အခန်း (၅၉၈-၆၀၀)

အပိုင်း ၅၉၈ - လင်းနယ်မြေ၌၇နှစ်၊ ၅ခုမြောက်သိုင်းပညာစနစ်(၃)

ဤသည်မှာ စိတ်ဝိဉာဉ်ဂိုဏ်းများ၏ လက်ချက်ဖြစ်မည်ကို သိပေမယ့် အဆင့်လွန် စိတ်ဝိဉာဉ်ဂိုဏ်းများ၏ နောက်ကွယ်မှ အစီအမံများနှင့် မည်သည့်သိသာသည့် သက်သေကိုမှ ရှာတွေ့ခြင်း မရှိပေ။

ဒီအချိန်၌ အဆင့်လွန် စိတ်ဝိဉာဉ်ဂိုဏ်းများသည်လည်း လျှို့ဝှက်ပါရမီရှင် အချို့ကို ထုတ်ဖော်ပြသပြီး ဖြစ်၏။

ဖန်းဟောင်သည် တစ်ကြိမ်တွင် အန္တရာယ်အများဆုံးအခြေအနေတစ်ခု အတွင်းသို့ပင် ကျရောက်သွားခဲ့သည်။ သူသည် သေခြင်း၏ အငွေ့အသက် ကပ်ဆွဲခြင်းကို ခံလိုက်ရ၏။ ထိုရက်စက်စဥ်းလဲသည့် စွမ်းအားသည် အလွန်ပြဿနာများလှသည်။

လျှို့ဝှက်အတတ်ကို အသုံးပြုကာ မရီတျန်တစ်ခုအတွင်း၌ ချိတ်ပိတ်ထားပြီး နောက်ပိုင်းမှ သန့်စင်ခြင်းအခင်းအကျင်းကို အသုံးပြုကာ ထိုအငွေ့အသက်ကို ဖယ်ထုတ်ရသည်။

ယွဲ့ချန်မင်မှာလည်း လင်းနယ်မြေအတွင်းသို့ ကြောက်စရာကောင်းသည့် တည်ရှိမှုအဖြစ် ပြန်လည်ဝင်ရောက်လာခဲ့၏။

ဖန်းဟောင်၏ အကာအကွယ်တစ်ယောက် အနေနှင့် သူသည် လုပ်ကြံသတ်ဖြတ်သူများကို ရင်ဆိုင်ရာတွင် ကြီးမားလှသည့် စွမ်းအားကို ပြသခဲ့သည်။

အထူးသဖြင့် ဖန်းဟောင်သည် ယာယီ သတိလက်လွတ် ဖြစ်သွားမှုကြောင့် သေခြင်း၏ အငွေ့အသက်ကပ်ငြိခြင်း ခံခဲ့ရသည့် အချိန်၌ ယွဲ့ချန်မင်သည် ဒေါသတကြီး တိုက်ခိုက်မှုပြုကာ သိုင်းတစ်ထောင်ခန်းမမှ ထိပ်တန်းကျင့်ကြံသူ တစ်ယောက်ကို သတ်ဖြတ်ခဲ့သည်။

ယခုအချိန်၌ ဖန်းဟောင်သည် မျိုးဆက်စုံမဟာမိတ်အဖွဲ့၌ သခင်ငယ်ဟူသည့် ရာထူးကို ဆုပ်ကိုင်ထားပြီးဖြစ်၏။ မဟာမိတ်ခေါင်းဆောင် ရာထူးကို အရယူရန်မှာ အချိန်တစ်ခုသာ လိုပါသည်။

မျိုးဆက်စုံ မဟာမိတ်အဖွဲ့ တစ်ခုလုံးတွင် သူ့ကို မလေးစားသည့်လူ မရှိပေ။ စွမ်းအားအကြီးဆုံး ပါရမီရှင်ဖြစ်သည့် ကျုရှင်ကျန့်ပြောခဲ့ဖူးသည့် လူများပင် တူညီစွာဖြစ်၏။

ဖန်းဟောင်၏ သိုင်းပညာ နည်းလမ်းများသည် ခန့်မှန်း၍ မရနိုင်အောင် နက်ရှိုင်းလှသည်။ ဤသည်က သူတို့၏ စိတ်ကူးစိတ်သန်းများ အားလုံးကို ကျော်လွန်နေ၏။ အညံ့ခံရန်သာ တတ်နိုင်တော့သည်။

"သင်၏တပည့် ရွှီယန်သည် မူလဒီဗိုင်းအဆင့်၏ အကြီးစားကျွမ်းကျင်မှုအဆင့်သို့ ချိုးဖျက်သွားသည်။ သင်သည် ဒီဗိုင်းဆန်းကြယ်စွမ်းအား အဆင့်၏ အကြီးစားကျွမ်းကျင်မှုသို့ ရောက်ရှိခဲ့သည်.."

တာအိုရွှေစာအုပ်က ပွင့်လာပြီး ရွှေရောင်အလင်းက ထွက်ပေါ်လာ၏။ ရွှီယန်သည် နောက်ထပ်အဆင့်ချိုးဖျက်မှုတစ်ခု ဖြစ်ပွားခဲ့သည်။

ပြီးခဲ့သည့် ၇နှစ်အတွင်းတွင် သူသည် သချွမ်ဒေသ၌ အငြိမ်နေခြင်း လုံးဝမရှိခဲ့ပေ။ ရှေးဟောင်းသင်္ချိုင်းများကို ချိုးဖျက်ဝင်ရောက်ခြင်း၊ အကြွင်းအကျန် ဒီဗိုင်းဝိဉာဉ်အချို့ကို သတ်ဖြတ်ခြင်းတို့ မကြာခဏ ပြုလုပ်လေ့ရှိသည်။ ရရှိမှုများမှာလည်း များပြားလှ၏။

သူသည် အချို့ ရင်ဆိုင်ရခက်ခဲပြီး စွမ်းအားကြီးမားသူများကိုလည်း ကြုံတွေ့ခဲ့သည်။ သို့ပေမယ့် အားလုံးတို့ကို အောင်မြင်စွာ သတ်ဖြတ်နိုင်ခဲ့၏။ ယခုအချိန်၌ မူလဒီဗိုင်းအဆင့်၏ အကြီးစားကျွမ်းကျင်မှုသို့ ချိုးဖျက်နိုင်ခဲ့လေသည်။

"ဒါက ကျင့်ကြံမှုအဆင့် မြင့်မားလာတဲ့ ပျော်ရွှင်မှုပဲ.."

လီရွှမ်မှာ စိတ်လှုပ်ရှားစွာ ခံစားနေရ၏။ ရွှီယန်သည် ဒီဗိုင်းဆန်းကြယ်စွမ်းအား အဆင့်နှင့် ပိုမိုနီးကပ်လာခဲ့ပြီးဖြစ်သည်။

ယခုအချိန်၌ သူ၏ သိုင်းပညာစနစ် လေးခုလုံးသည် ဒီဗိုင်းဆန်းကြယ်စွမ်းအား အဆင့်သို့ ရောက်ရှိပြီး ဖြစ်၏။ ဖန်းဟောင်သည် အခင်းအကျင်းများ၊ လျှို့ဝှက်အတက်များ၊ ချိတ်တံဆိပ်များကို သုတေသနပြုလုပ်ကာ တိုက်ခိုက်မှုများစွာ တို့ကိုလည်း ဆန့်ကျင်ခဲ့၏။

ထို့ကြောင့် ချီမန်သိုင်းပညာ၏ အနာဂတ်လမ်းစဉ်အတွက် ဉာဏ်အလင်းပွင့်မှုများစွာ ရရှိခဲ့သည်။

လီရွှမ်သည် မူလချီသင်္ကေတ ငါးခုတို့ကို စုစည်းပြီးခဲ့၏။

ထိုအထဲမှ တစ်ခုမှာ ဒီဗိုင်းဆန်းကြယ်စွမ်းအားအဆင့် သင်္ကေတဖြစ်သည်။

ချီမန်သိုင်းပညာ၏ ဒီဗိုင်းဆန်းကြယ်စွမ်းအားအဆင့်တွင် မည်သည့် ဒီဗိုင်းဆန်းကြယ်စွမ်းအားမှ ပေါက်ဖွားလာခြင်း မရှိပါ။ သို့ပေမယ့် ချီမန်သင်္ကေတတို့သည် ဒီဗိုင်းဆန်းကြယ်စွမ်းအား၏ အရင်းအမြစ် ဖြစ်လာခဲ့၏။ ၎င်းတို့ကို အသုံးပြုကာ ဒီဗိုင်းဆန်းကြယ်စွမ်းအား၏ စွမ်းအားနှင့် အံ့ဖွယ်တို့ကို ပိုင်ဆိုင်နိုင်သည့် ကောင်းကင်နှင့်ကမ္ဘာမြေကြီး၏ အခင်းအကျင်းကို တည်ဆောက်နိုင်သည်။

ဤသည်မှာ ဒီဗိုင်းဆန်းကြယ်စွမ်းအားများနှင့် ခြားနားခြင်း မရှိပေ။ တပည့်လေးယောက်တို့ အတွင်းတွင် ရွှီယန်သည် အသန်မာဆုံး ဖြစ်နေဆဲရှိ၏။ ယခုအချိန်၌ သူသည် မူလဒီဗိုင်းအဆင့်၏ အကြီးစားကျွမ်းကျင်မှုအဆင့်သို့ ချိုးဖျက်ခဲ့ရာ ဝူထန်းနန်ပင်လျှင် သူ၏ပြိုင်ဖက် မဟုတ်တော့ပေ။ ဝူထန်းနန်၏ စွမ်းအားတို့ ကြီးမားစွာ တိုးတက်ခဲ့လျှင်တောင် ဖြစ်၏။

ယခုအချိန်၌ ရွှီယန်ကို လင်းနယ်မြေ၏ အထွဋ်အထိပ်၌ ရပ်တည်ပြီးဖြစ်သည်ဟု ဆိုနိုင်ပါသည်။

မုန့်ချုံနှင့် စုလင်းရှုံတို့မှာ ဒီဗိုင်းဆန်းကြယ်စွမ်းအားအဆင့်၏ အသေးစားကျွမ်းကျင်မှု အဆင့်၌သာ ရှိနေကြသေးသည်။

ဖန်းဟောင်မှာလည်း ချီမန်သိုင်းပညာ၏ စွမ်းအားနှင့် အခင်းအကျင်းတို့ကို တည်ဆောက်ကာ အခင်းအကျင်းကြီးများနှင့် ကောင်းကင်နှင့်ကမ္ဘာမြေကြီး၏ လင်းကျီကို သန့်စင်ထားသည့် အသန်မာဆုံး ပုဂ္ဂိုလ်များအား ဖိနှိပ့်ကာ သတ်ဖြတ်ရန် ခက်ခဲခြင်း မရှိပါ။

'၅ခုမြောက် သိုင်းပညာစနစ်ကို စဉ်းစားရမယ့်အချိန်ပဲ..'

လီရွှမ်သည် ၅ခုမြောက် သိုင်းပညာအတွက် စိတ်ကူးအချို့ ရှိနေပြီး ဖြစ်၏။

'ငါ ရုပ်ပိုင်းဆိုင်ရာ ခန္ဓာကိုယ်ကျင့်ကြံမှု သိုင်းပညာစနစ်ရဲ့ ဒီဗိုင်းဆန်းကြယ်စွမ်းအားအဆင့် အထက်က ကျင့်စဉ်ကို ဖန်တီးပြီးနေပြီ။ ဟင်းလင်းပြင် ချိုးဖျက်မှုအတွက်လည်း တော်တော်လေး ဖန်တီးပြီးပြီ။ ဒန်ဆေးသိုင်းပညာစနစ်နဲ့ ချီမန်သိုင်းပညာစနစ်ကလည်း လားရာတွေ ရှိနေပြီးပြီ။ ဒါ့ကြောင့်မလို့ အဲ့ဒါတွေအပေါ်မှာ ထပ်ပြီးတော့အချိန်ကုန်ခံစရာ မလိုတော့ဘူး..'

'ဒီအချိန်က ၅ခုမြောက် သိုင်းပညာစနစ်ကို စဉ်းစားရမယ့်အချိန်ပဲ။ ၅ယောက်မြောက် တပည့်ကတော့ ဒီကျယ်ပြောတဲ့လင်းနယ်မြေမှာ တစ်ယောက်လောက် ရှာတွေ့နိုင်မှာပါ..'

လီရွှမ်သည် ကိုယ့်ကိုယ်ကိုယ် ရေရွတ်၏။ ပြီးခဲ့သည့် ရက်အနည်းငယ် အတွင်းတွင် ဝူထန်းနန်သည် ချန်ချင်းစံအိမ်မှ ထွက်ခွာသွားခဲ့၏။

သူ၏ အကြံပေးမှုနောက်သို့ လိုက်ကာ အတားအဆီးတို့ကို ချိုးဖျက်ရန်အတွက် လုံလောက်သည့် ဗဟုသုတတို့ကို စုစည်းရန် စိတ်ဝိဉာဉ်နယ်မြေတလျှောက် ခရီးသွားလှည့်လည်ကာ အတွေ့အကြုံတို့ကို ရှာဖွေသည်။

သူသည် ဝူထန်းနန်ကို အကြောင်းကြားကာ လင်းနယ်မြေရှိ ထူးချွန်သည့် ပါရမီရှင်များကို အကဲခတ်ခိုင်းနိုင်သည်။ ၅ယောက်မြောက်တပည့် နေရာအတွက် ပြင်ဆင်မည်ဖြစ်၏။

'၅ခုမြောက် သိုင်းပညာစနစ်ကို... ငါ ဘယ်လိုမျိုး တီထွင်သင့်လဲ..'

လီရွှမ်သည် ခဏတာစဉ်းစားပြီးနောက် သဲလွန်စအများကြီး ရလာခြင်း မရှိခဲ့ပေ။

အပိုင်း ၅၉၉ - ဒီဗိုင်းအသွင်အဆင့်၏ ကျင့်စဉ်ကို နားလည်သဘောပေါက်ခြင်း၊ လက်ဝါးစောင်း တစ်ချက်ဖြင့် အကြီးအကဲကိုသတ်ဖြတ်ခြင်း

လီရွှမ်သည် ၅ခုမြောက် သိုင်းပညာစနစ်နှင့် ပတ်သက်ပြီး သဲလွန်စမရသေးရာ ဒီအချိန်အတွင်းတွင် ထိုကိစ္စကို ထားထားလိုက်သည်။ ထိုက်ချန်းစာအုပ်၏ ၁၁ရွက်မြောက် စာမျက်နှာကို ကြည့်ကာ သက်ပြင်းချသည်။

အစက ထိုက်ချန်းစာအုပ်၏ ၁၀ခုမြောက် စာမျက်နှာအပြီးတွင် ပိုမိုအဆင့်မြင့်မားသည့် ကောင်းကင်နှင့်ကမ္ဘာမြေကြီး၏ နိယာမတို့ ရှိနေမည်ဟု ထင်ထားခဲ့၏။

သို့ပေမယ့် ရလဒ်က သူ့ကို အံ့သြသွားစေသည်။ သူသည် ၁၀ခုမြောက်စာမျက်နှာရှိ သင်္ကေတများကို မှတ်သားပြီးနောက် ၁၁ခုမြောက်စာမျက်နှာရှိ သင်္ကေတများကို ၅နှစ်ကြာအောင် လေ့လာခဲ့ပြီး ယခုအချိန်အထိ ပြည့်စုံစွာ မှတ်မိခြင်း မရှိသေးပေ။

သင်္ကေတများက နက်နဲကာ မှတ်မိရန်ခက်ခဲသည်။ အချိန်တိုင်းတွင် ပြောင်းလဲနေပုံပေါ်ပြီး ရပ်တန့်နေဟန်လည်းရှိ၏။

'ထိုက်ချန်းစာအုပ်ကို လုံးဝ ဉာဏ်အလင်းရလာဖို့အတွက် အချိန်ဘယ်လောက် ကြာဦးမလဲမသိဘူး... ဒီဟာကို မှတ်တမ်းတင်တဲ့ လူကတော့ သေချာပေါက် အရမ်းစွမ်းအားကြီးမှာ..'

သူသည် ထိုက်ချန်းစာအုပ်၏ ပိုင်ရှင်ကို တွေးမိလိုက်သည်နှင့် နက်ရှိုင်းစွာ အံ့ဩလာမိသည်။ တစ်ဖက်လူ၏ ခွန်အားသည် သူ့ထက် များစွာသာလွန်နေမှာ ဖြစ်၏။

'ဒါပေမယ့် တစ်နေ့မှာ ငါမင်းကို ကျော်ဖြတ်နိုင်လိမ့်မယ်..'

လီရွှမ်သည် ယုံကြည်ချက်အပြည့်ဖြင့် ရှိနေ၏။ ထိုက်ချန်းစာအုပ်ကို ကိုးကားချက်ယူထားသည့် သူ၏ သိုင်းပညာလမ်းစဉ်သည် ထိုက်ချန်းစာအုပ်၏ ပိုင်ရှင်အား ဖြတ်ကျော်နိုင်မည့် ယုံကြည်ချက်ဖြစ်၏။

သူသည် ရွှီယန်အပေါ်၌လည်း ယုံကြည်ချက်အပြည့် ရှိသည်။

လီရွှမ်သည် တာအိုရွှေစာအုပ်ကိုဖွင့်ကာ ၁၀ခုမြောက်စာမျက်နှာအတွက် ပေးလာခဲ့သည့် အချက်အလက်များကိုကြည့်၏။

ထိုက်ချန်းတာအို၏ သဘောတရားများ(မပြည့်စုံ) - ကောင်းကင်နှင့်ကမ္ဘာမြေကြီး၏ သဘောတရားကို တည်ဆောက်ခြင်း၊ တာအို၏ ပြောင်းလဲမှုများကို နားလည်ခြင်း

"တာအိုသဘောတရား..."

ထိုက်ချန်းစာအုပ်၏ စာမျက်နှာ၁၀မှ စတင်ပြီး ၎င်းသည် ထိုက်ချန်း၏ တာအိုသဘောတရားများကို ဖော်ပြ၏။

ဤသည်မှာ ကောင်းကင်နှင့်ကမ္ဘာမြေကြီး၏ အခြေခံဖြစ်သည်။ ထို့ကြောင့် လီရွှမ်၏ လက်ရှိခွန်အားနှင့်ပင်လျှင် စာမျက်နှာ၁၁ရှိ သင်္ကေတများကို မှတ်သားရန် အလွန်ခက်ခဲနေခြင်း ဖြစ်၏။

'ကောင်းကင်နဲ့ကမ္ဘာမြေကြီးရဲ့ နိယာမတွေအထက်မှာ ကောင်းကင်နဲ့ကမ္ဘာမြေကြီးရဲ့ တာအိုသဘောတရားတွေရှိတယ်။ အဲ့ဒါတွေက ကောင်းကင်နဲ့ ကမ္ဘာမြေကြီးရဲ့ အခြေခံ ဖြစ်တယ်။ ဟင်းလင်းပြင်ချိုးဖျက်ခြင်း အဆင့်က နိယာမတွေရဲ့ ကန့်သတ်မှုကို မခံရတော့ဘူး။ အဲ့ဒီ့နိယာမတွေရဲ့ အထက်ကို ကျော်လွန်ပြီး ကိုယ်ပိုင် သိုင်းပညာစွမ်းအားကို တည်ဆောက်တယ်..'

'ဒ့ါကြောင့်မလို့ ဟင်းလင်းပြင်ချိုးဖျက်ခြင်း အဆင့်ရဲ့ အထက်မှာ တာအိုသဘောတရားတွေ အတွက် ပြင်ဆင်ရမယ်။ အဲ့ဒါမှပဲ ကောင်းကင်နဲ့ကမ္ဘာမြေကြီးရဲ့ အခြေခံကို ထိတွေ့နိုင်မှာ..'

လီရွှမ်က ကိုယ့်ကိုယ်ကိုယ် ရေရွတ်သည်။ သူသည် ယခုအချိန်၌ ဟင်းလင်းပြင်ချိုးဖျက်ခြင်း အဆင့်၏ အထက်ရှိ ကျင့်စဉ်အတွက် အကြမ်းဖျင်း စိတ်ကူးတစ်ခု ရလာခဲ့၏။

ချန်ချင်းစံအိမ်၏ မိုးပျံသင်္ဘောသည် ရွှေကြာကန်၏အထက်တွင် မျှောလွင့်နေ၏။ မကြာခင်တွင် သကျယ်ဒေသ၏ ရွှေကြာကန်၌ ချန်ချင်းစံအိမ် ရောက်ရှိနေသည့်သတင်းသည် ပျံ့နှံလာခဲ့၏။

ပြိုင်ပွဲအတွင်းတွင် ဒဏ်ရာရရှိထားသည့် ပါရမီရှင်များ၊ ဒဏ်ရာဟောင်းများနှင့် သိုင်းသမားများ၊ အခြေခံထိခိုက်ထားသည့် သိုင်းသမားများနှင့် ဒီဗိုင်းဝိဉာဉ်ထိခိုက်ထားသည့် သိုင်းသမားများပင်လျှင် စတင် လာရောက်ကုသကြ၏။

ထိုလူနာများသည် သူတို့၏ ကုသမှုစရိတ်အတွက် ပြင်ဆင်ပြီးတာ ကြာပြီဖြစ်သည်။ ချန်ချင်းစံအိမ်၏ ပေါ်ပေါက်လာမှုကိုသာ စောင့်စားနေခြင်း ဖြစ်၏။

ထို့ကြောင့် ချက်ချင်းပင် သွားရောက်ကုသနိုင်ကြသည်။

ယခုမျှ အချိန်အတော်ကြာအောင် လင်းနယ်မြေတွင် လှည့်လည်ပြီးနောက် ချန်ချင်းစံအိမ်နှင့် ပတ်သက်ပြီး မည်သူမှ ပြဿနာလုပ်ရဲခြင်း မရှိသလို ချန်ချင်းစံအိမ်၏ စည်းမျဉ်းများကိုလည်း မည်သူမှ ချိုးဖျက်ရဲခြင်း မရှိတော့ပေ။

ကိုယ့်ကိုယ်ကိုယ် စွမ်းအားကြီးမားပြီး စည်းမျဉ်းများကို ဂရုစိုက်စရာ မလိုဟု မှတ်ယူထားသူများပင်လျှင် အပါအဝင် ဖြစ်၏။

သိုင်းသမားများစွာသို့ ချန်ချင်းစံအိမ်ဆီသို့ လာရောက်ကုသမှုနှင့်အတူ စံအိမ်တစ်ခုလုံးသည် စည်ကားလာခဲ့၏။

သို့ပေမယ့် ထိုကိစ္စအားလုံးသည် လီရွှမ်နှင့် သက်ဆိုင်ခြင်း မရှိပေ။ သူသည် စံအိမ်အတွင်းတွင် ထိုင်နေဆဲဖြစ်ပြီး ထိုက်ချန်း၏ တာအိုသဘောတရားများကို လေ့လာ၏။

ဒီတစ်ကြိမ်တွင် ချန်ချင်းစံအိမ်သည် ရွှေကြာကန်၌ လဝက်ကြာအောင် တည်ရှိနေပြီးမှ နောက်ထပ်နေရာကို ရွှေ့ပြောင်းခဲ့၏။

ယခုအချိန်၌ စုလင်းရှုံသည် ကိုယ်တိုင် ထွက်ခွာကုသပေးတာ အလွန်ရှားပါးလာခဲ့သည်။ ထူးဆန်းသည့် ရောဂါများ သို့မဟုတ် အလွန်ပြင်းထန်သည့် ဒဏ်ရာများ သို့မဟုတ် ခွန်အားကြီးမားသည့် လူနာများကိုသာလျှင် ကိုယ်တိုင် ကုသပေးမှုပြု၏။

ပုံမှန်အားဖြင့် ဒဏ်ရာများကို လာရောက်ကုသသည့် လူများအား ရှီအာ၊ ကျိုးယင်၊ မုန့်ရှူရှူ သို့မဟုတ် ယွဲ့အာတို့က ကြည့်ရှု့ပေးသည်။

ရောဂါလက္ခဏာ စမ်းသပ်ခြင်း စိတ်ဝိဉာဉ်ကိရိယာ၏ အဆင့်မြင့်လာမှုနှင့်အတူ ပြင်းထန်ကာ လျှို့ဝှက်သည့် ဒဏ်ရာဟောင်းများကိုပင် ရှာဖွေနိုင်လာ၏။ စမ်းသပ်မှုရလဒ်အတိုင်း ကုသမှု နည်းလမ်းများကိုလည်း ရရှိနိုင်သည်။

ယွဲ့အာသည် အထွတ်အထိပ် စိတ်ဝိဉာဉ်သန့်စင်ခြင်းအဆင့် ကောင်းကင်လူသားတစ်ယောက် ဖြစ်လာပြီးဖြစ်ကာ သူမ၏ ဒီဗိုင်းဝိဉာဉ်သည် အခြား အထွက်အထိပ်စိတ်ဝိဉာဉ်သန့်စင်ခြင်းအဆင့် ကောင်းကင်လူသားများထက် ပိုမိုသန်မာ၏။

စုလင်းရှုံ၏ ဒီဗိုင်းဝိဉာဉ်အပေါ် နားလည်မှုတို့အား ကျေးဇူးတင်ရပေမည်။ ဒီဗိုင်းဝိဉာဉ်ကို မြှင့်တင်ရန်အတွက် ပိုမိုကောင်းမွန်သည့် နည်းလမ်းများကို ရှာတွေ့ခဲ့၏။

ယွဲ့အာသည် စိတ်ဝိဉာဉ်ခန္ဓာပါရမီရှင် ဖြစ်ရာ ကောင်းကင်နှင့် ကမ္ဘာမြေကြီး၏ လင်းကျီကို ဒီဗိုင်းဝိဉာဉ်အတွင်းသို့ သန့်စင်ပြီး လင်းနယ်မြေ၏ အသန်မာအဆုံးအဆင့်သို့ တက်လှမ်းရန် ပြင်ဆင်နေပြီ ဖြစ်သည်။

အဘိုးအိုတစ်ယောက်သည် တောင်ဝှေးကို ထောက်ကာ ချန်ချင်းစံအိမ်ဆီသို့ ရောက်ရှိလာခဲ့၏။ လီရွှမ်က ကြည့်လိုက်ပြီးနောက် သူ၏မျက်ခုံးများ မြင့်တက်သွားသည်။

သို့ပေမယ့် အာရုံအများကြီး မထားပါ။ အဘိုးအို၏ ခန္ဓာကိုယ်အတွင်းတွင် သေခြင်းအငွေ့အသက်တစ်ခု ပုန်းအောင်းနေ၏။ ထိုအငွေ့အသက်သည် အလွန်လျှို့ဝှက်ပြီး အထူးလျှို့ဝှက်အတတ်ကို အသုံးပြုကာ သက်တမ်းကုန်ခမ်းမှု၏ သေခြင်းစွမ်းအင်နှင့် ပေါင်းစပ်နေသည်။

တစ်ကြိမ် အသုံးပြုပြီးသည်နှင့် သေဆုံးမှာ ဖြစ်သည်။ သူ၏ ဒီဗိုင်းဝိဉာဉ်၌ပင်လျှင် သေခြင်းအငွေ့အသက်တို့ ရစ်တွယ်နေ၏။

ဒီအဘိုးကြီးမှာ အဆင့်လွန် စိတ်ဝိဉာဉ်ဂိုဏ်း တစ်ခုခုမှ အသေခံသိုင်းသမားတစ်ယောက် ဖြစ်သည်မှာ သေချာပါသည်။

ချန်ချင်းစံအိမ်သို့ လာရောက်သည့် ရည်ရွယ်ချက်မှာတော့ လီရွှမ်အနေနှင့် ဂရုစိုက်ခြင်း မရှိပေ။ တစ်ဖက်လူသည် မည်သည့်ထကြွမှုကိုမှ လုပ်ဆောင်နိုင်မည် မဟုတ်ပါ။

"ဟန်... ခင်ဗျားရဲ့ ရောဂါလက္ခဏာတွေက ထူးဆန်းတယ်.."

ရှီအာက အဘိုးအိုကို အံ့သြစွာကြည့်သည်။

"ကုသဖို့အတွက် ဖြစ်နိုင်လားမသိဘူး.."

အဘိုးအိုကား အက်ကွဲနေသည့်အသံဖြင့် မေး၏။

"ကျွန်တော်တော့ မတတတ်နိုင်ဘူး... ခင်ဗျားရဲ့အခြေအနေက ထူးဆန်းတယ်။ ရောဂါစစ်ဆေးတဲ့ စိတ်ဝိဉာဉ်ကိရိယာတောင်မှ အကဲဖြတ် မပေးနိုင်ဘူး။ ကျေးဇူးပြုပြီး ခဏစောင့်ပါ.."

ထိုကဲ့သို့သော အထူးလူနာများအတွက် စုလင်းရှုံကိုယ်တိုင် ကုသရန်လိုအပ်ပါသည်။

ကျိုးယင်သည် စုလင်းရှုံကို သွားရောက်အကြောင်းကြား၏။

"ဒန်ဆေးနတ်သမီးစုက ကျွန်တော့်ရဲ့ဒဏ်ရာကို ကုသနိုင်လား မသိဘူး.."

အဘိုးအိုက စုလင်းရှုံကို စိတ်ပူစွာနှင့် မျှော်လင့်စွာကြည့်သည်။

"ရှင့်ရဲ့အခြေအနေက ပုံမှန်မဟုတ်ဘူး... သက်တမ်းက ကုန်ခမ်းလုနီးနေပြီ။ အဲ့ဒါကို ဆွဲဆန့်ဖို့အတွက် ဒန်ဆေးလုံးကို လိုအပ်တယ်။ အဲ့ဒီ့အပြင် ခန္ဓာကိုယ်ထဲက သေခြင်းအငွေ့အသက်တွေကိုလည်း ဖယ်ရှားဖို့ လိုအပ်တယ်.."

"ကုသဖို့အတွက် စျေးနည်းမှာမဟုတ်ဘူး... လိုအပ်တဲ့စာရင်းကို ကျွန်မပေးလိုက်မယ်။ အဲ့ထဲက ပစ္စည်းတွေကိုသာ ရှာနိုင်မယ်ဆိုရင် ကုသနိုင်လိမ့်မယ်။ ပြီးတော့ ရှင့်ရဲ့သက်တမ်းကို နှစ်တစ်ရာလောက်ဆွဲဆန့်ဖို့ ပြဿနာရှိမှာမဟုတ်တော့ဘူး.."

စုလင်းရှုံက တည်ငြိမ်စွာ ပြော၏။

"တကယ်လား.."

အဘိုးအိုမှာ စိတ်လှုပ်ရှားလာခဲ့၏။

"ငါ့ရဲ့သက်တမ်းကို နှစ်တစ်ရာ ထပ်ရှည်စေနိုင်တာလား.."

စုလင်းရှုံက သူ့ကို လိုအပ်သည့် ပစ္စည်းစာရင်းအားပေး၏။

"ဒါပေါ့... ဒါက သက်တမ်းဆွဲဆန့်ခြင်း ဒန်ဆေးလုံးကို သန့်စင်ဖို့ပဲလိုအပ်တာ။ ဘာမှမဟုတ်ဘူး.."

"အံ့သြဖို့ကောင်းလိုက်တာ... ငါဆက်ပြီးတော့ အသက်ရှင်နိုင်ပြီ.."

အဘိုးအိုသည် အလွန် စိတ်လှုပ်ရှားနေ၏။ ထိုစိတ်လှုပ်ရှားမှုကြောင့် ဖိနှိပ့်ထားသည့် သေခြင်းအငွေ့အသက်တို့အား ထိန်းချုပ်နိုင်မှု ပျောက်ကင်းသွားသည့်ဟန် ရသည်။

သူ၏လက်များသည် မီးခိုးရောင်ပြောင်းလာခဲ့၏။ ဆေးစာရွက်ဆီသို့ လက်လှမ်းရင်းက စိတ်လှုပ်ရှားစွာဖြင့် မတ်တတ်ရပ်သည်။

"ဘုန်း.."

ဒီအချိန်၌ အဘိုးအို၏ မျက်လုံးများသည် ရုတ်တရက် ရေခဲတမျှ အေးစက်လာပြီး ကြောက်စရာကောင်းသည့် သေခြင်းအငွေ့အသက်က လွှမ်းခြုံလာခဲ့သည်။

၎င်းသည် ညှို့မှိုင်းကာ ကြောက်ဖို့ကောင်း၏။ တစ္ဆေလက်သည်းတစ်ခု သဖွယ် စုစည်းလာပြီး စုလင်းရှုံကို တိုက်ခိုက်သည်။

အပိုင်း ၆၀၀ - ဒီဗိုင်းအသွင်အဆင့်၏ ကျင့်စဉ်ကို နားလည်သဘောပေါက်ခြင်း၊ လက်ဝါးစောင်းတစ်ချက်ဖြင့် အကြီးအကဲကို သတ်ဖြတ်ခြင်း(၂)

အကွာဝေးမှာ ယခုမျှ နီးကပ်နေရာ အဘိုးကြီးသည် သူ၏ ရုတ်တရက် တိုက်ခိုက်မှုဖြင့် တစ်ဖက်လူကို ကြီးစွာဒဏ်ရာရသွားစေမည်ဟု ယုံကြည်ချက်ရှိ၏။

သေခြင်းအငွေ့အသက်တို့သာ ခန္ဓာကိုယ်အတွင်းသို့ ဝင်ရောက်သွားပါက ပမာဏများပြားနေလျှင် ဒန်ဆေးနတ်သမီးဖြစ်လျှင်တောင် သံသယဝင်စရာ မကောင်းလောက်အောင် သေဆုံးရမှာဖြစ်၏။ အချိန်ခဏကြာအောင်သာ အသက်ကို ဆွဲဆန့်နိုင်လောက်သည်။

သို့ပေမယ့် သူ့ကို အံ့သြစေသည်မှာ စုလင်းရှုံ၏ ခန္ဓာကိုယ်မှ အပြာရောင်သဲ့သဲ့ အလင်းတစ်ခု ထွက်ပေါ်လာ၏။

သူမသည် နေရာတွင်ထိုင်ကာ သူ့ကို တိတ်ဆိတ်စွာသာ ကြည့်နေပါသည်။ သေခြင်းစွမ်းအင်မှ ပြောင်းလဲလာသည့် တိုက်ခိုက်မှုသည် အပြာရောင်အလင်းနှင့် ထိတွေ့ပြီးနောက် စတင်ပြိုကွဲလာပြီး ၎င်း၏အန္တရာယ်ကို ကြုံတွေ့လိုက်ရဟန် ရသည်။

"မဖြစ်နိုင်ဘူး.."

အဘိုးအို၏မျက်နှာက ထိတ်လန့်သွား၏။

"သိုင်းတစ်ထောင်ခန်းမလား... ဒါမှမဟုတ် လိင်ယွင်တောင်စံအိမ်လား.."

စုလင်းရှုံမှာ အရာအားလုံးတို့ကို မျှော်လင့်ထားပြီး ဖြစ်လင့်ကစား ခေါင်းကိုရမ်း၏။

"လိင်ယွင်တောင်စံအိမ်ကတော့ ဖြစ်ဖို့နည်းတယ်... ကြည့်ရတာ သိုင်းတစ်ထောင်ခန်းမ ဖြစ်လိမ့်မယ်... သိုင်းတစ်ထောင်ခန်းမရဲ့ အကြီးအကဲတစ်ယောက်ကို ဂျူနီယာမောင်လေးက အခင်းအကျင်းနဲ့ ဒဏ်ရာအပြင်းအထန် ရစေခဲ့ဖူးတယ်။ ပြီးတော့ ဒီမှာ အသဲအသန် လာရောက်ကုသခဲ့တယ်။ ဒါပေမယ့် ငါငြင်းခဲ့လိုက်တယ်.."

"အဲ့ဒါကြောင့်မလို့... ဒါက လက်စားပြန်ချေတာလား... သိုင်းတစ်ထောင်ခန်းမကို မကုပေးဘဲ အခြားသိုင်းသမားတွေပဲကုပေးလို့ ရန်ငြိုးထားတာပေါ့.."

အဘိုးအို၏မျက်နှာက ပြောင်းလဲသွားသည်။ ဖန်းဟောင်သည် ဘယ်လိုလုပ်ပြီး သူမ၏ ဂျူနီယာမောင် ဖြစ်ရသနည်း။ သူတို့သည် တူညီသည့် အဖွဲ့အစည်းတစ်ခုမှ လာခဲ့သည်လား။

ထိုအချိန်၌ စုလင်းရှုံက သူ၏ဦးခေါင်းဆီသို့ လက်ဆန့်လာကြောင်းကို တွေ့လိုက်ရသည်။

"အုန်း.."

သူ၏အသိစိတ်အား ဖျက်ဆီးခြင်း ခံလိုက်ရသကဲ့သို့ ခံစားရပြီး ဒီဗိုင်းဝိဉာဉ်မှာ အစိပ်စိပ်အမွှာမွှာ ဖြစ်သွားခဲ့သည်။

သေခြင်းစွမ်းအင်တို့သည် စုလင်းရှုံ၏ လက်ဝါးအတွင်းသို့ စတင်ကူးလူးသွားခဲ့၏။ အခိုက်အတန့်တစ်ခုတွင် သူ၏ အသိစိတ်မှာ လုံးဝပြိုလဲကာ ပျောက်ကွယ်သွားခဲ့သည်။ စုလင်းရှုံ၏ လက်ထဲတွင်တော့ သေခြင်းစွမ်းအင်အလုံးတစ်ခု ပေါ်လာခဲ့၏။

"အံ့သြဖို့ကောင်းတယ်... ဒီသေခြင်းစွမ်းအင်ကို ဘယ်လိုစုစည်းတာလဲလို့ ငါလေ့လာကြည့်ရမယ်.."

စုလင်းရှုံမှာ ဝမ်းသာသွား၏။ သူမသည် ရောဂါစစ်ဆေးစမ်းသပ်သည့် အလုပ်ကို ရှီအာတို့နှင့်ထားခဲ့ကာ တက်ကြွစွာဖြင့် ထွက်ခွာသွားသည်။ သေခြင်းစွမ်းအင် အလုံးကို စူးစမ်း၏။

ထိုလုပ်ကြံသတ်ဖြတ်မှုသည် မည်သည့်ရိုက်ခတ်မှုမှ မရှိခဲ့ပါ။ ရှီအာတို့ကလည်း ဂရုစိုက်ပုံ မပေါ်ပေ။ ဤသည်မှာ ကိစ္စသေးလေသာ ဖြစ်၏။

သချွမ်၏ မြင့်မားသည့် တောင်တစ်ခု၏ထိပ်တွင် ရွှီယန်သည် တစ်ယောက်ယောက်အား စောင့်စားနေ၏။

'ဒီသချွမ်က အဆုံးမသတ်နိုင်တဲ့ သင်္ချိုင်းတွေနဲ့ ပြည့်နက်နေတဲ့ပုံပဲ... ဒီ ရှေးဟောင်းသင်္ချိုင်းတွေမှာ ရှိတဲ့ အကြွင်းအကျန် ဒီဗိုင်းဝိဉာဉ်တွေကလည်း ပုံမှန်မဟုတ်ဘူး..'

ရွှီယန်သည် ဒီနှစ်များအတွင်းတွင် သချွမ်အတွင်းရှိ အန္တရာယ်များသည့် နေရာများစွာတို့ကို ရှာဖွေတူးဖော်ခဲ့သည်။

သူသည် ရှေးဟောင်းသင်္ချိုင်း အချို့ကိုလည်း ဝင်ရောက်စူးစမ်းခဲ့၏။ သင်္ချိုင်းအချို့တွင် အကြွင်းအကျန်ဝိဉာဉ်များ ရှိနေ၏။ သို့ပေမယ့် ထိုဝိဉာဉ်များသည် မူမမှန်လှပေ။ လင်းနယ်မြေမှ သိုင်းသမားများ၏ ဒီဗိုင်းဝိဉာဉ်အကြွင်းအကျန် မဟုတ်သည့်ပုံရ၏။

၎င်းတို့သည် စဥ်းလဲရက်စက်သော ညှို့မှိုင်းသည့် စွမ်းအင်များဖြင့် ပြည့်နက်နေပြီး အလွန်သွေးဆာ၏။ တစ်ခါက သချွမ်ဒေသရှိ မိသားစုကြီးတစ်ခုသည် တောင်တစ်ခုရှိ သင်္ချိုင်းတစ်ခုကို တူးဖော်ပြီး အတွင်းထဲ၌ စွမ်းအားကြီးမားသည့် အလောင်းတစ်ခုကို ရှာတွေ့ခဲ့၏။ ဤသည်က မိသားစုတစ်ခုလုံးကို သုတ်သင်ခံရလုနီးပါး ဖြစ်စေခဲ့သည်။

ရွှီယန်လည်း ထိုကဲ့သို့သော အဖြစ်အပျက်မျိုးကို ကြုံတွေ့ခဲ့၏။ သူသည် မြန်ဆန်စွာတုံ့ပြန်ပြီး အလောင်းသားရဲကို သတ်ဖြတ်ခဲ့လေသည်။

လွန်ခဲ့သည့် လဝက်က ထူးဆန်းသည့် သိုင်းသမားတစ်ယောက်ကိုလည်း ကြုံတွေ့ခဲ့၏။ တစ်ဖက်လူသည် မူမမှန်သည့် စွမ်းအားတစ်ခုကို ပိုင်ဆိုင်ထားသည်။ အဆုံးသတ်တွင် ရွှီယန်က သူ့ကို သတ်ဖြတ်လိုက်၏။

ပြီးနောက် ထိုသိုင်းသမားကို အမည်မသိ အကြွင်းအကျန်ဝိဉာဉ်တစ်ခုက ဝင်စီးထားခြင်း ဖြစ်ကြောင်းအား ရှာတွေ့လိုက်သည်။

'သချွမ်မှာ သင်္ချိုင်းတွေနဲ့ ပြည့်နေတယ်လို့ ဘာလို့ခံစားနေရတာလဲ... တောင်ကြီး တစ်ခုချင်းစီတိုင်းက အတွင်းထဲမှာ သိုင်းသမားတွေကို မြှုပ်နှံထားတဲ့ သင်္ချိုင်းတစ်ခုလိုပဲ..'

ရွှီယန်က ကိုယ့်ကိုယ်ကိုယ် ရေရွတ်သည်။

သချွမ်အတွင်းတွင် အန္တရာယ်နှင့် ဆက်တိုက်တိုက်ပွဲများ ဖြစ်ပွားလေ့ရှိပေမယ့် အထူးသဖြင့် တောင်များအတွင်းတွင် မကြာခဏ သတ်ဖြတ်လေ့ရှိပေမယ့် ဤသည်များက ရွှီယန်၏ သိုင်းပညာအပေါ် နားလည်သဘောပေါက်မှုနှင့် ခွန်အားကို မြှင့်တင်ရာတွင် ကြီးစွာမြင့်တက်စေခဲ့သည်။

ယခုအချိန်၌ သူသည် မူလဒီဗိုင်းအဆင့်၏ အကြီးစားကျွမ်းကျင်မှုသို့ ရောက်ရှိပြီးဖြစ်၏။

'ဒီတောင်ရဲ့အောက်မှာရော... သင်္ချိုင်းတစ်ခု ရှိနေမလား..'

သူသည် သူရပ်နေသည့် တောင်ကြီးကိုကြည့်ကာ ကိုယ့်ကိုယ်ကိုယ်ရေရွတ်သည့်။

'ဒီဗိုင်းအသွင်အဆင့်ကိုလည်း လုံးဝနားလည်သဘောပေါက်မှုရလာဖို့ ငါနည်းနည်းပဲ လိုတော့တယ်..'

ရွှီယန်သည် ကိုယ့်ကိုယ်ကိုယ်ရေရွတ်ပြီး တစ်ယောက်ယောက်ကို စောင့်စားနေ၏။

ဒီတိုက်ပွဲအပြီးတွင် ဒီဗိုင်းအသွင်အဆင့်၏ ကျင့်စဉ်ကို ပြီးပြည့်စုံစွာ နားလည်သဘောပေါက် လာလောက်သည်။

"ရွှီယန်... နောက်ဆုံးတော့ မင်းကိုငါတွေ့ပြီ.."

အေးစက်ကာ လူသတ်ငွေ့ဆန်သည့် အသံတစ်ခု ပျံ့လွင့်လာ၏။

ရွှီယန်၏မျက်နှာပေါ်၌ အပြုံးတစ်ခု ပေါ်လာခဲ့သည်။

"ကျွန်တော် ခင်ဗျားကိုစောင့်နေတာ အချိန်အတော် ကြာခဲ့ပြီ.."

သိုင်းတစ်ထောင်ခန်းမ၏ အကြီးအကဲက မှင်သက်သွား၏။

"မင်းရဲ့တည်နေရာကို တမင်ဖော်ပြခဲ့တာလား.."

"ဒါပေါ့.."

ရွှီယန်က တစ်ဖက်လူကို ကြည့်သည်။ ဤသည်မှာ သိုင်းတစ်ထောင်ခန်းမ၏ အစွမ်းထက်ဆုံး သိုင်းသမားများထဲမှ တစ်ယောက်ဖြစ်၏။ ကောင်းကင်နှင့်ကမ္ဘာမြေကြီး၏ နိယာမ အငွေ့အသက်ကို စုစည်းထားသည်။ တစ်မျှင်ထဲပင် မဟုတ်ပေ။

"မင်းက သေချင်နေတာလား... ဒါမှမဟုတ် ငါ့လက်ကနေ လွတ်မြောက်နိုင်မယ်လို့ ယုံကြည်ချက်ရှိတာလား.."

အကြီးအကဲ၏အကြည့်က ရွေ့လျားသွားပြီး သူ၏ ဒီဗိုင်းဝိဉာဉ်ဖြင့် တစ်လက်မချင်းစီတိုင်းကို ရှာဖွေကြည့်သည်။ သို့ပေမယ့် မည်သည့်ပုန်းအောင်းနေသည့် လူကိုမှ ရှာတွေ့ခြင်း မရှိပေ။

"ဒီနေရာမှာ ကျုပ် ခင်ဗျားကိုသတ်မှာ.."

ရွှီယန်က အကြီးအကဲ၏လက်ထဲရှိ ဆေဘာကို ကြည့်သည်။ ၎င်းသည် ဒီဗိုင်းကိရိယာတစ်ခုဖြစ်ပေမယ့် ရေခဲဆေဘာဓားလောက် စွမ်းအားကြီးမားခြင်း မရှိပေ။

ထို့ကြောင့် သူသည် ရေခဲဆေဘာဓားကို ထုတ်လိုက်၏။ တစ်ဖက်အကြီးအကဲဆီသို့ အသာ ပစ်ပေးလိုက်သည်။

"ခင်ဗျားကို ဓားငှားပေးလိုက်မယ်... အရင်တိုက်ကြည့်... သိုင်းတစ်ထောင်ခန်းမရဲ့ အစွမ်းထက်ဆုံး သိုင်းသမားက ဘယ်လိုခွန်အားမျိုးရှိတယ် ဆိုတာကို ကျုပ်စမ်းကြည့်သေးတယ်.."

အကြီးအကဲ၏ မျက်ခုံးများက ကျုံ့သွား၏။ ရွှီယန်သည် သူ့ကို ရေခဲဆေဘာဓားအား ပြန်ပေးနေသည်လား။

"မင်းက သေချင်နေတော့လည်း... ငါက လှိုက်လှိုက်လှဲလှဲ ပူးပေါင်းပေးရတာပေါ့.."

သူသည် ရေခဲဆေဘာဓားကိုကိုင်ကာ ဆေဘာအလင်းက ကောင်းကင်သို့ ထိုးတက်သွား၏။ ပတ်ဝန်းကျင်ဒေသတစ်ခုလုံးကို အေးစက်သည့် စွမ်းအင်တို့ ပြည့်နက်လာစေသည်။

ဒီဗိုင်းကိရိယာ၏ စွမ်းအားသည် လုံးဝ ပေါ်ထွက်လာခဲ့ပြီး ဝူယွမ်အသုံးပြုတုန်းကထက် များစွာ ကျော်လွန်နေ၏။

ရွှီယန်၏ ယုံကြည်ချက်အပြည့်နှင့် ရှိနေပုံကို တွေ့ရပြီးနောက် တစ်ဖက်အကြီးအကဲသည် သတိလက်လွတ်ပြုရဲခြင်း မရှိပေ။ ဘာပဲဖြစ်ဖြစ် သိုင်းတစ်ထောင်ခန်းမ၏ ဂိတ်တံခါးရှေ့တွင်လည်း ရွှီယန်သည် မောက်မာနေပုံပေါ်ပေမယ့် သူ့တွင် မောက်မာရန်ခွန်အားတို့ ရှိနေကြောင်းကို ပြသခဲ့ပြီး ဖြစ်သည်။

နှစ်အနည်းငယ် ကုန်ဆုံးသွားပြီးနောက် ရွှီယန်၏ခွန်အားသည် များစွာ တိုးတက်လာလောက်၏။ ထို့ကြောင့်သာ ယုံကြည်ချက် အလွန်ရှိနေခြင်း ဖြစ်ပေလိမ့်မည်။

သို့ပေမယ့် အကြီးအကဲသည် နှာခေါင်းရှုံ့၏။ ရွှီယန်သည် ယုံကြည်မှု လွန်ကဲလွန်းလှသည်။ ရေခဲဆေဘာဓားကိုင်ဆောင်ထားသည့် သူသည် သာမန် အသန်မာဆုံးပုဂ္ဂိုလ်တစ်ယောက်နှင့် တူညီနိုင်မည်လား။

"တိုက်တော့လေ.."

ရွှီယန်က လက်ဟန်ကိုပြုပြီးနောက် သူ၏ မူလဒီဗိုင်းက ဓားတစ်ချောင်းအဖြစ် ပြောင်းလဲသွားပြီး လက်ထဲသို့ ရောက်ရှိလာခဲ့သည်။

"သေလိုက်တော့.."

အကြီးအကဲက ဆေဘာကို ခုတ်ပိုင်းကာ အေးစက်ကာ သေစေနိုင်သည့် ဓားစွမ်းအင်က သက်ဆင်းလာခဲ့၏။

"ဘုန်း.."

ရွှီယန်သည် သူ၏ဓားကို ရှေ့သို့ထိုးစိုက်လိုက်သည်။ သို့ပေမယ့် ဓားနှစ်ခုသည် ထိပြီးသည်နှင့် ချက်ချင်းပင် ကွဲကွာသွား၏။

ရွှီယန်သည် လေထဲသို့ မြောက်တတ်သွားပြီး ဆေဘာ၏ ထက်မြသည့် အသွားကို ရှောင်ရှားလိုက်သည်။ သူသည် အဘိုးအို၏ စွမ်းအားကို ဂရုတစိုက် လေ့လာပြီး ကောင်းကင်နှင့်ကမ္ဘာမြေကြီး၏ နိယာမ စွမ်းအားအား စုစည်းပုံဖြစ်စဉ်ကို ကြည့်ရှု့နေ၏။

"ဘုန်း.."

ဆေဘာစွမ်းအင်အောက်တွင် တောင်ကြီးသည် ချက်ချင်းပင် နှစ်ပိုင်းကွဲသွားခဲ့သည်။