အခန်း (၁၄၉-၁၅၀)

အပိုင်း ၁၄၉

ခိုင်ထျန်း မိတ်ဆက်

၂၀၁၉ ခုနှစ်၊ ဧပြီလကုန်၊၊

​လုံထန်လုပ်ငန်းစုသည် စီအီးအို ကျန်းဖန်၏ ဦးဆောင်မှုဖြင့် သတင်းစာရှင်းလင်းပွဲတစ်ရပ် ကျင်းပခဲ့ပြီး 'ခိုင်ထျန်း' (Kaitian) တက်ဘလက် ကွန်ပျူတာများကို လူထုရှေ့မှောက်သို့ တရားဝင် ချပြလိုက်ရာ အရှိန်အဟုန်သစ် တစ်ရပ်ကို စတင်စေခဲ့သည်၊၊

​ရက်ပိုင်းအတွင်းမှာပင် ကမ္ဘာ့ထိပ်တန်း ဖုန်းထုတ်လုပ်ရေး ကုမ္ပဏီကြီးများအားလုံး ဤသတင်းကို ရရှိသွားကြပြီး တစ်ဦးပြီးတစ်ဦး သတိထား စောင့်ကြည့်လာကြသည်၊၊ ရိုးရာဖုန်းထုတ်လုပ်သူများနှင့် ယှဉ်လျှင် လုံထန်မှာ ထူးခြားတဲ့ တည်ရှိမှုတစ်ခု ဖြစ်နေသည်၊၊

သုတေသနမှသည် အမြောက်အမြား ထုတ်လုပ်မှုအထိ ပြင်ပလူ၏ လက်ကို ငှားရန်မလိုသလောက် ဖြစ်သဖြင့် ၎င်းတို့တွင် ဟာကွက်ဟူ၍ မရှိသလောက်ပင်။

​ထောက်ပံ့ပို့ဆောင်ရေးလမ်းကြောင်း (Logistics) ကို ဖြတ်တောက်ပြီး ထုတ်လုပ်မှုကို ရပ်တန့်ရန် ကြိုးစားလျှင်ပင် လုံးဝ မဖြစ်နိုင်ချေ၊၊ ဥပမာအားဖြင့် Xiaomi (တမီ) သည် မိမိကိုယ်ကိုယ် ထုတ်လုပ်သူထက် ပစ္စည်းစုစည်းသူ (Assembler) အဖြစ်သာ ကြော်ငြာခဲ့သဖြင့် Samsung၊ Sony သို့မဟုတ် Apple တို့သည် လဲ့ကျွင်းကို အရေးတယူ မလုပ်ခဲ့ကြ။

၊ သို့သော် လုံထန်မှာမူ အသေးငယ်ဆုံး အစိတ်အပိုင်းလေးများကအစ ကိုယ်တိုင်ထုတ်လုပ်ပြီး ဖုန်းတစ်လုံးလုံးကို ကိုယ်ပိုင်နည်းပညာဖြင့် တည်ဆောက်ထားသဖြင့် ပြစ်ချက်ရှာရန် ခက်ခဲလှသည်၊၊

​သတင်းစာရှင်းလင်းပွဲအတွက် ဖိတ်ကြားစာများမှာလည်း ကမ္ဘာကို တုန်လှုပ်စေခဲ့သည်၊၊ အာရှမှသည် ဥရောပ၊ အမေရိကနှင့် အာဖရိကအထိ စုစုပေါင်း ဖိတ်ကြားစာ ၁,၂၀၀ ပေးပို့ခဲ့သည်၊၊ မသိသူများအဖို့ လုံထန်လုပ်ငန်းစုမှာ ကမ္ဘာကြီးကို သိမ်းပိုက်တော့မည်ဟုပင် ထင်မှတ်ရသည်၊၊

​၃၁ ရက်နေ့ နံနက် ၉ နာရီ၊ ကျန်းလင်းမြို့ရှိ Shimao Binjiang Hilton ဟိုတယ်တွင် လုံထန်လုပ်ငန်းစု၏ သတင်းစာရှင်းလင်းပွဲကို ကျင်းပခဲ့သည်၊၊

​"အခု ကျွန်တော် 'ခိုင်ထျန်း' (Kaitian) တက်ဘလက် မိတ်ဆက်ပွဲ စတင်ပြီဖြစ်ကြောင်း ကြေညာပါတယ်"

​စီအိုအို (COO) ယွီလဲ့ (Yu Lei) သည် အနက်ရောင် ဝတ်စုံကို ဝတ်ဆင်ထားပြီး တည်ကြည်သော မျက်နှာထားဖြင့် ရှိနေသည်၊၊ ၎င်းမှာ လုံထန်ကိုယ်စား သူ ပထမဆုံးအကြိမ် တရားဝင် မိတ်ဆက်ပေးခြင်း ဖြစ်သလို၊ ကျင်းလီမှ ထွက်ခွာပြီးနောက် သူ၏ ပုံစံသစ်လည်း ဖြစ်သည်၊၊

​"ဝေါ"

​စကားအဆုံးတွင် ပရိသတ်ထံမှ သောင်းသောင်းဖျဖျ လက်ခုပ်သံများ ထွက်ပေါ်လာသည်၊၊

တရုတ်မီဒီယာသမား အားလုံးမှာလည်း စိတ်လှုပ်ရှားစွာဖြင့် မှတ်တမ်းတင်နေကြသည်၊၊

​"Kaitian ONE - တက်ဘလက် ကွန်ပျူတာ"

​ထိုအချိန်တွင် ယွီလဲ့သည် ငွေဖြူရောင် တက်ဘလက်တစ်လုံးကို ကိုင်မြှောက်ကာ ကင်မရာများဘက်သို့ လှည့်၍ အေးအေးလူလူ ပြောလိုက်သည်။

"ဒါဟာ နီဗားနားအိတ်ကို အခြေခံပြီး ထုတ်လုပ်ထားတဲ့ လုံးဝအသစ်စက်စက် တက်ဘလက် ဖြစ်ပါတယ်၊၊ ကျွန်တော်တို့ အဖွဲ့အစည်းကနေ ၂၀၁၉ ခုနှစ်အတွက် အသုံးပြုသူတွေကို ပေးအပ်လိုက်တဲ့ ပထမဆုံး အဖြေလွှာလည်း ဖြစ်ပါတယ်၊၊"

​"Kaitian ONE မှာ ကျွန်တော်တို့ ကုမ္ပဏီကိုယ်တိုင် တီထွင်ထားတဲ့စနစ်နဲ့ ချင်းလုန့် အမှတ် ၁ (Qinglong No. 1) အဆင့်မြင့် ချစ်ပ် (Chip) ကို အသုံးပြုထားပါတယ်၊၊ ဒီဇိုင်းပိုင်းအရ နီဗားနားအိတ် နဲ့ ဆင်တူပါတယ်၊၊"

​"ဒါပေမဲ့ ဒါဟာ တက်ဘလက် ဖြစ်တဲ့အတွက် စွမ်းဆောင်ရည်ပိုင်းမှာ ပိုမိုမြှင့်တင်ထားပါတယ်၊၊ ၁၁ လက်မ မျက်နှာပြင်၊ RAM 4G/6G၊ Storage 512G အထိ၊ ဘက်ထရီ 7500 mAh နဲ့ Standby နာရီ ၇၈ အထိ အသုံးပြုနိုင်မှာပါ၊၊"

​ယွီလဲ့သည် ပရိုဂျက်တာ ခလုတ်ကို နှိပ်လိုက်ရာ တက်ဘလက်၏ အသေးစိတ် အချက်အလက်များကို ဖန်သားပြင်ထက်တွင် မြင်တွေ့ရသည်၊၊

​မိနစ်ပိုင်းအကြာတွင် နောက်ထပ် လက်ခုပ်သံများ ထွက်ပေါ်လာပြန်သည်၊၊ လာရောက်သည့် မီဒီယာသမားများသည် အီလက်ထရွန်နစ် ပစ္စည်းများအကြောင်း နားလည်သူများ ဖြစ်သဖြင့် ဤအချက်အလက်များကို ကြည့်ရုံဖြင့် ခိုင်ထျန်း တက်ဘလက်မှာ ကမ္ဘာ့ထိပ်တန်း အဆင့်သို့ ရောက်ရှိနေသည်ကို သိကြသည်၊၊

လုံထန်၏ ထုံးစံအတိုင်း သူတို့ထုတ်ကုန်များသည် အမြဲတမ်း အရည်အသွေး အမြင့်ဆုံး ဖြစ်သည်၊၊

​"မစ္စတာယွီ... ဒီတက်ဘလက်ကို ဘယ်တော့ စတင်ရောင်းချမှာလဲ"

တရုတ်သတင်းထောက်တစ်ဦးက မတ်တပ်ရပ်၍ ကျယ်လောင်စွာ မေးလိုက်သည်၊၊ လူတိုင်း၏ အကြည့်မှာ ယွီလဲ့ထံ ရောက်သွားကြသည်၊၊

​"ဒီနေ့ဟာ မိတ်ဆက်ပွဲတင်မကဘဲ အရောင်းဖွင့်ပွဲနေ့လည်း ဖြစ်ပါတယ်၊၊"

ယွီလဲ့က အားလုံးကို ကြည့်ကာ ပြောလိုက်သည်။

"အခု မနက် ၁၀ နာရီ ရှိပါပြီ၊ နောက်ထပ် ၂ နာရီအကြာ နေ့လည် ၁၂ နာရီတိတိမှာ ကျွန်တော်တို့ အဖွဲ့အစည်းရဲ့ အွန်လိုင်းနဲ့ အော့ဖ်လိုင်း အရောင်းလမ်းကြောင်း အားလုံးကို တစ်ပြိုင်တည်း ဖွင့်လှစ်သွားမှာ ဖြစ်ပါတယ်၊၊"

​ဝုန်း

​ဒီသတင်းက ဗုံးတစ်လုံး ပေါက်ကွဲလိုက်သလိုပါပဲ၊၊ မိတ်ဆက်ပွဲနှင့် အရောင်းဖွင့်ပွဲကို တစ်ပြိုင်တည်း လုပ်မည်ဟု မည်သူမျှ မထင်ထားခဲ့၊၊ ရောင်းဖို့ ၂ နာရီပဲ လိုတော့သည့်တိုင် လုံထန်မှာ ကြိုတင်ကြော်ငြာခြင်း မရှိဘဲ တိုက်ရိုက် ရောင်းချတော့မည်လော..။

​မီဒီယာသမားအားလုံး မှင်တက်သွားကြရသည်၊ ဤလုပ်ဆောင်ချက်မှာ တကယ့်ကို အဆင့်မြင့်လှသည်၊၊ သို့သော် အင်တာနက်ခေတ်တွင် ၂ နာရီဆိုသည်မှာ သတင်းများ တရုတ်ပြည်အနှံ့ ပြန့်နှံ့သွားရန် လုံလောက်သော အချိန်ဖြစ်သည်ကို သူတို့ မသိကြပေ၊၊

​လောလောဆယ်တွင် လိုက်ဖ်လွှင့်နေသည့် အွန်လိုင်းကြည့်ရှုသူ အရေအတွက်မှာ သန်းနှင့်ချီ တိုးတက်နေပြီး၊ မိတ်ဆက်ပွဲ မပြီးခင်မှာပင် 'ခိုင်ထျန်း' တက်ဘလက် သတင်းမှာ တစ်နိုင်ငံလုံး ပြန့်သွားပါပြီ၊၊ လုံထန်ရဲ့ အရောင်းဌာနနှင့် အီးကောမတ်စ် (E-commerce) ဌာနတို့ကလည်း အဆင်သင့် ဖြစ်နေပါပြီ၊၊

ဂိုဒေါင်များတွင် အလုံးရေ သန်းနှင့်ချီကာ အသင့်ရှိနေသည်၊၊

​"အားလုံး စိတ်အဝင်စားဆုံးဖြစ်မယ့် ဈေးနှုန်းကို ပြောပြပါ့မယ်၊၊"

ယွီလဲ့က ပြုံးရင်း ဆက်ပြောလာသည်။

"အားလုံး ဖန်သားပြင်ကို ကြည့်ပေးပါ၊ ဈေးနှုန်းကတော့ ၄၈၈၈ (4888) ယွမ် ဖြစ်ပါတယ်၊၊ ကျွန်တော်တို့ အဖွဲ့အစည်းအနေနဲ့ အသုံးပြုသူ အားလုံး ဒီနှစ်မှာ အကြီးအကျယ် ချမ်းသာကြပါစေလို့ ဆုတောင်းပေးလိုက်ပါတယ်၊၊"

(မှတ်ချက် - ၈ ဂဏန်းသည် တရုတ်ဘာသာစကားဖြင့် 'ချမ်းသာခြင်း' ဟု အဓိပ္ပာယ်ရပါသည်)

​"ဟားဟားဟား"

​ပရိသတ်အားလုံး ရယ်မောကြပါသည်၊၊ ၄၈၈၈ ဆိုသည့် ဈေးနှုန်းမှာ iPad Pro ထက် စွမ်းဆောင်ရည် မနိမ့်သော်လည်း ဈေးနှုန်းမှာ ထက်ဝက်ပင် မရှိပေ၊၊ ၎င်းမှာ အမျိုးသားရေးစိတ်ဓာတ်ကို ဖော်ပြခြင်း မဟုတ်ပါလော၊၊

​၄၈၈၈ ယွမ် ဆိုသည်မှာ လူအများစု တတ်နိုင်သော ဈေးနှုန်းဖြစ်သဖြင့် ဝယ်ယူရန် ဆုံးဖြတ်ဖို့ လွယ်ကူစေသည်၊၊

​........................................................

အပိုင်း ၁၅၀

အံ့မခန်းရောင်းအား

သတင်းစာရှင်းလင်းပွဲ တရားဝင်ပြီးဆုံးသွားသည်နှင့် မီဒီယာသတင်းထောက်အားလုံးသည် မိမိတို့ကုမ္ပဏီများသို့ မဆိုင်းမတွ ပြန်ကြတော့သည်၊၊

သူတို့က ဒုံးပျံဖြင့်ပြန်သကဲ့သို့ အမြန်သွားကာ ဤသတင်းများကို နေ့စဉ်သတင်းစာနှင့် လစဉ်မဂ္ဂဇင်းများတွင် ဖော်ပြရန် စိတ်အားထက်သန်နေကြသည်၊၊

​လုံထန်လုပ်ငန်းစု၏ ဥက္ကဋ္ဌ လင်းဖန်သည် ခန်းမ၏ နောက်ဆုံးတန်းထိုင်ခုံတွင် ထိုင်ရင်း ကျေနပ်အားရသည့် အပြုံးဖြင့် ကြည့်နေသည်ကိုတော့ မည်သူမျှ သတိမထားမိကြပေ၊၊

​ကမ္ဘာတစ်ဝှမ်းလုံးတွင် သတင်းထောက်များသည် သတင်းဖြန့်ဝေရန် အကောင်းဆုံး လမ်းကြောင်းများ ဖြစ်ကြသည်၊၊ ယခင်က ဟောင်ကောင်တွင် စီးပွားရေးလုပ်ငန်းတစ်ခုခု လုပ်လျှင် မီဒီယာများက မိမိတို့ကို ဖော်ပြပေးရန် ငွေကုန်ကြေးကျခံ ရှာဖွေခဲ့ရသော်လည်း၊ ယခု လုံထန်၏ မိတ်ဆက်ပွဲတွင်မူ သတင်းထောက်အားလုံးက 'ခိုင်ထျန်း' (Kaitian) အပေါ် အကောင်းမြင်နေကြသည်မှာ သိသာလှသည်၊၊

​ဤကဲ့သို့သော အခြေအနေမျိုးတွင် ခိုင်ထျန်း တက်ဘလက် အလုံးရေ ၁၀ သန်း ရောင်းချရန်ဆိုသည်မှာ မဖြစ်နိုင်စရာ အကြောင်းမရှိတော့ချေ။

​တက်ဘလက်သည် မိုဘိုင်းဖုန်းနှင့် မတူပါ၊၊ ဖုန်းမှာ ဆက်သွယ်ရေးအတွက် လူတိုင်း မရှိမဖြစ် လိုအပ်သော်လည်း၊ တက်ဘလက်မှာ စမတ်ဖုန်းနှင့် လပ်တော့ပ် (Laptop) ကြားတွင် လုပ်ဆောင်ချက်အချို့ ထပ်နေသဖြင့် အသုံးနည်းတတ်ကြသည်၊၊ ၂၀၁၈ ခုနှစ်တွင် တစ်ကမ္ဘာလုံး၌ တက်ဘလက် တင်ပို့မှုမှာ အလုံးရေ ၁၄၄ သန်းခန့်သာ ရှိခဲ့သည်၊၊

​သို့သော် တရုတ်ပြည်၏ လူဦးရေမှာ ၁.၅ ဘီလီယံ ရှိသဖြင့် တက်ဘလက်ရောင်းအားမှာ အတော်လေး ကောင်းမွန်သည်၊၊ Apple ဖုန်းများပင်လျှင် ပြည်တွင်း၌ တစ်နှစ်လျှင် အလုံးရေ ၁၀ သန်း ပြည့်ရန် ခဲယဉ်းလှရာ၊ လုံထန်၏ တက်ဘလက်ကသာ ဆယ်သန်းချီ ရောင်းရမည်ဆိုပါက Apple ကို အပြတ်အသတ် အနိုင်ယူလိုက်ခြင်းပင် ဖြစ်သည်၊၊

​"သူဌေး... မိတ်ဆက်ပွဲ ပြီးပါပြီ၊ ဌာနချုပ်ကို ပြန်ဦးမလားရှင့်"

မိုရှင်းယာက လင်းဖန်၏ နားနားသို့ ကပ်ကာ တိုးတိုးလေး မေးလိုက်သည်၊၊

​"အင်း..."

လင်းဖန်က ခဏမျှ စဉ်းစားပြီးနောက်

"ယွီလဲ့ကို စီစဉ်ခိုင်းလိုက်၊ ဒီနေ့ မိတ်ဆက်ပွဲမှာ ပါဝင်တဲ့ ဝန်ထမ်းအားလုံးကို ဒီဟိုတယ်မှာပဲ နေ့လည်စာ ကျွေးလိုက်ပါ၊ ဌာနချုပ်ကိုတော့ ငါ အခုချက်ချင်း မသွားသေးဘူး၊၊"

ဟု အမိန့်ပေးလိုက်သည်၊၊

​ဗိုက်ဆာနေသော စစ်သည်ဖြင့် စစ်တိုက်၍ မရနိုင်သည်ကို လင်းဖန် ကောင်းကောင်းသိသည်၊၊ ဝန်ထမ်းများကို ထမင်းတစ်နပ်ကျွေးရုံမျှဖြင့် သူတို့၏ စိတ်ဓာတ်ကို မြှင့်တင်ပေးနိုင်ခြင်းမှာ တန်ဖိုးရှိလှသည်၊၊

​သုတေသနဌာန၊ အီးကောမတ်စ်နှင့် အရောင်းဌာနမှ ဝန်ထမ်းများမှာမူ နေ့လည် ၁၂ နာရီတွင် 'ခိုင်ထျန်း' ကို စတင်ရောင်းချရန်အတွက် ဖန်သားပြင်များကို စောင့်ကြည့်နေကြရသဖြင့် ဤနေရာသို့ မလာနိုင်ကြပေ၊၊ သို့သော် လုံထန်၏ ထုံးစံအတိုင်း ထုတ်ကုန်သစ်တစ်ခု ရောင်းချတိုင်း အမြတ်၏ ၁ ရာခိုင်နှုန်းကို ပါဝင်သူ ဝန်ထမ်းအားလုံးအား အချိုးကျ ခွဲဝေပေးလေ့ ရှိသည်၊၊ ထို့ကြောင့်ပင် ဝန်ထမ်းများသည် အချိန်ပိုဆင်းရသော်လည်း မည်သည့်အခါမျှ မညည်းညူကြဘဲ၊ အပိုဆုကြေးများမှာလည်း တခြားကုမ္ပဏီကြီးများထက် သိသိသာသာ ပိုများလှသည်၊၊

​တစ်ချိန်တည်းမှာပင် လုံထန်ဌာနချုပ် အဆောက်အအုံအတွင်း၌ စီအီးအို ကျန်းဖုန်သည် မျက်နှာပြင်ကြီးကို စိုက်ကြည့်နေသည်၊၊ ရောင်းချရန် နာရီဝက်ပင် မလိုတော့ပေ၊၊

​"ကွန်ရက်လိုင်းတွေ ကောင်းရဲ့လား ပြန်စစ်"

"Flagship Store တွေ အကုန် အဆင်သင့်ဖြစ်ပြီလား"

"Jindong က လူတွေကော အသင့်ပဲလား"

​ဌာနချုပ်တစ်ခုလုံး ဆူညံနေသော်လည်း စနစ်တကျ ရှိနေသည်၊၊

​"စမယ်"

​နေ့လည် ၁၂ နာရီ တိတိတွင် အွန်လိုင်းနှင့် အော့ဖ်လိုင်း လမ်းကြောင်းအားလုံးကို ဖွင့်လှစ်လိုက်သည်၊၊ ထိုခဏမှာပင် လုံထန်မောလ်အတွင်းသို့ ဝင်ရောက်ကြည့်ရှုသူ သန်းနှင့်ချီ ရောက်ရှိလာသည်၊၊ ကံကောင်းထောက်မစွာဖြင့် ဆာဗာ (Server) များမှာ အလွန်တောင့်တင်းသဖြင့် လိုင်းကျသွားခြင်း မရှိခဲ့၊၊

​၅ မိနစ်အတွင်းမှာပင် 'Kaitian ONE' ရောင်းအားမှာ တစ်သန်း ကျော်သွားခဲ့ပြီး၊ Penguin ဘက်မှ အချက်အလက်များမှာလည်း ဆက်တိုက် တက်နေသည်၊၊ ညနေ ၆ နာရီ အလုပ်ဆင်းချိန်သို့ ရောက်သောအခါ စုစုပေါင်း ရောင်းအားမှာ ၅ သန်းအထိ ရှိသွားခဲ့သည်၊၊

​ဤကိန်းဂဏန်းများမှာ လုံထန်တာဝန်ရှိသူများကိုပင် အံ့အားသင့်စေသည်၊၊ နေ့လည်ပိုင်းမှာ အလုပ်လုပ်ချိန်ဖြစ်သဖြင့် အဝယ်နည်းသေးသော်လည်း ညနေပိုင်းတွင်မူ အဝယ်ပိုတက်လာဦးမည်မှာ သေချာသည်၊၊

​"ရှန်ကျန့်စက်မှုဇုန်ကို အကြောင်းကြားလိုက်၊ ထုတ်လုပ်မှုကို အရှိန်မြှင့်တင်ဖို့ အမိန့်ပေးလိုက်ပါ၊၊"

စီအီးအို ကျန်းဖန်က မဆိုင်းမတွ အမိန့်ပေးလိုက်သည်၊၊

​နီဗားနားအိတ်နှင့် ခိုင်ထျန်း တက်ဘလက်ကြားတွင် ကာလအတန်ကြာ ကွာဟသွားခဲ့သဖြင့် သုံးစွဲသူများမှာ အလွန်ပင် စိတ်အားထက်သန်နေကြခြင်း ဖြစ်သည်၊၊ ဟောင်ကောင်တွင်ပင် ပစ္စည်းပြတ်လပ်သည်အထိ ဖြစ်နေပါပြီ၊၊

​တကယ်တော့ 'Kaitian ONE' သည် ပြည်တွင်းဈေးကွက်ကိုသာ ရည်ရွယ်သည်မဟုတ်ဘဲ နီဗားနားအိတ်၏ လက်တွဲဖော်အဖြစ် ကမ္ဘာ့ဈေးကွက်သို့ ချီတက်ရန် ပြင်ဆင်နေခြင်း ဖြစ်သည်၊၊ အမေရိက၊ ဥရောပ၊ သြစတြေးလျနှင့် တောင်အာရှ ဌာနခွဲများတွင်လည်း ခိုင်ထျန်း တက်ဘလက်များကို အမြောက်အမြား ထုတ်လုပ်နေပါပြီ၊၊

​လက်ရှိ အခြေအနေအရ ရောင်းအား ၁၀ သန်း ပြည့်ရန်မှာ စိုးရိမ်စရာ မရှိတော့၊၊ အကြောင်းမှာ တရုတ်ပြည်တွင်း အရောင်းအပြင် စစ်တပ်နှင့် ပြည်သူ့လုံခြုံရေး ဝန်ကြီးဌာနတို့ကလည်း အဝယ်ယူရန် ကမ်းလှမ်းလာသောကြောင့် ဖြစ်သည်၊၊

​ပြည်သူ့လုံခြုံရေး ဝန်ကြီးဌာနသည် နီဗားနားအိတ်၏ လုံခြုံရေးစနစ်ကို အလွန်သဘောကျသဖြင့် ရှေ့တန်းရဲအရာရှိများအားလုံးကို ဤဖုန်းများ ကိုင်ဆောင်စေရန် စီစဉ်နေသလို၊ 'Kaitian ONE' တက်ဘလက်များကိုလည်း နည်းပညာကဏ္ဍတွင် အသုံးပြုရန် ရည်ရွယ်နေသည်၊၊ လုံထန်၏ လျှို့ဝှက်ချက် ထိန်းသိမ်းနိုင်စွမ်းမှာ ကမ္ဘာပေါ်တွင် အကောင်းဆုံးဖြစ်ကြောင်း သက်သေပြနိုင်ခဲ့ပြီ မဟုတ်ပါလော၊၊