်ပြီး အတော်လေး အံ့အားသင့်သွားရသည်။ သူ၏ ဝိညာဉ်အဆင့်မှာ ရွှေရောင်အမြုတေအဆင့်မှာပင် ရှိနေသေးသည်။ ဝိညာဉ်တစ်ခုကိုလည်း ဖွဲ့စည်းပြီးပြီ အမြုတေကိုလည်း ဝိညာဉ်ပင်လယ်ထဲ ရွှေ့ပြီးပြီဖြစ်သော်လည်း သူ၏ ဝိညာဉ်မှာ ကလေးငယ်အဆင့်သာ ရှိသေးခြင်းကြောင့် ဤသို့ ဖြစ်နေခြင်းဖြစ်နိုင်သည်ဟု သူ တွေးမိသည်။

သူ၏ ကျင့်ကြံမှုလမ်းစဉ်မှာ ပုံမှန်မဟုတ်ဘဲ အလွန်ပင် ရှုပ်ထွေးနေကာ အသစ်ရရှိထားသော ခန္ဓာကိုယ်နှင့် တစ်စုံတစ်ရာ ပွတ်တိုက်မှု ရှိနေသလားဟု သူ သံသယဝင်မိပြီး သူ့ကိုယ်ပိုင် ကျင့်စဉ်လမ်းစဉ်ကို စတင်သုတေသနပြုရန် လိုအပ်နေပြီဖြစ်ကြောင်း သဘောပေါက်လိုက်သည်။

တစ်ဖက်တွင်လည်း ခန္ဓာကိုယ်ကြံ့ခိုင်မှုမှာ သူ မျှော်လင့်ထားသည့်အတိုင်း နှစ်ဆင့်မျှ တက်လှမ်းသွားခဲ့သည်။ ဝိညာဉ်အတွေ့အကြုံတိုးတက်လာရခြင်းမှာလည်း သူ၏အတွင်းပိုင်းရှိ ကြယ်နှစ်စင်းက ဝိညာဉ်ပင်လယ်မှ ချီစွမ်းအင်များကို အဆက်မပြတ် စုပ်ယူသန့်စင်ပေးနေခြင်းကြောင့်

ပင်။

ဤဖြစ်စဉ်မှာ အသစ်အဆင့်မြှင့်ထားသော ဝိညာဉ်ကြောထက်ပင် ပိုမိုမြန်ဆန်နေပြီး ကြယ်များ ကြီးထွားလာသည်နှင့်အမျှ လုပ်ဆောင်ချက်မှာလည်း ပိုမိုထိရောက်လာသည်။ ဤအရှိန်နှင့်ဆိုလျှင် တစ်ပတ်အတွင်း သူ အဆင့်တက်နိုင်ပေလိမ့်မည်။ ထို့ပြင် သူ၏ ချီစွမ်းအင်

အရည်အသွေးမှာလည်း စစ်မှန်သောချီဖြစ်လာရန် ခြေတစ်လှမ်းသာ လိုတော့သည်။

...

တိုက်ပွဲအတုယူစနစ်အတွင်းသို့ ရောက်သောအခါ သူသည် ထျန်းလင်းကို ရွေးချယ်ရန် ပြင်လိုက်မိသော်လည်း သူမ သေဆုံးသွားပြီဖြစ်၍ အတုယူ၍ မရနိုင်တော့ကြောင်း သတိရသွားသည်။

ထို့ကြောင့် သူသည် လီယောင်းကိုသာ ရွေးချယ်လိုက်တော့သည်။

ယခုအခါ စနစ်၏ အဆင့်မြှင့်တင်မှုကြောင့် လီယောင်း၏ ကျင့်ကြံမှုအဆင့်ကိုသာမက သူမ၏ အသွင်သဏ္ဌာန်မျိုးစုံကိုပါ ရွေးချယ်နိုင်သည်ကို တွေ့လိုက်ရသဖြင့် ရှန်းယွီ ကျေနပ်သွားမိသည်။ "စနစ်က ငါပြောတာတွေကို နားထောင်နေတာပဲ"

သူ တွေးလိုက်သည်။

သူသည် လီယောင်း၏ အသွင်မျိုးစုံထဲမှ လွန်ခဲ့သော တိုက်ပွဲတွင် သူမ အသုံးပြုခဲ့သည့် ကောင်းကင်ဘုံ နိယာမကိုယ်ပွားအသွင်ကို စမ်းသပ်ရန် ရွေးချယ်လိုက်တော့သည်။

ရှန်းယွီသည် တိုက်ပွဲအတွက် အသင့်ပြင်ထားသော်လည်း မည်သည့်တိုက်ခိုက်မှုမှ ဖြစ်ပေါ်မလာခဲ့ပေ။

လီယောင်းသည် ဘာမျှမလုပ်ဘဲ ကောင်းကင်ယံတွင် ငြိမ်သက်စွာ ပျံသန်းနေသည်။ ရှန်းယွီ စိတ်ပျက်လက်ပျက်ဖြင့် နဖူးကို လက်ဝါးနှင့် ရိုက်လိုက်မိသည်။

"အင်း... ဒီနေရာမှာလည်း သူ ငါ့ကို မမြင်နိုင်ဘူးထင်တယ်"

သူတွေးလိုက်သည်။ ထို့ကြောင့် သူသည် လီယောင်းနှင့် အတုယူတိုက်ခိုက်မှုကို ဖျက်သိမ်းလိုက်ပြီး အခြားတစ်ယောက်ကို ရွေးချယ်ရန် ဆုံးဖြတ်လိုက်သည်။

ယခုအခါ သူ၏ ထောက်လှမ်းနိုင်စွမ်း နယ်ပယ်မှာ ပိုမိုကျယ်ပြန့်လာပြီဖြစ်ရာ ရွေးချယ်စရာ ကျင့်ကြံသူ အများအပြား ရှိနေသည်။ သူသည် ဘေးဒုက္ခနယ်ပယ်၏ အထွတ်အထိပ်သို့ ရောက်ရှိနေသော ပညာရှင်တစ်ဦးဖြစ်သည့် ထျန်းဝူကျိကို ရွေးချယ်လိုက်သည်။

ယခုတစ်ကြိမ်တွင်မူ တိုက်ပွဲမှာ ချက်ချင်းစတင်ခဲ့ပြီး မြင်မကောင်းလောက်အောင်ပင် ပြင်းထန်လှသည်။

ရှန်းယွီ၏ ခန္ဓာကိုယ်မှာ ချက်ချင်းပင် တစ်စစီ ပေါက်ကွဲထွက်သွားခဲ့သော်လည်း သူသည် ချက်ချင်း ပြန်လည်ရှင်သန်လာကာ အဝေးသို့ နေရာရွေ့ပြောင်း၍ ရှောင်တိမ်းလိုက်သည်။ သို့သော်လည်း သူ လွတ်မြောက်ခြင်းမရှိပေ။ ထျန်းဝူကျိမှာ သူ၏နောက်၌ ရုတ်တရက် ပေါ်လာပြီး ထူးဆန်းသော စွမ်းရည်တစ်ခုကို အသုံးပြုကာ ပတ်ဝန်းကျင်ရှိ ဟင်းလင်းပြင်တစ်ခုလုံးကို အေးခဲပစ်လိုက်သည်။

ရှန်းယွီသည် သူ၏ ဟင်းလင်းပြင်နယ်ပယ်ကို အသုံးပြု၍ ထိုအေးခဲနေသော ဟင်းလင်းပြင်မှ ချက်ချင်း ရုန်းထွက်လိုက်သည်။ သို့သော် သူ ထွက်ပြေးရန် ကြိုးစားနေစဉ်မှာပင် ဝူကျိမှာ သူ၏ရှေ့သို့ ရောက်ရှိလာပြီး အလွန်တရာ သိပ်သည်းလှသော စွမ်းအင်များ ပြည့်နှက်နေသည့် လက်ဝါးကို ဆန့်ထုတ်လိုက်သည်။ ရှန်းယွီသည် အံကြိတ်ကာ သူ၏လက်ဝါးတွင်လည်း အလွန်သိပ်သည်းသော စွမ်းအင်များကို ထုတ်ဖော်လိုက်ပြီး ပြိုင်ဘက်၏ တိုက်ခိုက်မှုကို တားဆီးလိုက်သည်။

ရုတ်တရက် လောကတစ်ခုလုံး ဖြူဖွေးသွားတော့သည်။

ရှန်းယွီသည် တကယ့်လောကတွင် မျက်လုံးများကို ပြန်လည်ဖွင့်လိုက်သည်။

"ငါ ရှုံးသွားတာပဲ"

သူ တွေးလိုက်မိသည်။ သူ၏ ဟင်းလင်းပြင်နယ်ပယ်ကဲ့သို့ပင် သူ၏ ဒြပ်ဆွဲအားနယ်ပယ်မှာလည်း ကမ္ဘာအဆင့်တွင် ရှိနေသော်လည်း သူ ရှုံးနိမ့်ခဲ့ရသည်။ သူ သက်ပြင်းချလိုက်ရင်း ပါးကို ကုတ်လိုက်မိသည်။

"အင်း... အခက်အခဲအဆင့်ကို နည်းနည်းလောက် လျှော့ကြည့်ဦးမှပဲ"

အခက်အခဲအဆင့်ကို နှောင်းပိုင်းအဆင့်သို့ လျှော့ချလိုက်သည့်အခါမှသာ အခြေအနေမှာ အတော်အတန် ထိန်းချုပ်နိုင်လာသည်။

သို့သော်လည်း အနိုင်ရရန် ခက်ခဲနေဆဲဖြစ်ပြီး သူသည် ပတ်ပြေးနေရသည်က များနေသည်။ သူ၏ စစ်နတ်ဘုရားခန္ဓာကို အသုံးပြုကာ နယ်ပယ်အားလုံးကို ပေါင်းစပ်လိုက်လျှင်ပင် သိသာသော အသာစီးကို မရရှိခဲ့ပေ။ အခြေအနေပြ အချက်အလက်များအရ ထျန်းဝူကျိတွင် အကြွင်းမဲ့အဆင့်ရှိသော အချိန်နယ်ပယ်တစ်ခု ရှိနေကြောင်း သူ သိလိုက်ရသည်။

၎င်းမှာ ထျန်းလင်း အသုံးပြုခဲ့သော နယ်ပယ်နှင့် စွမ်းအားချင်း ဆင်တူလှသည်။ စွမ်းအားကွာခြားချက်မှာ အလွန်ကြီးမားလွန်းလှသဖြင့် ရှန်းယွီ၏ ပုံမှန်နယ်ပယ် ၂၀ ခန့်မှာ လုံးဝ အသုံးမဝင်သကဲ့သို့ ဖြစ်နေသည်။ သူ၏ ကမ္ဘာအဆင့်နယ်ပယ်နှစ်ခုသာလျှင် အနည်းငယ် ယှဉ်ပြိုင်နိုင်စွမ်း ရှိတော့သည်။

ဤအဆင့်တွင် ရှုံးနိမ့်ပြီးနောက် သူသည် အလယ်အလတ်အဆင့်သို့ ထပ်မံလျှော့ချလိုက်ပြန်သည်။

အလယ်အလတ်အဆင့်တွင်မူ သူသည် အဆင့်တူ ယှဉ်ပြိုင်နိုင်လာပြီး ပြိုင်ဘက်ကိုပင် အသာစီးရအောင် လုပ်ဆောင်နိုင်လာသည်။ ၎င်းမှာ ပြိုင်ဘက်၏ နယ်ပယ်မှာ အကြွင်းမဲ့အဆင့်မဟုတ်ဘဲ ကမ္ဘာအဆင့်သာ ရှိသောကြောင့် ဖြစ်သည်။

အောင်မြင်ပြီးနောက်တွင် သူသည် နယ်ပယ်များကို အဆင့်မြှင့်တင်ရန် လိုအပ်ကြောင်း ကိုယ့်ကိုယ်ကိုယ် သတိပေးလိုက်မိသည်။ အဆင့်မြင့်နယ်ပယ်များတွင် နယ်ပယ်ဆိုသည်မှာ အရာအားလုံးပင်။ အကြွင်းမဲ့အဆင့်ရှိသော နယ်ပယ်တစ်ခုတည်းကပင် သူ၏ ပုံမှန်နယ်ပယ် ၂၀ ကို လုံးဝ အသုံးမဝင်အောင် လုပ်ဆောင်နိုင်စွမ်း ရှိသည်။

သူသည် အတုယူတိုက်ခိုက်မှုကို ပြန်လည်စတင်လိုက်သည်။ ယခုတစ်ကြိမ်တွင်မူ သူ၏ စစ်

မှန်သော ရုပ်ပိုင်းဆိုင်ရာ အင်အားသည် ဘေးဒုက္ခနယ်ပယ်သို့ အမှန်တကယ် ရောက်ရှိသွားပြီလားဆိုသည်ကို စမ်းသပ်ရန်အတွက် အစောပိုင်းအဆင့်သို့ အခက်အခဲကို ထပ်မံလျှော့ချလိုက်တော့သည်။