ပီယွီ့ကောင်းကင်အရှင် နှင့် အမတဧကရာဇ်မင်း နှစ်ပါး ၊ အချိန်မြစ်ထက်က တိုက်ပွဲ (Part-1)
Vol. 63 Ch. 820
ဝုန်းးးး!
ထိုအခိုက်အတန့်မှာပင် ၊ အာကာသဟင်းလင်းပြင်သည် မှန်ကဲ့သို့ ကြေမွသွားသည်။
တောက်ပသော အမတအလင်းများက ထိုနယ်မြေတစ်ခုလုံးကို ဖုံးလွှမ်းသွားကာ ၊ လောကကြီးတစ်ခုလုံး ဖြူဖွေးသွားပြီး အခြား မည်သည့်အရောင်ကိုမျှ မမြင်ရတော့ချေ။
ဤကမ္ဘာလောကကြီးသည် အထက်အောက် ပြောင်းကာ အကန့်အသတ်မရှိသော ငွေရောင်ပင်လယ်ကြီးအဖြစ် ပြောင်းလဲသွားပုံရပြီး ၊ ကျယ်လောင်သော ကွဲကြေသံများက မိုးနှင့်မြေကြား ပဲ့တင်ထပ်လျက် ရှိသည်။
အောက်က ကျင့်ကြံသူများသည် နိယာမ အကာအကွယ်အတွင်း ရှိနေသော်လည်း၊ ဤကဲ့သို့ အဆုံးစွန်သော အဖျက်စွမ်းအားရှေ့တွင် ထိန်းမနိုင်သိမ်းမရ တုန်လှုပ်မိသည်။
စိတ်ဆန္ဒအားနည်းသူ အချို့မှာ အကာအကွယ်၏ အပြင်ဘက်တွင် ပေါက်ကွဲထွက်ပေါ်လာသော ကြောက်ခမန်းလိလိ စွမ်းအားများကြောင့် သွေးအန်ကာ သတိလစ် မေ့မြောသွားကြသည်။
ဤစွမ်းအားသည် သူတို့၏ သိရှိနားလည်နိုင်စွမ်းထက် ကျော်လွန်နေပြီ ဖြစ်သည်။
လူသားတို့၏ မျက်လုံးထဲတွင် ထာဝရ မပျက်စီးနိုင်သော စစ်မှန်အမတ များပင်လျှင် ဤမျှ ကြီးမားသော စွမ်းအားများကို ရင်ဆိုင်ရာ၌ ပုရွက်ဆိတ်ငယ်များကဲ့သို့ အရေးမပါခဲ့ချေ။
ပီယွီ့ကောင်းကင်အရှင်မှ ထုတ်ဖော်လိုက်သော စွမ်းအားသည် ကြောက်မက်ဖွယ် ကောင်းသော်လည်း၊ သို့သော် ထျန်းချန် အမတ ဧကရာဇ်မင်း နှင့် ချန်ယွမ် အမတဧကရာဇ်မင်းတို့သည်လည်း ဤမျှဖြင့် အရှုံးပေးမည် မဟုတ်။
ဝုန်းးး!
အမတအလင်းများ ပေါက်ကွဲထွက်လာပြီး ၊ အမတဧကရာဇ်မင်း နှစ်ပါး၏ ဘေးပတ်ပတ်လည်တွင် အချိန်အလင်းတန်းများ ပေါ်ထွက်လာခဲ့သည်။
အဆိုပါစွမ်းအားများ၏အောက်တွင် ၊ မူလကတည်းက တသိမ့်သိမ့် တုန်ခါနေသော ဟင်းလင်းပြင်မှာ လုံးဝ ပုံပျက်သွားပြီး ဖရိုဖရဲ ဖြစ်လို့လာသည်။
"စီနီယာ ဒါ ဘာကို ဆိုလိုတာလဲ"
လှုပ်ရှားရိုက်ခတ်နေသော အမတအလင်းလှိုင်းတံပိုးများကြားမှ ထျန်းချန် အမတ ဧကရာဇ်မင်း၏ ဒေါသတကြီး အော်ဟစ်သံကို ကြားလိုက်ရသည်။
"ကျွန်တော်တို့က ချန်ကဲ ဆက်ခံသူ ကို မတော်တဆ ပြစ်မှားမိရုံလေးနဲ့ ဒီလောက်အထိ အမြစ်ပြတ် သုတ်သင်ဖို့ လိုလို့လား"
သို့သော် ပီယွီ့ကောင်းကင်အရှင်သည် လုံးဝ လျစ်လျူရှုထားသည်။ သူမသည် ဟင်းလင်းပြင်ကို စုတ်ဖြဲကာ မဟာလမ်းစဉ် အာကာသ ကို ကြားခံအဖြစ် အသုံးပြု၍ အစစ်အမှန် မရှိသော အချိန်မြစ် ထဲသို့ ဝင်ရောက်တိုက်ခိုက်ရန် ပြင်ဆင်လိုက်သည်။
ဤမြင်ကွင်းကို မြင်လိုက်ရသော အမတဧကရာဇ်မင်း နှစ်ပါး၏ မျက်နှာအမူအရာများမှာ သိသိသာသာ ပြောင်းလဲသွားခဲ့သည်။
အမတနယ်မြေ၏ အတုမရှိသော အမတဧကရာဇ်မင်းများ ဖြစ်သည်နှင့်အလျောက် ၊ သူတို့သည် အချိန်မြစ်ကို ထိန်းချုပ်နိုင်ကြပြီး အချိန်ရေစီးကြောင်းကို ဆန့်ကျင်ကာ သွားလာနိုင်ကြသည်။
သူတို့၏ မူလဝိညာဉ်သည် မရေမတွက်နိုင်သော ကမ္ဘာများနှင့် နေရာများကို ဖြတ်ကျော်ကာ မိမိတို့၏ ခြေရာလက်ရာများကို ထားရှိခဲ့ကြပြီး ဖြစ်သည်။
အမတဧကရာဇ်မင်း တစ်ပါးကို အလုံးစုံ ပျက်စီးသွားစေလိုပါက ၊ အချိန်မြစ်တစ်လျှောက် လိုက်လံ ရှာဖွေပြီး ခေတ်ကာလ အားလုံးရှိ ၎င်းတို့၏ တည်ရှိမှုများကို ဖျက်ဆီးပစ်ရမည်။ထို့နောက်မှသာ အချိန်နှင့် အာကာသကို ပြန်လည် တည်ဆောက်မည် ဖြစ်သည်။
ပီယွီ့ကောင်းကင်အရှင်သည် အချိန်မြစ်ထဲသို့ တိုက်ရိုက် ဝင်ရောက်သွားသည်ကို ကြည့်လျှင်ဖြင့် ၊ သူမသည် အချိန်မြစ်တစ်လျှောက် လိုက်လံရှာဖွေကာ အမတဧကရာဇ်မင်း နှစ်ပါး၏ စစ်မှန်သော ကိုယ်ခန္ဓာများကို ဆွဲထုတ်လျက် ချေမှုန်းပစ်ရန် ကြံစည်နေသည်ကို သိနိုင်သည်။
ဤမျှ ကြီးမားသော အန္တရာယ်ကြောင့် အမတဧကရာဇ်မင်း နှစ်ပါးမှာ ဘာကိုမှ ဂရုမစိုက်နိုင်တော့ပေ။
သူတို့၏ မှော်အတတ်များကို အလျင်အမြန် အသက်သွင်းကာ အချိန်မြစ်ထဲသို့ လိုက်ပါဝင်ရောက်သွားကြသည်။ သေကြေပျက်စီးရမည် တန်ဖိုးကိုပင် ထည့်မတွက်ဘဲ ၊ သူတို့သည် ပီယွီ့ကောင်းကင်အရှင်နှင့် ပြင်းထန်စွာ တိုက်ခိုက်ကြပေတော့သည်။
ဝုန်းးးးးး!
အချိန်မြစ်သည် ထိပ်တန်း စွမ်းအားရှင်များ၏ သက်ရောက်မှုအောက်တွင် ၊ ကြောက်မက်ဖွယ် ကောင်းသော လှိုင်းလုံးကြီးများကို ဖြစ်ပေါ်စေခဲ့ကာ ခေတ်ကာလ ပုံရိပ်များစွာ ပါဝင်နေသည့် အချိန်အစအနများသည် ပြင်းထန်စွာ လွင့်စင် ပေါက်ကွဲကုန်သည်။
ဤနေရာသို့ ရောက်ရှိလာသည်မှာ အမတဧကရာဇ်မင်းများ၏ ဓမ္မကိုယ်ပွားများသာ ဖြစ်သော်လည်း ၊ သူတို့သည် အမတဧကရာဇ်အဆင့်ရှိ နိယာမများကို ထိန်းချုပ်နိုင်စွမ်းရှိပြီး ထို့အပြင် အမတဧကရာဇ် လက်နက်များ၏ အကူအညီကြောင့် ထုတ်လွှတ်လိုက်သော စွမ်းအားများသည် အဆုံးစွန်သော တန်ခိုးအရှိန်အဝါများဖြင့် ပြည့်နှက်နေခဲ့သည်။
...........
သို့သော် သူတို့ ရင်ဆိုင်နေရသည်မှာ တစ်ချိန်က အမတဧကရာဇ် အဆင့်ထက် ကျော်လွန်ခဲ့ဖူးသော ပီယွီ့ကောင်းကင်အရှင် ဖြစ်သည်။ သူတို့ နှစ်ဦး ပူးပေါင်းကာ အစွမ်းကုန် ကြိုးစားသော်လည်း ၊ မနည်း တောင့်ခံနိုင်ရုံသာ ရှိပြီး တန်ပြန် တိုက်စစ်ဆင်ရန် အခွင့်အရေး မရှိခဲ့ပေ။
ဘုန်း ဘုန်း !
သူတို့ သုံးဦးသည် အချိန်မြစ်ထက်တွင် မရပ်မနား တိုက်ခိုက်နေကြပြီး၊ ၎င်းတို့၏ လှုပ်ရှားမှုတိုင်းက ပြင်းထန်သော လှိုင်းလုံးကြီးများကို ဖြစ်ပေါ်စေသည်။
အချိန်နှင့် အာကာသ အပိုင်းအစများသည် လေထဲတွင် ဝဲပျံလျက် ၊ နိယာမတရားများသည် ပြင်းထန်စွာ ရိုက်ခတ်လို့နေလေ၏။
အမတနယ်မြေရှိ အခြားသော အမတဧကရာဇ်မင်း အများအပြားသည် ဤကြောက်မက်ဖွယ်ရာ စွမ်းအားကို သတိထားမိခဲ့ကြသည်။
အမတသခင်တရားစီရင်ရေးရုံးတော်၌ ကျင့်ကြံအားထုတ်နေသော ထျန်းယွီ့အမတဧကရာဇ်မင်း သည် သူ၏ မျက်လုံးများကို ဖြည်းညင်းစွာ ဖွင့်လိုက်သည်။
စကြဝဠာကဲ့သို့ နက်ရှိုင်းသော သူ၏ မျက်ဝန်းများသည် မိုင်ပေါင်း ကုဋေချီသော ဟင်းလင်းပြင်ကို ထိုးဖောက်ကာ အချိန်မြစ်ထက်သို့ ကျရောက်သွားပြီး အံ့အားသင့်စွာဖြင့် ရေရွတ်လိုက်သည် ။
"အမ် .. ဒါ ဘယ်လိုဖြစ်တာလဲ...”
"အမတဧကရာဇ်မင်းတွေက အချိန်မြစ်ထက်မှာ တိုက်ခိုက်နေကြတာလား... ဘာကြောင့်လဲ”
သူ၏ နတ်အသိစိတ်အာရုံဖြင့် ဆက်တိုက် စစ်ဆေးကြည့်ပြီးနောက် နောက်ဆုံးတွင် အရှိန်အဝါတစ်ခုကို ဖမ်းဆုပ်နိုင်ခဲ့သည်။
သူ၏ မျက်နှာအမူအရာမှာ ရုတ်တရက် ပြောင်းလဲသွားသည်။
"ဒီအရှိန်အဝါက... ချန်ယွမ် အမတဧကရာဇ်မင်း... ထျန်းချန် အမတ ဧကရာဇ်မင်း...?"
"သူတို့ နှစ်ယောက် ပူးပေါင်းပြီး... ပီယွီ့ကောင်းကင်အရှင် ကို တိုက်ခိုက်နေကြတာလား"
တအံ့တဩဖြစ်နေသော ထျန်းယွီ့အမတဧကရာဇ်မင်း၏ မျက်လုံးများမှာ ပို၍ပင် ပြူးကျယ်သွားခဲ့သည်။
နည်းနည်းမှ ဆက်စပ်မှု မရှိသော ဤလူများသည် အဘယ်ကြောင့် ယခုလို ပြင်းပြင်းထန်ထန် တိုက်ခိုက်နေကြသည်ကို သူ လုံးဝမှ နားမလည်နိုင်တော့ချေ။
……
ကောင်းကင်မိစ္ဆာအမတ နယ်မြေ ။
တိ့ကျွင်း အမတ ဧကရာဇ်မင်းသည်လည်း ဤအခိုက်အတန့်တွင် မရပ်မနား လှုပ်ခတ်နေသော အချိန်မြစ်ကို စိုက်ကြည့်နေသည်။
သူ၏ ပါးစပ်မှ တိုးတိုးလေး ရေရွတ်လိုက်သည် ။
"သူတို့ သုံးယောက်က ဘယ်လိုဖြစ်ပြီး အချိန်မြစ်ထဲမှာ တိုက်နေကြတာတုန်း “
"ချောင်ကဲ ပြောတာတော့... ကွေးယွမ်အမတဂိုဏ်းက အင်အားစုကြီး နှစ်ခုက လူတွေနဲ့ နတ်ဘုရားလက်နက် အမတမျှော်စင် မှာ ပြင်းထန်တဲ့ ပဋိပက္ခ ဖြစ်ခဲ့ကြတယ် ဆိုပဲ..."
"ဒါကြောင့်ပဲ ခုလို အကြီးအကျယ် တိုက်ပွဲ ဖြစ်နေတာလား...”
ထိုသို့ ရေရွတ်ပြီးနောက်၊ သူ၏ အပြုံးသည် ရုတ်တရက် ပျောက်ကွယ်သွားပြီး ထူးဆန်းသော အမူအရာ တစ်ခု ဖြစ်ပေါ်လာခဲ့သည် ။
"ဒါပေမဲ့ အမတနယ်မြေမှာ ဒီလို ရှုပ်ရှုပ်ထွေးထွေး ဖြစ်တာဟာလည်း ကောင်းတဲ့ကိစ္စပါပဲ”
ဤတိုက်ပွဲ၏ လှုပ်ခတ်မှုမှာ အလွန် ကြောက်စရာ ကောင်းသည်။
အစွမ်းထက်သော အမတဧကရာဇ်မင်းများသာမက အမတဘုရင်များလည်း ဤကြောက်မက်ဖွယ်ရာ လှိုင်းတံပိုးအတတ်အကျကို ခံစားခဲ့ရသည်။
သူတို့အားလုံး တုန်လှုပ်ချောက်ချားနေကြပြီး မျက်နှာများမှာ ဖြူဖျော့နေကြသည်။
ဒေဝလောက ပြန်လည်စတင်ရာခေတ်သည် ယခုလေးတင်မှ စတင်ခြင်း ဖြစ်ပြီး ၊ မျိုးဆက်သစ် ပါရမီရှင်များသည်လည်း သိပ်မကြာခင်ကမှ အမတနယ်မြေတစ်ခွင်သို့ ခြေဆန့်ရုံသာ ရှိသေး၏။
သို့သော် ဤမျှ ကြောက်မက်ဖွယ်ကောင်းသော တိုက်ပွဲကြီး တစ်ခု ဖြစ်လာပြီလော။
အမတနယ်မြေ၏ အခြေအနေသည် တစ်ဖန် ပြန်၍ ပြောင်းလဲတော့မည်လော။
.........
အခန်း(၈၂၀) – ပီယွီ့ကောင်းကင်အရှင် နှင့် အမတဧကရာဇ်မင်း နှစ်ပါး ၊ အချိန်မြစ်ထက်က တိုက်ပွဲ (Part-2)
ဝုန်းးး!
ကြယ်တာရာများ တိုက်မိကြသကဲ့သို့ ထူးဆန်းသော မြင်ကွင်းတစ်ခုသည် အချိန်မြစ်ထဲတွင် ပေါက်ကွဲထွက်ပေါ်လာသည်။
"ပျက်သုဉ်းစေ!”
ပီယွီ့ကောင်းကင်အရှင်၏ နှုတ်ခမ်းဖျားမှ စကားနှစ်လုံး ထွက်ပေါ်လာပြီးနောက်၊ သူမ၏ လက်ကို မြောက်ကာ အချိန်မြစ်ထဲသို့ ဖြည်းညင်းစွာ ဖိချလိုက်သည်နှင့် …
ဝုန်းးး!
တစ်လောကလုံးကို ထင်ဟပ်နေသော မိုးမခပင်ကြီးမှာ ကောင်းကင်သို့ ထိုးတက်သွားပြီး ၊ ပြင်းထန်သော ပရမ်းပတာစွမ်းအားများကို ဆောင်ကျဉ်းကာ ခေတ်ကာလ အဆက်ဆက်ကို မွှေနှောက်ဖျက်ဆီးပစ်လေသည်။
ဤကဲ့သို့သော ကြောက်မက်ဖွယ်ရာ ကောင်းသည့် စွမ်းအားများရှေ့မှောက်တွင် ၊ အမတဧကရာဇ်မင်း နှစ်ပါးမှာ တောင့်ခံ့နိုင်စွမ်း မရှိတော့ချေ။
‘ဘုန်း'ခနဲ့ ထွက်ပေါ်လာသော ကျယ်လောင်သံနှင့်အတူ ၊ အချိန်မြစ်ထက်တွင် ကြီးမားသော လှိုင်းလုံးကြီးများ ထကြွလာပြီး အမတဧကရာဇ်မင်း နှစ်ပါးမှာ ကြိုးပျက်သွားသော စွန်ကဲ့သို့ နောက်သို့ လွင့်ထွက်သွားကာ မဟာလမ်းစဉ် အာကာသ၏ အလွှာများသည် တစ်ခုပြီးတစ်ခု ရိုက်ချိုးခံလိုက်ရသည်။
ကွဲအက်သံ….
သူတို့၏ ခန္ဓာကိုယ်များပေါ်တွင် မရေမတွက်နိုင်သော အက်ကွဲရာများ ဖြစ်ပေါ်လာပြီး ၊ ဒဏ်ရာအပြင်းအထန် ရကာ အချိန်မရွေး ပြိုလဲတော့မည့်အလား ဖြစ်နေသည်။
အမတဧကရာဇ်မင်းများ အဖြစ် ၊ သူတို့၏ ရုပ်ခန္ဓာနှင့် စိတ်ဝိညာဉ်မှာ အလွန်ခိုင်ခံ့သန်မာပြီး အမတနယ်မြေ၏ အထွတ်အထိပ်တွင် ရှိကာ ၊ ကိုယ်ပွားတစ်ခု ဖြစ်လျှင်ပင် ဒဏ်ရာအပြင်းအထန် ရရန် မဖြစ်နိုင်ချေ။
သို့သော် ယခု ပီယွီ့ကောင်းကင်အရှင်၏ တိုက်ခိုက်မှုအောက်တွင် ၊ သူတို့၏ ခန္ဓာကိုယ်များသည် တခဏချင်း ကြေမွတော့မည့် အခြေအနေသို့ ရောက်ရှိခဲ့ရချေပြီ။
သို့သော် ကြောက်ရွံ့မှုထက် သူတို့၏ စိတ်ထဲတွင် ဒေါသများက ပို၍ ပြင်းထန်နေသည်။
"ကောင်းလှချည်လား ကွေးယွမ်အမတဂိုဏ်း! ပီယွီ့ကောင်းကင်အရှင်!"
ထျန်းချန် အမတ ဧကရာဇ်မင်းက ဒေါသတကြီးဖြင့် ထပ်မံ အော်ဟစ်လိုက်သည်။
"ဒီလို ပဋိပက္ခလေး တစ်ခုအတွက်နဲ့ စီနီယာက ကျုပ်တို့အပေါ် ဒီလောက်အထိ ရက်စက်ရသလား”
"အမတနယ်မြေရဲ့ ဟောကိန်းအရ ဒီခေတ်ကာလမှာ အမှောင်ထုက ပြန်လည် နိုးထလာတော့မယ်၊ ဒုတိယအကြိမ်မြောက် အဆုံးမဲ့ကပ်ဘေးကြီး ကျရောက်လာတော့မယ်..."
ချန်ယွမ် အမတဧကရာဇ်မင်းကလည်း ဟိန်းဟောက်လိုက်သည်။
"စီနီယာနဲ့ ကွေးယွမ်အမတဂိုဏ်းက တကယ်ပဲ ကျုပ်တို့နဲ့ စစ်ပွဲ ဆင်နွှဲပြီး အမတနယ်မြေရဲ့ အပြစ်သားတွေ ဖြစ်ချင်တာလား"
တစ်ချိန်တည်းမှာပင် သူတို့ နှစ်ဦး၏ စိတ်ထဲ၌လည်း မယုံကြည်နိုင်ဖြစ်လို့နေသည်။
စူးချန်ကဲ၏ အစောင့်အရှောက်မှာ သူတို့ကဲ့သို့ အမတဧကရာဇ်မင်း တစ်ပါး ဖြစ်လိမ့်မည်ဟု ထင်မှတ်ထားခဲ့သည်။
သို့သော် ယခုတွင်မူ တစ်ချိန်က အမတဧကရာဇ် အဆင့်ထက် ကျော်လွန်ခဲ့သော ပီယွီ့ကောင်းကင်အရှင် ဖြစ်နေလိမ့်မည်ဟု မျှော်လင့်မထားခဲ့ပေ။
ဤမျှ ကြောက်မက်ဖွယ်ကောင်းသော စွမ်းအားရှင်မှာ ပီယွီ့ကောင်းကင်အရှင် ဖြစ်ကြောင်း ကြိုသိခဲ့လျှင်ဖြင့် သူတို့ နှစ်ယောက်လုံး ဤနေရာသို့ လုံးဝ လာရောက်မည် မဟုတ် ။
ထို့အပြင် မူလက သူတို့အနေဖြင့် မည်မျှပင် ကြိုးစားပါစေ ၊ မိမိတို့ ဂိုဏ်းမှ အမတဘုရင် အစောင့်အရှောက်များနှင့် အဆက်အသွယ် မရနိုင်ခဲ့သည့် အကြောင်းရင်းကို ယခုမှသာ နားလည်သွားခဲ့သည်။
ပီယွီ့ကောင်းကင်အရှင်မှ သတ်ဖြတ်ပစ်လိုက်သည်မှာ သေချာသည်။
ဤကဲ့သို့သော ပုဂ္ဂိုလ်မျိုးသာလျှင် သူတို့ မသိအောင် ထိုကိစ္စကို လုပ်ဆောင်နိုင်ပေလိမ့်မည်။
သို့သော် သူတို့ စိတ်ထဲတွင် မေးခွန်းတစ်ချို့ ရှိနေသေးသည်။ ပီယွီ့ကောင်းကင်အရှင်သည် အဘယ်ကြောင့် သူတို့ဂိုဏ်းမှ အမတဘုရင်များကို သတ်ဖြတ်ခဲ့ရသနည်း။
ထို့အပြင် သူမ ပေါ်ထွက်လာလာချင်း ၊ သူတို့ကို အဘယ်ကြောင့် သတ်ဖြတ်ရန် ကြိုးစားနေသနည်း။
သူတို့ နှစ်ဦးနှင့် သူမကြားတွင် မည်သည့် ရန်ငြိုးမှ မရှိခဲ့ဖူးပေ။ အကယ်၍ စူးချန်ကဲ အတွက်နှင့် သူတို့နှင့်သာမက သူတို့နောက်ကွယ်မှ အင်အားစုများနှင့်ပါ အမတစစ်ပွဲ ဆင်နွှဲရန် ကြိုးစားခြင်းမှာ အတော်လေး ချဲ့ကားလွန်းသည်ဟု ဆိုရပေတော့မည်။
……
၎င်းတို့နှစ်ဦး၏ စကားများကို ကြားသော်လည်း ပီယွီ့ကောင်းကင်အရှင် မှာ အနည်းငယ်မျှပင် တုန်လှုပ်သွားခဲ့ခြင်း မရှိပေ။
နတ်အလင်းတန်းများ၏ ဖုံးလွှမ်းမှုအောက်တွင် သူမ၏ ရုပ်သွင်နှင့် အမူအရာကို မြင်ရန် ခဲယဉ်းလှသော်လည်း၊ သူမ၏ နှုတ်မှ မည်သည့် ခံစားချက်မျှ မပါသော အေးစက်သည့် အသံတစ်ခုသာ ထွက်ပေါ်လာခဲ့သည် ။
"ဟမ်... ငါ့အပေါ်ကို ပုပ်ခတ်တဲ့ စကားတွေ လာမပြောနဲ့”
"ငါက မင်းတို့နှစ်ယောက်လိုမျိုး ကိုယ့်အဆင့်အတန်းကို အသုံးချပြီး ကိုယ့်ထက်ငယ်တဲ့သူကို နှိပ်စက်ရလောက်အောင် အရှက်မရှိတဲ့သူ မဟုတ်ဘူး”
"ငါ ဘာလို့ မင်းတို့ကို တိုက်ခိုက်ရသလဲဆိုတာ... မင်းတို့ စိတ်ထဲမှာလည်း အဖြေရှိပြီးသားလို့ ငါထင်တယ်”
ပီယွီ့ကောင်းကင်အရှင်၏ စကားများသည် သူတို့၏ စိတ်နှလုံးသားထဲသို့ ကျဆင်းလာသော နတ်တောင်ကြီးတစ်ခုကဲ့သို့ ၊ စိတ်ဝိညာဉ်သည်ပင် ထိန်းမနိုင်သိမ်းမရ တုန်လှုပ်သွားသည်။
တစ်ဖက်လူရဲ့ စကားက ဘာကို ဆိုလိုတာလဲ?
သူတို့ စိတ်ထဲမှာ အဖြေရှိပြီးသား ဟုတ်လား?
သူတို့နှစ်ဦး၏ စိတ်ထဲတွင် ရှိနေသည့် တစ်ခုတည်းသော စိုးရိမ်ကြောက်ရွံ့မှုမှာ သူတို့သည် အမတနယ်မြေ ကောင်းကင်လမ်းစဉ်၏ လျှို့ဝှက်လက်ပါးစေများ ဖြစ်နေသည့် အချက်မှလွဲ၍ အခြား မရှိချေ။
သို့သော် ဤလျို့ဝှက်ချက်သည် သူတို့နှစ်ယောက်အတွက် တားမြစ်ချက်တစ်ခု ဖြစ်ပြီး ၊ ဂိုဏ်းအတွင်းရှိ အဆင့်မြင့် အကြီးအကဲများမှလွဲ၍ သူတို့၏ ကိုယ်ပိုင်တပည့်များပင် ဤအကြောင်းကို မသိကြချေ။
ပီယွီ့ကောင်းကင်အရှင်သည် အမှန်ပင် အစွမ်းထက်သော ပုဂ္ဂိုလ်တစ်ဦး ဖြစ်သော်လည်း ၊ သို့သော် သူမသည် အပြင်လူတစ်ဦးသာ ဖြစ်ရာ ဤလျှို့ဝှက်ချက်ကို သိရှိရန်မှာ မဖြစ်နိုင်သလောက်ပင်။
"စီနီယာ... ဒါက တစ်ခုခု အထင်လွဲနေသလိုပဲ..."
ချန်ယွမ် အမတဧကရာဇ်မင်း၏ စကား မဆုံးသေးမီမှာပင်၊ ပီယွီ့ကောင်းကင်အရှင်က ဖြတ်ပြောလိုက်သည် ။
"မင်းတို့ရဲ့ ရှင်းပြချက်တွေကို နားထောင်ဖို့ ငါ့မှာ အချိန်မရှိဘူး”
"နောက်မှ ကွေးယွမ်အမတဂိုဏ်းက မင်းတို့ကို အေးအေးလူလူ သေခွင့်ပေးလိမ့်မယ် “
ပီယွီ့ကောင်းကင်အရှင်သည် မည်သည့်ခံစားချက်မှ မပါဘဲ စကားလုံး တစ်လုံးချင်းစီ ထုတ်ပြောလိုက်ပြီး ၊ မျက်စိတမှိတ်အတွင်းမှာပင် အမတဧကရာဇ်မင်း နှစ်ပါးနှင့် အင်အားစုကြီး နှစ်ခု၏ ကံကြမ္မာကို ချမှတ်ခဲ့သည်။
ထို့နောက် ပီယွီ့ကောင်းကင်အရှင်သည် သူမ၏ လက်ကို မြှောက်ကာ ရှေ့က ဟင်းလင်းပြင်ကို အသာလေး တို့ထိလိုက်သည်။
ဝီ!
နတ်အလင်းလှိုင်းများ ပျံ့နှံ့ရိုက်ခတ်သွားပြီး၊ ထိုစွမ်းအား၏ သက်ရောက်မှုအောက်တွင် အချိန်မြစ်တစ်ခုလုံးသည် တစ်ဖန် ပြန်၍ ရူးသွပ်စွာ ဟောက်သံပြုလို့လာသည်။
မရေမတွက်နိုင်သော နတ်အလင်းများ ဆန်တက်လာကာ ၊ အဆုံးတွင် ပီယွီ့ကောင်းကင်အရှင်၏ ဦးခေါင်းထက်၌ ရွှေခရမ်းရောင် ရှိသော ဝဲဂယက်တစ်ခုအဖြစ် ပေါင်းစပ်သွားသည်။
ယင်းအတွင်းမှ ရွှေခရမ်းရောင် ရောင်ဝါမျှင်များ ပျံ့လွင့်ထွက်ပေါ်လာခဲ့သည်။
၎င်းတို့သည် တဖြည်းဖြည်း ပျံ့နှံ့သွားသည်နှင့်အမျှ ၊ အချိန်မြစ်အတွင်းရှိ ထောင်ပေါင်းများစွာသော အချိန်နှင့် အာကာသ အပိုင်းအစများသည် အညံ့ခံသည့်အလား သိသိသာသာ မှေးမှိန်သွားခဲ့သည်။
ဤလျို့ဝှက်ဆန်းကြယ်သော ခရမ်းရောင်အငွေ့အသက်များကို အနီးကပ် ခံစားလိုက်ရသည်နှင့် ၊ အမတဧကရာဇ်မင်း နှစ်ပါးစလုံး ချက်ချင်းဆိုသလို မျက်နှာများ ဖြူဖျော့သွားကြသည်။
"ဒါက... ရှေးဦးခရမ်းချီလား..."