အခန်း (၂၀၃-၂၀၄)

အခန်း (၂၀၃) – [ဓာတ်စွမ်းအင်မျိုး‌စေ့ - (၀)]၊ ဟယ့်မင်ယဲ့နှင့် ပြန်လည်ဆုံတွေ့ခြင်း

“ရွှီနင် ဟုတ်လား”

ဂိုဏ်းတာဝန်ခံကျား၏ စကားကို ကြားလိုက်ရပြီးနောက် ကူကျွမ့်ထံမှ ကြောက်မက်ဖွယ်ကောင်းသော ဖိအားများ ရုတ်တရက် ထွက်ပေါ်လာပြီး ဂိုဏ်းတာဝန်ခံကျား၏ ကိုယ်ပေါ်သို့ ဖိနှိပ်လိုက်လေသည်။ ဂိုဏ်းတာဝန်ခံကျား၏ မျက်နှာမှာ ဖြူဖျော့သွားပြီး အလွန်အမင်း ပြင်းထန်သော ဖိအားကို ခံစားလိုက်ရသည်။

သို့သော် ကူကျွမ့်၏ရှေ့တွင် သူသည် ဘာမှမပြောရဲချေ။

“မင်း သေချာရဲ့လား”

ကူကျွမ့်က ဂိုဏ်းတာဝန်ခံကျားကို ဒေါသထွက်နေသော မျက်နှာထားဖြင့် စိုက်ကြည့်ကာ မေးလိုက်သည်။

ရွှီနင်၏ တည်ရှိမှုက ကူကျွမ့်ကို အတော်လေး စိတ်အနှောင့်အယှက်ဖြစ်စေပြီးသားပင်။ ယခု ဖန်းကျဲ့ ပျောက်ကွယ်သွားခြင်းမှာ ရွှီနင်နှင့်ပင် သက်ဆိုင်နိုင်သည်ဟု ကြားလိုက်ရသောအခါ ကူကျွမ့်၏ရင်ထဲတွင် ဒေါသများ ပေါက်ကွဲထွက်လုမတတ် ဖြစ်သွားရလေသည်။

“သေချာပါတယ်ခင်ဗျာ” ဂိုဏ်းတာဝန်ခံကျားက အလျင်အမြန် ပြန်ဖြေလိုက်သည်။

“ဒီသတင်းကို အတည်ပြုနိုင်ဖို့အတွက် ကျွန်တော် ယွင်ယင်းမြို့အနှံ့ အကြိမ်ကြိမ် စုံစမ်းခဲ့တာပါ”

ကူကျွမ့်က လက်သီးကို ကျစ်ကျစ်ပါအောင် ဆုပ်လိုက်ရာ လက်ဆစ်သံများ တဖျတ်ဖျတ် ထွက်ပေါ်လာသည်။ အကြီးအကဲ ကူကျွမ့်သည် ရွှီနင်မှာ သံသယဖြစ်ဖွယ်အကောင်းဆုံးလူဖြစ်ကြောင်း ယုံကြည်သွားချေပြီ။

ဂိုဏ်းတာဝန်ခံကျား၏ စုံစမ်းချက်အရ ဝေ့မိသားစု၏မျိုးဆက်များ ကယ်တင်ခံရပြီးနောက် အိမ်သို့ ဘေးကင်းစွာ ပြန်ရောက်လာခဲ့ကြကြောင်း သိရသည်။ ထိုသို့ ပြန်လာချိန်တွင် ရွှီနင်သည်လည်း သူတို့နှင့်အတူ ပါရှိနေခဲ့သည်။

ဤကိစ္စ၏နောက်ကွယ်တွင် ရွှီနင် ရှိနေနိုင်ခြေမှာ အလွန်ပင် မြင့်မားလှသည်။

ထို့အပြင် ရွှီနင်သည် ဖုန်းချန်ကောကို သတ်နိုင်ခဲ့သည်ဆိုပါက သူသည် အနည်းဆုံး အစစ်အမှန်ပိုင်နက်နယ်ပယ်သို့ ရောက်ရှိနေပေလိမ့်မည်။

ထိုသို့ဆိုလျှင် လွန်ခဲ့သော လဝက်ခန့်က သူသည် တံဆိပ်တော်နယ်ပယ် သို့မဟုတ် အစစ်အမှန်စိတ်ဆန္ဒနယ်ပယ်သို့ ရောက်ရှိနေနိုင်ခြေ ရှိပေသည်။

အကယ်၍ မီရှင်းယယ်က သူ့ကို တာအိုလက်နက်တစ်ခု ပေးထားမည်ဆိုလျှင် ပေါင့်ချုံးဟွား သို့မဟုတ် ဖန်းကျဲ့ကို သတ်ရန်မှာ သူ့အတွက် အလွန်လွယ်ကူသော ကိစ္စဖြစ်ပေလိမ့်မည်။

‘ဖန်းကျဲ့ ပျောက်ကွယ်သွားတာက သေချာပေါက် သူ့လက်ချက်ပဲ ဖြစ်ရမယ်...’

သက်သေ မရှိသော်လည်း ဤသည်မှာ တိုက်ဆိုင်မှုဟုဆိုရန်မှာမူ အလွန်လွန်ကဲနေချေပြီ။

အကြီးအကဲ ကူကျွမ့်သည် ဤကဲ့သို့သော တိုက်ဆိုင်မှုများ တစ်ချိန်တည်းတွင် ဖြစ်ပေါ်လာလိမ့်မည်ဟု မယုံကြည်ပေ။

ထို့အပြင် ဖန်းကျဲ့ ပျောက်ကွယ်သွားချိန်တွင် ရွှီနင်မှာ ဂိုဏ်းအတွင်း၌ မရှိဘဲ အမှန်တကယ်ပင် အပြင်သို့ ခရီးထွက်နေခဲ့ခြင်း ဖြစ်သည်။

“ဂိုဏ်းတာဝန်ခံကျား... မင်း ကောင်းကောင်း လုပ်နိုင်ခဲ့တယ်”

အကြီးအကဲ ကူကျွမ့်၏အသံမှာ ကြောက်မက်ဖွယ်ကောင်းလောက်အောင် တည်ငြိမ်နေသည်။

ထိုအသံကို ကြားလိုက်ရသဖြင့် ဂိုဏ်းတာဝန်ခံကျားမှာ တစ်ကိုယ်လုံး ချမ်းစိမ့်သွားရလေသည်။

“ဒါက ကျွန်တော့်တာဝန်ပါခင်ဗျာ” ဂိုဏ်းတာဝန်ခံကျားက အမြန်ခေါင်းငုံ့လိုက်သည်။

အကြီးအကဲကူကျွမ့်က သူ့ကို တစ်ချက်ကြည့်လိုက်ပြီးနောက် လက်ကောက်ဝတ်ကို လှည့်လိုက်ရာ ကြွေပုလင်းလေးတစ်လုံး လက်ထဲတွင် ပေါ်လာသည်။

“ဒါက မင်းအတွက် ဆုလာဘ်ပဲ... ပြန်တော့။ မှတ်ထား... ဒီကိစ္စကို ဘယ်သူ့ကိုမှ မပြောနဲ့။ မင်း ဘာမှမသိသလိုပဲ နေလိုက်”

“ဟုတ်ကဲ့... ဟုတ်ကဲ့ပါ...” ဂိုဏ်းတာဝန်ခံကျားက အလျင်အမြန် တုံ့ပြန်ကာ နောက်သို့ဆုတ်လိုက်သည်။

ထို့နောက် သူသည် တစ်စုံတစ်ခုကို သတိရသွားဟန်ဖြင့် “ကျေးဇူးတင်ပါတယ် အကြီးအကဲ...” ဟု ပြောလိုက်ပြီး အခန်းထဲမှ ထွက်ခွာသွားလေတော့သည်။

အခန်းထဲတွင် ကူကျွမ့်တစ်ယောက်တည်း ပြန်လည်ကျန်ရစ်ခဲ့သည်။

“ဖန်းကျဲ့...” ကုကျွမ့်၏မျက်လုံးများမှာ အေးစက်နေသည်။

ဖန်းကျဲ့မှာ သေဆုံးသွားနိုင်ခြေရှိကြောင်းကို သူ နားလည်ထားလေသည်။

“ရွှီနင်...”

ကူကျွမ့်သည် ရွှီနင်ကို အလွန်မုန်းတီးနေချေပြီ။

ဤအချက်ကို သိလိုက်ရသည်နှင့်တစ်ပြိုင်နက် ရွှီနင်ကို ချက်ချင်း သတ်ပစ်ချင်စိတ်များ ပေါ်လာတော့သည်။

‘ရွှီနင်ကိုယ်တိုင် မဟုတ်ရင်တောင် သူက ဒီကိစ္စမှာ ပါဝင်ပတ်သက်နေတာ သေချာတယ်...’

ကူကျွမ့်သည် ဖန်းကျဲ့၏အခြေအနေကို ရွှီနင်ထံမှ မည်သို့စုံစမ်းရမည်ကို စဉ်းစားနေသည်။

‘ရွှီနင်က ဖုန်းချန်ကောကို သတ်နိုင်ခဲ့တာဆိုတော့ သူ့မှာ တာအိုလက်နက်ရှိရမယ်... ပြီးတော့ သူက အစစ်အမှန်ပိုင်နက်နယ်ပယ်မှာလည်း ရောက်နေရမယ်...’

ရွှီနင်နှင့်ပတ်သက်သည့် ကူကျွမ့်၏ခန့်မှန်းချက်မှာ အခြေခံအားဖြင့် မှန်ကန်နေသော်လည်း အချို့နေရာများတွင် လွဲချော်မှုများ ရှိနေသေးသည်။

ရွှီနင်က ဖုန်းချန်ကောကို သတ်လိုက်သည်ဆိုသော သတင်းမှာ မှန်ကန်သော်လည်း ဖုန်းချန်ကောမှာ တာအိုနယ်ပယ်အဆင့်သို့ တက်လှမ်းရန် ခြေတစ်လှမ်းအလိုသို့ ရောက်ရှိနေပြီဖြစ်ကြောင်း သတင်းမှာမူ လူအများသိရှိခြင်း မရှိသေးချေ။

ထို့ကြောင့် ကုကျွမ့်က ရွှီနင်၏တိုက်ခိုက်ရေးစွမ်းရည်မှာ အစစ်အမှန်ပိုင်နက်နယ်ပယ်၏ အမြင့်ဆုံးအဆင့်တွင်သာ ရှိသည်ဟု ထင်မှတ်နေခြင်း ဖြစ်သည်။

‘ငါက အစစ်အမှန်ပိုင်နက်နယ်ပယ်ထဲမှာ နေလာတာ ကြာပြီ... တာအိုနယ်ပယ်ကို တက်လှမ်းဖို့ ခြေတစ်လှမ်းပဲ လိုတော့တာ။ ဒါ့အပြင် ငါ့မှာလည်း တာအိုလက်နက် ရှိနေတာပဲ။ အခွင့်အရေးသာ ရမယ်ဆိုရင် ရွှီနင်ကို သတ်ဖို့က မခက်ဘူး...’

အကြီးအကဲ ကူကျွမ့်က တွေးတောနေလေသည်။

‘ဒါပေမဲ့... ငါ့ရည်ရွယ်ချက်က သူ့ကို တိုက်ရိုက်သတ်ဖို့ မဟုတ်ဘူး။ သူ့ကို အရှင်ဖမ်းပြီး ဖန်းကျဲ့ရဲ့အခြေအနေကို မေးမြန်းရမယ်...’

ဖန်းကျဲ့မှာ အသတ်ခံလိုက်ရနိုင်ကြောင်း သိထားသော်လည်း အကြီးအကဲကူကျွမ့်တွင် မျှော်လင့်ချက်အနည်းငယ် ရှိနေသေးသည်။

‘ငါ့အင်အားတစ်ခုတည်းနဲ့ သူ့ကို အရှင်ဖမ်းဖို့က ခက်ခဲလိမ့်မယ်။ ဘေးကင်းဖို့အတွက် ငါ အကူအညီ ရှာရမယ်...’

အကြီးအကဲ ကုကျွမ့်၏မျက်လုံးများထဲတွင် အေးစက်သော အငွေ့အသက်များ ပြည့်နှက်နေသည်။

ခေတ္တမျှ စဉ်းစားပြီးနောက် သူသည် အင်္ကျီလက်ကို ခါယမ်းကာ အခန်းထဲမှ ထွက်ခွာခဲ့ပြီး အကြီးအကဲတောင်ထိပ်မှ ဆင်းလာခဲ့လေသည်။

ဖန်းကျဲ့နှင့်ပတ်သက်သည့် သတင်းများ ရရှိသော်လည်း အကြီးအကဲ ကူကျွမ့်သည် သွမ့်ချင်းဟွေးအား အစီရင်ခံရန် မှာကြားချက်ကို မလိုက်နာခဲ့ပေ။

အဘယ်ကြောင့်ဆိုသော် သူသည် ရွှီနင်အား တိုက်ခိုက်မည့်ကိစ္စကို လျှို့ဝှက်ထားရန် လိုအပ်သောကြောင့် ဖြစ်သည်။

ယခုအချိန်တွင် ရွှီနင်သည် ကူကျွမ့်၏ပစ်မှတ်ထားခြင်း ခံနေရသည်ကို မသိရှိသေးပေ။

အကယ်၍ သိရှိခဲ့လျှင်ပင် ရွှီနင်မှာ ထိတ်လန့်သွားမည် မဟုတ်ပါချေ။ သူသည် အစစ်အမှန်ပိုင်နက်နယ်ပယ်၏ အမြင့်ဆုံးအဆင့်သို့ ရောက်ရှိနေရုံသာမက ရေမီးနှစ်သွယ်မူလကျမ်းစာကိုလည်း ကျင့်ကြံထားသည်။

ထို့အပြင် လျှို့ဝှက်နည်းစနစ် လေးခုကို အဆင့်ကိုးအထိ လေ့ကျင့်ထားပြီး တာအိုလက်နက် လက်ကာကိုလည်း ပိုင်ဆိုင်ထားလေသည်။

တာအိုလက်နက်ကိုင်ဆောင်ထားသော တစ်ဝက်တစ်ပျက်တာအိုနယ်ပယ် ပညာရှင်တစ်ဦးပင်လျှင် သူ့ကို ယှဉ်နိုင်လိမ့်မည် မဟုတ်ပေ။

အိမ်ထဲတွင်…

ဝုန်း...

ကြည်လင်ပြီး သန့်စင်သော ဆေးလုံးတစ်လုံးသည် ရွှီနင်၏ရှေ့ရှိ ဆေးဖိုထဲမှ ပျံထွက်လာသည်။ ရွှီနင်က ၎င်းကို လှမ်းဖမ်းလိုက်ရာ လက်ထဲတွင် ပူနွေးသော အငွေ့အသက်ကို ခံစားလိုက်ရလေသည်။

‘ဒါက နှလုံးမဲ့ဆေးလုံးလား...’

ရွှီနင်သည် ဤဆေးလုံးကို ဖော်စပ်ရန်အတွက် လိုအပ်သော ဆေးဖက်ဝင်ပစ္စည်းများကို ရက်ပေါင်းများစွာ စုဆောင်းခဲ့ရပြီး ခြောက်ကြိမ်မြောက် ကြိုးစားမှုတွင်မှ အောင်မြင်ခဲ့ခြင်း ဖြစ်သည်။

‘ဒီနှလုံးမဲ့ဆေးလုံးကို ဖော်စပ်ရတာက တကယ်ကို ခက်ခဲတာပဲ...’

နှလုံးမဲ့ဆေးလုံးသည် ထူးခြားဆန်းပြားသော ဆေးဖော်စပ်သူများအတွက် သီးသန့်ဆေးလုံးဖြစ်သော်လည်း ရွှီနင်မှာ မှင်ရောင်လဆေးကျမ်းကို အဆင့်ကိုးအထိ လေ့ကျင့်ထားသော်လည်း ငါးကြိမ်တိုင်တိုင် ရှုံးနိမ့်ခဲ့ရသည်။

၎င်းကပင် ဤဆေးလုံးကို အောင်မြင်အောင် ဖော်စပ်ရန် မည်မျှခက်ခဲကြောင်း ပြသနေလေသည်။

‘ငါ့မှာ ဆေးဖက်ဝင်ပစ္စည်း လေးစုံ ကျန်သေးတယ်... နောက်ထပ် နှလုံးမဲ့ဆေးလုံး တစ်လုံးလောက် ထပ်ပြီး ဖော်စပ်ကြည့်ရမယ်...’

ယခု ဆေးလုံးတစ်လုံး အောင်မြင်သွားပြီဖြစ်ရာ သူသည် စိတ်အားတက်ကြွနေသည်။

အကယ်၍ နောက်ထပ်တစ်လုံး ထပ်မံရရှိခဲ့လျှင် အနာဂတ်အရေးပေါ်အခြေအနေများအတွက် အဆင်သင့် ဖြစ်နေပေလိမ့်မည်။

သို့နှင့် ရွှီနင်သည် ပစ္စည်းများကို ထပ်မံထည့်လိုက်သည်။ နောက်ထပ်တစ်ကျော့ပြန် ဖော်စပ်ပြီးနောက် ကျန်ရှိနေသော လေးစုံကို အသုံးပြုကာ နောက်ထပ်နှလုံးသားမဲ့ဆေးလုံးတစ်လုံးကို ရွှီနင် အောင်မြင်စွာ ဖော်စပ်နိုင်ခဲ့လေသည်။

“ရိုးရာဆေးဖော်စပ်နည်း ဖြစ်ဖြစ်၊ ထူးခြားဆန်းပြားတဲ့ ဆေးဖော်စပ်နည်း ဖြစ်ဖြစ်... နှစ်မျိုးလုံးက တကယ်ကို နက်ရှိုင်းလှတာပဲ”

မတူညီသော သဘောတရားများရှိသည့် ဆေးဖော်စပ်နည်း နှစ်မျိုးလုံးကို တတ်မြောက်ပြီးနောက် ရွှီနင်သည် ဆေးဝါးများနှင့်ပတ်သက်သည့် နားလည်မှုမှာ ပိုမိုနက်ရှိုင်းလာခဲ့လေသည်။

‘ငါ တာအိုနယ်ပယ်ကျင့်စဉ်ကို သိရှိပြီးပြီဆိုတော့ နောက်ထပ်လုပ်ရမှာက လျှို့ဝှက်နည်းစနစ်အသစ် နှစ်ခုကို အဆင့်ကိုးအထိ မြှင့်တင်ဖို့နဲ့ မူလဓာတ်စေ့တွေကို စုစည်းဖို့ပဲ...’

ရွှီနင်သည် ယခင်က တာအိုနယ်ပယ်နည်းလမ်းကို ရေးထိုးရန် ကြိုးစားခဲ့ဖူးသည်။

သို့သော် ထူးဆန်းသည်မှာ သူ မအောင်မြင်ခဲ့ခြင်း ဖြစ်သည်။ ၎င်းမှာ ရွှီနင်၏ပါရမီ မပြည့်စုံ၍ မဟုတ်ဘဲ တာအိုနယ်ပယ်နည်းလမ်းမှာ သိုင်းပညာနည်းစနစ်တစ်ခု မဟုတ်ဘဲ နည်းလမ်းတစ်ခုသာ ဖြစ်နေသောကြောင့် ဖြစ်သည်။

ရွှီနင် နားလည်သွားပြီးနောက် တာအိုနယ်ပယ်နည်းလမ်းမှာ သိုင်းပညာမျက်နှာပြင်တွင် ပေါ်မလာခဲ့သော်လည်း သိုင်းပညာမျက်နှာပြင်မှာ ပြောင်းလဲသွားခဲ့သည်။

ရွှီနင်က အစစ်အမှန်ပိုင်နက်နယ်ပယ်သို့ တက်လှမ်းပြီးနောက် ရေမီးနှစ်သွယ်မူလကျမ်းစာဘေးရှိ “+” အမှတ်အသားမှာ ပျောက်ကွယ်သွားခဲ့လေသည်။

၎င်းသည် ရေမီးနှစ်သွယ်မူလကျမ်းစာကို အမြင့်ဆုံးအထိ ကျင့်ကြံပြီးဖြစ်ရာ ထပ်မံမြှင့်တင်၍ မရတော့ကြောင်း ဆိုလိုခြင်း ဖြစ်သည်။

သို့သော် တာအိုနယ်ပယ်နည်းလမ်းကို နားလည်ပြီးနောက်တွင်မူ “+” အမှတ်အသားမှာ ပြန်လည်ပေါ်ပေါက်လာခဲ့သည်။

ယခုအခါ ထိုနေရာတွင် ‘ရေမီးနှစ်သွယ်မူလကျမ်းစာ (ဟင်းလင်းပြင်နယ်ပယ် နဝမအဆင့် - အစစ်အမှန်ပိုင်နက်နယ်ပယ် [ဓာတ်စွမ်းအင်မျိုးစေ့ - ၀] +’ ဟု ပြောင်းလဲသွားသည်။

၎င်းသည် ရွှီနင်အတွက် ဆက်လက်မြှင့်တင်ရန် နည်းလမ်းရှိနေပြီဟု ဆိုလိုခြင်း ဖြစ်သည်။

သို့သော် မြှင့်တင်ရန် နည်းလမ်းရှိသော်လည်း ရွှီနင်သည် နောက်ထပ်ပြဿနာတစ်ခုနှင့် ရင်ဆိုင်နေရသည်။ ၎င်းမှာ သူသည် စွမ်းအင်ယူနစ် အမြောက်အမြား လိုအပ်နေခြင်းပင်။

သူသည် ဟင်းလင်းပြင်နယ်ပယ် လျှို့ဝှက်နည်းစနစ် နှစ်ခုကိုလည်း သင်ယူရဦးမည်ဖြစ်ပြီး ၎င်းတို့ကို အဆင့်ကိုးအထိ မြှင့်တင်ရန်အတွက် စွမ်းအင်ယူနစ် ၃၀,၀၀၀ ကျော် လိုအပ်မည် ဖြစ်သည်။

ထို့အပြင် မူလဓာတ်စေ့ တစ်စေ့ကို စုစည်းရန်အတွက် စွမ်းအင် ၂၅,၀၀၀ ကုန်ကျမည်ဖြစ်ပြီး ဓာတ်စေ့ခြောက်စေ့လုံးအတွက်ဆိုလျှင် စွမ်းအင် ၁၅၀,၀၀၀ အထိ ကုန်ကျပေလိမ့်မည်။

ဤမျှလောက် များပြားသော ပမာဏကို ရရှိရန်အတွက် ဆေးလုံးများ ဖော်စပ်ကာ ရောင်းချနေလျှင်ပင် အချိန်အတော်ကြာ လိုအပ်ပေလိမ့်မည်။

စွမ်းအင် ၁၈၀,၀၀၀ ဆိုသည်မှာ မီရှင်းယယ်၊ ကူကျွမ့် သို့မဟုတ် ယွမ်ချန်တို့ကဲ့သို့ အကြီးအကဲများသာ ပိုင်ဆိုင်နိုင်သည့် အရင်းအမြစ်ပမာဏမျိုး ဖြစ်သည်။

ထို့အပြင် မူလဓာတ်စေ့ ခြောက်စေ့နှင့်အတူ တစ်ဝက်တစ်ပျက် တာအိုနယ်ပယ်သို့ တက်လှမ်းရန်အတွက် မီရှင်းယယ်၏စုဆောင်းထားသမျှ အရာအားလုံးကို ပေးရန် သူ မတောင်းဆိုနိုင်ပါချေ။

‘တကယ်လို့ တခြားနည်းလမ်း မရှိတော့ဘူးဆိုရင် အချိန်ယူပြီးတော့ပဲ စွမ်းအင်တွေကို စုဆောင်းရတော့မယ်...’

ဆေးလုံးများရောင်းချခြင်းမှာ အချိန်ကြာမြင့်သော်လည်း စိတ်ချရသော နည်းလမ်းတစ်ခု ဖြစ်သည်။

၎င်းသည် ရွှီနင်အတွက် နောက်ဆုံးသော အားကိုးရာပင်။

သို့သော် ရွှီနင်မှာမူ လိုအပ်သည့်စွမ်းအင်များကို တစ်ခါတည်း ဖြည့်တင်းနိုင်ရန်အတွက် အရင်းအမြစ် အမြောက်အမြားကို ရရှိလိုနေဆဲ ဖြစ်သည်။

ဝမ်ရှန့်ပြည်နယ်မှ လူများမှာ သူ့အတွက် ကြီးမားသော ခြိမ်းခြောက်မှုတစ်ခု ဖြစ်လေသည်။

သူ့အင်အားကို မြှင့်တင်နိုင်မှသာ မသေချာသော အခြေအနေများကို ပိုမိုကောင်းမွန်စွာ ကိုင်တွယ်နိုင်ပေလိမ့်မည်။

‘မြူမှောင်ချောက်နက်ကြီးကို အရင်သွားရမလား...’

‘တကယ်လို့ ငါ မိစ္ဆာသားရဲကျမ်းစာထဲကို ထပ်ဝင်နိုင်မယ်ဆိုရင် ရွှီးဟူကျွင်းနဲ့ မီးခိုးရောင်လေးတို့က ငါ့ကို ကူညီပေးနိုင်လိမ့်မယ်။ မိစ္ဆာသားရဲကျမ်းစာထဲမှာ အရင်းအမြစ်တွေ အများကြီး ရှိတာပဲဟာ...’

ရွှီနင် တွေးတောကာ မိစ္ဆာသားရဲကျမ်းစာထဲမှ စွမ်းအင်အရင်းအမြစ်များကို ရှာဖွေရန် ဆုံးဖြတ်လိုက်သည်။

သို့သော် ထိုသို့မလုပ်မီ ရွှီနင်သည် မီရှင်းယယ်နှင့် အရင်ဆွေးနွေးရဦးမည် ဖြစ်သည်။

လတ်တလောတွင် သူ၏တိုက်ခိုက်ရေးစွမ်းရည်မှာ မြင့်မားနေပြီး ဂိုဏ်း၏အဓိကအဖွဲ့ဝင် ဖြစ်နေပြီ ဖြစ်သည်။

ယွဲ့လန်ဂိုဏ်းတွင် စီမံစရာကိစ္စများစွာ ရှိနေသဖြင့် ရွှီနင်အနေဖြင့် သူ့ကို ကူညီပေးရပေမည်။

ထို့အပြင် ရွှီနင်သည် နှလုံးမဲ့ဆေးလုံး၏အာနိသင်ကို သိရှိနိုင်ရန် ချူယဲ့ယန်ကိုလည်း တိုက်ကျွေးကြည့်ရဦးမည် ဖြစ်သည်။

ထို့နောက်တွင်တော့ ရွှီနင်သည် ကျန်ရှိနေသော ဆေးဖက်ဝင်ပစ္စည်းများကို အသုံးပြုကာ ဆေးလုံးအချို့ကို ဖော်စပ်လိုက်လေသည်။

ရွှီနင်သည် တောင်ထိပ်သို့ သွားရန် ပြင်နေစဉ်မှာပင် ဟယ့်မင်ယဲ့မှာ ယွဲ့လန်ဂိုဏ်းသို့ ပြန်ရောက်နေပြီဖြစ်ကြောင်းနှင့် တပည့်ရင်းများ၏တောင်ထိပ်တွင် ရှိနေကြောင်း တပည့်တစ်ဦးထံမှ ကြားလိုက်ရသည်။ ၎င်းကို ကြားလိုက်သောအခါ ရွှီနင်သည် စိတ်ပြောင်းသွားပြီး စီနီယာဖြစ်သူ ဟယ့်မင်ယဲ့ကို အရင်သွားတွေ့ရန် ပြင်ဆင်လိုက်လေသည်။

ရွှီနင်သည် တပည့်ရင်းများတောင်ထိပ်ရှိ ဟယ့်မင်ယဲ့၏ခြံဝင်းသို့ သွားခဲ့သည်။ တံခါးဝတွင် ဟယ့်မင်ယဲ့၏ခြံဝင်းထဲမှ ဓားကိုင်ထားသည့် လူငယ်နှစ်ဦးကို ရွှီနင် တွေ့လိုက်ရသည်။

ဟယ့်မင်ယဲ့ မထွက်ခွာမီ သူတို့မှာ သာမန်လူသားနယ်ပယ်တွင်သာ ရှိသေးသော်လည်း ယခုအခါတွင်မူ နှစ်ဦးလုံးမှာ ဟင်းလင်းပြင်နယ်ပယ်သို့ ရောက်ရှိနေကြပြီ ဖြစ်သည်။

၎င်းမှာ ဟယ့်မင်ယဲ့ ပြန်ရောက်လာပြီးနောက် သူတို့ကို သင်ကြားပေးလိုက်ခြင်းကြောင့် ဖြစ်ပေလိမ့်မည်။

“ဂိုဏ်းတူအစ်ကိုရွှီ...”

သူတို့နှစ်ဦးမှာ ရွှီနင်ကို မြင်လိုက်ရသော်လည်း အံ့အားသင့်ဟန် မရှိချေ။ သူတို့မှာ ရွှီနင်ကို စောင့်နေကြသည်နှင့်ပင် တူလှသည်။

“ဂိုဏ်းတူအစ်ကိုဟယ့် ပြန်ရောက်လာတုန်းက ဂိုဏ်းတူအစ်ကိုရွှီကို လာရှာမလို့ပါပဲ... ဒါပေမဲ့ ဂိုဏ်းတူအစ်ကို ကျင့်ကြံနေတယ်ဆိုတာ သိလို့ မနှောင့်ယှက်တော့တာပါ။ အစ်ကို ကျင့်ကြံရာက ထွက်လာရင် သူ့ဆီကို သေချာပေါက် လာလိမ့်မယ်ဆိုတာ သူသိနေတာမို့လို့ အိမ်ထဲမှာ စောင့်နေပါတယ်” ဓားကိုင်ထားသည့်လူငယ်က ပြောလိုက်သည်။

ရွှီနင်က ထိုစကားကို ကြားသောအခါ ပြုံးလိုက်ပြီး “နားလည်ပါပြီ” ဟု ပြောကာ ဗီလာထဲသို့ ဝင်ခဲ့သည်။

ယခုအချိန်တွင် ရွှီနင်သည် ဟယ့်မင်ယဲ့၏အငွေ့အသက်ကို ခံစားနေရပြီ ဖြစ်သည်။ ဟယ့်မင်ယဲ့သည်လည်း ဟင်းလင်းပြင်နယ်ပယ် နဝမအဆင့်သို့ တက်လှမ်းနိုင်ခဲ့ပြီ ဖြစ်လေသည်။

“ဂိုဏ်းတူညီလေး...”

ဟယ့်မင်ယဲ့သည် အပြင်သို့ ထွက်ကာ သူ့ကို ကြိုဆိုလိုက်သည်။ ရွှီနင် ရောက်လာချိန်တွင် ဟယ့်မင်ယဲ့သည်လည်း ရွှီနင်၏အငွေ့အသက်ကို အာရုံခံမိလိုက်ခြင်း ဖြစ်သည်။

“ဂိုဏ်းတူအစ်ကို...”

အချိန်အတော်ကြာ မတွေ့ရပြီးနောက် သူတို့နှစ်ဦးမှာ တစ်ဦးကိုတစ်ဦး ကြည့်ကာ ရင်းနှီးစွာ ပြုံးလိုက်ကြလေသည်။

“အစစ်အမှန်ပိုင်နက်နယ်ပယ်ကို ရောက်ရှိခဲ့တဲ့အတွက် ဂုဏ်ယူပါတယ် အစ်ကိုကြီး...”

ရွှီနင်က လက်ယှက်ကာ ဂုဏ်ပြုလိုက်သည်။

“ဂိုဏ်းတူညီလေးကလည်း နောက်နေပြန်ပြီ...”

ဟယ့်မင်ယဲ့က ရှေ့သို့ လှမ်းလာပြီး ပြေားလိုက်သည်။ “မင်း ဖုန်ချန်ကောကို သတ်ခဲ့တာနဲ့ နှိုင်းယှဉ်ရင် ငါက မင်းရဲ့နောက်မှာ အဝေးကြီး ကျန်နေပါသေးတယ်”

ဟယ့်မင်ယဲ့၏လေသံထဲတွင် မနာလိုမှုများမရှိဘဲ ဝမ်းသာပီတိ ဖြစ်နေဟန်သာ ရှိသည်။

“အစ်ကိုကြီး... ဂိုဏ်းကနေ ခဏလောက် ထွက်သွားခဲ့တာဆိုတော့ ဘယ်နေရာတွေကို သွားဖြစ်ခဲ့လဲ... ထူးထူးခြားခြားတွေကော တွေ့ခဲ့လား”

ရွှီနင်က မေးလိုက်သည်။

“ငါ ချောက်နက်ကြီးမြောက်ပိုင်းက ပြည်နယ် ၁၇ ခုရဲ့ တစ်ဝက်လောက်ကို လှည့်ပတ်ခဲ့တာလေ။ ငါ့ရဲ့စိတ်စွမ်းအားကို လေ့ကျင့်နိုင်ခဲ့သလို သိုင်းပညာပိုင်းမှာလည်း အများကြီး တိုးတက်လာတယ်။ ကဲ... လာပါဦး... နောက်ဖေးခြံထဲမှာ စကားတွေ အေးအေးဆေးဆေး ပြောကြတာပေါ့”

သူတို့နှစ်ဦးတွင် အချင်းချင်း ပြောစရာစကားများစွာ ရှိနေကြလေတော့သည်။

အခန်း (၂၀၄) - ကူကျွမ့်၏ ကလဲ့စားချေမှု

ဟယ့်မင်ယဲ့သည် ရွှီနင်ကို နောက်ဖေးခြံဝင်းအတွင်း ခေါ်ဆောင်သွားပြီးနောက် နောက်ဆုံးတွေ့ဆုံခဲ့ချိန်မှစ၍ သူတို့ကြုံတွေ့ခဲ့ရသော အတွေ့အကြုံများကို အပြန်အလှန် ပြောပြကြလေသည်။

ထို့နောက် စကားဝိုင်းမှာ လမ်းကြောင်းမျိုးစုံသို့ ရောက်ရှိသွားပြီးနောက် နောက်ဆုံးတွင် သိုင်းပညာအကြောင်းသို့ ပြန်လည်ရောက်ရှိလာခဲ့သည်။

“ညီလေး... မင်းက လျှို့ဝှက်နည်းစနစ်လေးခုလုံးကို ကိုးဆင့်မြောက်အထိ ကျင့်ကြံပြီးပြီပဲ၊ မင်းရဲ့ ဓာတ်စွမ်းအင်မျိုးစေ့တွေကို စုစည်းဖို့ အစီအစဉ်မရှိသေးဘူးလား”

ဟယ့်မင်ယဲ့၏ လေသံမှာ စူးစမ်းလိုစိတ်များ ပြည့်နှက်နေသည်။

“ကျွန်တော် စုစည်းဖို့ ပြင်ဆင်နေပါပြီ”

ရွှီနင်က ဖုံးကွယ်မထားဘဲ ပြောလိုက်သည်။

ဓာတ်စွမ်းအင်မျိုးစေ့များကို စုစည်းခြင်းဖြစ်စေ၊ ဟင်းလင်းပြင်နယ်ပယ် လျှို့ဝှက်နည်းစနစ်များကို လေ့လာခြင်းဖြစ်စေ ရွှီနင်သည် တစ်ပြိုင်နက်တည်း လုပ်ဆောင်နိုင်စွမ်း ရှိပေသည်။ ထိုလုပ်ငန်းစဉ်နှစ်ခုမှာ တစ်ခုနှင့်တစ်ခု အဟန့်အတား ဖြစ်မနေပေ။

ရွှီနင်သည် ပထမဦးစွာ ဓာတ်စွမ်းအင်မျိုးစေ့ လေးခုကို စုစည်းနိုင်ပြီး၊ ထို့နောက် လျှို့ဝှက်နည်းစနစ်သစ် နှစ်ခုကို သင်ယူကာ ကျန်ရှိသော ဓာတ်စွမ်းအင်မျိုးစေ့နှစ်ခုကို နောက်ဆုံးမှ စုစည်းနိုင်သည်။

တာအိုနယ်ပယ်တစ်ဝက်အဆင့် သိုင်းပညာရှင်အများစုမှာ ဤနည်းလမ်းအတိုင်းပင် လုပ်ဆောင်ကြခြင်း ဖြစ်သည်။

ယွဲ့လန်ဂိုဏ်းမှ အကြီးအကဲများဖြစ်ကြသော ချိုးရန့်ရှန်းနှင့် တုယွမ်တို့ကို ဥပမာထားကြည့်လျှင် သိသာနိုင်သည်။ သူတို့သည် နှစ်ပေါင်းတစ်ရာကျော် ကျင့်ကြံခဲ့ကြပြီး တစ်ဝက်တစ်ပျက် တာအိုနယ်ပယ်အဆင့် သိုင်းပညာရှင်များ ဖြစ်လာရန် ဓာတ်စွမ်းအင်မျိုးစေ့များကို စုစည်းထားခဲ့ကြသည်မှာ ကြာပြီဖြစ်သည်။

သို့သော် ပြီးပြည့်စုံသော အဆင့်တက်လှမ်းမှုဖြစ်စေရန်အတွက်၊ ဆိုလိုသည်မှာ တူညီသောဓာတ်သဘာဝရှိသည့် တာအိုနယ်ပယ်မျိုးစေ့ သုံးခုလုံးအား စုစည်းနိုင်ရန်အတွက် သူတို့သည် အဆင့်တက်လှမ်းမှုကို တမင်တကာ ထိန်းချုပ်ထားကြပြီး သူတို့၏ ဟင်းလင်းပြင်နယ်ပယ် လျှို့ဝှက်နည်းစနစ်အသစ်ကို ကိုးဆင့်မြောက်အထိ ရောက်အောင် အရင်ကျင့်ကြံလေ့ ရှိကြသည်။

ထို့ကြောင့်လည်း ထိပ်တန်းဂိုဏ်းကြီးများတွင် ခိုင်မာသော အခြေခံအုတ်မြစ်များ ရှိနေပြီး ဝမ်ရှန့်ပြည်နယ်မှလူများကို ရင်ဆိုင်ရာတွင် အားကိုးရာမဲ့ ဖြစ်မနေရခြင်းဖြစ်ကြောင်း ဖုန်းရှိုးက ပြောခဲ့ခြင်း ဖြစ်ပေသည်။

အကယ်၍ အရေးကြီးသော အချိန်အခါမျိုး ရောက်လာခဲ့လျှင် မိမိတို့၏ အစွမ်းကို ထိန်းချုပ်ထားသော ဤတစ်ဝက်တစ်ပျက်တာအိုနယ်ပယ်အဆင့် သိုင်းပညာရှင်များသည် အချိန်မရွေး တာအိုနယ်ပယ်သို့ အမြန်ဆုံး တက်လှမ်းသွားနိုင်ကြသည်။ ထိုသို့အလျင်စလို တက်လှမ်းခြင်းကြောင့် ရရှိလာမည့် အကျိုးသက်ရောက်မှုမှာ အနည်းငယ် လျော့နည်းနိုင်သော်လည်း သူတို့သည် တာအိုနယ်ပယ်သို့ ရောက်ရှိသွားမည်သာ ဖြစ်သည်။

“ဂိုဏ်းတူအစ်ကိုကြီးရော ဘယ်လိုလဲ”

ရွှီနင်က မေးလိုက်သည်။

“ငါလည်း စစုစည်းနေပြီ”

ဟယ့်မင်ယဲ့က ပြောလိုက်သည်။ “ငါက လျှို့ဝှက်နည်းစနစ်အသစ်ကို သင်ယူရင်းနဲ့ ဓာတ်စွမ်းအင်မျိုးစေ့တစ်ခုကို စုစည်းဖို့ စီစဉ်ထားတယ်။ ငါ့ရဲ့ ရေနဲ့ မီးဓာတ်သဘာဝ တစ်ခုစီအတွက် ဓာတ်စွမ်းအင်မျိုးစေ့ နှစ်ခုစီပဲ လိုချင်တာ။ ဒီအခြေခံနဲ့တင် ငါ တာအိုနယ်ပယ်ကို တက်လှမ်းနိုင်ပြီ”

“ညီလေး... မင်းရဲ့ ပါရမီက ပိုမြင့်တယ်၊ ဒါကြောင့် တာအိုနယ်ပယ်ကို မတက်လှမ်းခင် ဓာတ်စွမ်းအင်မျိုးစေ့ ခြောက်ခုလုံးကို အရင်စုစည်းထားတာက မင်းအတွက် အကောင်းဆုံးဖြစ်လိမ့်မယ်”

ဟယ့်မင်ယဲ့က ဆက်ပြောသည်။ “ဓာတ်စွမ်းအင်မျိုးစေ့တွေ များများစုစည်းနိုင်လေ မင်းရဲ့ အခြေခံက ပိုခိုင်မာလေပဲ၊ တာအိုနယ်ပယ်ကို ရောက်သွားတဲ့အခါမှာလည်း မင်းရဲ့ အမြင့်ဆုံးကန့်သတ်ချက်က ပိုမြင့်မားလာမှာဖြစ်သလို တိုက်ခိုက်ရေးစွမ်းရည်ကလည်း ပိုအားကောင်းလာလိမ့်မယ်”

“ကျွန်တော် လုပ်ပါ့မယ်”

ရွှီနင် ခေါင်းညိတ်လိုက်သည်။

“ဒါနဲ့ ညီလေး... ဝမ်ရှန့်ပြည်နယ်ကလူတွေ ရောက်လာတော့မယ်ဆိုတာ မင်းသိပြီးလောက်ပြီပေါ့”

ဟယ့်မင်ယဲ့က ပြောပြသည်။ “မင်း အပြင်မှာ ကျင့်ကြံနေတဲ့ ရက်ပိုင်းအတွင်းမှာပဲ ဂိုဏ်းအပြင်ရောက်နေတဲ့ အကြီးအကဲအများစု ပြန်ရောက်လာကြပြီ၊ နောက်ရက်အနည်းငယ်နေရင် ပြည်နယ်သုံးခုက အဆင့်မြင့်ပုဂ္ဂိုလ်တွေ စုစည်းပြီး မဟာမိတ်ဖွဲ့ကြလိမ့်မယ်။ အဲဒီအချိန်ကျရင် ငါတို့အားလုံးကို တာဝန်တွေ အသီးသီး ခွဲဝေပေးကြတော့မှာ၊ ဒါကြောင့် အဲဒီမတိုင်ခင် မင်းလုပ်စရာရှိတာတွေကို အမြန်ဆုံး အပြီးသတ်ထားပါ၊ မဟုတ်ရင် တာဝန်တွေနဲ့ အလုပ်ရှုပ်သွားလိမ့်မယ်”

“အဲဒီလိုလား...”

ရွှီနင် ခေါင်းညိတ်ကာ တွေးတောလိုက်သည်။ “ကျွန်တော် နားလည်ပါပြီ ဂိုဏ်းတူအစ်ကိုကြီး”

…

ဟယ့်မင်ယဲ့၏ ခြံဝင်းမှ ထွက်လာပြီးနောက် ရွှီနင်သည် ဂိုဏ်းအတွင်းမှ ချက်ချင်း ထွက်ခွာခဲ့သည်။

ဟယ့်မင်ယဲ့ ပြောသည့်အတိုင်းဆိုလျှင် သူ့ကို မကြာမီ တာဝန်များ ပေးအပ်ပေလိမ့်မည်။

ထို့ကြောင့် ထိုမတိုင်ခင် သူသည် မြူမှောင်ချောက်နက်ကြီးသို့ သွားရောက်ကာ မီးခိုးရောင်လေးနှင့် ရွှီးဟူကျွင်းတို့ကို လာမည့်ကိစ္စများအတွက် အဆင်သင့်ဖြစ်စေရန် အကြောင်းကြားရပေမည်။

မိစ္ဆာသားရဲကျမ်းစာကို ရည်မှန်းနေကြသော ဝမ်ရှန့်ပြည်နယ်မှလူများသည် အလွန်ပင် အန္တရာယ်များလှသည်။

ဂိုဏ်းမှထွက်လာပြီးနောက် ရွှီနင်သည် ရှောင်ဟေးကို ခေါ်ယူကာ သူ့အား ချူယဲ့ယန်ရှိရာသို့ ခေါ်ဆောင်သွားရန် ခိုင်းစေလိုက်သည်။

ခေတ္တမျှ ပျံသန်းပြီးနောက် ရှောင်ဟေးသည် ရွှီနင်ကို တောင်ထိပ်တစ်ခုပေါ်ရှိ ဧရာမငှက်သိုက်တစ်ခုဆီသို့ ခေါ်ဆောင်လာခဲ့သည်။

ငှက်သိုက်အတွင်း၌ ချူယဲ့ယန်မှာ အေးခဲနေဆဲပင်။ ရွှီနင်သည် ချူယဲ့ယန်အား အဆိပ်ဖြေဆေး တိုက်လိုက်သည်။

“ဒါက...”

ချူယဲ့ယန် နိုးလာသောအခါ ရွှီနင်နှင့် မိစ္ဆာသားရဲတစ်ကောင်က သူ့ကို စောင့်ကြည့်နေသည်ကို တွေ့လိုက်ရသည်။

“ငါ လျှို့ဝှက်နယ်မြေထဲကနေ ထွက်လာခဲ့ပြီလား”

ချူယဲ့ယန်မှာ ခေါင်းထဲ၌ မူးဝေနေဆဲပင်။

“သခင်လေး...”

ချူယဲ့ယန်သည် သူ့အား လွှတ်ပေးရန် ရွှီနင်ကို တောင်းပန်ချင်နေသော်လည်း ရွှီနင်က သူ့ကို အခွင့်အရေး မပေးခဲ့ပေ။ သူသည် ချူယဲ့ယန်အား နှလုံးမဲ့ဆေးလုံးကို အတင်းအကျပ် မျိုချခိုင်းလိုက်သည်။

နှလုံးမဲ့ဆေးလုံးကို မျိုချပြီးနောက် ချူယဲ့ယန်၏ မျက်လုံးများမှာ အနည်းငယ် ဝေဝါးသွားပြီး မျက်ဝန်းထဲမှ တောက်ပမှုများ ပျောက်ကွယ်သွားခဲ့ရာ သူ၏ အသိစိတ်များ ပျောက်ဆုံးသွားသကဲ့သို့ ဖြစ်နေသည်။

‘နှလုံးမဲ့ဆေးလုံးရဲ့ ဖော်ပြချက်အရဆိုရင် ဒီချူယဲ့ယန်က အခု ဆေးစွမ်းကို ချေဖျက်နေတာပဲ၊ ဆေးစွမ်းကို လုံးဝချေဖျက်ပြီးသွားတာနဲ့ သူက အသိစိတ်ပြန်ဝင်လာပြီး မှတ်ဉာဏ်တွေကို ဆက်ထိန်းထားနိုင်လိမ့်မယ်၊ ဒါပေမဲ့ ငါ့ရဲ့ အမိန့်တွေကိုတော့ လုံးဝ နာခံသွားလိမ့်မယ်’

ရွှီနင်သည် နှလုံးဖောက်ဆေးလုံး၏ ညွှန်ကြားချက်များအတိုင်း လုပ်ဆောင်ကာ ချူယဲ့ယန်အား သူ့အမိန့်များကို နာခံစေရန်အတွက် အသိစိတ်မျိုးစေ့များကို စတင် စိုက်ပျိုးလိုက်သည်။

ထိုလုပ်ငန်းစဉ်အတွင်း ချူယဲ့ယန်မှာ အနည်းငယ် ခုခံမှုရှိနေသော်လည်း ဆေးစွမ်းကြောင့် မအောင်မြင်ခဲ့ပေ။

နာရီဝက်ခန့် ကြာပြီးနောက် ချူယဲ့ယန်မှာ မျက်‌မှောင်ကြုံ့သွားပြီး သူ၏ လှုပ်ရှားမှုများမှာလည်း ပြန်လည်ကောင်းမွန်လာလေသည်။

သို့သော် ယခင်နှင့်မတူဘဲ ချူယဲ့ယန်ထံမှ ပိုမိုအေးစက်သော အငွေ့အသက်များ ထွက်ပေါ်နေလေသည်။

‘နှလုံးမဲ့ဆေးလုံးက အလုပ်ဖြစ်ရဲ့လား ကြည့်ရအောင်’

ရွှီနင် စမ်းသပ်ရန် ဆုံးဖြတ်လိုက်သည်။

သူသည် ချူယဲ့ယန်ထံမှ ရရှိထားသော ဓားတိုကို ပြန်ပေးလိုက်ပြီး အမိန့်ပေးလိုက်သည်။ “အဲဒီဓားနဲ့ မင်းရဲ့ လည်ပင်းကို ထိုးစမ်း”

ချူယဲ့ယန်သည် တုံ့ဆိုင်းခြင်းမရှိဘဲ ဓားကိုယူကာ မိမိကိုယ်ကိုယ် ထိုးရန် ပြင်လိုက်သည်။

“ရပ်စမ်း”

ဓားဦးဖျားသည် အရေပြားကို အနည်းငယ် ထိသွားချိန်တွင် ရွှီနင်က အမြန်တားလိုက်ရသည်။ ရွှီနင်အနေဖြင့် အမိန့်ကို အချိန်မီ မတားဆီးခဲ့ပါက ချူယဲ့ယန်မှာ သေဆုံးသွားနိုင်ကြောင်း ကောင်းစွာ သိလိုက်သည်။

‘ဒီနှလုံးမဲ့ဆေးလုံးရဲ့ အာနိသင်က တကယ်ကို ကြောက်စရာကောင်းတာပဲ၊ ဆေးကျမ်းထဲမှာ ဝမ်ရှန့်ပြည်နယ်ကလူတွေက သူတို့ရဲ့ လက်အောက်ငယ်သားတွေကို လေ့ကျင့်ပေးဖို့အတွက် ဒီနှလုံးမဲ့ဆေးလုံးတွေကို သုံးကြတယ်လို့ ဖော်ပြထားတာ မဆန်းတော့ဘူး’

ရွှီနင် တွေးတောလိုက်ပြီးနောက် ချူယဲ့ယန်ကို စိုက်ကြည့်လိုက်သည်။

“ချူယဲ့ယန်... မင်းရဲ့ တာအိုလက်နက်ကိုယူပြီး ဖေးယွင်ပြည်နယ်ကို သွားပါ၊ ပြီးရင် ငါ့မိသားစုကို စောင့်ရှောက်ပေးပါ”

ချူယဲ့ယန်မှာ သူ့အမိန့်ကို လုံးဝနာခံမည်ဖြစ်ကြောင်း အတည်ပြုပြီးနောက် ရွှီနင်က တာဝန်သစ် ပေးအပ်လိုက်သည်။

ဤသည်မှာ ရွှီနင်က ချူယဲ့ယန်အား နှလုံးမဲ့ဆေးလုံး ကျွေးရန် မဆုံးဖြတ်မီကတည်းက ကြိုတင်စဉ်းစားထားသော အစီအစဉ် ဖြစ်သည်။

ထောင်ရွာကို လျိုယီးကျန့်က စောင့်ရှောက်ပေးနေသော်လည်း လျိုယီးကျန့်၏ အစွမ်းမှာ ချူယဲ့ယန်ထက် များစွာ အားနည်းလှသည်။

အခြေအနေများသာ ပိုမိုရှုပ်ထွေးလာပါက ချူယဲ့ယန်ကဲ့သို့လူမျိုးသည် ထောင်ရွာကို စောင့်ရှောက်ပေးနေမှသာ ရွှီနင် စိတ်အေးရပေလိမ့်မည်။

‘နှလုံးမဲ့ဆေးလုံးရဲ့ အာနိသင်က အကန့်အသတ်ရှိတယ်၊ ဒီဆေးလုံးရဲ့ အရည်အသွေးအရဆိုရင် အစစ်အမှန်စိတ်ဆန္ဒနယ်ပယ်က ချူယဲ့ယန်ဟာ ငါးနှစ်ကျော်လောက်ပဲ ဒီဆေးလုံးရဲ့ အာနိသင်အောက်မှာ ရှိနေလိမ့်မယ်’

ထို့နောက် ရွှီနင်သည် ချူယဲ့ယန်အား ထောင်ရွာနှင့် သူ့မိသားစုအကြောင်းကို ပြောပြလိုက်သည်။ တစ်ပြိုင်နက်တည်းမှာပင် သူ့မိသားစုကို တိတ်တဆိတ် စောင့်ရှောက်ရန်နှင့် အန္တရာယ်နှင့် ကြုံတွေ့ရမှသာ ကိုယ်ထင်ပြရန် အမိန့်ပေးလိုက်သည်။

ချူယဲ့ယန်သည် ရွှီနင်၏ ညွှန်ကြားချက်များကို ရရှိပြီးနောက် ဖေးယွင်ပြည်နယ်သို့ ချက်ချင်း ထွက်ခွာသွားတော့သည်။

‘ချူယဲ့ယန်မှာ အစစ်အမှန်စိတ်ဆန္ဒနယ်ပယ် အစွမ်းအပြင် တာအိုလက်နက်လည်း ရှိနေတယ်၊ သူသာရှိနေရင် အစစ်အမှန်ပိုင်နက်နယ်ပယ် သိုင်းသမားတွေတောင် ထောင်ရွာကို ထိခိုက်အောင် လုပ်နိုင်မှာ မဟုတ်တော့ဘူး’

ရွှီနင်သည် အဝေးသို့ ထွက်ခွာသွားသော ချူယဲ့ယန်ကို ကြည့်ရင်း တွေးလိုက်မိသည်။

‘နောက်တစ်ဆင့်အနေနဲ့ ငါ မြူမှောင်ချောက်နက်ကြီးကို သွားပြီး မီးခိုးရောင်လေးနဲ့ ရွှီးဟူကျွင်းတို့ကို ရှာရမယ်’

ရွှီနင် အစီအစဉ် ချလိုက်သည်။

“ရှောင်ဟေး... သွားကြစို့၊ ငါ့ကို မြူမှောင်ချောက်နက်ကြီးဆီ ခေါ်သွားပေး”

ရွှီနင်၏ အမိန့်ကို ကြားသော် ရှောင်ဟေးက ခေါင်းငုံ့ပေးလိုက်သည်။ ရွှီနင်သည် ရှောင်ဟေး၏ ကျောပေါ်တွင် ထိုင်လိုက်ပြီးနောက် ရှောင်ဟေးသည် အနက်ရောင်မျဉ်းတစ်ကြောင်းပမာ အရှိန်အဟုန်ဖြင့် အဝေးသို့ ပျံသန်းသွားလေသည်။

သို့သော် တောင်တန်းကြီးအပြင်ဘက်သို့ မရောက်မီမှာပင် ရွှီနင်သည် အမှောင်ထဲမှ ချောင်းမြောင်းနေသော အန္တရာယ်အရိပ်အယောင်အချို့ကို သတိပြုမိလိုက်သည်။

…

“ကူကျွမ့်... ဒီကိစ္စပြီးရင် ငါ မင်းအပေါ် ဘာအကြွေးမှ မရှိတော့ဘူးနော်”

ရွှီနင် သွားရာလမ်းကြောင်းပေါ်ရှိ တောင်ကုန်းတစ်ခုပေါ်တွင် ကူကျွမ့်နှင့် ထိပ်ပြောင်အဘိုးကြီးတစ်ဦးတို့မှာ အမှောင်ထဲတွင် ပုန်းကွယ်နေကြသည်။ ထိုထိပ်ပြောင်အဘိုးကြီးထံမှ ထွက်ပေါ်နေသော အရှိန်အဝါမှာ အလွန်ပင် ပြင်းထန်လှရာ သာမန် ဟင်းလင်းပြင်နယ်ပယ် သိုင်းသမားများဆိုပါက သူ၏ အရှိန်အဝါအောက်တွင်ပင် ဖိနှိပ်ခံရပေလိမ့်မည်။

“ကျွမ်းထုန်... စိတ်မပူပါနဲ့၊ ငါတို့ အောင်မြင်သွားတာနဲ့ ငါတို့ကြားမှာ ဘာအကြွေးမှ ကျန်တော့မှာ မဟုတ်ဘူး၊ မင်းကိုလည်း ငါ အထူးကျေးဇူးတင်မှာပါ”

ကုကျွမ့်က ပြောလိုက်သည်။

“အဲဒါတွေ မလိုပါဘူး”

ကျွမ်းထုန်ဟု အမည်ရသော ထိပ်ပြောင်အဘိုးကြီးက လေးနက်သော အမူအရာဖြင့် ငြင်းပယ်လိုက်သည်။

ယခင်က ကူကျွမ့်သည် ဖန်းကျဲ့အကြောင်းကို သိရှိရန်အတွက် ရွှီနင်ကို အရှင်ဖမ်းဆီးရန် စီစဉ်ခဲ့သည်။

အကယ်၍ ဖန်းကျဲ့သာ အသက်ရှင်နေသေးပါက သူသည် ဖန်းကျဲ့ကို ပြန်ရှာဖွေမည်ဖြစ်သော်လည်း ဖန်းကျဲ့သာ တစ်ခုခုဖြစ်သွားခဲ့ပါက ရွှီနင်ကို ကလဲ့စားချေသည့်အနေဖြင့် တိတ်တဆိတ် သတ်ပစ်ရန် ရည်ရွယ်ထားခြင်း ဖြစ်သည်။

သို့သော် ကူကျွမ့်မှာ သတိကြီးသူ ဖြစ်လေသည်။ ရွှီနင်ကို တစ်ယောက်တည်း ဖမ်းဆီးရန်မှာ အလွန်ခက်ခဲမည်ဟု သူ ခံစားရသဖြင့် ကျွမ်းထုန်ကို ရှာဖွေကာ အကူအညီတောင်းခဲ့ခြင်း ဖြစ်သည်။

လွန်ခဲ့သော ဆယ်စုနှစ်များစွာက ကူကျွမ့်သည် ကျွမ်းထုန်၏ အသက်ကို ကယ်တင်ခဲ့ဖူးသည်။

ထိုကျေးဇူးကို ဆပ်ရန်အတွက် ကျွမ်းထုန်သည် ကူကျွမ့်ခိုင်းသမျှကို မိမိဆန္ဒနှင့် ဆန့်ကျင်ပြီး လုပ်ဆောင်ပေးခဲ့ရသည်မှာ အကြိမ်ကြိမ်ပင် ရှိခဲ့ပြီ ဖြစ်သည်။

ဤတစ်ကြိမ်တွင်လည်း ကုကျွမ့်က ကျွမ်းထုန်အား ကူညီရန် တောင်းဆိုခဲ့ပြန်သည်။ မီရှင်းယယ်၏ တပည့်ကို တိုက်ခိုက်ရမည်ဟု သိလိုက်ရသောအခါ ကျွမ်းထုန်မှာ ငြင်းပယ်ချင်ခဲ့သော်လည်း ကုကျွမ့်က ဤကိစ္စပြီးပါက ကျေးဇူးကြွေးများ အားလုံး ကျေအေးပေးမည်ဟု ပြောသဖြင့် ကျွမ်းထုန် သဘောတူလိုက်ရခြင်း ဖြစ်သည်။

ကူကျွမ့်သည် ကျွမ်းထုန်ကို ကြည့်လိုက်ရာ သူ မပျော်မရွှင် ဖြစ်နေသည်ကို သိလိုက်သည်။

သို့သော် ကူကျွမ့်ကမူ ဂရုမစိုက်ပေ။ ကျွမ်းထုန်၏ အားနည်းချက်မှာ ကျေးဇူးတရားကို တန်ဖိုးထားခြင်းဖြစ်ကြောင်း သူ ကောင်းစွာ သိထားသည်။ ကျွမ်းထုန်သည် လုပ်ဆောင်ရမည့်အရာကို မနှစ်သက်သော်လည်း အစွမ်းကုန် ကြိုးစားပေးမည်မှာ အမှန်ပင်။

“သူ ထွက်လာပြီ”

ရွှီနင်၏ အရှိန်အဝါ ချဉ်းကပ်လာသည်ကို ကူကျွမ့်တစ်ယောက် အာရုံခံမိလိုက်သည်။

ရွှီနင် ယွဲ့လန်ဂိုဏ်းမှ ထွက်ခွာလာကတည်းက ကူကျွမ့်မှာ ရွှီနင်အား စောင့်ကြည့်နေခဲ့ခြင်း ဖြစ်သည်။ ကူကျွမ့်နှင့် ကျွမ်းထုန်တို့သည် သူတို့အား ရွှီနင် သတိမထားမိစေရန်အတွက် အသက်ငွေ့ထိန်းဆေးလုံးများကို အမြောက်အမြား သုံးစွဲထားရုံသာမက အဝေးမှနေ၍ ရွှီနင် ရောက်လာမည့်အချိန်ကို စောင့်ဆိုင်းနေခဲ့ကြသည်။

“သူ ငါတို့နားကို ဖြတ်သွားတဲ့အချိန်ကျရင် ငါတို့နှစ်ယောက်လုံး တစ်ပြိုင်နက် တိုက်ခိုက်ကြမယ်၊ သူ့ကို ဖမ်းနိုင်ဖို့အတွက် ငါတို့ အစွမ်းကုန် ထုတ်သုံးရမယ်”

ကူကျွမ့်က ကျွမ်းထုန်ကို မှာကြားလိုက်သည်။

“နားလည်ပြီ”

ကျွမ်းထုန်ကလည်း အဆင်သင့် ပြင်လိုက်သည်။

‘ဟင်...’

သို့သော် ရွှီနင် စီးနင်းလာသော မိစ္ဆာသားရဲ၏ အရှိန်မှာ ရုတ်တရက် နှေးကွေးသွားသည်ကို သူတို့ သတိထားမိလိုက်ကြသည်။

“မကောင်းတော့ဘူး၊ သူ ငါတို့ကို သတိထားမိသွားပြီနဲ့ တူတယ်၊ တိုက်ကြမယ်”

ကူကျွမ့် မျက်မှောင်ကြုတ်ကာ အော်လိုက်သည်။ ကူကျွမ့်နှင့် ကျွမ်းထုန်တို့သည် သူတို့၏ ဂုဏ်သတ္တိ ပိုင်နက်များကို တစ်ပြိုင်နက်တည်း အသက်သွင်းလိုက်ကြပြီး တာအိုလက်နက်များကို ထုတ်ယူကာ ရွှီနင်ရှိရာသို့ အရှိန်အဟုန်ဖြင့် ပြေးဝင်သွားကြတော့သည်။

ရှောင်ဟေးမှာ အမြင့် မီတာတစ်ရာခန့်တွင် ပျံသန်းနေသော်လည်း သူတို့နှစ်ဦးအတွက် ထိုအကွာအဝေးမှာ ပြဿနာ မဟုတ်ပေ။

‘ထင်တဲ့အတိုင်းပဲ... တစ်ယောက်ယောက်က ငါ့ကို တိုက်ခိုက်ချင်နေတာပဲ’

ကြောက်မက်ဖွယ်ကောင်းသော အရှိန်အဝါများနှင့်အတူ သူ့ဆီသို့ ပြေးဝင်လာနေသော အရိပ်နှစ်ခုကို ရွှီနင် မြင်လိုက်ရသည်။ သူသည် တုံ့ဆိုင်းမနေဘဲ သူ၏ လက်ပတ်ကို ချက်ချင်း အသက်သွင်းကာ ဂုဏ်သတ္တိနှစ်မျိုး ပိုင်နက်ကို ဖြန့်ကျက်လိုက်သည်။

ထို့နောက် အရိုးမီးလျှံသမထကျင့်စဉ်ကို အသုံးပြုကာ မိမိကိုယ်နှင့် ရှောင်ဟေးကိုပါ လွှမ်းခြုံထားလိုက်သည်။ ရွှီနင်၏ ဂုဏ်သတ္တိပိုင်နက်သည် ကူကျွမ့်နှင့် ကျွမ်းထုန်တို့၏ ပိုင်နက်များနှင့် ထပ်တူကျသွားလေသည်။

‘တာအိုလက်နက်တွေ ကိုင်ထားတဲ့ တစ်ဝက်တစ်ပျက်တာအိုနယ်ပယ်အဆင့် သိုင်းပညာရှင် နှစ်ယောက်ပါလား’

ရွှီနင်သည် ရန်သူများ၏ အစွမ်းကို ချက်ချင်း ခန့်မှန်းလိုက်မိသည်။ ‘အရမ်း ရင်းနှီးနေတဲ့ အရှိန်အဝါတစ်ခု ပါနေတယ်’

ဒိုင်း

ကူကျွမ့်နှင့် ကျွမ်းထုန်တို့က နှစ်ဖက်ညှပ်၍ တိုက်ခိုက်လိုက်ကြသည်။

“ဓားတံဆိပ်ခတ်နှိပ်ခြင်း”

ဝှူး ဝှူး ဝှူး

ရွှီနင်၏ ပိုင်နက်အတွင်း၌ ဓားမိုးများ ရွာချလာလေသည်။ ကူကျွမ့်နှင့် ကျွမ်းထုန်တို့ကလည်း ထိုတိုက်ခိုက်မှုကို ခုခံရန်အတွက် ရေတွက်၍မရနိုင်သော လေဓားများနှင့် ဓားပျံများကို ထုတ်သုံးလိုက်ကြသည်။

ဒိုင်း

ပထမဆုံး ထိပ်တိုက်ရင်ဆိုင်မှုတွင် နှစ်ဖက်စလုံးမှာ အင်အားချင်းတူညီနေကြပြီး ထိတွေ့မိသည့် အရှိန်ကြောင့် အဝေးသို့ အသီးသီး လွင့်ထွက်သွားကြသည်။

“အကြီးအကဲ ကူကျွမ့်လား”

အကွာအဝေးတစ်ခုသို့ ရောက်သွားသောအခါ ရွှီနင်သည် အကြီးအကဲ ကူကျွမ့်ကို မှတ်မိသွားတော့သည်။