ဆေးပညာ ၏ အထွတ်အထိပ်အရှင်

ဆေးဖော်စပ်မှု ပါရမီရှင် ပွဲတော်ကြီး၏ ဗိုလ်လုပွဲ ပထမဆုံး အစီအစဉ်မှာ ပြီးဆုံးလုနီးပါး ဖြစ်နေပြီ ဖြစ်သည်။

ကွင်းပြင်တစ်ခုလုံးရှိ လူအပေါင်း၏ အကြည့်များမှာ ထန်ထျန်း၏ ပုံရိပ်ပေါ်သို့သာ စုပြုံရောက်ရှိနေကြသည်။

၎င်းမှာ ရှောင်လွှဲ၍မရနိုင်သော ကိစ္စပင်၊ အဘယ်ကြောင့်ဆိုသော် မြင်တွေ့လိုက်ရသည့် မြင်ကွင်းမှာ တကယ်ကို မှင်တက်စရာ ကောင်းလွန်းသောကြောင့် ဖြစ်သည်။

ထိုကဲ့သို့သော ဆေးဖော်စပ်နည်းမျိုးကို မည်သူမျှ မမြင်ဖူးကြချေ။ ထိုမျှ ရိုးရှင်းကြမ်းတမ်းသော နည်းလမ်းဖြင့် ပြီးပြည့်စုံသော သုညအစင်းကြောင်း ကောင်းကင်ဆေးလုံးများကို တစ်အိုးပြီးတစ်အိုး ဖော်စပ်နိုင်လိမ့်မည်ဟုလည်း မည်သူကမျှ ထင်မှတ်မထားခဲ့ကြပေ။

ဤမျှ ထူးဆန်းလွန်းသော အခြေအနေကြောင့် သူတို့ နှစ်ပေါင်းများစွာ လက်ခံယုံကြည်လာခဲ့သော ဆေးပညာ စနစ်ကြီးတစ်ခုလုံးမှာ ပြိုလဲလုနီးပါး ရင်ဆိုင်နေရသည်။

ပွဲကြည့်ပရိသတ်များသာမကဘဲ အမြင့်ဆုံးနေရာတွင် ထိုင်နေကြသော ဒိုင်လူကြီး ၁၀ ဦးကျော်မှာလည်း တစ်ယောက်မကျန် အံ့ဩတုန်လှုပ်နေကြပြီး သူတို့မျက်စိရှေ့တွင် မြင်နေရသည်ကိုပင် မယုံကြည်နိုင် ဖြစ်နေကြသည်။

"ဒါ... ဒါက ဖြစ်နိုင်လို့လား"

"ဒီလိုမျိုး အခြေအနေ ရှိနိုင်လို့လား"

အချို့မှာ သူတို့၏ ဝိညာဉ်အတွင်းပိုင်းအထိ သိမ့်သိမ့်တုန်အောင် သံသယများ ဖြစ်ပေါ်နေကြသည်။

သူတို့အားလုံးက အလယ်ဗဟိုတွင် ထိုင်နေသော အသက်အကြီးဆုံး အဖိုးအို ဆေးဆရာကြီးထံသို့ လှည့်ကြည့်လိုက်ကြသည်။ ထိုသူမှာ အစစ်အမှန် ဆေးနတ်ဘုရား တစ်ဦးပင် ဖြစ်သည်။

ထိုအချိန်တွင် ဆေးနတ်ဘုရားကြီးက ထန်ထျန်း၏ ပုံရိပ်ထဲမှ ဆေးမီးဖိုကို စိုက်ကြည့်နေပြီး လေးနက်သော အသံဖြင့် ပြောလိုက်သည်။

"ဒီလိုကိစ္စမျိုးက သီအိုရီအရတော့ တကယ် ရှိနိုင်တယ်"

"ဒါပေမဲ့ သာမန်အားဖြင့်တော့ ဒါက လူသားတစ်ယောက် လုပ်နိုင်တဲ့အရာ မဟုတ်ဘူး"

"ဒီလူက ဆေးပညာ လမ်းစဉ်အပေါ် နားလည်မှုက အကန့်အသတ်တွေကို ကျော်လွန်ပြီး ကောင်းကင်တာအို ရဲ့ အထက်မှာ ရောက်နေမှသာ ဒီလို ထူးဆန်းတဲ့ကိစ္စကို လုပ်နိုင်မှာ"

"ဒါပေမဲ့ အသက် ၂၁ နှစ်အရွယ် လူငယ်တစ်ယောက်က ကောင်းကင်တာအို ရဲ့ အထက်မှာ ဘယ်လိုလုပ် ရှိနေနိုင်မှာလဲ"

"ဒီအဖိုးကြီး ကိုယ်တိုင်လည်း... စဉ်းစားလို့ မရနိုင်ဘူး"

လူတိုင်းမှာ ဆွံ့အသွားကြသည်။

ဆေးနတ်ဘုရားကြီးပင် နားမလည်နိုင်သော တည်ရှိမှုမျိုးကို ထိုလူငယ်က မည်သို့ ပြုလုပ်နိုင်ခဲ့သနည်း။

"သူ့ရဲ့ နောက်ကြောင်းကို သွားစစ်ဆေးလိုက်ကြစမ်း"

မကြာမီမှာပင် လူအချို့က ထန်ထျန်း၏ မည်သူဖြစ်ကြောင်းကို စတင် စုံစမ်းတော့သည်။ ဤမျှ ထူးဆန်းသော ပုဂ္ဂိုလ်မျိုး ပေါ်ထွက်လာခြင်းမှာ လူအများ အထူးဂရုစိုက်ရမည့် ကိစ္စပင် ဖြစ်သည်။

စကားပြောနေကြစဉ်အတွင်း ထန်ထျန်း၏ ဆေးဖော်စပ်မှု ဖြစ်စဉ်မှာလည်း နောက်ဆုံးတွင် ပြီးဆုံးသွားခဲ့ပြီ ဖြစ်သည်။

ပြီးပြည့်စုံသော သုညအစင်းကြောင်း ကောင်းကင်ဆေးလုံး ၉ အိုး၊ စုစုပေါင်း အလုံး ၉၀ တိတိမှာ ကျောက်စိမ်းပုလင်းငယ် ၉ ပုလင်းထဲတွင် ပြည့်လျှံနေပြီး ထန်ထျန်း၏ ရှေ့၌ အစီအရီ တည်ရှိနေသည်။

သို့သော်လည်း ဆေးမီးဖိုအတွင်းမှ ဆေးမီးလျှံမှာ ငြိမ်းသတ်ခြင်း မရှိသေးပေ။

ထန်ထျန်းက ခဏမျှ တုံ့ဆိုင်းနေပြီး တစ်ခုခုကို စဉ်းစားနေပုံရသည်။

သို့သော် နောက်ဆုံးတွင် သူက လက်ချောင်းကို အသာတောက်လိုက်ရာ ဆေးမီးဖိုအတွင်းမှ မီးတောက်မှာ ငြိမ်သက်သွားတော့သည်။

တစ်ချိန်တည်းမှာပင် စင်မြင့်ထက်ရှိ ဆေးနတ်ဘုရားကြီးမှာ သက်ပြင်းအရှည်ကြီး ချလိုက်ပြီး အလွန် စိတ်အေးသွားပုံရသည်။

လူတိုင်းက အံ့ဩသွားကြပြီး ဆေးနတ်ဘုရားကြီးက ဘာကြောင့် ထိုသို့ ဖြစ်သွားရသလဲဟု မေးမြန်းကြသည်။

ဆေးနတ်ဘုရားကြီးက မုတ်ဆိတ်မွေးကို သပ်လိုက်ပြီး ပြုံးကာ ပြောလိုက်သည်။

"မင်းတို့ 'ဆေးပညာ လမ်းစဉ်ရဲ့ အထွတ်အထိပ်အရှင်' ဆိုတဲ့ အခေါ်အဝေါ်ကို ကြားဖူးကြသလား"

လူတိုင်းမှာ ကြောင်အသွားပြီး တစ်ယောက်က ပြန်ဖြေလိုက်သည်။ "ဒါ... ဆေးပညာ လမ်းစဉ်ကို ရှာဖွေပြီး အထွတ်အထိပ် ရောက်သွားတဲ့ အရှင်ကို ပြောတာလား"

ဆေးနတ်ဘုရားက ခေါင်းညိတ်ပြလိုက်ပြီး "အဲဒီလိုလည်း ပြောလို့ရပါတယ်"

"ဆေးပညာ လမ်းစဉ် အထွတ်အထိပ်အရှင် ဆိုတာက ဒဏ္ဍာရီလာ ဘွဲ့အမည်တစ်ခုပဲ"

"ရှေးယခင်ကစလို့ နှစ်ပေါင်း ဘီလီယံ တစ်ရာကျော်အတွင်းမှာ ဒီဘွဲ့အမည်ကို ရရှိခဲ့တဲ့သူက လက်ချိုးရေလို့ ရတဲ့အထိ အလွန်နည်းပါးလွန်းတယ်"

"သူတို့အားလုံးက သမိုင်းအစဉ်အဆက်မှာ ထာဝရ မှတ်တမ်းတင်ခံထားရတဲ့ အထွတ်အထိပ် အရှင်တွေချည်းပဲ"

လူတိုင်းက သံသယဖြင့် မေးလိုက်သည်။ "ဒါပေမဲ့ ဆေးပညာ လမ်းစဉ် အထွတ်အထိပ်အရှင်က ထန်ထျန်းနဲ့ ဘာဆိုင်လို့လဲ"

ဆေးနတ်ဘုရားက အေးအေးဆေးဆေး ရှင်းပြလိုက်သည်။

"ဆေးပညာ က ကျင့်ကြံခြင်းနဲ့ အတူတူပဲ၊ ကောင်းကင်တာအို ရဲ့ နိယာမတွေကို အပြည့်အဝ လိုက်နာရတယ်"

" ၃ ဆိုတာ အခြေခံကိန်းဂဏန်းဖြစ်ပြီး ၉ ဆိုတာကတော့ အကန့်အသတ် ပဲ။ ဒါကြောင့် ရှန်းယွမ်ဆေးလုံး အမယ် ၃ စုံက အများဆုံး ၉ အိုးပဲ ထွက်နိုင်တယ်။ ဘယ်သူမှ ဒီအကန့်အသတ်ကို မကျော်လွန်နိုင်ဘူး"

"ဒါပေမဲ့ ဆေးပညာ လမ်းစဉ် အထွတ်အထိပ်အရှင် ဆိုတာကတော့ ကောင်းကင်တာအို ကို ကျော်လွန်ပြီး ကမ္ဘာလောကကို ကျော်လွန်သွားတဲ့ တည်ရှိမှုတွေ ဖြစ်တယ်။ ဒါကြောင့် သူတို့က ဒီအကန့်အသတ်ကို ချိုးဖျက်ပြီး ၁၀ အိုးမြောက် ဆေးလုံးကို ဖော်စပ်နိုင်ကြတယ်"

"ထန်ထျန်းက ပြီးပြည့်စုံတဲ့ သုညအစင်းကြောင်း ကောင်းကင်ဆေးလုံး ၉ အိုး ဖော်စပ်တာကိုတော့ အစွန်းရောက်တဲ့ ဖြစ်နိုင်ခြေတချို့နဲ့ မသေမချာ ရှင်းပြလို့ ရနိုင်သေးတယ်"

"ဒါပေမဲ့ သူကသာ ၁၀ အိုးမြောက် ဆေးလုံးကို ဖော်စပ်လိုက်မယ်ဆိုရင်တော့..."

ဆေးနတ်ဘုရားက ဆက်မပြောတော့ပေ။ သို့သော် ဘေးပတ်ဝန်းကျင်မှ လူများမှာမူ နားလည်သွားကြသည်။

အကယ်၍ ထန်ထျန်းကသာ ၁၀ အိုးမြောက်ကို ဖော်စပ်ခဲ့မည်ဆိုလျှင် ထိုနေရာတွင် ထိုင်နေသူမှာ ဆေးပညာ လမ်းစဉ်၏ အထွတ်အထိပ်အရှင် ဖြစ်နေသည်ဟုသာ ဆိုလိုခြင်း ဖြစ်ပေလိမ့်မည်

အသက် ၂၁ နှစ်အရွယ် ဆေးပညာ လမ်းစဉ် အထွတ်အထိပ်အရှင်...

အမှန်တရားက မည်သို့ပင်ဖြစ်စေ၊ ဤပါရမီရှင် ပွဲတော်ကြီး၏ အနှစ်သာရမှာ လုံးဝ ပြောင်းလဲသွားပေလိမ့်မည်။

ထိုအချိန်ကျလျှင် ထိုက်ယိမြင့်မြတ်နယ်မြေကို အရေးပေါ် အကြောင်းကြားပြီး ကျိကျွင်း ကိုယ်တိုင် ကြွရောက်လာရန် ဖိတ်ကြားရပေတော့မည်။

သို့သော် ကံကောင်းထောက်မစွာဖြင့် စဉ်းစားလိုက်ရုံနှင့်ပင် တစ်ကိုယ်လုံး တုန်ယင်သွားစေမည့် ထိုကဲ့သို့သော ထိတ်လန့်ဖွယ်ရာ ကိစ္စကြီးမှာ အမှန်တကယ် ဖြစ်မလာခဲ့ပေ။

ပြိုင်ပွဲပြီးဆုံးကြောင်း ခေါင်းလောင်းသံ မြည်လာသည့်တိုင်အောင် ထန်ထျန်းမှာ လုံးဝ မလှုပ်ရှားတော့ဘဲ ကုလားထိုင်ပေါ်တွင် ငြိမ်သက်စွာ ထိုင်ရင်း ဝိုင်ကိုသာ အေးအေးလူလူ ဆက်သောက်နေခဲ့သည်။

ထိုအချိန်တွင် ပြိုင်ပွဲဝင် အားလုံး၏ ပထမဆုံး ပွဲစဉ် ရလဒ်များမှာ အတည်ဖြစ်သွားခဲ့ပြီ ဖြစ်သည်။

စင်ပေါ်မှ ပြိုင်ပွဲဝင်များ မသိကြသေးသော်လည်း ကွင်းပြင်ရှိ ပရိသတ်များအားလုံးကတော့ သိနေကြပြီဖြစ်သည်။ ထန်ထျန်းက မည်သည့် သံသယမှမရှိဘဲ ပထမဆုံး ပွဲစဉ်၏ ပထမဆု ကို ရရှိသွားခဲ့ပြီ ဖြစ်သည်။

"ဘယ်သူက ထင်မှာလဲ၊ ဒီရလဒ်ကို ဘယ်သူက ကြိုတင် ထင်ထားမှာလဲ"

လူတစ်ယောက်က သက်ပြင်းချလိုက်ရင်း ခုနက မြင်တွေ့ခဲ့ရသည့် မှင်တက်ဖွယ် မြင်ကွင်းမှ စိတ်မခွာနိုင်သေးပေ။

"ဆေးပညာ မျိုးဆက် ကျင်းမိသားစုက ကျင်းထန်ဟာ တခြားသူတွေကို နှိပ်ကွပ်ပြီး ပထမနေရာကို ယူလိမ့်မယ်လို့ ထင်ထားခဲ့တာ။ အခုတော့ သူကိုယ်တိုင်တောင် အနှိပ်ကွပ်ခံလိုက်ရပြီ"

"ပြီးပြည့်စုံတဲ့ သုညအစင်းကြောင်း ကောင်းကင်ဆေးလုံး ၉ အိုးတဲ့လား၊ ဆေးနတ်ဘုရား ကိုယ်တိုင် လာရင်တောင် ဒီလောက် လုပ်နိုင်ပါ့မလား မသိဘူး"

"တကယ်ကို ထူးဆန်းလွန်းတယ်။ အစကတော့ ငါတောင် သူ့ကို လှောင်ပြောင်မိသေးတယ်၊ ဟာသလာလုပ်တာ ထင်လို့လေ။ အခုတော့ လူရွှင်တော်ဖြစ်သွားတာ ငါတို့ကိုယ်တိုင်ပဲ..."

လူအများက တတွတ်တွတ် ဆွေးနွေးနေကြသည်။ ထန်ထျန်း၏ ဆေးဖော်စပ်မှု ဖြစ်စဉ်ကြီးမှာ သူတို့အတွက် အမှန်တကယ်ပင် မျက်စိပွင့်စေခဲ့သည်။

ထူးချွန်သော ပါရမီရှင်များကို ရှာဖွေရန် ရောက်ရှိနေကြသော အဖွဲ့အစည်းများမှာလည်း ထန်ထျန်း၏ အချက်အလက်များကို စတင် စုံစမ်းနေကြပြီး သူ့ကို သူတို့အဖွဲ့အတွင်းသို့ ဆွဲဆောင်နိုင်မလားဟု ကြည့်နေကြသည်။

မန်ရှီးမှာမူ သက်ပြင်းအရှည်ကြီး ချလိုက်ပြီး စိတ်ထဲမှ အလေးကြီးတစ်ခု ကျသွားသကဲ့သို့ ခံစားလိုက်ရသည်။

သခင်လေးထန်ကတော့ တကယ်ကို အစွမ်းပြသွားခဲ့ပြီ။

သူမက ထန်ထျန်း၏ ပြိုင်ပွဲရလဒ်ကြောင့် စားသောက်ဆိုင်တွင် သူမ၏ ရာထူးတိုးမည်ကို သိပ်စိတ်မဝင်စားပေ။ သူမ မျှော်လင့်သည်မှာ ခရစ်စတယ် ၅ သိန်း ဆိုသော ကော်မရှင်ခနှင့် ထိုက်တန်အောင် ထန်ထျန်းကို မြင့်မြတ်နယ်မြေသို့ သွားရောက်နိုင်မည့် လက်မှတ်အား အောင်မြင်စွာ ရရှိစေချင်ရုံသာ ဖြစ်သည်။

၅ သိန်း ဆိုသည်မှာ တကယ်ကို အများကြီး၊ အများကြီးပင်။

စိတ်အေးသွားပြီးနောက် သူမက အခြားကိစ္စများကို အာရုံစိုက်ရန် စိတ်ကူးရသွားသည်။

ဘေးနားရှိ လျိုကွမ်းကို လှည့်ကြည့်လိုက်ပြီး ပြုံးကာ ပြောလိုက်သည်။"ငါ မှတ်မိသေးတယ်၊ နင် ခုနက ပြောလိုက်တာ... အကယ်၍ သခင်လေးထန်ကသာ တကျော့ပြန် နိုင်ရင် ဆေးပညာ ကွင်းပြင်ထဲမှာ ကိုယ်တုံးလုံး ပတ်ပြေးမယ် ဆိုလား"

"နင်လို ဆိုင်ရှင်ကြီးတစ်ယောက်က ပြောပြီးရင်တော့ စကားမတည်ဘဲ မနေဘူး မဟုတ်လား"

လျိုကွမ်း၏ မျက်နှာမှာ ချက်ချင်း တောင့်တင်းသွားသည်။ ထိုကဲ့သို့သော ကိစ္စမျိုးကို လူပုံအလယ်တွင် သူ မည်သို့ လုပ်နိုင်မည်နည်း။

စိတ်ထဲက လုပ်ချင်ရင်တောင် သူ့ရဲ့ အနာဂတ်ကို ငဲ့ရဦးမည် မဟုတ်ပါလော။

နောက်ဆုံးတွင် သူက အပြုံးအတုတစ်ခုကို မနည်းလုပ်ယူလိုက်ပြီး တိုးတိုးလေး ပြောလိုက်သည်။

"မန်ရှီး... အစ်မမန်ရှီး၊ ဒီလို မလုပ်ပါနဲ့ဟာ"

"ငါတို့က လုပ်ဖော်ကိုင်ဖက်တွေပဲဟာကို၊ ငါ့ရဲ့ အနာဂတ်ကို ဖျက်ဆီးမပစ်ပါနဲ့"

" ဒီ ခရစ်စတယ် ငါးထောင်ကို ငါ တောင်းပန်တယ်လို့ လက်ခံပေးပါ"

မန်ရှီးက အေးစက်စွာ နှာခေါင်းရှုံ့လိုက်ပြီး သူ့ကို လှည့်မကြည့်တော့သလို ခရစ်စတယ်များကိုလည်း လက်မခံပေ။

ခုနက လျိုကွမ်းသည် သူမ၏ အနာဂတ်ကို ငဲ့ကွက်ခဲ့ဖူးသလော

သူမက စိတ်နှလုံး ဖြူစင်လွန်းသည့် သူမျိုး မဟုတ်ပေ။

ထန်ထျန်း၏ ပြိုင်ပွဲပြီးဆုံးသည်နှင့် သူမက လျိုကွမ်းအား ဤမြို့တော်ကြီးတွင် လုံးဝ ခြေကုတ်ယူစရာ မရှိအောင် ပြုလုပ်ပေတော့မည်။

လျိုကွမ်းက မန်ရှီး၏ သဘောထားကို မြင်သောအခါ တစ်ခုခုကို ခန့်မှန်းမိသွားသည်။

သူက ရယ်ကျဲကျဲဖြင့် ခရစ်စတယ်များကို ပြန်သိမ်းလိုက်ပြီး ဆက်ကြည့်ရန် စိတ်မကူးတော့ဘဲ တိုက်ရိုက် ထွက်ခွာသွားတော့သည်။

မန်ရှီး၏ တိုက်ခိုက်မှုကို ရင်ဆိုင်ရန်အတွက် သူ အပြည့်အဝ ပြင်ဆင်ရပေဦးမည်။

လျိုကွမ်း ထွက်သွားသည့်အချိန်တွင်ပင် အထက်ရှိ ဒိုင်လူကြီးများ စင်မြင့်ထက်မှ ပြိုင်ပွဲ၏ ပထမဆုံး ပွဲစဉ် ရလဒ်များကို စတင်ကြေညာ လိုက်ကြတော့သည်။