အခန်း (၅၉၂-၅၉၄)

အပိုင်း ၅၉၂ - ထာဝရစိမ်းလန်းခြင်း ဒီဗိုင်းမီးတောက်၊ အရိုးပြောင်းလဲခြင်း

လီရွှမ်သည် လေးစားစွာ သက်ပြင်းချမိ၏။ ဝူထန်းနန်သည် အမှန်တကယ်ကို ကြီးမားသည် ကံတရားနှင့် ပုဂ္ဂိုလ်တစ်ဦး ဖြစ်သည်။

တောင်ပေါ်ရွာသားလေး တစ်ယောက်က လှပသည့်မိန်းကလေးတစ်ယောက်ကို ကယ်တင်ကာ ထိုမိန်းကလေးသည် အလွန်စွမ်းအားကြီးမားပြီး သူမ၏ ညွှန်ကြားမှုဖြင့် ထိုကောင်လေးကို သိုင်းပညာလမ်းစဉ်ပေါ်သို့ ရောက်ရှိစေခဲ့သည်။

သူသည် လမ်းတလျှောက် မြင့်တက်ခဲ့ပြီး‌ ခုနှစ်စင်ကြယ်အကယ်ဒမီကို တည်ထောင်ကာ စိတ်ဝိဉာဉ်နယ်မြေသို့ ရောက်ရှိပြီးနောက်လည်း အဆုံးမဲ့ကြယ်တာရာအကယ်ဒမီ၏ ကျောင်းအုပ်ဖြစ်လာခဲ့၏။

ပြင်းထန်သည့် တိုက်ပွဲအပြီးတွင် ရှုံးနိမ့်ခဲ့ပေမယ့် ပြန်လည်မြင့်တက်လာနိုင်ကာ စိတ်ဝိဉာဉ်နယ်မြေ၏ အထွတ်အထိပ်သို့ ရောက်ရှိခဲ့သည်။

ထို့အပြင် ရုပ်ပိုင်းဆိုင်ရာခန္ဓာကိုယ် ကျင့်ကြံမှုစနစ်၌ အဆင့်ချိုးဖျက်မှုကြောင့် ဒီဗိုင်းဆန်းကြယ်စွမ်းအားတို့ ရရှိလာပြီး သူ၏ စိတ်အခြေအနေ ကောင်းမွန်နေစဉ်တွင် လာရောက်တွေ့ဆုံခဲ့၏။ မည်မျှ ကံကောင်းသည့် လူတစ်ဦးဖြစ်သနည်း။

သူ၏ သိုင်းပညာအတွေ့အကြုံတို့ကို ပြောပြပြီးနောက် ဝူထန်းနန်သည် လက်ရှိပြဿနာတို့ကို ပြောပြသည်။

သူသည် ဆက်လက်ကျင့်ကြံနိုင်ခြင်း မရှိပေ။ ကောင်းကင်နှင့်ကမ္ဘာမြေကြီး၏ နိယာမကို ခန္ဓာကိုယ်အတွင်းသို့ သန့်စင်နိုင်ခြင်း မရှိပါ။ ဤသည်မှာ သူ၏ လာရောက်လည်ပတ်ရသည့် အကြောင်းအရင်းလည်း ဖြစ်၏။

လီရွှမ်က တည်ငြိမ်စွာ ပြောသည်။

"ထိုက်ချန်းရဲ့ သိုင်းပညာတာအိုက ကောင်းကင်နဲ့ကမ္ဘာမြေကြီးရဲ့ လင်းကျီရဲ့ ကန့်သတ်ထားတာကို ခံရတယ်။ စိတ်ဝိဉာဉ်နယ်မြေရဲ့ လင်းကျီအကန့်အသတ်က ဒီလောက်အထိပဲ။ နိယာမရဲ့ စွမ်းအားကို စုစည်းတာက စစ်မှန်တဲ့ အကန့်အသတ်ကို ရောက်ရှိနေပြီးပြီ။ ကောင်းကင်နဲ့ကမ္ဘာမြေကြီးရဲ့ နိယာမကို ခန္ဓာကိုယ်ထဲကို သန့်စင်ဖို့က မဖြစ်နိုင်ဘူး.."

ဝူထန်းနန်မှာ မှင်သက်သွား၏။ ဒီဆရာကြီးသည် စိတ်ဝိဉာဉ်နယ်မြေ၏ သိုင်းပညာအကြောင်းကို ပြောနေခြင်းမဟုတ်ပေ။ ထိုက်ချန်းသိုင်းတာအို၏ အကြောင်းကို ရှင်းပြနေခြင်း ဖြစ်၏။

"ဆရာကြီး... ဒီကန့်သတ်ချက်ကို ဘယ်လိုချိုးဖျက်နိုင်မလဲ မသိဘူး.."

ဝူထန်းနန်က လေးစားစွာမေး၏။

"စိတ်ဝိဉာဉ်နယ်မြေရဲ့အလွန်ကို သွားပေါ့... မင်းရဲ့အတွင်းဘက်နယ်မြေကနေ စိတ်ဝိဉာဉ်နယ်မြေကို ရောက်ခဲ့တဲ့ ခရီးစဉ်လိုပဲ... ထိုက်ချန်းကလည်း အဲ့လိုပဲပေါ့.."

လီရွှမ်က တည်ငြိမ်စွာ ပြောသည်။ စကားလုံးများကို အရမ်းကြီး တိုက်ရိုက်ဆန်စွာ ပြောကြားလို့ မရပေ။ ဆရာသခင်တစ်ယောက်အနေနှင့် သူ၏ စကားလုံးများသည် နက်ရှိုင်းသည့် ခံစားချက်တစ်ခုကို ပေးစွမ်းနေပြီး လျှို့ဝှက်အသိ အဓိပ္ပါယ်တို့ ပါဝင်နေရမည် ဖြစ်၏။

ဝူထန်းနန်က ကိုယ့်ကိုယ်ကိုယ် ရေရွတ်သည်။

"စိတ်ဝိဉာဉ်နယ်မြေရဲ့ အလွန်လား... အတွင်းဘက်နယ်မြေကနေ စိတ်ဝိဉာဉ်နယ်မြေကို လာခဲ့သလိုပဲ... ဒီဗိုင်းတံတား.."

ဒီအချိန်၌ သူသည် ဒီဗိုင်းတံတားကို တွေးမိလိုက်သည်။ ဖြစ်နိုင်သည်မှာ ဒီဗိုင်းတံတားသည် စိတ်ဝိဉာဉ်နယ်မြေ၏ အပြင်ဘက်သို့ ရောက်ရှိနိုင်သည့် လမ်းကြောင်းတစ်ခု ဖြစ်၏။

လီရွှမ်က ဆက်လက်ပြောသည်။

"တကယ်တော့ ဘာနည်းလမ်းမှ မရှိတာတော့ မဟုတ်ဘူး... မင်းအတွက် ခက်ခဲမှုက အရမ်းကြီးမားနေတာပဲ ရှိတယ်.."

ခဏတာစဉ်းစားပြီးနောက် သူသည် လက်ကိုဆန့်ကာ ဖန်းဟောင်၏ လက်နက်ကိရိယာများကို ထုလုပ်သည့် ကုန်ကြမ်းများကို ဆွဲယူလိုက်သည်။

၎င်းတို့သည် သူ၏လက်ထဲသို့ ပျံသန်းလာခဲ့၏။ မျက်စိတစ်မှိတ်အတွင်းတွင် လက်ထဲ၌ ပါးလျသည့် စိတ်ဝိဉာဉ်စာရွက်တစ်ခု ပေါ်လာခဲ့သည်။

ဤသည်ကို ထိုပစ္စည်းများဖြင့် သန့်စင်ထားခြင်းဖြစ်ပြီး ကောင်းကင်နှင့်ကမ္ဘာမြေကြီး၏ နိယာမစွမ်းအားအား သယ်ဆောင်ရန် အသုံးပြုမည် ဖြစ်၏။

ပြီးနောက် သူသည် လက်ကို မြှောက်လိုက်ပြန်သည်။ ကောင်းကင်နှင့်ကမ္ဘာမြေကြီး၏ နိယာမစွမ်းအားက စုစည်းလာပြီး စိတ်ဝိဉာဉ်စာရွက်ပေါ်၌ စုတ်ချက်အနည်းငယ်တို့ ပေါ်လာခဲ့သည်။

စာရွက်ပေါ်တွင် ကောင်းကင်နှင့်ကမ္ဘာမြေကြီး၏ နိယာမစွမ်းအားဖြင့် ရေးဆွဲထားသည့် နိယာမအချို့တို့ ပေါ်လာခဲ့၏။

ထိုနိယာမအချို့တို့သည် ထိုက်ချန်း၏ နိယာမများနှင့် တူညီနေပါသည်။ ဒီစိတ်ဝိဉာဉ်စာရွက်ပေါ်ရှိ နိယာမတို့ကို နားလည်သဘောပေါက်နိုင်ပါက ၎င်းကို အခြေခံအဖြစ် အသုံးပြုကာ ကန့်သတ်မှုများကို ချိုးဖျက်နိုင်၏။

ကောင်းကင်နှင့်ကမ္ဘာမြေကြီး၏ နိယာမကို ခန္ဓာကိုယ်အတွင်းသို့ သန့်စင်ကာ စိတ်ဝိဉာဉ်နယ်မြေ၏ အကန့်အသတ်ကို ချိုးဖျက်နိုင်၏။

သို့ရာတွင် ထိုကဲ့သို့ စွမ်းဆောင်နိုင်ရန်မှာ အချိန်တိုအတွင်း မဖြစ်နိုင်ပေ။ ဝူထန်းနန်က သူ့ကို လာရောက်တွေ့ဆုံခဲ့ခြင်းကြောင့်သာ ဆရာသခင်တစ်ယောက်အနေနှင့် ဒီအခွင့်အရေးကို ပေးခဲ့ခြင်းဖြစ်၏။

"ဒါက ကောင်းကင်နဲ့ကမ္ဘာမြေကြီးရဲ့ နိယာမတွေထဲက တစ်ခုပဲ။ မင်းသာ ပြည့်ပြည့်စုံစုံ နားလည်နိုင်လာမယ်ဆိုရင် ဒါကို အခြေခံအဖြစ် အသုံးပြုပြီး သက်ဆိုင်ရာနိယာမကို သန့်စင်နိုင်တယ်.."

လက်တစ်ဝှေ့နှင့်အတူ လီရွှမ်သည် စိတ်ဝိဉာဉ်စာရွက်အား ဝူထန်းနန်ဆီသို့ ပစ်ပေးလိုက်၏။

ဝူထန်းနန်မှာ အလွန် စိတ်လှုပ်ရှားနေပါသည်။ သူသည် စာရွက်ကို လက်နှစ်ဖက်ဖြင့် နှိမ့်ချစွာလက်ခံ၏။

"ညွှန်ကြားမှုပေးတဲ့အတွက် ကျေးဇူးတင်ပါတယ်ဆရာကြီး.."

လီရွှမ်က စိတ်ဝိဉာဉ်လက်ဖက်ရည် ပန်းကန်လုံးကိုမြှောက်ကာ သောက်သည်။ ထူးမခြားနားစွာ ပြော၏။

"ငါ့ရဲ့တပည့်ကြီးက ဒီကို တိုက်ရိုက်ညွှန်လိုက်တယ် ဆိုကတည်းက ဒါက မင်းရဲ့ကံကောင်းမှုပဲ.."

ရွှီယန်၏ လမ်းညွှန်မှုရှိကာ သူကလည်း အဆင့်ချိုးဖျက်ပြီး စိတ်အခြေအနေကောင်းမွန်နေလို့ မဟုတ်ပါက ဝူထန်းနန်အား ယခုကဲ့သို့သော ရက်ရောလှသည့် အခွင့်အရေးကို ပေးမည်မဟုတ်ပေ။

ဝူထန်းနန်သည် ပြန်ပြောင်းစဉ်းစားမိ၏။ ရွှီယန်၏စကားက မှန်ပါသည်။ ဆရာသခင်တစ်ပါးကို တွေ့ဆုံနိုင်ခြင်းမှာ အမှန်တကယ်ကို ကြီးမားသည့် ကံကောင်းမှုဖြစ်၏။

ယနေ့တွင် သူသည် အမှန်တကယ်ကို ကံကောင်းခဲ့သည်။ အရိုအသေပေးပြီးနောက် သူနှင့်ယွဲ့ချန်မင်တို့သည် တိတ်ဆိတ်သည့်နေရာတစ်ခုကို သွားရောက်ရှာဖွေကာ တရားထိုင်ကျင့်ကြံ၏။

တစ်ချက် ကြည့်လိုက်ပြီးနောက် သူသည် နက်ရှိုင်းစွာအံ့သြသွားသည်။ ကြည့်ရသည်မှာ စိတ်ဝိဉာဉ်စာရွက်ပေါ်၌ ကောင်းကင်နှင့်ကမ္ဘာမြေကြီး၏ နိယာမတို့ အလုပ်လုပ်နေပုံကို တွေ့လိုက်ရဟန်ရှိ၏။ နက်ရှိုင်းကာ ဆန်းကြယ်ပြီး နားလည်နိုင်ရန် ခက်ခဲလှပါသည်။

ယွဲ့ချန်မင်လည်း ကြည့်လိုက်သည်။ သူ့ကိုယ်သူ စစ်မှန်သည့် ကောင်းကင်နှင့်ကမ္ဘာမြေကြီး၏ နိယာမအား လေ့လာနိုင်ရန် အလှမ်းကွာနေသေးကြောင်းကို နားလည်လိုက်၏။ ကောင်းကင်နှင့်ကမ္ဘာမြေကြီး၏ နိယာမစွမ်းအား အမျှင်ကိုသာ ဆက်လက်သန့်စင်လေသည်။

ဝူထန်းနန်က တင်ပျဉ်ခွေထိုင်ပြီး စိတ်ဝိဉာဉ်စာရွက်ကို ပေါင်ပေါ်တွင် တင်ထား၏။ သူ၏ ဒီဗိုင်းဝိဉာဉ်စွမ်းအားဖြင့် ဂရုတစိုက်စူးစမ်းရင်းက နက်ရှိုင်းသည့်အခြေအနေတစ်ခုအတွင်းသို့ ဝင်ရောက်သွားသည်။

သူသည် ကောင်းကင်နှင့်ကမ္ဘာမြေကြီး၏ နိယာမတို့ အလုပ်လုပ်နေပုံကို တွေ့မြင်ရသည့်ဟန် ရှိ၏။ ၎င်းတို့သည် လေ့လာရန်ခက်ခဲလှသည်။ ဉာဏ်အလင်းရရန် ခက်ခဲလှသည်။

'ဒီဝူထန်းနန်က မဆိုးဘူး..'

လီရွှမ်က သူ့ကို တစ်ချက်ကြည့်ပြီးနောက် စိတ်ဝင်စားမှုတို့ ပျောက်ဆုံးသွား၏။ သံသယဝင်စရာ မကောင်းလောက်အောင် ဝူထန်းနန်၏ ပါရမီမှာ အလွန်မြင့်မားလှပါသည်။

သူသည် စိတ်ဝိဉာဉ်ခန္ဓာတစ်ခုအား ပိုင်ဆိုင်ထားခြင်း မရှိပေမယ့် စိတ်ဝိဉာဉ်နယ်မြေ၏ အထွတ်အထိပ်အထိ ရောက်ရှိနိုင်ခဲ့သည်။

ဤသည်မှာ သူ၏ကံတရားအပြင် မြင့်မားသည့် နားလည်သဘောပေါက်နိုင်စွမ်းမှာလည်း မဖြစ်မနေအခန်းကဏ္ဍတွင် ပါဝင်၏။

ဝူထန်းနန်၏ ရောက်ရှိလာမှုကြောင့် ချန်ချင်းစံအိမ်သည် ပြောင်းလဲသွားမှု မရှိပါ။ တကယ်တော့ သူသည် ထောင့်တစ်ခု၌သာ ရှိနေပြီး တိတ်ဆိတ်စွာနှင့် စိတ်ဝိဉာဉ်စာရွက်ပေါ်ရှိ နိယာမတို့ကို သုံးသပ်နေခြင်း ဖြစ်၏။

လီရွှမ်သည် ထိုက်ချန်းစာအုပ်၏ စာမျက်နှာ၁၀ရှိ သင်္ကေတများကို ဆက်လက်အာရုံစိုက်ကာ မှတ်သားနေပါသည်။

"သင်၏တပည့် မုန့်ချုံသည် မသေခြင်းရွှေခန္ဓာ၏ ဒုတိယအဆင့်သို့ ချိုးဖျက်သွားသည်။ သင်၏စွမ်းအားမှာ အဆ၁၀၀ မြင့်မားလာခဲ့သည်.."

မုန့်ချုံသည် မူလဒီဗိုင်းအဆင့်သို့ ချိုးဖျက်ခဲ့၏။

"ငါပိုပြီးတော့ စွမ်းအားကြီးလာပြန်ပြီ..."

လီရွှမ်သည် စိတ်လှုပ်ရှားလာခဲ့၏။ သူ၏ ရုပ်ပိုင်းဆိုင်ရာခန္ဓာကိုယ်ကျင့်ကြံမှု ခွန်အားသည် အဆ၁၀၀ တိုးတက်လာခဲ့၏။

ဤသည်က ကျင့်ကြံခြင်းအတတ်ကို လှည့်လည်စရာပင် မလိုဘဲ ရုပ်ပိုင်းဆိုင်ရာ အကြမ်းထည် ခွန်အားသက်သက်ဖြင့် ဝူထန်းနန်ကဲ့သို့ သိုင်းသမားတစ်ယောက်ကို လက်သီးတစ်ချက်သုံးကာ ပေါက်ကွဲထွက်သွားစေနိုင်သည်။

'ဒီကောင်မလေး စုလင်းရှုံလည်း အဆင့်ချိုးဖျက်တော့မှာမလား..'

လီရွှမ်သည် မျှော်လင့်မှုတို့ဖြင့် ပြည့်နှက်နေ၏။

"သင်၏တပည့် မုန့်ချုံသည် ဆင်ကဲပြောင်းလဲမှုတို့ ဖြစ်ပေါ်ကာ ဗာဂျရာဒီဗိုင်းခန္ဓာအား ရရှိလာခဲ့သည်။ သင်သည် မူလဗာဂျရာ ဒီဗိုင်းခန္ဓာအား ရရှိသည်.."

မုန့်ချုံသည်လည်း ဒီဗိုင်းခန္ဓာတစ်ခုကို အောင်မြင်စွာ ပြောင်းလဲနိုင်ခဲ့၏။

မုန့်ချုံ အဆင့်ချိုးဖျက်ပြီး ရက်အနည်းငယ်အကြာတွင် သူ၏ သိုင်းတစ်ထောင်ခန်းမမှ ပုဂ္ဂိုလ်တစ်ဦးကို ကြမ်းကြုတ်စွာ ရက်စက်ခဲ့သည့် သတင်းမှာ ရောက်ရှိလာခဲ့သည်။ ရွှီယန်ကဲ့သို့ပင် သူလည်းပဲ သချွမ်ဆီသို့ သွားရောက်၏။

သိုင်းတစ်ထောင်ခန်းမမှာ အလွန်ဒေါသထွက်နေပြီး ရွှီယန်နှင့် မုန့်ချုံတို့ကို သတ်ဖြတ်ရန်အတွက် ကျိန်ဆို၏။

နောက်ထပ် စွမ်းအားကြီးပုဂ္ဂိုလ်များကို သချွမ်သို့စေလွှတ်ကာ သူတို့နှစ်ယောက်ကို လိုက်လံသတ်ဖြတ်စေသည်။

လီရွှမ်က ခေါင်းကိုရမ်းသည်။ ဒီသိုင်းတစ်ထောင်ခန်းမမှ အဘိုးကြီးများသည် အချိန်အများကြီး မကျန်တော့ပေ။ သူတို့သည် မကြာခင်တွင် ခြေနင်းကျောက်တုံးများ ဖြစ်လာတော့မှာ ဖြစ်၏။

ရွှီယန်နှင့်မုန့်ချုံတို့၏ ခွန်အားမြင့်တက်မှု အမြန်နှုန်းကို ကြည့်ပါက ကောင်းကင်နှင့်ကမ္ဘာမြေကြီး၏ လင်းကျီအား သန့်စင်ထားသည့် သိုင်းသမားများကို အနိုင်ယူရန် အချိန်မကြာလောက်တော့ပါ။

'ငါ့ရဲ့ သိုင်းနတ်ဘုရား အစစ်အမှန်ခန္ဓာလည်း မြင့်တက်လာပြန်ပြီ...'

လီရွှမ်သည် သူ၏ သိုင်းနတ်ဘုရားအစစ်အမှန်ခန္ဓာမှာ ယခုအချိန်၌ ၉ခုဖြစ်လာကြောင်းကို တွေ့လိုက်ရ၏။ ၎င်းတို့ကို တစ်ခုတည်းအဖြစ် ပေါင်းစည်းလိုက်ပါက သူ၏ သိုင်းနတ်ဘုရား အစစ်အမှန်ခန္ဓာသည် ပိုမိုမြင့်မားသည့်အဆင့်သို့ ရောက်ရှိသွားမှာ ဖြစ်သည်။

အပိုင်း ၅၉၃ - ထာဝရစိမ်းလန်းခြင်း ဒီဗိုင်းမီးတောက်၊ အရိုးပြောင်းလဲခြင်း(၂)

'အတွင်းဘက်နယ်မြေမှာ သဟွသိုင်းပညာရဲ့ ဖွံ့ဖြိုးမှုက ပိုပြီးတော့ မြန်ဆန်လာတယ်။ သဟွသိုင်းသမား တစ်မီလီယံပြည့်ဖို့က လက်တစ်ကမ်းပဲ လိုတော့တယ်..'

အတွင်းဘက်နယ်မြေ၏ လူဦးရေနှင့် သဟွသိုင်းသမားတစ်မီလီယံရှိလာသည်မှာ အမှန်တကယ်တွင် ဘာမှမဟုတ်ပေမယ့် ဤသည်မှာ အစပိုင်းသာ ရှိပါသေးသည်။

ထို့အပြင် အားလုံးနီးပါးတို့သည် အတွင်းဘက်နယ်မြေရှိ စွမ်းအားကြီးပုဂ္ဂိုလ်များက သူတို့၏ ကျင့်စဉ်များကို ပြောင်းလဲခဲ့ကြခြင်း ဖြစ်၏။ ထိုသူများ၏ ဦးဆောင်မှုဖြင့် သဟွသိုင်းပညာမှာ ပိုမိုပိုမိုကာ ကျယ်ပြန့်စွာ သင်ကြားပို့ချနိုင်မှာ ဖြစ်သည်။ ဒီအတိုင်းသာ ဆက်သွားပါက အတွင်းဘက်နယ်မြေ၏ သိုင်းပညာပင် နောက်ပိုင်းတွင် ပျောက်ကွယ်သွားနိုင်၏။

'အတွင်းဘက်နယ်မြေရဲ့ သဟွသိုင်းပညာမှာ အမြင့်ဆုံးအဆင့်က မူလအဆင့်ပဲ။ အဲ့ဒါကိုလည်း ရွှီကျွင်းဟယ်ပဲသိထားတယ်။ သူ့အတွက်တောင်မှ မူလဒီဗိုင်းအဆင့်ကို ချိုးဖျက်ဖို့က စောလွန်းနေသေးတယ်..'

အတွင်းဘက်နယ်မြေတွင် မူလဒီဗိုင်းအဆင့်ဟူသည့် အကန့်အသတ်မှာ နိမ့်ပါးခြင်းမရှိပေ။ မူလဒီဗိုင်းအဆင့်သိုင်းသမားတစ်ယောက် ပေါ်ထွန်းလာရန်မှာ အချိန်အတော်ကြာအောင် ယူရဦးမည်ဖြစ်၏။

သဟွသိုင်းပညာသည် ကောင်းကင်နှင့်ကမ္ဘာမြေကြီး၏ လင်းကျီကြောင့် ကန့်သတ်ထားခြင်း မခံရပေမယ့် ဘာပဲဖြစ်ဖြစ် အတွင်းဘက်နယ်မြေရှိ သဘာဝ၏စိတ်ဝိဉာဉ်စွမ်းအင်မှာ တော်တော်လေး ပါးလျသည်။ ထို့ကြောင့် ကျင့်ကြံမှုအမြန်နှုန်းမှာ နှေးကွေးနေမှာဖြစ်၏။

ထို့အပြင် မူလဒီဗိုင်းအဆင့်တွင် သာမန် မူလဒီဗိုင်းအဆင့် သိုင်းသမားတစ်ယောက် ဖြစ်လျှင်တောင် သူ၏ခွန်အားသည် စိတ်ဝိဉာဉ်သန့်စင်ခြင်းအဆင့် ကောင်းကင်လူသားထက် အားနည်းနေမည် မဟုတ်ပေ။

ယခုအချိန်၌ သဟွသိုင်းပညာသည် ပိုမိုမြင့်မားသည့် ခြေလှမ်းတစ်ခုကို တက်ရောက်ခဲ့ပြီး ထိုက်ချန်းသိုင်းပညာအား ကျော်လွန်ခဲ့ပြီ ဖြစ်၏။

'အတွင်းဘက်နယ်မြေမှာ သဟွသိုင်းသမားတွေ ပြည့်နက်လာတဲ့ တစ်နေ့ကျရင် သဟွသိုင်းပညာရဲ့ သိုင်းဘိုးဘေးဖြစ်တဲ့ငါ ကောင်းကင်နဲ့ကမ္ဘာမြေကြီးကို အမှန်တကယ် ကျော်လွန်နိုင်လိမ့်မယ်..'

လီရွှမ်သည် နှလုံးသားထဲ၌ စဉ်းစား၏။

"သင်၏တပည့် စုလင်းရှုံသည် ဒန်ဆေးသိုင်းပညာ၏ ဒီဗိုင်းဆန်းကြယ်စွမ်းအားအဆင့် ကျင့်စဉ်အား နားလည်သဘောပေါက်လာခဲ့သည်။ သင်သည် ဒန်ဆေးသိုင်းပညာစနစ်၏ ဒီဗိုင်းဆန်းကြယ်စွမ်းအား အဆင့်သို့ ချိုးဖျက်သွားသည်.."

ဝိဉာဉ်အခြေပေါ်ရှိ တာအိုရွှေစာအုပ်က ပွင့်လာပြီး တောက်ပသည့် ရွှေရောင်အလင်းတို့ ထွက်ပေါ်လာ၏။ စုလင်းရှုံသည် ဒီဗိုင်းဆန်းကြယ်စွမ်းအား အဆင့်၏ ကျင့်စဉ်ကို နားလည်သဘောပေါက်ခဲ့လေပြီ။

ဒန်ဆေးသိုင်းပညာစနစ်၏ အဆင့်ချိုးဖျက်မှုနှင့် အတူ လီရွှမ်သည် ဆက်တိုက်တိုးမြင့်လာနေသည့် အသက်ဓာတ်တို့ကို ခံစားရ၏။

သူ၏သက်တမ်းသည် အဆုံးမသတ်နိုင်ပဲ ရှိပုံပေါ်ပြီး အသက်ဓာတ်တို့ဘယ်တော့မှ ပျောက်ဆုံးမသွားတော့မည့်ပုံ ရသည်။

"သင်သည် ဒန်ဆေးသိုင်းပညာစနစ်တွင် ဒီဗိုင်းဆန်းကြယ်စွမ်းအားအဆင့်သို့ ရောက်ရှိပြီး ဒီဗိုင်းဆန်းကြယ်စွမ်းအား - တာအိုတစ်သောင်း ဒီဗိုင်းမီးဖိုကို ရရှိသည်.."

ပထမဆုံး ဒန်ဆေးသိုင်းပညာ၏ ဒီဗိုင်းဆန်းကြယ်စွမ်းအားမှာ ပေါက်ဖွားလာခဲ့၏။

တာအိုတစ်သောင်း ဒီဗိုင်းမီးဖို...

တစ်သောင်းသော တာအိုတို့သည် ဒီဗိုင်းမီးဖိုတစ်ခု ဖြစ်လာခဲ့၏။ ဒန်ဆေးလုံးများကို သန့်စင်နိုင်ကာ အရာအားလုံးတို့ကိုလည်း ပျော်ဝင်စေနိုင်သည်။ လက်တစ်ဝှေ့နှင့် ဒီဗိုင်းမီးဖိုသည် အရာအားလုံးတို့ကို လွမ်းခြုံပြီး အရာအားလုံးတို့ကို ပျော်ဝင်စေ၏။

ဤသည်မှာ ဆေးသန့်စင်နိုင်သည့် ဒီဗိုင်းဆန်းကြယ်စွမ်းအားတစ်ခု ဖြစ်သလို တိုက်ခိုက်ခြင်း ဒီဗိုင်းဆန်းကြယ်စွမ်းအား တစ်ခုလည်း ဖြစ်သည်။

'ကောင်းတယ်... ကောင်းကင်နဲ့ကမ္ဘာမြေကြီးရဲ့ ဒီဗိုင်းမီးဖို ဆေးသန့်စင်ခြင်းအတတ်က ဒီဗိုင်းဆန်းကြယ်စွမ်းအားတစ်ခု ဖြစ်လာခဲ့တယ်။ ခွန်အားသာ လုံလောက်မယ်ဆိုရင် ကောင်းကင်နဲ့ကမ္ဘာမြေကြီးရဲ့ နိယာမကို တစ်ခါတည်းထုတ်ယူပြီး ဒန်ဆေးလုံးအဖြစ် သန့်စင်နိုင်လိမ့်မယ်..'

လီရွှမ်သည် နှလုံးသားထဲ၌ အလွန် စိတ်လှုပ်ရှားနေ၏။ တာအိုတစ်သောင်း ဒီဗိုင်းမီးဖိုသည် ဒန်ဆေးသန့်စင်ခြင်းကို အမြင့်မားဆုံးသော အဆင့်အထိ မြှင့်တင်ပေးနိုင်၏။

လုံလောက်သည့်စွမ်းအားသာ ရှိပါက ကောင်းကင်နှင့်ကမ္ဘာမြေကြီးကိုပင် ဒန်ဆေးလုံးအဖြစ် သန့်စင်ရန် မဖြစ်နိုင်တာ မဟုတ်ပေ။

'ငါ့ရဲ့ လက်ရှိခွန်အားနဲ့... ကောင်းကင်နဲ့ကမ္ဘာမြေကြီးရဲ့ နိယာမစွမ်းအား တစ်မျှင်ကိုပဲ ထုတ်ယူသုံးစွဲနိုင်တယ်..'

ကောင်းကင်နှင့်ကမ္ဘာမြေကြီး၏ နိယာမစွမ်းအားကို အဓိကကုန်ကြမ်းအဖြစ် အသုံးပြုကာ သန့်စင်ထားသည့် ဒန်ဆေးလုံးသည် ကောင်းကင်နှင့်ကမ္ဘာမြေကြီး၏ နိယာမအပေါ် နားလည်သဘောပေါက်မှုနှင့် ပါရမီတို့ကို မြင့်တက်စေနိုင်မှာ ဖြစ်သည်။

"သင်သည် ဒန်ဆေးသိုင်းပညာစနစ်၌ ဒီဗိုင်းဆန်းကြယ်စွမ်းအားအဆင့်သို့ ချိုးဖျက်သွားပြီး ဒီဗိုင်းဆန်းကြယ်စွမ်းအား - ထာဝရစိမ်းလန်းခြင်း ဒီဗိုင်းမီးတောက်ကို ရရှိသည်.."

ဒန်ဆေးသိုင်းပညာ၏ ဒုတိယမြောက် ဒီဗိုင်းဆန်းကြယ်စွမ်းအားလည်း ပေါက်ဖွားလာခဲ့၏။ လီရွှမ်သည် သူ၏ ဝိဉာဉ်အခြေပေါ်၌ အပြာရောင်သဲ့သဲ့ရှိသည့် မီးတစ်ခုလောင်ကျွမ်းနေကြောင်းကို တွေ့လိုက်ရသည်။

၎င်းသည် တဖြည်းဖြည်းနှင့် ပိုမိုစွမ်းအားကြီးလာပြီး မီးပုံငယ်တစ်ခုကဲ့သို့ ဖြစ်လာခဲ့၏။ ဤသည်မှာ တကယ့်မီးတောက် မဟုတ်ပေ။ ဒီဗိုင်းဆန်းကြယ်စွမ်းအား အဆင့်၏ ဒီဗိုင်းအတတ်တစ်ခုဖြစ်ပြီး သိုင်းပညာ၏ နိယာမ အသွင်ဆောင်လာခြင်း ဖြစ်သည်ဟု မှတ်ယူနိုင်သည်။

ထို့ကြောင့် ထိုထာဝရစိမ်းလန်းခြင်း ဒီဗိုင်းမီးတောက်သည် နိယာမမှ ပြောင်းလဲလာခြင်းဖြစ်ပြီး ၎င်း၏စွမ်းအားနှင့် ကြီးထွားနိုင်မှုတို့သည် တကယ့်မီးတောက်ထပ် များစွာပိုမိုသာလွန်သည်။

'ထာဝရစိမ်းလန်းခြင်း ယဒီဗိုင်းမီးတောက်... ဒီမီးတောက်မှာ အပူချိန်မရှိဘူး... ဒါက အရာဝတ္ထုတွေကို လောင်ကျွမ်းစေတဲ့ မီးတောက်တစ်ခု မဟုတ်ဘူး...'

ဝိဉာဉ်အခြေ၏အထက်တွင် အပြာရောင်မီးတောက်သည် အနည်းငယ် ကခုန်နေပြီး မည်သည့်အပူချိန်ကိုမှ ထုတ်လွှတ်ထားခြင်း မရှိပေ။

၎င်းတွင် သန်မာသည့် လောင်ကျွမ်းနိုင်စွမ်းတို့လည်း လစ်ဟင်းနေ၏။ အဆုံးမသတ်နိုင်သော အသက်ဓာတ်များနှင့် ရှင်သန်ခြင်းမီးတောက်တစ်ခုနှယ် ရှိနေပါသည်။

ထာဝရစိမ်းလန်းခြင်း ဒီဗိုင်းမီးတောက်သည် အမှန်တကယ်ကို ရှင်သန်ခြင်းမီးတောက်တစ်ခု ဖြစ်၏။ ၎င်းသည် အသက်ကို ပေးစွမ်းနိုင်သည်။

သို့ပေမယ့် အသက်ကိုလည်း ဝါးမြိုနိုင်၏။ မည်သည့်အပူချိန်မှမရှိဘဲ လောင်ကျွမ်းရန် စွမ်းအားတို့ လစ်ဟင်းနေပုံပေါ်ပေမယ့် ဤသည်မှာ သာမန်မီးတောက်များနှင့် လောင်ကျွမ်းပုံခြင်း မတူသည်သာ ဖြစ်သည်။

၎င်း၏ ကြောက်စရာကောင်းမှုသည့် အသက်ဓာတ်တို့အား ပျော်ဝင်နိုင်စေခြင်း၌ မူတည်နေ၏။ အသက်ဓာတ်ကို လောင်ကျွမ်းစေသည်။ အသက်ဓာတ်ကို ဝါးမြိုသည်။

မည်သည့်သတ္တဝါမဆို ထိမိလိုက်သည်နှင့် ငြှိမ်းသတ်ရန်ခက်ခဲလှသည်။ အသက်ဓာတ်တို့ ရှိနေသ၍ ငြှိမ်းသတ်နိုင်ခြင်း မရှိသည့် မီးတောက်ဖြစ်ကာ လူတစ်ယောက်၏ သက်တမ်းအားလုံးတို့ လောင်ကျွမ်းသွားပြီး လုံးဝ ဝါးမြိုခြင်း ခံရမှသာလျှင် ငြိမ်းသွားပေလိမ့်မည်။

ထာဝရစိမ်းလန်းခြင်း ဒီဗိုင်းမီးတောက်သည် အသက်ကိုလည်း ပေးစွမ်းနိုင်၏။ သေခါနီးဖြစ်နေသည့် လူတစ်ယောက်ကိုပင် ထာဝရစိမ်းလန်းခြင်း ဒီဗိုင်းမီးတောက်တစ်မျှင်က အသက်အားပေးစွမ်းကာ သက်တမ်းကို ဆွဲဆန့်ပေးနိုင်သည်။

ထို့အပြင် တစ်ဖက်လူအား ထာဝရစိမ်းလန်းခြင်း ဒီဗိုင်းမီးတောက် တစ်စွန်းတစ်စကို ပေးအပ်ထားပါက ဒီဗိုင်းမီးတောက် မငြိမ်းမချင်း အသက်သည် ဘယ်တော့မှ ချုပ်ငြိမ်းမည် မဟုတ်ပေ။ ဤသည်မှာ ဒန်ဆေးသိုင်းပညာ၏ ထူးကဲသည့် ဒီဗိုင်းဆန်းကြယ်စွမ်းအားတစ်ခုဖြစ်၏။

'ဒါက အရမ်းစွမ်းအားကြီးတာပဲ..'

လီရွှမ်သည် အလွန် စိတ်လှုပ်ရှားလာ၏။ ဆေးပညာသည် ခွန်အားဖြင့် ကျော်ကြားခြင်းမရှိပေ။ သို့ပေမယ့် ၎င်းမှမွေးဖွားလာသည့် ဒီဗိုင်းဆန်းကြယ်စွမ်းအားသည် သတ်ဖြတ်ခြင်း၌ အားနည်းခြင်း မရှိပါ။

ဤသည်မှာ သူသည် သန့်စင်သည့် ဒန်ဆေးသိုင်းသမားတစ်ယောက် မဟုတ်သောကြောင့် ဖြစ်ပေလိမ့်မည်။ ဒန်ဆေးသိုင်းပညာ၏ ဖန်တီးသူ ဘိုးဘေးဖြစ်သောကြောင့် ကြီးမားသောကံကြမ္မာဖြင့် ယခုမျှသော စွမ်းအားကြီးမားသည့် ဒီဗိုင်းဆန်းကြယ်စွမ်းအားကို ရရှိလာတာလည်း ဖြစ်နိုင်ပါသည်။

'ရုပ်ပိုင်းဆိုင်ရာ ခန္ဓာကိုယ်ကျင့်ကြံမှုစနစ်က ဒီဗိုင်းဆန်းကြယ်စွမ်းအား သုံးခုကို ရရှိလာစေတယ်... အဲ့ဒါကြောင့်မလို့ ဒန်ဆေးသိုင်းပညာ လမ်းစဉ်ကလည်း ဒီဗိုင်းဆန်းကြယ်စွမ်းအား သုံးခုကို ရလာစေလောက်တယ်..'

လီရွှမ်သည် တတိယမြောက် ဒီဗိုင်းဆန်းကြယ်စွမ်းအားကို မည်သည်ဖြစ်မည်နည်းဟု မျှော်လင့်နေမိ၏။ ၎င်းသည်လည်း ဒန်ဆေးသိုင်းပညာ၏ လက္ခဏာရပ်များဖြင့် ထူးခြားနေလောက်သည်။

'တာအိုတစ်သောင်း ဒီဗိုင်းမီးဖိုက ဒန်ဆေးလုံးတွေကို သန့်စင်နိုင်တယ်... ထာဝရစိမ်းလန်းခြင်း ဒီဗိုင်းမီးတောက်က ရှင်သန်ခြင်းမီးတောက် တစ်ခုပဲ။ အဲ့ဒါကအသက်ကို ချီးမြှင့်ပေးနိုင်သလို အသက်ကိုလည်း လောင်ကျွမ်းဝါးမြိုနိုင်တယ်..'

'တတိယမြောက် ဒီဗိုင်းဆန်းကြယ်စွမ်းအားကရော ဘယ်လို လက္ခဏာရပ်တွေကို ပိုင်ဆိုင်ထားမလဲ..'

လီရွှမ်သည် ဝိဉာဉ်အခြေပေါ်တွင် လုံးဝပေါက်ဖွားလာပြီးဖြစ်သည့် ထာဝရစိမ်းလန်းခြင်း ဒီဗိုင်းမီးတောက်ကို ကြည့်သည်။ တတိယမြောက် ဒီဗိုင်းဆန်းကြယ်စွမ်းအားကို စောင့်စားနေ၏။

"သင်သည် ဒန်ဆေးသိုင်းပညာစနစ်တွင် ဒီဗိုင်းဆန်းကြယ်စွမ်းအားအဆင့်သို့ ချိုးဖျက်သွားပြီး ဒီဗိုင်းဆန်းကြယ်စွမ်းအား - အရိုးမှပြန်လည်ရှင်သန်ခြင်းကို ရရှိသည်.."

တတိယမြောက် ဒီဗိုင်းဆန်းကြယ်စွမ်းအားကို အရိုးမှပြန်လည်ရှင်သန်ခြင်းဟု ခေါ်၏။

လီရွှမ်သည် အလွန်အံ့ဩသွားသည်။ ဤသည်မှာ သူမျှော်လင့်ထားသည်ထက် လုံး၀ကျော်လွန်နေ၏။

ဒီ ဒီဗိုင်းဆန်းကြယ်စွမ်းအားသည် အလွန် မယုံကြည်နိုင်စရာ ကောင်းလှသည်။

အရိုးမှ ပြန်လည်ရှင်သန်ခြင်းဟူသည်မှာ သေပြီးသည့်လူကို ပြန်လည်ရှင်သန်အောင် လုပ်ဆောင်နိုင်ခြင်း ဖြစ်၏။

အရိုးတစ်ချောင်းသာ ကျန်လျှင်တောင် ပြန်လည်ရှင်သန်စေနိုင်သည်။

ဒီဗိုင်းဆန်းကြယ်စွမ်းအား အဆင့်ရှိ သိုင်းသမားတစ်ယောက်သည် အရိုးမှ ပြန်လည်ရှင်သန်အောင် မပြုလုပ်နိုင်တာ ဖြစ်ပေလိမ့်မည်။ သို့ပေမယ့် ဒီ ဒီဗိုင်းဆန်းကြယ်စွမ်းအားသည် အသုံးပြုနိုင်သည့်အချိန်၌ အလွန်စွမ်းအားကြီးလှမှာ ဖြစ်၏။

'အရိုးကနေပြီးတော့ ပြန်လည်ရှင်သန်လာအောင် မလုပ်နိုင်သေးပေမယ့်... လောလောလတ်လတ် သေထားတဲ့လူတစ်ယောက်ကို ပြန်လည်ရှင်သန်အောင် ပြုလုပ်နိုင်လောက်တယ်..'

လီရွှမ်သည် နှလုံးသားထဲ၌ ရေရွတ်၏။

'ငါသာ လုံလုံလောက်လောက် သန်မာပြီး ဒီ ဒီဗိုင်းဆန်းကြယ်စွမ်းအားကို အသုံးချလာနိုင်ခဲ့ရင် အရိုးကနေတောင်မှ ပြန်လည်ရှင်သန်လာအောင် လုပ်နိုင်လာလိမ့်မယ်။ ဒါက မယုံကြည်နိုင်စရာ ကောင်းလောက်အောင် စွမ်းအားကြီးမားပြီးတော့ စိတ်ကူးလို့ မရနိုင်ဘူး..'

'ကြည့်ရတာ ကောင်းကင်နဲ့ကမ္ဘာမြေကြီးကို ကျော်လွန်နိုင်ပြီးမှပဲ အမှန်တကယ် စွမ်းဆောင်နိုင်မယ် ထင်တယ်..'

'ပြီးတော့... အရိုးရဲ့ မူလစွမ်းအားက ပိုပြီးတော့သန်မာလေလေ ပြန်လည်ရှင်သန်အောင် ပြုလုပ်ဖို့အတွက် ပိုခက်ခဲလေ ဖြစ်လိမ့်မယ်...'

လီရွှမ်သည် တတိယမြောက် ဒီဗိုင်းဆန်းကြယ်စွမ်းအားနှင့် ပတ်သက်ပြီး ကြီးစွာအံ့သြသွားခဲ့၏။ အရိုးမှပြန်လည်ရှင်သန်စေခြင်းသည် အခြားလူများနှင့် မိမိကိုယ်တိုင် နှစ်ခုစလုံးကို ပြန်လည်ရှင်သန်စေခြင်းဖြစ်သည်။

သို့ပေမယ့် အခွင့်အရေးတစ်ကြိမ်သာ ရှိ၏။ သေဆုံးသည့်အချိန်၌ ဒီ ဒီဗိုင်းဆန်းကြယ်စွမ်းအားကို မိမိပေါ်တွင် အသုံးပြုပါက အမှန်တကယ်ကို သေခြင်းမှပြန်လည်ရှင်သန်နိုင်သည်။

သို့ပေမယ့် ပြန်လည်ရှင်သန်ပြီးနောက် ဒီ ဒီဗိုင်းဆန်းကြယ်စွမ်းအားသည် အသုံးမပြုနိုင်သည့် အခြေအနေသို့ ရောက်ရှိသွားမည် ဖြစ်၏။

'တကယ်လို့ အရိုးမှ ပြန်လည်ရှင်သန်ခြင်းကို အတွေးတစ်ချက်နဲ့ ပြန်လည်မွေးဖွားခြင်းနဲ့ တွဲပြီးတော့ အသုံးပြုလိုက်မယ်ဆိုရင် အရိုးမှ ပြန်လည်ရှင်သန်ခြင်းရဲ့ စွမ်းအင်ကုန်ဆုံးမှုကို လျော့ကျစေလိမ့်မယ်။ အဲ့ဒီ့အခါ ပြန်လည်ရှင်သန်ပြီးတဲ့ အခါကျရင် ဒီဗိုင်းဆန်းကြယ်စွမ်းအားက အသုံးမပြုနိုင်တဲ့ အခြေအနေကို ဝင်ရောက်သွားမှာ မဟုတ်ဘူး..'

'ဒါကတကယ်ကို ပြီးပြည့်စုံတဲ့ တွဲဖက်မှုပဲ... အသက်တွေအများကြီးရှိတာနဲ့ ညီမျှတယ်..'

သူသည် စဉ်းစားလေလေ အရိုးမှ ပြန်လည်ရှင်သန်ခြင်း၏ စွမ်းအားအပေါ် ပိုမိုအံ့ဩလေ ဖြစ်လာခဲ့၏။

'ဒီ ဒီဗိုင်းဆန်းကြယ်စွမ်းအားနဲ့ ဘာဒဏ်ရာမှ ရမှာကို ကြောက်စရာမလိုတော့ဘူး... ရန်သူရဲ့ တိုက်ခိုက်မှုကြောင့် ဒဏ်ရာအပြင်းအထန် ရပြီးရင်တောင် လျှပ်တပြက်အတွင်း ပြန်လည်ကောင်းမွန်နိုင်တယ်..'

'သေပြီးရင်တောင် ပြန်လည်ရှင်သန်နိုင်တာကို ဒဏ်ရာအပြင်းအထန် ရတာလောက်ကို ဘာတွေစိတ်ပူနေမှာလဲ..'

ဒီအချိန်၌ လီရွှမ်သည် အနှိုင်းမဲ့သည့် ယုံကြည်ချက်တို့ ရရှိလာခဲ့၏။

'အရမ်းကြီး စိတ်လွတ်မသွားနဲ့... ထိုက်ချန်းမှာ အရမ်းစွမ်းအားကြီးတဲ့ပုဂ္ဂိုလ်တွေ ရှိနေလောက်သေးတယ်။ ဥပမာအားဖြင့် ထိုက်ချန်းစာအုပ်ကို ရေးခဲ့တဲ့ လူလိုမျိုးပေါ့။ သူက ထိုက်ချန်းရဲ့ ကောင်းကင်နဲ့ကမ္ဘာမြေကြီးရဲ့ နိယာမတွေကိုတောင်မှ ရေးဆွဲနိုင်တာ မယုံကြည်နိုင်အောင် စွမ်းအားကြီးနေလိမ့်မယ်..'

'ငါက အခုအချိန်မှာ လင်းနယ်မြေမှာပဲ ပြိုင်ဖက်ကင်းသေးတာ... ထိုက်ချန်းမှာ ပြိုင်ဖက်ကင်းဖို့က ခရီးအရှည်ကြီး ကျန်သေးတယ်..'

'ကောင်းကင်နဲ့ကမ္ဘာမြေကြီးကို မကျော်လွန်နိုင်ဘူးဆိုရင်... ထိုက်ချန်းမှာ အမှန်တကယ် ပြိုင်ဖက်မကင်းနိုင်ဘူး..'

လီရွှမ်သည် အသက်ကို နက်ရှိုင်းစွာရှူပြီး ကိုယ့်ကိုယ်ကိုယ်သတိပေးလိုက်၏။ မောက်မာမူနှင့် ယုံကြည်ချက်လွန်ကဲမှုတို့ကို ဖိစီးထားလိုက်သည်။

ဒီဗိုင်းဆန်းကြယ်စွမ်းအားမှာ မည်မျှပင် အံ့သြဖို့ကောင်းလျှင်တောင် သူ၏ ကျင့်ကြံမှုအဆင့်မှာ အလွန်နိမ့်ပါးနေသေး၏။ ထို့ကြောင့် ပြိုကွဲပျက်စီးသွားနိုင်ဆဲ ရှိသည်။

'အရိုးကနေ ပြန်လည်ရှင်သန်ခြင်းက အံ့သြစရာကောင်းတဲ့ ဒီဗိုင်းဆန်းကြယ်စွမ်းအား တစ်ခုပဲ... ငါ တူညီတဲ့ ဒီဗိုင်းဆန်းကြယ်စွမ်းအားတွေကို ဖန်တီးဖို့ နည်းလမ်းရှာရမယ်..'

'အဲ့ဒါက စစ်မှန်တဲ့ ဒီဗိုင်းဆန်းကြယ်စွမ်းအားကြီးတစ်ခု ဖြစ်ပြီး ကျင့်ကြံလိုက်တာနဲ့ အသက်ပိုတစ်ခု ရှိနေတာနဲ့ တူလိမ့်မယ်..'

လီရွှမ်သည် ဖန်တီးရန်လိုအပ်သည့် ဒီဗိုင်းဆန်းကြယ်စွမ်းအားအသစ် တစ်ခု ရလာခဲ့၏။ အတွေးတစ်ချက်နှင့် အသွေးအသားတို့ ပြန်လည်ပေါက်ဖွားလာခြင်းအပြင် အရိုးမှ ပြန်လည်ရှင်သန်ခြင်း ကဲ့သို့သော ဒီဗိုင်းဆန်းကြယ်စွမ်းအားတို့နှင့် တူညီနေမည် ဖြစ်၏။

အရိုးမှ ပြန်လည်ရှင်သန်ခြင်း ဒီဗိုင်းဆန်းကြယ်စွမ်းအားသည် အခြားလူများကို ကယ်တင်နိုင်သည်။ သို့ပေမယ့် သူဖန်တီးသည့် အတတ်တွင်တော့ အခြားလူများကို ကယ်တင်နိုင်သည့် စွမ်းအားတို့ ရှိချင်မှရှိပေလိမ့်မည်။

ကိုယ့်ကိုယ်ကိုယ် ပြန်လည်ရှင်သန်စေနိုင်လျှင်တောင် အလွန်ကောင်းမွန်နေပြီး ဖြစ်၏။

သို့ရာတွင် ထိုကဲ့သို့သော ဒီဗိုင်းဆန်းကြယ်စွမ်းအား တစ်ခုကို ဖန်တီးရန်မှာ လွယ်ကူမည် မဟုတ်ပေ။ သူ့တွင် ကိုးကားချက်ယူရန် အရိုးမှ ပြန်လည်ရှင်သန်ခြင်း ဒီဗိုင်းဆန်းကြယ်စွမ်းအား ရှိနေပြီးလျှင်တောင် ဖြစ်၏။

'ဒီစွမ်းအားကြီးမားတဲ့ ဒီဗိုင်းဆန်းကြယ်စွမ်းအားတွေကို... ရွှီယန်ပဲ အောင်အောင်မြင်မြင် နားလည်ပြီး ကျင့်ကြံနိုင်လောက်တယ်..'

'ဒါပေမယ့် ခန္ဓာကိုယ်ကျင့်ကြံမှု သိုင်းပညာစနစ်နဲ့ ဆက်စပ်နေတာဆိုတော့ မုန့်ချုံလည်း လုပ်နိုင်လောက်တယ်... ဒီတပည့်နှစ်ယောက်ရဲ့ နားလည်နိုင်မှု စွမ်းရည်က မကောင်းဆိုးဝါး ဆန်လွန်းတယ်...'

လီရွှမ်သည် စိတ်လှုပ်ရှားမှုတို့ဖြင့် ပြည့်နက်နေ၏။ ထိုက်ချန်းစာအုပ်အား လက်မှချကာ သူ၏အတွေးများသည် ဒီဗိုင်းဆန်းကြယ်စွမ်းအားအား ဖန်တီးမှုပေါ်၌ အာရုံစိုက်သွား၏။

ယခုကဲ့သို့ ကိုးကားချက်ယူရန် ဒီဗိုင်းဆန်းကြယ်စွမ်းအားတို့ ရှိနေပြီး အတွေးအမြင်အသစ်တို့ ပေါက်ဖွားနေချိန်၌ ဖန်တီးရန် ပိုမိုလွယ်ကူပြီး ပိုမိုနည်းလမ်းကျမည်ဟု ခံစားရသည်။

'ဒီ ဒီဗိုင်းဆန်းကြယ်စွမ်းအားကို ငါ ဘယ်လိုခေါ်သင့်လဲ... အဲ့ဒါကိုလည်း စဉ်းစားရမယ်..'

လီရွှမ်သည် အသက်ကိုနက်ရှိုင်းစွာရှူပြီး ဒီဗိုင်းဆန်းကြယ်စွမ်းအား၏ အစောပိုင်း သဘောတရားများကို ဖန်တီးခဲ့၏။ ပြီးလျှင် ဖြည်းဖြည်းခြင်း ပြီးပြည့်စုံအောင် ပြုလုပ်မည် ဖြစ်သည်။ ဤသည်က အချိန်အချို့ ကြာဦးမည် ဖြစ်၏။ ဘာပဲဖြစ်ဖြစ် ယခုကဲ့သို့သော စွမ်းအားကြီးမားကာ နက်နဲသည့် ဒီဗိုင်းဆန်းကြယ်စွမ်းအား တစ်ခုကို ဖန်တီးရန် မလွယ်ကူနိုင်ပေ။

အပိုင်း ၅၉၄ - စုလင်းရှုံ၏ ဘဝဇာတ်ကြောင၊ ထန်းကျင်းယန်၏ ခန့်မှန်းချက်

လီရွှမ်၏ စိတ်အာရုံသည် ထိုက်ချန်းစာအုပ်မှ ဒီဗိုင်းဆန်းကြယ်စွမ်းအားတို့ အပေါ်သို့ ရောက်ရှိသွား၏။ သူသည် ဒီဗိုင်းဆန်းကြယ်စွမ်းအားငယ် များစွာတို့ကို ဖန်တီးခဲ့သည်။

ဒီဗိုင်းစွမ်းအားကြီးမှာတော့ ယာယီအချိန်အတွင်း၌ တစ်ခုမှ ပြီးမြောက်ခြင်း မရှိသေးပေ။ သို့ရာတွင် အတွေးတစ်ချက်နှင့် ပြန်လည်မွေးဖွားခြင်းနှင့် အရိုးမှပြန်လည်ရှင်သန်ခြင်းကဲ့သို့သော ဒီဗိုင်းဆန်းကြယ်စွမ်းအားတို့သည် သီအိုရီအားဖြင့် ပုံပေါ်လာခဲ့ပြီး ဖြစ်၏။ တရားဝင် ဖန်တီးပြီးမည်မှာ အချိန်အတိုင်းအတာ တစ်ခုသာ ကြာမှာဖြစ်သည်။

'ဒီ ဒီဗိုင်းဆန်းကြယ်စွမ်းအားကြီး တွေကို အမြန်ဆုံး ပြီးပြည့်စုံအောင် လုပ်ရမယ်။ ပြီးတော့ နားလည်သဘောပေါက်ရန် ခက်ခဲမှုနဲ့ ကျင့်ကြံရန် ခက်ခဲမှုတွေကိုလည်း တက်နိုင်သမျှ လျှော့ချရမယ်။ တပည့်တွေကျင့်ကြံတဲ့အခါမှာ သေချာပေါက် နားလည်မှုရအောင်ပြင်ဆင်ရမယ်..'

လီရွှမ်သည် ကိုယ့်ကိုယ်ကိုယ် ရေရွတ်၏။ သို့ရာတွင် သိုင်းပညာတစ်ခုသည် ပိုမို စွမ်းအားကြီးမားလေလေ နားလည်သဘောပေါက်ရန် ပိုမိုခက်ခဲလေ ဖြစ်ကြောင်းကို သူသိ၏။ ခက်ခဲမှုကို လျှော့ချရန်မှာ အလွန်ခက်ခဲလှမှာ ဖြစ်သည်။ မဟုတ်ဘဲ အရမ်းကြီး လျှော့ချလိုက်ပါက သိုင်းပညာ၏စွမ်းအားသည် လုံလောက်မှုမရှိဘဲ ဖြစ်ကုန်မှာ ဖြစ်၏။

စုလင်းရှုံသည် မူလဒီဗိုင်းအဆင့်သို့ ချိုးဖျက်ရန်အတွက် စတင်ပြင်ဆင်၏။ မထင်မှတ်ထားသည့် ကိစ္စတို့ ပေါ်ပေါက်မလာပါက သူမသည် ဒီဗိုင်းခန္ဓာတစ်ခုအား ပြောင်းလဲနိုင်မှာ ဖြစ်သည်။

'သိုင်းစနစ် သုံးခုလုံး ဒီဗိုင်းဆန်းကြယ်စွမ်းအားအဆင့်ကို ရောက်ပြီးနေပြီ... ချီမန်သိုင်းပညာစနစ်ပဲ လိုတော့တယ်။ ဒါပေမယ့် အဲ့ဒါကလည်း ကိစ္စကြီးမဟုတ်ပါဘူး..'

ချီမန်သိုင်းပညာသည် အစတည်းက အခြားသိုင်းစနစ်များနှင့် ခြားနား၏။ အခင်းအကျင်း၊ ချိတ်တံဆိပ်နှင့် ကောင်းကင်နှင့်ကမ္ဘာမြေကြီး၏ အံ့ဖွယ်များပါဝင်သည်။

ထိုချီမန်နည်းလမ်းများသည် ခွန်အားအဆင့် တိုးတက်မှုနှင့်အတူ စွမ်းအားတို့ မြင့်မားလာမှာဖြစ်၏။ ယခုအချိန်၌ လီရွှမ်သည် ဒီဗိုင်းဆန်းကြယ်စွမ်းအားနှင့် တူညီစွာ ပြင်းထန်သည့် အခင်းအကျင်းတစ်ခုကို ဖန်တီးနိုင်စွမ်း ရှိသည်။

ချန်ချင်းစံအိမ်တွင် သိုင်းသမားများ နေ့စဉ်နေ့တိုင်း လာရောက်ကုသကြ၏။ လေလွင့်သိုင်းသမားများမှ စိတ်ဝိဉာဉ်ဂိုဏ်းနှင့် မိသားစုကြီးများမှ သိုင်းသမားများအထိ လူအမျိုးမျိုး ရောက်ရှိလာကြသည်။

နေ့စဉ်ကုသမှုအတွက် လူနာအရေအတွက် ကန့်သတ်ထားပေမယ့် ဒဏ်ရာအပြင်းအထန် ရရှိထားခြင်း၊ ကုသမရသည့် ဒဏ်ရာဟောင်းများရှိခြင်း သို့မဟုတ် အခြေခံထိခိုက်ခြင်းတို့ ခံစားနေရသည့် သိုင်းသမားများအတွက် ဤသည်မှာ သူတို့၏ကံကြမ္မာကို ပြောင်းလဲနိုင်မည့် အခွင့်အရေး ဖြစ်သည်။ ထို့ကြောင့် လက်လျှော့သွားမည် မဟုတ်ပေ။

လီရွှမ်သည် မုန့်ရှူရှူတစ်ယောက် ရောဂါ လာရောက်ကုသသည့် လူနာများနှင့် တိတ်တဆိတ် စကားပြောနေပုံကို ရုတ်တရက် သတိထားမိလိုက်သည်။ မတော်တဆနှင့်လား ရည်ရွယ်ချက်ရှိရှိနှင့်လား မသိပေ။ နာမည်တစ်ခုကို ထည့်သွင်းပြောဆိုလေ့ ရှိသည်။ ကြည့်ရသည်မှာ သူသည် တစ်ယောက်ယောက်၏ အကြောင်းကို စုံစမ်းနေဟန်ရ၏။

သူသည် စိတ်ဝိဉာဉ်ဂိုဏ်းနှင့် မိသားစုကြီးများရှိ လူနာများကို ရွေးချယ်မေးမြန်းသည်။ ဘာပဲဖြစ်ဖြစ် ထိုသိုင်းသမားများသည် လျှို့ဝှက်ချက်နှင့် သတင်းအချက်အလက်များကို ရှာဖွေသိရှိရာတွင် လေလွင့်သိုင်းသမားများထက် များစွာ ပိုမိုသာလွန်၏။

"ငါ မုကျားဖုန်းဆိုတဲ့ သိုင်းသမားတစ်ယောက်ရဲ့အမည်ကို ကြားဖူးတယ်။ သူက ပါရမီထူးချွန်ပြီးတော့ တော်တော်လေးလည်း ချောတယ်တဲ့။ အဲ့ဒါအမှန်ပဲလား... မင်းသူ့ကို ကြားဖူးလား.."

မုန့်ရှူရှူက သိလိုစွာမေး၏။

"မုကျားဖုန်းလား..."

စိတ်ဝိဉာဉ်ဂိုဏ်းရှိ သိုင်းသမားမှာ အံ့သြသွားသည်။ မုန့်ရှူရှူကို ထူးဆန်းစွာကြည့်၏။ တစ်ဖက်လူသည် ဘယ်လိုလုပ်ပြီး မုကျားဖုန်းအကြောင်းကို ပြောလာရသနည်း။

သို့ရာတွင် ချန်ချင်းစံအိမ်မှလူ ဖြစ်ပြီး ဒန်ဆေးလုံးပေးရာ၌ တာဝန်ယူထားရာ သူ့အနေနှင့် ထိပါးလို့မဖြစ်ပေ။ ကျေနပ်အောင် စွမ်းဆောင်နိုင်ပါက အပိုဆေးလုံးပင် ရရှိလာနိုင်၏။

"မင်းပြောတဲ့ မုကျားဖုန်းဆိုတာ မုမိသားစုရဲ့ ငရှုပ်သခင်လေး ဖြစ်လိမ့်မယ်။ သူ့ရဲ့ခွန်အားက တကယ်ပဲ သန်မာတယ်။ ပါရမီကောင်းမွန်ပြီး ချောမောတဲ့ အသွင်အပြင်လည်း ရှိတယ်.."

မုမိသားစုရှိ ငရှုပ်သခင်လေးသည် အမှန်တကယ်ကို ကျော်ကြား၏။ အထူးသဖြင့် လော့ဒေသတွင် ဖြစ်သည်။

"ငရှုပ်သခင်လေး..."

မုန့်ရှူရှူက နားမလည်စွာဖြင့် ဆက်လက်မေးသည်။

"သူ့ကို ဘာလို့ ငရှုပ်သခင်လေးလို့ ခေါ်ကြတာလဲ.."

ထိုသိုင်းသမားက ထူးဆန်းသွား၏။ မုန့်ရှူရှူသည် မုကျားဖုန်း၏အမည်ကို သိပြီး မုကျားဖုန်း၏အကြောင်းများကိုတော့ ဘယ်လိုလုပ်ပြီး မသိရသနည်း။

စိတ်ဝိဉာဉ်နယ်မြေတွင်... အထူးသဖြင့် လော့ဒေသတွင် မုကျားဖုန်း၏ အမည်ကို မသိသည့်လူ ရှားပါးကြသည်။ အထူးသဖြင့် မုမိသားစု၏ ငရှုပ်သခင်လေးဟု ဆိုလိုက်သည်နှင့် လူတိုင်းနီးပါး သိကြ၏။

"သူက မိန်းမအရမ်းလိုက်စားတဲ့ လူလေ... မင်းမသိဘူးလား.."

ထိုသိုင်းသမားက အံ့သြစွာပြော၏။

မုန့်ရှူရှူမှာ မှင်သက်သွားသည်။ ပြီးနောက် အသက်ကိုနက်ရှိုင်းစွာရှူပြီး ပြော၏။

"နည်းနည်းလောက် ပြောပြကြည့်ပါလား... သူက ဘယ်လိုမျိုး မိန်းမလိုက်စားသူ ဖြစ်တာလဲ.."

"အဲ့ဒါက နည်းနည်းတော့ ရှည်တယ်..."

ထိုသိုင်းသမားက ချောင်းဟန့်ကာ သူ၏မျက်နှာက အနည်းငယ် ဖြူရော်လာခဲ့သည်။ ရှင်းလင်းစွာပင် ဒဏ်ရာဟောင်းတို့ ပေါ်လာဟန်ရှိ၏။

မုန့်ရှူရှူက ဒန်ဆေးလုံးတစ်လုံးကို လက်ထဲသို့သွန်ကာ ပေးလိုက်သည်။ သူမေးစမ်းခဲ့သည့် စိတ်ဝိဉာဉ်ဂိုဏ်းနှင့် မိသားစုကြီးများမှ သိုင်းသမားများအကြားတွင် ရှေ့ရှိလူသာလျှင် မုကျားဖုန်းကို သိပုံရှိ၏။ ကျန်ရှိသည့်လူများမှာ မုမိသားစုမှ ဖြစ်မည်ဟုသာ ခန့်မှန်းနိုင်ကြသည်။

ထိုသိုင်းသမားမှာ ချက်ချင်းပင် ဝမ်းသာသွား၏။ သူသည် ဒန်ဆေးလုံးကိုသိမ်းကာ မုကျားဖုန်း၏ အချစ်ရေးအချစ်ရာ ကိစ္စများကို စတင်ပြောပြသည်။ အချစ်ကြွေးများ မည်မျှတင်ထားပုံ၊ ပြဿနာများ မည်မျှ လုပ်ခဲ့ပုံတို့ဖြစ်၏။

သူသည် မုမိသားစုမှ ငရှုပ်သခင်လေး၏ ထူးချွန်လှသည့် ပါရမီကိုလည်း လေးစားမိသည်။ တစ်ဖက်လူသည် အထွတ်အထိပ် စိတ်ဝိဉာဉ်သန့်စင်ခြင်းအဆင့် ကောင်းကင်လူသားတစ်ယောက် ဖြစ်နေပြီးဖြစ်ကာ အသန်မာဆုံး ပုဂ္ဂိုလ်တစ်ယောက်ဖြစ်ဖို့ပင် နီးကပ်နေလောက်၏။

မုန့်ရှူရှူမှာ မှင်သက်သွားသည်။ သူ၏နှလုံးသားထဲရှိ လူတစ်ယောက်၏ ပုံရိပ်သည် ပြိုလဲလာခဲ့၏။ ခဏတာအတွင်း မသက်မသာ ခံစားလိုက်ရသည်။

'အကိုမုက... ဒီလိုလူမျိုး တစ်ယောက်လား..'

သူ၏မျက်လုံးထဲတွင် အတိတ်ရှိပုံရိပ်အချို့ ရုတ်တရက်ပေါ်လာခဲ့၏။

ရဲစွမ်းကာ ထူးကဲသည့် အသွင်အပြင်နှင့် အကိုမုသည် မိန်းမလှလေးများစွာ၏ တစ်ဖက်သတ် သဘောကျမှုကို ခံရ၏။ သူသည် ဘယ်လိုလုပ်ပြီးတော့ ငရှုပ်တစ်ယောက် ဖြစ်နေရသနည်း။

တင့်တယ်လှပသည့် မိန်းကလေးတစ်ယောက်၏ မုကျားဖုန်း၏ ရင်ခွင်ထဲတွင် ချစ်ခင်မှုအပြည့်နှင့် မှီနေပုံကို ပြန်တွေးမိတိုင်းတွင် မခံမရပ်နိုင်စွာ ခံစားရ၏။

သူထင်ထားခဲ့သည့် ဟင်္သာမောင်နှံကဲ့သို့ လိုက်ဖက်လှသည့် စုံတွဲသည် လက်စသတ်တော့ အလိမ်အညာတစ်ခုဖြစ်နေလေသည်။ သူမသည် မုကျားဖုန်း၏ ဘဝထဲရှိ မိန်းမများစွာတို့အတွင်းမှ တစ်ယောက်သာလျှင် ဖြစ်၏။

ခဏတာအတွင်း မုန့်ရှူရှူသည် မှင်သက်နေပြီး ခန္ဓာကိုယ်၌ ဝိဉာဉ်တို့ လွင့်ပါးသွားသည့်ဟန် ရသည်။ သူသည် နောက်သို့လှည့်ကာ ထွက်ခွာသွားရန် ပြု၏။ သို့ပေမယ့် ခေါင်းကိုလှည့်ကာ ရုတ်တရက်မေးသည်။

"မုကျားဖုန်း အခု ဘယ်နေရာမှာလဲ.."

တစ်ဖက်သိုင်းသမားသည် မုန့်ရှူရှူ၏ တုံ့ပြန်မှုမှာ ထူးဆန်းနေသည်ဟု ခံစားရပေမယ့် ဖြေကြား၏။

"ကျွန်တော်လည်း မသိဘူး... မုမိသားစုရဲ့ ငရှုပ်သခင်လေးက ပျောက်နေတာ အချိန်အချို့ ကြာနေပြီ။ ပြောကြတာက သူ အချစ်ကြွေးအချို့ကို ရှောင်ပြေးနေတာတဲ့။ အချို့ကလည်း အသန်မာဆုံးအဆင့်ကို ချိုးဖျက်ဖို့အတွက် နည်းလမ်းကို ရှာဖွေနေတယ်လို့ ပြောတယ်။ အချို့ကလည်း အချစ်သစ်ကို လိုက်ရှာနေတယ်လို့ပြောတယ်.."

မုန့်ရှူရှူမှာ အသဲကွဲစွာ ခံစားလိုက်ရသည်။ သူ၏နှလုံးသားထဲရှိ ထိုလူ၏ပုံရိပ်သည် လုံးဝ ပြိုလဲလာခဲ့၏။

ချန်ချင်းစံအိမ်သို့ပြန်ကာ စိတ်ဓာတ်ကျနေပုံ ပေါ်ပြီး ထောင့်တစ်ခု၌ တစ်ယောက်တည်းထိုင်နေလေသည်။ အတွေးထဲတွင် နစ်မြုပ်နေ၏။

လီရွှမ်၏ နှုတ်ခမ်းထောင့်များက တွန့်ကွေးသွားပြီး နောက်ဆုံးတွင် နားလည်လာခဲ့သည်။ မုန့်ရှူရှူသည် စုလင်းရှုံ၏ ဖခင်ကိုမြင်ဖူးပြီး တစ်ဖက်လူ၏ လင်းနယ်မြေမှလာခြင်း ဖြစ်ကြောင်းကို သိရှိရပေမည်။ ထို့ကြောင့် ယခုအချိန်၌ မေးစမ်းနေခြင်း ဖြစ်၏။

'မုမိသားစုရဲ့ ငရှုပ်သခင်လေးလား... ကျွတ် ကျွတ်... သူက တကယ့်လူပဲ... မုဖိန်မင်ကိုလည်း ရွှီယန်က အနိုင်ယူခဲ့တယ်။ ဖြစ်နိုင်တာက သူ့ရဲ့သားများလား... အဲ့ဒါဆိုရင် စုလင်းရှုံရဲ့ ဖအေတူမောင်ပေါ့..'

လီရွှမ်သည် ထိုကိစ္စအား ဆက်လက်စဉ်းစားနေခြင်း မပြုတော့ပါ။ သူသည် စုလင်းရှုံ၏ နောက်ကြောင်းနှင့်ပတ်သက်ပြီး ဂရုစိုက်ခြင်းမရှိပေ။

ထို့အပြင် ထိုရန်ကြွေးများကို စုလင်းရှုံကိုယ်တိုင်က သူမဘာသာ ဖြေရှင်းမှာဖြစ်၏။ ထိုလူကို သူမ၏ ဖခင်အဖြစ် အသိအမှတ်ပြုမည်လား ဟူသည်မှာလည်း သူမ၏ကိစ္စသာ ဖြစ်သည်။