အခန်း (၉၃-၉၄)

အခန်း ၉၃ - အစိမ်းရောင်ဝတ်အမျိုးသမီး

ကျန်းယွဲ့လုက ထူးဆန်းသောအမျိုးသမီးကို ကြည့်လိုက်၏။

“ငါ့ရဲ့ ဂမ္ဘီရတွက်ချက်မှုမှာ တစ်ခုခုလွဲသွားတာလား… ရုပ်တုရှေ့က စုဝေးနေတဲ့ လူခုနှစ်ယောက်ထဲမှာ ဒီမိန်းမ မပါဘူးထင်တယ်… ဒါမှမဟုတ် သူက ခြုံထည်ဝတ်ထားတဲ့ လျှို့ဝှက်ဆန်းကြယ်တဲ့လူများလား”

ချီရွှမ်းစုက ခေါင်းခါလိုက်သည်။

“တံလှပ်က သိပ်ပြီး မရှင်းလင်းပေမယ့် ခန္ဓာကိုယ်ပုံစံအရဆို ခြုံထည်ဝတ်ထားတဲ့ လျှို့ဝှက်ဆန်းကြယ်တဲ့လူက လင်းကျန်းယွမ်ဖြစ်မယ်”

ကျန်းယွဲ့လုက ချီရွှမ်းစု၏ စကားကို သဘောတူလက်ခံပြီး ခေါင်းညိတ်ပြလိုက်၏။

ဤအခိုက်အတန့်မှာ အစိမ်းရောင်ဝတ်အမျိုးသမီးက သူမ၏ ဓားကို ဆွဲထုတ်ပြီး ကျန်းယွဲ့လုရှိရာသို့ ပျံသန်းလာ၏။

ကျန်းယွဲ့လုက ပြန်လည်စိုက်ကြည့်ပြီး သူမ၏ ပုံသဏ္ဌာန်မဲ့စက္ကူကို စက္ကူဓားတစ်လက်အဖြစ် ပြောင်းလဲကာ ရှေ့သို့ ခုန်တက်လိုက်၏။

အစိမ်းရောင်ဝတ်အမျိုးသမီးက သူမ၏ ဓားကိုစောင်းပြီး လှုပ်ရှားမှုများကို အဆက်မပြတ်ပြောင်းလဲကာ ခန့်မှန်းရခက်သော စွမ်းအင်တစ်ခုကို ဖြစ်ပေါ်လာစေ၏။

အမျိုးသမီးအံ့အားသင့်သွားသည်မှာ ကျန်းယွဲ့လုက တိုက်ခိုက်မှုကိုမကာဘဲ သူမ၏ ပင်မဒါန်ထျန်ကိုသာ စက္ကူဓားဖျားဖြင့် ချိန်ရွယ်လာ၏။

ဤအချိန်မှာ ကျန်းယွဲ့လု၏ တိုက်ခိုက်မှုက ထက်ရှပြီး ပြင်းထန်ကြမ်းတမ်းနေကာ စီဟန်ဓားသိုင်းစဉ်နှင့် လုံးလုံးလျားလျား ကွဲပြားနေသည်။

အစိမ်းရောင်ဝတ်အမျိုးသမီးက နောက်သို့လျင်မြန်စွာဆုတ်ပြီး ကျန်းယွဲ့လု၏ တိုက်ခိုက်မှုကို ရှောင်တိမ်းလိုက်၏။ သို့သော် ကျန်းယွဲ့လု၏ စက္ကူဓားက အမျိုးသမီး၏ ရှေ့မှာ ရုတ်တရက် ဖျတ်ခနဲလက်ပြီး ဓားဖျားက သူမ၏ လည်ပင်းကို ထိုးညွှန်လာပြီဖြစ်၏။ အစိမ်းရောင်ဝတ်အမျိုးသမီးက မတတ်တာဘဲ နောက်သို့ ထပ်မံ၍ ဆုတ်လိုက်ရသည်။

ကျန်းယွဲ့လုက နောက်ကနေလိုက်ပါသွားပြီး အမျိုးသမီးရှောင်တိမ်းဖို့မဖြစ်နိုင်အောင် အဆက်မပြတ် တိုက်ခိုက်လိုက်၏။ အစိမ်းရောင်ဝတ်အမျိုးသမီးက သူမ၏ ဓားကိုလွှဲပြီး တိုက်ခိုက်မှုကို ကာလိုက်၏။ ထို့နောက် ကျန်းယွဲ့လု၏ ဦးခေါင်းကို ညာဘက်လက်ဝါးနှင့် ပစ်ရိုက်ချလိုက်၏။

ဤသည်ကိုကြည့်ပြီး ကျန်းယွဲ့လုက အမျိုးသမီး၏ လက်ကောက်ဝတ်ကို ခုတ်ပိုင်းချလိုက်၏။ သို့သော်လည်း အမျိုးသမီးက အမြင်အာရုံထက်ရှလေသည်။ သူမက လက်ချောင်းတစ်ချောင်းထုတ်ကာ ပုံသဏ္ဌာန်မဲ့စက္ကူဓားအပြားကို တောက်ပြီး နောက်သို့ ခုန်ဆုတ်လိုက်၏။

စက္ကူဓားကိုကိုင်ထားသည့် ကျန်းယွဲ့လု၏ လက်က တုန်ခါသွားပြီး ဓားက သူမ၏ လက်ထဲကနေ လွတ်ချလုမတတ်ပင်။

တစ်ချိန်တည်းမှာပင် ကျန်းယွဲ့လုက အစိမ်းရောင်ဝတ်အမျိုးသမီးကို ဖိအားပေးနိုင်မည့်အခွင့်အရေး ဆုံးရှုံးသွား၏။

သူတို့နှစ်ယောက်က အလွန်လျင်မြန်စွာလှုပ်ရှားနေပြီး ချီရွှမ်းစုက မူးဝေလာသည်ဟု ခံစားရသည်။ သူသည် ဤအမျိုးသမီးနှစ်ဦးထဲက ဘယ်သူနဲ့မဆို တိုက်ခိုက်ရမည်ဆိုလျှင် လှုပ်ရှားကွက်သုံးကွက်အတွင်း ဒဏ်ရာရရှိသွားပေလိမ့်မည်။

ကျန်းယွဲ့လုက စကားတစ်ခွန်းမဆိုဘဲ စီဟန်ဓားသိုင်းစဉ်မှ ဓားကွက်များကိုအသုံးပြုကာ စက္ကူဓားနှင့် အဆက်မပြတ်တိုက်ခိုက်နေ၏။ ဓားချင်းထိခတ်သည့် ကျယ်လောင်သောအသံက ခန်းမထဲမှာ အဆက်မပြတ်ထွက်ပေါ်လာသည်။

ဤအချိန်မှာ ကျန်းယွဲ့လုသည် သာမန်မျက်စိဖြင့် မြင်ဖို့မလွယ်သော အမြန်နှုန်းဖြင့် အစိမ်းရောင်ဝတ်အမျိုးသမီးကို ဓားကွက်တစ်ရာနီးပါးဖြင့် တိုက်ခိုက်ပြီးသွားပြီဖြစ်၏။

တစ်ချိန်တည်းမှာပင် စက္ကူဓား၏ ကိုယ်ထည်ကနေ စက္ကူအပိုင်းအစများစွာက ကွာကျပြီး လေထဲမှာ ချာလပတ်လည်ကာ နှင်းများကျဆင်းနေသလို စက္ကူကြာပန်းများအဖြစ် ပြောင်းလဲသွား၏။

ဤစက္ကူကြာပန်းများသည် ပုံသဏ္ဌာန်မဲ့စက္ကူကနေလာခြင်းဖြစ်ပြီး ပွင့်ချပ်များက ဓားမြှောင်များကဲ့သို့ ထက်ရှနေ၏။

ပန်းများက လည်ပတ်လာသည့်အခါ သူတို့သည် သတ္တုနှင့်ကျောက်စိမ်းတို့ကို အလွယ်တကူလှီးဖြတ်နိုင်သည့် လည်ပတ်နေသောဓားသွားများနှင့်တူလေသည်။

ချီရွှမ်းစုသည် သတ္တုနှင့်ကျောက်တုံးထိခတ်သံကို အဆက်မပြတ်အသံကိုသာ ကြားနေရ၏။ အစိမ်းရောင်ဝတ်အမျိုးသမီးသည် ဓားချီစက်ဝန်းများကြားမှာ လုံးလုံးလျားလျားပျောက်ကွယ်နေ၏။ သို့သော်လည်း ကျယ်လောင်သောမည်သည့်အသံမှ ထွက်မလာပေ။ သူမ၏ လှုပ်ရှားမှုများက ဘယ်လောက်ပေါ့ပါးဖျတ်လတ်သလဲ ပြသပေးနေသည်။

အံ့အားသင့်ဖို့ကောင်းစွာပင် အစိမ်းရောင်ဝတ်အမျိုးသမီးက နည်းနည်းကလေးမှ နောက်ကောက်ကျခြင်းမရှိဘဲ ကျန်းယွဲ့လု၏ ဓားကွက်များအားလုံးကို အမှန်တကယ်ပိတ်ဆို့တားဆီးနိုင်နေ၏။

လွင့်ပျံနေသော စက္ကူပွင့်ချပ်များက ဓားချီစက်ဝန်းများကို ထိခတ်သောအခါ မည်သည့်အသံမှမထွက်ဘဲ ကြေမွသွား၏။

“ထိုက်ရွှမ်ဓားနှလုံးသားသိုင်းစဉ်”

ကျန်းယွဲ့လုက အံ့အားသင့်သွားသည်။ ဤသိုင်းကွက်သည် ချွမ်ကျန်းဂိုဏ်းမှ တပည့်ဂိုဏ်းသားများသာ သင်ယူနိုင်သည့် ကန့်သတ်ထားသော နည်းစနစ် ထိုက်ယင်ဓား ၁၃ လက်မှလာခြင်းဖြစ်သည်။

ဤနည်းစနစ်သည် ကျန်းယီဂိုဏ်း၏ စီဟန်ဓားသိုင်းစဉ်၊ ထိုက်ဖျင်ဂိုဏ်း၏ ပေတူဓား ၃၆ လက်နည်းစနစ်နှင့် မဟာအကြီးအကဲ၏ နန်တူဓား ၂၈ လက်နည်းစနစ်များနှင့် တူညီလေသည်။ သူတို့ကို ခြုံငုံ၍ တာအိုဂိုဏ်းတော်၏ မဟာဓားပညာရပ်လေးခုအဖြစ် ခေါ်ဆိုကြသည်။

အစိမ်းရောင်ဝတ်အမျိုးသမီးသည် ချွန်ကျန်းဂိုဏ်းမှ တပည့်ဂိုဏ်းသားတစ်ဦးဖြစ်နေသည့်အတွက် ကျန်းယွဲ့လုက အံ့အားသင့်သွားရ၏။ သို့သော်လည်း ကျန်းယွဲ့လုက နည်းနည်းလေးမှ ထိတ်လန့်တကြားဖြစ်မသွားပေ။

စက္ကူကြာပန်းများက ထိုအမျိုးသမီးပေါ် သက်ရောက်မှုမရှိသော်လည်း ကျန်းယွဲ့လုက အခွင့်အလမ်းကိုချိန်ဆကာ သူမ၏ စက္ကူဓားကိုသုံး၍ အဖြူရောင်အလင်းတစ်ခုနှင့် အမျိုးသမီး၏ ခန္ဓာကိုယ်ကို လွှမ်းခြုံထား၏။

ဤအချိန်မှာ ကျန်းယွဲ့လုသည် စီဟန်ဓားသိုင်းစဉ်၏ ဓားကွက်များကို ဆက်လက်၍ ချုပ်တည်းထားခြင်း မရှိတော့ပေ။ သူမ၏ လှုပ်ရှားကွက်များက ပြင်းထန်ကြမ်းတမ်းလာပြီး ပြိုင်ဘက်၏ သေကွင်းသေကွက်များကို တိုက်ရိုက်ချိန်ရွယ်လာ၏။

သို့သော်လည်း အစိမ်းရောင်ဝတ်အမျိုးသမီးမှာ စိတ်ဝိညာဉ်မြွေတစ်ကောင်ကဲ့သို့ လှုပ်ရှားနေသည့် ပျော့ပျောင်းနူးညံ့သော ဓားတစ်လက်ရှိနေသည်။ ဓားက ရှေ့ကိုပြန်ကန်လိုက်၊ ရစ်ပတ်လိုက်၊ လည်ပတ်လိုက်၊ ပုံသဏ္ဌာန်မဲ့စက္ကူနှင့်ထိခတ်လိုက်နှင့် ပုံသေနည်းကျမရှိဘဲ လှုပ်ရှားနေ၏။ သတ္တုနှင့်ကျောက်တုံးထိခတ်သည့် ကျယ်လောင်သောအသံက အဆက်မပြတ် ထွက်ပေါ်နေပြီး ဓားအလင်းများက ပြဒါးကဲ့သို့ တောက်ပနေ၏။

အသက်ရှူချိန်အနည်းငယ်မျှမှာ ကျန်းယွဲ့လုသည် မိုးကြိုးလျှပ်စီးကဲ့သို့ မြန်ဆန်ထက်ရှသော သူမ၏ ဓားကွက်များကို အဆက်မပြတ်ပြောင်းလဲနေ၏။ အလျင်အဟုန်ကုန်ဆုံးသွားလျှင်တောင် ကျန်ရှိနေသော အော်ရာက ပြင်းထန်ကြမ်းတမ်းနေဆဲဖြစ်၏။ သို့သော်လည်း အစိမ်းရောင်ဝတ်အမျိုးသမီးသည် ရုပ်ဒြပ်မရှိသည့် တစ္ဆေတစ်ကောင်ကဲ့သို့ဖြစ်ပြီး ကျန်းယွဲ့လု၏ တိုက်ခိုက်မှုများကို သက်တောင့်သက်သာဖြင့် ပိတ်ဆို့တားဆီးထားနိုင်သည်။

အမျိုးသမီးသည် ကျန်းယွဲ့လု၏ တိကျသောတိုက်ခိုက်မှုများကို ဟာကွက်မရှိဘဲ ရှောင်တိမ်းနေသည်ကို ကြည့်ရသည်မှာ တကယ့်ကို ရင်သပ်ရှုမောဖွယ်ရာဖြစ်၏။

အချိန်တစ်ခုမှာ ခံစစ်အနေအထားကို ထိန်းသိမ်းထားပြီးနောက် အစိမ်းရောင်ဝတ်အမျိုးသမီးသည် သူမ၏ ဓားဖြင့် အလယ်ကို တည့်တည့်ပစ်ထိုးလိုက်၏။ သို့သော်လည်း သူမက ကျန်းယွဲ့လုကို ပစ်မထိုးနိုင်ခင် သူမ၏ ဓားက ရုတ်တရက် အသွင်ပြောင်းလဲခြင်းဆယ်ခုကျော်ကို ရုတ်တရက်ဖြတ်သန်းပြီး အမြင်အာရုံမှာ တဖျတ်ဖျတ်တလက်လက်ဖြစ်သွား၏။

ကျန်းယွဲ့လုက အမျိုးသမီး၏ ဓားအသွင်ပြောင်းလဲခြင်းအမျိုးမျိုးကို ခုတ်ချက်တစ်ချက်တည်းဖြင့် ပိတ်ဆို့တားဆီးလိုက်၏ သူမက စက္ကူဓားကို စောင်းပြီး အမျိုးသမီး၏ ဓားအပြားကို ဖိချကာ ချိန်သားကိုက် တိုက်ခိုက်လိုက်၏။

အစိမ်းရောင်ဝတ်အမျိုးသမီးက သူမ၏ ဓားဖျားပေါ်မှာ ချီကို စုစည်းထားပြီး ဓားဖျားက အားအနည်းဆုံးနေရာဖြစ်သည်။ ချွင်ခနဲအသံနှင့်အတူ သူမ၏ ဓားက ထိတွေ့ရိုက်ခတ်မှုမှာ အောက်ဘက်ကို လျှောကျသွား၏။

ကျန်းယွဲ့လုက စက္ကူဓားကိုလွှဲပြီး အမျိုးသမီး၏ ရင်ဘတ်ကို ခုတ်ပိုင်းချလိုက်သည်။ အစိမ်းရောင်ဝတ်အမျိုးသမီးသည် မတတ်သာဘဲ နောက်သို့အနည်းငယ်ဆုတ်ပေးလိုက်ရသည်။ တစ်ချိန်တည်းမှာပင် အမျိုးသမီးက သူမရှေ့မှာ စက်ဝိုင်းတစ်ခုကို ရေးဆွဲလိုက်၏။ ဓားစက်ဝိုင်းများသည် အမှန်တကယ်ရှိသော စက်ဝိုင်းများကဲ့သို့ဖြစ်ပြီး လေထဲမှာရစ်ဝဲကာ ကျန်းယွဲ့လု၏ တိုက်ခိုက်မှုကို ပိတ်ဆို့တားဆီး၍ တန်ပြန်၍ပင်တိုက်ခိုက်လာ၏။

ထိုသို့ဆိုလျှင်တောင် ကျန်းယွဲ့လုက ကြောက်ရွံ့မှုလုံးဝမပြဘဲ ဓားစက်ဝိုင်းများကို သက်တောင့်သက်သာဖြင့် ရှောင်တိမ်းလိုက်၏။ ထို့နောက် အမျိုးသမီးက စွမ်းအင်ကို ပြန်လည်စုစည်းနေစဉ် သူမက ချိန်သားကိုက် ထောင့်ဖြတ်ခုတ်ပိုင်းချလိုက်၏။ အမျိုးသမီးက မတတ်သာဘဲ နောက်သို့ထပ်မံ၍ဆုတ်လိုက်ရ၏။

ထို့နောက်ချက်ချင်းပင် အမျိုးသမီးက နောက်ထပ်ဓားစက်ဝိုင်းသုံးခုကို ရေးဆွဲပြီး ကျန်းယွဲ့လုရှိရာသို့ ပြန်ဝင်လာ၏။ သူမ၏ လက်ကောက်ဝတ်လှုပ်ရှားမှုနှင့်အတူ ကျန်းယွဲ့လုက အမျိုးသမီး၏ ဓားစက်ဝိုင်းများမှ အားအနည်းဆုံးအမှတ်ကို ထိုးညွှန်ပြီး သူတို့ကို ချိုးဖျက်လိုက်၏။

ထိုမျှသာမက ကျန်းယွဲ့လုသည် သူမ၏ စက္ကူဓားနှင့် အမျိုးသမီးကိုပစ်ထိုးပြီး နောက်သို့ပြန်ဆုတ်သွားစေ၏။

ဤကဲ့သို့ လျင်မြန်သော ရှေ့တိုးနောက်ဆုတ်တိုက်ခိုက်မှုများနှင့်အတူ သူတို့နှစ်ဦးက အချိန်ခဏအတွင်းမှာ တိုက်ကွက်ပေါင်းရာချီ ဖလှယ်ပြီးသွားပြီဖြစ်၏။

ချီရွှမ်းစုက သူတွေ့မြင်ရသည့်အရာမှာ မှင်တက်မိနေ၏။ သူ့ဘာသာသူ တွေးလိုက်သည်။

‘ချင်းရှောင်က ရှန်းထျန်သက်ရှိတွေထဲမှာ အတော်ဆုံးပဲ… ကောင်းကင်ဘုံသက်ရှိတွေပဲ သူ့ကို အနိုင်ယူနိုင်လိမ့်မယ်… အခု ချင်းရှောင်နဲ့ နောက်ကောက်မကျဘဲ ထိပ်တိုက်ရင်ဆိုင်နိုင်တဲ့ ဒီအမျိုးသမီးက ဘယ်သူပါလိမ့်’

ဤအခိုက်အတန့်မှာ ကျန်းယွဲ့လုက သူမ၏ စက္ကူဓားကို ရုတ်တရက်ခါပြီး အမျိုးသမီး၏ နားဘေးမှာ ကျယ်လောင်သောပေါက်ကွဲသံကို ထွက်ပေါ်စေကာ သူမကို မှင်တက်သွားစေ၏။

ဤသည်မှာ စီဟန်ဓားသိုင်းစဉ်၏ နှလုံးသားသိုင်းစဉ်မှ ပြိုင်ဘက်ကို မှင်တက်စေသော မဟာမိုးကြိုးဓားနည်းစနစ်ဖြစ်သည်။ အဆင့်မြင့်ကျွမ်းကျင်မှုမှာ ၎င်းသည် သာယာငြိမ့်ညောင်းသောတေးသွားဖြင့် ပြိုင်ဘက်၏ စိတ်ကိုပင် ညှို့ငင်ဖမ်းစားနိုင်သည်။

ကျန်းယွဲ့လုက သူမ၏ ဓားကို ဆက်လက်၍လွှဲယမ်းလိုက်၏။ ကျယ်လောင်သောအသံများ ဆက်လက်ထွက်ပေါ်လာပြီး အစိမ်းရောင်ဝတ်အမျိုးသမီးက အာရုံစူးစိုက်ဖို့ခက်ခဲလာသည်။ သိပ်မကြာခင် အမျိုးသမီးက နောက်ကောက်ကျသွားပြီး ကျန်းယွဲ့လု၏ စက္ကူဓားမှ လေအဟုန်က အမျိုးသမီး၏ ရင်ဘတ်ကို အမှတ်တမဲ့ ထိုးခွဲကာ အမျိုးသမီး၏ အစိမ်းရောင်ဝတ်ရုံရှေ့ဘက်ခြမ်းကို စုတ်ပြဲသွားစေ၏။

အမျိုးသမီးက အစိမ်းရောင်ဝတ်ရုံအောက်မှာ အောက်ခံအင်္ကျီကို ဝတ်ဆင်ထားသောကြောင့် လုံလုံခြုံခြုံရှိနေဆဲဖြစ်၏။ သို့သော်လည်း အရေးကြီးပစ္စည်းများကို ထိန်းသိမ်းထားသည့် အလယ်လွှာက စုတ်ပြဲသွားပြီး ရွှေနှင့်ခရမ်းရောင် ငါးရုပ်အဆောင်တစ်ခုက ထွက်ကျလာ၏။

ချီရွှမ်းစုနှင့် ကျန်းယွဲ့လု၏ အမူအရာများက တစ်ချိန်တည်းမှာ ပြောင်းလဲသွားကြ၏။

ကျန်းယွဲ့လုက အော်ပြောလိုက်သည်။

“နင်က ချင်းဖျင်အသင်းကပဲ”

ချီရွှမ်းစုက တုန်လှုပ်သွားပြီး တွေးလိုက်မိ၏။

‘ဒီမိန်းမက တကယ်ပဲ ချင်းဖျင်အသင်းကလား… ဒီကိစ္စမှာ သူတို့လည်း ပတ်သက်နေကြပြီလား။’

ချင်းဖျင်အသင်းသည် ရှေးဟောင်းအင်မော်တယ်များကိုယုံကြည်သည့် အခြားသောအသင်းအဖွဲ့များနှင့် မတူသော်လည်း ချင်းဖျင်အသင်း၏ အိပ်မက်အစည်းအဝေးနှင့် လင်းရှန်စုန်းကဝေအယူဝါဒဂိုဏ်း၏ ဂမ္ဘီရတိုင်းပြည်ကြား တိုက်ဆိုင်မှုမှာ ချီရွှမ်းစုက တုန်လှုပ်နေခဲ့ရပြီးသားဖြစ်၏။

အစိမ်းရောင်ဝတ်အမျိုးသမီးက တစ်စုံတစ်ရာ ပြောဆိုခြင်းမရှိပေ။ သူမက ခရမ်းရွှေငါးရုပ်အဆောင်ကိုသာ ပြန်လည်ဆင့်ခေါ်လိုက်သည်။

ကျန်းယွဲ့လုက ဆက်လက်၍ တုံ့ဆိုင်းမနေတော့ပေ။ ဓားအလင်းရောင်တစ်ချက် ဖျတ်ခနဲလက်ပြီး ကျန်းယွဲ့လုက အစိမ်းရောင်ဝတ်အမျိုးသမီးရှိရာသို့ ပြေးဝင်သွား၏။

အစိမ်းရောင်ဝတ်အမျိုးသမီးက ဓားကိုကန့်လန့်ဖြတ်ကိုင်ပြီး မြေပြင်မှာ ခြေကုပ်ရယူလိုက်သည်။ ဓားအလင်းက အမျိုးသမီး၏ ရှေ့ သုံးပေအကွာသို့ ထိခတ်လာသောအခါ သူမက ကိုယ်နေဟန်ထားကို ရုတ်တရက်ပြောင်းလဲလိုက်၏။

ကျန်းယွဲ့လု၏ ဓားက ချာလပတ်လည်၍ အမျိုးသမီး၏ ဘယ်ဘက်ပခုံးရှိရာသို့ ခုတ်ပိုင်းကျဆင်းလာ၏။ ၎င်းသည် ရိုးရှင်းသော တိုက်ခိုက်မှုတစ်ခုဖြစ်သော်လည်း အလွန်တရာမြန်ဆန်နေဆဲဖြစ်သည်။ သာမန်လူများသည် ၎င်းကို ခုခံနိုင်လိမ့်မည် မဟုတ်ပေ။ သို့သော်လည်း အစိမ်းရောင်ဝတ်အမျိုးသမီးက ကိုယ်ကိုအနည်းငယ်တိမ်းစောင်းရုံသာဖြစ်ပြီး သူမ၏ ဓားကို အလိုက်သင့်လှုပ်ရှားကာ ကျန်းယွဲ့လု၏ တိုက်ခိုက်မှုကို ပိတ်ဆို့တားဆီးလိုက်သည်။

ကျန်းယွဲ့လုက စက္ကူဓား၏ အဖျားကို အနည်းငယ်တုန်ခါစေပြီး ရှေ့သို့ အဖြောင့်ပစ်ထိုးလိုက်၏။ သူမက အစိမ်းရောင်ဝတ်အမျိုးသမီးအနားသို့ ချဉ်းကပ်လာစဉ်မှာပင် သူမ၏ စက္ကူဓားက နေရာအနှံ့လှုပ်ရှားသွားပြီး ဓားအရိပ်များစွာဖြင့် တိုက်ခိုက်မှုပုံရိပ်ယောင်တစ်ခုကို ဖြစ်ပေါ်လာစေသည်။

အစိမ်းရောင်ဝတ်အမျိုးသမီးက အမြဲတမ်းပြောင်းလဲနေသောပုံစံဖြင့် နေရာမှာပင် မတ်တတ်ရပ်ကာ တုံ့ပြန်လိုက်၏။ သူမက ရှေ့တွင် စက်ဝန်းများကို ရေးဆွဲလိုက်ရုံသာဖြစ်ပြီး စတင်တိုက်ခိုက်ခြင်းမရှိပေ။

ကျန်းယွဲ့လုက ဓားစက်ဝန်းနှင့် မထိတွေ့ပေ။ ထိုအစား သူမက ခြေကို ဘေးဘက်သို့ခွဲပြီး ထောင့်ဖြတ်တိုက်ခိုက်လိုက်သည်။ သူမသည် တိုက်စစ်အနေအထားကို ရပ်တန့်ပြီး ခံစစ်ပုံစံသို့ ကူးပြောင်းလိုက်သည်။ ဤသည်မှာ ရှည်ကြာလာသောတိုက်ပွဲတစ်ခုအတွက် နည်းဗျူဟာဖြစ်သည်။

အမျိုးသမီးနှစ်ဦးက ပြင်းထန်ကြမ်းတမ်းသောတိုက်ပွဲမှာ ဆင်နွဲနေကြ၏။ အစိမ်းရောင်ဝတ်အမျိုးသမီးသည် ခံ့ညားကြော့ရှင်းသောဓားသိုင်းကို ပြသပြီး နေရာလွတ်တစ်ခုလုံးကို စိုးမိုးထားသည်။ တစ်ချိန်တည်းမှာပင် ကျန်းယွဲ့လု၏ ဓားသိုင်းက ပေါ့ပါးဖျတ်လတ်၍ လိုက်လျောညီထွေရှိပြီး သက်တောင့်သက်သာစီးဆင်းနေ၏။ အစိမ်းရောင်ဝတ်အမျိုးသမီးက ခံစစ်ကနေ တိုက်စစ်သို့ ကူးပြောင်းလိုက်သော်လည်း ကျန်းယွဲလုမှာ ရှုံးနိမ့်မည့် မည်သည့်အရိပ်အယောင်မှ မပြသပေ။

လှုပ်ရှားကွက်တစ်ရာကျော်အပြီးမှာ မည်သည့်ဘက်ကမှ အသာစီးမရရှိသေးပေ။ ကျန်းယွဲ့လုက အစိမ်းရောင်ဝတ်အမျိုးသမီးနှင့် ထိပ်တိုက်ရင်ဆိုင်ဖို့ စိတ်အားထက်သန်မနေပေ။ ထိုအစား သူမက နောက်သို့ ပေအတော်များများခုန်ဆုတ်ပြီး အော်ပြောလိုက်၏။

“ဒါက နှလုံးသားကနေ ကောင်းကင်ရဲ့စိတ်ဆန္ဒကို အာရုံခံပြီး နှလုံးသားရဲ့စေညွှန်ရာအတိုင်း ဓားကလိုက်ပါတဲ့ ကောင်းကင်နှလုံးသားဓားနည်းစနစ်ပဲ”

“နင်က ငါတို့တာအိုထိုက်ယင်ဓား ၁၃ လက်နည်းစနစ်နဲ့ နင့်ရဲ့ ဇာစ်မြစ်ကို အစက ဖုံးကွယ်ထားခဲ့တယ်… အခု နောက်ဆုံး နင့်ရဲ့အစစ်အမှန်လမ်းစဉ်က ပေါ်ထွက်လာပြီပေါ့… နင်က ဘယ်မဟာပညာရှိရဲ့ သွန်သင်မှုကို ခံယူထားလဲ ငါသိချင်မိတယ်”

ထိုအခါမှသာ အစိမ်းရောင်ဝတ်အမျိုးသမီးက အမှန်တကယ်တော့ ကွန်ဖြူးရှပ်ကျောင်းတော်မှဖြစ်သည်ကို ချီရွှမ်းစုနားလည်သဘောပေါက်သွားသည်။ သို့သော်လည်း ချင်းဖျင်အသင်းမှ အဖွဲ့ဝင်များမှာ များသောအားဖြင့် နှစ်ခုတွဲသရုပ်သကန်များရှိထားသောကြောင့် အဓိပ္ပါယ်ရှိလေသည်။ သူတို့၏ အစစ်အမှန်သရုပ်သကန်များကို အလွန်တရာသိုဝှက်ထားပြီး သူတို့ထဲမှတချို့သည် ဘာသာသုံးခုမှ ပင်မအူတိုင်အဖွဲ့ဝင်များပင်ဖြစ်နေတတ်သည်။ ထို့ကြောင့် ချင်းဖျင်အသင်းတော်မှ အဖွဲ့ဝင်များအားလုံးသည် အတုအယောင်သရုပ်သကန်များကို အသုံးပြုတတ်ကြလေသည်။

အစိမ်းရောင်ဝတ်အမျိုးသမီးက နှုတ်ဆိတ်နေ၏။

ရုတ်တရက် သူမက နောက်ထပ်တိုက်ခိုက်မှုတစ်ခုကို ထုတ်ဖော်လိုက်သည်။ ကျန်းယွဲ့လုက ဤတစ်ခေါက်မှာ အလျှော့ပေးခြင်းမရှိဘဲ ထိပ်တိုက်ရင်ဆိုင်ကာ သူတို့၏ တိုက်ခိုက်မှုက တစ်ဖန်ပြန်လည်ပြင်းထန်ကြမ်းတမ်းလာ၏။

မထင်မှတ်ထားစွာပင် အစိမ်းရောင်ဝတ်အမျိုးသမီးက သူမ၏ ဓားနှင့် အတုအယောင်လှုပ်ရှားမှုတစ်ခုကို ပြုလုပ်လိုက်၏။ ထို့နောက် သူမ၏ ဘယ်ဘက်လက်ဖြင့် ကျန်းယွဲ့လုကို ခပ်ပြင်းပြင်းရိုက်ချလိုက်၏။ အံ့ဩစရာကောင်းသော စွမ်းအင်တစ်ခုက ကျန်းယွဲ့လု၏ ခန္ဓာကိုယ်တစ်ခုလုံးကို ချက်ချင်းပင်လွှမ်းခြုံသွားလေသည်။

ကျန်းယွဲ့လုက ထိုလက်ဝါးရိုက်ချက်ကို ရှောင်တိမ်းမည်ဆိုလျှင် သူမက အမျိုးသမီး၏ ဓားချက်ဖြင့် ဒဏ်ရာရရှိသွားပေလိမ့်မည်။ ကျန်းယွဲ့လုက ဒြပ်စင်ငါးမျိုးချီဒိုင်းကာကိုသုံးပြီး သူမ၏ ဘယ်ဘက်လက်ဖဝါးကို ဆန့်ထုတ်ကာ အမျိုးသမီး၏ လက်ဝါးရိုက်ချက်ကို ခုခံလိုက်၏။ လက်ဝါးနှစ်ခု ရိုက်ခတ်မိသည့်အချိန်မှာ ကျယ်လောင်သောအသံထွက်ပေါ်လာပြီး နှစ်ယောက်စလုံးက နောက်သို့စင်ထွက်သွား၏။

ကျန်းယွဲ့လု၏ ဓားက လည်ပတ်၍ အမျိုးသမီး၏ ဓားဆီသို့ ကန့်လန့်ဖြတ်ဝင်ရောက်လာသည်။ အစိမ်းရောင်ဝတ်အမျိုးသမီးက သူမ၏ ဓားကိုမြှောက်ပြီး တိုက်ခိုက်မှုကို ပိတ်ဆို့တားဆီးကာ သူမ၏ချီကို ဘယ်ဘက်လက်ဖဝါးဆီသို့ ပို့လွှတ်လိုက်၏။ သူမ၏ ချီကို ဘယ်ဘက်လက်ဖဝါးဆီသို့ ပို့လွှတ်ကာ အောက်သို့ ရိုက်ချလိုက်၏။ ကျန်းယွဲ့လုက မတတ်သာဘဲ သူမ၏ လက်ဖဝါးကို လှန်ကာ ထိုတိုက်ခိုက်မှုကို ခုခံလိုက်ရသည်။ သူတို့၏ လက်ဖဝါးများက ထိတွေ့မိသောအခါ ခပ်အုပ်အုပ်လက်ခုပ်တီးသံတစ်ချက် ထွက်ပေါ်လာ၏။

အစိမ်းရောင်ဝတ်အမျိုးသမီးက ခပ်ကိုင်းကိုင်းကိုယ်နေဟန်ထားဖြင့် နောက်သို့မျှောချကာ ပေသုံးဆယ်အကွာအဝေးမှာ ရပ်တန့်သွားလေသည်။

ကျန်းယွဲ့လုသည် သူမ၏ လက်ဖဝါးမှာ စပ်ဖျင်းဖျင်းခံစားမှုတစ်ခုကို ရရှိလိုက်ပြီး သွေးများစီးကျလာသည့် အပေါက်ငယ်တစ်ခုကို တွေ့မြင်လိုက်ရသည်။ သူမ၏ လက်ဖဝါးသည် ငွေအပ်တစ်ချောင်းဖြင့် ထိုးဖောက်ခံရပြီး ခန္ဓာကိုယ်ရှိ ချီစီးဆင်းမှုက နှောက်ယှက်ခံလိုက်ရ၏။

ကျန်းယွဲ့လု၏ အမူအရာက ပြောင်းလဲမသွားဘဲ ထေ့ငေါ့လိုက်၏။

“မဆိုးပါဘူး…”

အစိမ်းရောင်ဝတ်အမျိုးသမီးက အသံတစ်ချက်မထွက်ဘဲ ရှေ့သို့ပြန်လည်ပြေးဝင်လာပြီး သူမ၏ ဓားနှင့် ကျန်းယွဲ့လုကို တိုက်ခိုက်လိုက်၏။ သူမမှာ ပေါ့ပါးပျော့ပျောင်းသော ဓားတစ်လက်ရှိသော်လည်း တိုက်ခိုက်မှုက စွမ်းအားကြီးမားပြီး သိပ်သည်းလေးလံနေ၏။

ကျန်းယွဲ့လုက စက္ကူဓားကို ကိုက်မြှောက်ပြီး တိုက်ခိုက်မှုကို ပိတ်ဆို့တားဆီးလိုက်သည်။ သို့သော်လည်း စောစောက အပ်ပေါက်ဒဏ်ရာကြောင့် သူမ၏ ခွန်အားက လျော့ကျသွားပြီး သူမ၏လက်ထဲရှိစက္ကူဓားက ထိတွေ့ရိုက်ခတ်မှုမှာ လွင့်စင်ထွက်သွားသည်။

ရုတ်တရက် ကျန်းယွဲ့လုက လက်ဗလာနှင့် ရှေ့သို့ပြေးဝင်ပြီး သူမနှင့် အမျိုးသမီးကြား အကွာအဝေးကို ဖြတ်တောက်လိုက်၏။ သူမ၏ လှုပ်ရှားမှုက တစ္ဆေတစ်ကောင်ကဲ့သို့ ခန့်မှန်းရခက်ပြီး သူမ၏ တိုက်ခိုက်မှုများက မယုံကြည်နိုင်စရာကောင်းလောက်အောင် မြန်ဆန်ကာ စိတ်ကူးစိတ်သန်းကို ကျော်လွန်နေ၏။

ဤအခိုက်အတန့်မှာ အစိမ်းရောင်ဝတ်အမျိုးသမီးက ခံစစ်အနေအထားသို့ ပြန်လည်ရောက်ရှိကာ တန်ပြန်တိုက်ခိုက်နိုင်ခြင်းမရှိဘဲ အရေးမသာသောအခြေအနေမှာ ရောက်နေသည်ဟု ထင်ရသည်။

သို့သော်လည်း အစိမ်းရောင်ဝတ်အမျိုးသမီးသည် ဖိနှိမ်ခံနေရသည့်ပုံပေါ်သော်လည်း ထိုအမျိုးသမီးက မထိုးဖောက်နိုင်သော ခံစစ်တစ်ခုအား ထိန်းသိမ်းထားသည်ကို ချီရွှမ်းစုက ရှင်းရှင်းလင်းလင်းတွေ့မြင်နေရသည်။ ဆန့်ကျင်ဘက်အနေဖြင့် ကျန်းယွဲ့လုသည် အရေးမသာသောအခြေအနေသို့ တဖြည်းဖြည်းကျဆင်းလာပြီဖြစ်သည်။

အခန်း ၉၄ - ရွှမ်ကျောက်စိမ်းတစ်ဖန်ပေါ်လာခြင်း

ချီရွှမ်းစုထင်မှတ်ထားသည့်အတိုင်း ကျန်းယွဲ့လုက ခြေကုန်လက်ပန်းကျလုနီးပါးဖြစ်လာပြီး အစိမ်းရောင်ဝတ်အမျိုးသမီးက ချက်ချင်းပင် တန်ပြန်စတင်တိုက်ခိုက်လာနိုင်သည်။

တာအိုဂိုဏ်းတော်၏ ထိပ်တန်းဓားပညာရပ်များဖြစ်သော ပေတူဓား ၃၆ လက်နည်းစနစ်၊ ထိုက်ယင်ဓား ၁၃ လက်၊ နန်တူဓား ၂၈ လက်နှင့် စီဟန်ဓားသိုင်းစဉ်တို့သည် အလှည့်အပြောင်းများပေါ် အခြေခံထားသည်။

သို့သော် ကွန်ဖြူးရှပ်ဓားပညာရပ်များက ဆန့်ကျင်ဘက်ဖြစ်သည်။ သူတို့မှာ အလှည့်အပြောင်းအနည်းငယ်သာရှိပြီး ပို၍ တဲ့တိုးဆန်ကာ ပကတိခွန်အားဖြင့် ပြိုင်ဘက်ကို ဖိအားပေးတိုက်ခိုက်တတ်သည်။ တစ်နည်းအားဖြင့်ဆိုသော် ကွန်ဖြူးရှပ်ဓားပညာရပ်များသည် ထိုက်ကျိသဘောတရားကိုဆောင်ပြီး တာအိုဓားပညာရပ်များကတော့ ကွဲပြားခြားနားမှုများစွာထဲမှ ပေါင်းစည်းမှုကို ရှာဖွေခြင်းဖြစ်သည်။

အမျိုးသမီး၏ ကောင်းကင်နှလုံးသား ဓားပညာရပ်ကလည်း ထိုသို့ပင်ဖြစ်၏။ အလှည့်အပြောင်းတချို့ရှိသော်လည်း လှုပ်ရှားကွက်များက သိမ်မွေ့မှုသိပ်မရှိဘဲ အင်အားက အလွန်တရာပြင်းထန်၍ ဟာကွက်မရှိဘဲ သဘာဝဆန်သည်။ ကျန်းယွဲ့လုသည် လမ်းဆုံးတစ်ခုကို ရောက်ရှိလာပြီး ပုန်းကွယ်ဖို့ သို့မဟုတ် ထွက်ပြေးဖို့ မဖြစ်နိုင်တော့သလောက်ပင်။

ကျန်းယွဲ့လုက ကြောက်ရွံ့မှုကို လုံးဝမပြသပေ။ သူမက နောက်သို့မျှောချပြီး စောစောက သူမလက်ထဲကနေ လွတ်ကျသွားသည့် ပုံသဏ္ဌာန်မဲ့စက္ကူကို လက်ဆန့်ကာ ပြန်လည်ဆင့်ခေါ်လိုက်သည်။

ဤအချိန်မှာ ကျန်းယွဲ့လုသည် ပုံသဏ္ဌာန်မဲ့စက္ကူထဲသို့ သူမ၏ ချီကို ထည့်သွင်းပြီး ၎င်းကို လှံတစ်လက်အဖြစ် ပြောင်းလဲလိုက်သည်။

ကျန်းယွဲ့လုက လှံကိုဆုပ်ကိုင်လိုက်သည်နှင့် သူမ၏ လှုပ်ရှားကွက်များက လုံးဝကို ပြောင်းလဲသွား၏။ ယခင်က အစိမ်းရောင်ဝတ်အမျိုးသမီးအသုံးပြုခဲ့သည့် ထိုက်ရွှမ်ဓားနှလုံးသားသိုင်းစဉ်နှင့် တစ်နည်းတစ်ဖုံဆင်တူစွာဖြင့် ကျန်းယွဲ့လုသည် ချီယင်၏ အနန္တဓားနည်းစနစ်ကို အသုံးပြုနေသည်။

ကျန်းယွဲ့လုသည် လမ်းပိတ်ကနေ ဖောက်ထွက်ပြီး စက္ကူလှံအရိပ်ပေါင်းများစွာဖြင့် အစိမ်းရောင်ဝတ်အမျိုးသမီးကို လျင်မြန်စွာလွှမ်းခြုံလာနိုင်သည်။

အစိမ်းရောင်ဝတ်အမျိုးသမီးက ချက်ချင်းပင် သူမ၏ ဓားကို ရုပ်ပြီး အချင်းဆယ်ပေခန့်ရှိသော ချောမွေ့သည့် စက်ဝိုင်းတစ်ခုကို ရေးဆွဲကာ ရေဝဲဂယက်များကဲ့သို့ သူမ၏ ဘေးပတ်လည်မှာ တစ်လွှာပြီးတစ်လွှာဖြာထွက်သွားစေ၏။ သူမ၏ ခံစစ်က ထိုးဖောက်၍မရနိုင်ပေ။ ကျန်းယွဲ့လုက ဘယ်လိုပင်တိုက်ခိုက်သည်ဖြစ်စေ သူမက အစိမ်းရောင်ဝတ်အမျိုးသမီးကို ထိခိုက်အောင်မလုပ်နိုင်ပေ။

ဤအချိန်မှာ ပင်မခန်းမကနေ ကျယ်လောင်သော ညောင်းညောင်းညုန်းညုန်းအသံတစ်သံ ထွက်ပေါ်လာ၏။ ချီရွှမ်းစုက အသံထွက်ပေါ်လာရာဘက်သို့ လှည့်ကြည့်လိုက်ပြီး အသက်ဝင်နေသော ကြီးမားသည့် ဗုဒ္ဓရုပ်တုကို ချိုးဖျက်လိုက်သည့် ဦးပဥ္စင်းငယ်ကို တွေ့မြင်လိုက်ရ၏။ ဦးပဥ္စင်းငယ်က ရုပ်တု၏ လက်များကို ဖြတ်တောက်ရုံမျှသာမဟုတ်ဘဲ ထိုရုပ်တု၏ ကိုယ်ထည်တစ်ခုလုံးကို ကြေမွပျက်စီးစေသွား၏။

သို့သော် ဦးပဥ္စင်းငယ်ကလည်း ဒဏ်ရာအပြင်းအထန်ရရှိသွားသည်။ သူက မြေပြင်ပေါ်မှာ ခြေပစ်လက်ပစ်ထိုင်နေပြီး သည်းထန်စွာမောဟိုက်နေ၏။ သူ့မှာ လောလောဆယ်တိုက်ခိုက်ဖို့ မည်သည့်ခွန်အားမှ မကျန်ရှိတော့သည့်ပုံပင်။

တိုက်ခိုက်နေသော အမျိုးသမီးနှစ်ဦးကလည်း ဦးပဥ္စင်းငယ်ကို လှည့်ကြည့်လာကြ၏။ သို့သော်လည်း အစိမ်းရောင်ဝတ်အမျိုးသမီးက အနည်းငယ်စိတ်မရှည်နိုင်ဖြစ်လာပြီး ကျန်းယွဲ့လုကို ခါချလိုသည့်အတွက် ခံစစ်ကနေ တိုက်စစ်သို့ ပြောင်းလဲလိုက်သည်။

ကျန်းယွဲ့လုက တစ်စုံတစ်ရာလွဲမှားနေသည်ကို သတိထားမိသော်လည်း လောလောဆယ်မှာ တိုက်ခိုက်ခံနေရသည့်အတွက် လေးလေးနက်နက်စဉ်းစားတွေးတောဖို့ အချိန်မရပေ။

ချီရွှမ်းစုသည် အမျိုးသမီးနှစ်ဦး၏ တိုက်ပွဲကို ဘေးကနေ ရပ်ကြည့်နေသူဖြစ်သောကြောင့် ဖြစ်ပျက်နေသည့်အရာကို သတိထားမိလာ၏။ အစိမ်းရောင်ဝတ်အမျိုးသမီးသည် သတ်ဖြတ်ဖို့အတွက် တိုက်ခိုက်ခြင်းမဟုတ်ပေ။ ထိုအစား သူမသည် တစ်စုံတစ်ရာရှာဖွေဖို့အတွက် ပင်မခန်းမရှိရာသို့ သွားချင်နေပုံရသည်။ အရာရာတိုင်းက ချီရွှမ်းစုအတွက် စတင်၍ အဓိပ္ပါယ်ရှိလာ၏။

အစိမ်းရောင်ဝတ်အမျိုးသမီးသည် ယခင်က တိတ်တဆိတ်ချဉ်းကပ်ခဲ့သော်လည်း ထိုအမျိုးသမီး၏ တည်ရှိမှုကို ချီရွှမ်းစုက သတိပေးခဲ့၏။ ထိုအချိန်မှာ အမျိုးသမီးက ကျန်းယွဲ့လုနှင့် စတင်တိုက်ခိုက်ခဲ့ရသည်။ သူတို့ကို အံ့အားသင့်သွားစေသည်မှာ အမျိုးသမီးနှစ်ဦးစလုံးက လက်ရည်တူနေခြင်းပင်။

အစိမ်းရောင်ဝတ်အမျိုးသမီးသည် အစက ကျန်းယွဲ့လုကို အလွယ်တကူအနိုင်ပြီးမှ သူမ ရှာဖွေလိုသည့်အရာကို သွားရောက်ရှာဖွေမည်ဟု တွေးထားခဲ့ပုံရသည်။

ရလဒ်အနေဖြင့် အမျိုးသမီးနှစ်ဦးက ပြင်းထန်ကြမ်းတမ်းသောတိုက်ပွဲတစ်ခုမှာ ကျဆင်းသွားပြီး အစိမ်းရောင်ဝတ်အမျိုးသမီးက ပျာပျာသလဲဖြစ်လာ၏။

အစိမ်းရောင်ဝတ်အမျိုးသမီးက ချင်းဖျင်အသင်းဝင်တစ်ဦးဖြစ်သည်ကိုလည်း ချီရွှမ်းစုက ပြန်လည်အမှတ်ရသွားသည်။

ထိုကနေတစ်ဆင့် ဖုန်ထိုက်ခရိုင်မှာတုန်းက ရွှမ်ကျောက်စိမ်းကိုရှာဖွေရန် ချင်းဖျင်အသင်းတော်က ပေးခဲ့သည့် သူ့တာဝန်ကိုလည်း ပြန်လည်အမှတ်ရသွားခဲ့သည်။

ဖုန်ထိုက်ခရိုင်မှတာဝန်ကို အရိပ်များကြားမှာ ပုန်းကွယ်နေသည့် အစ်မချီက ဦးဆောင်ခဲ့ပြီး သူမ၏လက်အောက်ငယ်သား ချီရွှမ်းစုကတော့ ညစ်ညမ်းသည့်အရာများအားလုံးကို ပြုလုပ်ခဲ့ရသည်။ သို့သော်လည်း အစိမ်းရောင်ဝတ်အမျိုးသမီးသည် သူ့ထက် ကျင့်ကြံမှုအဆင့် များစွာပိုမြင့်လေသည်။ သူမသည် အစ်မချီနှင့် တန်းတူရည်တူရှိလောက်သည်။ သူတို့နှစ်ယောက်စလုံးမှာ ချင်းဖျင်အသင်းတော်တွင် (ခ)အဆင့် အဆင့်အတန်းများကို ညွှန်ပြနေသည့် ရွှေခရမ်းငါးရုပ်အဆောင်တစ်ခုစီ ရှိနေသောကြောင့်ဖြစ်သည်။

ထို့သို့ဆိုပါက အစ်မချီကဲ့သို့ပင် ဤအမျိုးသမီးသည် ရွှမ်ကျောက်စိမ်းကို ရှာဖွေရန်တာဝန်ကို လက်ခံရရှိထားသည်ဟုဆိုပါက အဓိပ္ပါယ်ရှိလေသည်။ တစ်နည်းအားဖြင့်ဆိုသော် ရွှမ်ကျောက်စိမ်းက ဤဗုဒ္ဓဘုရားကျောင်းထဲမှာ ရှိလောက်သည်။

ဤသို့စဉ်းစားရင်း ချီရွှမ်းစုက သူ၏ သားရေအိတ်ကို အလိုလိုစမ်းလိုက်၏။ ထင်မှတ်ထားသည့်အတိုင်း ၎င်းထံကနေ အနည်းငယ်တုန်ခါမှုကို သူခံစားလိုက်ရသည်။ သူက အဲဒါကို မခံစားမိလျှင် မည်သည့်အရာကိုမှ သတိထားမိလိမ့်မည် မဟုတ်ပေ။

၎င်းသည် ချီရွှမ်းစုအား အစ်မချီပေးထားသည့် ထူးခြားသည့် သံလိုက်အိမ်မြောင်မှလာသော တုန်ခါမှုဖြစ်သည်။ ထိုသံလိုက်အိမ်မြှောင်သည် တာအိုဆရာများ ဆောင်ထားလေ့ရှိသည့် ဖုန်းရွှေသံလိုက်အိမ်မြှောင်တစ်ခုလိုပင်ဖြစ်သည်။ ပုံပန်းသဏ္ဌာန်အရ သာမန်သံလိုက်အိမ်မြှောင်တစ်ခုနှင့် ရွှမ်ကျောက်စိမ်းကို ထောက်လှမ်းရန် အသုံးပြုသောထူးခြားသည့် သံလိုက်အိမ်မြှောင်ကြား ကွာခြားမှုကို ရှာတွေ့ဖို့ မလွယ်ပေ။ ထို့ကြောင့် ချီရွှမ်းစုသည် ၎င်းကို ဖုံးကွယ်မထားဘဲ ပိုးထည်စတစ်စဖြင့် ရစ်ပတ်ပြီး သူ၏သားရေအိတ်ထဲမှာသာ ထည့်ထား၏။

ဖုန်ထိုက်ခရိုင်သို့ သူသွားရောက်ခဲ့သည်မှာ နှစ်ဝက်နီးပါးရှိသွားခဲ့လေပြီ။ ထို့ကြောင့် ချီရွှမ်းစုသည် ဤသံလိုက်အိမ်မြှောင်ကို မေ့လျော့သလောက်နီးပါးဖြစ်နေ၏။ ဗုဒ္ဓဘုရားကျောင်းသို့ ဝင်ရောက်လာပြီးနောက် ဤနေရာမှာ ရွှမ်ကျောက်စိမ်းကို တွေ့ရလိမ့်မည်ဟု ထင်မှတ်မထားသောကြောင့် သူက ဤသံလိုက်အိမ်မြှောင်ကို အာရုံမစိုက်ခဲ့ပေ။ ဤဖြစ်နိုင်ခြေကို တွေးမိပြီးမှ သူသည် သံလိုက်အိမ်မြှောင်ထံမှ အနည်းငယ်တုန်ခါမှုကို ခံစားလိုက်ရပြီး ဤနေရာမှာ ရွှမ်ကျောက်စိမ်းရှိနေကြောင်း အတည်ပြုနိုင်သွားသည်။

ရွှမ်ကျောက်စိမ်းက မည်ကဲ့သို့အသုံးဝင်သည်ကို ချီရွှမ်းစုမသိသော်လည်း သူ သေချာသိရှိထားသည့် အချက်တစ်ချက်မှာ ရွှမ်ကျောက်စိမ်းက အလွန်တရာအဖိုးတန်လေသည်။ ရွှမ်ကျောက်စိမ်းကို လိုချင်နေသည်မှာ ချင်းဖျင်အသင်းတော်သာလျှင် မဟုတ်ပေ။ ထိုက်ဖျင်ဂိုဏ်းမှ ပညာရှိတစ်ဦးကလည်း ၎င်းကို လိုချင်နေသည်။

အစ်မချီ၏ အကူအညီနှင့်အတူ ချီရွှမ်းစုသည် ချင်းဖျင်အသင်းတော်ထံမှ ရွှမ်ကျောက်စိမ်းတစ်တုံးကိုရရှိခဲ့ပြီး ဆုလာဘ်အဖြစ် ထျန်ကန်းခန်းမသို့ ဝင်ရောက်နိုင်မည့်အခွင့်အရေးရရှိခဲ့သည်။ သူသည် (ခ)အဆင့် အသင်းဝင်တစ်ဦးအဖြစ်လည်း တိုးမြှင့်ပေးခံခဲ့ရသည်။ သူက ယခုတစ်ခေါက် ရွှမ်ကျောက်စိမ်းကို သူ့ခွန်အားနှင့်အတူ ရယူနိုင်မည်ဆိုလျှင် ဘယ်လိုဆုလာဘ်မျိုးကို သူရရှိမလဲ။

ဤအကြောင်းကိုစဉ်းစားရင်း ချီရွှမ်းစုက စိတ်လှုပ်ရှားမိလာ၏။

ဝမ်ရှန်းတာအိုနန်းတော်မှ ဒေသခံတစ်ဦးအဖြစ် ကြီးပြင်းလာသော ချီရွှမ်းစုက ချမ်းသာကြွယ်ဝသူအဖြစ် မွေးဖွားလာခြင်း မဟုတ်ပေ။ သူသည် ချင်းဖျင်းအသင်းမှ ပေးအပ်သည့်တာဝန်များကို ပြီးမြောက်စေရန် အစ်မချီနှင့်အတူ နေရာအနှံ့လှည့်လည်သွားလာရပြီး ဘယ်တုန်းကမှ သက်တောင့်သက်သာမနေခဲ့ရပေ။ ထို့ကြောင့် ချမ်းသာကြွယ်ဝမှုသည် ကြီးမားသောအန္တရာယ်ကို စွန့်စားဖြင့်သာ ရရှိနိုင်သည်ဟု သူအမြဲတမ်းလက်ခံယုံကြည်ထားသည်။ ဤကဲ့သို့သော စိတ်နေစရိုက်မရှိဘဲ သူသည် ဒက်စ်မန်နှင့် ပိုင်ယုံကွမ်းတို့ကို ဆက်တိုက်သတ်ဖြတ်နိုင်ခဲ့လိမ့်မည်မဟုတ်ပေ။

ခန်းမ၏ အခြားတစ်ဘက်မှာတော့ ကျန်းယွဲ့လုက တစ်ဘက်အမျိုးသမီး တဇွတ်ထိုးဝင်လာခြင်းကို အခွင့်ကောင်းယူကာ အမျိုးသမီး၏ ဝါးခမောက်ကို လှံဖြင့် လွှဲရိုက်ချလိုက်၏။ အမျိုးသမီး၏ ခေါင်းဆောင်းက ကြေမွသွားပြီး ပြင်းထန်ကြမ်းတမ်းသောအင်အားကြောင့် သူမ၏ မျက်နှာပေါ်မှာ သေးငယ်သောအက်ကွဲကြောင်းများစွာ ပေါ်ထွက်လာသည်။

အစိမ်းရောင်ဝတ်အမျိုးသမီးသည် သူမ၏ အစစ်အမှန်ရုပ်ရည်သွင်ပြင်ကို ဖုံးကွယ်ဖို့အတွက် မျက်နှာဖုံးတစ်ခုတပ်ထားသည်မှာ သိသာလေသည်။ ကွဲအက်သွားသည်က သူမ၏ မျက်နှာမဟုတ်ဘဲ မျက်နှာဖုံးဖြစ်သည်။

အစိမ်းရောင်ဝတ်အမျိုးသမီး၏ ဆံပင်များက ဖိုသီဖပ်သီဖြစ်နေ၏။ ရုတ်တရက် အမျိုးသမီး၏ အနက်ရောင်ဆံပင်များက ပေတစ်ရာကျော်ရှည်ထွက်သွား၏။ သူ၏ ဆံချည်မျှင် သုံးထောင်က ကျန်းယွဲ့လုထံသို့ ရောက်ရှိလာ၏။ ဤသည်မှာ တိုက်ခိုက်ဖို့၊ နောက်ဆုတ်ဖို့နှင့် ခုခံဖို့အတွက် အသုံးချနိုင်သော ထိုက်ယင်ဓား ၁၃ လက်ပညာရပ်မှ မဟူရာဆံကေသာချပ်ဝတ်တန်ဆာဖြစ်သည်။

အမျိုးသမီး၏ ဆံပင်က အစုလိုက်ယှက်လိမ်ပြီး ပိုးအိမ်တစ်ခုဖွဲ့စည်းနေသကဲ့သို့ ကျန်းယွဲ့လုကို ရစ်ပတ်လာ၏။ ချက်ချင်းပင် ကျန်းယွဲ့လုက သူမ၏ ဆံပင်ပိုက်ကွန်ထဲမှာ ပိတ်မိသွားသည်။

ဆံချည်မျှင်များက သိုးမွေးကဲ့သို့ နူးညံ့ပြီး ရန်လိုခက်ထန်သော ဓားစွမ်းအင်နှင့် လုံးဝကွဲပြားလေသည်။ ကျန်းယွဲ့လုသည် ရွှံ့ညွန်ထဲမှာ ကျဆင်းသွားသည့်အလား ခံစားလိုက်ရပြီး လှုပ်ရှားဖို့မတတ်နိုင်လုနီးပါးပင်။

တစ်ချိန်တည်းမှာပင် ဆံချည်မျှင်များသည် ကျန်းယွဲ့လု၏ စိတ်ထဲသို့ မရေမတွက်နိုင်သောအတွေးများနှင့် စိတ်ခံစားချက်များကို သွန်းလောင်းပေးလာ၏။

ဆံပင်က ရှည်လျား၍ ဖြူဖွေးလာသည်နှင့် လူတစ်ယောက်၏ စိုးရိမ်ပူပန်မှုများက အကန့်အသတ်မဲ့လာသည်ဟူသော ဆိုရိုးစကားရှိသည်။ ရုပ်ပိုင်းဆိုင်ရာတည်ရှိမှုကို အချိန်က ကန့်သတ်ထားသော်လည်း မကျေမချမ်းမှုများက ထာဝရတည်မြဲလေသည်။

မကျေမချမ်းမှုများသည် ချိုသာသောစကားကိုမုန်းတီးခြင်း၊ ကံဆိုးမိုးမှောင်ကို မုန်းတီးခြင်း၊ နှလုံးသားမဲ့သောလူများကို မုန်းတီးခြင်း၊ အသက်မပါသောဆက်ဆံရေးများကို မုန်းတီးခြင်း၊ လောက၏ ရက်စက်ကြမ်းတမ်းမှုကို မုန်းတီးခြင်း၊ တရားမမျှတမှုကို မုန်တီးခြင်းနှင့် အသွားအလာမရှိသောမေတ္တတရားကို မုန်းတီးခြင်းတို့ ဖြစ်ကြသည်။

မကျေမချမ်းမှု ၇မျိုးဟု လူသိများသော ဤမကျေမချမ်းမှုများသည် လူတစ်ယောက်၏ ဝိညာဉ်ကို တိုက်ရိုက်ချိန်ရွယ်ထားသည့် ဓား ၇လက်ကဲ့သို့ဖြစ်သည်။ ၎င်းသည် ထွက်လမ်းမရှိသော ပင့်ကူအိမ်မှာ ကပ်ညှိသွားသည့် ပိုးမွှားတစ်ကောင်ကဲ့သို့ စိတ်ကိုခိုးယူနိုင်သည်။

ကျန်းယွဲ့လုက အသက်အောင့်ထားပြီး သူမစိတ်ကို တည်ငြိမ်စေလိုက်၏။ သူမလက်ထဲရှိ ပုံသဏ္ဌာန်မဲ့စက္ကူက စက္ကူဓားတစ်လက်အဖြစ် ပြောင်းလဲသွား၏။ ထို့နောက်သူမက စီဟန်ဓားသိုင်းစဉ်မှ ကြွေလွင့်ပန်းများလှုပ်ရှားကွက်ကို အသုံးပြုလိုက်သည်။

နောက်ခဏ၌ မရေမတွက်နိုင်သောဓားချီများက ဆံချည်ပိုက်ကွန်ကို ထိုးဖောက်ကာ အမှတ်တစ်ခုမှစတင်၍ နောက်ဆုံးမှာ အပေါက်များစွာ တိုးလာခဲ့သည်။ ၎င်းသည် အဝတ်တစ်စကို အပ်ပေါင်းများစွာဖြင့် ထိုးဖောက်သကဲ့သို့ဖြစ်သည်။

သတ္တုနှင့်ကျောက်တုံးထိခတ်သည့်အသံက အဆက်မပြတ်ထွက်ပေါ်ပြီး အမျိုးသမီး၏ ဆံချည်မျှင်များက ပြတ်ကျကုန်၏။ သို့သော်လည်း မထိန်းချုပ်နိုင်သည့်ပေါင်းပင်ရိုင်းများကဲ့သို့ ဆံချည်မျှင်များက ထပ်မံ၍ ထွက်ပေါ်လာ၏။ ဆံချည်မျှင်များလျော့ကျသွားစဉ် ကျန်းယွဲ့လု၏ ခန္ဓာကိုယ်က နောက်တစ်ဖန်ပေါ်ထွက်လာသည်။

သို့သော်လည်း ကျန်းယွဲ့လု၏ မျက်နှာက တည်တံ့နေဆဲဖြစ်သည်။ သူမဖြတ်တောက်လိုက်သည့် ဆံချည်မျှင်များသည် အနီးနားမှာ လွင့်မျောပြီး ပို၍ပင်ပြင်းထန်ကြမ်းတမ်းလာသည့် ရှုပ်ထွေးသောအတွေးပေါင်းစုံကို ဖြစ်ပေါ်လာစေခြင်းကြောင့်ပင်။ မကျေမချမ်းမှုများအပြင် ချစ်ခြင်းမေတ္တာခံစားချက်များလည်း ပါဝင်လာသည်။

ချစ်ခြင်းမေတ္တာခံစားချက်များရှိနေသည့် ဤဆံချည်မျှင်အသစ်များနှင့် မကျေမချမ်းမှုများကို ဆုပ်ကိုင်ထားသည့် ဆံချည်မျှင်အဟောင်းများက ရောထွေးယှက်ဖြာပြီး ဧရာမပိုက်ကွန်တစ်ခုကို ယက်လုပ်လိုက်၏။ ဤသည်မှာ ထိုက်ယင်ဓား ၁၃ လက်၏ စွမ်းအားဖြစ်သည်။ အမှားတစ်ချက်မှာ ပြိုင်ဘက်ကို ဤစိတ်ခံစားချက် ပင့်ကူအိမ်ထဲ ရုန်းထွက်မရအောင် ပိတ်လှောင်နိုင်သည်။

မဟာဓားပညာရပ်လေးခုထဲမှာ နန်တူဓား ၂၈ လက်နည်းစနစ်နှင့် ပေတူ ဓား ၃၆ လက်နည်းစနစ်သည် တူညီသောလမ်းစဉ်ကနေလာပြီး ဓားပညာရပ်အပေါ် အာရုံစိုက်ထားသည်။ ဆန့်ကျင်ဘက်အနေဖြင့် စီဟန်ဓားသိုင်းစဉ်နှင့် ထိုက်ယင်ဓား ၁၃ လက်သည် ပြိုင်ဘက်၏ နှလုံးသားနှင့်စိတ်အပေါ် တိုက်ခိုက်ခြင်းမှာ အာရုံစိုက်ထားပြီး အရမ်းကို ရင်သပ်ရှုမောဖွယ်ရာဖြစ်သည်။

ကံကောင်းစွာဖြင့် ကျန်းယွဲ့လုသည် စီဟန်ဓားသိုင်းစဉ်မှ နှလုံးသားဓားသိုင်းစဉ်ကို လေ့ကျင့်ထားပြီးသားဖြစ်သည်။ ထို့ကြောင့် သူမသည် စိတ်ကိုတည်ငြိမ်စေနိုင်ပြီး ဤကဲ့သို့သောနည်းလမ်းများမှာ အရူးလုပ်မခံရေပေ။ သို့သော်လည်း သူမသည် နောက်ဆုံးမှီခိုအားထားရာအဖြစ် အခြားသောနည်းလမ်းတစ်ခုကို ထုတ်သုံးလာရသည်။

နတ်သက်ကြွေအင်မော်တယ်များသည် အရာရာတိုင်းမှာ ကျွမ်းကျင်နှံ့စပ်သောပညာရှင်များဖြစ်သောကြောင့် သူတို့သည်လည်း နတ်ဆရာများ၏ စိတ်ဝိညာည်ရုပ်တုဆင့်ခေါ်ခြင်းကို သိရှိထား၏။

ကျန်းယွဲ့လုက ပေခြောက်ဆယ်ကျော်မြင့်မားသည့် အဖြူရောင်ခန္ဓာနှင့် စိတ်ဝိညာဉ်ရုပ်တုတစ်ခုကို ဆင့်ခေါ်လိုက်၏။ ရုပ်တုက လက်များစွာပေါ်ထွက်လာပြီး တစ်ခဏချင်းမှာပင် ကျန်းယွဲ့လု၏ စိတ်ဝိညာဉ်ရုပ်တုမှာ လက် ၆၄ ဖက် ရှိလာခဲ့ပြီဖြစ်သည်။

ထို့နောက် ပုံသဏ္ဌာန်မဲ့စက္ကူကလည်း ဓား ၆၄ လက်အဖြစ် ပြောင်းလဲသွားသည်။

စိတ်ဝိညာဉ်ရုပ်တုက ပုံသဏ္ဌာန်နှင့်အရွယ်အစားမတူညီသော ဓား ၆၄ လက်ကို ကိုင်ဆွဲထား၏။ ဓားတချို့က ကြီးမားတုတ်ခိုင်ပြီး တချို့က ပေါ့၍ ပါးလွှာသည်။ တချို့က မြွေများကဲ့သို့ ပျော့ပျောင်းပြီး တချို့က တံခါးရွက်များကဲ့သို့ ကျယ်ပြန့်နေ၏။ ဓားများအားလုံးက ပြင်းထန်ကြမ်းတမ်းသော ဓားချီကို ထုတ်ဖော်ထားသည်။ ထို့နောက် စိတ်ဝိညာဉ်ရုပ်တုသည် လက်များထဲမှာ ဓား ၆၄ လက်ကိုကိုင်ပြီး လှည့်ပတ်လိုက်၏။

စီဟန်ဓားသိုင်းစဉ်မှ ဓားနည်းစနစ်များသည် ရှုပ်ထွေးပြီး ခန့်မှန်းဖို့မဖြစ်နိုင်လောက်အောင် ပြောင်းလဲနိုင်လေသည်။ ဓား ၆၄ လက်ထဲ တစ်လက်ချင်းစီမှာ ဓားနည်းစနစ်၏ ကွဲပြားသော အလှည့်အပြောင်းများရှိနေ၏။

စိတ်ဝိညာဉ်ရုပ်တုသည် ဓားနည်းစနစ်၏ အလှည့်အပြောင်း ၆၄ မျိုးကို တစ်ပြိုင်နက်တည်း အသုံးပြုနေသည်ဆိုလျှင်တောင် သူတို့က မည်သည့် ပဋိပက္ခမှမရှိဘဲ လိုက်ဖက်ညီ၍ အလွန်တရာခန့်မှန်းလို့မရဖြစ်နေ၏။

ဓားချီက စွမ်းအားကြီးမားပြီး ဆံချည်ပိုက်ကွန်ကို ဖျက်ဆီးကာ ဆံပင်အပိုင်းအစများကို ပြန့်ကျဲသွားစေ၏။ ထိုသို့ဖြင့် ကျန်းယွဲ့လုသည် မဟူရာဆံချည်ချပ်ဝတ်တန်ဆာကနေ ရုန်းထွက်လာနိုင်ခဲ့သည်။

အမျိုးသမီးက သူမ၏ ဆံပင်ရှည်များကို ပြန်ရုပ်လိုက်၏။ ထိုအခါ မူလက ခါးထိရှည်သောဆံပင်က တစ်ဝက်သာကျန်တော့လေသည်။ ကျန်းယွဲ့လုက အသာစီးရရှိလာသည်ကို ချီရွှမ်းစုတွေ့မြင်ရသည်နှင့် သူက ထိုအခွင့်အလမ်းကို အသုံးချကာ ပင်မခန်းမရှိရာသို့ ဦးတည်လိုက်လေသည်။ သူက ဤနေရာမှာ အကူအညီများစွာ ပေးစရာမလိုတော့သည့်အတွက်ကြောင့်ဖြစ်သည်။